ཐུགས་རྗེ་ཆེན་པོ་འཁོར་བ་དབྱིངས་སྒྲོལ་གྱི་ལས་བྱང་འཁྲུགས་པ་བསྡེབས་སུ་བཀོད་པ་བཀླགས་པས་དོན་གྲུབ།
ཐུགས་རྗེ་ཆེན་པོ་འཁོར་བ་དབྱིངས་སྒྲོལ་གྱི་ལས་བྱང་འཁྲུགས་པ་སྡེབས་སུ་བཀོད་པ་བཀླགས་པས་དོན་གྲུབ་བཞུགས་སོ། །
ཨོཾ་སྭ་སྟི་སིདྡྷཾ། །ཐུགས་རྗེ་ཉི་མའི་དངོས་བརྒྱ་ཤར་བའི་མོད། །འཛམ་གླིང་སྡུག་བསྔལ་སྨག་རུམ་མཐར་མཛད་ཕྱིར། །ཕྱག་ན་པད་དཀར་འཛིན་ཁྱོད་བརྟུལ་ཞུགས་རྩལ། །གྲུབ་པའི་གར་མཁན་མཚོ་སྐྱེས་རྡོ་རྗེར་འདུད། །གང་གི་རྣམ་སྤྲུལ་བཀའ་གཏེར་བསྟན་པའི་བདག །གཏེར་ཆེན་ཆོས་ཀྱི་རྒྱལ་པོ་ལེགས་ལྡན་རྗེ། །ཉི་ཟླ་འོད་ཟེར་རྩོད་དུས་གངས་ཅན་གྱི། །ཕན་བདེའི་སྣང་བ་སྟེར་མཛད་གཙུག་ན་མཛེས། །ཟན་གཡང་རྣམ་སྣང་ཐུགས་ཀྱི་གསང་བའི་མཛོད། །འཕགས་མཆོག་སྙིང་རྗེའི་ལྕགས་ཀྱིས་ལུས་ཅན་ཀུན། །འཁོར་བ་ལས་དྲངས་ཐར་པའི་དབྱིངས་ཆེན་པོར། །སྒྲོལ་བའི་ཟབ་གཏེར་སྔོན་མེད་ལེགས་པའི་ལམ། །སྐྱིད་ཤོད་མི་བདག་གཉེན་མདུན་ཤེ་མོང་གིས། །འཕྲུལ་སྣང་བར་ཁང་ནས་བཏོན་འཕྱོན་མའི་གར། །མ་ཞིག་ཞིག་པོས་འགྲོ་མང་འཁོར་གླིང་ལས། །མི་སྒྲོལ་ཉེས་ཀློང་བསྐྱུར་དང་འདི་མི་འདྲ། །དེ་ཕྱིར་འཕྲིན་ལས་སྒོམ་རིམ་(༢ན)
གཅིག་བསྡེབས་པའི། །ངག་འདོན་བཀླགས་པས་དོན་ཀུན་གྲུབ་པ་འདི། །སྙིགས་དུས་པདྨའི་རྒྱལ་ཚབ་གཏེར་བདག་གླིང་། །བཞེད་སྐོང་སླད་དུ་ཡི་གེའི་ཕྲེང་བར་སྤེལ། །དེ་ལ་འདིར་སྤྲུལ་པའི་གཏེར་ཆེན་ཉི་ཟླ་འོད་ཟེར་ལེགས་ལྡན་བདུད་འཇོམས་རྡོ་རྗེ་དཔལ་བཟང་པོས་ཟན་གཡང་མི་འགྱུར་ལྷུན་གྱིས་གྲུབ་པའི་བར་ཁང་གི་རྣམ་པར་སྣང་མཛད་ཀྱི་ཐུགས་ཀ་ནས་གདན་དྲངས་པའི་ཟབ་ལམ་འཁོར་བ་དབྱིངས་སྒྲོལ་གྱི་སྒྲུབ་ཐབས་དང་འཕྲིན་ལས་མ་བུ་ཁྲིགས་ཆགས་སུ་འདྲི་བ་ལ། བདེ་ལྡན་ཞིང་ན་ཆོས་སྐུ་འོད་དཔག་མེད། །གྲུ་འཛིན་རྩེ་མོར་ལོངས་སྐུ་སྤྱན་རས་གཟིགས། །རྔ་ཡབ་དཔལ་རིར་སྤྲུལ་སྐུ་ཐོད་ཕྲེང་རྩལ། །སྙིང་ནས་གསོལ་བ་འདེབས་སོ་བདག་བྱིན་རློབས། །དུས་གསུམ་རྒྱལ་བ་ཀུན་ཡུམ་འཚོ་རྒྱལ་མ། །སྔགས་འཆང་སྣ་ནམ་རྡོ་རྗེ་བདུད་འཇོམས་དཔལ། །ཟབ་གཏེར་སྒོ་འབྱེད་སྤྲུལ་སྐུ་ལེགས་ལྡན་རྗེར། །སྙིང་ནས་གསོལ་བ་འདེབས་སོ་བདག་བྱིན་རློབས། །བཀའ་བབས་ཆོས་བདག་རྣམ་རྒྱལ་(༢བ)
དཔལ་བཟང་པོ། །མཁས་བཙུན་གྲུབ་བརྙེས་ངག་དབང་རྣམ་པར་རྒྱལ། །སྤྲུལ་པའི་སྐུ་མཆོག་བཀྲ་ཤིས་དཔལ་གྲུབ་ལ། །སྙིང་ནས་གསོལ་བ་འདེབས་སོ་༴། །ཁྱབ་བདག་སྨན་ལུང་བློ་མཆོག་རྡོ་རྗེའི་ཞབས། །ཟ་ཧོར་རིགས་འཛིན་བྱང་སེམས་མྱུ་གུ་རྩལ། །སྙ་ནམ་ཟློས་གར་པདྨ་ཕོ་ཉའི་སྤྲུལ་པ་གཏེར་བདག་གླིང་པ་ལ་ཞེས་འདོན་པ་བསྒྱུར་ཆོག །འཕྲིན་ལས་ལ། །སྙིང་ནས་གསོལ་བ་འདེབས་སོ་བདག་༴། །བྱིན་རླབས་སྩོལ་མཛད་རྩ་བརྒྱུད་བླ་མ་དང་། །དངོས་གྲུབ་ཆར་འབེབས་ཡི་དམ་ཞི་ཁྲོའི་ལྷ། །བར་གཅོད་ཀུན་སེལ་མཁའ་འགྲོ་གཏེར་སྲུང་ལ། །སྙིང་ནས་གསོལ་བ་༴། །ཕྱི་ནང་གསང་བ་དེ་ཉིད་དཀྱིལ་འཁོར་དུ། །བུམ་གསང་ཤེས་རབ་ཡེ་ཤེས་རིག་པའི་རྩལ། །སྨིན་བྱེད་དབང་གི་ཆུ་བོས་བདག་རྒྱུད་ཀྱི། །ཟབ་ལམ་རྟོགས་པའི་མྱུ་གུ་སྨིན་པར་ཤོག །ཐུན་མོང་སྔོན་འགྲོས་རྒྱུད་སྦྱངས་རྡུལ་ཚོན་གྱི། །དཀྱིལ་འཁོར་ལ་བརྟེན་ཡེ་ཤེས་འོད་ལྔའི་ཀློང་། །ཡི་དམ་ཐུགས་རྗེ་ཆེན་པོ་ཞི་ཁྲོ་ཡི། །མ་ཧཱ་ཡོ་གའི་རྣལ་འབྱོར་མཐར་ཕྱིན་ཤོག །སྙིང་གའི་རྩ་འདབ་ཞི་བ་རིགས་ལྔ་དང་། །དུང་ཁང་འཁོར་ལོ་རྟ་མགྲིན་ཁྲག་འཐུང་གི །ལྷ་ཚོགས་ཡོངས་ཤར་སྤྲོ་བསྡུའི་སྦྱོར་བ་སོགས། །ཨ་ནུ་ཡོ་གའི་རྣལ་འབྱོར་མཐར་ཕྱིན་ཤོག །ཕྱི་ནང་ལུས་ཀྱི་དཀྱིལ་འཁོར་མ་ལུས་པ། །མེ་ལོང་གཟུགས་བཞིན་གསལ་སྟོང་འཛིན་པ་མེད། །བློ་འདས་རིག་པའི་རྩལ་དུ་ཡོངས་ཤར་བ། །ཨ་ཏི་ཡོ་གའི་རྣལ་འབྱོར་མཐར་ཕྱིན་ཤོག །དྷཱུ་ཏཱིའི་མར་སྣའི་ཨ་ཐུང་གཏུམ་མོའི་མེས། །ཧཾ་ཡིག་(༣ན)
བཞུ་བའི་བྱང་ཆུབ་སེམས་ཀྱི་རྒྱུན། །འབར་འཛག་དྲོད་ཀྱིས་རུ་བྱེ་དངས་མ་རྒྱས། །ལུས་ཀུན་ཁྱབ་པའི་བདེ་སྟོང་སྐྱེ་བར་ཤོག །རིགས་བཟང་བཅུ་དྲུག་ལོན་པའི་མཚན་ལྡན་མར། །མཉམ་སྦྱོར་ཐིག་ལེ་དབབ་དང་ལྡོག་པ་ལས། །དགའ་མཆོག་ཁྱད་པར་ལྷན་ཅིག་སྐྱེས་པ་ཡི། །མཆོག་གི་བདེ་སྟོང་ལམ་དུ་ལོངས་པར་ཤོག །ཤན་འབྱེད་མཉེན་བཙལ་བྱུང་གནས་འགྲོ་གསུམ་འཚོལ། །གནད་དུ་དབབ་པའི་སྔོན་འགྲོས་རྒྱུད་སྦྱངས་ནས། །ཆོས་ཀུན་སེམས་ཀྱི་དབྱིངས་སུ་ཀ་དག་པས། །རིག་རྩལ་ཆོས་སྐུ་རང་ངོ་འཕྲོད་པར་ཤོག །སྒྲོན་མ་རྣམ་བཞི་སྒོ་གསུམ་གཅུན་ཐབས་གསུམ། །གནད་བཞི་ལ་བརྟེན་འོད་གསལ་སྣང་བ་བཞིའི། །ལམ་བཟང་འཁྲུལ་པ་མེད་པར་ཉམས་བླངས་ནས། །ཚེ་འདིར་ཟུང་འཇུག་ཀུན་བཟང་མངོན་གྱུར་ཤོག །དབང་འབྲིང་རང་བཞིན་འཆི་ཁར་ཆོས་ཉིད་ཀྱི། །བར་དོ་གནད་ཀྱི་ཉམས་ལེན་ལ་བརྟེན་ནས། །མ་པང་བུ་རྒྱུག་ལྟ་བུར་རིགས་ལྔའི་ཚོགས། །ངོ་འཕྲོད་རྫུས་སྐྱེས་ཆོས་ཉན་གྲོལ་བར་ཤོག །བརྩོན་འགྲུས་དམན་པས་དབང་པོ་རབ་འབྲིང་གི །ཟབ་ལམ་རྣལ་འབྱོར་ཉམས་འོག་མ་ཆུད་དང་། །སྡིག་ཅན་བཙན་ཐབས་འདྲེན་ཕྱིར་
བདག་གཞན་སེམས། །འོད་དཔག་མེད་ཀྱི་ཐུགས་ཀར་འཕོ་བར་ཤོག །མ་བསྒོམས་སངས་རྒྱས་ཆོས་ལྔར་གྲགས་པ 
་ལས། །དམ་རྫས་ཏིང་འཛིན་སྔགས་ཀྱིས་ཉེར་བསྒྲུབས་པ། །མྱོང་གྲོལ་བདུད་རྩིས་འགྲོ་ཀུན་ངན་སོང་སྒོ །རབ་(༣བ)
བཅད་ཐར་པའི་ལམ་དུ་འཁྲིད་པར་ཤོག །རྩ་གསུམ་བྱིན་རླབས་རྟེན་འབྲེལ་སླུ་མེད་མཐུས། །རང་སེམས་དོན་གྱི་འཕགས་མཆོག་འཇིག་རྟེན་དབང་། །མངོན་སུམ་རང་ངོ་འཕྲོད་ནས་ལུས་ཅན་ཀུན། །འདྲེན་པའི་དེད་དཔོན་ཆེན་པོར་ བདག་འགྱུར་ཤོག །ཅེས་འཁྲུལ་མེད་ཀྱི་གཏེར་སྟོན་ཉི་ཟླ་འོད་ཟེར་རམ་རྡོ་རྗེ་གྲོ་ལོད་དུ་གྲགས་པ ་མཆོག་སྤྲུལ་མངའ་རིས་པ་ལེགས་ལྡན་བདུད་འཇོམས་རྡོ་རྗེའི་གཏེར་གསར་ཐུགས་རྗེ་ཆེན་པོ་འཁོར་བ་དབྱིངས་སྒྲོལ་གྱི་བརྒྱུད་འདེབས་ལམ་གྱི་རིམ་པ་དང་འབྲེལ་བའི་སྨོན་ལམ་དང་བཅས་པ་འདི་ནི་བྱང་བདག་རིགས་འཛིན་ཆེན་པོའི་སྤྲུལ་པའི་སྐུ་བློ་བཟང་པདྨ་འཕྲིན་ལས་ཐེག་མཆོག་དབང་གི་རྒྱལ་པོ་ཡོངས་འདུའི་སྡེའི་གསུང་གིས་བསྐུལ་བ་ལ་བརྟེན་ནས་ཟ་ཧོར་གྱི་རིགས་ལས་སྔགས་དཀར་མ་ཎི་བ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་གནས་བན་འཇམ་དབྱངས་བསྟན་འཛིན་ནོ། །ཏྭཱ་ཐརྱཊ། ཏཿཐྱ་ཊ་ཆེན་ཊ་ནེ་ཨྱེཿ །མི་འགྱུར་དོན་དམ་ཐུགས་རྗེ་ཆེན་པོ་ལ༔ སྒོ་གསུམ་དམ་འདྲེས་དོན་གྱི་ཕྱག་འཚལ་ལོ༔ སྒྲུབ་པའི་ཁ་སྐོང་ལས་ཀྱི་ཁྲིགས་སུ་སྡེབས༔ མ་འོངས་ལས་འཕྲོ་ཅན་གྱི་དཔལ་དུ་ཤོག༔ ས་མ་ཡ༔ རྒྱ་རྒྱ་རྒྱ༔ དེ་ཡང་སྦྱོར་དངོས་རྗེས་གསུམ་དང་པོ་ནི༔ སྐྱབས་སེམས་བགེགས་བསྐྲད་སྲུང་འཁོར་བྱིན་དབབ་ཅིང་༔ མཆོད་བྱིན་བརླབ་དང་བཤགས་པ་སྔོན་འགྲོ་བདུན༔ དང་པོ་སྐྱབས་སུ་འགྲོ་བ་འདི་སྐད་དོ༔ ན་མོ། བདག་སོགས་མཁའ་མཉམ་སེམས་ཅན་རྣམས༔ འདི་བཟུང་བླ་མེད་བྱང་ཆུབ་བར༔ རྒྱལ་བ་ཡོངས་རྫོགས་ཐུགས་རྗེ་ཡི༔ ལྷ་ཚོགས་རྣམས་ལ་(༤ན)
སྐྱབས་སུ་མཆི༔ གཉིས་པ་སེམས་བསྐྱེད་པ་ནི༔ ཧྲཱི༔ སྲིད་མཚོ་འཁོར་བའི་སྡུག་བསྔལ་ལས༔ བདག་གིས་འགྲོ་རྣམས་བསྒྲལ་བའི་ཕྱིར༔ རིགས་འདུས་ཐུགས་རྗེ་ཆེན་པོ་ཡི༔ བསྐྱེད་རྫོགས་དོན་ལས་མི་འདའ་འོ༔ གསུམ་པ་བགེགས་བསྐྲད་པ་ནི༔ ཧྲཱི༔ བདག་ཉིད་ཐུགས་རྗེ་ཁྲོས་པའི་སྐུ༔ དབང་ཆེན་ཡོངས་རྫོགས་ཧེ་རུ་ཀ༔ སྤྲུལ་པའི་ཁྲོ་ཚོགས་སྐར་ལྟར་འཁྲུག༔ དམ་སྲི་ལོག་འདྲེན་བགེགས་ཀྱི་ཚོགས༔ ནམ་ཡང་འདའ་བར་མི་ནུས་པའི༔ མཁྱེན་གཉིས་བར་དུ་མཚམས་བཅད་དོ༔ ཨཱོཾ་ཧ་ཡ་གྲཱི་ཝ་མ་ཧཱ་ཀྲོ་ཏ་སརྦ་དུཥྚན་བིགྷྣཱན་མཱ་ར་ཡ་ཧཱཾ་ཕཊ༔ བཞི་པ་སྲུང་འཁོར་ནིཿ ཧྲཱིཿ གདོད་ནས་རྣམ་དག་རང་བྱུང་གཞལ་ཡས་ཁང་ཿ རིག་པའི་ངོ་བོ་པདྨ་ཧེ་རུ་ཀ༔ དངས་མའི་ཐུགས་སྲོག་ཡེ་ཤེས་རྣམ་ལྔ་ཡི༔ རང་འོད་ཟེར་གྲུབ་ཆོས་དབྱིངས་འཁོར་ལོ་དང་༔ མེ་ལོང་ཡེ་ཤེས་མི་འགྱུར་རྡོ་རྗེའི་དབྱིབས༔ མཉམ་ཉིད་དབྱིངས་ལས་རིན་ཆེན་འབར་བ་སྟེ༔ སོར་རྟོག་སྐྱོན་བྲལ་པདྨའི་གུར་ཁང་དང་༔ བྱ་གྲུབ་རང་བྱུང་རལ་གྲི་འབར་བའི་ཚུལ༔ སྣ་ཚོགས་མཚོན་ཆའི་འོད་ཟེར་མེ་འོད་འཕྲོ༔ སྟེང་འོག་ཕྱོགས་མཚམས་མི་ཤིགས་སྲུང་འཁོར་གྲུབ༔ ཨཱོཾ་བཛྲ་རཀྵ་རཀྵ་ཧཾ། ལྔ་པ་བྱིན་དབབ་པ་ནི༔ ཧྲཱི༔ ཆོས་དབྱིངས་རྣམ་དག་དཀྱིལ་འཁོར་ནས༔ རང་བྱུང་ཐུགས་རྗེའི་ལྷ་ཚོགས་རྣམས༔ འགྲོ་བའི་དོན་དུ་སྐུ་བཞེངས་ལ༔ དབང་བསྐུར་བྱིན་ཕོབ་དངོས་གྲུབ་སྩོལ༔ ཨཱོཾ་བཛྲ་ཨ་བེ་ཤ་ཡ་ཨ༔ དྲུག་པ་མཆོད་རྫས་བྱིན་རླབས་ནི༔ ཨོཾ་སྭ་བྷཱ་ཝ་བི་ཤུདྡྷ་སརྦ་དྷརྨཱ་སྭ་(༤བ)
བྷཱ་ཝ་བི་ཤུདྡྷོ྅ཧཾ། རཾ་ཡཾ་ཁཾ། ཨཱོཾ་ཨཱཿཧཱུཾ། ཨཱོཾ་བཛྲ་པུཥྤེ། དྷཱུ་པེ། ཨཱ་ལོ་ཀེ །གནྡྷེ། ནྱཻ་ཝིདྱ། ཤཔྟ་པཱུ་ཛ་ཧོ༔ ཨཱོཾ་ཨཱཿཧཱུཾ་མ་ཧཱ་པཉྩ་པཱུ་ཛ་ཧོ༔ ཨཱོཾ་ཨཱཿཧཱུཾ། བྷོ་དྷི་ཙིཏྟ་ག་ན་གུ་ཧྱ་མ་ཧཱ་པཱུ་ཛ་ཧོ༔ ཨཱོཾ་ཨཱཿཧཱུཾ་མ་ཧཱ་སརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཧཱུཾ་ཧྲི་ཋཿ བདུན་པ་བཤགས་པ་ནི༔ ཧྲཱི༔ རྩེ་གསུམ་ཐུགས་རྗེ་ཞི་ཁྲོའི་ལྷ༔ ཡེ་ནས་རང་བྱུང་དབྱེར་མེད་ལས༔ གཉིས་འཛིན་རྟོག་པས་སོ་སོར་བཟུང་༔ མཉམ་ཉིད་རིག་པའི་ཀློང་དུ་བཤགས༔ ཨཱོཾ་བཛྲ་ས་ཏྭ་ཨ། དེ་ལྟར་སྔོན་འགྲོ་རིམ་པ་བདུན༔ སྐལ་པ་ཅན་གྱིས་ཤེས་པར་བྱ༔ ཏ་རྒ༔རྒྱ་རྒྱ་རྒྱ༔ གཉིས་པ་དངོས་གཞིའི་ལས་རིམ་ནི༔ དམ་ཚིག་བསྐྱེད་དང་སྤྱན་འདྲེན་དང་༔ བཞུགས་གསོལ་ཕྱག་འཚལ་མཆོད་འབུལ་བསྟོད༔ འཛབ་བཟླས་བདུན་ནི་དངོས་གཞིའོ༔ དང་པོ་དམ་ཚིག་བསྐྱེད་པ་ནི༔ ཡོ་ག་གསུམ་གྱི་མངོན་རྟོགས་བསྒོམ༔ ཏྭཱ་ཐ༔ གསང་ཆེན་ལམ་ཞུགས་ཐུགས་རྗེའི་རྣལ་འབྱོར་པས༔ ཟབ་མོའི་སྒྲུབ་ཐབས་ཡོ་ག་གསུམ་གྱི་ཚུལ༔ དཀྱིལ་འཁོར་གསུམ་ལ་བརྟེན་ནས་བསྒྲུབ་པར་བྱ༔ དང་པོར་མ་ཧཱ་ཡོ་གའི་སྒོམ་རིམ་ནི༔ ཏིང་འཛིན་མ་ཡེངས་ཡིད་ཀྱིས་འཛིན་ཕུར་གདབ༔ ཨཱོཾ་སྟོང་ཉིད་སྙིང་རྗེ་དབྱེར་མེད་རང་རིག་ཧྲཱིཿ དེ་ལས་འོད་ཟེར་ཐིག་འཕྲོས་འབྱུང་ལྔའི་སྟེང་༔ བྷཱུཾ་ལས་བདེ་ཆེན་ལྷུན་གྲུབ་གཞལ་ཡས་ཁང་༔ གྲུ་བཞི་སྒོ་བཞི་རྟ་བབས་བཞི་དང་ལྡན༔ རྩིག་པ་ལྔ་ལྡན་ཕ་གུ་པ་ཏྲར་ལྡན༔ དྲ་ཕྱེད་ཤར་བུ་མདའ་ཡབ་ཕིབས་ཏོག་མཛེས༔ རྡོ་རྗེའི་ར་གུར་ཡེ་(༥ན)
ཤེས་མེ་འོད་འཕྲོ༔ ཕྱི་རོལ་དུར་ཁྲོད་བརྒྱད་ཀྱིས་ཡོངས་སུ་བསྐོར༔ དེ་དབུས་པདྨ་འཁོར་ལོ་ཕྱི་ནང་སྤེལ༔ ལྟེ་བར་ཐིག་ལེ་ཟུང་འབྲེལ་མུ་ཁྱུད་བསྐོར༔ མདུན་གྱི་ཐིག་ལེར་རང་རིག་ལྷ་ཡི་སྐུ༔ ཐུགས་རྗེ་ཆེན་པོ་པདྨ་རཱ་གའི་མདོག༔ ཞལ་གཅིག་ཕྱག་གཉིས་ཤེལ་ཕྲེང་བུམ་པ་བསྣམས༔ རིན་ཆེན་རྒྱན་མཛེས་རྡོ་རྗེ་སྐྱིལ་ཀྲུང་བཞུགས༔ གསང་ཡུམ་དམར་མོ་པདྨ་བུམ་འཛིན་འཁྱུད༔ བདག་ཉིད་སྤྱི་གཙུག་རིགས་བདག་འོད་དཔག་མེད༔ ཞལ་གཅིག་ཕྱག་གཉིས་མཉམ་གཞག་ལྷུང་བཟེད་བསྣམས༔ མཚན་དཔེ་ཡོངས་རྫོགས་ཆོས་གོས་རྣམ་གསུམ་ལྡན༔ གཡོ་མེད་རྡོ་རྗེའི་སྐྱིལ་ཀྲུང་དྲང་པོར་བཞུགས༔ ཤར་དུ་མི་བསྐྱོད་ཐུགས་རྗེ་ཤེལ་གྱི་མདོག༔ ཞལ་གཅིག་ཕྱག་གཉིས་རྡོ་རྗེ་ཤེལ་འཕྲེང་བསྣམས༔ རིན་ཆེན་རྒྱན་མཛེས་༴། །མཱ་ཀི་དཀར་མོ་པདྨ་བུམ་༴། །ལྷོ་རུ་རིན་འབྱུང་ཐུགས་རྗེ་གསེར་གྱི་མདོག༔ ཞལ་གཅིག་ཕྱག་གཉིས་རིན་ཆེན་ཤེལ་འཕྲེང་བསྣམས༔ རིན་ཆེན་རྒྱན་མཛེས་༴༔ སྤྱན་མ་སེར་མོ་པདྨ་བུམ་འཛིན་འཁྱུད༔ ནུབ་ཏུ་སྣང་མཐའ་ཐུགས་རྗེ་བྱུ་རུའི་མདོག༔ ཞལ་གཅིག་ཕྱག་གཉིས་པདྨ་ཤེལ་ཕྲེང་བསྣམས༔ རིན་ཆེན་རྒྱན་༴། གོས་དཀར་དམར་མོ་པདྨ་བུམ་༴། བྱང་དུ་དོན་གྲུབ་ཐུགས་རྗེ་ཨིནྡྲའི་མདོག༔ ཞལ་གཅིག་ཕྱག་གཉིས་རྒྱ་གྲམ་ཤེལ་འཕྲེང་བསྣམས༔ རིན་ཆེན་རྒྱན་༴། སྒྲོལ་མ་ལྗང་གུ་པདྨ་བུམ་༴། དེ་ལྟར་རང་བྱུང་ཞི་བའི་ལྷ་ཚོགས་རྣམས༔ མཉེན་ལྕུག་འཁྲིལ་ལྡེམ་ཞི་བའི་ཆས་དགུ་གསོལ༔ གཞོན་ཚུལ་གཟི་ལྡན་ཡེ་ཤེས་འོད་ལྔའི་ཀློང་༔ རང་སྣང་མ་འདྲེས་ཐམས་ཅད་སྐྱིལ་(༥བ)
ཀྲུང་བཞུགས༔ ཨཱོཾ་ཨཱཿཧཱུཾ་ཧྲཱིཿ ཨཱོཾ་མ་ཎི་པདྨེ་ཧཱུཾ། ཧཱུཾ། ཞི་བའི་ངང་ལས་ཁྲོ་བོའི་སྐུར་བཞེངས་པར༔ འབར་བའི་དབང་ཆེན་ལྷ་ཚོགས་རང་བྱུང་ཤར༔ བཅོམ་ལྡན་སྐུ་རྒྱབ་འོད་ཟེར་ཐིག་ལེའི་དབུས༔ དབང་ཆེན་ཡོངས་རྫོགས་པདྨ་ཧེ་རུ་ཀ༔ སྐུ་མདོག་དམར་ནག་སྤྱི་གཙུག་རྟ་གདོང་འཚེར༔ ཞལ་གཅིག་ཕྱག་གཉིས་གྲི་གུག་ཐོད་ཁྲག་བསྣམས༔ དུར་ཁྲོད་ཆས་གསོལ་བམ་ཆེན་སྟེང་ན་འགྱིང་༔ ཕག་མོ་རང་འདྲའི་འཁྲིལ་སྦྱོར་ཕག་གདོང་དུར༔ ཤར་རྩིབས་དབང་ཆེན་བཛྲ་ཧེ་རུ་ཀ༔ སྐུ་མདོག་དཀར་པོ་སྤྱི་གཙུག་རྟ་གདོང་འཚེར༔ ཞལ་གཅིག་ཕྱག་གཉིས་རྡོ་རྗེ་ཐོད་ཁྲག་བསྣམས༔ དུར་ཁྲོད་ཆས་གསོལ་བམ་ཆེན་སྟེང་ན་འགྱིང་༔ ཕག་མོ་རང་འདྲ་འཁྲིལ་སྦྱོར་ཕག་གདོང་དུར༔ ལྷོ་རྩིབས་དབང་ཆེན་རཏྣ་ཧེ་རུ་ཀ༔ སྐུ་མདོག་སེར་པོ་༴། ཞལ་གཅིག་ཕྱག་གཉིས་རིན་ཆེན་ཐོད་ཁྲག་བསྣམས༔ དུར་ཁྲོད་ཆས་གསོལ་༴། ཕག་མོ་༴། ནུབ་རྩིབས་དབང་ཆེན་པདྨ་ཧེ་རུ་ཀ༔ སྐུ་མདོག་དམར་པོ་༴། ཞལ་གཅིག་ཕྱག་གཉིས་པདྨ་ཐོད་ཁྲག་བསྣམས༔ དུར་ཁྲོད་ཆས་གསོལ་༴། ཕག་མོ་༴། བྱང་རྩིབས་དབང་ཆེན་ཀརྨ་ཧེ་རུ་ཀ༔ སྐུ་མདོག་ལྗང་གུ་༴། ཞལ་གཅིག་ཕྱག་གཉིས་རྒྱ་གྲམ་ཐོད་ཁྲག་བསྣམས༔ དུར་ཁྲོད་ཆས་གསོལ་༴། ཕག་མོ་རང་འདྲ་༴། ཤར་སྒོར་རྡོ་རྗེ་མཁའ་འགྲོ་ཡབ་ཡུམ་དཀར༔ ལྕགས་ཀྱུ་ཐོད་ཁྲག་འཁྲིལ་སྦྱོར་ཚུལ་དུ་འགྱིང་༔ ལྷོ་སྒོར་རིན་ཆེན་མཁའ་འགྲོ་ཡབ་ཡུམ་སེར༔ ཞགས་པ་ཐོད་ཁྲག་༴ ནུབ་སྒོར་པདྨ་མཁའ་འགྲོ་ཡབ་ཡུམ་དམར༔ ལྕགས་སྒྲོག་ཐོད་ཁྲག་༴ བྱང་སྒོར་ལས་ཀྱི་མཁའ་འགྲོ་ཡབ་ཡུམ་ལྗང་༔ དྲིལ་བུ་ཐོད་ཁྲག་༴ དེ་ལྟར་རིག་(༦ན)
རྩལ་མཁའ་འགྲོའི་ལྷ་ཚོགས་རྣམས༔ བརྗིད་པའི་སྐུ་ལ་དུར་ཁྲོད་ཆས་ཀྱིས་བརྒྱན༔ འབར་བའི་གར་དགུ་རྔམ་བརྗིད་ཁྲོ་ཚུལ་ལྡན༔ བསྐལ་མེ་རབ་འབར་བམ་ཆེན་སྟེང་ན་འགྱིང་༔ ཨཱོཾ་པདྨནྟ་ཀྲྀཏྷ་ཡ་གྲཱི་ཝ་ཧཱུཾ་ཕཊ། གཉིས་པ་སྤྱན་འདྲེན་སྤོས་རོལ་དང་༔ གདུང་བའི་དབྱངས་ཀྱིས་འདི་སྐད་དོ༔ ཧྲཱིཿ དབྱིངས་ཀྱི་འོད་ཁྱིམ་རྣམ་དག་པོ་ཊ་ལ༔ རིག་པའི་རང་སྐུ་བདེ་ཆེན་ལོངས་སྤྱོད་རྫོགས༔ ཐུགས་རྗེ་མཚུངས་མེད་ཡབ་ཡུམ་གཉིས་མེད་སྦྱོར༔ གནས་འདིར་ཐུགས་རྗེས་དགོངས་ལ་གཤེགས་སུ་གསོལ༔ རིག་པའི་རང་རྩལ་འོད་ཕུང་སྐུར་སྣང་བ༔ ཐིག་ལེ་ལྔ་རྫོགས་འབྲེལ་བའི་གཞལ་ཡས་ནས༔ ཡེ་ཤེས་བཞི་སྦྱོར་རིགས་བཞི་ཡབ་ཡུམ་རྣམས༔ ཚད་མེད་ཐུགས་རྗེས་དགོངས་ལ་གཤེགས་སུ་གསོལ༔ དབང་དྲག་ཟླ་གམ་འབར་བའི་གཞལ་ཡས་ནས༔ ཡེ་ཤེས་རང་རྩལ་དབང་ཆེན་ཡོངས་རྫོགས་ལྷ༔ དམིགས་མེད་ཐུགས་རྗེའི་དབང་གིས་བརྩེར་དགོངས་ལ༔ གནས་འདིར་སྤྱན་འདྲེན་མཆོད་ཀྱིས་གཤེགས་སུ་གསོལ༔ ལས་བཞི་ལྷུན་གྲུབ་སྒོ་བ་ཡབ་ཡུམ་རྣམས༔ རྟག་ཆད་མཐའ་བྲལ་དབྱིངས་ནས་སྐུ་བཞེངས་ལ༔ ཚད་མེད་རྣམ་བཞིས་འགྲོ་བ་འདུལ་བའི་ཕྱིར༔ གནས་འདིར་སྤྱན་འདྲེན་བརྩེར་དགོངས་གཤེགས་སུ་གསོལ༔ ཨཱོཾ་བཛྲ་ས་མ་ཡ་ཛ༔ གསུམ་པ་བཞུགས་སུ་གསོལ་བ་ནི༔ ཧྲཱི༔ ཆོས་དབྱིངས་ལྷུན་གྲུབ་བདེ་ཆེན་གཞལ་ཡས་འདིར༔ དབྱིངས་ཀྱི་ཐིག་ལེ་འོད་ཕུང་འཁྱིལ་བའི་དབུས༔ རིག་པ་རང་ཤར་ཐུགས་རྗེ་ཞི་ཁྲོའི་ལྷ༔ མཉམ་ཉིད་དོན་གྱི་དབྱིངས་སུ་བརྟན་པར་བཞུགས༔ ཨཱོཾ་(༦བ)
བཛྲ་ས་མ་ཡ་ཏིཥྛནྟུ༔ བཞི་པ་ཕྱག་འཚལ་ནི༔ ཧྲཱི༔ རང་རིག་ཐུགས་རྗེ་ཞི་ཁྲོའི་ལྷ་ཚོགས་ལ༔ སྣང་སྟོང་སྐྱེ་འགག་མེད་པའི་དབྱིངས་ཉིད་དུ༔ བཟང་ངན་གཉིས་འཛིན་ཡེ་ནས་བྲལ་བ་ཡི༔ མཉམ་ཉིད་དོན་གྱི་ངང་དུ་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོ༔ ལྔ་པ་མཆོད་པ་འབུལ་བ་ནི༔ ཧྲཱི༔ རིག་གདངས་ཐུགས་རྗེའི་ལྷ་ཚོགས་ལ༔ མཆོད་པའི་བྱེ་བྲག་འབུལ་བ་ནི༔ མེ་ཏོག་བདུག་སྤོས་མར་མེ་དྲི༔ ཞལ་ཟས་སྒྲ་སྙན་ལྷ་མོ་རྣམས༔ སོ་སོའི་ཁ་དོག་ཕྱག་རྒྱ་བསྒྱུར༔ རབ་འབྱམས་ནམ་མཁའི་ཁམས་བཀང་ནས༔ རྒྱལ་བའི་དཀྱིལ་འཁོར་མཆོད་པར་བྱ༔ ཨཱོཾ་ཨཱཿཧཱུཾ་བཛྲ་པུཥྤེ་ནས་ཤཔྟ་པཱུ་ཛ་ཧོཿ ཧྲཱི༔ རིག་གདངས་ཞི་ཁྲོའི་ལྷ་ཚོགས་ལ༔ རང་བྱུང་བདུད་རྩི་རྣམ་ལྔ་དང་༔ ཤ་ལྔ་དམ་ཚིག་མཆོག་གི་རྫས༔ ནང་གི་བདག་ཉིད་དག་པར་བཞེས༔ མ་ཧཱ་ཨ་མྲྀ་ཏ་མཾ་ས་པཉྩ་པཱུ་ཛ་ཧོ༔ ཧྲཱི༔ ཐུགས་རྗེ་ཞི་ཁྲོའི་ལྷ་ཚོགས་ལ༔ སྣང་སྟོང་བདེ་ཆེན་ཡབ་ཡུམ་མཁར༔ དགའ་བཞི་ཡེ་ཤེས་ཐིག་ལེར་འཁྱིལ༔ ཟུང་འཇུག་བདེ་ཆེན་མཆོད་པ་བཞེས༔ ཨཱོཾ་བྷོ་དྷི་ཙིཏྟ་པཱུ་ཛ་ཧོ༔ ཧྲཱི༔ རང་བྱུང་གདོད་ནས་རྣམ་པར་དག་པའི་རྫས༔ རྩ་བ་བརྒྱད་དང་ཡན་ལག་སྟོང་སྦྱར་བ༔ མྱོང་གྲོལ་བདུད་རྩི་སྨན་གྱི་མཆོད་པ་འདི༔ བླ་མ་ཡི་དམ་མཁའ་འགྲོ་སྲུང་མར་འབུལ༔ ཨཱོཾ་མ་ཧཱ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ འོད་དཔག་མེད་དང་འཕགས་མཆོག་སྤྱན་རས་གཟིགས། ཨྱོན་པདྨ་ཐོད་ཕྲེང་མཁར་ཆེན་བཟའ། །རྡོ་རྗེ་བདུད་འཇོམས་གཏེར་སྟོན་ལེགས་ལྡན་རྗེར། །མྱོང་གྲོལ་བདུད་རྩི་སྨན་གྱི་མཆོད་པ་འབུལ། །ཨཱོཾ་མ་ཧཱ་སརྦ་༴། རྣམ་རྒྱལ་དཔལ་བཟང་ངག་དབང་རྣམ་པར་རྒྱལ། །བཀྲ་ཤིས་དཔལ་གྲུབ་ཁྱབ་བདག་སྨན་(༧ན)
ལུང་པ། །ཟ་ཧོར་རིགས་འཛིན་གཏེར་བདག་གླིང་པ་ལ། །མྱོང་གྲོལ་༴། ཨཱོཾ་མ་ཧཱ་སརྦ་༴། ཡི་དམ་ཐུགས་རྗེ་ཆེན་པོ་ཞི་ཁྲོའི་ལྷ། །མཁའ་འགྲོ་བཀའ་སྲུང་དམ་ཅན་གཏེར་སྐྱོང་དང་། །ཡུལ་ལྷ་གཞི་བདག་རྡོ་རྗེ་མཆེད་ལྕམ་ལ། །མྱོང་གྲོལ་༴། ཨཱོཾ་མ་ཧཱ་སརྦ་༴། ཧྲཱིཿ ཐུགས་རྗེ་ཞི་ཁྲོའི་ལྷ་ཚོགས་ལ༔ རྩ་བརྒྱད་བདུད་རྩི་མཆོད་པ་དང་༔ བདེ་ཆེན་རཀྟའི་མཆོད་པ་དང་༔ དམ་རྫས་གཏོར་མའི་མཆོད་པ་རྣམས༔ དོན་དམ་དབྱིངས་ཀྱི་མཆོད་པ་འབུལ༔ མཐུན་འཇུག་མཆོག་གི་མཆོད་པར་བཞེས༔ ཨཱོཾ་མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁ་རཾ་ཁཱ་ཧི༔ དྲུག་པ་བསྟོད་པ་ནི༔ ཧྲཱིཿ དབྱིངས་ཀྱི་འོད་ཕུང་ཡེ་ཤེས་ཆེན་པོ་ལས༔ རིག་པའི་སྐུར་བཞེངས་ཐུགས་རྗེ་ཆེན་པོ་ཡབ༔ བདེ་ཆེན་དགྱེས་ པ་བསྐྱེད་ཕྱིར་ཡུམ་དང་སྦྱོར༔ གཉིས་མེད་དོན་དམ་རིག་པའི་སྐུ་ལ་བསྟོད༔ རིགས་ཀྱི་བདག ་པོ་སྣང་མཐའ་འོད་དཔག་མེད༔ རྗེས་སུ་ཆགས་པ་སྐུ་མདོག་རཱ་གའི་མདོག༔ མཉམ་གཞག་མི་འགྱུར་གཡོ་མེད་སྐྱིལ་ཀྲུང་བཞུགས༔ རིགས་མཆོག་ཡོངས་རྫོགས་སྐུ་ལ་ཕྱག་འཚལ་བསྟོད༔ དབྱིངས་ཀྱི་འོད་ཕུང་ཡེ་ཤེས་ཆེན་པོ་ལས༔ རིག་པའི་སྐུར་བཞེངས་རིགས་བཞི་སྤྱན་རས་གཟིགས༔ ཁམས་བཞི་རྣམ་དག་ཡུམ་བཞི་འཁྲིལ་སྦྱོར་ཚུལ༔ རིགས་བཞི་ཡབ་ཡུམ་སྐུ་ལ་ཕྱག་འཚལ་བསྟོད༔ ཧྲཱི༔ རིག་པའི་རང་རྩལ་ཡེ་ཤེས་འབར་བའི་སྐུ༔ དབང་ཆེན་ཡོངས་རྫོགས་པདྨ་ཧེ་རུ་ཀ༔ ཤེས་རབ་དབྱིངས་ཀྱི་ཕག་མོ་དགྱེས་པ་འཁྲིལ༔ གཉིས་མེད་བདེ་ཆེན་སྐུ་ལ་ཕྱག་འཚལ་བསྟོད༔ ཆོས་ཉིད་དབང་དྲག་ལྷུན་གྲུབ་རོལ་པའི་སྐུ༔ ཡེ་ཤེས་རང་ཤར་རིགས་བཞི་ཧ་ཡ་གྲཱི༔ རང་རིག་ཕག་(༧བ)
མོ་སྡེ་བཞི་མཉམ་པར་སྦྱོར༔ རྟ་མཆོག་རིགས་བཞིའི་སྐུ་ལ་ཕྱག་འཚལ་བསྟོད༔ ཚད་མེད་རྣམ་བཞིའི་དཀྱིལ་འཁོར་སྒོ་བཞི་རུ༔ འཕྲིན་ལས་བཞི་ལྡན་སྒོ་བ་ཡབ་ཡུམ་བརྒྱད༔ སྣ་ཚོགས་རབ་འབྱམས་ལས་ཀུན་ལྷུན་གྲུབ་པའི༔ ཏྀ་ཀྲ་ཏ་སྒོ་བའི་ཚོགས་ལ་ཕྱག་འཚལ་བསྟོད༔ ཧྲཱི༔ རིག་པ་སྤྲོས་བྲལ་ངོས་བཟུང་མེད་པའི་ལྷ༔ ཅིར་ཡང་མ་གྲུབ་ངང་གི་གསལ་བའི་ལྷ༔ ཡེ་ནས་རང་གྲོལ་རྫོགས་པ་ལྟ་བའི་ལྷ༔ མ་བཅོས་ཅོག་བཞག་རང་འགྲོས་སྒོམ་པའི་ལྷ༔ བླང་དོར་རང་དག་ཟུང་འཇུག་སྤྱོད་པའི་ལྷ༔ རང་བྱུང་ཡེ་དག་མཐར་ཕྱིན་འབྲས་བུའི་ལྷ༔ ཐིག་ལེ་ཆེན་པོ་གྲ་ཟུར་མེད་པའི་ལྷ༔ ཕྱི་དང་ནང་མེད་ཀུན་ཏུ་བརྡལ་བའི་ལྷ༔ སྣང་སྲིད་རྣམ་དག་གཞལ་ཡས་ལྷུན་གྲུབ་པའི༔ ཆགས་སྡང་རང་གྲོལ་ཞི་ཁྲོའི་དཀྱིལ་འཁོར་ཤར༔ ཡེ་ཤེས་སྐུ་མཆོག་རྣམས་ལ་ཕྱག་འཚལ་བསྟོད༔ བདུན་པ་འཛབ་བཟླས་དགོངས་པ་ནི༔ ཡོ་ག་གསུམ་གྱི་མངོན་རྟོགས་ཡིན༔ དེ་ཡི་འཕྲིན་ལས་འདི་ལྟར་རོ༔ ཧྲཱི༔ རང་བྱུང་རྣམ་དག་གཞལ་ཡས་འདིར༔ ཆོས་སྐུ་ཐུགས་རྗེ་ཞི་ཁྲོའི་ལྷ༔ སྣ་ཚོགས་སྐུ་དང་ཆ་ལུགས་ལ༔ ཐུགས་སྲོག་འཛབ་ཀྱི་རང་སྒྲ་སྒྲོག༔ མི་འགྱུར་ཐུགས་ལས་འོད་ཟེར་འཕྲོས༔ ཕར་འཕྲོས་སེམས་དོན་རྣམས་རྫོགས༔ ཚུར་འདུས་དངོས་གྲུབ་བཅུད་དུ་བསྡུ༔ རྟགས་མཐོང་བར་དུ་རྒྱུན་མི་བཅད༔ དེ་ལྟར་མ་ཧཱ་ཕྱི་གྲུབ་བཟླས་བའི་ཚེ༔ བདག་ཉིད་ཐུགས་ཀར་ཉི་སྟེང་ཧྲཱི༔ཡིག་དམར། དེ་མཐར་སྔགས་བསྐོར་འོད་ཟེར་སྤྲོས་པ་ལས༔ རྒྱལ་བ་རྒྱ་མཚོའི་བྱིན་རླབས་འོད་དུ་བསྡུས༔ བདག་ཉིད་ཞལ་ཞུགས་ཐུགས་ཀར་ཐིམ་པ་ཡིས༔ སྐུ་གསུང་ཡེ་ཤེས་ལྔ་ཡི་དབང་ཐོབ་བསམ། བདག་གི་རིགས་(༨ན)
འགྲེས་ལྷ་རྣམས་ཀུན་ལ་སྦྱར༔ ཕུང་པོ་ལྔ་ལ་རིགས་ཀྱི་སྤྲོ་བསྡུ་དང་༔ ཞི་སོགས་ལས་ལ་རིགས་བཞིའི་སྤྲོ་བསྡུ་བྱ༔ བརྒྱ་སྟོང་ཁྲི་འབུམ་ཐུན་སྦྱར་བཟླས་པ་སྟེ༔ དེ་ཡིས་དངོས་གྲུབ་ཡིད་བཞིན་འགྲུབ་པ་དང་༔ ཞི་སོགས་ལས་རྣམས་ཐོགས་མེད་མཐར་ཕྱིན་འགྱུར༔ རིགས་འདུས་ཕྱི་སྒྲུབ་ཡིད་བཞིན་ནོར་བུ་འདི༔ མ་འོངས་ལས་ལྡན་བུ་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ ཨཱོཾ་ཨཱཿཧཱུཾ་ཧྲཱི༔ ཨཱོཾ་མ་ཎི་པདྨེ་ཧཱུཾ། ཨཱོཾ་པདྨཱནྟ་ཀྲྀཏྷ་ཡ་གྲཱི་ཝ་ཧཱུཾ༔ ཞེས་བྱ་ཞི་ཁྲོའི་ཐུགས་སྲོག་སྔགས༔ འཛབ་དགོངས་འཛབ་དབྱངས་གྲངས་ལྡན་བསྒྲུབ༔ དེ་ནི་དངོས་གཞིའི་རིམ་པའོ༔ དེ་ནས་རྗེས་ཀྱི་རིམ་པ་ནི༔ ཚོགས་དང་ལྷག་མ་ཐུགས་དམ་བསྐུལ༔ ཆད་མདོ་བསྒྲོག་ཅིང་བསྟན་མ་སྐྱོང་༔ གཏོར་མནན་དངོས་གྲུབ་བླང་བ་དང་༔ བསྡུ་ཆོག་བརྒྱད་ནི་རྗེས་ཀྱི་ཆོས༔ དང་པོ་ཚོགས་ནི༔ ཨཱོཾ་སྭ་བྷཱ་ཝ་༴ ། རཾ་ཡཾ་ཁཾ། ཨཱོཾ་ཨཱཿཧཱུཾ༔ ཧྲཱིཿ བདག་ཉིད་ལྷ་ཡི་ཐུགས་ཀ་ནས༔ ཡི་གེ་དྲུག་གི་འཕྲོ་འདུ་ལས༔ ཚོགས་ཀྱི་འཛིན་རྟོག་རང་དག་ནས༔ ཡེ་ཤེས་བདུད་རྩིའི་ངོ་བོར་གྱུར༔ ཧྲཱིཿ གདོད་ནས་རང་བྱུང་རིག་པའི་སྐུ༔ སྣང་སྟོང་ཐུགས་རྗེ་ཞི་ཁྲོའི་ལྷ༔ འདོད་ཡོན་ཚོགས་ལ་སྤྱན་འདྲེན་གཤེགས༔ གཉིས་མེད་ངང་དུ་བརྟན་པར་བཞུགས༔ ཧྲཱི༔ རིག་པ་རང་ཤར་ཞི་ཁྲོའི་ལྷ༔ རྩལ་གདངས་འཁོར་ཚོགས་བཅས་པ་ལ༔ སྣང་བ་རྒྱན་ཤར་འདོད་ཡོན་འདི༔ བླང་དོར་མེད་པར་བཞེས་སུ་གསོལ༔ ཧྲཱི༔ གཉིས་འཛིན་རྟོག་པ་ཨ་འཐས་པའི༔ རིག་པ་ལྷ་དང་འདོད་ཡོན་ཚོགས༔ མཉམ་ཉིད་དབྱིངས་(༨བ)
སུ་མ་རྟོགས་པ༔ ཞལ་ཟས་ཚོགས་ཀྱི་མཆོད་པས་བཤགས༔ རཱུ་པ་དགུག་གཞུག་མཐར་རྒྱས་ནི༔ ཧཱུཾ་ཧྲཱི༔ ཆོས་དབྱིངས་ཡེ་ཤེས་རིག་པའི་རང་རྩལ་ལས༔ ལྷུན་གྲུབ་ལས་མཛད་བུདྡྷ་ཧ་ཡ་གྲཱི༔ ཡབ་ཡུམ་གཉིས་མེད་རོལ་པའི་བྱིན་རླབས་ལས༔ མ་རིག་གཏི་མུག་གཟུང་འཛིན་དགྲ་བགེགས་རྣམས༔ ཆོས་དབྱིངས་ཀློང་དུ་སྒྲོལ་བའི་འཕྲིན་ལས་མཛོད༔ ཧཱུཾ་ཧྲཱི༔ མེ་ལོང་ཡེ་ཤེས་༴། ཞི་བའི་ལས་མཛད་བཛྲ་༴། ཡབ་ཡུམ་༴། མ་རིག་ཞེ་སྡང་༴། གསལ་བའི་ཀློང་དུ་༴། ཧཱུཾ་ཧྲཱི༔ མཉམ་ཉིད་༴། རྒྱས་པའི་ལས་མཛད་རཏྣ་ཧ་ཡ་གྲཱི༔ ཡབ་ཡུམ་༴། མ་རིག་ང་རྒྱལ་༴། མཉམ་པའི་ཀློང་དུ་༴། ཧཱུཾ་ཧྲཱི༔ སོར་རྟོག་ཡེ་ཤེས་རིག་པའི་རང་རྩལ་ལས༔ དབང་གི་ལས་མཛད་པདྨ་ཧ་ཡ་གྲཱི༔ ཡབ་ཡུམ་༴། མ་རིག་འདོད་ཆགས་༴། མཁྱེན་པའི་ཀློང་དུ་༴། ཧཱུཾ་ཧྲཱི༔ བྱ་གྲུབ་ཡེ་ཤེས་༴། དྲག་པོའི་ལས་མཛད་ཀརྨ་༴། ཡབ་ཡུམ་༴། མ་རིག་ཕྲག་དོག་༴ ལས་གྲུབ་ཀློང་དུ་༴། ཧཱུཾ་ཧྲཱི༔ མ་རིག་དུག་ལྔ་འདུས་པའི་རུ་དྲ་འདི༔ རིག་སྐུ་ཡེ་ཤེས་ཡོངས་རྫོགས་ཧེ་རུ་ཀས༔ སྣ་ཚོགས་རང་ཤར་སྤྲུལ་པའི་ཕོ་ཉའི་ཚོགས༔ དུག་ལྔ་གཟུང་འཛིན་རྩད་གཅོད་ཕུར་བུ་འདྲིལ༔ འཁོར་བའི་རྒྱུན་ལམ་ཆོད་ཅིག་ཀཱི་ལཱ་ཡ༔ མཉམ་རྫོགས་དབྱིངས་སུ་སྦྱོར་ཅིག་ཀཱི་ལཱ་ཡ༔ ཨཱོཾ་པདྨ་ཀྲོ་ཏ་ཀཱི་ལཱ་ཡ་ཪྣྲི་ཏྲི་ཧུར་ཐུཾ་མཱ་ར་ཡ་རྦད༔ ཧཱུཾ། དོན་དམ་ཆོས་ཉིད་ཞལ་ཕྱེ་ཞིག༔ ཁམས་གསུམ་འཁོར་བ་ཞལ་དུ་སྟོབ༔ ཡེ་ཤེས་རྣམ་ལྔ་ཞལ་ཕྱེ་ཞིག༔ དུག་ལྔ་གཟུང་འཛིན་ཞལ་དུ་སྟོབ༔ དཀྱིལ་འཁོར་ལྷ་ཚོགས་ཞལ་ཕྱེ་ཞིག༔ བར་ཆད་དགྲ་བགེགས་ཞལ་དུ་སྟོབ༔ མ་ར་ཙི་ཁཱ་ཧི༔ ཚོགས་ལ་རོལ་ཅིང་རྡོ་རྗེའི་གླུ་བྱ༔ ཐཏ྅ཐ། ལྭཱཊཏམཧཱཙཊ། ཧཱཊཧཱཏརྒ༔ (༩ན)
བདག་འདྲ་པདྨ་འབྱུང་གནས་ཀྱིས༔ གསང་སྔགས་བསྟན་པ་བསྲུང་བའི་ཕྱིར༔ གཟའ་བདུད་དུག་གི་སྤུ་གྲི་ཡི༔ གསོལ་མཆོད་རིམ་པ་བསྟན་པར་བྱ༔ འདི་ལ་ཤིས་པའི་མཐུན་རྫས་རྣམས༔ ཚང་ཞིང་བཀོད་ལེགས་བཤམས་ནས་ཀྱང་༔ རྒྱུ་དུས་དག་དང་ཟེར་གཉིས་དུས༔ སྔགས་འདིས་དགུག་ཅིང་ཕུད་ཀྱིས་མཆོད༔ ཨཱོཾ་ཧ་ཡ་གྲཱི་ཝ་ཧཱུཾ། བཛྲ་རཱ་ཧུ་ལ་ཙིཏྟ་ཤཀ་རུ་རིམ་མ་ཡོད་ཟ་འགྲམ་ཧ་ཧེ་ཛ་ཛ༔ རྫས་བསྲེག་རོལ་དབྱངས་བཅས་ཏེ་བསྐུལ༔ ཧཱུཾ། སྔོན་ཚེ་དབང་ཆེན་པདྨ་ཧེ་རུ་ཀས༔ དམ་ལ་བཏགས་པའི་ཆོས་སྐྱོང་མཐུ་རྩལ་ཅན༔ དྲང་སྲོང་ཆེན་པོ་གཟའ་མཆོག་རཱ་ཧུ་ལ༔ ཐུགས་དམ་དབང་གིས་གནས་འདིར་གཤེགས་སུ་གསོལ༔ དྲག་པོའི་ཆ་ལུགས་དུད་ཁ་མུན་པའི་མདོག༔ དབུ་དགུ་སྤྱན་སྟོང་བསྟན་ལ་བྱ་ར་མཛད༔ ཞལ་བགྲད་མཆེ་གཙིགས་ནད་ཀྱི་ན་བུན་འཁྲུག༔ ཕྱག་གཡས་ཆུ་སྲིན་རྒྱལ་མཚན་ཕྱར་བ་ཡིས༔ འགལ་བྱེད་ཁྱུར་མིད་ཐར་པའི་དུས་སྐབས་མེད༔ གཡོན་པ་མདའ་གཞུས་ཉམས་པའི་སྙིང་ལ་གཟེར༔ སྐུ་སྨད་སྦྲུལ་མཇུག་ཀླུ་བདུད་ཕོ་ཉར་འགྱེད༔ འབྱུང་བཞིའི་འཁོར་ལོ་དཀྲུགས་བསྡེབས་སྲིད་གསུམ་གཡོ༔ སྤྲུལ་པ་གཟའ་བརྒྱད་གདོང་མོ་ཁ་བཞི་དང་༔ ལྷ་སྲིན་སྡེ་བརྒྱད་རྒྱུ་སྐར་ཉི་ཤུའི་ཚོགས༔ རང་རང་མཐུན་པའི་དམ་རྫས་འདི་བཞེས་ལ༔ རྡོ་རྗེ་འཛིན་རྒྱལ་པདྨ་ཧེ་རུ་ཀ༔ ཤྲཱི་སིངྷ་པདྨའི་སྤྱན་སྔ་རུ༔ ཇི་ལྟར་ཁས་བླངས་དམ་བཅས་དྲན་མཛོད་ལ༔ བདག་ལ་སྡང་བའི་ལས་ངན་དགྲ་བོ་འདི༔ ཆོས་སྐྱོང་ཁྱོད་ལ་གསོད་པའི་གཉེར་དུ་གཏད༔ ལོ་ཟླར་མ་བཞག་མྱུར་དུ་སྒྲོལ་བར་མཛོད༔ ཕོ་རྒྱུད་རྩད་ཆོད་མོ་རྒྱུད་མངལ་ནས་སྐྱོམས༔ དགྲ་བོའི་སྲོག་རྩ་དམར་(༩བ)
པོ་དོན་སྙིང་བཅས༔ ཁྱོད་ཀྱི་ཟས་སྐལ་མཐུན་རྫས་མ་ཡིན་ནམ༔ སྲོག་ཆོད་སྙིང་ཕྱུངས་ཤ་རུས་དུམ་བུར་གཏུབས༔ བཞེས་ཤིག་རོལ་ཅིག་དམ་ཉམས་དགྲ་ལ་རོལ༔ ཕ་ཚན་བདུན་རྒྱུད་ཐམས་ཅད་རྩད་ནས་ཆོད༔ མིང་ཙམ་མེད་པར་ཐལ་བའི་རྡུལ་དུ་ལྷོགས༔ ཞེས་བསྐུལ་ཡི་དམ་ང་རྒྱལ་གྱིས༔ མཆོད་ལ་གང་འདོད་འཕྲིན་ལས་བཅོལ༔ དམ་ཚིག་ནན་བསྒྲགས་གོང་གནོན་གཅེས༔ བདག་འདྲ་པདྨ་འབྱུང་གནས་ཀྱིས༔ རྣོ་མྱུར་ཁྱད་འཕགས་ཐོག་འདྲ་བའི༔ ཆོས་སྐྱོང་ཁྱབ་འཇུག་མཆོད་བསྐུལ་འདི༔ ཡང་ཟབ་ཆོས་ཀྱི་སྲུང་མར་སྦས༔ བསྟན་པ་གཉན་པོ་བསྲུང་བར་ཤོག༔ ས་མ་ཡ༔ རྒྱ་རྒྱ་རྒྱ༔ གཉིས་པ་ལྷག་གཏོར་ནི། ཧཱུཾ། དབང་ཆེན་ཐུགས་རྗེ་ཞི་ཁྲོ་ཡི༔ རིག་རྩལ་བཀའ་ཡི་ལྷག་སྡུད་མ༔ རྟོགས་ཚོགས་དབང་སྒྱུར་འཕྲུལ་མོ་ཆེ༔ འདོད་ཡོན་རོལ་པའི་ལྷག་གཏོར་བཞེས༔ སྐྱེ་འགག་མཐའ་བྲལ་ལས་མཛོད་ཅིག༔ གསུམ་པ་ཐུགས་དམ་བསྐུལ་བ་ནི༔ ཧཱུཾ། རང་བྱུང་དཀྱིལ་འཁོར་ཆེན་པོ་ནས༔ རིག་པ་རང་ཤར་ལྷ་ཡི་ཚོགས༔ ཞི་ཁྲོ་ཡོངས་རྫོགས་སྐུ་བཞེངས་ལ༔ ཤར་གྲོལ་རང་མཚང་གསལ་བར་མཛོད༔ རེ་དོགས་མཐའ་ལས་གྲོལ་བར་མཛོད༔ གཉིས་འཛིན་ལོག་ལྟ་རྒྱུན་ཆོད་ལ༔ རྟག་ཆད་མུ་མཐའ་བྲལ་བ་ཡི༔ ཆོས་ཉིད་ཀློང་དུ་ཐིམ་བར་མཛོད༔ སངས་རྒྱས་རེ་བའི་ཕོ་བདུད་དང་༔ འཁོར་བར་དོགས་པའི་དམ་སྲི་དང་༔ ཚོགས་དྲུག་ཡུལ་གྱི་སྡེ་བརྒྱད་རྣམས༔ སྐྱེ་མེད་ཆོས་སྐུའི་ཀློང་དུ་གྲོལ༔ ཨ་ཕཊ། བཞི་པ་ཆད་མདོ་ནི༔ ཧྲཱིཿ འོད་གསལ་ལྷུན་གྲུབ་ཕོ་བྲང་དུ༔ གདོད་མའི་སངས་རྒྱས་ཐུགས་རྗེ་ཡིས༔ རང་ཤར་དཀྱིལ་འཁོར་ཞལ་ཕྱེ་ཚེ༔ འགྱུ་སྣང་བཀའ་སྡོད་ཐམས་ཅད་ཀྱིས༔ རང་དམ་(༡༠ན)
ཤར་གྲོལ་མཚང་བསྟན་པས༔ བདག་འཛིན་བྲལ་བར་མ་ཆད་དམ༔ སྣང་རིག་དོན་གྱི་གཏོར་མ་ལོང་༔ ཆོས་ཉིད་མ་ལ་བུ་ཐིམ་མཛོད༔ དེ་འོག་བསྐལ་པ་བར་མ་ལ༔ མི་འགྱུར་དཔལ་གྱི་སྟེང་ཁང་དུ༔ རིགས་འཛིན་པདྨ་སཾ་བྷ་ཝས༔ ཞི་ཁྲོ་ཟུང་འཇུག་ཞལ་ཕྱེ་ཚེ༔ མ་སྲིང་དམ་ཅན་རྒྱ་མཚོ་ཡིས༔ ཇི་ལྟར་ཁས་བླངས་དམ་བཅས་བཞིན༔ མཆོད་གཏོར་བཞེས་ལ་འཕྲིན་ལས་མཛོད༔ དེ་འོག་བསྐལ་པའི་ཐ་མ་ལ༔ དག་སྣང་དཔལ་རིའི་རྩེ་མོ་རུ༔ མོས་གཟུགས་པདྨ་འབྱུང་གནས་དང་༔ ཐོལ་བྱུང་ཉི་ཟླ་འོད་ཟེར་གྱིས༔ རྩལ་སྣང་དཀྱིལ་འཁོར་ཞལ་ཕྱེ་ཚེ༔ འོད་སྣང་བཀའ་སྡོད་ཐམས་ཅད་ཀྱིས༔ འགྱུ་དྲན་བྲལ་བར་མ་ཆད་དམ༔ འདོད་ཡོན་རང་ཤར་གཏོར་མ་ལོང་༔ སྣང་སྟོང་ཟུང་དུ་འཇུག་པར་མཛོད༔ ལྔ་པ་བསྟན་མ་སྐྱོང་བ་ནི༔ བྷྱོ༔ དམ་ཚིག་དབང་གི་ལས་མཛད་མ༔ རྟེན་འབྲེལ་བཅུ་གཉིས་རང་དག་པའི༔ མ་མོ་བསྟན་མ་བཅུ་གཉིས་པོ༔ དམ་ལས་མ་འདའ་གནས་འདིར་སྤྱོན༔ དམ་རྫས་གཏོར་མ་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ དྲུག་པ་གཏོར་མནན་ནི༔ ཧཱུཾ། ལྷུན་གྲུབ་ཞི་ཁྲོའི་དཀྱིལ་འཁོར་འདིར༔ གཉིས་འཛིན་དམ་སྲི་བསྒྲལ་བ་ཡི༔ ལྔ་ཕུང་སྙིགས་མར་གྱུར་པ་ལ༔ དངས་མ་ཡེ་ཤེས་བྲོ་བརྡུངས་པས༔ རང་གྲོལ་ཆོས་སྐུ་མི་འགྱུར་བའི༔ སྐྱེ་མེད་རྒྱ་ཡན་ལྷུན་གྱིས་གྲུབ༔ བདུན་པ་དངོས་གྲུབ་བླང་བ་ནི༔ ཧཱུཾ་ཧྲཱི༔ སྐྱེ་མེད་ཆོས་དབྱིངས་ཕོ་བྲང་ནས༔ ཐུགས་རྗེ་འགག་མེད་ཞི་ཁྲོའི་ལྷ༔ མཉམ་ཉིད་དབྱིངས་ནས་སྐུ་བཞེངས་ལ༔ སྐུ་གསུམ་ཡོངས་རྫོགས་དངོས་གྲུབ་སྩོལ༔ ཨཱོཾ་ཨཱཿཧཱུཾ། མ་ཧཱ་སིདྡྷི་ཧཱུཾ༔ བརྒྱད་པ་བསྡུ་ཆོག་ནི༔ ཧོ། རང་རིག་(༡༠བ)
རྣམ་དག་སྒྲུབ་གཞུང་ལས༔ སེམས་སྣང་འཁྲུལ་པའི་ཉེས་པ་རྣམས༔ གཉིས་མེད་དོན་དམ་ངང་དུ་བཤགས༔ དྲི་མེད་རྗེན་པར་རྟོགས་པར་ཤོག༔ སྐྱེ་མེད་ངང་ལས་གཟུགས་སྐུའི་རོལ་པར་ཤར༔ རང་རྩལ་ལྷུན་གྲུབ་ཞི་ཁྲོའི་ལྷ་ཚོགས་རྣམས༔ རྣམ་བཞིའི་འཕྲིན་ལས་དགོངས་པ་མཐར་ཕྱིན་ནས༔ ཆོས་སྐུ་རྣམ་དག་སྐྱེ་མེད་དབྱིངས་སུ་གཤེགས༔ འགྱུར་མེད་དགེ་བ་རྣམ་དག་བསྒྲུབས་པ་ལས༔ གདོད་མའི་མགོན་པོ་ཀུན་གྱིས་རྟོགས་པར་ཤོག༔ ཧྲཱི༔ དགོངས་པ་རང་ཤར་ཐུགས་རྗེས་འགྲོ་རྣམས་འདྲེན༔ རྩ་བརྒྱུད་རིགས་འཛིན་བླ་མའི་བཀྲ་ཤིས་ཤོག༔ དགོངས་པ་རང་ཤར་ཡེ་ཤེས་འོད་འབར་སྐུ༔ ཐུགས་རྗེ་ཡོངས་རྫོགས་ཞི་ཁྲོའི་བཀྲ་ཤིས་ཤོག༔ རང་རྩལ་འགག་མེད་སྒྱུ་འཕྲུལ་ཅིར་ཡང་སྟོན༔ དམ་ཅན་སྲུང་མའི་ཚོགས་ཀྱི་བཀྲ་ཤིས་ཤོག༔ ཅེས་བརྗོད་དགའ་སྟོན་གླུ་གར་བྱ༔ ལས་རྣམས་ཀུན་གྱི་ཁ་སྐོང་བའི༔ ལས་བྱང་ཡེ་ཤེས་འཁོར་ལོ་འདི༔ ལས་འཕྲོ་ཅན་གྱི་དཔལ་དུ་ཤོག༔ ས་མ་ཡ༔ རྒྱ་རྒྱ་རྒྱ༔ བརྡ་ཡིག་ཡོད། དེ་ལྟར་ལས་བྱང་སྒྲུབ་ཐབས་གཏེར་སྲུང་རྣམས་གཏེར་བྱོན་རྡོ་རྗེའི་ཚིག་ལྷད་མེད་ལ། བརྒྱུད་འདེབས་དང་སྨན་མཆོད་ཀྱི་ལྷན་ཐབས་གསར་དུ་སྦྱར། འདོན་ཆ་མིན་པ་ཐམས་ཅད་སེར་གྱིས་ཕྱེ་ནས་བཀླགས་ཆོག་ཏུ་བཀོད་པའོ། །ཆེས་ཆེར་སྙིགས་མ་ལྔ་བདོའི་པུར་རྒྱལ་འགྲོར། །རྗེས་ཆགས་པདྨཱ་ཀ་རས་ཟབ་གཏེར་སྨན། །གྲངས་མེད་སྦས་ཀྱང་ཡིད་སྲུབས་ཀྱིས་བརླམས་འགས། །ཧ་ལའི་རྐྱལ་པ་ཕྱི་ནས་ཕྱོགས་བཅུར་འགྱེད། །རྫུན་པོད་གཟིག་ཤུན་གོས་མཛེས་རང་ཆེ་སྐད། །མགྲིན་མཐོར་བཏེག་ནས་གཞན་འདྲིད་སྣང་འོད་རྐང་། །སྐལ་དམན་རལ་རྩེར་འཛེགས་(༡༡ན)
པ་སྔོན་བྱུང་དིང་། །སྔ་ཕྱིའི་སྤོ་ཁམས་ཟོག་རྒྱལ་དེས་མཚོན་མང་། །ཆོས་མིན་ཆུ་དང་དམ་ཆོས་འོ་མའི་བཅུད། །དབྱེ་བའི་དཔྱོད་ལྡན་ལུས་དཀར་དབང་པོ་དེས། །བལྟས་ཚེ་ར་གན་གསེར་འཁྲུལ་རིན་གཞལ་བའི། །ཚོད་བླུན་རྣམས་ལ་ཁྲེལ་བའི་མགྲིན་རྔ་འཁྲོལ། །ཚེ་དབང་རིགས་འཛིན་འཁྲུལ་མེད་ཟབ་གཏེར་སྒོ། །འབྱེད་མཛད་མངའ་རིས་པཎ་ཆེན་སྐུ་མཆེད་ཀྱི། །སྨིན་གྲོལ་གདམས་པ་ཡིད་བཞིན་དབང་གི་རྒྱལ། །སྐལ་བཟང་རྒྱལ་མཚན་རྩེ་མོར་མཆོད་དེ་སྤྲོ། །དེ་ཕྱིར་མི་ཟད་འཁོར་བ་མཐའ་ཅན་དུ། །བྱས་ནས་ཆོས་ཉིད་ཟད་སར་འཁྱོལ་བའི་དབྱིངས། །སྒྲོལ་ནུས་ལག་ན་པད་དཀར་འཆང་བ་ཡི། །འཕྲིན་ལས་བཀླགས་པས་དོན་ཀུན་གྲུབ་འདི་བཀོད། །དགེ་འདིས་ནམ་མཁའི་ཚད་མཉམ་མ་རྒན་འགྲོ། །གྲུ་འཛིན་རི་བོའི་གཞལ་ཡས་ཁང་བཟང་དུ། །འཇིག་རྟེན་དབང་ཕྱུག་སྐུ་རུ་སངས་རྒྱས་ནས། །དོན་གཉིས་འདོད་པ་འཇོ་བའི་བཀྲ་ཤིས་ཤོག །ཅེས་ཐུགས་རྗེ་ཆེན་པོ་འཁོར་བ་དབྱིངས་སྒྲོལ་གྱི་ལས་བྱང་འཁྲུགས་བསྡེབས་སུ་བཀོད་པ་བཀླགས་པས་དོན་གྲུབ་འདི་ནི་བདག་གི་ཕ་རྒན་ཞབས་དྲུང་ཧོར་བདུད་འདུལ་རབ་བརྟན་གྱི་དགོངས་རྫོགས་སྒྲུབ་མཆོད་ཨྱོན་སྨིན་གྲོལ་གླིང་བར་འཛུགས་པའི་སྟ་གོན་གྱི་ཚེ་སྤྲུལ་སྐུ་རིན་པོ་ཆེ་གཏེར་བདག་གླིང་པས་ཆོག་སྒྲིགས་ཤིག་གིས་གསུང་བ་དང་དུ་བླངས་ཏེ་ཟ་ཧོར་གྱི་སྔགས་དཀར་མ་ཎི་བ་བྱང་སེམས་མྱུ་གུ་རྩལ་གྱིས་སྦྱར་བའི་ཡི་གེ་པ་ནི་རིགས་འཛིན་གྱི་བཙུན་པ་འཇམ་དབྱངས་གྲགས་པའོ། །སརྦ་མངྒ་ལཾ།།