རྟགས་ཡང་དག་གི་མཚན་ཉིད་བཤད་སྐབས་ཀྱི་དོགས་དཔྱོད།

རྟགས་ཡང་དག་གི་མཚན་ཉིད་བཤད་སྐབས་ཀྱི་དོགས་དཔྱོད།

རིག་པ་ཅན་གྱི་ལུགས་ལ་སྔ་མ་ལྡན་པའམ་རྒྱུ་རྟགས་ཡང་དག་འདོད་ཀྱང་རང་ལུགས་ལ་རྒྱུ་རྟགས་ཡང་དག་མི་འདོད་པར་ཐལ། འདོད་མི་ནུས་ཏེ། བྱས་པའི་རྒྱུ་དེ་དངོས་པོའི་རྒྱུར་གྱུར་པའི་སྒྲ་མི་རྟག་པར་སྒྲུབ་པའི་རྟགས་ཡང་དག་གང་ཞིག བསྒྲུབ་བྱའི་ཆོས་དེའི་རྒྱུ་གང་ཡིན་པ་རྟགས་སུ་བཀོད་པ་ཡིན་པའི་ཕྱིར། དང་པོ་མ་གྲུབ་ན། བྱས་པའི་རྒྱུ་ཆོས་ཅན། དངོས་པོའི་རྒྱུར་གྱུར་པའི་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པར་ཐལ། དངོས་པོའི་རྒྱུར་གྱུར་པའི་སྒྲ་མི་རྟག་པར་སྒྲུབ་པའི་རྟགས་གང་ཞིག དངོས་པོའི་རྒྱུར་གྱུར་པའི་སྒྲ་མི་རྟག་པར་སྒྲུབ་པའི་རྟགས་ལྟར་སྣང་གསུམ་པོ་གང་ཡང་མ་ཡིན་པའི་ཕྱིར། དང་པོ་སླ། ཕྱི་མ་དེར་ཐལ། དེ་སྒྲུབ་ཀྱི་མ་གྲུབ་པའི་རྟགས་མ་ཡིན་པ་གང་ཞིག འགལ་རྟགས་དང་མ་ངེས་པའི་རྟགས་གང་ཡང་མ་ཡིན་པའི་ཕྱིར། དང་པོ་གྲུབ་སྟེ། མ་གྲུབ་པའི་རྟགས་བཅུ་བཞིའམ་བཅོ་ལྔ་བོ་གང་ཡང་མ་ཡིན་པའི་ཕྱིར། གཉིས་པ་གྲུབ་སྟེ། བྱས་པའི་རྒྱུའི་རྟགས་ཀྱིས་དངོས་པོའི་རྒྱུར་གྱུར་པའི་སྒྲ་མི་རྟག་པར་སྒྲུབ་པར་བྱེད་པའི་ཁྱབ་པ་རྣལ་མ་ངེས་པ་གང་ཞིག དེ་སྒྲུབ་ཀྱི་འགལ་རྟགས་དང་མ་ངེས་པའི་རྟགས་གང་ཡིན་ཡང་ཁྱབ་པ་རྣལ་མ་མ་ངེས་དགོས་པའི་ཕྱིར། དེར་ཐལ། རང་ལུགས་རྟགས་རིགས་ལས། མ་ངེས་པའི་རྟགས་ཡིན་ན་རང་ཕྱོགས་ཆོས་ཅན་དུ་སོང་བའི་གང་ཟག་གིས་ཁྱབ་པ་རྣལ་མ་དང་ཕྱིན་ཅི་ལོག་གང་དུ་ཡང་མ་ངེས་པ་དགོས་པའི་ཕྱིར་རོ། །ཞེས་དང༌། འགལ་རྟགས་ཡིན་ན་རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་ཁྱབ་པ་ཕྱིན་ཅི་ལོག་ཏུ་ངེས་པ་དགོས་པའི་ཕྱིར་རོ། །ཞེས་གསུངས་པའི་ཕྱིར་ན། མཁས་པ་འགའ་ཞིག་གིས་རྟགས་དེ་རྟགས་ཆོས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་ཡིན་པར་གསུངས་ལ། ཡང་འགའ་ཞིག་གིས་ཐུན་མོང་གི་མ་ངེས་པའི་གཏན་ཚིགས་ལ་དངོས་ཀྱི་མ་ངེས་པའི་གཏན་ཚིགས་དང་ལྷག་ལྡན་གྱི་གཏན་ཚིགས་གཉིས་དང་དེ་གཉིས་གང་ཡང་མ་ཡིན་པའི་གཏན་ཚིགས་གསུམ་གསུངས་པ་ལས་ཕྱི་མ་དེ་ཡིན་པར་གསུངསཔས་རང་ལུགས་ལ་གང་འཐད་དཔྱད། ༈ ཡང་རིགས་གཏེར་རང་འགྲེལ་གྱི་ལུགས་ལ་རིག་པ་ཅན་གྱིས་ཚུལ་བཞི་བ་ཅན་གྱི་རྟགས་འདོད་པ་གསུངས་པ་མི་འཐད་པར་ཐལ། སྔ་མ་དང་ལྡན་པ་དང༌། ལྷག་མ་དང་ལྡན་པ་དང༌། སྤྱི་མཐོང་བ་སྟེ་གསུམ་ལས་མི་འདོད་པའི་ཕྱིར། མ་གྲུབ་ན། དེར་ཐལ། ཚད་མ་མདོའི་རང་འགྲེལ་ལས། རིག་པ་ཅན་ན་རེ། དེ་སྔོན་དུ་སོང་བ་ཅན་གྱི་རྗེས་སུ་དཔག་པ་ནི་གསུམ་སྟེ། སྔ་མ་དང་ལྡན་པ། ལྷག་མ་དང་ལྡན་པ་དང༌། སྤྱི་མཐོང་བ་ཅན་ནོ་ཞེས་ཟེར་རོ། །ཞེས་གསུངས་པའི་ཕྱིར། འདོད་ན། རིགས་གཏེར་ལུགས་ལ་ཕྱི་རོལ་རིག་པ་ཅན་གྱིས་རྟགས་གསུམ་ལས་མི་འདོད་པ་མི་འཐད་པར་ཐལ། རིག་པ་ཅན་དག་གིས་ཚུལ་བཞི་བ་ཅན་གྱི་རྟགས་འདོད་པའི་ཕྱིར། དེར་ཐལ། རིགས་གཏེར་རང་འགྲེལ་ལས། ཡང་རིག་པ་ཅན་པ་འགའ་ཞིག་ཆོས་ཅན་ལ་གྲུབ་པ་སྔ་མ་ཅན་དང༌། མཐུན་ཕྱོགས་ལ་ཡོད་པ་ལྷག་མ་ཅན་དང༌། མི་མཐུན་ཕྱོགས་ལ་མེད་པ་སྤྱི་མཐོང་བ། མངོན་སུམ་དངལུང་གཉིས་ཀྱིས་མི་གནོད་པ་འགལ་བ་མེད་པ་སྟེ་ཚུལ་བཞི། ཞེས་གསུངས་པའི་ཕྱིར་ན་དཔྱད། ༈ སློབ་དཔོན་དབང་ཕྱུག་སྡེའི་ལུགས་ལ་ཚུལ་དྲུག་པ་ཅན་གྱི་རྟགས་དེ་རྟགས་ཡང་དག་གི་མཚན་ཉིད་དང་དེ་ལས་རྟགས་ཚུལ་དང་པོ་ལ་ཕྱོགས་ཆོས་ཞེས་འདོད་པ་ཡིན་པར་ཐལ། འདོད་ན། སློབ་དཔོན་དབང་ཕྱུག་སྡེའི་ལུགས་ལ་རྟགས་ཚུལ་དང་པོར་ཕྱོགས་ཆོས་ཞེས་བཤད་པ་འཐད་པར་ཐལ། འདོད་ན། དེ་མི་འཐད་པར་ཐལ། སློབ་དཔོན་དབང་ཕྱུག་སྡེས་རྟགས་ཚུལ་དང་པོ་ལ་ཕྱོགས་ཆོས་ཞེས་བཤད་ན་དགོས་པ་མེད་པར་འདོད་པའི་ཕྱིར། དེར་ཐལ། སློབ་དཔོན་ཛྙ་ན་ཤྲཱིའི་རྣམ་ངེས་འགྲེལ་བཤད་ལས། འདིར་སློབ་དཔོན་དབང་ཕྱུག་སྡེ་ན་རེ། དགོས་པ་མེད་པའི་ཕྱིར་གདགས་པར་མི་བྱའོ་ཞེ་ན། ཞེས་གསུངས་པའི་ཕྱིར། འདོད་ན། སློབ་དཔོན་དབང་ཕྱུག་སྡེས་རྟགས་ཚུལ་དང་པོ་ལ་ཕྱོགས་ཆོས་ཞེས་བཤད་ན་དགོས་པ་མེད་པར་འདོད་པར་ཐལ། འདོད་ན། དེ་མི་འཐད་པར་ཐལ། སློབ་དཔོན་དབང་ཕྱུག་སྡེའི་ལུགས་ལ་ཚུལ་དྲུག་འདྲེན་པའི་ཚེ་ཚུལ་དང་པོར་ཕྱོགས་ཆོས་ཞེས་བགྲང་བའི་ཕྱིར། དེར་ཐལ། རང་ལུགས་རྟགས་རིགས་ལས། ཚུལ་དྲུག་ནི། ཕྱོགས་ཆོས་དང༌། མཐུན་ཕྱོགས་ལ་མཐོང་ཙམ་གྱིས་རྗེས་འགྲོ་དང༌། མི་མཐུན་ཕྱོགས་ལ་མ་མཐོང་བ་ཙམ་གྱིས་ལྡོག་པ་དང༌། དམ་བཅའ་ལ་ཚད་མས་གནོད་པ་མེད་པའི་ཡུལ་ཅན་དང༌། ལོག་ཕྱོགས་སྒྲུབ་བྱེད་ཀྱི་ཚད་མ་མེད་པའི་བརྗོད་པར་འདོད་པའི་གྲངས་གཅིག་པ་དང༌། ལྔ་བོ་དེ་བློ་ཡུལ་དུ་ངེས་པའི་ཤེས་པ་ཉིད་དང་དྲུག་གོ །ཞེས་གསུངས་པའི་ཕྱིར་ན་དཔྱད་དགོས་ལ་རྒྱསཔར་ཕྱོགས་སྒྲའི་སྐབས་སུ་དཔྱད་པར་འགྱུར་རོ། །༈ ཡང་སློབ་དཔོན་དབང་ཕྱུག་སྡེའི་ལུགས་ལ་ཚུལ་དྲུག་ཚང་བ་ཡིན་ན་རྟགས་ཡང་དག་ཡིན་པས་ཁྱབ་པར་ཐལ། འདོད་ན། གཞལ་བྱ་རྟག་པ་ལ་ཡོད་པར་མ་མཐོང་ཞིང་མི་རྟག་པ་ལ་མཐོང་ཙམ་གྱི་རྒོལ་བའི་ངོར་གཞལ་བྱ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པར་ཐལ། གཞལ་བྱའི་རྟགས་ཀྱིས་སྒྲ་མི་རྟག་པར་སྒྲུབ་པའི་ཚུལ་དྲུག་ཚང་བའི་ཕྱིར། དེར་ཐལ། ཕྱོགས་ཆོས་གང་ཞིག རྗེས་ཁྱབ་དང་ལྡོག་ཁྱབ་གཉིས་ཀྱང་གྲུབ། དམ་བཅའ་ལ་ཚད་མས་གནོད་པ་མེད། ལོག་ཕྱོགས་སྒྲུབ་བྱེད་ཀྱི་ཚད་མའང་མེད། ལྔ་བོ་དེ་བློ་ཡུལ་དུ་ངེས་པའི་ཤེས་པ་སྟེ་དྲུག་པོ་རེ་རེ་ནས་ཚང་བའི་ཕྱིར། རྟགས་གཉིས་པ་དང་གསུམ་པ་གཉིས་གྲུབ་སྟེ། རྟགས་གཞལ་བྱ་དེ་མཐུན་ཕྱོགས་མི་རྟག་པ་ལ་མཐོང་ཙམ་དང་མི་མཐུན་ཕྱོགས་རྟག་པ་ལ་མ་མཐོང་བ་ཙམ་གྲུབ་པའི་ཕྱིར། ཁྱབ་སྟེ། སློབ་དཔོན་དབང་ཕྱུག་སྡེའི་ལུགས་ལ་མཐུན་ཕྱོགས་ལ་མཐོང་ཙམ་གྱིས་རྗེས་ཁྱབ་དང༌། མི་མཐུན་ཕྱོགས་ལ་མ་མཐོང་བ་ཙམ་གྱིས་ལྡོག་ཁྱབ་གྲུབ་པར་འདོད་པའི་ཕྱིར། དེར་ཐལ། མཐུན་ཕྱོགས་མཐའ་དག་ལ་ཡོད་པ་དང་མི་མཐུན་ཕྱོགས་མཐའ་དག་ལ་མེད་པར་ངེས་དགོས་ན་ཚུར་མཐོང་སོ་སྐྱེས་རྣམས་ཀྱིས་རྗེས་ཁྱབ་དང་ལྡོག་ཁྱབ་གྲུབ་པར་མི་འགྱུར་བའི་ཕྱིར། མ་གྲུབ་ན། དེར་ཐལ། ལུང་འགལ་ལས། སློབ་དཔོན་དབང་ཕྱུག་སྡེ་ན་རེ། རྟགས་མི་མཐུན་ཕྱོགས་ལ་མ་མཐོང་བ་ཙམ་གྱིས་ལྡོག་ཁྱབ་གྲུབ་དགོས། གཞན་དུ་ན་མི་མཐུན་ཕྱོགས་མཐའ་དག་ལ་མེད་པར་ངེས་དགོས་ན་ཚུར་མཐོང་གིས་ལྡོག་ཁྱབ་གྲུབ་པ་དཀའ་བར་འདོད་དོ། །ཞེས་གསུངས་པའི་ཕྱིར། རྟགས་བཞི་བ་གྲུབ་སྟེ། དམ་བཅའ་སྒྲ་མི་རྟག་པ་ལ་ཚད་མས་གནོད་པ་མེད་པའི་ཡུལ་ཅན་དང་ལྡན་པའི་ཕྱིར། རྟགས་ལྔ་བ་གྲུབ་སྟེ། སྒྲ་མི་རྟག་པའི་ལོག་ཕྱོགས་སྒྲ་རྟག་པར་སྒྲུབ་པའི་ཚད་མའམརྟགས་ཡང་དག་མེད་པའི་ཕྱིར་རོ། །༈ སློབ་དཔོན་དབང་ཕྱུག་སྡེའི་ལུགས་ལ་རྟགས་ཡང་དག་ཡིན་ན་ཚུལ་དྲུག་ཚང་བ་ཡིན་པས་ཁྱབ་པར་ཐལ། འདོད་ན། གཞལ་བྱ་ཆོས་ཅན། ཁྱོད་གཞལ་བྱ་མི་རྟག་པ་ལ་མ་མཐོང་བའི་རྒོལ་བའི་ངོར་སྒྲ་རྟག་པར་སྒྲུབ་པའི་ཚུལ་དྲུག་ཚང་བ་ཡིན་པར་ཐལ། ཁྱོད་དེ་འདྲའི་རྒོལ་བའི་ངོར་སྒྲ་རྟག་པར་སྒྲུབ་པའི་རྟགས་ཡང་དག་ཡིན་པའི་ཕྱིར། མ་གྲུབ་ན། གཞལ་བྱ་ཆོས་ཅན། ཁྱོད་དེ་འདྲའི་རྒོལ་བའི་ངོར་སྒྲ་རྟག་པར་སྒྲུབ་པའི་རྟགས་ཡང་དག་ཡིན་པར་ཐལ། ཁྱོད་དེ་འདྲའི་རྒོལ་བའི་ངོར་སྒྲ་རྟག་པར་སྒྲུབ་པའི་ཕྱོགས་ཆོས་དང་ལྡོག་ཁྱབ་ཡིན་པའི་ཕྱིར། ཁྱབ་སྟེ། རྣམ་འགྲེལ་རིན་འཕྲེང་ལས། རྟགས་ཡང་དག་ཏུ་ཐལ། དེ་ཡི་ཕྱོགས་ཆོས་དང་ལྡོག་ཁྱབ་ཡིན་པས་སོ། །ཞེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། དེ་སྒྲུབ་ཕྱོགས་ཆོས་ཀྱི་གྲུབ་པ་སླ་ཞིང༌། དེ་སྒྲུབ་ཀྱི་ལྡོག་ཁྱབ་གྲུབ་པའི་ཕྱིར། དེར་ཐལ། དེ་འདྲའི་རྒོལ་བས་རྟགས་དེ་དེ་སྒྲུབ་ཀྱི་མི་མཐུན་ཕྱོགས་ལ་མ་མཐོང་བ་ཙམ་ཡིན་པའི་ཕྱིར། ཁྱབ་སྟེ། སློབ་དཔོན་དབང་ཕྱུག་སྡེའི་ལུགས་ལ་ལྡོགཁྱབ་ཀྱི་དོན་ལ་རྟགས་དེ་མི་མཐུན་ཕྱོགས་ལ་མ་མཐོང་བ་ཙམ་དེ་འཇོག་དགོས་པའི་ཕྱིར། ༈ རང་ལུགས་ལ་ཚུལ་གསུམ་ཡིན་པ་རྟགས་ཡང་དག་གི་མཚན་ཉིད་ཡིན་པར་ཐལ། འདོད་ན། རྟགས་ཡང་དག་ཡིན་ན་ཚུལ་གསུམ་ཡིན་པས་ཁྱབ་པར་ཐལ། ཚུལ་གསུམ་ཡིན་པ་རྟགས་ཡང་དག་གི་མཚན་ཉིད་ཡིན་པའི་ཕྱིར། འདོད་ན། བྱས་པ་ཆོས་ཅན། ཚུལ་གསུམ་ཡིན་པར་ཐལ། རྟགས་ཡང་དག་ཡིན་པའི་ཕྱིར། འདོད་ན། བྱས་པ་ཆོས་ཅན། རྗེས་ཁྱབ་དང་ལྡོག་ཁྱབ་གཉིས་ཀ་ཡིན་པར་ཐལ། ཚུལ་གསུམ་ཡིན་པའི་ཕྱིར། འདོད་ན། རྗེས་ཁྱབ་དང་ལྡོག་ཁྱབ་གཉིས་ཀའི་ཡིན་པ་ཡོད་པར་ཐལ། བྱས་པ་དེ་རྗེས་ཁྱབ་དང་ལྡོག་ཁྱབ་གཉིས་ཀ་ཡིན་པའི་ཕྱིར། འདོད་ན། དེ་མི་འཐད་པར་ཐལ། རྗེས་ཁྱབ་དང་ལྡོག་ཁྱབ་གཉིས་འགལ་བ་ཡིན་པའི་ཕྱིར། དེར་ཐལ། རིགས་ཐིགས་ལས། རྗེས་སུ་འགྲོ་བ་དང་ལྡོག་པ་དག་ནི་ཕན་ཚུན་རྣམ་པར་གཅོད་པའི་འགལ་བའོ། །ཞེས་དང༌། རྣམ་ངེས་ལས། འོ་ན་རྟགས་ཚུལ་གཉིས་པར་འགྱུར་རོ་ཞེ་ན་མ་ཡིན་ཏེ། རྗེས་སུ་འགྲོ་བ་དང༌། ལྡོག་པ་དག་ཕན་ཚུན་ཐ་དད་པའི་ཕྱིར་རོ། །ཞེས་གསུངས་པའི་ཕྱིར། འདོད་ན། རྗེས་ཁྱབ་དང་ལྡོག་ཁྱབ་གཉིས་ཀྱི་ཡིན་པ་མེད་པར་ཐལ། རྗེས་ཁྱབ་དང་ལྡོག་ཁྱབ་འགལ་བ་ཡིན་པའི་ཕྱིར། འདོད་ན། ཚུལ་གསུམ་གྱི་ཡིན་པ་མེད་པར་ཐལ། རྗེས་ཁྱབ་དང་ལྡོག་ཁྱབ་གཉིས་ཀྱི་ཡིན་པ་མེད་པའི་ཕྱིར། འདོད་ན། བྱས་པ་ཆོས་ཅན། ཚུལ་གསུམ་མ་ཡིན་པར་ཐལ། ཚུལ་གསུམ་གྱི་ཡིན་པ་མེད་པའི་ཕྱིར། འདོད་ན། བྱས་པ་ཆོས་ཅན། ཚུལ་གསུམ་ཡིན་པར་ཐལ། རྟགས་ཡང་དག་ཡིན་པའི་ཕྱིར། ཁྱབ་སྟེ། ཚུལ་གསུམ་ཡིན་པ་རྟགས་ཡང་དག་གི་མཚན་ཉིད་ཡིན་པའི་ཕྱིར། དེར་ཐལ། རྣམ་འགྲེལ་རིན་འཕྲེང་ལས། ཚུལ་གསུམ་རྟགས་ཡང་དག་གི་མཚན་ཉིད་ཡིན་ཏེ། རྣམ་འཇོག་ཡིན་པས་སོ། །ཞེས་དང༌། རང་ལུགས་རྟགས་རིགས་མཐའ་དཔྱོད་ལས། ཚུལ་གསུམ་ཡིན་པ་རྟགས་ཡང་དག་གི་མཚན་ཉིད་ཡིན་ཏེ། ཞེས་གསུངས་པའི་ཕྱིར། གོང་གི་མ་ཁྱབ་མཚམས་ཀྱི་རྟགས་གྲུབ་སྟེ། གཞི་གྲུབ་པའི་ཕྱིར། ཁྱབ་སྟེ། བསྡུས་གྲྭའི་ཟུར་དཔྱད་ཉིན་བྱེད་སྣང་བ་ལས། ཚུལ་གསུམ་ཡིན་པ་མ་ཡིན་པའི་ཆོས་གཅིག་ཀྱང་མེད་པའི་ཕྱིར། དེར་ཐལ། གཞི་གྲུབ་ན་རྟགསཡང་དག་ཡིན་པས་ཁྱབ་པའི་ཕྱིར་རོ། །ཞེས་གསུངས་པའི་ཕྱིར་ན་དཔྱད། ༈ ཡང་རིགས་སྒོའི་སྐབས་སུ་རྟགས་ཡང་དག་གི་མཚན་ཉིད་ལ་ཚུལ་གསུམ་ཚང་བ་དེ་བཞག་པ་ཡིན་པར་ཐལ། འདོད་ན། དེ་སྒྲུབ་ཀྱི་ཚུལ་གསུམ་ཚང་བ་དེ་སྒྲུབ་ཀྱི་རྟགས་ཡང་དག་གི་མཚན་ཉིད་ཡིན་པར་ཐལ། ཚུལ་གསུམ་ཚང་བ་རྟགས་ཡང་དག་གི་མཚན་ཉིད་ཡིན་པ་གང་ཞིག དེ་གཞི་ལ་སྦྱོར་ཚུལ་ཡོད་པའི་ཕྱིར། འདོད་ན། དེ་སྒྲུབ་ཀྱི་ཚུལ་གསུམ་ཚང་བ་ཡོད་ན་དེ་སྒྲུབ་ཀྱི་རྟགས་ཡང་དག་ཡོད་པས་ཁྱབ་པར་ཐལ། དེ་སྒྲུབ་ཀྱི་ཚུལ་གསུམ་ཚང་བ་དེ་དེ་སྒྲུབ་ཀྱི་རྟགས་ཡང་དག་གི་མཚན་ཉིད་ཡིན་པའི་ཕྱིར། འདོད་ན། སྒྲ་རྟག་པར་སྒྲུབ་པའི་རྟགས་ཡང་དག་ཡོད་པར་ཐལ། སྒྲ་རྟག་པར་སྒྲུབ་པའི་ཚུལ་གསུམ་ཚང་བ་ཡོད་པའི་ཕྱིར། མ་གྲུབ་ན། སྒྲ་རྟག་པར་སྒྲུབ་པའི་ཚུལ་གསུམ་ཚང་བ་ཡོད་པར་ཐལ། སྒྲ་རྟག་པར་སྒྲུབ་པའི་ཕྱོགས་ཆོས་ཡོད་པ་གང་ཞིག སྒྲ་རྟག་པར་སྒྲུབ་པའི་རྗེས་ཁྱབ་དང་ལྡོག་ཁྱབ་གཉིས་ཀྱང་ཡོད་པའི་ཕྱིར། རྟགས་དང་པོ་མ་གྲུབ་ན། སྒྲ་རྟག་པར་སྒྲུབ་པའི་ཕྱོགས་ཆོས་ཡོད་པར་ཐལ། བྱས་པ་དེ་ཡིན་པའི་ཕྱིར། མ་གྲུབ་ན། བྱས་པ་ཆོས་ཅན། སྒྲ་རྟག་པར་སྒྲུབ་པའི་ཕྱོགས་ཆོས་ཡིན་པར་ཐལ། སྒྲ་རྟག་པར་སྒྲུབ་པའི་འགལ་རྟགས་ཡིན་པའི་ཕྱིར། ཁྱབ་སྟེ། གཏན་ཚིགས་དོན་བསྡུས་ལས། འགལ་མ་ངེས་མ་གྲུབ་གསུམ་སྟེ། མཚན་ཉིད་ནི་རིམ་པ་ལྟར། ཕྱོགས་ཆོས་གང་ཞིག རྗེས་སུ་འགྲོ་ལྡོག་ཕྱིན་ཅི་ལོག་ཏུ་ངེས་པ། ཞེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། ཕྱོགས་ཆོས་འཁོར་ལོ་ལས། སྟེང་འོག་གཉིས་ལ་ཡང་དག་གཉིས། །ལོགས་གཉིས་འགལ་བ་གཉིས་ཡིན་ཏེ། །ཞེས་གསུངས་པའི་ཕྱིར། གོང་གི་རྟགས་གཉིས་པ་མ་གྲུབ་ན། སྒྲ་རྟག་པར་སྒྲུབ་པའི་རྗེས་ཁྱབ་དང་ལྡོག་ཁྱབ་གཉིས་ཀ་ཡོད་པར་ཐལ། འདུས་མ་བྱས་ཀྱི་ཆོས་དེ་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ཆོས་ཆོས་ཅན། སྒྲ་རྟག་པར་སྒྲུབ་པའི་རྗེས་ཁྱབ་ཡིན་པར་ཐལ། སྒྲ་རྟག་པར་སྒྲུབ་པའི་བསྒྲུབ་བྱའི་ཆོས་རྟག་པ་དང་འབྲེལ་ཞིང༌། སྒྲ་རྟག་པར་སྒྲུབ་པའི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པར་ངེས་པའི་གཏན་ཚིགས་ཡིན་པའི་ཕྱིར། ཟུར་དང་པོ་དེར་ཐལ། འདུས་མ་བྱས་ཀྱི་ཆོས་དེ་རྟག་པ་དང་ཐ་དད་གང་ཞིག རྟག་པ་ལྡོག་ན་འདུས་མ་བྱས་ཀྱི་ཆོས་དེ་ལྡོག་པས་ཁྱབ་པའི་ཕྱིར། གོང་གི་ཟུར་གཉིས་པ་དེར་ཐལ། འདུས་མ་བྱས་ཀྱི་ཆོས་དེ་སྒྲ་རྟག་པར་སྒྲུབ་པར་བྱེད་པའི་འགལ་རྟགས་དང་མ་ངེས་པའི་རྟགས་གང་ཡང་མ་ཡིན་པའི་ཕྱིར། ཁྱབ་སྟེ། དེ་སྒྲུབ་ཀྱི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པར་ངེས་པ་ཞེས་པའི་ཚིག་གིས་འགལ་རྟགས་དང་མ་ངེས་པའི་གཏན་ཚིགས་རྣམས་སེལ་བ་ཡིན་པའི་ཕྱིར། དེར་ཐལ། རྟགས་རིགས་མཐའ་དཔྱོད་ལས། ཟུར་དང་པོས་འགལ་རྟགས་དང༌། ཟུར་གཉིས་པས་དངོས་ཀྱི་མ་ངེས་པ་དང༌། ཟུར་གསུམ་པས་འགལ་བ་ལྷག་ལྡན་དང༌། ཐུན་མོང་མ་ཡིན་པའི་མ་ངེས་པ་དང༌། ཟུར་བཞི་བས་ཡང་དག་ལྷག་ལྡན་གྱི་མ་ངེས་པ་རྣམས་སེལ་བ་ཡིན་པའི་ཕྱིར། ཞེས་གསུངས་པའི་ཕྱིར། འདོད་ན། སྒྲ་རྟག་པར་སྒྲུབ་པའི་ཚུལ་གསུམ་ཚང་བ་ཡོད་པར་ཐལ། སྒྲ་རྟག་པར་སྒྲུབ་པའི་ཕྱོགས་ཆོས་དང༌། སྒྲ་རྟག་པར་སྒྲུབ་པའི་རྗེས་ཁྱབ་དང་ལྡོག་ཁྱབ་གཉིས་ཀྱང་ཡོད་པའི་ཕྱིར། རྟགས་རེ་རེ་ནས་ཁས། འདོད་ན། སྒྲ་རྟག་པར་སྒྲུབ་པའི་རྟགས་ཡང་དག་ཡོད་པར་ཐལ། སྒྲ་རྟག་པར་སྒྲུབ་པའི་ཚུལ་གསུམ་ཚང་བ་ཡོད་པའི་ཕྱིར། རྟགས་ཁྱབ་ཁས། འདོད་ན། སྒྲ་ཆོས་ཅན། ཁྱོད་རྟག་པ་ཡིན་པར་ཐལ། ཁྱོད་རྟག་པརསྒྲུབ་པའི་རྟགས་ཡང་དག་ཡོད་པའི་ཕྱིར་ན་དཔྱད། ༈ རང་ལུགས་ལ་ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་དེ་རྟགས་ཡང་དག་གི་མཚན་ཉིད་ཡིན་པར་ཐལ། གཏན་ཚིགས་དོན་བསྡུས་ལས། དབྱེ་ན་རྟགས་ཡང་དག་དང་ལྟར་སྣང་གཉིས་སོ། །མཚན་ཉིད་ནི་རིམ་པ་ལྟར། ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་དང༌། རྟགས་སུ་བཀོད་ཅིང་ཚུལ་གསུམ་མ་ཚང་བའོ། །ཞེས་གསུངས་པའི་ཕྱིར། འདོད་ན། སྒྲ་མི་རྟག་པར་སྒྲུབ་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་ཡིན་ན་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པས་ཁྱབ་པར་ཐལ། འདོད་ན། གཞལ་བྱ་ཆོས་ཅན། སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པར་ཐལ། སྒྲ་མི་རྟག་པར་སྒྲུབ་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་ཡིན་པའི་ཕྱིར། མ་གྲུབ་ན། གཞལ་བྱ་སྒྲ་མི་རྟག་པར་སྒྲུབ་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་ཡིན་པར་ཐལ། སྒྲ་མི་རྟག་པར་སྒྲུབ་པའི་ཚུལ་གསུམ་ཆོས་ཅན། ཚད་མའི་སྟོབས་ཀྱིས་ངེས་པ་ཡིན་ཏེ། གཞལ་བྱ་ཡིན་པའི་ཕྱིར་ཞེས་བཀོད་པ་ན། གཞལ་བྱ་དེ་དེ་སྒྲུབ་ཀྱི་གཏན་ཚིགས་ཡིན་པ་གང་ཞིག དེའི་བསྒྲུབ་བྱ་ལ་སྒྲ་མི་རྟག་པར་སྒྲུབ་པའི་ཚུལ་གསུམ་ཚད་མའི་སྟོབས་ཀྱིས་ངེས་པ་དེ་འཇོག་དགོས་པའི་ཕྱིར། ཁྱབ་སྟེ། གཞལ་བྱ་དེ་དེ་སྒྲུབ་ཀྱི་རྟགས་དང་སྒྲ་མི་རྟག་པ་དེ་སྒྲུབ་ཀྱི་བསྒྲུབ་བྱ་ལ་འཇོག་ན་གཞལ་བྱ་སྒྲ་མི་རྟག་པར་སྒྲུབ་པའི་གཏན་ཚིགས་སུ་འཇོག་དགོས་པའི་ཕྱིར། འདོད་ན། གཞལ་བྱ་ཆོས་ཅན། སྒྲ་མི་རྟག་པར་སྒྲུབ་པའི་ཚུལ་གསུམ་ཚད་མའི་སྟོབས་ཀྱིས་ངེས་པར་སྒྲུབ་པར་བྱེད་པའི་གཏན་ཚིགས་ཡིན་པར་ཐལ། འདོད་ན། གཞལ་བྱ་ཆོས་ཅན། སྒྲ་མི་རྟག་པར་སྒྲུབ་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་ཡིན་པར་ཐལ། སྒྲ་མི་རྟག་པར་སྒྲུབ་པའི་ཚུལ་གསུམ་ཚད་མའི་སྟོབས་ཀྱིས་ངེས་པར་སྒྲུབ་པའི་གཏན་ཚིགས་ཡིན་པའི་ཕྱིར། ཁྱབ་སྟེ། སྒྲ་མི་རྟག་པར་སྒྲུབ་པར་བྱེད་པའི་གཏན་ཚིགས་ཡིན་ན་སྒྲ་མི་རྟག་པའི་གཏན་ཚིགས་ཡིན་དགོས་པའི་ཕྱིར། འདོད་ན། གཞལ་བྱ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་ཡིན་པའི་ཕྱིར། འདོད་མི་ནུས་ཏེ། གཞལ་བྱ་དེ་སྒྲ་མི་རྟག་པར་སྒྲུབ་པར་བྱེད་པའི་མ་ངེས་པའི་གཏན་ཚིགས་ཡིན་པའི་ཕྱིར། དེར་ཐལ། གཏན་ཚིགས་འཁོར་ལོ་ལས། ཟུར་བཞི་དངོས་ཀྱི་མ་ངེས་པ། །ཞེསགསུངས་པའི་ཕྱིར་ན་དཔྱད། ༈ ཡང་སངས་རྒྱས་འཕགས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་ཡིན་པའི་ཕྱིར། མ་གྲུབ་ན། སངས་རྒྱས་འཕགས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གང་ཟག་ཡིན་པའི་ཕྱིར། མ་གྲུབ་ན། སངས་རྒྱས་འཕགས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གང་ཟག་ཡིན་པར་ཐལ། ཆོས་ཐམས་ཅད་ཚད་མའི་སྟོབས་ཀྱིས་ངེས་པའི་གང་ཟག་ཡིན་པའི་ཕྱིར། དེར་ཐལ། ཆོས་ཐམས་ཅད་རྟོགས་པའི་གང་ཟག་ཡིན་པའི་ཕྱིར། འདོད་ན། སངས་རྒྱས་འཕགས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གང་ཟག་ཡིན་པའི་རྒྱུ་མཚན་འཐད་པའི་ཕྱིར། འདོད་ན། སངས་རྒྱས་འཕགས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་ཡིན་པའི་ཕྱིར། ཁྱབ་སྟེ། གཏན་ཚིགས་དོན་བསྡུས་ལས། རྟགས་ཡང་དག་དང་ལྟར་སྣང་གཉིས་སོ། །མཚན་ཉིད་ནི་རིམ་པ་ལྟར། ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས། ཞེས་གསུངས་པའི་ཕྱིར་ན་དཔྱད། ༈ ཡང་རྟགས་ཡང་དག་ཡིན་ན་ཚུལ་གསུམ་ཡིན་པས་ཁྱབ་པར་ཐལ། ཚུལ་གསུམ་ཡིན་པ་རྟགས་ཡང་དག་གི་མཚན་ཉིད་ཡིན་པའི་ཕྱིར། འདོད་ན། རི་བོང་རྭ་ཆོས་ཅན། ཚུལ་གསུམ་ཡིན་པར་ཐལ། རྟགས་ཡང་དག་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། རྟགས་ཡང་དག་ཡིན་པར་ཐལ། རྟགས་ཡང་དག་ཏུ་བཀོད་པ་ཡིན་པའི་ཕྱིར། དེར་ཐལ། རི་བོང་རྭ་རྟགས་ཡང་དག་ཏུ་བཀོད་འདོད་པའི་རྒོལ་བ་ཡོད་པའི་ཕྱིར། ཁྱབ་སྟེ། ཆོས་དེ་བསྒྲུབ་བྱར་བཀོད་འདོད་པའི་རྒོལ་བ་ཡོད་ན་ཆོས་དེ་བསྒྲུབ་བྱར་བཟུང་བས་ཁྱབ་པའི་ཕྱིར། དེར་ཐལ། རྣམ་འགྲེལ་ལས། སྒྲ་ནི་བརྗོད་འདོད་རྗེས་འབྲང་ཕྱིར། །ཞེས་དང༌། རྣམ་འགྲེལ་རིན་འཕྲེང་ལས། འཕངས་པའི་ཞེ་འདོད་ཀྱི་བསྒྲུབ་བྱ་ཡིན་ན་བསྒྲུབ་བྱར་འདོད་དགོས་ཞེས་སྟོན་པས་སོ། །ཞེས་གསུངས་པའི་ཕྱིར། འདོད་ན། རི་བོང་རྭ་ཆོས་ཅན། རྟགས་ཡང་དག་ཡིན་པར་ཐལ། རྟགས་ཡང་དག་ཏུ་བཀོད་པ་ཡིན་པའི་ཕྱིར། ཁྱབ་སྟེ། རྟགས་སུ་བཀོད་པ་ཡིན་ན་རྟགས་ཡིན་པས་ཁྱབ་པ་གང་ཞིག རིགས་པ་མཚུངས་པའིཕྱིར་ན་དཔྱད། ༈ ཡང་སྒྲུབ་པར་བྱེད་པ་དང༌། ཤེས་པར་བྱེད་པ་དང༌། གཏན་ཚིགས་རྣམས་མིང་གི་རྣམ་གྲངས་ཡིན་པར་ཐལ། འདོད་ན། གཏན་ཚིགས་ཡིན་ན་ཤེས་པར་བྱེད་པ་ཡིན་པས་ཁྱབ་པར་ཐལ། དེ་གཉིས་མིང་གི་རྣམ་གྲངས་ཡིན་པའི་ཕྱིར། འདོད་ན། དངོས་པོ་ཆོས་ཅན། ཤེས་པར་བྱེད་པ་ཡིན་པར་ཐལ། གཏན་ཚིགས་ཡིན་པའི་ཕྱིར། འདོད་ན། དངོས་པོ་ཆོས་ཅན། མཚན་ཉིད་ཡིན་པར་ཐལ། ཤེས་པར་བྱེད་པ་ཡིན་པའི་ཕྱིར། ཁྱབ་སྟེ། ཤེས་པར་བྱེད་པ་དང་མཚན་ཉིད་གཉིས་མིང་གི་རྣམ་གྲངས་ཡིན་པའི་ཕྱིར། དེར་ཐལ། ཆོས་རྗེ་ཉ་དབོན་པའི་དྲིས་ལན་ཡིད་ཀྱི་མུན་སེལ་ལས། ཤེས་པར་བྱེད། གོ་བར་བྱེད། རྟོགས་པར་བྱེད་པས་མཚན་ཉིད་ཅེས་པའི་བརྡ་བྱས་པ་ཡིན། ཞེས་གསུངས་པའི་ཕྱིར། འདོད་ན། དངོས་པོ་ཆོས་ཅན། མཚན་ཉིད་ཡིན་པར་ཐལ། ཤེས་པར་བྱེད་པ་ཡིན་པའི་ཕྱིར། དེར་ཐལ། གཏན་ཚིགས་ཡིན་པའི་ཕྱིར། ཁྱབ་སྟེ། ཐར་འབྱུང་སྦས་པའི་རྟོག་གེའི་སྐད་ལས། སྒྲུབ་པར་བྱེད་པ་དང༌། ཤེས་པར་བྱེད་པ་དང༌། གཏན་ཚིགས་དང༌། ཁྱབཔར་བྱ་བ་ཞེས་པ་རྟགས་ཀྱི་མིང་གཞན་རྣམས་སོ། །ཞེས་གསུངས་པའི་ཕྱིར་ན་དཔྱད། ༈ གཞན་ཡང་དངོས་པོ་ཆོས་ཅན། མཚན་ཉིད་ཡིན་པར་ཐལ། མཚོན་བྱེད་ཡིན་པའི་ཕྱིར། དེར་ཐལ། རྟགས་ཡིན་པའི་ཕྱིར། ཁྱབ་སྟེ། དུལ་བ་ལྷའི་འགྲེལ་བ་སློབ་ཕན་ལས། འདིས་མཚོན་པར་བྱེད་པས་ན་རྟགས་སོ། །ཞེས་གསུངས་པའི་ཕྱིར། འདོད་ན། དངོས་པོ་ཆོས་ཅན། མཚོན་བྱེད་ཡིན་པར་ཐལ། འདོད་ན། དངོས་པོ་ཆོས་ཅན། མཚན་ཉིད་ཡིན་པར་ཐལ། མཚོན་བྱེད་ཡིན་པའི་ཕྱིར། ཁྱབ་སྟེ། ཆོས་རྗེ་ཉ་དབོན་པའི་དྲིས་ལན་ལས། དེ་བཞིན་དུ་མཚོན་པར་བྱེད་པས་མཚན་ཉིད་དེ། མཚོན་ཞེས་པ་གོ་བའམ་རྟོགས་སམ་ཤེས་ཟེར་བའི་དོན་ཡིན། ཞེས་གསུངས་པའི་ཕྱིར་ན་དཔྱད།