སྒྲུབ་པའི་ཐབས་རིན་ཆེན་འབྱུང་གནས་ལས་ཐོག་མར་དགེ་བའི་དོན་དུ་ཉེར་མཁོ་སྒྲུབ་ཐབས་འགའ་ཞིག་བཤད་པའི་སྐབས་ཏེ་གཉིས་པའོ།
རྗེ་བཙུན་མ་འཕགས་མ་སྒྲོལ་མ་དཀར་མོ་ཡིད་བཞིནའཁོར་ལོའི་བསྙེན་སྒྲུབ་ཀྱི་ལག་ལེན་མཆོག་ཏུ་གསལ་བ་བདུད་རྩིའི་བུམ་བཟང་།
རྗེ་བཙུན་མ་འཕགས་མ་སྒྲོལ་མ་དཀར་མོ་ཡིད་བཞིནའཁོར་ལོའི་བསྙེན་སྒྲུབ་ཀྱི་ལག་ལེན་མཆོག་ཏུ་གསལ་བ་བདུད་རྩིའི་བུམ་བཟང་ཞེས་བྱ་བ་བཞུགས་སོ། །ན་མོ་ཨཱརྻ་ཏཱ་རེ། རབ་དཀར་ལྷུན་སྡུག་རི་དབང་ཀེ་ལ་ཤར། །རབ་མཛེས་ཟླ་ཞུན་འཁྱིལ་བའི་དཔལ་མངའ་བ། །འཆི་མེད་བདུད་རྩིའི་འབྱུང་གནས་བདུད་རྩིའི་འོད། །འཆི་བདག་གཡུལ་ངོ་བཟློག་མཛད་མྱུར་ཞིང་དཔའ། །འཕགས་མ་སྒྲོལ་མ་དེ་ལ་ནི། །མཆོག་ཏུ་དང་བས་ཕྱག་བགྱིས་ཏེ། །དེའི་སྒྲུབ་ཐབས་ཡན་ལག་བཅས། གོ་བདེ་གསལ་བའི་ཚིག་གིས་བརྗོད། །འདིར་འཆི་མེད་ལྷ་མོ་ཡིད་བཞིན་འཁོར་ལོའི་སྒྲུབ་ཐབས་ཉམས་སུ་ལེན་པ་ལ་གཉིས་ཏེ། མཉམ་པར་བཞག་པའི་རྣལ་འབྱོར་དང༌། ཐུབ་མཚམས་ཀྱི་བྱ་བའོ། །དང་པོ་ལ། ལྷའི་རྣལ་འབྱོར་དང༌། བཟླས་པའི་རྣལ་འབྱོར་དང༌། རྗེས་ཀྱི་བྱ་བའོ། །དང་པོ་ལ། སྔོན་འགྲོ་དང་དངོས་གཞི་གཉིས་ལས། སྔོན་འགྲོ་ལ་ཐུན་མོང་དང་ཐུན་མོང་མ་ཡིན་པའི་སྔོན་འགྲོའོ། །དང་པོ་ནི། སྐྱབས་འགྲོ་སེམས་བསྐྱེད་དེ། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ༴ རྫོགས་པའི་སངས་རྒྱས་བཅོམ་ལྡན་འདས་རྣམས་ལ༴ དམ་པའི་ཆོས་རྣམས་ལ༴ འཕགས་པའི་དགེ་འདུན་རྣམས་ལ༴ ལན་གསུམ་ལ་སོགས་པས་སྐྱབས་སུ་འགྲོའོ། །སེམས་ཅད་ཐམས་ཅད་ཀྱི་དོན་དུ་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་མྱུར་དུ་ཐོབ་པར་བྱ། དེའི་ཕྱིར་དུ་རྗེ་བཙུན་མ་འཕགས་མ་སྒྲོལ་མ་དཀར་མོ་ཡིད་བཞིན་འཁོར་ལོའི་སྒོམ་བཟླས་ལ་འཇུག་
པར་བགྱིའོ། །ལན་གསུམ་གྱིས་སེམས་བསྐྱེད། སྔར་ཡང་སྐྱབས་འགྲོ་སེམས་བསྐྱེད་མདོར་བསྡུས་སུ་བཟུང་བ་ནི། སངས་རྒྱས་ཆོས་དང་ཚོགས་ཀྱི་མཆོག་བཅས་ལ། ཞེས་སོགས་ལན་གསུམ་བརྗོད། གཉིས་པ་ཐུན་མོང་མ་ཡིན་པའི་སྔོན་འགྲོ་ལ། བསོད་ནམས་ཚོགས་བསོག་དང༌། ཡེ་ཤེས་ཚོགས་གསོག་གོ །དང་པོ་ནི། རང་གི་སྙིང་གར་ཟླ་བའི་སྟེང་དུ་ཏཱཾཿདཀར་པོ། དེ་ལས་འོད་ཟེར་འཕྲོས། མདུན་གྱི་ནམ་མཁའི་སྟེང་གི་ཆ་ལ་རྩ་བའི་བླ་མ་འོད་དཔག་ཏུ་མེད་པའི་རྣམ་པ་ཅན་ལ་བརྒྱུད་པའི་བླ་མའི་ཚོགས་ཀྱིས་བསྐོར་བ། འོག་གི་ཆ་ལ་རྗེ་བཙུན་མ་འཕགས་མ་སྒྲོལ་མ་དཀར་མོ་སངས་རྒྱས་བྱང་ཆུབ་སེམས་དཔའི་ཚོགས་ཐམས་ཅད་དང་བཅས་པ་ཨོཾ་བཛྲ་ས་མཱ་ཛཿ པདྨ་ཀ་མ་ལ་ཡ་སྟྭཾ། ན་མོ་གུ་རུ་བྷྱཿ ན་མ་ཨཱཪྱ་ཏཱ་རེ་ས་པ་རི་ཝཱ་ར་མཎྜ་ལ་བྷྱཿ གང་གི་དྲིན་གྱི་བདེ་ཆེན་ཉིད། །ཞེས་པ་ནས། བར་ལ་བདུད་དང༌། དུས་གསུམ་སངས་རྒྱས་བསྐྱེད་པའི་ཡུམ། །འཆི་མེད་ཚེ་ཡི་དཔལ་སྦྱིན་མ། །འདོད་པ་ཐམས་ཅད་རབ་སྩོལ་བའི། །སྒྲོལ་མ་ལྷ་ཚོགས་བཅས་ལ་འདུད། །ཨོཾ་ཨཱཪྱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ཨརྒྷཾ་གྱི་སར་པཱདྱཾ་སྦྱར། ཨོཾ་ཨཱཪྱ་ཏཱ་རེ་ས་པ་རི་ཝཱ་ར་བཛྲ་པུཥྤེ་ཨཱཿཧཱུཾ། དེ་བཞིན་དུ། དྷུ་པེ། ཨཱ་ལོ་ཀེ གནྡྷེ། ནཻ་ཝེ་ཏེ། ཤཔྟ་ཨཱཿཧཱུཾ། དོན་ཡིད་ལ་དྲན་བཞིན་པའི་སྒོ་ནས། དཀོན་མཆོག་གསུམ་ལ་བདག་སྐྱབས་མཆི། །ཞེས་པ་ནས། སངས་རྒྱས་འགྲུབ་པར་ཤོག །ལན་གསུམ། ཨོཾ་བཛྲ་མུཿ ཞེས་གཤེགས་སུ་གསོལ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་
གྱུར་ཅིག སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིགཉེ་རིང་ཆགས་སྡང་དང་བྲལ་བའི་བཏང་སྙོམས་ཚད་མེད་པ་ལ་གནས་པར་གྱུར་ཅིག །ཅེས་བརྗོད།གཉིས་པ་ཡེ་ཤེས་ཀྱི་ཚོགས་གསོག་པ་ནི། ཆོས་ཐམས་ཅད་རང་གི་སེམས་ཙམ་དང༌། སེམས་ཉིད་གསལ་སྟོང་ཟུང་འཇུག་ཆུ་ཟླ་ལྟ་བུ་ལ་མཉམ་པ་བཞག་སྟེ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད། གཉིས་པ་དངོས་གཞི་ལ་ལྔ་སྟེ། དམ་ཚིག་པ་བསྐྱེད་པ། ཡི་གེ་བཀོད་པ། ཡེ་ཤེས་པ་བསྟིམ་པ། དབང་བསྐུར་རྒྱས་བཏབ། མཆོད་ཅིང་བསྟོད་པའོ། །དང་པོ་ནི། སྟོང་པའི་ངང་ལས་མ་བཅོས་པའི་སེམས་སྣང་ཧཱུཾ་གི་སྒྲ་གདངས་ནམ་མཁའ་གང་བ། ཧཱུཾ་ལས་རྡོ་རྗེའི་ས་གཞི། རྭ་གུར། བླ་བྲེ། མེ་དཔུང་འབར་བ་དང་བཅས་པའི་བསྲུང་བའི་འཁོར་ལོར་གྱུར། དེའི་དབུས་སུ་བྷྲུཾ་ལས་སྣོད་ཀྱི་འཇིག་རྟེན་ཟླ་བ་ཆུ་ཤེལ་གྱི་གཞལ་ཡས་ཁང༌། དབུས་སུ་པཾ་ལས་པདྨ་དཀར་པོ་འདབ་མ་སྟོང་ལྡན་ཡལ་ག་ལོ་འདབ་རབ་ཏུ་རྒྱས་པའི་སྡོང་པོ་དང་བཅས་པ། པདྨའི་ལྟེ་བར་ཨ་ལས་ཟླ་བ་ཉ་གང་ཞིང༌། རྙོག་པའི་དྲི་མ་དང་བྲལ་བ། དེའི་སྟེང་དུ་རང་གི་སེམས་ཉིད་ཏཱཾཿཡིག་དཀར་པོ་ལས་ཨུཏྤལ་དཀར་པོའི་སྡོང་པོ་ཟེའུ་འབྲུ་ལ་ཏཱཾཿཡིག་དཀར་པོས་མཚན་པར་གྱུར། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་ཐམས་ཅད་ཀྱི་དོན་བྱས། སླར་འདུས་ཤིང་ཐིམ་པ་ཡོངས་སུ་གྱུར་པ་ལས། རང་ཉིད་ལྷ་མོ་སྒྲོལ་མ་ཡིད་བཞིན་འཁོར་ལོ་སྐུ་མདོག་ཟླ་བ་ལྟར་དཀར་བ། ནོར་བུ་ཆུ་ཤེལ་ལྟར་དྭངས་ལ་དྲི་མ་མེད་པ་འོད་ཟེར་ལྔ་ལྡན་དུ་འཕྲོ་བ། རབ་ཏུ་ཞི་བ་ཆེན་པོའི་འཛུམ་ཞལ་ཅན། ཨུཏྤ་ལའི་འདབ་མ་ལྟར་
རབ་ཏུ་རྒྱས་པའི་སྤྱན་བདུན་དང་ལྡན་མ། ཕྱག་གཡས་མཆོག་སྦྱིན་དང༌། གཡོན་པའི་འཐེབ་སྲིན་གྱིས་ཨུཏྤ་ལ་དཀར་པོའི་སྡོང་བུའི་རྩ་བ་ཐུགས་ཀར་འཛིན་ཞིང༌། རབ་ཏུ་རྒྱས་པའི་སྙན་གྱི་ཐད་ཀར་ཁ་ཕྱེ་བ་བསྣམས་པ། སྒེག་ཅིང་ཆགས་པའི་ཉམས་ལྡན་ནུ་འབུར་ཟུང་གིས་མཛེས་པ། མུ་ཏིག་དཀར་པོ་གཙོ་བོར་གྱུར་པ། རིན་པོ་ཆེ་སྣ་ཚོགས་ཀྱི་དབུ་རྒྱན། སྙན་རྒྱན། མགུལ་རྒྱན། དོ་ཤལ། སེ་མོ་དོ། དཔུང་རྒྱན། ཕྱག་གདུབ། སྐེད་རྒྱན། ཞབས་གདུབ། གཡེར་ཁའི་ཕྲེང་བ་དང་བཅས་པ་དང༌། ལྷ་རྫས་ཀྱི་མེ་ཏོག་དུ་མས་མཛེས་པ། དར་དཀར་པོའི་སྟོད་གཡོགས་དང༌། སྣ་ཚོགས་དར་གྱི་སྨད་དཀྲིས་གསོལ་བ། དབུ་སྐྲ་:ཡིབ་[ལི་བ་]ལྟག་པར་བཅིངས་པའི་ཟུང་ཕུད་རྣམ་པར་གཡོ་ཞིང༌། གཞོན་ནུའི་ལུས་ཅན་རྡོ་རྗེའི་སྐྱིལ་ཀྲུང་གིས་འགྱིང་ཚུལ་དུ་བཞུགས་ཤིང༌། རི་བོང་འཛིན་པའི་རྒྱབ་ཡོལ་ཅན་དུ་གྱུར། གཉིས་པ་ནི། དཔྲལ་བར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱཿདམར་པོ། ཐུགས་ཀར་ཉི་མ་ལ་ཧཱུཾ་སྔོན་པོ། ཧཱུཾ་གི་སྟོད་ཙམ་དུ་པད་དཀར་དང་ཟླ་བ་ལ་ཏཱཾཿཡིག་དཀར་པོ། གསུམ་པ་ནི། རང་གི་སྙིང་ག་ནས་འོད་ཟེར་འཕྲོས། རང་བཞིན་གྱི་གནས་ནས་རྗེ་བཙུན་མ་འཕགས་མ་སྒྲོལ་མ་དཀར་མོའི་ལྷ་ཚོགས་ཐམས་ཅད་བཛྲ་ས་མཱ་ཛཿ ཨོཾ་བཛྲ་ཨརྒྷཾ་སྭཱཧཱ། ཨོཾ་བཛྲ་པཱདྱཾ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ནས། ཨོཾ་བཛྲ་ཤཔྟ་ཨཱཿཧཱུཾ། ཞེས་པའི་བར་གྱིས་མཆོད། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། དམ་ཚིག་པ་དང་ཡེ་ཤེས་པ་དབྱེར་མེད་པའི་ངོ་བོར་གྱུར། བཞི་པ་ནི། སླར་ཡང་རང་གི་སྙིང་གའི་ཧཱུཾ་ལས་འོད་ཟེར་འཕྲོས། དབང་གི་ལྷ་རྒྱལ་བ་རིགས་ལྔ་
འཁོར་དང་བཅས་པ་བཛྲ་ས་མཱ་ཛཿ ཨོཾ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གྱིས་གོང་བཞིན་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་གསུངས་ཤིང་བུམ་པའི་ཆུས་དབང་བསྐུར། སྐུ་ལུས་ཐམས་ཅད་གང༌། སྒྲིབ་གཉིས་ཀྱི་དྲི་མ་ཐམས་ཅད་དགཆུའི་ལྷག་མ་ཡར་ལུད་པ་ལས། རིན་ཆེན་འབྱུང་ལྡན་གྱིས་དབུ་བརྒྱན། ལྔ་པ་ནི། ཨོཾ་ཨཱཪྱ་ཏཱ་རེ་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གོང་བཞིན། ལྷ་དང་ལྷ་མིན་ཅོད་པན་གྱིས། །ཞབས་ཀྱི་པད་མ་ལ་བཏུད་དེ། །འཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །གཉིས་པ་བཟླས་པའི་རྣལ་འབྱོར་ནི། རང་གི་སྙིང་གར་པད་ཟླའི་གདན་ལ། འཁོར་ལོ་དཀར་པོ་རྩིབས་བརྒྱད་མུ་ཁྱུད་དང་བཅས་པའི་ལྟེ་བར་ཟླ་བ་ལ་ཏཱཾཿཡིག་དཀར་པོ། མཐའ་སྐོར་དུ་ཨོཾ་བདག་མིང་འདི་ཞེས་བགྱི་བའི་ཚེ་དང་བསོད་ནམས་ཡེ་ཤེས་རྒྱས་པར་མཛོད་ཅིག་ཧཱ། ཞེས་པ་རྣམས་གཡས་བསྐོར་དང༌། རྩིབས་བརྒྱད་ལ། ཏཱ་རེ་ཏུཏྟཱ་རེ་ཏུ་རེ་སྭཱ། ཞེས་ཡི་གེ་བརྒྱད་ཀྱིས་བསྐོར་བ་གསལ་བཏབ། ས་བོན་སྔགས་འཕྲེང་དང་བཅས་པ་ལས་འོད་ཟེར་འཕྲོས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ལ་མཆོད། སེམས་ཅན་ཐམས་ཅད་ཀྱི་ཚེ་སྤེལ་བ་ལ་སོགས་
པའི་དོན་བྱས། སངས་རྒྱས་ཐམས་ཅད་ཀྱི་ཐུགས་རྗེས་བྱིན་རླབས་རྣམས་ཚུར་བསྡུས། འོད་ཟེར་རྣམས་ས་བོན་སྔགས་འཕྲེང་དང་བཅས་པ་ལ་ཐིམ་པས། བཀྲགས་མདངས་གཟི་བརྗིད་རབ་ཏུ་འབར་བའི་རྣམ་པར་གྱུར། སྤྲོ་བསྡུའི་དམིགས་པ་དེ་ཉིད་ལ་གནས་བཞིན་པའི་སྒོ་ནས། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཞེས་པ་ཡི་གེ་བཅུ་པ་སྟེ་སྙིང་པོའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཨཱ་ཡུར་པུཎྱེ་ཛྙཱ་ན་པུཥྟིཾ་ཀུ་རུ་སྭཱཧཱ། ཞེས་སྤེལ་ཚིག་དང་བཅས་པ་འདི་ནི་ལས་སྔགས་སོ། །བསྙེན་པ་སོགས་ཐུན་བཞིའི་རྣལ་འབྱོར་ལ་འཇུག་པ་ན། བཟླས་པའི་ངོ་བོ་ཡི་གེ་བཅུ་པ་ལ་བྱེད་ཅིང༌། ཐུན་སོ་སོ་རྫོགས་མཚམས་སུ་སྤེལ་ཚིག་དང་བཅས་པ་ཡང་བརྒྱ་རྩ་བརྒྱད་རེ་བཟླ་བར་བྱའོ། །རྒྱུན་གྱི་བཟླས་པ་ལ་ནི། སྤེལ་ཚིག་དང་བཅས་པ་ཁོ་ན་བཟླ་བ་ཡིན་ནོ། །གསུམ་པ་རྗེས་ཀྱི་བྱ་བ་ནི། སྣང་ཞིང་སྲིད་པས་བསྡུས་པའི་ཆོས་ཐམས་ཅད་རྗེ་བཙུན་མ་འཕགས་མ་སྒྲོལ་མ་དཀར་མོ་ཡིད་བཞིན་འཁོར་ལོའི་དཀྱིལ་འཁོར་དུ་གྱུར། དེ་ཐམས་ཅད་བདག་ཉིད་ཀྱིས་བསྒོམས་པའི་བསྲུང་འཁོར་ལ་ཐིམ། རང་ཉིད་རྟེན་དང་བརྟེན་པར་བཅས་པ་ཡང་ཐུགས་ཀའི་ཏཱཾཿཡིག་ལ་ཐིམ། དེ་ཉིད་ཀྱང་ཁོག་པ། མགོ་བོ། ཟླ་ཕྱེད། ཐིག་ལེ། ནཱ་ད་རྣམས་གཅིག་ལ་གཅིག་ཐིམ། ནཱ་ད་ཡང་འོད་གསལ་གྱི་ངང་དུ་ཞུགས་པར་གྱུར། སླར་ཡང་རང་ཉིད་འཕགས་མ་སྒྲོལ་མའི་སྐུར་གྱུར་པའི་དཔྲལ་བར་ཨོཾ། མགྲིན་པ་ཨཱཿ ཐུགས་ཀར་ཧཱུཾ། སྣང་གྲགས་ཀྱི་ཆོས་ཐམས་ཅད་དོན་དམ་པར་རང་བཞིན་མེད་པ། སྣང་ཆ་སྒྱུ་མ་ལྟ་བུ། ཡེ་ཤེས་ལྷའི་ངོ་བོར་རྣམ་པར་དག་གོ །དགེ་བ་འདི་ཡིས་མྱུར་དུ་བདག །སྒྲོལ་མ་དཀར་མོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །
དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང༌། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་པོ་ཐོབ་པར་ཤོག །
བདག་བསྐྱེད་བསྡུས་པ་ལ་མོས་ན། སྐྱབས་འགྲོ་སེམས་བསྐྱེད་བསྡུས་པ་བྱས་ལ། ཚད་མེད 
་བཞི་བསྒོམས་ཏེ། ཨོཾ་ཤཱུ་ནྱ་ཏ་ཞེས་པ་མན་ཆད་ཀྱིས་ཆོག་ཅིང༌། ཤིན་དུ་བསྡུ་ན། སྟོང་པའི་ངང་ལས་ཧཱུཾ་ལས་བྱུང་བའི་བསྲུང་འཁོར་གྱི་དབུས་སུ། པད་ཟླའི་གདན་ལ། ཏཱཾཿལས་རང་ཉིད་ལྷ་མོ་སྒྲོལ་མ་ཞེས་སོགས་དང༌། རི་བོང་འཛིན་པའི་རྒྱབ་ཡོལ་ཅན། རིན་ཆེན་འབྱུང་ལྡན་གྱིས་དབུ་བརྒྱན་པ། དཔྲལ་བར་ཟླ་བ་ལ་ནས། ཛཿཧཱུཾ་བཾ་ཧོའི་བར་བྱ། དེ་ནས་བཟླས་པ་ལ་འཇུག་གོ །གཉིས་པ་ཐུན་མཚམས་ཀྱི་བྱ་བ་ནི། བྲིས་སྐུ་བགྲམ། མཎྜལ་ལ་རྡུལ་ཚོན་དཀར་པོས་པད་མ་འདབ་བརྒྱད་བྲིས། ལྟེ་བ་ལ་རྡུལ་ཚོན་དཀར་པོའམ། འབྲུ་དཀར་པོའི་ཚོམ་བུ་བཀོད། དཀར་གཏོར་གཅིག་དང་མཆོད་པ་བཤམས། རང་གི་མདུན་དུ་རྡོ་རྗེ་དྲིལ་བུ། མེ་ཏོག་གི་གང་པའི་སྣོད། དུང་ཆོས་དྲི་བཟང་གི་ཆུས་གང་བ། ཀུ་ཤའི་འཐོར་ཡབ་དང་བཅས་པ་འདུས་བྱས་ལ། རང་སྐད་ཅིག་གིས་སྒྲོལ་མ་དཀར་མོར་གྱུར། ཨོཾ་ཨ་མྲྀ་ཏེ་ཧཱུཾ་ཕཊ། ལན་ཉེར་གཅིག་གམ། བརྒྱ་རྩ་ཙམ་བཟླ་ཞིང༌། སེམས་མ་རྡོ་རྗེ་མའི་ཕྱག་རྒྱས་ཀུ་ཤའི་འཐོར་ཡབ་བཟུང་ངོ༌། །དེ་ནི་བསང་ཆུ་སྒྲུབ་པ་ཡིན་ནོ། །བསང་ཆུ་དེ་ཉིད་གནས་ཁང་དང་མཆོད་རྫས་སོགས་ལ་གཏོར། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ་ཀྱིས་བསངས། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ་གིས་སྦྱངས། སྟོང་པའི་ངང་ལས་གནས་ཁང་བྷྲུཾ་ལས་རིན་པོ་ཆེ་སྣ་ཚོགས་ལས་གྲུབ་པའི་ཐར་པ་ཆེན་པོའི་གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། ཨོཾ་ལས་བྱུང་བའི་རིན་
པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ། ཧཱུཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོགབདུག་སྤོས། མར་མེ། དྲི་ཆབ། ཞལ་ཟས། རོལ་མོ་ལ་སོགས་པའི་མཆོད་རྫས་རྣམས་ཡེ་ཤེས་ཀྱི་རང་བཞིན། མཆོད་པའི་རྣམ་པ། ཟག་མེད་བདེ་ཆེན་གྱི་རྒྱུ་བླ་ན་མེད་པའི་མཁའ་དབྱིངས་ཐམས་ཅད་ཡོངས་སུ་ཁྱབ་པར་གྱུར། ཨོཾ་བཛྲ་ཨརྒྷཾ་སྭཱཧཱ། ཨོཾ་བཛྲ་པཱདྱཾ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾ་བཛྲ་ནཻ་ཝེ་ཏེ་ཨཱཿཧཱུཾ། ཨོཾ་བཛྲ་ཤཔྟ་ཨཱཿཧཱུཾ། ཨོཾ་བཛྲ་དྷརྨ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲ་ཙ་ལི་ཏེ། པྲཛྙཱ་པ་ར་མི་ཏ་ན་ད་སམྦྷ་ཝེ་ཏེ། བཛྲ་དྷརྨ་ཧྲི་ད་ཡ་ནི། སནྟོ་ཥ་ནི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨཱ་ཁཾ་སྭཱཧཱ། ལན་གསུམ་གྱིས་བྱིན་དབབ། མདུད་བསྐྱེད་ཀྱི་དཀྱིལ་འཁོར་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཧཱུཾ་གི་སྒྲ་གདངས་ནམ་མཁའ་གང་བ་ཞེས་པ་ནས། རྙོག་པའི་དྲི་མ་དང་བྲལ་བ། དེའི་སྟེང་དུ་ཏཱཾཿདཀར་པོ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སླར་འདུས་ཤིང་ཐིམ་པ་ཡོངས་སུ་གྱུར་པ་ལས། ལྷ་མོ་སྒྲོལ་མ་ཡིད་བཞིན་འཁོར་ལོ་ཞེས་པ་ནས། རིན་ཆེན་འབྱུང་ལྡན་གྱིས་དབུ་བརྒྱན། ཞེས་པའི་བར་བདག་བསྐྱེད་དང་འདྲ། གལ་ཏེ་ཅུང་ཟད་སྤྲོས་པ་ལ་མོས་ན། ཡེ་ཤེས་པ་སྤྱན་འདྲེན་པའི་སྐབས། ཚིགས་བཅད་དང༌། མཆོད་ཡོན་གདན་འབུལ་སོགས་རྒྱས་པར་བྱས་ཀྱང་རུང་ངོ༌། །སླར་ཡང་རང་གི་སྙིང་གའི་འོད་ཟེར་གྱིས། བླ་མ་ཡི་དམ་སངས་རྒྱས་བྱང་སེམས་འཕགས་པ་ཉན་རང་གི་ཚོགས་ཐམས་ཅད་མཆོད་པའི་ཡུལ་དུ་བཛྲ་ས་མཱ་ཛཿ མ་ལུས་སེམས་ཅན་ཀུན་གྱི་མགོན་གྱུར་ཅིང༌། ཞེས་པ་ནས།
ཡོངས་དག་འཁོར་དང་བཅས་ཏེ་གཤེགས་སུ་གསོལ། །ཞེས་གསོལ་བ་བཏབ། ཨོཾ་ཨ་མྲྀ་ཏའི་སྔགས་ཀྱིས་ཕྱིས་འབྲང་གི་བགེགས་བསྐྲད། ཨོཾ་པདྨ་ཀ་མ་ལ་ཡེ་སྟྭཾ། རིན་པོ་ཆེའི་ཁྲི་དང༌། པད་ཟླ་ལ་སོགས་པའི་གདན་ཕུལ་བར་བསམ། དེ་ནས་མཆོད་པ་འབུལ་བ་ནི། སྔགས་ཀྱི་འགོར་པད་སྐོར་དང༌། འཇུག་ཏུ་སེ་གོལ་གཏོགས་ཤིང༌། ཨརྒྷཾ་ཞེས་སོགས་སོ་སོའི་མིང་གི་སྐབས། མཆོད་ཡོན་སོགས་སོ་སོའི་ཕྱག་རྒྱ་བཅའ་བ་ཕྱག་ལེན་ཡིན་ནོ། །ཨོཾ་ཨཱཪྱ་ཏཱ་རེ་གུ་རུ་བུདྡྷ་བོ་དྷི་སཏྭ་ས་པ་རི་ཝཱ་ར་མཎྜ་ལ་བྷྱཿ ཨརྒྷཾ་པྲ་ཏཱིཙྪ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ། ཨརྒྷཾ་གྱི་གནས་སུ། པཱདྱཾ་ལ་ཡང་སྦྱར་བས། ཞབས་བསིལ་འབུལ། མེ་ཏོག་ལ། ཨོཾ་ཨཱཪྱ་ཏཱ་རེ་ས་པ་རི་ཝ་ར་བྷྱཿ བཛྲ་པུཥྤེ་པྲ་ཏཱིཙྪ་ན་མཿ ཞེས་བརྗོད། དེ་བཞིན་དུ། དྷུ་པེ། བདུག་སྤོས་དང༌། ཨཱ་ལོ་ཀེ མར་མེ་དང༌། གནྡྷེ། དྲི་ཆབ་དང༌། ནཻ་ཝི་ཏེ། ཞལ་ཟས། ཤཔྟ་རོལ་མོ་རྣམས་འབུལ་ལོ། །དེ་ནས་བསྟོད་པ་ནི། འཁོར་བ་ལས་སྒྲོལ་ཏཱ་རེ་མ། །ཏུཏྟཱ་ར་ཡིས་འཇིགས་བརྒྱད་སྒྲོལ། །ཏུ་རེས་ན་བ་ཀུན་ལས་སྐྱོབ། སྒྲོལ་མ་ལ་ནི་ཕྱག་འཚལ་བསྟོད། །པདྨ་དཀར་པོའི་དབུས་གནས་པ། །ཟླ་བའི་གཟུགས་ཀྱི་གདན་སྟེང་དུ། །རྡོ་རྗེ་སྐྱིལ་ཀྲུང་བཅས་མཛད་མ། །མཆོག་སྦྱིན་སྒྲོལ་མ་ལ་ཕྱག་འཚལ། །སྟོན་ཀའི་ཟླ་བའི་གདངས་འདྲ་ཞིང༌། །ཟླ་བ་ལ་ནི་རྒྱབ་བརྟེན་མ། །རྒྱན་རྣམས་ཐམས་ཅད་ཡང་དག་རྫོགས། །ཨུཏྤལ་བསྣམས་ལ་ཕྱག་འཚལ་བསྟོད། །བཅུ་དྲུག་ལོ་ལོན་ལུས་ཅན་མ། །རྫོགས་སངས་རྒྱས་རྣམས་ཁྱོད་ཀྱི་སྲས། །འདོད་སྦྱིན་སྐུ་ནི་འཆང་བའི་ཡུམ། །འཕགས་མ་སྒྲོལ་མ་ཕྱག་འཚལ་བསྟོད། །འཁོར་ལོ་དཀར་པོ་འོད་
ཟེར་འབར། །རྩིབས་བརྒྱད་ལ་ནི་ཡི་གེ་བརྒྱད། །ཡོངས་སུ་བསྐོར་བའི་རྣམ་པ་ཅན། །ཡིད་བཞིན་འཁོར་ལོར་ཕྱག་འཚལ་བསྟོད། །གཏོར་མ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། གཏོར་སྣོད་ཡངས་ཤིང་རྒྱ་ཆེ་བ་རིན་པོ་ཆེ་ལས་གྲུབ་པའི་ནང་དུ། ཨོཾ་ཨཱཿཧཱུཾ། ཞུ་བ་ལས་བྱུང་བའི་གཏོར་མ་འདོད་དགུའི་རྒྱ་མཚོ་ཆེན་པོ་ཁ་དོག་དྲི་རོ་ནུས་མཐུ་ཕུན་སུམ་ཚོགས་པར་གྱུར། ཨོཾ་ཨཱཿཧཱུཾ་ལན་གསུམ་མམ་ལན་བདུན་གྱིས་བྱིན་གྱིས་བརླབས། ཨོཾ་ཏཱ་རེ་ཏུཏྟཱ་རེ་ཏུ་རེ་ཨི་དམ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་བདུན་གྱིས་རྗེ་བཙུན་མ་དང༌། ཨ་ཀཱ་རོ་ལན་གསུམ་གྱིས་འཁོར་ཚོགས་ཐམས་ཅད་ལ་ཕུལ་བར་མོས། ཚོགས་ཞིང་གི་སྐབས་ལྟར་མཆོད། དགེ་བ་ཅན་མ་གཟི་བརྗིད་ལྡན། །དབྱངས་ཅན་མ་དང་ནོར་གྱི་བདག །དཔལ་མོ་ལ་སོགས་སྤྲུལ་པ་མཛད། །ལྷ་མོ་སྒྲོལ་མ་ལ་ཕྱག་འཚལ། །གང་གི་ཐུགས་རྗེའི་འོད་དཀར་གྱིས། །མ་ལུས་འགྲོ་བའི་དོན་མཛད་ཅིང༌། །མགོན་མེད་རྣམས་ཀྱི་མགོན་དང་སྐྱབས། །རྒྱལ་བ་སྲས་དང་བཅས་ལ་འདུད། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་སོགས་ནས། ཡིད་ལ་འདོད་པ་ཀུན་འགྲུབ་ཤོག་གི་བར་བརྗོད་ཅིང༌། ཁྱད་པར་ཡིད་ལ་འདོད་པའི་དོན་གང་ཡིན་པ་དེ་ཉིད་འགྲུབ་པར་གསོལ་བ་དྲག་ཏུ་བཏབ་བོ། །ཡི་གེ་བརྒྱ་པ་ལན་གསུམ་མམ་བདུན་གྱིས་ལྷག་ཆད་ཁ་བསྐང༌། མ་འབྱོར་པ་དང་ཉམས་པ་དང༌། །ཞེས་སོགས་ཀྱིས་བཟོད་པར་གསོལ། སུ་པྲ་ཏིཥྛས་རྟེན་རྣམས་ལ་མེ་ཏོག་དོར་ཞིང་བརྟན་བཞུགས་བྱ། མཆོད་གཏོར་གྱི་མགྲོན་རྣམས་གཤེགས་སུ་གསོལ་བར་མོས་ཏེ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །ཞེས་པ་ནས། ཨོཾ་བཛྲ་མུཿ
ཞེས་བརྗོད། སྨོན་ལམ་དང་བཀྲ་ཤིས་རྒྱས་བསྡུས་གང་འོས་བྱའོ། །འདི་དག་ལ་རྒྱུན་གྱི་ཉམས་ལེན་ལ། མཆོད་ཆོག་སོགས་རྒྱས་པ་མི་ལྕོགས་ན། བདག་བསྐྱེད་རྒྱས་བསྡུས་གསུམ་པོ་གང་རུང་ཞིག་བླངས་ལ། ཡེ་ཤེས་ལྷའི་ངོ་བོར་རྣམ་པར་དག་གོ །ཞེས་པ་ཡན་ཆད་བྱ། དེ་ནས་གཏོར་ཆོག་ཙམ་བྱ་བ་ཡིན་ཏེ། གོང་བཞིན་གཏོར་མ་བྱིན་གྱིས་བརླབས། རང་གི་སྙིང་གའི་ས་བོན་ལས་འོད་ཟེར་འཕྲོས། ལྷོ་ཕྱོགས་པོ་ཊ་ལའི་རི་བོ་ནས། རྗེ་བཙུན་མ་སྒྲོལ་མ་དཀར་མོ་ལ་བླ་མ་ཡི་དམ་སངས་རྒྱས་བྱང་ཆུབ་སེམས་དཔའི་ཚོགས་ཐམས་ཅད་ཀྱིས་བསྐོར་བ་བཛྲ་ས་མཱ་ཛཿ པདྨ་ཀ་མ་ལ་ཡ་སྟྭཾ། ལྷ་རྣམས་ཀྱི་ལྗགས་རྡོ་རྗེའི་སྦུ་གུས་གཏོར་མ་དྲངས་ཏེ་གསོལ་བར་གྱུར། ཨོཾ་ཏཱ་རེ་ཞེས་པ་ནས། བཀྲ་ཤིས་ཀྱི་བར་གཏོར་མ་འབུལ་ཚུལ་གོང་བཞིན་བྱའོ། །དེ་ཡང་སྔ་དྲོ་ལྟ་བུ་བདག་བསྐྱེད་ཀྱི་ཐུན་འཇུག་དེ་ཉིད་དུ་གཏོར་མ་ཕུལ་ཀྱང་རུང༌། བདག་བསྐྱེད་སྔ་དྲོ་བླངས་ནས། སྲོད་ཐུན་སོགས་ལ་གཏོར་མ་ཕུལ་ཀྱང་རུང་ངོ༌། །འདིའི་བསྙེན་པའི་ལག་ལེན་ནི། བྲིས་སྐུ་མཎྜལ་མཆོད་གཏོར་སོགས་ཞལ་ལྷོར་བསྟན་ལ་གོང་ལྟར་བཤམ། བདག་ཉིད་གདོང་བྱང་དུ་ཕྱོགས་པས། གོང་མཆོད་ཆོག་གི་སྐབས་སུ་བཤད་པ་ལྟར། མཆོད་པ་བྱིན་རླབས་ཡན་ཆད་བྱས་པའི་རྗེས་ལ། སྐྱབས་འགྲོ་ནས་བརྩམས་ཏེ། བདག་བསྐྱེད་ཡོངས་སུ་རྫོགས་པ་བྱེད་ལ། བཟླས་པའི་གཙོ་བོ་ཡང་བདག་བསྐྱེད་ཀྱི་སྐབས་འདི་ཉིད་རང་ཡིན་ཞིང༌། བདག་བསྐྱེད་ཀྱི་ཐུན་རྫོགས་པ་ན། རབ་ཏུ་ཐུན་བཞི་ཆར་གྱི་མཐར། གོང་དུ་བཤད་པའི་མཆོད་གཏོར་གྱི་ཆོ་ག་ཡོངས་རྫོགས་ཚར་རེ་བྱ་ཞིང༌། འབྲིང་དུ་ན་སྔ་ཐུན་དང༌། སྲོད་ཐུན་ལ་བདག་མདུན་མཆོད་གཏོར་ཡོངས་རྫོགས་དང་བཅས་པ་རེ་བྱ་ལ། ཐུན་བར་པ་གཉིས་ལ་སྐྱབས་འགྲོ་ནས་དགེ་བ་
བསྔོ་བའི་བར་བདག་བསྐྱེད་ཁོ་ན་བྱའོ། །ཐ་མས་དེ་ཡང་མ་གྲུབ་ན། སྔ་ཐུན་གྱི་མཐར་མཆོད་གཏོར་འབུལ་བ་རྒྱས་པའི་ལས་ལ་བསྔགས་པ་ཡིན་ནོ། །ཡང་ཤིན་ཏུ་རྩོལ་བ་ཆུང་བས་དེ་ཡང་མ་འགྲུབ་ན། སྔ་ཐུན་གྱི་མཐར། གོང་དུ་བསྟན་པ་ལྟར་གྱི་དུས་རྒྱུན་གྱི་ལག་ལེན་གྱི་གཏོར་ཆོག་དེ་བྱ་ཞིང༌། ཚེས་བཅོ་ལྔ་སོགས་དུས་བཟང་རྣམས་ལ། མདུན་བསྐྱེད་གཏོར་མ་དང་བཅས་པ་རྒྱས་པ་དེ་བྱས་པས་ཀྱང་འགྲུབ་པ་ཡིན་ནོ། །སྤྱིར་བསྙེན་པའི་ཚད་ནི། སྔགས་སྤེལ་ཚིག་ཅན་དེ་མི་ཐེ་བའི་ཡི་གེ་བཅུ་པ་ཉིད་ལ་འབུམ་ཕྲག་བཅུ་གྲངས་བསྙེན་ཡིན་ལ་བྱེ་བ་སོང་ན་ལས་དང་དངོས་གྲུབ་རྣམས་སྒྲུབ་པ་ལ་དབང་བ་ཡིན་ནོ། །འོན་ཀྱང་ཞག་བདུན་ཙམ་ལ་བཟླས་པ་གང་སོང་བྱས་པས་ཀྱང་ཕན་ཡོན་དཔག་ཏུ་མེད་པ་ཡོད་པས་དེ་ཡང་ནན་ཏན་དུ་བྱ་བ་ཁོ་ནའོ། །སྤྱིར་ཁ་བ་ཅན་གྱི་ཕྱོགས་འདིར་སྒྲོལ་དཀར་གྱི་ཆོས་སྐོར་ལུགས་ལྔ་ཙམ་བྱོན་པར་གྲགས་ཏེ། ཇོ་བོ་རྗེའི་ལུགས་དང༌། གཉན་ལོཙྪ་བའི་ལུགས་དང༌། བ་རི་ལོཙྪ་བའི་ལུགས་དང༌། ཉེ་བརྒྱུད་པཎ་ཆེན་ནགས་རིན་གྱི་ལུགས་ཏེ། བཞི་པོ་དེ་སློབ་དཔོན་ངག་དབང་གྲགས་པའི་གདམས་པ་དང་འབྲེལ་བ་ཡིན་ལ། ལྔ་པ་ནི་པཎ་ཆེན་ཤཱཀྱ་ཤྲཱི་ལུགས་ཏེ། ལྷ་སྔགས་ཀྱང་རྣམ་པ་གཞན་དུ་གནས་པ་ཡིན་ནོ། །དེ་དག་ལས་འདི་ནི་སྔ་འགྱུར་ཇོ་བོ་ལུགས་གཙོ་བོར་བྱས་པ་སྟེ། ཕྱིས་ཇོ་བོ་ལུགས་ཀྱི་སྒྲོལ་དཀར་གྱི་སྒྲུབ་མཆོད་དུ་གྲགས་པའི་ཡིག་ཆ་གསར་པ་རྣམས་ནི་རང་ལུགས་ཀྱི་ཐོབ་ཐང་མ་ཚང་ཞིང༌། ཏིང་ངེ་འཛིན་གྱི་དབང་གི་བདག་འཇུག་སོགས་གཞན་གྱི་བསྲེ་ལྷད་དང༌། རང་བཟོ་དུ་མ་བྱས་པ་དག་ཀྱང་མཐོང་ངོ༌། །འདིར་སྐྱོན་དེ་དག་ཐམས་ཅད་འབད་པས་སྤངས་ཤིང༌། རང་ལུགས་ཀྱི་སྙིང་པོ་ཚང་ལ་མ་འཁྲུགས་པ་ལེགས་པར་བརྗོད་པའོ། །བསམ་གྱི་མི་ཁྱབ་ཟབ་མོའི་ཕྱོགས་གྲོལ་ལ། །བློ་དམན་བྱུང་དུས་དོར་བྱིར་མི་ནུས་མོད། །མན་ངག་ལ་
བརྟེན་ཅུང་ཟད་སྦྱར་བ་འདི། །བློ་ལྡན་ལམ་འདིར་མོས་ལ་ཡིད་བདེའི་གནས། །འདི་བྲིས་རྣམ་པར་དཀར་བ་དེས། །འགྲོ་ཀུན་འཆི་མེད་རྡོ་རྗེའི་གནས། །རྒྱལ་བའི་ཡུམ་གྱུར་སྒྲོལ་མ་ཡི། །གོ་འཕང་མྱུང་དུ་ཐོབ་པར་ཤོག །ཅེས་པ་སྒྲོལ་དཀར་ཇོ་བོ་ལུགས། བརྒྱུད་པའི་བཀའ་སྲོལ་གཉིས་ལ་བརྟེན་པའི་མན་ངག་བསྙེན་སྒྲུབ་ཀྱི་ལག་ལེན་གསལ་བར་བཀོད་པ་བདུད་རྩིའི་བུམ་བཟང་ཞེས་བྱ་བ་འདི་ཡང༌། འཇིག་རྟེན་མགོན་པོ་སྟག་ལུང་ཐང་པའི་བྱིན་རླབས་ཀྱིས་འཚོ་འདི་ག་ཞེས་པ། དབང་ཕྱུག་དམ་པའི་མངའ་བདག་མི་དབང་ཚེ་བརྟན་རྡོ་རྗེའི་གསུང་གིས་བསྐུལ་བའི་ངོར། རྒྱལ་ཁམས་པ་ཏཱ་ར་ནཱ་ཐའམ། མིང་གཞན་ཀུན་དགའ་སྙིང་པོ་ཞེས་བྱ་བས་གཉན་ཐོག་གི་གཙུག་ལག་ཁང་དུ་སྦྱར་བའོ།། །།བཀྲ་ཤིས། །
ཡིད་བཞིན་འཁོར་ལོའི་རྗེས་གནང་།
ཨོཾ་སྭཱ་སྟི། འཕྲིན་ལས་ལྷུན་གྲུབ་ལྷ་མོའི་སྐུ། །སྒྲོལ་མའི་ཚོགས་ལ་གུས་བཏུད་དེ། ཡིད་བཞིན་འཁོར་ལོའི་རྗེས་གནང་གི །རིམ་པ་ཅུང་ཟད་བྲི་བར་བྱ། །འདི་ལ་སློབ་དཔོན་གྱི་བྱ་བའི་རིམ་པ་བདག་བསྐྱེད། མདུད་བསྐྱེད་མཐའ་དག་སྒྲོལ་དཀར་གྱི་བསྙེན་སྒྲུབ་གྱི་ལག་ལེན་གསལ་བར་བཀོད་པ་བདུད་རྩིའི་བུམ་བཟང་བཞིན་བྱ་བ་ལས། རྡུལ་ཚོན་གྱི་པདྨ་འདབ་བརྒྱད་འབྲི་བ་མ་ལྕོགས་ན། མཎྜལ་ལ་ཚོམ་བུ་བཀོད་པ་ཙམ་གྱིས་ཆོག་ཅིང༌། མདུད་བསྐྱེད་ཀྱི་བསྟོད་པའི་རྗེས། གཏོར་ཆོག་གི་སྔོན་དུ་བཟླས་པ་ཅི་འགྲུབ་བྱ། གཏོར་ཆོག་སོང་བའི་མཚམས་སུ། སློབ་མ་རྗེས་འཛིན་བྱ་སྟེ། སློབ་མ་རྣམས་སྒོ་དྲུང་དུ་ཁྲུས་བྱ་བ་མ་འགྲུབ་ན། ཁ་བཤལ་བའི་ཆབ་བཏང༌། གྲལ་ལ་འཁོད་པ་ལ་མེ་ཏོག་བཀྱེ་བསྡུ་བྱ་སྟེ། སློབ་དཔོན་གྱིས་འདི་སྐད་ཅེས་བརྗོད། སེམས་ཅད་ཐམས་ཅད་ཀྱི་དོན་དུ་བླ་ན་མེད་པ་རྣམ་པ་ཐམས་ཅད་མཁྱེན་པ་
སངས་རྒྱས་ཀྱི་གོ་འཕང་ཐོབ་པར་བྱ། དེ་མ་ཐོབ་ཀྱི་བར་དུ་ཡང་ཕྱི་ནང་གི་འཇིགས་པ་བར་ཆད་ཐམས་ཅད་ཞི་བ་དང༌། བསམ་པའི་དོན་ཐམས་ཅད་གེགས་མེད་པར་འགྲུབ་ཅིང༌། ཁྱད་པར་དུ་ཚེའི་འགལ་རྐྱེན་ཐམས་ཅད་ཞི་ནས་འཆི་མེད་ཚེའི་དངོས་གྲུབ་ཐོབ་པར་བྱ། དེའི་ཕྱིར་དུ་རྗེ་བཙུན་མ་འཕགས་མ་སྒྲོལ་མ་དཀར་མོ་ཡིད་བཞིན་འཁོར་ལོའི་རྗེས་གནང་ཟབ་མོ་ཞུ་སྙམ་པའི་བྱང་ཆུབ་ཀྱི་མཆོག་ཏུ་སེམས་བསྐྱེད་པ་དང༌། ཆོས་གསན་པའི་ཀུན་ཏུ་སྤྱོད་པ་ཡང་མདོ་རྒྱུད་རིན་པོ་ཆེ་ནས་ཇི་སྐད་བཀའ་སྩལ་བ་ལྟར་ལེགས་པར་གསལ་བཏབ་ཏེ་གསན་པར་མཛད་པ་ཞུ། འདིར་གྲུབ་པའི་སློབ་དཔོན་ངག་གི་དབང་ཕྱུག་གྲགས་པ་ཞེས་བྱ་བ་རྗེ་བཙུན་མ་འཕགས་མ་སྒྲོལ་མའི་ཞལ་རྟག་ཏུ་གཟིགས་པ་དེས། རྒྱུད་སྡེ་མང་པོ་ནས་གསུངས་པའི་ཚེ་བསྒྲུབ་ཕྱོགས་གཅིག་ཏུ་བསྒྲིགས་པའི་འཆི་བསླུ་བླུ་ཆེན་མོ་ཞེས་བྱ་བ་ཤླཽ་ཀ་བཞི་བརྒྱ་ལྔ་བཅུ་པ་ཞིག་མཛད། དེའི་ནང་ན་སྒྲོལ་དཀར་ཡིད་བཞིན་འཁོར་ལོའི་སྒྲུབ་ཐབས་གསལ་བར་བཞུགས། སློབ་དཔོན་དེའི་སློབ་མ་པཎྜི་ཏ་ཐུ་བོ་ཞེས་བྱ་བས་དེ་ལོགས་སུ་ཕྱུང་བའི་སྒྲུབ་ཐབས་ཀྱང་མཛད། དེ་ཆོས་འདིའི་གཞུང་གི་རྩ་བ་ཡིན་ཞིང༌། དེ་ཉིད་ཁ་བ་ཅན་གྱི་ཕྱོགས་འདིར་སྔ་འགྱུར་ཇོ་བོ་རྗེ་དཔལ་ལྡན་ཨ་ཏི་ཤའི་ལུགས་དང༌། བར་འགྱུར་གཉན་ལུགས་དང༌། བ་རི་ལུགས། ཕྱི་འགྱུར་ནགས་རིན་ལུགས་ཀྱི་ཉེ་བརྒྱུད་དེ་ལུགས་བཞི་ཡོད་པ་ལས། འདི་སྔ་འགྱུར་ཡིན། དེ་ཡང་སློབ་དཔོན་ངག་དབང་གྲགས་པ་ལ་གསེར་གླིང་པས་གསན། དེ་ལ་ཇོ་བོ་རྗེས་གསན། ཇོ་བོས་བོད་དུ་མང་དུ་གནང་ནའང༌། འདི་འབྲོམ་སྟོན་ལས་བརྒྱུད་པ་ཡིན་ཞིང༌། བར་སྐབས་སུ་སྒམ་པོ་ལུགས་དང༌། བཀའ་
གདམས་ལུགས་ཞེས་བརྒྱུད་པ་ཐ་དད་དུ་གྱེས་པ་ཡོད་ནའང༌། མན་ངག་གི་ངོ་བོ་ལ་དབྱེ་བ་མེད་ཅིང༌། འདིར་དེ་གཉིས་ཀར་བརྒྱུད་པ་གཅིག་ཏུ་འདུས་པ་ཡིན་ལ། དེ་ལ་སློབ་དཔོན་གྱི་བྱ་བ་རྣམས་སྔོན་དུ་སོང༌། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་རྗེས་གནང་ཟབ་མོ་ཞུ་བའི་ཡོན་དུ་མཎྜལ་ཕུལ་མཛོད། ཅེས་བརྗོད། སློབ་མས་ཀྱང་མཎྜལ་ཕུལ། དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་བཟློས་མཛོད། རྡོ་རྗེ་འཛིན་པ་དགོངས་སུ་གསོལ། །བདག་ནི་འགྲོ་ལ་ཕན་དོན་དུ། །གཙོ་ཆེན་ཁྱེད་ལ་གསོལ་འདེབས་ཀྱི། །མ་ལུས་རྗེས་གནང་སྩལ་དུ་གསོལ། །ལན་གསུམ། དེ་ནས་རྒྱུན་བཤགས་སྔོན་དུ་འགྲོ་བའི་སེམས་བསྐྱེད་པ་ནི། སློབ་དཔོན་དང་མདུན་བསྐྱེད་གཉིས་ཀར་འཕགས་མ་སྒྲོལ་མ་ཡིད་བཞིན་འཁོར་ལོའི་སྐུར་གསལ་བ། སྟེང་གི་ཆ་ལ་བརྒྱུད་པའི་བླ་མ་ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་བྱང་སེམས་ཐམས་ཅད་བཞུགས་པར་བསམས་ལ། སྐྱབས་འགྲོ་སེམས་བསྐྱེད་ཀྱི་འདུན་པ་དང་བཅས་པས་འདིའི་རྗེས་ཟློས་མཛོད། སངས་རྒྱས་ཆོས་དང་སོགས་ལན་གསུམ། སྡིག་པ་བཤགས་པ་དང༌། དགེ་བ་ལ་ཡིད་རང་བ། སྐྱབས་འགྲོ་དང་སྨོན་པ་སེམས་བསྐྱེད་དུ་འཇུག་སྡོམ་ལེན་པ་དང༌། དགེ་བ་བསྔོ་བ་རྣམས་བགྱིད་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །སོགས་ལན་གསུམ། རྗེས་གནང་དངོས་ལ་དམིགས་པ་འདི་བཞིན་དུ་མཛོད། སློབ་དཔོན་གྱྀ་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ཀྱི་ལུས་ལ་ཕོག་པས་རྣམ་སྨིན་ཤ་ཁྲག་
རྡོས་བཅས་ཀྱིས་མཚོན་པའི་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་བར་སྦྱངས། ཨོཾ་སྭ་བྷཱ་ཝ་སོགས། སྟོང་པའི་ངང་ལས་ནས། རྒྱབ་ཡོལ་ཅན་དུ་གྱུར། དཔྲལ་བར་ཟླ་བ་ཞེས་པ་ནས། ཏཱཾཿདཀར་པོ། དེ་ནས་སློབ་དཔོན་ལ་མོས་གུས་དུང་བ་བྱས་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། སངས་རྒྱས་བྱང་སེམས་ཐམས་ཅད་སྒྲོལ་དཀར་ཡིད་བཞིན་འཁོར་ལོའི་རྣམ་པར་སྤྱན་དྲངས། ཁྱེད་རང་རྣམས་ཀྱི་ལུས་ལ་ཐིམ། ལྷོ་ཕྱོགས་རི་བོ་པོ་ཏ་ལ་ནས། རྗེ་བཙུན་མ་འཕགས་མ་སྒྲོལ་མ་དཀར་མོ་ལ། བླ་མ་ཡི་དམ་སངས་རྒྱས་བྱང་ཆུབ་སེམས་དཔས་བསྐོར་བ་སྤྱན་དྲངས། ཁྱེད་རང་རྣམས་ལ་ཐིམ། སློབ་དཔོན་དང་སྒྲོལ་དཀར་ཡིད་བཞིན་འཁོར་ལོའི་ཐུགས་ཀ་ནས། སྒྲོལ་དཀར་ཡིད་བཞིན་འཁོར་ལོའི་སྐུ་ཆེ་བ་རི་རབ་ཙམ། ཆུང་བ་ཡུངས་འབྲུ་ཙམ། ཡང་ཆུང་རྡུལ་ཕྲན་ཙམ་བསམ་གྱིས་མི་ཁྱབ་པ་ཁ་བ་བུ་ཡུག་འཚུབ་པ་བཞིན་དུ་ཁྱེད་རང་རྣམས་ཀྱི་ལུས་ལ་གཉིས་སུ་མེད་པར་སིབ་སིབ་ཐིམ་པར་མོས་པ་མཛོད། བྱས་ལ། དྲི་ཞིམ་པོའི་སྤོས་དུད་དང༌། རོལ་མོ་འཇམ་རོལ་རྒྱུན་རིང་བས་བྱིན་དབབ། སློབ་དཔོན་གྱིས་རྡོ་རྗེ་གསོར་ཞིང་དྲིལ་བུ་འཁྲོལ་བཞིན་པས། ཨོཾ་ཨཱཪྱ་ཏཱ་རེ་བཛྲ་ཨ་བེ་ཤ་ཨ་ཨ། ཞེས་ལན་ཉེར་གཅིག་ནས་བརྒྱ་རྩའི་བར་གང་འོས་པ་བརྗོད་དོ། །དེས་སྐུའི་རྗེས་གནང་གྲུབ་པ་ལགས། ཡང་དམིགས་པ་འདི་བཞིན་དུ་མཛོད། ཁྱེད་རང་རྣམས་ཀྱི་སྙིང་གར་པད་ཟླ་ལ་འཁོར་ལོ་དཀར་པོ་རྩིབས་བརྒྱད་པའི་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་ཏཱཾཿཡིག་དཀར་པོ། མཐའ་སྐོར་དུ་ཨོཾ་མ་མ་ཨཱ་ཡུར་པུཎྱེ་ཛྙཱ་ན་པུཥྟིཾ་ཀུ་རུ་ཧཱ། རྩིབས་བརྒྱད་ལ། ཏཱ་རེ་ཏུཏྟཱ་རེ་ཏུ་རེ་སྭཱ། ཞེས་པའི་སྔགས་ཀྱི་ཡིག་འབྲུ་རྣམས་ཁ་དོག་དཀར་པོ་མགོ་
གྱེན་བསྟན། ཁ་ནང་དུ་ཕྱོགས་པ་འོད་ཟེར་དཀར་པོ་འབར་བའི་རྣམ་པ་ཅན་དུ་བཞུགས་པར་མོས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། ཐུགས་ཀའི་སྔགས་འཕྲེང་ལས་སྔགས་འཕྲེང་གཉིས་པ་ཆད། ཞལ་ནས་ཐོན། ཁྱེད་རང་རྣམས་ཀྱི་ཁ་སྒོ་ནས་ཞུགས། སྙིང་གའི་འཁོར་ལོའི་ལྟེ་བ་དང༌། རྩིབས་རྣམས་ལ་སྤར་བཏབ་པ་བཞིན་དུ་འཁོར་བར་མོས་ལ། འདིའི་རྗེས་བཟློས་མཛོད། ཡི་གེ་བཅུ་པ་ལན་བདུན་དང༌། སྔགས་སྤེལ་ཚིག་ཅན་ལན་གསུམ་རྗེས་ཟློས་བྱེད་གཞུགདེས་སྔགས་ཀྱི་བཟླས་ལུང་ཐོབ། འོན་ཀྱང་བཟླས་བརྗོད་མ་བྱས་ན། ལུང་ཕོག་པ་ཙམ་གྱིས་དངོས་གྲུབ་མི་ཐོབ་པས། བཟླས་བརྗོད་ཀྱི་དོན་དུ་དམ་བཅའ་བའི་ལུང་ནི། དུས་འདི་ནས་བཟུང་སྟེ། ཇི་སྲིད་བྱང་ཆུབ་མ་ཐོབ་བར་དུ། རྗེ་བཙུན་མ་འཕགས་མ་སྒྲོལ་དཀར་ཡིད་བཞིན་འཁོར་ལོ་ཡི་དམ་གྱི་ལྷར་བཟུང་ནས། དེའི་གཟུངས་སྔགས་ཉིན་རེ་ལ་རང་གི་བློ་དང་འཚམས་པ་འདི་ཙམ་རེ་མ་ཆག་པར་བཟླ་སྙམ་པས་འདིའི་རྗེས་ཟློས་མཛོད། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང༌། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། སྒྲོལ་དཀར་ཡིད་བཞིན་འཁོར་ལོ་ཡི་དམ་གྱི་ལྷར་བཟུང་ནས། དེའི་གཟུངས་སྔགས་ཉིན་རེ་ལ་ཅི་ནུས་རེ་བཟླ་བར་དམ་འཆའ་ལགས་སོ། །ལན་གསུམ། དེ་ལྟར་སྔགས་བཟླས་པས་ཀྱང་དངོས་གྲུབ་ཙམ་ཐོབ་པར་འགྱུར་བ་ཡིན་མོད་ཀྱི། ལོ་དང་ཟླ་བ་མང་པོར་བསྒྲུབས་པས་མཐར་གྱི་དངོས་གྲུབ་འཐོབ་པ་ཞིག་ཀྱང༌།
བླ་མ་དང་ལྷའི་བྱིན་རླབས་ཀྱི་སྟོབས་ཀྱིས་ཉིན་ཞག་འགའ་ཞིག་ཙམ་གྱིས་ཁྱད་འགྲུབ་པའི་ཕྱིར། བྱིན་གྱིས་བརླབས་པའི་ལུང་བྱ་དགོས་པས། སློབ་དཔོན་ལ་མེ་ཏོག་འཐོར་བཞིན་དུ་འདིའི་རྗེས་ཟློས་མཛོད། བཅོམ་ལྡན་བདག་ལ་སྩལ་ལགས་ཀྱི། །བདག་ལ་འགོ་བར་མཛད་དུ་གསོལ། །ཅེས་ལན་གསུམ། དེ་ལྟར་ཕུལ་བས་མེ་ཏོག་དེ་ཉིད་སྔགས་འཕྲེང་དུ་བྱིན་གྱིས་བརླབས་ཏེ། ཁྱེད་རང་རྣམས་ཀྱི་སྤྱི་བོ་ནས་གཏོར་བས། སྤྱི་གཙུག་གི་སྒོ་ནས་ཞུགས་ཏེ། སྙིང་གར་སྔགས་འཕྲེང་ལ་ཐིམ་ཞིང༌། བྱིན་གྱིས་བརླབས་པར་མོས་མཛོད། མེ་ཏོག་སྤྱི་བོར་གཏོར་ཏེ། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །ཅེས་ལན་གསུམ་སྙིང་གར་གཏོར་ཏེ། སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རྡོ་རྗེ་སློབ་མ་འདི་རྣམས་ཀྱི་རྒྱུད་ལ་རྗེ་བཙུན་མ་འཕགས་མ་སྒྲོལ་མའི་ཟབ་མོའི་གསུང་རིག་སྔགས་ཀྱི་ནུས་མཐུ་ཐམས་ཅད་ཐོགས་མེད་དུ་འཇུག་པར་གྱུར་ཅིགདེས་གསུང་གི་རྗེས་གནང་ཐོབ་པ་ལགས། ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། ཐུགས་ཀ་ནས་འོད་ཟེར་འཕྲོས། སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ཐམས་ཅད་ཕྱག་མཚན་ཨུཏྤལ་དཀར་པོ་དྲི་མ་མེད་པའི་འོད་ཟེར་འཕྲོ་བས་རྣམ་པར་སྤྱན་དྲངས། མདུན་བསྐྱེད་ཀྱི་ཐུགས་ཀར་ཐིམ། མདུན་བསྐྱེད་ལ་མོས་གུས་དུང་བ་བྱས། དེ་ཉིད་རང་གི་སྤྱི་བོར་བྱོན། འོད་ཀྱི་གོང་བུར་ཞུ་བ་སྤྱི་བོ་ནས་ཞུགས་ཏེ་སྙིང་གར་ཐིམ། དེའི་ངང་དེར་སེམས་དུས་གསུམ་གྱི་རྣམ་པར་རྟོག་པའི་སྤྲོས་པ་ཐམས་ཅད་སྤངས་ཏེ།
ཅུང་ཟད་མཉམ་པར་ཞོག་མཛོད། ཅེས་བརྗོད་ལ་ཅུང་ཟད་མི་རྟོག་པ་སྒོམ་དུ་གཞུགདེས་ཐུགས་ཀྱི་རྗེས་གནང་ཐོབ་པ་ལགས། དེ་དག་གི་གནས་སྐབས་སུ་ཐོབ་པའི་དམ་ཚིག་དང་སྡོམ་པ་བསྲུང་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། ལན་གསུམ། བཀའ་དྲིན་གཏང་རག་གི་དོན་དུ་མཎྜལ་ཕུལ་མཛོད་ཅེས་བརྗོད་ལ། སློབ་མས་ཀྱང་མཎྜལ་འབུལ། རང་གི་ལུས་དང་ལོངས་སྤྱོད་དུས་གསུམ་གྱི་དགེ་བའི་དངོས་པོ་ཐམས་ཅད་ལྷ་དང་བླ་མ་ལ་འབུལ། ཆ་ཤས་ཀྱང་ལོངས་སྤྱོད་དུ་གསོལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་བདག་བྲན་དུ། ཁྱོད་ལ་བདག་ནི་འབུལ་ལགས་ཀྱི། ཁྱོད་ཀྱིས་སློབ་མ་བཟུང་བ་དང༌། །ཆ་ཤས་ཀྱིས་ཀྱང་སྤྱད་དུ་གསོལ། ལན་གསུམ། བསོད་ནམས་འདི་ཡིས་སོགས་དང༌། སྨོན་ལམ་དང་བཀྲ་ཤིས་ཀྱི་ཚིགས་བཅད་ཅི་རིགས་པ་བརྗོད། དེས་སློབ་མ་རྗེས་སུ་འཛིན་པའི་བྱ་བ་རྫོགས་པ་ཡིན། རྗེས་ཆོག་ནི་མཆོད་པ་རྣམས་ཁ་གསོས་ལ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཨོཾ་ལས་བྱུང་བའི་ནས། ཨ་ཁཾ་སྭཱཧཱའི་བར་ཀྱི་བྱིན་གྱིས་བརླབས། ཨོཾ་ཨཱཪྱ་ཏཱ་རེ་གུ་རུ་བུདྡྷ་ནས། སྒྲོལ་མ་ལ་ནི་ཕྱག་འཚལ་བསྟོད་ཀྱི་བར་སྒྲུབ་ཐབས་བཞིན། རྗེ་བཙུན་མ་འཕགས་མ་སྒྲོལ་མས་བདག་དང་སློབ་མར་བཅས་པ་ལ་དངོས་གྲུབ་ཐམས་ཅད་སྩལ་དུ་གསོལ། ཡིག་བརྒྱ་ལན་གསུམ་ནས། བཀྲ་ཤིས་ཀྱི་བར་ཡང་སྒྲུབ་ཐབས་ཀྱི་མཆོད་ཆོག་བཞིན་བྱའོ། །འདི་ནི་སྒྲོལ་དཀར་ཇོ་བོ་ལུགས་ཀྱི་དབང་དུ་བྱས་པ་སྟེ། ལུགས་བཞིའི་ནང་ནས་རྩ་བའམ། མ་ལྟ་བུར་གྱུར་པ་ཡིན་ལ། ལུགས་འདི་ལ་ཚེ་ཁྲིད་ཟབ་མོའང་བཞུགས་ཤིང༌། ལས་ཚོགས་
ཀྱང་མང་རབ་ཡོད་དོ། །ལུགས་གཞན་རྣམས་ཀྱི་ཁྱད་པར་ཅུང་ཟད་ཙམ་བརྗོད་ན། བ་རི་ལུགས་དང༌། གཉན་ལུགས་ལ་སྒྲུབ་ཐབས་ཀྱི་སྐབས་གནས་གསུམ་བྱིན་རླབས་མེད། རིགས་བདག་འོད་དཔག་མེད་ཡིན། རྗེས་གནང་གི་ངོ་བོ་སྒྲུབ་ཐབས་བརྒྱ་རྩ་དང་འདྲ། གཉན་ལུགས་ལ་བུམ་ཆོག་སྤྱི་དང་མཐུན་པའི་བུམ་པ་ཞིག་བཅས་ལ། ཐུགས་ཀྱི་རྗེས་གནང་གི་མཐར་བཀྲུ་བྱབས་བསྲུང་གསུམ་མཛད། སྙིང་གའི་སྔགས་འཁོར་ལ་འཁོར་ལོའི་མུ་ཁྱུད་ལ་ཨོཾ་ཡིག་གི་འཕྲེང་བ་བསྒོམ། བ་རི་ལུགས་ལ་སྐུའི་རྣམ་པའང་སྤྱན་གཉིས་མ་གཙོ་བོར་མཛད། སྐུ་འགྱིང་བག་མེད་པའི་དྲང་པོ། གཡོན་གྱི་ཨུཏྤལ་དུས་གསུམ་གྱི་སངས་རྒྱས་མཚོན་པའི་མེ་ཏོག་ཁ་ཟུམ་ཞིང་ཡལ་བ་དང༌། འབུས་པ་དང༌། རྒྱས་པ་གསུམ་ཡོད། ལུགས་འདི་ལ་ལས་ཚོགས་ཤིན་ཏུ་མང༌། པཎ་ཆེན་ནགས་རིན་གྱི་ལུགས་ལ། སྔོན་འགྲོ་སྐྱབས་སེམས་ཁོ་ན་ཡིན། སྟོང་པའི་ངང་ལས་ཧཱུཾ་ལས་བསྲུང་འཁོར་དང༌། བྷྲུཾ་ལས་ཆུ་ཤེལ་གྱི་གཞལ་མེད་ཁང༌། དེར་ཏཱཾཿལས་སྒྲོལ་དཀར་འོད་དཔག་མེད་ཀྱི་དབུ་བརྒྱན་རང་ཆས་སུ་ཡོད་པ་ཞིག་བསྒོམ། གནས་གསུམ་བྱིན་རླབས། ཡེ་ཤེས་སྤྱན་དྲངས། དབང་བསྐུར་རྒྱས་བཏབ། མཆོད་བསྟོད་རྣམས་བདག་བསྐྱེད་ལ་མི་མཛད། རྗེས་གནང་ལ་ཕལ་ཆེར་ཇོ་བོ་ལུགས་དང་འདྲ་བ་ལས། སྔོན་འགྲོའི་སྐབས་སངས་རྒྱས་ཆོས་དང་མ་མི་དགོས། གསུང་གི་རྗེས་གནང་གི་སྐབས། སློབ་དཔོན་དང་མདུན་བསྐྱེད་ཀྱི་ཐུགས་ཀའི་འཁོར་ལོ་སྔགས་འཕྲེང་དང་བཅས་པ་ཡོངས་རྫོགས་སློབ་མའི་སྙིང་གའི་སྔགས་འཁོར་ལ་བསྟིམ། ཐུགས་ཀྱི་རྗེས་གནང་གི་སྐབས། སློབ་དཔོན་གྱི་སྙིང་གའི་སྔགས་འཁོར་གྱི་འོད་ཀྱིས་རིགས་བདག་བསྐུལ། ཕྱག་གི་ལྷུང་བཟེད་ཀྱི་འོད་ཀྱིས་སྣོད་བཅུད་ཐམས་ཅད་ཀྱི་བཅུད་བསྡུས་ནས་སློབ་མའི་སྤྱི་བོ་ནས་ཞུགས་ཏེ།
སྙིང་གའི་སྔགས་འཁོར་ལ་བསྟིམ། འདི་དང་བ་རི་ལུགས་གཉིས་མཐུན་པར་ལས་སྔགས་ཁོ་ན་ལ་བཟླས་པ་བྱེད་ཅིང༌། འཁོར་ལོ་ལ་མུ་ཁྱུད་རིམ་པ་གསུམ་གྱི་ནང་མ་ལ་ཨཱ་ལི་གཡོན་བསྐོར། བར་པ་ལ་ཀཱ་ལི་གཡས་བསྐོར། ཕྱི་མ་ལ་རྟེན་འབྲེལ་སྙིང་པོ་གཡས་བསྐོར་དུ་བསྒོམ། པཎ་ཆེན་ཤཱཀྱ་ཤྲཱིས་ཀྱང་ངག་དབང་གྲགས་པའི་ལུགས་འདི་ཅུང་ཟད་གསུངས་ཤིང་བསྒྱུར་བར་ཡང་མཛད་མོད་ཀྱི། དེང་སང་དེ་ནས་བརྒྱུད་པའི་བཀའ་མེད་པར་མངོན། པཎ་ཆེན་ཉིད་ཀྱི་ཞལ་གཟིགས་ནི་ལྷ་དགུ་མ་ཡིན་ལ། སྔགས་ཀྱང་གཞན་ཡིན་པའི་ཕྱིར་ངག་དབང་གྲགས་པའི་ལུགས་དང་མ་འབྲེལ་བས། ལུགས་འདི་དག་དང་བསྲེ་བར་མི་བྱ་སྟེ། སྒྲུབ་ཐབས་ཀྱང་ལོགས་སུ་སྟོན་ཏོ། །འདི་ཤེས་ཆོས་འདིའི་ལུགས་སྲོལ་ཀུན༵། །མ་འདྲེས་སོ་སོའི་འབྱེད་ལ་དག༵འ། །ཡིག་ཚོགས་ཆེ་བ་མི་ངོམ་པར། །སྙིང༵་པོ༵འི་གནད་ལ་མཁས་པར་འགྱུར། །སྒྲོལ་དཀར་ཡིད་བཞིན་འཁོར་ལོའི་སྒྲུབ་ཐབས་ཀྱི་ཡན་ལག་རྗེས་གནང་གི་ལེ་ཚན་ནོ།། །།དགེའོ། །
འཕགས་མ་དབྱངས་ཅན་མའི་སྒྲུབ་ཐབས།
འཕགས་མ་དབྱངས་ཅན་མའི་སྒྲུབ་ཐབས་ཡེ་ཤེས་འཆར་བ་ཞེས་བྱ་བ་བཞུགས་སོ། ༈ ཨོཾ་སྭཱ་སྟི། འཕགས་མ་དབྱངས་ཅན་མའི་སྒྲུབ་ཐབས་ཡེ་ཤེས་འཆར་བ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དཔལ་ལྡན་འཇིག་རྟེན་མགོན་པོ་ཡིས། །གདུལ་བྱའི་བློ་མུན་བསལ་བའི་ཕྱིར། །ཐབས་མཁས་ལྷ་མོའི་སྐུར་སྤྲུལ་པ། །དཔལ་མོ་དབྱངས་ཅན་མ་ལ་འདུད། །སྒྲུབ་ཐབས་མཆོད་པའི་ཆོ་ག་ནི། །མན་ངག་བཅས་པ་མདོར་བསྡུས་ཏེ། །བློ་ལྡན་གཞན་ལ་ཕན་དོན་དུ། །ཅུང་ཟད་ཡི་གེའི་ལམ་དུ་སྤེལ། །འདི་ལ་བསྙེན་པའི་མན་ངག་དང༌། མཆོད་པའི་
ཆོ་ག་དང༌། ཉེར་མཁོའི་མན་ངག་སྟེ་གསུམ་ལས། དང་པོ་ནི། སྐྱབས་འགྲོ་སེམས་བསྐྱེད་ཚད་མེད་བཞི་རྣམས་སྤྱི་དང་མཐུན། བླ་མ་ཡི་དམ་སངས་རྒྱས་བྱང་ཆུབ་སེམས་དཔའི་ཚོགས་ཐམས་ཅད་མདུན་དུ་བཞུགས་པར་གྱུར། དཀོན་མཆོག་གསུམ་ལ་བདག་སྐྱབས་མཆི། སོགས་ཡན་ལག་བདུན་པ་ཚར་གསུམ་བྱ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་བྷྲུཾ་ལས་སྣོད་ཀྱི་འཇིག་རྟེན་ལྷ་དང་དྲང་སྲོང་དྲི་ཟ་གྲུབ་པའི་ཚོགས་ཀྱིས་བསྟེན་པའི་གནས། རི་བོ་ནགས་ཚལ་སྨན་ལྗོངས་ཉམས་དགའ་བའི་དབུས། འོ་མའི་རྒྱ་མཚོ་དཀར་ལ་དྭངས་པའི་ནང་དུ། པཾ་ལས་པདྨ་དཀར་པོ་འདབ་མ་འབུམ་ཕྲག་རྒྱས་པའི་སྡོང་པོ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་རང་སེམས་ཧྲཱིཾཿདཀར་པོ་ཡོངས་སུ་གྱུར་པ་ལས། རང་ཉིད་སྒྲ་དབྱངས་ལྷ་མོ་དབྱངས་ཅན་མ་སྐུ་མདོག་དཀར་མོ་ཞལ་གཅིག་ཕྱག་གཉིས། སྐྱིལ་ཀྲུང་ཕྱེད་པ་ཙོག་པུའི་འདུག་སྟངས་ཅན། ཞལ་རས་ཟླ་བ་ཉ་གང་བ་ལྟ་བུ། ཨུཏྤལ་ལྟར་བཀྲ་བའི་སྤྱན་ཟུང་གཡོ་བས་མཛེས་པ། ཕྱག་གཡོན་པས་བཻཌཱུཪྱའི་རྒྱུད་མང་འཛིན་ཞིང༌། གཡས་པའི་ཕྱག་སོར་གྱི་འདུ་བྱེད་ཀྱིས་བསྐུལ་བས་སྒྲ་དབྱངས་རྒྱ་མཚོ་མངོན་པར་སྒྲུབ་པ། བུང་བ་ལྟར་གནག་པའི་སྐྲ་ཚོགས་ཕྱེད་སྟག་པར་བཅིངས་ཤིང༌། ཕྱེད་གསིལ་བུར་གྲོལ་བས་སྐུ་སྟོད་ཁྱབ་པ། པདྨ་དཀར་པོའི་ཕྲེང་བའི་ཐོད་བཅིངས་དང༌། རིན་པོ་ཆེའི་སྣ་ཚོགས་པས་སྐྲའི་ཟར་བུ་མཛེས་པ། བཅུ་དྲུག་ལོན་པའི་ལང་ཚོ་ཅན། ནུ་འབུར་མཐོ་ལ་རྒྱས་པ། སྐེད་སྐབས་ཕྲ་ཞིང་སྒེག་ལ་འཛུམ་པའི་ཉམས་ཅན། ལྷ་རྫས་ཀྱི་སྟོད་གཡོགས་དཀར་པོ་དང༌། སྨད་གཡོགས་དབང་པོའི་གཞུ་ལྟར་
བཀྲ་བའི་ལྷབ་ལྷུབ་གཡོ་བ། ནོར་བུ་རིན་པོ་ཆེའི་རྒྱན་དུ་མས་རྣམ་པར་བརྒྱན་པ་ནི། གཙུག་གི་ནོར་བུ། སྙན་རྒྱན། མགུལ་རྒྱན། ཕྱག་གདུབ། ཞབས་གདུབ། སོར་གདུབ། སྐ་རགས། དོ་ཤལ། སེ་མོ་དོ། གཡེར་ཁའི་ཕྲེང་ལ་སོགས་པས་བརྒྱན་པའོ། །རང་གི་སྙིང་ཆུ་ཤིང་གི་མེ་ཏོག་ལྟར་ཁ་ཐུར་དུ་ལྟ་བ་དེ་ཉིད་གྱེན་དུ་ལངས་པས་ཨུཏྤལ་དམར་པོ་ཁ་འབུས་པའི་རྣམ་པ་ཅན་དུ་གྱུར་པའི་ནང་དུ། ཨོཾ་དཀར་པོ། རླུང་ཅུང་ཟད་ཕྱིར་བསལ། ཨོཾ་གྱི་ནཱ་ད་ལས་འོད་ཟེར་དཀར་པོ་འཕྲོས། སྣ་བུག་གཡས་ནས་ཐོན། ལྷོ་ཕྱོགས་རྒྱ་མཚོའི་འགྲམ་རིག་འཛིན་དགའ་བའི་ཚལ་ན་ལྷ་མོ་དབྱངས་ཅན་མ་བཞུགས་པའི་ཤངས་བུག་གཡོན་ནས་ཞུགས། ཐུགས་ཀ་ནས་ངོ་བོ་ཡེ་ཤེས་སེམས་དཔའ། རྣམ་པ་དབྱངས་ཅན་གྱི་འཁོར་ལོ་འོད་ཟེར་འབར་བ་སྤྱན་དྲངས་ཏེ། ཤངས་བུག་གཡས་ནས་ཐོན། སྐད་ཅིག་གིས་བྱོན་ཏེ། རང་གི་མདུན་གྱི་ནམ་མཁར་བཞུགས་པ་ལ་གློ་བུར་དུ་བྱུང་བའི་མཆོད་པ་ནམ་མཁའ་གང་བས་མཆོད་པར་གྱུར། ཨོཾ་པྲི་ཏི་དེ་ཝཱི་དཱི་བྱ་པུཥྤེ་ཧཱུཾ། དེ་བཞིན་དུ་སྦྱར་ཏེ། དྷཱུ་པེ། གནྡྷེ། ནཻ་ཝེ་ཏེ། ཨཱ་ལོ་ཀེ ཨོཾ་པྲི་ཏི་དེ་ཝཱི་དཱི་བྱ་བི་ལེ་པ་ནི་ཧཱུཾ། ཞེས་པས་མཆོད། ཨོཾ་པྲི་ཏི་དེ་ཝཱི་མེ་ཧྲཱིཾཿཥྛི་ཏིཥྛ་ཧྲཱིཾཿ ཞེས་ཤུབ་བུར་བརྗོད་ནས། དབུགས་ནང་དུ་རྔུབས། འཁོར་ལོ་སྣ་བུག་གཡོན་ནས་ཞུགས། འོད་དུ་ཞུ་སྟེ། ཨོཾ་གྱི་ནཱ་ད་ལ་ཐིམ། ཨོཾ་ཡོངས་སུ་གྱུར་པ་ལས། དབྱངས་ཅན་གྱི་འཁོར་ལོ་པདྨ་དཀར་པོ་འདབ་བརྒྱད་ཤིན་ཏུ་རྒྱས་པ། ལྟེ་བ་ལྗང་ཁུ་ཟེའུ་དམར་སེར། དེའི་སྟེང་དུ་ཟླ་བ་རྙོག་བྲལ་གྱི་དབུས་སུ་ཧྲཱིཾཿདཀར་པོ་ནཱ་ད་དང་བཅས་པ། འདབ་མ་བརྒྱད་ལ་དབྱངས་ཀྱི་ཡི་གེ་གཉིས་གཉིས་ཏེ་གཡས་བསྐོར་དུ་འཁོར་
བ། མར་མེ་དཀར་པོའི་ཕྲེང་བ་ལྟ་བུའོ། །འཁོར་ལོ་ཡིག་འབྲུ་དང་བཅས་པའི་འོད་ཟེར་གྱིས། ལུས་ཀྱི་ཕྱི་ནང་ཐམས་ཅད་ཁྱབ། མི་ཤེས་པའི་མུན་པ་དག །ཤེས་བྱ་ཐམས་ཅད་ལ་ཆགས་ཐོགས་མེད་པའི་བློ་གྲོས་ཀྱི་སྣང་བ་རྒྱས་པར་གྱུར། ཞེས་བརྗོད་ཅིང་བསྒོམ། དབྱངས་ཅན་དགའ་བའི་ཞབས་ཀྱི་སྒྲུབ་ཐབས་ན། ཡན་ལག་བཞི་བསྐྱེད་མཛད་པ་ལྟར་སྤྲོ་ན་བྱ་བར་ལྟ་རུང་མོད་ཀྱི། འོན་ཀྱང་འདི་ནི་མན་ངག་ཐུན་མོང་མ་ཡིན་པའོ། །བསྡུས་པ་ལ་དགའ་ན། སྐྱབས་འགྲོ་སེམས་བསྐྱེད། སྭ་བྷཱ་ཝ་སོགས་དང༌། སྟོང་པའི་ངང་ལས་རང་ཉིད་སྐད་ཅིག་ཙམ་གྱིས་སྒྲ་དབྱངས་ལྷ་མོ་དབྱངས་ཅན་མ་སྐུ་མདོག་དཀར་མོ་ཞེས་པ་མན་ཆད་ཀྱིས་ཆོག་གོ །བཟླས་པ་ནི་འཁོར་ལོ་དེ་ཉིད་ལྟེ་བར་བཀོད་ཀྱང་རུང་སྟེ། ཧྲཱིཾཿཞེས་བཟླས་པས། འཁོར་ལོའི་དབུས་ཀྱི་ཧྲཱིཾཿགི་ནཱ་ད་ལས་ཧྲཱིཾཿཆད། ཞལ་ནས་ཐོན། དེའི་འོད་ཟེར་གྱིས་བཀུག་པའི་དེ་བཞིན་གཤེགས་པ་རྣམས་ཀྱི་བྱིན་རླབས་དང་ལྷན་ཅིག་ལྟེ་བའི་དཀྱིལ་འཁོར་ནས་ཞུགས་ཏེ་འཁོར་ལོའི་དབུས་ཀྱི་ཧྲཱིཾཿལ་ཐིམ། འཁོར་ལོ་ལྟར་ཟླུམ་པོ་དང༌། མུ་ཏིག་དོ་ཤལ་ལྟར་འཆང་བ་གང་བསྒོམས་ཀྱང་རུང་ངོ༌། །ཐུན་འཇོག་ཁར་འོག་ནས་འབྱུང་བ་ལྟར་གཏོར་མ་ཕུལ་ལ། ཕྱོགས་ཐམས་ཅད་ལས་རྣམ་པར་རྒྱལ་བའི་ཤེས་རབ་སྩལ་དུ་གསོལ། ཞེས་ལན་མང་དུ་གསོལ་བ་བཏབ། ཡི་གེ་བརྒྱ་པ་སོགས་རྗེས་ཀྱི་བྱ་བ་རྣམས་བྱས་ལ། གནས་གསུམ་བྱིན་གྱིས་བརླབས་ཏེ། ཐུན་མཚམས་ཀྱི་བྱ་བ་ལ་འཇུགཛམྦྷ་ལའི་ཆུ་སྦྱིན་ཡང་མ་ཆག་པར་བྱ། དེ་དག་ནི་རྒྱུན་གྱི་རྣལ་འབྱོར་ཏེ། དེ་ལྟར་ཐུན་བཞིར་བརྩོན་པ་ལ་གནས་ཤིང༌། མི་ཚིག་གིས་བར་མཆོད་པར་བཟླས་པ་འབུམ་ཕྲག་གཅིག་དང༌། ཉི་ཁྲི་ལྔ་སྟོང་བཟླ་བར་བཤད་པ་ད་ལྟ་བཞི་འགྱུར་དུ་བྱེད་དགོས་པས། འབུམ་ཕྲག་ལྔ་བཟླ་ཞིང༌།
དེ་ཉིད་ལན་གསུམ་དུ་བརྩམས་པ་ནི། འབུམ་ཕྲག་བཅོ་ལྔ་སྟེ། དེ་ཙམ་གྱིས་གྲངས་ཀྱི་བསྙེན་པ་ཚར་གཅིག་རྫོགས་པ་ཡིན་ནོ། །གཉིས་པ་མཆོད་པས་ཆོ་ག་ནི་ས་སྟེགས་གྲུ་བཞི་ཁྲུ་དོ་པ་ཤིན་ཏུ་མཉམ་པའམ། དབུས་དང༌། ལྷོ་དང༌། ནུབ་ཅུང་ཟད་མཐོ་ཞིང༌། ཤར་དང་བྱང་ཅུང་ཟད་དམའ་བ་ལ། བ་བྱུང་ལྔས་ཆག་ཆག་བཏབ། ཚངས་ཟུར་གྱིས་ཐིག་གདབ། ལྟེ་བ་སོར་བཞིར་བསྐོར་བ་དང༌། འདབ་མ་ལ་ཁྲུ་ཕྱེད་བསྐོར་བ། དེ་ལ་རྡུལ་ཚོན་ནམ་ཆུ་ཚོན་གྱིས་པདྨ་འདབ་བརྒྱད་བྲི། ཡང་ན་དར་རམ་རས་གཞི་ལ་བྲིས་པ་སྟེགས་བུའི་སྟེང་དུ་བཀྲམ་ཡང་རུང་ངོ༌། །དེའི་དབུས་དང་འདབ་མ་བརྒྱད་ལ་མར་གྱི་མར་མེ་རེ་རེ་བཞག་པའམ། ཏིང་ལོ་ཆུང་ངུ་དགུ་དབུས་སུ་བཞག་ཀྱང་རུང་ངོ༌། །ཡང་ན་ལྟེ་བ་དང་འདབ་མ་རྣམས་ལ་བཞི་མཉམ་གྱིས་སྙིང་གའི་འཁོར་ལོ་དང་འདྲ་བའི་ཡི་གེ་རྣམས་བྲིའོ། །བཞི་མཉམ་ནི། ཙན་དན། གླ་རྩི། གུར་གུམ། གི་ཧཾ་སྟེ་བཞི་པོ་སྦྱར་བའི་ལྡེ་གུ་ཡིན་ནོ། །དཀྱིལ་འཁོར་དེའི་དབུས་སུ་སྐུ་གཟུགས་ལུགས་མ་ལྟ་བུ་བཞུགས་སུ་གསོལ། དེ་མེད་ན་དཀྱིལ་འཁོར་གྱི་རྒྱབ་ཏུ་བྲིས་སྐུ་བཀྲམས་པས་ཀྱང་དེའི་དོད་དུ་འགྱུར། མ་འབྱོར་ན་བྲིས་འབུར་གྱི་སྐུ་གཟུགས་མེད་ཀྱང་རུང༌། མདུན་དུ་དཀར་གཏོར་ཆེ་ཆུང་གཉིས་དང༌། མཆོད་པ་གཙང་ཞིང་བཟང་བ་འབྱོར་ཚད་བཤམ། ཆང་བུའི་གཏོར་མའང་བཤམ། དེ་ནས་ཨ་མྲྀ་ཏའི་སྔགས་ཀྱིས་བགེགས་བསྐྲད། བདག་བསྐྱེད་བཟླས་པ་དང་བཅས་པ་ཚར་གཅིག་བསྒོམས་ཏེ། མདུན་གྱི་དཀྱིལ་འཁོར་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཧཱུཾ་ཡིག་ལས་བྱུང་བའི་བསྲུང་བའི་འཁོར་ལོའི་དབུས་སུ་ཨོཾ་ཡོངས་སུ་གྱུར་པ་ལས་དབྱངས་ཅན་གྱི་འཁོར་ལོ་ཞེས་པ་ནས། ལྟ་བུའི་བར་བདག་བསྐྱེད་བཞིན། འཁོར་ལོ་ཡིག་འབྲུ་དང་བཅས་པའི་འོད་
ཟེར་རིང་དུ་འཕྲོས་པས། ལྷོ་ཕྱོགས་རྒྱ་མཚོའི་འགྲམ་རིག་འཛིན་དགའ་བའི་ཞེས་པ་ནས། བི་ལི་པ་ནི་ཧཱུཾ་གི་བར་གོང་བཞིན། ཛཿཧཱུཾ་བཾ་ཧོཿ འཁོར་ལོ་དམ་ཚིག་པ་དང་གཉིས་སུ་མེད་པར་གྱུར། ཨོཾ་པྲི་ཏི་དེ་ཝཱི་ཧྲཱིཾཿ ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ ཞེས་བརྒྱ་རྩ་བརྒྱད་བཟླས། འཁོར་ལོ་དེ་ཉིད་གཞལ་མེད་ཁང་དང་བཅས་པ་ལྷ་མོའི་སྐུར་གྱུར། མཆོད་པ་རྣམས་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་བའི་ནང་དུ། ཧཱུཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོགབདུག་སྤོས། མར་མེ། དྲི་ཆབ། ཞལ་ཟས་རྣམས་ནམ་མཁའི་ཁམས་ཐམས་ཅད་ཁྱབ་པར་གྱུར། ཨོཾ་བཛྲ་ཨརྒྷཾ་སྭཱཧཱ་ནས། ཤབྟ་ཨཱཿཧཱུཾ་གི་བར་གྱིས་བྱིན་གྱིས་བརླབས། ཡེ་ཤེས་བདེ་བ་ཆེན་པོའི་དངོས། །མཆོད་ཡོན་བདུད་རྩིའི་རྒྱ་མཚོ་འདི། །དཔལ་གྱི་ལྷ་མོ་དབྱངས་ཅན་མ། །རྒྱལ་བ་སྲས་བཅས་རྣམས་ལ་འབུལ། །ཨོཾ་སྭ་ར་སྭ་སྟི་དེ་ཝཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ་འདོན་པ་སྤོས་ཏེ། ཞབས་བསིལ་བདུད་རྩིའི་ཆུ་རྒྱུན་འདི། །པཱདྱཾ། ལྷའི་མེ་ཏོག་སྣ་ཚོགས་པ། །ཡོངས་འདུ་མནྡ་ར་བ་དང་། །འདབ་བརྒྱ་ཨུཏྤལ་ཀུ་མུད་སོགས། །འབུལ་གྱི་བདག་ལ་དགྱེས་པར་མཛོད། །པུཥྤེ། སྣ་ཚོགས་དྲི་ཞིམ་སྤོས་ཀྱི་མཆོག །ཞིང་ཀུན་ཁྱབ་པར་བྱེད་པ་འདི། །ངག་དབང་ལྷ་མོ་ལ་འབུལ་གྱི། །དངོས་གྲུབ་སྩོལ་ཕྱིར་བཞེས་སུ་གསོལ། །དྷཱུ་པེ། སྣ་ཚོགས་ནོར་བུའི་སྣང་གསལ་དང༌། །བགེགས་འཇོམས་མར་མེའི་ཕྲེང་བ་འདི། །མཆོག་ཏུ་དགེས་པས་བཞེས་སུ་གསོལ། །བློ་དང་མཆོག་གི་
དངོས་གྲུབ་སྩོལ། །ཨཱ་ལོ་ཀེ །བཞི་མཉམ་སྦྱར་བའི་དྲི་མཆོག་འདི། །ལྷའི་དྲི་བཟང་ཕྱེ་མ་དང༌། །བྱུགས་པ་ཡིས་ཀྱང་བྱུག་པར་བྱ། །རྫུ་འཕྲུལ་དངོས་གྲུབ་བདག་ལ་སྩོལ། །གནྡྷེ། བཟའ་བ་བཅའ་བའི་ཁྱད་པར་དང༌། །སྣ་ཚོགས་བདུད་རྩིའི་ཞལ་ཟས་ནི། །བཏུང་བའི་བྱེ་བྲག་འབུམ་དང་སྦྱར། །བཞེས་ནས་བྱིན་གྱིས་བརླབ་པར་མཛོད། །ནཻ་ཝེ་ཏེ། དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་ཚིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །ཤཔྟ། དེ་ནས་སྤྲོ་ན་རྒྱལ་སྲིད་སྣ་བདུན། འདོད་ཡོན་ལྔ། བཀྲ་ཤིས་རྟགས་བརྒྱད། རྫས་བརྒྱད་ལ་སོགས་པ་རྣམས་ཀྱིས་མཆོད། བསྟོད་པ་ནི། སྤྱན་རས་གཟིགས་དབང་མཆེ་བའི་རྩེ་མོ་ལས་ནི་མངོན་སྤྲུལ་ཞིང༌། །ཐོགས་མེད་རྣམ་འཕྲུལ་མཐའ་ཡས་རོལ་པས་རྗེས་སུ་བཟུང་བའི་ཕྱིར། །ཚངས་པའི་བུ་མོ་ཁྱོད་སྐུ་རབ་ཏུ་གསལ་བའི་རྣམ་འགྱུར་ཅན། །བིཥྞུའི་གཟུགས་བརྙན་གཏུམ་པོ་རབ་དགའ་བསྐྱེད་པའི་ཚུལ་འཛིན་མ། །རྗེས་སུ་ཆགས་བཅས་རོལ་པའི་ལོ་ནི་བརྒྱད་གཉིས་ལོན་པའི་ཉམས། །ཆུ་གཏེར་འགྲམ་ངོགས་སྦུ་བའི་ཕྲེང་བས་རྩེ་བའི་དགའ་བ་ཅན། །དྲི་ཟའི་བུ་མོས་མངོན་བསྟོད་ཉིད་ཀྱི་རྣམ་ཐར་ཕུལ་བྱུང་རྣམས། །གང་གིས་ཡིད་ལ་དྲན་བྱེད་དེ་ལ་ངག་གི་དངོས་གྲུབ་མྱུར་དུ་སྩོལ། ཁོ་བོས་ཁྱོད་དྲན་བ་སྤུ་ཤས་ཆེར་གཡོས་པའི་ལག་པ་ཡིས། །ཐལ་སྦྱར་མེ་ཏོག་གཞོན་ནུ་ཁ་འབུས་ལྟ་བུ་སྤྱི་བོའི་སྟེང༌། །རབ་བཞག་སྙིང་ནས་གུས་པ་ལྷུར་བྱེད་ཁྱོད་ཀྱི་ཡོན་ཏན་ཆེ། །མཐའ་དག་རྟོགས་མིན་འདིར་ནི་སྡེབ་སྦྱོར་ལེགས་པའི་ཕྲེང་བས་མཆོད། །
དེ་ལྟར་ཁྱོད་བསྟོད་ལྷུར་ལེན་གང་ཡིན་དེ་ནི་ཡོན་ཏན་གྱིས། །དབུས་འགྱུར་སྣ་ཚོགས་རིག་པའི་གཞུང་ལས་རབ་སྐྱེས་ཆོས་ཀྱི་དོན། །མྱུར་རྟོགས་ས་གསུམ་སྐྱེ་དགུའི་གཞུང་སྒྲོན་གཏི་མུག་མུན་པ་རྣམས། །རབ་བསལ་སྐྱེ་བོས་རྒྱལ་བའི་དབང་པོ་འོད་དཔག་མེད་འདྲ་ཐོབ་པར་ཤོག །ཅེས་པ་དང་གཞན་ཡང་ཚིག་དོན་ཕུན་སུམ་ཚོགས་པའི་བསྟོད་པ་ཅི་ཤེས་ཀྱིས་བསྟོད་དོ། །གཏོར་མ་བསངས་སྦྱངས། སྟོང་པའི་ངང་ལས་བྷྲུཾ་ལས་བྱུང་བའི་གཏོར་སྣོད་རིན་པོ་ཆེ་ལས་གྲུབ་པ་ཡངས་ཤིང་རྒྱ་ཆེ་བ་སྟོང་གསུམ་དང་ཁྱོན་མཉམ་པའི་ནང་དུ། ཨོཾ་ཨཱཿཧཱུཾ་ཞུ་བ་ལས་བྱུང་བའི་གཏོར་མ་འདོད་དགུའི་རྒྱ་མཚོར་གྱུར། ཨོཾ་ཨཱཿཧཱུཾ་ཉེར་གཅིག་བརྗོད་པས་བྱིན་གྱིས་བརླབས། ཨོཾ་སྭ་ར་སྭ་སྟི་ས་པ་རི་ཝཱ་རེ་བྷྱཿ ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཱཾ་ཨཱདྱ་ནུཏྤནྣ་ཏྭ་ཏ་ཨོཾ་ཨཱཿཧཱུཾ་ཕཊ་སྭཱཧཱ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུཾ་ཞེས་ལན་བདུན་གྱིས་ལྷ་མོ་དབྱངས་ཅན་མ་ལ་ཕུལ། ཆུ་གཉིས་སྔོན་དུ་འགྲོ་བའི་མེ་ཏོག་ལ་སོགས་པས་མཆོད། མཁྱེན་བཟང་རབ་ཏུ་རྒྱས་པའི་པདྨ་དང༌། །ཐུགས་རྗེས་དྲི་མེད་ཟླ་བའི་གདན་ལ་འགྱིང༌། །སྒྲ་དབྱངས་རྒྱ་མཚོ་པི་ཝཾ་གསུང་སྙན་གྱིས། ཁམས་གསུམ་དབུགས་འབྱིན་ལྷ་མོ་ཁྱོད་ལ་འདུད། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །འཕགས་མ་དབྱངས་ཅན་མ་འཁོར་དང་བཅས་པ་ཐམས་ཅད་ཀྱིས་བདག་ལ་ཐུགས་བརྩེ་བར་མཛད་དུ་གསོལ། བདག་ལ་དངོས་གྲུབ་སྩལ་དུ་གསོལ། ཕུན་སུམ་ཚོགས་པའི་ཤེས་རབ། ཆགས་ཐོགས་མེད་པའི་སྤོབས་པ ། གཞན་དྲིང་མི་འཇོག་པའི་བློ་གྲོས།
ཚངས་པའི་དབྱངས་ཀྱི་ངག་རྣམས་སྩལ་དུ་གསོལ། རིག་པ་རང་གྲོལ་བའི་སྨྲ་བ་ཕུན་སུམ་ཚོགས་པ་དང༌། སྡེ་སྣོད་མ་ལུས་པའི་དོན་རྟོགས་པ་དང༌། རིག་པའི་གནས་མཐའ་དག་ཁོང་དུ་ཆུད་ཅིང༌། རིག་པ་དྲི་མ་མེད་པའི་རྟོག་གེ་དང༌། ཚིག་རྒྱན་ཕུལ་དུ་བྱུང་བའི་སྙན་ངག་སོགས་འཆད་རྩོད་རྩོམ་པ་ལ་ཐོགས་པ་མེད་པའི་བློ་གྲོས་བསྐྱེད་དུ་གསོལ། གཞན་ཡང་ཕྱི་ནང་གི་བར་ཆད་ཐམས་ཅད་ཞི་བ་དང༌། དངོས་གྲུབ་མ་ལུས་པ་ཡིད་བཞིན་དུ་སྩལ་དུ་གསོལ། གཏོར་མ་གཉིས་པ་ཡང་གོང་བཞིན་བྱིན་གྱིས་བརླབས་ཏེ། ནོར་རྒྱུན་མ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཞེས་སྤྱན་དྲངས། ཨོཾ་བཱ་སུ་དྷ་ར་ཧཱུཾ་སྭཱཧཱ། ཨོཾ་པྲ་ཀ་ར་ཛ་མེ་སྭཱཧཱ། ཞེས་ལན་བདུན་ནམ་ཉི་ཤུ་རྩ་གཅིག་གིས་འབུལ། བདག་མིང་འདི་ཞེས་བགྱི་བར་དཔལ་ལྷ་མོ་དབྱངས་ཅན་མ་སྒྲུབ་པ་ལ་ཕྲག་དོག་དང་བར་ཆད་མ་མཛད་པར་ནོར་འཕེལ་བར་མཛད་དུ་གསོལ། ཞེས་གསོལ་བ་གཏབ། ཆང་བུའི་གཏོར་མ་གོང་བཞིན་བྱིན་གྱིས་བརླབས། ཁ་འབར་མའི་སྔགས་ལན་བདུན་གྱིས་འབྱུང་པོ་ཐམས་ཅད་ལ་བསྔོས། བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །གཟུགས་མཛེས་དམ་པ་ལ༴ སྐུ་འབྱམས་ཀླས་ལ༴ འཇིགས་པ་ཐམས་ཅད་དང་བྲལ་བ་ལ༴ སྲིད་པ་གསུམ་གྱི་འབྱུང་པོའི་ཚོགས་རྣམས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། སྒྲུབ་པ་ལ་བར་དུ་གཅོད་པ་མ་མཛད་ཅིགདཀར་ཕྱོགས་སྐྱོང་བ་མཐུ་ལྡན་རྣམས་ཀྱིས་བར་ཆད་བསྲུང་ཞིང༌། དངོས་གྲུབ་སྩོལ་བའི་མཐུན་རྐྱེན་མཛོད་ཅིགཅེས་དང་ཡི་གེ་བརྒྱ་པ་ལན་མང་དུ་བརྗོད་ཅིང༌། ཨོཾ་བཛྲ་སཏྭ་ཧཱུཾ།
བརྒྱ་རྩ་བཟླའོ། །མ་འབྱོར་པ་དང་ཉམས་པ་སོགས་ཀྱིས་བཟོད་པར་གསོལ། ཨརྒྷཾ་ལ་སོགས་པའི་མཆོད། ལྷ་མོ་འོད་དུ་ཞུ། འཁོར་ལོར་གྱུར། སླར་ཡང་གོང་ལྟར། ཨོཾ་པྲ་ཏི་སོགས་ཀྱིས་མཆོད། བྲིས་སྐུ་སོགས་ལ་བརྟན་བཞུགས་བྱ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །སོགས་བར། ཨོཾ་བཛྲ་མུཿ ཞེས་མགྲོན་རྣམས་གཤེགས་སུ་གསོལ། །སྨོན་ལམ་དང་བཀྲ་ཤིས་ཇི་ལྟར་རིགས་པ་བྱའོ། །གསུམ་པ་མན་ངག་ནི། སློབ་མ་རྗེས་བཟུང་དང༌། སྦྱིན་བསྲེག་དང༌། འདོད་ཆགས་ཀྱི་གེགས་བསལ་བ། ནོར་གྱི་གེགས་བསལ་བ། ཤེས་པ་འགྱུར་བའི་གེགས་བསལ་བ། གསུམ་ལ། ཐུན་མོང་དང་ཁྱད་པར་བ་གཉིས་གཉིས་ཏེ་དྲུགདངོས་གྲུབ་ཀྱི་གེགས་སེལ་ལ། དམིགས་པ་དང་རྗེས་སུ་མཐུན་པའི་གདམས་ངག་དང༌། རླུང་གནད་དང་རྗེས་སུ་འབྲེལ་བའི་གདམས་ངག་གཉིས། ལས་སྦྱོར་ཀྱི་སྐབས་རྩོད་པ་ལས་རྒྱལ་བ་དང༌། དུག་ཞི་བ་དང༌། དབང་བསྡུད་དེ་གསུམ་ཡོད་ལ། དེ་ལྟར་ཀུན་དྲིལ་བས། སློབ་དཔོན་བྲམ་ཟེ་ཕུར་བུ་ནས་བརྒྱུད་པའི་གདམས་པ་བཅུ་གསུམ་མཐོང་ངོ༌། །དབྱངས་ཅན་དགའ་བའི་ཞབས་ཀྱི་ཉེ་བརྒྱུད་ཀྱི་མན་ངག་ཏུ་གྲགས་པ་གེགས་སེལ་བོགས་འདོན་མང་དུ་ཡོད་པ་ནི། དེ་ཉིད་ཀྱིས་མཛད་པའི་སྒྲུབ་ཐབས་དང༌། དེའི་ལྷན་ཐབས་རྣམས་སུ་གསལ་བར་བཞུགས་པའི་ཕྱིར། དེ་དག་ཏུ་བལྟ་བར་བྱའོ། །སྔར་བཤད་པའི་མན་ངག་དེ་དག་ལས། གཞན་རྣམས་ནི་ཡིག་རྙིང་དང་བླ་མའི་མན་ངག་ལས་རྟོགས་པར་བྱའོ། །བསྙེན་སྒྲུབ་ལས་སྦྱོར་མཐའ་དག་ལ་ཉེར་བར་མཁོ་ཞིང༌། སྒྲུབ་པ་པོའི་སྡིག་སྒྲིབ་སྦྱང་བ་དང༌། བར་ཆད་སེལ་བ་དང༌། ཚོགས་རྫོགས་པ་དང༌། ལྷ་དགེ་བའི་ཐབས་བླ་ན་མེད་པ་ཡིན་ཞིང༌། ཁྱད་པར་སྒྲུབ་ཐབས་འདི་ལ་བརྟེན་ཏེ་ཤེས་རབ་བསྐྱེད་
པ་ལ་མེད་ཐབས་མེད་པ་ཡིན་པའི་ཕྱིར། སྦྱིན་བསྲེག་གི་ཆོ་ག་མདོ་ཙམ་བཤད་ན། བསྐོས་ཐབ་བམ། བརྩིགས་ཐབ་ཞི་བའི་ཐབ་ཁུང་སྤྱི་དང་མཐུན་པའམ། ཡང་ན་བྲིས་པའི་ཐབ། ཚངས་ཐིག་ཟུར་ཐིག་ལེགས་བཏབ་ནས། ཁྲུ་ཕྱེད་བསྐོར་བ་ཐབ་ཀྱི་ནང༌། །དེ་ནས་སོར་བཞི་ལན་གསུམ་བསྐོར། །ཕྱི་རོལ་ལོགས་བཞིར་གྲུ་བཞི་གདབ། །ཐབ་དང་ཁ་ཁྱེར་མུ་རན་དང༌། །སྟེགས་བུ་རྣམས་ཀྱི་ཐིག་ཡིན་ནོ། །དེ་རྣམས་རྡུལ་ཚོན་དཀར་པོས་བགང་ཞིང༌། དམར་པོ་གཅད་གདབ། དབུས་སུ་པདྨ་འདབ་བརྒྱད་ལ། ས་བོན་དང་དབྱངས་ཡིག་འགོད་ཚུལ་སྙིང་གའི་འཁོར་ལོ་བཞིན་དུ་འབྲི། ཐབ་ཀྱི་སྟེང་དུ་ཤིང་བཟང་པོའི་ཤིང་ལེབ་བམ། བ་དམར་གསལ་གྱི་ལྕི་བས་བརྩིགས། ཁ་ཁྱེར་ལ་པད་འདབ་མུ་རན་ལ་རྡོ་རྗེའི་ཕྲེང་བ། གྲྭ་བཞིར་ཟླ་ཕྱེད་རྡོ་རྗེ་རྣམས་རྡུལ་ཚོན་སེར་པོ་ལ་བཞི་མཉམ་བསྲེས་པས་བྲིས། ཡང་ན་རི་མོ་ཐམས་ཅད་དཀར་པོས་འབྲི་ཞིང༌། བར་རྣམས་སེར་པོས་བཀང་ཡང་རུང༌། ནང་བུད་ཤིང་དྲི་ཞིམ་པོས་ཤིང་སེར་པོར་ཁ་བསྒྱུར་ནས། གྲུ་བཞི་བསྣོལ་མར་འགོད། མེ་ཚང་བྱ་ལུགས་སྤྱི་དང་མཐུན། མཆོད་གཏོར་གོང་མཆོད་ཆོག་གི་སྐབས་ལྟར་བཤམ། བ་བྱུང་གི་མཎྜལ་དུ་བསྲེག་རྫས་ཙན་དན་སོགས་སྤོས་སྣ་ཚོགས་དང༌། མེ་ཏོག་སེར་པོ་དང༌། ཏིང་ལོ་མང་པོ་དང༌། བཞི་མཉམ་སོགས་ལྡེ་གུ་དང་ཕྱེ་མ་དང༌། ཕྱེ་མར་ཀྱི་ཟས་མཆོག་ཆུང་ངུ་མང་པོ་དང༌། ཀུ་ཤའི་མྱུ་གུ་མངར་གསུམ་དང་བཞི་མཉམ་གྱིས་སྦགས་པ་དང༌། ནས། གྲོ། སྲན། འབྲས། ཏིལ་དཀར་ནག་ལ་སོགས་པ་འབྲུ་སྣ་སྣ་ཚོགས་བསྲེས་པ་དང༌། མར་ཁུ་དང༌། མེ་ལྷའི་བསྲེག་རྫས་དང༌། དུང་ཆོས་སུ་བསངས་ཆུ་ཀུ་ཤའི་འཐོར་ཡབ་དང་བཅས་པ་བཤམ། སྐྱབས་
འགྲོ་ནས་བརྩམས་ཏེ་བཟླས་པའི་བར་བདག་བསྐྱེད་རྫོགས་པར་བསྒོམ། བཟླས་པ་ཅི་འགྲུབ་བྱས་ཏེ། བསངས་ཆུ་ལ་དམིགས་ནས། ཨོཾ་ཨ་མྲྀ་ཏ་བརྒྱ་རྩ་བརྒྱད་བཟླས། མཆོད་རྫས་དང་བསྲེག་རྫས་རྣམས་ལ་བསངས་ཆུ་གཏོར་ཞིང༌། གོང་དུ་བསྟན་པ་ལྟར་མཆོད་པ་བྱིན་རླབས་བྱ། ཐབ་བསངས་སྦྱངས། སྟོང་པའི་ངང་ལས་བྷྲུཾ་ལས་བྱུང་བའི་ཐབ་ཁུང་ཟླུམ་པོ་གསེར་བཙོ་མ་ལྟ་བུར་འབར་བ། ཁ་ཁྱེར་མུ་རན་སྟེགས་བུ་དང་བཅས་པ་དྭངས་ཤིང་ཐོགས་པ་མེད་པ། ནང་ལྷ་རྫས་ཀྱི་བུད་ཤིང་གིས་གང་བར་གྱུར། ཨོཾ་ཨགྣ་ཡེ་ཛྭ་ལ་རཾ། ཞེས་དགེ་འདུན་གྱི་རུང་ཁང་ངམ། རྒྱལ་པོའི་ཕོ་བྲང་ནས་བླངས་པའི་མེ་སྦར། རཾ་ལས་བྱུང་བའི་དྲང་སྲོང་ཆེན་པོ་མེ་ལྷའི་ངོ་བོ་མེ་འབར་བའི་རྣམ་པ་ཅན་དུ་གྱུར། རང་གི་སྙིང་ག་ནས་འོད་ཟེར་འཕྲོས། མེ་ལྷ་འཁོར་བཅས་བཛྲ་ས་མཱ་ཛཿ དབྱུག་གུ་རྩེ་གསུམ་གྱི་ཕྱག་རྒྱས་རྣ་བར་གཡོབ་ཅིང༌། ཨོཾ་ཨགྣ་ཡེ་མཧཱ་བྷུ་ཏ་དེ་ཝ་རི་ཥི་དྭེ་ཛ་སཏྭ་མ་གྲྀ་ཧི་ཏྭ་ཨ་ཧུ་ཏི། མཧཱ་ར་ཨསྨིན་ས་ནི་ཧི་ཏྭ་བྷ་བ། ཞེས་སྤྱན་དྲངས། ཛཿཧཱུཾ་བཾ་ཧོཿ འབར་བའི་རྣམ་པ་དང་གཉིས་སུ་མེད་པར་གྱུར། ཨོཾ་ཨགྣ་ཡེ་ཨ་དཱི་བྱ་ཨ་དཱི་བྱ། ཨཱ་བི་ཤ་ཨཱ་བི་ཤ ཧ་བྱ་ཀ་བྱ་ཧ་ན་ཡ་སྭཱཧཱ། ཞེས་པ་དང༌། ཨོཾ་ཨགྣ་ཡེ་སྭཱཧཱ། ལན་བདུན་གྱིས་དགང་བླུགས་ཕུལ། སྭ་ཨརྠནྩཻ་ཝ་པ་ར་ཨརྠནྩ་ས་དྷི་སྟྭཾ་གཙྪ། ཧ་བྱ་བྷུ་ཀ་ཨ་ག་མི་ཥྱ། སི་ཡ་ཐ་ཀ་ལེ། སརྦ་སིདྡྷི་ཀུ་རུ་ཥཱ་མེ། ཞེས་བརྗོད་པས་མེ་ལྷ་དགེས་པར་བསམ། བསྲེག་རྫས་ཐམས་ཅད་གཅིག་ཏུ་བསྲེས་པའི་སྣོད་ལས་བླངས་ཏེ། ཨོཾ་ཨགྣ་ཡེ་སྭཱཧཱ། ཞེས་པས་ལན་ཉི་ཤུ་རྩ་གཅིག་ཙམ་ཕུལ། རང་གི་སྙིང་གའི་ཧྲཱིཾཿཡིག་ལས་འོད་ཟེར་འཕྲོས། ལྷོ་ཕྱོགས་རྒྱ་མཚོའི་
འགྲམ་རིག་འཛིན་དགའ་བའི་ཚལ་ཞེས་པ་ནས། གཉིས་སུ་མེད་པར་གྱུར་གྱི་བར་མདུན་བསྐྱེད་བཞིན། འཁོར་ལོའི་འོད་ལས་ལྷ་མོའི་སྐུ་བྱུང་བར་མོས་ལ། ཨོཾ་པྲི་ཏི་དེ་ཝཱི་ཧྲཱིཾཿཨ་ཨཱ་སོགས་ལན་བདུན་བཟླས། གོང་མཆོད་ཆོག་གི་སྐབས་སུ་བཤད་པ་ལྟར་མཆོད་བསྟོད་བྱ། ཨོཾ་པྲི་ཏི་དེ་ཝཱི་ཧྲིཾཿདེ་བྱ་དྷུ་པེ་ཧཱུཾ། མེ་པྲཛྙཱ་ཝརྡྷ་མ་ན་ཡ་ཨོཾ། ཞེས་པས་བདུག་སྤོས་དང༌། ཨོཾ་པྲི་ཏི་དེ་ཝཱི་དི་བྱ་པུཥྤེ་ཧཱུཾ། མེ་པྲཛྙཱ་ཝརྡྷ་མ་ན་ཡ་ཨོཾ། ཞེས་པས་མེ་ཏོག་སེར་པོ་དང༌། དེ་བཞིན་དུ་འདོན་པ་སྤོས་ཏེ། དཱི་པེ་ཞེས་པས་ཏིང་ལོ་དང༌། བི་ལི་པ་ནི་ཞེས་པས་ལྡེ་གུ་དང༌། ནཻ་ཝེ་ཏྱ་ཟས་མཆོག་དང༌། ཨགྣ་ཡེས་མར་ཁུ་དང༌། ཨ་པྲ་ཏི་ཧ་ད་ཞེས་པས་ཀུ་ཤ་དང༌། བི་ཛ་ཡེ་ཞེས་པས་འབྲུ་སྣ་ཚོགས། ཤྲཱི་ཕ་ལ་ཡིས་ཤིང་ཏོག་སྣ་ཚོགས་སོ། །གཞན་མང་ཉུང་གང་འོས་འབུལ་ལ། ཟས་མཆོག་ལ་གྲངས་བཟུང་ཞིང་འབུལ་ལོ། །ཐུན་རེར་བརྒྱ་རྩ་ལ་སོགས་པ་འབུལ་ལོ། །སླར་གཏོར་མ་འབུལ་བ་ནས། བཛྲ་མུཿཞེས་མགྲོན་རྣམས་གཤེགས་སུ་གསོལ་བའི་བར་གོང་བཞིན། ཨོཾ་པྲི་ཏི་དེ་ཝཱི་མེ་ཧྲཱིཾཿཥྟཱིཿཏིཥྛ་ཧྲཱིཾཿ ཞེས་བཟླས་པས། འཁོར་ལོ་རང་གི་སྙིང་གའི་འཁོར་ལོ་ལ་ཐིམ། སླར་ཡང་མེ་ལ་མར་ཁུ་དང་བསྲེག་རྫས་གོང་བཞིན་འབུལ་ལོ། །ཨོཾ་ཨགྣ་ཡེ་གཙྪ་ཞེས་པས་སྔར་གྱི་ཕྱག་རྒྱ་ཕྱིར་བསྟན་ལ་གཤེགས་སུ་གསོལ། སྨོན་ལམ་དང་བཀྲ་ཤིས་ཅི་ཤེས་བྱའོ། །རྒྱས་པའོ། །དེ་ལས་མེ་ལྷ་མཆོད་པའི་སྐོར་རྣམས་བོར་བ་འབྲིང་པོའོ། ཁ་ཁྱེར་མུ་རན་སྟེགས་བུ་སོགས་མི་འབྲི་བ་དང༌། བསྲེག་རྫས་འབུལ་བའི་ཚེ་ཧྲཱིཾཿམེ་པྲཛྙཱ་ཝརྡྷ་མ་ན་ཡ་ཨོཾ། ཞེས་པ་ཁོ་ནས་འབུལ་བ་ནི་བསྡུས་པ་ཡིན་ཅིང༌། གཞན་གོང་དང་འདྲའོ། །ཧྲཱིཾཿཞེས་པ་གཅིག་པུས་བསྲེག་རྫས་
འབུལ་བ་ནི་ཤིན་ཏུ་བསྡུས་པའོ། །འདིའི་བསྙེན་པ་དང་སྒྲུབ་པ་ལ་གནས་པའི་ཚེ། དམ་ཚིག་ནི་སྤྱིར་རང་གིས་བླངས་པའི་དམ་ཚིག་དང་སྡོམ་པ་ལ་གནས་ཤིང༌། ཁྱད་པར་སྡིག་པ་སྤངས། ཚངས་པར་སྤྱོད་པ་ལ་གནས། རྫུན་མི་སྨྲ་བ་ཤ་ཆང་སྒོག་ཙོང་ལ་ཕུག་ལ་སོགས་པའི་ཁ་ཟས་སྤངས། གོས་གཙང་མ་གྱོན། ཁྲུས་དང་གཙང་སྦྲ་ལ་འབད། གདན་དང་སྒ་རྔས་སུ་མི་འཇུགལྷམ་དང་གོས་རྙིང་སྐྲར་རྙིང་སོགས་ཀྱི་འོག་ཏུ་མི་ཉལ་བ་རྣམས་ལ་འབད་པར་བྱའོ། །མ་ལུས་རྒྱལ་བ་ཐམས་ཅད་ཀྱི། །མཁྱེན་པའི་བདག་ཉིད་འཇམ་པའི་དབྱངས། །དགེས་མཛད་རྡོ་རྗེ་ལྷ་མོ་ཆེ། །གང་དེའི་སྒྲུབ་ཐབས་རྨད་བྱུང་འདི། །འགྲོ་ལ་ཕན་པའི་ཉེར་འཚོ་དང༌། །དེ་ལས་དཔག་ཡས་སེམས་ཅན་རྣམས། །བླ་མེད་དུས་གསུམ་རྒྱལ་བ་ཡི། །མཁྱེན་པའི་གསང་མཛོད་འཛིན་པར་ཤོག །དཔལ་ལྡན་དེ་བཞིན་གཤེགས་ཀུན༵་གྱི། །ལྷན་སྐྱེས་དག༵འ་བའི་རྟེན་གྱུར་པ། །མཚོ་བྱུང་ལྷ་མོ་སྒྲུབ་པའི་ཐབས། །ཀུན་གྱི་སྙིང༵་པོ༵་ངོ་མཚར་རྨད།། །།ཅེས་འཕགས་མ་དབྱངས་ཅན་མའི་སྒྲུབ་ཐབས་ཡེ་ཤེས་འཆར་བ་ཞེས་བྱ་བ། དོན་གཉེར་དུ་མས་སྔ་ཕྱིར་ཡང་ཡང་བསྐུལ་བའི་ངོར། རྒྱལ་ཁམས་པ་ཏཱ་ར་ནཱ་ཐས་ཡར་འབྲོས་སྣ་དཀར་རྩེར་སྦྱར་བའོ། །མངྒ་ལཾ། །
དབྱངས་ཅན་མ་དཀར་མོའི་རྗེས་གནང་།
ཨོཾ་སྭཱ་སྟི། མ་རིག་མུན་སེལ་འཇམ་པའི་དབྱངས། །སྒྲ་དབྱངས་ལྷ་མོའི་ཚུལ་སྟོན་པ། །དེ་ལ་བཏུད་ནས་རྗེས་གནང་གི །ཆོ་ག་མདོ་ཙམ་བཤད་པར་བྱ། །འདིར་སྒྲུབ་ཐབས་ནི་ཡེ་ཤེས་འཆར་བར་བཤད་ཟིན་ཏོ། །སློབ་མ་རྗེས་བཟུང་གི་བྱ་བ་ལ། ཡིག་རྙིང་ན་མདོར་བསྡུས་ཙམ་ཞིག་ལས་མེད་ནའང༌། ཕྱོགས་ལས་རྣམ་པར་རྒྱལ་བ་དབྱངས་ཅན་དགའ་བའི་རྗེས་གནང་གི་ཐོ་ཡིག་ལྟར་ཕྱག་ལེན་མཛད་པས་དུས་ཚེས་བཟང་པོ་ལ། ས་སྟེགས་གྲུ་བཞི་ཁྲུ་དོ་
བ་ཤིན་ཏུ་མཉམ་པ་ལ་ཐིག་ཆེན་བརྒྱད་བཏབ། པདྨ་འདབ་བརྒྱད་བྲི། ལྟེ་བ་དང་འདབ་མ་བརྒྱད་ལ་ཏིང་ལོ་རེ་རེ་འཇོག་པའམ། དབུས་སུ་ཏིང་ལོ་གཅིག་ལ་སློབ་མའི་གྲངས་ཚད་དང་མཉམ་པའི་ཏིང་ལོས་བསྐོར་བ་བྱས་ཀྱང་རུང༌། དེའི་སྟེང་དུ་མཉྫི་ལ་མཎྜལ་མེ་ལོང་ལ། བ་དཀར་དམར་གང་རུང་ལས་བྱུང་བའི་དཀར་གསུམ་དང་སྦྲང་རྩི་སྦྱར་བ་ལ་དྲི་བཟང་བཞི་མཉམ་བཏབ་སྟེ། དེས་པདྨ་འདབ་བརྒྱད་ཡི་གེ་དང་བཅས་པ་སྙིང་གའི་འཁོར་ལོ་ལྟ་བུ་འབྲི། དེ་ལ་འབྲུ་དཀར་པོ་སྦྱར་ཏེ་འཁོར་ལོའི་རྣམ་པ་གསལ་པོར་བྱས་པ་བཞགསློབ་མ་ལ་སྦྱིན་རྒྱུའི་ཏིང་ལོ་ཡང་དཀར་གསུམ་མངར་གསུམ་བཞི་མཉམ་སྦྱར་བའི་རྒྱུ་ལས་བྱ། འོག་གཞིའི་དཀྱིལ་འཁོར་མ་འགྲུབ་ན་ཚོམ་བུ་ཙམ་གྱིས་ཀྱང་རུང་ངོ༌། །སྒྲུབ་ཐབས་ཀྱི་མཆོད་ཆོག་ཏུ་བཤད་པ་ལྟར་མཆོད་གཏོར་གཙང་མས་མཐའ་བསྐོར། ཨ་མྲྀ་ཏའི་སྔགས་ཀྱིས་བགེགས་བསྐྲད་པ་ནས། དངོས་གྲུབ་སྩོལ་བའི་མཐུན་རྐྱེན་མཛོད་ཅིག །ཅེས་པའི་བར་སྒྲུབ་ཐབས་སུ་བཤད་པའི་མདུད་བསྐྱེད་མཆོད་ཆོག་ཇི་ལྟ་བ་བཞིན་དུ་བྱ། སློབ་མའི་རྒྱུད་བྱིན་གྱིས་བརླབ་པའི་དོན་དུ་བཟླས་པ་ཅི་འགྲུབ་བྱ། བུམ་པ་གཙང་མ་བུམ་རྫས་དང་བཅས་པའི་ཆུས་བཀང་བ་ལ། བ་དམར་སེར་གྱི་དཀར་གསུམ་དང༌། མངར་གསུམ་ཅུང་ཟད་བླུག །མེ་ཏོག་གི་ཕྲེང་བ་གཟུངས་ཐག་ལ་བཏགས་ཏེ་སྣེ་མོ་ནས་བཟུང་ལ། ཨོཾ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽཨཾ་ཨཿསྭཱཧཱ། ཞེས་བརྒྱ་རྩ་བརྒྱད་བཟླས། སློབ་མས་མཎྜལ་སྔོན་དུ་འགྲོ་བས། སློབ་དཔོན་བདག་ལ་དགོངས་སུ་གསོལ། །སྒྲ་དབྱངས་ལྷ་མོ་དབྱངས་ཅན་མའི། །སྐུ་དང་གསུང་དང་ཐུགས་རྣམས་ཀྱི། །རྗེས་སུ་གནང་བ་བདག་ལ་སྩོལ། །ཅེས་ལན་གསུམ་གསོལ་བ་བཏབ། འགྲོ་རྣམས་བསྒྲལ་འདོད་བསམ་
པ་ཡི། །སོགས་ལན་གསུམ་གྱིས་ཐུན་མོང་གི་སྐྱབས་འགྲོ་སེམས་བསྐྱེད་བྱ། དཀོན་མཆོག་གསུམ་ལ་བདག་སྐྱབས་མཆི། །སོགས་རྒྱུན་བཤགས་ལན་གསུམ། སློབ་དཔོན་དང་མདུན་བསྐྱེད་དབྱངས་ཅན་མའི་སྐུར་གསལ་བའི་ཐུགས་ཀའི་ཧྲཱིཾཿལས་འོད་ཟེར་འཕྲོས། སློབ་མའི་སྤྱི་བོ་ནས་རྐང་མཐིལ་གྱི་བར་གང་བས། སྡིག་སྒྲིབ་ཐམས་ཅད་དག་སྟེ། མ་དག་པའི་སྣང་བ་ཐམས་ཅད་སྟོང་པ་ཉིད་ཀྱི་ངང་དུ་ཐིམ་པར་མོས་སུ་བཅུག་ལ། ཨོཾ་སྭ་བྷཱ་ཝ་ནས། ཨོཾ་དཀར་པོའི་བར་བདག་བསྐྱེད་བཞིན་བྱ། སློབ་དཔོན་གྱི་ཐུགས་ཀའི་ཧྲཱིཾཿལས་འོད་ཟེར་དཀར་པོ་འཕྲོས། སྣ་བུག་གཡས་ནས་ཐོན། ལྷོ་ཕྱོགས། ཞེས་པ་ནས། བི་ལེ་པ་ནི། ཞེས་པའི་བར་མངོན་རྟོགས་བཞིན། ཡང་ན་སྐུ་བསྐྱེད་བསྟིམ་སྤྱི་དང་མཐུན་པར་བྱས་ཀྱང་རུང་ངོ༌། །ཨོཾ་པྲི་ཏི་དེ་ཝཱི་མེ་ཧྲཱིཾཿཥྟཱིཿཏིཥྛ་ཧྲཱིཾཿ ཞེས་དྲག་ཏུ་བཟླས་ཤིང་རོལ་མོ་བྱ། འཁོར་ལོ་སློབ་མའི་སྙིང་གའི་ཨོཾ་ལ་བསྟིམ། སྐུའི་རྗེས་གནང་ངོ༌། །མགྲིན་པར་འཁོར་ལོ་དཀར་པོ་རྩིབས་བཅུ་དྲུག་པའི་ལྟེ་བར་ཧྲཱིཾཿདཀར་པོ་རྩིབས་རྣམས་ལ་ཨཱ་ལི་བཅུ་དྲུགདེ་ལས་དེ་འདྲ་བ་རང་སྒྲ་སྒྲོག་པ་ཞིག་ཆད། འོད་ཟེར་གྱིས་སློབ་མའི་ལུས་ཐམས་ཅད་གང༌། འཁོར་ལོ་མགྲིན་པར་ཐིམ། ཧྲཱིཾཿ ཉེར་གཅིག་དང་དབྱངས་ཡིག་གི་སྔགས་ལན་གསུམ་རྗེས་བཟློས་བྱེད་དུ་བཅུག་སྟེ། གསུང་གི་རྗེས་གནང་ངོ༌། །བླ་མའི་སྙིང་གའི་ཧྲཱིཾཿལས་འོད་འཕྲོས། སློབ་མའི་སྙིང་གའི་ས་བོན་ལ་ཐིམ་པར་མོས་ཏེ། ཏིང་ལོ་སྦར་ཏེ་མིང་དུ་གཞུགཐུགས་ཀྱི་རྗེས་གནང་ངོ༌། །མདུན་གྱི་མཎྜལ་བླངས་ལ། དབྱངས་ཡིག་བཟླ་བཞིན་དུ། བུམ་པའི་ཆུས་བཀྲུས་པའི་ཁུ་བ་སློབ་མ་འཐུང་དུ་བཅུག་ལ། ལུས་ངག་ཡིད་གསུམ་གྱི་དྲི་མ་དག ཤེས་རབ་ཀྱི་སྣང་བ་རྒྱས་པར་མོས་
སུ་བཅུགཡོན་ཏན་འཕྲིན་ལས་ཀྱི་རྗེས་གནང་ངོ༌། །གཙོ་བོས་ཇི་ལྟར་སོགས་མཎྜལ་འབུལ། དེང་ནས་བརྩམས་ཏེ་སོགས་བྱ། མདུན་བསྐྱེད་མཆོད་པ་ཁ་གསོ། ཡིག་བརྒྱ་ལན་མང་དུ་བརྗོད་པ་ནས། བཀྲ་ཤིས་ཀྱི་བར་ཡང་སྒྲུབ་ཐབས་ཀྱི་མཆོད་ཆོག་གི་སྐབས་སུ་བཤད་པ་ལྟར་བྱ་སྟེ། རྗེས་ཀྱི་ཆོ་གའོ། །ཀུན༵་ཏུ་ཟབ་ཅིང་དག༵འ་བར་བསྔགས། །སྙིང༵་ནས་བློ་གྲོས་མཆོག་འདོད་ན། །ལྷག་པའི་ལྷ་འདི་ཏེ་པོ༵ར་སྒྲུབས། །མྱུར་དུ་མཁས་པའི་གནས་ཐོབ་འགྱུར། །དབྱངས་ཅན་མ་དཀར་མོའི་སྒྲུབ་པའི་ཐབས་སྔར་གཞན་དུ་རྒྱས་པར་བཤད་ཟིན་པས། རྗེས་གནང་བྱ་བའི་ལེ་ཚན་ནོ། །མངྒ་ལཾ།
གཉན་སྒྲོལ་སྒྲུབ་ཐབས།
གཉན་སྒྲོལ་ཡན་ལག་དྲུག་པའི་མངོན་རྟོགས་བཞུགས་སོ། །ཨོཾ་སྭཱ་སྟི། ཡུམ་གྱུར་འཕགས་མ་སྒྲོལ་མ་ལ། །བཏུད་ནས་སྒྲུབ་ཐབས་ཀླུ་སྒྲུབ་ལུགས། །གཉན་ལོའི་མན་ངག་ཆེས་ཟབ་པ། །རྗེ་བཙུན་ཆེན་པོའི་གསུང་བཞིན་བསྡུ། །བླ་མ་དང་དཀོན་མཆོག་ལ་སྐྱབས་འགྲོ་ཅི་ནུས་བྱས་པའི་མཐར། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྗེ་བཙུན་མ་སྒྲོལ་མའི་སྒོམ་བཟླས་ལ་ཉམས་སུ་བླང་བར་བགྱིའོ། །ཞེས་ལན་གསུམ་བརྗོད། རང་སྐད་ཅིག་གིས་རྗེ་བཙུན་མར་གསལ་བའི་ཐུགས་ཀར་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཏཱཾཿལྗང་ཁུ། དེ་ལས་འོད་ཟེར་འཕྲོས་པས། བླ་མ་དང་རྗེ་བཙུན་མ་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས། དེ་ནས་ཨོཾ་བཛྲ་པུཥྤེ་ཨཱཿཧཱུཾ། ཞེས་སོགས་
ནས། ཨོཾ་བཛྲ་ཤབྟ་ཨཱཿཧཱུཾ། ཞེས་པ་རྣམས་ཕྱག་རྒྱ་དང་བཅས་པས་མཆོད། ཐལ་མོ་སྦྱར་ཏེ་དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ལན་གསུམ་བརྗོད། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིགཞེས་སོགས་ཚད་མེད་བཞི་བསྒོམ། ཨོཾ་ཤཱུ་ནྱ་ཏ་སོགས། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་རང་གི་སེམས་ཉིད་ཏཱཾཿལས་ཨུཏྤལ་ལྗང་ཁུ་ཏཱཾཿགིས་མཚན་པ་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཏཱཾཿཡིག་ཨུཏྤལ་དང་བཅས་པ་ལ་ཐིམ། དེ་ཡོངས་སུ་གྱུར་པ་ལས་རང་ཉིད་རྗེ་བཙུན་མ་སྒྲོལ་མ་སྐུ་མདོག་ལྗང་ཁུ་ཞལ་གཅིག་ཕྱག་གཉིས་པ། གཡས་པས་མཆོག་སྦྱིན་གྱི་ཕྱག་རྒྱ་མཛད་ཅིང༌། གཡོན་པའི་མཐེབ་སྲིན་གྱིས་ཨུཏྤལ་སྔོན་པོའི་རྩ་བ་ཐུགས་ཀར་བཟུང་སྟེ། མེ་ཏོག་སྙན་གྱི་ཐད་ཀར་ཁ་བྱེ་བ། ཞལ་འཛུམ་ཞིང་རབ་ཏུ་ཞི་བ། དབུ་སྐྲ་ལི་བ་གཡོན་ཕྱོགས་སུ་བཅིངས་ནས་གཡས་ངོས་སུ་འཁྱིལ་ཞིང་འཕྱང་བ། ལོ་བཅུ་དྲུག་ལོན་པ་ལྟ་བུའི་ཆ་ལུགས་ཅན། ཟླ་བ་ལ་སྐུ་རྒྱབ་བརྟེན་པ། དར་སྲབ་མོའི་སྟོད་གཡོགས་ཀྱིས་ནུ་མ་བཀབ་ཅིང༌། དར་སྣ་ཚོགས་ཀྱི་ཤམ་ཐབས་གསོལ་བ། ཞབས་གཡས་ཅུང་ཟད་བརྐྱང་ཞིང་གཡོན་བསྐུམ་པའི་རོལ་སྟབས་ཀྱིས་བཞུགས་པ། དེའི་ཐུགས་ཀར་པཾ་ལས་པདྨ་དང་ཨཱ་ལས་ཟླ་བའི་དཀྱིལ་འཁོར་གྱི་སྟེང་དུ་ཏཱཾཿཡིག་ལྗང་ཁུ། དེ་ལས་འོད་ཟེར་འཕྲོས་པས་པོ་ཏཱ་ལ་ནས་རྗེ་བཙུན་མ་སྒྲོལ་མ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས། གོང་ལྟར་མཆོད། ཨོཾ་ཨ་
བྷི་ཥིཉྩནྟུ་མཾ་སརྦ་ཏ་ཐཱ་ག་ཏ། ཞེས་གསོལ་བ་བཏབ་པས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བྱའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུངས་ཤིང་བུམ་པ་བདུད་རྩིས་གང་བས་དབང་བསྐུར། སྐུ་གང༌། དྲི་མ་དག །ཆུ་ལྷག་མ་ཡར་ལུད་པ་ལས་དོན་ཡོད་གྲུབ་པས་དབུ་བརྒྱན། དབང་གི་ལྷ་དེ་རྣམས་རྗེ་བཙུན་མ་སྒྲོལ་མའི་སྐུར་གྱུར་ཏེ་རང་ལ་ཐིམ། ཛཿཧཱུཾ་བཾ་ཧོཿ ཐལ་མོ་སྦྱར་བའི་མཛུབ་མོ་གཉིས་གུང་མོའི་རྒྱབ་ཏུ་སྦྱར། སྲིན་མཛུབ་གཉིས་བཀུག་སྟེ། མཛུམ་མོ་མནན་པ་ཨུཏྤ་ལའི་ཕྱག་རྒྱ་དཔྲལ་མགྲིན་སྙིང་ག་དཔུང་པ་རྣམས་སུ་རེག་ཅིང་ཡི་གེ་བཅུ་པ་ཚར་རེ་བརྗོད་པས་བྱིན་གྱིས་བརླབས་ཏེ། སྐུ་སྣང་ལ་རང་བཞིན་མེད་པ་ལ་སེམས་ཡུན་རིང་དུ་གཏད། :སྐྱོ་ན་[སྤྲོ་ན་]ཐུགས་ཀར་ཟླ་བའི་སྟེང་དུ་ཏཱཾཿཡིག་གི་མཐར་ཡི་གེ་བཅུ་པ་ཁ་དོག་དཀར་པོ་མགོ་བོ་གྱེན་དུ་བལྟ་བས་བསྐོར་བར་བསམས་ལ། དེ་ལ་ཀློག་པའི་ཚུལ་དུ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཞེས་པའི་ཡི་གེ་བཅུ་པ་གཙོ་བོར་བཟླ། སྤྲོ་ན། ན་མོ་རཏྣ་ཏྲཱ་ཡཱ་ཡ། ན་མ་ཨཱརྻ་ཨ་ཝ་ལོ་ཀི་ཏི་ཤྭ་རཱ་ཡ། བོ་དྷི་སཏྭཱ་ཡ། མཧཱ་སཏྭཱ་ཡ། མཧཱ་ཀ་རུ་ཎི་ཀཱ་ཡ། ཏཏྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཀྲི་ཏེ་སརྦ་དུཥྟཱཾ། པྲ་དུཥྟཱཾ། ཛཾ་བྷ་ཡ། སྟཾ་བྷ་ཡ། མོ་ཧཱ་ཡ། བནྡྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། སརྦ་དུཥྟཱཾ་སྟཾ་བྷ་ནི་ཏཱ་རེ་སྭཱཧཱ། ཞེས་གཟུངས་རིང་ཡང་ཅི་ནུས་བཟླ། མཐར་འདོད་དོན་ཞུས་ལ། བསྔོ་བ་དང་སྨོན་ལམ་བྱ་ཞིང༌། སྤྲོ་ན་ཐུན་མཚམས་སུ་མཚན་བརྒྱ་རྩ་བརྒྱད་པ་དང༌། གཟུངས་རིང་ཅི་ནུས་ཀྱི་མཐར་ཕྱག་འཚལ་ཉེར་གཅིག་གིས་བསྟོད་ལ། གཏོར་
མ་འབུལ་བར་འདོད་ན། དཀར་གཏོར་མཆོད་པ་སྤྱི་མཐུན་དང་བཅས་པ་བཤམས། མཆོད་པ་བྱིན་རླབས་ཀྱང་སྤྱི་དང་མཐུན། གཏོར་མ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བར་གཏོར་མ་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུཾ་ལན་གསུམ། རང་གི་སྙིང་ག་ནས་འོད་ཟེར་འཕྲོས། འཕགས་མ་སྒྲོལ་མ་འཁོར་བཅས་ཨོཾ་བཛྲ་ས་མཱ་ཛཿ པོ་ཊ་ལ་ཡི་གནས་མཆོག་ན། །ཞེས་སོགས་བརྗོད། པདྨ་ཀ་མ་ལ་ཡ་སྟྭཾ། གཏོར་མ་གསོལ་བར་བསམས་ལ། ན་མཿས་མནྟ། བུདྡྷ་བོ་དྷི་སཏྭཱ་ནཾ། ཨ་པྲ་ཏི་ཧ་ཏ་ཤ་ས་ནཱཾ་ཧེ་ཧེ་བྷ་ག་ཝ་ཏི་མཧཱ་སཏྭ་སརྦ་བུདྡྷ་ཨ་བ་ལོ་ཀི་ཏེ། མཱ་བི་ལམྦ་མཱ་བི་ལམྦ། ཨི་མཾ་བ་ལིང་གྲྀཧྞ་པཱ་ཡ། གྲིཧྞ་པཱ་ཡ་ཧཱུཾ་ཧཱུཾ་ཛ་ཛ་སརྦ་བི་སཉྩ་རེ་སྭཱཧཱ། ལན་ལྔས་ཕུལ། ཨརྒྷཾ་ནས་ཤཔྟའི་བར་གྱིས་མཆོད། ལྷ་དང་ལྷ་མིན་སོགས་ཀྱིས་བསྟོད། མཆོད་སྦྱིན་གཏོར་མ་འདི་བཞེས་སོགས་དང༌། རྗེ་བཙུན་མ་འཕགས་མ་སྒྲོལ་མས་བདག་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། འཇིགས་པ་ཆེན་པོ་བརྒྱད་དང་བཅུ་དྲུག་ལ་སོགས་པ་གནོད་བྱེད་ཐམས་ཅད་ལས་སྐྱོབ་ཏུ་གསོལ། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་བསྒྲལ་དུ་གསོལ། སྡུག་བསྔལ་ཐམས་ཅད་ཞི་བར་མཛད་དུ་གསོལ། ཅེས་འདོད་དོན་གསོལ་བ་གདབ། ཡིག་བརྒྱ་བཟོད་གསོལ། གཤེགས་གསོལ་རྣམས་དང༌། སྨོན་ལམ་གདབ། བཀྲ་ཤིས་བརྗོད། མདུན་བསྐྱེད་དང་འབྲེལ་བའི་ཚེ། གཏོར་ཆོག་སྐབས། སྤྱན་འདྲེན་དང་གདན་འབུལ་སྒོས་སུ་བྱེད་མི་འཚལ། དེ་ལྟ་བུའི་སྒོ་ནས་ཡི་གེ་བཅུ་པ་འབུམ་ཕྲག་བཅུ་གསུམ་མམ། འབུམ་ཕྲག་བརྒྱད་ཅུའི་གྲངས་ཀྱིས་བསྙེན་པ་རྫོགས་པ་ཡིན་ནོ། །འདིའི་རྗེས་གནང་ནི། ཐུན་མོང་བ་སྤྱི་དང༌། ཁྱད་པར་བ་ལུང་འབོགས་ཚུལ། སློབ་མ་
མཆོག་ལ་སྟེ། དེ་ཡང་མཎྜལ་དང་མཆོད་གཏོར་བཤམས་ལ། སློབ་དཔོན་གྱིས་བདག་བསྐྱེད་བཟླས་པ་དང་བཅས་པ་བྱ། མདུན་དུ་མཎྜལ་གྱི་སྟེང་དུ་རྗེ་བཙུན་མ་སྒྲུབ་ཐབས་ལྟར་བསྐྱེད། མཆོད་པ་རྣམས་བྱིན་གྱིས་བརླབས་ལ་ཕུལ། བསྟོད་པ་བྱ། གཏོར་མ་གོང་ལྟར་ཕུལ་ལ། མདུན་བསྐྱེད་ལ་དམིགས་པའི་བཟླས་པ་ཅུང་ཟད་བྱ། སློབ་མ་རྣམས་ཁྲུས་བྱས་མཎྜལ་ཕུལ། དུས་གསུམ་སངས་རྒྱས་ཐམས་ཅད་དང༌། །སོགས་ཀྱིས་གསོལ་བ་བཏབ། དཀོན་མཆོག་གསུམ་ལ་བདག་སྐྱབས་མཆི། །སོགས་ཀྱིས་རྒྱུན་བཤགས་བྱ། དེ་ནས་རྗེས་གནང་གི་གཞི་དགོད་པའི་སླད་དུ་སློབ་དཔོན་ལ་རྗེ་བཙུན་མ་དངོས་ཡིན་སྙམ་པའི་མོས་པ་བྱས་པས་དེའི་ཐུགས་ཀའི་འོད་ཟེར་གྱིས་མདུན་བསྐྱེད་ཀྱི་ཐུགས་བརྒྱུད་བསྐུལ། ཐུགས་ཀ་ནས་འོད་ཟེར་ལྗང་ཁུ་དཔག་ཏུ་མེད་པ་འཕྲོས་ཏེ། སློབ་མའི་ལུས་ལ་ཕོག་པས་སྡིག་སྒྲིབ་དང་བར་དུ་གཅོད་པ་ཐམས་ཅད་སྦྱངས། ལུས་འོད་ཀྱི་རང་བཞིན་དུ་གྱུར་པར་བསམ། དེའི་སྐད་ཅིག་ལ་པཾ་ལས་པད་མ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཏཱཾཿལས་ཨུཏྤལ་ཏཱཾཿགིས་མཚན་པ་དེ་ལས་འོད་ཟེར་འཕྲོས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས། སློབ་མ་རྣམས་སྒྲུབ་ཐབས་ལྟར་རྗེ་བཙུན་མར་བསྐྱེད། སླར་སློབ་དཔོན་ལ་མོས་གུས་བྱས་པས། དེའི་ཐུགས་ཀའི་འོད་ཟེར་གྱིས་མདུན་བསྐྱེད་དང་ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱི་ཐུགས་ཀ་ནས་རྗེ་བཙུན་མའི་སྐུ་བསམ་གྱིས་མི་ཁྱབ་པ་སྤྱན་དྲངས་ཏེ། སློབ་མ་ལ་ཐིམ་པར་བསམས་ལ། སྔགས་བཟླས་ཤིང་དྲིལ་སིལ་བྱ་བ་ནི་གཞི་འགོད་པའོ། །དངོས་ལ་གསུམ་ལས། དང་པོ་རྗེས་སུ་བཟླས་པའི་ལུང་ནི། སློབ་དཔོན་གྱིས་བདག་ལ། རྗེ་བཙུན་མ་སྒྲོལ་མའི་མཚན་
བརྒྱ་རྩ་བརྒྱད་པའི་ལུང་དང་གསང་སྔགས་ཀྱི་རྗེས་སུ་གནང་བ་མ་ལུས་པ་སྩལ་དུ་གསོལ། ཞེས་ལན་གསུམ་གྱིས་གསོལ་བ་བཏབ། དེ་ནས་སློབ་དཔོན་གྱི་ཐུགས་ཀའི་སྔགས་འཕྲེང་ས་བོན་དང་བཅས་པ་ལས་དེ་འདྲ་བ་དུ་མ་བྱུང་ནས་ཞལ་ནས་ཐོན། སློབ་མའི་ཞལ་དུ་ཞུགས། ཐུགས་ཀར་ཟླ་བ་ལ་ཏཱཾཿཡིག་གི་མཐར་འཁོད་པར་མོས་པ་བྱས་ལ། སྙིང་པོ་དང་གཟུངས་ཀྱི་རྗེས་བཟློས་ལན་གསུམ་བྱ། མཚན་བརྒྱ་རྩ་བརྒྱད་པའི་མགོ་བོའི་དཔལ་ལྡན་ཡིད་འོང་ཞེས་པ་ནས། གྱུར་ལ་བསྟོད་ཅེས་པའི་བར་སློབ་དཔོན་གྱིས་ཚར་གཅིག་ཀློགཨོཾ་དགེ་བ་ཅན་ནི་ནས། སྭཱཧཱའི་བར་གྱི་རྗེ་ཟློས་ལན་གསུམ་བྱེད་དུ་གཞུགཨོཾ་གྱི་རྣམ་པར་འདོད་གཟུགས་མ། །ཞེས་པ་ནས། དཔལ་ལྡན་འཇིག་རྟེན་དབང་ཕྱུག་སྐྱེས། །ཀྱི་བར་ལན་གཅིག་རྗེས་ཟློས་བྱེད། དེ་མན་ཆད་ཀྱི་ཕན་ཡོན་རྣམས་སློབ་དཔོན་གྱིས་ལན་གཅིག་ཀློག་གོ །དེ་ནས་སློབ་མས་བཅོམ་ལྡན་བདག་གིས་སོགས་བརྗོད་ཅིང་མེ་ཏོག་གཏོར། སློབ་དཔོན་གྱིས་བཅོམ་ལྡན་འདི་ལ་སོགས་བརྗོད་ཅིང་མེ་ཏོག་མགོ་བོར་བཞག་གོ །གཉིས་པ་དམ་བཅའ་བའི་ལུང་ནི། བྱང་ཆུབ་མ་ཐོབ་ཀྱི་བར་དུ་རྗེ་བཙུན་མ་ཡི་དམ་དུ་བཟུང་སྙམ་པའི་བསམ་པས། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས་དུས་ད་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྗེ་བཙུན་མ་སྒྲོལ་མ་ཡི་དམ་གྱི་ལྷར་བཟུང་བར་བགྱིའོ། །ཞེས་ལན་གསུམ། རྡོ་རྗེ་སློབ་མ་འདི་རྣམས་ཀྱི་རྒྱུད་ལ་རྗེ་བཙུན་མ་སྒྲོལ་མའི་སྐུ་གསུང་ཐུགས་ཀྱི་བྱིན་རླབས་མ་ལུས་པ་འཇུག་པར་གྱུར་ཅིག ཅེས་བརྗོད་ཅིང་མེ་ཏོག་དོར། གསུམ་པ་བྱིན་གྱིས་བརླབ་པའི་ལུང་ནི། མདུན་བསྐྱེད་ཀྱི་རྗེ་བཙུན་མ་ལ་གུས་འདུད་དྲག་
པོ་བྱས་པའི་རྐྱེན་གྱིས་ཐུགས་ཀ་ནས་དེ་འདྲ་བའི་རྗེ་བཙུན་མ་མཐེ་བོང་ཙམ་ཅིག་བྱོན་ཏེ་སློབ་མའི་སྤྱི་གཙུག་ནས་ཞུགས། ཐུགས་ཀའི་ཏཱཾཿཡིག་དང་དབྱེར་མེད་དུ་འདྲེས་པས་རྒྱུད་བྱིན་གྱིས་བརླབས་པར་བསམ། སློབ་དཔོན་གྱིས་མེ་ཏོག་གཏོར་ཏེ། རྗེ་བཙུན་མ་འཕགས་མ་སྒྲོལ་མས་རྡོ་རྗེ་སློབ་མ་འདི་རྣམས་གནས་སྐབས་སུ་འཇིགས་པ་ཆེན་པོ་བརྒྱད་དང་བཅུ་དྲུག་ལས་བསྐྱབས་ཏེ་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་བསྒྲལ་དུ་གསོལ། མཐར་ཐུག་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། ཞེས་བརྗོད། རྗེས་ཀྱི་བྱ་བ་སྤྱི་དང་མཐུན་ནོ། །རྗེས་གནང་ཐུན་མོང་བ་ནི། སྐྱེ་བོ་མང་པོ་ལ་བྱེད་ན་གཞན་རྣམས་འདྲ་བ་ལས། གཟུངས་རིང་དང་མཚན་བརྒྱ་རྩ་བརྒྱད་པའི་ལུང་དོར་བས་རུང་ངོ༌། །སྤྱིར་འདི་ལ། བསྙེན་པ་དང༌། དབང་བསྡུད་ཀྱི་སྒྲུབ་པ་དང༌། གཏོར་ཆོག་དང༌། བྲིས་པའི་བསྲུང་འཁོར། ཆོམ་རྐུན་འཆིང་བ། རྗེས་གནང་བྱེད་ཐབས། མཚན་བརྒྱ་འདོན་ཐབས་ཏེ་བདུན་ལས། རྩ་བ་ནི་བསྙེན་པ་ཡིན་ལ། ཡན་ལག་ནི་ལྷག་མ་དྲུག་པོ་ཡིན་པས། གཉན་སྒྲོལ་ཡན་ལག་དྲུག་པར་གྲགས་སོ། །ལས་ཚོགས་བཞི་པོ་དེ་རྗེ་བཙུན་གྲགས་པའི་ཡིག་ཆར་གསལ་ལོ། །སྒྲོལ་མའི་སྒྲུབ་ཐབས་ཆེ་མང་བ། །ཀུན༵་གྱི་ཏོག་ལྟར་དག༵འ་བའི་ཆོས། །གོང་མའི་ཡི་གེ་རྒྱས་པ་ལས། །ཉེར་འཁོ་སྙིང༵་པོ༵ར་དྲིལ་བ་ཡིན། །གཉན་སྒྲོལ་སྒྲུབ་ཐབས་ཀྱི་ལེ་ཚན་ནོ།། །།མངྒལཾ།
རྗེ་བཙུན་མ་ཀུ་རུ་ཀུལླེའི་སྒྲུབ་ཐབས།
རིག་བྱེད་མའི་མངོན་རྟོགས་ཉམས་སུ་ལེན་ཚུལ་ཐུན་མོང་མ་ཡིན་པ་བཞུགས་སོ། །ཨོཾ་སྭཱ་སྟི། འཕགས་མ་འཁོར་བ་ཀུན་སྒྲོལ་མ། །དེ་ལ་བཏུད་ནས་རིག་བྱེད་མའི། །སྒྲུབ་ཐབས་དགེས་རྡོར་ལས་བྱུང་བ། །ལྷན་སྐྱེས་རོལ་བའི་ལུགས་བཤད་བྱ། །དམར་པོ་སྐོར་གསུམ་དུ་གྲགས་པའི་ནང་གི་ཀུ་རུ་ཀུལླེ་སྒོམ་པར་འདོད་ན། སྐྱབས་འགྲོ་སེམས་བསྐྱེད་བྱས་ལ། རང་སྐད་ཅིག་གིས་ཀུ་རུ་ཀུལླེར་གསལ་བའི་ཐུགས་ཀར་རཾ་ལས་ཉི་མའི་སྟེང་དུ་ཧྲཱིཾཿདམར་པོ་དེ་ལས་འོད་ཟེར་འཕྲོས་པས་བླ་མ་དང་རྗེ་བཙུན་མ་ཀུ་རུ་ཀུལླེ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ན་མོ་གུ་རུ་བྷྱཿ ན་མཿཀུ་རུ་ཀུལླེ་བྷྱཿ ཨོཾ་ཀུ་རུ་ཀུལླེ་བཛྲ་པུཥྤེ་ཨཱཿཧཱུཾ། ཞེས་སོགས་ནས་ཤཔྟའི་བར་གྱིས་མཆོད། གུར་ནས་འབྱུང་བའི་རྒྱུན་བཤགས་ལན་གསུམ་བྱ། ཚད་མེད་བཞི་བསྒོམ། ཤཱུནྱ་ཏའི་སྔགས་བརྗོད། སྟོང་པའི་ངང་ལས་དུར་ཁྲོད་བརྒྱད་ཀྱི་དབུས་སུ་པཾ་ལས་པདྨ་དམར་པོ་ལྟེ་བར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧྲཱིཾཿཡིག་དམར་པོ་རིང་མོ་ཚེག་དྲེག་དང་བཅས་པ་དེ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུ་འཕྲོས་པས་འཕགས་པ་མཆོད། སེམས་ཅད་ཐམས་ཅད་རྗེ་བཙུན་མའི་གོ་འཕང་ལ་བཀོད། ཚུར་འདུས་ཧྲཱིཾཿཡིག་ལ་ཐིམ། དེ་ཡོངས་སུ་གྱུར་པ་ལས་བདག་ཉིད་རྗེ་བཙུན་མ་ཀུ་རུ་ཀུལླེ་སྐུ་མདོག་དམར་མོ་ཞལ་གཅིག་ཕྱག་བཞི་མ། དང་པོ་གཉིས་ཀྱིས་ཨུཏྤལ་དམར་པོའི་མདེའུ་ཅན་གྱི་མདའ་དང་མེ་ཏོག་གི་གཞུ་སྙན་གྱི་བར་དུ་འགེངས་པ། གཡས་འོག་མས་འགུགས་བྱེད་ལྕགས་ཀྱུ་དང༌། གཡོན་འོག་མས་རྩ་བ་ཞགས་པར་བྱས་པའི་ཨུཏྤལ་འཛིན་པ། མཆེ་བ་ཅུང་ཟད་གཙིགས་ཤིང༌། སྤྱན་གསུམ་དང་ལྡན་པ། ནུ་འབུར་རྒྱས་པ། ལོ་བཅུ་དྲུག་ལོན་པ་ལྟ་བུ་དབུ་སྐྲ་དམར་སེར་གྱེན་དུ་བརྫེས་པ། ཐོད་སྐམ་ལྔས་དབུ་བརྒྱན་ཞིང༌། རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་
ལྔས་བརྒྱན་པ། སྟག་གི་པགས་པའི་ཤམ་ཐབས་གསོལ་བ། མི་རོ་མགོ་བོ་གཡོན་དུ་བསྟན་པའི་སྟེང་དུ་ཞབས་གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་འོད་ཟེར་དམར་པོ་དང་མེ་དཔུང་འབར་བའི་དབུས་ན་བཞུགས་པའོ། །དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་དབུས་སུ་ཨུཏྤལ་དམར་པོའི་ལྟེ་བར་ཉི་མ་ལ་ཧྲཱིཾཿདམར་པོ། དེ་ལས་འོད་ཟེར་འཕྲོས་པས་རིག་བྱེད་ཀྱི་ཕུག་ནས་རྗེ་བཙུན་མ་ཀུ་རུ་ཀུལླེ་ལ་སངས་རྒྱས་བྱང་སེམས་བསམ་གྱིས་མི་ཁྱབ་པས་བསྐོར་བ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས་ལ། ཛཿཧཱུཾ་བཾ་ཧོཿ རང་ལ་གཉིས་སུ་མེད་པར་ཐིམ། སླར་ཡང་ཐུགས་ཀའི་ཧྲཱིཾཿལས་འོད་ཟེར་འཕྲོས་པས། དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་པཉྩ་ཀུ་ལ་ས་པ་རི་ཝཱ་ར་བཛྲ་པུཥྤེ་ལ་སོགས་པས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། ཨོཾ་བཛྲི་བྷཱ་བ་ཨ་བྷི་ཥིཉྩ་ཧཱུཾ་ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང༌། དྲི་མ་དགཆུ་ལྷག་མ་ཡར་ལུད་པ་ལས། འོད་དཔག་ཏུ་མེད་པས་དབུ་བརྒྱན། ཨརྒྷཾ་ནས་ཤཔྟའི་བར་གྱིས་མཆོད། བརྩེ་བས་རྗེས་ཆགས་སོགས་ཀྱིས་བསྟོད། བདུད་རྩི་ཀྱཻ་རྡོར་ལྟར་བྱིན་གྱིས་བརླབས་པའམ། སྤྱི་དང་མཐུན་པར་བྱིན་གྱིས་བརླབས། འབྲུ་གསུམ་བརྗོད་ཅིང་མྱངས་ཏེ་བདེ་བས་མཉེས་པར་བསམས་ལ། ཨོཾ་ཀུ་རུ་ཀུལླེ་ཧྲཱིཾཿསྭཱཧཱ། ཞེས་མ་ཡེངས་པར་ཙན་དན་དམར་པོའི་ཕྲེང་བ་མིང་མེད་ཀྱི་སྟེང་ནས་དྲངས་ཤིང་བགྲང་བར་བྱའོ། །ཐུན་འཇོག་པ་ན།
བཅོམ་ལྡན་འདས་མ་བདག་དང་སེམས་ཅན་ཐམས་ཅད་ལ་མཆོག་ཐུན་མོང་གི་དངོས་གྲུབ་ཐམས་ཅད་སྩལ་དུ་གསོལ། ཞེས་གསོལ་བ་གདབ་ལ། རང་གི་སྙིང་ག་ནས་འོད་ཟེར་འཕྲོས་ཏེ། སྣང་བ་ཐམས་ཅད་འོད་ཟེར་གྱི་རྣམ་པར་གྱུར་ཏེ་རང་ལ་ཐིམ། གཏོར་མ་འབུལ་ན། ནང་མཆོད་ལྟར་བྱིན་གྱིས་བརླབས་ཏེ། སྙིང་ག་ནས་འོད་ཟེར་འཕྲོས་པས། རྗེ་བཙུན་མ་མདུན་གྱི་ནམ་མཁར་བྱོན། ལྗགས་རྡོ་རྗེའི་སྦུ་གུ་ཅན་གྱིས་གསོལ་བར་བསམ་ཞིང༌། སྔགས་ཀྱི་མཐར། ཨོཾ་ཨ་ཀཱ་རོ་བཏགས་ལ་ཕུལ། བརྩེ་བས་རྗེས་ཆགས་པད་མ་རཱ་གའི་མདོག །ཞལ་གཅིག་ཕྱག་བཞི་ཞབས་གཉིས་མཛེས་པའི་སྐུ། །མདའ་གཞུ་ཨུཏྤལ་དབང་གི་ལྕགས་ཀྱུ་འཛིན། །བཅོམ་ལྡན་རིག་བྱེད་མ་ལ་ཕྱག་འཚལ་ལོ། །ཞེས་སོགས་ཅི་ཤེས་པས་བསྟོད། འདོད་དོན་ཞུ། ལྷག་ཆད་ཁ་བསྐང༌། བཟོད་པར་གསོལ། བྲིས་སྐུ་སོགས་རྟེན་ཡོད་ན་བརྟན་བཞུགས་བྱ། མེད་ན་གཤེགས་སུ་གསོལ་ལ་བསྔོ་བ་སྨོན་ལམ་ཅི་ཤེས་བྱ།འདིའི་རྗེས་གནང་བྱ་བའི་ཚུལ་ནི། ཐུན་མོང་བ་སྤྱི་དང་འདྲ་བ་ལས་གཏོར་དབང་ཙམ་བྱེད་པ་ཡིན་ལ། ཐུན་མོང་མ་ཡིན་པ་ནི། གཞི་དམར་པོའི་སྟེང་དུ་ཙན་དན་དམར་པོས་བྱུགས་པའི་མཎྜལ་ལ། མེ་ཏོག་དམར་པོས་ཚོམ་བུ་བཀོད། དེའི་སྟེང་དུ་མཉྫི་ལ་རྟེན་གྱི་གཏོར་མ་བྲག་སྐྱིབས་ཀྱི་དབྱིབས་ཅན་དམར་པོ་རྒྱན་དང་ལྡན་པ་བཀོད། བྲིས་སྐུ་ཡོད་ན་དགྲམ། ཆུ་བཞི་སྔོན་དུ་འགྲོ་བའི་ཉེར་སྤྱོད་དང༌། སྨུག་རྩིས་བྱུགས་པའི་འབུལ་གཏོར་གཅིགསློབ་དཔོན་གྱི་མདུན་དུ་ནང་མཆོད་རྡོ་རྗེ་དྲིལ་བུ་མེ་ཏོག་རྣམས་བཤམ། མཆོད་པ་བྱིན་རླབས་ཀྱཻ་རྡོ་རྗེ་བཞིན་ནམ་སྤྱི་དང་མཐུན་པ་དང་བདག་བསྐྱེད་བཟླས་པ་དང་བཅས་པ་བྱ། མདུན་བསྐྱེད་སྟོང་པར་སྦྱང་བ་ནས་བཟུང༌། མངོན་རྟོགས་འདོན་པ་སྤོ་བ་ཙམ་མ་གཏོགས་འདྲ། མཆོད་བསྟོད་གཏོར་མ་ཕུལ་ལ། ཐུགས་རྒྱུད་
བསྐུལ་བའི་བཟླས་པ་བྱ། སློབ་མ་ཁྲུས་བྱས། ཕྱག་དང་ཡོན་ཕུལ་ནས། གྲལ་ལ་འཁོད་པ་ལ། སེམས་བསྐྱེད་གསལ་བཏབ། འདིར་དཔལ་ཀྱཻ་རྡོ་རྗེའི་རྩ་བཤད་ཀྱི་རྒྱུད་རྣམས་ནས་བཤད་པའི་རྗེ་བཙུན་མའི་རྗེས་སུ་གནང་བ་སྒྲུབ་པ་ལ། སློབ་དཔོན་གྱིས་བགྱི་བར་འོས་པ་ཐམས་ཅད་གྲུབ། སློབ་མའི་བྱ་བ་ལ་རྗེས་གནང་གི་སྔོན་དུ་འགྲོ་བ་སློབ་དཔོན་ལ་རྗེ་བཙུན་མ་དངོས་ཡིན་པའི་མོས་གུས་དང་ལྡན་པས་རྗེས་གནང་ཞུ་བའི་ཡོན་དུ་མཎྜལ་འབུལ་བ་ཞུ་བྱས་ལ། སློབ་མས་ཀྱང་མཎྜལ་འབུལ། མེ་ཏོག་དང་བཅས་པས་ཐལ་མོ་སྦྱར་ཏེ། གསོལ་བ་བཏབ་པའི་རྗེས་ཟློས་ལན་གསུམ་མཛོད། ཀུན་མཁྱེན་ཡེ་ཤེས་སོགས་ནས་གནང་བར་མཛོད། ཅེས་གསོལ་བ་བཏབ་ནས། རྒྱུད་དག་པའི་སླད་དུ་དམིགས་པ་འདི་བཞིན་མཛོད། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པའི་རྩ་བརྒྱུད་ཀྱི་བླ་མ་རྣམས་སྟེང་གི་ཆ་ལ་བཞུགས་པའི་རྗེ་བཙུན་མ་ཀུ་རུ་ཀུལླེ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པའི་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས་ལ། ཕྱག་དང་མཆོད་པ་ཕུལ་བར་མོས་པ་བྱས་ཏེ། ཐལ་མོ་སྦྱར་ནས་འདི་རྣམས་ཀྱི་རྗེས་ཟློས་མཛོད། ན་མོ་གུ་རུ་བྷྱཿ ན་མ་ཀུ་རུ་ཀུལླེ་བྷྱཿ ཞེས་པས་ཕྱག་བྱས་ནས་ཚོགས་ཞིང་སྐབས་ལྟར་མཆོད་ལ། ཚེ་ཐོག་མ་མེད་པ་ནས་བསགས་པའི་སྡིག་པ་བཤགས་པ་ལ་སོགས་པའི་ཡན་ལག་བདུན་པ་བགྱི་སྙམ་པས་འདིའི་རྗེས་བཟློས་ལན་གསུམ་མཛོད། དཀོན་མཆོག་གསུམ་ལ་སོགས་ནས་འགྲུབ་པར་ཤོག །ཅེས་པས་རྒྱུད་དག་
པར་བྱས་ནས། ཚོགས་ཞིང་རྣམས་མདུན་བསྐྱེད་ཀྱི་ལྷ་མོ་ལ་ཐིམ་པར་མོས་པ་མཛོད། དེ་རྣམས་རྗེས་གནང་གི་སྔོན་འགྲོ་ཡིན། དངོས་གཞི་ལ། སྐུའི་རྗེས་གནང་གི་སླད་དུ་དམིགས་པ་འདི་བཞིན་དུ་མཛོད། མདུན་བསྐྱེད་ཀྱི་ལྷ་མོའི་ཐུགས་ཀ་ནས་འོད་ཟེར་འཕྲོས་པས་ཁྱེད་རང་གི་ལུས་ལ་ཞུགས་པའི་ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་ཐམས་ཅད་དང་ཀུན་རྫོབ་རྣམ་ཤེས་ཀྱིས་བསྡུས་པའི་ཆོས་ཐམས་ཅད་སྟོང་པར་སྦྱངས། ཨོཾ་ཤཱུ་ནྱ་ཏ་སོགས་ནས་བཞུགས་པའོ། །ཞེས་པས་བར་སྒྲུབ་ཐབས་བཞིན་བརྗོད། དེ་ནས་སློབ་དཔོན་དང་ཁྱེད་རང་གི་ཐུགས་ཀའི་ཧྲཱིཾཿལས་འོད་ཟེར་འཕྲོས་པ། ལྷོ་ཕྱོགས་རིག་བྱེད་ཀྱི་ཕུག་ན་བཞུགས་པའི་རྗེ་བཙུན་མའི་ཐུགས་ཀར་ཕོག་པས་དེའི་ཐུགས་རྒྱུད་བསྐུལ་ཏེ་ཐུགས་ཀ་ནས་འོད་ཟེར་དམར་པོའི་ཕྲེང་བ་བསམ་གྱིས་མི་ཁྱབ་པ་དམར་ཁྲིག་ཁྲིག་བྱོན་ཏེ་ཁྱེད་རང་གི་ལུས་ལ་ཐིམ་པས་ལུས་འོད་ཀྱི་རང་བཞིན་དུ་གྱུར། ཡང་འོད་ཟེར་འཕྲོས་པས་བརྟན་གཡོ་སྣོད་བཅུད་ཐམས་ཅད་ལ་ཕོག་པས་སྣོད་ཐམས་ཅད་གཞལ་ཡས་ཁང་དང་བཅུད་ཐམས་ཅད་རྗེ་བཙུན་མའི་སྐུར་གྱུར་ཏེ་སླར་ཚུར་འདུས་ནས་ཁྱེད་རང་ལ་ཐིམ། ཡང་སློབ་དཔོན་དང་མདུན་བསྐྱེད་ཀྱི་ཐུགས་ཀ་ནས་ཀྱང་རིག་བྱེད་མ་དཔག་ཏུ་མེད་པ་བྱུང་ཁྱེད་རང་ལ་ཐིམ། ཡང་འོད་ཟེར་འཕྲོས་པས། ལྷོ་ཕྱོགས་རིག་བྱེད་ཀྱི་ཕུག་ན་བཞུགས་པའི་རྗེ་བཙུན་མའི་སྐུ་ལ་ཕོག་པས། དེ་ལས་དེ་འདྲ་བའི་རྗེ་བཙུན་མའི་སྐུ་བསམ་གྱིས་མི་ཁྱབ་པ་སྤྱན་དྲངས་ཏེ་ཁྱེད་རང་ལ་ཐིམ་པས། རྒྱུད་བྱིན་གྱིས་བརླབས་པར་མོས་པ་མཛོད། ཅེས་དང༌། སྔགས་ཀྱི་མཐར། ཛཿཧཱུཾ་བཾ་ཧོཿ ཞེས་ཡང་ཡང་བརྗོད་དེ། དྲིལ་བུ་སིལ་ཞིང་གུ་གུལ་གྱིས་བདུགདེས་རྗེ་བཙུན་མའི་སྐུའི་རྗེས་གནང་ཐོབ། རྗེ་བཙུན་མའི་སྐུ་དང་རང་གི་ལུས་དབྱེར་མེད་དུ་བྱིན་གྱིས་བརླབས་སྙམ་དུ་མོས་པ་མཛོད། གསུང་གི་རྗེས་གནང་གི་སླད་དུ།
ཁྱེད་རང་རྗེ་བཙུན་མར་གསལ་བའི་ཐུགས་ཀར་ཨུཏྤལ་དང་ཉི་མའི་སྟེང་དུ་ཧྲཱིཾཿཡིག་གཅིག་བསམས་ཏེ་སློབ་དཔོན་དང་མདུན་བསྐྱེད་ཀྱི་རྗེ་བཙུན་མ་ལ་གུས་འདུད་དྲག་པོ་དུངས་པ་བྱས་པས། དེ་གཉིས་ཀའི་ཐུགས་ཀ་ནས་སྔགས་ཀྱི་ཕྲེང་བ་བྱུང༌། ཞལ་ནས་ཐོན། ཁྱེད་རང་གི་ཞལ་དུ་ཞུགས། ཐུགས་ཀའི་ཧྲཱིཾཿཡིག་གི་མཐར་གཡས་སྐོར་དུ་འཁོད་པར་མོས་པ་བྱས། མེ་ཏོག་དང་བཅས་པས་ཐལ་མོ་སྦྱར་ཏེ་སྔགས་འདིའི་རྗེས་ཟློས་མཛོད། ཨོཾ་ནས་སྭཱཧཱ་ལན་གསུམ། ཞེས་བཟླས་པའི་དང་པོས་རྒྱུད་བྱིན་གྱིས་བརླབས། གཉིས་པས་དབྱེར་མེད་དུ་བྱས། གསུམ་པས་བརྟན་པར་མོས་ཏེ། སློབ་དཔོན་ལ་དྲིན་ལན་གྱི་ཚུལ་དུ་མེ་ཏོག་གཏོར་ནས་འདིའི་རྗེས་ཟློས་མཛོད། བཅོས་ལྡན་བདག་གིས་སོགས་ལན་གསུམ་བརྗོད་ནས། སློབ་དཔོན་གྱིས་ཀྱང་མེ་ཏོག་གི་ཕྲེང་བ་སྔགས་སུ་བྱིན་གྱིས་བརླབས་ཏེ། ཁྱེད་རང་གི་སྤྱི་བོར་བཏག་ཅིང་བྱིན་གྱིས་བརླབས་པར་མོས་པ་མཛོད། བཅོམ་ལྡན་འདི་ལ་སོགས་གསུམ་གྱི་མཐར། རྡོ་རྗེ་སློབ་མ་འདིའི་རྒྱུད་ལ་རྗེ་བཙུན་མ་ཀུ་རུ་ཀུལླེའི་སྔགས་ཀྱི་བྱིན་རླབས་མ་ལུས་པ་འཇུག་པར་གྱུར་ཅིགདེས་རྗེ་བཙུན་མའི་གསུང་གི་རྗེས་གནང་ཐོགརྗེ་བཙུན་མའི་གསུང་དང་རང་གི་ངག་དབྱེར་མེད་དུ་བྱིན་གྱིས་བརླབས་སྙམ་དུ་མོས་པར་མཛོད། ཐུགས་ཀྱི་རྗེས་གནང་གི་སླད་དུ་དམིགས་པ་འདི་བཞིན་མཛོད། སློབ་དཔོན་གྱི་ཐུགས་ཀའི་ཧྲཱིཾཿལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམ་དཔའ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་དང༌། སྟོབས་དང་མི་འཇིགས་པ་དང་མ་འདྲེས་པའི་ཆོས་ལ་སོགས་པ་སངས་རྒྱས་ཀྱི་ཡོན་ཏན་ཐམས་ཅད་འོད་ཟེར་
ཁ་དོག་དམར་པོའི་རྣམ་པར་སྤྱན་དྲངས་ཏེ། ཁྱེད་རང་གི་ཐུགས་ཀར་ཐིམ་པས། དེ་རྣམས་ཀྱི་བྱིན་རླབས་ཐམས་ཅད་རྒྱུད་ལ་ཞུགས་པར་མོས་པ་མཛོད། སླར་ཡང་ཧྲཱིཾཿལས་འོད་ཟེར་འཕྲོས་པས་འཕགས་པ་ཉན་ཐོས་དང་རང་སངས་རྒྱས་རྣམས་ཀྱི་ལུང་དང་མངོན་པར་རྟོགས་པའི་ཡོན་ཏན་ཐམས་ཅད་སོགས་འགྲེ། སླར་ཡང་དེ་ལས་འོད་ཟེར་འཕྲོས་པས་ཚངས་པ་དང་བརྒྱ་བྱིན་ལ་སོགས་པ་འཇིག་རྟེན་པའི་ཆེན་པོ་རྣམས་ཀྱི་ཚེ་དང་བསོད་ནམས་དང་དབང་ཐང་ཐམས་ཅད་གོང་ལྟར་སྤྱན་དྲངས་ཏེ། ཁྱེད་རང་རྣམས་ལ་ཐིམ་པས་ཚེ་དང་བསོད་ནམས་དང་དབང་ཐང་ཐམས་ཅད་རྒྱས་པར་མོས་པ་མཛོད། སླར་ཡང་ཐུགས་ཀ་ནས་འོད་ཟེར་འཕྲོས་པས་འཁོར་ལོས་བསྒྱུར་བའི་རྒྱལ་པོ་དང༌། པཎྜི་ཏ་དང༌། སྐྱེ་འགྲོ་བསོད་ནམས་ཅན་རྣམས་ཀྱི་ལུང་དང་མངོན་པར་རྟོགས་པའི་ཡོན་ཏན་དང༌། ཚེ་དང་བསོད་ནམས་དང་དཔལ་འབྱོར་ཐམས་ཅད་ཀྱང་གོང་ལྟར་སྤྱན་དྲངས་ཏེ། ཁྱེད་རང་རྣམས་ལ་ཐིམ་པས། ཚེ་དང་བསོད་ནམས་དང་དཔལ་འབྱོར་ཐམས་ཅད་རྒྱས་པར་བྱས་པ་ཡིན་སྙམ་དུ་མོས་པར་མཛོད། ཨོཾ་ཀུ་རུ་ཀུལླེ་ཧྲཱིཿཧྲཱིཿཧྲཱིཿ ཨ་བེ་ཤ་ཡ་ཧྲཱིཿཧྲཱིཿཧྲཱིཿ ཞེས་ཡང་ཡང་བརྗོད་ཅིང༌། གུ་གུལ་གྱིས་བདུགདྲིལ་བུའི་སྒྲ་རེས་འཇོག་ཏུ་བྱ། དེས་རྗེ་བཙུན་མའི་ཐུགས་ཀྱི་རྗེས་གནང་ཐོབ། རྗེ་བཙུན་མའི་ཐུགས་དང་རང་གི་སེམས་དབྱེར་མེད་དུ་བྱིན་གྱིས་བརླབས་སྙམ་དུ་མོས་པར་མཛོད། དེ་ནས་གཏོར་དབང་སྤྱི་དང་མཐུན་པར་བྱ་བའམ། གཏོར་དབང་མ་བྱས་ཀྱང་རུང་ལ། དེ་ལྟ་ན་རྟེན་གཏོར་ཡང་མི་དགོས་སོ། །རྗེས་གཙོ་བོ༴ མཎྜལ་ཕུལ། དེང་ནས་སོགས་འདྲ། ཚོམ་བུ་ལ་མཆོད་བསྟོད། དངོས་གྲུབ་བླངས་ལ་གཤེགས་སུ་གསོལ། དམ་ཚིག་པ་བསྡུས་ཏེ་གནས་གསུམ་བསྲུང་
དགེ་བ་བསྔོའོ། །སངས་རྒྱས་པ་ཡི་སྔགས་རྒྱུད་ལ། །དབང་བསྡུད་ཀུན༵་གྱི་རྩ་བར་གྲགས། །དག༵འ་ཆེན་ལྷ་མོ་རིག་བྱེད་མའི། །ལག་ལེན་སྙིང༵་པོ༵་ངོ་མཚར་རྨད། །རྗེ་བཙུན་ས་སྐྱ་པའི་གདམས་ངག་དང་འབྲེལ་བའི་ཟབ་ཆོས་དམར་པོ་སྐོར་གསུམ་དུ་གྲགས་པ་ལས། རྗེ་བཙུན་མ་ཀུ་རུ་ཀུལླེའི་སྒྲུབ་ཐབས་ཀྱི་ལེ་ཚན་ནོ།། །།ཞུས་དག །
དཔལ་འདོད་པའི་རྒྱལ་པོའི་སྒྲུབ་ཐབས།
དཔལ་འདོད་པའི་རྒྱལ་པོའི་སྒྲུབ་ཐབས་བཞུགས་སོ། །ཨོཾ་སྭཱ་སྟི། འདོད་ཆགས་རྡོ་རྗེ་ལ་བཏུད་ནས། །དབང་སྡུདརྣོ་ལ་སྟོབས་ཆེ་བ། །འགྲན་ཟླ་མེད་པའི་རིག་སྔགས་རྒྱལ། །འདོད་རྒྱལ་སྒྲུབ་ཐབས་བཤད་པར་བྱ། །སྐྱབས་འགྲོ་སེམས་བསྐྱེད་བྱས་ལ། རང་སྐད་ཅིག་གིས་འདོད་པའི་རྒྱལ་པོར་གསལ་བའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་དམར་པོ་དེ་ལས་འོད་ཟེར་འཕྲོས་པས། རང་བཞིན་གྱིས་གནས་ནས་བླ་མ་འོད་དཔག་མེད་ཀྱི་རྣམ་པ་ཅན་གྱིས་དབུ་བརྒྱན་པའི་འདོད་པའི་རྒྱལ་པོ་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་ཨོཾ་བཛྲ་ས་མཱ་ཛཿ ན་མོ་གུ་རུ་བྷྱཿ ན་མཿཊཀྐི་རཱ་ཛ་བྷྱཿ ཨོཾ་བཛྲ་པུཥྤེ་སོགས་ཀྱིས་མཆོད། གུར་ནས་འབྱུང་བའི་རྒྱུན་བཤགས་བྱ། ཚད་མེད་བཞི་བསྒོམ། ཨོཾ་སྭ་བྷཱ་ཝ་སོགས་བརྗོད། སྟོང་པའི་ངང་ལས་པཾ་ལས་པདྨ་དམར་པོ་འདབ་མ་སུམ་ཅུ་རྩ་གཉིས་པའི་ལྟེ་བར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་བྷྲུཾ་དམར་པོ་ལས་བྱུང་བའི་རིན་པོ་ཆེ་པདྨ་རཱ་ག་ལས་གྲུབ་པའི་གཞལ་ཡས་ཁང་ཟླ་གམ་སྒོ་གཅིག་པ། དབུས་སུ་པཾ་ལས་པདྨ་དམར་པོ་འདབ་མ་བརྒྱད་པའི་ལྟེ་བར་རཾ་ལས་ཉི་མའི་དཀྱིལ་འཁོར་གྱི་སྟེང་དུ། རང་སེམས་ཧཱུཾ་ཡིག་
དམར་པོ། དེ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུ་བསམ་གྱིས་མི་ཁྱབ་པར་འཕྲོས། འཕགས་པ་མཆོད། སྣོད་བཅུད་ཐམས་ཅད་དབང་དུ་བསྡུས་ནས། འོད་ཟེར་དམར་པོའི་རྣམ་པར་ཚུར་འདུས་ཏེ་ཧཱུཾ་ལ་ཐིམ། དེ་འོད་དུ་ཞུ་བ་ལས་རང་ཉིད་འདོད་པའི་རྒྱལ་པོ་སྐུ་མདོག་པདྨ་རཱ་ག་ལྟར་དམར་ཞིང་འོད་འབར་བ། ཞལ་གཅིག་ཕྱག་གཉིས་སྤྱན་གསུམ་དང་ལྡན་པ། གཡས་ཁམས་གསུམ་འགུགས་པའི་ལྕགས་ཀྱུ་འཕྱར་སྟབས་སུ་འཛིན་ཞིང༌། གཡོན་སྡིགས་མཛུབ་དང་བཅས་པས་ཞགས་པ་ཐུགས་ཀར་འཛིན་པ། ཞབས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་བཞུགས་པ། དབུ་སྐྲ་རལ་པའི་ཐོར་གཙུགས་ཅན། རིན་པོ་ཆེ་དང་སྦྲུལ་གྱིས་བརྒྱན་པ། དར་དམར་པོ་སྟོད་གཡོགས་དང༌། དར་སྣ་ཚོགས་ཀྱི་ཤམ་ཐབས་གསོལ་བ། དེའི་བར་དུ་ཡུམ་བདེ་བ་རྒྱས་བྱེད་མ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། གཡས་ལྕགས་ཀྱུ་འཕྱར་སྟབས་སུ་འཛིན་ཞིང༌། གཡོན་བདུད་རྩིས་གང་བའི་བུམ་པ་འཛིན་པས་ཡབ་ལ་འཁྱུད་པ། ཞབས་གཡས་བརྐྱང་ཞིང་གཡོན་བསྐུམ་པའི་སྟབས་ཀྱིས་ཡབ་ལ་འཁྲིལ་བ། ཡབ་ཡུམ་གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། ཡབ་ཀྱི་ཐུགས་ཀར་ཧཱུཾ་ཡིག་དམར་པོའི་མཐར་བཟླས་བྱའི་སྔགས་ཁ་དོག་དམར་པོས་གཡས་བསྐོར་དུ་བསྐོར་བ། དེ་ལས་འོད་ཟེར་འཕྲོས་པས་བདེ་བ་ཅན་ནས་འདོད་པའི་རྒྱལ་པོ་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་ཨོཾ་བཛྲ་ས་མཱ་ཛཿ ཨོཾ་བཛྲ་པུཥྤེ་སོགས་ཀྱིས་མཆོད། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་
བཅས་པ་ཨོཾ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། སངས་རྒྱས་རྣམས་ཀྱིས་ཨོཾ་བཛྲི་བྷཱ་ཝ་ཨ་བྷི་ཥིཉྩ་ཧཱུཾ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དགཆུ་ལྷག་མ་ཡར་ལུད་པ་ལས། འོད་དཔག་ཏུ་མེད་པས་དབུ་བརྒྱན། དེའི་དཔྲལ་བར་ཨོཾ་ལས་འཁོར་ལོ་ཨོཾ་གྱིས་མཚན་པ་ལས་རྣམ་པར་སྣང་མཛད་དམར་པོ་བྱང་ཆུབ་མཆོག་གི་ཕྱག་རྒྱ་མཛད་པ། མགྲིན་པར་ཨཱཿལས་པདྨ་ཨཱཿཡིས་མཚན་པ་ལས་འོད་དཔག་མེད་དམར་པོ་མཉམ་བཞག་གི་ཕྱག་རྒྱ་མཛད་པ། ཐུགས་ཀར་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས་མི་བསྐྱོད་པ་དམར་པོ་གཡས་ས་གནོན། གཡོན་མཉམ་བཞག་གི་ཕྱག་རྒྱ་མཛད་པ། དེ་གསུམ་གྱི་ཐུགས་ཀ་ནས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དེ་བཞིན་གཤེགས་པ་རིགས་གསུམ་གྱི་རྣམ་པར་ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ལྷ་གསུམ་ལ་སོ་སོར་ཐིམ་ཞིང༌། དེ་གསུམ་འོད་ཟེར་ཁ་དོག་དམར་པོའི་རྣམ་པར་ཞུ་ནས་རང་གི་ལུས་ངག་ཡིད་གསུམ་དང་དབྱེར་མེད་དུ་གྱུར། པདྨའི་ཕྲེང་བ་སྲིན་ལག་གི་སྟེང་ནས་དྲངས་ཏེ། ཨོཾ་ཝཱ་ཤཾ་ཀུ་རུ་ཧོཿ ཨོཾ་ཀུ་སུ་མ། མཱ་ལི་བྷི་ཧཱུཾ་ཛཿ ཨོཾ་བཛྲ་ཀུ་ས་ཛི་ཀཾ་བྷེཿ ཋ་ཋ་ཋ། ཨོཾ་གྲོ་གེ་མ་ཀྲི་ཏེ། འགྲོ་བ་མང་པོ་ཝཱ་ཤཾ་ཀུ་རུ་ཧོཿ ཀ་ཀ་དྷ་ཡ་ཀ་དྷ་ཡ། ཁ་ཁཱ་ཧི་ཁཱ་ཧི། ག་གརྫ་ཡ་གརྫ་ཡ། གྷ་གྷ་ཏ་ཡ་གྷ་ཏ་ཡ། ཙ་ཙ་ལ་ཡ་ཙ་ལ་ཡ། ཚ་ཚ་ཏ་ཡ་ཚ་ཏ་ཡ། ཛ་ཛཾ་བྷ་ཡ་ཛཾ་བྷ་ཡ། ཛྷ་ཛྷ་ཏ་ཡ་ཛྷ་ཏ་ཡ། ཊ་ཊ་ལ་ཡ་ཊ་ལ་ཡ། ཋ་ཋ་ཀ་ཡ་ཋ་ཀ་ཡ། ཌ་ཌ་བྷ་ཡ་ཌ་བྷ་ཡ། ཌྷ་ཌྷ་ཀ་ཡ་ཌྷ་ཀ་ཡ།
ཎ་ཎ་ཤ་ཡ་ཎ་ཤ་ཡ། ཏ་ཏཾ་བྷ་ཡ་ཏཾ་བྷ་ཡ། ཐ་ཐོ་བྷ་ཡ་ཐོ་བྷ་ཡ། ད་ད་ར་ཡ་ད་ར་ཡ། དྷ་དྷ་ར་ཡ་དྷ་ར་ཡ། ན་ནཱ་ཤ་ཡ་ནཱ་ཤ་ཡ། པ་པ་ཏ་ཡ་པ་ཏ་ཡ། ཕ་ཕ་ཏ་ཡ་ཕ་ཏ་ཡ། བ་བནྡྷ་ཡ་བནྡྷ་ཡ། བྷ་བྷེ་ཏ་ཡ་བྷེ་ཏ་ཡ། མ་མཱ་ར་ཡ་མཱ་ར་ཡ། ཡ་ཡོ་ཧ་ཡ་ཡོ་ཧ་ཡ། ར་རོ་ཧ་ཡ་རོ་ཧ་ཡ། ལ་ལོ་བ་ཡ་ལོ་བ་ཡ། ཝ་ཝ་ཧ་ཡ་ཝ་ཧ་ཡ། ཤ་ཤོ་ཥ་ཡ་ཤོ་ཥ་ཡ། ཥ་ཥུཥྟི་ཡ་ཥུཥྟི་ཡ། ས་ས་དྷ་ཡ་ས་དྷ་ཡ། ཧ་ཧ་ན་ཡ་ཧ་ན་ཡ། ཀྵ་ཀྵོ་བྷ་ཡ་ཀྵོ་བྷ་ཡ། འགྲོ་བ་མང་པོ་ཝ་ཤཾ་ཀྲི་ཏི། ཝ་ཤཾ་ཀུ་རུ་ཧོཿ ཤནྟིཾ་ཀུ་རུ། པུཥྟིཾ་ཀུ་རུ། ཀྵ་ཡཾ་ཀུ་རུ། ཀྵོ་བྷཾ་ཀུ་རུ། མ་རཾ་ཀུ་རུ་སྭཱཧཱ། ཨོཾ་སིདྡྷི་སརྦ་སིདྡྷི་མཧཱ་སིདྡྷི། པཱུ་ཛ་ཨགྞི་ཏཾ། བྷ་ན་ཏེ་མཱ་ར་ཎཾ། འགྲོ་བ་མང་པོ་ཝཱ་ཤཾ་རུ་ཧོཿ ཞེས་ཐུན་རེ་ལ་ཉེར་ལྔ་རེ་བཟླ། ཐུན་འཇོག་པ་ན། རང་གི་སྙིང་ག་ནས་འོད་ཟེར་འཕྲོས་པས། གཞལ་ཡང་ཁང་གདན་དང་བཅས་པ་འོད་ཟེར་གྱི་རྣམ་པར་གྱུར་ནས་རང་ལ་ཐིམ། གཏོར་མ་འབུལ་ན་རིན་པོ་ཆེའི་སྣོད་དུ་ཟན་ལེབ་ཟླུམ་པོ་གྲུ་བཞི་གྲུ་གསུམ་ཟླ་གམ་རྣམས་བརྩེགས་པའི་སྟེང་དུ་གཏོར་མའི་སྙིང་པོ་བཞག་ལ་སྨུག་རྩིས་བསྒྱུར། མཐའ་མམཐེབ་ཀྱུ་དང་ཁ་ཟས་སྣ་ཚོགས་ཀྱིས་བསྐོར་བ་ཞིག་གམ། མ་གྲུབ་ན་གཞན་གང་རིགས་དང༌། མཁའ་འགྲོ་མ་རྣམས་ལ་གཏོར་མ་བཤམ། ཡི་དམ་གང་བྱེད་ཀྱི་ནང་མཆོད་བྱིན་གྱིས་བརླབས། མདུན་བསྐྱེད་དང་མ་འབྲེལ་ན། རང་གི་སྙིང་ག་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་ནུབ་ཕྱོགས་བདེ་བ་ཅན་ནས། ཨོཾ་ཊཀྐི་རཱ་ཛ་ཧཱུཾ་ཛཿ ཞེས་པས་སྤྱན་དྲངས། བྲིས་སྐུ་སོགས་ཡོད་ན་བསྟིམ། སླར་ཡང་སྙིང་ག་ནས་འཕྲོས་པས་འོད་ཟེར་གྱིས་གཏོར་མ་བཏེག་སྟེ། འདོད་རྒྱལ་གྱི་ཕྱག་ཏུ་ཕུལ་བ་གསོལ་བར་བསམ་ཞིང༌། རྡོ་རྗེ་ཐལ་མོ་ཁ་ཕྱེ་སྟེ། ཨོཾ་ཊཀྐི་རཱ་ཛཿཨི་དཾ་བ་ལིཾ་ཁ་ཁ་
ཁཱ་ཧི་ཁཱ་ཧི། སརྦ་སིདྡྷི་མྨེ་པྲ་ཡཙྪནྟུ་ཧཱུཾ། ཞེས་པ་ལན་གསུམ་མཾ་ལྔས་ཕུལ། མེ་ཏོག་ལ་སོགས་པས་མཆོད། དུས་གསུམ་སངས་རྒྱས་ཐམས་ཅད་ཀྱིས། །དབང་བསྐུར་ཕོ་ཉའི་ལས་མཛད་པ། ཁྲོ་བོ་འདོད་པའི་རྒྱལ་པོ་ནི། ཁམས་གསུམ་འགུགས་པ་ཁྱོད་ལ་འདུད། །མཆོད་སྦྱིན་གཏོར་མ་འདི་བཞེས་ལ། །ཞེས་སོགས་ཀྱིས་འཕྲིན་ལས་གཞོལ། རང་གི་སྙིང་ག་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་གནས་ཀྱི་མཁའ་འགྲོ་མ་སུམ་ཅུ་རྩ་གཉིས་འཁོར་དང་བཅས་པ་ཨོཾ་སརྦ་ཌཱ་ཀི་ནཱི་ཧཱུཾ་ཛཿ ཞེས་པས་སྤྱན་དྲངས། གཙོ་མོ་རྣམས་སྐུ་མདོག་དམར་མོ་ཌ་མ་རུ་དང་ཐོད་པ་རུས་པའི་རྒྱན་དང༌། དར་དམར་པོའི་ན་བཟའ་ཅན། ཉི་མའི་གདན་ལ་གར་སྟབས་ཀྱིས་བཞུགས་ཤིང་འཁོར་རྣམས་སྐུ་མདོག་སྣ་ཚོགས་པ་ཕྱག་མཚན་སྣ་ཚོགས་འཛིན་པར་བསམ། རང་གི་སྙིང་ག་ནས་སྤྲུལ་པའི་ལྷ་མོ་ཐོད་པ་ཐོགས་པ་མང་པོས་བདུད་རྩི་བཅུས་ཏེ། དེ་རྣམས་ཀྱི་ཕྱག་གི་ཐོད་པར་བླུག་པ་གསོལ་བར་བསམ་ཞིང༌། ཨོཾ་སརྦ་ཌཱ་ཀི་ནཱི་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་གསུམ་ལ་སོགས་པས་ཕུལ། ཞིང་སྐྱེས་ཡུལ་གྱི་དུར་ཁྲོད་ནས། །མཁའ་འགྲོ་ཆེན་མོ་རྣམས་བཞུགས་པ། །སྐུ་ཡི་གར་སྟབས་གློག་ལྟར་འཁྱུག །གསུང་གི་གསང་སྔགས་ཕྱོགས་བཅུར་སྒྲོག །ཐུགས་ནི་ཐུགས་རྗེའི་ངང་ལ་བཞུགས། །སྒྲུབ་པོའི་འཕྲིན་ལས་ཅི་ཡང་མཛད། །མཐུ་དང་ནུས་པ་བསམ་མི་ཁྱབ། །སྟོབས་ཆེན་ཁྱེད་ལ་གུས་པས་བསྟོད། །མཆོད་སྦྱིན་གཏོར་མ་སོགས་གོང་ལྟར་བརྗོད་པས། དེ་ལྟར་བགྱིའོ། །ཞེས་ཁས་བླངས་པར་བསམ། ཡིག་བརྒྱས་ལྷག་ཆད་ཁ་བསྐང༌། བཟོད་པར་གསོལ་ལ། བྲིས་སྐུ་ཡོད་ན་བརྟན་བཞུགས་བྱ། མེད་ན་གཤེགས་སུ་གསོལ། རང་གི་གནས་གསུམ་བསྲུངས་
ལ་བསྔོ་བ་དང་བཀྲ་ཤིས་བྱའོ། །འདོད་རྒྱལ་འདི་ལ་རྗེས་གནང་ནི། མི་ཟབ་པའི་ལུགས་དང༌། ཟབ་མོའི་ལུགས་དང༌། སྐག་ཆོལ་གྱི་རྗེས་གནང་གསུམ་ཡོད་པ་ལས། དང་པོ་ནི་སྒྲུབ་ཐབས་བརྒྱ་རྩའི་ཆིངས་བཞིན་ཡིན་པ་ལས། གཏོར་དབང་ཙམ་བྱ་བ་ཡིན་ལ། གསུམ་པ་ནི། འཁོར་ལོའི་ལས་ཚོགས་ལ་ཉེ་བར་མཁོ་བའི་བྱིན་རླབས་ཙམ་ཡིན་ཞིང༌། ཤིན་ཏུ་བཀའ་དོག་པར་མཛད་པས་འདིར་མི་འབྲིའོ། །གཉིས་པ་ནི། མཎྜལ་ཟླ་གམ་དམར་པོའི་ནང་དུ་པདྨ་འདབ་བརྒྱད་ཚོམ་བུ་ཅན་ཞིག་བཀོད། དེའི་སྟེང་དུ་མཉྫི་ལ། གོང་དུ་བཤད་པའི་དབྱིབས་ཁྱད་པར་ཅན་གྱི་གཏོར་མ་དེ་རྟེན་གཏོར་དུ་བཀོད། མདུན་དུ་འབུལ་གཏོར་དང་མཆོད་པ་རྒྱ་ཆེར་བཤམ། སྔོན་འགྲོ་གཏོར་མ་དང་བགེགས་གཏོར་བཏང་ཞིང་བགེགས་བསྐྲད། མཆོད་པ་བྱིན་རླབས་སྤྱི་དང་མཐུན་པར་བྱ། བདག་བསྐྱེད་འདོད་རྒྱལ་ཉིད་དམ་ཡི་དམ་གང་ཡང་རུང་བ་ཞིག་བསྒོམ་པ་ལས། དང་པོ་ལྟར་ན། གོང་དུ་བཤད་པ་བཞིན་ནོ། །མདུན་བསྐྱེད་སངས་སྦྱངས། སྟོང་པའི་ངང་ལས། ནས། དབུ་རྒྱན་གྱི་བར་བདག་བསྐྱེད་བཞིན་བསྐྱེད། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཞེས་པ་ཙམ་བརྗོད། བཟླས་པ་ཅི་འགྲུབ་བྱས། གོང་བཞིན་གཏོར་མ་ཕུལ། སླར་ཡང་མཆོད་བསྟོད་བྱས་ལ། སློབ་མ་རྗེས་སུ་འཛིན་པར་གསོལ་བ་གདབ་པའོ། །སློབ་མ་རྣམས་ཀྱིས་ཁྲུས་བྱས། ཡོན་དང་མཎྜལ་ཕུལ། རྡོ་རྗེ་རྣལ་འབྱོར་དབང་ཕྱུག་གཙོ། །གསང་བའི་ཆོ་ག་བླ་ན་མེད། །དབང་དུ་བྱེད་པའི་རིགས་སྔགས་མཆོག །བདག་ལ་ངེས་པར་སྩལ་དུ་གསོལ། །ཞེས་པས་གསོལ་བ་བཏབ། དཀོན་མཆོག་གསུམ་ལ་བདག་སྐྱབས་མཆི། །སོགས་རྒྱུན་བཤགས་བྱ། ཨོཾ་ཤཱུ་ནྱ་ཏ་ནས། གསུམ་དང་དབྱེར་མེད་དུ་གྱུར་གྱི་བར་མངོན་རྟོགས་བཞིན་དམིགས་པ་ཕོག ཡེ་ཤེས་སྤྱན་འདྲེན་གྱི་སྐབས་རོལ་ཆེན་བྱ། སྐུའི་རྗེས་གནང་ངོ༌། །
སློབ་མའི་སྙིང་གར་པད་ཉི་ལ་ཧཱུཾ་དང༌། སྔར་སློབ་དཔོན་ཉིད་ཀྱིས་བདག་བསྐྱེད་འདོད་རྒྱལ་ལ་བྱས་ན། སློབ་དཔོན་གྱི་ཐུགས་ཀ་དང༌། ཡི་དམ་གཞན་ལ་བྱས་ན། མདུན་བསྐྱེད་ཀྱི་ཐུགས་ཀར་པད་ཉི་ལ། ས་བོན་སྔགས་འཕྲེང་ཨཱ་ལི་ཀཱ་ལིས་བསྐོར་བ་བཀོད། སློབ་མའང་དེ་བཞིན་གསལ་འདེབས་སུ་བཅུག མཎྜལ་ཙནྡན་དམར་པོས་བྱུགས་པ་ལ། མེ་ཏོག་དམར་པོས་ཚོམ་བུ་བཀོད་པ། སྐབས་འདི་སློབ་དཔོན་གྱི་ཕྱག་ཏུ་ཕུལ་ཏེ། ས་གཞི་སྤོས་ཀྱིས་ཞེས་སོགས་བརྗོད། འདི་ཕྱིས་ཀྱི་ཕྱག་ལེན་ལ་མི་བྱེད་པར་སྣང་ནའང༌། སྒོས་ཆོས་ཡིན་པས་འགྲུབ་ན་ལེགས། དུས་གསུམ་སངས་རྒྱས་ཐམས་ཅད་ཀྱི། །དམིགས་མེད་ཐུགས་རྗེ་ལས་འཁྲུངས་པའི། །འཕྲིན་ལས་དངོས་གྲུབ་འབྱུང་བའི་ཕྱིར། །འདི་ནི་རྗེས་སུ་གནང་བར་མཛོད། །ཅེས་ལན་གསུམ་རྗེས་ཟློས་ཀྱིས་གསོལ་བ་བཏབ། ཚིག་དང་པོ་གཉིས་འདྲ་བ་ལས། ཐབས་ཀྱི་འཕྲིན་ལས་ཟབ་མོའི་དོན། །གསང་བ་ཆེ་འདིར་ཁྱེད་དད་དམ། ཞེས་སློབ་དཔོན་གྱིས་འདྲི། ཚིག་དེ་ཉིད་ལ་གསང་བ་ཆེ་འདི་བདག་དད་དོ། །ཞེས་བསྒྱུར་ལ་རྗེས་ཟློས་བྱེད་དུ་གཞུགདེ་ནས་བཟླས་ལུང་སྤྱི་དང་མཐུན་པར་འབོགབཅོམ་ལྡན་བདག་གི་བཟུང་ལགས་ཀྱི། །སོགས་ཀྱང་སྤྱི་དང་མཐུན། གསུང་གི་རྗེས་གནང་ངོ༌། །ཐུགས་ཀྱི་རྗེས་གནང་ནི། གཏོར་མ་མགོ་བོར་བཞག་པས། ཁྲོ་བོ་འདོད་པའི་རྒྱལ་པོ་གནས་སུམ་ཅུ་རྩ་གཉིས་ཀྱི་མཁའ་འགྲོ་མ་གཙོ་མོ་རེ་རེ་ལ་འཁོར་འབུམ་འབུམ་གྱི་ཚོགས་དང་བཅས་པས་བསྐོར་བ། སྔགས་དང་རོལ་མོའི་སྒྲ་ཆེན་པོ་དང་བཅས་འུར་འུར་བྱོན་ཏེ། འདོད་རྒྱལ་ཁྱེད་རང་རྣམས་ཀྱི་སྤྱི་བོར་བཞུགས། འཁོར་རྣམས་སྟེང་འོག་ཕྱོགས་འཚམས་
ནམ་མཁའ་ཐམས་ཅད་ཁྱབ་པར་བཞུགས་པར་མོས། དེ་རྣམས་ལ་བླ་མས་བཀའ་བསྒོས་པས་འཕྲིན་ལས་རྣམ་བཞི་སོགས་རང་གི་འདོད་དོན་ཐམས་ཅད་ཐོགས་པ་མེད་པར་བསྒྲུབ་པར་མོས་པ་མཛོད། དེ་ནས་རོལ་ཆེན་གྱི་སྒྲ་དང་སྦྱར་ཏེ། དུས་གསུམ་སངས་རྒྱས་ཐམས་ཅད་ཀྱི། །ཞི་བས་འཕྲིན་ལས་ཆེན་པོ་ཡིས། །ནད་དང་གནོད་པ་ཞི་བར་མཛོད། །ཚེ་དང་བསོད་ནམས་རྒྱས་པར་གྱིས། །གདུལ་བྱ་དབང་དུ་འགྱུར་བར་གྱིས། །བསྟན་ལ་གནོད་པ་བསད་པར་གྱིས། །དུས་གསུམ་སངས་རྒྱས་ཐམས་ཅད་ཀྱིས། །བྱིན་གྱིས་བརླབས་པའི་ཁྲོ་བོ་ནི། །དབང་བསྐུར་ཕོ་ཉའི་ལས་མཛད་པ། ཁྲོ་བོ་འདོད་པའི་རྒྱལ་པོ་ཡིས། །འདི་ཡི་བསྒྲུབ་བྱ་འགྲུབ་པར་གྱིས། །མཁའ་འགྲོ་སུམ་ཅུ་རྩ་གཉིས་ཀྱིས། །འདི་ཡིས་བསྒྲུབ་བྱ་འགྲུབ་པར་མཛོད། །ཅེས་པའི་མཐར་རྩ་སྔགས་དྲག་ཏུ་བཟླའོ། །དེ་ནས་གོང་གི་དུས་གསུམ་སངས་རྒྱས་སོགས་ལ། གསང་བ་ཆེ་འདི་སྒྲུབ་པར་གྱིས། །ཞེས་འདོན་པ་སྤོས་ལ་གནང་བ་བྱིན། འདིའི་སྒྲུབ་པ་ལ་བརྩོན་པ་དང༌། སྣོདམིན་ལ་གསང་ཞིང༌། སྐལ་ལྡན་རེ་རེ་ཙམ་ལ་སྤེལ་བར་བྱའོ། །ཞེས་གདམས་སོ། །རྗེས་གཙོ་བོས་ཇི་ལྟར་སོགས་དང༌། མཎྜལ་འབུལ། དེང་ནས་བརྩམས་ཏེ་སོགས་བྱ། ཚོགས་མཆོད་བྱ། སླར་ཡང་ལས་དང་མཐུན་པའི་ཡོན་འབུལ། མཆོད་པ་ཁ་གསོས་ལ། མཆོད་བསྟོད་བྱ། གསོལ་བ་དྲག་ཏུ་གདབ། ཡིག་བརྒྱས་ལྷག་ཆད་ཁ་བསྐང་བ་མན་ཆད། གོང་བཞིན་བྱའོ། །མཁའ་འགྲོ་ཀུན༵་གྱི་བཀའ་བགྲོས་པ། །དབང་སྡུད་རབ་དག༵འ་རྒྱུད་ཆུང་དང༌། །མན་ངག་རྒྱ་མཚོའི་སྙིང༵་པོ༵་ལས། །ལག་ལེན་ཉེར་མཁོ་ཅུང་ཟད་སྡེབས། །དམར་པོ་སྐོར་གསུམ་ལས། འདོད་པའི་རྒྱལ་པོའི་སྒྲུབ་ཐབས་ཀྱི་ལེན་ཚན་ནོ།། །།
དཔལ་ཚོགས་ཀྱི་བདག་པོའི་སྒྲུབ་ཐབས།
དཔལ་ཚོགས་ཀྱི་བདག་པོའི་སྒྲུབ་ཐབས་བཞུགས་སོ། ཨོཾ་སྭཱ་སྟི། གསང་བའི་བདག་པོ་ཧེ་རུ་ཀ །འབྱུང་པོ་འདུལ་དང་ཚོགས་བདག་གི །སྒྲུབ་ཐབས་རྨད་བྱུང་ངོ་མཚར་ཅན། །ཀུན་གྱི་མཆོག་གྱུར་བཤད་པར་བྱ། །ཚོགས་བདག་གི་སྒྲུབ་ཐབས་ཐམས་ཅད་ཀྱི་རྒྱལ་པོ་ཚོགས་བདག་དམར་ཆེན་འདི་ཡིན་ནོ། །དབེན་པའི་གནས་སུ་མཎྜལ་ལ་པདྨ་འདབ་བརྒྱད་དམར་པོ་བྲིས། དེའི་དབུས་སུ་ཟླ་གམ་དམར་པོ་ལ་ཚོམ་བུ་དམར་པོ་དགོད། དེའི་སྟེང་དུ་རྟེན་གཏོར་ནོར་བུའི་དབྱིབས་ཅན་བྲིས་སྐུ་ཙཀ་ལི་བཙུགས་པ་གཅིགདེའི་གཡས་ངོས་སུ་འདས་གཏོར། མདུན་དུ་རྒྱུན་གཏོར། དཀར་གསུམ། མངར་གསུམ། ལ་དུ། ལ་ཕུགསྤོས་སྣ་ཚོགས་བཏབ་པའི་རིལ་བུ་མར་དུ་བཙོས་པ། མཆོད་མགོ་གཡས་ནས་བརྩམས་པའི་ཆུ་གཉིས་སྔོན་འགྲོའི་ཉེར་སྤྱོད་ཚར་གཉིས་དང༌། རང་གི་མདུན་དུ་ནང་མཆོད་རྡོ་རྗེ་དྲིལ་བུ་རྣམས་བཤམས། མཆོད་པ་བྱིན་རླབས་བདེ་མཆོག་ལྟར་རམ། བླ་མེད་གང་འོས་དང་མཐུན་པར་བྱས་ལ། སྐྱབས་འགྲོ་སེམས་བསྐྱེད་སྔོན་དུ་འགྲོ་བས། རང་སྐད་ཅིག་གིས་འབྱུང་པོ་འདུལ་བྱེད་དུ་གསལ་བའི་ཐུགས་ཀའི་ཧཱུཾ་ལས་འོད་ཟེར་འཕྲོས། བླ་མ་དང་འབྱུང་པོ་བྱེད་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཨོཾ་བྷུ་ཏ་ཌཱ་མ་ར་ཨརྒྷཾ་པྲ་ཏཱིཙྪ་སྭཱཧཱ། ཞེས་སོགས་ཆུ་གཉིས་སྔོན་དུ་འགྲོ་བའི་ཉེར་སྤྱོད་ཀྱིས་མཆོད། གུར་ནས་འབྱུང་བའི་རྒྱུན་བཤགས་བྱ། ཚད་མེད་བཞི་བསྒོམ། ཨོཾ་ཤཱུ་ནྱ་ཏ་སོགས། སྟོང་པའི་ངང་ལས་ཧཱུཾ་ཡིག་ལས་བྱུང་བའི་རྡོ་རྗེའི་ས་གཞི། རྭ་བ་དྲྭ་བ་གུར་བླ་བྲེ། ཡེ་ཤེས་ཀྱི་མེ་དཔུང་རབ་ཏུ་འབར་བ་དང་བཅས་
པའི་བསྲུང་བའི་འཁོར་ལོའི་ནང་དུ། པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་མཐིང་ནག་ལས་རྡོ་རྗེ་ཧཱུཾ་གིས་མཚན་པ། དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས་རང་ཉིད་ཁྲོ་བོའི་རྒྱལ་པོ་འབྱུང་པོ་འདུལ་བྱེད་སྐུ་མདོག་སྔོན་པོ་ཞལ་གཅིག་ཕྱག་བཞི་པ་གཡས་དང་པོས་བ་དན་རྩེ་གསུམ་དང་བཅས་པའི་རྡོ་རྗེ། གཡོན་དང་པོས་བྷན་དྷ་ཁྲག་གང་ཐུགས་ཀར་འཛིན་པ། འོག་མ་གཉིས་མདའ་གཞུ་རྒྱབ་ནས་འགེངས་པ། ཞལ་མཆེ་བ་གཙིགས་ཤིང༌། སྤྱན་གསུམ་དང་ལྡན་པ། ཧ་ཧའི་གད་རྒྱངས་ཀྱིས་སུམ་ཅུ་རྩ་གསུམ་ལ་སོགས་པའང་འཇིག་པར་མཛད་པ། སྨ་ར་དང་སྨིན་མ་དབུ་སྐྲ་སེར་པོ་གྱེན་དུ་བརྫཻས་པ། མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན། རིན་པོ་ཆེ་དང་སྦྲུལ་གྱིས་བརྒྱན་པ། སྟག་གི་པགས་པའི་ཤམ་ཐབས་གསོལ་བ། མི་རོའི་སྟེང་ན་ཞབས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །དེའི་དཔྲལ་བར་ཨོཾ་དཀར་པོ། མགྲིན་པ་ཨཱཿདམར་པོ། ཐུགས་ཀར་ཧཱུཾ་སྔོན་པོ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཁྲོ་བོའི་རྒྱལ་པོ་འབྱུང་པོ་འདུལ་བྱེད་ཀྱི་རྣམ་པར་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས། ཛཿཧཱུཾ་བཾ་ཧོཿ གཉིས་སུ་མེད་པ་ཐིམ། སླར་ཡང་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས། ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ་ཞེས་གསོལ་བ་
བཏབ་པས། ཨོཾ་བཛྲ་བྷ་བ་ཨ་བྷི་ཥིཉྩ་ཧཱུཾ་ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག་ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན། ཚོགས་ཞིང་གི་སྐབས་ལྟར་མཆོད། འབར་བའི་སྐུ་ཅན་ཉི་མ་འབུམ་གྱི་གཟི། །དཔའ་བོའི་སྟང་སྟབས་ཞབས་ཀྱིས་ས་འོག་གཡོ། །རབ་ཏུ་ཁྲོས་པའི་ཁྲོ་གཉེར་གློག་སྟོང་འཁྱུག །དཔལ་ཆེན་འབྱུང་པོའི་དགྲ་ལ་ཕྱག་འཚལ་ལོ། །བཞད་པའི་ང་རོས་སུམ་ཅུ་རྩ་གསུམ་འཇིག །ཀུན་ཏུ་ཐོགས་མེད་གདུག་པའི་མཚོན་ཆ་བསྣམས། །སྙིང་རྗེའི་དབང་གིས་ཞི་ཞིང་འགྲོ་ལ་བརྩེ། །དངོས་གྲུབ་སྩོལ་མཛད་ཁྱོད་ལ་ཕྱག་འཚལ་ལོ། །ཞེས་པས་བསྟོད། ནང་མཆོད་བདེ་མཆོག་ལྟར་རམ། སྤྱི་ལྟར་བྱིན་གྱིས་བརླབས། ཨོཾ་ཨཱཿཧཱུཾ་གིས་ཕུལ། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བཛྲ་རཱ་ཛ་ཧཱུཾ་ཧཱུཾ་ཕཊ། ཅེས་པ་བརྒྱ་རྩ་བརྒྱད་ལ་སོགས་པ་བཟླས་པའི་མཐར། སྣོད་བཅུད་ཐམས་ཅད་རང་ལ་ཐིམ་པར་བསམ། དེ་ནས་མདུན་གྱི་ནམ་མཁར་ཁྲོ་བོ་ཆེན་པོ་སྐད་ཅིག་གིས་གྲུབ་པ་ནི། འབྱུང་པོ་འདུལ་བྱེད་ནས། དབུས་ན་བཞུགས་པའོ། །དེ་ནས་མཆོད་བསྟོད་གོང་བཞིན་བྱ། འདས་གཏོར་ནང་མཆོད་ལྟར་བྱིན་གྱིས་བརླབས་ལ། བྷུ་ཏ་ཌཱ་མ་རའི་མཐར། ཨཱ་ཀ་རོ་བཏགས་པས་ཕུལ། རྟེན་གཏོར་ནམ་མཁའ་མཛོད་ཀྱི་ཕྱག་རྒྱས་ཟད་མི་ཤེས་པས་ལོངས་སྤྱོད་ཆེན་པོར་བྱིན་གྱིས་བརླབས། བྲིས་སྐུ་བསངས་སྦྱངས། སྟོང་པའི་ངང་ལས་རང་ཉིད་ཁྲོ་བོ་ཆེན་པོར་གསལ་བའི་མདུན་དུ་བཻཌཱུཪྱའི་བྲག་རིའི་ཁྲོད་དུ་པདྨ་དམར་པོ་འདབ་མ་བརྒྱད་པའི་ལྟེ་བར་ནོར་བདག་བྱི་བ་སྔོན་པོ་
རིན་པོ་ཆེ་སྣ་ཚོགས་སྐྱུག་པའི་སྟེང་དུ་གཿཡིག་དམར་པོ་ཡོངས་སུ་གྱུར་པ་ལས་དཔལ་ཚོགས་ཀྱི་བདག་པོ་སྐུ་མདོག་དམར་པོ་གླང་པོ་ཆེའི་གདོང་པ་ཅན་རྣོ་ཞིང་དཀར་བའི་མཆེ་བ་རབ་ཏུ་གཙིགས་ཤིང་སྤྱན་གསུམ་དང་ལྡན་པ། དབུ་སྐྲ་ནག་པོ་སྤྱི་བོར་བཅིངས་པའི་རྩེ་མོར་ཡིད་བཞིན་གྱི་ནོར་བུའི་མཚན་ཞིང་དར་དམར་པོའི་ཅོན་པན་ཅན། ཕྱག་བཅུ་གཉིས་ཀྱི་གཡས་པ་དྲུག་ན། དགྲ་སྟ། མདའ་ཆེན། ལྕགས་ཀྱུ། རྡོ་རྗེ། རལ་གྲི། འཕང་མདུང་རྣམས་འཛིན་པ། གཡོན་པ་དྲུག་ན་གཏུན་ཤིང༌། གཞུ། ཁ་ཊྭཱཾ་གཁྲག་གིས་གང་བའི་ཐོད་པ། ཐོད་པ་ཤ་ཆེན་གྱིས་གང་བ། ཕུབ་དང་ལྷན་ཅིག་མདུང་ལ་བ་དན་བཏགས་པ་རྣམས་འཛིན་པ། རྡོ་རྗེ་དང་ཐོད་ཁྲག་ཐུགས་ཀར་འཛིན་ཞིང༌། ལྷག་མ་རྣམས་འཕྱར་བ། དར་སྣ་ཚོགས་གྱི་ཤམ་ཐབས་གསོལ་ཞིང༌། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། ཞབས་གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་འོད་ཟེར་དམར་པོ་རབ་ཏུ་འཁྲུག་པའི་དབུས་ན་བཞུགས་པ། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་དབུས་སུ་གཿཡིག་དམར་པོ། དེ་ནས་རང་ཉིད་ཁྲོ་བོ་ཆེན་པོར་གསལ་བའི་ཐུགས་ཀ་ནས་འོད་ཟེར་འཕྲོས་པས། སུམ་ཅུ་རྩ་གསུམ་གྱི་གནས་རྡོ་ཆེན་ཨ་མོ་ལིར་གནས་དཔལ་ཚོགས་ཀྱི་བདག་པོའི་སྐུའི་ཚོགས་བསམ་གྱིས་མི་ཁྱབ་པ་སྤྱན་དྲངས་ཏེ་མདུན་གྱི་ཚོགས་ཀྱིས་བདག་པོ་ལ་ཐིམ་པར་མོས་ཤིང༌། དྲིལ་བུ་བསིལ་ཞིང༌། ཨོཾ་གཿགཿསིདྡྷི་སིདྡྷི་སརྦ་ཨཱརྠ་མེ་པྲ་སཱ་ངྷ་ཡ་ཧཱུཾ་ཧཱུཾ་ཛཿཛཿསྭཱཧཱ། ཞེས་བརྒྱ་རྩ་ལ་སོགས་པ་མང་དུ་བརྗོད་པས་བཀུག་ལ། ཛཿཧཱུཾ་བཾ་ཧོཿ གཉིས་སུ་མེད་པར་གྱུར་བར་
བསམ་སྟེ། དེ་ལ་ཨོཾ་པདྨ་ཀ་མ་ལ་ཡ་སྟྭཾ། ཞེས་པས་གདན་ཕུལ་ནས། ས་མ་ཡ་ཧོ་ཞེས་པས་དམ་ལ་བཞགསླར་ཡང་ཐུགས་ཀ་ནས་འོད་ཟེར་འཕྲོས་པས་དབང་ལྷ་སྤྱན་དྲངས་བ་སོགས་གོང་བཞིན་བྱས་ནས། ཆུའི་ལྷག་མ་ཡར་ལུད་པ་ལས་འོད་དཔག་མེད་ཀྱིས་དབུ་བརྒྱན་པར་མོས་ལ། བྱིན་གྱིས་བརླབས་པའི་མཆོད་པ་རྣམས། ཨོཾ་ག་ན་པ་ཏི་ཨརྒྷཾ་པྲ་ཏཱིཙྪ་སྭཱཧཱ་ཞེས་སོགས་ཀྱིས་དབུལ། རྒྱལ་བའི་སྐུ་གསུང་ཐུགས་རྡོ་རྗེ། །གཉིས་མེད་ཡེ་ཤེས་ལས་བྱུང་བ། །ཚོགས་རྗེ་ཚོགས་དབང་ཚོགས་ཀྱི་བདག །བགེགས་ཀྱི་གཙོ་ལ་མཆོད་ཅིང་བསྟོད། །རྒྱུན་གཏོར་བསངས་སྦྱངས། ཨོཾ་ཨཱཿཧཱུཾ་ཧ་ཧོ་ཧྲཱིཿ ཞེས་མཁའ་འགྲོ་སྤྱི་གཏོར་ལྟར་བྱིན་གྱིས་བརླབས་ཨོཾ་ག་ན་པ་ཏི་ཞེས་པ་ལ་ཨ་ཀཱ་རོའམ། ནམ་མཁའ་མཛོད་ཀྱི་སྔགས་བཏགས་པ་ལན་གསུམ་གྱིས་འབུལ། མཆོད་བསྟོད་འདོད་དོན་ཞུས་ལ། སུམྦྷ་ནི་བརྒྱ་ཕྲག་ལ་སོགས་པས་མགོ་དྲངས་པའི་ཨོཾ་ཨཱཿགཿཧཱུཾ་སྭཱཧཱ། ཞེས་པ་འབུམ་ཕྲག་གཅིག་གམ། འབྲུ་འབུམ་བཟླ། ཨོཾ་ཝཱ་ར་ཀཱ་ཏཱ་ཡ་སྭཱཧཱ། ཨོཾ་ཝ་ཀ་ཏེ་ཀ་དཾཥྟ་བིནྡྷ་ཧཱུཾ་ཕཊ་སྭཱཧཱ། ཨོཾ་བྷྲཱུཾ་ག་ན་པ་ཏ་ཡེ་སྭཱཧཱ། ཞེས་ཚོགས་བདག་དཀར་པོའི་སྔགས་རྣམས་ཀྱང་བཟླའོ། །མཎྜལ་དང་མཆོད་རྫས་རྣམས་ལ་དམིགས་ལ། མེ་ཏོག་ཕྲེང་བ་ལ་སོགས་རིན་ཆེན་དབྱིག །ལ་དུ་ལ་ཕུག་འབྲས་བུ་ཡིད་འོང་ཟས། །ཕྱོགས་བཅུའི་ཆུ་སྐྱེས་ཐང་སྐྱེས་ལོངས་སྤྱོད་རྐྱེན། །རིས་མ་བཅད་པའི་མཆོད་སྤྲིན་རྒྱས་པར་འབུལ། །མཎྜལ་དམ་པ་རབ་ཏུ་མཛེས་པ་དང༌། །བཤོས་བཙང་མར་མེ་ཡོན་ཆབ་སྣ་ཚོགས་དང༌། །འབྲང་ཆང་རྒུན་ཆང་ལ་སོགས་བཏུང་བའི་མཆོག །སྦྲང་རྩི་བུ་རམ་ལ་སོགས་མངར་བའི་རོ། །ལྷན་ཅིག་སྐྱེས་དང་རབ་ཏུ་སྦྱར་བ་ཡི། །སྣ་ཚོགས་མཆོད་པ་དམ་པ་འདི་དག་བཞེས། །ཏིང་
འཛིན་སྔགས་དང་ཕྱག་རྒྱས་རྣམ་འཕྲུལ་ལས། །བྱུང་བའི་བླ་མེད་མཆོད་པ་འདི་དག་འབུལ། །གཟུགས་སྒྲ་དྲི་རོ་རེག་སོགས་ཀུན་ལྡན་པའི། །འདོད་ཡོན་ཚོགས་ཀྱི་མཆོད་པ་བཞེས་སུ་གསོལ། །བདག་ཉིད་དང་བས་བཤམས་ཤིང་སྤྲུལ་བ་ཡི། །མཆོད་པའི་ཚོགས་ཀྱིས་ལྷ་ཆེན་མཉེས་གྱུར་ཅིག །མཆོད་བསྟོད་འདོད་དོན་ཞུས་ཏེ། ཁྲོ་བོ་ཆེན་པོ་མི་དམིགས་པར་སྦྱངས། བྲིས་སྐུ་ལ་བརྟན་བཞུགས་བྱས་ལ། རྟེན་གཏོར་དང་བཅས་པ་གཞན་གྱིས་མི་མཐོང་བའི་སར་བཞུགས་སུ་གསོལ། རང་གི་གནས་གསུམ་བསྲུང༌། དགེ་བ་བསྔོ་ཞིང་བཀྲ་ཤིས་དང་དགའ་སྟོན་རྒྱས་པར་བྱའོ། །རྗེས་གནང་བྱ་བའི་ཚུལ་ནི། རྒྱལ་ཕུར་འཇོམས་པའི་ཚེ་དབེན་པའི་གནས་སུ་མཎྜལ་དང༌། བྲིས་སྐུ་དང༌། མཆོད་གཏོར་ལ་སོགས་པ་གོང་ལྟར་དང༌། མཎྜལ་གཅིག་ལ་ཁྲོ་བོ་ཆེན་པོའི་ཚོམ་བུའང་བཤམས། སློབ་དཔོན་གྱིས་མཆོད་པ་བྱིན་རླབས་ནས་བརྩམས་ཏེ། བདག་བསྐྱེད་འབྱུང་འདུལ་གྱི་སྒོམ་བཟླས། མདུན་བསྐྱེད་འབྱུང་འདུལ་བསྐྱེད་དེ། མཆོད་གཏོར་འབུལ་བ། བྲིས་སྐུ་ཚོགས་བདག་ཏུ་བསྐྱེད་པ་ལ་མཆོད་བསྟོད་གཏོར་མ་འབུལ་བ། བཟླས་པའི་བར་སྒྲུབ་ཐབས་བཞིན་བྱས་ལ། ཕྱག་དང་ཡོན་ཕུལ་ཏེ་འཁོད་པ་ལ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོང་འཕང་ཐོབ་པར་བྱ་བ་དང༌། གནས་སྐབས་སུ་ཆོས་སྒྲུབ་པའི་འགལ་རྐྱེན་བར་ཆད་ཞི་ཞིང༌། མཐུན་རྐྱེན་ཕུན་སུམ་ཚོགས་པར་བྱ་བའི་ཆེད་དུ། ཁྲོ་བོ་འབྱུང་པོ་འདུལ་བྱེད་དང་དཔལ་ཚོགས་ཀྱི་བདག་པོ་བསྔགས་ཏེ་སྒྲུབ་པའི་རྗེས་སུ་གནང་བ་གསན་ལ་དོན་ཉམས་སུ་བླང་བར་བགྱིའོ། །སྙམ་པ་བྱང་ཆུབ་ཀྱི་མཆོག་ཏུ་ཐུགས་བསྐྱེད་པ་གསལ་
བཏབ་ནས་གསན་པར་ཞུ། དེ་ལ་འདིར་རྗེས་སུ་གནང་བ་སྒྲུབ་པ་ལ། སློབ་དཔོན་གྱིས་བགྱི་བར་འོས་པ་ཐམས་ཅད་གྲུབ། སློབ་མས་བྱ་བ་ལ་རྗེས་གནང་གི་སྔོན་དུ་འགྲོ་བ། སློབ་དཔོན་ལ་ཁྲོ་བོ་འབྱུང་པོ་འདུལ་བྱེད་དངོས་ཡིན་སྙམ་པའི་མོས་གུས་དང་ལྡན་པས་རྗེས་གནང་ཞུ་བའི་ཡོན་དུ་མཎྜལ་ཕུལ་ཞེས་བརྗོད། སློབ་མས་མཎྜལ་འབུལ། གསོལ་བ་འདེབས་པའི་རྗེས་ཟློས་མཛོད། ཀུན་མཁྱེན་ཡེ་ཤེས་སོགས་ནས། གནང་བར་མཛོད་ཅེས་གསོལ་བ་བཏབ་ནས། དེ་ནས་རྒྱུན་བཤགས་འདིའི་རྗེས་ཟློས་མཛོད། དཀོན་མཆོག་གསུམ་ལ་སོགས་ནས། འགྲུབ་པར་ཤོགདེ་རྣམས་ཀྱིས་རྗེས་གནང་གི་སྔོན་འགྲོ་ཡིན། དངོས་གཞི་ལ་སྐུའི་རྗེས་གནང་གི་སླད་དུ་དམིགས་པ་འདི་བཞིན་མཛོད། སློབ་དཔོན་དང་མདུན་བསྐྱེད་ཀྱི་ཁྲོ་བོའི་ཐུགས་ཀ་ནས་འོད་ཟེར་འཕྲོས་པ། ཁྱེད་རང་གི་ལུས་ལ་ཕོག་པས་ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་ཐམས་ཅད་སྦྱངས་ཏེ། ལུས་དྲི་མ་དང་བྲལ་བའི་རང་བཞིན་དུ་གྱུར་པར་མོས་པ་མཛོད། དེ་ལ་དམིགས་ཏེ་སློབ་དཔོན་གྱིས་ཨོཾ་ཤཱུ་ནྱ་ཏ་སོགས། མི་བསྐྱོད་པའི་དབུ་རྒྱན་ཞེས་པའི་བར། དེ་ལྟར་ཁྱེད་རང་ཁྲོ་བོ་ཆེན་པོར་གསལ་བའི་མདུན་དུ་བཻཌཱུཪྱའི་བྲག་རིའི་ཁྲོད་དུ་ནས། འོད་དཔག་མེད་ཀྱིས་དབུ་རྒྱན་ཞེས་པའི་བར་བརྗོད་དེ། ཚོགས་བདག་སྤྱན་འདྲེན་སྐབས་རོལ་ཆེན་བྱའོ། །དེ་སྐུའི་རྗེས་གནང་ཡིན། གསུང་གི་རྗེས་གནང་གི་སླད་དུ་དམིགས་པ་འདི་བཞིན་མཛོད། སློབ་དཔོན་གྱི་ཐུགས་ཀའི་ཧཱུཾ་ཡིག་སྔགས་འཕྲེང་དང་བཅས་པ་ལས་སྔགས་ཀྱི་ཕྲེང་བ་བྱུང༌། ཞལ་ནས་ཐོན། ཁྱེད་རང་གི་ཞལ་དུ་ཞུགས། ཐུགས་ཀའི་ཧཱུཾ་ཡིག་གི་མཐར་གཡས་བསྐོར་དུ་འཁོད་པར་
མོས་པ་བྱས་ནས། མེ་ཏོག་དང་བཅས་པའི་ཐལ་མོ་སྦྱར་ཏེ། འདིའི་རྗེས་ཟློས་ལན་གསུམ་མཛོད། ཨོཾ་སུམྦྷ་སོགས་ནས། ཧཱུཾ་ཧཱུཾ་ཕཊ། ཅེས་བརྗོད་ནས། ཁྱེད་རང་གི་མདུན་གྱི་དཔལ་ཚོགས་ཀྱི་བདག་པོའི་ཐུགས་ཀའི་གཿཡིག་ལས་སྔགས་ཕྲེང་བྱུང་བ་ཁྱེད་རང་ཁྲོ་བོ་ཆེན་པོར་གསལ་བའི་ལྟེ་བའི་གནས་སུ་ཐིམ་པར་མོས་ནས། སྔགས་འདི་རྣམས་ཀྱི་རྗེས་ཟློས་ལན་གསུམ་གསུམ་མཛོད། ཨོཾ་ཨཱཿགཱཿཧཱུཾ། ཞེས་སོགས་སྔགས་ཚན་བཞི་པོ་ལན་གསུམ་བཟློས་པས། དང་པོས་རྒྱུད་བྱིན་གྱིས་བརླབས། གཉིས་པས་དབྱེར་མེད་དུ་བྱས། གསུམ་པས་བརྟན་པར་བྱས་པར་མོས་ཏེ། སློབ་དཔོན་ལ་དྲིན་ལན་གྱི་ཚུལ་དུ་མེ་ཏོག་གཏོར་ནས་འདིའི་རྗཻས་ཟློས་མཛོད། བཅོམ་ལྡན་བདག་ལ་སོགས་ནས། མཛད་དུ་གསོལ་ཞེས་གསོལ་བ་བཏབ། སློབ་དཔོན་གྱིས་ཀྱང་མེ་ཏོག་གི་ཕྲེང་བ་སྔགས་སུ་བྱས་ནས། ཁྱེད་རང་གི་སྤྱི་བོར་བཞག་ཅིང་བྱིན་གྱིས་བརླབས་པར་མོས་པ་མཛོད། བཅོམ་ལྡན་འདི་ལ་སོགས་ནས། བརྟུལ་བཞུགས་བརྟན་པར་མཛད་དུ་གསོལ། ཞེས་བརྗོད་པས་ལྷ་གཉིས་ཀྱི་གསུང་གི་རྗེས་གནང་ཐོབ་པ་ཡིན་སྙམ་པའི་མོས་པ་མཛོད། ཐུགས་ཀྱི་རྗེས་གནང་གི་སླད་དུ་དམིགས་པ་འདི་བཞིན་མཛོད། སློབ་དཔོན་གྱི་ཐུགས་ཀའི་ཧཱུཾ་ལས་འོད་འཕྲོས་པ་མདུན་གྱི་ཚོགས་གྱི་བདག་པོའི་ཐུགས་ཀའི་གཿཡིག་ལ་ཕོག་པས་སྲོག་རྒྱུད་བསྐུལ་ཏེ། གཿལས་འོད་ཟེར་དམར་པོ་བསམ་གྱིས་མི་ཁྱབ་པ་འཕྲོས་པས། སུམ་ཅུ་རྩ་གསུམ་གྱི་གནས་ནས་ཚོགས་བདག་དང༌། གཏེར་བདག་དང་ནོར་བདག་དང༌། གཞན་ཡང་འཇིག་རྟེན་གྱི་ཁམས་གྱི་དྲེགས་པ་ཅན་ཐམས་ཅད་ཀྱི་ཐུགས་རྒྱུད་བསྐུལ་ནས། དེ་རྣམས་ཀྱིས་སྐྱེ་འགྲོ་བསོད་ནམས་ཅན་རྣམས་ཀྱི་ལུང་དང་རྟོགས་པའི་ཡོན་ཏན་དང་ཚེ་དང་བསོད་ནམས་དང༌། དཔལ་དང་འབྱོར་པ་དང༌། ནོར་དང་འབྲུ་དང་གཡང་དང་མདངས་དང༌། གཟི་བརྗིད་དང༌། འབྱུང་བ་བཞིའི་
བཅུད་ཐམས་ཅད་བསྡུས་ནས། ཁྱེད་རང་ལ་བྱིན་པས། རང་གི་གནས་ཁང་དང༌། བང་མཛོད་དང༌། ཡུལ་ཕྱོགས་ཐམས་ཅད་ཁེངས། ལོངས་སྤྱོད་འདོད་དགུ་ཕུན་སུམ་ཚོགས་པ་ལ་དབང་བར་བྱས་པ་ཡིན་སྙམ་དུ་མོས་པ་མཛོད། ཁྱད་པར་དུ་ཚོགས་ཀྱི་བདག་པོའི་ཞབས་གཡོན་པའི་རྟིང་པས་ཞབས་འོག་གི་བྱི་བ་ལ་བརྡབས་པས་དེས་མ་བཟོད་དེ། འཇིག་རྟེན་ཁམས་ཀྱི་ཟས་ནོར་ཐམས་ཅད་བསྡུས་ནས་ཁྱེད་ལ་ཕུལ་ཞིང༌། བྱི་བའི་ཁ་ནས་རིན་པོ་ཆེ་སྣ་ཚོགས་སྐྱུགས་པས་ཁྱེད་རང་གི་གནས་ཁང་དང་བང་མཛོད་ཅེས་སོགས་གོང་བཞིན་བརྗོད་པའི་མཐར་དྲིལ་བུ་སིལ་ཞིང༌། ཨོཾ་གཿགཿསིདྡྷི་སིདྡྷི་སོགས་ནས་སྭཱཧཱ། ཞེས་མང་དུ་བརྗོད། ཐུགས་རྒྱུད་བསྐུལ་ནས་བཀའ་བསྒོ་བ་ནི། རོལ་ཆེན་དང་བཅས་རྟེན་གཏོར་སློབ་མའི་ལག་ཏུ་གཏད་དེ། སྔགས་རྣམས་ཀྱི་མཐར་དཔལ་ཚོགས་ཀྱི་བདག་པོས་རྡོ་རྗེ་སློབ་མ་འདི་རྣམས་ཀྱི་ལུས་དང་གྲིབ་མ་བཞིན་དུ་འགྲོགས་ནས། དུས་ད་ནས་གཟུང་སྟེ་བྱང་ཆུབ་མ་ཐོབ་ཀྱི་བར་དུ། འགལ་རྐྱེན་བར་ཆད་མི་མཐུན་པའི་ཕྱོགས་ཐམས་ཅད་ཞི་བ་དང༌། བསྲུང་བ་དང་བསྐྱབ་པ་དང༌། སྦ་བའི་འཕྲིན་ལས་མཛོད་ཅིགམཐུན་རྐྱེན་ཚེ་དང་བསོད་ནམས་དང་དཔལ་འབྱོར་དང་དབང་ཕྱུག་ཐམས་ཅད་གོང་ནས་གོང་དུ་འཕེལ་ཞིང་རྒྱས་པའི་འཕྲིན་ལས་མཛོད་ཅིགལྷ་འདྲེ་མི་གསུམ་གྱི་འགྲོ་བ་མང་པོ་དབང་དུ་བསྡུས་ནས། ཟས་གོས་ལོངས་སྤྱོད་ཐམས་ཅད་ཀྱིས་འཕོངས་པ་མེད་པར་ཡིད་བཞིན་དུ་འབྱོར་བ་དང༌། དེ་དག་གིས་ཀྱང་སངས་རྒྱས་ཀྱི་བསྟན་པ་དང་སེམས་ཅན་མང་པོ་ལ་ཕན་པ་དང་བདེ་བ་བསམ་གྱིས་མི་ཁྱབ་པ་འབྱུང་བ་དང༌། མཐར་ཐུག་རྫོགས་པའི་སངས་རྒྱས་ཀྱི་གོ་འཕང་ཐོབ་
པའི་འཕྲིན་ལས་མཛོད་ཅིགཅེས་བཀའ་བསྒོས་པས་ཚོགས་ཀྱི་བདག་པོས་དེ་ལྟར་ཞལ་གྱིས་བཞེས་ཏེ་ཁྱེད་རང་གི་ཕྱི་བཞིན་དུ་འབྲངས་པའི་མོས་པ་མཛོད། དེ་ནས་མདུན་བསྐྱེད་ཀྱི་ནམ་མཁའ་ན་བཞུགས་པའི་ཁྲོ་བོ་ཆེན་པོའི་ཐུགས་ཀ་ནས་ཁྲོ་བོ་ཆེན་པའི་སྐུ་དེ་འདྲ་བ་ཞིག་བྱོན་པ་ཁྱེད་རང་གི་སྤྱི་གཙུག་ནས་ཞུགས་ཏེ། སྙིང་གར་པདྨ་དང་ཉི་མའི་གདན་ལ་བཞུགས་ནས་རྒྱུད་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། དེ་རྣམས་ཀྱིས་ཁྲོ་བོ་ཆེན་པོ་དང་དཔལ་ཚོགས་ཀྱི་བདག་པོའི་རྗེས་སུ་གནང་བ་གྲུབ་པ་ཡིན། དེ་དག་གི་གནས་སྐབས་སུ་ཐོབ་པའི་དམ་ཚིག་ལ་བསྲུང་སྡོམ་བགྱི་སྙམ་པས་འདིའི་རྗེས་ཟློས་ཀྱིས། གཙོ་བོས༴ མཎྜལ། དེང་ནས༴སོགས་སྤྱི་དང་འདྲ། ལྷ་གཉིས་ལ་མཆོད་དེ་ཚོམ་བུའི་ལྷ་གཤེགས་སུ་གསོལ། བྲིས་སྐུ་བརྟན་བཞུགས་བྱ། ལྷག་མ་གོང་དང་འདྲའོ། །ཀུན༵་ལས་ཁུངས་ཆེ་རྒྱུད་ལས་གསལ། །ལས་ཚོགས་ཤིན་ཏུ་མང་ལ་དག༵འ། །མན་ངག་ཤེས་ནས་སྙིང༵་ཐག་པར། །སྒྲུབས་ན་མྱུར་པོ༵ར་མངོན་རྟོགས་འབྱུང༌། །དམར་པོ་སྐོར་གསུམ་ལས་ཚོགས་བདག་དམར་པོའི་སྒྲུབ་ཐབས་ཀྱི་ལེན་ཚན་ནོ།། །།
རྡོར་སེམས་སྒྲུབ་ཐབས།
ཨོཾ་སྭཱ་སྟི། མཆོག་གྱུར་དཔལ་ལྡན་བླ་མ་དང༌། །དཀྱིལ་འཁོར་གཙོ་ལ་གུས་བཏུད་ནས། །རྡོར་སེམས་སྒྲུབ་ཐབས་ངོ་མཚར་བ། །ཇོ་བོའི་མན་ངག་བཞིན་དུ་བྲིས། །སྐྱབས་སེམས་སྔོན་དུ་སོང་ནས། ཤཱུ་ནྱ་ཏས་སྟོང་པར་སྦྱངས། རང་གི་སྙིང་གར་ཨ་ལས་ཟླ་བའི་སྟེང་དུ་ཧཱུཾ་སེར་པོ། དེ་ལས་འོད་འཕྲོས། ལས་དང་ཉོན་མོངས་པ་དང་སྡིག་སྒྲིབ་ཐམས་ཅད་སྦྱངས། རང་ཉིད་རྡོ་རྗེ་སེམས་དཔའ་སྐུ་མདོག་སེར་པོ་འོད་ཟེར་དཀར་པོ་འཕྲོ་བ།
ཕྱག་གཡས་རྡོ་རྗེ་ཐུགས་ཀར་གཏོད་ཅིང༌། གཡོན་དྲིལ་བུ་དཀུར་བསྟེན་པ། སེམས་དཔའི་སྐྱིལ་མོ་ཀྲུང་གིས་བཞུགས་ཤིང༌། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། པད་ཟླ་ལ་གནས་ཤིང་ཟླ་བའི་འོད་ཀྱི་རྒྱབ་ཡོལ་ཅན། ཐུགས་ཀར་ཟླ་བ་ལ་གནས་པའི་ཧཱུཾ་སེར་པོ། དེའི་འོད་ཀྱིས་ཡེ་ཤེས་སེམས་དཔའ་དང༌། བླ་མ་དང༌། སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་སྤྱན་དྲངས། མདུན་གྱི་ནམ་མཁར་བཞུགས་པ་ལ་ཕྱག་མཆོད་ཡན་ལག་བདུན་པ་ཅི་འགྲུབ་བྱ། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། བཟླས་པའི་དམིགས་པ་གསལ་བཏབ་ལ། རྡོ་རྗེ་སེམས་དཔའི་ཡིག་བརྒྱ་མ་ཡེངས་པར་འདོན། བདག་གི་དམ་ཚིག་ཉམས་ཆགས་ཐམས་ཅད་འདག་པར་མཛད་དུ་གསོལ། ཅེས་གསོལ་བ་བཏབ། དགེ་བ་བསྔོ། འདི་ནི་བཟླས་ལུང་ཁོ་ནས་འགྲུབ་པ་ཡིན་ཏེ། སློབ་མས་དཀོན་མཆོག་ལ་མཆོད་པ་དང༌། སློབ་དཔོན་ལ་མཎྜལ་ཕུལ། སློབ་དཔོན་གྱིས་འདིའི་སྒོམ་ཚུལ་བཤད། སློབ་དཔོན་གྱི་འཕྲེང་བ་ལ་འཇུས་ཏེ། ཡིག་བརྒྱའི་རྗེས་ཟློས་ལན་གསུམ་བྱ། མཐར་སློབ་དཔོན་གྱི་འཕྲེང་བ་སློབ་མའི་མགོ་བོར་བཞག་སྟེ། བཅོམ་ལྡན་འདི་ལ་སྩལ་ལགས་ཀྱི། །བཅོམ་ལྡན་འདི་ལ་བྱིན་གྱིས་རློབས། །ཞེས་བརྗོད་དོ། །དེ་ནས་སློབ་མས་མཎྜལ་འབུལ། དམ་ཚིག་ཉམས་ཆགས་བཅས་ཀུན༵་ལ། །སྒྲུབ་ཐབས་ཟབ་ཀྱང་ཕན་མི་ཐོགས། །དངོས་གྲུབ་སྒྲུབ་པར་དག༵འ་བ་རྣམས། །སྙིང༵་པོ༵་ཡིག་བརྒྱར་ནན་ཏན་མཛོད། །རྡོ་རྗེ་སེམས་དཔའི་སྒྲུབ་ཐབས་ཀྱི་ལེ་ཚན་ནོ། །སྒྲུབ་པའི་ཐབས་རིན་ཆེན་འབྱུང་གནས་ལས་ཐོག་མར་དགེ་བའི་དོན་དུ་ཉེར་མཁོ་སྒྲུབ་ཐབས་འགའ་ཞིག་བཤད་པའི་སྐབས་ཏེ་གཉིས་པའོ།། །།ཞུས་དག །