མདོ་ཁམས་གཡུ་ཁོག་ཡུལ་གྱི་སྣོད་བཅུད་ཀྱི་བཀོད་པ་སྤྱིར་བཤད་པ།

སྣོད་བཅུད་ཀྱི་བཀོད་པ་བཤད་པ།

དང་པོ་སྣོད་བཅུད་ཀྱི་བཀོད་པ་བཤད་པ་ནི། ཡུལ་ལ་སྔ་བ་གངས་ཅན་གྱི་ལྗོངས། མི་ལ་སྔ་བ་གདོང་དམར་གྱི་བོད། ཅེས་ཡོངས་སུ་གྲགས་པ་ནི། འདུལ་བ་ལུང་གཞི་དང་མངོན་པར་འབྱུང་བའི་མདོ་གཉིས་ལས། དེའི་ཚེ་ས་ཆེན་པོ་འདི་ཆུ་འབའ་ཞིག་ཏུ་འགྱུར་ཞིང་མཚོ་གཅིག་ཏུ་འགྱུར་རོ། །ས་ཆེན་པོ་འདི་ཆུ་འབའ་ཞིག་གི་མཚོ་གཅིག་ཏུ་གྱུར་བའི་སྟེང་དུ་རླུང་གིས་པྲིས་མ་ཆགས་པ་དང་། མཁྲེགས་པ་དང་། ཁེབས་པར་བྱེད་དོ། །དཔེར་ན་འོ་མ་བསྐོལ་བ་གྲང་བར་གྱུར་པའི་སྟེང་དུ་རླུང་གིས་པྲིས་མ་ཆགས་པ་དང་། མཁྲེགས་པ་དང་། ཁེབས་པ་དེ་བཞིན་དུ། ས་ཆེན་པོ་འདི་ཆུ་འབའ་ཞིག་གི་མཚོ་གཅིག་ཏུ་གྱུར་པའི་སྟེང་དུ་རླུང་གིས་པྲིས་མ་ཆགས་པ་དང་། མཁྲེགས་པ་དང་། ཁེབས་པར་བྱེད་དོ། ཞེས་གསུངས་པ་ལྟར། མི་ལོ་དུང་ཕྱུར་མང་པོའི་གོང་རོལ་དུ་འཇིག་རྟེན་གྱི་ཁམས་ཡོངས་རྫོགས་རྒྱ་མཚོ་ཆེན་པོ་གཅིག་ཏུ་གནས་པ་དུས་ཡུན་ཤིན་ཏུ་རིང་པོའི་བར་རླུང་གིས་བསྲུབ་པ་དངོས་པོའི་འགྱུར་སྟོབས་ཀྱི་ནུས་པས་མཚོ་དཀྱིལ་ནས་ཇོ་མོ་གླང་མའི་རི་རྩེ་འབུར་ཞིང་། དེ་ནས་རིམ་གྱིས། འབྲོམ་སྟོན་ཆེན་པོས་རྒྱལ་པོ་ས་ཡི་སང་གའི་དྲིས་ལན་དུ། མདོར་ན་གངས་རིའི་ཁྲོད་འདི་ན། །ལུང་ཆེན་སྟོང་དང་ལྔ་བརྒྱ་ཡོད། །ལུང་སུལ་ཁྲི་དང་ཉིས་སྟོང་ཡོད། །རི་བོ་ཁྲི་ཕྲག་བཅུ་བཞི་ཡོད། །རི་ཕྲན་འབུམ་ཚོ་ཉི་ཤུ་ལྔ། །ཐང་ཆེན་སྟོང་དང་དྲུག་ཅུ་བདུན། །ཐང་ཕྲན་འབུམ་ཕྲག་བཅུ་བདུན་ཡོད། །ཆུ་བོ་ཆེན་པོ་བཞི་རུ་གནས། །ཆུ་ཕྲན་འབུམ་ཚོ་སུམ་ཅུ་ལྔ། །ཆུ་མིག་འབུམ་ཕྲག་བཞི་བཅུ་དྲུག །བྲག་རི་ཁྲི་ཕྲག་དགུ་རུ་གནས། །ལམ་འཕྲང་ཁྲི་ཕྲག་བཅུ་དགུ་སྟེ། །བོད་ཡུལ་ཁྱོན་ནི་དེ་ཙམ་ཞིག །ཞེས་གསུངས་པ་ལྟར། ཁ་བའི་རྡུལ་མང་བརྩེགས་པའི་ས་འཛིན་ཤེལ་དཀར་གྱི་ཕྲེང་བས་ཡོངས་སུ་བསྐོར་བའི་ལྗོངས་ཆེན་པོ་འདི་ཐོག་མར་ཆགས་ཤིང་། དེ་ནས་འཛམ་གླིང་གི་ཡུལ་གྲུ་གཞན་རྣམས་རིམ་གྱིས་བྱུང་། དེ་ནས་སྲོག་ཆགས་རྣམས་མཆེད། དེ་ཡང་སྟོད་དུ་གཡའ་དང་སྤང་ལ་གླང་ཆེན་དང་རི་དྭགས། བར་གྱི་བྲག་དང་ནགས་ཚལ་ལ་བྱ་དང་གཅན་གཟན། སྨད་ཀྱི་རྩི་ཤིང་ནགས་ཚལ་ལ་སྤྲ་སྤྲེའུ་བྲག་སྲིན་སོགས་བྱུང་། བོད་ཡུལ་དུ་མིའི་འགྲོ་བ་ཐོག་མར་བྱུང་ཚུལ་ལ་བཀའ་ཆེམས་ཀ་ཁོལ་མ་ལས། རི་བོ་གྲུ་འཛིན་ནས་འཕགས་པའི་སྤྲུལ་པ་སྤྲེའུ་ཞིག་འོངས་བ་དེ་དང་སྒྲོལ་མའི་སྤྲུལ་པ་བྲག་སྲིན་མོ་གཉིས་འདུས་པ་ལས་བོད་རིགས་མཆེད་པར་འདོད་པ་དང་། རྒྱ་གར་གྱི་སློབ་དཔོན་ཤེས་རབ་གོ་ཆའི་ལྷ་ལས་ཕུལ་བྱུང་གི་བསྟོད་འགྲེལ་ལས། སྟོན་པ་སངས་རྒྱས་བྱོན་པའི་དུས་ལས་སྔ་བ་རྩོད་ལྡན་གྱི་ཐོག་མའི་དུས་སུ་ཁྱབ་འཇུག་གིས་སྐྱ་སེང་བུ་ལྔའི་ཕྱོགས་བྱས་ཏེ་འཐབ་དཀའི་དཔུང་ཚོགས་བཅོ་བརྒྱད་དང་བཅས་པ་བཅོམ་སྐབས། རྒྱལ་པོ་རུ་པ་ཏི་དཔུང་དང་བཅས་པ་བུད་མེད་ཀྱི་ཆ་ལུགས་བྱས་ཤིང་བྲོས་ཏེ། རི་ཁ་བ་ཅན་གྱི་ཁྲོད་དུ་གནས་པའི་རིགས་བོད་ཡིན་པར་གསུངས། དེང་གི་བཤད་སྲོལ་ལྟར་ན། ནམ་མཁའ་ནས་ཆར་བབས་པས་རྒྱ་མཚོའི་ནང་དུ་ཉ་ལ་སོགས་པའི་དམའ་རིམ་གྱི་སྲོག་ཆགས་བྱུང་། ཕྱིས་སུ་སྲོག་ཆགས་འགའ་རེ་མཚོ་ནང་ནས་ཐོན་ཏེ་རི་གླིང་དང་ནགས་གསེབ་སོགས་སུ་རྩེན་པ་རྒྱུ་རྐྱེན་གང་ཞིག་གིས་ཕྱིར་རྒྱ་མཚོར་ཞུགས་མི་ནུས་པར་གྱུར་པ་རི་དྭགས་དང་གཅན་གཟན། ཆུ་གནས་འགའ་རེའི་མཇུག་མ་ཆད་ནས་ཆུ་ནང་དུ་གནས་མ་ནུས་པ་སྤྲ་སྤྲེའུ་སོགས་སུ་གྱུར། ཡང་སྤྲ་སྤྲེའུ་ཁག་གཅིག་ལ་རིམ་པས་རྡོ་ཆས་དང་མེ་བཀོལ་བ་སོགས་ཤེས་འཇོན་ཅུང་ཙམ་རེ་བྱུང་བས་འཇོན་མི་དང་། དེ་ཇེ་བཟང་དུ་གྱུར་པ་བཟོ་མི། ཡར་ལང་ནས་འགྲོ་ཞིང་གཏམ་ཐར་ཐོར་སྨྲ་ཤེས་པའི་འགྲེང་མི་དང་། སྔ་མ་དག་ལས་མཁས་ཤིང་མཛངས་པར་གྱུར་པའི་མཛངས་མི་ཕྱོགས་སུ་མཆེད་པའི་སྐོར་ལ་གདོད་མའི་དུས་རབས་དང་། བོད་ཀྱི་ཡུལ་དུ་དང་པོ་མི་མ་ཡིན་གྱིས་བདག་ཏུ་བཟུང་། དེ་ནས་མིའི་འགྲོ་བ་ཆགས་ནས་རིམ་གྱིས་མངའ་མཛད་ཀྱི་དུས་རབས། དེ་ནས་སིལ་མ་བཅུ་གཉིས་དང་། རྒྱལ་ཕྲན་ཉེར་ལྔ། སིལ་མ་བཞི་བཅུར་གྱེས་པ་སིལ་མའི་དུས་རབས། དེ་ནས་སྤུ་རྒྱལ་བཙན་པོའི་དུས་རབས་བྱུང་བ་སོགས་བཤད་ཚུལ་སྣ་ཚོགས་ཡོད་མོད། གནད་ཀྱི་དོན་ནི། བོད་ཡུལ་ཀྱི་སྣོད་བཅུད་ཐམས་ཅད་སྟོན་པ་མ་བྱོན་པའི་ཡར་སྔོན་ནས་ཡོད་པར་འདོད་དགོས་ཏེ། འདུལ་བ་ལུང་ལས། ཁྱིམ་གཅིག་དང་ལྡན་པའི་གྲོང་གང་ཞེ་ན། འདི་ལྟ་སྟེ། རི་ཁྲོད་པ་རྣམས་དང་། བོད་རྣམས་དང་། ཀླ་ཀློ་རྣམས་ཀྱི་གྲོང་ངོ། ཞེས་དང་། དུས་འཁོར་གྱི་ཡེ་ཤེས་ལེའུའི་སྐབས་སུ། འཕགས་པ་བོད་ལ་སོགས་རྣམས་ལ། །བྱུང་དང་འབྱུང་འགྱུར་ད་ལྟར་བྱུང་བ་རྣམ་པ་གསུམ། ཞེས་དང་། བཀའ་ཆེམས་ཀ་ཁོལ་མ་ལས། སྤྱན་རས་གཟིགས་ཛེ་ཏའི་ཚལ་དུ་འོངས་ནས་སྟོན་པ་མྱ་ངན་ལས་མི་འདའ་བར་གསོལ་བ་བཏབ་པའི་ཚེ། ངའི་གདུལ་བྱ་རྫོགས་སོ། །ཞེས་གསུངས་པ་ན། ད་དུང་ཁ་བ་ཅན་གྱི་སེམས་ཅན་མ་ཐུལ་ལོ། །ཞེས་ཞུས་པས། དེ་ནི་ཁྱོད་ཀྱིས་གདུལ་བར་བྱ་བ་ཡིན་ནོ། །ཞེས་དང་། འགོས་ལོ་གཞོན་ནུ་དཔལ་གྱིས་དེབ་ཐེར་སྔོན་པོར། བོད་ཀྱི་ཡུལ་འདི་ཡང་རྒྱ་གར་དང་འདྲ་བར་ཡུལ་དང་མི་ལ་སོགས་པ་གནས་པའི་བསྐལ་པ་ནས་བྱུང་བར་བྱས་ན་ལུང་དང་རིགས་པས་གནོད་པ་མེད། ཞེས་གསུངས་པ་སོགས་ཀྱིས་ཤེས་སོ། །སྤྱིར་ཡིག་ཆ་དུ་མ་ཞིག་ན། འཇམ་དཔལ་རྩ་རྒྱུད་ལས། ང་ཡི་དུས་ནས་ལོ་བརྒྱ་ན། །ཁ་བ་ཅན་དུ་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། ཞེས་པ་དྲངས་ནས་སྟོན་པ་མྱ་ངན་ལས་འདས་པའི་རྗེས་སུ་བོད་ཡུལ་ཆགས་པར་བཤད་པ་ནི་འཐད་པར་མ་མཐོང་། ལུང་དེའི་དོན་ལ་སུམ་པའི་ཆོས་འབྱུང་ཡོངས་འདུས་ལྗོན་བཟང་ལས། མདོ་དེའི་དོན་ནི། བོད་དུ་ལྷོ་བྱང་གི་གཡུ་མཚོ་དེང་སང་གི་འདི་ལས་ཆེ་ཙམ་དང་། མཚོ་སྣ་སོགས་སུའང་མཚོ་ཕྲན་གཞན་མང་པོ་ཡོད་པ་ཅུང་ཟད་བྲི་བ་དང་། ཁྱད་པར་དུ་སྐྱིད་ཤོད་དུ་འོ་ཐང་གི་མཚོ་ཆུང་ཞིག་ཡོད་པའང་བྲི་ནས་དེ་དག་ཏུ་ལྷ་ཁང་སོགས་ཆགས་ཏེ་བསྟན་པ་དར་དུས་ལ་དགོངས་པར་བྱས་ཆོག་པས། དེ་ཙམ་གྱིས་བོད་ཀྱི་ཕྱོགས་ཀུན་ཆུས་གང་སྟེ་མིའི་འགྲོ་བ་གཅིག་ཀྱང་མེད་མི་དགོས། ཞེས་གསུངས་པ་ནི་ལེགས་བཤད་རིན་ཐང་ཅན་དུ་མཐོང་། ལུང་ཚིག་འདི་ཡང་སྡེ་དགེའི་པར་མའི་ནང་དུ། ང་ནི་ས་སྟེང་མྱ་ངན་འདའ། ཁ་བ་ཅན་གྱི་ནང་དག་ཏུ། །སཱ་ལའི་ནགས་ནི་ཡང་དག་འབྱུང་། ཞེས་གསུངས་འདུག་པ་ལས་མཚོ་བྲི་ཚུལ་བཤད་མི་འདུག་པས་དཔྱད་འཚལ། གང་ལྟར་ཡང་ཡུལ་འདིའི་སྐྱེ་བོ་དག་འཕགས་པ་ཐུགས་རྗེ་ཆེན་པོའི་ཐུགས་བསྐྱེད་དང་བྱིན་རླབས་ཀྱིས་སྐྱོང་བར་མཛད་པ་ཞིག་ཡིན་པར་གསལ་ཏེ། སངས་རྒྱས་འོད་དཔག་མེད་ཀྱིས་བྱང་ཆུབ་སེམས་དཔའ་སྤྱན་རས་གཟིགས་ལ། མཐའ་འཁོབ་ཁ་བ་ཅན་གྱི་ཡུལ་ཁམས་དེར། །ཡི་དམ་ལྷ་ཡི་སྐལ་བ་ཁྱོད་ཡིན་ཏེ། །ཡི་དམ་ཁྱོད་ལ་བརྟེན་ནས་མ་འོངས་དུས། །ཡུལ་དེར་སངས་རྒྱས་བྱང་སེམས་དཔག་མེད་འབྱུང་། །སངས་རྒྱས་བསྟན་པ་དར་ཞིང་རྒྱས་པར་འགྱུར། །ཆོས་སྐལ་སྙིང་པོ་ཡིག་དྲུག་འདི་ཡིན་ཏེ། །སྙིང་པོ་འདི་ལ་བརྟེན་ནས་མ་འོངས་དུས། །ཤཱཀྱའི་རྒྱལ་པོའི་གསུང་རབ་དམ་ཆོས་ཀུན། །ཡུལ་དེར་དར་རྒྱས་མི་ཀུན་ཆོས་སྤྱོད་འགྱུར། །ཞེས་སོགས་གསུངས་པ་ལྟར་རོ། །དེ་ཡང་ཡུལ་སྤྱིའི་དགེ་མཚན་གྱི་དབང་དུ་བྱས་ན་ཆོས་རྒྱལ་སྲོང་བཙན་སྒམ་པོས། དེ་ལྟར་འཕགས་པའི་གང་ཟག་རྣམས་འབྱུང་ཞིང་། །འཁོར་ནི་ལེགས་གནས་སྟོན་པའི་གསུང་རབ་དང་། །སྟོན་པའི་སྐུ་གཟུགས་དངོས་སུ་བཞུགས་པ་དང་། །རི་བོ་ཡོན་ཏན་ཅན་ཡང་དེ་ན་ཡོད། །ཙཱ་རི་ཙ་གོང་བདེ་མཆོག་རང་བྱོན་དང་། །རྡོ་ཆུ་རིན་པོ་ཆེ་ཡང་དེ་ན་ཡོད། །ཏི་སེའི་གངས་ལ་དགྲ་བཅོམ་ལྔ་བརྒྱ་བཞུགས། །བདུད་རྩིའི་ཆུ་ཡང་རི་བོ་དེ་ན་ཡོད། །གྱེ་རིའི་བྲག་ལ་ཡིག་དྲུག་རང་བྱུང་དང་། །མཁའ་འགྲོའི་ཕྱག་རྒྱ་རི་བོ་དེ་ན་ཡོད། །མ་ཕམ་མཚོ་ལ་ཀླུ་རྒྱལ་བྱང་སེམས་གནས། །ཆུ་བོ་ཡོན་ཏན་ཅན་ཡང་དེ་ན་ཡོད། །ཁྲི་བཤོས་རྒྱ་མཚོའི་ཀླུ་བློན་བྱང་ཆུབ་སེམས། །ཆུ་བོ་ཆེན་པོ་ཀུན་ལ་ཕན་པར་མཛད། །གནམ་མཚོ་ཕྱུག་མོའི་ནང་ན་བྱང་ཆུབ་སེམས། །ཐང་ལྷའི་བྲག་ལ་དགྲ་བཅོམ་ལྔ་བརྒྱ་ཡོད། །སྦུབས་མཚོའི་ནང་ན་ཀླུ་རྒྱལ་བྱང་ཆུབ་སེམས། །ཁའུའི་གངས་ལ་དགྲ་བཅོམ་མང་པོ་ཡོད། །རི་མཐོ་ས་གཙང་གངས་རི་གཉན་གྱིས་བསྐོར། །སྒྲ་དག་སྐད་སྙན་སཾ་སྐྲྀ་ཏ་དང་མཚུངས། །མི་སྐད་ཆོས་ལ་བསྒྱུར་དུ་བཏུབ་པའི་སྒྲ། །ཡངས་ཤིང་མཐའ་ལེགས་ཡོན་ཏན་ཀུན་ལྡན་པ། །ཞེས་སོགས་དང་། བཀའ་གདམས་གླེགས་བམ་ལས། ཤར་རྡོ་རྗེ་གདན་གྱི་བྱང་ཕྱོགས་ན། །གནས་པུར་རྒྱལ་བོད་ཅེས་བྱ་བ་ཡོད། །རི་མཐོན་པོ་གནམ་གྱི་ཀ་བ་ཡོད། །མཚོ་དམའ་མོ་གཡུ་ཡི་མཎྜལ་ཡོད། །སྤང་སེར་པོ་གསེར་གྱི་ལྷུན་པོ་ཡོད། །དྲི་ཞིམ་པོ་སྨན་གྱི་བདུག་སྤོས་ཡོད། །ཚོན་བཀྲ་བ་གསེར་གྱི་མེ་ཏོག་ཡོད། །དབྱར་བཀྲ་བ་གཡུ་ཡི་མེ་ཏོག་ཡོད། །ཞེས་དང་། རི་པདྨ་སྟོང་ལྡན་དབྱིབས་ལེགས་པ། །དུས་དགུན་གསུམ་དཀར་པོ་ཤེལ་གྱི་མདོག །དུས་དབྱར་གསུམ་སྔོན་པོ་གཡུ་ཡི་མདོག །དུས་སྟོན་གསུམ་སེར་པོ་གསེར་གྱི་མདོག །དུས་དཔྱིད་གསུམ་ཁྲ་བོ་གཟི་ཡི་མདོག །ཅེས་སོགས་ཆེད་དུ་བསྔགས་པར་མཛད་པ་དང་། ཁང་ས་ཞིང་ས་ས་ཡི་དགེ །འཐུང་ཆུ་ཡུར་ཆུ་ཆུ་ཡི་དགེ །གམ་འབྲོག་རྒྱང་འབྲོག་རྩྭ་ཡི་དགེ །ཁང་ཤིང་བུད་ཤིང་ཤིང་གི་དགེ །ཁང་རྡོ་ཐབ་རྡོ་རྡོ་ཡི་དགེ །ཞེས་པ་ལྟར་ཡུལ་ལ་དགེ་བཅུ་ཚང་ཞིང་ཁྱད་པར་བཀའ་དྲིན་ཟླ་མེད་ཨོ་རྒྱན་ཆེན་པོ་དང་། སྤྲུལ་པའི་ཆོས་རྒྱལ་ཆེན་པོ་ལ་སོགས་པ་ས་ཆེན་པོ་ལ་གནས་པའི་རྒྱལ་བློན་པཎ་གྲུབ་དུ་མས་བྱིན་གྱིས་བརླབས་ཤིང་ཡོངས་སུ་སྐྱོང་བར་མཛད་ཅིང་སྙིགས་མའི་དུས་སུ་སྟོན་པ་སངས་རྒྱས་ཉིད་ཀྱིས་ལུང་དུ་བསྟན་པ་ལྟར་རྒྱལ་བའི་བསྟན་པ་ཆེས་ཆེར་དར་ཞིང་རྒྱས་པའི་གནས་ཕུན་སུམ་ཚོགས་པ་བསིལ་ལྡན་སཱ་ལའི་སྨན་ལྗོངས་སམ། ལྷ་མོ་དྲི་མ་མེད་པའི་འོད་ལུང་བསྟན་པའི་མདོར་གདོང་དམར་ཅན་གྱི་ཡུལ་ཞེས་གསུངས་པ་འདི་ལ་ནང་གསེས་སུ། སྤུ་རངས་དང་། མང་ཡུལ། ཟངས་དཀར་གསུམ་སྐོར་གཅིག ལི་དང་། བྲུ་ཤ སྦལ་ཏི་གསུམ་སྐོར་གཅིག ཞང་ཞུང་དང་། ཁྲི་སྡེ་སྟོད་སྨད་གསུམ་སྐོར་གཅིག་སྟེ་སྟོད་མངའ་རིས་སྐོར་གསུམ། སྔོན་ཆོས་རྒྱལ་སྲོང་བཙན་གྱི་དུས་སུ་དབུས་ལ་དབུ་རུ་དང་གཡོན་རུ་གཉིས། གཙང་ལ་གཡས་རུ་དང་རུ་ལག་གཉིས་ཏེ་བཞིར་གྲགས་ཀྱང་། སོག་པོ་གུ་ཤྲི་ཧན་གྱིས་བོད་ཡུལ་ཡོངས་རྫོགས་དབང་དུ་བསྡུས་ཏེ། ཀུན་གཟིགས་ལྔ་པ་ཆེན་པོའི་ཕྱག་ཏུ་ཕུལ་བ་ནས་བཟུང་དབུས་གཙང་སྤྱི་ལ་གཡས་རུ་དང་གཡོན་རུ། སྤུ་རུ་དང་གུང་རུ་བཞིར་བྱས་པ་སྟེ་བར་དབུས་གཙང་རུ་བཞི་དང་། ཟལ་མོ་བཀྲ་ཤིས་ལྷ་སྒང་། ཚ་བ་སྟོང་ཉིད་ཆོས་སྒང་། སྨར་རི་ལྷ་ཁམས་གཡུ་སྒང་། སྤོ་འབོར་སྤོ་ལུང་གསེར་སྒང་། རྨ་རྫ་མཆོང་ལུང་དར་སྒང་། མི་ཉག་མཐོན་པོ་རབ་སྒང་སྟེ་སྨད་མདོ་ཁམས་སྒང་དྲུག་སྟེ། དེ་ལྟར་ཤོག་ཚན་གསུམ་དུ་ཕྱེ་བའི་ཕྱི་མ་མདོ་ཁམས་སྒང་དྲུག་གི་ནང་ཚན། རྨ་རྫ་སྒང་རྒྱུད་དུ་གཏོགས་པར་སྣང་སྟེ། གཡུ་ཁོག་ཡུལ་གྱི་ཡུལ་ལྷའི་བསང་མཆོད་ཀྱི་ཡིག་ཆ་འགའ་རེ་སོགས་སུ་གཡུ་ཁོག་གི་ས་ཆ་འདི་ཟལ་མོ་སྒང་རྒྱུད་ཡིན་པར་གསུངས་པ་དང་། ཁྱུང་ལུང་རས་པ་དམ་ཚིག་རྡོ་རྗེའི་རྣམ་ཐར་དུ། རྡོ་གྲུབ་ཀུན་བཟང་གཞན་ཕན་གྱིས་ཁྱུང་ལུང་རས་པ་ལ། རིག་འཛིན་འཇིགས་གླིང་གི་བསྟན་པ་སྒང་གི་ཕྱོགས་སུ་དར་གསུངས་པའི་ལུང་བསྟན་གྱི་དོན་རྨ་རྫ་གཉིས་ཀྱི་བར་དེ་ལ་ཟལ་མོ་སྒང་ཟེར་བ་ཡིན་གསུངས་པས་སོ། །ཡང་ན་ཤར་རྒྱལ་མོ་ཚ་བ་རོང་། ལྷོ་མོན་ཁ་གྲོ་མ་ནགས་ཀྱི་རོང་། ནུབ་མི་ཡུལ་རྫ་ཡི་རོང་། བྱང་སྐྱིད་ཡུལ་གངས་ཀྱི་རོང་སྟེ་བོད་ཀྱི་རོང་ཆེན་རྣམ་བཞིར་གྲགས་པའི་ཡ་གྱལ་ཤར་རྒྱལ་མོ་ཚ་བ་རོང་གི་སྟོད་ཕྱོགས་ན། གཡུ་སྟག་མོ་འཕྲེད་ཉལ་སྨར་གྱི་ལག །བུ་དཔའ་བོ་མི་སྐྱེས་ཀ་མེད་རེད། །ཅེས་གནའ་བོའི་ངག་སྒྲོས་སུ་གྲགས་པའི་ཡུལ་གྲུ། ས་དབྱིབས་གཅན་གཟན་དབྱི་དཀར་གྱི་པགས་པ་བརྐྱངས་པ་དང་འདྲ་བས་དབྱི་ཁོག་གམ་གཡི་ཁོག གླིང་གེ་སར་རྒྱལ་པོས་ས་བཅུད་གཡང་རྟེན་དུ་གཡུ་ཕུག་རོན་ཙམ་པདྨ་རྣམ་པར་བཀྲ་བའི་གནས་སུ་གཏེར་དུ་སྦས་པས་སམ། ཡང་ན། རིན་ཆེན་གཡུའི་ཕོ་བྲང་ལ་མངའ་དབང་མཛད་པའི་བོད་ཁམས་སྐྱོང་བའི་བརྟན་མ་ཆེན་མོ་ལྷ་སྨན་རྡོ་རྗེ་གཡུ་ཡི་སྒྲོན་མས་ཀུན་ནས་སྐྱོང་བའི་ས་ཕྱོགས་ཡིན་ཕྱིར་གཡུ་ཁོག་ཞེས་བཤད་རྒྱུན་དང་འབྲི་ཚུལ་གསུམ་དུ་བྱུང་བའི་ཡུལ་གྲུ་འདི་ནི། གངས་ལྗོངས་མདོ་དབུས་ཁམས་གསུམ་དུ་ཕྱེ་བ་ལས་ཁམས་ཀྱི་ཕྱོགས་སུ་གཏོགས་ཏེ། གྱི་ལུང་མཁས་གྲུབ་རྣམ་གཉིས་ཀྱིས་མཛད་པའི་བོད་མི་བུ་གདོང་དྲུག་གི་རུས་མཛོད་མེ་ཏོག་སྐྱེད་ཚལ་དུ། ཁམས་ཕྱོགས་ཀྱི་གེ་འཕན་གཡུ་རྩང་སྒེག་གསུམ། ཞེས་སོགས་འབྱུང་བས་སོ། །

དེ་ཡང་ཤར་ན་མདོ་མུར་ཤོག་གསུམ། ལྷོ་ན་མི་ཉག་དང་ཏྲེ་ཧོར། ནུབ་ན་ལི་རྩང་སྟོད་སྨད། བྱང་ན་རྒྱལ་རོང་ཁྲོ་སྐྱབས་བཅས་ཀྱིས་བསྐོར་བའི་ཡུལ་དབུས་ན་མངོན་པར་མཛེས་པའི་མ་བཅོས་རང་བྱུང་ལྷུན་གྱིས་གྲུབ་པའི་མཛེས་ལྗོངས་ཆེན་པོ་འདིའི་ཆགས་ཚུལ་ནི། གཡུ་ལུང་རིང་མོའི་སྟོད་ན་སྨུག་སྤྲིན་གྱིས་མགུལ་བ་དཀྲིས་པའི་གངས་ཀྱི་རི་བོའི་དབུ་རྩེ་མཐིང་སྔོན་ནམ་མཁའི་དབྱིངས་སུ་སྙེགས་པའི་མཐའ་སྐོར་དུ་རི་ཕྲན་མང་པོས་བསྐོར་བ། གཡུ་སྨད་དུ་རྒྱ་ཤོད་ཞིང་གི་རེའུ་མིག་རྣམ་པར་བཀྲ་བ་ལས་འབྲུ་རིགས་སྣ་ཚོགས་ཀྱི་འབྲས་བུ་གཡུར་དུ་ཟ་བ། ཕྱོགས་མཚམས་རྣམས་སུ་རྔམ་ཞིང་བརྗིད་པའི་ནགས་རི། མཐོ་ལ་གཟར་བའི་རྫ་རི་དང་བྲག་རི། འཇམ་ལ་ཟླུམ་པའི་སྤང་རི་དང་དེའུ་དུ་མ་སྤེལ་མར་གནས་པའི་བར་མཚམས་རྣམས་སུ། གཡུའི་དགའ་སྤྲོའི་ཐང་། གཡུ་མཁར་རལ་གྲི་ཐང་། ཆུ་ལུང་ཐང་། རྒྱུ་ཡངས་ཐང་། ཆོས་དུང་ཐང་། ཆོས་ཁྲི་ཐང་། བྲག་དམར་བོལ་གོང་ཐང་། སྒེག་གི་ཆུ་ཐག་ཐང་། བརྡར་རྡོའི་ཐང་། འཁྱིལ་ཆེན་ཤོ་རྡེའུ་ཐང་། ཨུག་ཚང་དཀྱིལ་རུའི་ཐང་ངམ་དཀྱིལ་འཁོར་ཐང་སོགས་ཐང་ཆེན་དང་ཐང་ཆུང་དུ་མས་མཛེས་པ། གཡུ་ལུང་རིང་མོའི་གཡས་ཕྱོགས་ཀྱི་མཐའ་སྐོར་དུ་ཆུ་དཀར་ཁོག་དང་ཆུ་དབར་ཁོག ས་དམར་ཁོག འཁྱིལ་ཆེན་སྟོད་སྨད། ཤ་འབྲུག་རྒྱས་གསུམ། ནེའུ་ཆེ་ཆུང་། གསེས་དང་ཙི་རུ། ཀི་ལོ་དང་རྨ་ལུང་། ཉིན་ཡག་དང་ཁོ་ཁོ། གཡུ་འབྲུག་ཆེ་ཆུང་སོགས་དང་། གཡོན་ཕྱོགས་ཀྱི་མཐའ་སྐོར་དུ་ཆུ་དམར་ཁོག་དང་ཆུ་ལུང་ཁོག ཨ་སེན་ཁོག་དང་བེས་ཁོག སྒེག་ཁོག་དང་ཇུ་ནུ་རི་གསུམ། དབྱི་འ་དང་རྒྱ་འུ། སྤ་ལུང་དང་སྒ་ནུབ། རྒྱབ་ཕྱོགས་སུ་ཨུག་ཚང་དང་རྟའུ་ཁ་ལུང་། ངར་དང་རི་ཟིབ། རྡོ་རིང་དང་རྫེས། རྒ་ནུབ་སོགས་གཡུ་ལུང་རིང་མོར་མདོ་འབྲེལ་བ་དང་མགོ་འབྲེལ་བའི་རི་ལུང་ཤིན་ཏུ་མང་བ། སྔོ་ལྗང་གཡུ་ལོས་སྤྲས་པའི་ཐང་ཤིང་དང་ཤུག་པ། བེ་ཤིང་དང་སྲ་ཤིང་། སྟག་པ་དང་སྟག་མ། ཉ་བྲུག་དང་བ་ལུ། སུར་ཤིང་དང་གླང་མ། ལྕང་དཀར་སོགས་ཉི་མའི་ཟེར་སྣང་སྤྱི་བོས་ལེན་ཅིང་། བདུད་རྩིའི་རྒྱུན་བཟང་རྐང་པས་འཐུང་བའི་སྣ་བརྒྱའི་ལྗོན་ཤིང་གི་ཚང་ཚིང་འཁྲིགས་པའི་གསེབ་རྣམས་སུ། མི་རྒོད་དང་། སྟག གཟིག དོམ། དྲེད། འཕར་བ། སྤྱང་ཀི གཡི་དཀར། གཡི་དམར། གཡི་སྔོན། གུང་། ཝ། གསའ་སོགས་སྡེར་ཆགས་གཅན་གཟན་རྣམས་ཀྱིས་རྔམ་པའི་ང་རོ་སྒྲོག་པ། དེ་བཞིན་དུ་ཤ་སྐྱ་དང་ཤ་ནག གླ་སྐྱ་དང་གླ་ནག གནའ་བ་དང་དགོ་བ། ཁ་ཤ་དང་ཤ་རྒྱ། ར་རྒོད་དང་ཕག་རྒོད། རི་བོང་དང་སྤྲེའུ་ལ་སོགས་པ་ཡང་དལ་གྱིས་རྒྱུ་ཞིང་རང་བྱུང་རྩྭ་ཆུའི་བཅུད་ལ་རོལ་བ། རྒོད་ཐང་དཀར་དང་ཐང་ནག གླག་ནག་རོག་ཆུང་དང་གླག་ཁྲ། ཁྲ་དང་ཕོ་རོག བྱ་ཆེན་གོ་བོ་དང་འོལ་བ། ཕུག་རོན་དང་སྐྱ་ག་ཁྲ་མོ་སོགས་འཕུར་རྩལ་ཆེ་བའི་བྱ་རིགས་རྣམས་མཁའ་ལ་རྩེན་པ། ཁུ་བྱུག་དང་མཐིང་རིལ། བྱ་དཀར་དང་གོང་མོ། འཇོལ་མོ་དང་ཅོ་ཀ་སོགས་རིགས་མི་གཅིག་པའི་འདབ་ཆགས་དུ་མ་ཞིག་གིས་མེ་འབྲས་ལོ་མས་དུད་པའི་ལྗོན་ཚལ་ན་དྲུག་འགྱུར་མགྲིན་པའི་དབྱངས་སྙན་འཁྲོལ་བ། ནེའུ་གསིང་དང་སྤང་ལྗོངས་རྣམས་སུ་དཀར་དམར་མེ་ཏོག་གི་ཕྲ་ཚོམ་རྣམ་པར་བཀྲ་ཞིང་སྣ་ཚོགས་རྩི་སྨན་གྱི་དྲི་བསུང་ཕྱོགས་སུ་འཕྲོ་བ། མཁའ་དབྱིངས་ཆུ་འཛིན་གྱི་གུར་ཁང་ནས། སྦྲང་ཆར་སིལ་མའི་མེ་ཏོག་འཇོ་ཞིང་། ཁ་ཏོག་ལྔ་ལྡན་གྱི་འཇའ་ཟེར་འཁྱིལ་བ། གཡུ་ཁྲོམ་གངས་ཀྱི་རི་བོའི་གཡས་དང་གཡོན་ལས་འབབ་པའི་དྭངས་བསིལ་གཡུ་ཆུ་སྔོན་མོ་ཆུ་ཕྲན་དུ་མའི་རམ་འདེགས་དང་བཅས་ཏེ་ལྷོ་ནས་བྱང་དུ་འབབ་བཞིན་སྒེག་ཆུ་དང་འབྲེལ་ཞིང་གཡུ་ལུང་རིང་མོའི་གཞུང་བརྒྱུད་ནས་རྡོ་གསེར་གྱི་ཆུ་དང་འདྲེས། དེ་ནས་ཤར་ཕྱོགས་རྒྱལ་མོ་རྔུལ་ཆུའི་ཀླུང་ཆེན་པོ་དང་བསྡོངས་ནས་དལ་གྱིས་བཞུར་ཏེ་སི་ཁྲོན་ཡེས་པེན་（宜宾）ཞེས་པའི་ས་ནས་འབྲི་ཆུ་དང་གཅིག་ཏུ་འདྲེས་ཤིང་རྒྱ་ནག་གི་ཞིང་ཆེན་འགའ་བརྒྱུད་ནས་མཐའི་རྒྱ་མཚོར་འབབ་པ། གཡུ་མཚོ་དང་གསེར་མཚོ་སོགས་གཏན་འཁྱིལ་གྱི་མཚོ་དང་མཚེའུ། ཆུ་བོ་རྣམས་སུ་མཚོ་གླང་དང་མཚོ་ལུག ཉ་ཁྱེའུ་དང་གསེར་ཉ། ཆུ་སྲམ་སོགས་ཆུ་གནས་སྣ་ཚོགས་བག་ཡངས་སུ་གནས་པ། ངང་པ་དང་ངུར་བ། ཆུ་བྱ་དང་ཆུ་བྱེའུ་སོགས་ཀྱིས་མགྲིན་གླུ་དར་དིར་སྒྲོག་བཞིན་རྐྱལ་དུ་རྩེན་པ། གཞན་ཡང་འབྱུང་འཁྲུགས་ནད་ཀྱི་ཟུག་རྔུ་འཇོམ་ཞིང་ལུས་སེམས་ལ་བདེ་དགའ་སྟེར་བའི་རང་བྱུང་ཆུ་ཚན་གྱི་ཁྲུས་རྫིང་དྲོ་གྲང་སྙོམ་པ་དུ་མ་ཕྱོགས་ཀུན་ན་འཁྱིལ་བ། རུ་རྟ་དང་མ་ནུ། ཏང་ཀུན་དང་ལྕུམ་རྩ། རྫ་ཡུང་དང་ཧོང་ལེན། ཤང་དྲིལ་དང་ཅོང་ཞི་སོགས་ས་སྟེང་དང་ས་འོག་ན་གནས་པའི་སྨན་གྱི་རིགས་ནི་ཚད་གཟུང་དུ་མེད་པ་དང་། ཁྱད་པར་གསེར། དངུལ། ཟངས། ལྕགས་ལ་སོགས་པའི་གཏེར་རྫས་སྣ་ཚོགས་ཀྱང་ཡུལ་གཞན་ལས་མང་བར་མཆིས་སོ། །དེ་ལྟར་འགྲོ་བའི་ཡིད་སྣང་དབང་མེད་དུ་འཕྲོག་པར་བྱེད་པའི་མ་བཅོས་རང་བྱུང་གི་མཛེས་ལྗོངས་ཆེན་པོ་དེ་ནི་དཔྱིད་གསུམ་སྔོ་ལྗང་གི་ལོ་མ་རྒྱས་པས་གཡུ་ཡི་མདོག་ལྟར་ལྗང་ལྟེམ་མེ། དབྱར་གསུམ་མེ་ཏོག་སྣ་ཚོགས་ཀྱི་འདབ་མ་བཞད་པས་ཟ་འོག་གི་ཁ་ཕྱེ་བ་ལྟར་ཁྲ་ལམ་མེ། སྟོན་གསུམ་སྐྱེ་དངོས་རྣམས་གསེར་མདོག་གི་རང་བཞིན་དུ་འགྱུར་བས་སེར་ཤིགས་སེ། དགུན་གསུམ་ཁ་བའི་མེ་ཏོག་གིས་མཛེས་པར་བཀླུབས་པས་དཀར་ལམ་མེར་འགྱུར་བ་སོགས་དུས་བཞིའི་རྣམ་འགྱུར་གསལ་བ། དྲོ་གྲང་དང་ཐན་ཞོད་སྙོམ་པ། ས་ཆུའི་བཅུད་བཟང་ཞིང་འབྲུ་རིགས་སྣ་ཚོགས་སྨིན་པ། གདུག་པའི་གཅན་གཟན་དང་འབུ་སྲིན་སོགས་ཉུང་བ། མི་རྣམས་རང་བཞིན་གྱིས་གཤིས་རྒྱུད་འཇམ་ཞིང་དྲང་བ། ལས་འབྲས་ཀྱི་བླང་དོར་མ་མཐར་ཡང་ཕྱོགས་ཙམ་རེ་ཤེས་པ་སྟེ། སྒྲུབ་རྒྱུད་བསྟན་པའི་མངའ་བདག་ཀརྨ་སྐུ་ཕྲེང་བཅུ་པ་ཆོས་དབྱིངས་རྡོ་རྗེས་མཛད་པའི་རྟོགས་བརྗོད་ཀ་ལ་པིང་ཀའི་ལམ་གླུ་རུ། རྡོ་རྗེ་གཡུ་སྒྲོན་གྱི་གངས་རིའི་ཆུ་རྒྱུན་བསིལ་མ་གྱ་གྱུར་འབབ་པ། རྩྭ་སྔོན་གསར་པ་དང་། མེ་ཏོག་བསིལ་མས་ས་གཞི་ཀུན་མཛེས་པར་བྱས་པ། གཙང་ཞིང་ཡིད་དུ་འོང་བའི་ས་ཕྱོགས་ན། རེ་བའི་ཁྱིམ་པ་དད་པའི་སེམས་ཀྱི་རང་བཞིན་གསེར་ལྟར་བཟང་བ་བརྒྱ་ཕྲག་དུ་མ་ཞེས་ཆེད་དུ་བསྔགས་པ་བརྗོད་པའི་ཡུལ་གླིང་དེ་ན་རྟ་ནོར་ལུག་གསུམ་འཚོ་སྐྱོང་བྱེད་ཅིང་མར་ཆུར་འོ་ཞོའི་གཏེར་ཁ་འབྱེད་པའི་འབྲོག་སྡེ་དང་། རྨོ་རྐོ་སོ་ནམ་གྱི་ལས་ལ་གཞོལ་ཞིང་འབྲུ་རིགས་སྣ་ལྔའི་གཏེར་མཛོད་སྤུང་བའི་རོང་སྡེ་སྟེ་ལས་ལ་བརྩོན་ཅིང་དཔའ་ངར་ལྡན་པ། མི་གཞི་བཟང་ཞིང་ཆོས་ལ་དད་པའི་ལྷ་སྡེ་དཀར་པོ་ཞིག་ཕྱོགས་དང་ཕྱོགས་སུ་འབྲས་དཀར་གྱི་ཚོམ་བུ་བཀོད་པ་བཞིན་དུ་གནས་སོ།། དེ་ཡང་གཡུ་ལུང་རིང་མོའི་ཆགས་དབྱིབས་གཅན་གཟན་གཡི་དཀར་གྱི་པགས་པ་བརྐྱངས་པ་དང་ཅི་ལྟར་མཚུངས་ཞེ་ན། དབྱི་སྙིང་ལ་ཁ་ནི་གཡིའི་སྙིང་ཀ་དང་། དགྲ་བླའི་རི་རྒྱུད་གཡིའི་མགོ། ཆུ་དཀར་ཁོག་དང་། ཆུ་དམར་ཁོག་གཉིས་གཡིའི་ལག་པ་གཉིས། རལ་གྲིའི་ཐང་དང་ཆོས་ཁྲི་ཐང་གཡིའི་ཁོག་པ། སྒེག་ཁོག་དང་། འཁྱིལ་ཆེན་ཁོག་གཉིས་གཡིའི་རྐང་པ་གཉིས། ཁྲོ་མདའ་མན་ཆད་ནི་གཡིའི་མཇུག་མའི་ཚུལ་དུ་གནས་པར་གྲགས་སོ།།

བྱིན་ལྡན་གནས་རི་ཇི་སྙེད་མཆིས་ཚུལ་བཤད་པ།

གཉིས་པ་བྱིན་ལྡན་གནས་རི་ཇི་སྙེད་མཆིས་ཚུལ་བཤད་པ་ནི།

མི་ཡུལ་གྱི་དག་ཞིང་དུ་གྲགས་པའི་གནས་མཆོག་ཆེན་པོ་དེའི་སྟོད་སྨད་བར་གསུམ་ཀུན་ན་རྒྱལ་དབང་ཨོ་རྒྱན་པདྨ་དང་། ལོ་ཆེན་བཻ་རོ་ཙ་ན། དཔལ་རྒ་ལོ་པ་སོགས་དམ་པའི་སྐྱེས་བུ་དུ་མས་ཞབས་ཀྱིས་བཅགས་ཤིང་སྒྲུབ་པ་མཛད། ཆོས་ནོར་གྱི་གཏེར་ཁ་དཔག་ཏུ་མེད་པ་སྦས་ཤིང་བྱིན་གྱིས་བརླབས་པའི་གནས་རི་དུ་མ་ཞིག་ཡོད་ཏེ། གཡུ་སྟོད་ན་གཡུ་ཁྲོམ་གངས་ཀྱི་ར་བ། ཤུག་འདབས་ཁོག་ན་རྒྱ་གར་གྱི་དུར་ཁྲོད་བསིལ་བའི་ཚལ་དང་། དཔལ་གྱི་ཙཱ་རི་ཊ་གཉིས་པར་བསྔགས་པ་གནས་ལུང་དཔལ་གྱི་རི་བོ། གཡུ་མཁར་རལ་གྲིའི་ཐང་རྩེ་ན་གླིང་གེ་སར་རྒྱལ་པོས་བླ་གཡུ་གཏེར་དུ་སྦས་པ་དང་། སྤྱི་དཔོན་རྒྱལ་པོས་སྒྲུབ་པ་མཛད་པ། རིག་འཛིན་ལུང་རིག་གླིང་པས་དགོངས་གཏེར་མཁའ་འགྲོའི་བརྡ་མཛོད་ཀྱི་སྒོ་འཕར་ཕྱེ་བའི་གནས་མཆོག་དབྱི་སྙིང་པདྨ་རྣམ་པར་བཀྲ་བ། ཆུ་དཀར་ཁོག་ན་རིགས་གསུམ་སེམས་དཔའི་གནས་རི་སྦས་ཡོལ་དགའ་བ་ལྗོངས། གཡུའི་ཆུ་དབར་ཁོག་ན་སྐུ་གསུམ་མཁའ་འགྲོའི་འདུ་གླིང་སྟེ། སྟོད་ན་ཆོས་སྐུའི་མཁའ་འགྲོ་རྡོ་རྗེ་ཕག་མོའི་གནས་མཚོ་མདའ་ཙཱ་རི་གཉིས་པ། བར་ན་ལོངས་སྐུའི་མཁའ་འགྲོ་རྒྱལ་ཡུམ་སྒྲོལ་མ་ཉེར་གཅིག་གི་གནས་ཏཱ་རེ་མི་འགྱུར་དགའ་ཚལ། སྨད་ན་སྤྲུལ་སྐུའི་མཁའ་འགྲོ་ཡེ་ཤེས་མཚོ་རྒྱལ་གྱི་གནས་དེའུ་དཔལ་གྱི་རི་བོ། སྦས་ལུང་གསེར་ཁ་ན་རིགས་ལྔའི་མཁའ་འགྲོའི་འདུ་གླིང་མཁའ་སྤྱོད་དགའ་བའི་ཚལ། སྒེག་ལུང་ན་འཕགས་པ་སྤྱན་རས་གཟིགས་ཀྱི་གནས་མ་ཎི་རང་བྱོན། ངེས་ལེགས་ན་ངེས་ལེགས་བླ་རབས་རིམ་བྱོན་གྱི་གདན་ས་བསམ་གཏན་གླིང་། བོལ་གོང་ལྡོང་རི་ན་འཕགས་མཆོག་ཐུགས་རྗེ་ཆེན་པོའི་གནས་ཡིག་དྲུག་རང་བྱོན། སྦས་གནས་ན་ལོ་ཆེན་བཻ་རོ་ཙ་ན་སོགས་ཀྱི་སྒྲུབ་གནས་རི་བོ་ཏ་ལ། ༼༡ ས་མུ་ངོས་ན་དཔལ་རྒ་ལོ་པའི་སྒྲུབ་གནས་གསང་ཆེན་རྡོ་རྗེའི་བྲག་རྫོང་། ༼༢ གླ་ཡུམ་ན་སྤྱན་རས་གཟིགས་ཀྱི་གནས་གྲུ་འཛིན་བདེ་ཆེན་འགྱུར་མེད་ལྷུན་གྱིས་གྲུབ་པའི་རྫོང་དཔལ་ལྡན་ཡོན་ཏན་བརྩེགས་པའི་དགའ་ཚལ་། ༼༣ རི་རྨོག་ཆེན་ན་སྐུ་གསུམ་སྟོན་པའི་གནས་རི་རྨོག་ཆེན་རྣམ་རྒྱལ་བྲག་རྫོང་། ༼༤ ཁོ་ཁོ་ན་འཆི་མེད་ཚེ་ལྷའི་གནས་རི་འོག་མིན་རིགས་གསུམ་འཆི་མེད་གྲུབ་པའི་རྫོང་། ༼༥ ཤོག་བཞི་ན་འཇིགས་བྱེད་ཀྱི་གནས་རི་བདེ་ཆེན་དབང་དྲག་རོལ་པའི་རྫོང་། ༼༦ རྫ་ས་དམར་ན་ཨོ་རྒྱན་ཆེན་པོའི་སྒྲུབ་གནས་དཔལ་རི་བདེ་ཆེན་རྫོང་། ༼༧ རྫ་བྲག་མདོ་ན་བདེ་གཤེགས་སྒྲུབ་པ་བཀའ་བརྒྱད་ཀྱི་གནས་རི་བྲག་དམར་བདེ་གཤེགས་འབུམ་རྫོང་། ཨུག་ཚང་ཁོག་ན་དཔལ་རྒ་ལོ་བ་གཞོན་ནུ་དཔལ་གྱི་སྒྲུབ་གནས་དཔལ་རྒྱལ་དབང་ཀརྨ་པ་སྐུ་ཕྲེང་བཅུ་པ་སོགས་ཆེད་མཇལ་དུ་ཕེབས་པའི་སྒྲུབ་ཕུག་རྒ་ལོ་བ། འཁྱིལ་ཆེན་ཁོག་ན་མ་གཤིན་ཕུར་གསུམ་གྱི་གནས་རི་དང་། དཔོན་བླ་དགེ་འདུན་རྒྱ་མཚོའི་སྒྲུབ་གནས་གླག་ཚང་དཔལ་རི་གཉིས་པ་སོགས་ཁྱད་འཕགས་བྱིན་ལྡན་གྱི་སྒྲུབ་གནས་དབེན་རི་དུ་མས་འབྲེལ་ཚད་བདེ་ལ་འགོད་པའོ།། གནས་དེ་དག་ཀྱང་ཡེ་གདོད་མ་ནས་དག་མཉམ་ཆེན་པོ་ལས་མ་འདས་པས་ཆོས་ཉིད་ངོ་བོས་གྲུབ་པ། སྐུ་གསུང་ཐུགས་རྟེན་རང་བྱོན་དང་ཕྱག་ཞབས་ཀྱི་རྗེས་སོགས་བཀྲ་བས་ཆོས་ཅན་རང་བཞིན་གྱིས་གྲུབ་པ། མཐོང་ཐོས་དྲན་རེག་སོགས་འབྲེལ་ཚད་དོན་ལྡན་དུ་བྱེད་པ་ནུས་པའི་མཐུས་གྲུབ་པ། རྒྱལ་དབང་པདྨ་ཡབ་སྲས་སོགས་ཀྱི་བྱིན་གྱིས་བརླབས་པས་གྲུབ་པ་སྟེ་གྲུབ་པ་བཞི་དང་ལྡན་པའི་གནས་འདི་དག་གི་རང་བཞིན་རྒྱས་པར་ཤེས་འདོད་ན་མདོ་ཁམས་གཡུ་ཁོག་ཡུལ་གྱི་གནས་ཡིག་ཕྱོགས་བསྒྲིགས་དགེ་མཚན་བྱེ་བའི་འོད་སྣང་ལ་གཟིགས་པར་འཚལ་ལོ།།

ཡུལ་ལྷ་ཟོ་དོར་ཇི་སྙེད་གནས་ཚུལ་བཤད་པ།

གསུམ་པ་ཡུལ་ལྷ་ཟོ་དོར་ཇི་སྙེད་གནས་ཚུལ་བཤད་པ་ནི། ཡང་གཡུ་ལུང་རིང་མོའི་ཕུ་མདའ་ཉིན་སྲིབ་ལུང་ཕྲན་རྣམས་སུ་རྒྱལ་དབང་པདྨའི་བཀའ་ཉན་དཀར་ཕྱོགས་སྐྱོང་བའི་ཡུལ་ལྷ་ཟོ་དོར་དུ་མ་ཞིག་མཆིས་པ་ཡང་བཤད་པར་བྱ་སྟེ། གཡུ་སྟོད་གངས་ཀྱི་ར་བ་ན་གནམ་སྔོན་མོ་འདེགས་པའི་ཀ་བ། ས་དོག་མོ་མི་འགྱུར་གོང་གནོན་ལ་བོད་ཀྱི་རྩེ་ལྷ་ཆེན་པོ་བཅུའི་ཡ་གྱལ། འཕགས་མཆོག་འཇིག་རྟེན་དབང་ཕྱུག་ཡུལ་ལྷའི་རྣམ་པར་འཕྲུལ་བ། དགེ་བསྙེན་རྡོ་རྗེ་གཡུ་ཁྲོམ། ཡུམ་ཆེན་བག་མ་ཞྭ་མེད་དམ་ལྷ་ལྕམ་དཀར་མོ། གཞན་རྩང་གི་དེའུ་དཀར་མི་མགོན་དཀར་པོའི་སྲིང་མོ་གཡུ་ཁྲོམ་གྱིས་བཙུན་མོར་བསུས་པ་སོགས་གཡུ་ཁྲོམ་ལ་ཡུམ་བཞི། བུ་ཆུང་ལྷ་རྩེ་གཉན་པོ་དང་། དེམ་གྱི་རྨོག་རི་སོགས་སྲས་དགུ། ལྕམ་སྲིང་རྡོ་རྗེ་གཡུ་སྒྲོན་ཞེས་བོད་ཁམས་སྐྱོང་བའི་བརྟན་མ་ཆེན་མོ། གཡུ་ཁྲོམ་ལ་གཡུ་འཁོར་སུམ་བརྒྱ་དྲུག་ཅུ་དང་། གཡུ་སྒྲོན་མ་ལ་སྐུ་འཁོར་འབུམ་གྱིས་བསྐོར་བ། དེ་ཡང་ལྕམ་བླ་འགྱུར་མེད་རྒྱལ་མཚན་གྱིས། འབྲོག་གནས་རྨ་རྒྱལ་སྤོམ་ར་དང་། །མཚོ་སྨན་རྒྱལ་མོ་བཤོས་པའི་སྲས། །ཟིལ་ཕྲོམ་གཡུ་ཕྲོམ་བཞག་བྲ་སོགས། །མཆེད་ཟླ་བདུན་གྱི་འབྲིང་པོ་ཉིད། །དགེ་བསྙེན་རྡོ་རྗེ་གཡུ་ཕྲོམ་རྩལ། །ཞེས་གཡུ་ཁྲོམ་འདི་རྨ་རྒྱལ་སྤོམ་རའི་སྲས་ཡིན་པར་གསུངས། རིག་འཛིན་ལུང་རིག་གླིང་པ་དང་། བསམ་གཏན་ཡེ་ཤེས་གླིང་པ་རྣམ་གཉིས་ཀྱིས་གཡུ་ཁྲོམ་འདི་བོད་སྐྱོང་དགེ་བསྙེན་ཉེར་གཅིག་གི་ཡ་གྱལ་ཡིན་པར་གསུངས་སོ།། དབྱི་སྙིང་དུ་རྡོ་རྗེ་གཡུ་ཁྲོམ་གྱི་བང་མཛོད་གཏེར་གྱི་མངའ་བདག་དགྲ་བླ་མི་མགོན་དཀར་པོ་རྔམ་བརྗིད་ནགས་རི་ཕྱུག་མོར་རྟེན་བཅས་པ། ལབ་ཙེའི་གདོང་དུ་སྔོན་གཡུ་ཁོག་དཔོན་བླས་དབུས་གཙང་ཕྱོགས་ནས་ཁྲིད་ཡོང་བར་གྲགས་པ་ཟླ་ཡི་ཡུལ་ལྷ་གཉན་པོ་སྟག་རྩེའམ་གཡུ་ཤོད་མཐིང་གི་དགེ་བསྙེན་གཡུ་ཁྲབ་ཅན། གནས་ལུང་དུ་གནས་བདག་དབང་བསྡུད་ལྷ་རྩེ། གདུགས་ཆེན་སྟོད་ན་ཡུལ་ལྷ་དཔའ་བོ་སྟག་འཕྲུ། རལ་གྲིའི་ཐང་སྟོད་ཀྱི་དེའུ་ལ་དགྲ་བླ་མི་མགོན་དཀར་པོའི་སྐུ་སྲས་ནོར་བུ་ལྷ་རྩེ། ཐང་སྨད་ཀྱི་བྲག་མཁར་དུ་དགྲ་འདུལ་གཉན་པོ་གཡུ་རྩེ། ར་ཆགས་ཀྱི་ནགས་རི་ལ་ཤྭ་ཁྲ་མིག་དམར་རྡོ་རྗེ་ལྷ་རྩེ། ཆུ་ལུང་མར་མདའི་གདགས་རི་ལ་ཡུལ་ལྷ་གླང་པོ་དམ་བསྟན། འཁྱིལ་ཆེན་མཚོ་ལུང་གི་མཚོ་ལ་མཚོ་སྨན་རྒྱལ་མོ་སོགས་དང་། གཞན་ཡང་གཡུ་མཚོ་ལ་ནོར་རྒྱལ་འཁོར་ལོ། སྒོ་སྲུང་དབང་ཕྱུག་ཡབ་ཡུམ། བྱ་ར་གངས་ཀྱི་སེང་གེ། ཕོ་ཉ་འབྲུག་རི་ལྕགས་རྩེ། རྫ་ལུང་ན་གནོད་སྦྱིན་སྡེ་དཔོན་རྟ་ཁྲ་ཅན། སྒེག་གི་གནས་ན་ཁྱབ་འཇུག་ཟླ་བ་ཐོད་དཀར་དང་། ཀླུ་རྒྱལ་དྲག་པོ་ཟླ་སྐྱོང་། ཨ་སེན་ན་རི་བཙན་ལྷ་མོ། ཆུ་ལུང་མདོའི་ཕར་ངོས་སུ་རྡོ་རྗེ་དྲག་མོ། ངེས་ལེགས་རྒྱབ་ཕྱོགས་སུ་སྐུ་བླ་དུང་རྩེ། དེའི་གཡས་ཕྱོགས་ན་གསེས་མཁར་བདུད་བཙན། གཡོན་ཕྱོགས་ན་གཉན་སྲས་གཟི་བརྗིད་མཆོག་ལྡན་སྟེ་དུང་རྩེ་མཆེད་གསུམ། ངེས་ལེགས་ན་པདྨ་དྲེགས་འདུལ། ཆུ་མིག་ལ་ཀླུ་རྒྱལ་ཝ་རུ་ཎ། རྫ་རི་ན་ལྷ་རྒོད་དགྲ་འདུལ། ལྡོང་རིའི་གནས་ན་མགོན་པོ་ལེགས་ལྡན། འཁྱིལ་ཆེན་སྟོད་ན་ཡུལ་ལྷའི་གཙོ་བོ་རྟ་ཤར་རྨོག་མཐོ། སྲས་བྲག་དཀར་རྡོ་རྗེ་ཞལ་དཀར། ལ་རྩ་ན་ཀླུ་མོ་དུང་མཚོ། ཆུ་དཀར་སྟོད་ན་གཉན་སྲས་གཡུང་དྲུང་ལྷ་རྩེ། མདའ་ན་འབྲི་བོམ་ནས་དེའུ་ཕྱུག་མོ། ཆུ་ངན་ན་བང་ང་སྨུག་རིལ། ཧ་ཧི་ན་བཀའ་བློན་སེང་གེ་གནམ་རྫོང་། ཤོག་ཤོག་ན་གནོད་སྦྱིན་དྲག་པོ་རབ་འབར་རམ་ཟངས་ཁྲབ་དམར་པོ། སྨར་ན་མཛོ་ཞོན། ཤོ་རྡེའུ་ན་སྟག་ཞོན། ནགས་ལུང་ན་གནོད་སྦྱིན་བཀྲ་ཤིས་ལྷ་རྩེ། སྐུ་དབེན་ན་ཀླུ་སྨན་ལྕམ་དྲལ། དགའ་མ་གདོང་ན་སྨན་བཙུན་དུང་ལྕམ་དཀར་མོ། རི་བྲོ་ན་རྨོག་མཐོ་རྩེ་རྒྱལ། ཇུ་སྟོད་ན་ཙིག་ཙིག་སྤུན་གསུམ་དང་། ལྕམ་སྲིང་བཀྲ་ཤིས་འོད་ལྡན། ནུ་རྐེད་ན་བྲེང་ངེ་གཡག་ཕྱུག་གཡུང་དྲུང་ལྷ་རྩེའམ་ཡུལ་ལྷ་དབང་བསྡུད་དཔའ་བོ།། དབྱི་འ་ན་བ་དཀར་ཕྱུག་མོ། རྒྱ་འུ་ཡར་གདོང་ན་ར་མ་བྱ་ཁྱུང་། མར་གདོང་ན་རུས་སྦལ་ཟིལ་ཁྲོམ་སྟེ་སྲིད་པའི་བ་སྦལ་ཁྱུང་གསུམ། སྤ་ལུང་ན་ར་མ་གྱོ་བཙན་ཕྲིན་ལས་དབང་ལྡན་རྩལ། རྦེས་ལུང་ན་ལྷ་རྗེ་གཙུག་ཏོར། རྒ་ནུབ་ན་གཡུ་རོང་རྙི་བོ་སྤུན་གསུམ་གྱི་དགྱེས་ཡུམ་མཚོ་སྨན་སྤུན་གསུམ། རྒྱས་ཟི་ན་ར་མཁར་རྡོ་རྗེ་རྩེ་རྒྱལ། ཤ་དུང་ན་སྐུ་བླ་ཉྭ་དཀར་དང་ཉྭ་ལྕམ་དུང་སྐྱོང་དཀར་མོ། ཉུག་སར་ན་མངའ་རིས་ཙན་ཏན་སྡོང་པོའམ་ལྷ་མགོན་རྡོ་རྗེ་འོད་འབར། ཆུ་དབར་ཏཱ་རེའི་གནས་སུ་ཡུལ་ལྷ་སྤྲིན་དབང་འོད་ཕྲོམ། སྲིབ་རི་ན་རི་རྒྱལ་འཕན་ཕྱུག དགོད་བྲོ་ན་བོམ་ར་བསྟན་འཛིན་རྒྱལ་མཚན། མཚོ་ལུང་ན་གཡུང་དྲུང་དུང་རྩེ། མཁན་ལུང་ན་དཔའ་མོ་གཡུ་སྒྲོན་ཐོད་དཀར། ཕྱག་ཆེན་ན་རྫ་རི་དུང་ཕྲེང་། སུམ་མདོ་ན་ཀླུ་མོ་དུང་མཚོ། སིས་བྲོ་ན་རྫ་ཁྲ་བཀྲ་ཤིས་ལྷ་རྩེ། མཚོ་ནག་ན་ཀླུ་སྨན་རྡོ་རྗེ་དྲག་མོ། ས་དམར་སྟོད་ན་ཁྱུང་རི་ས་འཛིན་རྒྱལ་པོ། ཚ་རི་ན་འདོད་འཇོའི་བ་དཀར། སྦལ་རི་ན་སྲིད་པའི་རུས་སྦལ་ཏེ་བ་སྦལ་ཁྱུང་གསུམ། གནས་སར་ན་ཉིན་གྱི་བཙན་རྒོད་མཆེད་གསུམ་སྟེ་ལྷ་བཙན་དབང་ཆེན་མཆོག་གྲུབ། ལྷ་དབང་རྡོ་རྗེ་དགའ་བ། གཉན་རྗེ་ཕྲིན་ལས་ཐོགས་མེད་གསུམ། རི་ཧེ་ན་དུང་ཕྲེང་ཕྱུག་མོ། མཚོ་ཆུང་ན་བདེ་སྟེར་གཡུ་ཡི་མཚོ་མོ། བཙན་ཁང་ན་རྒྱལ་བ་གློག་ཕྲེང་། རི་རྨོག་ཆེན་ན་གནས་སྲུང་ནོར་བུ་བསམ་འཕེལ། གཡུ་འབྲུག་ཆེ་ན་འབྲུག་གོང་ཁྱེའུ་སྟག་ཐུལ། གཡུ་སྨད་རྡོ་སྟོད་ན་གཡུ་ལུང་ས་ཡི་རྟེན་ཕུར་རྔམ་བརྗིད་རྫ་བྲག་མཐོན་པོ་ལ་རྟེན་གནས་མཛད་པའི་ཡུལ་ལྷ་དངུལ་རྫི་རྡོ་རྗེ་དབང་བསྡུད་རྩལ། རྨ་ལུང་ན་ལྷ་བཙན་གཞོན་ནུ་འོད་འབར། ཉིན་ཡག་ན་སྒོ་སྲུང་བྲག་དཀར་གཉན་པོ་དང་དཀར་ལིང་མཚོ་སྨན། ཁོ་ཁོ་ན་རི་ཕྱུག་མགོན་གཡུ་རྩེ་དང་། གནས་བདག་ཀླུ་མོ་དུང་སྐྱོང་། འོ་བཟིའི་ཕྱོགས་སུ་རྡོ་རྗེ་གཡུ་ཁྲོམ་གྱི་ནུ་བོར་གྲགས་པ་ར་ཁང་རྡོ་རྗེ་དབང་བསྡུད་འབར་བ་ལ་སོགས་པ་ཡུལ་ལྷ་གཉན་པོ་གནས་འཆའ་བའི་ལྷ་རི་དང་། རྫ་བྲག གཡུ་མཚོ་དང་ཆུ་མིག་རྣམས་བཀྲག་མདངས་དང་ལྡན་པར་བརྗིད་ཆགས་པའོ།།

དམ་པའི་སྐྱེས་ཆེན་དུ་མས་ཞབས་ཀྱིས་བཅགས་ཤིང་བྱིན་གྱིས་བརླབས་ཚུལ།

བཞི་པ་དམ་པའི་སྐྱེས་ཆེན་དུ་མས་ཞབས་ཀྱིས་བཅགས་ཤིང་བྱིན་གྱིས་བརླབས་ཚུལ་ནི། དེ་ཡང་དུས་རབས་བདུན་པའི་ནང་བློན་ཆེན་མགར་སྟོང་བཙན་དང་། ལྷ་གཅིག་རྒྱ་བཟའ་ཀོང་ཇོ་སོགས་ཀྱིས་ཇོ་བོ་ཤཱཀྱ་མུ་ནེ་ཡུལ་དབུས་སུ་གདན་འདྲེན་སྐབས་མདོ་ཁམས་གཡུ་ཁོག་གི་ཡུལ་འདི་བརྒྱུད་ནས་ཕེབས་ཚུལ་འོག་ཏུ་འགོད་ལ། དུས་རབས་བརྒྱད་པའི་ནང་དུ་རྒྱལ་དབང་ཨོ་རྒྱན་ཆེན་པོ་དང་། མཁའ་འགྲོ་ཡེ་ཤེས་མཚོ་རྒྱལ། ལོ་ཆེན་བཻ་རོ་ཙ་ན། རྒྱལ་མོ་གཡུ་སྒྲ་སྙིང་པོ། ལྷ་ལུང་དཔལ་གྱི་རྡོ་རྗེ་སོགས་གྲུབ་བརྙེས་དུ་མ་དངོས་དང་རྫུ་འཕྲུལ་གྱིས་ཕེབས་ནས་ལྷ་སྲིན་སྡེ་བརྒྱད་གདུག་པ་ཅན་རྣམས་དམ་ལ་བཏགས། སྒྲུབ་གནས་བྱིན་དབབ་དང་ཆོས་ནོར་གྱི་གཏེར་ཁ་སྦས་ཚུལ་ནི། བདུད་འཇོམས་གླིང་པའི་གཏེར་བྱོན་ཨོ་རྒྱན་རྣམ་ཐར་མཐོང་བ་རང་གྲོལ་ལས། དེ་ནས་རྡོ་རྗེ་གཡུ་ཁྲོམ་དུ༔ གཡུ་ཁྲོམ་འབྲུག་ཞོན་དམ་ལ་བཏགས༔ ཞག་གསུམ་སྒྲུབ་པ་མཛད་ཅིང་བཞུགས༔ ཞེས་དང་། ལོ་ཆེན་བཻ་རོས་མཛད་པའི་གནས་ལུང་གནས་ཡིག་ཏུ། སྤྲེལ་ལོ་སྤྲེལ་གྱི་ཟླ་བའི་བཅོ་ལྔའི་ཉིན༔ རྒྱལ་བའི་དབང་པོ་པདྨ་ཀཱ་ར་དང་༔ བི་མ་མི་ཏྲ་བྷོ་དྷི་ས་ཏྭ་རྗེ༔ ལོ་པན་བཻ་རོ་མཁའ་འགྲོ་མཚོ་རྒྱལ་སོགས༔ རྒྱ་བོད་རིག་འཛིན་གྲུབ་ཐོབ་རྒྱ་མཚོའི་ཚོགས༔ གནས་འདིར་རྫུ་འཕྲུལ་ཤུགས་ཀྱིས་བྱོན་ནས་སུ༔ རྩ་བ་གསུམ་གྱི་དཀྱིལ་འཁོར་ཞལ་ཕྱེས་ཚེ༔ ཕྱོགས་བཅུར་བཞུགས་པའི་སངས་རྒྱས་བྱང་སེམས་དང༔ བླ་མ་རིག་འཛིན་ཡི་དམ་ཞི་ཁྲོའི་ལྷ༔ མ་སྲིང་མཁའ་འགྲོ་དམ་ཅན་ཆོས་སྐྱོང་བཅས༔ སྤྲིན་ལྟར་གཏིབས་ནས་བྱིན་རླབས་ཆར་བཞིན་ཕབ༔ ཞེས་སོགས་གསུངས་པ་ལྟར་དང་། ལྷ་ལུང་དཔལ་གྱི་རྡོ་རྗེའམ་མཚན་གཞན་དཔལ་རྒ་ལོ་པ་གནས་འདིར་ཕེབས་ནས་གསང་ཆེན་རྡོ་རྗེའི་བྲག་རྫོང་སྟེ་ས་མུ་ངོས་ཞེས་པའི་གནས་དབུས་ལྷ་ལུང་ཕུག་ཏུ་ཞག་བདུན་དུ་སྒྲུབ་པ་མཛད་པ་སོགས་ཀྱི་སྐབས་མི་དང་མི་མིན་དུ་མ་ལ་དམ་པ་ཆོས་ཀྱི་བགོ་སྐལ་འགྱེད། དེ་ཡང་དཔལ་རྒ་ལོ་པ་འདི་ལྷ་ལུང་དཔལ་རྡོར་གྱི་མཚན་གྱི་རྣམ་གྲངས་ཡིན་པ་སྔོན་གྱི་ངག་རྒྱུན་ལ་ཡོད་པ་དང་། ཁྱད་པར་གསང་ཆེན་རྡོ་རྗེའི་བྲག་རྫོང་གི་གནས་ཡིག་ཏུ། རྒ་ལོ་པ་ཞེས་ལྷ་ལུང་དཔལ་རྡོར་བྱོན། །གནས་དབུས་ལྷ་ལུང་ཕུག་ཏུ་ཞག་བདུན་བཞུགས། གསུངས་པ་ལྟར་བྱས་སོ།། རབ་བྱུང་དང་པོའི་ནང་གླིང་གེ་སར་རྒྱལ་པོ་སྐུ་འཁོར་གྱིས་ཞབས་ཀྱིས་བཅགས། རབ་བྱུང་གཉིས་པའི་ནང་དཔལ་རྒ་ལོ་པ་གཞོན་ནུ་དཔལ་གཡུ་ཁོག་གི་ཡུལ་འདིར་བྱོན་ནས་ཨུག་ཚང་དབེན་རིར་སྒྲུབ་པ་མཛད་པས་དེང་དུས་ས་མིང་ལ་རྒ་ལོ་བ་ཐོགས་པ་དང་། གཞི་བདག་རྡོ་རྗེ་གཡུ་ཁྲོམ་ལ་དགེ་བསྙེན་གྱི་སྡོམ་པ་གནང་བར་བསང་མཆོད་རྣམས་སུ་གསལ་ཏེ། ཕྱི་མའི་དོན་དུ་ཆོས་ལ་སེམས། །གྲུབ་ཐོབ་སྐྱེས་བུ་རྒ་ལོ་བྱོན། །དེ་ལ་དགེ་བསྙེན་སྡོམ་པ་ཞུས། །སྤྱི་བོའི་གཙུག་ཏུ་རྡོ་རྗེ་བཞག །མཚན་ལ་རྡོ་རྗེ་གཡུ་ཁྲོམ་བཏགས། །ཞེས་སོགས་གསུངས་སོ། །རབ་བྱུང་དྲུག་པའི་ས་ཕག་༼༡༣༥༩༽ལོར་ཀརྨ་པ་སྐུ་ཕྲེང་བཞི་པ་རོལ་པའི་རྡོ་རྗེ་གཡུ་ཁོག་ཏུ་ཕེབས་ནས་དད་ལྡན་མང་ཚོགས་ལ་ཟབ་རྒྱས་ཀྱི་ཆོས་འཁོར་བསྐོར། རབ་བྱུང་བདུན་པའི་ནང་མི་ཉག་མཁས་དབང་འཇམ་དབྱངས་གྲགས་པ་ཆོས་ཁྲིའི་ཐང་དུ་ཕེབས་ནས་ཕྱོགས་ཀྱི་དད་ལྡན་རྣམས་ལ་ཆོས་བཀའ་བསྩལ་ཞིང་ཀརྨ་པ་རོལ་པའི་རྡོ་རྗེའི་ཆོས་ཁྲི་ཞིག་གསོ་མཛད་ཅིང་གཡུའི་ཆོས་ཁྲི་ཐང་ཞེས་ས་མིང་བཏགས། ཚུལ་དེ་དག་ནི་འཇམ་དབྱངས་གྲགས་པའི་རང་རྣམ་དུ། དེ་ནས་སྟ་བུ། ཚ་འབྲང་། རྒྱལ་མོ་རོང་༼རྟའུ། ཚ་འཕྲང་། རྒྱལ་མོ་རོང་༽གསུམ་གྱི་དབུས་རྡོ་རྗེ་གཡུ་ཁྲོམ་གྱི་ཞོལ། ཆོས་ཀྱི་རྗེ་རོལ་པའི་རྡོ་རྗེའི་ཆོས་ཁྲིའི་སར། ཕྱོགས་ཀྱི་མི་སྡེ་ཚན་ཆེ་བ་ཆོས་བསྐུལ་གསུང་རབས་ཀྱི་རབ་གནས། ཆོས་ཁྲི་ཞིག་གསོ་སོགས་བྱས། ཞེས་གསུངས། རབ་བྱུང་བཅུ་པའི་ནང་མི་ཉག་གྲུབ་ཆེན་ཨ་ར་ཆོས་རྗེ་ཉི་མ་རྒྱལ་མཚན་ཕེབས་ཤིང་ཡོལ་རི་ནས་སྒྲུབ་པ་མཛད། རབ་བྱུང་བཅུ་གཅིག་པའི་ནང་རྒྱལ་དབང་ཀརྨ་པ་སྐུ་ཕྲེང་བཅུ་པ་ཆོས་དབྱིངས་རྡོ་རྗེ། རིམ་གྲོ་པ་ཀུན་ཏུ་བཟང་པོ། ཞྭ་དམར་བདུན་པ་ཡེ་ཤེས་སྙིང་པོ་བཅས་ཕེབས་ནས་སྒྲུབ་པ་ཉམས་བཞེས་མཛད། ཀརྨ་པས་གཡུ་དགོན་བོན་ལུགས་ཡིན་པ་བཀའ་བརྒྱུད་པར་བསྒྱུར་བ་སོགས་མཛད། རབ་བྱུང་བཅུ་གསུམ་པའི་ནང་སི་ཏུ་པཎ་ཆེན་ཆོས་ཀྱི་འབྱུང་གནས་ཀྱིས་གཡུའི་ཆོས་ཁྲི་ཐང་ནས་ཆོས་འཁོར་བསྐོར། རབ་བྱུང་བཅུ་བཞི་པའི་ནང་རྫོགས་ཆེན་མཁན་ཆེན་པདྨ་བཛྲ་ཡུལ་འདིར་ཕེབས་པར་མ་ཟད་ཕྱག་འཁར་ས་ལ་བཙུགས་པ་ཤིང་ལྗོན་པར་གྱུར་པ་དེང་སྐབས་ཀྱང་མཇལ་དུ་ཡོད། རབ་བྱུང་བཅུ་བཞི་པའི་ལྕགས་སྦྲུལ་༼༡༨༢༡༽ལོར་ཁྱུང་ལུང་རས་པ་དམ་ཚིག་རྡོ་རྗེ་ཕེབས་ནས་གཡུ་དགོན་བསྐྱར་བཞེངས་ཀྱི་ས་འདུལ་སོགས་མཛད། ཤིང་ལུག་༼༡༨༣༥༽ལོར་རྒྱལ་སྲས་གཞན་ཕན་མཐའ་ཡས་ཀྱིས་གཡུ་དགོན་རྫོགས་ཆེན་པའི་ཆོས་བརྒྱུད་དུ་བསྒྱུར། མདོ་མཁྱེན་བརྩེ་ཡེ་ཤེས་རྡོ་རྗེ་ལན་གྲངས་དུ་མར་ཕེབས་ནས་འདུས་པའི་སྡེར་ཆོས་བཀའ་དུ་མ་གནང་བར་མ་ཟད་གཡུ་ཁོག་རྒྱ་སྤྲུལ་ལུང་རིག་གླིང་པ་བྱིན་གྱིས་བརླབས་པའི་སྲས་སུ་བསྐྲུན། རྒྱལ་འཕགས་ཀུ་ལུ་ཀུན་བཟང་གིས་གཡུ་ཁྲོམ་གངས་ཀྱི་རི་ལ་སྒྲུབ་པ་མཛད། རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོས་གཡུའི་ཆོས་ཁྲི་ཐང་སོགས་སུ་ཆོས་འཁོར་བསྐོར། གཞན་ཡང་ས་སྐྱའི་རྗེ་བཙུན་མ་སྐལ་བཟང་ཆོས་ཀྱི་སྒྲོལ་མ། རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེ། མཁན་ཆེན་ཐུབ་བསྟན་སྙན་གྲགས། ཡབ་རྗེ་ངག་དབང་ནོར་བུ། མ་ཎི་བླ་མ་པདྨ་སིདྡྷི། རྫོགས་ཆེན་མཁན་པོ་འོད་ལུ། རྫོགས་ཆེན་མཁན་པོ་ཆོས་ཚ། གཟན་དཀར་རིན་པོ་ཆེ་པདྨ་དངོས་གྲུབ་རོལ་པའི་རྡོ་རྗེ། མདོ་མང་གཏེར་ཆེན་རྡོ་རྗེ་བདེ་ཆེན་གླིང་པ། སྒོ་འཛི་གཏེར་སྟོན་ཡེ་ཤེས་འབྱུང་གནས། འཁོར་གདོང་བླ་མ་མགོན་པོ་དབང་རྒྱལ། རྡོ་གྲུབ་ཆེན་ཐུབ་བསྟན་ཕྲིན་ལས་དཔལ་བཟང་། གྲུབ་ཆེན་གླིང་སྤྲུལ་སོགས་དང་། ཕྱིས་རྒྱལ་བསྟན་ཡང་དར་གྱི་སྐབས་སུ་ཡང་། ཆོས་རྗེ་འཇིགས་མེད་ཕུན་ཚོགས། ཁྱབ་བདག་པདྨ་སྐལ་བཟང་སོགས་མཁས་དང་གྲུབ་པའི་དབང་ཕྱུག དམ་པའི་ཚུལ་དགུའི་བདག་ཉིད། འབྲེལ་ཚད་དོན་དང་ལྡན་པའི་སྐྱེས་ཆེན་གསེར་རིའི་ཕྲེང་བ་ལྟ་བུ་དུ་མས་ཞབས་ཀྱིས་བཅགས་ཤིང་། ཟབ་རྒྱས་སྨིན་གྲོལ་ཆོས་ཀྱི་འཁོར་ལོ་རྒྱ་ཆེན་པོ་བསྐོར་ཞིང་དགོན་གནས་ཡུལ་གྲུ་ཀུན་དུ་བྱིན་རླབས་ཀྱི་ཉི་འོད་བསྐྱིལ་བར་མཛད་དོ།།

གནས་ཆེན་རྒྱལ་མོ་རོང་གི་སྟོད་ཀྱི་ཕྱོགས། །མི་ཉག་ར་བ་སྒང་གི་དཀྱིལ་ཤོད་ན། །འཛམ་གླིང་ས་ཡི་དྭངས་རྩེ་གཡུ་ཡི་མཁར། །བདེ་སྐྱིད་ཀུན་འཛོམས་ལྷ་ཡི་གནས་མཆོག་ཡོད། །དེར་ནི་སྙིང་སྟོབས་ལྡན་པའི་དཔའ་རྒོད་འབུམ། །སྡང་དགྲའི་གྲོང་ཁྱེར་འཇོམ་ལ་ཟླ་མེད་པས། །སྟག་མོ་འཕྲེད་ཉལ་སྨར་གྱི་ལག་བཟང་ཞེས། །གནའ་བོའི་ངག་སྒྲོས་འཛིན་མའི་ཁྱོན་ན་སྙན། །སྟོད་ན་ཡུལ་ལྷ་རྡོ་རྗེ་གཡུ་ཁྲོམ་ཆེ། །ཁ་བའི་རྡུལ་མང་བརྩེགས་པའི་ཀཻ་ལ་ཤ། །འཇའ་སྤྲིན་སྣ་ལྔས་མགུལ་བ་མཛེས་བྱས་པའི། །དབུ་རྩེ་སྔོ་བསང་བུ་མོའི་ལྟོ་བའི་རྒྱན། །བར་ན་གཡུ་ཐང་རང་བྱུང་མཛེས་ལྗོངས་སུ། །ལྷན་སྐྱེས་དྲི་ཞིམ་སྤྲོ་བའི་སྨན་སྣ་དང་། །དཀར་དམར་མེ་ཏོག་བཀྲ་བའི་འཛུམ་དཀར་གྱིས། །ཡིད་མཐུན་ར་ཡིག་གཉིས་པ་གྲོགས་སུ་འགུགས། །མཚམས་སུ་རྫ་སྤང་ནགས་ཚལ་ལྷུན་ཆགས་ཤིང་། །རི་སྐྱེས་སྤུ་སྡུག་སྣ་ཚོགས་བག་ཡངས་རྒྱུ། །མ་རྨོས་མ་བཏབ་ལྗོན་པའི་ཡལ་ག་ན། །རོ་མཆོག་བརྒྱ་ལྡན་འབྲས་བཟང་གཡུར་དུ་ཟ། །དཀར་ཡག་གངས་ཀྱི་རི་ནས་ལེགས་འོང་བའི། །དྭངས་བསིལ་དལ་འབབ་གཡུ་ཆུ་སྔོན་མོའི་རྒྱུན། །འབྲི་ཆུའི་ལང་ཚོར་འགྲོག་པའི་སྒེག་ཉམས་ཀྱིས། །མཐའ་བྲལ་མཐའ་ཡི་རྒྱ་མཚོར་སིམ་པ་སྟེར། །གནས་དེར་ནམ་ཟླ་དུས་བཞིའི་རྣམ་འགྱུར་གསལ། །སྐྱེ་འགྲོའི་སྲོག་ལ་འཚེ་བའི་གདུག་ཅན་ཉུང་། །འབྲེལ་ཚད་བདེ་ལ་འགོད་པའི་གནས་ཆེན་མང་། །ཕྱོགས་མཚམས་ཟོ་དོར་འབུམ་གྱིས་དུས་ཀུན་སྲུང་། །འཆི་མེད་མཚོ་འཁྲུངས་མ་ཧཱ་གུ་རུ་དང་། །གྲུབ་པའི་སྐྱེས་བུ་ཡེ་ཤེས་རྡོ་རྗེ་སོགས། །ལྷ་ཡི་ཡང་ལྷར་གྱུར་པ་གྲངས་མེད་ཀྱིས། །ཞབས་ཀྱིས་བཅགས་ཤིང་བྱིན་གྱིས་བརླབས་ཚུལ་སྙན། །གནས་དེར་ཤེས་རྒྱ་ཅན་གྱི་ཕ་ཁུ་དང་། །ལག་ལས་ཅན་གྱི་མ་སྲུ་མཛངས་མ་མང་། །གནས་དེ་ཡ་རབས་སྐྱེ་བོའི་གྲོང་ཁྱེར་དང་། །རྟ་ནོར་རྐང་བཞི་ཕྱུགས་ཀྱི་ཕ་ས་ལགས། །གནས་དེར་ཤ་མར་ཐུད་ཀྱི་རི་བོ་སྤུང་། །གནས་དེར་ཇ་ཆང་འོ་ཞོའི་རྒྱ་མཚོ་འཁྱིལ། །གནས་དེར་འབྲུ་རིགས་སྣ་ལྔའི་གཏེར་ཁ་རྡོལ། །གནས་དེར་དགའ་སྐྱིད་དགོད་སྒྲ་རྒྱུན་མི་འཆད། །གནས་དེ་ཆོས་སྲིད་བསྟན་པ་དར་བའི་ལྗོངས། །ཕ་མེས་སྲོལ་རྒྱུན་བཟང་པོ་སྐྱོང་བའི་ཡུལ། །གངས་རིའི་རང་སྐད་གཙང་མ་བཤད་པའི་གནས། །འདོད་དགུའི་འབྱོར་བས་ཀུན་ནས་ཕྱུག་པའི་གླིང་། །བདེ་སྐྱིད་དཔལ་གྱིས་མཛེས་པས་དག་པའི་ཞིང་། །སྣ་བརྒྱའི་མེ་ཏོག་བཀྲ་བས་ལྷ་ཡི་ཚལ། །སྟོབས་འབྱོར་མངའ་ཐང་རྒྱས་པས་ཀླུ་ཡི་གྲོང་། །གཡུ་མཁར་བདེ་སྐྱིད་ནོར་བུའི་ར་བར་གྲགས། །བར་སྐབས་ཀྱི་ཚིགས་སུ་བཅད་པའོ། །