དཔལ་ལྡན་བླ་མ་མཆོག་ལ་བསྔགས་པའི་གཏམ་དད་པའི་གེ་སར།
དཔལ་ལྡན་བླ་མ་མཆོག་ལ་བསྔགས་པའི་གཏམ་དད་པའི་གེ་སར་ཞེས་བྱ་བ། ཀ་དམ་པ་ཅན་བླ་བྲེ་ལས་བྱུང་བའི། །ཁ་བའི་རྡུལ་བརྩེགས་ཁྲོད་ན་གནས་པའི་འགྲོ། །ག་ལ་བ་དེར་གཟིགས་ཏེ་མིག་མི་འཛུམ། །ང་ཅག་གདུང་སེལ་དམ་པར་བཞེངས་དེར་འདུད། ༡ །ཅ་ཅོའི་རླབས་ཕྲེང་རབ་ལྡན་འཁོར་བའི་ཆབ། །ཆ་མཐུན་བདེན་གཉིས་རིན་ཆེན་གྲུས་བརྒལ་ནས། །ཇ་ཆང་སྐྱེམས་ཀྱིས་མི་མཚོན་དབང་བཞིའི་རྒྱུན། །ཉ་རྒྱས་ཀུ་མུད་འཛུམ་
བཞིན་སྩོལ་བར་མཛད། ༢ །ཏུ་རུའི་ཚེར་མ་ལྟར་རྣོ་རྟོག་ཚོགས་ཀྱིས། །ཐ་དད་དགྲ་གཉེན་བར་མ་འདུ་བྱས་ཏེ། །ད་ཀོ་བྱང་སེམས་གཞོན་ཤ་འབིགས་པའི་ཚེ། །ན་མར་མགོན་པོ་ཁྱོད་ཀྱིས་རྗེས་སུ་ཟུངས། །པ་སངས་བཞད་པའི་འོད་དཀར་ཇི་བཞིན་དུ། །ཕ་རོལ་ཕྱིན་ལམ་སྤྱོད་པར་འཇུག་བྱས་ཏེ། །བ་མོར་ཉི་བཞིན་གློ་བུར་འཁྲུལ་པའི་ཚོགས། །མ་བཅོས་ལྷན་སྐྱེས་ཆེན་པོར་ཞི་བར་མཛོད། ༤ ། ཙ་རི་ཏྲ་སོགས་གནས་ཡུལ་ཌཱ་ཀིའི་གྲོང་། །ཚ་གྲང་ཨ་ཧཾ་ཟུང་འཇུག་ལ་ཆགས་ཕྱིར། །ཛ་ལང་འབོད་དབྱངས་རོལ་མོས་འགུགས་བྱེད་པའི། །ཝ་ལྟར་ཉུལ་བའི་སྣང་སེམས་འཁོར་ལོར་བཅིངས། ༥ །ཞྭ་ཐོད་པདྨ་གསར་པའི་འཁྲི་ཤིང་དེར། །ཟ་ཧོར་རྒྱལ་པོའི་མཆོད་གནས་མཚོ་སྐྱེས་རྗེ། །འ་ཅག་བྱིན་གྱིས་བརླབ་ཕྱིར་རབ་བཞུགས་ཏེ། །ཡ་བྲལ་ལས་འདས་བདེན་གཉིས་དམ་ཆོས་སྟོན། ༦ །ར་ཧུ་ལ་དང་ཙ་ཏུ་རྨུ་ཁའི་འཁོར། །ལ་ཀླུང་རྒྱུ་ཞིང་འགྲོ་ལ་འཚེ་བ་ཀུན། །ཤ་ཟ་འབོད་སྒྲོག་རྒྱལ་པོ་པད་འབྱུང་གིས། །ས་བཅུའི་བཀའ་རྟགས་རྭ་བར་བཟླུམ་བཞིན་འདུལ། ༧ །ཧུ་ལ་ལྟ་བུའི་རྟོག་བྲལ་རང་རིག་པ། །ཚུ་ཨ་དོན་རྫོགས་པ་ཆེན་པོར་མཉམ་པ་བཅིང་། །ཧཾ་ཡིག་ག་བུར་བཞུ་བའི་ཆུ་རྒྱུན་གྱིས། །ཨ་ལ་ལ་སྟེ་དབུ་མའི་ཀུན་བཞད། ༨ །སྣ་ཚོགས་ཚིག་ཕྲེང་གང་ཤར་རྡོ་རྗེའི་གླུས། །གཏད་མེད་ཉམས་མྱོང་གསར་
པ་འགུགས་བྱས་པས། །རིང་པོར་མི་ཐོགས་འགྲོ་རྣམས་བརྒྱན་གྱུར་ཏེ། །ཕན་བདེའི་དགའ་སྟོན་མཆོག་ལ་རོལ་པར་ཤོག ༩ །ཨ་ཧོ་རྒྱལ་ཀུན་མཐོན་མཐིང་གཙུག་ཏོར་རྩེར། །ཨ་དར་ལྟར་རབ་དྭངས་མཁྱེན་བརྩེའི་དངོས། །ཨེ་མ་མགོན་པོ་གང་གི་ཞབས་བཀོད་པས། །ཨ་ཏིའི་ཤིན་ཏུ་བཀའ་དྲིན་དྲན་བཞིན་སླར་འདུད་དོ། ༡༠ །སརྦ་སུ་ཛ་ཀ་ཏྭཾ།།