གསོལ་འདེབས་བྱིན་རླབས་བདུད་རྩིའི་སྤྲིན་ཕུང༔

ཨེ་མ་ཧོ༔ ཀ་དག་སངས་རྒྱས་གདོད་མའི་མགོན་པོ་རྗེ༔ ལྷུན་གྲུབ་རང་གདངས་རིགས་ལྔ་ལོངས་སྤྱོད་རྫོགས༔ ཐུགས་རྗེ་ཀུན་ཁྱབ་རིགས་འདུས་པདྨ་འབྱུང༔ སྒྱུ་འཕྲུལ་མངོན་རྫོགས་གུ་རུ་མཚན་མཆོག་བརྒྱད༔ ཀུན་འདུས་ངོ་བོ་རྩ་བའི་བླ་མ་རྗེ༔ ཁྱབ་བདག་འཁོར་ལོའི་མགོན་པོ་ལུང་རིག་གླིང༔ འདས་རྗེས་ཐོབ་པའི་རིག་འཛིན་གཞན་ལ་ཕན༔ འགྲོ་འདུལ་སྤྲུལ་པའི་སྐུ་ལ་གསོལ་བ་འདེབས༔ མི་མཐུན་གཡུལ་རྒྱལ་བསམ་དོན་མྱུར་འགྲུབ་ཤོག༔ མཐར་ཐུག་དཔལ་རི་པདྨ་བཀོད་པའི་ཞིང༔ ཚོམ་བུ་གཅིག་ཏུ་སྟོན་འཁོར་མཉམ་པར་ཤོག༔ ཅེས་སྔོན་སྦྱངས་ལས་ཀྱིས་འབྲེལ་བའི་བཙུན་པ་པདྨའི་མཚན་ཅན་གྱིས་བསྐུལ་ངོར༔ གཏེར་སྟོན་མིང་འཛིན་གཞན་ཕན་བཟང་པོས་བྲིས་པ་དགེ་ལེགས་འཕེལ༔