གནས་གཉིས་པ་དབང་པོ་བསྟན་པའི་འགྲེལ་པ།
གཉིས་པ་དབང་པོ་བསྟན་པ་ལ། དབང་པོའི་རང་བཞིན། འདུས་བྱས་ཆོས་ཀྱི་སྐྱེ་ཚུལ། རྒྱུ་རྐྱེན་འབྲས་བུའིི་འབྱུང་ཚུལ་དང་གསུམ། དང་པོ་ལ། དབང་པོར་འཇོག་ཚུལ། གྲངས་ངེས། ངོ་བོ། རབ་དབྱེ་དང་བཞི་ལས། དང་པོ་ལ། བྱེ་སྨྲའི་ལུགས་དང་། མདོ་སྡེ་པའི་ལུགས་གཉིས། དང་པོ་ནི། ལྔ་པོ་རྣམས་ནི་དོན་བཞི་ལ། །དབང་བྱེད་བཞི་རྣམས་གཉ ིས་ལ་ལོ། །ལྔ་དང་བརྒྱད་པོ་དེ་རྣམས་ནི། །ཀུན་ནས་ཉོན་མོངས་རྣམ་བྱང་ལ། །ཞེས་པ་སྟེ། མིག་དབང་སོགས་ལྔ་ནི་དོན་བཞི་ལ་དབང་བྱེད་དེ། ལུས་བསྲུང་བ། ལུས་མཛེས་པ། ཡུལ་ལ་དམིགས་པ། རང་འབྲས་རྣམ་ཤེས་བསྐྱེད་པ་དང་བཞི་ལ་དབང་བྱེད། ཕོ། མོ། སྲོག །ཡིད་དབང་དང་བཞི་ནི་དོན་གཉིས་གཉིས་ལ་དབང་བྱེད་དེ། ཕོ་དབང་གིས་རྟེན་གྱི་གང་ཟག་ཕོ་ཉིད་དུ་མཚོན་པ་དང་། ཕོའི་རང་བཞིན་ལ་དབང་བྱེད། མོ་དབང་གིས་ཀྱང་དེ་བཞིན་དུ་དབང་བྱེད། སྲོག་དབང་གིས་ཕུང་པོའི་རིགས་འདྲ་སྔ་མ་ལས་ཕྱི་མ་འབྱུང་བ་དང་། འབྱུང་བ་གནས་པར་དབང་བྱེད། ཡིད་དབང་གིས་ལུས་ངག་གི་ལས་ཡིད་དང་མཐུན་པར་འཇུག་པ་ལ་དབང་བྱེད། ཚོར་དབང་ལྔ་དང་རྣམ་བྱང་གི་དབང་པོ་བརྒྱད་པོ་རྣམས་ནི་ཀུན་ནས་ཉོན་མོངས་དང་རྣམ་བྱང་ལ་རིམ་བཞིན་དབང་བྱེད་དོ། །གཉིས་པ་ནི། རང་གི་དོན་དང་ཐམས་ཅད་ལ། །དམིགས་པར་དབང་བྱེད་ཕྱིར་དབང་དྲུག །མོ་ཉིད་ཕོ་ཉིད་ལ་དབང་ཕྱིར། །ལུས་ལས་མོ་དབང་ཕོ་དབང་དག །རིགས་གནས་ཀུན་ནས་ཉོན་མོངས་དང་། །རྣམ་པར་བྱང་ལ་དབང་བྱེད་ཕྱིར། །སྲོག་དང་ཚོར་བ་རྣམས་དང་ནི། །དད་སོགས་དབང་པོ་ལྔར་འདོད་དོ། །མྱ་ངན་འདས་སོགས་གོང་ནས་གོང་། །འཐོབ་པ་ལ་ནི་དབང་བྱེད་ཕྱིར། །ཀུན་ཤེས་བྱེད་དང་ཀུན་ཤེས་དང་། །དེ་བཞིན་ཀུན་ཤེས་ལྡན་དབང་པོ། །ཞེས་པ་སྟེ། མིག་སོགས་དབང་པོ་དྲུག་ལ་དབང་པོ་ཞེས་བྱ་ཏེ། དང་པོ་ལྔ་རང་རང་གི་དོན་གཟུགས་སོགས་དང་། ཡིད་དབང་གིས་ཆོས་ཐམས་ཅད་ལ་དམིགས་པར་དབང་བྱེད་པའི་ཕྱིར། ཕོ་མོའི་དབང་པོས་དེ་གཉིས་ཀྱི་རང་བཞིན་ལ་དབང་བྱེད་པ་དང་། དེ་གཉིས་ལུས་དབང་ཡིན་ཏེ་རང་འབྲས་ལུས་ཤེས་ཀྱི་བདག་རྐྱེན་བྱེད་པའི་རིགས་གནས་ནང་གཟུགས་དྭངས་པ་ཡིན་པའི་ཕྱིར། སྲོག་དབང་ཕུང་པོའི་རིགས་འདྲ་གནས་པར་དབང་བྱེད་པ་དང་། ཚོར་དབང་རྣམས་ཀུན་ནས་ཉོན་མོངས་རྒྱས་པ་ལ་དབང་བྱེད་པ་དང་། དད་སོགས་དབང་པོ་ལྔ་རྣམ་བྱང་གི་ཆོས་གོང་འཕེལ་དུ་འགྱུར་བ་ལ་དབང་བྱེད་པ་དང་། མི་ཤེས་པ་ཀུན་ཤེས་པའི། ཀུན་ཤེས་པའི། ཀུན་ཤེས་ལྡན་དབང་གསུམ་གྱིས་ལྷག་མེད་མྱང་འདས་སོགས་གོང་ནས་གོང་དུ་འཐོབ་པ་ལ་དབང་བྱེད་པའི་ཕྱིར།
གཉིས་པ་གྲངས་ངེས་ལ། བྱེ་སྨྲའི་ལུགས་དང་། མདོ་སྡེ་པའི་ལུགས་གཉིས། དང་པོ་ནི། སེམས་ཀྱི་རྟེན་དང་དེའི་བྱེ་བྲག །གནས་དང་ཀུན་ནས་ཉོན་མོངས་ཉིད། །ཚོགས་དང་རྣམ་བྱང་ཇི་སྙེད་པ། །དབང་པོ་དག་ཀྱང་དེ་སྙེད་དུ། །ཞེས་པ་སྟེ། སེམས་རྣམ་པར་ཤེས་པ་ཚོགས་དྲུག་གི་རྟེན་བྱེད་པའི་དབང་དུ་བྱས་ནས་དབང་པོ་དྲུག་བཞག །སེམས་ཅན་དེའི་བྱེ་བྲག་ཕོ་མོ་ལ་དབང་བྱེད་པ་དང་། ཕུང་པོའི་རིགས་འདྲ་གནས་བྱེད་དང་། ཀུན་ནས་ཉ ོན་མོངས་ལ་དབང་བྱེད་དུ་བྱས་ནས་ཚོར་བའི་ཕུང་པོ་ལྔ། རྣམ་བྱང་གི་ཚོགས་ལ་དབང་བྱེད་དུ་བྱས་ནས་རྣམ་བྱང་གི་དབང་པོ་བརྒྱད་རྣམས་རིམ་བཞིན་དེ་དང་དེའི་དབང་པོར་བཞག་གོ །གཉིས་པ་ནི། ཡང་ན་འཇུག་པའི་རྟེན་དང་ནི། །སྐྱེ་དང་གནས་དང་ཉེར་སྤྱོད་ལས། །བཅུ་བཞི་རེ་བཞིན་ལྡོག་པ་ལ། །དབང་པོ་རྣམས་ནི་གཞན་ཡིན་ནོ། །ཞེས་པ་སྟེ། ཡང་ན་གང་ཟག་གཅིག་འཁོར་བར་སྐྱེ་བའི་དབང་དུ་བྱས་ནས་ཀུན་ནས་ཉོན་མོངས་ཀྱི་དབང་པོ་བཅུ་བཞི། དེར་འཇུག་པའི་རྟེན་གྱི་དབང་དུ་བྱས་ནས་མིག་སོགས་དབང་པོ་དྲུག །དེར་སྐྱེ་དབང་དུ་བྱས་ནས་ཕོ་མོའི། དེར་གནས་དབང་དུ་བྱས་ནས་སྲོག་དབང་། དེར་ཡུལ་ཉེ་བར་ལོངས་སྤྱོད་དབང་དུ་བྱས་ནས་ཚོར་དབང་ལྔ་བཞག་པའོ། །དེ་བཞིན་ལྡོག་པ་ལ་སྟེ། ཟག་མེད་དུ་འཇུག་དབང་དུ་ཕྱི་མ་བརྒྱད་བཞག་པ་ཡིན་ཏེ། དེར་འཇུག་རྟེན་གྱི་དབང་དུ་དད་སོགས་དབང་པོ་ལྔ། དེར་སྐྱེ་དབང་དུ་མི་ཤེས་པ་ཀུན་ཤེས་པ། དེར་གནས་དབང་དུ་ཀུན་ཤེས་པའི། གནས་ནས་ཟག་མེད་ཀྱི་བདེ་བ་ལོངས་སྤྱོད་པའི་དབང་དུ་བྱས་ནས་ཀུན་ཤེས་ལྡན་པའི་དབང་པོ་བཞག་པའོ། །
གསུམ་པ་ངོ་བོ་ནི། ཕོ་མོ་དད་སོགས་ལྔ་སྲོག་དབང་རྣམས་གོང་འོག་ནས་འབྱུང་། འདིར་ཚོར་དབང་ལྔ་དང་། དྲི་མེད་ཀྱི་དབང་པོ་གསུམ་ལས། དང་པོ་ནི། ལུས་ཚོར་སིམ་པ་མ་ཡིན་གང་། །སྡུག་བསྔལ་དབང་པོའོ་སིམ་པ་ནི། །བདེ་བའོ་བསམ་གཏན་གསུམ་པ་ན། །སེམས་ཀྱི་དེ་ནི་བདེ་དབང་པོ། །གཞན་ན་དེ་ཡིད་བདེ་བ་ཡིན། །སེམས་ཀྱི་སིམ་པ་མ་ཡིན་པ། །ཡིད་མི་བདེ་བའོ་བཏང་སྙོམས་ནི། །བར་མའོ་གཉིས་ཀའི་མི་རྟོག་ཕྱིར། །ཞེས་པ་སྟེ། སིམ་པ་མ་ཡིན་པར་རང་སྟོབས་ཀྱིས་གདུང་བར་ཉམས་སུ་མྱོང་བའི་ལུས་ཚོར་ལ། ཚོར་བ་སྡུག་བསྔལ་གྱི་དབང་པོར་འཇོག །སིམ་པར་ཉམས་སུ་མྱོང་བའི་ལུས་ཚོར་དང་། བསམ་གཏན་གསུམ་པ་ན་སེམས་ཀྱི་ཚོར་བ་དེ་ནི་བདེ་བའི་དབང་པོར་འཇོག །གསུམ་པའི་སེམས་བདེ་ལས་གཞན་པའི་སིམ་པར་ཉམས་སུ་མྱོང་བའི་ཡིད་ཚོར་ལ་ཡིད་བདེར་འཇོག །སིམ་པ་མ་ཡིན་པར་རང་སྟོབས་ཀྱིས་གདུང་བར་ཉམས་སུ་མྱོང་བའི་ཡིད་ཚོར་ལ་ཡིད་མི་བདེར་འཇོགསིམ་གདུང་བར་མ་ཙམ་དུ་མྱོང་བའི་སེམས་བྱུང་ལ་བཏང་སྙོམས་ཀྱི་དབང་པོར་འཇོག་སྟེ། དེ་སིམ་གདུང་གཉིས་ཀར་མི་རྟོག་པའི་ཕྱིར། དེ་ལ་དབང་ཤེས་དང་ཡིད་ཤེས་ཀྱི་ཆ་གཉིིས་ཀ་ཡོད་དོ། །གཉིས་པ་དྲི་མེད་ཀྱི་དབང་པོ་གསུམ་ནི། མཐོང་སྒོམ་མི་སློབ་ལམ་ལ་དགུ། །ཞེས་པ་སྟེ། མཐོང་ལམ་གྱིས་མི་ཤེས་པ་ཀུན་ཤེས་པའི་དབང་པོ་བསྡུས། སྒོམ་ལམ་གྱིས་ཀུན་ཤེས་པའི་དེ་བསྡུས། མི་སློབ་ལམ་གྱིས་ཀུན་ཤེས་ལྡན་དབང་བསྡུས་ཤིང་། དེ་རེ་རེ་ལའང་དབྱེ་ན་དགུ་དགུ་ཡོད་དེ། དང་པོའི་ངོ་བོར་གྱུར་པའི་དད་སོགས་ལྔ། ཡིད་དབང་། ཚོར་བདེ། ཡིད་བདེ། བཏང་སྙོམས་དང་དགུར་ཡོད་པའི་ཕྱིར། དེས་ཕྱི་མ་གཉིས་འགྲེ།
བཞི་པ་དབང་པོའི་དབྱེ་བ་ལ། དབང་པོ་ཡིན་མིན་གྱི་སྒོ་ནས། དེ་རྙེད་གཏོང་གི་ཚུལ། དགེ་སྦྱོང་ཚུལ་གྱི་འབྲས་བུ་དབང་པོ་དུས་འཐོབ་ལ་དཔྱད། དབང་པོའི་ལྡན་ཚུལ་ལ་དཔྱད་པའོ། །དང་པོ་ལ་གཉིས་ཚན་གྱི། གསུམ་ཚན་གྱི་སྒོ་ནས་དབྱེ་བ་གཉིས། དང་པོ་ལ། ཟག་པ་དང་བཅས་མ་བཅས་ཀྱི། རྣམ་སྨིན་ཡིན་མིན་གྱི། རྣམ་སྨིན་དང་བཅས་པའི་སྒོ་ནས་དབྱེ་བ་དང་གསུམ། དང་པོ་ནི། གསུམ་ཡིན་གསུམ་ནི་དྲི་མ་མེད། །གཟུགས་ཅན་སྲོག་དང་སྡུག་བསྔལ་དག །ཟག་དང་བཅས་པ་དགུ་རྣམ་གཉིས། །ཞེས་པ་སྟེ། བཤད་མ་ཐག་པའི་དྲི་མེད་ཀྱི་དབང་པོ་གསུམ་ནི་མཐའ་གཅིག་ཏུ་ཟག་མེད་ཡིན་ཏེ། འཕགས་ལམ་གྱི་ངོ་བོར་གྱུར་པའི་དེ་ཡིན་པའི་ཕྱིར། གཟུགས་ཅན་གྱི་དབང་པོ་བདུན་དང་། སྲོག །ཚོར་སྡུག །ཡིད་མི་བདེ་དང་བཅུ་ནི་ཟག་བཅས། དད་སོགས་ལྔ། ཚོར་བདེ། ཡིད་བདེ། བཏང་སྙོམས། ཡིད་དབང་དང་དགུ་ལ་ཟག་བཅས་ཟག་མེད་གཉིས་ཀ་ཡོད་དོ། །གཉིས་པ་ནི། སྲོག་ནི་རྣམ་སྨིན་བཅུ་གཉིས་གཉིས། །ཐ་མ་བརྒྱད་དང་ཡིད་མི་བདེ། །མ་གཏོགས་པ་སྟེ། ཞེས་པས། སྲོག་རྣམ་སྨིན་སྐྱེས་ཡིན་བྱས་པ་ལ། ཁོ་ན་རེ། དགྲ་བཅོམ་པ་འགའ་ཞིག་ཚེ་འདོར་ལེན་ལ་དབང་ཐོབ་པ་མ་ཡིན་པར་འགྱུར་ཞེ་ན། འདིའི་ལན་ལ་ཚེ་ལ་རྣམ་སྨིན་གྱིས་ཁྱབ་པ་དང་། མ་ཁྱབ་པར་འདོད་པའི་ལུགས་གཉིས་ལས། དང་པོ་དགྲ་བཅོམ་པ་འཆི་ཀར་གྱུར་པ་ན་ལོངས་སྤྱོད་རྣམས་སྦྱིན་པར་གཏང་ནས། ཚེ་འདིའི་འཐུད་དང་ཕྱི་མའི་འཐུད་དུ་གྱུར་ཅིག་ཅེས་བརྗོད་པ་ལས། ཚེ་འདོར་བ་ལྟ་བུ་ལ་བྱེད། གཉིས་པ་ནི། བཞི་པའི་རབ་མཐའ་ཐོབ་པའི་དགྲ་བཅོམ་པ་འགའ་ཞིག་གིས་འབྱུང་བ་བྱིན་གྱིས་བརླབས་ནས། དེ་དང་དུས་མཉམ་དུ་གྱུར་པའི་སྲོག་ཀྱང་རྒྱས་པ་ལ་བྱེད། འདི་དབྱངས་སྒྲོག་གི་ལུགས་སོ། །གཟུགས་ཅན་གྱི་དབང་པོ་བདུན། ཚོར་བ་ཡིད་བདེ་མ་གཏོགས་པ་གཞན་བཞི་དང་བཅུ་གཉིས་ལ་རྣམ་སྨིན་ཡིན་མིན་གཉིས་ཀ་ཡོད། ཐ་མ་རྣམ་བྱང་གི་དབང་པོ་བརྒྱད་དང་ཡིད་མི་བདེ་རྣམ་སྨིན་དུ་མ་གཏོགས་སོ། །གསུམ་པ་ནི། དེ་གཅིག་ནི། རྣམ་པར་སྨིན་བཅས་བཅུ་རྣམ་གཉིས། །ཞེས་པ་སྟེ། བཤད་མ་ཐག་པའི་ཡིད་མི་བདེ་དེ་གཅིག་པུ་རྣམ་སྨིན་དང་བཅས་པ་ཡིན། ཡིད་དབང་། ཚོར་བ་གཞན་བཞི། དད་སོགས་ལྔ་སྟེ་བཅུ་ལ་རྣམ་སྨིན་དང་བཅས་མ་བཅས་གཉིས་ཀའི་ཆ་ཡོད་པའོ། །གཉིས་པ་གསུམ་ཚན་གྱི་སྒོ་ནས་དབྱེ་བ་ལ། དགེ་སོགས་གསུམ་གྱི། ཁམས་གསུམ་གྱི། མཐོང་སྤང་སོགས་གསུམ་གྱི་སྒོ་ནས་དབྱེ་བ་དང་གསུམ། དང་པོ་ནི། ཡིད་དང་ཚོར་གཞན་དད་ལ་སོགས། །དགེ་བ་བརྒྱད་ཡིད་མི་བདེ་བ། །རྣམ་གཉིས་ཡིད་དང་ཚོར་གཞན་ནི། །རྣམ་གསུམ་གཞན་ནི་རྣམ་པ་གཅིག །ཅེས་པ་སྟེ། རྣམ་བྱང་དབང་པོ་བརྒྱད་མཐའ་གཅིག་ཏུ་དགེ་བ། ཡིད་མི་བདེ་ལ་དགེ་མི་དགེ་གཉིས་ཀའི་ཆ་ཡོད། ཡིད་དབང་། ཚོར་བ། གཞན་བཞི་སྟེ་ལྔ་ལ་དགེ་མི་དགེ་ལུང་མ་བསྟན་གསུམ་ཀ་ཡོད། དེ་རྣམས་ལས་གཞན་གཟུགས་ཅན་གྱི་དབང་པོ་བདུན་སྲོག་དབང་དང་བརྒྱད་ནི་རྣམ་པ་གཅིག་ཏུ་ལུང་མ་བསྟན་ཡིན། གཉིས་པ་ནི། དྲི་མེད་མ་གཏོགས་འདོད་པར་གཏོགས། །ཕོ་མོའི་དབང་དང་སྡུག་བསྔལ་དག །མ་གཏོགས་གཟུགས་གཏོགས་གཟུགས་ཅན་དང་། །བདེ་བའང་མ་གཏོགས་གཟུགས་མེད་གཏོགས། །ཞེས་པ་སྟེ། དྲི་མེད་ཀྱི་དབང་པོ་གསུམ་མ་གཏོགས་པ་བཅུ་དགུ་འདོད་པར་གཏོགས། དེའི་སྟེང་ནས་ཕོ་མོའི། ཚོར་བ་སྡུག་བསྔལ། ཡིད་མི་བདེ་སྟེ་བཞི་མ་གཏོགས་པའི་བཅོ་ལྔ་གཟུགས་སར་གཏོགས། དེའི་སྟེང་ནས་གཟུགས་ཅན་རྣམས་དང་། བདེ་བ་མ་གཏོགས་པའི་ལྷག་མ་བརྒྱད་གཟུགས་མེད་ཀྱི་སར་གཏོགས་སོ། །གསུམ་པ་ནི། ཡིད་དང་ཚོར་བ་གསུམ་རྣམ་གསུམ། །གཉིས་ཀྱི་སྤང་བྱ་ཡིད་མི་བདེ། །དགུ་ནི་སྒོམ་པས་ལྔ་པོ་ནི། །སྤང་བར་བྱ་མིན་ཡང་གསུམ་མིན། །ཞེས་པ་སྟེ། ཡིད་དབང་། ཚོར་བདེ། ཡིད་བདེ། བཏང་སྙོམས་རྣམས་ལ་མཐོང་སྤང་སྒོམ་སྤང་དེ་གཉིས་ཀ་མིན་པའི་ཆ་ཡོད། ཚོར་བ་ཡིད་མི་བདེ་ལ་མཐོང་སྒོམ་གྱི་སྤང་བྱའི་ཆ་ཡོད། གཟུགས་ཅན་གྱི་དབང་པོ་བདུན། སྲོག །ཚོར་བ་སྡུག་བསྔལ་ཏེ་དགུ་སྒོམ་སྤང་ཡིན། ཟག་མེད་ཀྱི་དད་སོགས་ལྔ་སྤང་བྱ་མིན་ཡང་ཟག་བཅས་ཀྱི་དེ་ལྔ་སྒོམ་སྤང་ཡིན། དྲི་མེད་ཀྱི་གསུམ་སྤང་བྱ་མ་ཡིན་པའི་དོན་ནོ། །
གཉིས་པ་རྙེད་གཏོང་གི་ཚུལ་ལ། དབང་པོ་རྙེད་ཚུལ་དང་། གཏོང་ཚུལ་གཉིས། དང་པོ་ལ། འདོད་པའི་དབང་དུ་དང་། ཁམས་གོང་གི་དབང་དུ་བྱས་པ་གཉིས། དང་པོ་ལ། མངལ་སྐྱེས་ཀྱི་དབང་དུ་དང་། རྫུས་སྐྱེས་ཀྱི་དབང་དུ་བྱས་པ་གཉིས། དང་པོ་ནི། འདོད་པར་དང་པོར་རྣམ་སྨིན་གཉིས། །རྙེད་དེ། ཞེས་པ་སྟེ། འདོད་པར་སྲོག་ཡིད་བཏང་སྙོམས་ལུས་དབང་དང་བཞི་དང་པོར་ཅིག་ཅར་དུ་རྙེད་ཀྱང་། རྣམ་སྨིན་སྐྱེས་ཀྱི་དབང་དུ་བྱས་ན། སྲོག་ལུས་དབང་གཉིས་ཅིག་ཅར་དུ་རྙེད་ཀྱི་གཞན་གཉིས་མིན་ཏེ། དེ་གཉིས་ཉིང་མཚམས་སྦྱོར་ཚེ་ཉོན་མོངས་ཅན་དུ་ངེས་པའི་ཕྱིར། གཉིས་པ་ནི། རྫུས་ཏེ་སྐྱེ་བས་མིན། །དེ་ཡིས་དྲུག་གམ་བདུན་ནམ་བརྒྱད། །ཅེས་པ་སྟེ། རྫུས་སྐྱེས་ལ་དེ་ལྟར་ངེས་པ་མ་ཡིན་ཏེ། རྣམ་སྨིན་སྐྱེས་ལ་མཚན་གཏན་མེད་དང་། གང་རུང་གཅིག །གཉིས་ཀ་དང་ལྡན་པ་གསུམ་ལས། དང་པོ་མིག་དབང་སོགས་ལྔ་དང་སྲོག་དབང་དང་དྲུག་ཅིག་ཅར་དུ་རྙེད། གཉིས་པས་གོང་གི་དྲུག་དང་ཕོ་མོའི་དེ་གང་རུང་ག །ཅིག་དང་བདུན་ཅིག་ཅར་དུ་རྙེད། གསུམ་པས་ཕོ་མོའི་མཚན་གཉིས་ཀ་དང་བརྒྱད་ཅིག་ཅར་དུ་རྙེད་པའོ། །གཉིིས་པ་ཁམས་གོང་གི་དབང་དུ་བྱས་པ་ནི། གཟུགས་ན་དྲུག་གོ་གོང་མར་གཅིག །ཅེས་པ་སྟེ། གཟུགས་ཁམས་ན་མིག་སོགས་ལྔ་དང་། སྲོག་དབང་དང་དྲུག་ཅིག་ཅར་དུ་རྙེད། དེའི་གོང་མ་གཟུགས་མེད་དུ་རྣམ་སྨིན་སྐྱེས་སྲོག་གཅིག་བུ་ཡིན་ནོ། །གཉིས་པ་གཏོང་བའི་ཚུལ་ལ། ཁམས་གོང་གི་དང་། འདོད་པའི་དབང་དུ་བྱས་པ་གཉིས། དང་པོ་ནི། གཟུགས་མེད་དག་དུ་འཆི་བ་ནི། །སྲོག་དང་ཡིད་དང་བཏང་སྙོམས་ཉིད། །འགག་པར་འགྱུར་རོ་གཟུགས་ན་བརྒྱད། །ཅེས་པ་སྟེ། གཟུགས་མེད་དུ་འཆི་བའི་ཚེ་སྲོག་ཡིད་བཏང་སྙོམས་གསུམ་ཅིག་ཅར་དུ་འགག །གཟུགས་ཁམས་ན་མིག་དབང་སོགས་ལྔ་དང་གོང་གི་གསུམ་སྟེ་བརྒྱད་ཅིག་ཅར་དུ་འགག་གོ །གཉིས་པ་ལ། འདོད་པར་བཅུའམ་དགུའམ་བརྒྱད། །ཅེས་པ་སྟེ། ཅིག་ཅར་བའི་དང་། རིམ་གྱིས་པའི་དབང་དུ་བྱས་པ་གཉིས། དང་པོ་ལ། མཚན་གཉིས་ལྡན། གཅིག་ལྡན། གཏན་མེད་གསུམ་ལས། དང་པོ་ནི། མིག་སོགས་དབང་པོ་ལྔ། སྲོག །ཡིད་བཏང་སྙོམས་ཕོ་མོ་གཉིས་ཏེ་བཅུ་ཅིག་ཅར་དུ་འགག །གཉིས་པ་ནི། དགུ་ཅིག་ཅར་དུ་འགག །གསུམ་པ་བརྒྱད་ཅིག་ཅར་དུ་འགག་གོ །གཉིས་པ་ནི། རིམ་གྱིས་འཆི་བ་དག་ལ་བཞི། །དགེ་ལ་ཐམས་ཅད་དག་ཏུ་ལྔ། །ཞེས་པ་སྟེ། རིམ་འཆི་ལ། སྲོག་ཡིད་བཏང་སྙོམས་ལུས་དབང་དང་བཞི་ཅིག་ཅར་དུ་འགག །དེ་ཉོན་མོངས་ཅན་དང་ལུང་མ་བསྟན་འཆི་བའི་དབང་དུ་བྱས་ལ། དགེ་སེམས་དང་བཅས་འཆི་ན་དེའི་སྟེང་དད་སོགས་དབང་པོ་ལྔ་ཅིག་ཅར་དུ་འགག་གོ །
གསུམ་པ་དགེ་སྦྱོང་ཚུལ་གྱི་དབང་པོ་དུས་འཐོབ་ནི། འབྲས་བུ་ཐ་མ་གཉིས་དགུས་འཐོབ། །གཉིས་ནི་བདུན་ནམ་བརྒྱད་དམ་དགུས། །བཅུ་གཅིག་དག་གིས་དགྲ་བཅོམ་ཉིད། །འགའ་ཞིག་སྲིད་ཕྱིར་བཤད་པ་ཡིན། །ཞེས་པ་སྟེ། འབྲས་བུ་ཐ་མ་རྒྱུན་ཞུགས་དང་དགྲ་བཅོམ་གཉིས་དབང་པོ་དགུ་དགུས་ཐོབ་སྟེ། ལམ་རྗེས་བཟོད་ཀྱི་ངོ་བོར་གྱུར་བའི་དད་སོགས་དབང་ལྔ། ཡིད་དབང་བཏང་སྙོམས་མི་ཤེས་པ་ཀུན་ཤེས་པའི་ལམ་རྗེས་ཤེས་ཀྱི་ངོར་གྱུར་ཀྱི་ཀུན་ཤེས་པའི་དབང་པོ་དགུས་རྒྱུན་ཞུགས་འབྲས་འཐོབ། སྒོམ་ལམ་སྐད་ཅིག་ཐ་མའི་ངོར་གྱུར་ཀྱི་དད་སོགས་ལྔ། ཡིད་དབང་། ཚོར་བ་བདེ་བ། ཡིད་བདེ། བཏང་སྙོམས་གསུམ་གང་རུང་གཅིག །ཀུན་ཤེས་པའི། མི་སློབ་ལམ་གྱི་ངོར་གྱུར་ཀུན་ཤེས་ལྡན་དབང་དང་དགུས་དགྲ་བཅོམ་པའི་འབྲས་བུ་འཐོབ་པའི་ཕྱིར། རིམ་གྱིས་པའི་ཕྱིར་འོང་མི་འོང་གཉིས་འཇིག་ལམ་གྱིས་ཐོབ་ཚེ། དད་སོགས་ལྔ་ཡིད་དབང་བཏང་སྙོམས་དང་བདུན་ལ་བརྟེན་ནས་ཐོབ་པའི་ཕྱིར། དེ་གཉིས་འདས་ལམ་གྱིས་ཐོབ་ཚེ་དབང་པོ་བརྒྱད་བརྒྱད་ལ་བརྟེན་ནས་ཐོབ་སྟེ། སྒོམ་ལམ་གྱི་ངོར་གྱུར་ཀྱི་དད་སོགས་ལྔ་ཡིད་དབང་། བཏང་སྙོམས་དང་ཀུན་ཤེས་པའི་དབང་པོ་དང་བརྒྱད་ལ་བརྟེན་ནས་ཐོབ་པའི་ཕྱིར་ཆགས་བྲལ་སྔོན་སོང་གི་ཕྱིར་འོང་གི་འབྲས་བུ། རྒྱུན་ཞུགས་ཐོབ་བྱེད་ཀྱི་དབང་པོ་དགུ་ལ་བརྟེན་ནས་ཐོབ། དེ་སྔོན་གྱི་ཕྱིར་མི་འོང་གི་འབྲས་བུ། ལམ་རྗེས་བཟོད་ཀྱི་ངོར་གྱུར་དད་སོགས་ལྔ། ཡིད་དབང་། ཚོར་བདེ། ཡིད་བདེ། བཏང་སྙོམས་གསུམ་གང་རུང་གཅིག །མི་ཤེས་པ་ཀུན་ཤེས་པའི། ལམ་རྗེས་ཤེས་ཀྱི་ངོར་གྱུར་ཀུན་ཤེས་པའི་དབང་པོ་དགུས་ཐོབ་པའི་ཕྱིར། བསྟན་བཅོས་རབ་ཏུ་བྱེད་པ་ལས། དགྲ་བཅོམ་འབྲས་བུ་དབང་པོ་བཅུ་གཅིག་གིས་ཐོབ་པར་བཤད་པ་ཡང་ཡོད་པའི་དོན་ནོ། །
བཞི་པ་དབང་པོའི་ལྡན་ཚུལ་ལ། ངེས་ལྡན་གྱི་དབང་དུ་དང་། སྲིད་ལྡན་གྱི་དབང་དུ་བྱས་པ་གཉིས། དང་པོ་ལ། ཕན་ཚུན་ངེས་ལྡན་གྱི་དབང་དུ་དང་། དབང་པོ་དེ་ལ་དབང་པོ་གཞན་ངེས་ལྡན་གྱི་དབང་དུ་བྱས་པ་གཉིས། དང་པོ་ནི། བཏང་སྙོམས་དང་ནི་སྲོག་དང་ནི། །ཡིད་དང་ལྡན་ལ་ངེས་གསུམ་ལྡན། །ཞེས་པ་སྟེ། བཏང་སྙོམས་སྲོག་ཡིད་སུམ་པོ་ཕན་ཚུན་ངེས་ལྡན་ཡིན་ཏེ། དེ་གང་རུང་གཅིག་ལྡན་ན་གཞན་གཉིས་ལྡན་པས་ཁྱབ་པའི་ཕྱིར། གལ་ཏེ་འགོག་པར་གནས་པའི་རྒྱུད་ལ་སྲོག་དབང་ཡོད་པའི་ཕྱིར། དེ་གཉིས་ཡོད་པར་ཐལ་ཞེ་ན། མ་ཁྱབ་སྟེ། དེ་གཉིས་ཀྱི་ཐོབ་པ་ཡོད་པ་ལ་དེ་གཉིས་དང་ལྡན་པར་འཇོག་པའི་ཕྱིར། གཉིས་པ་ནི། བདེ་ལུས་ལྡན་ལ་བཞི་དག་དང་། །མིག་སོགས་ལྡན་ལ་ལྔ་དང་ལྡན། །ཡིད་བདེ་ལྡན་ལ་སྡུག་བསྔལ་ལྡན། །བདུན་དང་མོ་ཡི་དབང་སོགས་ལྡན། །བརྒྱད་དང་ཀུན་ཤེས་ལྡན་པ་ཡི། །དབང་པོ་ལྡན་ལ་བཅུ་གཅིག་ལྡན། །ཀུན་ཤེས་བྱེད་པའི་དབང་ལྡན་ལ། །བཅུ་གསུམ་དག་དང་ལྡན་པ་ཡིན། །ཞེས་པ་སྟེ། བདེ་དབང་དང་ལུས་དབང་གཉིས་ལ་ངེས་ལྡན་གསུམ་སྟེ་བཞི་བཞི་ལྡན། མིག་དབང་ལ་ངེས་ལྡན་གསུམ་ལུས་དབང་དང་ལྔ་ལྡན། སྣ་དབང་སོགས་བཞི་ཡང་ལྔ་ལྔ་དང་ལྡན། ཡིད་བདེ་དང་ལྡན་པ་ལ་ངེས་ལྡན་གསུམ་བདེ་བ་དང་ལྔ་ལྡན། སྡུག་བསྔལ་དང་ལྡན་ལ་ངེས་ལྡན་གསུམ། ལུས་དབང་ཚོར་བ་སྡུག་བསྔལ། བདེ་བ། ཡིད་བདེ་དང་བདུན་ལྡན། ཕོ་མོ་གང་རུང་དང་ལྡན་ན་གོང་གི་བདུན་དང་བརྒྱད་ལྡན། ཀུན་ཤེས་ལྡན་དབང་ལ་གདགས་གཞི་དབང་པོ་དགུ་སྲོག་དང་བཅུ་གཅིག་ལྡན། ཀུན་ཤེས་པའི་དབང་ལྡན་ལ་གདགས་གཞི་དགུ་སྲོག་དང་བཅུ་གཅིག་ལྡན། མི་ཤེས་པ་ཀུན་ཤེས་ལྡན་དབང་ལ་གདགས་གཞི། སྲོག་ལུས་དབང་། ཚོར་བ་སྡུག་བསྔལ་དང་བཅུ་གསུམ་ལྡན་པའི་ཕྱིར། གདགས་གཞི་དགུ་ནི། དད་སོགས་ལྔ། ཡིད་དབང་། ཚོར་བདེ། ཡིད་བདེ། བཏང་སྙོམས་དང་དགུ་ལ་བྱེད་དོ། །གཉིས་པ་སྲིད་ལྡན་ལ། ཉུང་ལྡན་གྱི་དབང་དུ་དང་། མང་ལྡན་གྱི་དབང་དུ་བྱས་པ་གཉིས། དང་པོ་ནི། དགེ་མེད་ནང་ན་ཉུང་ལྡན་པ། །ལུས་ཚོར་སྲོག་ཡིད་བརྒྱད་དང་ལྡན། །གཟུགས་མེད་བྱིས་པའང་དེ་བཞིན་ཏེ། །བཏང་སྙོམས་སྲོག་ཡིད་དགེ་རྣམས་དང་། །ཞེས་པ་སྟེ། དགེ་རྩ་མེད་པ་ལ་དབང་པོ་ཉུང་ངུ་ལྡན་ཏེ། ལུས་དབང་། ཚོར་བ་ལྔ། སྲོག་ཡིད་བདེ་དང་བརྒྱད་ལྡན་སྲིད་པའི་ཕྱིར། གཟུགས་མེད་ཀྱི་བྱིས་པ་ལའང་དེ་བཞིན་ལྡན་ཏེ་བཏང་སྙོམས། སྲོག །ཡིད། དད་སོགས་ལྔ་དང་ལྡན་པའི་ཕྱིར། གཉིས་པ་མང་ལྡན་གྱི་དབང་དུ་བྱས་པ་ནི། མང་པོར་ལྡན་ལ་བཅུ་དགུ་སྟེ། །དྲི་མ་མེད་རྣམས་མ་གཏོགས་སོ། །མཚན་གཉིས་འཕགས་པ་ཆགས་བཅས་ཀྱང་། །མཚན་གཅིག་དྲི་མེད་གཉིས་མ་གཏོགས། །ཞེས་པ་སྟེ། མཚན་གཉིས་ལྡན་གྱི་འདོད་པའི་སོ་སྐྱེ་ལ་མང་པོ་ལྡན་ཏེ། དྲི་མེད་ཀྱི་གསུམ་མ་གཏོགས་བཅུ་དགུ་ལྡན། མཐོང་ལམ་འཕགས་པ་ཆགས་བཅས་ལ། ཕོ་མོའི་མཚན་གང་རུང་གཅིག་མ་གཏོགས་པ་བཅོ་བརྒྱད་ཀུན་ཤེས་པའི་དབང་པོ་དང་བཅུ་དགུ་ལྡན། ཉན་ཐོས་སྒོམ་ལམ་པ་ལ་ཡང་། གོང་གི་བཅོ་བརྒྱད། ཀུན་ཤེས་པའི་དབང་པོ་དང་བཅུ་དགུ་ལྡན་པའོ། །
གཉིས་པ་འདུས་བྱས་ཆོས་ཀྱི་སྐྱེ་ཚུལ་ལ། གཟུགས་ཅན་དང་། དེ་མ་ཡིན་པའི་སྐྱེ་ཚུལ་གཉིས། དང་པོ་ནི། འདོད་ན་དབང་པོ་མེད་པ་དང་། །སྒྲ་མེད་ཕྲ་རབ་རྡུལ་རྫས་བརྒྱད། །ལུས་དབང་ལྡན་ལ་རྫས་དགུ་སྟེ། །དབང་པོ་གཞན་ལྡན་རྫས་བཅུའོ། །ཞེས་པ་སྟེ། འདོད་པར་དབང་པོས་ཟིན་པ་མེད་པའི་རྡུལ་ཕྲ་རབ་གཅིག་སྐྱེ་བའི་ཚེ། འབྱུང་བཞི་སྒྲ་མ་གཏོགས་པའི་དོན་བཞི་སྟེ་བརྒྱད་ཅིག་ཅར་དུ་སྐྱེ། ལུས་དབང་དང་ལྡན་ལ་སྔར་གྱི་བརྒྱད་ལུས་དབང་དང་དགུ་ཅིག་ཅར་དུ་སྐྱེ། མིག་དབང་དང་ལྡན་པ་ལ་གོང་གི་དགུ་སྟེ་བཅུ་ཅིག་ཅར་དུ་སྐྱེ། དེས་དབང་པོ་གཞན་ལའང་རིགས་འགྲེ།
གཉིས་པ་གཟུགས་ཅན་མ་ཡིན་པའི་སྐྱེ་ཚུལ་ལ། མཚུངས་ལྡན་འདུ་བྱེད་དང་ལྡན་མིན་འདུ་བྱེད་གཉིས། དང་པོ་ལ་བསྟན་བཤད་གཉིས། དང་པོ་ནི། སེམས་དང་སེམས་བྱུང་ངེས་ལྷན་ཅིག །ཐམས་ཅད་འདུས་བྱས་མཚན་ཉིད་དང་། །ཐོབ་པའོ། །ཞེས་པ་སྟེ། གཙོ་སེམས་གཅིག་སྐྱེ་ཚེ་རང་གི་སེམས་བྱུང་དང་ཅིག་ཅར་སྐྱེ་ཞིང་འདུས་བྱས་ཐམས་ཅད་རང་གི་མཚན་ཉིད་སྐྱེ་འགག་གནས་པ་མི་རྟག་པ་བཞི་དང་ཅིག་ཅར་དུ་སྐྱེ་བས་ཁྱབ་སྟེ། འདུས་བྱས་ཡིན་ན་དེ་བཞི་ལྡན་དགོས་པས་སོ། །རྒྱུད་ཀྱིས་བསྡུས་པའི་འདུས་བྱས་ཡིན་ན་རང་གི་ཐོབ་པ་དང་ཅིག་ཅར་སྐྱེ་བས་ཁྱབ་སྟེ་འཐོབ་བྱའི་ཆོས་དེ་རྒྱུད་ལ་ལྡན་བྱེད་ཀྱི་རྫས་གཅིག་ཡོད་དགོས་པའི་ཕྱིར།
གཉིས་པ་ལ། སེམས་བྱུང་སྤྱིའི་རྣམ་བཞག །གཙོ་སེམས་འཁོར་དུ་སེམས་བྱུང་དུ་འགྲོ་དཔྱད། ཞར་ལ་སེམས་བྱུང་འགའ་ཞིག་གི་ཁྱད་པར་དང་གསུམ། དང་པོ་ལ། ངེས་པའི་མཚུངས་ལྡན་དེ་དང་མ་ངེས་པའི་མཚུངས་ལྡན་འདུ་བྱེད་གཉིས། དང་པོ་ལ་བསྟན་བཤད་གཉིས། དང་པོ་ནི། སེམས་བྱུང་རྣམ་ལྔ་སྟེ། །ས་མང་ལ་སོགས་ཐ་དད་ཕྱིར། །ཞེས་པ་སྟེ། ངེས་པའི་མཚུངས་ལྡན་གྱི་སེམས་བྱུང་རྣམས་ལ་སྐྱེ་ཚུལ་ལྔ་ཡོད་དེ། སེམས་ཀྱི་ས་མང་པོ་པ། ཉོན་མོངས་ཆེན་པོའི་ས་པ། མི་དགེ་བའི་ས་པ། ཉོན་མོངས་ཆུང་ངུའི་ས་པ་སྟེ་ཐ་དད་པ་ལྔ། གཉིས་པ་ལ། གོང་གི་ལྔ་ལས། དང་པོ་ནི། ཚོར་དང་སེམས་པ་འདུ་ཤེས་དང་། །འདུན་དང་རེག་དང་བློ་གྲོས་དྲན། །ཡིད་ལ་བྱེད་དང་མོས་པ་དང་། །ཏིང་ངེ་འཛིན་སེམས་ཐམས་ཅད་ལ། །ཞེས་པ་སྟེ། ཚོར་བ་སོགས་བཅུ་པོ་འདི་ལ་སེམས་ཀྱི་ས་མང་པོ་པ་ཞེས་བྱ་སྟེ། གཙོ་སེམས་ཀུན་གྱི་འཁོར་དུ་འགྲོ་བས་སོ། །གཉིས་པ་ནི། དད་དང་བག་ཡོད་ཤིན་ཏུ་སྦྱངས། །བཏང་སྙོམས་ངོ་ཚ་ཤེས་ཁྲེལ་ཡོད། །རྩ་བ་གཉིས་རྣམ་མི་འཚེ་དང་། །བརྩོན་འགྲུས་རྟག་ཏུ་དགེ་ལ་འབྱུང་། །ཞེས་པ་སྟེ། དད་སོགས་བཅུ་པོ་འདི་ལ་དགེ་བའི་ས་པ་ཞེས་བྱ་སྟེ། དགེ་བ་གཙོ་སེམས་ཀུན་གྱི་འཁོར་དུ་འགྲོ་བས་སོ། །གསུམ་པ་ནི། རྨོངས་དང་བག་མེད་ལེ་ལོ་དང་། །མ་དད་པ་དང་རྨུགས་དང་རྒོད། །ཉོན་མོངས་ཅན་ལ་རྟག་ཏུ་འབྱུང་། །ཞེས་པ་སྟེ་རྨོངས་སོགས་དྲུག་པོ་འདི་ལ་ཉོན་མོངས་པ་ཆེན་པོོའི་ས་པ་ཞེས་བྱ་སྟེ། དབང་ཤེས་ཡིད་ཤེས་མཐོང་སྤང་སྒོམ་སྤང་དུ་གྱུར་པའི་ཉོན་མོངས་པ་ཅན་གྱི་གཙོ་སེམས་ཀུན་གྱི་འཁོར་དུ་འགྲོ་བས་སོ། །བཞི་པ་ནི། མི་དགེ་ལ་ནི་ཁྲེལ་མེད་དང་། །ངོ་ཚ་མེད་པའོ། །ཞེས་པ་སྟེ། དེ་གཉིས་ལ་མི་དགེ་བའི་ས་པ་ཞེས་བྱ་སྟེ་གཙོ་སེམས་མི་དགེ་བ་ཀུན་གྱི་འཁོར་དུ་འགྲོ་བས་སོ། །ལྔ་པ་ནི། ཁྲོ་བ་དང་། །འཁོན་དུ་འཛིན་དང་གཡོ་དང་ནི། །ཕྲག་དོག་ཚིག་འཆབ་སེར་སྣ་དང་། །སྒྱུ་དང་རྒྱགས་དང་རྣམ་འཚེ་ནི། །ཉོན་མོངས་ཆུང་ངུའི་ས་པ་རྣམས། །ཞེས་པ་སྟེ། བཅུ་པོ་དེ་ལ་ཉོན་མོངས་པ་ཆུང་ངུའི་ས་པ་ཞེས་བྱ་སྟེ། ཡིད་ཤེས་དང་སྒོམ་སྤང་ཁོ་ནའི་ཉོན་མོངས་ཅན་གྱི་གཙོ་སེམས་ཀུན་གྱི་འཁོར་དུ་འགྲོ་བའི་ཕྱིར་རོ། །
གཉིས་པ་ནི། འདོད་ཆགས། ཁོང་ཁྲོ། ང་རྒྱལ། ཐེ་ཚོམ་དང་བཞི་དང་གཞན་འགྱུར་བཞི་སྟེ་བརྒྱད་ནི་མ་ངེས་པ་ཞེས་བྱ་སྟེ། གོང་གི་ལྔ་པོ་གང་རུང་དུ་མ་ངེས་ཤིང་དེ་ལས་ལོག་པའི་ཕྱིར་རོ། །གཉིས་པ་ལ། འདོད་པའི་དབང་དུ་བྱས་པ་དང་། ཁམས་གོང་གི་དབང་དུ་བྱས་པ་གཉིས། དང་པོ་ལ། དགེ་བའི་དབང་དུ། མི་དགེ་བའི་དབང་དུ། ལུང་མ་བསྟན་གྱི་དབང་དུ་བྱས་པ་དང་གསུམ། དང་པོ་ནི། འདོད་པའི་དགེ་བའི་སེམས་ལ་ནི། །རྟོག་དང་དཔྱོད་དང་བཅས་པའི་ཕྱིར། །སེམས་ལས་བྱུང་བ་ཉི་ཤུ་གཉིས། །ལ་ལ་དག་ཏུ་འགྱོད་པ་བསྣན། །ཞེས་པ་སྟེ། འདོད་པའི་གཙོ་སེམས་དགེ་བའི་འཁོར་དུ་སེམས་བྱུང་ཉེར་གཉིས་འབྱུང་སྟེ། སེམས་ཀྱི་ས་མང་པོ་པ་བཅུ། དགེ་བའི་ས་པ་བཅུ། རྟོག་དཔྱོད་གཉིས་རྣམས་འབྱུང་བས་སོ། །གཉིས་པ་ནི། མི་དགེ་ལ་ནི་མ་འདྲེས་དང་། །ལྟ་དང་ལྡན་ལ་ཉི་ཤུ་འབྱུང་། །ཉོན་མོངས་བཞི་དང་ཁྲོ་སོགས་དང་། །འགྱོད་པ་དང་ནི་ཉི་ཤུ་གཅིག །ཅེས་པ་སྟེ། དེ་ཡང་མ་རིག་པ་ལ་མ་འདྲེས་པའི་དང་། འདྲེས་པའི་མ་རིག་པ་གཉིས་ལས། དང་པོ་ནི། འདོད་ཆགས་སོགས་ཉོན་མོངས་བཞི་གང་རུང་དང་མི་ལྡན་པའོ། །གཉིས་པ་ནི། དེ་བཞི་གང་རུང་དང་ལྡན་པའོ། །དང་པོ་དང་ལྡན་པའི་གཙོ་སེམས་མི་དགེ་བའི་འཁོར་དུ་སེམས་བྱུང་ཉི་ཤུ་འབྱུང་སྟེ། སེམས་ཀྱི་ས་མང་པོ་པ་བཅུ། ཉོན་མོངས་ཆེན་པོའི་ས་པ་དྲུག །མི་དགེ་བའི་ས་པ་གཉིས། རྟོག་དཔྱོད་གཉིས་རྣམས་འབྱུང་བས་སོ། །ལྟ་བ་དང་ལྡན་པའི་གཙོ་སེམས་མི་དགེ་བའི་འཁོར་དུ་དེ་ཉི་ཤུ་འབྱུང་ངོ་། །འདིར་ལྟ་བ་ཟུར་དུ་མི་སྨོས་ཏེ། ཤེས་རབ་ཀྱི་ཁོངས་སུ་གཏོགས། མ་རིག་པ་ཟུར་དུ་མི་བགྲང་སྟེ། རྨོངས་པའི་ཁོངས་སུ་གཏོགས། གཏི་མུག་མེད་པ་དགེ་བའི་ས་པར་མི་བགྲང་སྟེ། ཤེས་རབ་ཀྱི་ཁོངས་སུ་གཏོགས། བརྗེད་ངས་ཟུར་དུ་མི་བགྲང་སྟེ། རང་ཡུལ་མི་གསལ་བའི་དྲན་པའི་ཁོངས་སུ་གཏོགས། རྣམ་གཡེང་ཟུར་དུ་མི་བགྲང་སྟེ། ཏིང་ངེ་འཛིན་ཉོན་མོངས་ཅན་ཡིན་པས་དེའི་ཁོངས་སུ་གཏོགས། ཤེས་བཞིན་མ་ཡིན་པ་ཟུར་དུ་མི་བགྲང་སྟེ། ཤེས་རབ་ཀྱི་ཁོངས་སུ་གཏོགས། འདྲེས་པ་ནི་འདོད་ཆགས་འཁོར་དུ་ལྡན་པའི་གཙོ་སེམས་མི་དགེ་བའི་འཁོར་དུ་སེམས་བྱུང་ཉེར་གཅིག་འབྱུང་སྟེ། གོང་གི་ཉི་ཤུ་དང་འདོད་ཆགས་འབྱུང་བས་སོ། །དེས་ཁོང་ཁྲོ་སོགས་གསུམ་དང་། ཁྲོ་བ་སོགས་བཅུ་དང་། འགྱོད་པ་རྣམས་རིགས་འགྲེ། གསུམ་པ་ལུང་མ་བསྟན་གྱི་དབང་དུ་བྱས་པ་ནི། བསྒྲིབས་ལ་བཅོ་བརྒྱད་ལུང་མ་བསྟན། །གཞན་ལ་བཅུ་གཉིས་དག་ཏུ་འདོད། །གཉིད་ནི་ཀུན་ལ་མི་འགལ་ཕྱིར། །གང་ལ་ཡོད་པ་དེ་བསྣན་ནོ། །ཞེས་པ་སྟེ། བསྒྲིབས་ལུང་མ་བསྟན་གྱི་གཙོ་སེམས་ཀྱི་འཁོར་དུ་བཅོ་བརྒྱད་འབྱུང་སྟེ། སེམས་ཀྱི་ས་མང་པོ་པ་བཅུ། ཉོན་མོངས་ཆེན་པོའི་ས་པ་དྲུག །རྟོག་དཔྱོད་རྣམས་འབྱུང་བས་སོ། །མ་བསྒྲིབས་ལུང་མ་བསྟན་དུ་གྱུར་པའི་གཙོ་སེམས་ཀྱི་འཁོར་དུ་བཅུ་གཉིས་འབྱུང་སྟེ། སེམས་ཀྱི་ས་མང་པོ་པ་བཅུ། རྟོག་དཔྱོད་གཉིས་རྣམས་སོ། །གཉིད་ནི་གང་ལ་ཡོད་པ་དེ་ལ་བསྣན་ཏེ་དེ་ཀུན་དང་མི་འགལ་བའི་ཕྱིར་རོ། །གོང་དུ། ལ་ལ་དག་ཏུ་འགྱོད་པ་བསྣན་ཅེས་པ་ནི། གང་ལ་ཡོད་པ་དེ་ལ་བསྣན་ཏེ་འགྱོད་པ་ལའང་དགེ་མི་དགེ་ལུང་མ་བསྟན་གསུམ་ཀ་ཡོད་པས་སོ། །གཉིས་པ་ཁམས་གོང་གི་དབང་དུ་བྱས་པ་ལ། དཔྱད་བྱའི་སེམས་བྱུང་ངོས་བཟུང་བ་དང་། དེ་ཇི་ལྟར་འབྱུང་བ་གཉིས། དང་པོ་ནི། དེ་ལས་འགྱོད་གཉིད་མི་དགེ་རྣམས། །བསམ་གཏན་དང་པོ་དག་ན་མེད། །རྟོག་པའང་བསམ་གཏན་ཁྱད་པར་ཅན། །དེ་ཡི་གོང་ན་དཔྱོད་པ་ཡང་། །ཞེས་པ་སྟེ། འགྱོད། གཉིད། མི་དགེ་རྣམས་བསམ་གཏན་དང་པོ་དག་ན་མེད། དེའི་དངོས་གཞི་ཁྱད་པར་ཅན་ན་རྟོག་པའང་མེད། དེའི་གོང་མ་བསམ་གཏན་གཉིས་པ་ཡན་ཆད་ན་དཔྱོད་པ་ཡང་མེད་པའི་དོན་ནོ། །གཉིས་པ་ནི། དང་པོ་ཙམ་གྱི་དགེ་སེམས་ལ། །ཞེས་སོགས་སུ་བསྒྱུར་རོ། །
གསུམ་པ་སེམས་བྱུང་འགའ་ཞིག་གི་ཁྱད་པར་ལ། སེམས་བྱུང་བརྒྱད་ཀྱི་ཁྱད་པར་དང་། སེམས་སེམས་བྱུང་གི་མིང་གི་རྣམ་གྲངས་གཉིས། དང་པོ་ནི། མ་གུས་ངོ་ཚ་མེད་ཁྲེལ་མེད། །ཁ་ན་མ་ཐོ་འཇིགས་མི་ལྟ། །དགའ་དང་གུས་ཉིད་ངོ་ཚ་ཤེས། །དེ་གཉིས་འདོད་དང་གཟུགས་དག་ན། །རྟོག་དང་དཔྱོད་པ་རྩིང་ཞིབ་ཉིད། །ང་རྒྱལ་ཁེངས་པའོ་རྒྱགས་པ་ནི། །རང་གི་ཆོས་ལ་ཆགས་པ་ཡི། །སེམས་ནི་ཡོངས་སུ་གཏུགས་པའོ། །ཞེས་པ་སྟེ། ངོ་ཚ་མེད་དང་ཁྲེལ་མེད་ལ་ཁྱད་ཅི་ཞེ་ན། ངོ་ཚ་མེད་པ་ནི་ཡུལ་ཁྱད་པར་ཅན་ལ་མ་གུས་པའི་སེམས་བྱུང་། ཁྲེལ་མེད་པ་ནི་རང་རྒྱུད་ཀྱི་ཁ་ན་མ་ཐོ་བ་ལ་འཇིགས་པར་མི་ལྟ་བའོ། །དྲི་བ་གསལ་བྱེད་དུ་སྦྱར་ནས། དགའ་བ་ལ་ཉོན་མོངས་ཅན་གྱི་དགའ་བ་དང་། ཡང་དག་པའི་དགའ་བ་གཉིས། དང་པོ་ནི། བུ་དང་ཆུང་མ་སོགས་ལ་ཆགས་སྲེད། གཉིས་པ་ནི། གང་ཟག་ཡོན་ཏན་ཅན་ལ་དང་བའི་དད་པའོ། །དེ་གཉིས་འདོད་གཟུགས་སུ་གཏོགས་ཀྱི་གཟུགས་མེད་དུ་མི་གཏོགས་ཏེ། དེ་གཉིས་ཡུལ་གཞན་ལ་དམིགས་ནས་འབྱུང་ལ། གཟུགས་མེད་ཁམས་པ་རྣམས་ཕན་ཚུན་གཅིག་གིས་གཅིག་མིག་ཡུལ་དུ་མི་རུང་བའི་ཕྱིར། རྟོག་པ་ནི་སེམས་རྩིང་བའི་དང་། དཔྱོད་པ་ནི་དེ་ཞིབ་པའི་རྣམ་པ་ཅན་ཉིད་དོ། །ང་རྒྱལ་ནི་ཁེངས་སེམས་ཀྱི་སེམས་བྱུང་རྫས་ཡོད། རྒྱགས་པ་ནི། རང་གི་རིགས་དང་ཆོས་ལ་ཆགས་ནས་ཡོངས་སུ་གཏུགས་པའི་སེམས་བྱུང་ངོ་། །གཉིས་པ་ནི། སེམས་དང་ཡིད་དང་རྣམ་ཤེས་ནི། །དོན་གཅིག་སེམས་དང་སེམས་བྱུང་དང་། །རྟེན་དང་དམིགས་དང་རྣམ་བཅས་དང་། །མཚུངས་པར་ལྡན་པའང་རྣམ་པ་ལྔ། །ཞེས་པ་སྟེ། སེམས་ཡིད་རྣམ་ཤེས་གསུམ་དོན་གཅིག་ཅིང་། སེམས་སེམས་བྱུང་ལ་རྟེན་བཅས་ཞེས་བྱ་སྟེ། བདག་རྐྱེན་ལ་བརྟེན་པ་དང་། དམིགས་བཅས་ཞེས་བྱ་ཏེ། རང་ཡུལ་ལ་དམིགས་པ་དང་། རྣམ་བཅས་ཞེས་བྱ་སྟེ། རང་གི་དམིགས་པ་དེ་ཉིད་ལ་རྣམ་པ་རེ་རེ་ནས་བྱེ་བྲག་ཏུ་དཔྱོད་པའི་ཕྱིར། མཚུངས་ལྡན་ཞེས་བྱ་སྟེ། མཚུངས་ལྡན་རྣམ་པ་ལྔ་མཚུངས་ཡིན་པའི་ཕྱིར། ལྔ་མཚུངས་ནི། རྟེན། དམིགས་པ། རྣམ་པ། དུས། རྫས་མཚུངས་པ་ལྔའོ། །རྣམ་པ་མཚུངས་ཏེ། མིག་ཤེས་དང་དེའི་འཁོར་བྱུང་གི་སེམས་བྱུང་གཉིས་གཟུགས་ཀྱི་རྣམ་པ་གཅིག་ཉིད་ཡུལ་དུ་བྱེད་པར་མཚུངས་པའི་ཕྱིར།
གཉིས་པ་ལྡན་མིན་འདུ་བྱེད་ལ། དབྱེ་བའི་སྒོ་ནས་མདོར་བསྟན། སོ་སོའི་རང་བཞིན་རྒྱས་པར་བཤད། ཆོས་གཞན་གྱི་ཁྱད་པར་བསྟན་པའི་སྒོ་ནས་དོན་བསྡུ་བའོ། །དང་པོ་ནི། མི་ལྡན་པ་ཡི་འདུ་བྱེད་རྣམས། །ཐོབ་དང་མ་ཐོབ་སྐལ་མཉམ་དང་། །འདུ་ཤེས་མེད་སྙོམས་འཇུག་པ་དང་། །སྲོག་དང་མཚན་ཉིད་རྣམས་དང་ནི། །མིང་གི་ཚོགས་ལ་སོགས་པ་ཡང་། །ཞེས་པ་སྟེ། ཐོབ་པ། མ་ཐོབ་པ། སྐལ་མཉམ། འདུ་ཤེས་མེད་པ། དེའི་སྙོམས་འཇུག །འགོག་སྙོམས། སྲོག །སྐྱེ་བ། རྒ་བ། གནས་པ། མི་རྟག་པ། མིང་གི་ཚོགས། ཡི་གེའི་ཚོགས། ངག་གི་ཚོགས་ལ་སོགས་བཅུ་བཞིའོ། །
གཉིས་པ་ལ། ཐོབ་སོགས་གསུམ་བཤད། འདུ་ཤེས་མེད་པ་སོགས་གསུམ་བཤད། སྲོག་སོགས་ལྔ་བཤད། མིང་སོགས་གསུམ་བཤད་པ་དང་བཞི། དང་པོ་ལ། ཐོབ་མ་ཐོབ་བཤད་པ་དང་། སྐལ་མཉམ་བཤད་པའོ། །དང་པོ་ནི། ཐོབ་མ་ཐོབ་ཀྱི་ངོ་བོ་དང་། ཁྱད་ཆོས་གཉིས། དང་པོ་ནི། ཐོབ་པ་རྙེད་དང་ལྡན་པའོ། །ཐོབ་དང་མ་ཐོབ་རང་རྒྱུད་དུ། །གཏོགས་པ་རྣམས་ཀྱིའོ་འགོག་གཉིས་ཀྱི། །ཞེས་པ་སྟེ། འཐོབ་བྱའི་ཆོས་དེ་རང་གང་ལ་ལྡན་པའི་རྟེན་གྱི་གང་ཟག་གི་རྒྱུད་ལ་ལྡན་བྱེད་ཀྱི་རྫས་གཅིག་ལ་འཇོག །དེ་ལ་དབྱེ་ན། རྙེད་ཐོབ་དང་ལྡན་ཐོབ་གཉིས། དང་པོ་ནི། འཕགས་རྒྱུད་ལ་མཐོང་ལམ་གསར་ལྡན་བྱེད་པའི་རྫས་གཅིག་ལ་བྱེད། གཉིས་པ་ནི། སོ་སྐྱེའི་རྒྱུད་ལ་ཉོན་མོངས་ཡེ་ནས་ལྡན་བྱེད་ཀྱི་རྫས་སོ། །མ་ཐོབ་པ་ནི། འཐོབ་བྱའི་ཆོས་དེ་རྟེན་གྱི་གང་ཟག་དེའི་རྒྱུད་ལ་ལྡན་པ་ལ་གེགས་བྱེད་ཀྱི་རྫས། དེ་ལ་གཉིས། རྙེད་པའི་མ་ཐོབ་པ་དང་། ལྡན་པའི་མ་ཐོབ་པའོ། །དང་པོ་ནི། སྦྱོར་ལམ་པའི་རྒྱུད་ལ་མཐོང་ལམ་སྐྱེ་བ་ལ་གེགས་བྱེད་ཀྱི་རྫས། གཉིས་པ་ནི། བསམ་གཏན་གྱི་དངོས་གཞི་ལས་ཉམས་ཏེ་སླར་དེ་ལྡན་པ་ལ་གེགས་བྱེད་ཀྱི་རྫས། མ་ཐོབ་པ་དེ་ཡང་རང་རྒྱུད་དུ་གཏོགས་པའིི་འདུས་བྱས་རྣམས་ཀྱིའོ་ཞེས་སྤྱིར་བསྟན་ནས། དམིགས་བསལ་ནི། རྒྱུད་ཀྱིས་བསྡུས་པའི་འདུས་བྱས་མ་ཡིན་ཡང་འགོག་པ་གཉིས་ཀྱིི་ཐོབ་པ་ཡོད་པའོ། །གཉིས་པ་ཁྱད་ཆོས་ལ། ཐོབ་པའི་དང་། མ་ཐོབ་པའི་ཁྱད་ཆོས་གཉིས། དང་པོ་ལ། སྤྱིར་བསྟན་དང་། དམིགས་བསལ་གཉིས། དང་པོ་ནི། དུས་གསུམ་པ་ཡི་རྣམ་པ་གསུམ། །དགེ་ལ་སོགས་ཀྱི་དགེ་ལ་སོགས། །དེར་གཏོགས་རྣམས་ཀྱི་རང་ཁམས་པ། །མ་གཏོགས་རྣམས་ཀྱི་རྣམ་པ་བཞི། །སློབ་དང་མི་སློབ་མིན་གྱི་གསུམ། །སྤང་བྱ་མིན་པའི་རྣམ་གཉིས་འདོད། །ཅེས་པ་སྟེ། འཐོབ་བྱའི་ཆོས་ལ་དུས་གསུམ་ཀ་ཡོད་དེ། དེའི་དཔེ་ནི། ཁ་སང་གི་བསམ་སྡོམ་དེ་རིང་གི་སྡོམ་པ་ལ་ལྟོས་ཏེ་འདས་པ། འདས་ཆོས་དེ་ལ་ཐོབ་པ་དུས་གསུམ་ཀ་ཡོད། མཚན་གཞི་ནི། ཁ་སང་གི་དུས་ཁོ་རང་ལྡན་བྱེད་ཀྱི་རྫས་གཅིག་ལ་དེའི་ཐོབ་པ་འདས་པ། ཁ་སང་གི་བསམ་སྡོམ་སང་གི་དུས་སུ་ལྡན་བྱེད་ཀྱི་རྫས་གཅིག་ལ་དེའི་ཐོབ་པ་མ་འོངས་པ། དེ་རིང་གི་དུས་སུ་ཁོ་རང་གང་ལ་ལྡན་བྱེད་ཀྱི་རྫས་གཅིག་ལ་ཁོའི་ཐོབ་པ་ད་ལྟར་བར་འཇོག །འཐོབ་བྱའི་ཆོས་ད་ལྟར་བ་དང་མ་འོངས་པ་གཉིས་ལའང་དེས་འགྲེ་ཤེས་པར་བྱའོ། །དགེ་སོགས་གསུམ་གྱི་ཐོབ་པ་ནི་གོ་རིམ་བཞིན་དུ་དགེ་ལ་སོགས་པ་ཡིན་པའི་དོན་ནོ། །འཐོབ་བྱའི་ཆོས་ཁམས་གསུམ་པོ་དེར་གཏོགས་པ་རྣམས་ཀྱི་ཐོབ་པ་ནི་རང་རང་གི་ཁམས་སུ་གཏོགས་པ་ཡིན་ནོ། །འཐོབ་བྱའི་ཆོས་སར་མ་གཏོགས་པ་རྣམས་ལ་མུ་བཞི་སྟེ། འཐོབ་བྱའི་ཆོས་དེ་ཁམས་གསུམ་གྱི་སར་མ་གཏོགས་ལ། དེའི་ཐོབ་པ་དེ་རྣམས་ཀྱིས་བསྡུས་པའི་མུ་གསུམ་དང་། འཐོབ་བྱའི་ཆོས་དེ་ཁམས་གསུམ་གང་རུང་གི་སར་མ་གཏོགས་ལ། དེའི་ཐོབ་པ་ཡང་དེ་གསུམ་གང་རུང་གིས་མ་བསྡུས་པའི་མུ་དང་བཞི་ཡོད་པས་སོ། །དེ་དག་གི་མཚན་གཞི་རིམ་བཞིན་འདོད་པའི་རྟེན་ཅན་གྱི་གང་ཟག་གི་རྒྱུད་ཀྱི་སོ་སོར་བརྟགས་མིན་གྱི་འགོག་པ་དང་། གཟུགས་དང་གཟུགས་མེད་ཀྱི་རྟེན་ཅན་གྱི་སོ་སོར་བརྟགས་མིན་གྱི་འགོག་པ་དང་། བྱིས་པའི་ལམ་གྱིས་ཐོབ་པའི་འགོག་པ་དང་། འགོག་བདེན་དང་ལམ་བདེན་ལྟ་བུའོ། །སློབ་མི་སློབ་ཀྱི་སྒོ་ནས་དབྱེ་ན། རང་གང་ལ་ལྡན་པའི་རྟེན་ཅན་སློབ་པ་འཕགས་པར་མཚོན་བྱེད་ཀྱི་འདུས་བྱས་ཀྱི་ཡོན་ཏན་ལ་སློབ་པའི་ཆོས་སུ་འཇོག །མི་སློབ་པར་མཚོན་པར་བྱེད་པའི་དེའི་རྒྱུད་ཀྱི་ཡོན་ཏན་ལ་མི་སློབ་པའི་ཆོས་སུ་འཇོག །སློབ་པ་འཕགས་པ་དང་། མི་སློབ་པ་གང་རུང་མིན་པར་མཚོན་བྱེད་ཀྱི་འདུས་བྱས་ཀྱི་ཡོན་ཏན་གཅིག་ལ་དེ་གཉིས་གང་རུང་མིན་པའི་ཆོས་སུ་འཇོག །འཕགས་པ་སློབ་མི་སློབ་ཀྱི་འགོག་བདེན་དེ་གཉིས་ཀྱི་ཆོས་མིན་ཡང་། དེ་གཉིས་ཀྱི་ཐོབ་པ་དེ་གཉིས་ཀྱི་ཆོས་སུ་འཇོག །བརྟགས་འགོག་དེ་སོ་སྐྱེའི་ཐོབ་པ་དང་། བརྟགས་མིན་གྱི་འགོག་པའི་ཐོབ་པ་དང་། ཟག་བཅས་ཀྱི་ཐོབ་པ་གསུམ་པོ་གང་རུང་མིན་པའི་ཆོས་སུ་འཇོག །འཐོབ་བྱའི་ཆོས་སྤང་བྱ་མིན་པ་ལ་དེའི་ཐོབ་པ་སྤང་བྱ་ཡིན་མིན་གཉིས་ཡོད་དེ། བརྟགས་མིན་གྱི་འགོགས་པ་དང་། འཕགས་པའི་སོ་སོར་བརྟགས་འགོག་ལྟ་བུའོ། །གཉིས་པ་དམིགས་བསལ་ནི། །ལུང་བསྟན་མིན་ཐོབ་ལྷན་ཅིག་སྐྱེས། །མངོན་ཤེས་སྤྲུལ་པ་མ་གཏོགས་པ། །བསྒྲིབས་པའི་གཟུགས་ཀྱིའང་འདོད་པ་ན། །གཟུགས་ཀྱི་སྔར་ནི་སྐྱེ་བ་མེད། །ཅེས་པ་སྟེ། དུས་གསུམ་ཞེས་པའི་དམིགས་བསལ་འཆད་པ་ནི། མ་བསྒྲིབས་ལུང་མ་བསྟན་ལ་ཐོབ་པ་ལྷན་སྐྱེས་ཡོད་ཀྱི་སྔར་སྐྱེས་དང་ཕྱིས་སྐྱེས་མེད། དེའི་ཡང་དམིགས་བསལ་ནི། མངོན་ཤེས་ལུང་མ་བསྟན་དང་སྤྲུལ་སེམས་ལུང་མ་བསྟན་ལ་སྔར་སྐྱེས་དང་ཕྱིས་སྐྱེས་ཡོད་སྲིད། བསྒྲིབས་པའི་རིག་བྱེད་ཀྱི་གཟུགས་ཀྱིའང་ཐོབ་པ་ལྷན་སྐྱེས་ཁོ་ན་ཡིན་གྱི་སྔ་ཕྱི་སྐྱེས་མེད། འདོད་པ་ན་སྤྱོད་པའི་གཟུགས་ཅན་གྱི་དགེ་མི་དགེའི་ཐོབ་པ་སྔར་སྐྱེས་མེད་ཅིང་ཕྱིས་སྐྱེས་དང་ད་ལྟར་སྐྱེས་གཉིས་ཡོད་དོ། །གཉིས་པ་མ་ཐོབ་པའི་ཁྱད་ཆོས་ལ། སྤྱིར་བསྟན་དང་། གཏོང་ཚུལ་གཉིས། དང་པོ་ནི། མ་ཐོབ་མ་བསྒྲིབས་ལུང་མ་བསྟན། །འདས་མ་སྐྱེས་ཀྱི་དེ་རྣམ་གསུམ། །འདོད་སོགས་གཏོགས་དང་དྲི་མེད་ཀྱིའང་། །ལམ་མ་ཐོབ་པ་སོ་སོ་ཡི། །སྐྱེ་བོར་འདོད་དོ། །ཞེས་པ་སྟེ། དགེ་ལ་སོགས་ཀྱི་དགེ་ལ་སོགས། །ཞེས་པའི་ལོག་ཕྱོགས་འཆད་པ་ནི། འཐོབ་བྱའི་ཆོས་དགེ་མི་དགེ་ལུང་མ་བསྟན་གང་ཡིན་ཡང་། དེའི་མ་ཐོབ་པ་མ་བསྒྲིབས་ལུང་མ་བསྟན་དུ་ངེས། དུས་གསུམ་ཞེས་པའི་ལོག་ཕྱོགས་ནི་འཐོབ་བྱའི་ཆོས་ལ་དུས་གསུམ་ཡོད་དེ། དཔེར་མཚོན་ན་ཁ་སང་གི་དགེ་སློང་གི་སྡོམ་པ་དེ་རིང་ལ་ལྟོས་ཏེ་འཐོབ་བྱའི་ཆོས་འདས་པ་ཡིན་དེ་ལ་མ་ཐོབ་པ་དུས་གསུམ་སྟེ། སྔོན་ཐོག་མེད་ནས་ཁ་སང་གི་སྡོམ་པ་ལྡན་པ་ལ་གེགས་བྱེད་ཀྱི་རྫས་ཤིག་ལ། ཁ་སང་སྡོམ་པའི་མ་ཐོབ་པ་སྔར་སྐྱེས། སྡོམ་པ་དེ་སང་ཉིན་ཕན་ཆད་དུ་ལྡན་པ་ལ་གེགས་བྱེད་པའི་རྫས་ཤིག་ལ་དེའི་མ་ཐོབ་པ་ཕྱིས་སྐྱེས། སྡོམ་པ་དེ་དེ་རིང་ལྡན་པ་ལ་གེགས་བྱེད་པའི་རྫས་ཤིག་ལ་དེའི་མ་ཐོབ་པ་ད་ལྟར་བར་འཇོག །དེས་མ་སྐྱེས་པ་སྟེ་མ་འོངས་པ་ལའང་མ་ཐོབ་པ་དུས་གསུམ་ཡོད་པ་མཚོན། འཐོབ་བྱའི་ཆོས་ད་ལྟར་བ་ལ་མ་ཐོབ་པ་སྔར་སྐྱེས་དང་ཕྱིས་སྐྱེས་ཡོད་ཀྱི་ད་ལྟར་སྐྱེས་མེད་དེ། ཁོ་རང་དུས་སུ་ཐོབ་པའི་ཕྱིར། འཐོབ་བྱའི་ཆོས་ཁམས་གསུམ་གང་རུང་དུ་གཏོགས་པ་ལ་དེ་མ་ཐོབ་པ་ཁམས་གསུམ་ཅི་རིགས་སུ་གཏོགས་པ་ཡོད་དེ། རྟེན་གྱི་གང་ཟག་གང་དུ་སྐྱེས་པའི་ས་དེར་གཏོགས་པའི་ཕྱིར། དྲི་མེད་ལམ་བདེན་གྱི་མ་ཐོབ་པའང་ཁམས་གསུམ་ཅི་རིས་སུ་གཏོགས་སོ། །ལམ་བདེན་གྱི་མ་ཐོབ་པ་དྲི་མེད་མིན་ཏེ། དེ་སོ་སྐྱེའི་རྒྱུད་ལ་ཡོད་པའི་ཟག་བཅས་ཡིན་པའི་ཕྱིར་ཏེ། འཕགས་ལམ་མ་ཐོབ་པའི་རྒྱུད་ལ་ཡོད་པའི་དེ་ཡིན་པའི་ཕྱིར། ཁྱབ་སྟེ། འཕགས་ལམ་མ་ཐོབ་པའི་གང་ཟག་སོ་སོ་སྐྱེ་བོར་འདོད་པའི་ཕྱིར་རོ། །གཉིས་པ་གཏོང་ཚུལ་ནི། དེ་ཐོབ་དང་། །ས་འཕོས་ནས་ནི་རྣམ་ཉམས་འགྱུར། །ཞེས་པ་སྟེ། མ་ཐོབ་པ་དེ་རྒྱུ་གང་གིས་གཏོང་ན། རྟོགས་པའི་མ་ཐོབ་པ་རྟོགས་པ་དེ་ཐོབ་པ་དང་སའི་མ་ཐོབ་པ་ས་འཕོས་ནས་ཉམས་པར་འགྱུར་ཏེ། ཚོགས་ལམ་པའི་རྒྱུད་ལ་སྦྱོར་ལམ་པའི་མ་ཐོབ་པ་ཡོད་པ་དེ། སྦྱོར་ལམ་དེ་ཐོབ་པ་དང་། བསམ་གཏན་དང་པོའི་རྒྱུད་ལ་གཉིས་པའི་མ་ཐོབ་པ་ཡོད་པ། གཉིས་པར་ས་འཕོས་པའི་ཚེ་གཏོང་བའི་ཕྱིར་རོ། །འོ་ན་དད་ལྡན་གྱི་རྒྱུད་ལ། དད་པའི་ཐོབ་པ་ལྡན་པར་བྱེད་པའི་ཐོབ་པ་ཡོད་དམ་མེད། ཡོད་ན་དེ་ཐུག་མེད་དུ་འགྱུར། མེད་ན་དད་པའི་ཐོབ་པ་དོན་མེད་དོ་ཞེ་ན། རང་དུས་ལ་ལྟོས་ན་ཐུག་མེད་དུ་མི་འགྱུར་ཡང་། ཕྱི་མཐའ་ལ་ལྟོས་ན་ཐུག་མེད་དུ་འགྱུར་བ་ཡོད་དེ། དད་ལྡན་གྱི་རྒྱུད་ལ་དད་པ་དང་། དེ་ལྡན་བྱེད་ཀྱི་ཐོབ་པ་དང་། དེ་ལྡན་བྱེད་ཀྱི་ཐོབ་པའི་ཐོབ་པ་གསུམ་ཡོད་དེ་ལས་གཞན་པ་མེད། དེའི་སྐད་ཅིག་གཉིས་པ་ན་ཆོས་གསུམ་པོ་དེ་ལྡན་བྱེད་ཀྱི་ཐོབ་པ་གསུམ་དང་། ཐོབ་པའི་ཐོབ་པ་གསུམ་སྟེ་དྲུག་ཡོད། སྐད་ཅིག་གསུམ་པ་ན་སྐད་ཅིག་གཉིས་པའི་སྐབས་ཀྱི་དྲུག །དང་པོའི་སྐབས་ཀྱི་གསུམ་སྟེ་དགུ་དང་། ཐོབ་པའི་ཐོབ་པ་དགུ་སྟེ་བཅོ་བརྒྱད་ཡོད། དེ་བཞིན་དུ་སྐད་ཅིག་ཕྱི་མ་ཕྱི་མ་ལ་སྦྱར་ཏེ་བཤད་པས་ཐོབ་པའི་ཕྱི་མཐའ་ཐུག་མེད་དུ་འགྲུབ་པས་སོ། །ཇི་སྐད་དུ་འགྲེལ་པར། ཅི་མ་ཐོབ་པ་དང་ཐོབ་པ་དག་གི་ཡང་སོགས་ནས་རྗེས་ཀྱི་ཐོབ་པ་དང་བཅས་པས་བཅོ་བརྒྱད་དུ་འགྱུར་རོ་ཞེས་པའི་བར་གསུངས་སོ། །གཉིས་པ་ནི། སྐལ་མཉམ་སེམས་ཅན་འདྲ་བའོ། །ཞེས་པ་སྟེ། སྐལ་མཉམ་ཞེས་པའི་རྫས་ནི་སེམས་ཅན་རྣམས་ཀྱི་འདྲ་བ་སྟེ་རིས་མཐུན་པ་ཞེས་ཀྱང་བྱའོ། །
གཉིས་པ་འདུ་ཤེས་མེད་པ་སོགས་གསུམ་ལ་གསུམ་ནི། འདུ་ཤེས་མེད་པ་པ་འདུ་ཤེས། །མེད་པར་སེམས་དང་སེམས་བྱུང་རྣམས། །འགོག་པའོ་རྣམ་སྨིན་དེ་འབྲས་ཆེ། །དེ་བཞིན་འདུ་ཤེས་མེད་སྙོམས་འཇུག །བསམ་གཏན་ཐ་མར་འབྱུང་འདོད་པས། །དགེ་བའོ་སྐྱེས་ནས་མྱོང་འགྱུར་ཉིད། །འཕགས་པའི་མ་ཡིན་དུས་གཅིག་ཐོབ། །འགོག་པ་ཞེས་པའང་དེ་བཞིན་ཉིད། །འདི་གནས་དོན་དུ་སྲིད་རྩེ་སྐྱེས། །དགེ་བའོ་གཉིས་སུ་མྱོང་འགྱུར་དང་། །མ་ངེས་འཕགས་པའི་སྦྱོར་བས་འཐོབ། །ཐུབ་པའི་བྱང་ཆུབ་ཀྱིས་འཐོབ་བྱ། །དང་པོར་མ་ཡིན་སྐད་ཅིག་མ། །སུམ་ཅུ་རྩ་བཞིས་ཐོབ་ཕྱིར་རོ། །གཉིས་ཀ་འདོད་དང་གཟུགས་རྟེན་ཅན། །འགོག་པ་དང་པོ་མིའི་ནང་དུ། །ཞེས་པ་སྟེ། དེ་ལ་གསུམ་ལས་དང་པོ་འདུ་ཤེས་མེད་པ་ནི། འདུ་ཤེས་མེད་པར་སྐྱེས་པའི་གང་ཟག་གིས་དེར་སེམས་སེམས་བྱུང་མ་ལུས་པ་འགོག་པའོ། །དེ་ཡང་འདུ་ཤེས་མེད་པའི་སྙོམས་འཇུག་གི་རྣམ་སྨིན་གྱི་འབྲས་བུ་ལུང་མ་བསྟན་ཡིན། དེའི་གནས་ནི་འབྲས་བུ་ཆེ་བ་དང་གྲོང་དང་དགོན་པའི་ཚུལ་དུ་ཡོད། གཉིས་པ་དེའི་སྙོམས་འཇུག་ནི་འདུ་ཤེས་མེད་པ་དེས་སེམས་སེམས་བྱུང་མ་ལུས་པ་འགོག་པ་བཞིན་དུ་འདུ་ཤེས་མེད་པའི་སྙོམས་འཇུག་གིས་ཀྱང་དེ་འགོག་པར་བྱེད། རྒྱུ་ནི་བཞི་པའི་རབ་ཐ་ལ་བརྟེན་ནས་ངེས་པར་འབྱུང་བའི་ཚུལ་དུ་སྐྱེ་བར་འདོད། ངོ་བོ་དགེ་བ། དེ་ཡང་སྐྱེས་ནས་མྱོང་འགྱུར་གྱི་ཚུལ་དུ་སྐྱེ་བར་འདོད། རྟེན་གྱི་གང་ཟག་འཕགས་པའི་མིན་གྱི་སོ་སྐྱེ་ཁོ་ནའི་རྒྱུད་ལ་སྐྱེ་བར་འདོད། ཐོབ་པ་དུས་གཅིག་ཁོ་ན་ཡིན་གྱི་སྔར་སྐྱེས་ཕྱིས་སྐྱེས་གཉིས་ཀ་མེད། གསུམ་པ་འགོག་པའི་སྙོམས་འཇུག་ཅེས་པའང་འདུ་ཤེས་མེད་པའི་སྙོམས་འཇུག་དེ་བཞིན་དུ་སེམས་སེམས་བྱུང་མ་ལུས་པ་འགོག་པ་ཉིད་དོ། །འདི་ནི་ཟག་བཅས་ཀྱི་ཚོར་འདུ་ཉེར་ཞི་ལ་གནས་པའི་དོན་དུ་ཡིན། དངོས་ཀྱི་སེམས་རྟེན་སྲིད་རྩེའི་སྙོམས་འཇུག་ལ་བརྟེན་ནས་སྐྱེ་ཞིང་། དེའི་སས་བསྡུས་ཀྱི་ཟག་བཅས་ཡིན། ངོ་བོ་དགེ་བའོ། །འགོག་སྙོམས་བསྒོམས་པ་ལས་སྲིད་རྩེར་སྐྱེས་ཤིང་སྐྱེས་ནས་མྱོང་འགྱུར་དང་། ལན་གྲངས་གཞན་ལ་མྱོང་འགྱུར་གཉིས་ཀྱིས་སྲིད་རྩེར་སྐྱེ་བའི་ལས་ཅན་ཡིན་ཞིང་། དེར་སྐྱེ་བར་ནི་མ་ངེས་སོ། །རྟེན་གྱི་གང་ཟག་ཐེག་ཆེན་འཕགས་པའི་སྦྱོར་བ་དང་བཅས་པས་ཐོབ། ཐུབ་པ་སངས་རྒྱས་ཀྱིས་བླ་ན་མེད་པའི་བྱང་ཆུབ་བརྙེས་པའི་ཚུལ་གྱིས་འཐོབ་བྱ་ཡིན། དང་པོ་བྱང་སེམས་ཀྱི་རྒྱུད་ལ་ཡོད་པ་མིན་ཏེ། བྱང་སེམས་སོ་འཕགས་གཉིས་ཀའི་རྒྱུད་ལ་མེད་པའི་ཕྱིར། བྱང་འཕགས་ཀྱི་རྒྱུད་ལ་བདེན་པ་མངོན་རྟོགས་བཅུ་དྲུག །སྲིད་ཉོན་སྤོང་བྱེད་ཀྱི་བར་ཆད་མེད་ལམ་དགུ། དེ་ལས་གྲོལ་བའི་རྣམ་གྲོལ་ལམ་དགུ་སྟེ་སྐད་ཅིག་མ་སུམ་ཅུ་རྩ་བཞི་བར་མ་ཆད་དུ་ཐོབ་ཅིང་འགོག་སྙོམས་དེ་སེམས་སེམས་བྱུང་མ་ལུས་པ་འགགས་པའི་སྙོམས་འཇུག་ཡིན་པའི་ཕྱིར། འདུ་ཤེས་མེད་པའི་དང་འགོག་པའི་སྙོམས་འཇུག་གཉིས་ཀ་འདོད་གཟུགས་ཀྱི་རྟེན་ལ་སྐྱེ་བ་ཡོད་ཅིང་། འགོག་པའི་སྙོམས་འཇུག་ནི་དང་པོར་ཐོབ་པ་འདོད་པ་མིའི་ནང་དུ་ཡིན་ཞིང་། ཐོབ་ཟིན་གནས་པ་གཉིས་ཀའི་རྟེན་ལ་ཡོད་པའོ། །
གསུམ་པ་སྲོག་སོགས་གསུམ་བཤད་པ་ལ། དང་པོ་ནི། སྲོག་དང་། མཚན་ཉིད་བཤད་པའོ། །དང་པོ་ནི། སྲོག་ནི་ཚེ་ཡིན་དྲོད་དང་ནི། །རྣམ་ཤེས་རྟེན་གང་ཡིན་པའོ། །ཞེས་པ་སྟེ། ཕུང་པོའི་རིགས་འདྲ་གནས་པའི་རྟེན་བྱེད་པའི་ཚེ་ལ་འཇོག་པ་ཡིན། བྱེད་ལས་ནི། འདོད་གཟུགས་གཉིས་སུ་དྲོད་དང་རྣམ་ཤེས་ཀྱི་རྟེན་བྱེད། གཟུགས་མེད་དུ་རྣམ་ཤེས་ཀྱི་རྟེན་བྱེད་པའོ། །གཉིས་པ་ནི། མཚན་ཉིད་དག་ནི་སྐྱེ་བ་དང་། །དགའ་དང་གནས་དང་མི་རྟག་ཉིད། །དེ་དག་སྐྱེ་བའི་སྐྱེ་ལ་སོགས། །དེ་ཆོས་བརྒྱད་དང་གཅིག་ལ་འཇུག །རྒྱུ་དང་རྐྱེན་དག་མེད་པར་ནི། །སྐྱེ་བ་བསྐྱེད་བྱ་སྐྱེད་བྱེད་མིན། །ཞེས་པ་སྟེ། འདུས་བྱས་ཡིན་ན་རང་གི་མཚན་ཉིད་སྐྱེ་བ་དང་། རྒ་བ་དང་། གནས་པ་དང་། མི་རྟག་པ་ཉིད་དེེ་བཞིས་མཚོན་དགོས་ཏེ། དེ་བཞི་དང་ལྡན་པས་ཁྱབ་པའི་ཕྱིར། འོ་ན་བུམ་པའི་སྐྱེ་བ་ལ་སྐྱེ་བ་ཡོད་དམ་མེད། མེད་ན་འདུས་བྱས་མིན་པར་འགྱུར་ཞིང་། ཡོད་ན་སྐྱེ་བ་ཐུག་མེད་དུ་འགྱུར་རོ་ཞེ་ན་སྐྱོན་མེད་དེ་བུམ་པ་ལྟ་བུ་གཅིག་སྐྱེ་བ་ན། ཆོས་དགུ་ཅིག་ཅར་དུ་སྐྱེ་སྟེ། བུམ་པ་དེའི་སྐྱེ་བ། རྒ་བ། གནས་པ། མི་རྟག་པ། སྐྱེ་བའི་སྐྱེ་བ། རྒ་བའི་རྒ་བ། གནས་པའི་གནས་པ། མི་རྟག་པའི་མི་རྟག་པ་སྟེ་དགུ་ཅིག་ཅར་དུ་སྐྱེ་བས་སོ། །བུམ་པའི་སྐྱེ་བ་དེས་བུམ་པ་བསྐྱེད་པའི་ཚེ་ཆོས་བརྒྱད་ཅིག་ཅར་དུ་བསྐྱེད་དེ། ཁོ་རང་མ་གཏོགས་པ་བརྒྱད་སྐྱེད་པའི་ཕྱིར། བུམ་པའི་སྐྱེ་བའི་སྐྱེ་བ་དེ་བུམ་པའི་སྐྱེ་བ་གཅིག་བུ་བསྐྱེད་པ་ལ་འཇུག །དེ་བཞིན་དུ་གནས་པས་ཀྱང་བདག་ཉིད་མ་གཏོགས་པ་ཆོས་གཞན་བརྒྱད་གནས་པར་བྱེད་ལ། གནས་པ་ནི། རྩ་བའི་གནས་པ་དེ་ཁོ་ན་གནས་པར་བྱེད་དོ། །དེ་བཞིན་དུ་རྒས་པ་དང་། མི་རྟག་པ་ལའང་སྦྱར་རོ། །འོ་ན་སྐྱེ་བ་ཁོ་ནས་ཆོས་བརྒྱད་སྐྱེད་པར་བྱེད་ན། མ་འོངས་པ་ཐམས་ཅད་ཅིག་ཅར་དུ་བསྐྱེད་པར་འགྱུར་རོ་ཞེ་ན་མིན་ཏེ། རྒྱུ་རྐྱེན་གྱི་ཚོགས་པ་མེད་པར་ནི། སྐྱེ་བ་ཁོ་ནས་བསྐྱེད་བྱ་དེ་སྐྱེད་པར་བྱེད་པ་མིན་པའི་ཕྱིར་རོ། །
བཞི་པ་མིང་སོགས་གསུམ་བཤད་པ་ནི། མིང་གི་ཚོགས་ལ་སོགས་པ་ནི། །མིང་དང་ངག་དང་ཡི་གེའི་ཚོགས། །འདོད་དང་གཟུགས་གཏོགས་སེམས་ཅན་སྟོན། །རྒྱུ་མཐུན་ལུང་བསྟན་མིན། ཞེས་པ་སྟེ། དོན་གྱི་ངོ་བོ་ཙམ་སྟོན་པར་བྱེད་པའི་མཉན་བྱ་ལ་མིང་དུ་འཇོག །དཔེ་ནི། གཟུགས་ཞེས་པ་ལྟ་བུ། དེ་དུ་མ་ཚོགས་པ་ནི་མིང་གི་ཚོགས་ཏེ། དཔེར་ན་གཟུགས་སྒྲ་དྲི་རོ་རེག་བྱ་ཞེས་པ་ལྟ་བུ། སོགས་ཁོངས། དོན་གྱི་ངོ་བོ་ཁྱད་པར་དང་བཅས་སྟོན་པའི་མཉན་བྱ་ལ་ངག་ཏུ་འཇོག །དཔེ་ནི་འདུས་བྱས་མི་རྟག་ཅེས་པ་ལྟ་བུ། དེ་དུ་མ་ཚོགས་པ་ནི་ཚིག་གི་ཚོགས། དེ་གཉིས་ཀའི་གསལ་བྱེད་དུ་གྱུར་པའི་སྐད་གདངས་ཀྱི་ངོ་བོ་ལ་ཡི་གེར་འཇོག །དཔེ་ནི་ཨ་ཞེས་པ་ལྟ་བུ། དེ་དུ་མ་ཚོགས་པ་ཡི་གེའི་ཚོགས་སུ་འཇོག །དེས་ན་མིང་ཚིག་ཡི་གེ་གསུམ་གཟུགས་ཕུང་དང་། ཚོགས་གསུམ་འདུ་བྱེད་ཀྱི་ཕུང་པོར་འདོད་དོ། །ཚོགས་གསུམ་པོ་འདོད་གཟུགས་སུ་གཏོགས་ཀྱི་གཟུགས་མེད་ན་མེད། སེམས་ཅན་གྱི་རྒྱུད་ཀྱིས་བསྡུས་པས་སེམས་ཅན་དུ་སྟོན་པ། བྱུང་བ་གསུམ་གྱི་ནང་ནས་རྒྱུ་མཐུན་ཁོ་ན་ལས་བྱུང་བ། ངོ་བོ་མ་བསྒྲིབས་ལུང་མ་བསྟན་ནོ། །
གསུམ་པ་ཆོས་གཞན་གྱི་ཁྱད་པར་བསྟན་པའི་སྒོ་ནས་དོན་བསྡུ་བ་ནི། དེ་བཞིན། །སྐལ་མཉམ་རྣམ་པར་སྨིན་པའང་ཡིན། །ཁམས་གསུམ་པ་སྟེ་ཐོབ་རྣམ་གཉིས། །མཚན་ཉིད་རྣམས་ཀྱང་སྙོམས་འཇུག་དང་། །མི་ལྡན་པ་དག་རྒྱུ་མཐུན་པ། །ཞེས་པ་སྟེ། བཤད་མ་ཐག་པ་དེ་བཞིན་དུ་སྐལ་མཉམ་དེ་སེམས་ཅན་དུ་སྟོན་པ་དང་རྒྱུ་མཐུན་གྱི་རྒྱུ་ལས་བྱུང་བ་དང་། མ་བསྒྲིབས་ལུང་མ་བསྟན་ཏེ་ཁྱད་ཆོས་གསུམ་ལྡན་ནོ། །འོ་ན་རྒྱུ་མཐུན་གྱི་རྒྱུ་ལས་བྱུང་བ་ཁོ་ན་ཡིན་ནམ་ཞེ་ན། རྣམ་སྨིན་གྱི་རྒྱུ་ལས་བྱུང་བ་ཡིན། སས་བསྡུས་ཚུལ་ཁམས་གསུམ་ཆར་དུ་གཏོགས་པ་ཡོད། ཐོབ་པའང་རྒྱུ་མཐུན་དང་། རྣམ་སྨིན་གྱི་རྒྱུ་སྟེ་གཉིས་ལས་བྱུང་བ་ཡིན། མཚན་ཉིད་རྣམས་ཀྱང་རྒྱུ་དེ་གཉིས་དང་ལྡན། གོང་དུ་བཤད་པའི་སྙོམས་འཇུག་གཉིས་དང་མི་ལྡན་པའི་འདུ་བྱེད་དག་རྒྱུ་མཐུན་པ་ལས་བྱུང་བ་ཁོ་ནའོ། །
གསུམ་པ་རྒྱུ་རྐྱེན་འབྲས་བུའི་རྣམ་བཞག་ལ། རྒྱུ་འབྲས་སྤྱིར་བསྟན་དང་། རྐྱེན་བྱེ་བྲག་ཏུ་བཤད་པའོ། །དང་པོ་ལ། རྒྱུ། འབྲས་བུ། དེ་གཉིས་ཐུན་མོང་གི་ཆོས་བཤད་པ་དང་གསུམ། དང་པོ་ལ། དབྱེ་བའི་སྒོ་ནས་མདོར་བསྟན། སོ་སོའི་རང་བཞིན་རྒྱས་པར་བཤད། དུས་ཀྱི་སྒོ་ནས་དོན་བསྡུ་བ་དང་གསུམ། དང་པོ་ནི། བྱེད་རྒྱུ་ལྷན་ཅིག་འབྱུང་བ་དང་། །སྐལ་མཉམ་མཚུངས་པར་ལྡན་པ་དང་། །ཀུན་ཏུ་འགྲོ་དང་རྣམ་སྨིན་དང་། །རྒྱུ་ནི་རྣམ་པ་དྲུག་ཏུ་འདོད། །ཅེས་པ་སྟེ། རྣམ་པ་དྲུག་སྟེ་བྱེད་རྒྱུ་ནས་རྣམ་སྨིན་གྱི་རྒྱུའི་བར་དུའོ། །བསྡུ་ན་བྱེད་རྒྱུ་གཅིག་པུར་འདུས་ཏེ། དེ་ནུས་ལྡན་དང་། ནུས་མེད་གཉིས་སུ་འདུས་པའི་ཕྱིར། ལྷག་མ་ལྔ་ཡང་གཉིས་སུ་འདུས་ཏེ། མཉམ་པ་དང་མི་མཉམ་པ་གཉིས་ལས། སྤྱིར་མཉམ་པའི་དབང་དུ་བྱས་ནས་ལྷན་ཅིག་འབྱུང་རྒྱུ། བྱེ་བྲག་ཤེས་པར་མཉམ་པའི་ཆ་ནས་མཚུངས་ལྡན་གྱི་རྒྱུ་བཤད། གཉིས་པ་ལ་རིགས་འདྲ་མི་འདྲ་གཉིས་ལས། དང་པོ་ལ། སྤྱིར་འདྲ་བའི་དབང་དུ་བྱས་ནས་སྐལ་མཉམ་གྱི་རྒྱུ། བྱེ་བྲག་ཉོན་མོངས་ཅན་དུ་འདྲ་བའི་ཆ་ནས་ཀུན་འགྲོའི་རྒྱུ། རིགས་མི་འདྲ་བའི་དབང་དུ་བྱས་ནས་རྣམ་སྨིན་གྱི་རྒྱུ་བཞག་པའི་ཕྱིར་རོ། །གཉིས་པ་ལ་དྲུག་ལས། དང་པོ་བྱེད་རྒྱུ་ནི། རང་ལས་གཞན་པ་བྱེད་རྒྱུའི་རྒྱུ། །ཞེས་པ་སྟེ། རང་སྐྱེ་བ་ལ་གེགས་མི་བྱེད་ཅིང་རང་ལས་དོན་གཞན་པའི་ཆོས་ཤིག་བྱེད་རྒྱུར་འཇོག །དེ་ཡང་ནུས་ལྡན་དང་ནུས་མེད་གཉིས་ཡོད་ཅིང་། དེ་ཡང་རང་ཕན་འདོགས་དང་ཕན་གནོད་མེད་པ་དང་། གནོད་བྱེད་དེ་གསུམ་ལས། དང་པོའི་དབང་དུ་ནུས་ལྡན། གཉིས་པའི་དབང་དུ་ནུས་མེད་བཞག་ལ། ཕྱི་མ་བྱེད་རྒྱུར་མི་འཇོག་སྟེ། དཔེར་ན་བུམ་པ་འཇིག་པའི་ཐོ་བ་སོགས་དེའི་བྱེད་རྒྱུ་མིན་པ་བཞིན་ནོ། །གཉིས་པ་ལྷན་ཅིག་འབྱུང་རྒྱུ་ལ། ངོ་བོ། མཚན་གཞི། སེམས་ཀྱི་རྗེས་འཇུག་ངོས་བཟུང་བ། རྗེས་སུ་འཇུག་ཚུལ་དང་བཞི། དང་པོ་ནི། ལྷན་ཅིག་འབྱུང་གང་ཕན་ཚུན་འབྲས། །ཞེས་པ་སྟེ། ཕན་ཚུན་རྒྱུ་འབྲས་སུ་གྱུར་པའི་རྒྱུ་ཞིག་ལ་འཇོག་པའོ། །གཉིས་པ་ནི། འབྱུང་བཞིན་སེམས་ཀྱི་རྗེས་འཇུག་དང་། །སེམས་དང་མཚན་ཉིད་མཚན་གཞི་བཞིན། །ཞེས་པ་སྟེ། ཚོགས་པ་གཅིག་ན་གནས་པའི་འབྱུང་བཞི་བཞིན་དང་། སེམས་ཀྱི་རྗེས་འཇུག་རྣམས་དང་སེམས་བཞིན་དང་། འདུས་བྱས་ཀྱི་མཚན་ཉིད་སྐྱེ་སོགས་དང་། མཚན་གཞི་འདུས་བྱས་ཕན་ཚུན་རྒྱུ་འབྲས་ཡིན་པ་བཞིན་ནོ། །གསུམ་པ་ནི། སེམས་ལས་བྱུང་དང་སྡོམ་གཉིས་དང་། །སེམས་དང་དེ་དག་གི་མཚན་ཉིད། །ཅེས་པ་སྟེ། སེམས་ཀྱི་འཁོར་དུ་བྱུང་བའི་སེམས་བྱུང་དང་། དེ་ལ་བརྟེན་པའི་བསམ་གཏན་ཟག་མེད་ཀྱི་སྡོམ་པ་གཉིས་དང་། སེམས་དེ་དག་གི་མཚན་ཉིད་སྐྱེ་སོགས་རྣམས་སོ། །བཞི་པ་ནི། སེམས་ཀྱི་རྗེས་འཇུག་དུས་དང་ནི། །འབྲས་སོགས་དགེ་ལ་སོགས་པས་སོ། །ཞེས་པ་སྟེ། སེམས་དང་དེའི་རྗེས་འཇུག་གཉིས་དུས་གཅིག་པ་ཡིན་ཏེ། སེམས་འདས་པས་དེའི་རྗེས་འཇུག་འདས་པའི་ལྷན་ཅིག་འབྱུང་རྒྱུ་བྱེད། སེམས་ཀྱི་རྗེས་འཇུག་འདས་པ་རྣམས་ཀྱིས་སེམས་འདས་པའི་ལྷན་ཅིག་འབྱུང་རྒྱུ་བྱེད། ད་ལྟ་བ་དང་མ་འོངས་པ་ལའང་དེའི་ཕྱིར་སེམས་ཀྱི་འབྲས་བུ་དེ་དེའི་རྗེས་འཇུག་རྣམས་ཀྱི་ཡང་འབྲས་བུར་ལྡན་པས་འབྲས་བུ་གཅིག་པ་དང་། སེམས་དགེ་བས་སེམས་དགེ་བ་བསྐྱེད་པ་དང་། སེམས་བྱུང་མི་དགེ་བས་སེམས་མི་དགེ་བ་བསྐྱེད་པ་སོགས་རིགས་གཅིག་གོ །མཐའ་གཅིག་ཏུ་མ་ངེས་ཏེ་སེམས་དགེ་མི་དགེའི་རང་གི་མཚན་ཉིད་སྐྱེ་སོགས་ལུང་མ་བསྟན་བསྐྱེད་པ་ཡོད་པའི་ཕྱིར་རོ། །གསུམ་པ་སྐལ་མཉམ་གྱི་རྒྱུ་ལ། ངོ་བོ་སྤྱིར་བསྟན་པ་དང་། ནང་མཚན་བྱེ་བྲག་ཏུ་བཤད་པ་གཉིས། དང་པོ་ནི། སྐལ་མཉམ་རྒྱུ་ནི་འདྲ་བའོ། །ཞེས་པ་སྟེ། འབྲས་བུ་རང་དང་འདྲ་བར་སྐྱེད་པའི་རྒྱུ་གཅིག་ལ་དེའི་རྒྱུར་འཇོག་པའོ། །གཉིས་པ་ལ། ཉོན་མོངས་ཅན་གྱི་དང་། དེ་མིན་པའི་སྐལ་མཉམ་གྱི་རྒྱུ་གཉིས། དང་པོ་ནི། རང་རིས་ས་པའོ་སྔར་སྐྱེས་རྣམས། །ས་དགུའི་ལམ་ནི་ཕན་ཚུན་དུ། །མཉམ་དང་ཁྱད་པར་ཅན་གྱི་ཡིན། །ཞེས་པ་སྟེ། ཁྱད་ཆོས་གསུམ་སྟེ། རང་དང་སྤང་བྱ་རིས་གཅིག་པ། ས་གཅིག་པ། འབྲས་བུའི་སྔར་སྐྱེས་ཡིན་པ་རྣམས་སོ། །དེ་ཡང་སྤང་བྱ་རིགས་ལྔ་ལས་སྡུག་བསྔལ་མཐོང་སྤང་གིས་དེའི་སྐད་ཅིག་ཕྱི་མའི་རྒྱུ་བྱེད་ཀྱི་གཞན་གྱི་མི་བྱེད་པ་ནས། སྒོམ་སྤང་སྐད་ཅིག་སྔ་མས་དེ་སྐད་ཅིག་ཕྱི་མའི་སྐལ་མཉམ་གྱི་རྒྱུ་བྱེད་ཀྱི་གཞན་གྱི་མི་བྱེད་པ་དང་། ས་དགུ་ལས་འདོད་ཉོན་གྱིས་འདོད་ཉོན་ཕྱི་མའི་སྐལ་མཉམ་གྱི་རྒྱུ་བྱེད་གཞན་མི་བྱེད་པ་ནས། སྲིད་ཉོན་གྱིས་སྲིད་ཉོན་ཕྱི་མའི་སྐལ་མཉམ་གྱི་རྒྱུ་བྱེད་ཀྱི་གཞན་གྱི་མི་བྱེད་པ་དང་། འབྲས་བུའི་སྔ་རོལ་དུ་སྐྱེས་པ་གཅིག་དགོས་ཀྱི་འབྲས་བུ་དང་དུས་མཉམ་དང་ཕྱིས་བྱུང་བས། འབྲས་བུ་དེའི་སྐལ་མཉམ་གྱི་རྒྱུ་མི་བྱེད་དོ། །ཟག་མེད་ས་དགུ་ལ་བརྟེན་པའི་ལམ་ནི་ཕན་ཚུན་མཉམ་པས་མཉམ་པ་དང་། མཉམ་པ་ཁྱད་པར་ཅན་གྱི་རྒྱུ་བྱེད་པ་གཉིས་ཡིན། དང་པོ་ནི། སྡུག་བསྔལ་ཆོས་བཟོད་སྐད་ཅིག་དང་པོས་དེ་སྐད་ཅིག་གཉིས་པའི་སྐལ་མཉམ་གྱི་རྒྱུ་བྱེད་པ་ལྟ་བུའོ། །གཉིས་པ་ནི། སྡུག་བསྔལ་ཆོས་བཟོད་ཀྱིས་སྡུག་བསྔལ་ཆོས་ཤེས་ནས་ཟད་མི་སྐྱེ་ཤེས་པའི་བར་གྱི་རྒྱུ་བྱེད་པ་ལྟ་བུ། གཉིས་པ་ནི། སྦྱོར་བྱུང་དེ་ཉིད་ཁོ་ནའི་ཡིན། །ཐོས་དང་བསམ་བྱུང་ལ་སོགས་པ། །ཞེས་པ་སྟེ། སྦྱོར་བྱུང་འཇིག་རྟེན་པའི་ལམ་ལ་ཡང་། མཉམ་པས་མཉམ་པ་དང་། ཁྱད་པར་ཅན་གྱི་སྐལ་མཉམ་གྱི་རྒྱུ་བྱེད་པ་དེ་གཉིས་ཁོ་ན་ཡིན་ཏེ། དཔེར་ན་ཐོས་བསམ་ལས་བྱུང་བ་དང་། སོགས་ཁོངས་ནས་སྒོམ་བྱུང་རྣམས་མཉམ་པ་དང་། ཁྱད་པར་ཅན་ཁོ་ནའི་རྒྱུ་ཡིན་གྱི་དམན་པའི་མིན་པ་བཞིན་ནོ། །བཞི་པ་མཚུངས་ལྡན་གྱི་རྒྱུ་ནི། མཚུངས་ལྡན་རྒྱུ་ནི་སེམས་དག་དང་། །སེམས་བྱུང་རྟེན་མཚུངས་ཅན་རྣམས་སོ། །ཞེས་པ་སྟེ། ཐུན་མོང་མ་ཡིན་པའི་བདག་རྐྱེན་གཅིག་ལ་བརྟེན་པར་མཚུངས་པ་ཅན་གྱི་སེམས་སེམས་བྱུང་གཉིས་ནི། ཕན་ཚུན་མཚུངས་ལྡན་གྱི་རྒྱུའོ། །ལྔ་པ་ཀུན་འགྲོའི་རྒྱུ་ནི། ཀུན་འགྲོ་ཞེས་བྱ་ཉོན་མོངས་ཅན། །རྣམས་ཀྱི་རང་ས་ཀུན་འགྲོ་ལྔ། །ཞེས་པ་སྟེ། འབྲས་བུ་དང་རང་འདྲ་བར་བསྐྱེད་པའི་རྒྱུ་གཅིག་ལ་ཀུན་འགྲོའི་རྒྱུར་འཇོག །དེ་ཡང་རང་དང་ས་གཅིག་པ་དང་། འབྲས་བུའི་སྔར་བྱུང་བ་གཅིག་དགོས་ཀྱི་རང་དང་སྤང་བྱ་རིགས་གཅིག་པ་མི་དགོས་ཏེ། འདོད་པའི་སས་བསྡུས་ཀྱི་མཐོང་སྤང་གིས་སྒོམ་སྤང་འདོད་ཉོན་གྱི་ཀུན་འགྲོའི་རྒྱུ་བྱེད་པ་ཡོད་པའི་ཕྱིར་རོ། །དྲུག་པ་རྣམ་སྨིན་གྱི་རྒྱུ་ནི། རྣམ་སྨིན་རྒྱུ་ནི་མི་དགེ་དང་། །དགེ་བ་ཟག་བཅས་རྣམས་ཁོ་ན། །ཞེས་པ་སྟེ། མི་དགེ་བ་དང་དགེ་བ་ཟག་བཅས་གཉིས་རྣམས་ཁོ་ནའོ། །གསུམ་པ་དོན་བསྡུ་བ་ནི། ཀུན་འགྲོ་སྐལ་མཉམ་དུས་གཉིས་པ། །གསུམ་པོ་དག་ནི་དུས་གསུམ་པ། །ཞེས་པ་སྟེ། ཀུན་འགྲོ་སྐལ་མཉམ་གྱི་རྒྱུ་ནི་འདས་ད་ལྟ་བ་སྟེ་འདས་པས་ད་ལྟར་བ་དང་། ད་ལྟར་བས་མ་འོངས་པའི་རྒྱུ་བྱེད་པའི་ཕྱིར། ལྷན་ཅིག་འབྱུང་བ་མཚུངས་ལྡན་རྣམ་སྨིན་གསུམ་པོ་ནི་དུས་གསུམ་པ་སྟེ་མ་འོངས་པས་མ་འོངས་པ་བསྐྱེད་པའང་ཡོད་པའི་ཕྱིར། འདིར་བྱེད་རྒྱུ་མ་བཤད་དེ། བྱེད་རྒྱུའི་རྒྱུ་ནི་དུས་ངེས་པ་མ་བསྟན་པས་དུས་ཐམས་ཅད་པ་དང་དུས་དང་བྲལ་བར་ཡང་རིག་པར་བྱའོ། །
གཉིས་པ་འབྲས་བུ་ལ། མཚན་གཞི། འབྲས་བུ་གང་རྒྱུ་དུ་ལས་བྱུང་ཚུལ། འབྲས་བུ་སོ་སོའི་ངོ་བོ་དང་གསུམ། དང་པོ་ནི། འདུས་བྱས་བྲལ་བཅས་འབྲས་བུ་ཡིན། །འདུས་མ་བྱས་ལ་དེ་དག་མེད། །ཅེས་པ་སྟེ། འདུས་བྱས་བྲལ་བ་འགོག་པ་དང་བཅས་པ་འབྲས་བུ་ཡིན་ཏེ། བསྟན་བཅོས་ལས། འབྲས་བུའི་ཆོས་རྣམས་གང་ཞེ་ན། འདུས་བྱས་ཀྱི་ཆོས་ཐམས་ཅད་དང་། སོ་སོར་བརྟགས་པས་འགོག་པ་ཞེས་འབྱུང་བས་སོ། །འོ་ན་འགོག་བདེན་གྱི་རྒྱུ་ཡོད་པར་འགྱུར་རོ་ཞེ་ན། འདུས་མ་བྱས་ལ་རྒྱུ་དྲུག་པོ་དེ་དག་མེད་ལ། དེ་ཡང་དང་པོ་མེད་དེ། ཁོ་འབྲས་བུ་སྐྱེ་རུང་དུ་མེད་པའི་ཕྱིར། གཉིས་པ་དང་བཞི་པ་མེད་དེ། ཕན་ཚུན་རྒྱུ་འབྲས་སུ་མེད་པའི་ཕྱིར། གསུམ་པ་དང་ལྔ་པ་མེད་དེ། ཁོའི་རིགས་མཐུན་གྱི་རྒྱུ་མེད་པའི་ཕྱིར། དྲུག་པ་མེད་དེ། ཁོའི་རྒྱུར་གྱུར་པའི་མི་དགེ་བ་དང་དགེ་བ་ཟག་བཅས་གང་རུང་མེད་པའི་ཕྱིར། གཉིས་པ་ནི། རྣམ་སྨིན་འབྲས་བུ་ཐ་མའི་ཡིན། །བདག་པོའི་འབྲས་བུ་དང་པོའི་ཡིན། །རྒྱུ་མཐུན་སྐལ་མཉམ་ཀུན་འགྲོ་བའི། །སྐྱེས་བུ་པ་ནི་གཉིས་ཀྱི་ཡིན། །ཞེས་པ་སྟེ། རྣམ་སྨིན་གྱི་འབྲས་བུ་ནི་རྒྱུ་དྲུག་གི་ནང་ནས་ཐ་མ་རྣམ་སྨིན་གྱི་རྒྱུའི་འབྲས་བུ་ཡིན། བདག་འབྲས་ནི་རྒྱུ་དང་པོ་བྱེད་རྒྱུའི་འབྲས་བུ་ཡིན། རྒྱུ་མཐུན་ནི་སྐལ་མཉམ་དང་ཀུན་འགྲོའི་འབྲས་བུ་ཡིན། སྐྱེས་བུ་བྱེད་འབྲས་ནི་ལྷན་ཅིག་འབྱུང་བ་དང་མཚུངས་ལྡན་གྱི་རྒྱུ་གཉིས་ཀྱི་འབྲས་བུ་ཡིན། གསུམ་པ་ནི། རྣམ་སྨིན་ལུང་དུ་མ་བསྟན་ཆོས། །སེམས་ཅན་བརྗོད་ལུང་བསྟན་ཕྱིས་འབྱུང་། །རྒྱུ་མཐུན་རྒྱུ་དང་འདྲ་བའོ། །བྲལ་བ་བློ་ཡིས་ཟད་པའོ། །གང་གི་སྟོབས་ཀྱིས་གང་སྐྱེས་པའི། །འབྲས་དེ་སྐྱེས་བུའི་བྱེད་ལས་སྐྱེས། །སྔོན་བྱུང་མ་ཡིན་འདུས་བྱས་ནི། །འདུས་བྱས་ཁོ་ནའི་བདག་པོའི་འབྲས། །ཞེས་པ་སྟེ། རྣམ་སྨིན་གྱི་འབྲས་བུ་ནི་མ་བསྒྲིབས་ལུང་མ་བསྟན་པའི་ཆོས་ཤིག་ལ་བྱེད། །དེ་ཡང་སེམས་གྱི་རྒྱུད་ཀྱིས་བསྡུས་པར་འཇོག་ཅིང་། རྒྱུ་ལུང་དུ་བསྟན་པ་ལས་ཕྱིས་འབྱུང་སྟེ། མི་དགེ་བ་དང་དགེ་བ་ཟག་བཅས་གང་རུང་ལས་ཕྱིས་འབྱུང་བའི་འབྲས་བུ་ཡིན་པའི་ཕྱིར། རྒྱུ་མཐུན་གྱི་འབྲས་བུ་ནི། རྒྱུ་དེ་དང་རིགས་འདྲ་བར་སྐྱེས་པའི་འབྲས་བུ་གཅིག་ལ་འཇོག །བྲལ་འབྲས་ནི་བློ་བར་ཆད་མེད་ལམ་གྱིས་རང་གི་སྤང་བྱ་ཟད་པར་སྤངས་པའི་སྟོབས་ཀྱིས་ཐོབ་པའི་འགོག་པའོ། །སྐྱེས་བུའི་བྱེད་འབྲས་ནི་རྒྱུ་གང་སྐྱེས་པའི་སྟོབས་ཀྱིས་འབྲས་བུ་གང་རང་གི་ངང་གིས་སྐྱེས་པའི་འབྲས་བུ་དེའོ། །བརྟགས་འགོག་ལ་ནི་གང་གི་སྟོབས་ཀྱིས་གང་ཐོབ་པའི་ཞེས་སྦྱར་རོ། །འབྲས་བུ་དེ་རྒྱུའི་སྔོན་བྱུང་མ་ཡིན་པར་དུས་མཉམ་པའི་ཕྱིས་འབྱུང་བའི་འདུས་བྱས་ནི། རྒྱུ་འདུས་བྱས་ཁོ་ནའི་བདག་འབྲས་སོ། །དེ་ལྟར་ཡང་རྒྱལ་སྲས་མར། འབྲས་བུ་ལས་རྒྱུ་ཕྱི་བ་ནི་མེད་དོ། །ཞེས་སོ། །
གསུམ་པ་རྒྱུ་འབྲས་གཉིས་ཀའི་ཐུན་མོང་གི་ཆོས་ལ། འབྲས་བུ་འཛིན་པ་དང་འབྱིན་པའི་ཁྱད་པར་དང་། འབྲས་བུ་གང་རྒྱུ་གང་ལས་བྱུང་ཚུལ་ལོ། །དང་པོ་ནི། ལྔ་པོ་ད་ལྟར་འབྲས་བུ་འཛིན། །གཉིས་ནི་རབ་ཏུ་འབྱིན་པར་བྱེད། །ད་ལྟར་གྱི་དང་འདས་པ་དག །གཅིག་ནི་འདས་པས་འབྱིན་པར་འགྱུར། །ཞེས་པ་སྟེ། སྤྱིར་རྒྱུས་འབྲས་བུ་བསྐྱེད་པའི་ནུས་པ་ལ་འཛིན་པ་དང་དངོས་སུ་བསྐྱེད་པ་ལ་འབྱིན་པར་འཇོག །དེས་ན་བྱེད་རྒྱུ་མ་གཏོགས་པའི་རྒྱུ་ལྔ་པོ་ད་ལྟར་བའི་འབྲས་བུ་འཛིན་པ་ཡིན་ཏེ། དེ་དག་ལ་འབྲས་བུ་བསྐྱེད་པའི་ནུས་པ་ཡོད་པའི་ཕྱིར། ལྡན་མཚུངས་ཀྱི་རྒྱུ་གཉིས་ནི་ད་ལྟ་བའི་འབྲས་བུ་རབ་ཏུ་འབྱིན་པར་བྱེད་དེ་འབྲས་བུ་རང་དང་ལྷན་ཅིག་ཏུ་བསྐྱེད་པའི་ཕྱིར། སྐལ་མཉམ་དང་ཀུན་འགྲོའི་རྒྱུ་གཉིས་ནི་ད་ལྟར་གྱི་འབྲས་བུ་དང་འདས་པའི་འབྲས་བུ་དག་ཁོ་ན་ཡིན་ཏེ། སྐད་ཅིག་གཞན་གྱིས་བར་མ་ཆོད་པར་གཉིས་པ་ལ་འབྲས་བུ་བསྐྱེད་ན་ད་ལྟར་བ་དང་། བར་ཆོད་པས་བསྐྱེད་ན་བདག་འབྲས་འབྱིན་ཞིང་མ་འོངས་འབྲས་འབྱིན་མེད་པའི་ཕྱིར། རྣམ་སྨིན་གྱི་རྒྱུ་ནི་འདས་པ་ཁོ་ནས་འབྲས་བུ་འབྱིན་པར་འགྱུར་ཏེ། ལྷན་ཅིག་གམ་དེ་མ་ཐག་ཏུ་འབྲས་བུ་འབྱིན་པ་མེད་པས་སོ། །གཉིས་པ་ནི། ཉོན་མོངས་ཅན་དང་རྣམ་སྨིན་སྐྱེས། །ལྷག་དང་དང་པོ་འཕགས་རིམ་བཞིན། །རྣམ་སྨིན་ཀུན་འགྲོ་དེ་གཉིས་དང་། །སྐལ་མཉམ་མ་གཏོགས་ལྷག་ལས་སྐྱེས། །སེམས་དང་སེམས་ལས་བྱུང་བ་ཡིན། །མཚུངས་ལྡན་མ་གཏོགས་གཞན་དེ་བཞིན། །ཞེས་པ་སྟེ། སྤྱིར་འབྲས་བུ་དེ་ལ་སེམས་སེམས་བྱུང་གིས་བསྡུས་པ་དང་། མ་བསྡུས་པ་གཉིས། དང་པོ་ལ་བཞི་སྟེ། ཉོན་མོངས་ཅན་དང་རྣམ་སྨིན་སྐྱེས་དང་། དེ་གཉིས་ཀྱི་ལྷག་མ་མ་བསྒྲིབས་ལུང་མ་བསྟན་དང་། ཟག་མེད་སྐད་ཅིག་དང་པོའི་ལྷག་མ་དེ་སྐད་ཅིག་གཉིས་པ་མན་ཆད་ཀྱི་དགེ་བ་རྣམས་དང་། ཟག་མེད་སྐད་ཅིག་དང་པོའི་དགེ་བ་སྟེ་བཞིར་ཡོད་པའི་ཕྱིར། དེ་ཡང་གོ་རིམ་བཞིན་ཉོན་མོངས་ཅན་གྱི་འབྲས་བུ་ནི་རྣམ་སྨིན་གྱི་རྒྱུ་མ་གཏོགས་པ་ལྔ་ལས་བྱུང་དེ་ལས་མ་བྱུང་སྟེ་རྣམ་སྨིན་གྱི་འབྲས་བུ་ནི། མ་བསྒྲིབས་ལུང་མ་བསྟན་ཞིག་ལ་བཤད་དེ། ཁོ་ཉོན་མོངས་ཅན་ཡིན་པའི་ཕྱིར། རྣམ་སྨིན་གྱི་འབྲས་བུ་ནི་ཀུན་འགྲོའི་རྒྱུ་མ་གཏོགས་པ་ལྔ་ལས་བྱུང། དེ་ལས་མ་བྱུང་སྟེ་ཀུན་འགྲོ་ནི་ཉོན་མོངས་ཅན་ཞིག་ལ་བཤད་ལ། ཁོ་མ་བསྒྲིབས་ལུང་མ་བསྟན་ཡིན་པའི་ཕྱིར། ལྷག་མ་མ་བསྒྲིབས་ལུང་མ་བསྟན་དང་ཟག་མེད་སྐད་ཅིག་གཉིས་པ་མན་ཆད་ཀྱི་འབྲས་བུ་ནི། རྣམ་སྨིན་དང་ཀུན་འགྲོའི་རྒྱུ་དེ་གཉིས་མ་གཏོགས་པ་བཞི་ལས་བྱུང་། དེ་གཉིས་ལས་མ་བྱུང་སྟེ། རིམ་བཞིན་མི་དགེ་བ་དང་དགེ་བ་ཟག་བཅས་ཀྱི་འབྲས་བུ་མིན་པའི་ཕྱིར་དང་། ཉོན་མོངས་ཅན་མིན་པའི་ཕྱིར། ཟག་མེད་སྐད་ཅིག་དང་པོ་འཕགས་ལམ་ནི། རྣམ་སྨིན་ཀུན་འགྲོ་སྐལ་མཉམ་གྱི་རྒྱུ་ལས་མ་གཏོགས་པའི་རྒྱུ་ལྷག་མ་གསུམ་ལས་སྐྱེས། དང་པོ་གཉིས་ལས་མ་བྱུང་སྟེ། གོང་གི་གཏན་ཚིགས་དེའི་ཕྱིར། སྐལ་མཉམ་གྱི་རྒྱུ་ལས་མ་བྱུང་སྟེ། ཁོ་ཟག་མེད་ཀྱི་རིགས་འདྲ་སྔོན་སོང་མིན་པའི་ཕྱིར། དེ་དག་ནི་སེམས་དང་སེམས་ལས་བྱུང་བའི་དབང་དུ་བྱས་པ་ཡིན། གཉིས་པ་དེ་གཉིས་ཀྱིས་མ་བསྡུས་པའི་འབྲས་བུ་རྣམས་ནི་མཚུངས་ལྡན་གྱི་རྒྱུ་མ་གཏོགས་པ་གཞན་གོང་དུ་བཤད་པ་དེ་བཞིན་དུ་རྒྱུ་བཞི་དང་། གསུམ་དང་། གཉིས་ལས་སྐྱེ་བ་ཡོད་དོ། །དེ་མཚུངས་ལྡན་གྱི་རྒྱུ་ལས་མ་བྱུང་སྟེ། དེ་དང་མཚུངས་ལྡན་གྱི་སེམས་སེམས་བྱུང་གང་ཡང་མེད་པའི་ཕྱིར།
གཉིས་པ་རྐྱེན་བྱེ་བྲག་ཏུ་བཤད་པ་ལ། རྐྱེན་གྱི་རྣམ་བཞག་སྤྱིར་བཤད་པ་དང་། དེ་མ་ཐག་རྐྱེན་བྱེ་བྲག་ཏུ་བཤད་པ་གཉིས། དང་པོ་ལ། དབྱེ་བའི་སྒོ་ནས་མདོར་བསྟན། སོ་སོའི་རང་བཞིན་རྒྱས་པར་བཤད། དེ་དག་གི་ཁྱད་ཆོས་གཞན་བཤད་པ་དང་གསུམ། དང་པོ་ནི། །རྐྱེན་ནི་བཞི་པོ་དག་ཏུ་གསུངས། །ཞེས་པ་སྟེ། རྐྱེན་ལ་དབྱེ་ན། རྒྱུ་རྐྱེན། དེ་མ་ཐག་རྐྱེན། དམིགས་རྐྱེན། བདག་རྐྱེན་དང་བཞིར་གསུངས་པའི་ཕྱིར། གཉིས་པ་ནི། རྒྱུ་ཞེས་བྱ་བ་རྒྱུ་ལྔ་ཡིན། །སེམས་དང་སེམས་བྱུང་སྐྱེས་པ་རྣམས། །ཐ་མ་མིན་མཚུངས་དེ་མ་ཐག །དམིགས་པ་ཆོས་རྣམས་ཐམས་ཅད་དོ། །བྱེད་རྒྱུ་ཞེས་བྱ་བདག་པོར་བཤད། །ཅེས་པ་སྟེ། གོང་དུ་བཤད་པའི་རྒྱུ་ལྔ་རྒྱུའི་རྐྱེན་ཡིན་ཏེ། རང་འབྲས་ཀྱི་ངོ་བོ་ལ་ཕན་འདོགས་བྱེད་ཡིན་པས་སོ། །སྐྱེས་པ་ད་ལྟར་བ་དང་འདས་པས་བསྡུས་པའི་སེམས་སེམས་བྱུང་ཕལ་ཆེ་བ་རྣམས་མཚུངས་པ་དེ་མ་ཐག་རྐྱེན་ཡིན་ཏེ། རང་འབྲས་རིག་པ་ཕྱི་མའི་ཉེར་ལེན་བྱེད་ནུས་ཀྱི་ཤེས་པ་ཡིན་པའི་ཕྱིར། ལྷག་མེད་མྱ་ངན་ལས་འདའ་ཁ་མའི་དགྲ་བཅོམ་པ་ཐ་མའི་སེམས་སེམས་བྱུང་རྣམས་དེ་མ་ཐག་རྐྱེན་མ་ཡིན་ཏེ། རང་འབྲས་རིག་པ་ཕྱི་མའི་ཉེར་ལེན་མ་ཡིན་པའི་ཕྱིར། གཟུགས་ལ་སོགས་པའི་ཆོས་ཐམས་ཅད་དམིགས་རྐྱེན་ཡིན་ཏེ། གཟུགས་མིག་ཤེས་ཀྱི་དམིགས་རྐྱེན་ཡིན་པ་ནས། ཆོས་ཐམས་ཅད་ཡིད་ཀྱི་རྣམ་ཤེས་ཀྱི་དམིགས་རྐྱེན་ཡིན་པའི་བར་དུ་ཡིན་པས་སོ། །འདི་ལ་གཉིས་ཏེ་དམིགས་རྐྱེན་ནུས་ལྡན་དང་ནུས་མེད་གཉིས། དང་པོ་ནི་འདུས་བྱས་ཐམས་ཅད་དོ། །གཉིས་པ་ནི་འདུས་མ་བྱས་རྣམས་སོ། །བྱེད་རྒྱུ་ཞེས་བྱ་བ་དེ་བདག་པོའི་རྐྱེན་དུ་བཤད་དོ། །རྐྱེན་འདི་གཉ ིས་ལ་ཁྱད་པར་ཅི་ཡོད་ཅེ་ན། ཡོད་དེ། རྣམ་ཤེས་དང་ལྷན་ཅིག་འབྱུང་བའི་ཆོས་རྣམས་རྣམ་ཤེས་དེའི་དམིགས་རྐྱེན་མིན་ཡང་། བདག་རྐྱེན་ཡིན་པས་སོ། །གསུམ་པ་ཁྱད་ཆོས་ལ། རྐྱེན་གང་གིས་འབྲས་བུ་གང་ལ་བྱ་བ་བྱེད་ཚུལ། འབྲས་བུ་གང་རྐྱེན་དུ་ལས་འབྱུང་ཚུལ། འབྱུང་བ་འབྱུང་འགྱུར་གཉིས་རྐྱེན་དང་རྐྱེན་ཅན་དུ་འགྱུར་ཚུལ་དང་གསུམ། དང་པོ་ནི། རྒྱུ་གཉིས་པོ་དག་འགག་པ་ལ། །བྱ་བ་བྱེད་དོ་གསུམ་པོ་ནི། །སྐྱེ་ལའོ་དེ་ལས་གཞན་པ་ཡིས། །རྐྱེན་དག་དེ་ལས་ལྡོག་པ་ཡིན། །ཞེས་པ་སྟེ། རྒྱུ་ལྔ་ལས་ལྷན་ཅིག་འབྱུང་རྒྱུ་དང་མཚུངས་ལྡན་གྱི་རྒྱུ་གཉིས་ནི་འགག་པ་ལ་མངོན་དུ་ཕྱོགས་པའི་འབྲས་བུ་ད་ལྟར་བ་ལ་བྱེད་དེ། རྒྱུ་འབྲས་དུས་མཉམ་པའི་ཕྱིར། རྒྱུ་ལྷག་མ་གསུམ་པོ་ནི་འབྲས་བུ་སྐྱེ་རུང་མ་འོངས་པ་ལ་བྱ་བ་བྱེད་དེ། རང་འབྲས་ཕྱི་མ་སྐྱེད་བྱེད་ཡིན་པའི་ཕྱིར། དེ་ལས་གཞན་པའི་རྐྱེན་ཕྱི་མ་གསུམ་པོ་ནི། སྔ་མ་དེ་དག་ལས་གོ་རིམ་ལྡོག་ནས་བྱ་བ་བྱེད་དེ། དེ་མ་ཐག་རྐྱེན་གྱིས་འབྲས་བུ་མ་འོངས་པ་ལ་བྱ་བ་བྱེད། དམིགས་རྐྱེན་གྱིས་ད་ལྟར་བ་ལ། བདག་རྐྱེན་གྱིས་དུས་ཀུན་ཏུ་བྱ་བ་བྱེད་དོ། །གཉིས་པ་ནི། བཞི་ཡིས་སེམས་དང་སེམས་བྱུང་རྣམས། །གསུམ་གྱིས་སྙོམས་པར་འཇུག་པ་གཉིིས། །གཞན་ནི་གཉིས་པོ་དག་ལས་སྐྱེ། །དབང་ཕྱུག་སོགས་མིན་རིམ་སོགས་ཕྱིར། །ཞེས་པ་སྟེ། སེམས་སེམས་བྱུང་རྣམས་རྐྱེན་བཞིས་བསྐྱེད་པའི་འབྲས་བུ་ཡིན་ཏེ། དངོས་པོ་ཡིན་པས་རྒྱུ་རྐྱེན་དང་བདག་རྐྱེན་གྱི་དང་། ཤེས་པ་ཡིན་པས་དམིགས་རྐྱེན་དང་དེ་མ་ཐག་རྐྱེན་གྱི་འབྲས་བུ་ཡིན་པས་སོ། །དམིགས་རྐྱེན་མ་གཏོགས་གསུམ་གྱིས་འགོག་སྙོམས་དང་། འདུ་ཤེས་མེད་པའི་སྙོམས་འཇུག་གཉིས་བསྐྱེད་དེ། དངོས་པོ་ཡིན་པས་རྒྱུ་རྐྱེན་དང་བདག་རྐྱེན་གྱི་འབྲས་བུ་ཡིན་ལ། སྙོམས་པར་འཇུག་ཁ་མའི་སེམས་ལས་བྱུང་བས་དེ་མ་ཐག་རྐྱེན་གྱི་འབྲས་བུ་ཡིན་པས་སོ། །དེ་ལས་གཞན་ལྡན་པ་མིན་པ་ལྷག་མ་དང་གཟུགས་ཅན་གྱི་དངོས་པོ་རྣམས་རྒྱུ་རྐྱེན་དང་བདག་རྐྱེན་གཉིས་ལས་སྐྱེས་ཏེ་དངོས་པོ་ཡིན་པས་སོ། །རྐྱེན་ལ་བཞིར་གྲངས་ངེས་ཤིང་དབང་ཕྱུག་སོགས་རྐྱེན་མ་ཡིན་ཏེ། དབང་ཕྱུག་ནི་འབྲས་བུ་རིམ་བསྐྱེད་མ་ཡིན་པར་ཁས་བླངས་ཤིང་། རྐྱེན་ནི་འབྲས་བུ་རིམ་བསྐྱེད་སོགས་ཡིན་པའི་ཕྱིར། གསུམ་པ་ནི། དེའི་རྒྱུ་འབྱུང་བ་རྣམ་པ་གཉིས། །འབྱུང་ལས་གྱུར་པའི་རྣམ་པ་ལྔ། །འབྱུང་གྱུར་རྣམ་གསུམ་ཕན་ཚུན་དུ། །འབྱུང་བ་རྣམས་ཀྱི་དེ་རྣམ་གཅིག །ཅེས་པ་སྟེ། འབྱུང་བ་རྒྱུར་བཅས་དང་། འབྱུང་འགྱུར་རྒྱུར་བྱས་པ་གཉིས་ལས། དང་པོ་ལའང་འབྱུང་བ་བསྐྱེད་པ་དང་། འབྱུང་འགྱུར་བསྐྱེད་པ་གཉིས། དང་པོའི་ཚེ་འབྱུང་བ་དེའི་རྒྱུ་འབྱུང་བ་ནི་རྣམ་པ་གཉིས་ཏེ། རང་དང་དུས་མཉམ་གྱི་འབྱུང་བ་བསྐྱེད་པས་ལྷན་ཅིག་འབྱུང་རྒྱུ་དང་། རིགས་འདྲ་ཕྱི་མ་བསྐྱེད་པས་སྐལ་མཉམ་གྱི་རྒྱུར་འགྱུར་བའི་ཕྱིར་རོ། །འབྱུང་འགྱུར་བསྐྱེད་ཚེ་བྱེད་རྒྱུ་ཁོ་ནར་འགྱུར་བ་ལས་དེ་ཡང་བྱེད་ཚུལ་ལྔ་སྟེ། འབྱུང་འགྱུར་ཕྱི་མ་སྐྱེད་པར་བྱེད། དེ་ཉིད་འབྱུང་བ་ཕྱི་མ་ལ་རྟེན་པར་བྱེད་པ། བརྟེན་པ་གནས་པར་བྱེད། གནས་པ་རྒྱུན་མི་ཆད་པར་བྱེད། འབྱུང་བ་རྒྱས་པའིི་སྟོབས་ཀྱིས་འབྱུང་བ་གོང་འཕེལ་དུ་བྱེད་པའི་ཕྱིར། ཕྱི་མ་ལ་འབྱུང་འགྱུར་རྒྱུར་བྱས་ནས་འབྱུང་འགྱུར་བསྐྱེད་པ་དང་། འབྱུང་བ་བསྐྱེད་པ་གཉིས་ལས། དང་པོ་ནི། འབྱུང་འགྱུར་མི་དགེ་བ་གསུམ་དུ་འགྱུར་བ་ཡོད་དེ། དེས་འབྱུང་འགྱུར་ཉོན་མོངས་ཅན་བསྐྱེད་ཚེ། སྐལ་མཉམ་དང་ཀུན་འགྲོའི་རྒྱུ་གཉིས་སུ་འགྱུར། འབྱུང་འགྱུར་མ་བསྒྲིབས་ལུང་མ་བསྟན་བསྐྱེད་ཚེ། རྣམ་སྨིན་གྱི་རྒྱུར་འགྱུར་བའི་ཕྱིར། གཉིས་པ་ནི། དེས་འབྱུང་བ་རྣམས་ཀྱི་རྒྱུ་བྱེད་པའི་ཚེ་དེ་རྣམ་སྨིན་གྱི་རྒྱུ་གཅིག་པུར་འགྱུར་ཏེ། ལུས་ངག་གི་ལས་དེ་དབང་པོ་དང་ཚོགས་པ་གཅིག་པའི་འབྱུང་བའི་རྒྱུ་ཡིན་པས་སོ། །
གཉིས་པ་དེ་མ་ཐག་རྐྱེན་བྱེ་བྲག་ཏུ་བཤད་པ་ལ། བཅུ་གཉིས་སུ་དབྱེ། ཉི་ཤུར་དབྱེ། སེམས་ཀྱི་ཐོབ་པ། རྙེད་ཚུལ་བྱེ་བྲག་ཏུ་བཤད་པ་དང་གསུམ་ལས། དང་པོ་ནི། དཔེའི་སྒོ་ནས་མདོར་བསྟན་པ་དང་། སོ་སོའི་རང་བཞིན་ནོ། །དང་པོ་ནི། འདོད་ཡིད་དགེ་དང་མི་དགེ་དང་། །བསྒྲིབས་པ་དང་ནི་མ་བསྒྲིབས་པ། །གཟུགས་དང་གཟུགས་མེད་པ་དག་ན། །མི་དགེ་ལས་གཞན་ཟག་མེད་གཉིས། །ཞེས་པ་སྟེ། འདོད་ཁམས་ན་སེམས་ཡིད་དགེ་བ་དང་། མི་དགེ་བ་དང་། བསྒྲིབས་པ་དང་མ་བསྒྲིབས་པ་དེ་བཞི་ཡོད། གཟུགས་གཟུགས་མེད་ན། མི་དགེ་བ་ལས་གཞན་པའི་གསུམ་གསུམ་ཡོད། སློབ་པ་ཟག་མེད། མི་སློབ་པ་ཟག་མེད་གཉིས་ཏེ་བཅུ་གཉིས་ཡོད་དོ། །གཉིས་པ་ལ། འདོད་པ། གཟུགས། གཟུགས་མེད་ཀྱི་དབང་དུ་བྱས་པ་དང་གསུམ། དང་པོ་ནི། འདོད་སེམས་དགེ་བ་ལས་སེམས་དགུ། །དེ་ནི་བརྒྱད་པོ་ཁོ་ན་ལས། །མི་དགེ་བ་ནི་བཅུ་དག་ལས། །དེ་ལས་བཞི་སྟེ་བསྒྲིབས་དེ་བཞིན། །མ་བསྒྲིབས་པ་ནི་ལྔ་དག་ལས། །དེ་ལས་མཇུག་ཐོགས་སེམས་བདུན་ནོ། །ཞེས་པ་སྟེ། དང་པོ་དགེ་བའི་དབང་དུ་བྱས་པ་ནི། སྤྱིར་ཚེ་བདུན་ཡོད་དེ། རྒྱུན་དང་ས་མཚུངས་པའི་ཚེ། ཉིང་མཚམས་སྦྱོར་བའི་ཚེ། སྙོམས་འཇུག་གི་ཚེ། དེ་ལས་ལྡང་ཚེ། སྤྲུལ་པ་ལ་འཇུག་ཚེ། སྙོམས་འཇུག་ཉོན་མོངས་ཅན་གྱིས་གཟིར་བའི་ཚེའོ། །དང་པོའི་ཚེ། རང་རང་གི་མཇུག་ཏུ་རང་གི་རིགས་འདྲ་ཕྱི་མ་འབྱུང་ཞིང་། ས་མཚུངས་པའི་ཚེ། འདོད་སེམས་གཅིག་གི་མཇུག་ཏུ་བཞི་ཀ་འབྱུང་། ཁམས་གོང་མ་ཡང་དེ་བཞིན་ཉིང་མཚམས་སྦྱོར་ཚེ་གང་གིས་གང་དུ་དང་། དེའི་འབྲས་བུ་གཉིས་ལས། དང་པོ་ནི། འདོད་པའི་དགེ་བ་དང་། མ་བསྒྲིབས་གཉིས་ཀྱིས་ཁམས་གོང་མ་གཉིས་ཆར་དུ་ཉིང་མཚམས་སྦྱོར་བར་བྱེད། གཟུགས་ཀྱི་དེ་གཉིས་ཀྱིས་ཁམས་གོང་དུ་ཉིང་མཚམས་སྦྱོར་བར་བྱེད། གཟུགས་མེད་ཀྱི་སེམས་གསུམ་ཀས་གཟུགས་དང་འདོད་པ་གཉིས་ཆར་དུ་སྦྱོར། གཟུགས་ཀྱི་གསུམ་ཀས་འདོད་པར་སྦྱོར་རོ། །གཉིས་པ་འབྲས་བུ་ནི། འདོད་པ་ནས་ཡར་ཉིང་མཚམས་སྦྱོར་ཚེ། གཟུགས་ཀྱི་བསྒྲིབས་ལུང་མ་བསྟན་དང་། གཟུགས་མེད་ཀྱི་བསྒྲིབས་ལུང་མ་བསྟན་གཉིས་འབྱུང་། གཟུགས་མེད་ཀྱི་འོག་མ་གཉིས་སུ་ཉིང་མཚམས་སྦྱོར་ཚེ། གཟུགས་ཀྱི་བསྒྲིབས་པ་དང་། འདོད་པའི་མི་དགེ་བ་དང་། བསྒྲིབས་པ་གཉིས་འབྱུང་། སྙོམས་འཇུག་གི་ཚེ་སེམས་གང་གིས་སྙོམས་པར་འཇུག་པ། ཡུལ་གང་ལ། ཚུལ་ཇི་ལྟར་དུ་སྙོམས་པར་འཇུག་པ། སྙོམས་པར་ཞུགས་པའི་འབྲས་བུ་དང་བཞི་ལས། དང་པོ་ནི། ཁམས་གསུམ་གྱི་དགེ་སེམས་གསུམ་གྱིའོ། །གཉིས་པ་ནི། ཁམས་གོང་མ་གཉིས་ཀྱི་དགེ་སེམས་སློབ་མི་སློབ་ཀྱི་སེམས་ཟག་མེད་བཞི་ལ་འཇུག །གསུམ་པ་ནི། འདོད་པའི་དགེ་སེམས་དེ་གཟུགས་ཀྱི་དགེ་སེམས་དང་ཟག་མེད་གཉིས་ལ་འཇུག་གི་གཟུགས་མེད་ལ་མི་འཇུག་སྟེ། གཟུགས་མེད་དེ་འདོད་པ་ལས་རིང་བ་རྣམ་པ་བཞིས་རིང་བའི་ཕྱིར། བཞི་ནི། དམིགས་པ། རྣམ་པ། རྟེན། གཉེན་པོའོ། །གཟུགས་ཀྱི་དགེ་སེམས་ཀྱིས་གཟུགས་མེད་དང་ཟག་མེད་གཉིས་ཏེ་གསུམ་ལ་འཇུག །གཟུགས་མེད་ཀྱི་དགེ་སེམས་ནི། སློབ་པ་ཟག་མེད་དང་། མི་སློབ་པ་ཟག་མེད་གཉིས་ལ་འཇུག །བཞི་པ་སྙོམས་པར་ཞུགས་འབྲས་ནི། འཇུག་ཡུལ་གྱི་སེམས་དེ་དག་སྙོམས་པར་འཇུག་བྱེད་ཀྱི་སེམས་ཀྱི་རྗེས་སུ་འབྱུང་། བཞི་པ་སྙོམས་འཇུག་ལས་ལངས་པའི་ཚེ། འཇུག་ཡུལ་གྱི་སེམས་རྗེས་སུ་འཇུག་བྱེད་ཀྱི་སེམས་འབྱུང་། ལྔ་པ་ནི། སེམས་གང་གིས་གང་ལ་འཇུག་པ་དང་། སྤྲུལ་པ་ལས་ཞུགས་པའི་འབྲས་བུ་གཉིས། དང་པོ། གཟུགས་ཀྱི་དགེ་སེམས་ཁོ་ནས་འདོད་གཟུགས་ཀྱི་སྤྲུལ་སེམས་གཉིས་ལ་འཇུག །གཉིས་པ་ནི། གཟུགས་ཀྱི་དགེ་སེམས་ཀྱི་མཇུག་ཏུ་འདོད་པའི་སྤྲུལ་སེམས་ལུང་མ་བསྟན་འབྱུང་། དྲུག་པ་སྤྲུལ་པ་ལས་ལངས་ཚེ། འདོད་པའི་གཟུགས་ཀྱི་སྤྲུལ་སེམས་ཀྱི་རྗེས་སུ་འདོད་གཟུགས་ཀྱི་དགེ་སེམས་འབྱུང་། བདུན་པ་གཟིར་བའི་ཚེ་འོག་མའི་དགེ་སེམས་འབྱུང་། དེ་དག་གཞུང་དང་སྦྱར་བ་ནི། འདོད་སེམས་དགེ་བའི་མཇུག་ཏུ་སེམས་དགུ་འབྱུང་སྟེ། རྒྱུན་དང་ས་མཚུངས་པའི་ཚེ་རང་སའི་བཞི་འབྱུང་། ཁམས་གོང་མ་གཉིས་སུ་ཉིང་མཚམས་སྦྱོར་ཚེ་གོང་མ་གཉིས་ཀྱི་བསྒྲིབས་ལུང་མ་བསྟན་གཉིས་འབྱུང་། སྙོམས་འཇུག་གི་ཚེ་གཟུགས་ཀྱི་དགེ་སེམས་དང་ཟག་མེད་གཉིས་ཏེ་གསུམ་རྣམས་འབྱུང་བའི་ཕྱིར། འདོད་སེམས་དགེ་བ་དེ་ནི་བརྒྱད་ཀྱི་མཇུག་ཏུ་འབྱུང་སྟེ། རང་སའི་བཞི་དང་སྙོམས་འཇུག་ལས་ལང་ཚེ། གཟུགས་ཀྱི་དགེ་སེམས་དང་ཟག་མེད་གཉིས་དང་གཟུགས་ཀྱི་སྙོམས་འཇུག་ཉོན་མོངས་ཅན་གྱིས་གཟིར་བའི་ཚེ། གཟུགས་ཀྱི་བསྒྲིབས་པ་དང་བརྒྱད་ལས་འབྱུང་བའི་ཕྱིར། འདོད་པའི་མི་དགེ་བ་ནི་བཅུ་དག་ལས་འབྱུང་སྟེ། རྒྱུན་དང་ས་མཚུངས་པའི་ཚེ། རང་སའི་བཞི། ཉིང་མཚམས་སྦྱོར་ཚེ། གཟུགས་ཀྱི་སེམས་གསུམ། གཟུགས་མེད་ཀྱི་གསུམ་སྟེ་བཅུ་ལས་འབྱུང་བའི་ཕྱིར། ཁོ་ལས་བཞི་འབྱུང་སྟེ་རང་སའི་བཞི་འབྱུང་བའི་ཕྱིར། མི་དགེ་བ་དེ་ཇི་ལྟ་བ་བཞིན་དུ་འདོད་པའི་བསྒྲིབས་ལུང་མ་བསྟན་ལ་སྦྱར། འདོད་པའི་མ་བསྒྲིབས་པ་ནི་སེམས་ལྔ་ལས་འབྱུང་སྟེ། ས་མཚུངས་པའི་ཚེ། རང་སའི་བཞི། སྤྲུལ་འཇུག་གི་ཚེ། གཟུགས་ཀྱི་དགེ་སེམས་དང་ལྔ་ལས་འབྱུང་བའི་ཕྱིར། ཁོ་ལས་མཇུག་ཐོགས་སུ་སེམས་བདུན་འབྱུང་སྟེ། ས་མཚུངས་ཚེ་རང་ས་བཞི། ཁམས་གོང་མ་གཉིས་སུ་ཉིང་མཚམས་སྦྱོར་ཚེ། གོང་མ་གཉིས་ཀྱི་ཉོན་མོངས་ཅན་གཉིས། སྤྲུལ་པ་ལས་ལངས་ཚེ་གཟུགས་ཀྱི་དགེ་སེམས་ཏེ་བདུན་འབྱུང་བའི་ཕྱིར། གཉིས་པ་གཟུགས་ཀྱི་དབང་དུ་བྱས་པ་ནི། གཟུགས་ན་དགེ་ལས་བཅུ་གཅིག་གོ །དེ་ནི་དགུ་ཡི་མཇུག་ཐོགས་སུ། །བསྒྲིབས་པ་བརྒྱད་ལས་དེ་ལས་དྲུག །མ་བསྒྲིབས་པ་ནི་གསུམ་ལས་སོ། །དེ་ལས་དྲུག་སྟེ། ཞེས་པ་སྟེ། གཟུགས་ཀྱི་དགེ་བ་ལས་བཅུ་གཅིག་འབྱུང་སྟེ། ས་མཚུངས་པའི་ཚེ་རང་སའི་གསུམ། ཉིང་མཚམས་སྦྱོར་ཚེ་འདོད་པའི་མི་དགེ་བ་དང་བསྒྲིབས་པ་གཉིས། གཟུགས་ཀྱི་བསྒྲིབས་པ། གཟུགས་མེད་ཀྱི་བསྒྲིབས་པ། སྙོམས་འཇུག་གི་ཚེ། གཟུགས་མེད་ཀྱི་དགེ་བ་ཟག་མེད་གཉིས། སྤྲུལ་འཇུག་གི་ཚེ་འདོད་པའི་མ་བསྒྲིབས་པ། སྙོམས་འཇུག་ལས་ལངས་ཚེ། འདོད་པའི་དགེ་སེམས་ཏེ་བཅུ་གཅིག་འབྱུང་བའི་ཕྱིར། གཟུགས་ཀྱི་དགེ་བ་དེ་ནི་དགུའི་མཇུག་ཐོགས་སུ་འབྱུང་སྟེ། ས་མཚུངས་པའི་ཚེ་རང་སའི་གསུམ། སྙོམས་འཇུག་གི་ཚེ་འདོད་པའི་དགེ་བ། དེ་ལས་ལངས་ཚེ་གཟུགས་མེད་ཀྱི་དགེ་བ་ཟག་མེད་གཉིས། སྤྲུལ་པ་ལས་ལངས་ཚེ་འདོད་པའི་མ་བསྒྲིབས་པ། ཉོན་མོངས་ཅན་གྱིས་གཟིར་ཚེ་གཟུགས་མེད་ཀྱི་བསྒྲིབས་པའི་མཇུག་ཐོགས་སུ་འབྱུང་བའི་ཕྱིར། གཟུགས་ཀྱི་བསྒྲིབས་པ་སེམས་བརྒྱད་ལས་འབྱུང་སྟེ། ས་མཚུངས་ཚེ་རང་སའི་གསུམ། ཉིང་མཚམས་སྦྱོར་ཚེ་གཟུགས་མེད་ཀྱི་གསུམ། འདོད་པའི་དགེ་བ་དང་མ་བསྒྲིབས་ལུང་མ་བསྟན་གཉིས་ཏེ་བརྒྱད་ལས་འབྱུང་བའི་ཕྱིར། དེ་ལས་དྲུག་འབྱུང་སྟེ་ས་མཚུངས་ཚེ་རང་སའི་གསུམ། ཉིང་མཚམས་སྦྱོར་ཚེ་འདོད་པའི་མི་དགེ་བ་དང་བསྒྲིབས་པ་གཉིས། ཉོན་མོངས་ཅན་གྱིས་གཟིར་ཚེ་འདོད་པའི་དགེ་བ་སྟེ་དྲུག་འབྱུང་བའི་ཕྱིར། གཟུགས་ཀྱི་མ་བསྒྲིབས་པ་ནི་སེམས་གསུམ་ལས་འབྱུང་སྟེ། རང་སའི་གསུམ་ལས་འབྱུང་བས་སོ། །དེ་ལས་དྲུག་འབྱུང་སྟེ་ས་མཚུངས་ཚེ་རང་སའི་གསུམ། ཉིང་མཚམས་སྦྱོར་ཚེ་འདོད་པའི་མི་དགེ་བ་དང་བསྒྲིབས་པ་གཉིས། གཟུགས་མེད་ཀྱི་བསྒྲིབས་པ་སྟེ་དྲུག་འབྱུང་བའི་ཕྱིར་རོ། །གསུམ་པ་གཟུགས་མེད་ཀྱི་དབང་དུ་བྱས་པ་ནི། གཟུགས་མེད་པའང་། །དེ་ཡི་ཚུལ་ལོ་དགེ་བ་ལས། །སེམས་དགུ་དག་གོ་དེ་དྲུག་གི །བསྒྲིབས་པ་ལས་བདུན་དེ་དེ་བཞིན། །སློབ་པ་བཞི་ལས་དེ་ལས་ལྔ། །མི་སློབ་པ་ནི་ལྔ་ལས་སོ། །དེ་ལས་སེམས་ནི་བཞི་དག་གོ །ཞེས་པ་སྟེ། གཟུགས་མེད་ཀྱི་མ་བསྒྲིབས་པའང་ནི། སེམས་གསུམ་ལས་འབྱུང་སྟེ། རང་སའི་གསུམ་ལས་སོ། །ཁོ་ལས་དྲུག་འབྱུང་སྟེ་ས་མཚུངས་ཚེ་རང་སའི་གསུམ། ཉིང་མཚམས་སྦྱོར་ཚེ་གཟུགས་ཀྱི་བསྒྲིབས་པ། འདོད་པའི་བསྒྲིབས་པ་དང་། མི་དགེ་བ་སྟེ་དྲུག་འབྱུང་བའི་ཕྱིར། གཟུགས་མེད་ཀྱི་དགེ་བ་ལས་སེམས་དགུ་འབྱུང་སྟེ། ས་མཚུངས་ཚེ་རང་སའི་གསུམ་ཉིང་མཚམས་སྦྱོར་ཚེ་གཟུགས་ཀྱི་བསྒྲིབས་པ། འདོད་པའི་བསྒྲིབས་པ་དང་། མི་དགེ་བ་གཉིས། སྙོམས་འཇུག་གི་ཚེ་ཟག་མེད་གཉིས་དེ་ལས་ལངས་ཚེ་གཟུགས་ཀྱི་དགེ་བ་སྟེ་དགུ་འབྱུང་བའི་ཕྱིར། གཟུགས་མེད་ཀྱི་དགེ་བ་དེ་ནི་དྲུག་གི་མཇུག་ཐོགས་སུ་འཇུག་སྟེ། རང་སའི་གསུམ་དང་སྙོམས་འཇུག་གི་ཚེ་གཟུགས་ཀྱི་དགེ་བ་དང་། ལྡང་ཚེ་ཟག་མེད་གཉིས་ལས་འབྱུང་བའི་ཕྱིར། གཟུགས་མེད་ཀྱི་བསྒྲིབས་པ་ལས་བདུན་འབྱུང་སྟེ། ས་མཚུངས་ཚེ་རང་སའི་གསུམ། ཉིང་མཚམས་སྦྱོར་ཚེ་གཟུགས་ཀྱི་བསྒྲིབས་པ་འདོད་པའི་བསྒྲིབས་པ། མི་དགེ་བ། གཟུགས་མེད་ཀྱི་སྙོམས་འཇུག་ཉོན་མོངས་ཅན་གྱིས་གཟིར་ཚེ་གཟུགས་ཀྱི་དགེ་བ་སྟེ་བདུན་འབྱུང་བའི་ཕྱིར། གཟུགས་མེད་ཀྱི་བསྒྲིབས་པ་དེ་ཡང་གྲངས་དེ་བཞིན་དུ་བདུན་ལས་འབྱུང་སྟེ། རང་སའི་གསུམ་དང་། ཉིང་མཚམས་སྦྱོར་ཚེ་འདོད་གཟུགས་ཀྱི་དགེ་བ་དང་། བསྒྲིབས་པ་བཞི་ལས་སོ། །སློབ་མི་སློབ་ཀྱི་དབང་དུ་བྱས་ན་སློབ་པའི་སེམས་ཟག་མེད་ནི་སེམས་བཞི་ལས་འབྱུང་སྟེ། སྙོམས་འཇུག་གི་ཚེ་ཁམས་གསུམ་གྱི་དགེ་བ་གསུམ། རྒྱུན་གྱི་ཚེ་རང་གི་རིགས་འདྲ་སྔ་མ་དང་བཞི་ལས་འབྱུང་བའི་ཕྱིར། དེ་ལས་ལྔ་འབྱུང་སྟེ་སྙོམས་འཇུག་ལས་ལངས་ཚེ། ཁམས་གསུམ་གྱི་དགེ་བ་གསུམ། རྒྱུན་གྱི་ཚེ་རང་གི་རིགས་འདྲ་ཕྱི་མ། རྟོགས་པ་འཕེལ་ཚེ་མི་སློབ་པའི་སེམས་ཟག་མེད་དེ་ལྔ་འབྱུང་བའི་ཕྱིར། མི་སློབ་པའི་སེམས་ཟག་མེད་ནི་ལྔ་ལས་འབྱུང་སྟེ། སྙོམས་འཇུག་གི་ཚེ་ཁམས་གསུམ་གྱི་དགེ་བ་གསུམ། རྟོགས་པ་འཕེལ་དབང་དུ་བྱས་ན་སློབ་པའི་ཟག་མེད་རྒྱུན་གྱི་ཚེ་རང་གི་རིགས་འདྲ་སྔ་མ་སྟེ་ལྔ་ལས་འབྱུང་བའི་ཕྱིར། ཁོ་ལས་བཞི་འབྱུང་སྟེ། སྙོམས་འཇུག་ལས་ལངས་ཚེ། ཁམས་གསུམ་གྱི་དགེ་བ་གསུམ་རྒྱུན་གྱི་ཚེ་རང་གི་རིགས་འདྲ་ཕྱི་མ་སྟེ་བཞི་འབྱུང་ངོ་། །གལ་ཏེ་བཞི་ལས་མི་འབྱུང་བ་མི་འཐད་དེ། དགྲ་བཅོམ་པའི་འབྲས་བུ་ལས་ཉམས་པ་ཡོད་པར་བཤད་པ་དང་འགལ་བའི་ཕྱིར་ཞེ་ན་སྐྱོན་མེད་དེ། དགྲ་བཅོམ་པའི་འབྲས་བུ་ལས་ཉམས་ནས་འོག་མའི་ཉོན་མོངས་མངོན་དུ་གྱུར་ཚེ། མི་སློབ་པ་ཟག་མེད་ཀྱི་ཐོབ་པ་མ་བཏང་བས་སློབ་པའི་སེམས་ཟག་མེད་མངོན་དུ་འགྱུར་བ་མེད་པའི་ཕྱིར། འོ་ན་འབྲས་བུ་ལས་ཉམས་པའི་དོན་ཅི་ཞེ་ན། ཉོན་མོངས་མངོན་དུ་གྱུར་པ་དང་། སློབ་པའི་ཟག་མེད་ཀྱི་ཐོབ་པ་ལྡན་པ་ཙམ་ལ་དགོངས་སོ། །གཉིས་པ་ཉི་ཤུར་དབྱེ་བ་ནི། བཅུ་གཉིས་དེ་དག་ཉི་ཤུར་ཡང་། །གསུམ་དུ་སྐྱེས་ནས་ཐོབ་པ་དང་། །སྦྱོར་བྱུང་དགེ་རྣམས་གཉིས་ཕྱེ་ན། །རྣམ་སྨིན་སྐྱེས་དང་སྤྱོད་ལམ་པ། །བཟོ་ཡི་གནས་དང་སྤྲུལ་པ་དང་། །འདོད་ན་ལུང་བསྟན་མིན་རྣམ་བཞི། །གཟུགས་ན་བཟོ་མ་གཏོགས་པའོ། །ཞེས་པ་སྟེ། གོང་དུ་བཤད་པའི་སེམས་བཅུ་གཉིས་པོ་དེ་དག་ནང་ཚན་གྱི་སྒོ་ནས་ཉི་ཤུར་དབྱེ་རུང་སྟེ། ཁམས་གསུམ་གྱི་དགེ་བ་ལ་སྐྱེས་ནས་ཐོབ་པ་དང་། སྦྱོར་བྱུང་གཉིས་གཉིས་ཕྱེ་བ་དྲུག་དང་། ཁམས་གསུམ་གྱི་བསྒྲིབས་པ་གསུམ། འདོད་པའི་མི་དགེ་བ་སྟེ་བཅུ་དང་འདོད་པའི་བསྒྲིབས་པ་ལ་རྣམ་སྨིན་སྐྱེས་དང་། སྤྱོད་ལམ་པ་དང་། བཟོའི་གནས་དང་། སྤྲུལ་སེམས་དང་བཞི་དང་། གཟུགས་ན་བཟོ་གནས་མ་གཏོགས་པ་གསུམ་དང་། གཟུགས་མེད་ཀྱི་མ་བསྒྲིབས་པ་དང་། སློབ་མི་སློབ་ཀྱི་སེམས་ཟག་མེད་གཉིས་ཏེ་ཉི་ཤུར་ཡོད་པའི་ཕྱིར། གསུམ་པ་སེམས་ཀྱི་ཐོབ་པ་བྱེ་བྲག་ཏུ་བཤད་པ་ནི། ཁམས་གསུམ་པ་ཡི་ཉོན་མོངས་ཅན། །དྲུག་དང་དྲུག་དང་གཉིས་རྙེད་དོ། །གཟུགས་སྐྱེས་དགེ་ལ་གསུམ་དག་གོ །སློབ་པ་ལ་བཞི་ལྷག་ལ་དེ། །ཞེས་པ་སྟེ། སེམས་མངོན་འགྱུར་བའི་ཐོབ་ཚུལ་དེ་ལྟར་ཡིན་ན། ཐོབ་པ་རྙེད་ཚུལ་ཇི་ལྟར་ཡིན་ཞེ་ན། རང་འགྲེལ་དུ། སྐྱེ་དང་སྙོམས་པར་འཇུག་པ་དང་། །འདོད་ཆགས་བྲལ་དང་ཡོངས་ཉམས་དང་། །དགེ་རྩ་ཉིང་མཚམས་སྦྱོར་བའི་ཚེ། །ཞེས་པའི་དོན་ནི། ཁམས་གསུམ་དུ་སྐྱེས་ཚེ། དེ་དག་གི་དགེ་བའི་ཐོབ་པ་དེ་འབྱུང་ལ། སྙོམས་པར་འཇུག་ཚེ་འཇུག་ཡུལ་གྱི་དགེ་བའི་ཐོབ་པ་དེ་འབྱུང། འོག་ས་ལ་འདོད་ཆགས་དང་བྲལ་ཚེ་གོང་སའི་དགེ་བའི་ཐོབ་པ་དེ་འབྱུང་། གོང་སའི་ཆགས་བྲལ་ལས་ཉམས་ཚེ་འོག་སའི་བསྒྲིབས་པའི་ཐོབ་པ་དེ་འབྱུང་། ལོག་ལྟས་དགེ་རྩ་བཅད་ནས་དགེ་བའི་ཉིང་མཚམས་སྦྱོར་ཚེ་དགེ་བའི་ཐོབ་པ་དེ་འབྱུང་། གཞུང་དང་སྦྱར་ན། འདོད་པའི་རྟེན་ཅན་གྱི་ཉན་ཐོས་དགྲ་བཅོམ་པའི་འབྲས་བུ་ལས་ཉམས་ནས། འདོད་པའི་ཉོན་མོངས་པ་མངོན་དུ་གྱུར་ཚེ་སེམས་དྲུག་གི་ཐོབ་པ་ཅིག་ཅར་དུ་རྙེད་དེ། འདོད་པའི་དགེ་མི་དགེ་ཁམས་གསུམ་གྱི་བསྒྲིབས་པ་དང་གསུམ། སློབ་པ་ཟག་མེད་དེ་དྲུག་གི་ཐོབ་པ་ཅིག་ཅར་རྙེད་པའི་ཕྱིར། ཡང་འདོད་པའི་རྟེན་ཅན་གྱི་ཉན་ཐོས་དགྲ་བཅོམ་པ་རང་གི་འབྲས་བུ་ལས་ཉམས་ནས་འདོད་པའི་ཆགས་བྲལ་ལས་མ་ཉམས་པས་གཟུགས་ཀྱི་ཉོན་མོངས་མངོན་དུ་གྱུར་པའི་ཚེ། སེམས་དྲུག་གི་ཐོབ་པ་ཅིག་ཅར་རྙེད་དེ། གཟུགས་ཀྱི་དགེ་བ་འདོད་གཟུགས་གཉིས་ཀྱི་སྤྲུལ་སེམས་གཉིས། ཁམས་གོང་མ་གཉིས་ཀྱི་བསྒྲིབས་པ་གཉིས། སློབ་པ་ཟག་མེད་དང་དྲུག་གི་ཐོབ་པ་ཅིག་ཅར་རྙེད་པའི་ཕྱིར། དགྲ་བཅོམ་གྱི་འབྲས་བུ་ལས་ཉམས་ནས་གཟུགས་མེད་ཀྱི་ཉོན་མོངས་ཅན་མངོན་དུ་གྱུར་ཚེ་གཉིིས་རྙེད་དེ། དེ་ཉིད་དང་སློབ་པའི་ཐོབ་པ་གཉིས་རྙེད་པའི་ཕྱིར། གཟུགས་སུ་སྐྱེས་ཚེ་གསུམ་ཅིག་ཅར་དུ་རྙེད་དེ། གཟུགས་ཀྱི་དགེ་བ་དེའི་སྟོབས་ཀྱིས་འདོད་གཟུགས་ཀྱི་སྤྲུལ་སེམས་གཉིས་ཏེ་གསུམ་གྱི་ཐོབ་པ་རྙེད་པའི་ཕྱིར། འདོད་པའི་རྟེན་ཅན་གྱི་སྦྱོར་ལམ་པས་བསམ་གཏན་གྱི་ཉེར་བསྡོགས་ལ་བརྟེན་ནས་སྡུག་བསྔལ་ཆོས་བཟོད་ཐོབ་པའི་ཚེ། ཐོབ་པ་བཞི་ཅིག་ཅར་རྙེད། སློབ་པ་ཟག་མེད། གཟུགས་ཀྱི་དགེ་བ། དེའི་སྟོབས་ཀྱི་སྤྲུལ་སེམས་གཉིས་ཏེ་བཞིའི་ཐོབ་པ་ཅིག་ཅར་རྙེད་པའི་ཕྱིར་རོ། །ཆོས་མངོན་རིན་ཆེན་སྙེ་མ་ལས། དབང་པོ་བསྟན་པ་ཞེས་བྱ་བ་སྟེ་གནས་གཉིས་པའོ།། །།