ལམ་གྱི་དབྱེ་བ།
གཉིས་པ་ལམ་གྱི་དབྱེ་བ་ལ་བཞི་སྟེ། དབྱེ་བའི་གཞི་དང་། དབྱེ་བའི་དོན་དང་། གྲངས་ངེས་པ་དང་། མིང་གི་དོན་ཏོ། །དང་པོ་ནི་གཞུང་ལུགས་ཀྱི་དབང་དུ་བྱས་པ་དང་། ལམ་དང་འབྲས་བུའི་དབང་དུ་བྱས་པ་གཉིས་ཀའི་སྒོ་ནས་ཐེག་པ་ཆེན་པོ་སྟེ་གོང་དུ་བཤད་པ་ཉིད་དོ། །དེ་ནི་དབྱེ་བའི་གཞིའོ། །༼གཉི༷ས་པ༷་༽དེ་ལ་དབྱེ་ན་གཉིས་ཏེ། ཕ་རོལ་ཏུ་ཕྱིན་པའི་ཐེག་པ་ཆེན་པོ་དང་། གསང་སྔགས་ཀྱི་ཐེག་པ་ཆེན་པོའོ། །དེའང་ཁྱད་པར་བཞི་དང་མི་ལྡན་པའི་ཐེག་པ་ཆེན་པོ་རྣམས་ལ་ཕ་རོལ་ཏུ་ཕྱིན་པའི་ཐེག་པ་ཞེས་བྱ་ལ། ཁྱད་པར་བཞིས་འཕགས་པ་རྣམས་ལ་གསང་སྔགས་ཀྱི་ཐེག་པ་ཞེས་བྱའོ། །ལམ་འདི་གཉིས་ཀྱང་ཕན་ཚུན་སྤངས་ཤིང་མི་མཐུན་པའི་དབྱེ་བ་ནི་མ་ཡིན་ཏེ། སྤྱི་དང་བྱེ་བྲག་གི་དབྱེ་བའམ་ཁྱད་པར་དུ་འཕགས་པ་དང་མ་འཕགས་པའི་དབྱེ་བ་ཡིན་ནོ། །དེ་ལ་སྤྱི་ནི་ཕ་རོལ་ཏུ་ཕྱིན་པའི་ཐེག་པ་སྟེ་གཉིས་ཀའི་ལམ་ཐུན་མོང་དུ་གྱུར་པའི་ཕྱིར་རོ། །བྱེ་བྲག་ནི་རྡོ་རྗེ་ཐེག་པ་སྟེ་དེ་དག་ལ་མ་གྲགས་པའི་ཟབ་པ་དང་རྒྱ་ཆེ་བས་ཁྱད་པར་དུ་འཕགས་པའི་ཕྱིར་རོ། །དེ་གཉིས་ཀྱི་ཁྱད་པར་རྒྱས་པར་འོག་ནས་འཆད་དོ། །དབྱེ་བའི་དོན་ཏོ། །གསུམ་པ་དེ་ལྟར་གཉིས་སུ་གྲངས་ངེས་པ་ལ་གཉིས། ལམ་གཉིས་སུ་ངེས་པ་དང་། འབྲས་བུ་གཉིས་སུ་ངེས་པའོ། །དེ་རེ་རེ་ལའང་རིགས་པའི་སྒོ་ནས་དང་། ལུང་གི་སྒོ་ནས་སོ། །དེ་ལ་དང་པོ་ལམ་གཉིས་སུ་གྲངས་ངེས་པའི་གཏན་ཚིགས་ནི་སྤྱིར་ཆོས་ཐམས་ཅད་གདུལ་བྱ་རྟེན་གྱི་གང་ཟག་གི་ཕྱིར་གསུངས་པ་ཡིན་པས། གདུལ་བྱ་ལ་རིགས་གཉིས་ཏེ། སྤྱིར་ཡང་ཉོན་མོངས་པ་ཆུང་ལ་ཁྱད་པར་དུ་འདོད་པ་ལ་གདུང་བ་ཆུང་ཞིང་དེ་སྤངས་པས་བྱང་ཆུབ་འདོད་པ་དབང་པོ་རྟུལ་བ་ལ་དགོངས་ནས་ཕ་རོལ་ཏུ་ཕྱིན་པའི་ཐེག་པ་གསུངས་ལ། གང་ཟག་ཁ་ཅིག་སྤྱིར་ཡང་ཉོན་མོངས་པ་ཆེ་ལ་ཁྱད་པར་དུ་འདོད་པ་ལ་གདུང་བ་ཆེ་བས་དེ་སྤང་བར་ནི་མི་ནུས་ལ། བླ་ན་མེད་པའི་བྱང་ཆུབ་ཀྱང་འདོད་པ་དབང་པོ་རྣོ་བ་ལ་དགོངས་ནས་གསང་སྔགས་ཀྱི་ཐེག་པ་གསུངས་སོ། །དེ་ལྟར་ཉོན་མོངས་པ་ཤས་ཆེ་བ་ལ་གསང་སྔགས་གསུངས་ན། ཉོན་མོངས་པ་ཤས་ཆེ་བ་དེ་དམན་པ་ཡིན་པས་གསང་སྔགས་ཀྱང་ཁྱད་པར་དུ་མ་འཕགས་པར་མི་འགྱུར་རམ་ཞེ་ན། ཉོན་མོངས་པ་ཆེ་བས་གང་ཟག་དམན་པར་མི་འགྱུར་ཏེ། གཉེན་པོ་བསྟེན་མི་ནུས་པ་དམན་པ་ཡིན་ནོ། །ཡང་ཉོན་མོངས་པ་ཤས་ཆེ་བ་ཉིད་འཇོམས་པའི་ཕྱིར་ཡང་ཐབས་ཆེ་བ་ཡིན་ཏེ། ྈམདོ་སྡེ་རྒྱན་ལས། ྈ༼ཐེ༷ག་བསྡུས༷་ལ༷ས། ༽ཐབས་ཆེན་དག་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །འཁོར་བ་ཞི་བའི་བདག་ཉིད་པས། །དེ་ཕྱིར་རྒྱལ་སྲས་བསམ་མི་ཁྱབ་འོག་མ་ལ་གབ་པ་གོང་མས་འབྱིན་པའི་ཚུལ་གྱིས་བཀྲལ་ན་འདི་གསང་སྔགས་སུ་འགྲེལ་རུང་གསུང་ངོ་། །ཅེས་གསུངས་པ་ལྟ་བུ་སྟེ། དཔེར་ན་གཉེན་པོ་མེ་ཆུང་བ་ལས་མེད་ན། སྤང་བྱ་བུད་ཤིང་ཆེན་པོ་བསྟེན་པར་མི་ནུས་ལ། གཉེན་པོ་མེ་ཆེ་ན་སྤང་བྱ་བུད་ཤིང་ཆེ་བ་ཉིད་མེ་འབར་བའི་གྲོགས་སུ་འགྱུར་བ་བཞིན་ནོ། །གལ་ཏེ་འོ་ན་ཕ་རོལ་ཏུ་ཕྱིན་པ་དང་གསང་སྔགས་གཉིས་ཀ་ལ་གང་ཟག་ཉོན་མོངས་པ་ཆེ་འབྲིང་གསུམ་ཀའི་ཐབས་ཡོད་ན། སོ་སོར་ངེས་པས་ཅི་བྱ་སྙམ་ན། སོ་སོ་ཉིད་ལ་ཡང་དབྱེ་བ་ཡོད་པ་འགལ་བ་མ་ཡིན་ནོ། །དེ་ལྟར་ན་གང་ཟག་གཉིས་སུ་ངེས་པས་ལམ་ཡང་གཉིས་སུ་ངེས་པ་ཡིན་ནོ། །གཉིས་པ་ལུང་གིས་བསྒྲུབ་པ་ནི། བཅོམ་ལྡན་འདས་ཀྱིས་ཡང་དག་པར་སྦྱོར་བ་ལས་གསུངས་པ། ཐེག་པ་ཆེན་པོ་འདི་ནི་ཐེག་པ་ཆེན་པོ་སྟེ་བྱང་ཆུབ་སེམས་དཔའི་ལམ་འབྲས་བུ་དང་བཅས་པའོ། །དེ་བས་ན་ཆེན་པོ་རྣམ་པ་བདུན་དུ་སྦྱོར་བའི་ཕྱིར་ཕ་རོལ་ཏུ་ཕྱིན་པའི་མདོ་དག་ཏུ་གྲུབ་བོ། །དེ་བས་ཆེས་ཁྱད་པར་དུ་འཕགས་པའི་རྡོ་རྗེའི་ཐེག་པ་འདི་ནི་སྐྱེ་བ་འདིར་སངས་རྒྱས་ལ་སོགས་པ་འགྲུབ་པར་བྱེད་པས་ན་དེའི་ཡོན་ཏན་དམ་པར་གྱུར་པའོ། །ཞེས་གསུངས་སོ། །སློབ་དཔོན་སངས་རྒྱས་གསང་བས་ཀྱང་། རང་དང་གཞན་གྱི་དོན་ཕུན་སུམ་ཚོགས་པ་ཉིད་གསང་སྔགས་ཀྱི་སྤྱོད་པ་སྟོན་པར་བྱེད་པ་དང་། ཕ་རོལ་ཏུ་ཕྱིན་པའི་སྤྱོད་པ་སྟོན་པར་བྱེད་པའི་མདོ་སྡེ་རྣམས་ཀྱིས་བསྟན་ཏོ། །ཞེས་རྣམ་སྣང་མངོན་པར་བྱང་ཆུབ་པའི་དོན་བསྡུས་པ་ལས་གསུངས་སོ། །སྤྱི་དོན་གཉིས་པ་འབྲས་བུ་གཉིས་སུ་ངེས་པ་ལ་ཡང་གཉིས། རིགས་པ་དང་། ལུང་ངོ་། །དང་པོ་རིགས་པ་ནི་གང་དག་རྒྱུ་ལ་ཁྱད་ཞུགས་པས་འབྲས་བུ་ལ་ཁྱད་འཇུག་པ་ཆོས་ཉིད་དེ། དཔེར་ན་ཀོ་ཊ་པ་དང་། སཱ་ལུ་བཞིན་ནོ། །དེས་ན་ལམ་གཉིས་ཡོད་པས་འབྲས་བུ་ཡང་གཉིས་འབྱུང་ངོ་། །གཉིས་པ་ལུང་ཡང་། ཡང་དག་པར་སྦྱོར་བ་ལས་སྐྱེ་བ་འདིར་སངས་རྒྱས་ཉིད་དམ་རྡོ་རྗེ་སེམས་དཔའ་ཐོབ་པར་འགྱུར་ཏེ། གང་དག་བསམ་གྱིས་མི་ཁྱབ་པའི་གནས་སངས་རྒྱས་རང་སྣང་གི་ཡེ་ཤེས་མ་ཐོབ་པ་དེ་ནི་བདེ་བར་གཤེགས་པ་སྟེ་ཕར་ཕྱིན་པའི་སངས་རྒྱས་ཡིན་ལ། མཚན་གཞི་ས་བཅུ་གསུམ་པ་མཚོན་པ་ནི་རྡོ་རྗེ་སེམས་དཔའ་ཡང་དག་པའོ། །ཞེས་གསུངས་པས་སྤངས་ཐོབ་མ་ལུས་པ་མ་བརྙེས་པ་ནི་ཕ་རོལ་ཏུ་ཕྱིན་པའི་འབྲས་བུ། ཐམས་ཅད་མངོན་དུ་མཛད་པ་ནི་རྡོ་རྗེ་ཐེག་པའི་འབྲས་བུའོ། །རྒྱས་པར་ལུང་དང་རིགས་པས་བསྙད་ལ་རྟོགས་པར་བྱའོ། །༼བཞི༷་པ༷་༽ལམ་དེ་གཉིས་ཀྱི་མིང་གི་དོན་ནི། ཕ་རོལ་ཏུ་ཕྱིན་པའི་སྤྱོད་པ་སྟོན་བྱེད་དང་། གསང་སྔགས་ཀྱི་སྤྱོད་པ་སྟོན་བྱེད་དོ། །ཡང་ཐེག་པ་ཆེན་པོ་ཙམ་དང་། རྡོ་རྗེའི་ཐེག་པའོ། །ཡང་བྱང་ཆུབ་སེམས་དཔའི་སྡེ་སྣོད་དང་། རིག་པ་འཛིན་པའི་སྡེ་སྣོད་ཅེས་བྱ་བ་མིང་གི་རྣམ་གྲངས་དྲུག་པོ་ནི་སྤྱིའི་མིང་བྱེ་བྲག་ལ་བཏགས་པར་ཤེས་པར་བྱ་སྟེ། དཔེར་ན་གསང་སྔགས་ཀྱི་སྤྱོད་པ་སྟོན་ཞེས་པའི་མིང་དེ། རིག་པ་ཆེན་མོའི་སྔགས། བླ་ན་མེད་པའི་སྔགས་ཞེས་སོགས་མདོ་ཕྱོགས་ལའང་འཇུག་པའི་ཕྱིར་དང་། རྡོ་རྗེ་ཐེག་པ་ཞེས་པའི་རྡོ་རྗེའང་སྟོང་ཉིད་ལ་འཇུག་པས་མདོ་ལས་བཤད་རུང་བས་སོ། །སྤྱི་ཙམ་ལས་མེད་པ་ནི་སྤྱི་མིང་ཡིན་ལ། དེ་ལས་བྱེ་བྲག་ཏུ་གྱུར་པ་ལ་ནི་བྱེ་བྲག་གི་མིང་སྟེ། དཔེར་ན་ཟངས་དང་ཟངས་ཀྱི་བུམ་པ་ཞེས་སོ་སོར་ཕྱེ་བ་ལྟ་བུའོ། །དེ་ལྟར་ཡིན་པར་ཅིས་ཤེས་ན། རྡོ་རྗེ་རྩེ་མོ་ལས། སེམས་ཅན་གྱི་དོན་གྱི་ཕྱིར་བྱང་ཆུབ་ཏུ་སེམས་བསྐྱེད་ནས་ཕ་རོལ་ཕྱིན་དྲུག་སྤྱོད་པ་དག །སྟོན་པས་རྟོག་པའི་རྒྱུད་ཞེས་བཤད་དོ། །ཞེས་བྱ་བ་ལ་སོགས་པ་གསུངས་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་གསང་སྔགས་ཏེ། རིག་པ་ཆེན་མོའི་གསང་སྔགས་ཞེས་བྱ་བ་ལ་སོགས་པ་རྒྱལ་བའི་ཡུམ་ལས་ཀྱང་གསུངས་སོ། །དེ་བས་ན་གཙོ་ཆེ་བའི་དབང་དུ་བྱས་པའི་མིང་ངོ་། །ཡང་གཞི་སྤོང་བའི་ཐེག་པ་དང་། གཞི་མི་སྤོང་བའི་ཐེག་པ་ཞེས་བྱ་བའམ། རྒྱུའི་ཐེག་པ་དང་། འབྲས་བུའི་ཐེག་པ་ཞེས་བྱ་བའམ། ཐེག་པ་ཆེན་པོ་ཐུན་མོང་བ་དང་ཐུན་མོང་མ་ཡིན་པ་ཞེས་བྱ་བ་འདི་ནི་སོ་སོར་ངེས་པའི་མིང་ཡིན་ནོ། །མིང་འདི་དག་གི་སྒྲའི་དོན་གྱི་བཤད་པ་ནི། སོ་སོའི་མཚན་ཉིད་ཀྱི་སྐབས་སུ་བཤད་པས་དེར་ཤེས་པར་བྱའོ། །རྒྱུད་སྡེ་སྤྱིའི་རྣམ་པར་གཞག་པ་ལས་ལམ་དེའི་རབ་ཏུ་དབྱེ་བའི་སྐབས་ཏེ་གསུམ་པའོ།། །།