གསུམ་པ་ཡིན་ལོག་མིན་ལོག་གི་རྣམ་བཞག་ལ་དོགས་པ་འགོད་པ།

གསུམ་པ་ཡིན་ལོག་མིན་ལོག་གི་རྣམ་བཞག་ལ་དོགས་པ་འགོད་པ་ལ།

རང་ལུགས་ལ་གཟུགས་ཤེས་གཉིས་ཀྱི་ཡིན་པ་མེད་པར་ཐལ། གཟུགས་ཡིན་ན་ཤེས་པ་མ་ཡིན་པས་ཁྱབ་པའི་ཕྱིར། འདོད་ན། གཟུགས་ཤེས་གཉིས་ཀྱི་གཞི་མཐུན་ཡོད་པར་ཐལ། གཟུགས་ཡིན་ན་ཤེས་པ་ཡིན་པས་ཁྱབ་པའི་ཕྱིར། མ་གྲུབ་ན། གཟུགས་ཡིན་ན་ཤེས་པ་ཡིན་པས་ཁྱབ་པར་ཐལ། གཟུགས་ཡིན་ན་སེམས་ཀྱི་སྣང་བ་ཡིན་པས་ཁྱབ་པའི་ཕྱིར། མ་ཁྱབ་ན།ཁྱབ་པ་ཡོད་པར་ཐལ། སེམས་ཀྱི་སྣང་བ་ཡིན་ན་ཤེས་པ་ཡིན་པས་ཁྱབ་པའི་ཕྱིར། མ་གྲུབ་ན། དེ་ཁྱབ་པར་ཐལ། སེམས་ཀྱི་སྣང་བ་ཡིན་ན་སེམས་ཡིན་པས་ཁྱབ་པའི་ཕྱིར། མ་གྲུབ་ན། སེམས་ཀྱི་སྣང་བ་ཡིན་ན་སེམས་ཡིན་པས་ཁྱབ་པར་ཐལ། དེ་ལྟར་ཁྱབ་པ་དེ་ཡང་རྗེ་བཙུན་ཏཱ་ར་ནཱ་ཐས་མཛད་པའི་དབུ་མ་ཐེག་མཆོག་ལས། ཅི་ཙམ་སྣང་བ་གསལ་བའི་སེམས་ཡིན་ཏེ། །ཞེས་གསུངས་པའི་ཕྱིར། མ་ཁྱབ། སེམས་ཀྱི་བདག་ཉིད་ཡིན་པའི་དོན་ཡིན་ཟེར་ན། འོ་ན་གཟུགས་དེ་སེམས་ཀྱི་བདག་ཉིད་ཡིན་པར་ཐལ། ལུང་དོན་འཐད་པའི་ཕྱིར། འདོད་ན། གཟུགས་ཆོས་ཅན། སེམས་ཀྱི་རྫས་ལས་གྲུབ་པ་ཡིན་པར་ཐལ། སེམས་ཀྱི་བདག་ཉིད་ཡིན་པའི་རྒྱུ་མཚན་འཐད་པའི་ཕྱིར། འདོད་ན། གཟུགས་ཆོས་ཅན། མི་གསལ་བ་བེམ་པོའི་རྫས་ལས་གྲུབ་པ་མ་ཡིན་པར་ཐལ། སེམས་ཀྱི་རྫས་ལས་གྲུབ་པ་ཡིན་པའི་ཕྱིར། འདོད་ན། གཟུགས་ཆོས་ཅན། ཤེས་པ་ཡིན་པར་ཐལ། རང་ཉིད་མི་གསལ་བ་བེམ་པོའི་རྫས་ལས་གྲུབ་པ་མ་ཡིན་པར་གསལ་བ་ཤེས་པའི་རྫས་ལས་གྲུབ་པ་ཡིན་པའི་ཕྱིར། ཁྱབ་སྟེ། ཤེས་པའི་ངོར་གྲུབ་ཚུལ་དེ་ལས་གཞན་ཞིག་མེད་པའི་ཕྱིར། གོང་དུ་འདོད་ཟེར་ན། སེམས་ཀྱི་སྣང་བ་ཡིན་ན་སེམས་ཡིན་པས་ཁྱབ་པར་ཐལ། གོང་གི་ལུང་དོན་འཐད་པའི་ཕྱིར། འདོད་ན། གཟུགས་ཆོས་ཅན། སེམས་ཡིན་པར་ཐལ། སེམས་ཀྱི་སྣང་བ་ཡིན་པའི་ཕྱིར། འདོད་ན། གཟུགས་ཆོས་ཅན། ཤེས་པ་ཡིན་པར་ཐལ། སེམས་ཡིན་པའི་ཕྱིར། འདོད་མི་རིགས་ཏེ། སེམས་ཀྱི་མཚན་ཉིད་གསལ་ཞིང་རིག་པ་ལ་སོགས་པ་བེམ་པོར་གྱུར་བའི་ཆོས་རྣམས་ལ་མེད་པའི་རྒྱུ་མཚན་ཡོད་པའི་ཕྱིར། མ་གྲུབ་ན། དེ་ཡོད་པར་ཐལ། དེ་ལྟར་ཡོད་པ་དེ་ཡང་རྗེ་བཙུན་ཏཱ་ར་ནཱ་ཐས་མཛད་པའི་ཐེག་མཆོག་དབུ་མ་ལས། སེམས་ཀྱི་མཚན་ཉིད་གསལ་ཞིང་རིག་པ་ལ་སོགས་པ་བེམ་པོར་གྱུར་བའི་ཆོས་རྣམས་ལ་མེད་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །གཞན་ཡང༌། དངོས་པོ་ཡིན་པར་ཐལ། རྣམ་མཁྱེན་ཡིན་ན་ཚད་མ་ཡིན་པས་ཁྱབ་པས་ཕྱིར། མ་ཁྱབ་ན། རྣམ་མཁྱེན་ཡིན་ན་ཚད་མ་ཡིན་པས་ཁྱབ་པར་ཐལ། ཁྱབ་མེད་ཀྱི་ལན་འཐད་པའི་ཕྱིར། འདོད་ན། རྣམ་མཁྱེན་སྐད་ཅིག་གཉིས་པ་ཆོས་ཅན། ཚད་མ་ཡིན་པར་ཐལ། རྣམ་མཁྱེན་ཡིན་པའི་ཕྱིར། ཁྱབ་པ་ཁས། འདོད་ན། རྣམ་མཁྱེན་སྐད་ཅིག་གཉིས་པ་ཆོས་ཅན། གསར་དུ་མི་བསླུ་བའི་རིག་པ་ཡིན་པར་ཐལ། ཚད་མ་ཡིན་པའི་ཕྱིར། རྟགས་ཁས། ཁྱབ་པ་ཡོད་དེ། ཚད་མ་རྣམ་འགྲེལ་ལས། ཚད་མ་བསླུ་མེད་ཅན་ཤེས་པ། །དོན་བྱེད་ནུས་པར་གནས་པ་ན། །མི་བསླུ། ཞེས་དང༌། ཡང་དེ་ཉིད་ལས། མ་ཤེས་དོན་གྱི་གསལ་བྱེད་ཀྱང༌། ཞེས་གསུངས་པའི་ཕྱིར། འདོད་ན། རྣམ་མཁྱེན་སྐད་ཅིག་གཉིས་པ་ཆོས་ཅན། གསར་རྟོགས་ཀྱི་བློ་ཡིན་པར་ཐལ། གསར་དུ་མི་བསླུ་བའི་རིག་པ་ཡིན་པའི་ཕྱིར། འདོད་ན། རྣམ་མཁྱེན་སྐད་ཅིག་གཉིས་པ་ཆོས་ཅན། གསར་རྟོགས་ཀྱི་བློ་མ་ཡིན་པར་ཐལ། བཅད་ཤེས་ཡིན་པའི་ཕྱིར། མ་ཁྱབ་ན། ཁྱབ་པ་ཡོད་དེ། བཅད་ཤེས་ཡིན་པ་ལ་རང་འདྲེན་བྱེད་ཀྱི་ཚད་མ་སྔ་མས་རྟོགས་ཟིན་པའི་དོན་སླར་རྟོགས་པའི་བློ་ཞིག་དགོས་པའི་ཕྱིར། མ་གྲུབ་ན། དེ་དགོས་པར་ཐལ། རང་གི་ཚད་མ་སྔ་མས་བཟུང་ཟིན་གྱི་དོན་ལ་བསྣན་ནས་འཇུག་པའི་ཤེས་པ་དེ་བཅད་ཤེས་ཀྱི་མཚན་ཉིད་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། གཏན་ཚིགས་རིགས་པའི་དོན་བསྡུས་ལས། རང་གི་ཚད་མ་སྔ་མས་བཟུང་ཟིན་གྱི་དོན་ལ་བསྣན་ནས་འཇུག་པའི་ཤེས་པ་ཞེས་པའོ། ། ཞེས་དང༌། བསྡུས་གྲྭའི་སྤྱི་དོན་ལས། རྟོགས་ཟིན་རྟོགས་པའི་རིག་པ་དཔྱད་ཤེས་ཀྱི་མཚན་ཉིད། ཅེས་གསུངས་པའི་ཕྱིར། གོང་གི་མ་ཁྱབ་མཚམས་ལ་རྟགས་མ་གྲུབ་ཟེར་ན། རྣམ་མཁྱེན་ཆོས་ཅན། ཁྱོད་སྐད་ཅིག་གཉིས་པ་བཅད་ཤེས་ཡིན་པར་ཐལ། ཁྱོད་མངོན་སུམ་ཚད་མ་ཡིན་པའི་ཕྱིར། ཁྱབ་སྟེ། མངོན་སུམ་ཚད་མ་ཡིན་ན་ཁྱོད་སྐད་ཅིག་གཉིས་པ་བཅད་ཤེས་ཡིན་པས་ཁྱབ་པའི་ཕྱིར། མ་གྲུབ་ན། དེ་ཁྱབ་པར་ཐལ། དེ་ལྟར་ཁྱབ་པ་དེ་ཡང་སློབ་དཔོན་ཆོས་མཆོག་གི་དགོངས་པ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ཉིད་ཀྱིས་མཛད་པའི་འཐད་ལྡན་ཆེ་བ་ལས། མངོན་སུམ་དང་རྗེས་སུ་དཔག་པ་དག་གི་སྐད་ཅིག་མ་དང་པོ་ནི་ཚད་མ་ཡིན་ལ། དེའི་རྒྱུན་དུ་གྱུར་བ་གྲུབ་པ་དང་བདེ་བ་ཐ་མི་དད་པ་ཕྱི་མ་རྣམས་ཚད་མ་ཡིན་པ་སྤངས་པ་ཡིན་ནོ། །ཞེས་གསུངས་པའི་ཕྱིར། འདོད་ན། རྣམ་མཁྱེན་ཆོས་ཅན། ཁྱོད་སྐད་ཅིག་གཉིས་པ་བཅད་ཤེས་ཡིན་པར་ཐལ། འདོད་པའི་ཕྱིར། འདོད་ན། རྣམ་མཁྱེན་ཆོས་ཅན། ཁྱོད་སྐད་ཅིག་གཉིས་པ་བཅད་ཤེས་མ་ཡིན་པར་ཐལ། ཁྱོད་སྐད་ཅིག་གཉིས་པ་སྔར་ལས་རྟོགས་ཚུལ་གཞན་ཡོད་པའི་སྤྱོད་ཡུལ་ཅན་ཡིན་པའི་ཕྱིར། མ་གྲུབ་ན། དེར་ཐལ། རྟོག་གེའི་སྐད་ལས། འདིའི་སྤྱོད་ཡུལ་སྔར་མེད་པ་ཡིན་པས་སྔར་མ་གཏོགས་པའི་སྤྱོད་ཡུལ་ཅན་ནོ། །ཞེས་དང༌། ཡང་རྣམ་མཁྱེན་སྐད་ཅིག་གཉིས་པ་ཆོས་ཅན། ཚད་མ་ཡིན་པར་ཐལ། རྣམ་མཁྱེན་ཡིན་པའི་ཕྱིར། མ་ཁྱབ་ན། ཁྱབ་པ་ཡོད་དེ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། རྣམ་མཁྱེན་ཆོས་ཅན། ཚད་མ་ཡིན་པར་ཐལ། རྣམ་མཁྱེན་ཡིན་པའི་ཕྱིར། ཞེས་དང༌། བསྡུས་གྲྭའི་སྤྱི་དོན་རིན་ཆེན་སྒྲོན་མེ་ལས། རྣམ་མཁྱེན་ལ་གསར་རྟོགས་ཀྱི་ཚད་མ་མ་ཡིན་པ་མེད་པའི་ཕྱིར་རོ། །ཞེས་གསུངས་པའི་ཕྱིར་ན་དཔྱད་དོ། ། གཞན་ཡང༌། རྣམ་མཁྱེན་ཡིན་ན་ཚད་མ་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། རྣམ་མཁྱེན་ཆོས་ཅན། ཚད་མ་ཡིན་པར་ཐལ། འདོད་ན། རྣམ་མཁྱེན་ཆོས་ཅན། ཚད་མ་མ་ཡིན་པར་ཐལ། བཅད་ཤེས་ཡིན་པའི་ཕྱིར། མ་གྲུབ་ན། རྣམ་མཁྱེན་ཆོས་ཅན། བཅད་ཤེས་ཡིན་པར་ཐལ། རྟོགས་ཟིན་རྟོགས་པའི་རིག་པ་ཡིན་པའི་ཕྱིར། མ་གྲུབ་ན། རྣམ་མཁྱེན་ཆོས་ཅན། རྟོགས་ཟིན་རྟོགས་པའི་རིག་པ་ཡིན་པར་ཐལ། རྟོགས་ཟིན་རྟོགས་པའི་ཚད་མ་ཡིན་པའི་ཕྱིར། མ་གྲུབ་ན། རྣམ་མཁྱེན་ཆོས་ཅན། བུམ་པ་རྟོགས་པའི་ཚད་མ་མ་ཡིན་པར་ཐལ། འདོད་ན། རྣམ་མཁྱེན་ཆོས་ཅན། ཆོས་ཐམས་ཅད་རྟོགས་པའི་ཚད་མ་མ་ཡིན་པར་ཐལ། འདོད་ན། རྣམ་མཁྱེན་ཆོས་ཅན། ཆོས་ཐམས་ཅད་ཅིག་ཆར་དུ་མངོན་སུམ་གྱིས་རྟོགས་པའི་མཐར་ཐུག་གི་མཁྱེན་པ་མ་ཡིན་པར་ཐལ། འདོད་ན། རྣམ་མཁྱེན་ཆོས་ཅན། ཆོས་ཐམས་ཅད་ཅིག་ཆར་དུ་མངོན་སུམ་གྱིས་རྟོགས་པའི་མཐར་ཐུག་གི་མཁྱེན་པ་ཡིན་པར་ཐལ། རྣམ་ མཁྱེན་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། དེ་གཉིས་མཚན་མཚོན་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། ཆོས་ཐམས་ཅད་ཅིག་ཆར་དུ་མངོན་སུམ་གྱིས་རྟོགས་པའི་མཐར་ཐུག་གི་མཁྱེན་པ་དེ་རྣམ་མཁྱེན་གྱི་མཚན་ཉིད་ཡིན་པའི་ཕྱིར། ཞེས་དང༌། ཉ་ཊཱིཀ་ལས། ཇི་ལྟ་ཇི་སྙེད་མཁྱེན་པའི་ཡེ་ཤེས་མཐར་ཐུག་གམ་ཆོས་ཐམས་ཅད་བདེན་པའི་སྐྱེ་མེད་དུ་རྟོགས་ཤིང་དོན་གཉིས་མཐར་ཐུག་པ་སྟེ། ཞེས་གསུངས་པའི་ཕྱིར། འདོད་ན། རྣམ་མཁྱེན་ཆོས་ཅན། ཆོས་ཐམས་ཅད་ཅིག་ཆར་དུ་མངོན་སུམ་གྱིས་རྟོགས་པའི་མཐར་ཐུག་གི་མཁྱེན་པ་ཡིན་པར་ཐལ། འདོད་ན། རྣམ་མཁྱེན་ཆོས་ཅན། ཆོས་ཐམས་ཅད་རྟོགས་པའི་ཚད་མ་ཡིན་པར་ཐལ། འདོད་ན། རྣམ་མཁྱེན་ཆོས་ཅན། བུམ་པ་རྟོགས་པའི་ཚད་མ་ཡིན་པར་ཐལ། ཆོས་ཐམས་ཅད་རྟོགས་པའི་ཚད་མ་ཡིན་པའི་རྒྱུ་མཚན་ཡོད་པའི་ཕྱིར། འདོད་ན། རྣམ་མཁྱེན་ཆོས་ཅན། རྟོགས་ཟིན་རྟོགས་པའི་ཚད་མ་ཡིན་པར་ཐལ། འདོད་ན། རྣམ་མཁྱེན་ཆོས་ཅན། རྟོགས་ཟིན་རྟོགས་པའི་རིག་པ་ཡིན་པར་ཐལ། རྟོགས་ཟིན་རྟོགས་པའི་ཚད་མ་ཡིན་པའི་ཕྱིར། རྟགས་ཁས། འདོད་ན། རྣམ་མཁྱེན་ཆོས་ཅན། རྟོགས་ཟིན་རྟོགས་པའི་རིག་པ་མ་ཡིན་པར་ཐལ། ཚད་མ་ཡིན་པའི་ཕྱིར། མ་ཁྱབ་ཟེར་ན། དེ་ལ་ཁྱབ་པར་ཐལ། དེ་ལྟར་ཁྱབ་པ་དེ་ཡང་བསྡུས་གྲྭའི་སྤྱི་དོན་རིན་ཆེན་སྒྲོན་མེ་ལས། ཚད་མ་ཡིན་ན་གསར་རྟོགས་དང་སྒྲོ་འདོགས་དངོས་སུ་གཅོད་པའི་རིག་པ་ཡིན་གྱི་རྟོགས་ཟིན་རྟོགས་པའི་རིག་པ་མ་ཡིན་པས་ཁྱབ་པའི་ཕྱིར། ཞེས་གསུངས་པའི་ཕྱིར། འདོད་ན། ཚད་མ་ཡིན་ན་རྟོགས་ཟིན་རྟོགས་པའི་རིག་པ་མ་ཡིན་པས་ཁྱབ་པར་ཐལ། ལུང་དོན་འཐད་པའི་ཕྱིར། འདོད་ན། རྣམ་མཁྱེན་ཆོས་ཅན། རྟོགས་ཟིན་རྟོགས་པའི་རིག་པ་མ་ཡིན་པར་ཐལ། ཚད་མ་ཡིན་པའི་ཕྱིར། ཁྱབ་པ་ཁས། འདོད་ན། རྣམ་མཁྱེན་ཆོས་ཅན། རྟོགས་ཟིན་རྟོགས་པའི་རིག་པ་ཡིན་པར་ཐལ། བཅད་ཤེས་ཡིན་པའི་ཕྱིར། མ་ཁྱབ་ན། དེ་ཁྱབ་པར་ཐལ། དེ་གཉིས་མཚན་མཚོན་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ལྟར་ཡིན་པ་དེ་ཡང་བསྡུས་གྲྭའི་སྤྱི་དོན་རིན་ཆེན་སྒྲོན་མེ་ལས། རྟོགས་ཟིན་རྟོགས་པའི་རིག་པ་དཔྱད་ཤེས་ཀྱི་མཚན་ཉིད། ཅེས་དང༌། བློ་རིག་གསེར་གྱི་ཉི་མ་ལས། རང་འདྲེན་བྱེད་ཀྱི་ཚད་མ་སྔ་མའི་རྟོགས་ཟིན་པའི་དོན་སླར་རྟོགས་པའི་བློ་དེ་བཅད་ཤེས་ཀྱི་མཚན་ཉིད། ཅེས་གསུངས་པའི་ཕྱིར་རོ། །དེ་ཆོས་ཅན། ཁྱོད་ཀྱི་འབྲས་བུ་མེད་པར་ཐལ། དངོས་མེད་ཡིན་པའི་ཕྱིར། ཞེས་པའི་ལུང་གི་དོན་ཡོད་པར་ཐལ། ཡོད་པའི་ཕྱིར། འདོད་ན། དངོས་མེད་ཡིན་ན་ཁྱོད་ཀྱི་འབྲས་བུ་མེད་པས་ཁྱབ་པར་ཐལ། ལུང་གི་དོན་འཐད་པའི་ཕྱིར། འདོད་ན། ནམ་མཁའ་ཆོས་ཅན། ཁྱོད་ཀྱི་འབྲས་བུ་མེད་པར་ཐལ། ཁྱོད་དངོས་མེད་ཡིན་པའི་ཕྱིར། འདོད་ན། ནམ་མཁའ་ཆོས་ཅན། ཁྱོད་ཀྱི་འབྲས་བུ་ཡོད་པར་ཐལ། ཁྱོད་དངོས་པོ་ཡིན་པའི་ཕྱིར། མ་ཁྱབ་ན། དེ་ཁྱབ་པར་ཐལ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། ཁྱོད་ཀྱི་འབྲས་བུ་ཡོད་པར་ཐལ། ཁྱོད་དངོས་པོ་ཡིན་པའི་ཕྱིར། ཞེས་གསུངས་པའི་ཕྱིར། གོང་གི་མ་ཁྱབ་མཚམས་ཀྱི་རྟགས་མ་གྲུབ་ན། དེ་ཆོས་ཅན། ཁྱོད་དངོས་པོ་ཡིན་པར་ཐལ། ཁྱོད་མི་རྟག་པ་ཡིན་པའི་ཕྱིར། མ་ཁྱབ་ན། དེ་ཁྱབ་པར་ཐལ། དེ་གཉིས་དོན་གཅིག་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། དངོས་པོ་དང་མི་རྟག་པ་དང་བྱས་པ་རྣམས་དོན་གཅིག ཞེས་དང༌། བསྡུས་གྲྭའི་སྤྱི་དོན་རིན་ཆེན་སྒྲོན་མེ་ལས། དངོས་པོ། འདུས་བྱས། མི་རྟག་པ། ཕུང་པོ། རང་མཚན། འདུ་བྱེད། གཞན་དབང་རྣམས་མདོ་སྡེ་པ་ཡན་ཆད་ཀྱི་ལུགས་ལ་དོན་གཅིག ཅེས་གསུངས་པའི་ཕྱིར། འདོད་ན། དངོས་པོ་དང་མི་རྟག་པ་གཉིས་དོན་གཅིག་ཡིན་པར་ཐལ། ལུང་དོན་འཐད་པའི་ཕྱིར། འདོད་ན། མི་རྟག་པ་ཡིན་ན་དངོས་པོ་ཡིན་པས་ཁྱབ་པར་ཐལ། དངོས་པོ་དང་མི་རྟག་པ་གཉིས་དོན་གཅིག་ཡིན་པའི་ཕྱིར། འདོད་ན། ནམ་མཁའ་ཆོས་ཅན། ཁྱོད་དངོས་པོ་ཡིན་པར་ཐལ། ཁྱོད་མི་རྟག་པ་ཡིན་པའི་ཕྱིར། མ་གྲུབ་ན། ནམ་མཁའ་ཆོས་ཅན། ཁྱོད་མི་རྟག་པ་ཡིན་པར་ཐལ། དེ་ལྟར་ཡིན་པ་དེ་ཡང་ཐམས་ཅད་མཁྱེན་པ་ཏཱ་ར་ནཱ་ཐས་མཛད་པའི་ཐེག་མཆོག་དབུ་མའི་ཟིན་བྲིས་ལས། སྤྱིར་ནམ་མཁའ་ལ་སོགས་པ་འདི་རྣམས་རྟག་པ་ཡིན་པ་དང༌། འདུས་མ་བྱས་ཡིན་པར་ཁས་ལེན་པ་མང་དུ་ཡོད་པ་ཡིན་པ་ལས་ཐེག་པ་ཆེན་པོའི་མདོ་སྡེ་ངེས་དོན་འཆད་པའི་སྐབས་འདིར། དེ་འདུས་བྱས་དང་མི་རྟག་པར་འཆད་དགོས་པ་ཡིན་ནོ། །ཞེས་དང༌། ཟབ་དོན་ཉེར་གཅིག་ལས། དངོས་དང་དངོས་མེད་ལ་འདུས་བྱས་ཀྱིས་ཁྱབ། དོན་དམ་འདུས་མ་བྱས་དངོས་ཡིན། ནམ་མཁའ་སོགས་འདུས་མ་བྱས་བཏགས་པ་བ་ཡིན་གསུངས། ཞེས་གསུངས་པའི་ཕྱིར། འདོད་ན། ནམ་མཁའ་ཆོས་ཅན། ཁྱོད་མི་རྟག་པ་ཡིན་པར་ཐལ། ལུང་གི་དོན་འཐད་པའི་ཕྱིར། འདོདན། ནམ་མཁའ་ཆོས་ཅན། ཁྱོད་དངོས་པོ་ཡིན་པར་ཐལ། ཁྱོད་མི་རྟག་པ་ཡིན་པའི་ཕྱིར། འདོད་ན། ནམ་མཁའ་ཆོས་ཅན། ཁྱོད་ཀྱི་འབྲས་བུ་ཡོད་པར་ཐལ། ཁྱོད་དངོས་པོ་ཡིན་པའི་ཕྱིར། འདོད་ན། ནམ་མཁའ་ཆོས་ཅན། ཁྱོད་ཀྱི་འབྲས་བུ་མེད་པར་ཐལ། ཁྱོད་དངོས་མེད་ཡིན་པའི་ཕྱིར་ཟེར་ན་དཔྱད་དོ། ། རྟག་པ་ཡིན་པར་ཐལ། ཡོད་པ་གང་ཞིག དངོས་པོ་མ་ཡིན་པའི་ཕྱིར། འདོད་ན། རྟག་པ་མ་ཡིན་པར་ཐལ། དངོས་པོ་ཡིན་པའི་ཕྱིར། དངོས་པོ་ཡིན་པར་ཐལ། གང་ཟག་ཡིན་པའི་ཕྱིར། མ་གྲུབ་ན། གང་ཟག་ཡིན་པར་ཐལ། རྭ་མ་ཡིན་པའི་ཕྱིར། མ་གྲུབ་ན། རྭ་མ་ཡིན་པར་ཐལ། རྭ་ཡིན་པ་ལས་ལོག་པ་ཡིན་པའི་ཕྱིར། མ་ཁྱབ་ན། དེ་ཁྱབ་པར་ཐལ། རྭ་ཡིན་པ་ལས་ལོག་པ་དང་རྭ་མ་ཡིན་པ་གཉིས་དོན་གཅིག་ཡིན་པའི་ཕྱིར། མ་གྲུབ་ན། རྭ་ཆོས་ཅན། ཁྱོད་ཡིན་པ་ལས་ལོག་པ་དང་ཁྱོད་མ་ཡིན་པ་གཉིས་དོན་གཅིག་མ་ཡིན་པར་ཐལ། འདོད་ན། གང་ཟག་ཆོས་ཅན། ཁྱོད་ཡིན་པ་ལས་ལོག་པ་དང་ཁྱོད་མ་ཡིན་པ་གཉིས་དོན་གཅིག་མ་ཡིན་པར་ཐལ། འདོད་ན། བདག་མེད་ཆོས་ཅན། ཁྱོད་ཡིན་པ་ལས་ལོག་པ་དང་ཁྱོད་མ་ཡིན་པ་གཉིས་དོན་གཅིག་ཡིན་པར་ཐལ། ཁྱོད་ཡིན་པ་ལས་ལོག་པ་དང་ཁྱོད་མ་ཡིན་པ་གཉིས་ཡིན་ཁྱབ་མཉམ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། བདག་མེད་ཡིན་པ་ལས་ལོག་པ་དང་བདག་མེད་མ་ཡིན་པ་གཉིས་ཡིན་ཁྱབ་མཉམ་ཡིན་ཏེ། ཞེས་གསུངས་པའི་ཕྱིར་ཟེར་ན་དཔྱད། དེ་བཞིན་དུ་སྔ་མའི་རིགས་འགྲོས་ཀྱིས་སྤྱིར་ཇ་མ་སོགས་ཡིན་མིན་དཔྱད་པར་བྱའོ། །ཚད་མའི་བསྟན་བཅོས་བསྡུས་གྲྭ་ལས། རྟག་པ་ཆོས་ཅན། མ་བྱས་པ་མ་ཡིན་པ་ལས་ལོག་པ་ཡིན་པར་ཐལ། མ་བྱས་པ་ཡིན་པའི་ཕྱིར་ཞེས་པའི་རྟགས་གྲུབ་པར་ཐལ། འདོད་ན། རྟག་པ་ཆོས་ཅན། མ་བྱས་པ་མ་ཡིན་པར་ཐལ། བྱས་པ་མ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། བྱས་པ་མ་ཡིན་པ་ལས་ལོག་པ་ཡིན་པར་ཐལ། བྱས་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། བྱས་པ་ཡིན་པར་ཐལ། འདུས་བྱས་ཡིན་པའི་ཕྱིར། མ་གྲུབ་ན། དེ་ཆོས་ཅན། འདུས་བྱས་ཡིན་པར་ཐལ། དངོས་མེད་ཡིན་པའི་ཕྱིར། འགལ་ཁྱབ་ཟེར་ན། དེ་ཁྱབ་པར་ཐལ། དངོས་དང་དངོས་མེད་གཉིས་འདུས་བྱས་ཡིན་པའི་ཕྱིར། མ་གྲུབ་ན། ཡིན་པར་ཐལ། དེ་ལྟར་ཡིན་པ་དེ་ཡང་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རྩ་ཤེས་ལས། དངོས་དང་དངོས་མེད་འདུས་བྱས་ཡིན། །ཞེས་གསུངས་པའི་ཕྱིར། འདོད་ན། རྟག་པ་ཆོས་ཅན། བྱས་པ་ཡིན་པར་ཐལ། འདུས་བྱས་ཡིན་པའི་ཕྱིར། འདོད་ན། རྟག་པ་ཆོས་ཅན། བྱས་པ་མ་ཡིན་པར་ཐལ། མ་བྱས་པ་མ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། མ་བྱས་པ་མ་ཡིན་པ་ལས་ལོག་པ་ཡིན་པར་ཐལ། མ་བྱས་པ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། ཚད་མའི་བསྟན་བཅོད་བསྡུས་གྲྭ་ལས། རྟག་པ་ཆོས་ཅན། མ་བྱས་པ་མ་ཡིན་པ་ལས་ལོག་པ་ཡིན་པར་ཐལ། མ་བྱས་པ་ཡིན་པའི་ཕྱིར། ཞེས་གསུངས་པའི་ཕྱིར་རོ། །ཡང་དེ་ལ་དོགས་པ་བཀོད་ནས་མ་བྱས་པ་ཡིན་ན་མ་བྱས་པ་མ་ཡིན་པ་ལས་ལོག་པ་ཡིན་པས་ཁྱབ་པར་ཐལ། འདོད་ན། བུ་ཕྲུག་ཆོས་ཅན། མ་བྱས་མ་ཡིན་པ་ལས་ལོག་པ་ཡིན་པར་ཐལ། མ་བྱས་པ་ཡིན་པའི་ཕྱིར། མ་གྲུབ་ན། བུ་ཕྲུག་ཆོས་ཅན། མ་བྱས་པ་ཡིན་པར་ཐལ། མ་དངོས་པོ་ཡིན་པའི་ཕྱིར། མ་གྲུབ་ན། དེ་ཆོས་ཅན། མ་དངོས་པོ་ཡིན་པར་ཐལ། མ་གང་ཟག་ཡིན་པའི་ཕྱིར། མ་གྲུབ་ན། དེ་ཆོས་ཅན། མ་གང་ཟག་ཡིན་པར་ཐལ།ཕ་མ་གཉིས་ཀ་གང་ཟག་ཡིན་པའི་ཕྱིར། འདོད་ན། དེ་ཆོས་ཅན། མ་དངོས་པོ་ཡིན་པར་ཐལ། མ་གང་ཟག་ཡིན་པའི་ཕྱིར། རྟགས་ཁས། འདོད་ན། དེ་ཆོས་ཅན། མ་བྱས་པ་ཡིན་པར་ཐལ། མ་དངོས་པོ་ཡིན་པའི་ཕྱིར། རྟགས་ཁས། འདོད་ན། དེ་ཆོས་ཅན། མ་བྱས་པ་མ་ཡིན་པ་ལས་ལོག་པ་ཡིན་པར་ཐལ། མ་བྱས་པ་ཡིན་པའི་ཕྱིར། རྟགས་ཁས། འདོད་ན། དེ་ཆོས་ཅན། མ་བྱས་པ་མ་ཡིན་པ་ལས་ལོག་པ་མ་ཡིན་པར་ཐལ། མ་བྱས་པ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། མ་བྱས་པ་ཡིན་པ་ལས་ལོག་པ་ཡིན་པར་ཐལ། བྱས་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། བྱས་པ་ཡིན་པར་ཐལ། དངོས་པོ་ཡིན་པའི་ཕྱིར། མ་གྲུབ་ན། དེ་ཆོས་ཅན། དངོས་པོ་ཡིན་པར་ཐལ། གཟུགས་ཡིན་པའི་ཕྱིར། མ་གྲུབ་ན། དེ་ཆོས་ཅན། གཟུགས་ཡིན་པར་ཐལ། གཟུགས་ཀྱི་སྐྱེ་མཆེད་ཡིན་པའི་ཕྱིར། མ་གྲུབ་ན། དེ་ཆོས་ཅན། གཟུགས་ཀྱི་སྐྱེ་མཆེད་ཡིན་པར་ཐལ། མིག་ཤེས་ཀྱི་བཟུང་བྱ་ཡིན་པའི་ཕྱིར་ཟེར་ན་དཔྱད་དོ། །གཞན་ཡང༌། སྡུག་བདེན་ཆོས་ཅན། ཁྱོད་མི་རྟག་པ་དངོས་པོ་མ་ཡིན་པར་ཐལ། ཁྱོད་མི་རྟག་པ་རྟག་པ་ཡིན་པའི་ཕྱིར། རྟགས་མ་གྲུབ། སྡུག་བདེན་ཆོས་ཅན། ཁྱོད་མི་རྟག་པ་རྟག་པ་ཡིན་པར་ཐལ། ཁྱོད་མི་རྟག་པ་དང་རྟག་པ་གཉིས་ཀྱི་གཞི་མཐུན་ཡོད་པའི་ཕྱིར། མ་གྲུབ་ན། དེ་ཡོད་པར་ཐལ། ཤེས་བྱ་དེ་ཡིན་པའི་ཕྱིར། མ་གྲུབ་ན། ཤེས་བྱ་ཆོས་ཅན། སྡུག་བདེན་མི་རྟག་པ་དང་རྟག་པ་གཉིས་ཀྱི་གཞི་མཐུན་ཡིན་པར་ཐལ། སྡུག་བདེན་མི་རྟག་པ་དང་རྟག་པ་གཉིས་ཀྱི་ལྡོག་པ་ཐ་དད་དུ་གྲུབ་པ་གང་ཞིག ཁྱོད་དེ་གཉིས་རེ་རེ་ནས་ཡིན་པའི་ཕྱིར། མ་གྲུབ་ན། རྟགས་གྲུབ་པར་ཐལ། རྟགས་དང་པོ་གྲུབ་པ་གང་ཞིག ཕྱི་མ་གྲུབ་པའི་ཕྱིར། དང་པོ་སླ། ཕྱི་མ་མ་གྲུབ་ན། ཤེས་བྱ་ཆོས་ཅན། སྡུག་བདེན་མི་རྟག་པ་དང་རྟག་པ་གཉིས་རེ་རེ་ནས་ཡིན་པར་ཐལ། སྡུག་བདེན་མི་རྟག་པ་ཡིན་པ་གང་ཞིག རྟག་པ་ཡིན་པའི་ཕྱིར། དང་པོ་མ་གྲུབ་ན། ཤེས་བྱ་ཆོས་ཅན། སྡུག་བདེན་མི་རྟག་པ་ཡིན་པར་ཐལ། གཞི་གྲུབ་པའི་ཕྱིར། མ་ཁྱབ་ན། གཞི་གྲུབ་ན་སྡུག་བདེན་མི་རྟག་པ་ཡིན་པས་ཁྱབ་པར་ཐལ། གཞི་གྲུབ་ན་སྒྲ་མི་རྟག་པ་ཡིན་པས་ཁྱབ་པ་གང་ཞིག རིགས་པ་རྣམ་པ་ཀུན་ཏུ་མཚུངས་པའི་ཕྱིར། རྟགས་མ་གྲུབ་ན། རྟགས་གྲུབ་པར་ཐལ། རྟགས་དང་པོ་གྲུབ་པ་གང་ཞིག ཕྱི་མ་གྲུབ་པའི་ཕྱིར། དང་པོ་མ་གྲུབ་ན། གཞི་གྲུབ་ན་སྒྲ་མི་རྟག་པ་ཡིན་པས་ཁྱབ་པར་ཐལ། བསྡུས་གྲྭའི་སྤྱི་དོན་རྀན་ཆེན་སྒྲོན་མེ་ལས། གཞི་གྲུབ་ན་སྒྲ་མི་རྟག་པ་ཡིན་པས་ཁྱབ་པའི་ཕྱིར། དེར་ཐལ།ཤེས་བྱ་སྒྲ་མི་རྟག་པ་ཡིན་པའི་ཕྱིར། ཞེས་གསུངས་པའི་ཕྱིར། འདོད་ན།འོ་ན། གཞི་གྲུབ་ན་སྒྲ་མི་རྟག་པ་ཡིན་པས་ཁྱབ་པར་ཐལ། འདོད་ན། གཞི་གྲུབ་ན་སྡུག་བདེན་མི་རྟག་པ་ཡིན་པས་ཁྱབ་པར་ཐལ། གཞི་གྲུབ་ན་སྒྲ་མི་རྟག་པ་ཡིན་པས་ཁྱབ་པ་གང་ཞིག རིགས་པ་རྣམ་པ་ཀུན་ཏུ་མཚུངས་པའི་ཕྱིར། རྟགས་དང་པོ་ཁས། འདོད་ན། ཤེས་བྱ་ཆོས་ཅན།སྡུག་བདེན་མི་རྟག་པ་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། འདོད་ན། ཤེས་བྱ་ཆོས་ཅན། སྡུག་བདེན་མི་རྟག་པ་དང་རྟག་པ་གཉིས་རེ་རེ་ནས་ཡིན་པར་ཐལ། སྡུག་བདེན་མི་རྟག་པ་ཡིན་པ་གང་ཞིག རྟག་པ་ཡིན་པའི་ཕྱིར། འདོད་ན། ཤེས་བྱ་ཆོས་ཅན། སྡུག་བདེན་མི་རྟག་པ་དང་རྟག་པ་གཉིས་ཀྱི་གཞི་མཐུན་ཡིན་པར་ཐལ། སྡུག་བདེན་མི་རྟག་པ་དང་རྟག་པ་གཉིས་ལྡོག་པ་ཐ་དད་དུ་གྲུབ་པ་གང་ཞིག ཁྱོད་དེ་གཉིས་ཀ་རེ་རེ་ནས་ཡིན་པའི་ཕྱིར། རྟགས་ཁས། འདོད་ན། སྡུག་བདེན་མི་རྟག་པ་དང་རྟགཔ་གཉིས་ཀྱི་གཞི་མཐུན་ཡོད་པར་ཐལ། ཤེས་བྱ་དེ་ཡིན་པའི་ཕྱིར། རྟགས་ཁས། འདོད་ན། སྡུག་བདེན་མི་རྟག་པ་ཆོས་ཅན། རྟག་པ་ཡིན་པར་ཐལ། ཁྱོད་དང་རྟག་པའི་གཞི་མཐུན་ཡོད་པའི་ཕྱིར། རྟགས་ཁྱབ་ཁས། འདོད་ན། སྡུག་བདེན་མི་རྟག་པ་ཆོས་ཅན། རྟག་པ་མ་ཡིན་པར་ཐལ། ལྡན་མིན་འདུ་བྱེད་ཡིན་པའི་ཕྱིར། རྟགས་མ་གྲུབ་ན། སྡུག་བདེན་ཆོས་ཅན། ཁྱོད་མི་རྟག་པ་ལྡན་མིན་འདུ་བྱེད་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། མ་ཁྱབ་ན། ཁྱབ་པར་ཐལ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། སྡུག་བདེན་ཆོས་ཅན། ཁྱོད་མི་རྟག་པ་ལྡན་མིན་འདུ་བྱེད་ཡིན་པར་ཐལ། ཁྱོད་དངོས་པོ་ཡིན་པའི་ཞེས་གསུངས་པའི་ཕྱིར་ན་དཔྱད་དོ། །རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་ན་རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པས་ཁྱབ་ཕྱིར། མ་གྲུབ་ན། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་ན་རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པས་ཁྱབ་པར་ཐལ། མ་ཁྱབ་པའི་སྐྱོན་འཇོག་རྒྱུ་མེད་པའི་ཕྱིར། མ་གྲུབ་ན། དེ་ཡོད་པར་ཐལ། རྟགས་མ་གྲུབ་ཀྱི་ལན་འཐད་པའི་ཕྱིར། འདོད་ན། ཞོག འདུས་མ་བྱས་པའི་ཡེ་ཤེས་ཆོས་ཅན། འོ་ན་འདུས་མ་བྱས་པའི་ཡེ་ཤེས་ཆོས་ཅན། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པར་ཐལ། མ་ཁྱབ་པའི་སྐྱོན་འཇོག་ཚུལ་འཐད་པའི་ཕྱིར། འདོད་ན།འདུས་མ་བྱས་པའི་ཡེ་ཤེས་ཆོས་ཅན། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་མ་ཡིན་པར་ཐལ། འདོད་པའི་ཕྱིར། འདོད་ན། འདུས་མ་བྱས་པའི་ཡེ་ཤེས་ཆོས་ཅན། རྟག་པ་ཡིན་པ་ལས་ལོག་པ་མ་ཡིན་པ་ལོག་པ་མ་ཡིན་པ་མི་འཐད་པར་ཐལ། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན།འདུས་མ་བྱས་པའི་ཡེ་ཤེས་ཆོས་ཅན། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པར་ཐལ། རྟག་པ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། འདུས་མ་བྱས་པའི་ཡེ་ཤེས་ཆོས་ཅན། རྟག་པ་ཡིན་པ་ལས་ལོག་པ་ཡིན་པར་ཐལ། རྟག་པ་མ་ཡིན་པའི་ཕྱིར། མ་གྲུབ་ན། འདུས་མ་བྱས་པའི་ཡེ་ཤེས་ཆོས་ཅན། རྟག་པ་མ་ཡིན་པར་ཐལ། མི་རྟག་པ་ཡིན་པའི་ཕྱིར། མ་གྲུབ་ན། འདུས་མ་བྱས་པའི་ཡེ་ཤེས་ཆོས་ཅན། མི་རྟག་པ་ཡིན་པར་ཐལ། འདུས་བྱས་ཡིན་པའི་ཕྱིར། མ་གྲུབ་ན། འདུས་མ་བྱས་པའི་ཡེ་ཤེས་ཆོས་ཅན། འདུས་བྱས་ཡིན་པར་ཐལ། དངོས་མེད་ཡིན་པའི་ཕྱིར། རྟགས་མ་གྲུབ་ན། འདུས་མ་བྱས་པའི་ཡེ་ཤེས་ཆོས་ཅན། དངོས་མེད་ཡིན་པར་ཐལ། དོན་བྱེད་ནུས་སྟོང་ཡིན་པའི་ཕྱིར། མ་གྲུབ་ན། འདུས་མ་བྱས་པའི་ཡེ་ཤེས་ཆོས་ཅན། དོན་བྱེད་ནུས་སྟོང་ཡིན་པར་ཐལ། དོན་བྱེད་ནུས་པ་མ་ཡིན་པའི་ཕྱིར། མ་གྲུབ་ན། འདུས་མ་བྱས་པའི་ཡེ་ཤེས་ཆོས་ཅན། དངོས་པོ་ཡིན་པར་ཐལ། དོན་བྱེད་ནུས་པ་ཡིན་པའི་ཕྱིར། འདོད་ན། འདུས་མ་བྱས་པའི་ཡེ་ཤེས་ཆོས་ཅན། འདུས་བྱས་ཡིན་པར་ཐལ། དངོས་པོ་ཡིན་པའི་ཕྱིར། རྟགས་ཁས། མ་ཁྱབ་ན། དེ་ཁྱབ་པར་ཐལ། ཟབ་དོན་ཉེར་གཅིག་ལས། དངོས་པོ་དངོས་མེད་ལ་འདུས་བྱས་ཀྱིས་ཁྱབ། ཅེས་གསུངས་པའི་ཕྱིར་ཟེར་ན་དཔྱད་དོ། །བདག་མེད་ཡིན་པ་ལས་ལོག་པ་དང་བདག་མེད་མ་ཡིན་པ་གཉིས་ཡིན་ཁྱབ་མཉམ་ཡིན་ཐལ། འདོད་ན། བདག་མེད་ཡིན་པ་ལས་ལོག་པ་ཡིན་ན་བདག་མེད་མ་ཡིན་པས་ཁྱབ་པར་ཐལ། བདག་མེད་ཡིན་པ་ལས་ལོག་པ་དང་བདག་མེད་མ་ཡིན་པ་གཉིས་ཡིན་ཁྱབ་མཉམ་ཡིན་པའི་ཕྱིར། རྟགས་ཁས། འདོད་ན། རི་བོང་རྭ་ཆོས་ཅན། བདག་མེད་མ་ཡིན་པར་ཐལ། བདག་མེད་ཡིན་པ་ལས་ལོག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། རི་བོང་རྭ་ཆོས་ཅན། བདག་མེད་ཡིན་པ་ལས་ལོག་པ་ཡིན་པར་ཐལ། བདག་མེད་མ་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། བདག་མེད་མ་ཡིན་པར་ཐལ། ཤེས་བྱ་མ་ཡིན་པའི་ཕྱིར། མ་ཁྱབ་ན། ཁྱབ་པ་ཡོད་པར་ཐལ། ཤེས་བྱ་དང་བདག་མེད་གཉིས་ཡིན་ཁྱབ་མཉམ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ལྟར་ཡིན་པ་དེ་ཡང་མཚལ་མིན་པ་བསོད་ནམས་བཟང་པོས་མཛད་པའི་གཏན་ཚིགས་དོན་བསྡུས་ལས། དེ་དང་ཁྱབ་མཉམ་དོན་གཅིག་པ་ནི། ཡུལ་དང་གཞལ་བྱ་དང་བདག་མེད་དང༌། །གཞི་གྲུབ་གཞན་སེལ་ཡོད་པ་སོགས། །ཞེས་གསུངས་པའི་ཕྱིར། འདོད་ན། རི་བོང་རྭ་ཆོས་ཅན། བདག་མེད་མ་ཡིན་པར་ཐལ། ཤེས་བྱ་མ་ཡིན་པའི་ཕྱིར། ཁྱབ་པ་ཁས། འདོད་ན། རི་བོང་རྭ་ཆོས་ཅན། བདག་མེད་ཡིན་པ་ལས་ལོག་པ་ཡིན་པར་ཐལ། བདག་མེད་མ་ཡིན་པའི་ཕྱིར། རྟགས་ཁས། འདོད་ན། རི་བོང་རྭ་ཆོས་ཅན། བདག་མེད་མ་ཡིན་པར་ཐལ། བདག་མེད་ཡིན་པ་ལས་ལོག་པ་ཡིན་པའི་ཕྱིར། འདོད་ན། རི་བོང་རྭ་ཆོས་ཅན། བདག་མེད་མ་ཡིན་པ་མི་འཐད་པར་ཐལ། བདག་མེད་ཡིན་པའི་ཕྱིར། རྟགས་མ་གྲུབ། རི་བོང་རྭ་ཆོས་ཅན། བདག་མེད་ཡིན་པར་ཐལ། བདག་ཏུ་མ་གྲུབ་པ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། རི་བོང་རྭ་ཆོས་ཅན། ཀ་བུམ་གཉིས་མ་ཡིན་པར་ཐལ། བདག་ཏུ་མ་གྲུབ་པའི་ཕྱིར། ཞེས་དང༌། བསྡུས་གྲྭའི་སྤྱི་དོན་ལས། རི་བོང་གི་རྭ་སོགས་གང་ཟག་གི་བདག་ཏུ་མ་གྲུབ་པར་འཛིན་པའི་གང་ཟག་གི་བདག་མེད་རྟོགས་པའི་ཡེ་ཤེས་ཏེ་ཡོད་པ་དེའི་དམིགས་པ་ཡིན་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན་དཔྱད་དོ། །རྟག་པ་ཡིན་པར་ཐལ། ཡོད་པ་གང་ཞིག དངོས་པོ་མ་ཡིན་པའི་ཕྱིར། འདོད་ན། རྟག་པ་མ་ཡིན་པར་ཐལ། དངོས་པོ་ཡིན་པའི་ཕྱིར། མ་གྲུབ་ན། དངོས་པོ་ཡིན་པར་ཐལ། གཞི་གྲུབ་ན་ཁྱོད་ཡིན་པས་ཁྱབ་ན་ཁྱོད་ཀྱི་ཡིན་པ་ཡོད་པས་ཁྱབ་པའི་ཕྱིར། མ་ཁྱབ་ན། གཞི་གྲུབ་ན་ཁྱོད་ཡིན་པས་ཁྱབ་ན་ཁྱོད་ཀྱི་ཡིན་པ་ཡོད་པས་ཁྱབ་པར་ཐལ། ཁྱབ་མེད་ཀྱི་ལན་འཐད་པའི་ཕྱིར། འདོད་ན། རང་དང་གཅིག་ཆོས་ཅན། ཁྱོད་ཀྱི་ཡིན་པ་ཡོད་པར་ཐལ། གཞི་གྲུབ་ན་ཁྱོད་ཡིན་པས་ཁྱབ་པའི་ཕྱིར། མ་གྲུབ་ན། རང་དང་གཅིག་ཆོས་ཅན། གཞི་གྲུབ་ན་ཁྱོད་ཡིན་པས་ཁྱབ་པར་ཐལ། མ་ཁྱབ་པའི་སྐྱོན་མེད་པའི་ཕྱིར། རྟགས་མ་གྲུབ། ཞོག ཀ་བུམ་གཉིས་ཆོས་ཅན་ཟེར་ན། འོ་ན་ཀ་བུམ་གཉིས་ཆོས་ཅན། རང་དང་གཅིག་མ་ཡིན་པར་ཐལ། འདོད་ན། འདོད་ལན་ཐོབ་ཅེས་བྱས་པས། ཀ་བུམ་གཉིས་ཀ་བུམ་གཉིས་དང་གཅིག་མ་ཡིན་པར་འདོད་ཅེས་ཟེར་ན། ཀ་བུམ་གཉིས་ཆོས་ཅན། ཁྱོད་ཁྱོད་དང་གཅིག་ཡིན་པར་ཐལ། གཞི་གྲུབ་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། གཞི་གྲུབ་ན་ཁྱོད་ཁྱོད་དང་གཅིག་ཡིན་པས་ཁྱབ་པར་ཐལ། གཞི་གྲུབ་ན་ཁྱོད་ཁྱོད་དང་ཐ་དད་མ་ཡིན་པས་ཁྱབ་པའི་ཕྱིར། ཞེས་གསུངས་པའི་ཕྱིར། འདོད་ན། ཀ་བུམ་གཉིས་ཆོས་ཅན། ཁྱོད་ཁྱོད་དང་གཅིག་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། འདོད་ན། འདོད་ལན་ཐོབ། ཀ་བུམ་གཉིས་ཀ་བུམ་གཉིས་དང་གཅིག་ཡིན་པར་འདོད་ཅེས་ཟེར་ན། ཀ་བུམ་གཉིས་ཆོས་ཅན། རང་དང་གཅིག་ཡིན་པར་ཐལ། འདོད་ན། གཞི་གྲུབ་ན་རང་དང་གཅིག་ཡིན་པས་ཁྱབ་པར་ཐལ། འདོད་ན། རང་དང་གཅིག་ཆོས་ཅན། ཁྱོད་ཀྱི་ཡིན་པ་ཡོད་པར་ཐལ། གཞི་གྲུབ་ན་ཁྱོད་ཡིན་པས་ཁྱབ་པའི་ཕྱིར། འདོད་ན། རང་དང་གཅིག་གི་ཡིན་པ་མེད་པར་ཐལ། བུམ་པ་དེ་མ་ཡིན་པ་གང་ཞིག དེ་ལས་གཞན་ཞིག་མ་ཡིན་པའི་ཕྱིར། རྟགས་དང་པོ་མ་གྲུབ་ན། བུམ་པ་རང་དང་གཅིག་ཡིན་པར་ཐལ། བུམ་པ་རང་དང་གཅིག་གི་ཡིན་པ་ཡིན་པའི་ཕྱིར། རྟགས་ཁས། འདོད་ན། བུམ་པ་རང་དང་ཡིན་ཁྱབ་མཉམ་ཡིན་པར་ཐལ། བུམ་པ་རང་དང་གཅིག་ཡིན་པའྀ་ཕྱིར། རྟགས་ཁས། འདོད་ན། འདོད་མི་ནུས་པར་ཐལ། བུམ་པ་ཡིན་ན་རང་ཡིན་པས་མ་ཁྱབ་པ་གང་ཞིག རང་ཡིན་ན་བུམ་པ་ཡིན་པས་མ་ཁྱབ་པའི་ཕྱིར། རྟགས་དང་པོ་མ་གྲུབ་ན། གསེར་བུམ་ཟངས་བུམ་གཉིས་ཆོས་ཅན། རང་ཡིན་པར་ཐལ། བུམ་པ་ཡིན་པའི་ཕྱིར། རྟགས་གཉིས་པ་མ་གྲུབ་ན། ཤེས་བྱ་ཆོས་ཅན། བུམ་པ་ཡིན་པར་ཐལ། རང་ཡིན་པའི་ཕྱིར་ཟེར་ན་དཔྱད་དོ། །དོན་དམ་བདེན་པ་ཆོས་ཅན། ཡིན་མིན་གང་ཡང་མ་ཡིན་པར་ཐལ། ཡིན་མིན་སོགས་སྤྲོས་པ་མཐའ་དག་དང་བྲལ་བ་ཡིན་པའི་ཕྱིར། མ་ཁྱབ་ན། དེ་ཁྱབ་པར་ཐལ། མ་ཁྱབ་པའི་སྐྱོན་ངོས་འཛིན་རྒྱུ་མེད་པའི་ཕྱིར། མ་གྲུབ་ན། དེ་ཡོད་པར་ཐལ། རྟགས་མ་གྲུབ་ཀྱི་ལན་འཐད་པའི་ཕྱིར། འདོད་ན། ཞོག དོན་དམ་བདེན་པ་ཆོས་ཅན་ཟེར་ན། དོན་དམ་བདེན་པ་ཆོས་ཅན། ཡིན་མིན་གང་རུང་ཡིན་པར་ཐལ། འདོད་ན། དོན་དམ་བདེན་པ་ཆོས་ཅན། ཡིན་མིན་གང་རུང་མ་ཡིན་པར་ཐལ། ཡིན་པ་མ་ཡིན་པ་གང་ཞིག མ་ཡིན་པ་མ་ཡིན་པའི་ཕྱིར། མ་གྲུབ་ན། རྟགས་གྲུབ་པར་ཐལ། རྟགས་དང་པོ་གྲུབ་པ་གང་ཞིག ཕྱི་མ་གྲུབ་པའི་ཕྱིར། ཕྱི་མ་མ་གྲུབ་ཟེར་ན། དོན་དམ་བདེན་པ་ཆོས་ཅན། མ་ཡིན་པ་ཡིན་པར་ཐལ། ཕྱི་མ་མ་གྲུབ་ཀྱི་ལན་འཐད་པའི་ཕྱིར། འདོད་ལན་ཐོབ། དོན་དམ་བདེན་པ་མ་ཡིན་པར་འདོད་ཅེས་ཟེར་ན། དོན་དམ་བདེན་པ་ཡིན་མིན་ཞེས་པའི་སྐབས་སུ་དོན་དམ་ལ་ཁས་ལེན་འགྲོ་བ་མ་ཡིན་པར་ཐལ། འདོད་ན། དོན་དམ་བདེན་པ་ཡིན་མིན་ཞེས་པའི་སྐབས་སུ་དོན་དམ་ལ་ཁས་ལེན་འགྲོ་བ་ཡིན་པར་ཐལ། དོན་དམ་ཡོད་པ་ཡིན་པར་ཐལ་ཞེས་པའི་སྐབས་སུ་དོན་དམ་ལ་ཁས་ལེན་འགྲོ་བ་ཡིན་པ་གང་ཞིག རིགས་པ་རྣམ་པ་ཀུན་ཏུ་མཚུངས་པའི་ཕྱིར། འདོད་ན། དོན་དམ་བདེན་པ་ཡིན་པར་ཐལ། དོན་དམ་བདེན་པ་ཡིན་མིན་ཞེས་པའི་སྐབས་སུ་དོན་དམ་ལ་ཁས་ལེན་འགྲོ་བ་གང་ཞིག དོན་དམ་བདེན་པ་ཡིན་པའི་ཕྱིར། རྟགས་ཕྱི་མ་མ་གྲུབ་ཟེར་ན། དོན་དམ་ཆོས་ཅན། བདེན་པ་ཡིན་པར་ཐལ། དེ་ལྟར་ཡིན་པ་དེ་ཡང་དགེ་བཤེས་བློ་བཟང་མཆོག་གྲུབ་རྒྱ་མཚོས་མཛད་པའི་དབུ་མ་ཐེག་མཆོག་གི་འགྲེལ་བ་ལས། དོན་དམ་ཆོས་ཀྱི་དབྱིངས་ཆོས་ཅན། བདེན་པ་ཡིན་ཏེ། རང་གི་ངོ་བོ་གནས་ལུགས་ལ་གྲུབ་པའི་ཕྱིར། ཞེས་གསུངས་པའི་ཕྱིར། འདོད་ན། དོན་དམ་ཆོས་ཅན། བདེན་པ་ཡིན་པར་ཐལ། ལུང་གི་དོན་འཐད་པའི་ཕྱིར། འདོད་ན། དོན་དམ་བདེན་པ་ཡིན་པར་ཐལ། དོན་དམ་བདེན་པ་ཡིན་མིན་ཞེས་པའི་སྐབས་སུ་དོན་དམ་ལ་ཁས་ལེན་འགྲོ་བ་གང་ཞིག དོན་དམ་བདེན་པ་ཡིན་པའི་ཕྱིར། རྟགས་རེ་རེ་ནས་ཁས། འདོད་ན། དོན་དམ་བདེན་པ་མ་ཡིན་པར་ཐལ། ཀུན་རྫོབ་བདེན་པ་ཡིན་པའི་ཕྱིར། མ་གྲུབ་ན། ཀུན་རྫོབ་བདེན་པ་ཡིན་པར་ཐལ། དངོས་མེད་ཀྱི་ཆོས་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཟབ་དོན་ཉེར་གཅིག་ལས། དངོས་དང་དངོས་མེད་ལའང་ཀུན་རྫོབ་ཀྱིས་ཁྱབ། ཅེས་གསུངས་པའི་ཕྱིར་ཟེར་ན་དཔྱད་པར་བྱའོ། །