སྐབས་དང་པོས་རྩིས་ལ་ཐོག་མར་འཇུག་པའི་སྦྱོར་བ་རྣམས་འཆད་པ།
གཉིས་པ་ཡན་ལག་རྒྱས་བཤད་ལ་སྐབས་ཉི་ཤུ་རྩ་གསུམ་ལས། སྐབས་དང་པོས་རྩིས་ལ་ཐོག་མར་འཇུག་པའི་སྦྱོར་བ་རྣམས་འཆད་པ་ལ་བསྟན་བཤད་བསྡུ་གསུམ་ལས། དང་པོ་ནི། སྔོན་འགྲོ་བྱ་བའི་རིམ་པ་ནི། །ཞེས་སྨོས་སོ། །གཉིས་པ་ནི། དེ་ཡང་རྩིས་ལ་སྦྱོང་བར་འདོད་པ་རྣམས་ཀྱིས་ཐོག་མ་ཁོ་ནར་མ་བྲལ་བ་རྣམ་པ་གསུམ་དང་ལྡན་པའི་སྒོ་ནས་རྟོགས་པར་བྱའོ། །ཞེས་རྩིས་པ་རྣམས་ཀྱི་ཁ་སྐད་དུ་འབྱུང་བས། དང་པོ་ལུས་ཀྱི་ལས་ལག་པ་བྲིས་དང་མ་བྲལ་བ་སྟེ། ཤེས་བྱ་མཐའ་དག་རྩི་ནའང་། །འབྲི་བྱའི་ཡི་གེ་བཅུ་རུ་ཤེས། །ཞེས་པས་གཅིག་ནས་དགུའི་བར་དང་གནས་འཛིན་ཐིག་སྟེ། ཡི་གེ་བཅུ་པོའི་གཟུགས་བརྙན་རྣམས་ལེགས་པར་བསླབས་ནས་འབྲི་བ་དང་བསྒྱུར་བ་དང་བགོད་པ་སོགས་བག་དང་ལྡན་པས་བྱའོ། །ཇི་ལྟར་བྱ་ཞེ་ན། སྤྱིར་ཨང་ཀི་འབྲི་བགྲང་སྣོན་པ་རྣམས་རང་གི་གཡས་ཕྱོགས་ནས་བརྩམས་ཏེ་བྱ་ལ། བསྒྱུར་བགོད་འབྲིད་པ་རྣམས་ནི་གཡོན་ཕྱོགས་ནས་བྱ་སྟེ། དེ་ལས་གཞན་པའི་བྱ་བས་དོན་མི་འགྲུབ་པ་དང་བྱ་དཀའ་བས་སོ། །བྱེ་བྲག་ཏུ། བཅུ་སོགས་ཀྱིས་བསྒྱུར་བའི་ཚེ་གཞིའི་ཕུང་པོ་ཉིད་བཅུ་ཆར་སྤེལ་བའི་དོན་གྱིས་སྒྱུར་བྱེད་ཀྱི་མཐའི་ཐིག་ལེ་ནི་བསྒྱུར་བྱའི་གྲལ་མཐར་བསྒྲིགས་ཏེ་བཞག་གོོ། བགོད་བྱེད་བཅུ་སོགས་ཀྱི་མཐའི་ཐིག་ལེས་བགོ་བྱའི་གནས་གཞན་གྱི་མས་མཐའ་དགག་སྟེ་དེ་ལས་གཞན་པའི་བྱ་བ་ལ་དོན་མེད་པའི་ཕྱིར་རོ། །སྒྱུར་བྱེད་སྟོངས་ན་དེའི་དོན་མེད་པ་ཡིན་པས་བསྒྱུར་བྱའི་ཚོགས་དབྱེ་བར་བྱས་ཏེ་གནས་བསྲུང་དགོས་ན་ཐིག་ལེས་བསྲུང་ངོ་། །བགོད་བྱེད་སྟོངས་ན་དེས་བགོ་བྱ་མེད་པས་ཐོབ་ནོར་གྱི་གནས་སུ་ཐིག་ལེ་བྲིའོ། །བསྒྱུར་བྱ་སྒྱུར་བྱེད་དང་བགོ་བྱ་བགོད་བྱེད་ཀྱི་བར་དང་ཐ་མར་སྟོངས་པའི་ཐིག་ལེས་ནི་སོ་སོའི་གནས་གཞན་གྱི་གོ་ས་འཛིན་པ་ཙམ་ལས་དོན་གཞན་མེད་ཅིང་གྲལ་འགོར་འབྱུང་བ་ནི་མི་སྲིད་དོ། །བསྒྱུར་བ་ལ་རྐྱང་སྦྲག་གཉིས་ལས། རྐྱང་བསྒྱུར་གནས་གཞན་གཅིག་གིས་རང་གི་བསྒྱུར་བྱའི་ཐད་དྲངས་ཏེ་བསྒྱུར་ཞིང་། སྦྲག་བསྒྱུར་ནི་བསྒྱུར་བྱའི་འོག་གི་ཐད་དྲངས་སུ་སྒྱུར་བྱེད་ཀྱི་ཐ་མ་བཞག་ནས་བསྒྱུར་གཞི་གཅིག་ཉིད་སྒྱུར་བྱེད་ཀུན་གྱིས་རིམ་བཞིན་བསྒྱུར་ཏེ་བསྒྱུར་བྱ་དེ་ཉིད་སྒྱུར་བྱེད་ཀྱི་གྲངས་སུ་སྤེལ་བའི་གནད་ཀྱིས་སོ། །བགོད་པ་ལའང་རྐྱང་སྦྲག་གཉིས་ལས། རྐྱང་བགོད་རང་གཅིག་པོས་ཇི་ཙམ་ཐོབ་པ་ཁྱེར་བས་ཆོག་ལ། སྦྲག་བགོད་གནས་གཞན་འོག་མའི་ཚོད་དང་སྦྱོར་གྱིན་ཁྱེར་དགོས་ཏེ། བགོད་བྱེད་གནས་གཞན་སྦྲག་མས་འཐོབ་བྱ་གཅིག་ཡིན་པས་སོ། །སྒྱུར་བྱེད་གཉིས་ལ་སོགས་པས་བསྒྱུར་བ་ན་མང་དུ་འགྲོ་སྟེ། སྒྱུར་བྱེད་ཀྱི་གྲངས་སུ་བསྒྱུར་བྱ་འཕེལ་བའི་ཕྱིར། བསྒྱུར་བས་ཉུང་དུ་འགྲོ་བ་ནི་ཕྱེད་ཀྱིས་བསྒྱུར་ན་སྟེ། ཕྱེད་ཆར་འགྱུར་བའི་ཕྱིར་སྒྱུར་བྱེད་བསྒྱུར་བྱར་འཕོས་པའོ། །སྐྱེ་འབྲི་མེད་པ་ནི་གཅིག་གིས་བསྒྱུར་ན་སྟེ། མང་པོར་འཕེལ་བ་དང་ཉུང་ངུར་བྲི་བ་མེད་པ་ཡིན་པས་སོ། །གཞན་ཡང་། བསྲེ་དང་སྣོན་པ་རང་རང་གི། གནས་གཞན་དེ་ཡི་ཐད་ནས་བྱ། །འོག་ཏུ་བཅུར་ལོངས་གོང་དུ་འཕོ། །ལྷག་གམ་མ་ལོངས་རང་སར་བཞག །དབྲི་དང་བགོད་ཚེ་རང་ཐད་ནས། །མ་ལྡངས་གོང་ནས་གཅིག་ཕོབ་གང་། །འོག་ཏུ་བཅུར་འགྱུར་དེ་ལ་དབྲི། །བརྒྱ་སོགས་འབེབས་པའང་རིགས་པས་དཔྱད། །ཅེས་སོ། །གཉིས་པ་ངག་དགུ་མཐའ་དང་མ་བྲལ་བ་ནི། དགུ་གཅིག་གཅིག་དགུ་དགུ་ཡིན་ཏེ། །ཞེས་པ་ནས། གཅིག་གཅིག་གཅིག་ཡིན་ཐིག་ལེ་སྟོང་། །ཞེས་པའི་བར་རྐང་པ་གཅིག་དང་བཅས་པའི་ཚིགས་སུ་བཅད་པ་བཅུ་གཅིག་གི་དོན་ནི་གོ་བར་ཟད་ལ། དེ་ཡང་ངག་གི་དགུ་མཐའ་དག་པ་ཤིན་ཏུ་གཅེས་པས་དེ་ཉིད་ལེགས་པར་བཟུང་ནས་བྱང་ཞིང་ཆུབ་པར་བྱའོ། །གསུམ་པ་ཡིད་གནས་གཞན་དང་མ་བྲལ་བ་ནི། མཛོད་རང་འགྲེལ་གྱི་ལུགས་བཞིན་སྡེབས་པ་འདི་ལྟར་རིག་པར་བྱ་སྟེ། འདི་ལ་གཉིས། རྐྱང་པ་དང་། ཁུག་པའོ། །དང་པོ་ནི། གཅིགབཅུ། བརྒྱ། སྟོང་། ཁྲི། འབུམ་དང་། ས་ཡ། བྱེ་བ། དུང་ཕྱུར་ཏེ། །དགུ་པོ་རྐྱང་པའི་གྲངས་སུ་བརྗོད། །གཉིས་པ་ཁུག་པ་ལ་གནས་གསུམ་སྟེ། ཐེར་འབུམ། ཁྲག་ཁྲིག །རབ་བཀྲམ་དང་། གཏམས། དཀྲིགས། མི་འཁྲུག །ཁྱད་འབྱིན་དང་། སྤང་རྟེན། དེད་འདྲེན་ཞེས་པ་དགུ་ལ་ཆེན་པོ་དགུ་བསྣན་པའི་བཅོ་བརྒྱད་ནི་ཁུག་པ་དང་པོའོ། །མཐའ་སྣང་དང་། རྒྱུ་རིགའོད་མཛེས། དབང་པོ་དང་། ལེགས་འབྱིན། རྟོགས་འགྲོ། འབྱིངས་རྟུལ་དང་། རྒྱ་རྟགས། སྟོབས་འཁོར་ཏེ་དགུ་སྔ་མ་ལྟར་ཆེན་པོའི་ཟླ་དང་བཅས་པའི་བཅོ་བརྒྱད་ནི་ཁུག་པ་གཉིས་པའོ། །བརྡ་ཤེས་དང་། རྣམ་བྱུང་དང་། སྟོབས་མིག་གསུམ་ལ་ཆེན་པོ་གསུམ་བསྣན་པའི་དྲུག་ནི་ཁུག་པ་གསུམ་པའོ། །གནས་གཞན་དྲུག་ཅུའི་དབང་དུ་བྱས་ན་ཟུང་བཞི་མ་ཚང་བ་ལ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་བཞི་ཆེན་པོའི་ཟླ་དང་བཅས་པ་སྟེ་བརྒྱད་བསྣན་པས་ཁུག་པ་གསུམ་པའི་གནས་སུ་གྲངས་བཅུ་བཞིའོ། །དེ་དག་ཀྱང་། ཐེར་འབུམ་དང་། ཐེར་འབུམ་ཆེན་པོ་ཞེས་སོགས་ཆེན་པོ་དང་བཅས་པའི་གཉིས་གཉིས་ཀྱི་བགྲང་ཚུལ་ནི་ཁུག་པ་ཀུན་ལ་འགྲེ་བ་ཡིན་ནོ། །གྲངས་མེད་པ་ནི་གྲངས་དེ་དག་ཀུན་གྱི་ཐ་མ་སྟེ། དེ་ལྟར་གནས་གཞན་དྲུག་ཅུ་པོ་ཐམས་ཅད་ཀྱང་གོང་ནས་གོང་དུ་བཅུ་འགྱུར་དུ་བསྒྲེས་པའོ། །དེ་ཡང་དབྱིག་གཉེན་ཞབས་ཀྱིས། དེ་ལྟར་ན་རྐྱང་པ་དགུ་དང་། ཁུག་པའི་གནས་གསུམ་ལ་གྲངས་བཞི་བཅུ་རྩ་གཉིས་ཏེ། བསྡུས་ན་ལྔ་བཅུ་རྩ་གཅིག་ནི་མངོན་པ་ན་སྣང་ངོ་། །ལྷག་མ་གྲངས་བརྒྱད་མ་ཚང་བ། ཁུག་པའི་གནས་སུ་བརྒྱད་བསྣན་ན་ལྔ་བཅུ་རྩ་དགུ་ནི་གྲངས་མིང་དུ་བཏགས་ལ། དྲུག་ཅུ་པ་ནི་དེ་ལྟ་བུའི་མིང་ལས་འདས་པས་གྲངས་མེད་པ་ཞེས་བྱའོ། །ཞེས་གསུངས་སོ། །འདིར་ཁ་ཤཱཀྱ་དབང་ཕྱུག་ཅིག །གྲངས་ཀྱི་གནས་གཞན་དྲུག་ཅུ་ལ། །ཞེས་བྲིས་ནས། སྟོབས་མིག་གི་མཐར་ཁྱད་བྱུང་ཞེས་པ་བསྣོན་པ་ནི་མི་ལེགས་ཏེ། དེ་ལྟར་ན་གནས་གཞན་རེ་གཅིག་འབྱུང་བའི་ཕྱིར་རོ། །གཞན་ཡང་གྲངས་ཀྱི་རྣམ་གཞག་ལ། ཕལ་ཆེན། རྒྱ་རོལ། འཇམ་དཔལ་རྩ་རྒྱུད། འཇིག་རྟེན་པའི་ལུགས་དང་བཞི་ལས། དང་པོ་ནི། བྱེ་བ་ཁོད་ཁོད་ཐད་གུ་དང་། །ཁྲིག་ཁྲིག་ཐམས་ཐམས་མྱད་མྱིད་དང་། །གང་ཡ་བན་བུན་ཕྱར་ཕྱུར་དང་། །ལྕག་ལྕིག་བྱང་བྱིང་ཆེམ་ཆེམ་དང་། །ཕྱལ་ཕྱོལ་ཁྱད་ཁྱུད་ཟར་ཟེར་དང་། །ཁྲིབ་ཁྲིབ་ཡ་གངས་ཆོ་མ་དང་། །ཁྲིམ་ཁྲིམ་ནབ་ནུབ་སང་སང་དང་། །བརྒྱུད་ཡས་བཏང་ཡས་བཀྲ་ཡར་དང་། །གསའ་ཡས་མཚུངས་མེད་ལ་ལུམ་དང་། །ཡལ་ལོལ་ཁྲལ་ཁྲུལ་ཐུད་ཐུད་དང་། །བསམ་ཕྱོད་བྲང་བྲེང་སྒྲོད་ཡས་དང་། །སྔོ་ཡས་ཟང་ཡག་འཕྲོ་བཀྱེ་དང་། །རྩེ་འཕྱོ་ཡོངས་བསྟན་བྲུག་གཡོས་དང་། །སང་ཡལ་ཐེད་ཡུག་ཡིད་འཕྱོ་དང་། །ནབ་ནེབ་ཁྲིག་ཐམ་ཡལ་ཡལ་དང་། །བགྲང་ཡས་ཐུག་ཡལ་ཤང་ཤང་དང་། །ཡག་ཡག་ཐིམ་ཐིམ་རློམ་སྙལ་དང་། །གཞལ་འཕྱོས་གཞལ་ཡས་གཞལ་ལད་དང་། །གཞལ་འཁོར་གཞལ་ཐིམ་གར་གཞལ་དང་། །གཞལ་སངས་གཞལ་ཐག་གཞལ་ཕུལ་དང་། །གཞལ་གཞི་འཕྱོང་འགྱུར་ཉ་ཉེར་དང་། །ཕྱག་ཕྱིག་ཟལ་ཟུལ་སལ་སལ་དང་། །གཡོ་ལྡེག་ཕན་ཕུན་གདང་ཡས་དང་། །རིམ་གྲོལ་རྫི་ང་རྫི་རྡུལ་དང་། །ཕུན་ཡོལ་ངད་ངད་བགྲང་རྩི་དང་། །ཟབ་བགྲང་དགའ་རྐྱང་གཞུང་འདལ་དང་། །ཁྲུག་ཕྱད་འོལ་ཕྱོད་གདབ་ཡས་དང་། །གཅའ་ཡས་བགྲང་ཡས་ཀྱི་འཕྱོ་དང་། །ཡ་མེ་སྙལ་ཡས་འདབ་འདེབ་དང་། །འབན་ཅང་ཕང་ཕུང་ཁེའུ་ཚང་། །ཞུན་བཟུང་མཆོག་ཡལ་མཐའ་བརྟུལ་དང་། །ཡུན་འགྱངས་བུན་ལོབ་ལམ་ལོམ་དང་། །བསྙད་ཡས་ལང་ལིང་ལྗབ་ལྗིབ་དང་། །མི་བཅའ་མཇམ་ཡས་ང་སྒྲང་དང་། །སྨོས་ཡལ་བཀྲ་ཚལ་ལོ་རྒྱས་དང་། །འབུམ་རྟིག་གམ་གུམ་ལ་ལོ་དང་། །བགྲང་འཕྱོས་བགྲང་འཕྱོས་ལ་བསྒྲེས་པ། །དཔག་ཡས་དེ་བསྒྲེས་ཡལ་ཕྱོང་དང་། །དེ་བསྒྲེས་མུ་ཡལ་མུ་ཡལ་བསྒྲེས། །བགྲང་ཡོལ་གཉིས་དང་མི་འཇལ་གཉིས། །བསམ་ཕྱོད་གཉིས་དང་མཐའ་འབྱམས་གཉིས། །དཔག་ཐག་གཉིས་དང་བརྗོད་མེད་གཉིས། །བརྗོད་མེད་པའི་ཡང་བརྗོད་མེད་ལ། །སྒྲེས་པ་ཤིན་ཏུ་བརྟན་པའོ། །འདི་ལ་གྲངས་གནས་བརྒྱ་དང་ཉི་ཤུ་རྩ་བརྒྱད་ཡོད་ཅིང་། བརྒྱ་སྟོང་ཕྲག་བརྒྱ་ལ་བྱེ་བ་དང་། དེ་ནས་བྱེ་བ་བྱེ་བ་ལ་ཁོད་ཁོད་སོགས་སྡེས་བསྒྱུར་བ་ཡིན་ནོ། །གཉིས་པ་རྒྱ་རོལ་ལས་གསུངས་པ་ནི། བྱེ་བ་ཐེར་འབུམ་ཁྲག་ཁྲིག་དང་། །གཏམས་དཀྲིགས་མི་འཁྲུགས་ཁྱད་འབྱིན་དང་། །སྤང་རྟེན་མང་འཛིན་གླང་པོའི་སྟོབས། །ངོགས་ཐོབ་རྣམ་བཞག་གདགས་རྒྱུ་རིག །ལག་སྦྱིན་རྒྱུ་དབང་རྫོགས་འཐོབ་དང་། །བགྲང་རྟོགས་གྲིབ་པ་སྟོབས་ཀུན་སྟོབས། །རྣམ་བརྡ་ཤེས་ལྡན་བརྡ་ཤེས་ཀུན། །རྣམ་འབྱུང་དེ་ཡི་མཚན་ཉིད་ཅན། །རྒྱལ་མཚན་རྩེ་མོའི་ནོར་བུ་དང་། །རྒྱལ་མཚན་རྩེ་མོ་ངེས་པར་སྒྲོགས། །དེད་འདྲེན་ཞེས་གདགས་གཏན་ལ་འབེབས། །གཅོད་རྟོགས་གཅོད་རྟོགས་ལྡན་དང་ནི། །ཐམས་ཅད་རྣམ་འབྱེད་སྙིང་པོ་མཆོག །ཕྲ་རབས་རྡུལ་གྱི་རྗེས་སུ་འཇུག །གྲངས་གནས་སུམ་ཅུ་རྩ་གཉིས་ཏེ། །གོང་ནས་གོང་དུ་བརྒྱ་འགྱུར་སྒྲེ། །ཞེས་བྱའོ། །གསུམ་པ་འཇམ་དཔལ་རྩ་རྒྱུད་ལས་གསུངས་པ་ནི། བརྒྱ་སྟོང་ཁྲི་འབུམ་ས་ཡ་བྱེ། །དུང་ཕྱུར་ཐེར་འབུམ་ཐེར་འབུམ་ཆེ། །ཤུ་རྔོག་མཆོག་ཉལ་རྐྱང་ཕྱེ་དང་། །རྐྱང་ཕྱེ་ཆེ་དང་ཁྱད་འབྱིན་གཉིས། །སྒྱུ་མ་གཉིས་དང་མཚོ་ཡས་གཉིས། །དུག་ཅན་རྒྱ་མཚོ་ཆེ་དང་བཅས། །མཆོག་ཡས་བན་བུན་མ་ལུས་པ། །མ་ལུས་ཆེ་དང་གྲངས་མེད་དང་། །དཔག་མེད་གཉིས་དང་འཇིག་རྟེན་གཉིས། །མུན་པ་སྣང་བ་སྣང་བ་ཆེ། །ཕུང་པོ་གཉིས་དང་ཟབ་པ་དང་། །བརྟན་པ་རབ་བརྟན་འགྲོ་མང་ལྡན། །གནས་དང་གནས་ཆེན་དཔག་མེད་གཉིས། །དོན་ཆེན་རྒྱ་མཚོ་མཆོག་གཙོ་ཁྱིམ། །བསམ་མི་ཁྱབ་དང་མི་ཟད་གཟུགས། །རྒྱལ་ཐབས་གཏེར་དང་དགེ་བ་དང་། །སེམས་བྱུང་གཉིས་དང་བརྗོད་པ་དང་། །བརྗེད་མེད་བསྙད་ཡས་བསྙད་ཡས་ཆེ། །ཕྱར་ཕྱུར་གཉིས་དང་ཤུ་རྔོག་དང་། །ཤུ་རྔོག་ཆེ་དང་ཞི་བ་དང་། །ཆུ་འབྱུང་སེམས་འཁྲུལ་དམ་པ་ཉིད། །སངས་རྒྱས་ཡུལ་དང་འཕེལ་བྱེད་པ། །དེ་ལྟར་གྲངས་གནས་དྲུག་ཅུ་དགུ། །གོང་ནས་གོང་དུ་བཅུ་འགྱུར་ཡིན། །དེ་ཡན་སངས་རྒྱས་ཉིད་ཀྱི་ཡུལ། །དེ་ཕྱིར་འགྲོ་བས་བགྲང་མི་ནུས། །ཞེས་བྱའོ། །བཞི་པ་འཇིག་རྟེན་པའི་གྲངས་གནས་ནི། གཅིག་བཅུ་བརྒྱ་སྟོང་ཁྲི་འབུམ་དང་། །ས་ཡ་བྱེ་བ་དུང་ཕྱུར་དང་། །ཐེར་འབུམ་ཤུ་རྔོག་མཆོག་ཉལ་དང་། །སྐྱ་འཕྱིས་བྱེ་མ་ནབ་ནུབ་དང་། །མཚོ་ཡས་ལྷབས་ཕྱོར་རྫི་ཞེས་གནས། །བཅོ་བརྒྱད་གོང་དུ་བཅུ་འགྱུར་བསྒྲེ། །གཞན་ཡང་སྡོང་པོ་བཀོད་པའི་མདོ་དང་། འདུས་བྱས་འདུས་མ་བྱས་རྣམ་པར་ངེས་པའི་བསྟན་བཅོས་ལས་གནས་གཞན་དྲུག་ཅུ་ཚང་བ་སོགས་གྲངས་ཀྱི་རྣམ་གཞག་མང་དུ་མཐོང་ཡང་བྲིར་མ་ལང་ངོ་། །དེ་ལྟར་བཤད་མ་ཐག་པ་ལྟར་མ་བྲལ་བ་གསུམ་གྱི་སྒོ་ནས་བསྒྱུར་བགོད་སོགས་བྱས་པའི་མཐར་རི་མོ་འཁྲུལ་མ་འཁྲུལ་བརྟག་པར་བྱ་བའི་ཕྱིར། རི་མོ་གང་འཐད་བློ་འདོད་བྲིས། །སྒྱུར་བྱེད་གང་ཡིན་དེ་ཡིས་བསྒྱུར། །སླར་ཡང་སྒྱུར་བྱེད་དེ་ཉིད་ཀྱིས། །བགོས་པས་སྔར་གྱི་གཞི་དེ་འཆར། །དཀའ་ཚེགས་མེད་པར་འདི་འབྱུང་ན། །རི་མོ་བྱང་བའི་ཚད་ཡིན་པས། །དེ་རྗེས་ཡན་ལག་ལྔ་ལ་སོགས། །རྩིས་ཀྱི་གཞུང་ལ་འཇུག་པར་བྱ། །ཞེས་གདམས་སོ། །
ད་ནི་འཕྲོས་དོན་ཆུ་ཚོད་ལ་སོགས་པའི་ཚུལ་ཤེས་པར་བྱ་བའི་ཕྱིར་བརྗོད་པ་ནི། སྐྱེས་བུ་ཁམས་སྙོམས་པའི་དབུགས་འབྱུང་འཇུག་གི་ཁུག་པ་གཅིག་ལ་དབུགས་གཅིག་དང་། དེ་དྲུག་ལ་སྲང་གཅིག །སྲང་དྲུག་ཅུ་ལ་ཆུ་ཚོད་གཅིག །ཆུ་ཚོད་དྲུག་ཅུར་ཉིན་ཞག་གཅིག་རྣམས་འབྱུང་བ་ཡིན་ཏེ། བསྡུས་པའི་རྒྱུད་ལས། དབུགས་དྲུག་གིས་ནི་ཆུ་སྲང་གཅིག་ཏུ་རབ་ཏུ་འགྱུར་ཏེ་ཆུ་སྲང་དྲུག་ཅུ་ཡིས་ཀྱང་ཆུ་ཚོད་དོ། །ཆུ་ཚོད་དྲུག་ཅུས་ཉིན་ཞག་ཏུ་འགྱུར། ཞེས་གསུངས་པས་སོ། །དེ་ལྟར་ཉིན་ཞག་རེ་ལ་ཆུ་ཚོད་དྲུག་ཅུར་བྱས་པ་དེ་ནི་དུས་ཀྱི་ཆུ་ཚོད་ཡིན་ཏེ། དུས་ཡུན་རིང་ཐུང་འདི་ཙམ་ཞིག་ལ་ལོངས་སྤྱོད་པའི་ཚད་སྟོན་བྱེད་ཡིན་པས་སོ། །འོ་ན་ཆུ་ཚོད་དྲུག་ཅུ་ཉིན་ཞག་གཅིག་གི་ལོངས་སྤྱོད་ཡིན་ན། ཁྱིམ་ཚེས་ཞག་གི་བསྒྱུར་བགོད་ལའང་ཆུ་ཚོད་དྲུག་ཅུ་སོགས་ཀྱིས་བྱེད་པ་སྣང་བས་སྐྱོན་དུ་མི་འགྱུར་རམ་ཞེ་ན། སྐྱོན་མེད་དེ། བྱ་སླར་དགོངས་ནས་དེ་ཉིད་དང་རྗེས་སུ་མཐུན་པ་ཙམ་དུ་མཛད་པ་ཡིན་པའི་ཕྱིར་ཏེ། ཉིན་ཞག་དང་མ་བསྟུན་ན་ཁྱིམ་ཚེས་གཉིས་རྩི་མི་ཤེས་པའི་ཕྱིར། ཞིབ་པར་འོག་ཏུ་སོ་སོ་འཆད་པར་འགྱུར་བ་ལས་ཤེས་པ་ཡིན་པས། འདིར་མི་སྤྲོའོ། །ཡང་ཆུ་སྲང་དྲུག་ཅུ་ལ་ཆུ་ཚོད་དུ་བྱེད་པ་ལས་གཞན་ཆུ་སྲང་ང་དྲུག་རྐང་བཅས་ལའང་ཆུ་ཚོད་གཅིག་ཏུ་མཛད་པ་འདུག་པས། དེ་གཉིས་མི་འགལ་ལམ་ཞེ་ན་མི་འགལ་ཏེ། ང་དྲུག་རྐང་བཅས་ལ་ཆུ་ཚོད་དུ་བྱེད་པ་དེ་ནི་དུ་བའི་རྩིས་སོགས་གནས་སྐབས་འགར་དགོངས་ནས་གསུངས་ཀྱི་དེ་ལས་གཞན་དུ་གསུངས་པ་མིན་པའི་ཕྱིར་དང་། རྒྱུད་ལས་དང་པོ་ནི་འཕོ་བ་བཅུ་གཉིས་དང་ཕྱི་མ་ནི་འཕོ་བ་བཅུ་ཉིན་ཞག་གཅིག་གི་ཆུ་སྲང་༣༦༠༠བཞིས་བསྒྱུར་བས་༡༤༤༠༠དེ་ལ་ཆུ་སྲང་༥༦བཞིས་བསྒྱུར་བ་ལ་རྐང་པ་གཅིག་པོ་བསྲེས་པས། ༢༢༥འབྱུང་བས་ཐོབ་པ་དབྱུག་གུ་༦༤སྟེ་ལྷག་མེད་དོ། །དྲུག་སྟེ་ནང་གི་དུས་སྦྱོར་བཅུ་གཉིས་དང་འཁོར་ལོ་བཞི་སོ་སོའི་འབྱུང་བ་བཞི་སྟེ་དཀྱིལ་འཁོར་བཅུ་དྲུག་གི་དབང་དུ་བྱས་ནས་གསུངས་པའི་ཕྱིར་རོ། །དེས་ན་ཆུ་ཚོད་གཅིག་ལ་ཆུ་སྲང་དྲུག་ཅུར་བྱས་པ་ནི་གྲགས་ཆེ་ཞིང་རྒྱུད་འདིར་དེ་ཉིད་ཤས་ཆེ་བའི་དབང་དུ་བྱས་ནས་གསུངས་པ་ཡིན་གྱི་མཐའ་གཅིག་ཏུ་མ་ངེས་སོ། །གཞན་ཡང་། སྟག་སྣའི་མདོ་ལས་ནི། བུད་མེད་རས་བལ་གྱི་ལ་བ་གཅིག་ཤིན་ཏུ་རིང་བ་དང་ཐུང་བ་མ་ཡིན་པར་འདྲེན་པའི་ཡུན་ནི་སྐད་ཅིག་ཐུང་ངུ་གཅིག །དེ་བརྒྱ་ཉི་ཤུ་ལ་སྐད་ཅིག་རིང་པོ། །དེ་དྲུག་ལ་ཐང་ཅིག །དེ་སུམ་ཅུ་ལ་ཡུད་ཙམ་གཅིག་དང་། ཡང་ན་མིག་འཛུམ་གཉིས་ལ་ཐང་ཅིག །དེ་བཞི་ལ་མཆོག་དགའ། དེ་བཅུ་དྲུག་ལ་དུས་ཚོད་གཅིགདེ་རེ་བཞི་ཡུད་ཙམ་གཅིག་དང་། ཡང་ཡུད་ཙམ་གྱི་ཕྱེད་ལ་ཆུ་ཚོད་གཅིག་ཏུ་བྱེད་པར་བཤད་ཅིང་། ཡུད་ཙམ་སུམ་ཅུ་ལ་ཉིན་ཞག་ཏུ་བྱེད་པ་མངོན་པ་དང་མཐུན་ཡང་། འདིར་བཞི་མཐོན་ཞེས་སོགས་ཡུད་ཙམ་སུམ་ཅུ་པོ་ལ་མིང་ཐ་དད་དུ་བརྗོད་པར་བྱེད་དོ། །མཛོད་ལས། སྐད་ཅིག་མ་བརྒྱ་ཉི་ཤུ་ལ། །ཞེས་སོགས་ཀྱི་དོན་ནི། ཀུན་མཁྱེན་ཆོས་རྗེས་ཡིད་བཞིན་རིན་པོ་ཆེའི་མཛོད་དུ། དུས་མཐའི་སྐད་ཅིག་མ་སྟེ་སེ་གོལ་གྱི། །དྲུག་ཅུ་རྩ་བཞིའི་ཆ་གཅིག་བརྒྱ་ཉི་ཤུ། །དེ་ཡི་སྐད་ཅིག་དྲུག་ཅུ་ཐང་ཅིག་སྟེ། །སུམ་ཅུ་ཡུད་ཙམ་སུམ་ཅུ་ཉིན་ཞག་གཅིག །ཅེས་གསལ་བར་མཛད་དེ་མངོན་པའི་ལུགས་སོ། །འཆི་མེད་མཛོད་ལས། མིག་འཛུམ་བཅོ་བརྒྱད་དེ་ཡི་གནས། །དེ་ནི་སུམ་ཅུ་ཆ་ཤས་སོ། །དེ་སུམ་ཅུ་ལ་སྐད་ཅིག་གོ། དེ་ནི་བཅུ་གཉིས་ཡུད་ཙམ་ཡིན། །དེ་སུམ་ཅུ་ལ་ཉིན་ཞག་གོ། ཞེས་སོ། །འདིར་ཁ་ཅིག་དྭགས་པཎ། མིག་འཛུམ་བཅོ་བརྒྱད་ལ་མཐར་གནས། དེ་སུམ་ཅུ་ལ་སྐད་ཅིག་ཏུ་བྱེད་པ་ནི་ནོར་བ་སྟེ། དེ་གཉིས་ཀྱི་བར་ན་ཀ་ལ་ཤ་ཞེས་པ་ཆ་ཤས་ཀྱི་མིང་རྒྱ་དཔེ་ལ་ཡོད་པའི་ཕྱིར་རོ། །རྡོ་རྗེ་མཁའ་འགྲོ་ལས་ནི། མིག་འཛུམ། ཆ་ཤས་སམ་ཡུད་ཙམ། སྐད་ཅིག །ཐང་ཅིག །ཅུང་ཟད་ཅེས་པ་རྣམས་གོང་ནས་གོང་དུ་དྲུག་འགྱུར་དང་། ཅུང་ཟད་སུམ་ཅུས་ཡི་གེ་ལྕི་བའི་དུས། དེ་བཅུས་སྲོགདེ་ཉེར་དྲུག་གིས་སྲང་། དེ་དྲུག་ཅུས་ཆུ་ཚོད། དེ་བརྒྱད་ཀྱིས་ཐུན་གཅིག །དེ་བརྒྱད་ཀྱིས་ཞག་གཅིག་ཏུ་གསུངས་ཏེ། དེ་ཉིད་ལས། མིག་འཛུམ་མིག་ནི་བཙུམས་པ་སྟེ། །མིག་བཙུམས་དྲུག་ལ་ཆ་ཤས་ནི། །གཅིག་ཅེས་བྱ་བར་བརྗོད་པ་ཡིན། །ཡུད་ཙམ་དྲུག་ནི་སྐད་ཅིག་སྟེ། །སྐད་ཅིག་དྲུག་ནི་ཐང་ཅིག་ཡིན། །ཐང་ཅིག་དྲུག་ནི་ཅུང་ཟད་ཡིན། །དུས་ཀྱི་གོ་རིམ་བྱ་བ་འདིས། །སུམ་ཅུ་ཐམ་པར་བསྒྱུར་བ་ལ། །ཡི་གེ་ལྕི་བའི་དུས་ཞེས་བརྗོད། །ཡི་གེ་ལྕི་བ་བཅུ་ལ་ནི། །སྲོག་གཅིག་ཅེས་བྱའི་དུས་སུ་བཤད། །དེ་ནི་བཅུ་གསུམ་བསྒྱུར་བ་ལས། །དེ་ཡང་གཉིས་སུ་བསྒྱུར་བ་ནི། །སྲང་གཅིག་ཅེས་ནི་བརྗོད་པ་ཡིན། །སྲང་ནི་དྲུག་ཅུ་ཐམ་པ་ལ། །ཆུ་ཚོད་གཅིག་ཏུ་བཞེད་པ་ཡིན། །དེ་བརྒྱད་ཐུན་གཅིག་ཅེས་བྱའོ། །དེ་བཞི་ལ་ནི་ཉིན་གཅིག་གོ། ཉིན་མཚན་དུས་ནི་མཉམ་པ་ལ། །མཚན་མོའང་དེ་དང་མཉམ་པར་བཤད། །ཅེས་སོ། །ཀྱེ་རྡོ་རྗེར། དབྱུག་གུ་དྲུག་ཅུ་རྩ་བཞི་དང་། །ཆུ་ཚོད་སུམ་ཅུ་རྩ་གཉིས་སོ། །ཞེས་ཞག་གཅིག་ལ་དབྱུག་གུ་རེ་བཞི་དང་ཆུ་ཚོད་སོ་གཉིས་སུ་གསུངས་པ་དང་། སྡོམ་འབྱུང་ལས། ཉིན་དང་མཚན་མོ་ཞག་ཡིན་ཏེ། །མེལ་ཚེ་ཐུན་ཞེས་བརྗོད་པ་ཡིན། །ཐུན་བཞི་ཉིན་མོར་ཤེས་པར་བྱ། །དེ་བཞིན་མཚན་མོའང་ཐུན་བཞིའོ། །ཞག་གཅིག་ལ་ནི་འཕོ་བ་ཡི། །ཡན་ལག་བཅུ་དྲུག་རྣམས་ཡིན་ཏེ། །ཞེས་དང་། ཐུན་རེ་ཡི་ནི་བཞི་ཆ་རྣམས། །ཆུ་ཚོད་དུ་ནི་བརྗོད་པས་ན། །ཉིན་ཞག་གཅིག་ལ་རྩ་རྣམས་ཀྱི། །སུམ་ཅུ་རྩ་གཉིས་ཤེས་པར་བྱ། །ཉིན་ཞག་གཅིག་ལ་དབྱུག་གུ་ནི། །དྲུག་ཅུ་རྩ་བཞིའི་ཚད་ཀྱིས་ནི། །ཞེས་ཞག་གཅིག་ལ་ཐུན་ཆེན་བརྒྱད། འཕོ་བ་བཅུ་དྲུག་ཆུ་ཚོད་སོ་གཉིས། དབྱུག་གུ་རེ་བཞིར་གསུངས་ཤིང་། ཀུན་མཁྱེན་ཆེན་པོས་ཀྱང་ཐེག་མཆོག་མཛོད་ཀྱི་རིམ་ཁང་བཅུ་གཉིས་པར་བརྟེན་པ་རླུང་གི་རབ་དབྱེ་འཆད་པའི་སྐབས་བཤད་པའང་དེ་དང་མཐུན་ཏེ། དེ་ཉིད་ལས། དེ་ཡང་ཆུ་ཚོད་དང་དབྱུག་གུའི་རྩིས་དང་སྦྱར་ན། ཞག་གཅིག་ལ་ཐུན་བརྒྱད། ཆུ་ཚོད་སུམ་ཅུ་རྩ་གཉིས། དབྱུག་གུ་དྲུག་ཅུ་རྩ་བཞི། འཕོ་བ་བཅུ་དྲུག་སྟེ། འཕོ་བ་རེ་རེ་ལ་རླུང་སྟོང་དང་སུམ་བརྒྱ་དང་ལྔ་བཅུའོ། །དབྱུག་གུ་རེ་རེ་ལ་སུམ་བརྒྱ་དང་སུམ་ཅུ་སོ་ཕྱེད་དང་བརྒྱད་བརྒྱད་རྒྱུའོ། །ཐུན་རེ་རེ་ལ་ཉིས་སྟོང་བདུན་བརྒྱ་རྒྱུའོ། །ཞེས་གསུངས་སོ། །དུས་ཀྱི་འཁོར་ལོ་འདིར་ནི་སྔར་བཤད་པ་ལྟར་འཕོ་བ་བཅུ་གཉིས་དང་བཅུ་དྲུག་པའི་ཚུལ་གཉིས་གསུངས་པ་ལས་སྲང་ནས་ཆུ་ཚོད་དུ་རྩི་ཚུལ་ལ་མི་གཅིག་ཀྱང་། གཉིས་ཀའང་དབུགས་དྲུག་ལ་སྲང་དུ་མཚུངས་ཤིང་། དབྱུག་གུ་དང་ཆུ་ཚོད་དོན་གཅིག་པར་འཆད་དོ། །ཆུ་ཚོད་ཆུ་སྲང་ལ་སོགས་པར་མིང་འདོགས་པའི་རྒྱུ་མཚན་ཡང་། འཇལ་བ་པོ་རྣལ་འབྱོར་པ་ལ་སོགས་པའི་དབང་དུ་བྱས་ནས་དབུགས་ཞེས་བཏགས་ཏེ། ནང་དབུགས་ལ་བརྟེན་ནས་གཞལ་བས་སོ། །རྒྱལ་པོ་ལ་སོགས་པའི་དབང་དུ་བྱས་ནས་དབྱུག་གུའི་ཆུ་ཚོད་དང་ཆུ་སྲང་ཞེས་བཏགས་ཏེ། ཕྱིའི་འཇལ་བྱེད་ལ་བརྟེན་ནས་གཞལ་བས་སོ། །དེ་ལ་ནང་གི་འཇལ་བྱེད་ནི། བསྡུས་རྒྱུད་ལས། ཕྲ་དབུགས་རྒྱུ་ཞེས་གསུངས་པའི་འགྲེལ་པར། མིའི་དབུགས་གཅིག་གི་ཉི་ཁྲི་ཆིག་སྟོང་དྲུག་བརྒྱའི་ཆ་གཅིག་ལ་ཕྲ་མོའི་དབུགས་གཅིག །དེ་འདྲའི་དབུགས་དྲུག་ལ་སྲིན་བུའི་རིགས་སོགས་ཀྱི་སྲང་གཅིག །དེ་འདྲ་དྲུག་ཅུ་ལ་ཆུ་ཚོད་གཅིག །དེ་འདྲ་དྲུག་ཅུ་ལ་སྲིན་བུའི་རིགས་ལ་སོགས་པའི་ཉིན་ཞག་གཅིགདེ་འདྲའི་ཉིན་ཞག་གཅིག་ལ་མིའི་དབུགས་གཅིག །དེ་འདྲའི་དབུགས་ཉི་ཁྲི་ཆིག་སྟོང་དྲུག་བརྒྱ་མིའི་ཉིན་ཞག་གཅིག་གི་ཚད་དུ་བཤད་དེ། རྩ་རྒྱུད་ལས། དྲུག་བརྒྱ་རྣམས་ཀྱིས་ལྷག་པ་ཡི། །སྟོང་ཕྲག་ཉི་ཤུ་རྩ་གཅིག་པོ། །ཞེས་དང་། བསྡུས་རྒྱུད་ལས། དབུགས་དྲུག་གིས་ནི་ཆུ་སྲང་ཞེས་སོགས་སྔར་དྲངས་པ་དང་། རྫོགས་པ་ཆེན་པོའི་རྒྱུད་ཐལ་འགྱུར་ལས་ཀྱང་། རྩ་ལ་བརྟེན་པའི་རླུང་དག་ནི། །ཉི་ཁྲི་དང་ནི་སྟོང་ཕྲག་གཅིག །དྲུག་བརྒྱ་དག་ཏུ་འགྱུ་བ་ནི། །འགྱུ་བ་ཆེན་པོའི་རླུང་དུ་འདོད། །ཅེས་དང་། སྡོམ་འབྱུང་ལས་ཀྱང་། དྲུག་བརྒྱ་རྣམས་ཀྱིས་ལྷག་པ་ཡི། །སྟོང་ཕྲག་ཉི་ཤུ་རྩ་གཅིག་རྣམས། །ཞེས་སོགས་རྒྱུད་དང་། མདོ་སྡེ་དག་ལས་མཐུན་པར་འབྱུང་ཞིང་། ཕྱི་རྒྱུད་དབྱངས་འཆར་ལས་ཀྱང་། ལུས་ཅན་རྣམས་ཀྱི་ཞག་གཅིག་ལ། །ཞེས་སོགས་འདི་དང་མཐུན་པར་བཤད་དོ། །དེའི་ཕྱིར་དབུགས་གྲངས་དེ་ཉིད་དྲུག་གིས་བགོས་པས་སྲང་། དེ་དྲུག་ཅུ་ལ་ཆུ་ཚོད། དེ་དྲུག་ཅུ་ལ་ཉིན་ཞག་གཅིག་ཏུ་བརྩི་བ་ནི་ནང་རླུང་སེམས་ལ་གཙོ་བོར་བྱེད་པའི་རྣལ་འབྱོར་པ་རྣམས་ཀྱི་བྱ་བའོ། །ཕྱིའི་འཇལ་བྱེད་ནི། རྡོ་རྗེ་མཁའ་འགྲོ་ལས། ཟངས་མ་སྲང་ནི་བཅུ་གཉིས་ལ། །སྣོད་ནི་དཔངས་སུ་སོར་བརྒྱད་དང་། །རྒྱར་ནི་སོར་མོ་བཅུ་གཉིས་པ། །ལེགས་པ་ཉིད་དུ་བརྡུང་བར་བྱ། །གསེར་ནི་འོ་སེ་སུམ་འོ་སེ་གཉིས་ལ་སེ་བ་གང་ཡིན་དོན་ལ་སེ་བ་བཅོ་ལྔ་ཅུ་ལས། །སོར་དྲུག་པ་ཡི་ཚད་དག་ཏུ། །ཐུར་མ་ལེགས་པར་བརྡུངས་ནས་ནི། །ཐུར་མ་དེ་ཡི་བུ་ག་ནི། །ཟངས་མའི་སྣོད་ལ་མཁས་པས་དབུག །ཆུ་ནི་རྙོག་མ་མེད་པ་ལས། །སྲང་ནི་དྲུག་ཅུའི་ཚད་དུ་བྱ། །སྲང་འདིས་ཆུ་ཚོད་ཚད་ཡིན་ཏེ། །སྐྱེ་བོ་རྣམས་ལ་ཕན་ཕྱིར་བཤད། །ཅེས་གསུངས་པ་ལྟར་རྒྱ་གར་ན་རྒྱལ་པོའི་མེལ་ཚེ་བ་རྣམས་ཀྱིས་ཆུ་ཚོད་བགྲང་བའི་ཚེ། འདི་ལྟ་བུའི་ཟངས་སྣོད་དུ་གསེར་ཐུར་བཅུག་པ་དེ་ཉིད་ཀྱི་ཕྱོགས་བཞིར་སྲད་བུ་བཏགས་ལ། སྣོད་ཆུ་གཙང་གིས་བཀང་བའི་སྟེང་དུ་ལྡིང་ཐབས་སུ་བཞག་པས་བུ་ག་ནས་གྱེན་དུ་འོངས་པའི་ཆུས་སྣོད་གང་བ་ན་ཆུའི་གཏིང་དུ་བྱིང་བར་འགྱུར་ལ། དེའི་ཚེ་རྔ་ལ་དབྱུག་གུ་གཅིག་བསྣུན། ཡང་སྲད་བུ་ནས་བཟུང་སྟེ་སྣོད་སྟོང་པ་ཤིང་གི་དྲ་བས་ཁ་བཅད་པའི་སྟེང་དུ་བཞག་ནས་ཆུ་ཟགས་སུ་བཅུག་པ་ལས་ཟད་པར་གྱུར་པ་ན་རྔ་ལ་དབྱུག་གུ་གཅིག་བསྣུན་པའི་ཚུལ་གྱིས་སྣོད་གང་སྟོངས་གཉིས་གཉིས་ལ་ཆུ་ཚོད་རེ་རེ་བྱས་ནས་རྩི་བར་གྲགས་ལ། ཆུ་སྲང་ནི་གཞོང་པའི་ནང་ལ་རི་མོ་བྱས་ཏེ་དེར་ཆུས་སླེབ་པ་ལ་ཚད་འཛིན་པར་ཁ་ཅིག་ནས་བཤད་དོ། །འདི་ལྟར་ཆུ་ཚོད་དྲུག་ཅུར་འདོད་པའི་ལུགས་ལའང་གཉིས་ཏེ། དུས་ཀྱི་ཆུ་ཚོད་དང་། ཡུལ་གྱི་ཆུ་ཚོད་དོ། །དང་པོ་ནི། བཤད་མ་ཐག་པ་ཉིད་ཡིན་ལ། གཉིས་པ་ནི། རྩ་རྒྱུད་ལས། ཉིན་གཅིག་རྒྱུ་སྐར་གྱིས་བསྒྱུར་གང་། །ཆུ་ཚོད་དྲུག་ཅུས་དེ་བཞིན་ཏེ། །ཞེས་གསུངས་པ་ལྟར། གྲོ་ཞུན་བྱི་ཞུན་གཉིས་གཅིག་ཏུ་བསྡོམས་པའི་རྒྱུ་སྐར་ཉི་ཤུ་རྩ་བདུན་གྱི་སྐར་ཁོངས་རེ་རེའི་སའི་ཁྱོན་ལ་ཆུ་ཚོད་དྲུག་ཅུ་རེར་བྱས་ནས་བཞག་པས་ཁྱོན་བསྡོམས་ན་སྟོང་དང་དྲུག་བརྒྱ་ཉི་ཤུར་འགྱུར་བའི་ཆུ་ཚོད་དེ་ལ་ནི་ཡུལ་གྱི་ཆུ་ཚོད་ཅེས་བྱ་སྟེ། ཡུལ་ལམ་གཞི་གང་ལ་ལོངས་སྤྱོད་པར་བྱ་བའི་ཚད་སྟོན་བྱེད་ཀྱི་དབང་དུ་བྱས་ནས་བཞག་པར་བཞེད་པ་ཉིད་རྒྱུད་འགྲེལ་གྱི་དགོངས་པ་ཡིན་པའི་ཕྱིར། མདོར་ན་ཡུལ་དུས་ཀྱི་ཆུ་ཚོད་ཆུ་སྲང་དབུགས་ཆ་རྣམས་མིང་འདྲ་ཡང་དོན་གཏན་ནས་མི་འདྲ་སྟེ། རེས་ཀྱི་གཟའ་དེས་དུས་ཀྱི་ཆུ་ཚོད་དྲུག་ཅུ་རྫོགས་པར་སྤྱོད་ནུས་ཀྱང་། དེའི་བར་ལ་ཡུལ་གྱི་ཆུ་ཚོད་དྲུག་ཅུ་རྫོགས་པར་སྤྱོད་མི་ནུས་པའི་ཕྱིར་དང་། དུས་ཀྱི་ཆུ་ཚོད་ནི་སྐད་ཅིག་ལ་སོགས་པས་གཞལ་བར་བྱ་བ་ཡིན་ལ། ཡུལ་གྱི་ཆུ་ཚོད་ནི་དཔག་ཚད་ལ་སོགས་པས་གཞལ་བྱ་ཡིན་པས་སོ། །འོ་ན་ཡུལ་གྱི་ཆུ་ཚོད་དེ་དཔག་ཚད་སོགས་ཀྱིས་ཇི་ལྟར་གཞལ་ཞེ་ན། ཉི་མས་ཉིན་ཞག་གཅིག་ལ་འཁོར་བའི་གོ་ལའི་རི་མོ་ཟླུམ་པོའི་ཁྱོན་ལ་དཔག་ཚད་སུམ་འབུམ་བདུན་ཁྲི་ལྔ་སྟོང་ཡོད་ཅིང་། དེ་ལ་རྒྱུ་སྐར་གྱི་ཆུ་ཚོད་སྟོང་དྲུག་བརྒྱ་ཉི་ཤུས་བགོས་པའི་ནོར་ནི་ཡུལ་གྱི་ཆུ་ཚོད་རེའི་རྒྱའི་ཚད་དུ་འགྱུར་ཏེ། དེ་ལ་དཔག་ཚད་ཉིས་བརྒྱ་དང་སོ་གཅིག །རྒྱང་གྲགས་གཅིག །གཞུ་འདོམ་སྟོང་བརྒྱད་བརྒྱ་དང་ང་གཅིག །ཁྲུ་གསུམ། སོར་དགུ། ནས་དྲུག་ལྷག་ཙམ་རེ་འོང་ཞིང་། དེ་ལྟ་བུའི་དཔག་ཚད་ལ་སོགས་པའི་གྲངས་དེ་ལ་དྲུག་ཅུས་བགོས་པས་ཡུལ་གྱི་ཆུ་སྲང་རེའི་ས་ཁྱོན་ལ་དཔག་ཚད་གསུམ། རྒྱང་གྲགས་གསུམ། གཞུ་འདོམ་བརྒྱད་བརྒྱ་རེ་བཞི། མཐོ་གང་། སོར་དྲུག །ནས་བདུན་ལྷག་ཙམ་འོང་། དེ་ལ་སྔར་བཞིན་དྲུག་གིས་བགོས་པས། ཡུལ་གྱི་དབུགས་རེའི་ས་ཁྱོན་ལ་རྒྱང་གྲགས་གཉིས། གཞུ་འདོམ་སྟོང་ཆིག་བརྒྱ་ཞེ་བཞི། སོར་གསུམ། ནས་གཅིག་ལྷག་ཙམ་འོང་། དེ་ལ་སྔར་བཞིན་བུག་མཁའ་མིག་བུག་ཡིད་ཀྱིས་བགོས་པས། ཡུལ་གྱི་བུག་སོགས་ཀྱིས་ཁྱོན་རེ་ལ། སོར་གསུམ་དང་། ནས་གཉིས་ལྷག་ཙམ་འོང་བ་ཡིན་ནོ། །དེ་དག་གི་ཕྱིར་ན་གཉིས་པོ་དེ་ལས་སྔ་མ་དུས་ཀྱི་ཆུ་ཚོད་ཆུ་སྲང་དབུགས་རྣམས་ནི་དངོས་མིང་ཡིན་ལ། ཕྱི་མ་ཡུལ་གྱི་ཆུ་ཚོད་དང་ཆུ་སྲང་དབུགས་རྣམས་ནི་ཟླའོ་དུས་ཀྱིས་བཏགས་པས་བཏགས་མིང་གི་ཆུ་ཚོད་སོགས་ཡིན་གྱི་དངོས་མ་ཡིན་ཞིང་། ཡུལ་དུས་གཉིས་ཀའི་ཆ་ཤས་ནི་དུམ་བུའམ་ཡན་ལག་སྟེ་དངོས་མིང་གིས་བཏགས་པའོ། །
གསུམ་པ་བསྡུ་བ་ནི། དེ་ལྟར་གྲངས་དང་རི་མོ་ལ་ཐོག་མར་འཇུག་པའི་ཡན་ལག་མདོ་ཙམ་ཞིག་བཤད་པ་སྟེ། ཅིའི་ཕྱིར་ཞེ་ན། བྱིས་པ་རྣམས་ཀྱི་དོན་དུའོ། །རྩིས་ཀྱི་མན་ངག་ཉིན་བྱེད་སྣང་བ་ལས། སྔོན་འགྲོ་བྱ་བའི་རིམ་པ་བཤད་པའི་སྐབས་ཏེ་དང་པོའི་འགྲེལ་པའོ། །ཞེས་ལེའུའི་སྐབས་བསྡུས་སོ།། །།