རྒྱལ་བའི་སྲས་པོ་སྐལ་ལྡན་ལུང་རིག་གླིང་བའི་སྐྱེ་ཕྲེང་གསོལ་འདེབས་ཐར་ལམ་སྣང་བྱེད།
༄༅། རྒྱལ་བའི་སྲས་པོ་སྐལ་ལྡན་ལུང་རིག་གླིང་བའི་སྐྱེ་ཕྲེང་གསོལ་འདེབས་ཐར་ལམ་སྣང་བྱེད་བཞུགས། ན་མོ་གུ་ར་ཝེ། མཁའ་ཁྱབ་རྒྱལ་ཀུན་བྱམས་དང་བརྩེ་བའི་འཕྲུལ། །གངས་ཅན་སྐྱབས་གཅིག་རྒྱལ་སྲས་པད་དཀར་འཆང་། །སྒྲོལ་མའི་ཐུགས་རྗེའི་རང་གཟུགས་མཐིང་འོད་འབར། །ཐུབ་དབང་ཞབས་འདེགས་དགྲ་བཅོམ་བློ་གྲོས་གྲགས། །གསོལ་བ་འདེབས་སོ་ཐར་ལམ་སྣང་བར་མཛོད། །བུད་མེད་གཟུགས་འཆང་འཕགས་མ་ཨུཏྤལ་མདོག །གུ་རུའི་ཐུགས་ཀྱི་གཟུངས་མ་མཁར་ཆེན་བཟའ། །ཕུར་བའི་གྲུབ་བརྙེས་དཔལ་གྱི་དབང་ཕྱུག་ཞབས། །འཁོན་རིགས་ཀླུ་ཡི་དབང་པོ་ཆོས་ཀྱི་སྤྱན། །གསོལ་བ་འདེབས་སོ་ཐར་ལམ་སྣང་བར་མཛོད། །བྱང་བདག་ཤེས་རབ་ཆ་འཛིན་ཆོས་དབང་མོ། །དགོངས་འདུས་བཀའ་བབས་དང་པོ་ཛྙཱ་ནའི་མཚན། །ཀར་གླིང་བདེ་བའི་གར་མཁན་ལང་ཚོ་མ། །ཤར་གཏེར་མངའ་བདག་ཁམས་ཞིག་ཉི་མ་གྲགས། །གསོལ་བ་འདེབས་སོ་ཐར་ལམ་སྣང་བར་མཛོད། །འགྱུར་མེད་རིགས་ཆོས་རིན་ཆེན་བརྒྱུད་འཛིན་པ། །བདུད་ལས་རྣམ་རྒྱལ་དཔའ་བོ་རྡོ་རྗེར་གྲགས། །མདོ་སྨད་གཤེན་རབ་བསྟན་པའི་རྒྱལ་མཚན་མཆོག །གྲུབ་པའི་ངོ་མཚར་སུས་ཀྱང་འགོག་མེད་པ། །གསོལ་བ་འདེབས་སོ་ཐར་ལམ་སྣང་བར་མཛོད། །ཕྱག་ཆེན་གྲུབ་བརྙེས་རྣལ་འབྱོར་ཡེ་ཤེས་སེང་། །རྡོ་གྲུབ་ཐུགས་སྲས་འཇིགས་མེད་སྐལ་བ་བཟང་། །སྦས་པའི་ཚུལ་འཆང་དཀོན་མཆོག་དབང་ཕྱུག་འཕྲུལ། །དགོངས་གཏེར་དག་སྣང་བཀའ་བབས་ལུང་རིག་གླིང་། །གསོལ་བ་འདེབས་སོ་ཐར་ལམ་སྣང་བར་མཛོད། །ཐར་ལམ་ཆོས་ཀྱི་རྩ་བ་དག་སྣང་ཞེས། །མཁས་གྲུབ་ཐམས་ཅད་ཞལ་རྒྱུན་དགོངས་པ་གཅིག །ཁྱད་པར་བཀའ་དྲིན་གསུམ་ལྡན་བླ་མ་ལ། །དཀོན་མཆོག་ཀུན་འདུས་ངོ་བོར་གསོལ་བ་འདེབས། །རབ་འབྱམས་ལྷག་པའི་ལྷ་ཡི་བསྐྱེད་རིམ་ལས། །བླ་མ་སྐད་ཅིག་དྲན་པ་མཆོག་ཡིན་ཞེས། །གསང་ཆེན་རྒྱུད་སྡེའི་དགོངས་པར་ངེས་རྙེད་ནས། །རྟག་ཏུ་ཁྱེད་ཤེས་དད་པས་གསོལ་འདེབས་ན། །དཔག་བསམ་ཤིང་དང་ཡིད་བཞིན་ནོར་བུ་ལ། །རྟོག་པ་མེད་ཀྱང་དགོས་འདོད་འབྱུང་བ་བཞིན། །གནས་སྐབས་མཐར་ཐུག་ཕན་དང་བདེ་བའི་གཏེར། །བདག་རྒྱུད་ཆོས་དང་མཐུན་པར་བྱིན་གྱིས་རློབས། །དེ་མཐུས་སྒྲིབ་གཉིས་ཆུ་འཛིན་དྭངས་པའི་མཁར། །རང་རིག་ཡེ་ཤེས་ཉིན་བྱེད་རབ་འབར་བས། །སྲིད་ཞིའི་མཐའ་ལྟའི་མུན་པ་དབྱིངས་སངས་ནས། །རྨད་བྱུང་སྣང་བས་ས་གསུམ་ཡོངས་ཁྱབ་ཤོག །རང་དོན་ཆོས་སྐུ་ཞི་བའི་རྒྱལ་སྲིད་ཟིན། །གཞན་དོན་གཟུགས་སྐུ་སྐྱེ་རྒུའི་དཔལ་དུ་ཤར། །ལས་བཞིའི་ཕྲིན་ལས་བསྟན་འགྲོར་ཕན་བདེ་སྤེལ། །སྐུ་གསུམ་བླ་མའི་གོ་འཕང་མྱུར་འགྲུབ་ཤོག། ཅེས་པའང་དད་དང་སྐལ་བར་ལྡན་པའི་སློབ་བུ་བཙུན་ཆུང་ཐུབ་བསྟན་འོད་ཟེར་གྱིས་ནན་ཏན་ཆེན་པོས་ལྷ་རྫས་དར་དཀར་སྲིད་དུ་རིང་བ་དང་བཅས་བསྐུལ་ངོར་དགེ་སྦྱོང་རྒན་པོ་རྒྱ་སྤྲུལ་པས་གང་ཤར་བཅོས་མེད་དུ་སྤེལ་བ་དུས་གསུམ་དུ་དགེ་བར་གྱུར་ཅིག སརྦ་ཛ་ཡནྟུ།