ལོ་རྒྱུས་རིན་པོ་ཆེའི་མདོ་བྱང་།
༄༅༔ གཡུ་ཡིག་ཅན་པོ་ཏི་སྨུག་ཆུང་སྐོར་རྣམས་བཞུགས་སོ༔ ༼གཡུ་ཡིག༽
མ་ཡིག་བུ་ཡིག་བསྡོམས་པས་སྐབས་དོན་བཅུ་གཉིས་དང་ཐོར་བུའི་སྐོར་རྣམས༔
༄༅༔ ༼ཁཾན།གཤྭཏམྭཧ།༔ སཾ་སྐྲ་ཏའི་སྐད་༽ཨེ་ཝཾ་མ་ཡ་ཤྲུ་ཏ་ཨེ་ཀ་སྨིན༔ ༼ཨོ་རྒྱན་སྐད་༽བྷ་དུ་སར་དྷཾ་བྷི་ལ་ཀི༔ ༼རྒྱ་ནག་པོའི་སྐད་༽བཻ་རོ་བྷ་ཞ་ཏི་སག་ཏི་ཀོ༔ ༼མཁའ་འགྲོ་མའི་སྐད་༽བྷེ་ཏི་བྷྱ་གུ་ལིར་ཏ༔ ༼སིང་གྷ་ལའི་སྐད་༽པ་བྷྱ་ཞུ་ཏི་ད་རོས་ཏུ༔ ༼སོག་པོའི་སྐད་༽ཕེ་ཏི་བྱེ་ལ་པོ་ཏང་ཀེ༔ བོད་སྐད་དུ༔ ལོ་རྒྱུས་རིན་པོ་ཆེའི་མདོ་བྱང༔ བཅོམ་ལྡན་འདས་བྱ་བྲལ་རྫོགས་པ་ཉིད་ལ་ཕྱག་འཚལ་ལོ༔ (༢)གང་ཞིག་རྨོངས་པ་གདུང་བ་སེལ་བའི་དོན་ཚིག་དང༔ གང་ཞིག་སེམས་ཉིད་རྣལ་དུ་འབེབས་པའི་དོན་ཚིག་དང༔ གང་ཞིག་རྒྱུད་ལུང་དོན་དུ་འགོད་པའི་དོན་ཚིག་དང༔ གང་ཞིག་ལྷ་རྣམས་མངོན་དུ་སྣང་བའི་དོན་ཚིག་དང༔ གང་ཞིག་སྐྱེ་མེད་གདིང་དུ་འཛུད་པའི་དོན་ཚིག་དང༔ གང་ཞིག་ཆོས་སྐུ་ཅོག་གིས་འཇོག་པའི་དོན་ཚིག་དང༔ གང་ཞིག་འཁྲུལ་པ་ཐུར་དུ་གཞུག་པའི་དོན་ཚིག་དང༔ གང་ཞིག་ཉོན་མོངས་སྔར་གྱི་འཛིན་པའི་དོན་ཚིག་དང༔ གང་ཞིག་ལྷག་པའི་བསམ་གཏན་རྫོགས་པའི་དོན་ཚིག་དང༔ གང་ཞིག་ཁམས་གསུམ་གཡུལ་ངོ་བཟློག་པའི་དོན་ཚིག་དང༔ གང་ཞིག་བྱ་བྱེད་ལམ་དུ་སློང་བའི་དོན་ཚིག་དང༔ གང་ཞིག་བཀོད་པ་ཡོངས་སུ་རྫོགས་པའི་དོན་ཚིག་རྣམས༔ རྣམ་པར་ཕྱེ་སྟེ་གསལ་བ་འདིར་ནི་བསྟན་པར་བྱའོ༔
ཁ།ཁཾཀརཀནཱ༔དབཱཊ།༔ རྨོངས་པ་གདུང་བ་དག་ནི་བསལ་བའི་ཕྱིར༔ ༼པོ་ཏི་སྨུག་གུ་ལ་ཟངས་ཀྱི་ཁྱམས་བག་ཏུ་བཅུག་ནས་རྒྱས་གདབ་ནས་སྦས་པའི་མན་ངག་པོ་ཏི་སྨུག་ཆུང་ཞེས་བྱ་སྟེ༔ འདི་ལ་འདྲ་མིན་གཉིས་ཡོད་དེ༔ མིན་པ་ལ་ཡིན་པའི་སྐད་བྱས་པ་ཅིག་ཀྱང་ཡོད་དོ༔ འདི་ནི་བསེ་རིན་པོ་ཆེའི་བྱང་དམར་ལ་གཡུའི་ཡི་གེ་བྲིས་ནས༔ སོག་པོ་གཡུའི་སྨིན་མ་ཅན་གྱིས་ཡུལ་ནས་བསྒྱུར་བའོ༔༽ བཀོད་པ་ཆེན་པོའི་དོན་ནི་རྒྱ་ཆེ་ལས༔ ༼ལོ་རྒྱུས་རྒྱས་འབྲིང་གསུམ་ལས་འདི་ལེགས༔༽ རིན་ཆེན་ལོ་རྒྱུས་མིག་འབྲས་འདིར་སྤྲོའོ༔ དོན་ཉིད་གསང་བ་བསྡུས་པའི་ཡི་གེ་(༣)འདི༔ སྒྲ་དང་ཐ་སྙད་བཀོད་པ་ཆེན་པོ་པས༔ སྙིང་པོ་འདི་ནི་ཡོངས་སུ་བསྡུས་པའོ༔ ཤིན་ཏུ་དཀོན་པས་སྔོན་པོའི་གཡུ་ཡིས་བྲིས༔ ༼གསང་སྐོར་སོགས་༽གཞན་དང་ཐུན་མོང་དག་ཏུ་མ་བྱས་པ༔ འདི་ནི་མཆོག་ཏུ་གསང་བའི་ཡི་གེའོ༔ རྒྱ་རྒྱ་རྒྱ༔