ཀུན་རྫོབ་བྱེ་མ་ལག་ཁྲིད།
ཀུན་རྫོབ་བྱེ་མ་ལག་ཁྲིད་བཞུགས་པའི་དབུ་ཕྱོགས་ལགས་སོ།
འཕགས་པ་འཇམ་དཔལ་ལ་ཕྱག་འཚལ་ལོ། །ས་དཔྱད་བྱེ་མ་ལག་ཁྲིད་ཅེས་བྱ་བ། །དང་པོ་ནམ་མཁའ་བར་སྣང་བརྟག་པ་ལ། གནམ་དབྱིབས་འཁོར་ལོ་རྩིབས་བརྒྱད་འདྲ་བའམ། །ཡང་ན་ཟླུམ་པོ་གྲུ་བཞི་ལ། །ཕྱོགས་མཚམས་ཆུང་ཞིང་རྒྱ་ཆེ་བ། །ཉི་ཟླའི་བགྲོད་ཐག་རིང་ན་བཟང་། །ཟླ་གམ་ནར་པོ་ཟུར་གསུམ་ངན། །བར་སྣང་གསལ་དང་དྭངས་པ་དང་། །བྱང་ཕྱོགས་ནམ་མཁའ་མི་མངོན་དང་། །ཤར་ལྷོ་ནུབ་གསུམ་གསལ་ན་བཟང་། །གཅན་གཟན་སོ་བསྣོལ་འདྲ་ན་ངན། །བུག་གམ་རལ་ན་ངན་པར་བཤད། །རི་རབ་འདུག་ལུགས་བརྟག་པ་ནི། །རི་
རབ་བསྡུ་ན་རྣམ་པ་ལྔ། །མཆོད་རྟེན་བུམ་པ་རྡོ་རྗེ་སོགས། །འདྲ་དཔེ་དངོས་གཟུགས་རྫ་ས་ཀྱི་རི། །ཁྱུང་འབྲུག་སེང་སྟག་གླང་ཆེན་སོགས། །སྲོག་ཆགས་འདྲ་བ་གཟུགས་ཀྱི་རི། །དེ་ལ་འགྲོ་ལུགས་རྣམ་བཞི་སྟེ། །འགྲོ་འདུག་ཉལ་དང་འགྲོས་འདྲ་བ། །དེ་རྣམས་གང་ཡང་མི་འདྲ་ན། །འཁྱོག་པའི་རི་ཞེས་བྱ་བ་ཡིན། །རྒྱལ་འབངས་མདུན་རྒྱབ་བརྟག་པ་ནི། །རྒྱལ་པོའི་རྟགས་སུ་ལ་ཐོད་ནི། །དབྱར་མི་ཞུ་བའི་གངས་ཤིག་དགོས། །བཙུན་མོའི་རྟགས་སུ་བྲང་རྒྱན་ནི། །དགུན་མི་བསྐམ་པའི་མཚོ་ཞིག་དགོས། །གདན་དང་ཐུ་བ་འདམ་གཅིག་གཅེས། །དེ་རྣམས་
མེད་ན་འབངས་ཀྱི་རི། །མདུན་རི་དགུ་བ་མདུན་ལ་གྱེས་པ་རྒྱབ། །ཐུ་བ་ཡོད་པ་མདུན་ལ་མེད་པ་རྒྱབ། །འབབ་ཆུ་ཡོད་པ་མདུན་ལ་མེད་པར་རྒྱབ། །མང་པོར་རྩེ་མོ་གར་གསལ་མདུན། །རི་རྒྱ་ཆེ་ཞིང་རྩེ་མོ་སྦོམ། །བྲག་ཆའི་སྐད་སྦོམ་ཕོ་ཡི་རི། །དེ་ལས་ལྡོག་པར་མོ་ཡི་རི། །དེ་ལྟར་ཀུན་ལ་ཤེས་པར་བྱ། །ཡོན་ཏན་ལྡན་པའི་ས་ལྔ་བསྟན་པ་ནི། །རི་
བཟང་རྩ་བ་ཆུ 
་ཡིས་བསྐོར། །གཡས་གཡོན་གཉིས་སུ་ཆུ་མིག་འབབ། །རྩེ་ལ་ན་བུན་རྒྱུན་མི་འཆད། །དམུ་ཐག་གནམ་དུ་འཐེན་པའི་ས། །བྲག་དཀར་རྩེ་ལ་གངས་དཀར་ཐོད། །རི་སྣ་ཐང་བསྐོར་ཐང་མཐའ་འཁྱིལ། །དབུ་ཞྭ་རྐང་ལྷམ་མཛེས་པའི་ས། །ལམ་དང་རིམ་པ་མང་པོ་བརྩེགས། །རི་ཆེན་གདན་ཐབས་བརྩིགས་པའི་སྟེང་། །མདུན་དུ་མཚོ་དང་མེ་ཏོག་རྒྱས། །རིན་ཆེན་མཎྜལ་ཚོམ་བུ་འམ། །ཡངས་མཐོ་མཚོ་ནང་དིལ་འབུར་མངོན། །གསང་ཤ་སྡེར་དུ་བཀོད་པའི་ས། །འདི་རྣམས་འཛོམས་པའི་ས་བརྟན་ནོ། ཚེ་རིང་ནད་མེད་མི་ནོར་འཕེལ། །བཙན་ཕྱུག་འཛོམས་པའི་ཡོན་ཏན་ཡོད། །བཟང་ཞིང་རག་པ་ལྔ་བསྟན་པ་ནི། །རྒྱབ་རི་རྩེ་འཛིན་དར་ལ་རག །རྩེ་མཐོ་རྒྱ་ཆེ་བཟང་བ་ཡིན། །ཚེ་རིང་དམུ་
ཐག་བཟང་ལ་རག །སྒང་རྒྱུད་མ་ཆད་འབྲེལ་ན་ བཟང་། །འཕེན་དམའ་ཤིང་དང་ཆུ ་ལ་རག །ལུང་པ་ ཆུ་འབབ་ཡངས་ན་བཟང ་། །མདུན་དུ་ ཆུ་མདུད་མང་ན་བཟང ་། །ཕྱུག་དང་དབུལ་ནི་ལེན་ལ་རག ། ཆུ་མང་ཞིག་རལ་མེད་ན་བཟང ་། །དཔའ་དར་སྲུང་བ་བཞི་ལ་རག །ཕྱོགས་བཞིར་ལྷ་བཞི་ཚང་ན་བཟང་། །གདབ་པའི་ས་ལྔ་བསྟན་པ་ནི། །ཚེ་རིང་སྲོག་བརྟན་བྲག་ལ་གདབ། །ལྷུན་སྟག་རྩེ་མོ་རྣོ་ན་བཟང་། །རྨང་པོ་འཕེན་འདོད་ཤིང་ལ་གདབ། །ནགས་ཚལ་རྒྱ་ཆེ་འཐུག་ན་བཟང་། །དབུལ་པོ་ཕྱུག་འདོད་ན་བར་གདབ། །རྒྱ་ཆེ་ཕོ་བ་བརྒྱང་འདྲ་བཟང་། །བརྟན་པར་འདོད་ན་ཐང་ལ་གདབ། །ཤས་འཐུག་འདེབས་མིག་འབུར་ན་ བཟང་། །སྲིད་ཀྱི་འཇོག་པོ་ཆུ ་ལ་རག །མདུན་འབབ་རྒྱུན་མི་ཆད་ན་བཟང་། །དུར་སའི་རྩེ་འཛིན་དམག་དཔོན་བདུན་བསྟན་པ་ནི། བྲག་དཀར་གངས་དཀར་རྩེ་རྣོ་བ། །ལྷ་ཡི་དམག་དཔོན་ཡིན་པས་བཟང་། །སྤང་རི་རྒྱ་ཆེ་ལྷུན་སྡུག་པ། །ཀླུ་ཡི་དམག་དཔོན་ཡིན་པས་བཟང་། །སྤང་རི་ཆེན་པོ་ལྷུན་ཆགས་དེ། །ཡུལ་པའི་དམག་དཔོན་ཡིན་པས་བཟང་། །གཡའ་རི་རྫ་རི་རྒྱ་ཆེ་དེ། །གཉན་གྱི་
དམག་དཔོན་ཡིན་པས་བཟང་། །བྲག་དམར་ཟུར་དང་རྩེ་རྣོ་བ། །བཙན་གྱི་དམག་དཔོན་ཡིན་པས་བཟང་། །ཁྲག་ནག་རྟ་སོ་མདུང་རྩེ་འདྲ། །བདུད་ཀྱི་དམག་དཔོན་ཡིན་པས་ངན། །ས་སྔོན་ས་སེར་གཡའ་མ་དང་། །ཀླུ་གཉན་ཡིན་པས་གདུག་པ་ཙམ། །བཟང་པོ་གདམས་ལ་ངན་པ་སྤང་། །གཅེས་པའི་ས་རྣམ་པ་བདུན་བརྟན་པ་ནི། །གངས་རི་བྲག་དཀར་རྒྱུན་རིང་ཞིང་། །ལྷུན་སྟུག་རྩེ་མོ་རྣོ་བ་དེ། །རྒྱལ་རིགས་གྲགས་པའི་ས་རུ་གཅེས། །གཡའ་རི་སྨུག་པོ་ལྷུན་ཆགས་དེ། །རྗེ་རིགས་བློན་པོའི་ས་རུ་གཅེས། །བྲག་བཟང་རི་བོ་རྩེ་རྒྱལ་དེ། །དཔལ་རྩལ་ཅན་གྱི་ས་རུ་གཅེས། །འབྲུ་ཡི་ཕུང་པོ་སྤུངས་འདྲ་དེ། །དགོན་པ་རྣམས་ཀྱི་ས་རུ་གཅེས། །ན་བ་རྒྱ་ཆེ་ཤས་ བཟང་བ། །ཕྱུག་པོ་ནོར་འདོད་ས་རུ་གཅེས། །མདུན་དུ་མགྱོགས་པའི་ཆུ ་འབབ་པ། །འཕེན་འདོད་སྲིད་ཀྱི་ས་རུ་གཅེས། ། ཆུ་མིག་ལུ་མ་འབབ་འདྲ་བ། །བུ་སྲིང་སྨན་གྱི་ས་རུ་གཅེས། །སྤྱིར་བཟང ་བའི་ས་རྣམ་པ་བདུན་བསྟན་པ་ནི། །ཕོ་ཡི་དུར་དང་མཁར་གྱི་ས། །མཐོ་ལ་རྔམ་པ་བཟང་བ་ཡིན། །མོ་ཡི་དུར་དང་ཁང་པའི་ས། །དམའ་བ་ཡིན་པས་བཟང་བ་ཡིན། །ཕྱག་རྩེ་སུམ་བརྩེགས་
གདན་ཐོག་དེ། །དགེ་བཤེས་རྒྱལ་རྒྱུད་ས་རུ་བཟང་། །མཆོད་རྟེན་པོ་ཏི་བརྩེགས་འདྲ་བ། །རབ་བྱུང་བཙུན་པའི་ས་རུ་བཟང་། །གཡུང་དྲུང་རྔ་ཤང་འདྲ་བའི་ས། །གཤིན་རབ་བོན་གྱི་ས་རུ་བཟང་། །མཐོ་ཞིང་འཕགས་པའི་ས་མིག་དེ། །ཚེ་རིང་བཀྲ་རྒན་ས་རུ་བཟང་། །རིམ་པ་བཞིན་དུ་ཚོགས་འདྲའི་སྨད། །དམའ་ལ་ཡངས་པའི་ས་མིག་དེ། །བུད་མེད་རྒྱས་པའི་ས་རུ་བཟང་། །ཚེ་རིང་བུ་མང་རིམ་པར་བསྟོད། །ཤི་ལུགས་བཟང་ངན་དག་ལའང་སྦྱར། །བཟང་པོ་བཟང་དུ་མི་ཐུབ་པའི་ས་བཅུ་བསྟན་པ་ནི། །རྒྱལ་མཚན་རྩེ་དང་གདུགས་ཀྱི་ཏོག །བུམ་པའི་ཁ་རྒྱུན་འདྲ་བ་གསུམ། །དགེ་བའི་བཤེས་གཉེན་མ་གཏོགས་པ། །བཙུན་པ་ཕལ་གྱིས་ཐུབ་པར་དཀའ། །རྒྱལ་པོའི་ཐུགས་དང་གླང་ཆེན་གཙུག །སེང་གེའི་གཡུ་རལ་རྣམ་གསུམ་དེ། །རྗེ་རིགས་ས་བདག་མ་གཏོགས་པ། །བློན་འབངས་ཕལ་གྱིས་ཐུབ་པར་དཀའ། །འབྲོང་རུ་དར་མའི་རྭ་བར་དང་། །བྱ་ཁྱུང་ནོར་བུ་རྨ་བྱའི་མདོངས། །ཆེ་བཙན་ལྡན་པ་མ་གཏོགས་པ། །སྐྱེ་བོ་ཕལ་གྱིས་ཐུབ་པར་དཀའ། །སྐྱ་ཁྲའི་གཤོག་སྟེང་སྟག་གི་འཛུམ། །གཅན་གཟན་གདུག་པའི་སྙིང་ག་
གསུམ། །དྲག་རྩལ་ལྡན་པ་མ་གཏོགས་པ། །སྐྱེ་བོ་ཕལ་གྱིས་ཐུབ་པར་དཀའ། །ཕྱག་རྩེ་རྩེ་གསུམ་བརྩེགས་གདན་ཁྲིའི་སྟེང་། །ཡོན་ཏན་ལྡན་པ་མ་གཏོགས་པ། །ཡོན་ཏན་མེད་པས་ཐུབ་པར་དཀའ། །མཐོ་ལ་ཡངས་པའི་ས་མིག་དེ། །ཚེ་རིང་བཀྲ་རྒན་མ་གཏོགས་པ། །གཞོན་པ་རྣམས་ཀྱིས་ཐུབ་པར་དཀའ། །སྤང་ཐང་ན་བ་རྒྱ་ཆེ་དེ། །ཕྱུག་པོ་ནོར་ལྡན་མ་གཏོགས་པ། །དབུལ་པོ་རྣམས་ཀྱིས་ཐུབ་པར་དཀའ། །ནགས་ཚལ་འཐུག་པོ་སྤང་ཐང་དེ། །འཕེན་པོ་བུ་མང་མ་གཏོགས་པ། །རྨང་པོ་རྣམས་ཀྱིས་ཐུབ་པར་དཀའ། །ས་བདག་ཀླུ་གཉན་བཟང་བའི་གནས། །མི་རྒྱུད་གཙང་མ་མ་གཏོགས་པ། །སྐྱོན་ཅན་རྣམས་ཀྱིས་ཐུབ་པར་དཀའ། །རི་ཞབས་ཐང་མཐའ་ཆུ་འགྲམ་དེ། །ཕོ་བྲན་རིགས་ངན་མ་གཏོགས་པ། །ཡ་རབ་རྣམས་ཀྱིས་ཐུབ་པར་དཀའ། །འཇོག་པོ་ཕོ་མོའི་རྟགས་བསྟན་པ་ནི། །རི་ཡི་ཕོ་མོ་རྩེ་མོས་འབྱེད། །རི་མགོ་སྦོམ་པ་ཕོ་ལ་ཕྲ་བ་མོ། །ཤིང་གི་ཕོ་མོའབྲས་བུས་འབྱེད། །འབྲས་བུ་ཡོད་པ་ཕོ་ལ་མེད་པ་མོ། །རྡོ་བྲག་ཕོ་མོ་ཟུར་གྱིས་འབྱེད། །ཟུར་ཅན་ཕོ་ལ་ཟུར་མེད་མོ། །ཆུ་ཡི་ཕོ་མོ་འབབ་འཁྱིལ་འབྱེད། །དྲག་འབབ་ཕོ་ལ་དལ་
འཁྱིལ་མོ། །ལམ་གྱི་ཕོ་མོ་ཁ་དབྲག་འབྱེད། །ལམ་གཅིག་ཕོ་ལ་ཁ་དབྲག་མོ། །ན་བའི་ཕོ་མོ་ཆུ་ཡིས་འབྱེད། །ཆུ་འགོ་ཉུང་བ་ཕོ་ལ་མང་བ་མོ། །ས་ཡི་ཕོ་མོ་འབུར་གཤོང་འབྱེད། །འབུར་བ་ཕོ་ལ་གཤོང་བ་མོ། །འདེབས་ཀྱི་ཕོ་མོ་གཡས་གཡོན་འབྱེད། །གཡས་འདེབས་ཕོ་ལ་གཡོན་འདེབས་མོ། །བྱིས་སྦ་ཕོ་མོ་འཇོག་སའི་ས་ལ་དཔྱད། ། ཆུ་འབབ་ཕོ་ལ་འཁྱིལ་བ་མོ། །ཤིང་གི་བཟང ་ངན་བསྟན་པ་ནི། །རྩེ་འཛིན་རྒྱབ་རི་གང་རུང་ལ། །ཤིང་སྐམ་གཅིག་སྐྱེས་བདུད་མདའ་ཡིན། །སྟོད་དུ་ཤིང་སྐམ་མགོ་ཟླུམ་ཡོད། །ཀླད་པའི་འཛེར་བུ་བྱ་བ་ཡིན། །གཡས་ཀྱི་ཤིང་སྐམ་མགོ་ལེབ་ནི། །ས་ཡི་དབྱག་པ་བྱ་བ་ཡིན། །གཡོན་གྱི་ཤིང་སྐམ་རྩེ་གུག་ནི། །ས་ལ་འཇོར་གྱིས་འབྲུ་ཞེས་བྱ། །ནུབ་ཀྱི་ཤིང་སྐམ་རྐང་གཅིག་ནི། །ལྷ་འདྲེའི་འདུག་ཕུད་སྡུད་པའོ། །ཞབས་ཀྱི་ཤིང་གཅིག་བརྟན་ཕུར་ཡིན། །ལེན་དང་མདུན་རིའི་ཤིང་སྤུན་ཡིན། །ནོར་གྱི་རུ་མ་ཡིན་པས་བཟང་། །སེ་བ་རྟ་ལ་ཉ་བྲིད་འབྲི། །སུ་རུ་ལུག་ལ་སྟག་མ་ར། །གླང་མ་སྤེན་མ་བ་གླང་ཡིན། །ཤིང་སྣ་མང་པོ་ཚོགས་པ་ནི། །ལོངས་སྤྱོད་ཕུན་སུམ་ཚོགས་པའི་བླ་གནས་
ཡིན། །ཤིང་མདའ་ཡོངས་སུ་ཤེས་པའི་དཔྱད་བྱའོ། །བཟང་ངན་བརྟག་ཐབས་བསྟན་པ་ནི། །མདུན་རྒྱབ་གངས་རི་བྲག་དཀར་ནི། །དགུ་བ་སེང་ཆེན་ཡིན་པར་དཔྱད། །དགྱེ་ན་རྒྱལ་པོ་ཡིན་པར་དཔྱད། །དེ་བཞིན་དགྱེ་དགུའི་བྱེ་བྲག་ནི། །སེར་པོ་སྟག་དང་བློན་པོར་དཔྱད། །དམར་པོ་འཕར་སྤྱང་དམག་མིར་དཔྱད། །ནག་པོ་དོམ་དྲེད་འབངས་སུ་དཔྱད། །སྟེང་གི་ཕ་ཝང་ལེབ་མོ་ནི། །སྤྱི་བོའི་རྡོ་ལེབ་བྱ་བ་ཡིན། །སྟེང་དུ་བྲག་ཐེམ་ཡོད་པ་ལ། །སྣ་གཉིས་མར་ལ་འགུགས་པ་ནི། །ས་མཁན་ལྟག་བདུད་ཡིན་པས་སྤང་། །གཡས་གཡོན་ཕ་ཝང་སྒོ་ཉལ་ཏེ། །འོག་གི་བྲེ་གུ་སྒོ་ཁྱིར་འདོད། །སྟེང་གི་འཇུ་ཐག་བཟུང་བ་དང་། །འོག་གི་བརྟན་ཕུར་ཀུན་ལ་སོགས། །བཟང་ངན་ནོར་ས་མང་བས་གཟབ། །ལམ་གྱི་བཟང་ངན་བསྟན་པ་ནི། །ཤར་གྱི་ལམ་དེ་གྲོགས་ལམ་ཡིན། །ལྷོ་ཡི་ལམ་དེ་དཔལ་གཡང་ཡིན། །ནུབ་ཀྱི་ལམ་དེ་གཤིན་ལམ་ཡིན། བྱང་གི་ལམ་དེ་དགྲ་ལམ་ཡིན།། སྟེང་ནས་ལམ་གྱིས་བཅད་པ་ནི། །ལྟག་པའི་གཉའ་ཤིང་བྱ་བ་ཡིན། །འོག་ཏུ་འཕྲད་ཟུག་ཕྱག་བརྩེགས་བཟང་། །གྱེན་ཐུར་ཟུག་དང་ཐད་དཀར་འགྲོ། །ལམ་སྣ་མང་པོ་ཟུག་པ་
ནི། །ཁ་ལྕེ་རྒྱུན་མི་འཆད་པ་ཡིན། །ལུང་པའི་བཟང་ངན་བསྟན་པ་ནི། སྟེང་གི་ལུང་སྐམ་འཚོང་མི་ཡིན། །འོག་ལུང་སྐམ་པོ་ཉོ་མི་ཡིན། གཡས་ཕྱོགས་ལུང་སྐམ་སྤུང་དབྱུག་ཡིན། །གཡོན་ཕྱོགས་ལུང་སྐམ་སྤྲང་སྐྱེ་ཡིན། །གོང་དུ་ལུང་སྐམ་ཕྲད་ཟུག་ཡོད། །མི་མཐོ་གཉའ་ནོན་བྱ་བ་ཡིན། །འོག་གི་ལུང་སྐམ་ཟབ་མོ་ནི། །མི་ནོར་དོང་དུ་ཤུལ་བ་ཡིན། །ལུང་པ་ཆུ་མེད་མང་པོ་ནི། །མི་རྒྱུད་དབུལ་པོར་འགྲོ་བ་ཡིན། །འོག་ཏུ་ཀོ་མོག་རི་སྤང་སོགས། །བུག་དང་རལ་བ་ཐམས་ཅད་ངན། །བཟང་པོ་རྒྱུན་མི་འཆད་པ་ལྔ་བསྟན་པ་ནི། །དཀྱིལ་འཁོར་མཆོད་རྟེན་ཁྲི་འཕང་དང་། །རྡོ་རྗེ་པོ་ཏི་འདྲ་བ་བཞི། །དགེ་བཤེས་བཙུན་པ་རྒྱུན་མི་འཆད། །གཡུ་དྲུང་གསས་མཁར་རྔ་ཤང་དང་། །རྒོད་གཤོག་བཙུགས་པ་འདྲ་བ་བཞི། །གཤེན་རབ་བོན་རྒྱུན་མི་འཆད་ས། །རི་ཡི་རྩེ་མོ་བྱུང་རྒྱལ་དང་། །རི་བྲན་མང་པོས་བསྐོར་བ་དེ། །ཞང་བློན་རྒྱུན་མི་འཆད་པའི་བརྡ། །བྲེ་གུ་སྟག་གཟིག་སྤྱང་ཐོད་འདྲ། །མདུང་དང་རལ་གྲི་འདྲ་བ་ནི། །དཔའ་བོ་རྒྱུན་མི་འཆད་པའི་ས། །གཡས་ཀྱི་ས་མགོས་གཡོན་སྐོར་མནན། །ཕ་སྤུན་ནང་དུ་རྒྱལ་བའི་ས། །དེ་
ལས་ལྡོག་ན་རང་ལ་ཕམ། །འབྲིང་པོ་རྒྱུན་མི་འཆད་པའི་ས་བསྟན་པ་ནི། །བྲེ་གུ་དཀར་ནག་མང་པོ་འདྲེས། །མགར་བ་རྒྱུན་མི་འཆད་པའི་ས། །ཕྱུར་བའི་དབུས་ན་ཆུ་གྲིའི་གཟུགས། །བཟོ་བོ་རྒྱུན་མི་འཆད་པའི་ས། །ས་རྡོ་རི་བྲག་མང་པོ་འདྲེས། །འཐབ་མཁོན་རྒྱུན་མི་འཆད་པའི་ས། །ཝ་སྐྱེས་ཕྱི་ལྟས་བྱས་འདྲ་དེ། །སྡར་མ་རྒྱུན་མི་འཆད་པའི་ས། །ས་བྲག་དམར་པོ་ཞིག་རལ་ཅན། །སྟེང་དུ་ལམ་འཕྲང་གྱ་གྱུའི་གཟུགས། །ཐོག་དང་སེར་བ་རྒྱུན་མི་འཆད། །ས་བྲག་དམར་རྩུབ་སལ་སུལ་མང་། །དགྲ་རྒོད་རྒྱུན་མི་འཆད་པའི་ས། །རི་རྡུམ་མགོ་མེད་རི་རྒྱུད་ཆད། །རབས་ཆད་རྒྱུན་མི་འཆད་པའི་ས། །སྤྲེལ་ཁྲིད་འཕྲུ་གཙུགས་འདྲ་བ་ནི། །དམེ་ཕོ་རྒྱུན་མི་ཆད་པའི་ས། །རྒྱབ་ཀྱི་དིལ་འབུར་མར་ཆད་ནི། །དྭ་ཕྲུག་རྒྱུན་མི་ཆད་པའི་ས། །བྲག་རི་མགོ་ཟླུམ་ཆུ་ལྐུག་མང་། །རྐུན་མ་རྒྱུན་མི་ཆད་པའི་ས། །ཕ་ཝང་དིལ་འབུལ་ཤིང་ཟུང་འགྲོགས། །མཚེ་མ་རྒྱུན་མི་འཆད་པའི་ས། །ས་ཆུ་དཀར་ནག་སྔོན་པོ་འདྲེས། །ནལ་མ་རྒྱུན་མི་ཆད་པའི་ས། །ཕ་ཝང་བྲེ་གུ་གང་རུང་མགོར། །ཆུ་བྲན་འབབ་རྒྱུད་མེད་པ་ནི། །མུག་ཕྲུག་རྒྱུན་མི་ཆད་པའི་ས། །
ས་རྡོ་སྐྱ་དཀྲེན་བྱེ་ཕྱག་ཅན། །བསེ་རག་རྒྱུན་མི་ཆད་པའི་ས། །འདེབས་སུ་མི་རུང་བའི་ས་བསྟན་པ་ནི། །རི་ཐང་གཉིས་ཀྱི་མཚམས་སུ་ཆགས། །ཉིན་སྲིབ་གཉིས་ཀྱི་མཚམས་སུ་ཆགས། །སྐམ་གཤེར་གཉིས་ཀྱི་མཚམས་སུ་ཆགས། །རི་རབ་ཆེན་པོའི་རྩེ་མོ་ཟད། །སྒང་རིང་པོ་ཡི་སྣ་ཁ་ཟད། །ཐང་ཆེན་ཡངས་པའི་དབུས་ན་ཟད། །གླ་བ་རྦབ་སྡོད་འདྲ་བ་དང་། །སྤྲེའུ་དམེསྡོད་འདྲ་བ་དང་། །ཡུགས་ས་ཁྱོ་སྡོད་འདྲ་བ་དང་། །དེ་རྣམས་བརྟེན་ན་བཀྲ་མི་ཤིས། །ས་ཡི་སྐེད་ཆད་རྣམ་པ་ལྔ་བསྟན་པ་ནི། །སྟེང་དུ་མཆོད་རྟེན་པུ་ཏིས་བསྐོར། །སྒང་རྒྱུད་རྐེད་པར་མཚོ་སྐམ་ཡོད། །ཆུ་སྐྱེད་ས་རྡོ་ཟམ་པས་བཅད། །རི་བྲག་རི་ཆེན་མ་སླེབ་དང་། །ཆུ་བྲན་ཆུ་ཆེན་མ་སླེབ་ལྔ། །བརྟེན་ན་སྐྱིད་ལ་སྐེད་ཆད་འོང་། །རྒྱུན་དུ་ཕུང་བའི་ས་ལྔ་བསྟན་པ་ནི། །ས་གཞི་སྣུམ་མེད་སྐྱ་ལ་བཀྲེན། །འབབ་ཆུ་མེད་ཅིང་ལུང་སྐམ་མང་། །རྩི་ཤིང་མི་སྐྱེ་བུག་རལ་མང་། །བལྟས་ཚེ་ས་མིག་མི་གསལ་བ། །ཡིད་དུ་མི་འོང་ས་རྣམས་སྤང་། །འཕྲལ་དུ་བར་ཆད་འོང་བའི་ས་ལྔ་བསྟན་པ་ནི། །མཐོ་ལ་གཉན་པའི་རི་རྩེ་དང་། །ཀླུ་གཉན་གནས་པ་མཚོ་འགྲམ་དང་། །ལྷ་
འདྲེ་གཏུམ་པོ་འདུ་བ་དང་། །ས་རྡོ་ནག་ཅན་ཆུ་མིག་ལོགས། །ས་རྡོ་ཤིང་གསུམ་མཚན་མ་ཅན། །སྐྱེ་བོ་ཡིན་ཡང་མ་བྱིན་སྤངས། །དུར་སའི་ས་མིག་བསྟན་པ་ནི། གོང་གི་དིལ་འབུལ་དེ་དང་ནི། །ཤིང་དཀོན་ཡུལ་གྱི་ཤིང་གཅིག་སྐྱེས། །རྡོ་དཀོན་ཡུལ་གྱི་ཕ་ཝང་དང་། །ལམ་དཀོན་ཡུལ་གྱི་ལམ་ཕྲན་དང་། །ལེན་ལ་རྩི་ཞིང་མང་གྲངས་བཟུང་། །ཐོག་མར་ཕོ་སྐྱེས་ནག་མོ་ནི། །འཇོག་པོ་ཕོ་མོ་དག་ལ་དཔྱད། །ཕོ་མོ་གང་ཡང་རིམ་པ་བཞིན། །འདྲེས་ན་མོ་ནི་སྐྱེ་བར་འགྱུར། །འབྱུང་བ་ལྔའི་ཁམས་ལྔའི་དུར་ས་བསྟན་པ་ནི། །ནགས་ཚལ་འཐུག་དང་ཤིང་སྤྱན་སྐྱེས། །ཤིང་ཁམས་པ་ཡི་བླ་རི་ཡིན། །ས་བྲག་དམར་པོ་རྩེ་མོ་རྣོ། །མེ་ཁམས་པ་ཡི་བླ་རི་ཡིན། །ས་སེར་གྲུ་བཞི་ལྷུན་ཆགས་རི། །ས་ཁམས་པ་ཡི་བླ་རི་ཡིན། །ས་བྲག་དཀར་པོ་རྫ་རི་ནི། །ལྕགས་ཁམས་པ་ཡི་བླ་རི་ཡིན། །མཚོ་དང་ཆུ་ཆེན་ཆུ་རི་སོགས། ། ཆུ་ཁམས་པ་ཡི་བླ་རི་ཡིན། །རང་རང་རི་ལ་དུར་བཏབ་ན། །དབང་ཐང་རི་ལ་བཟང ་བར་བཤད། །ས་ཡི་འདེབས་ལ་སྟག་ཡོས་ཤར་ལ་བཟང་། །ལྷོ་འབྲིང་ནུབ་ངན་བྱང་ནི་འབྲིང་སྟོད་ཡིན། །རྟ་སྦྲུལ་ལྷོ་བཟང་ཤར་འབྲིང་བྱང་ན་ངན། །བྱ་
སྤྲེལ་ནུབ་བཟང་ཤར་འབྲིང་ལྷོ་ལ་ངན། །བྱི་ཕག་བྱང་བཟང་ནུབ་ཤར་ལྷོ་གསུམ་འབྲིང་། །མཚམས་བཞི་ལྷོ་བཟང་ནུབ་བྱང་འབྲིང་ཤར་ངན། །མ་རིར་བཏབ་ན་ཚེ་རིང་འཕེལ། །བུ་རིར་བཏབ་ན་མི་གྲངས་འཕེལ། །གྲོགས་རིར་བཏབ་ན་ཟས་ནོར་འཕེལ། །དགྲ་རིར་བཏབ་ན་དགྲ་སྣ་མང་། །ཀུན་ལ་མ་བུ་དགྲ་གྲོགས་བརྩི། །ལོ་སྐོར་བཅུ་གཉིས་ཀྱི་དུར་ས་བསྟན་པ་ནི། སྟག་ཡོས་གཉིས་ཀྱི་ས་དགྲ་ནི། །ནུབ་ཕྱོགས་བྲག་དཀར་བྱ་སྤྲེལ་འདྲ། །རྟ་སྦྲུལ་གཉིས་ཀྱི་དགྲ་ས་ཡིན། །བྱང་ཕྱོགས་མཚོ་ཆུང་ཆུ་ཆེན་འབབ། །བྱ་སྤྲེལ་གཉིས་ཀྱི་ས་དགྲ་ནི། །ལྷོ་ཡི་ས་དམར་མེ་རི་འདྲ། །བྱི་ཕག་གཉིས་ཀྱི་ས་དགྲ་ནི། །ལྷོ་ནུབ་ཐང་ཆེན་གྲུ་བཞི་དང་། །མཚམས་བཞི་ལྷ་ཁང་མཆོད་རྟེན་ཡོད། །ཁྱི་འབྲུག་གླང་ལུག་ས་དགྲ་ནི། །ཤར་ཕྱོགས་ནགས་ཚལ་ཤིང་གཅིག་ཡོད། །དེར་བཏབ་ཉེས་སྐྱོན་སྣ་ཚོགས་འོང་། །ཤི་གསོན་གང་ཡང་རུང་བ་ཡི། །མ་བུ་དགྲ་གྲོགས་བརྩི་བར་ཤེས། །སྒྲོན་གྱི་བྱེ་བྲག་བཤད་པ་ནི། །གནམ་སྒྲོན་དཀར་ནག་གཉིས་ཡོད་དེ། །དཀར་པོ་གནམ་གྱི་མཆེ་འདྲ་དང་། །ནག་པོ་བུག་པ་སྐར་ཁུང་ཡིན། །ས་སྒྲོན་གད་པ་མདུང་རྩེ་ཅན། །
ཤིང་སྒྲོན་རླུང་གི་གཡབ་མོ་ཅན། །བྲག་སྒྲོན་ནམ་མཁའི་ཕུག་པ་ཅན། །རླུང་སྒྲོན་གོང་བུ་མདའ་ལྟོང་ཅན། །ཆུ་སྒྲོན་ཉི་མའི་སྲབ་མདའ་ཅན། །དེ་ལྟར་འབྱུང་བའི་དགྲ་རྣམས་དཔྱད། །སྤྱིར་ནི་གང་དུ་བྱུང་ན་ངན། །ཁྱད་པར་རང་ཕྱོགས་བྱུང་བ་ངན། །སྤྱིར་ནི་ས་མིག་བཙལ་ཐབས་བསྟན་པ་ནི། །རི་དང་ཐང་གཉིས་གང་རུང་ལ། །གཟར་བ་རྣམས་ཀྱི་བདེ་བ་དང་། །བདེ་བ་རྣམས་ཀྱི་གཟར་བ་དང་། །འཇམ་པ་རྣམས་ཀྱི་རྩུབ་པ་དང་། །རྩུབ་པ་རྣམས་ཀྱི་འཇམ་པ་དང་། །འབུར་བ་རྣམས་ཀྱི་གཤོང་བ་དང་། །གཤོང་བ་རྣམས་ཀྱི་འབུར་བ་དང་། །དེ་ལ་སོགས་པ་རིམ་པར་དཔྱད། །བྱེ་བྲག་ས་མིག་བསྟན་པ་ནི། །སྤང་ལུང་གཤོང་བའི་ནང་དུ་ནི། །མེ་ལོང་རྒྱབ་ལྟར་འབུར་བ་སྟེ། །ས་དབྱིབ་འབུར་བའི་སྟེང་དུ་ནི། །མེ་ལོང་དཀྱིལ་ལྟར་འཇམ་པ་དང་། །སྒང་རྒྱུད་རིང་པོར་མ་ཆད་པའི། །ཤིང་ནགས་འཐུག་པོའི་དཀྱིལ་དུ་ནི། །སྤང་འཇམ་ཕྱིང་པ་གཏིང་འདྲ་དང་། །བྲག་རི་མཐོན་པོའི་མདུན་རྒྱབ་ཏུ། །སྤང་གིས་གཡོགས་པའི་འབུར་གཤོང་དང་། །ཉིན་རི་ངོས་ལ་ཕྱིང་པ་ཙམ། །ཁ་བ་མི་འཇུ་སྲིབ་དང་འདྲ། །སྲིབ་རི་ངོས་ནས་ཕྱིང་པ་ཙམ། །ཉིན་ལྟས་ཁ་བ་
འཇུ་བ་དང་། །གཡའ་སྤང་མཚམས་སུ་ཕྱིང་པ་ཙམ། །རྩུབ་པའི་ནང་ན་འཇམ་པ་དང་། །སྤང་དང་ན་བའི་མཚམས་སུ་ནི། །གུར་ཕུབ་འདྲ་བའི་དིལ་འབུར་དང་། །མོ་བཙུན་འདྲ་བའི་ལྟེ་བ་རུ། །ཉལ་ས་ཙམ་གྱི་ས་བྱུང་ན། །ཐེ་ཚོམ་སྤངས་ལ་བཏབ་པར་བྱ། །ཕར་རི་ལེན་གྱི་དཔྱད་པ་ལ། །ཐལ་མོ་སྦྱར་འདྲའི་དཀྱིལ་གྱི་ལྟོ། །ས་དབྱིབས་ཟླུམ་འཐུག་ནེའུ་སིང་ཡོད། །ཆུ་མིག་མང་ཞིང་ཤིང་སྤུང་སྐྱེ། །བུག་རལ་མེད་ཅིང་འཇམ་ན་ བཟང་། །ལེན་གྱི་དབུས་ན་ཆུ ་བབས་པ། །ཆུ་ཆེན་ནང་སླེབས་བཙན་ཕྱུག་ལྡན། །མ་སླེབས་མྱ་ངན་ཆུ་ཞེས་བྱ། །ལེན་སྟོད་ཕ་ཁུ་རྒན་ལ་དབང་། །ལེན་སྨད་མ་སྲུ་བུ་ནོར་དབང་། །ལེན་གཡས་ཆུང་རྒྱུད་བུ་ཚར་དབང་། །ལེན་གཡོན་ཆུང་རྒྱུད་བུ་མོར་དབང་། །འདེབས་ལེན་བྱེ་བྲག་མ་ནོར་གཅེས། །མདུན་རི་མཐོ་ཞིང་དྲལ་བ་ངན། །དམའ་ཞིང་འདུད་པ་འདྲ་བ་བཟང་། །བཏུད་ཅིང་སྐྱོར་བ་འདྲ་ན་བཟང་། ༈ །ཆུང་དུར་གྱི་ས་དང་སྲི་དུར་གྱི་ས་བསྟན་པ་ནི། ཁྱད་པར་སྲི་བུའི་ཆུང་དུར་ནི། །འདེབས་ལེན་གཉིས་ཀ་འཇམ་ན་བཟང་། །རྩུབ་ཀྱང་ཕྱི་མ་སྐྱེས་ཀྱང་འཆི། །མཐུ་བ་ཤོར་དུ་མི་རུང་ངོ་། །ཇི་ལྟར་ཤི་
གྲངས་མང་བཞིན་དུ། །དེའི་གྲངས་གཉའ་གནོན་མང་བ་གཅེས། །གཉའ་གནོན་ཆེ་ན་ཕ་ལ་ངན། །མདུན་པང་འཇམ་ལ་བདེ་བ་སྟེ། །བུག་རལ་བྱུང་ན་མ་ལ་ངན། །ཆུ་ནི་གཡུ་འབྲུག་བུ་སྤུན་ལ། །རི་ནི་མ་པང་བུ་ཐོགས་དང་། །ཤིང་ནི་ཕོ་ཤིང་འབྲས་བུ་ཅན། །འབུར་ལ་ས་མིག་བསྟན་པ་ནི། །ས་རྡོ་དིལ་འབུར་རག་རུག་རྣམས། །བུ་རི་ཡིན་པས་བུ་ལ་ བཟང་། །ཕོ་དེ་ཞེས་བྱ་ཁྱེའུ་སྐྱེ། །ཆུ ་དང་རིང་དུ་མི་རུང་ངོ་། །འདོམ་པ་ལྔ་བཞི་ཉེ་བར་བཏབ། །ཡང་ན་གཉིས་གསུམ་གཅིག་ཏུ་བཏབ། །ཆུ་གཞུང་མ་འགྱངས་དམ་པ་གཅེས། །མདོར་ན་འདེབས་ལེན་འཇོག་པོ་དང་། །ཕོ་མོ་གང་ཡང་དེ་ལྟར་འགྱུར། ༈ །དུར་སའི་ཁ་དམར་བསྟན་པ་ནི། །རྩེ་འཛིན་མི་དམའ་མཐོ་བའི་ས། །གངས་བྲག་རྩེ་མོ་རྣོ་བ་བཟང་། །རྒྱབ་རི་རི་མགོ་མཐོ་དམའ་ལ། །རྒྱ་ཆེ་རྩེ་འཛིན་ལྷུན་སྟུག་བཟང་། །མཐོ་དམན་བུ་རྒྱུད་རྒན་རིམ་ལ། །མཐོ་ཞིང་འཐེན་པ་འདྲ་ན་བཟང་། །རྒྱལ་ཆེན་སྟག་ཆེན་བུ་རྒྱུད་ལ། །རི་རྒྱུད་རིང་དང་འཇམ་ན་ བཟང་། །ཡག་ཉེས་ཆུ ་རྒྱུད་དག་ལ་ནི། །ལམ་གྱིས་མ་བཅད་འཇམ་ན་བཟང་། །ཁྱེའུ་ཆུང་མོ་རྒྱུད་བུ་མོའི་ས། །དམ་ཞིང་བསྐྱིལ་ཕ་
འདྲ་ན་བཟང་། །ཕོ་ནི་ཁྲུས་ཆབ་ལེན་མི་གཉིས། །ཞིག་རལ་འཁྱམས་གསུམ་མེད་ན་བཟང་། །སྟེང་ཕྱོགས་བཀྲ་མཚུན་རྒན་རིམ་ས། །གཡས་ཕྱོགས་ཆེ་རྒྱུད་ཕ་ཡི་ས། །ལེན་གྱི་སྨད་ཀྱི་མཐུ་བ་ནི། །མདོར་བསྡུས་དབུས་ནི་རང་ས་ཡིན། །གཡོན་ཕྱོགས་བུ་སྲིང་མག་པའི་ས། །འོག་ཕྱོགས་མ་ཕྱི་བུ་ནོར་ས། །རང་སར་རྡོ་བ་ལྐོག་མར་ཡོད། །བུ་སར་ས་བྲག་ཞིག་རལ་སྤང་། །ཕ་ཡིས་བུ་བསད་ཅེས་ཀྱང་བྱ། །དེ་བཞིན་བུ་ཡིས་ཕ་ཡང་བསད། །མེས་པོས་ཚ་བོ་བསད་པ་དང་། །ཕུ་བོས་ནུ་བོ་བསད་པ་དང་། །སྐྱེས་པས་བུད་མེད་བསད་པ་དང་། །ཟུར་པོས་མནའ་མ་བསད་པ་དང་། །ཞང་པོས་ཚ་བོ་བསད་པ་དང་། །འཕགས་པས་སྐྱེས་པ་བསད་པ་དང་། །བྲན་གྱིས་རྗེ་བོ་བསད་པ་དང་། །གསོད་མའི་ས་རུ་རྡོ་རྒོད་འབྱུང་། །གསོད་པའི་ས་རུ་ཞིག་རལ་འབྱུང་། །རང་རང་དབང་བའི་ས་རུ་བསད། །སྐྱོན་རྣམས་གང་མཐོང་ཁ་མར་ཡིན། །སྔ་རྟགས་ཕྱི་རྟགས་ཀུན་ལ་སྦྱར། །ཞིབ་ཏུ་རྟགས་ན་མངོན་ཤེས་འཆར། །རིགས་པའི་མདའ་ཡིས་སྦྱར་བ་གཅེས། ༈ །ཁང་པ་འདེབས་པའི་ས་བསྟན་པ་ནི། །དང་པོ་བསླང་བ་ས་ཡི་ཆོ་ག་བྱ། །
ཚོགས་བསགས་གསུང་རབ་ཀློག་པ་དང་། །དབུས་སུ་བུམ་པར་ཀླུ་གཏོར་བཞག །དབྱངས་གསལ་རྟེན་འབྲེལ་སྣང་བརྒྱད་འདོན། །སྤེལ་ཚིག་མིང་དང་བཅས་པ་ནི། །རུས་སྦལ་གསེར་འཁོར་སྙིང་པོ་ལྔ། །རིན་ཆེན་འབྲུ་སྣ་དར་སྣ་གཞུག །མིང་གི་ཚིག་མཚམས་བརྒྱད་དུ་ཡང་། །བུམ་པར་རང་མདོག་སྙིང་པོ་ལྔ། །བཀྲ་ཤིས་རྫ་ས་བརྒྱད་དག་གིས་མཚན། །འབྱུང་བའི་ལྷ་མོའི་སྔགས་ཤམ་བུར། །སྤར་ཁའི་ཕྱག་རྒྱ་དང་བཅས་གཞུག །བྱིན་རླབས་རབ་གནས་བཀའ་བསྒོ་བྱ། །ཕྱོགས་ཀྱི་དགྲ་བཞི་བསྲུང་བ་དང་། །ལྷ་བཞི་དག་ཀྱང་བཞེངས་པར་བྱ། ༈ །དུར་ས་འདེབས་པའི་ཆོ་ག་བསྟན་པ་ནི། །རུས་པར་ཁྲུས་བྱ་དྲི་བཟང་འདེབས། །བགེགས་བསྐད་བྱས་ལ་བུམ་པར་བླུག །བླ་རྡོ་ཁམས་ལྔ་རིམ་པ་ལ་བཞིན། །འབྱུང་བ་ལྔ་ཡི་ཡིག་འབྲུ་དང་། །སྔགས་ལ་ཤམ་བུར་བཅས་པ་བྲི། །བླ་བྱང་ཤུག་པའི་བྱང་བུ་ལ། །ཉི་ཟླ་ཨཱ་ལི་ཀཱ་ལིས་མཚན། །ཕོ་མོ་གུར་གུམ་གི་ཝང་བྱུགས། །རང་མདོག་དར་དྲིལ་བུམ་པར་གཞུག །བླ་ཕུར་སྐྱེར་པའི་ཕུར་པ་ཡི། །རྩེ་མོར་མི་ཡི་མགོ་བོ་ཅན། །རང་ལོ་རང་སྔགས་ཁྲག་གིས་བྲི། །དེའི་ཕྱིར་པགས་པས་བཏུམ་ལ་བཞག་
བཙུན་པར་རྡོ་རྗེ་དྲིལ་བུ་དང་། །ཕོ་མོར་མདའ་གཞུ་བལུ་འཕང་དང་། །གཡས་གཡོན་འཚམས་པར་བཞག་ཤེས་བྱ། །ཁྱད་པར་སྙིང་གཏེར་གཞུག་འདོད་ན། །ཞོ་ཤའི་རྩ་སྦུབ་རཀྟ་བླུགས། །སྙིང་པོ་ཡི་གེ་བརྒྱ་པ་བྱ། །ཡང་སྙིང་བཀྲ་ཤིས་སྨོན་ལམ་བཏབ། །གཏོར་མ་ལྷ་མཆོད་བསང་མཆོད་བྱ། །རློན་མི་འཇིག་པའི་ཐབས་དང་ནི། །པ་ལྔ་ལོ་དང་བདུན་ཟུར་ལོར། །རྫས་སྔགས་བསག་པ་ཞལ་ལས་ཤེས། ༈ །དུར་སའི་དབྱེ་བ་བསྟན་པ་ནི། །ཡོན་ཏན་མཁན་དང་བཙུན་པ་དང་། །ཕྱུག་པོ་འཕེན་པོ་བཀྲ་རྒན་དང་། །བཀྲ་ཤིས་རོ་བུ་དུར་དུ་མཆོག །སྐྱེས་པ་རིགས་རྒྱུད་བཟང་བ་དང་། །དབུལ་པོ་ཞིམ་རྒྱ་ཆེ་བ་དང་། །རྨང་པོ་རབས་ཆད་དམན་པ་དང་། །གཞོན་ནུ་ལང་ཚོ་དར་བ་དང་། །གནས་སྐབས་དག་དང་སྦྱར་བར་བྱ། །བཞི་བཅུ་མན་ཆད་དར་སྲི་དང་། །རབས་ཆད་དམེ་ཕོ་མཛེ་དང་ཡུགས། །དབང་པོ་ཡན་ལག་མ་ཚང་དང་། །ལྕེབ་པ་ལ་སོགས་ཤི་ཡོ་ཐབས་ངན་པ་དང་། །དེ་རྣམས་ཀུན་ལ་གཉའ་ནོན་གཅེས། །ལམ་དང་བྲེ་གུ་གཉའ་གནོན་གསུམ། །གང་ལ་གང་དགོས་ཤེས་པར་བྱ། །གཉེན་གྱི་ཤེས་པས་མི་ལ་འདུད། །ཆས་
དང་མ་ཆས་བརྩི་བ་ནི། །གནམ་གྱི་བྱ་ཁྱུང་གཤོག་པ་བརྡབ་པ་ནི་ལྕགས་བྱི། །ས་འོག་དུར་ཕག་ཁྲ་བོ་མཁྱེན་པ་ནི་ས་ཕག །ར་གན་སྤྲེལ་སེར་པོ་གར་བྱེད་པ་ནི་ས་སྤྲེལ། །ཐང་སྦྲུལ་སྔོན་མོའི་ཞགས་པ་འདོར་བ་ཆུ་སྦྲུལ། །ཟངས་ཀྱི་གླང་དམར་པོའི་རྭ་བ་མེ་གླང་། །རྡོ་ལུག་གྲོ་མོ་མཁྱེན་པ་ནི་ལྕགས་ལུག །གཡུ་འབྲུག་སྔོན་མོའི་ཟེ་བ་གསེགས་པ་ནི་ཆུ་འབྲུག་གོ། གཏོ་འདི་བརྩི་ཐབས་དང་བསྟན་བཅོས་བསྟན་པ། །འདི་རྣམས་གནམ་ལོ་དང་ལོག་མིན་མ་གསུངས། གང་བྱུང་ཡང་དུར་སློང་བྱས་པའི། ཕ་ཚན་ཤི་ཁ་བྱེ་བའོ། གཏོ་ནི་གཤེད་བྱ་བ་དུར་སྤྲོ་བའོ། །དེ་མིན་ན་མཚན་བཅོས་བྱ། དུར་སྲི་མནན་དུར་ལོས་བྱ། ༈ །སྤྱིར་ལོ་སྐོར་བཅུ་གཉིས་ཀྱི་དཔྱད་དོན་ལ། སྟག་ཡོས་ལོ་པའི་ས་ཤེས་ན། །ནུབ་ཀྱི་བྲག་དམར་མཚོན་འདྲ་འཇིགས། །ཕྱིན་ཅི་ལོག་ཏུ་ཁ་བལྟས་ན། །དུར་གྱི་ནག་པོ་གཤེད་དུ་བརྫུས། །གསོན་ལ་དགྲ་ངོ་རྒྱུན་མི་འཆད། །རྟ་སྦྲུལ་ལོ་པའི་ས་ཤེས་ན། །བྱང་གི་ཆུ་ནག་རིང་རྣམས་སྤངས། །ཕྱིན་ཅི་ལོག་ཏུ་ཁ་བལྟས་ན། །ལོ་སྲི་ནག་པོ་གཤེད་དུ་བརྫུས། །མི་རྒྱུད་ཕ་ཚན་ཐམས་ཅད་ལ། །ཆུ་གྲི་གྲང་བའི་དམུ་ཆུ་ཡིན། །མི་རབས་བཅུ་གསུམ་རབ་
ཏུ་ཕུང་། །བྱ་སྤྲེལ་ལོ་པའི་ས་ཤེས་ན། །ལྷོ་ཕྱོགས་བྲག་དམར་གྲུ་གསུམ་འཇིགས། །ཕྱིན་ཅི་ལོག་ཏུ་ཁ་བལྟས་ན། །གྲི་བདུད་ངོ་དམར་བདུད་དུ་བབ། །ཕ་ཚན་གྲི་ཤི་རྒྱུན་མི་འཆད། །བྱི་ཕག་ལོ་པའི་ས་ཤེས་ན། །ལྷོ་ནུབ་ཐང་ཆེན་གྲུ་བཞི་འཇིགས། །ཕྱིན་ཅི་ལོག་ཏུ་ཁ་བལྟས་ན། །ས་བདུད་ནག་པོ་ཕུང་བྱེད་བདུད་དུ་བབ། །ཕ་ཚན་མི་བརྒྱུད་གཏན་ནས་བརླག །མཚམས་བཞི་ལོ་པའི་ས་ཤེས་ན། །ཤར་གྱི་ཤིང་ཕུར་རྒྱས་པར་འཇིགས། །ཕྱིན་ཅི་ལོག་ཏུ་ཁ་བལྟས་ན། །ཕུང་བྱེད་སྤྱན་དགུ་བདུད་དུ་བརྫུས། །ཕ་ཚན་མི་རྒྱུད་དམུག་རྒྱུད་ཕུང་། ༈ །ཕྱོགས་ཕྱོགས་དཔུང་ལ་འཐུག་ན་བཟང་། །བུ་སྲིང་བཟང་ལ་བསྐྱེད་པ་ཡིན། །ཤར་དཀར་ཉི་ཟླའི་བགྲོད་ཐག་རིང་། །ཚེ་རིང་སྐྱེས་མང་བཟང་བ་ཡིན། །ནུབ་ཕྱོགས་བདལ་ལ་འདན་པ་རྣམས། །ཕྱིས་ནས་ཤི་ཆད་མི་ཡོང་བཟང་། ལྷོ་ཕྱོགས་སྤྱང་བ་འདྲ་ན་བཟང་། །ནོར་གྱི་བླ་རུ་ཡིན་པས་བཟང་། །བྱང་ཕྱོགས་ཡོལ་བ་འདྲ་ན་བཟང་། །བྱང་གི་དགྲ་མདའ་ཆགས་པ་ཡིན།་་་།ཡང་ཐང་ཆེན་པོའི་དབུས་སུ་མི་བཏབ། རི་ཆེན་པོ་ཡི་སྣར་མི་བཏབ། །རི་ཐང་མཚམས་སུ་མི་བཏབ། སྐམ་གཤེར་མཚམས་སུ་མི་བཏབ། རི་ཡི་རྩེར་
མི་བཏབ། ཉིན་སྲིབ་མཚམས་སུ་མི་བཏབ། རི་མགོ་མེད་ལ་མི་བཏབ། རྒབ་ཆད་ལ་མི་བཏབ། དབུས་ཞལ་རི་རྐང་ཆད་ལ་མི་བཏབ། ས་ཆ་སྨད་རྒྱུག་འདྲ་བ་ལ་མི་བཏབ། སྦྲུལ་ནག་སྤྱང་མོ་འདུར་རྒྱུག་འདྲ་བ་ལ་མི་བཏབ། གདོང་སྣ་ལ་མི་བཏབ། མཐའ་གཞི་ཟུག་ས་ལ་མི་འདེབས། འདི་མཆན་ཡིན་པ་འདྲ། ༈ ད་ནི་སྒྲོན་ཆེན་ཉི་ཤུ་རྩ་ལྔའི་མན་ངག་འདི་ལྟར་བསྟན་པའོ། ཤར་ནས་སྤེལ་དཀར་དམག་ཤུད་སྒྲོན། །དམེ་གྲི་བྱུང་བའི་ས་གནད་ཡིན། །ལྷོ་ནས་དོམ་བུ་སྟན་འདུག་སྒྲོན། །སྨྱུག་གྲི་འབྱུང་བའི་ས་གནད་ཡིན། །ནུབ་ཕྱོགས་དུར་ལུང་མཚུན་རྐུན་སྒྲོན། །མཚུན་དུར་མཐོར་བའི་ས་གནད་ཡིན། །བྱང་ནས་ཤ་བ་གྲི་སྡོད་སྒྲོན། །དམེ་སའི་འབྱུང་བའི་ས་གནད་ཡིན། །བྱང་ཤར་བཙན་གྱི་བླ་རི་སྒྲོན། །བུད་མེད་གནང་ཆེན་ཤོར་བའི་ས་གནད་ཡིན། །ཤར་ལྷོ་ལམ་གྱི་སྣ་འདྲེན་སྒྲོན། །ཡམས་ནད་འབྱུང་བའི་ས་གནད་ཡིན། །ལྷོ་ནུབ་བདུད་ཀྱིས་ཉལ་བའི་སྒྲོན། །ཐོག་སྨྲས་འབྱུང་བའི་ས་གནད་ཡིན། །ནུབ་བྱང་ཆེ་བཙན་ལ་གདོང་སྒྲོན། །ཁ་མཆུ་འོང་བའི་ས་གནད་ཡིན། །དཀར་པོ་རི་ཝང་ཙམ་གྱི་སྒྲོན། །ནག་པོ་གཞུ་རྒྱུད་ཙམ་གྱི་སྒྲོན། །གནའ་མ་གནང་ཆེན་ཤོར་བའི་ས་གནད་ཡིན། །ནག་པོ་ཕྱི་བ་ཙམ་གྱི་སྒྲོན། །
བུ་ཚ་སྟག་ཤར་པ་ཡི་ས་གནད་ཡིན། །ནག་པོ་སྟག་པ་ཙམ་གྱི་སྒྲོན། །ཕྱུགས་བེའུ་ལུག་ཤི་བའི་ས་གནད་ཡིན། །གནམ་སྒྲོན་ས་ལ་མཆེ་བ་ཅན། །གཙོ་བོ་ཤི་བའི་ས་གནད་ཡིན། །གནམ་སྒྲོན་སྐར་མའི་སྐར་མདའ་འདྲ། །མདའ་གྲི་འབྱུང་བའི་ས་གནད་ཡིན། །གནམ་སྒྲོན་སྤྲིན་གྱི་ལྕགས་སྒྲོག་ཅན། །འགོག་གྲི་འབྱུང་བའི་ས་གནད་ཡིན། །གནམ་སྒྲོན་ཉི་ཟླའི་ཞགས་པ་ཅན། །འགགས་གྲི་འབྱུང་བའི་ས་གནད་ཡིན། །རི་སྒྲོན་ལ་བཙས་མཆེ་བ་ཅན། །བན་བོན་ཤི་བའི་ས་གནད་ཡིན། །རི་སྒྲོན་ཤིང་ནག་ཐོར་ཅོག་ཅན། །འདུན་ས་འཆོར་བའི་ས་གནད་ཡིན། །རི་སྒྲོན་བྲག་གི་མཚོན་ཆ་ཅན། །མཚོན་ཆ་རྒོད་པའི་ས་གནད་ཡིན། །བྲོག་སྒྲོན་སྟག་གི་མཆེ་བ་ཅན། །འོག་རྟ་ཤི་བའི་ས་གནད་ཡིན། །རི་སྒྲོན་ཤིང་གི་མཚོན་ཆ་ཅན། །མཚོན་ཆ་རྒོད་པའི་ས་གནད་ཡིན། །བྲག་སྒྲོན་ཤིང་ནགས་དམ་དམ་ཅན། །ནང་དམེ་འབྱུང་བའི་ས་གནད་ཡིན། །བྲག་སྒྲོན་ཤིང་ནག་ལམ་ལམ་ཅན། །ཐོབ་ཤོར་འོང་བའི་ས་གནད་ཡིན། །ཤིང་སྒྲོན་རླུང་གི་གཡབ་མོ་ཅན། །ཞགས་ཁར་ཤི་བའི་ས་གནད་ཡིན། །བྱང་ཕྱོགས་ཐང་ཤིང་གཅིག་པོ་དེ། །གཞོན་ནུ་
མདུང་ཆག་ཤི་བའི་ས་གནད་ཡིན། །ཤིང་སྐམ་མགོ་ཟླུམ་ལོ་མ་མེད། །ཕྱུགས་གཞོན་སྐམ་པའི་ས་གནད་ཡིན། །ལམ་སྒྲོན་མི་ཡི་ཞོག་པ་ཅན། །ཐོག་མི་འབྱུང་བའི་ས་གནད་ཡིན་།ཆུ་སྒྲོན་སྦྲ་བའི་ཁ་ཕྲུ་ཅན། །མོ་བཙུན་ཤི་བའི་ས་གནད་ཡིན། །ཆུ་སྒྲོན་ཉི་ཟེར་ཞགས་པ་ཅན། །མཚོན་ཆ་འཁྲུག་པའི་ས་གནད་ཡིན། །ས་འགབ་དེལ་འབུར་མགོ་མངོན་དེ། །གྲི་དུར་འདུས་པའི་ས་གནད་ཡིན། །ཐང་སྒྲོན་གད་པ་སྨིན་མ་ཅན། །བུད་མེད་སྦྲུམ་མ་ཤི་བའི་ས་གནད་ཡིན། །མདུན་གྱི་ཐང་སྟོང་བྱེ་རྡུབ་དེ། །ཁྱིམ་གཞི་སྟོང་བའི་ས་གནད་ཡིན། །ཞབས་ཀྱི་ཕ་ཝང་འཇིང་བསྣོལ་དེ། །ས་མཁན་འོག་རྟ་ཤི་བའི་ས་གནད་ཡིན། །སྦྲུལ་ནག་ཐུར་དུ་རྒྱུག་ལ་དུར་བཏབ་ན། །ས་མཁན་གྲོས་མི་འཆམས་པའི་ས་གནད་ཡིན། །ལྕགས་ཀྱི་བྲེ་སེ་འདྲ་ལ་དུར་བཏབ་ན། །ས་མཁན་གྲོས་མི་འཚམས་པའི་ས་གནད་ཡིན། །ས་ཕུག་སྟོང་པའི་ཞབས་ལ་ས་བཏབ་ན། །ས་མཁན་གྲོས་མི་འཆམས་པའི་ས་གནད་ཡིན། །སོག་པ་འདྲ་བའི་སྣེ་ལ་དུར་བཏབ་ན། །ས་མཁན་གྲོས་མི་འཆམས་པའི་ས་གནད་ཡིན། །གནམ་ནི་ལྷུང་བར་འདྲ་བ་ངེས་པར་ཞན། །བྲག་རལ་བ་དང་ཤིང་ནགས་
སྐམ་པ་དང་། །ཆུ་ཆད་པ་ནི་དམུ་ཐག་ཆད་པས་ངན། །ཉེ་ལོགས་ས་ནས་ལེན་གྱི་ཁ་གདངས་ངན། ༈ །ཡང་སའི་ཁ་བྲག་དཔྱད་པ་ལ། །ས་ལ་རྩེ་འཛིན་བཟང་ངན་ཁ་བྲག་སྟེ། དེ་བས་དང་སྐྱེས་ཁ་ཡང་བྲག །འདེབས་མིག་ བཟང་ན་ཁ་བྲག་སྟེ། ལྕགས་ས་ལ་བཏབ་པ་དང་། ཆུ ་གཤེད་བཞི་ལ་བཏབ་པ་དང་། མེ་བྱི་ཕག་ཆུ་ལ་བཏབ་པ་དང་། དེ་རྣམས་ལ་བཏབ་ན་ནད་འབྱུང་། ཡང་ལུས་ཀྱི་བྲག་ས་ཕྱི་བ་ནི། ཤིང་ཁམས་མེ་ལ་བཏབ་པ་དང་། མེ་ཁམས་ས་ལ་བཏབ་པ་དང་། ས་ཁམས་ལྕགས་ལ་བཏབ་པ་དང་། ལྕགས་ཁམས་ཆུ་ལ་བཏབ་པ་དང་། ཆུ་ཁམས་ཤིང་ལ་བཏབ་པ་དང་། དེ་རྣམས་ལ་བཏབ་ན་ནོར་འཁྱེར། རི་བདུན་ཟུར་དང་དགྲ་གཤེད་འདྲ་བའི་སྣར་མི་བཏབ། ལེན་ཡང་དེ་དང་འདྲ་བར་བྱོར། །དེ་འདེབས་ལ་དེ་བཟང་ཕྱོགས་ནི། །སྟག་ཡོས་ལོ་པ་ཤར་གྱི་རི་བོ་ཡི། །རྩེ་རྒྱལ་ཤིང་འཚེར་ བཟང་པོའི་གསེབ་ཏུ་བཏབ། ལ་ཉེ་བྱང་གི་ཆུ ་ལ་གཅེས་པ་དང་། །དགྲ་ནི་ནུབ་ཀྱི་བྲག་དཀར་པོ་ལ་འཇིགས། །རྟ་སྦྲུལ་ལོ་པ་ལྷོ་ཡི་ བཟང་ངོས་བཏབ། །ལ་ཉེ་ཤར་གྱི་ཤིང་ཚལ་གསེབ། །དགྲ་ནི་བྱང་གི་ཆུ ་ལ་འཇིགས། །བྱ་སྤྲེལ་ནུབ་ཀྱི་
བྲག་དཀར་དག་ལ་བཏབ། །ལ་ཉེ་ནགས་ཚལ་སྒང་རྒྱུད་ བཟང་པོར་གཅེས། །དགྲ་ནི་ལྷོ་ཡི་བྲག་དམར་པོ་ལ་འཇིགས། །བྱི་ཕག་ལོ་པ་བྱང་གི་ཆུ ་རྩར་བཏབ། །ལ་ཉེ་ནུབ་ཀྱི་བྲག་དཀར་པོ་ལ་གཅེས། །དགྲ་ལྷོ་ནུབ་མཚམས་ས་སྒང་སེར་དེར་འཇིགས། །མཚམས་བཞི་ལོ་པ་ཐང་ཆེན་དག་ལ་བཏབ། །ལ་ཉེ་ལྷོ་ཡི་བྲག་དམར་པོ་ལ་གཅེས། །དགྲ་ཤར་ཕྱོགས་ཀྱི་ཤིང་གིས་འཇིགས། །ཤིང་ཁམས་པ་ཐམས་ཅད་ཆུ་ལ་བཏབ། །མེ་ཁམས་པ་ཐམས་ཅད་ཤིང་ལ་བཏབ། །ས་ཁམས་པ་ཐམས་ཅད་མེ་ལ་བཏབ། །ཆུ་ཁམས་པ་ཐམས་ཅད་ལྕགས་ལ་བཏབ། །ལྕགས་ཁམས་པ་ཐམས་ཅད་ས་ལ་བཏབ། །ས་འདེབས་བྱེ་མ་ལག་ཁྲིད་འདི་ཚ་ཁང་རྒྱ་མཁར་ལྷ་ཐོ་གསེར་འབུམ་ཁང་པ་དུར་ས་ཀུན་ལ་འདི་ལས་ཟབ་པ་གཞན་ན་མེད། ས་སློང་བྱེ་མ་ལག་ཁྲིད་འདི་སྔགས་འཆང་མགོན་ནག་གིས་བསྐུལ་ཕྱིར། ༧ རཱ་ག་ཨ་སྱས་སྦྱར་བའོ། །ཉེས་འགལ་མཆིས་ན་དབང་ཆེན་ཡབ་ཡུམ་སྲས་དང་བཅས་ལ་བཤགས༔ དགེ་བས་འགྲོ་ཀུན་འཇམ་དཔལ་ས་ཐོབ་ཤོག །བཀྲ་ཤིས་དཔལ་འབར་འཛམ་གླིང་མཛེས་རྒྱན་ཤོག། །།