རྒྱུད་གུར་གྱི་སྒྲུབ་ཐབས་བསྡུས་པ།
རྒྱུད་གུར་གྱི་སྒྲུབ་ཐབས་བསྡུས་པ་བཞུགས་སོ། །
ན་མོ་གུ་རུ་ཧེ་བཛྲ་ཡེ། བླ་མ་དང་དཔལ་ཀྱེའི་རྡོ་རྗེ་ལ་ཕྱག་འཚལ་ལོ། །བྱིན་གྱིས་རླབས་པའི་བཀའ་གནང་དུ་གསོལ། འདིར་རྒྱུད་རྣམས་ནས་གསུངས་པའི་གུར་མགོན་གྱི་སྒྲུབ་ཐབས་ལ་གསུམ་སྟེ། བསྙེན་པ་སྒྲུབ་པ་ལས་སྦྱོར་རོ། །དང་པོ་ནི་དུར་ཁྲོད་ལ་སོགས་དབེན་པའི་གནས་སུ་ཡི་དམ་གྱི་མངོན་རྟོགས་བསྒོམ་ཞིང་ཐུན་བསྡུས་ནས། བླ་མ་དང་དཔལ་ཀྱེའི་རྡོ་རྗེ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །སེམས་ཅན་ཐམས་ཅད་ཀྱི་དོན་དུ་དཔལ་ནག་པོ་ཆེན་པོ་བསྒྲུབ་པར་བྱའོ། །ཨོཾ་མ་ཧཱ་
ཀཱ་ལ་ཡ། བཛྲ་ཀ་ཝ་ཙ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་ལན་གསུམ་གྱིས་བསྲུང་བ་བྱས་ནས། རང་ཉིད་སྐད་ཅིག་གིས་དཔལ་ནག་པོ་ཆེན་པོར་གསལ་བའི་ཐུགས་ཀར་རཾ་ལས་ཉི་མའི་སྟེང་དུ་ཧཱུྃ་ནག་པོ། དེ་ལས་འོད་ཟེར་འཕྲོས་པས་སྲིད་པ་གསུམ་གྱིས་གདུག་པ་བསལ་ནས། འོད་ཟེར་དེས་བླ་མ་དང་སངས་རྒྱས་བྱང་སེམས་ཐམས་ཅད་ནག་པོ་ཆེན་པོའི་རྣམ་པར་མདུན་གྱི་ནམ་མཁར་སྤྱན་དྲངས་བཛྲ་ས་མཱ་ཛཿ རང་གི་ཐུགས་ཀ་ནས་མཆོད་པའི་སྤྲིན་དཔག་ཏུ་མེད་པས་མངོན་པར་མཆོད། ཨོཾ་མ་ཧཱ་ཀཱ་ལ་ཨརྒྷཾ་་སོགས༔ དཀོན་མཆོག་གསུམ་ལ་བདག་སྐྱབས་མཆི་སོགས། སེམས་
ཅན་ཐམས་ཅད་བདེ་བ་དང་ཚད་མེད་པ་བཞི་བསྒོམ། བཛྲ་མུཿ ཚོགས་ཞིང་གཤེགས་པའམ་མི་དམིགས་པར་བྱས་ལ། སྭ་བྷ་ཝས་ཆོས་ཐམས་ཅད་སྟོང་ཞིང་བདག་མེད་པའི་སྟོང་པ་ཉིད་དུ་གྱུར། ཨོཾ་མ་ཧཱ་ཤུ་རྒྱ་སོགས། གཉིས་སྣང་གི་ཆོས་ཐམས་ཅད་གཉིས་མེད་ཡེ་ཤེས་ཆེན་པོའོ། །སྟོང་པའི་ངང་ལས་པཾ་ལས་པདྨ་རཾ་ལས་ཉི་མའི་སྟེང་དུ་ཧཱུཾ་ཞུ་བས་གྲི་གུག་གི་ཡུ་བར་ཉི་མའི་སྟེང་དུ་ཧཱུྃ་གིས་མཚན་པ་དེ་ལས་འོད་ཟེར་དང་གྲི་གུག་གི་ཚོགས་འཕྲོས་གདུག་པ་ཅན་ཐམས་ཅད་ཚར་བཅད། ཚུར་འདུས་པས་སྟེང་འོག་ཕྱོགས་མཚམས་ཐམས་ཅད་གྲི་གུག་སོ་ཕྱིར་བསྟན་པའི་གུར་བླ་བྲེ་དྲྭ་བ་ར་བ་ཡེ་ཤེས་ཀྱི་མེ་རབ་ཏུ་འབར་བར་གྱུར། དེའི་དབུས་སུ་ཨེ་ལས་ཆོས་ཀྱི་འབྱུང་གནས་མཐིང་ནག་རྩ་བ་ཕྲ་བ་ཐུར་དུ་ཟུག་པ། ཁ་གདེངས་ཆེ་བ་གྱེན་དུ་བསྟན་པ་ཡངས་ཤིང་རྒྱ་ཆེ་བའི་ནང་དུ། སྣ་ཚོགས་པདྨ་ཉི་མ་རོའི་སྙིང་ཁར་ཉི་ཟླའི་གའུ་ཨཱ་ལི་ཀཱ་ལིའི་མཚན་པའི་དབུས་སུ་ཧཱུྃ་ནག་པོ་འོད་དུ་ཞུ་བ་ལས་གྲི་གུག་གི་ཡུ་བ་ཧཱུྃ་གིས་མཚན་པ། དེ་ལས་འོད་འཕྲོས་དོན་གཉིས་བྱས་ཚུར་འདུས་ཡོངས་སུ་གྱུར་པ་ལས། །དཔལ་རྡོ་རྗེ་ནག་པོ་ཆེན་པོ་སྐུ་མདོག་མཐིང་ནག་ཞལ་གཅིག་སྤྱན་གསུམ་མཆེ་བ་གཙིགས་པ། དབུ་སྐྲ་
སེར་པོ་གྱེན་དུ་བརྫེས་པ། ཕྱག་གཉིས་ཀྱི་གཡས་གྲི་གུག་ནམ་མཁའ་ལ་ཕྱར་ཞིང་གཡོན་ཐོད་པ་ཐུགས་ཀར་འཛིན་པ། སྐུ་ཐུང་ཞིང་སྦོམ་པ་ཡན་ལག་རགས་པ། གསུས་འཁྱིམ་ཆེ་བ། མི་མགོའི་ཕྲེང་བ་དང་སྦྲུལ་གྱིས་བརྒྱན་པ། ཞལ་ནས་ཁྲག་འཛག་པ། གཡོན་བརྐྱང་གིས་བཞུགས་པ། དེའི་དཔྲལ་བར་ཨོཾ་དཀར་པོ། མགྲིན་པར་ཨཱདམར་པོ། ཐུགས་ཀར་པད་ཉིའི་སྟེང་དུ་ཧཱུྃ་ལས་བྱུང་བའི་གྲི་གུག་ཧཱུཾ་གིས་མཚན་པ་དེ་ལས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་ནག་པོ་ཆེན་པོའི་རྣམ་པར་སྤྱན་དྲངས་བཛྲ་ས་མཱ་ཛཿ ཨརྒྷཾ་སོགས། ཛཿཧཱུྃ་བཾ་ཧོ༔ ཡེ་ཤེས་པ་དང་དམ་ཚིག་པ་དབྱེར་མེད་པར་གྱུར། སླར་ཡང་ཐུགས་ཀ་ནས་འོད་འཕྲོས་དབང་ལྷ་སྤྱན་དྲངས་དབང་བསྐུར་སྐུ་གང་དྲི་མ་དག་ཆུའི་ལྷག་མ་ཡར་ལུད་པས་སྤྱི་བོར་རིགས་ཀྱི་བདག་པོ་བླ་མ་མི་བསྐྱོད་པས་དབུ་བརྒྱན་པར་གྱུར། རང་གི་ཐུགས་ཀར་གྲི་གུག་གིས་ལྟེ་བར་ཉི་མའི་སྟེང་དུ་ཧཱུྃ་མཐིང་ནག་གི་མཐར་སྔགས་ཕྲེང་གཡས་སུ་འཁོར་བར་གྱུར། ཨོཾ་མ་ཧཱ་ཀཱ་ལ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་པའི་འོད་ཟེར་གྱིས་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ལ་མཆོད་པ་
དཔག་ཏུ་མེད་པ་ཕུལ་བས་ཐུགས་མཉེས་ནས། ཐམས་ཅད་ཀྱང་ནག་པོ་ཆེན་པོའི་རྣམ་པར་ཆར་བབ་པ་ལྟར་བྱོན་ནས་རང་ལ་ཐིམ། འོད་ཟེར་གྲི་གུག་གིས་ཚོགས་འཕྲོས་པས་བདུད་དང་ལོག་འདྲེན་གནོད་བྱེད་ཐམས་ཅད་ཚར་བཅད་ནས་མཐུ་སྟོབས་ནུས་པ་ཐམས་ཅད་ཚུར་བསྡུས་ནས་རང་ཉིད་ལ་ཐིམ་པས་མཐུ་སྟོབས་རྒྱས། འོད་ཟེར་གྱིས་འགྲོ་དྲུག་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་དག་ནས་ཐམས་ཅད་དཔལ་ནག་པོ་ཆེན་པོའི་སྐུ་ཤ་སྟག་ཏུ་གྱུར་ཏེ། རིམ་བུའི་ཚུལ་སྔགས་དི་རི་རི་སྔགས་བཟླ་རོག་བྱེད་པར་བསམས་ལ་བཟླས། ཐུན་མཚམས་སུ་ཤ་ཁྲག་ཆན་དང་ལ་ཕུད་ཉ་ཤ་འབྲུ་སྣ་ཚོགས་དུག་གིས་ལ་དུ་སོགས་དང་བཅས་པའི་གཏོར་མ་ཆང་གིས་བྲན་ལ། རླུང་མེ་ཐོད་སྐྱེད་གྱི་སྟེང་དུ་ཐོད་པར་ཤ་ལྔ་བདུད་རྩི་ལྔ་ས་བོན་དང་བཅས་པའི་སྟེང་དུ་གྲི་གུག་ཧཱུྃ་གིས་མཚན་པ་ལས། འོད་ཟེར་འོག་ཏུ་འཕྲོས་པས་རླུང་གཡོས་མེ་སྦར། རྫས་ཞུ་བ་གྲི་གུག་གིས་དཀྲུགས་པས་དམ་ཚིག་བདུད་རྩི་དང་། ཧཱུྃ་གིས་འོད་ཟེར་སྟེང་དུ་འཕྲོས་པས་ཡེ་ཤེས་ཀྱི་བདུད་རྩིར་བཀུག་སྟེ་གཉིས་མེད་དུ་གྱུར། ཨོཾ་མ་ཧཱ་ཀཱ་ལ་ཡ། ཛྷཱ་ན་ཨ་མྲྀ་ཏ་ཨོཾ་ཨཱཧུཾ་ཞེས་བྱིན་རླབས། རང་གི་ཐུགས་ཀའི་འོད་ཟེར་གྱིས་མགྲོན་
རིགས་བཞི་པོ་ཐམས་ཅད་དཔལ་ནག་པོ་ཆེན་པོའི་རྣམ་པར་སྤྱན་དྲངས་ཏེ། ཨོཾ་མ་ཧཱ་ཀཱ་ལ་ཡ་བཛྲ་ས་མཱ་ཛ་ལྷ་ཐམས་ཅད་ཀྱི་ལྗགས་ཧཱུྃ་ལས་བྱུང་བའི་རྡོ་རྗེའི་སྦུ་གུས་བདུད་རྩི་དྲངས་ཤིང་གསོལ་བར་གྱུར། ཨོཾ་མ་ཧཱ་ཀཱ་ལ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁཱ་ཧི་ཁཱ་ཧི། ཞེས་གསུམ་མམ་བདུན་དང་། ཨོཾ་མ་ཧཱ་ཀཱ་ལ་ཤཱ་ས་ན། །ཨོཾ་མ་ཧཱ་ཀཱ་ལ་ཨདྷཾ་སོགས་དང་། ཧཱུྃ། སྲིན་པོའི་གཟུགས་སོགས་ཀྱིས་བསྟོད། མཆོད་སྦྱིན་གཏོར་མ་འདི་བཞེས་སོགས་ཕྲིན་ལས་བཅོལ། བཛྲ་མུཿ ཞེས་མགྲོན་རྣམས་གཤེགས་རང་ཉིད་སྲུང་འཁོར་ནས་རིམ་པར་མེ་ལོང་ལ་ཧས་བཏབ་པ་ལྟར་མཐའ་ནས་དབུས་སུ་འདུས། ཐིག་ལེ་ནཱ་ད་ལས་འདས་ནས། དོན་དམ་པའི་སྟོང་པ་ཉིད་ལ་མཉམ་པར་བཞག །དགེ་བ་འདི་ཡིས་མྱུར་དུ་བདག །ཅེས་སོགས་བསྔོ་བ་བྱས་ནས། རང་ཉིད་ནག་པོ་ཕྱག་གཉིས་རྒྱུན་སྤྱང་བའི་ང་རྒྱལ་གྱིས་སྤྱོད་ལམ་བྱའོ། །དེ་ལྟ་བུར་ཐུན་དུ་བཅད་ནས་ཉམས་སུ་བླངས་ཏེ། ཞག་ཉེར་གཅིག་གམ། སྔགས་བཞི་འབུམ་མམ་རྨིས་ལྟས་སུ་ཞལ་མཐོང་བའམ། མགོན་པོའི་སྐུ་གཟུགས་མཇལ་བ་དང་། མི་ནག་བྱ་ནག་ཁྱི་ནག་གཡག་ནག་
དང་། ཕྲེང་བ་དང་རྒྱུད་ཀྱི་པུ་ཏི་རྙེད་པ། ཀཱ་པ་ལ་དང་གྲི་གུག་རྡོར་དྲིལ་རྙེད་པ། ཉམས་རྟོགས་ཁྱད་པར་ཅན་སྐྱེ་བ་མ་བྱུང་བར་དུ་བསྙེན་ལ། ཁ་བཀང་སྦྱིན་སྲེག་ཡང་གྲུབ་ན་བྱ་སྟེ་༔ དེ་ནས་ལས་སྦྱོར་བྱ་རུང་ངོ། །དེ་ནས་བསྙེན་པའི་རིམ་པ་ཡང་ཡིན་ལ། ཡི་དམ་ལྟར་བསྒྲུབ་པ་ཡིན་ནོ། ཨྠྀི། དེ་ནི་སྒྲུབ་པ་ནི་མཎྜལ་མེ་རི་རྡོ་རྗེ་གྲི་གུག་གིས་རྭ་བའི་དབུས་སུ། གྲུ་གསུམ་མཐིང་ནག་སྣ་ཚོགས་པད་ཉིའི་ལྟེ་བར་གྲི་གུག་ཧཱུྃ་མཚན་བྲི། བསྡུ་ན་དུར་ཁྲོད་ཀྱི་ས་གསུམ་བྱ། དེའི་སྟེང་དུ་རོ་བསྲེགས་པའི་འགལ་དུམ་མམ་གཡུལ་དུ་ཤི་བའི་རུས་པས་སྲོག་ཤིང་བྱས་མཆོད་པའི་ས་བསྲེས་ལ་འདག་སྐུ་ཁྲུ་གང་ངམ་མཐོ་གང་པའམ། རོ་རས་ལ་བྲིས་པའི་སྐུ་རབ་གནས་ཅན་བཤམས། མཐར་སྨན་རཀ་མཆོད་པ་རྣམ་ལྔ་དུག་གི་མེ་ཏོག་དང་དུར་ཁྲོད་དུ་སྦྱར་བའི་སྤོས་ཚིལ་ཆེན་གྱི་མར་མེ། ཤ་ཆེན་གྱི་ལྷ་བཤོས། ཁྲག་གིས་ཨརྒྷཾ་བཤམས། རྟེན་གཏོར་རྒྱུན་གཏོར། རྐང་གླིང་ཐོད་རྔ་དྲིལ་བུ་རྣམས་ཡང་འཛོམས་པར་བྱས་ལ། བསང་སྦྱངས་ནས་རང་ཡི་དམ་མམ་མགོན་པོར་གསལ་བའི་མདུན་དུ་མེ་རི་དང་གྲི་གུག་གིས་རྭ་བ་དུར་ཁྲོད་བརྒྱད་ཀྱིས་བསྐོར་བའི་དབུས་སུ། རྡོ་རྗེའི་བྲག་སྟེང་གྲུ་གསུམ་
མཐིང་ནག་འབར་བའི་སྟེང་དུ་སྣ་ཚོགས་པདྨ་དང་ཉི་མ་ལ་ཧཱུཾ་ལ་སོགས་གཙོ་བོ་སྔར་ལྟར་བསྐྱེད་པའི་གཡས་སུ་བྱ་ནག །གཡོན་ནས་ཁྱི་ནག་རྒྱབ་ནས་ལྕགས་སྤྱང་མདུན་ནས་མི་ནག །སྟེང་ནས་ནམ་མཁའ་ལྡིང་གི་ཕོ་ཉ་བྱེད་པ་དེའི་གནས་གསུམ་ཡི་གེ་གསུམ་བསྐྱེད་ཧཱུྃ་ལས་འོད་འཕྲོས་ཡེ་ཤེས་པ་སྤྱན་དྲངས་བསམས་ལ། ཧཱུྃ། མགོན་པོ་ཀུན་གཤེགས་སོགས་དང་། ཨོཾ་ཤྲཱི་མ་ཧཱ་ཀཱ་ལ་ཡེ། ཨེ་ཧེ་ཧི་ཛཿཧཱུྃ་བཾ་ཧོ༔ ཧཱུཾ། རྡོ་རྗེ་འཆང་གི་སྤྱན་སྔ་རུ། །སོགས། པདྨ་ཀ་མ་ལཱ་ཡེ་ཧཱུཾ། རྡོ་རྗེ་རྩེ་ལྔ་པའི་ཕྱག་རྒྱ་བྱས་ལ། ཨོཾ་མ་ཧཱ་ཀཱ་ལ་ས་མ་ཡ་སོགས། བཅོམ་ལྡན་འདས་རྡོ་རྗེ་འཆང་ཆེན་པོ་དང་དཔལ་ཀྱེའི་རྡོ་རྗེ་ལ་སོགས་པ་རྩ་བ་དང་བརྒྱུད་པའི་བླ་མ་རྣམས་ཀྱི་བཀའ་དང་དམ་ལས་མ་འདའ་བར་སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། ཁྱད་པར་དུ་བདག་གི་བསམ་དོན་ཕྲིན་ལས་ཐམས་ཅད་ཡིད་བཞིན་དུ་འགྲུབ་པའི་ཕྲིན་ལས་བཅོལ་ལོ། དུས་རྒྱུན་དུ་ནི་དམིགས་བྱ་དེ་ཉིད་གང་དུ་གནས་པའི་སྤྱི་གཙུག་ཏུ་ནག་པོ་ཆེན་པོ་བཞུགས་ནས་ཕྱག་གཡས་གྲི་གུག་ལས་གྲི་གུག་གི་ཆར་བབས་པས་ཁོའི་ལུས་གཏུབ། གྲི་གུག་ལས་ལ་དབང་པོའི་སྒོ་ནས་ཞུགས་ཏེ་རྩ་གནས་
རྣམས་དྲག་ཏུ་འཁོར་བས་དབང་པོ་དོན་སྙིང་གཏུབ་པའི་ཁྲག་གི་རྒྱུན། རང་དབང་མེད་པར་ནག་པོ་ཆེན་པོའི་ཐོད་པར་སོང་བ་ཞལ་དུ་གསོལ་བར་དམིགས་སོ། གཏོར་སྒྲུབ་རྟགས་ཐོན་པ་ཟོར་དུ་འཕང་ལིང་ག་སྦྱིན་སྲེག་བྱ་ཐལ་བ་གཉན་སར་རླུང་ལ་ཕྱར་བ་དང་། དྲག་པོའི་སར་ལིང་ག་དང་བཅས་པ་མནན་ནོ། །ལས་སྦྱོར། ཨྠྀི། ཡང་དགྲའམ་བགེགས་སྟོབས་ཆེན་ཚར་གཅོད་པ་ནི་དུར་ཁྲོད་ཀྱི་གནས་སམ་དབེན་པར་རང་ཉིད་ནག་པོ་ཆེན་པོར་བསྒོམས་ལ། ལྷོ་ནུབ་ཏུ་ཁ་བལྟས་ཏེ། དུར་ཁྲོད་ཀྱི་རས་སམ་དུག་ཤོག་ལ་དུར་ཁྲོད་ཀྱི་སོལ་བ་བྱ་རོག་གིས་ཁྲག་ཚ་བ་གསུམ་བསྲེས་པའི་སྣག་ཚས་བྱ་རོག་འུག་པའི་སྒྲོས་འཁོར་ལོ་གཉིས་བྲི་སྟེ། འོག་འཁོར་གཡས་སྐོར་ཡིག་མགོ་ཕྱིར་བསྟན། སྟེང་འཁོར་གཡོན་སྐོར་ཡིག་མགོ་ནང་བསྟན་བྱ༔ དབུས་སུ་ཧཱུཾ་གཉིས་ཀྱི་བར་དུ་རྨི་འམ་ཏྲི་ལིང་གིས་བསྐོར་བ། དེ་རྒྱབ་རྩིབས་བརྒྱད་ལ་སྙིང་པོ། དེ་རྒྱབ་རྩིབས་བརྒྱད་ལ་རྩ་སྔགས། དེ་རྒྱབ་མུ་ཁྱུད་ལ་ལས་སྔགས། བར་དུ་བསྒྲུབ་བྱའི་མིང་གཞུག །དེ་རྒྱབ་ཏུ་ནག་པོ་ཆེན་པོ་ཕྱག་གཉིས་ཀྱི་ཐོད་པ་འཛིན་པའི་ཞལ་དུ་བསྒྲུབ་བྱའི་མིང་ཡིག་བྲིའོ། །དེ་ནས་ཁུག་མ་བཅང་ན་ཤོག་ལིང་བྱ། མནན་པ་བྱེད་ན་
ཚ་བ་གསུམ་དང་རྐང་རྗེས་གཡོན་པའི་ས་དང་བག་ཟན་རྣམས་བསྲེས་ལ། ལིང་ག་སོར་གསུམ་པའི་སྙིང་གར། ཨོཾ་མ་ཧཱ་ཀཱ་ལ་ཡ། ཨ་པ་ར་བྷེ་ཤ་ཨ་མུ་ཀ་མཱ་ར་ཡ་ཧཱུྃ་ཧཱུྃ་ཕཊ། ཅེས་གྲོ་ག་ལ་བྲིས་པ་དང་མིང་རུས་བཅུག །དེ་ནས་ལིང་ག་དེ་ཐོད་པའམ་ལྕགས་སྣོད་དུ་བཞག་ལ། ལྕགས་ཀྱུའི་ཕྱག་རྒྱ་བྱས་ལ་ཐུགས་ཀའི་འོད་ཟེར་གྱིས་དམིགས་བྱ་བཀུག་ནས་བསྟིམ་ཞིང་། བདེན་སྟོབས་བཀུག་གཞུག་དང་། ཨོཾ་མ་ཧཱ་ཀ་ལ། ཨ་མུ་ཀ་ཨ་ཀར་ཤ་ན་ཛྫ་ཛྫ༔ ཧཱུྃ་ཧཱུྃ་ཕཊ༔ ཅེས་མང་དུ་བཟླས། དེ་ནག་པོ་ཆེན་པོའི་གྲི་གུག་དམིགས་བྱ་ལྷ་དང་སོ་སོར་ཕྱེ་བར་དམིགས་ལ། ཨོཾ་མ་ཧཱ་ཀཱ་ལ་སརྦ་དུཉྩན་ཙ། ད་ཧ་ད་ཧ་ཧཱུཾ། ཨ་མུ་ཀ་བི་དེ་ཤ་ཡ་མཱ་ར་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ༔ ཞེས་བརྗོད་མཆོད་རྟེན་དང་སྐུ་གཟུགས་བྱིན་རླབས་ཅན་དང་གདུང་རིང་བསྲེལ་ཐོག་ནས་ལིང་ག་ལ་བསྐོར་བ་བྱ་ཞིང་། དགྲ་བོ་སྲུང་བྱེད་ཀྱི་ལྷ་ཁྱེད་རྣམས་དཀོན་མཆོག་གསུམ་གྱི་ཕྱག་དང་བསྐོར་བ་ཐེག་གམ་བརྗོད་པས། ལྷ་རྣམས་དཔག་ཚད་དུ་བྲོས་པར་བསམ། དེ་ནས་མཎྜལ་དབུས་སུ་འཁོར་ལོ་གཉིས་བཤམས། དེའི་ཕྱོགས་མཚམས་བརྒྱད་དུ་རང་སོའི་ཕུར་པ་སོར་བཞི་ༀ་མ་ཧཱ་ཀཱ་ལ་ཡ།
བཛྲ་ཀཱི་ལ་ཡ། ཨ་མུ་ཀ་ཧ་ན་ཧ་ན་ཧཱུཾ་ཧཱུཾ་ཕཊ། བྲིས་པ་བརྒྱད་བཤམས། མཆོད་གཏོར་བཤམས་ནས་ཙཀྲ་གཉིས་ནག་པོ་ཆེན་པོ་གཉིས་སུ་བསྐྱེད་ལ་སྤྱན་འདྲེན་མཆོད་བསྟོད་གཏོར་མ་འབུལ་ཞིང་ཕྲིན་ལས་བཅོལ་ཡུངས་ཀར་དང་ཕུར་བུ་ནག་པོ་སྐུ་སྨད་ཕུར་པ་ཅན་དུ་བྱིན་བརླབས་ནས། ལིང་གའི་ཐིག་ལེའི་གནས་སུམ་ཅུ་རྩ་གཉིས་སུ་ཕུར་བུ་དང་ཡུངས་ཀར་བཏབ་ཅིང་བསད་སྔགས་འདིར་བརྗོད་དོ། །ༀ་མ་ཧཱ་ཀཱ་ལ་ཡ། འཛ་ཡེ་འཛ་ལེན་ཏ་ཧ་ཨཥཱ་ག་ཏྲ། འདྷ་ཧན་ཏ་ཧོ། ཕོ་རོན་མ་ཧཱ་ཀཱ་ལ་ཡ་ཡ། ག་ར་མི་ག་ར། སུ་ཏ་ན་པ། ཨ་མུ་ཀ་ས་ཧ་ར་ན་ས་ཧ་རི་སཾ། ག་ར་བ་ཕཊ། ཧཱུཾ་ཕུ་རཱ། ཨ་ན་ལ་ཨ་ན་ལ། འབ་ཡི་རི་ཡཱ། འབ་ཡི་རི་ཡཱ། འབྲ་སྨྲ་མ་རཾ་འབི་བྷུ་ནི་ཝ་རཾ། ཨ་མུ་ཀ་ནི་ཡང་འཛའུ་མ་ཧཱ་པི་རཾ། འདྷ་ལའུ་འདྷུ་ལའུ་འདྷུ་ལ། ཨ་མུ་ཀ་ཚ་ཏ་ཀ་ནི་ཡ་ར་ཡ། ཧཱུཾ་ཧཱུཾ་ཕཊ། ཅེས་བཟླས། དེ་ནས་མདུན་གྱི་ནག་པོ་ཆེན་པོ་གཉིས་ཀྱི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས། བསྒྲུབ་བྱ་བཀུག་ནས་འོད་ཀྱི་ཞགས་པས་ཡན་ལག་བཅིངས་ཏེ། གཅེར་བུ་མགོ་མཇུག་བཟློག་སྟེ་མ་ཧཱ་ཀཱ་ལ་གཉིས་ཁ་སྦྱོར་གྱིས་བར་དུ་བཅུག་པར་བསྒོམས་ལ། ལིང་ག་འཁོར་ལོའི་
བར་དུ་བལྟམས་ནས་གྲིར་ཤི་བའི་སྒྲས་རྒྱ་གྲམ་དུ་བཅིང་ཞིང་། ཨོཾ་མ་ཧཱ་ཀཱ་ལ་ཡ། ཨ་མུ་ཀ །བྷནྡྷ་བྷནྡྷ་ཧཱུྃ་ཕཊ། ཅེས་བཟླས་འཁོར་ལོ་དེ་ཐོད་པའམ་ལྕགས་སྣོད་ནང་དུ་བཞག་ནས་རྟེན་གྱི་མདུན་དུའམ་གཏོར་མའི་དྲུང་དུ་བཞག་པའམ། བྱད་ཆོས་བྱེད་ན་ཁུག་མ་ནག་པོ་ཟུར་གསུམ་དུ་བཅུག་ལ་རང་གི་ལུས་ལ་འཆང་ཞིང་། མ་ཧཱ་ཀཱ་ལ་ཁ་སྦྱོར་གྱི་བར་དུ་བསྒྲུབ་བྱ་འགུགས་དབང་མེད་པའི་སྙིང་གི་དཀྱིལ་དུ་གྲི་གུག་གི་འཁོར་ལོ་འཁོར་བས་སྲོག་རྩ་བཅད་ཅིང་། ནང་ཁྲོལ་ཐམས་ཅད་གཉོག་ནས་ཁྲག་གི་རྐྱལ་པ་ལྟར་གྱུར་པ་ལས། བཤང་གཅིའི་ལམ་གཉིས་ནས་སྙིང་ཁྲག་ཐམས་ཅད་ནག་པོ་ཆེན་པོ་གཉིས་ཀྱིས་དྲངས་ནས་འཐུང་བར་བསམ་ཞིང་། རྒྱུན་དུ་དམིགས་པ་དེ་དང་བཀུག་གཞུག་དང་སྔགས་བཟླས་སོ། །ཨོཾ་མ་ཧཱ་ཀཱ་ལ་ཡ། རག་ཏུ་ལྷུག་ལྷུག་ཤམ་རིག་ཏུ། མ་ཧཱ་ཀཱ་ལ་ཡ། ཨ་མུ་ཀ་མཱ་ར་ཡ། ཨ་པ་ར་བྷི་ཤ་ཧཱུཾ། ཞེས་དང་སྔགས་ཐུང་མཱ་རི་ཡའི་མཐའ་དང་ཤཱ་ས་ན་བཟླས་སོ། །ལིང་ག་ལ་བྲིས་པ་དེ་བཟླས་ཀྱང་རུང་བའོ། །དེ་ལྟར་ཞག་བདུན་བསྒྲུབས་ན་ངེས་པར་དགྲ་བོ་སྒྲོལ་བར་བཤད་ལ། རྒྱུན་བསྙེན་བྱེད་ན་ཕྱི་རྟགས་མ་བྱུང་བར་དུ་ཁུག་མ་བཅང་ཞིང་སྔགས་དང་
དམིགས་པ་བྱ། བསྐུལ་ཡང་བྱའོ། །ཡང་མནན་པ་བྱ་བ་ནི། བག་ཟན་ལིང་ག་འཁོར་ལོའི་བར་དུ་བཅུག་ལ་དྲིལ། རོ་སྐས་བཅིངས་ལ་དོམ་མམ་ཁྱི་ནག་ཐོད་པར་བཅུག་སྐུད་པ་དམར་ནག་གིས་བཅིངས། ཐོད་པ་ཁོག་ནག་པོའམ་སྨེ་བ་ཡོད་པའམ་ཐོད་ངན་གཉིས་ལ། དུར་ཁྲོད་ཀྱི་སོལ་བ་ཁྱི་ནག་སྙིང་ཁྲག་དུར་ཁྲོད་ཀྱི་སྣག་ཚ་བསྲེས་ལ་འཁོར་ལོ་སྐུ་སྤང་བ་གཉིས་བྲིས། དེ་གཉིས་ཁ་སྦྱར་ནང་དུ་ཁྱི་ཐོད་དོམ་ཐོད་བཅུག །ཕྱི་རོལ་དུ་ཚ་བ་གསུམ་བྱུག །གྲི་སྒྲས་རྒྱ་གྲམ་དུ་བཅིང་ཞིང་གོང་གི་བཅིངས་སྔགས་བཟླས་སོ། །དེ་ནས་དེ་མཆོད་རྟེན་ནག་པོའི་ནང་དུ་བཙུག་ནས་དུར་ཁྲོད་ཀྱི་མེ་ཐབ་ཏུ་མནན་ན་ཚ་བའི་ནད་ཀྱིས་འཆིའོ། །ཆུ་དོང་རྙིང་མའི་ནང་དུ་མནན་ན་རྒྱུན་འགགས་ནས་འཆི། དུར་ཁྲོད་ཁང་སྟོང་དུ་སྦས་ན་མཁའ་འགྲོ་མ་རྣམས་ཀྱིས་ཚོགས་འཁོར་བསྐོར་ནས། ཁྲག་སྐྱུགས་ཏེ་འཆི། མཆོད་རྟེན་ནམ་ལྷ་ཁང་གི་ཐེམ་འོག་ཏུ་མནན་ན་ཁ་ལྷུག་མིག་ལོང་གཞོགས་ཕྱེད་སྐམ་ནས་འཆིའོ། །ཡང་འཁོར་ལོ་གཉིས་ཀྱི་དབུས་སུ་བུག་པ་ཅུང་ཟད་བྱས་ནས་རླུང་ལ་བསྐོར་ན་ཡང་ལེགས་པར་མངོན་ཏེ། དེའི་མན་ངག་ཤེས་པར་བྱའོ། །འཁོར་ལོ་ལ་བརྟེན་པ་འདི་ལས་སྦྱོར་ཨྠྀི།
དྲག་པོའི་སྦྱིན་སྲེག་ནི་སྤྱི་ལྟར་ལས་སྙིང་པོ་ལ། དགྲ་བགེགས་མཱ་ར་ཡ་བཏགས་ཨྠྀི། གསང་བའི་སྦྱིན་སྲེག་གི་མན་ངག་རྫ་ས་ལ་ཐབ་མཐོ་གང་བྱ་སྟེ། ཏིལ་མར་བྱུག་ལ་བསྲེགས། ཚེར་མ་ཅན་ནམ་གསལ་ཤིང་གི་ཡམ་ཤིང་སོར་བཅུ་གཉིས་སམ་དྲུག་པ་བརྒྱ་རྩ་དང་། ཐོད་པ་དུམ་བུ་དྲུག་པར་དྲུག་གི་ནང་དུ་གཏོར་མ་བཤམས། དམིགས་བྱའི་ལིང་ག་བཀུག་གཞུག་ལྷ་དབྱེ་བྱས་ལ་ཚེར་མའི་མེ་ལ་དྲོས་པར་བསྲོ་ཞིང་ཐུགས་ཀའི་འོད་ཟེར་གྱིས་བཀུག་ལ་བསྟིམ། གྲི་གུག་རབ་བྱ་གཅན་གྱི་མགོ་ནས་རྐང་པའི་བར་དུ་ཏིལ་ཙམ་དུ་གཏུབ་ཅིང་སྔགས་འདི་དྲག་ཏུ་བརྗོད། ཨོཾ་མ་ཧཱ་ཀཱ་ལ་ཡ། ཨ་མུ་ཀ་ཏ་པ་ཏ་པ་ཧཱུཾ། དེ་ནས་རཾ་ལས་མེ་ཐབ་དབུས་སུ་ནག་པོ་ཆེན་པོ་ཞལ་གནམ་ས་ཙམ་གོདངས་བ་ནས། མེ་ལྕེ་སྣ་ཚོགས་པ་རེག་བྱ་རབ་ཏུ་ཚ་བ་དབྱིབས་གྲུ་གསུམ་དུ་འབར་བར་བསམ། བདག་གི་ཧཱུྃ་ལས་མགོན་པོའི་ཚོགས་གྲངས་མེད་པ་འཕྲོས་ནས་དམིགས་བྱ་རང་དབང་མེད་པར་བཀུག་ནས། རྐང་པ་གཉིས་ནས་བཟུང་སྟེ་དུག་གཏོར་ནང་སྤྲུགས་པས་ཉ་རོ་ཚོས་པ་ལྟར་ཤ་ཁྲག་ཉིལ་ལེ་སོང་། མགོན་པོའི་ཞལ་དུ་ཡང་དེ་ལྟར་སྤྲུགས་པར་བསམ། རང་ཉིད་རོའི་གདན་ལ་ནག་པོ་
ཆེན་པོ་དངོས་སུ་བསམ། མིག་ཟུར་གསུམ་དུ་བལྟ་ཞིང་སོ་བསྒྲིག་ཅིང་། རང་གི་ཐུགས་ཀའི་འོད་ཟེར་ནག་པོ་ལྕགས་ཀྱུ་ལྟ་བུ་དང་མགོན་པོའི་ཚོགས་ཀྱིས་བསྒྲུབ་བྱ་བཀུག་པར་དམིགས་ལ། མེ་ཐབ་ཀྱི་ནག་པོ་ཆེན་པོའི་ཞལ་དུ་དགྲ་བོ་དེ་དངོས་སུ་འཕང་བས། གཞོབ་བུན་བུན་སོང་བར་བསམ་ཞིང་། ༀ་མ་ཧཱ་ཀཱ་ལ་ཡ་ཧཱུྃ་ཧཱུྃ་ཕཊ། དགྲ་བགེགས་མཱ་ར་ཡ་ཕཊ་སྭཱ་ཧཱ། ཞེས་ལིང་ཆུང་དང་། ལིང་དུམ་བརྒྱ་རྩ་བརྒྱད་འབུལ་བདུན་བྱས་ན་དེ་མ་ཐག་ཏུ་སྒྲོལ་བར་ཐེ་ཚོམ་མེད་གསུངས་སོ། །སྤྱི་འདིའི་སྙིང་པོ་ནི་ཡི་གེ་བཅུ་གཉིས་པ་དང་། རྩ་སྔགས་ནི་ཤཱ་ས་ན་ཡིན་ནོ། སྤྱི༔ ཡང་ཕ་རོལ་པོ་འཇིག་རྟེན་པའི་ལྷ་དག་གིས་ནུས་པའི་སྟོབས་དང་ལྡན་ན། དེ་ལྷ་དང་ཕྲལ་ཏེ་སྟོབས་མེད་པར་བྱ་བ་ནི་བསྒྲུབ་བྱའི་རྐང་པ་གཡོན་པའི་ས་དང་། སྐེ་ཚེ་ཡུངས་ཀར་བཙན་དུག །ཡུགས་ས་མོའི་སྐྲ་ཤད་བག་ཟན་སྦྱར་ཏེ་ལིང་ག་སོར་བརྒྱད་བྱས་ལ་སྐེ་ལ་མིའི་སྟག་ཙ་དཀར་པོ་བཀོན། ཡང་རྡོ་དཀར་དང་མཆོད་པའི་ས་དང་སྤྲ་ཚིལ་ལ་ཁོའི་ལྷ་དེའི་གཟུགས་སོར་བརྒྱད་པའི་སྙིང་ཁར་ལྷ་དེ་རྣམས་ཀྱི་སྙིང་པོའམ་མིང་བཅུག །ལིང་ག་གཉིས་རྒྱབ་སྤྲད་བར་དུ་བར་སྣང་གི་ཤིང་ལོ་ལ། ༀ་མ་ཧཱ་ཀཱ་ལ། ཨཥྚ་དེ་བ་
ཏ། བཱི་དེ་ཤ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྲིས་ལ་གཞུག །དེ་ནི་མིའི་རྒྱུ་མས་དཀྲིས་ཏེ་རྐང་ལག་ལ་བཏགས་ནས། མཆོག་ཕུར་བཞི་ལ་བཏགས་ཏེ་བར་སྣང་ལ་བཞག་པར་བྱའོ། །བསྒྲུབ་བྱ་སྟེང་དང་ལྷ་འོག་ཏུ་ཡོད་པར་བྱས་ནས། དུག་དང་སྐེ་ཚེ་ལྡོང་རོས་གུ་གུལ་ནག་པོས་འོག་ནས་བདུག །སྐེ་ཚེ་ཡུངས་ཀར་བཙན་དུག་རྡོ་ནག་ཕྱེ་ཟངས་ལྕགས་རིན་པོ་ཆེའི་ཕྱེ་མས་སྙིང་ནས་བརྡོག་ཅིང་། བདག་ནག་པོ་ཆེན་པོའི་ང་རྒྱལ་གྱིས་སྔགས་དྲག་ཏུ་བཟླས་སོ། །ཨོཾ་མ་ཧཱ་ཀཱ་ལ་ཡ། སརྦ་དུན་ཙ་ད་ཧ་ད་ཧ་ཧཱུཾ། ཨ་མུ་ཀ་འབི་དེ་ཤ་ཡ་མཱ་ར་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ལྟར་ཞག་གསུམ་བྱས་ལ། དེ་ནས་ནག་པོ་ཆེན་པོའི་གྲི་གུག་སོ་སོར་ཕྱེ་ལ། ལྷའི་ལིང་ག་མནན་པ་བྱ། དགྲའི་ལིང་ག་སྦྱིན་སྲེག་བྱའོ། །དེས་ནི་ངེས་པར་ལྷ་དང་དབྱེ་ཞིང་ཁོའི་སྟོབས་ཉམས་པར་འགྱུར་རོ། ཨྠྀི། དེ་ལྟར་བསྙེན་སྒྲུབ་ལས་སྦྱོར་གྱིས་རིམ་པ་འདི་ནི་དྲག་པོའི་བརྟག་པ་དུར་ཁྲོད་ཆེན་པོའི་རྒྱུད་དང་། སྒྲུབ་ཐབས་རྒྱ་མཚོའི་རྒྱ་གཞུང་སོགས་དང་། མན་ངག་གི་ཡི་གེ་མང་ཞིག་དང་། རྒྱུ་སྟོན་རིན་པོ་ཆེ་དང་སངས་རྒྱས་དབོན་གྱིས་མཛད་པ་སོགས་ཀྱིས་རྗེས་སུ་འབྲངས་ནས་ཀརྨ་༧ ཨ་རཱ་གས་མགོན་ཆེན་འདི་ལ་འབྲེལ་པ་བཞག་ཕྱིར་བྲིས་པའོ། །འདི་ལ་འགལ་འཁྲུལ་
ཉེས་པ་གང་མཆིས་རྗེ་བཙུན་ནག་པོ་ཆེན་པོ་ཉིད་ལ་བཤགས་ཤིང་། དགེ་བས་བདག་དང་བདག་ལ་འབྲེལ་ཐོགས་ཐམས་ཅད། ཚེ་འདིར་བདུད་དགྲའི་བར་ཆད་ཞི་ནས། བར་དོར་བདེ་ཆེན་དག་པའི་ཞིང་དུ་མགོན་པོས་སྐྱེལ་མའི་ཕྱིར་ཡོངས་སུ་བསྔོའོ།། མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།