རྩོམ་པར་དམ་བཅའི་སྐབས་ཀྱི་དོགས་གཅོད་།
རྩོམ་པར་དམ་བཅའི་སྐབས་ཀྱི་དོགས་གཅོད་ནི།
མཛོད་འགྲེལ་ཟླ་བའི་འོད་ཟེར་ལས། རང་རྩོམ་པ་པོ་སེམས་ཅན་གྱི་བཀའི་དགོངས་འགྲེལ་དུ་གྱུར་པའི་ངག་རྣམ་དག་དེ། བཀའ་དང་བསྟན་བཅོས་གཉིས་སུ་ཕྱེ་བའི་བསྟན་བཅོས་ཀྱི་མཚན་ཉིད། ཅེས་གསུངས་པ་མི་རིགས་པར་ཐལ། བྱེ་བྲག་སྨྲ་བའི་ལུགས་ལ་བསྟན་བཅོས་དང་མིང་ཚིག་སོགས་ལ་ལྡན་མིན་འདུ་བྱེད་ཡོད་པས་ངག་ཡིན་མི་དགོས་པའི་ཕྱིར་ཏེ། ཕྱོགས་གླང་གི་མཛོད་འགྲེལ་གནད་ཀྱི་སྒྲོན་མ་ལས། ཆོས་ཀྱི་ཕུང་པོ་བརྒྱད་ཁྲི་དག །གང་རྣམས་ཐུབ་པས་གསུང་དེ་དག །ཚིག་གམ་མིང་ཡིན་དེ་དག་ནི། །གཟུགས་དང་འདུ་བྱེད་དག་ཏུ་འདུས། །གང་དག་གི་ལྟར་ན་སངས་རྒྱས་ཀྱི་གསུང་ཚིག་གི་རང་བཞིན་ཡིན་པ་དེ་དག་གི་ལྟར་ན་དེ་དག་ནི་གཟུགས་ཀྱི་ཕུང་པོས་བསྡུས་སོ། །གང་དག་གི་ལྟར་ན་མིང་གི་རང་བཞིན་ཡིན་པ་དེ་དག་གི་ལྟར་ན་ནི་འདུ་བྱེད་ཀྱི་ཕུང་པོས་བསྡུས་སོ། །ཞེས་གསུངས་པའི་ཕྱིར་ཟེར་ན་དཔྱད། མཆིམས་མཛོད་༡༡ལས། འཕགས་པ་ལྷས། ཉོན་མོངས་དགྲ་རྣམས་མ་ལུས་འཆོས་པ་དང༌། །ངན་འགྲོ་སྲིད་ལས་སྐྱོབ་པ་གང་ཡིན་པ། །ཞེས་སོགས་གསུངས་པ་ལ། ལུང་དེ་འཕགས་པ་ལྷས་མཛད་པ་མ་ཡིན་པར་ཐལ། གཞུང་ཆེན་དུ་མར་རྣམ་བཤད་རིགས་པའི་ལེའུ་ལྔ་བའི་ལུང་ཡིན་པར་གསུངས་པའི་ཕྱིར་ཟེར་ན་དཔྱད་པར་བྱའོ།། །།