གཉིས་པ་མདོ་བྱེ་བྲག་གི་འགྲེལ་བ།

གཉིས་པ་མདོ་བྱེ་བྲག་གི་འགྲེལ་བ་ཡོད་དེ།

སོ་སོར་ཐར་བའི་འགྲེལ་བ་འདུལ་བ་བསྡུས་པ་ཁྱད་པར་བཤེས་གཉེན་གྱིས་མཛད་པ་བམ་པོ་བཅོ་ལྔ་བ་དང༌། སློབ་དཔོན་དྲི་མེད་བཤེས་གཉེན་གྱིས་མཛད་པའི་སོ་སོར་ཐར་བའི་རྒྱ་ཆེར་འགྲེལ་བ་འདུལ་བ་ཀུན་ལས་བཏུས་པ་བམ་པོ་ལྔ་བཅུ་པ་དང༌། སློབ་དཔོན་དཔའ་བོས་མཛད་པའི་སོ་ཐར་གཞུང་འགྲེལ་དང༌། དཱ་ལ་ཤཱི་ལའི་ཚིག་གི་བརྗེད་བྱང༌། དགེ་ལེགས་བཤེས་གཉེན་གྱི་ཚིག་གི་དགའ་བསྐྱེད། སློབ་དཔོན་སྦྲང་མའི་རྐང་བུ་ཅན་གྱི་མའི་སོ་ཐར་གྱི་འགྲེལ་བ་དང༌། སོ་ཐར་གྱི་འགྲེལ་བ་གླང་བོ་ཆེའི་ཆུ་འཐུང་དུ་གྲགས་པ་ཆེ་ཆུང་གཉིས་དང་བརྒྱད་དོ། །དགེ་ལེགས་བཤེས་གཉེན་གྱིས་མཛད་པའི་གཞི་འགྲེལ་བསྒྱུར་འཕྲོ་ཅན་བམ་པོ་བཅུ་གཅིག་དང༌། དུལ་ལྷས་མཛད་པའི་རྣམ་འབྱེད་འགྲེལ་བ་བམ་པོ་བཅོ་ལྔ་བ་དང༌། དགེ་ལེགས་བཤེས་གཉེན་གྱིས་མཛད་པའི་གཞུང་བླ་མའི་བྱེ་བྲག་ལུང་ཞུ་བའི་འགྲེལ་བ་བསྒྱུར་འཕྲོ་ཅན་དང༌། སློབ་དཔོན་ཚུལ་ཁྲིམས་བསྐྱངས་ཀྱིས་མཛད་པའི་ཕྲན་ཚེགས་སྒོ་བརྒྱད་ཀྱི་འགྲེལ་བ་སོགས་ཡོད་དོ། །