སྒྲོལ་མའི་གསོལ་འདེབས་བྱིན་རླབས་མྱུར་འཇུག
དམ་ཆོས་ཡང་ཟབ་པདྨའི་ཐུགས་ཐིག་ལས༔ སྒྲོལ་མའི་གསོལ་འདེབས་བྱིན་རླབས་མྱུར་འཇུག་བཞུགས༔
དང་པོ་སྐལ་ལྡན་རྙེད་དཀའ་འཇིག་སླ་བའི༔ རྟེན་ལ་སེམས་ཏེ་ངེས་འབྱུང་ཐར་འདོད་བློ༔ འགྲོ་དྲུག་དོན་དུ་བསྐྱེད་དེ་སྐྱབས་ཀྱི་མཆོག༔ ཀུན་འདུས་འཕགས་མར་གསོལ་བ་འདི་བཞིན་གདབ༔ ཨེ་མ་ཧོ༔ དུས་གསུམ་ཀུན་ཏུ་གཤེགས་ཤིང་བཞུགས་པ་ཡི༔ རྒྱལ་བ་སྲས་དང་བཅས་པ་མ་ལུས་པས༔ འགྲོ་བའི་དོན་དུ་བསྐུལ་ཞིང་བསྔགས་པ་བརྗོད༔ རྗེ་བཙུན་འཕགས་མ་སྒྲོལ་མར་གསོལ་བ་འདེབས༔ དེ་བཞིན་གཤེགས་པ་རྔ་སྒྲའི་བསྟན་པ་ལ༔ རྒྱལ་པོའི་སྲས་མོ་ཡེ་ཤེས་ཟླ་བར་གྱུར༔ མཐའ་ཡས་འགྲོ་རྣམས་འཁོར་བའི་སྡུག་བསྔལ་ལས༔ སྒྲོལ་བའི་དམ་བཅའ་མཛད་ལ་གསོལ་བ་འདེབས༔ དེ་ཚེ་འཇིགས་པ་བརྒྱད་དང་བཅུ་དྲུག་གིས༔ རབ་ཏུ་གཙེས་པའི་སོ་སྐྱེས་རྨོངས་པའི་རིགས༔ ཡུད་ཙམ་གྱིས་ཀྱང་བདེ་བར་དབུགས་འབྱིན་པའི༔ དཔའ་མོ་མཆོག་ཏུ་གྱུར་ལ་གསོལ་བ་འདེབས༔ ཤེས་བྱ་མ་ལུས་ཇི་སྙེད་མཁྱེན་པ་དང་༔ རང་བཞིན་བྲལ་བ་གནས་ལུགས་ཆོས་ཀྱི་དབྱིངས༔ ཇི་བཞིན་མཁྱེན་ལ་རྒྱལ་སྲས་འཇམ་དཔལ་དབྱངས༔ དགྱེས་མཛད་སྒྲ་དབྱངས་ལྷ་མོར་གསོལ་བ་འདེབས༔ དམིགས་པ་མེད་ཀྱང་དཔག་བསམ་ལྗོན་བཟང་ལས༔ དབུལ་སེལ་འདོད་དགུའི་དཔལ་ཀུན་འབྱུང་བ་བཞིན༔ ཚད་མེད་སྙིང་རྗེར་གོམས་པས་ཉམ་ཐག་འགྲོ༔ སྐྱོང་མཛད་བྱམས་བརྩེའི་དབང་མོར་གསོལ་བ་འདེབས༔ བདུད་དང་ལོག་འདྲེན་བྱེ་བ་ཁྲག་ཁྲིག་དཔུང་༔ ཐོགས་མེད་འཇོམས་ལ་མཐའ་ཡས་རྒྱལ་ཀུན་གྱི༔ མཐུ་སྟོབས་ནུས་པ་གཅིག་ཏུ་བསྡུས་པའི་ཉམས༔ ཅིར་ཡང་སྟོན་མཛད་འཕགས་མར་གསོལ་བ་འདེབས༔ གང་གི་མཚན་ཙམ་ཡིད་ལ་དྲན་པས་ཀྱང་༔ སྲིད་དང་ཞི་བའི་རྒུད་པ་འཇོམས་མཛད་ཅིང་༔ གནས་སྐབས་མཐར་ཐུག་ལེགས་རྒུའི་དཔལ་མ་ལུས༔ སྩོལ་མཛད་རྒྱལ་ཡུམ་མཆོག་ལ་གསོལ་བ་འདེབས༔ འཕགས་མ་མཆོག་གི་ཐུགས་བསྐྱེད་ལས་བྱུང་བའི༔ གསང་སྔགས་རིག་སྔགས་ལྷ་མོའི་ཚོགས་རྣམས་ཀུན༔ མ་ངེས་སྤྲུལ་པའི་རོལ་གར་མཐའ་ཡས་པས༔ བསྟན་འགྲོའི་གསོས་སུ་གྱུར་ལ་གསོལ་བ་འདེབས༔ མཉམ་མེད་ཟས་གཙང་སྲས་སོགས་བསྐལ་བཟང་འདིའི༔ སངས་རྒྱས་སྟོང་དང་དེ་བཞིན་རྒྱལ་བའི་སྲས༔ དེ་དག་ཀུན་གྱི་ཐུགས་རྗེ་ནུས་པའི་གཟུགས༔ སེམས་མའི་རྣམ་པར་སྣང་ལ་གསོལ་བ་འདེབས༔ འཕགས་མ་མཆོག་གི་ཐུགས་རྗེས་ལེགས་སྐྱོང་བའི༔ ནཱ་གརྫུ་ན་པདྨ་སཾ་བྷ་ཝ༔ ཉི་མ་སྦས་པ་ཙནྡྲ་གོ་མི་སོགས༔ འཕགས་བོད་མཁས་གྲུབ་རྣམས་ལ་གསོལ་བ་འདེབས༔ གནས་སྐབས་ཉེས་བརྒྱའི་སྐྱོན་ལས་གྲོལ་བ་དང་༔ མཐར་ཐུག་སྲིད་ཞིར་མི་གནས་འགོག་བདེན་ཆོས༔ ཟུང་འཇུག་བསྟན་པའི་སྙིང་པོ་སྟོན་པའི་གསུང་༔ ཐེག་གསུམ་གདུལ་བྱར་སྟོན་ལ་གསོལ་བ་འདེབས༔ ལྷ་མིའི་གཙོ་བོ་ཀུན་གྱི་གཙུག་ན་བརྗིད༔ སྲིད་ན་མཚུངས་མེད་མཚན་དཔེའི་སྣང་བ་མཆོག༔ དྲན་པས་འཁོར་བའི་འཇིགས་པ་ཐམས་ཅད་ལས༔ སྐྱོབ་མཛད་འཕགས་མར་གུས་པས་གསོལ་བ་འདེབས༔ དེ་ལྟར་གསོལ་བ་བཏབ་པས་བདག་སོགས་འགྲོ༔ ཚེ་རབས་ཀུན་ཏུ་འཕགས་མས་རྗེས་བཟུང་ནས༔ ནད་གདོན་རྐྱེན་ངན་བར་ཆད་གཡུལ་ངོ་ལས༔ རྣམ་རྒྱལ་བདེ་བའི་དབུགས་འབྱིན་ཐོབ་པར་ཤོག༔ སྲིད་པའི་དུཿཁས་མནར་བའི་མཐའ་ཡས་འགྲོ༔ སྒྲིབ་གཉིས་གློ་བུར་སྒྲིབ་པ་ལས་གྲོལ་ནས༔ སྐུ་གཉིས་ཡོངས་གྲུབ་གདོད་མའི་རྒྱལ་ས་རུ༔ རྗེ་བཙུན་མཆོག་དང་དབྱེར་མེད་འགྲུབ་པར་ཤོག༔ དེ་ལྟར་འཕགས་མའི་གསོལ་འདེབས་འདི་ཉིད་ལ༔ བརྩོན་པས་འཇིགས་པ་ཀུན་ཞི་ལེགས་ཚོགས་འགྲུབ༔ དད་ཅན་ཡང་དག་ཆོས་ཀྱིས་མི་བསླུ་བ༔ འཕགས་མ་ཀུན་གྱི་ཐ་ཚིག་ཡང་དག་གོ༔ དགེའོ༔