ཤེས་འདོད་ཆོས་ཅན་བཤད་སྐབས་ཀྱི་དོགས་དཔྱོད།

ཤེས་འདོད་ཆོས་ཅན་བཤད་སྐབས་ཀྱི་དོགས་དཔྱོད།

དེ་སྒྲུབ་ཀྱི་རྩོད་གཞིར་བཟུང་བ་ཤེས་འདོད་ཆོས་ཅན་གྱི་མཚན་ཉིད་ཡིན་པར་ཐལ། འདོད་ན། དེ་སྒྲུབ་ཀྱི་རྩོད་གཞིར་བཟུང་བ་ཡིན་ན་ཤེས་འདོད་ཆོས་ཅན་ཡིན་པས་ཁྱབ་པར་ཐལ། དེ་སྒྲུབ་ཀྱི་རྩོད་གཞིར་བཟུང་བ་ཤེས་འདོད་ཆོས་ཅན་གྱི་མཚན་ཉིད་ཡིན་པའི་ཕྱིར། འདོད་ན། སྒྲ་ཆོས་ཅན། ཁྱོད་སྒྲ་མི་རྟག་པ་རྟོགས་ཟིན་པའི་གང་ཟག་གི་ངོར་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པར་ཐལ། དེ་འདྲའི་གང་ཟག་གི་ངོར་སྒྲ་མི་རྟག་པར་སྒྲུབ་པར་བྱེད་པའི་རྩོད་གཞིར་བཟུང་བ་ཡིན་པའི་ཕྱིར། འདོད་ན། དེ་མི་འཐད་པར་ཐལ། སྒྲ་དེ་སྒྲ་མི་རྟག་པ་རྟོགས་ཟིན་པའི་གང་ཟག་གི་ངོར་སྒྲ་མི་རྟག་པར་སྒྲུབ་པར་བྱེད་པའི་ཆོས་ཅན་ཡིན་ཡང་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པར་ཁས་ལེན་མི་ཐུབ་པའི་ཕྱིར། དེར་ཐལ། འབའ་མདའ་བླ་མའི་རྟགས་རིགས་རྩོམ་འཕྲོ་ལས། དེས་ན་སྒྲ་དེ་བྱས་པའི་རྟགས་ཀྱིས་སྒྲ་མི་རྟག་པ་རྟོགས་ཟིན་པའི་གང་ཟག་གི་ངོར་སྒྲ་དེ་ཆོས་ཅན་ཡིན་ཀྱང༌། ཤེས་འདོད་ཆོས་ཅན་མ་ཡིན་ཏེ། དེས་སྒྲ་མི་རྟག་པ་རྟོགས་ཟིན་པའི་ཕྱིར། ཞེས་གསུངས་པའི་ཕྱིར། འདོད་མི་ནུས་ཏེ། སྒྲ་དེ་སྒྲ་མི་རྟག་པ་རྟོགས་ཟིན་པའི་གང་ཟག་གི་ངོར་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པའི་ཕྱིར། དེར་ཐལ། སྒྲ་དེ་སྒྲ་མི་རྟག་པར་རྟོགས་ཟིན་པའི་གང་ཟག་གི་ངོར་སྒྲ་མི་རྟག་པར་སྒྲུབ་པའི་རྩོད་གཞིར་བཟུང་བ་ཡིན་པའི་ཕྱིར། ཁྱབ་སྟེ། སྒྲ་མི་རྟག་པར་སྒྲུབ་པར་བྱེད་པའི་རྩོད་གཞིར་བཟུང་བ་དེ། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་གྱི་མཚན་ཉིད་ཡིན་པའི་ཕྱིར། དེར་ཐལ། རང་ལུགས་རྟགས་རིགས་ལས། སྒྲ་མི་རྟག་པར་སྒྲུབ་པར་བྱེད་པའི་རྩོད་གཞིར་བཟུང་བ་དེ། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་གྱི་མཚན་ཉིད། ཅེསགསུངས་པའི་ཕྱིར་རོ། །༈ ཡང་ཤེས་འདོད་ཆོས་ཅན་ཡིན་ན་བསྒྲུབ་བྱ་སྤྱི་ཡི་ཕྱོགས་གཅིག་གང་ཞིག བསྒྲུབ་བྱའི་ཆོས་ཀྱི་དཔག་གཞིར་བཟུང་བས་ཁྱབ་པར་ཐལ། དེ་གཉིས་མཚན་མཚོན་ཡིན་པའི་ཕྱིར། འདོད་ན། སྒྲ་མི་རྟག་པ་ཆོས་ཅན། བསྒྲུབ་བྱ་སྤྱི་ཡི་ཕྱོགས་གཅིག་གང་ཞིག བསྒྲུབ་བྱའི་ཆོས་ཀྱི་དཔག་གཞིར་བཟུང་བ་ཡིན་པར་ཐལ། ཤེས་འདོད་ཆོས་ཅན་ཡིན་པའི་ཕྱིར། འདོད་ན། སྒྲ་མི་རྟག་པ་ཆོས་ཅན། བསྒྲུབ་བྱ་སྤྱི་ཡི་ཕྱོགས་གཅིག་ཡིན་པར་ཐལ། འདོད་ན། སྒྲ་མི་རྟག་པ་ཆོས་ཅན། བསྒྲུབ་བྱའི་ཕྱོགས་གཅིག་ཡིན་པར་ཐལ། འདོད་མི་ནུས་ཏེ། བསྒྲུབ་བྱ་དངོས་ཡིན་པའི་ཕྱིར། ཁྱབ་སྟེ། བསྒྲུབ་བྱ་དངོས་ཡིན་ན་བསྒྲུབ་བྱའི་ཕྱོགས་གཅིག་མ་ཡིན་དགོས་པའི་ཕྱིར། དེར་ཐལ། བསྒྲུབ་བྱའི་ཕྱོགས་གཅིག་ཡིན་ན་བསྒྲུབ་བྱ་མཚན་ཉིད་པ་མ་ཡིན་དགོས་པའི་ཕྱིར། དེར་ཐལ། བསྒྲུབ་བྱའི་ཕྱོགས་གཅིག་ཡིན་པ་ལ་བསྒྲུབ་བྱ་བཏགས་པ་བ་ཡིན་དགོས་པའི་ཕྱིར། དེར་ཐལ། སྐབས་འདིའི་བསྒྲུབ་བྱའི་ཕྱོགས་གཅིག་ཅེས་པ་རྟགས་ཚུལ་དང་པོ་གཏན་ལ་འབེབས་སྐབས་ཀྱི་ཕྱོགས་ཏེ་ཤེས་འདོད་ཆོས་ཅན་ལ་བྱེད་དགོས་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བསྒྲུབ་བྱའི་ཕྱོགས་གཅིག་ཡིན་པའི་རྒྱུ་མཚན་གྱིས་བསྒྲུབ་བྱ་བཏགས་པ་བ་ཡིན་པར་སྒྲུབ་པ་ཡིན་པའི་ཕྱིར། དེར་ཐལ། ཚད་མ་མདོ་ལས། བསྡུས་པ་བསྒྲུབ་བྱ་ཡིན་པའི་ཕྱིར། །ཆོས་དང་ཆོས་ཅན་ཁ་ཡར་བ། །དངོས་སུ་མིན་ཡང་དེའི་ཕྱོགས་གཅིག །ཡིན་ཕྱིར་བསྒྲུབ་བྱར་བཏགས་ནས་བརྗོད། །ཅེས་གསུངས་པའི་ཕྱིར་ན་མཁས་པ་གཞན་གྱིས་ཤེས་འདོད་ཆོས་ཅན་གྱི་མཚན་ཉིད་ལའང་ཕྱོགས་བཏགས་པ་བ་གང་ཞིགཅེས་སྦྱར་ཡོད་པས་དཔྱད་རྒྱུ་ཡོད་ལ་རྒྱས་པར་སྐབས་གཞན་དུ་འཆད་པར་འགྱུར་རོ། །༈ ཡང་བསྒྲུབ་བྱ་སྤྱི་ཡི་ཕྱོགས་གཅིག་གང་ཞིག བསྒྲུབ་བྱའི་ཆོས་ཀྱི་དཔག་གཞིར་བཟུང་བ་ཤེས་འདོད་ཆོས་ཅན་གྱི་མཚན་ཉིད་ཡིན་པར་ཐལ། གཏན་ཚིགས་དོན་བསྡུས་ལས། མཚན་ཉིད་རིམ་པ་ལྟར། བསྒྲུབ་བྱ་སྤྱི་ཡི་ཕྱོགས་གཅིག་གང་ཞིག བསྒྲུབ་བྱའི་ཆོས་ཀྱི་དཔག་གཞིར་བཟུང་བ། ཞེས་གསུངས་པའི་ཕྱིར། འདོད་ན། ཤེས་འདོད་ཆོས་ཅན་ཡིན་ན་བསྒྲུབ་བྱ་སྤྱི་ཡི་ཕྱོགས་གཅིག་གང་ཞིག བསྒྲུབ་བྱའི་ཆོས་ཀྱི་དཔག་གཞིར་བཟུང་བ་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། སྦྱོར་བ་དེའི་ཤེས་འདོད་ཆོས་ཅན་ཡིན་ན་སྦྱོར་བ་དེའི་བསྒྲུབ་བྱའི་ཆོས་ཀྱི་དཔག་གཞིར་བཟུང་བ་ཡིན་པས་ཁྱབ་པར་ཐལ། འདོད་ན། སྒྲ་ཆོས་ཅན། སྒྲ་ཆོས་ཅན། བྱས་པ་ཡིན་པའི་ཕྱིར་ཞེས་པའི་སྦྱོར་བའི་བསྒྲུབ་བྱའི་ཆོས་ཀྱི་དཔག་གཞིར་བཟུང་བ་ཡིན་པར་ཐལ། སྒྲ་ཆོས་ཅན། བྱས་པ་ཡིན་པའི་ཕྱིར་ཞེས་པའི་སྦྱོར་བའི་ཤེས་འདོད་ཆོས་ཅན་ཡིན་པའི་ཕྱིར། འདོད་ན། དེ་མི་འཐད་པར་ཐལ། སྒྲ་ཆོས་ཅན། བྱས་པ་ཡིན་པའི་ཕྱིར་ཞེས་པའི་སྦྱོར་བའི་བསྒྲུབ་བྱའི་ཆོས་མེད་པའི་ཕྱིར། དེར་ཐལ། དེ་ལྟ་བུའི་སྦྱོར་བ་དེ་རྩོད་གཞི་དང་རྟགས་ཙམ་བཀོད་པའི་སྦྱོར་བ་ཡིན་པའི་ཕྱིར། ཁྱབ་སྟེ། རྩོད་གཞི་དང་རྟགས་ཙམ་བཀོད་པའི་སྦྱོར་བ་ཞེས་པའི་ཙམ་སྒྲས་གཅད་བྱ་ངོས་འཛིན་རྒྱུ་ཡོདཔའི་ཕྱིར་ན་དཔྱད། ༈ ཡང་ཤེས་འདོད་ཆོས་ཅན་རྟོགས་ན་བསྒྲུབ་བྱ་སྤྱི་ཡི་ཕྱོགས་གཅིག་གང་ཞིག བསྒྲུབ་བྱའི་ཆོས་ཀྱི་དཔག་གཞིར་བཟུང་བ་རྟོགས་པས་ཁྱབ་པར་ཐལ། བསྒྲུབ་བྱ་སྤྱི་ཡི་ཕྱོགས་གཅིག་གང་ཞིག བསྒྲུབ་བྱའི་ཆོས་ཀྱི་དཔག་གཞིར་བཟུང་བ་དེ་ཤེས་འདོད་ཆོས་ཅན་གྱི་མཚན་ཉིད་ཡིན་པའི་ཕྱིར། འདོད་ན། ཤེས་འདོད་ཆོས་ཅན་རྟོགས་ན་བསྒྲུབ་བྱའི་ཕྱོགས་གཅིག་རྟོགས་པས་ཁྱབ་པར་ཐལ། འདོད་ན། ཤེས་འདོད་ཆོས་ཅན་རྟོགས་ན་བསྒྲུབ་བྱ་རྟོགས་པས་ཁྱབ་པར་ཐལ། ཤེས་འདོད་ཆོས་ཅན་རྟོགས་ན་བསྒྲུབ་བྱའི་ཕྱོགས་གཅིག་རྟོགས་དགོས་པའི་ཕྱིར། མ་ཁྱབ་ན། ཁྱབ་པ་ཡོད་པར་ཐལ། ཆོས་དེའི་ཕྱོགས་གཅིག་རྟོགས་ན་ཆོས་དེ་རྟོགས་པས་ཁྱབ་པའི་ཕྱིར། དེར་ཐལ། ཆོས་དེའི་ཕྱོགས་གཅིག་མཐོང་ན་ཆོས་དེ་མཐོང་དགོས་པའི་ཕྱིར། མ་གྲུབ་ན། ཆོས་དེའི་ཕྱོགས་གཅིག་མཐོང་ན་ཆོས་དེ་མཐོང་དགོས་པར་ཐལ། མདུན་རིའི་ཕྱོགས་མཐོང་ན་མདུན་རི་མཐོང་དགོས་པའི་རྒྱུ་མཚན་ཡོད་པའི་ཕྱིར། མ་གྲུབ་ན། དམ་བཅའ་བས་དགོན་འདིའི་མདུན་རི་མ་མཐོང་བར་ཐལ། མདུན་རིའི་ཕྱོགས་གཅིག་མཐོང་བས་མདུན་རི་མཐོང་བར་མི་འཇོག་ལ་མདུན་རིའི་ཕྱོགས་ཀུན་ནས་མ་མཐོང་བའི་ཕྱིར་དང༌། ཡང་རྒྱ་མཚོའི་ཕྱོགས་གཅིག་མཐོང་བས་རྒྱ་མཚོ་མཐོང་བར་མི་འགྱུར་བ་དང་ཆུ་བོ་ཧུབ་གང་བཏུངས་པས་ཆུ་བོ་འཐུང་བར་མི་འགྱུར་བའི་སྐྱོན་ཡོད་པའི་ཕྱིར་ན་དཔྱད། ༈ ཤེས་འདོད་ཆོས་ཅན་ལ་དབྱེ་ན་རྟགས་ཡང་དག་དང༌། འགལ་མ་ངེས་མ་གྲུབ་པའི་ཆོས་ཅན་བཞིར་དབྱེ་བ་ཡིན་པར་ཐལ། འདོད་ན། དེ་སྒྲུབ་ཀྱི་རྟགས་ཡང་དག་གི་ཆོས་ཅན་ཡིན་ན་དེ་སྒྲུབ་ཀྱི་ཤེས་འདོད་ཆོས་ཅན་ཡིན་པས་ཁྱབ་པར་ཐལ། འདོད་ན། བུམ་པ་ཆོས་ཅན། བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་ཤེས་འདོད་ཆོས་ཅན་ཡིན་པར་ཐལ། བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་ཆོས་ཅན་ཡིན་པའི་ཕྱིར། དེར་ཐལ། བུམ་པ་དེ་བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་མཐུན་དཔེ་ཆོས་ཅན་ཡིན་པའི་ཕྱིར། ཁྱབ་སྟེ། མིག་ཤེས་ཀྱི་གཟུང་བྱ་སྒྲ་མི་རྟག་པར་སྒྲུབ་པར་བྱེད་པའི་ཆོས་ཅན་གྱི་ཆོས་ཡིན་པའི་རྒྱུ་མཚན་ཡོད་པའི་ཕྱིར། དེར་ཐལ། རྣམ་ངེས་རང་འགྲེལ་ལས། མ་ཡིན་ཏེ། ཆོས་ཅན་ཐམས་ཅད་ཀྱི་ཆོས་ཡིན་པ་དགག་པའི་ཕྱིར་ཏེ། ཞེས་པ་ནས། མིག་གིས་གཟུང་བ་ཡིན་པའི་ཕྱིར་ཞེས་པ་ལ་སོགས་པ་སྤངས་པ་ཡིན་ནོ། །ཞེས་གསུངས་པའི་ཕྱིར། འདོད་ན། བུམ་པ་ཆོས་ཅན། བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཆོས་ཅན་ཡིན་པར་ཐལ། འདོད་ན། བུམ་པ་ཆོས་ཅན། བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པར་ཐལ། བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཆོས་ཅན་ཡིན་པའི་ཕྱིར། རྟགས་ཁས། ཁྱབ་སྟེ། དེ་སྒྲུབ་ཀྱི་ཆོས་ཅན་ཡིན་ན་དེ་སྒྲུབ་ཀྱི་ཤེས་འདོད་ཆོས་ཅན་ཡིན་པས་ཁྱབ་པའི་ཕྱིར། དེར་ཐལ། དེ་སྒྲུབ་ཀྱི་རྟགས་ཡང་དག་གི་ཆོས་ཅན་ཡིན་ན་དེ་སྒྲུབ་ཀྱི་ཤེས་འདོད་ཆོས་ཅན་ཡིན་པས་ཁྱབ་པའི་ཕྱིར། མ་གྲུབ་ན། དེ་སྒྲུབ་ཀྱི་རྟགས་ཡང་དག་གི་ཆོས་ཅན་ཡིན་ན་དེ་སྒྲུབ་ཀྱི་ཤེས་འདོད་ཆོས་ཅན་ཡིན་དགོས་པར་ཐལ། དེ་སྒྲུབ་ཀྱི་རྟགས་ཡང་དག་གི་ཆོས་ཅན་དེ་དེ་སྒྲུབ་ཀྱི་ཤེས་འདོད་ཆོས་ཅན་གྱི་དབྱེ་བ་ཡིན་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། དབྱེ་ན་རྟགས་ཡང་དག་དང༌། འགལ་མངེས་མ་གྲུབ་པའི་ཆོས་ཅན་བཞིའོ། །ཞེས་གསུངས་པའི་ཕྱིར་རོ། །༈ ཡང་མ་གྲུབ་པའི་ཤེས་འདོད་ཆོས་ཅན་ཆོས་ཅན། ཤེས་འདོད་ཆོས་ཅན་གྱི་དབྱེ་བ་ཡིན་པར་ཐལ། འདོད་ན། མ་གྲུབ་པའི་ཤེས་འདོད་ཆོས་ཅན་དེ་ཤེས་འདོད་ཆོས་ཅན་གྱི་དབྱེ་བ་མ་ཡིན་པར་ཐལ། མ་གྲུབ་པའི་ཤེས་འདོད་ཆོས་ཅན་དང་ཤེས་འདོད་ཆོས་ཅན་གཉིས་ལ་ཁྱབ་ཆེ་ཆུང་མེད་པའི་ཕྱིར། ཁྱབ་སྟེ། ཆོས་དེ་གཞི་དེའི་དབྱེ་བ་ཡིན་པ་ལ་ཆོས་དེ་གཞི་དེ་ལས་ཁྱབ་ཆུང་བ་ཡིན་དགོས་པའི་ཕྱིར། དེར་ཐལ། ཆོས་དེ་གཞི་དེའི་དབྱེ་བ་ཡིན་པའི་ཚད་ཡོད་པའི་ཕྱིར་ན་དཔྱད། ༈ ཡང་སྒྲ་མ་ཡིན་པ་ལས་ལོག་པ་དང་མཉན་བྱ་གཉིས་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་མ་ཡིན་པར་ཐལ། འདོད་ན། དེ་མི་འཐད་པར་ཐལ། སྒྲ་མ་ཡིན་པ་ལས་ལོག་པ་དེ་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པའི་ཕྱིར། དེར་ཐལ། སྒྲ་མ་ཡིན་པ་ལས་ལོག་པ་དེ་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་དུ་བཟུང་བ་ཡིན་པའི་ཕྱིར། མ་གྲུབ་ན། སྒྲ་མ་ཡིན་པ་ལས་ལོག་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་དུ་བཟུང་བ་ཡིན་པར་ཐལ། རྒོལ་བ་གང་ཡང་རུང་བ་ཞིག་གིས་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་དུ་བཟུང་བ་ཡིན་པའི་ཕྱིར། དེར་ཐལ། སྒྲ་མ་ཡིན་པ་ལས་ལོག་པ་ཤེས་འདོད་ཆོས་ཅན་དུ་འཛིན་འདོད་ནས་སྒྲ་ཆོས་ཅན། མི་རྟག་སྟེ། བྱས་པ་ཡིན་པའི་ཕྱིར་ཞེས་སྦྱོར་བ་འགོད་པ་ཡོད་པའི་ཕྱིར། ཁྱབ་སྟེ། དེ་འདྲའི་རྒོལ་བ་དེས་སྒྲ་མ་ཡིན་པ་ལས་ལོག་པ་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་དུ་འཛིན་འདོད་ནས་སྦྱོར་བ་བཀོད་ན་སྒྲ་མ་ཡིན་པ་ལས་ལོག་པ་དེ་སྦྱོར་བ་དེའི་ཤེས་འདོད་ཆོས་ཅན་དུ་འཛིན་དགོས་པའི་ཕྱིར། དེར་ཐལ། རྣམ་འགྲེལ་ལས། སྒྲ་ནི་བརྗོད་འདོད་རྗེས་འབྲང་ཕྱིར། །ཞེས་དང༌། མ་བརྗོད་ན་ཡང་འདོད་པ་ནི། །སྐབས་ལས་རྟོགས་པར་འགྱུར་བ་ཡིན། །ཞེས་གསུངས་པའི་ཕྱིར། འདོད་ན། སྒྲ་མ་ཡིན་པ་ལས་ལོག་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་དུ་བཟུང་བ་ཡིན་པའི་ཕྱིར། འདོད་ན། སྒྲ་མ་ཡིན་པ་ལས་ལོག་པ་ཆོས་ཅན། སྒྲ་སྒྲུབ་པ་ཡིན་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པའི་ཕྱིར། འདོད་ན། སྒྲ་མ་ཡིན་པ་ལས་ལོག་པ་ཆོས་ཅན། སྒྲུབ་པ་ཡིན་པར་ཐལ། སྒྲ་སྒྲུབ་པ་ཡིན་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པའི་ཕྱིར། ཁྱབ་སྟེ། རང་ལུགས་རྟགས་རིགས་ལས། སྒྲ་མ་ཡིན་པ་ལས་ལོག་པ་ཆོས་ཅན། སྒྲུབ་པ་ཡིན་པར་ཐལ། སྒྲ་སྒྲུབ་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པའི་ཕྱིར། རྟགས་ཁས། འདོད་མི་ནུས་ཏེ། དགག་པ་ཡིན་པའི་ཕྱིར། ཞེས་གསུངས་པའིཕྱིར་ན་དཔྱད། ༈ དེ་སྒྲུབ་ཀྱི་རྩོད་གཞི་དང་རྟགས་གཉིས་ཀ་ཡིན་ན་ཕྱོགས་ཆོས་མ་གྲུབ་པས་ཁྱབ་པར་ཐལ། འདོད་ན། བྱས་པ་ཆོས་ཅན། དེ་སྒྲུབ་ཀྱི་ཕྱོགས་ཆོས་མ་ཡིན་པར་ཐལ། དེ་སྒྲུབ་ཀྱི་རྩོད་གཞི་དང་རྟགས་གཉིས་ཀ་ཡིན་པའི་ཕྱིར། མ་གྲུབ་ན། བྱས་པ་ཆོས་ཅན། དེ་སྒྲུབ་ཀྱི་རྩོད་གཞི་དང་དེ་སྒྲུབ་ཀྱི་རྟགས་གཉིས་ཀ་ཡིན་པར་ཐལ། དེ་སྒྲུབ་ཀྱི་རྩོད་གཞི་ཡིན་པ་གང་ཞིག དེ་སྒྲུབ་ཀྱི་རྟགས་ཀྱང་ཡིན་པའི་ཕྱིར། རྟགས་དང་པོ་མ་གྲུབ་ན། བྱས་པ་ཆོས་ཅན། དེ་སྒྲུབ་ཀྱི་རྩོད་གཞི་ཡིན་པར་ཐལ། སྦྱོར་བ་གང་ཡང་རུང་བ་ཞིག་གི་རྩོད་གཞི་ཡིན་པའི་ཕྱིར། དེར་ཐལ། བྱས་པ་བདག་མེད་དུ་སྒྲུབ་པའི་རྩོད་གཞི་ཡིན་པའི་ཕྱིར། རྟགས་པ་གཉིས་པ་མ་གྲུབ་ན། བྱས་པ་ཆོས་ཅན། དེ་སྒྲུབ་ཀྱི་རྟགས་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་རྟགས་ཡིན་པའི་ཕྱིར། དེར་ཐལ། ཡོད་མེད་གང་རུང་ཡིན་པའི་ཕྱིར། ཁྱབ་སྟེ། ཡོད་མེད་གང་རུང་ཡིན་ན་སྒྲ་ཆོས་ཅན། མི་རྟག་པ་ཡིན་ཏེ། ཁྱོད་ཡིན་པའི་ཕྱིར་ཞེས་པའི་སྦྱོར་བ་ཡོད་པས་ཁྱབ་པའི་ཕྱིར། དེར་ཐལ། རང་ལུགས་རྟགས་རིགས་ལས། སྒྲ་ཆོས་ཅན། མི་རྟག་པ་ཡིན་ཏེ། ཁྱོད་ཡིན་པའི་ཕྱིར་ཞེས་པའི་སྦྱོར་བ་ཡོད་པའི་ཕྱིར། དེར་ཐལ། ཡོད་མེད་གང་རུང་ཡིན་པའི་ཕྱིར། ཞེས་གསུངས་པའི་ཕྱིར། འདོད་ན། བྱས་པ་ཆོས་ཅན། དེ་སྒྲུབ་ཀྱི་རྩོད་གཞི་དང་རྟགས་གཉིས་ཀར་བཀོད་པ་ཡིན་པར་ཐལ། འདོད་ན། བྱས་པ་ཆོས་ཅན། དེ་སྒྲུབ་ཀྱི་ཕྱོགས་ཆོས་མ་ཡིན་པར་ཐལ། དེ་སྒྲུབ་ཀྱི་རྩོད་གཞི་དང་རྟགས་གཉིས་ཀར་བཀོད་པ་ཡིན་པའི་ཕྱིར། ཁྱབ་སྟེ། རྣམ་འགྲེལ་ལས། ཆོས་ཅན་གཏན་ཚིགས་དངོས་གྱུར་ནི། །ཤེས་བྱེད་ཉིད་དུ་མ་གྲུབ་ཕྱིར། །ཞེས་དང༌། རང་ལུགས་རྟགས་རིགས་ལས། དེ་སྒྲུབ་ཀྱི་རྩོད་གཞི་དང་རྟགས་གཉིས་ཀར་ཆོས་གཅིག་བཀོད་པ་ཡིན་ན་ཕྱོགས་ཆོས་མ་གྲུབ་དགོས་པའི་ཕྱིར། ཞེས་གསུངས་པའི་ཕྱིར་ན་དཔྱད། ༈ བཏགས་ཡོད་ཆོས་གསུམ་ཚང་བ་དེ་སྒྲ་མཚོན་བྱར་སྒྲུབ་པར་བྱེད་པའི་རྟགས་ཡང་དག་ཡིན་པར་ཐལ། འདོད་ན། སྒྲ་བཏགས་ཡོད་ཆོས་གསུམ་ཚང་བ་ཡིན་པར་རྟོགས་ནས་སྒྲ་མཚོན་བྱ་ཡིན་པར་མ་རྟོགས་པའི་གང་ཟག་ཡོད་པར་ཐལ། བཏགས་ཡོད་ཆོས་གསུམ་ཚང་བ་དེ་སྒྲ་མཚོན་བྱར་སྒྲུབ་པར་བྱེད་པའི་རྟགས་ཡང་དག་ཡིན་པའི་ཕྱིར། འདོད་ན། དེ་མི་འཐད་པར་ཐལ། སྒྲ་བཏགས་ཡོད་ཆོས་གསུམ་ཚང་བ་ཡིན་པ་རྟོགས་ན་སྒྲ་མཚོན་བྱ་ཡིན་པར་རྟོགས་པས་ཁྱབ་པའི་ཕྱིར། དེར་ཐལ། སྒྲ་བཏགས་ཡོད་ཀྱི་ཆོས་གསུམ་ཚང་བ་ཡིན་པར་རྟོགས་པ་ལ་བཏགས་ཡོད་ཀྱི་ཆོས་གསུམ་ག་རེ་རེ་ནས་རྟོགས་དགོས་པའི་ཕྱིར། ཁྱབ་སྟེ། བཏགས་ཡོད་ཀྱི་ཆོས་གསུམ་ག་རྟོགས་པ་ལ་སྤྱིར་མཚོན་བྱ་ཡིན་པ། རང་གི་མཚན་གཞིའི་སྟེང་དུ་གྲུབ་པ། རང་གི་མཚན་ཉིད་གང་ཡིན་པ་ལས་གཞན་པའི་ཆོས་གང་གི་མཚོན་བྱ་མི་བྱེད་པ་སྟེ་གསུམ་པོ་རྟོགས་དགོས་པའི་ཕྱིར། དེར་ཐལ། བཏགས་ཡོད་ཀྱི་ཆོས་གསུམ་ག་འདྲེན་པའི་ཚེ་ན་སྤྱིར་མཚོན་བྱ་ཡིན་པ། རང་གི་མཚན་གཞིའི་སྟེང་དུ་གྲུབ་པ། རང་གི་མཚན་ཉིད་ལས་གཞན་པའི་ཆོས་གང་གི་མཚན་བྱ་མི་བྱེད་པ་དེ་འདྲེན་དགོས་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། རྣམ་བཞག་ཆོས་གསུམ་ནི། སྤྱིར་མཚོན་བྱ་ཡིན་པ། རང་གི་མཚན་ཉིད་ལས་གཞན་པའི་མཚོན་བྱ་མིན་པ། རང་གི་མཚན་གཞི་ལས་གྲུབ་པའོ། །ཞེས་གསུངས་པའི་ཕྱིར། འདོད་ན། བཏགས་ཡོད་ཆོས་གསུམ་ཚང་བ་རྟོགས་པ་ལ་སྤྱིར་མཚོན་བྱ་རྟོགས་དགོས་པར་ཐལ། འདོད་པའི་ཕྱིར། འདོད་ན། སྒྲ་བཏགས་ཡོད་ཆོས་གསུམ་ཚང་བ་ཡིན་པར་རྟོགས་ན་སྒྲ་སྤྱིར་མཚོན་བྱ་ཡིན་པར་རྟོགས་པས་ཁྱབ་པར་ཐལ། འདོད་ན། སྒྲ་བཏགས་ཡོད་ཆོས་གསུམ་ཚང་བ་ཡིན་པར་རྟོགས་ན་སྒྲ་མཚོན་བྱ་ཡིན་པར་རྟོགས་པས་ཁྱབ་པར་ཐལ། སྒྲ་བཏགས་ཡོད་ཆོས་གསུམ་ཚང་བ་ཡིན་པར་རྟོགས་ན་སྒྲ་སྤྱིར་མཚོན་བྱ་ཡིན་པར་རྟོགས་པས་ཁྱབ་པའི་ཕྱིར། ཁྱབ་སྟེ། སྒྲ་སྤྱིར་མཚོན་བྱར་ཡིན་པར་རྟོགས་ན་སྒྲ་མཚོན་བྱ་ཡིན་པར་རྟོགས་དགོས་པའི་ཕྱིར། དེར་ཐལ། སྒྲ་སྤྱིར་མཚོན་བྱར་ཡིན་པར་རྟོགས་ན་སྒྲ་མཚན་ཉིད་གཏན་མ་ཞིང༌། མཚོན་བྱ་ཁོ་ན་ཡིན་པར་རྟོགས་དགོས་པའི་ཕྱིར། དེར་ཐལ། བསྡུས་གྲྭའི་སྤྱི་དོན་ལས། སྤྱིར་ཞེས་པའི་ནུས་པ་སྐབས་འདིར་མཚན་ཉིད་གཏན་མ་ཡིན་པར་མཚོན་བྱ་ཁོ་ན་ཡིན་ཞེས་པ་ཡིན་ལ། ཞེས་གསུངས་པའི་ཕྱིར། འདོད་ན། སྒྲ་སྤྱིར་མཚོན་བྱ་རྟོགས་ན་སྒྲ་མཚོན་བྱ་ཡིན་པར་རྟོགས་དགོས་པར་ཐལ། འདོད་ན། སྒྲ་བཏགས་ཡོད་ཆོས་གསུམ་ཚང་བ་རྟོགས་ན་སྒྲ་མཚོན་བྱ་ཡིན་པར་རྟོགས་པས་ཁྱབ་པར་ཐལ། སྒྲ་བཏགས་ཡོད་ཆོས་གསུམ་ཚང་བ་ཡིན་པར་རྟོགས་ན་སྒྲ་སྤྱིར་མཚོན་བྱ་ཡིན་པར་རྟོགས་དགོས་པའི་ཕྱིར། འདོད་ན། བཏགས་ཡོད་ཆོས་གསུམ་ཚང་བ་ཆོས་ཅན། ཁྱོད་སྒྲ་མཚོན་བྱར་སྒྲུབ་པར་བྱེད་པའི་རྟགས་ཡང་དག་མ་ཡིན་པར་ཐལ། སྒྲ་ཁྱོད་དུ་རྟོགས་ན་སྒྲ་མཚོན་བྱ་ཡིན་པར་རྟོགས་དགོས་པའི་ཕྱིར། འདོད་མི་ནུས་ཏེ། རང་ལུགས་རྟགས་རིགས་ལས། སྒྲ་མཚོན་བྱར་སྒྲུབ་པར་བྱེད་པའི་རྟགས་ཡང་དག་ཡོད་པའི་ཕྱིར། མ་གྲུབ་ན། དེ་ཡོད་པར་ཐལ། བཏགས་ཡོད་ཆོས་གསུམ་ཚང་བ་དེ་དེ་ཡིན་པའི་ཕྱིར། ཞེས་གསུངས་པའི་ཕྱིར། འདོད་ན། སྒྲ་སྤྱིར་མཚོན་བྱར་རྟོགས་པ་ལ་སྒྲ་མཚོན་བྱ་ཡིན་པར་རྟོགས་མི་དགོས་པར་ཐལ། འདོད་ན། དེ་མི་འཐད་པར་ཐལ། སྒྲ་སྤྱིར་ཤེས་བྱ་ཡིན་པ་རྟོགས་པ་ལ་སྒྲ་ཤེས་བྱ་རྟོགས་དགོས་པའི་ཕྱིར་ན་སྤྱིར་མཚོན་བྱ་རྟོགས་ཚུལ་ནིམཚོན་བྱ་དོན་གྱི་རྟོགས་ཚུལ་ཡིན་ཞེས་འབའ་ལང་རྟགས་རིགས་ལས་གསུངས་སོ། །༈ མཉན་བྱ་སྒྲའི་སྐྱེ་མཆེད་ཀྱི་མཚན་ཉིད་ཡིན་པར་ཐལ། རྟགས་རིགས་ལས། མཉན་བྱ་ཆོས་ཅན། མཚོན་བྱ་ཡིན་པར་ཐལ། སྒྲ་མཚོན་བྱར་སྒྲུབ་པའི་ཤེས་འདོད་ཆོས་ཅན་ཡིན་པའི་ཕྱིར། འདོད་མི་ནུས་ཏེ། མཚན་ཉིད་ཡིན་པའི་ཕྱིར། དེར་ཐལ། སྒྲའི་སྐྱེ་མཆེད་ཀྱི་མཚན་ཉིད་ཡིན་པའི་ཕྱིར། ཞེས་གསུངས་པའི་ཕྱིར། འདོད་ན། མཉན་བྱ་ཡིན་ན་སྒྲའི་སྐྱེ་མཆེད་ཡིན་པས་ཁྱབ་པར་ཐལ། མཉན་བྱ་སྒྲའི་སྐྱེ་མཆེད་ཀྱི་མཚན་ཉིད་ཡིན་པའི་ཕྱིར། འདོད་ན། ཐུང་མཐའི་སྐད་ཅིག་མའི་ངོ་བོར་གྱུར་པའི་སྒྲ་ཆོས་ཅན། སྒྲའི་སྐྱེ་མཆེད་ཡིན་པར་ཐལ། མཉན་བྱ་ཡིན་པའི་ཕྱིར། འདོད་ན། དེ་ཆོས་ཅན། རྣ་ཤེས་ཀྱི་གཟུང་བྱ་ཡིན་པར་ཐལ། སྒྲའི་སྐྱེ་མཆེད་ཡིན་པའི་ཕྱིར། འདོད་ན། དེ་ཆོས་ཅན། ཚུར་མཐོང་གི་རྣ་ཤེས་ཀྱི་གཟུང་བྱ་ཡིན་པར་ཐལ། རྣ་ཤེས་ཀྱི་གཟུང་བྱ་ཡིན་པའི་ཕྱིར། ཁྱབ་སྟེ། དབང་ཤེས་ལྔ་བོ་གང་གི་གཟུང་བྱ་ཡིན་པ་ལ་སོ་སྐྱེས་ཀྱི་དབང་ཤེས་ཀྱི་གཟུང་བྱ་ཡིན་དགོས་པའི་ཕྱིར། དེར་ཐལ། རྣ་ཤེས་དང་མིག་ཤེས་སོགས་གང་ཡང་རུང་བའི་གཟུང་བྱ་ཡིན་ན་རྣ་ཤེས་དང་མིག་ཤེས་སོགས་ཀྱི་གཟུང་བྱ་ཡིན་མི་དགོས་པའི་ཕྱིར། མ་གྲུབ་ན། འོ་ན་སངས་འཕགས་ཀྱི་མིག་ཤེས་ཀྱི་གཟུང་བྱ་ཡིན་ན་མིག་ཤེས་ཀྱི་གཟུང་བྱ་ཡིན་དགོས་པར་ཐལ། མིག་ཤེས་གང་ཡང་རུང་ཞིག་གི་གཟུང་བྱ་ཡིན་ན་མིག་ཤེས་ཀྱི་གཟུང་བྱ་ཡིན་དགོས་པའི་ཕྱིར། འདོད་ན། ཆོས་ཐམས་ཅད་ཆོས་ཅན། མིག་ཤེས་ཀྱི་གཟུང་བྱ་ཡིན་པར་ཐལ། སངས་འཕགས་ཀྱི་མིག་ཤེས་ཀྱི་གཟུང་བྱ་ཡིན་པའི་ཕྱིར། དེར་ཐལ། མདོ་ལས། དེ་བཞིན་དུ་སྤྱན་གྱིས་ཀྱང་ཆོས་ཐམས་ཅད་རྟོགས་སོ། །ཞེས་གསུངས་པའི་ཕྱིར། འདོད་ན། སྒྲ་ཆོས་ཅན། མིག་ཤེས་ཀྱི་གཟུང་བྱ་ཡིན་པར་ཐལ། སངས་འཕགས་ཀྱི་མིག་ཤེས་ཀྱི་གཟུང་བྱ་ཡིན་པའི་ཕྱིར། མ་ཁྱབ་ན། མིག་ཤེས་ཀྱི་གཟུང་བྱ་ཡིན་པ་ལ་ཚུར་མཐོང་གི་མིག་ཤེས་ཀྱི་གཟུང་བྱ་ཡིན་དགོས་པར་ཐལ། མ་ཁྱབ་པ་དེའི་ཕྱིར། འདོད་ན། རྣ་ཤེས་ཀྱི་གཟུང་བྱ་ཡིན་པ་ལ་ཚུར་མཐོང་གི་རྣ་ཤེས་ཀྱི་གཟུང་བྱ་ཡིན་དགོས་པར་ཐལ། འདོད་པའི་ཕྱིར། འདོད་ན། ཐུང་མཐའི་སྐད་ཅིག་མའི་ངོ་བོར་གྱུར་པའི་སྒྲ་ཆོས་ཅན། རྣ་ཤེས་ཀྱི་གཟུང་བྱ་མ་ཡིན་པར་ཐལ། ཚུར་མཐོང་གི་རྣ་ཤེས་ཀྱི་གཟུང་བྱ་མ་ཡིན་པའི་ཕྱིར་ན་རིགས་ལམ་ཐོར་བུ་ལས། གཟུགས་ཡིན་ན་གཟུགས་ཀྱི་སྐྱེ་མཆེད་ཡིན་པས་ཁྱབ་པར་ཐལ། སྒྲ་ཡིན་ན་སྒྲའི་སྐྱེ་མཆེད་ཡིན་པས་ཁྱབ་པའི་ཕྱིར་ན་འགའ་ཞིག་མ་ཁྱབ་ཟེར་ཡང་ཁོ་བོས་རྟགས་མ་གྲུབ་ཅེས་ལན་འདེབས་པ་ཡིན་ཏེ། ཐུང་མཐའི་སྐད་ཅིག་མའི་ངོ་བོར་གྱུར་སྒྲ་དེ་ཡིན་པའི་ཕྱིར། ཞེས་གསུངས་མོད། རང་ལུགས་ལ་བསྡུས་གྲྭའི་སྤྱི་དོན་སོགས་སུ་སྒྲ་དང་སྒྲའི་སྐྱེ་མཆེད་དོན་གཅིག་པར་གསུངས་པ་དང་རང་ལུགས་རྟགས་རིགས་སུའང་མཉན་བྱ་སྒྲའི་སྐྱེ་མཆེད་ཀྱི་མཚན་ཉིད་དུ་གསུངས་པས་བློ་ལྡན་རྣམས་ཀྱིས་དཔྱདཔར་བྱའོ། །༈ རང་ལུགས་ལ་མཉན་བྱ་དེ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པར་ཐལ། འདོད་ན། མཉན་བྱ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་མ་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་མ་ངེས་པའི་གཏན་ཚིགས་ཡིན་པའི་ཕྱིར། དེར་ཐལ། མཉན་བྱ་དེ་སྒྲ་མི་རྟག་པར་སྒྲུབ་པའི་ཐུན་མོང་མ་ཡིན་པའི་མ་ངེས་པའི་གཏན་ཚིགས་ཡིན་པའི་ཕྱིར། དེར་ཐལ། གཏན་ཚིགས་འཁོར་ལོ་ལས། དབུས་ན་ཐུན་མོང་མིན་མ་ངེས། །ཞེས་དང༌། གཏན་ཚིགས་དོན་བསྡུས་ལས། དང་པོ་ལ་མཐུན་ཕྱོགས་ལ་ཡོད་ཀྱང་མ་མཐོང༌། མེད་ནས་མ་མཐོང༌། མི་མཐུན་ཕྱོགས་ལ་ཡོད་ཀྱང་མ་མཐོང༌། མེད་ནས་མ་མཐོང་བ་བཞི་སྟེ། རིམ་པ་བཞིན། དཔེར་ན་སྒྲ་མི་རྟག་སྟེ། མཉན་བྱ་ཡིན་པས་སོ། །རྟག་སྟེ། མཉན་བྱ་ཡིན་པས་སོ། །ཞེས་གསུངས་པའི་པྱིར། འདོད་ན། མཉན་བྱ་ཆོས་ཅན། སྒྲ་མི་རྟག་པར་སྒྲུབ་པའི་རྟགས་ཡང་དག་མ་ཡིན་པར་ཐལ། དེ་སྒྲུབ་ཀྱི་མ་ངེས་པའི་གཏན་ཚིགས་ཡིན་པའི་ཕྱིར། འདོད་མི་ནུས་ཏེ། མཉན་བྱ་སྒྲ་མི་རྟག་སྒྲུབ་ཀྱི་རྟགས་ཡང་དག་ཡིན་པའི་ཕྱིར། དེར་ཐལ། ནང་གི་ཁྱབ་པ་ལས། རྒོལ་བ་རྨོངས་ལ་ལྟོས་པ་ཡིན། །ཞེས་དང༌། ནང་གི་ཁྱབ་པ་བློ་ལྡན་ལ་འོ། །ཞེས་དང༌། ཆོས་རྗེ་ཉ་དབོན་པའི་ཚད་ཊཱིཀ་ཡིད་ཀྱི་མུན་སེལ་ལས། མཁས་གྲུབ་ཤནྟི་བ་ཡང་རྨོངས་པ་ལ་དཔེ་དགོས་པས། མཉན་བྱ་སྒྲ་མི་རྟག་པར་སྒྲུབ་པའི་རྟགསཡང་དག་ཡིན་ཕྱིར། ཞེས་གསུངས་པའི་ཕྱིར་ན་དཔྱད། ༈ མཉན་བྱ་དེ་རྒོལ་བ་དབང་རྟུལ་ལ་སྒྲ་མི་རྟག་པར་སྒྲུབ་པར་བྱེད་པའི་རྟགས་ལྟར་སྣང་དང༌། དབང་རྣོན་ལ་རྟགས་ཡང་དག་ཏུ་བཞག་པ་ཡིན་པར་ཐལ། འདོད་ན། མཉན་བྱ་དེ་དབང་རྟུལ་ལ་སྒྲ་མི་རྟག་སྒྲུབ་ཀྱི་རྟགས་ཡང་དག་མ་ཡིན་པའི་རྒྱུ་མཚན་དེ་དེ་སྒྲུབ་ཀྱི་མཐུན་དཔེ་ཡང་དག་མེད་པའི་རྒྱུ་མཚན་གྱིས་ཡིན་པར་ཐལ། འདོད་ན། དེ་མི་འཐད་པར་ཐལ། མཉན་བྱའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་མཐུན་དཔེ་ཡང་དག་ཡོད་པའི་ཕྱིར། དེར་ཐལ། དུང་གི་མཉན་བྱ་སྐད་ཅིག་ཐ་མ་དེ་ཡིན་པའི་ཕྱིར། མ་གྲུབ་ན། དེར་ཐལ། དུང་གི་མཉན་བྱ་སྐད་ཅིག་ཐ་མའི་སྟེང་དུ་མཉན་བྱ་ཡིན་ན་མི་རྟག་པ་ཡིན་པས་ཁྱབ་པ་ངེས་ནས་སྒྲ་མི་རྟག་པ་ཡིན་པར་མ་ངེས་པ་ཡོད་པའི་ཕྱིར། ཁྱབ་སྟེ། དེ་སྒྲུབ་ཀྱི་བསྒྲུབ་བྱ་མ་ངེས་པའི་སྔ་རོལ་ཏུ་ཁྱབ་པ་ངེས་པའི་གཞིར་རུང་བ་དེ། དེ་སྒྲུབ་ཀྱི་མཐུན་དཔེ་ཡང་དག་གི་དོན་ཡིན་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། དུང་གི་མཉན་བྱ་སྐད་ཅིག་ཐ་མ་མི་རྟག་པར་ངེས་ན་སྒྲ་མི་རྟག་པར་ངེས་མི་དགོས་པའི་ཕྱིར། དེར་ཐལ། དུང་གི་མཉན་བྱ་སྐད་ཅིག་ཐ་མ་ཚུར་མཐོང་རྣམས་ཀྱི་མངོན་སུམ་གྱིས་གྲུབ་ཐུབ་པའི་ཕྱིར། མ་གྲུབ་ན། དེར་ཐལ། རྣམ་འགྲེལ་ལེའུ་གསུམ་པ་ལས། འདི་ལྟར་རྟགས་མེད་བྱིས་པར་གྱི། །སྐྱེ་བོས་ཕྱིས་འབྱུང་བ་དང་ནི། །འབྲེལ་མེད་མར་མེ་ལ་སོགས་ཀྱི། །འཇིག་པ་མཐོང་བས་ཡོངས་གཅོད་ཉིད། །ཅེས་དང༌། དེའི་ཐད་ཀྱི་རིན་ཕྲེང་ལས། བྱིས་པའི་སྐྱེ་བོས་ཀྱང་རིགས་འདྲ་ཕྱིས་འབྱུང་མེད་པའི་མར་མེ་དང་གློག་ལ་སོགས་པ་འཇིག་པར་ངེས་ནུས་ཤིང༌། རིགས་འདྲ་གཞན་འབྱུང་ཡོད་པའི་རི་ལ་སོགས་པ་རྟག་པར་འཁྲུལ་བས་སོ། །ཞེས་གསུངས་པའི་ཕྱིར། འདོད་ན། དུང་གི་མཉན་བྱ་སྐད་ཅིག་ཐ་མའི་སྟེང་དུ་མི་རྟག་པར་རྟོགས་ན་སྒྲ་མི་རྟག་པ་རྟོགས་མི་དགོས་པར་ཐལ། འདོད་ན། དུང་གི་མཉན་བྱ་སྐད་ཅིག་ཐ་མ་ཆོས་ཅན། ཁྱོད་མཉན་བྱའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་གཉིས་ལྡན་གྱི་མཐུན་དཔེ་ཡང་དག་ཡིན་པར་ཐལ། མཉན་བྱའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱ་སྒྲ་མི་རྟག་པ་མ་ངེས་པའི་སྔ་རོལ་ཏུ་དེ་སྒྲུབ་ཀྱི་ཁྱབ་པ་ངེས་པའི་གཞི་རུང་བ་ཡིན་པའི་ཕྱིར། འདོད་ན། མཉན་བྱའི་རྟགས་ཀྱིས་སྒྲ་མི་རྟག་པར་སྒྲུབ་པའི་མཐུན་དཔེ་ཡང་དག་ཡོད་པར་ཐལ། འདོད་པའི་ཕྱིར། འདོད་ན། མཉན་བྱ་རྒོལ་བ་དབང་རྟུལ་ལའང་སྒྲ་མི་རྟག་སྒྲུབ་ཀྱི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་མཐུན་དཔེ་ཡང་དག་ཡོད་པ་གང་ཞིག གཞན་རྒྱུ་མཚན་མེད་པའི་ཕྱིར། འདོད་མི་ནུས་ཏེ། ནང་གི་ཁྱབ་པ་ལས། རྒོལ་བ་རྨོངས་ལ་ལྟོས་པ་ཡིན། །ཞེས་དང༌། ཉ་ཚད་ལས། མཁས་གྲུབ་ཤནྟི་བ་ཡང་རྨོངས་པ་ལ་དཔེ་དགོས་པས། ཞེས་པ་ནས། ནང་གི་ཁྱབ་པར་བཤད་དེ་ལེགས་སམ་སྙམ་མོ། །ཞེས་གསུངས་པའི་ཕྱིར། ཡང་ན་དེ་སྒྲུབ་ཀྱི་མཐུན་དཔེ་ཡང་དག་ཡོད་པར་ཐལ། གསལ་བྱེད་ཀྱི་ཡི་གེ་ཀ་ཞེས་པ་དེ་ཡིན་པའི་ཕྱིར་ན་དཔྱད་ཚུལ་གོང་དང་མཚུངས་ལ། རྗེ་རྟ་ནག་པས་སེ་གོལ་གྱི་མཉན་བྱ་མཐུནདཔེར་བཟུང་ན་མཉན་བྱ་དེ་སྒྲུབ་ཀྱི་རྟགས་ཡང་དག་ཡིན་པར་ཡང་གསུངས་སོ། །༈ ཡང་མཉན་བྱ་ཆོས་ཅན། རྒོལ་བ་དབང་རྟུལ་ལ་སྒྲ་མི་རྟག་པར་སྒྲུབ་པའི་རྟགས་ལྟར་སྣང་ཡིན་པ་མི་འཐད་པར་ཐལ། རྒོལ་བ་དབང་རྟུལ་ལ་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པའི་ཕྱིར། དེར་ཐལ། རྒོལ་བ་དབང་རྟུལ་དེས་སྒྲ་དང་མཉན་བྱའི་མིང་དོན་གྱི་འབྲེལ་བ་མ་ངེས་པའི་སྔ་རོལ་ཏུ་མཉན་བྱ་མི་རྟག་པ་ཡིན་པར་རྟགས་ཀྱི་བྱེད་པ་ལ་བརྟེན་ནས་བསྒྲུབ་པ་ཡོད་པའི་ཕྱིར། དེར་ཐལ། མཉན་བྱ་ཆོས་ཅན། མི་རྟག་པ་ཡིན་ཏེ། དོན་བྱེད་ནུས་པ་ཡིན་པའི་ཕྱིར་ཞེས་པའི་སྦྱོར་བ་བཀོད་ནས་སྦྱོར་བ་དེ་སྒྲུབ་ཀྱི་རྟགས་དོན་བྱེད་ནུས་པའི་བྱེད་པ་ལ་བརྟེན་ནས་མཉན་བྱ་མི་རྟག་པར་གྲུབ་པ་ཡོད་པའི་ཕྱིར། དེར་ཐལ། འཐད་ལྡན་ལས། གལ་ཏེ་མཉན་བྱ་ཉིད་ནི་མཉན་ཤེས་བསྐྱེད་པ་ཡིན་ལ། ཞེས་གསུངས་པའི་ཕྱིར། འདོད་ན། སྒྲ་དང་མཉན་བྱའི་མིང་དོན་གྱི་འབྲེལ་བ་མ་ངེས་པའི་སྔ་རོལ་ཏུ་མཉན་བྱ་ལ་མི་རྟག་པས་ཁྱབ་པ་ངེས་པའི་རྒོལ་བ་དབང་རྟུལ་ཡོད་པར་ཐལ། འདོད་ན། དེའི་འདྲའི་རྒོལ་བ་ལ་མཉན་བྱ་དེ་སྒྲ་མི་རྟག་སྒྲུབ་ཀྱི་རྟགས་ཡང་དག་ཡིན་པར་ཐལ། ཕྱིས་སུ་རྒོལ་བ་དེ་ལ་ཁྱབ་འབྲེལ་ངག་གིས་དངོས་སུ་མ་བསྟན་པར་སྒྲ་མཉན་བྱ་ཡིན་ནོ་ཞེས་གཏན་ཚིགས་འབའ་ཞིག་བརྗོད་པ་ཙམ་གྱིས་མཉན་བྱ་རྟགས་ཡང་དག་ཏུ་འགྱུར་བའི་ཕྱིར། དེར་ཐལ། བྱས་ན་མི་རྟག་པས་ཁྱབ་པ་སྔོན་དུ་ངེས་པའི་རྒོལ་བ་ལ་ཕྱིས་སུ་བྱས་ན་མི་རྟག་པས་ཁྱབ་པ་དངོས་སུ་བརྗོད་མི་དགོས་པར་སྒྲ་བྱས་སོ་ཞེས་ཕྱོགས་ཆོས་རྐྱང་བ་བརྗོད་པས་རྒོལ་བ་དེ་ལ་རྟགས་དེ་དེ་སྒྲུབ་ཀྱི་རྟགས་ཡང་དག་ཏུ་འགྲོ་བའི་ཕྱིར། དེར་ཐལ། རྣམ་འགྲེལ་ལས། མཁས་པ་རྣམས་ལ་ནི། །གཏན་ཚིགས་འབའ་ཞིག་བརྗོད་པ་ཟད། །ཅེས་དང༌། དེའི་ཐད་ཀྱི་འགྲེལ་བཤད་རིན་ཕྲེང་ལས། དེ་སྒྲུབ་ཀྱི་ཕྱོགས་ཆོས་མི་ཤེས་ཤེས་རུང་དུ་ཡོད་ཅིང༌། དེ་ཡི་ཁྱབ་འབྲེལ་ཤེས་པའི་མཁས་པ་ཆོས་ཅན། ཁྱོད་ཀྱི་ངོར་དེ་སྒྲུབ་ཀྱི་ཁྱབ་འབྲེལ་ངག་གིས་དངོས་སུ་བསྟན་ནུས་མི་དགོས་ཏེ། སྒྲ་བྱས་སོ་ཞེས་ཕྱོགས་ཆོས་འབའ་ཞིག་བརྗོད་པས་ཀྱང་ཆོག་པས་སོ། །དུ་བ་ལའང་སྦྱར་རོ། །ཞེས་གསུངས་པའི་ཕྱིར། འདོད་ན། རྒོལ་བ་དབང་རྟུལ་ལའང་མཐུན་དཔེ་མེད་པར་རྟགས་ཡང་དག་ཏུ་སོང་བ་ཡོད་པར་ཐལ། འདོད་མི་ནུས་ཏེ། སྐབས་འདིར་རྣམ་འགྲེལ་རྩ་བ་དང་རིནའཕྲེང་གཉིས་ཀར་རྒོལ་བ་མཁས་པ་ལ་སྦྱར་བའི་རྒྱུ་མཚན་ཡོད་པའི་ཕྱིར་ན་དཔྱད། ༈ཡང་རང་ལུགས་ལ་མཉན་བྱ་དེ་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པར་ཐལ། འདོད་ན། སྒྲ་དང་མཉན་བྱའི་མིང་དོན་གྱི་འབྲེལ་བ་ངེས་ཤིང༌། མཉན་བྱ་མི་རྟག་པར་ངེས་ནས་སྒྲ་མི་རྟག་པ་མ་ངེས་པའི་རྒོལ་བ་ཡོད་པར་ཐལ། མཉན་བྱ་དེ་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པའི་ཕྱིར། འདོད་ན། དེ་མི་འཐད་པར་ཐལ། མཉན་བྱ་སྒྲར་ངེས་པའི་སྟེང་ནས་མཉན་བྱ་མི་རྟག་པར་ངེས་ན་སྒྲ་མི་རྟག་པ་ངེས་དགོས་པའི་ཕྱིར། དེར་ཐལ། སྒྲ་མི་རྟག་པར་རྟོགས་ཚུལ་ཡང་མཉན་བྱ་དང་སྒྲ་ཡི་མིང་དོན་གྱི་འབྲེལ་བ་ངེས་ནས་མཉན་བྱ་མི་རྟག་པ་རྟོགས་ཚུལ་ལས་ལྷག་ཅིག་མེད་པའི་ཕྱིར་ན་དཔྱད་དགོས་ལ། མཁས་པ་གཞན་གྱིས་འདི་ལ་གསུངས་ཟིན་མི་འདྲ་བ་གཉིས་ཡོད་དེ། རྣམ་ངེས་དར་ཊཱིཀ་དང་རྗེ་བཙུན་པའི་རྣམ་འགྲེལ་སོགས་སུ་མཉན་བྱ་མི་རྟག་པར་ཚད་མས་ངེས་པའི་རྗེས་སུ་མཉན་བྱ་དང་སྒྲའི་མིང་དོན་གྱི་འབྲེལ་བ་ཚད་མས་ངེས་པའི་གང་ཟག་ཡིན་ན། སྒྲ་མི་རྟག་པར་ཚད་མས་ངེས་པའི་གང་ཟག་ཡིན་དགོས་པར་གསུངས་ལ། རིགས་རྒྱན་དང་རྣམ་བཤད་སོགས་སུ་མཉན་བྱ་ལ་མི་རྟག་པས་ཁྱབ་པ་སྔར་ངེས། དེའི་རྗེས་སུ་མཉན་བྱ་སྒྲའི་ཐུན་མོང་མ་ཡིན་པའི་ཆོས་སུ་ངེས། དེའི་རྗེས་སུ་སྒྲ་མི་རྟག་པར་ངེསཀྱང་ཚུལ་གསུམ་གྱི་བྱེད་པ་ལ་བརྟེན་ནས་ངེས་པ་མིན་པར་གསུངས་སོ། །༈ ཡང་བཀའ་བཞི་བ་བསོད་ནམས་བཟང་པོའི་གཏན་ཚིགས་དོན་བསྡུས་དང༌། འགྲེལ་བཤད་རིན་འཕྲེང་གཉིས་ལས་མཉན་བྱ་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པར་མ་གསུངས་ཤེ་ན། དེ་མི་འཐད་པར་ཐལ། གཏན་ཚིགས་དོན་བསྡུས་གཞིར་བཞག་ནའང་མཉན་བྱ་དེ་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པར་ཁས་ལེན་དགོས་པའི་ཕྱིར། དེར་ཐལ། ཚ་ཞིང་སྲེག་པ་དེ་མེ་འཚེད་བྱེད་ཅེས་པའི་སྒྲ་བཤད་པའི་རྒྱུ་མཚན་འཇུག་རུང་དུ་སྒྲུབ་པའི་རྟགས་ཡང་དག་ཡིན་པར་འདོད་པ་གང་ཞིག རིགས་པ་མཚུངས་པའི་ཕྱིར། རྟགས་དང་པོ་གྲུབ་སྟེ། གཏན་ཚིགས་དོན་བསྡུས་ལས། མེ་ཆོས་ཅན། འཚེད་བྱེད་ཅེས་པའི་སྒྲ་བཤད་པའི་རྒྱུ་མཚན་གྱིས་འཇུག་རུང་སྟེ། ཚ་ཞིང་སྲེག་པ་ཡིན་པའི་ཕྱིར་ཞེས་པ་ལྟ་བུའོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། དེ་གཉིས་ཀ་མཚན་ཉིད་དེས་མཚོན་བྱ་དེའི་སྟེང་དུ་གཞི་དེ་ཡིན་པར་སྒྲུབཔ་མཚུངས་པའི་ཕྱིར་རོ། །༈ ཡང་མཁས་པ་གཞན་གྱི་ལུགས་ལ་མཉན་བྱ་སྒྲ་མི་རྟག་པར་སྒྲུབ་པའི་རྟགས་ལྟར་སྣང་ཡིན་པར་ཐལ། འདོད་ན། དེ་མི་འཐད་པར་ཐལ། མཉན་བྱ་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པའི་ཕྱིར། མ་གྲུབ་ན། མཉན་བྱ་ཆོས་ཅན། སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པར་ཐལ། སྒྲ་མི་རྟག་པར་སྒྲུབ་པའི་ཚུལ་གསུམ་ཡིན་པའི་ཕྱིར། མ་གྲུབ་ན། མཉན་བྱ་ཆོས་ཅན། སྒྲ་མི་རྟག་པར་སྒྲུབ་པའི་ཚུལ་གསུམ་ཡིན་པར་ཐལ། སྒྲ་མི་རྟག་པར་སྒྲུབ་པའི་ཕྱོགས་ཆོས་གང་ཞིག དེ་སྒྲུབ་ཀྱི་ཁྱབ་པ་གཉིས་ཀའང་ཡིན་པའི་ཕྱིར། དང་པོ་མ་གྲུབ་ན། མཉན་བྱ་ཆོས་ཅན། སྒྲ་མི་རྟག་པར་སྒྲུབ་པའི་ཕྱོགས་ཆོས་ཡིན་པར་ཐལ། སྒྲ་མི་རྟག་པར་སྒྲུབ་པའི་མ་ངེས་པའི་གཏན་ཚིགས་ཡིན་པའི་ཕྱིར། ཁྱབ་པ་སླ། རྟགས་དེར་ཐལ། གཏན་ཚིགས་འཁོར་ལོ་ལས། དབུས་ན་ཐུན་མོང་མིན་མ་ངེས། །ཞེས་གསུངས་པའི་ཕྱིར། གོང་གི་རྟགས་གཉིས་པ་མ་གྲུབ་ན། མཉན་བྱ་ཆོས་ཅན། སྒྲ་མི་རྟག་པར་སྒྲུབ་པའི་རྗེས་ཁྱབ་ཡིན་པར་ཐལ། སྒྲ་མི་རྟག་པར་སྒྲུབ་པའི་རྗེས་ཁྱབ་ཏུ་སོང་བའི་རྒོལ་བ་ཡོད་པའི་ཕྱིར། དེར་ཐལ། སྒྲ་དང་མཉན་བྱའི་མིང་དོན་གྱི་འབྲེལ་བ་མ་ངེས་པའི་སྔ་རོལ་ཏུ་མཉན་བྱ་མི་རྟག་པ་ཁོ་ན་ལ་ཡོད་པར་ངེས་པའི་རྒོལ་བ་ཡོད་པའི་ཕྱིར། མ་གྲུབ་ན། དེ་ཡོད་པར་ཐལ། རྣམ་ངེས་དར་ཊཱིཀ་ལས། ཁྱབ་པ་གྲུབ་ཟིན་མ་བརྗེད་པའི་རྗེས་སུ་སྒྲ་དང་མཉན་བྱ་གཉིས་ཀྱི་མིང་དོན་གྱི་འབྲེལ་བ་ངེས་པར་བྱས་པས། མཉན་བྱས་སྒྲ་མི་རྟག་པར་སྒྲུབ་པའི་ཕྱོགས་ཆོས་གྲུབ་ལ། དེའི་རྗེས་སུ་རྟགས་དེ་ལ་བརྟེན་ནས་སྒྲ་མི་རྟག་པ་གསར་དུ་ངེས་པར་བྱར་ཡོད་པ་ཡིན་ནོ། །ཞེས་གསུངས་པའི་ཕྱིར་ན་ཀུན་མཁྱེན་འཇམ་དབྱངས་བཞད་པའི་རྣམ་འགྲེལ་མཐའ་དཔྱོད་ལས། དེ་དེ་སྒྲུབ་ཀྱི་རྟགས་ཡང་དག་ཏུ་སོང་བའི་རྒོལ་བ་སྲིད་པའི་ཕྱིར་ན་ཤིན་ཏུ་མ་ཁྱབ་སྟེ། དམིགས་བསལ་ལ་དེ་འདྲ་སྲིད་ཀྱང༌། སྤྱིར་བཏང་ལ་དེ་དེ་སྒྲུབ་ཀྱི་ཐུན་མོང་མ་ཡིན་པའི་གཏན་ཚིགས་ཡིན་ལ། དེ་དེ་སྒྲུབ་ཀྱི་རྟགས་ཡང་དག་མ་ཡིན་པའི་ཁྱད་པར་འབྱེད་དགོས་པའི་ཕྱིར། ཞེས་གསུངས་ལ། གོང་གི་རྣམ་ངེས་དར་ཊཱིཀ་གི་ལུང་དོན་རྗེ་བཙུན་པའི་རྣམ་འགྲེལ་དུ། འཐད་ལྡན་གྱི་ལུགས་ལྟར་ཡིན་པ་གསུངས་ཀྱང༌། རང་ལུགས་ལ་འཐད་ལྡན་ལྟར་ན་མཉན་བྱ་སྒྲ་མི་རྟག་སྒྲུབ་ཀྱི་རྟགས་ཡང་དག་ཏུ་མི་བཞེད་དེ། ཆོས་རྗེ་ཉ་དབོན་པའི་ཚད་ཊཱིཀ་ལས། ཆོས་མཆོག་དང་བྲམ་ཟེ་གཉིས་ཀྱིས་མཉན་བྱ་སྒྲ་མི་རྟག་པར་སྒྲུབ་པའི་རྟགས་ཡང་དག་མ་ཡིན་པར་བཤད་ལ། རྒྱལ་དབང་བློ་དང་ཤནྟི་པས་རྟགས་ཡང་དག་ཏུ་བཞེད་དོ། །ཞེས་གསུངས་སོ། །དེས་ན་འཐད་ལྡན་མཁན་པོའི་ལུགས་ལ་མཉན་བྱ་སྒྲ་མི་རྟག་པར་སྒྲུབ་པའི་རྟགས་ཡང་དག་མ་ཡིན་པས་དེ་སྒྲུབ་ཀྱི་རྟགས་ཡང་དག་ཏུ་སོང་བའི་རྒོལ་བ་མེད་དམ་དཔྱད་དགོས་ཏེ། སྦྱོར་བ་དེ་སྒྲུབ་ཀྱི་རྟགས་ཡང་དག་ཡིན་མིན་དེ་དེ་སྒྲུབ་ཀྱི་རྟགས་ཡང་དག་ཏུ་སོང་བའི་རྒོལ་བཡོད་མེད་ལ་ལྟོས་པའི་ཕྱིར་ན་དཔྱད། ༈ སྒྲ་ཚད་མས་ངེས་པའི་གང་ཟག་ཡིན་ན་སྒྲ་སྒྲར་ཚད་མས་ངེས་པའི་གང་ཟག་ཡིན་པས་ཁྱབ་པར་ཐལ། འདོད་ན། ཁྱོད་ཁྱོད་རང་ཡིན་ན་ཁྱོད་རྟོགས་པའི་གང་ཟག་ཡིན་ན་ཁྱོད་ཁྱོད་དུ་རྟོགས་པའི་གང་ཟག་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། ཤེས་བྱ་ཆོས་ཅན། ཁྱོད་རྟོགས་པའི་གང་ཟག་ཡིན་ན་ཁྱོད་ཁྱོད་དུ་རྟོགས་པའི་གང་ཟག་ཡིན་དགོས་པར་ཐལ། ཁྱོད་ཁྱོད་རང་ཡིན་པའི་ཕྱིར། འདོད་ན། ཤེས་བྱ་བློའི་ཡུལ་བྱ་རུང་རྟོགས་པའི་གང་ཟག་ཡིན་ན་ཤེས་བྱ་ཤེས་བྱ་རྟོགས་པའི་གང་ཟག་ཡིན་པས་ཁྱབ་པར་ཐལ། ཤེས་བྱ་བློའི་ཡུལ་དུ་བྱ་རུང་རྟོགས་པའི་གང་ཟག་ཡིན་ན་ཤེས་བྱ་རྟོགས་པའི་གང་ཟག་ཡིན་དགོས་པའི་ཕྱིར། འདོད་ན། ཤེས་བྱ་བློའི་ཡུལ་དུ་བྱ་རུང་ཆོས་ཅན། གང་ཟག་དེས་ཁྱོད་རྟོགས་ན་ཤེས་བྱ་ཤེས་བྱ་ཡིན་པར་རྟོགས་པས་ཁྱབ་པར་ཐལ། འདོད་ན། ཤེས་བྱ་བློའི་ཡུལ་དུ་བྱ་རུང་ཆོས་ཅན། གང་ཟག་དེས་ཁྱོད་རྟོགས་ན་ཤེས་བྱ་ཤེས་བྱ་ཡིན་པར་རྟོགས་པས་མ་ཁྱབ་པར་ཐལ། ཁྱོད་ཤེས་བྱ་ཤེས་བྱ་ཡིན་པའི་མཚན་ཉིད་ཡིན་པའི་ཕྱིར། དེར་ཐལ། བསྡུས་གྲྭའི་སྤྱི་དོན་ལས། ཤེས་བྱ་བློའི་ཡུལ་དུ་བྱ་རུང་ཡིན་པ། ཤེས་བྱ་ཤེས་བྱ་ཡིནཔའི་མཚན་ཉིད། ཅེས་གསུངས་པའི་ཕྱིར་ན་དཔྱད། ༈ གཞན་ཡང་སྒྲ་དང་མི་རྟག་པ་གཉིས་ཆོས་ཅན། ཁྱོད་རྟོགས་ན་ཁྱོད་ཁྱོད་ཡིན་པར་རྟོགས་དགོས་པར་ཐལ། ཁྱོད་ཁྱོད་རང་ཡིན་པའི་ཕྱིར། འདོད་ན། བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཕྱི་རྒོལ་ཡང་དག་ཆོས་ཅན། ཁྱོད་ཀྱིས་སྒྲ་དང་མི་རྟག་པ་གཉིས་སྒྲ་དང་མི་རྟག་པ་གཉིས་ཡིན་པར་རྟོགས་པར་ཐལ། ཁྱོད་ཀྱིས་སྒྲ་དང་མི་རྟག་པ་གཉིས་རྟོགས་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱིས་སྒྲ་དང་མི་རྟག་པ་གཉིས་རྟོགས་པར་ཐལ། ཁྱོད་ཀྱིས་བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་དོན་གསུམ་རྟོགས་པའི་ཕྱིར། དེར་ཐལ། ཁྱོད་བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཕྱི་རྒོལ་ཡང་དག་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་རྩོད་གཞི་དང་རྟགས་གཉིས་ཀ་རྟོགས་པར་ཐལ། ཁྱོད་ཀྱིས་བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་དོན་གསུམ་རྟོགས་པའི་ཕྱིར། འདོད་ན། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཕྱིར་རྒོལ་ཡང་དག་ཆོས་ཅན། ཁྱོད་ཀྱིས་སྒྲ་དང་མི་རྟག་པ་གཉིས་ཀ་རྟོགས་པར་ཐལ། འདོད་ན། དེ་ཆོས་ཅན། ཁྱོད་ཀྱིས་སྒྲ་དང་མི་རྟག་པ་གཉིས་སྒྲ་དང་མི་རྟག་པ་གཉིས་ཀ་ཡིན་པར་རྟོགས་པར་ཐལ། ཁྱོད་གང་ཟག་གང་ཞིག ཁྱོད་ཀྱིས་སྒྲ་དང་མི་རྟག་པ་གཉིས་རྟོགས་པའི་ཕྱིར། འདོད་ན། གང་ཟག་དེས་སྒྲ་དེ་སྒྲ་དང་མི་རྟག་པ་གཉིས་ཀ་ཡིན་པར་རྟོགས་པར་ཐལ། དེས་སྒྲ་དང་མི་རྟག་པ་གཉིས་ཀ་སྒྲ་དང་མི་རྟག་པ་གཉིས་ཡིན་པར་རྟོགས་པའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་སྒྲ་མི་རྟག་པར་རྟོགས་པར་ཐལ། ཁྱོད་ཀྱིས་སྒྲ་དེ་སྒྲ་དང་མི་རྟག་པ་གཉིས་ཀ་ཡིན་པར་རྟོགས་པའི་ཕྱིར། འདོད་མི་ནུས་ཏེ། ཁྱོད་བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཕྱིར་རྒོལ་ཡང་དག་ཡིན་པའི་ཕྱིར་ནདཔྱད་པར་བྱའོ། །