ཟབ་ལམ་ཐུགས་རྗེ་ཆེན་པོའི་ལོ་རྒྱུས།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ཟབ་ལམ་ཐུགས་རྗེ་ཆེན་པོའི་ལོ་རྒྱུས་བཞུགས༔ ཧེ་རུ་ཀཿདཔལ་ལྷ་ལ་འདུད༔ མཆིམས་ཕུ་དཔལ་གྱི་དབེན་རྩ་རུ༔ སློབ་དཔོན་པདྨ་འབྱུང་གནས་ལ༔ བཙུན་མོ་འབྲོམ་བཟའ་བྱང་ཆུབ་མས༔ གུས་པའི་ཕྱག་དང་བསྐོར་བ་བྱས༔ མ་འོངས་ལྔ་བརྒྱའི་ཡང་མཐའ་ལ༔ སྐྱེ་བ་དམན་པའི་བུད་མེད་བདག༔ ཤ་ཁྲག་དྲ་བའི་ལུས་ལེན་ཞིང་༔ བུད་མེད་བུ་རུ་སྐྱེས་ནས་ཀྱང་༔ ཁམས་ཞིག་ཉི་མ་གྲགས་པ་ཡི༔ གཏེར་གྱི་གྲོགས་སུ་འགྱུར་གསུང་དུས༔ ཉམས་ལེན་གང་ལ་བྱས་ན་ཟབ༔ ཡི་དམ་གང་གིས་བྱིན་རླབས་འཐོབ༔ ད་ནས་བཟུང་སྟེ་དེ་བར་དུ༔ ལས་ཀྱིས་ལུས་ངན་གང་ལྟར་ལེན༔ འགྲོ་དྲུག་མངལ་སྒོ་ཇི་ལྟར་འགྲིམ༔ བུད་མེད་སྐྱེ་བ་སྤངས་ནས་ཀྱང་༔ མཐོ་རིས་སངས་རྒྱས་འཐོབ་པའི་དུས༔ སྐྱེ་བ་དུ་ཙམ་བརྒྱུད་དུས་འོང་༔ གཟུངས་མ་ཡེ་ཤེས་མཚོ་རྒྱལ་དང་༔ ཤེལ་དཀར་རྡོ་རྗེ་མཚོ་མོ་དང་༔ ལྷ་ལྕམ་ནུས་འབྱིན་ས་ལེ་དང་༔ མོན་མོ་བཀྲ་ཤིས་ཁྱེ་འདྲེན་སོགས༔ བདག་ཅག་རིག་འཛིན་མཆེད་ལྕམ་ལྔས༔ དཀྱིལ་འཁོར་གཉན་པོའི་མདུན་འདི་རུ༔ སྨོན་ལམ་བཏབ་པའི་རྟེན་འབྲེལ་གྱིས༔ གཏེར་གྱི་གྲོགས་སུ་སྐྱེ་གསུང་དུས༔ ཡུལ་ཕྱོགས་རིགས་རུས་ཅི་འདྲར་སྐྱེ༔ དུས་གསུམ་མཁྱེན་པས་གསུང་དུ་གསོལ༔ དེ་སྐད་ཞུས་པས་སློབ་དཔོན་གྱིས༔ ཁྱེད་རྣམས་མ་ཡེངས་ལེགས་པར་ཉོན༔ ད་ལྟ་དཀྱིལ་འཁོར་གཉན་པོའི་མདུན༔ སྨོན་ལམ་བཏབ་པའི་མཆེད་ལྕམ་ལྔ༔ མ་འོངས་ལྔ་བརྒྱའི་ཡང་མཐའ་ལ༔ ང་སྤྲུལ་ཉི་མ་གྲགས་པ་ཡིས༔ ཟབ་དོན་གཏེར་ལ་སྤྱོད་པའི་དུས༔ ཡེ་ཤེས་མཚོ་རྒྱལ་སྤྲུལ་པ་ཞིག༔ དྷེ་ཝི་ཀཽ་ཊིའི་བྱང་ཕྱོགས་ནས༔ སྔགས་སྐྱེས་བུ་མོ་རཏྣའི་མིང་༔ ང་སྤྲུལ་བུ་དང་འཕྲད་པའི་ཚེ༔ རྩ་མདུད་འགྲོལ་ཞིང་ལུང་བསྟན་གསལ༔ ཁ་བྱང་རྙེད་ཅིང་མངོན་ཤེས་འཆར༔ ཤེལ་དཀར་རྡོ་རྗེ་མཚོ་མོ་འདི༔ མང་ཡུལ་གངས་རིའི་འགྲམ་བཟང་དུ༔ སྔགས་སྒོམ་བུ་མོ་ཆོས་ཀྱི་མིང་༔ གཏེར་ཁ་གསུམ་གྱི་གྲོགས་བྱེད་ཅིང་༔ ཐུགས་ཀྱི་གཟུངས་མས་ཚེ་འཕྲང་སེལ༔ ད་ལྟའི་བཙུན་མོ་འབྲོམ་བཟའ་ཁྱོད༔ སྲིན་མོ་རྫོང་གི་ཤར་འདབས་སུ༔ སྔགས་སྐྱེས་བུ་མོ་ཨ་ཡི་མིང་༔ གཏེར་ཁ་ལྔ་ཡི་གྲོགས་བྱེད་ཅིང་༔ ཆགས་མེད་འཕྲིན་ལས་སྐྱོང་བར་འགྱུར༔ མོན་མོ་བཀྲ་ཤིས་ཁྱེ་འདྲེན་འདི༔ བྲག་དམར་ཟངས་སྦུབ་ཅན་གྱི་བྱང་༔ སྔགས་སྐྱེས་བུ་མོ་ཀརྨའི་མིང་༔ ཟབ་གཏེར་གྲོགས་བྱེད་རིགས་རྒྱུད་སྤེལ༔ རྒྱལ་པོའི་སྲས་མོ་ནུས་འབྱིན་འདི༔ དཔལ་གྱི་ཙ་རིའི་གནས་ནང་དུ༔ གནས་སྐྱེས་བུ་མོ་སྒྲོལ་མའི་མིང་༔ ཟབ་གཏེར་གྲོགས་དང་འདུ་བ་བཞིའི༔ དངོས་གྲུབ་ཆར་ལྟར་འབེབས་པ་འོང་༔ ད་ནས་བཟུང་སྟེ་དེ་བར་དུ༔ ལུས་ནི་སྣ་ཚོགས་གཟུགས་མང་ལེན༔ མཐོ་དམན་སྐྱེ་བ་མང་དུ་བརྒྱུད༔ མ་འོངས་ལྔ་བརྒྱའི་ཡང་མཐའ་ལ༔ གཏེར་གྲོགས་བུད་མེད་ལུས་ལེན་དུས༔ པདྨ་ང་ནི་རིགས་ཀྱི་ལྷ༔ ཟབ་གནད་འདུས་པའི་སྒྲུབ་སྐོར་རྣམས༔ ཉམས་སུ་ལེན་པའི་དུས་འོང་བས༔ བརྩོན་འགྲུས་ཞེ་བཅད་ཉམས་ལེན་འབུངས༔ སྡུག་བསྲན་དཀའ་ཐུབ་སྲང་ལ་གཅུན༔ བུད་མེད་ལུས་ཀྱི་རྒྱུན་ཆོད་དེ༔ དག་པའི་ཞིང་མང་ཉུལ་བར་བྱེད༔ དེ་སྐད་སློབ་དཔོན་ཆེན་པོས་གསུངས་ པ་དང་༔ བདག་འདྲ་བུད་མེད 
་འབྲོམ་བཟའ་ལ༔ མ་འོངས་ལྔ་བརྒྱའི་ཡང་མཐའི་ཚེ༔ ཟབ་ཆོས་གཏེར་གྱི་གྲོགས་བྱེད་དུས༔ ཉམས་སུ་ལེན་པའི་སྒྲུབ་ཐབས་ཤིག༔ ཡི་དམ་ལྷ་སྐལ་གང་ཡིན་པ༔ སློབ་དཔོན་ཆེན་པོས་གནང་དུ་གསོལ༔ ཅེས་ཞུས་དངུལ་གྱི་མེ་ལོང་དང་༔ རིན་ཆེན་གསེར་གྱི་དོང་ཙེ་བདུན༔ གཙུག་གཡུ་རིན་ཆེན་སྟག་མགོ་ཕུལ༔ ཕྱག་དང་སྐོར་བ་གྲངས་མེད་བྱས༔ དུས་གསུམ་མཁྱེན་པའི་པད་འབྱུང་གིས༔ ཁྱོད་ཀྱི་ལྷ་སྐལ་འདི་ཡིན་གསུང་༔ ཐུགས་རྗེ་ཆེན་པོའི་སྒྲུབ་ཐབས་གནང་༔ བུད་མེད་ཡེ་ཤེས་མཚོ་རྒྱལ་ངས༔ མ་འོངས་དོན་དུ་ཡི་གེར་བཏབ༔ ཆོས་བཀའ་ཚང་ཕྱིར་གཏེར་དུ་སྦས༔ ལས་འཕྲོའི་དབང་གིས་འདི་འཕྲད་ནས༔ སྨོན་ལམ་དག་པས་མཚམས་སྦྱོར་ཏེ༔ འབྲེལ་ཚད་དོན་དང་ལྡན་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་ཏེ་སེའི་གངས་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལཾ།། །།