ཀོ་ལྤགས་ཀྱི་གཞི་འཆད་པ།
ཀོ་ལྤགས་ཀྱི་གཞིའི་སྡོམ་ལ། ལྔས་ནི་བསྙེན་པར་རྫོགས་པ་དང་། །གནས་མལ་ཆེ་དང་བེའུ་དང་ནི། །བཞོན་པ་ཁྲུས་དང་བ་ལང་འཇུག་ཤིང་ལྷམ་རི་མོ་ཅན་མིན་ནོ། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་རྡོ་ཅན་ཞེས་བྱ་བའི་ཡུལ་གྱི་མཐའ་ན་གནས་པ་ཞེས་བྱ་བའི་གྲོང་ན་ཁྱིམ་བདག་སྟོབས་ཀྱི་སྡེ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ཀྱང་བུ་ཕོ་ཡང་མེད། བུ་མོ་ཡང་མེད་ནས། ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་བདག་ལ་བུ་ཕོ་ཡང་མེད། བུ་མོ་ཡང་མེད་པས་ནོར་རྫས་འདི་རྙེད་བདག་གིས་ཁྱིམ་དུ་བསགས་ཀྱང་། བདག་ཤི་ནས་བདོག་པ་ཐམས་ཅད་བདག་ལ་བུ་མེད་དོ་ཞེས་ནས་རྒྱལ་པོས་དབང་བྱས་པར་འགྱུར་རོ་སྙམ་དུ་སེམས་ཁོང་དུ་ཆུད་ཅིང་འདུག་གོ །དེའི་མཛའ་བཤེས་དང་ཉེ་དུ་དང་གཉེན་རྣམས་ཀྱིས་སྨྲས་པ། ཁྱོད་ཅིའི་ཕྱིར་སེམས་ཁོང་དུ་ཆུད་
ལྷ་ལ་གསོལ་བ་བྱོས་ཤིག །ཁྱོད་ལ་བུ་ཡོད་པར་འགྱུར་རོ། །དེས་བསམས་པ། ལེགས་པ་ཞིག་སྨྲས་ཀྱིས། མ་ལ་བདག་གིས་བུའི་ཕྱིར་ལྷ་རྣམས་ལ་གསོལ་བ་བྱའོ་སྙམ་ནས་བུ་མེད་པ་དེ་བུ་མངོན་པར་འདོད་པའི་ཕྱིར་ཞི་བ་དང་། ཆུ་ལྷ་དང་། ལུས་ངན་དང་། བརྒྱ་བྱིན་དང་། ཚངས་པ་ལ་སོགས་པ་ལྷ་རྣམས་ལ་ཡང་གསོལ་བ་བྱེད་དེ། འདི་ལྟ་སྟེ་ཀུན་དགའ་ར་བའི་ལྷ་དང་། ནགས་ཚལ་གྱི་ལྷ་དང་། བཞི་མདོའ་ལྷ་དང་། སུམ་མདོའ་ལྷ་དང་། གཏོར་མ་ལེན་པའི་ལྷ་དང་། ལྷན་ཅིག་སྐྱེས་པ་དང་། ཆོས་མཐུན་པ་དང་། རྟག་པར་རྗེས་སུ་འབྲང་བའི་ལྷ་ལ་ཡང་གསོལ་བ་འདེབས་སོ། །འཇིག་རྟེན་ན་གང་དག་གསོལ་བ་འདེབས་པའི་རྒྱུ་ལས་བུ་ཕོ་དང་བུ་མོ་སྐྱེ་བར་འགྱུར་བའི་གཏམ་དེ་ལྟ་བུ་གྲགས་སྟེ། དེ་ནི་དེ་ལྟ་མ་ཡིན་ཏེ། གལ་ཏེ་དེ་ལྟར་འགྱུར་དུ་ཟིན་ན་རེ་རེ་ལ་ཡང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འོན་ཀྱང་གནས་གསུམ་པོ་དག་མངོན་དུ་གྱུར་པ་ལས་བུ་ཕོ་དང་བུ་མོ་སྐྱེ་བར་འགྱུར་ཏེ། གནས་གསུམ་གང་ཞེ་ན། འདི་ལྟར་ཕ་དང་མ་གཉིས་ཆགས་པར་གྱུར་ཅིང་འདུས་པ་དང་། མ་ཡང་རུང་ཞིང་ཟླ་མཚན་དང་ལྡན་པ་དང་། དྲི་ཟ་ཉེ་བར་གནས་པ་སྟེ། གནས་གསུམ་པོ་དེ་དག་མངོན་དུ་གྱུར་པ་ལས་བུ་ཕོ་དང་བུ་མོ་སྐྱེ་བར་འགྱུར་རོ། །དེ་དེ་ལྟར་གསོལ་བ་འདེབས་པ་ལྷུར་ལེན་ཅིང་འདུག་པ་ལས་སྲིད་པ་ཐ་མ་པའི་སེམས་ཅན་སྤྱོད་པ་ཚོལ་བ། ཐར་པའི་སྙིང་པོ་བཟུང་བ། མྱ་ངན་ལས་འདས་པ་ལ་མངོན་དུ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པ་པའི་འགྲོ་བ་ཐམས་ཅད་དུ་འཆི་འཕོ་དང་སྐྱེ་བ་དོན་དུ་མི་གཉེར་བ། ལུས་ཐ་མ་འཛིན་པ་ཞིག་ལྷའི་རིས་ཤི་གནས་ཤི་འཕོས་ནས་དེའི་ཆུང་མའི་རུམ་དུ་ཞུགས་སོ། །བུད་མེད་མཁས་པའི་རང་བཞིན་ཅན་ཁ་ཅིག་ལ་མ་འདྲེས་པའི་ཆོས་ལྔ་ཡོད་དོ། །ལྔ་གང་ཞེ་ན། སྐྱེས་པ་ཆགས་པ་ཤེས་ཤིང་ཆགས་པ་དང་བྲལ་བ་ཤེས་པ་དང་། དུས་ཤེས་ཤིང་ཟླ་མཚན་ཤེས་པ་དང་། མངལ་དུ་ཞུགས་པ་ཤེས་པ་དང་། གང་ལས་མངལ་དུ་ཞུགས་པ་དེ་
ཡང་ཤེས་པ་དང་། བུ་ཕོ་ཤེས་ཤིང་བུ་མོ་ཤེས་པའོ། །གལ་ཏེ་ཁྱེའུར་འགྱུར་ན་དཀུ་གཡས་པར་རྟེན་ཅིང་གནས་སོ། །གལ་ཏེ་བུ་མོར་འགྱུར་ན་དཀུ་གཡོན་པར་རྟེན་ཅིང་གནས་སོ། །དེ་ཡིད་དགའ་ཞིང་མགུ་ནས་ཁྱིམ་ཐབ་ལ་སྨྲས་པ། རྗེའི་སྲས་དགྱེས་པ་བསྐྱེད་དུ་གསོལ། བདག་ལ་སེམས་ཅན་ཞུགས་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་གནས་པ་ལས་ན་གདོན་མི་ཟ་བར་ཁྱེའུར་འགྱུར་རོ། །དེ་ཡང་དགའ་ཞིང་མགུ་བས་ཆེད་དུ་བརྗོད་པས་ཆེད་དུ་བརྗོད་པ། འདི་ལྟར་བདག་གིས་ཡུན་རིང་མོ་ཞིག་ནས་མངོན་པར་འདོད་པའི་བུའི་ངོ་མཐོང་བར་འགྱུར་གྱིས། བདག་དང་མཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང་། བདག་གི་བྱ་བ་དག་བྱེད་པ་དང་། གསོས་པས་ཕྱིར་གསོ་བ་དང་། བགོ་སྐལ་ལ་སྤྱོད་པ་དང་། བདག་གི་རིགས་ཀྱི་རྒྱུད་ཡུན་རིང་དུ་གནས་པར་སྒྲུབ་པ་དང་། བདག་ཅག་ཤི་ཞིང་དུས་ལ་བབ་པ་ན་ཉུང་ངུ་འམ་མང་པོ་ཡང་རུང་སྦྱིན་པ་དག་བྱིན་ཞིང་བསོད་ནམས་དག་བྱས་ནས་འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་བདག་ཅག་གཉིས་ཀྱི་མིང་ནས་བརྗོད་ཅིང་ཡོན་སྔོ་བ་བྱེད་པར་འགྱུར་རོ་ཞེས་སྨྲས་སོ། །དེ་ལ་སེམས་ཅན་ཞུགས་པར་ཤེས་ནས་གང་ཡང་མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟངས་ཀྱི་གཞིར་གྲང་བ་ན་གྲང་བའི་ཡོ་བྱད་དང་། དྲོ་བ་ན་དྲོ་བའི་ཡོ་བྱད་དང་། སྨན་པས་བཅས་པའི་ཟས་ཧ་ཅང་མི་ཁ་བ་དང་། ཧ་ཅང་མི་སྐྱུར་བ་དང་། ཧ་ཅང་ལན་ཚྭ་མི་ཆེ་བ་དང་། ཧ་ཅང་མི་མངར་བ་དང་། ཧ་ཅང་མི་ཚ་བ་དང་། ཧ་ཅང་མི་བསྐ་བ་དང་། ཁ་བ་དང་། སྐྱུར་བ་དང་། མངར་བ་དང་། ཚ་བ་དང་། བསྐ་བ་རྣམས་སྤངས་པའི་ཟས་དང་། སེ་མོ་དོ་དང་། དོ་ཤལ་དག་གིས་བརྒྱན་པའི་ལུས་ལྷའི་བུ་མོ་དགའ་ཚལ་ན་རྣམ་པར་སྤྱོད་པ་བཞིན་དུ་ཁྲི་ནས་ཁྲི་དང་། ཁྲིའུ་ནས་ཁྲིའུར་རྒྱུ་ཞིང་ཤོད་ཀྱི་ས་གཞིར་མི་འབབ་སྟེ། སྒྲ་ཡིད་དུ་མི་འོང་བ་ཅུང་ཟད་ཀྱང་མི་གྲག་པར་བྱས་སོ། །དེ་ཟླ་བ་བརྒྱད་དམ་དགུ་འདས་ནས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། པགས་པའི་
མདོག་གསེར་འདྲ་བ། མགོ་གདུགས་ལྟ་བུ་ལག་པ་རིང་བ། དཔྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ། རིན་པོ་ཆེས་སྤྲས་པའི་རྣ་ཆ་རྣ་བ་ལ་བཏགས་པའི་ཁྱེའུ་ཞིག་བཙས་སོ། །གནས་པ་ཞེས་བྱ་བའི་གྲོང་ན་རིན་པོ་ཆེ་དཔྱོད་པ་ཇི་སྙེད་ཅིག་གནས་པ་དེ་ཐམས་ཅད་ཁྱིམ་བདག་སྟོབས་ཀྱི་སྡེས་རིན་པོ་ཆེ་བརྟག་པའི་ཕྱིར་བཀུག་ནས་སྨྲས་པ། ཤེས་ལྡན་དག་རིན་པོ་ཆེ་རིན་ཐང་ཆོད་ཅིག །དེ་དག་གིས་སྨྲས་པ། རིན་པོ་ཆེའི་རིན་ཐང་གཅད་པར་མི་ནུས་སོ། །ཆོས་ཉིད་ཀྱིས་རིན་ཐང་གཅད་པར་མི་ནུས་པའི་རིན་པོ་ཆེ་གང་ཡིན་པ་དེ་ནི་བྱེ་བ་རི་བ་ཡིན་པས། དེ་དག་གིས་སྨྲས་པ། ཁྱིམ་བདག་རིན་པོ་ཆེ་འདི་ནི་བྱེ་བ་རིའོ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་སྟོན་རྒྱ་ཆེར་བྱས་ནས་མིང་འདོགས་པར་བྱེད་དེ། ཤེས་ལྡན་དག་ཁྱེའུའི་མིང་ཅིར་གདགས། གཉེན་དག་གིས་སྨྲས་པ། ཁྱེའུ་འདི་རིན་པོ་ཆེ་བྱེ་བ་རི་བས་སྤྲས་པའི་རྣ་ཆ་རྣ་བ་ལ་བཏགས་ཤིང་རྒྱུ་སྐར་གྲོ་བཞིན་ལ་བཙས་པས་ཁྱེའུའི་མིང་གྲོ་བཞིན་སྐྱེས་རྣ་བ་བྱེ་བ་རིར་གདགས་སོ་ཞེས་དེའི་མིང་གྲོ་བཞིན་སྐྱེས་རྣ་བ་བྱེ་བ་རིར་བཏགས་སོ། །གང་གི་ཉི་མ་ལ་གྲོ་བཞིན་སྐྱེས་རྣ་བ་བྱེ་བ་རི་བཙས་པ་དེའི་ཉི་མ་ལ་ཁྱིམ་བདག་སྟོགས་ཀྱི་སྡེའི་མངག་གཞུག་པའི་ཁྱེའུ་གཉིས་བཙས་ཏེ། དེས་གཅིག་གི་མིང་ནི་བྲན་ཞེས་བྱ་བར་བཏགས་སོ། །གཅིག་གི་མིང་ནི་སྐྱོང་བ་ཞེས་བྱ་བར་བཏགས་སོ། །གྲོ་བཞིན་སྐྱེས་རྣ་བ་བྱེ་བ་རི་མ་མ་བརྒྱད་ལ་རྗེས་སུ་གཏད་དེ། པང་ན་མཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ཏེ། མ་མ་བརྒྱད་ཀྱིས་དེ་འོ་མ་དང་། ཞོ་དང་། མར་སར་པ་དང་། ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་དེ། རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། རྩིས་དང་། གྲངས་དང་། ལག་
རྩིས་དང་། དབྱུང་བ་དང་། གཞུག་པ་དང་། གཞག་པ་དང་། ལེན་པ་དང་། གཞི་བརྟག་པ་དང་། རས་བརྟག་པ་དང་། རིན་པོ་ཆེ་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། བུད་མེད་བརྟག་པ་དང་། སྐྱེས་པ་བརྟག་པ་དང་། ཤིང་བརྟག་པ་ལ་ཉེ་བར་ཞུགས་ཏེ། དེ་བརྟག་པ་བརྒྱད་རྣམས་ལ་བྱང་ཞིང་འབྱེད་པ་དང་། ཀློག་པ་ལ་གཡེར་པོར་གྱུར་ཏོ། །དེའི་ཕས་འདུག་པའི་ཁང་པ་གསུམ་པོ་དགུན་གྱི་དང་། དཔྱིད་ཀྱི་དང་། དབྱར་གྱི་བརྩིགས་སོ། །སྐྱེད་མོས་ཚལ་གསུམ་པོ་དགུན་གྱི་དང་། དཔྱིད་ཀྱི་དང་། དབྱར་གྱི་བཙུགས་ནས་ཆུང་མ་གསུམ་པོ་ཆེན་མ་དང་། བར་མ་དང་། ཆུན་མ་ཉེ་བར་བཞག་ནས། དེ་སྟེང་གི་ཁང་བཟངས་ཀྱི་གཞིལ་སྐྱེས་པ་མེད་པར་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །ཁྱིམ་བདག་སྟོབས་ཀྱི་སྡེ་ནི་རྟག་ཏུ་ཞིང་ལས་ཀྱི་མཐའ་ལ་འབད་དོ། །དེས་ཕ་དེ་རྟག་པར་ཞིང་ལས་ཀྱི་མཐའ་ལ་འབད་པ་མཐོང་ནས་དེ་ལ་སྨྲས་པ། ཡབ་ཁྱོད་ཅིའི་ཕྱིར་རྟག་ཏུ་ཞིང་ལས་ཀྱི་མཐའ་ལ་འབད། དེས་སྨྲས་པ། བུ་ཁྱོད་ཇི་ལྟར་སྟེང་གི་ཁང་བཟངས་ཀྱི་གཞིན་སྐྱེས་བ་མེད་པར་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་བཞིན་དུ་ངས་ཀྱང་རྩེད་མོ་བྱས། དགའ་བར་བྱས། དགའ་མགུར་སྤྱད་ན་རིང་པོར་མི་ཐོགས་པར་བདག་ཅག་གི་ལོངས་སྤྱོད་འགྲིབས་ཤིང་ཡོངས་སུ་ཟད་པ་དང་གཏུགས་པར་འགྱུར་རོ། །དེས་སྨྲས་པ། ཡབ་གལ་ཏེ་དེ་ལྟ་ན་བདག་ཟོང་ཐོགས་ཏེ་ཡུལ་གྱི་མཐར་མཆིའོ། །བུ་རེ་ཞིག་ང་ལ་རིན་པོ་ཆེའི་རིགས་གལ་ཏེ་ཁྱོད་ཀྱིས་ཏིལ་དང་། འབྲས་དང་། རྒྱ་ཤུག་དང་། མོན་སྲན་བཞིན་དུ་རིན་པོ་ཆེ་ཡོངས་སུ་སྤྱད་ཀྱང་རིན་པོ་ཆེ་དག་ཡོངས་སུ་ཟད་པར་མི་འགྱུར་བ་ང་ལ་ཡོད་དོ། །དེས་ཡང་དང་ཡང་དུ་སྨྲས་པ། ཡབ་བདག་ནི་ཟོང་ཐོགས་ལ་ཡུལ་གྱི་མཐར་མཆིའོ། །དེས་དེ་ངེས་པར་གལ་གྱིས་འཆུ་བར་ཤེས་ནས་གནང་ངོ་། །
ཁྱིམ་བདག་སྟོབས་ཀྱི་སྡེས་གནས་པའི་གྲོང་དུ་དྲིལ་བསྒྲགས་ནས། གནས་པའི་གྲོང་ན་གནས་པའི་ཤེས་ལྡན་ཚོང་པ་དག་ཉོན་ཅིག །གྲོ་བཞིན་སྐྱེས་རྣ་བ་བྱེ་བ་རི་རྒྱ་མཚོ་ཆེན་པོར་འཇུག་པར་འགྱུར་གྱིས། ཤེས་ལྡན་ཁྱེད་ལས་གང་ཞིག་གྲོ་བཞིན་སྐྱེས་རྣ་བ་བྱེ་བ་རི་དང་ལྷན་ཅིག་ཤོ་གམ་མེད་པ་དང་། བསེལ་བའི་རྔན་པ་མི་དགོས་པ་དང་། གྲུ་བཙས་མི་དགོས་པར་རྒྱ་མཚོ་ཆེན་པོར་འཇུག་པར་སྤྲོ་བ་དེ་དག་རྒྱ་མཚོ་ཆེན་པོར་འགྲོ་བའི་ཟོང་སྡོགས་ཤིག །ཚོང་པ་ལྔ་བརྒྱས་རྒྱ་མཚོ་ཆེན་པོར་འཇུག་པའི་ཟོང་སྟ་གོན་བྱས་སོ། །ཁྱིམ་བདག་སྟོབས་ཀྱི་སྡེས་ཚོང་པ་ལྔ་བརྒྱ་པོ་རང་གི་ཁྱིམ་དུ་མགྲོན་དུ་བོས་ཏེ་ཟས་བྱིན་ནས་སྨྲས་པ། ཤེས་ལྡན་ཚོང་བ་དག་ཉོན་ཅིག །གྲོ་བཞིན་སྐྱེས་རྣ་བ་བྱེ་བ་རི་ཇི་ལྟར་བདག་གི་བུ་ཡིན་པ་དེ་བཞིན་དུ་ཁྱེད་ཀྱི་ཡང་ཡིན་གྱིས་འདི་ལ་ཁྱེད་རྣམས་ཀྱིས་གནོད་པ་སྤང་བར་བྱ་ཞིང་ཕན་པ་ལ་སྦྱར་བར་བྱའོ། །དཔོན་པོ་བཀའ་བཞིན་འཚལ་ཞེས་ཚོང་པ་རྣམས་ཀྱིས་ཁྱིམ་བདག་སྟོབས་ཀྱི་སྡེའི་ལྟར་མཉན་ཏོ། །དེ་ནས་ཁྱིམ་བདག་སྟོབས་ཀྱི་སྡེས་གྲོ་བཞིན་སྐྱེས་རྣ་བ་བྱེ་བ་རི་ལ་འདི་སྐད་ཅེས་སྨྲས་སོ། བུ་ཁྱོད་ཀྱིས་ཇི་ལྟར་ང་ལས་ཚིག་མཉན་པར་བྱ་ཞིང་བསྒྲུབ་པར་བྱ་བར་སེམས་པ་དེ་བཞིན་དུ་ཚོང་པ་ལྔ་བརྒྱ་པོ་འདི་རྣམས་ཀྱི་ཡང་མཉན་པར་བྱ་ཞིང་བསྒྲུབ་པར་སོམས་ཤིག །ཁྱིམ་བདག་སྟོབས་ཀྱི་སྡེས་བསམས་པ། གྲོ་བཞིན་སྐྱེས་རྣ་བ་བྱེ་བ་རི་བཞོན་པ་ཅི་འདྲ་བ་ཞིག་གིས་གཏང་སྙམ་མོ། །དེས་བསམས་པ། གལ་ཏེ་གླང་པོ་ཆེའི་བཞོན་པས་འགྲོ་ན་ནི་དེ་ཤིན་ཏུ་བསྐྱང་དཀའ་ཞིང་དགང་དཀའོ། །རྟ་ཡང་བསྐྱང་དཀའ་ལ་དགང་དཀའོ། །བོང་བུ་ནི་གསོ་སླ་ཞིང་དྲན་པ་དང་ལྡན་པས་བོང་བུའི་བཞོན་པས་བཏང་ངོ་སྙམ་ནས་དེས་དེ་ལ་སྨྲས་པ། བུ་གྲོགས་ཀྱི་ཐོག་མ་དང་ཐ་མ་ནས་མ་འགྲོ་ཞིག །གལ་ཏེ་ཆོམ་རྐུན་པ་མཐུ་དང་ལྡན་པར་གྱུར་ན་ནི་འགྲོན་པའི་ཐོག་མ་ནས་འཇོམས་སོ། །གལ་ཏེ་མཐུ་ཆུང་བར་གྱུར་ན་ནི་ཐ་མ་ནས་འཇོམས་ཀྱིས་ཁྱོད་ཚོང་པའི་དབུས་ནས་འགྲོ་བར་བྱ་སྟེ།
དེད་དཔོན་བཅོམ་པས་ནི་ཚོང་པ་རྣམས་བཅོམ་ཞེས་བྱའོ། །བྲན་དང་། སྐྱོང་བ་ལ་སྨྲས་པ། ཁྱེད་གཉིས་ཀྱིས་རྣམ་གྲངས་གང་གིས་ཀྱང་གྲོ་བཞིན་སྐྱེས་རྣ་བ་བྱེ་བ་རི་གཏང་བར་མི་བྱའོ། །དེ་ནས་དུས་གཞན་ཞིག་ན་གྲོ་བཞིན་སྐྱེས་རྣ་བ་བྱེ་བ་རི་དགེ་མཚན་དང་། བཀྲ་ཤིས་དང་། བདེ་ལེགས་སུ་འགྱུར་བ་དག་བྱས་ནས་མའི་གན་དུ་སོང་སྟེ། ཡུམ་བདག་མཆི་ཕྱག་འཚལ་ལོ། །དེས་དུ་བར་བརྩམས་པ་དང་། དེས་སྨྲས་པ། ཡུམ་ཅིའི་ཕྱིར་བཤུམས། བུ་ཁྱོད་གསོན་པོར་ཁོ་མོ་དང་ནམ་ཞིག་ཕྲད་སྙམ་མོད། དེས་བསམས་པ། བདག་བཀྲ་ཤིས་པར་བྱས་ཏེ། ཆས་པ་ལ་འདི་འདྲ་བའི་བཀྲ་མི་ཤིས་པ་སྨྲའོ་སྙམ་ནས་དེ་མི་བཟོད་པ་སྐྱེས་ཏེ་སྨྲས་པ། ངན་སོང་ལ་ཅིའི་ཕྱིར་མི་གཟིགས། དེས་སྨྲས་པ། བུ་ཁྱོད་ཀྱིས་དག་གི་ལས་རྩུབ་བོ་བྱུང་གིས་ཉེས་པ་ལ་ཉེས་པར་ཤོགས་ཤིག་དང་། དེས་ན་ལས་དེ་ཉིད་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ། །དེས་དེ་ལ་ཉེས་པ་ལ་ཉེས་པར་བཟོད་པར་གསོལ་ཏེ། །དེ་ནས་གྲོ་བཞིན་སྐྱེས་རྣ་བ་བྱེ་བ་རི་དགེ་མཚན་དང་། བཀྲ་ཤིས་དང་། བདེ་ལེགས་སུ་འགྱུར་བ་བྱས་ནས་ཤིང་རྟ་དང་། ཁུར་དང་། པང་ཚད་དང་། གཟེབ་རྣམས་དང་། རྔ་མོ་རྣམས་དང་། བ་ལང་དང་། བོར་བུ་རྣམས་ལ་ཟོང་མང་པོ་བཀལ་ནས་རྒྱ་མཚོ་ཆེན་པོར་ཆས་ཏེ། དེ་དག་རིམ་གྱིས་གྲོང་དང་། གྲོང་ཁྱེར་དང་། གྲོང་འདབ་དང་། ཚོང་དུས་རྣམས་རྒྱུ་ཞིང་རྒྱ་མཚོ་ཆེན་པོའི་འགྲམ་དུ་ཕྱིན་ནས། རྒྱ་མཚོའི་གྲུ་བོ་ཆེ་ཕུན་སུམ་ཚོགས་པ་ཞིག་བསྒྲུབས་ཏེ། ནོར་བསྒྲུབ་པའི་ཕྱིར་རྒྱ་མཚོ་ཆེན་པོར་ཞུགས་པ་དང་། དེ་རྗེས་སུ་མཐུན་པའི་རླུང་གིས་བདས་ཏེ་རིན་པོ་ཆེའི་གླིང་དུ་ཕྱིན་ཏོ། །དེས་དེར་བརྟགས་བརྟགས་ནས་རིན་པོ་ཆེ་རྣམས་ཀྱིས་གྲུ་བོ་ཆེ་དཔེར་ན་ཏི་ལ་ལམ། འབྲས་སམ། རྒྱ་ཤུག་གམ། མོན་སྲན་བཞིན་དུ་བཀང་ནས་དེ་རྗེས་སུ་མཐུན་པའི་རླུང་གིས་བདས་ཏེ་གྲུ་བོ་ཆེ་ཉེ་ཞོ་མེད་པར་འཛམ་བུའི་གླིང་དུ་ཕྱིན་ནས་ཚོང་པ་དེ་དག་རྒྱ་མཚོའི་
འགྲམ་དེ་ཉིད་དུ་འབྲང་བཏབ་བོ། །དེས་ཀྱང་བྲན་དང་སྐྱོང་བ་ཁྲིད་དེ། ཕྱོགས་གཅིག་ཏུ་དོང་ནས་འདུ་བ་དང་འགོད་པའི་རྩིས་བྱ་བར་བརྩམས་སོ། །ཕྱི་ཞིག་ནས་དེས་བྲན་ལ་སྨྲས་པ། བྲན་ཚོང་པ་རྣམས་ཅི་དག་བྱེད་ལྟོས་ཤིག །དེ་དེར་སོང་ན་ཅི་ཙམ་ན་ཚོང་པ་རྣམས་གཉིད་ལོག་པ་མཐོང་ནས། དེ་ཡང་དེ་ཉིད་དུ་ཉལ་ལོ། །བྲན་རིང་ཞིག་ཐོགས་ནས་དེས་སྐྱོང་བ་ལ་སྨྲས་པ། སྐྱོང་བ་ཚོང་པ་རྣམས་ཅི་དག་བྱེད་པ་ལྟོས་ཤིག །དེས་དེར་སོང་ན་ཇི་ཙམ་ན་ཚོང་པ་རྣམས་ཁལ་འགེལ་བ་མཐོང་ནས་དེས་ཀྱང་ཁལ་དགལ་བར་བརྩམས་སོ། །བྲན་གྱིས་བསམས་པ། སྐྱོང་བས་དེད་དཔོན་སྤྲན་གྲང་སྙམ་མོ། །སྐྱོང་བས་བསམས་པ། བྲན་གྱིས་དེད་དཔོན་སྤྲན་གྲང་སྙམ་མོ། །ཚོང་པ་དེ་དག་ནི་ཁལ་བཀལ་ནས་དོང་ངོ་། །གྲོ་བཞིན་སྐྱེས་རྣ་བ་བྱེ་བ་རི་བ་ནི་གཉིད་ཀྱིས་མྱོས་ནས་ཉལ་ལོ། །ཚོང་པ་དེ་རྣམས་དོང་བ་ལས་ཅི་ཙམ་ན་ནམ་ནངས་ནས་དེ་དག་གིས་སྨྲས་པ། ཤེས་ལྡན་དག་དེད་དཔོན་ག་རེ། དེད་དཔོན་སྔར་སོང་ངོ་། །སྔོན་དུ་སོང་ནས་དེད་དཔོན་ག་རེ་ཞེས་དྲིས་པ་དང་མཇུག་ནས་འོང་ངོ་། །མཇུག་ཏུ་སོང་སྟེ་དེད་དཔོན་ག་རེ་ཞེས་དྲིས་པ་དང་བར་ནས་སོང་ངོ་། །བར་དུ་སོང་སྟེ་དྲིས་པ་ལས་གང་ན་ཡང་མི་སྣང་ནས། བྲན་གྱིས་སྨྲས་པ། བདག་གི་བློ་སྐྱེས་པ་སྐྱོང་བས་དེད་དཔོན་སྤྲན་གྲང་སྙམ་མོ། །སྐྱོང་བས་སྨྲས་པ། བདག་གི་བློ་སྐྱེས་པ། བྲན་གྱིས་དེད་དཔོན་སྤྲན་གྲང་སྙམ་མོ། །ཤེས་ལྡན་དག་གང་ཡང་བདག་ཅག་གིས་དེད་དཔོན་བོར་ནས་དོང་བས་ནི་བཟང་པོ་མ་ཡིན་གྱིས་ཕྱིར་འདོང་གིས་ཚུར་ཤེག །དེ་དག་གིས་སྨྲས་པ། ཤེས་ལྡན་དག་གལ་ཏེ་བདག་ཅག་ཕྱིར་ལོག་ན་ཐམས་ཅད་ཚུལ་མ་ཡིན་པས་སྡུག་བསྔལ་བར་འགྱུར་གྱིས་ཚུར་ཤེག །རེ་ཞིག་ནང་ཁྲིམས་ཤིག་བཅའ་བར་བྱ་སྟེ། གང་ཡང་བདག་ཅག་གི་རྫས་རྣམས་མ་བྲུབས་ཀྱི་བར་དུ་རེ་ཞིག་སུས་ཀྱང་གྲོ་བཞིན་སྐྱེས་རྣ་བ་བྱེ་བ་རིའི་ཕ་མ་ལ་གཏམ་བསྙད་པར་
མི་བྱའོ་ཞེས་དེ་རྣམས་ཀྱིས་ནང་ཁྲིམས་སུ་བཅའ་བ་དག་བྱས་ནས་དོང་ངོ་། །གྲོ་བཞིན་སྐྱེས་རྣ་བ་བྱེ་བ་རི་བའི་ཕ་མས་གྲོ་བཞིན་སྐྱེས་རྣ་བ་བྱེ་བ་རི་འོངས་སོ་ཞེས་ཐོས་ནས་དེ་གཉིས་བསུར་དོང་ནས། དེད་དཔོན་ག་རེ་སྔར་སོང་ངོ་། །དེ་གཉིས་སྔོན་དུ་སོང་ནས་དེད་དཔོན་ག་རེ་ཞེས་དྲིས་པ་དང་མཇུག་ནས་འོང་ངོ་། །མཇུག་ཏུ་དོང་ནས་དེད་དཔོན་ག་རེ་ཞེས་དྲིས་པ་དང་བར་ནས་སོང་ངོ་ཞེས་རྫས་རྣམས་བྲུབས་ཀྱི་བར་དུ་མགོ་རྨོངས་སུ་བཅུག་ནས། དེའི་འོག་ཏུ་སྨྲས་པ། ཡབ་ཡུམ་བདག་ཅག་གིས་དེད་དཔོན་བརྗེད་དོ། །དེ་གཉིས་ཀྱི་དྲུང་དུ་གཅིག་ཅིག་འོངས་ནས་ཡབ་ཡུམ་གྲོ་བཞིན་སྐྱེས་རྣ་བ་བྱེ་བ་རི་མཆིས་སོ་ཞེས་སྨྲས་པ་དང་། དེ་དག་གིས་དེ་ལ་རྔན་པ་བྱིན་ནས་བསུར་དོང་ནས་མ་མཐོང་ངོ་། །ཡང་གཞན་ཞིག་འོངས་ནས་ཡབ་ཡུམ་གྲོ་བཞིན་སྐྱེས་རྣ་བ་བྱེ་བ་རི་མཆིས་སོ་ཞེས་སྨྲས་པ་དང་། དེ་དག་གིས་དེ་ལ་རྔན་པ་བྱིན་ནས་བསུར་དོང་ན་ཅིང་མ་མཐོང་སྟེ། དེ་ལྟར་སུ་ལ་ཡང་ཡིད་མི་ཆེས་སོ། །དེ་གཉིས་ཀྱིས་སྐྱེད་མོས་ཚལ་དང་། ལྷ་ཁང་དང་། འདུན་ཁང་རྣམས་སུ་གདུགས་དང་། དྲིལ་བུ་དང་། རྔ་ཡབ་རྣམས་ཕུལ་ནས་གལ་ཏེ་གྲོ་བཞིན་སྐྱེས་རྣ་བ་བྱེ་བ་རི་གསོན་པར་གྱུར་ན་མྱུར་དུ་འོང་བ་དང་། ལ་གོར་འོང་བར་གྱུར་ཅིག །གལ་ཏེ་དུས་ལས་འདས་ཏེ་ཤི་འཕོས་པར་གྱུར་ན་འགྲོ་བའི་གནས་གནས་ཁྱད་པར་ཅན་དུ་སྐྱེ་བར་གྱུར་ཅིག་ཅེས་ཡི་གེར་བྲིས་སོ། །དེ་གཉིས་ནི་མྱ་ངན་དང་དུད་མོས་ལོང་བར་གྱུར་ཏོ། །དེ་ཡང་ཉི་མ་འཆར་ཀའི་ཚེ་ཉི་མའི་ཟེར་གྱིས་ཕོག་ནས་སང་ན་དེ་ན་བོང་བུ་གཉིས་འདུག་པ་མ་གཏོགས་པར་ཚོང་པ་གང་ཡང་མ་མཐོང་ངོ་། །དེས་དེ་གཉིས་སྦྲེལ་ཏེ་དེད་དེ་སོང་བ་ན་རླུང་ལངས་པས་ལམ་བྱེམས་ཡོག་པ་བོང་བུ་དྲན་པ་དང་ལྡན་པས་ལམ་སྣས་སྣོམ་ཞིང་དལ་གྱིས་སོང་བ་དང་། དེས་ལྕག་གཟེར་བུ་ཅན་གྱིས་གཞུས་ཤིང་དེད་པ་ལས་དེ་གཉིས་ཀྱི་དྲན་པ་འཁྲུགས་ནས་ཤིང་སཱ་ལའི་དགོན་པ་ཞིག་ཏུ་ཕྱིན་ཏོ། །དེ་གཉིས་སྐོམ་པས་སྲོ་ཤི་ཞིང་ལྕེ་ཕྱུང་སྟེ་ཕན་ཚུན་འཐོམ་པ་དེས་མཐོང་ནས་
སྙིང་རྗེ་སྐྱེས་ཏེ། དེས་བསམས་པ། གལ་ཏེ་བདག་གིས་མ་བཞག་ན་འདི་དང་ལྷན་ཅིག་ཏུ་ཚུལ་མ་ཡིན་པས་སྡུག་བསྔལ་བར་འགྱུར་རོ་སྙམ་ནས་དེས་དེ་གཉིས་བོར་ཏེ་རྐང་པས་སོང་བ་ལས། དེས་ཇི་ཙམ་ན་ལྕགས་ཀྱི་གྲོང་བྱེར་མཐོ་ཞིང་རྒྱ་ཆེ་བ་དེའི་སྒོ་ན་སྐྱེས་བུ་གནག་ལ་ཆེ་བ། མིག་དམར་བ། བྱིན་སྙིང་རློ་བ་ལག་ན་དབྱུག་པ་ཐོགས་པ་ཞིག་འདུག་པ་མཐོང་ནས། དེ་དེའི་དྲུང་དུ་སོང་སྟེ། ཀྱེ་ནང་རྗེ་འདི་ན་ཆུ་ཡོད་དམ། དེ་ཡང་ཅང་མི་སྨྲ་བར་འདུག་གོ །དེས་ཡང་དྲིས་པ། ཀྱེ་ནང་རྗེ་འདི་ན་ཆུ་ཡོད་དམ། འོན་ཀྱང་དེ་ཡང་མི་སྨྲ་བར་འདུག་གོ །དེས་དེར་ཞུགས་ཏེ་ཆུ་ཆུ་ཞེས་བྱ་བའི་སྒྲ་ཕྱུང་བ་དང་ཡི་དགས་ལུས་སྡོང་དུམ་ཚིག་པ་འདྲ་བ། རུས་གོང་བསྒྲེང་བ་ལྟ་བུ་རང་གི་སྤུ་དང་སྐྲས་ཡོག་པ། ལྟོ་རི་སུལ་ལྟར་འདུག་པ། ཁབ་ཀྱི་མིག་ཙམ་གྱི་ཁ་ཡོད་པ་བརྒྱ་སྟོང་དུ་མས་ཡོངས་སུ་བསྐོར་ནས་གྲོ་བཞིན་སྐྱེས་སྙིང་རྗེ་དང་ལྡན་པ་ཁྱོད་ཀྱིས་བདག་ཅག་སྐོམ་པ་ལ་ཆུ་ལུད་ཅིག །དེས་སྨྲས་པ། ཤེས་ལྡན་དག་བདག་ཀྱང་ཆུ་སློང་ན་བདག་གིས་ཆུ་བླུད་དུ་ག་ལ་ཡོད། དེ་དག་གིས་སྨྲས་པ། གྲོ་བཞིན་སྐྱེས་ཡི་དགས་ཀྱི་གྲོང་ཁྱེར་འདི་ན་ཆུ་ག་ལ་ཡོད། བདག་ཅག་གིས་ལོ་བཅུ་གཉིས་ཀྱི་བར་དུ་ཆུ་ཆུ་ཞེས་བྱ་བའི་མིང་དེང་ཐོས་སོ། །ཤེས་ལྡན་དག་ཁྱེད་ཅག་སུ་ཞིག་ལས་གང་གིས་འདིར་སྐྱེས། གྲོ་བཞིན་སྐྱེས་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཡིད་མི་ཆེས་སོ། །ཤེས་ལྡན་དག་བདག་གིས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་པར་འགྱུར། དེ་དག་གིས་ཚིགས་སུ་བཅད་དེ་སྨྲས་པ། བདག་ཅག་ངག་རྩུབ་ཁྲོ་ལྡན་ཞིང་། །བདག་ཅག་སེར་སྣ་འཇུངས་པ་ཅན། །སྦྱིན་པ་ཅུང་ཟད་མ་བཏང་དེས། །བདག་ཅག་ཡི་དགས་འཇིག་རྟེན་ལྷགས། །གྲོ་བཞིན་སྐྱེས་ཁྱོད་བསོད་ནམས་ཀྱི་མཐུ་ཆེན་པོ་དང་ལྡན་གྱིས་སོང་ཤིག །ཡི་དགས་ཀྱི་གྲོང་ཁྱེར་དུ་ཞུགས་པ་ལ་གསོན་པོར་འགྲོ་བ་འགའ་ཡང་ཁྱོད་ཀྱིས་མཐོང་བ་ཡོད་དམ། དེ་སོང་བ་དང་། ཇི་ཙམ་ན་སྐྱེས་བུ་
དེ་མཐོང་ནས་དེས་དེ་ལ་སྨྲས་པ། ཨེ་མའོ་བཞིན་བཟངས་ཁྱོད་ཀྱིས་ཁོ་བོ་ལ་འདི་ལྟ་སྟེ། འདི་ནི་ཡི་དགས་ཀྱི་གྲོང་ཁྱེར་ཡིན་ནོ། ཞེས་སྨྲས་པ་དང་། ཁོ་བོ་དེར་མི་འཇུག་པ་ཞིག །དེས་སྨྲས་པ། གྲོ་བཞིན་སྐྱེས་ཁྱོད་བསོད་ནམས་ཀྱི་མཐུ་ཆེན་པོ་དང་ལྡན་གྱིས་སོང་ཤིང་། །ཡི་དགས་ཀྱི་གྲོང་ཁྱེར་དུ་ཞུགས་པ་ལ་གསོན་པོར་འགྲོ་བ་འགའ་ཡང་ཁྱོད་ཀྱིས་མཐོང་བ་ཡོད་དམ། །དེས་སོང་བ་ལས་ཇི་ཙམ་ན་ལྕགས་ཀྱི་གྲོང་ཁྱེར་མཐོ་ཞིང་རྒྱ་ཆེ་བ་ཞིག་གི་སྒོ་ན་སྐྱེས་བུ་གནག་ལ་ཆེ་བ། མིག་དམར་བ། བྱིན་སྙིང་རློ་བ། ལག་ན་དབྱིག་པ་ཐོགས་པ་ཞིག་འདུག་པ་མཐོང་ནས། དེ་དེའི་དྲུང་དུ་སོང་སྟེ། ཀྱེ་ནང་རྗེ་འདི་ན་ཆུ་ཡོད་དམ། དེ་ཅང་མི་སྨྲ་བར་འདུག་པ་དང་། དེ་ལ་ཡང་ཀྱེ་ནང་རྗེ་འདི་ན་ཆུ་ཡོད་དམ། དེ་འོན་ཀྱང་ཅང་མི་སྨྲ་བར་འདུག་གོ །དེས་དེར་ཞུགས་ཏེ་ཆུ་ཆུ་ཞེས་བྱ་བའི་སྒྲ་ཕྱུང་བ་དང་། ཡི་དགས་སྡོང་དུམ་ཚིག་པ་འདྲ་བ་རུས་གོང་བསྒྲེང་བ་ལྟ་བུ་རང་གི་སྐྲ་དང་སྤུས་ཡོག་པ། ལྟོ་རི་སུལ་ལྟར་འདུག་པ། ཁབ་ཀྱི་མིག་ཙམ་གྱི་ཁ་ཡོད་པ་བརྒྱ་སྟོང་དུ་མས་ཡོངས་སུ་བསྐོར་ནས་གྲོ་བཞིན་སྐྱེས་སྙིང་རྗེ་དང་ལྡན་པ་ཁྱོད་ཀྱིས་བདག་ཅག་སྐོམ་པ་རྣམས་ལ་ཆུ་ལུད་ཅིག །དེས་སྨྲས་པ། ཤེས་ལྡན་དག་བདག་ཉིད་ཀྱང་ཆུ་སློང་ན་བདག་གིས་ཆུ་བླུད་དུ་ག་ལ་ཡོད། །དེ་དག་གིས་སྨྲས་པ། གྲོ་བཞིན་སྐྱེས་ཡི་དགས་ཀྱི་གྲོང་ཁྱེར་འདི་ན་ཆུ་ག་ལ་ཡོད། བདག་ཅག་གིས་ལོ་བཅུ་གཉིས་ལོན་ན་ཆུ་ཆུ་ཞེས་བྱ་བའི་སྒྲ་ཁྱོད་ལས་དེང་ཐོས་སོ། །ཤེས་ལྡན་དག་ཁྱེད་ཅག་སུ་ཞིག །ལས་གང་གིས་འདིར་སྐྱེས། དེ་དག་གིས་སྨྲས་པ། གྲོ་བཞིན་སྐྱེས་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཡིད་མི་ཆེས་སོ། །ཤེས་ལྡན་དག་བདག་གིས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་པར་འགྱུར། དེ་དག་གིས་ཚིགས་སུ་བཅད་དེ་སྨྲས་པ། ནད་མེད་རྒྱགས་པས་མྱོས་པ་དང་། །ལང་ཚོ་ལོངས་སྤྱོད་དྲེགས་མྱོས་ཏེ། །སྦྱིན་པ་ཅི་ཡང་མ་བཏང་བས། །བདག་ཅག་ཡི་དགས་
འཇིག་རྟེན་ལྷགས། །གྲོ་བཞིན་སྐྱེས་ཁྱོད་བསོད་ནམས་ཀྱི་མཐུ་ཆེན་པོ་དང་ལྡན་པས་སོང་ཤིག །ཡི་དགས་ཀྱི་གྲོང་ཁྱེར་དུ་ཞུགས་པ་ལ་གསོན་པོར་འགྲོ་བ་འགའ་ཡང་ཁྱོད་ཀྱིས་མཐོང་བ་ཡོད་དམ། དེ་སོང་བ་དང་ཅི་ཙམ་ན་སྐྱེས་བུ་དེ་མཐོང་ནས་དེས་དེ་ལ་སྨྲས་པ། ཨེ་མའོ་བཞིན་བཟངས་ཁྱོད་ཀྱིས་ཁོ་བོ་ལ་འདི་ལྟ་སྟེ། འདི་ནི་ཡི་དགས་ཀྱི་གྲོང་ཁྱེར་ཡིན་ནོ་ཞེས་སྨྲས་པ་དང་། ཁོ་བོ་དེར་མི་འཇུག་པ་ཞིག །དེས་སྨྲས་པ། གྲོ་བཞིན་སྐྱེས་ཁྱོད་བསོད་ནམས་ཀྱི་མཐུ་ཆེན་པོ་དང་ལྡན་པས་སོང་ཤིག །ཡི་དགས་ཀྱི་གྲོང་ཁྱེར་དུ་ཞུགས་པ་ལ་གསོན་པོར་འགྲོ་བ་འགའ་ཡང་ཁྱོད་ཀྱིས་མཐོང་བ་ཡོད་དམ། དེ་སོང་བ་དང་། ཅི་ཙམ་ན་ཉི་མ་ནུབ་ཀའི་དུས་སུ་གཞལ་མེད་ཁང་ཞིག་མཐོང་སྟེ། དེ་ན་ལྷ་མོ་གཟུགས་བཟང་བ་མཛེས་པ། བལྟ་ན་སྡུག་པ་བཞི་དང་། སྐྱེས་བུ་གཟུགས་བཟང་བ། མཛེས་པ། བལྟན་སྡུག་པ་དཔུང་རྒྱན་དང་། རྣ་ཆ་གདུབ་ཀོར་དང་། བྱུག་པ་དང་། ཕྲེང་བ་སྣ་ཚོགས་ཀྱིས་བརྒྱན་པ་གཅིག་དང་དེ་དག་ཏུ་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དག་གིས་དེ་རྒྱང་རིང་པོ་ཁོ་ན་ནས་མཐོང་ནས། དེ་དག་གིས་སོ་སོ་ནས་སྨྲ་བར་བརྩམས་པ། གྲོ་བཞིན་སྐྱེས་འོངས་པ་ལེགས་སོ། །མི་སྐོམ་མ་མ། མི་བཀྲེས་སམ། དེས་བསམས་པ། གདོན་མི་ཟ་བར་ལྷ་འམ། ཀླུའམ། གནོད་སྦྱིན་ཞིག་ཡིན་ནོ་སྙམ་ནས་བདག་སྐོམ་མོ། །བདག་བཀྲེས་སོ། །དེ་དག་གིས་ཁྲུས་བྱས་ནས་ཟན་བྱིན་ཏེ་གཞལ་མེད་ཁང་དེ་ཉིད་དུ་ཇི་ཙམ་ཉི་མ་མ་ཤར་གྱི་བར་དུ་འདུག་པ་དང་། དེ་ལ་དེ་དག་གིས་སྨྲས་པ། གྲོ་བཞིན་སྐྱེས་འདིར་ཉེས་དམིགས་དག་འབྱུང་བར་འགྱུར་གྱིས་བྱུང་ཤིག །དེ་བྱུང་ནས་མཐའ་གཅིག་ཏུ་སོང་སྟེ་གནས་སོ། །དེ་ནས་ཕྱི་ཞིག་ན་ཉི་མ་ཤར་བའི་དུས་ཀྱི་ཚེ་གཞལ་མེད་ཁང་དེ་ཡང་མི་སྣང་། ལྷའི་བུ་མོ་ཡང་མི་སྣང་བར་གྱུར་ཏེ། ཁྱི་སྲེ་བོ་བཞི་ཞིག་བྱུང་ནས་དེ་དག་གིས་སྐྱེས་པ་དེ་ཁས་བུབ་ཏུ་བསྙལ་
ཏེ་རྒྱབ་ཀྱི་ཤ་ལྤགས་ཁམ་ཚད་ཁམ་ཚད་དུ་བཅད་དེ། ཇི་ཙམ་ཉི་མ་ནུབ་ཀྱི་བར་དུ་ཟོས་སོ། །དེའི་འོག་ཏུ་ཡང་གཞལ་མེད་ཁང་ཡང་སླར་བྱུང་། ལྷའི་བུ་མོ་ཡང་བྱུང་བར་གྱུར་ཏེ། སྐྱེས་པ་གཟུགས་བཟང་བ། མཛེས་པ། བལྟ་ན་སྡུག་པ། དཔུང་རྒྱན་དང་། རྣ་ཆ་གདུབ་ཀོར་དང་། བྱུག་པ་དང་། ཕྲེང་པ་སྣ་ཚོགས་ཀྱིས་བརྒྱན་པ་དེ་དང་དེ་དག་ཏུ་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དག་གི་དྲུང་དུ་སོང་ནས་ཤེས་ལྡན་དག་ཁྱེད་ཅག་སུ་ཞིག །ལས་གང་གིས་འདིར་སྐྱེས། གྲོ་བཞིན་སྐྱེས་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཡིད་མི་ཆེས་སོ། །ཤེས་ལྡན་དག་བདག་གིས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་པར་འགྱུར། གྲོ་བཞིན་སྐྱེས་བདག་གནས་པའི་གྲོང་གི་ཤེན་པར་གྱུར་པ་ན་ལུག་བསད་དེ་བསད་པའི་ཤ་བཙོངས་པས་འཚོ་བར་བྱེད་པ་ལས་འཕགས་པ་ཀཱ་ཏྱཱ་ཡ་ན་ཆེན་པོས་བདག་ལ་ཐུགས་བརྩེ་བའི་ཕྱིར་བྱོན་ནས། བཞིན་བཟངས་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་གསུངས་ན། དེས་གསུངས་པ་བཞིན་དུ་བདག་གིས་མ་སྤངས་པ་དང་། དེས་བདག་ལ་སྤོང་དུ་གཞུག་པའི་ཕྱིར་ཡང་དང་ཡང་དུ་བཞིན་བཟངས་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་གསུངས་ན། འོན་ཀྱང་བདག་གིས་མ་སྤངས་ནས་དེས་བདག་ལ་སྨྲས་པ། བཞིན་བཟངས་ཁྱོད་ཅི་ལུག་ཉིན་པར་རམ། ནུབ་མོ་གསོད། བདག་གིས་སྨྲས་པ། འཕགས་པ་ཉིན་པར་རོ། །དེས་ཅིའི་ཕྱིར་ནུབ་མོ་ཚུལ་ཁྲིམས་ཡང་དག་པར་མནོད་པ་མི་གཟུང་ཞེས་གསུངས་ནས། དེ་ལས་བདག་གིས་ནུབ་མོ་ཚུལ་ཁྲིམས་ཡང་དག་པར་མ་ནོས་ཏེ་བཟུང་བ་དེའི་ལས་ཀྱི་རྣམ་པར་སྨིན་པའི་འབྲས་བུས་ནུབ་མོ་འདི་ལྟ་བུའི་བདེ་བ་ཉམས་སུ་མྱོང་ངོ་། །གང་ཡང་ཉིན་
པར་ལུག་བསད་པ་དེའི་ལས་ཀྱི་རྣམ་པར་སྨིན་པས་ཉིན་པར་འདི་ལྟ་བུའི་སྡུག་བསྔལ་ཉམས་སུ་མྱོང་ངོ་། །ཚིགས་སུ་བཅད་དེ། ཡང་སྨྲས་པ། ཉིན་པར་གཞན་གྱི་སྲོག་གཅོད་ཅིང་། །ནུབ་མོ་ཚུལ་ཁྲིམས་ཡོན་ཏན་ལྡན། །ལས་དེའི་འབྲས་བུ་བཟང་པོ་དང་། །སྡིག་ཏོ་འདི་ནི་མྱོང་བ་ཡིན། །གྲོ་བཞིན་སྐྱེས་ཁྱོད་གནས་པའི་གྲོང་དུ་འགྲོའམ། དེ་ན་བདག་གི་བུ་ཤེན་པ་བགྱིད་པ་དེ་ལ་ཁྱོད་ཀྱི་ཕ་ངས་མཐོང་སྟེ། དེ་ན་རེ་ལས་འདིའི་འབྲས་བུ་རྣམ་པར་སྨིན་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ་ཞེས་གསུང་ཤིག །ཀྱེ་ནང་རྗེ་ཁྱོད་ཀྱིས་ཁོ་བོ་ལ་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའོ་ཞེས་སྨྲས་པས་ཡིད་ཆེས་པར་མི་འགྱུར་རོ། །གྲོ་བཞིན་སྐྱེས་གལ་ཏེ་ཡིད་མི་ཆེས་ན་དེ་ལ་ཁྱོད་ཀྱི་ཕ་དེ་ན་རེ་རལ་གྲིས་བསད་པའི་སའི་འོག་ན་གསེར་ཕྱེ་བུམ་པ་གང་བཞག་གིས་དེ་ཕྱུང་སྟེ། བདག་ཉིད་ལ་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་ལ་བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་བྱོས་ཤིག་དང་། དེ་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་གསུང་ཤིག །དེ་སོང་བ་ལས་ཇི་ཙམ་ན་ཉི་མ་འཆར་ཀའི་དུས་སུ་གཞལ་མེད་ཁང་གཞན་ཞིག་མཐོང་སྟེ། དེ་ན་ལྷ་མོ་གཟུགས་བཟང་བ། མཛེས་པ། བལྟ་ན་སྡུག་པ་གཅིག་དང་། སྐྱེས་པ་གཟུགས་བཟང་བ། མཛེས་པ། བལྟ་ན་སྡུག་པ། དཔུང་རྒྱན་དང་། རྣ་ཆ་གདུབ་ཀོར་དང་། བྱུག་པ་དང་། ཕྲེང་བ་སྣ་ཚོགས་ཀྱིས་བརྒྱན་པ་གཅིག་དང་དེར་ལྷན་ཅིག་རྩེ་བར་བྱེད། དགའ་བར་བྱེད། དགའ་མ་གུར་སྤྱོད་པར་བྱེད་དོ། །དེ་དེ་དག་གིས་རྒྱང་རིང་པོ་ནས་མཐོང་ནས་སོ་སོ་ནས་སྨྲ་བར་བརྩམས་པ། གྲོ་བཞིན་སྐྱེས་འོངས་པ་ལེགས་སོ། །མི་སྐོམ་མམ། མི་བཀྲེས་སམ། དེས་
བསམས་པ། གདོན་མི་ཟ་བར་ལྷའམ། ཀླུ་འམ། གནོད་སྦྱིན་ཞིག་ཡིན་ནོ་སྙམ་ནས་བདག་སྐོམ་མོ། །བདག་བཀྲེས་སོ། །དེ་དག་གིས་དེ་ཁྲུས་བྱས་ནས་ཟན་བྱིན་ཏེ། །དེ་གཞལ་མེད་ཁང་དུ་ཇི་ཙམ་ཉི་མ་ནུབ་ཀྱི་བར་དུ་འདུག་པ་དང་། དེ་ལ་དེ་དག་གིས་སྨྲས་པ། གྲོ་བཞིན་སྐྱེས་འདིར་ཉེས་དམིགས་དག་འབྱུང་བར་འགྱུར་གྱིས་བྱུང་ཤིག །དེས་ཉེས་དམིགས་དག་མཐོང་བས་བྱུང་སྟེ་མཐའ་གཅིག་ཏུ་འདུག་གོ །དེའི་འོག་ཏུ་ཉི་མ་ནུབ་ཀའི་དུས་ཀྱི་ཚེ་དེ་ན་གཞལ་མེད་ཁང་ཡང་མི་སྣང་། ལྷ་མོ་དེ་ཡང་མི་སྣང་གི །སྲིན་གྱི་མེད་ཆེན་པོ་ཞིག་བྱུང་སྟེ། དེས་སྐྱེས་པ་དེའི་ལུས་ལ་ལུས་ཀྱིས་ལན་བདུན་དུ་དཀྲིས་ནས་སྟེང་དུ་བྱུང་སྟེ། དེས་ནམ་ཉི་མ་ཤར་བའི་བར་དུ་ཀླད་རྒྱས་ཟ་བར་བྱེད་དོ།། །།འདུལ་བ་གཞི། བམ་པོ་ཉི་ཤུ་གཅིག་པ། དེ་ནས་དེའི་འོག་ཏུ་གཞལ་མེད་ཁང་ཡང་སླར་བྱུང་། ལྷ་མོ་དེ་ཡང་སླར་བྱུང་ནས་སྐྱེས་པ་གཟུགས་བཟང་བ། མཛེས་པ། བལྟ་ན་སྡུག་པ། དཔུང་རྒྱན་དང་། རྣ་ཆ་གདུབ་ཀོར་དང་། བྱུག་པ་དང་། ཕྲེང་བ་སྣ་ཚོགས་ཀྱིས་བརྒྱན་པ་དེ་དང་དེར་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དེ་དག་གི་དྲུང་དུ་སོང་སྟེ་སོང་ནས་སྨྲས་པ། ཤེས་ལྡན་དག་ཁྱེད་ཅག་སུ་ཞིག །ལས་གང་གིས་འདིར་སྐྱེས། གྲོ་བཞིན་སྐྱེས་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཡིད་མི་ཆེས་སོ། །བདག་གིས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་པར་འགྱུར། དེས་སྨྲས་པ། གནས་པའི་གྲོང་ན་བདག་བྲམ་ཟེར་གྱུར་ཏེ། བྱི་བོ་བྱེད་པ་ལས་འཕགས་པ་ཀཱ་ཏྱཱ་ཡ་ན་ཆེན་པོས་བདག་ལ་ཐུགས་བརྩེ་བའི་ཕྱིར་བྱོན་ནས་གསུངས་པ། བཞིན་བཟངས་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་གསུངས་ན། དེ་གསུངས་པ་བཞིན་དུ་བདག་གིས་མ་སྤངས་པ་དང་། དེས་བདག་ལ་སྤོང་དུ་གཞུག་པའི་ཕྱིར་ཡང་དང་ཡང་དུ་བཞིན་བཟངས་ལས་
འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་གསུངས་ན་འོན་ཀྱང་བདག་གིས་དེ་མ་སྤངས་སོ། །དེས་བདག་ལ་སྨྲས་པ་བཞིན་བཟངས་ཁྱོད་ཉིན་པར་བྱི་བོ་ལ་འགྲོ་འམ་ནུབ་མོ། བདག་གིས་དེ་ལ་སྨྲས་པ། འཕགས་པ་ནུབ་མོའོ། །དེས་བཞིན་བཟངས་ཅིའི་ཕྱིར་ཉིན་པར་ཚུལ་ཁྲིམས་ཡང་དག་པར་མ་ནོས་ཏེ་མི་གཟུང་དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་འགྱུར་རོ། །ཞེས་གསུངས་ནས། དེ་ལས་བདག་གིས་ཉིན་པར་ཚུལ་ཁྲིམས་ཡང་དག་པར་མནོས་ཏེ་བཟུང་ངོ་། །གང་ཡང་ཉིན་པར་ཚུལ་ཁྲིམས་ཡང་དག་པར་མནོས་ཏེ་བཟུང་བ་དེའི་ལས་ཀྱི་རྣམ་པར་སྨིན་པས་ཉིན་པར་བདེ་བ་འདི་ལྟ་བུ་ཉམས་སུ་མྱོང་ངོ་། །གང་ཡང་མཚན་མོ་བྱི་བོ་བྱེད་དུ་སོང་བ་དེའི་ལས་ཀྱི་རྣམ་པར་སྨིན་པས་མཚན་མོ་སྡུག་བསྔལ་འདི་ལྟ་བུ་ཉམས་སུ་མྱོང་བར་གྱུར་ཏོ། །ཚིགས་སུ་བཅད་དེ་ཡང་སྨྲས་པ། མཚན་མོ་བྱི་བོ་བྱེད་ལ་ཆགས། །ཉིན་པར་ཚུལ་ཁྲིམས་ཡོན་ཏན་ལྡན། །ལས་དེའི་འབྲས་བུ་བཟང་པོ་དང་། །སྡིག་ཏོ་འདི་ནི་མྱོང་བ་ཡིན། །གྲོ་བཞིན་སྐྱེས་ཁྱོད་གནས་པའི་གྲོང་དུ་འགྲོ་འམ། དེ་ན་བདག་གི་བུ་བྲམ་ཟེ་བྱི་བོ་བྱེད་པ་ལ་ཁྱོད་ཀྱི་ཕ་ངས་མཐོང་སྟེ། དེ་ན་རེ་ལས་འདིའི་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས། དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ། །ཞེས་གསུང་ཤིག །དེས་སྨྲས་པ། ཀྱེ་ནང་རྗེ་ཁྱོད་ན་རེ་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའོ་ཞེས་སྨྲས་པས་ཡིད་ཆེས་པར་མི་འགྱུར་རོ། །གྲོ་བཞིན་སྐྱེས་གལ་ཏེ་ཡིད་མི་ཆེས་ན་དེ་ལ་ཁྱོད་ཀྱི་ཕ་ན་རེ་མེ་ཐབ་ཀྱི་འོག་ན་གསེར་ཕྱེ་བུམ་པ་གང་བཞག་གིས་དེ་ཕྱུང་སྟེ། བདག་ཉིད་ལ་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་ལ་བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་གྱིས་
ཤིག་དང་། དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་ཟེར་རོ་ཞེས་གསུང་ཤིག །དེ་སོང་བ་དང་ཇི་ཙམ་ན་གཞལ་མེད་ཁང་གཞན་ཞིག་མཐོང་སྟེ། དེ་ན་བུད་མེད་གཟུགས་བཟང་བ། མཛེས་པ། བལྟ་ན་སྡུག་པ་དཔུང་རྒྱན་དང་། རྣ་ཆ་གདུབ་ཀོར་དང་། བྱུག་པ་དང་། ཕྲེང་བ་སྣ་ཚོགས་ཀྱིས་བརྒྱན་པ་ཞིག་འདུག་པ་དེའི་ཁྲིའི་རྐང་པ་བཞི་ལ་ཡི་དགས་བཞི་བཏགས་ཤིང་འདུག་གོ །དེ་དེས་རྒྱང་རིང་པོ་ནས་མཐོང་ནས་སྨྲས་པ། གྲོ་བཞིན་སྐྱེས་འོངས་པ་ལེགས་སོ། །འོངས་པ་ལེགས་སོ། མི་སྐོམ་མམ། མི་བཀྲེས་སམ། དེས་བསམས་པ། །གདོན་མི་ཟ་བར་ལྷ་མོ་འམ། །ཀླུ་མོའམ་། །གནོད་སྦྱིན་མོ་ཞིག་ཡིན་ནོ་སྙམ་ནས། དེས་སྨྲས་པ། བདག་སྐོམ་མོ། །བདག་བཀྲེས་སོ། །དེས་དེ་ཁྲུས་བྱས་ནས་ཟན་བྱིན་ཏེ་དེ་ལ་སྨྲས་པ། གྲོ་བཞིན་སྐྱེས་གལ་ཏེ་ཁྱོད་ལ་འདི་དག་ཆུང་ཟད་སློང་ན་མ་སྦྱིན་ཅིག་ཅེས་སྨྲས་ནས། སེམས་ཅན་དེ་རྣམས་ཀྱི་ལས་བདག་གིར་བྱ་བ་མངོན་སུམ་དུ་བྱ་བར་འདོད་ནས་གཞལ་མེད་ཁང་གི་ནང་དུ་ཞུགས་ཏེ་འདུག་གོ །དེ་དག་གིས་བསླང་བར་བརྩམས་ཏེ། གྲོ་བཞིན་སྐྱེས་སྙིང་རྗེ་དང་ལྡན་པ་ཁྱོད་ཀྱིས་བདག་ཅག་བཀྲེས་པས་ཉེན་པ་ལ་བྱིན་ཅིག །དེས་གཅིག་ལ་ཁམ་གཅིག་བྱིན་པ་དང་ཕུབ་མར་གྱུར་ཏོ། །ཡང་གཅིག་ལ་ཁམ་གཅིག་བྱིན་པ་དང་ལྕགས་ཀྱི་ཐུ་ལུམ་ཟ་བར་གྱུར་ཏོ། །ཡང་གཅིག་ལ་ཁམ་གཅིག་བྱིན་པ་དང་དེ་རང་གི་ཤ་ལ་ཟ་བར་གྱུར་ཏོ། །ཡང་གཅིག་ལ་ཁམ་གཅིག་བྱིན་པ་དང་རྣག་ཁྲག་ཏུ་གྱུར་ཏོ། །དེ་དྲི་ཚོར་ནས་བྱུང་སྟེ། གྲོ་བཞིན་སྐྱེས་ཁྱོད་ལ་ཁོ་མོས་མ་ཟློག་གམ། ཅིའི་ཕྱིར་འདི་དག་ལ་སྦྱིན་ཅི་ཁོ་མོའི་སྙིང་རྗེ་ལས་ཁྱོད་ཀྱི་སྙིང་རྗེ་ལྷག་གམ། དེས་སྨྲས་པ། སྲིང་མོ་འདི་དག་ཁྱོད་ཀྱི་ཅིར་འོང་། དེས་སྨྲས་པ། འདི་ནི་ཁོ་མོའི་ཁྱིམ་ཐབ་ཡིན། འདི་ནི་བུ་ཡིན། འདི་ནི་མནའ་མ་ཡིན། འདི་ནི་ཁོ་མོའི་བྲན་མོ་ཡིན་ནོ། །ཁྱེད་ཅག་སུ་དག་ཅིག་
ལས་གང་གིས་འདིར་སྐྱེས། གྲོ་བཞིན་སྐྱེས་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཡིད་མི་ཆེས་སོ། །སྲིང་མོ་བདག་གིས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་པར་འགྱུར། དེས་སྨྲས་པ། གྲོ་བཞིན་སྐྱེས་ཁོ་མོ་གནས་པ་ཞེས་བྱ་བའི་གྲོང་གི་བྲམ་ཟེ་མོར་གྱུར་པ་ན་རྒྱུ་སྐར་ལ་བབ་པའི་ནུབ་མོ་ཁ་ཟས་བསོད་པ་དག་སྟ་གོན་བྱས་པ་དང་། འཕགས་པ་ཀཱ་ཏྱཱ་ཡ་ན་ཆེན་པོ་ཁོ་མོ་ལ་ཐུགས་བརྩེ་བའི་ཕྱིར་གནས་པའི་གྲོང་དུ་བསོད་སྙོམས་ལ་གཤེགས་ཏེ་རིམ་གྱིས་ཁོ་མོའི་ཁྱིམ་དུ་བྱོན་པ་དང་། ཁོ་མོས་དེའི་སྐུ་འཛེས་ཤིང་ཐུགས་དང་བ་མཐོང་ངོ་། །མཐོང་ནས་ཀྱང་ཁོ་མོ་མངོན་པར་དད་པར་གྱུར་ཏེ། དེ་ལ་ཁོ་མོ་དད་པ་སྐྱེས་ནས་བསོད་སྙོམས་ཕུལ་ཏེ་ཁོ་མོའི་བློ་སྐྱེས་པ། དེ་ལ་ཁྱིམ་ཐབ་རྗེས་སུ་ཡི་རང་བ་འབུལ་དུ་བཅུག་ན་རབ་ཏུ་དགའ་བ་སྐྱེ་བར་འགྱུར་རོ་སྙམ་པ་ལས་དེས་ཁྲུས་བྱས་ཏེ་འོངས་པ་དང་། དེ་ལ་ཁོ་མོས་སྨྲས་པ། རྗེའི་སྲས་འཕགས་པ་ཀཱ་ཏྱཱ་ཡ་ན་ཆེན་པོ་ལ་ཁོ་མོས་བསོད་སྙོམས་ཕུལ་གྱིས་རྗེས་སུ་ཡི་རང་བ་ཕུལ་ཅིག །དེ་ཁྲོས་ནས་སྨྲས་པ། ཇི་སྲིད་བྲམ་ཟེ་རྣམས་ལ་མ་ཕུལ། །གཉེན་བཤེས་རྣམས་ལ་གཉེན་གྱི་སྲི་ཞུ་མ་བྱས་པར་ཇེ་ཁྱོད་ཀྱིས་དགེ་སྦྱོང་མགོ་རེག་དེ་ལ་བསོད་སྙོམས་ཀྱི་ཕུད་སྦྱིན་ནམ་ཞེས་དེ་མི་བཟོད་པ་སྐྱེས་ནས་དགེ་སྦྱོང་མགོ་རེག་དེ་ཅིའི་ཕྱིར་ཕུབ་མ་མི་འགམ་ཞེས་སྨྲས་པས། དེ་ལས་དེའི་རྣམ་པར་སྨིན་པས་ཕུབ་མ་འགམ་པར་གྱུར་ཏོ། །ཁོ་མོའི་བློ་སྐྱེས་པ། ཁྱིམ་ཐབ་ཀྱིས་རྗེས་སུ་ཡི་རང་བ་མ་ཕུལ་གྱིས། རེ་ཞིག་བུ་རྗེས་སུ་ཡི་རང་བ་འབུལ་དུ་བཅུག་ན་དགའ་བ་སྐྱེ་བར་འགྱུར་རོ་སྙམ་ནས་ཁོ་མོས་དེ་ལ་ཡང་སྨྲས་པ། བུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་ཁོ་མོས་བསོད་སྙོམས་ཕུལ་གྱིས་རྗེས་སུ་ཡི་རང་བ་ཕུལ་ཅིག །དེ་ཡང་ཁྲོས་ཏེ་སྨྲས་པ། ཇི་སྲིད་བྲམ་ཟེ་རྣམས་ལམ་བྱིན་པར་ཇེ་ཁྱོད་ཀྱིས་དགེ་སྦྱོང་མགོ་རེག་དེ་ལ་བསོད་སྙོམས་ཀྱི་ཕུད་བྱིན་ནམ་ཞེས་དེ་མི་བཟོད་པ་སྐྱེས་ནས་དགེ་སྦྱོང་མགོ་རེག་
དེ་ཅིའི་ཕྱིར་ལྕགས་ཀྱི་ཐུ་ལུམ་མི་ཟ་ཞེས་སྨྲས་པ། དེ་ལས་དེའི་རྣམ་པར་སྨིན་པས་ལྕགས་ཀྱི་ཐུ་ལུམ་ཟ་བར་གྱུར་ཏོ། །གྲོ་བཞིན་སྐྱེས་རྒྱུ་སྐར་ལ་བབ་པའི་ནུབ་མོ་གཉེན་དག་གིས་ཁོ་མོ་ལ་གཡར་གཟིགས་ཤིག་བསྐུར་བ་དེ་ཁོ་མོས་མནའ་མ་ལ་གཏད་ན། དེས་གཡར་གཟིགས་བསོད་བ་བསོད་པ་དག་ནི་ཟོས་ལ། ངན་པ་དག་ཁོ་མོ་ལ་བྱིན་ནོ། །ཁོ་མོས་གཉེན་དེ་དག་ལ་ཁྱེད་ཅག་ལོ་ཉེས་སམ་ཅི། འདི་ལྟ་བུ་གཡར་གཟིགས་ངན་པ་བསྐུར། དེ་རྣམས་ཀྱིས་ཁོ་མོ་ལ་བདག་ཅག་གིས་གཡར་གཟིགས་ངན་པ་ནི་མ་བསྐུར་ཏེ། དེ་ལྟ་མོད་ཀྱི་གཡར་གཟིགས་བསོད་པ་ཞིག་བསྐུར་རོ་ཞེས་སྤྲིང་བ་འོངས་ནས་ཁོ་མོས་མནའ་མ་ལ་སྨྲས་པ། བག་སར་ཁྱོད་ཀྱིས་གཡར་གཟིགས་བསོད་པ་དག་ནི་ཟོས་ལ་ངན་པ་དག་ཁོ་མོ་ལ་མ་བྱིན་གྲང་དེས་སྨྲས་པ། ཁྱོད་ཀྱི་གཡར་གཟིགས་ཟན་བདག་རང་གི་ཤ་ཅིའི་ཕྱིར་མི་ཟ་ཞེས་སྨྲས་པ། དེ་ལས་དེའི་རྣམ་པར་སྨིན་པས་རང་གི་ཤ་ཟ་བར་གྱུར་ཏོ། །རྒྱུ་སྐར་ལ་བབ་པའི་ནུབ་མོ་ཁོ་མོས་བྲན་མོ་གཡར་གཟིགས་བསོད་པ་དག་ཅིག་ལག་ཏུ་བསྐུར་ཏེ་གཉེན་བཤེས་ཀྱི་གན་དུ་བཏང་བ་ལས། དེས་ལམ་ཀར་གཡར་གཟིགས་བསོད་པ་དག་ཟོས་ནས་དེ་དག་ལ་ངན་པ་དག་བྱིན་པ་དང་། དེ་དག་གིས་ཁོ་མོ་ལ་ཁྱོད་ལོ་ཉེས་སམ་ཅི། བདག་ཅག་ལ་གཡར་གཟིགས་ངན་པ་དག་བསྐུར་ཞེས་སྤྲིང་བ་འོངས་ན། ཁོ་མོས་དེ་དག་ལ་ཁོ་མོས་ཁྱེད་ཅག་ལ་གཡར་གཟིགས་ངན་པ་ནི་མ་བསྐུར་ཏེ། དེ་ལྟ་མོད་ཀྱི་གཡར་གཟིགས་བསོད་པ་ཞིག་བསྐུར་རོ་ཞེས་སྤྲིང་ངོ་། །ཁོ་མོས་བྲན་མོ་ལ་དྲིས་པ། བྲན་མོ་གཡར་གཟིགས་བསོད་པ་དག་ཁྱོད་ཀྱིས་ཟོས་ལ་དེ་དག་ལ་ངན་པ་དག་མ་བྱིན་གྲང་། དེས་སྨྲས་པ། ཁྱོད་ཀྱི་གཡར་གཟིགས་ཟ་ན་རྣག་ཁྲག་ཅིའི་ཕྱིར་མི་འཐུང་ཞེས་སྨྲས་པས། དེ་ལས་དེའི་རྣམ་པར་སྨིན་པས་རྣག་ཁྲག་འཐུང་བར་གྱུར་ཏོ། །བདག་གི་བློ་སྐྱེས་པ་གང་དུ་སེམས་ཅན་འདི་དག་རང་རང་གི་ལས་ཀྱི་
འབྲས་བུ་ཉམས་སུ་མྱོང་བར་འགྱུར་པ་དེར་ཉིད་མཚམས་སྦྱོར་ཞིང་ལྟ་བར་གྱུར་ཅིག་སྙམ་མོ། །ཁོ་མོས་གང་ཡང་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་པས་སུམ་བཅུ་རྩ་གསུམ་པའི་གནས་བཟང་པོར་སྐྱེ་བར་འགྱུར་བ་ལས་བདག་གིས་སྨོན་ལམ་ལོག་པར་བཏབ་པས། ད་ལྟར་ཡི་དགས་མཐུ་ཆེན་པོ་ཞིག་ཏུ་སྐྱེས་སོ། །གྲོ་བཞིན་སྐྱེས་ཡང་གནས་པ་ཞེས་བྱ་བའི་གྲོང་དུ་འགྲོ་ན་དེ་ན་ཁོ་མོའི་བུ་མོ་སྨད་འཚོང་བྱེད་པ་དེ་ལ། ཁྱོད་ཀྱི་ཕ་དང་། མ་དང་། མིང་པོ་དང་། མནའ་མ་དང་། བྲན་མོ་དག་ངས་མཐོང་སྟེ། དེ་དག་ན་རེ་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་པ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ། །ཞེས་གསུང་ཤིག །སྲིང་མོ་ཁྱེད་ཉིད་ན་རེ་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའོ་ཞེས་སྨྲས་པས་ཡིད་ཆེས་པར་མི་འགྱུར་རོ། །དེས་སྨྲས་པ། གྲོ་བཞིན་སྐྱེས་གལ་ཏེ་ཡིད་མི་ཆེས་ན་ཁྱོད་ཀྱི་ཕའི་སྔོན་གྱི་ཁང་པ་ན་ལྕགས་ཟངས་གསེར་གྱིས་གང་བ་ཟུང་བཞི་དང་། དབུས་ན་གསེར་གྱི་ཁར་པ་དང་། རིལ་བ་སྤྱི་བླུགས་ཤིག་ཡོད་ཀྱིས་དེ་དག་ཕྱུང་སྟེ། བདག་ཉིད་ལ་ཡུན་དུ་བདེ་པས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་དབུལ་ཞིང་བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་བྱོས་ཤིག་དང་། དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་ཟེར་རོ་ཞེས་གསུང་ཤིག །དེས་དེ་ལས་ཁས་བླངས་ཏེ། དེ་དེ་ལྟར་འཁྱམ་པ་ལ་ལོ་བཅུ་གཉིས་འདས་སོ། །དེས་དེ་ལ་སྨྲས་པ། གྲོ་བཞིན་སྐྱེས་ཁྱོད་གནས་པའི་གྲོང་དུ་འགྲོ་འམ། སྲིང་མོ་འགྲོའོ་ཞེས་དེ་གཞལ་མེད་ཁང་དུ་ཞུགས་པ་དང་དེས་ཡི་དགས་དེ་རྣམས་ལ་བསྒོ་བ། ཤེས་ལྡན་དག་དེང་ལ་གྲོ་བཞིན་སྐྱེས་རྣ་བ་བྱེ་བ་རི་ཉལ་བཞིན་དུ་གནས་པའི་གྲོང་གི་ཕའི་སྐྱེད་མོས་ཚལ་དུ་ཞོག་
ལ་སླར་གཤེགས་ཤིག །དེ་དག་གིས་དེ་གནས་པའི་གྲོང་དུ་ཕའི་སྐྱེད་མོས་ཚལ་དུ་བཞག་གོ །དེ་གཉིད་སད་པ་དང་ཇི་ཙམ་ན་དྲིལ་བུ་དང་། གདུགས་དང་། བསིལ་ཡབ་རྣམས་ཕུལ་ནས་གལ་ཏེ་གྲོ་བཞིན་སྐྱེས་རྣ་བ་བྱེ་བ་རི་གསོན་པོ་ཞིག་ན་ལ་གོར་འོང་ཞིང་མྱུར་དུ་འོང་བར་ཤོག་ཤིག །འོན་ཏེ་དུས་ལས་འདས་ཏེ་ཤི་འཕོས་པར་གྱུར་ན་འགྲོ་བའི་གནས་གནས་ཁྱད་པར་ཅན་དུ་སྐྱེ་བར་གྱུར་ཅིག་ཅེས་ཡི་གེ་བྲིས་པ་མཐོང་ནས། དེས་བསམས་པ། འདི་ལྟར་བདག་ཕ་དང་མས་ཤི་བའི་ཁོངས་སུ་བརྩིས་ན་ཅིའི་ཕྱིར་སླར་ཁྱིམ་དུ་འཇུག །བདག་སོང་ལ་འཕགས་པ་ཀཱ་ཏྱཱ་ཡ་ན་ཆེན་པོའི་དྲུང་དུ་རབ་ཏུ་འབྱུང་བར་བྱའོ་སྙམ་མོ། །དེ་ནས་གྲོ་བཞིན་སྐྱེས་རྣ་བ་བྱེ་བ་རི་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་གང་ན་བ་དེར་སོང་བ་དང་། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་གྲོ་བཞིན་སྐྱེས་རྣ་བ་བྱེ་བ་རི་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་གྲོ་བཞིན་སྐྱེས་རྣ་བ་བྱེ་བ་རི་ལ་འདི་སྐད་ཅེས་སྨྲས་སོ། །གྲོ་བཞིན་སྐྱེས་ཚུར་ཤོག །གྲོ་བཞིན་སྐྱེས་ཁྱོད་འོངས་པ་ལེགས་སོ། །གྲོ་བཞིན་སྐྱེས་ཁྱོད་ཀྱིས་འཇིག་རྟེན་འདི་དང་འཇིག་རྟེན་ཕ་རོལ་མཐོང་ངམ། བཙུན་པ་ཀཱ་ཏྱཱ་ཡ་ན་ཆེན་པོ་མཐོང་ངོ་། །བཙུན་པ་ཀཱ་ཏྱཱ་ཡ་ན་ཆེན་པོ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་གནང་ན། བཙུན་པ་ཀཱ་ཏྱཱ་ཡ་ན་ཆེན་པོ་བདག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་ལ་སྤྱད་པར་འཚལ་ལོ། །གྲོ་བཞིན་སྐྱེས་རེ་ཞིག་སྔོན་གྱི་དམ་བཅས་པ་དྲན་པར་བྱོས་ལ་ཐ་ན་ཇི་སྐད་སྤྲིང་ཞིང་བཟུང་བ་ཆུབ་པར་སྐྱོལ་ཅིག །དེ་ཤེན་པ་དེའི་དྲུང་དུ་སོང་ནས་བཞིན་བཟངས་ཁྱོད་ཀྱི་ཕ་ངས་མཐོང་སྟེ། དེ་ན་རེ་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ། །དེས་སྨྲས་པ། ཀྱེ་ནང་རྗེ་བདག་གི་ཕ་ནི་ཤི་ནས་དེང་དུ་ལོ་བཅུ་གཉིས་ལོན་ན།
ཁྱོད་ཀྱིས་འཇིག་རྟེན་ཕ་རོལ་ནས་སླར་འོངས་པ་འགའ་མཐོང་བ་ཡོད་དམ། བཞིན་བཟངས་བདག་དེར་སོན་ཏོ། །དེ་ཡིད་མཆེས་པ་དང་བཞིན་བཟངས་ཅི་སྟེ་ཡིད་མི་ཆེས་ན་དེ་ན་རེ་ཁྱོད་ཀྱི་ཕའི་རལ་གྲིས་བསད་པའི་འོག་ན་གསེར་ཕྱེ་མ་བུམ་པ་གང་བཞག་གིས་དེ་ཕྱུང་ལ་བདག་ཉིད་ལ་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་ལ། བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་བྱོས་ཤིག་དང་། དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་ཟེར་རོ། །དེས་བསམས་པ།བདག་གིས་སྔོན་ཆད་ནི་དེ་ལྟ་བུ་ལན་འགའ་ཡང་མ་ཐོས་ན་རེ་ཞིག་བལྟས་ཏེ་གལ་ཏེ་བྱུང་བར་གྱུར་ན་ཟེར་བ་དེ་ཐམས་ཅད་བདེན་ནོ་སྙམ་ནས། དེས་སོང་སྟེ་བརྐོས་ནས་ཇི་ཙམ་ན་མཐོང་བ་དང་དེ་ཐམས་ཅད་དེ་ཁོ་ན་བཞིན་དུ་གྱུར་ཏེ། དེས་ཡིད་ཆེས་པར་གྱུར་ཏོ། །དེའི་འོག་ཏུ་བྱི་བོ་བྱེད་པ་དེའི་དྲུང་དུ་སོང་སྟེ་སོན་ནས་སྨྲས་པ། བཞིན་བཟངས་ཁྱོད་ཀྱི་ཕ་ངས་མཐོང་སྟེ། དེ་ན་རེ་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ་དེས་སྨྲས་པ། ཀྱེ་ནང་རྗེ་བདག་གི་ཕ་ཤི་ནས་དེང་དུ་ལོ་བཅུ་གཉིས་ལོན་ན་ཁྱོད་ཀྱིས་འཇིག་རྟེན་ཕ་རོལ་ནས་འོངས་པ་འགའ་མཐོང་བ་ཡོད་དམ། བཞིན་བཟངས་བདག་དེར་སོན་ཏོ། །དེ་ཡིད་མ་ཆེས་ཏེ་དེས་སྨྲས་པ། བཞིན་བཟངས་གལ་ཏེ་ཡིད་མི་ཆེས་ན་ཕ་ན་རེ་ཁྱོད་ཀྱི་ཕའི་མེ་ཐབ་ཀྱི་འོག་ན་གསེར་ཕྱེ་བུམ་པ་གང་བཞག་གིས་དེ་ཕྱུང་ལ་བདག་ཉིད་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་ལ་བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་བྱོས་ཤིག་དང་། དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་དེ་སྐད་ཟེར་རོ། །དེས་བསམས་པ། བདག་གིས་དེ་སྐད་སྔོན་ཆད་ནི་ལན་འགའ་ཡང་མ་ཐོས་
ན་གལ་ཏེ་བྱུང་བར་གྱུར་ན་ཟེར་བ་དེ་ཐམས་ཅད་བདེན་ནོ་སྙམ་ནས། དེས་སོང་སྟེ་བརྐོས་ནས་ཇི་ཙམ་ན་མཐོང་བ་དང་དེ་ཐམས་ཅད་དེ་ཁོ་ན་བཞིན་དུ་གྱུར་ཏེ་དེས་ཡིད་ཆེས་པར་གྱུར་ཏོ། །དེའི་འོག་ཏུ་གྲོ་བཞིན་སྐྱེས་རྣ་བ་བྱེ་བ་རི་སྨད་འཚོང་མ་དེའི་དྲུང་དུ་སོང་སྟེ་སྨྲས་པ། སྲིང་མོ་ཁྱོད་ཀྱི་ཕ་དང་། མ་དང་། མིང་པོ་དང་། མནའ་མ་དང་། བྲན་མོ་དག་ངས་མཐོང་སྟེ། དེ་དག་ན་རེ་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ། །དེས་སྨྲས་པ། ཀྱེ་སྐྱེས་བུ་བདག་གི་ཕ་དང་མ་དག་ཤི་ནས་དེང་དུ་ལོ་བཅུ་གཉིས་ལོན་ན་ཁྱོད་ཀྱིས་འཇིག་རྟེན་ཕ་རོལ་ནས་འོངས་པ་འགའ་མཐོང་བ་ཡོད་དམ། དེས་སྨྲས་པ། བདག་དེར་སོན་ཏོ། །དེ་ཡིད་མ་ཆེས་པ་དང་། དེས་སྨྲས་པ། སྲིང་མོ་གལ་ཏེ་ཡིད་མི་ཆེས་ན་དེ་དག་ན་རེ་ཁྱོད་ཀྱི་ཕའི་སྔོན་གྱི་ཁང་པ་རྙིང་པ་ན་ལྕགས་ཟངས་གསེར་ཕྱེས་གང་བ་ཟུང་བཞི་དང་། དབུས་ན་གསེར་གྱི་ཁར་བ་དང་། རིལ་བ་སྤྱི་བླུགས་ཡོད་ཀྱིས་དེ་དག་ཕྱུང་ལ་བདག་ལ་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་ལ། བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་བྱོས་ཤིག་དང་། དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་ཟེར་རོ། །དེས་བསམས་པ། བདག་གིས་སྔོན་ཅད་ནི་དེ་ལྟ་བུ་ལན་འགའ་ཡང་མ་ཐོས་ན་བལྟ་བར་བྱ་སྟེ། གལ་ཏེ་བྱུང་བར་གྱུར་ན་ཟེར་བ་དེ་ཐམས་ཅད་བདེན་ནོ་སྙམ་ནས། དེས་སོང་སྟེ་བརྐོས་ནས་ཇི་ཙམ་ན་མཐོང་བ་དང་དེ་ཐམས་ཅད་དེ་ཁོ་ན་བཞིན་དུ་གྱུར་ཏེ་ཡིད་ཆེས་པར་གྱུར་ཏོ། །གྲོ་བཞིན་སྐྱེས་རྣ་བ་བྱེ་བ་རིས་བསམས་པ། འཇིག་རྟེན་འདི་དག་ཐམས་ཅད་ནི་གསེར་གྱིས་ཡིད་ཆེས་ཀྱིས། བདག་ལ་ནི་འགའ་ཡང་ཡིད་ཆེས་བར་མ་གྱུར་ཏོ་སྙམ་ནས་དེས་འཛུམ་ཕྱུང་བ་དང་། དེ་བྱིས་པ་ན་མཆེ་བ་གསེར་གྱིས་བརྒྱན་པ་དེ་དེས་ངོ་ཤེས་པར་གྱུར་ནས་དཔོན་པོ་གྲོ་བཞིན་སྐྱེས་རྣ་བ་བྱེ་བ་རི་ཡིན་
ནམ། སྲིད་མོ་བདག་ནི་སྐྱེ་བོ་དག་གིས་དེ་ལྟར་ཤེས་སོ། །དེ་སོང་ནས་དེའི་ཕ་མ་ལ་ཡབ་ཡུམ་གྲོ་བཞིན་སྐྱེས་རྣ་བ་བྱེ་བ་རི་མཆིས་སོ་ཞེས་སྦྲན་པ་ནས་དུ་མ་ཞིག་གིས་སྦྲན་ན་ཡང་དེ་དག་ཡིད་མ་ཆེས་ནས། ཇི་ཙམ་ན་དེ་རང་ཉིད་འོངས་ཏེ་ཡབ་ཡུམ་ཕྱག་འཚལ་ལོ་ཞེས་སྨྲས་པ་དང་། དེ་དབྱིག་གི་ང་རོ་ཅན་ཞིག་པས་དེ་གཉིས་ཀྱིས་སྐད་ལས་ངོ་ཤེས་ནས་དེ་གཉིས་ཀྱིས་དེའི་མགུལ་ནས་འཇུས་ཏེ་དུ་བར་བརྩམས་པ་དང་། དེ་གཉིས་མཆི་མ་བྱུང་བས་མིག་གི་ལིང་ཏོག་བྱེད་ནས་བལྟ་བར་བརྩམས་སོ། །དེས་སྨྲས་པ། ཡབ་ཡུམ་བདག་ཡང་དག་པར་ཁྱིམ་ནས་ཁྱིམ་མེད་པར་རབ་ཏུ་འབྱུང་གིས་གནང་བར་མཛོད་ཅིག །དེ་གཉིས་ཀྱིས་སྨྲས་པ། བུ་ཁྱོད་ཀྱི་མྱ་ངན་དང་དུད་མོས་བདག་ཅག་མིག་ལྡོངས་པར་གྱུར་པ་ལས། ད་ཁྱོད་ཉིད་འོངས་ནས་བདག་ཅག་གི་མིག་སོར་ཆུད་ཀྱིས། བདག་ཇི་སྲིད་གསོན་པ་དེ་སྲིད་དུ་རབ་ཏུ་མ་འབྱུང་བར་ནམ་ཤི་བར་གྱུར་པ་དེའི་ཚེ་རབ་ཏུ་བྱུང་ཤིག །དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་དྲུང་དུ་ཆོས་མཉན་པས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །ཕ་དང་མ་གཉིས་ཀྱང་སྐྱབས་སུ་འགྲོ་བ་དང་བསླབ་པའི་གཞི་རྣམས་ལ་བཀོད་དོ། །ལུང་བཞིན་རྟོགས་པར་བྱས་ཏེ་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱས་སོ། །ཕ་དང་མ་གཉིས་ཀྱང་བདེན་པ་རྣམས་ལ་བཀོད་དོ། །དུས་གཞན་ཞིག་ན་དེའི་ཕ་དང་མ་ཤི་ནས་དེས་ནོར་དེ་དག་ཕོངས་པ་དང་། མགོན་མེད་པ་དང་། བཀྲེན་པ་དང་། ཉམ་ཐག་པ་རྣམས་ལ་ཕྱིན་ཏེ། བཀྲེན་པ་ཕལ་མོ་ཆེ་ཞིག་དབུལ་བོར་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་གང་ན་བདེར་སོང་སྟེ་ཕྱིན་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རྐང་པ་གཉིས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་གྲོ་བཞིན་སྐྱེས་རྣ་བ་བྱེ་བ་རིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་ཀཱ་ཏྱཱ་ཡ་ན་ཆེན་པོ་བདག་ལེགས་པར་གསུངས་པའི་ཆོས་འདུལ་བ་ལ་
རབ་ཏུ་བྱུང་བ་དང་བསྙེན་པར་རྫོགས་ཏེ་དགེ་སློང་གི་དངོས་པོ་གནང་ན། བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་པར་འཚལ་ལོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེ་རབ་ཏུ་ཕྱུང་ངོ་། །དེས་རབ་ཏུ་ཕྱུང་ནས་མ་མོ་རྟོགས་པར་བྱས་ཏེ། ཕྱིར་མི་འོང་བའི་འབྲས་བུ་མངོན་སུམ་དུ་བྱས་སོ། །རྡོ་ཅན་ཞེས་བྱ་བའི་ཡུལ་གྱི་མཐའ་ན་དགེ་སློང་གི་ཚོགས་ཉུང་སྟེ་གྲངས་བཅུར་བསྐང་བ་དཀའ་ནས། དེས་དེ་ཟླ་བ་གསུམ་དུ་དགེ་ཚུལ་དུ་བཞག་གོ །ཆོས་ཉིད་ཀྱིས་སངས་རྒྱས་བཅོམ་ལྡན་འདས་རྣམས་ཀྱི་ཉན་ཐོས་རྣམས་ཀྱི་འདུས་པ་ནི་གཉིས་སུ་འགྱུར་ཏེ། འདུས་པ་ཆེན་པོ་ནི་དབྱར་ཟླ་འབྲིང་པོའི་དབྱར་ཉེ་བར་སྒྲུབ་པ་ལ་གང་ཡིན་པ་དང་། སྟོན་ཟླ་འབྲིང་པོའི་ཉ་ལ་གང་ཡིན་པའོ། །དེ་ལ་གང་དག་དབྱར་ཟླ་འབྲིང་པོའི་དབྱར་ཉེ་བར་སྒྲུབ་པ་ལ་འདུས་པ་དེ་དག་ནི་ཡིད་ལ་བྱེད་པའི་ཁྱད་པར་དེ་དང་དེ་དག་བཟུང་ནས་ཆུབ་པར་བྱས་ཏེ་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དེ་དང་དེ་རྣམས་སུ་དབྱར་གནས་པར་དམ་འཆའོ། །གང་དག་སྟོན་ཟླ་འབྲིང་པོའི་ཉ་ལ་འདུས་པ་དེ་དག་ནི་ཇི་ལྟར་རྟོགས་པ་དག་སྨྲས་ནས་གོང་མ་དག་འདྲི་བར་བྱེད་དེ། ཉན་ཐོས་ཆེན་པོ་རྣམས་ཀྱི་ཡང་དེ་དང་འདྲའོ། །དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་ལྷན་ཅིག་གནས་པ་དང་། ཉེ་གནས་ཀྱི་དགེ་སློང་དག་གིས་ཡིད་ལ་བྱེད་པའི་ཁྱད་པར་དེ་དང་དེ་དག་བཟུང་ནས་ཆུབ་པར་བྱས་ཏེ་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དེ་དང་དེ་རྣམས་སུ་དབྱར་གནས་པར་དམ་བཅས་སོ། །དེ་དག་གིས་དབྱར་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན་ཆོས་གོས་ཟིན་པ་དང་ལྡན་ནས། ལྷུང་བཟེད་དང་ཆོས་གོས་ཐོགས་ཏེ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་གང་ན་བ་དེར་དོང་སྟེ་ཕྱིན་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རྐང་པ་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་
ནས་དེ་དག་གིས་ཇི་ལྟར་རྟོགས་པ་དག་སྨྲས་ཏེ། གོང་མ་དག་ཀྱང་འདྲིའོ། །ཚོགས་ཀྱི་གྲངས་ཀྱང་བཅུར་བསྐངས་ནས་དེས་དེ་བསྙེན་པར་རྫོགས་པར་བྱས་སོ། །དེས་སྡེ་སྣོད་གསུམ་རྟོགས་པར་བྱས་ནས་ཉོན་མོངས་པ་ཐམས་ཅད་སྤངས་ཤིང་དགྲ་བཅོམ་པ་མངོན་སུམ་དུ་བྱས་ཏེ་དགྲ་བཅོམ་པར་གྱུར་ནས་ཁམས་གསུམ་གྱི་འདོད་ཆགས་དང་བྲལ་བ་གྱོ་མོ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཉམ་པའི་སེམས་ཙན་དན་དང་སྟེའུར་མཉམ་པ། རིག་པས་མ་རིག་པའི་སྒོ་ངའི་སྦུབས་དྲལ་བ། རིག་པ་དང་། མངོན་པར་ཤེས་པ་དང་། སོ་སོར་ཡང་དག་པར་རིག་པ་ཐོབ་པ། སྲིད་པ་དང་། རྙེད་པ་དང་། ཆགས་པ་དང་། བཀུར་སྟི་ལས་ཕྱིར་ཕྱོགས་པ། དབང་པོ་དང་ཉེ་དབང་པོའི་ལྷ་དང་བཅས་པ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་ལྷན་ཅིག་གནས་པ་དང་། ཉེ་གནས་ཀྱི་དགེ་སློང་རྣམས་ཀྱིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་བསྙེན་བཀུར་བྱས་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །མཁན་པོ་ནི་བདག་ཅག་གིས་མཐོང་སྟེ། བསྙེན་བཀུར་ཡང་བགྱིས་ལགས་ཀྱིས། བཅོམ་ལྡན་འདས་ལ་བདག་ཅག་རྣམས་བསྙེན་བཀུར་བགྱིད་དུ་མཆིའོ། །བུ་དག་དེ་བཞིན་དུ་གྱིས་ཤིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་བསྙེན་བཀུར་བྱ་བ་ཁོ་ན་ཡིན་ནོ། །དེའི་ཚེ་གྲོ་བཞིན་སྐྱེས་རྣ་བ་བྱེ་བ་རི་འཁོར་དེ་ཉིད་ཀྱི་ནང་དུ་ཚོགས་ཤིང་འདུག་པར་གྱུར་ཏོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །བདག་གིས་མཁན་པོ་ཡང་མཐོང་། བཅོམ་ལྡན་འདས་ཀྱང་ཆོས་ཀྱི་སྐུར་ནི་མཐོང་ན། གཟུགས་ཀྱི་
སྐུ་མ་མཐོང་བས། མཁན་པོ་བཅོམ་ལྡན་འདས་ཀྱི་གཟུགས་ཀྱི་སྐུ་ལྟར་མཆིའོ། །བུ་དེ་བཞིན་དུ་གྱིས་ཤིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་བ་ནི་རྙེད་པར་དཀའ་སྟེ། དཔེར་ན་མེ་ཏོག་ཨུ་དུམ་བཱ་ར་དང་མཚུངས་སོ། །བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱོས་ལ། བདག་གི་ཚིག་འདིས་རེག་པར་སྤྱོད་དམ་ཞེས་བྱ་བའི་བར་དང་། ཞུ་བ་ལྔ་པོ་འདི་དག་ཀྱང་ཞུས་ཤིག །བཙུན་པ་རྡོ་ཅན་ཞེས་བགྱི་བའི་ཡུལ་གྱི་མཐའ་ན་དགེ་སློང་ཉུང་བས་གྲངས་བཅུར་བསྐང་བ་དཀའ་ན་དེ་ལ་ཇི་ལྟར་བདག་གིས་བསྒྲུབ་པར་བགྱི། བཙུན་པ་བ་ལང་གི་རྗེས་ཀྱིས་ས་རྩུབ་པོར་གྱུར་པ་དང་། རྡོ་ཅན་ཞེས་བགྱི་བའི་ཡུལ་གྱི་མཐའ་ན་འདི་ལྟ་བུའི་གདིང་བ་དང་། དགབ་པ་འདི་ལྟ་སྟེ། ལུག་གི་ལྤགས་པ་དང་། བའི་ཀོ་བ་དང་། རི་དགས་ཀྱི་ལྤགས་པ་དང་། རའི་ལྤགས་པ་ལས་བགྱིད་དོ། །ཇི་ལྟར་ཡུལ་གཞན་དག་ན་འདི་ལྟ་བུའི་གདིང་བ་དང་། དགབ་པ་འདི་ལྟ་སྟེ། བལ་སྟན་དང་། ཤིང་ཤུན་གྱི་སྟན་དང་། སྲིན་བལ་གྱི་སྟན་དང་། རས་བལ་གྱི་སྟན་དག་མཆིས་པ་དེ་བཞིན་དུ་རྡོ་ཅན་ཞེས་བགྱི་བའི་ཡུལ་གྱི་མཐའ་ན་འདི་ལྟ་བུའི་གདིང་བ་དང་། དགབ་པ་འདི་ལྟ་སྟེ། ལུག་གི་པགས་པ་དང་ཞེས་བྱ་བ་གོང་མ་བཞིན་ནོ། །ཆུས་འདག་པར་འཚལ་བའི་མི་རྣམས་རྟག་པར་ཁྲུས་ལ་སྤྱོད་པ་དང་། དགེ་སློང་གིས་དགེ་སློང་ལ་ཆོས་གོས་བསྐུར་བ་ཚུ་རོལ་ནས་ནི་སྤགས་ལ་དེར་ནི་མ་མཆིས་ན། དེ་གང་ལ་སྤང་བའི་ལྟུང་བྱེད་དུ་འགྱུར་ཞེས་ཞུས་ཤིག །ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རིས་ཅང་མི་སྨྲ་བས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལས་མཉན་ཏོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རྐང་པ་གཉིས་ལ་མགོ་བོས་ཕྱག་བྱས་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་དྲུང་ནས་སོང་ངོ་། །དེ་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་དེ་ཉིད་ཀྱི་མཚན་མོ་འདས་ནས་སྔ་དྲོའི་དུས་སུ་ཤམ་ཐབས་བགོས་
ལྷུང་བཟེད་དང་ཆོས་གོས་ཐོགས་ནས་གནས་པ་ཞེས་བྱ་བའི་གྲོང་དུ་བསོད་སྙོམས་ལ་ཞུགས་ཏེ། ཇི་ཙམ་ན་རིམ་གྱིས་མཉན་ཡོད་དུ་ཕྱིན་ཏོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་ལྷུང་བཟེད་དང་ཆོས་གོས་མཁོས་སུ་ཕབ་ནས་རྐང་པ་གཉིས་བཀྲུས་ཏེ། བཅོམ་ལྡན་འདས་གང་ན་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དེ་བཞིན་གཤེགས་པ་དང་། གྲོ་བཞིན་སྐྱེས་རྣ་བ་བྱེ་བ་རེ་གཙུག་ལག་ཁང་གཅིག་ཏུ་ཁྲི་ཤོམས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ཀྱི་ལྟར་མཉན་ནས། དེ་བཞིན་གཤེགས་པ་དང་གྲོ་བཞིན་སྐྱེས་རྣ་བ་བྱེ་བ་རི་གཙུག་ལག་ཁང་གཅིག་ཏུ་ཁྲི་བཤམས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དེ་བཞིན་གཤེགས་པ་དང་གྲོ་བཞིན་སྐྱེས་རྣ་བ་བྱེ་བ་རི་གཙུག་ལག་ཁང་གཅིག་ཏུ་ཁྲི་བཤམས་ལགས་ཏེ། བཅོམ་ལྡན་འདས་ད་དེའི་དུས་ལ་བབ་པ་ལགས་སོ། །དེ་ནས་བཅོམ་ལྡན་འདས་དང་གྲོ་བཞིན་སྐྱེས་རྣ་བ་བྱེ་བ་རི་གཙུག་ལག་ཁང་གང་ན་བ་དེར་གཤེགས་ཏེ་བྱོན་ནས། གཙུག་ལག་ཁང་གི་ཕྱི་རོལ་དུ་ཞབས་གཉིས་བཀྲུས་ཏེ་གཙུག་ལག་ཁང་དུ་ཞུགས་ནས་ དགོངས་པ
་མངོན་དུ་བཞག་སྟེ་བཞུགས་སོ། །ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་ཡང་གཙུག་ལག་ཁང་གི་ཕྱི་རོལ་དུ་རྐང་པ་གཉིས་བཀྲུས་ནས་གཙུག་ལག་ཁང་དུ་ཞུགས་ཏེ་སྐྱིལ་མོ་ཀྲུང་བཅས་ལུས་བསྲང་ནས་དྲན་པ་མངོན་དུ་ཕྱོགས་པར་བཞག་ནས་འདུག་སྟེ། བཅོམ་ལྡན་འདས་དང་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་འཕགས་པའི་མི་སྨྲ་བས་དེའི་མཚན་མོ་འདས་པར་མཛད་དོ། །དེ་ནས་བཅོམ་ལྡན་འདས་ཀྱིས་ནམ་ནངས་སུ་ཉེ་བ་ན་ཚེ་དང་ལྡན་པ་གྲོ་
བཞིན་སྐྱེས་རྣ་བ་བྱེ་བ་རི་ལ་བཀའ་སྩལ་པ། གྲོ་བཞིན་སྐྱེས་ཆོས་གང་ལ་བདག་གིས་མངོན་པར་ཤེས་ཏེ་མངོན་པར་སངས་རྒྱས་ནས་གསུངས་པ་ལ་ཁྱོད་སྤོངས་པར་གྱིས་ཤིག །དེ་ནས་གྲོ་བཞིན་སྐྱེས་རྣ་བ་བྱེ་བ་རི་བཅོམ་ལྡན་འདས་ཀྱིས་སྐབས་ཕྱེ་བ་དང་རྡོ་ཅན་ཞེས་བྱ་བའི་མཐའི་དབྱངས་ཀྱི་ང་རོས་ཆེད་དུ་བརྗོད་པ་དང་། ཕ་རོལ་འགྲོ་བྱེད་དང་། བདེན་པ་མཐོང་བ་དང་། རི་གནས་ཀྱི་ཚིགས་སུ་བཅད་པ་དང་། ཕ་པའི་ཚིགས་སུ་བཅད་པ་དང་། གནས་བརྟན་གྱི་ཚིགས་སུ་བཅད་པ་དང་། གནས་བརྟན་མའི་ཚིགས་སུ་བཅད་པ་དང་། དོན་གྱི་ཚོམས་ཀྱི་མདོ་སྡེ་དག་གསང་བསྟོད་དེ་བཏོན་ཏོ། །དེ་ནས་བཅོམ་ལྡན་འདས་ཀྱིས་གྲོ་བཞིན་སྐྱེས་རྣ་བ་བྱེ་བ་རིས་བརྗོད་པ་རྫོགས་པར་མཁྱེན་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་ལ་འདི་སྐད་ཅེས་བཀའ་སྩལ་ཏོ། །གྲོ་བཞིན་སྐྱེས་ཁྱོད་ཀྱིས་གང་དག་བདག་གིས་མངོན་པར་ཤེས་ཏེ་མངོན་པར་སངས་རྒྱས་ནས་གསུངས་པའི་ཆོས་གྱ་ནོམ་པ་དང་སྙན་པར་བསྒྲགས་པ་ལེགས་སོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་འདི་སྙམ་དུ་སེམས་ཏེ། ད་བཅོམ་ལྡན་འདས་ལ་བདག་གི་མཁན་པོས་ཕྲིན་གསོལ་བ་སྨྲ་བའི་དུས་ལ་བབ་བོ་སྙམ་དུ་རིག་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་རྡོ་ཅན་ཞེས་བགྱི་བའི་ཡུལ་གྱི་མཐའ་གནས་པ་ཞེས་བགྱི་བའི་གྲོང་ན། བཙུན་པ་ཀཱ་ཏྱཱ་ཡ་ན་ཆེན་པོ་མཆིས་པ་དེ་བདག་གི་མཁན་པོ་ལགས་ཏེ། དེ་ཡང་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་བདེ་བ་དང་ཉམ་པ་མ་མཆིས་པས་བདེ་བ་ལ་རེག་པར་སྤྱོད་དམ་ཞེས་སྙུན་གསོལ་ལགས་སོ། །གྲོ་བཞིན་སྐྱེས་དགེ་སློང་ཀཱ་ཏྱཱ་ཡ་ན་བདེ་བར་གྱུར་ཅིག །ཞུ་བ་ལྔ་པོ་དག་ཀྱང་རྒྱས་པར་བརྗོད་པར་བྱའོ། །དེ་ནས་བཅོམ་ལྡན་འདས་ཀྱིས་
གྲོ་བཞིན་སྐྱེས་རྣ་བ་བྱེ་བ་རི་ལ་འདི་སྐད་ཅེས་བཀའ་སྩལ་ཏོ། །གྲོ་བཞིན་སྐྱེས་རེ་ཞིག་ངས་ཞུ་བ་འདི་ལུང་བསྟན་པའི་དུས་ལ་མ་བབ་ཀྱིས་དགེ་འདུན་གྱི་ནང་དུ་ཞུ་བ་ཞུས་ཤིག་དང་དེར་ཁྱོད་ཀྱི་ཞུ་བ་ལུང་བསྟན་པའི་དུས་ལ་བབ་བོ། །དེ་ནས་བཅོམ་ལྡན་འདས་ནང་པར་སྔར་བཞེངས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་ཞེས་བྱ་བ་ནས་ཕྱོགས་གཅིག་ཏུ་འདུག་གོ་ཞེས་བྱ་བའི་བར་དུ་སྟེ། གྲོ་བཞིན་སྐྱེས་རྣ་བ་བྱེ་བ་རིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་རྡོ་ཅན་ཞེས་བགྱི་བའི་ཡུལ་གྱི་མཐའ་ན་གནས་པ་ཞེས་བགྱི་བའི་གྲོང་ན་བཙུན་པ་ཀཱ་ཏྱཱ་ཡ་ན་ཆེན་པོ་མཆིས་པ་དེ་བདག་གི་མཁན་པོ་ལགས་ཏེ། དེ་ཡང་བཅོམ་ལྡན་འདས་ཀྱི་ཞབས་ལ་ཞེས་བྱ་བ་ནས་བདེ་བ་ལ་རེག་པར་སྤྱོད་དམ་ཞེས་བྱ་བའི་བར་དུའོ། །ཞུ་བ་ལྔ་པོ་གོང་དུ་ཇི་སྐད་དུ་སྤང་བའི་ལྟུང་བྱེད་ཀྱི་བར་བརྗོད་པ་ཡང་རྒྱས་པར་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་རྗེས་སུ་གནང་སྟེ། ཡུལ་མཐའ་འཁོབ་རྣམས་སུ་འདུལ་བ་འཛིན་པ་དང་ལྔའི་ཚོགས་ཀྱིས་བསྙེན་པར་རྫོགས་པ་དང་། རྟག་ཏུ་ཁྲུས་བྱས་པ་དང་། མཆིལ་ལྷམ་རིམ་གཅིག་པ་བཅང་བར་བྱ་སྟེ། རིམ་གཉིས་པ་མ་ཡིན། རིམ་གསུམ་པ་མ་ཡིན་ནོ། །གལ་ཏེ་ཟད་པར་གྱུར་ན་ལྷན་བས་བཏབ་སྟེ་བཅང་བར་བྱའོ། །ཀོ་བ་བཅང་བར་བྱའོ། །དགེ་སློང་གིས་དགེ་སློང་ལ་ཆོས་གོས་བསྐུར་བ་ཚུ་རོལ་ནས་ནི་སྤངས་ལ་དེར་མ་ཕྱིན་ན་གང་ལ་ཡང་སྤང་བའི་ལྟུང་བྱེད་དུ་མི་འགྱུར་རོ། །བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་ཡུལ་མཐའ་འཁོབ་རྣམས་སུ་འདུལ་བ་འཛིན་པ་དང་ལྔའི་ཚོགས་ཀྱིས་བསྙེན་པར་རྫོགས་པར་བྱའོ་ཞེས་གང་གསུངས་པ་དེ་ལ་དབུས་ནི་གང་ལགས། མཐའ་འཁོབ་ནི་གང་ལགས། ཉེ་བ་འཁོར་ཤར་ཕྱོགས་ན་ལི་ཁར་ཤིང་འཕེལ་
ཞེས་བྱ་བའི་གྲོང་ཡོད་པ་དེའི་ཤར་ཕྱོགས་ན་ལི་ཁར་ཚང་ཚིང་ཞེས་བྱ་བའི་ཚལ་ཡོད་དེ་དེ་ནི་དབུས་སོ། །དེ་ཕན་ཆད་ནི་མཐའ་འཁོབ་བོ། །ལྷོ་ཕྱོགས་ན་འདམ་བུ་ཅན་ཞེས་བྱ་བའི་གྲོང་ཡོད་པ་དེའི་ཕ་རོལ་ན་འདམ་བུ་ཅན་ཞེས་བྱ་བའི་ཆུ་བོ་ཡོད་པ་དེ་ནི་དབུས་སོ། །དེ་ཕན་ཆད་ནི་མཐའ་འཁོབ་བོ། །ནུབ་ཕྱོགས་ན་བྲམ་ཟེའི་གྲོང་ཀ་བ་དང་ཉེ་བའི་ཀ་བ་དག་ཡོད་དེ་དེ་ནི་དབུས་སོ། །དེ་ཕན་ཆད་ནི་མཐའ་འཁོབ་བོ། །བྱང་ཕྱོགས་ན་ཨུ་ཤི་རིའི་རི་ཞེས་བྱ་བ་ཡོད་དེ་དེ་ནི་དབུས་སོ། །དེ་ཕན་ཆད་ནི་མཐའ་འཁོབ་བོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་པ་ནོར་མང་བ་ལོངས་སྤྱོད་ཆེ་བའི་རིགས་དང་རིན་པོ་ཆེས་སྤྲས་པའི་རྣ་ཆ་རྣ་བ་ལ་ཐོགས་ཤིང་བཙས་ལ། ངན་སོང་མཐོང་ཞིང་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གྲོ་བཞིན་སྐྱེས་རྣ་བ་བྱེ་བ་རི་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་བཱ་རཱ་ཎ་སཱིའི་གྲོང་ཁྱེར་དུ་སྟོན་པ་འོད་སྲུང་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བ་ནས་འཇིག་རྟེན་དུ་སྒྲ་རྣམ་པར་གྲགས་བ་ཞེས་བྱ་བའི་བར་འཇིག་རྟེན་དུ་བྱུང་ངོ་། །བཱ་རཱ་ཎ་སཱིའི་གྲོང་ན་ཁྱོ་ཤུག་གཉིས་ཤིག་ཡོད་པ་དེ་གཉིས་ཀྱིས་ཡང་དག་པར་རྫོགས་པའི་སངས་རྒྱས་འོད་སྲུང་ལས་སྐྱབས་སུ་འགྲོ་བ་དང་བསླབ་པའི་གཞི་རྣམས་མནོས་སོ། །གང་གི་ཚེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་སངས་རྒྱས་ཀྱི་མཛད་པ་མཐའ་དག་མཛད་ནས་ཕུང་པོའི་ལྷག་
མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དང་རྒྱལ་པོ་ཀྲི་ཀཱིས་དེའི་མཆོད་རྟེན་རིན་པོ་ཆེ་སྣ་བཞི་ལས་ཁོ་ར་ཁོར་ཡུག་ཏུ་དཔག་ཚད་གང་ཙམ་ལ་འཕང་དུ་དཔག་ཚད་ཕྱེད་པ་ཞིག་བྱེད་དུ་བཅུག་ནས། དེ་ཞིག་ཅིང་གོགས་པ་སླར་བཅོས་པའི་ཕྱིར་གྲོང་ཁྱེར་གྱི་ཤར་ཕྱོགས་ཀྱི་སྒོ་ནས་དཔྱ་འདུ་བ་གང་ཡིན་པ་དེ་དག་དེས་མཆོད་རྟེན་དེ་ལ་ཕུལ་ལོ། །གང་གི་ཚེ་རྒྱལ་པོ་ཀྲི་ཀཱི་ཤི་ནས་དེའི་བུ་ལེགས་སྐྱེས་ཞེས་བྱ་བ་དེ་རྒྱལ་སྲིད་ལ་བཞག་པ་དང་དེའི་བློན་པོ་དག་གིས་དཔྱ་ཉུང་ཤས་ཤིག་ཕུལ་ལོ། །དེས་བློན་པོ་རྣམས་ལ་སྨྲས་པ། ཅིའི་ཕྱིར་ཁྱེད་ཀྱིས་ང་ལ་དཔྱ་ཉུང་ངུ་ཞིག་ཕུལ། ངའི་ཡུལ་ནས་དཔྱ་མི་འདུ་འམ་ཞེས་སྨྲས་པ་དང་། དེ་དག་གིས་སྨྲས་པ། ལྷ་དཔྱ་དེ་ལས་འདུ་བ་གང་ལ་མཆིས། ལྷ་གྲོང་ཁྱེར་གྱི་ཤར་ཕྱོགས་ཀྱི་སྒོ་ནས་དཔྱ་འདུ་བ་གང་ལགས་པ་དེ་དག་ནི་རྒྱལ་པོ་ཡབ་ཀྱི་མཆོད་རྟེན་ཞིག་ཅིང་གོགས་པ་སླར་བཅོས་པའི་རྒྱུར་གཞག་གོ །གལ་ཏེ་ལྷས་གནང་ན་དཔྱ་དེ་བདག་ཅག་གིས་དགུམ་མོ། །དེས་སྨྲས་པ། ཤེས་ལྡན་ངའི་ཡབ་ཀྱིས་གང་མཛད་པ་དེ་ནི་ཚངས་པས་བྱས་པའོ། །དེ་ནི་བརྒྱ་བྱིན་གྱིས་བྱས་པའོ། །དེ་དག་གིས་བསམས་པ། གལ་ཏེ་ལྷས་གནང་ན་བདག་ཅག་གིས་ཅི་ནས་དཔྱ་དེ་དག་རང་འདུ་བར་མི་འགྱུར་བ་དེ་ལྟར་བྱའོ་སྙམ་ནས། དེ་དག་གིས་སྒོ་བཅད་དེ་བཞག་པས་ཕྱིན་ཆད་དཔྱ་འདུ་བ་ཆད་དོ། །མཆོད་རྟེན་དེ་ཡང་ཞིག་ཅིང་གོགས་པར་གྱུར་པ་དང་། ཁྱོ་ཤུག་དེ་གཉིས་རྒས་པར་གྱུར་པ་ནས་མཆོད་རྟེན་དེ་ཉིད་ལ་བྱི་དོར་བྱེད་ཅིང་འདུག་གོ །བྱང་ཕྱོགས་ནས་དེད་དཔོན་ཞིག་ཟོང་ཐོགས་ཏེ་བཱ་རཱ་ཎ་སཱིའི་གྲོང་དུ་ཕྱིན་པ་དང་། དེས་མཆོད་རྟེན་ཞིག་ཅིང་གོགས་པར་གྱུར་པ་དེ་མཐོང་ངོ་། །དེས་མཐོང་ནས་ཡབ་ཡུམ་མཆོད་རྟེན་འདི་སུའི་ལགས་ཞེས་དྲིས་སོ། །དེ་གཉིས་ཀྱིས་སྨྲས་པ། ཡང་དག་པར་རྫོགས་པའི་སངས་རྒྱས་འོད་སྲུང་གི་ཡིན་ནོ། །སུས་བགྱིས་པ། རྒྱལ་པོ་ཀྲི་ཀཱི་སོ། །རྒྱལ་པོ་ཀྲྀ་ཀཱི་
དེས་མཆོད་རྟེན་དེ་ཞིག་པ་དང་གོགས་པ་སླར་བཅོས་པའི་ཕྱིར་ཕུལ་བཅུང་ཟད་མེད་དམ། དེ་གཉིས་ཀྱིས་སྨྲས་པ། ཕུལ་བ་ཡོད་དེ་གྲོང་ཁྱེར་གྱི་ཤར་ཕྱོགས་ཀྱི་སྒོ་ནས་དཔྱ་འདུ་བ་གང་དག་མཆོད་རྟེན་དེ་ཞིག་པ་དང་གོགས་པ་བཅོས་པའི་ཕྱིར་ཕུལ་བ་ལས་རྒྱལ་པོ་ཀྲི་ཀཱི་ནོངས་ནས་དེའི་སྲས་ལེགས་སྐྱེས་ཞེས་བྱ་བ་དེ་རྒྱལ་སྲིད་ལ་བཞག་ནས་དེས་དཔྱ་འདུ་བ་དེ་བཅད་པས་མཆོད་རྟེན་ཞིག་ཅིང་གོགས་པར་གྱུར་ཏོ། །དེས་རིན་པོ་ཆེས་སྤྲས་པའི་རྣ་ཆ་རྣ་བ་ལས་བཀྲོལ་ནས་དེས་དེ་གཉིས་ལ་བྱིན་ཏེ་སྨྲས་པ། ཡབ་ཡུམ་རིན་པོ་ཆེའི་རྣ་ཆ་འདིས་མཆོད་རྟེན་འདི་ཞིག་ཅིང་གོགས་པ་རྣམས་ཆོས་ཤིག །བདག་ནམ་ཟོང་རྣམས་འགྱུར་ཏེ་འོངས་ནས་ཕྱིས་ཀྱང་སྦྱིན་ནོ། །དེ་གཉིས་ཀྱིས་དེ་བཙོངས་ནས་དེས་མཆོད་རྟེན་དེ་ཞིག་པ་དང་གོགས་པ་སླར་བཅོས་ཏེ་ཁ་ཅིག་ནི་ལྷག་གོ །དེ་ནས་དུས་ཕྱི་ཞིག་ན་དེད་དཔོན་གྱིས་ཟོང་བསྒྱུར་ནས་སྤོགས་ཁྱེར་ཏེ་འོངས་སོ། །དེས་མཆོད་རྟེན་དེ་ལྟ་བས་མི་ངོམས་པ་ཞིག་ཏུ་མཐོང་ངོ་། །མཐོང་ནས་ཀྱང་དེ་ཕྱིར་ཞིང་རབ་ཏུ་དགའ་བ་དང་། དང་བ་སྐྱེས་ཏེ་དྲིས་པ། ཡབ་ཡུམ་ཁྱེད་ཀྱིས་སྐྱིན་པོ་ཅུང་ཟད་མ་བྱས་སམ། དེ་གཉིས་ཀྱིས་སྨྲས་པ། བུ་བདག་ཅག་གིས་སྐྱིན་པོ་ཅུང་ཟད་ཀྱང་མ་བྱས་ཏེ། འོན་ཀྱང་ལྷག་པ་ཡང་ཡོད་དོ། །དེ་རབ་ཏུ་དང་བ་སྐྱེས་ནས་དེ་ལ་ཅི་ལྷག་པ་དང་གཞན་ཡང་ཕུལ་ནས་མཆོད་པ་དང་བཀུར་སྟི་ཆེར་བྱས་ཏེ་དགེ་བའི་རྩ་བ་འདིས་བདག་ཕྱུག་པ་དང་། ནོར་མང་བ་དང་། ལོངས་སྤྱོད་ཆེ་བའི་རིགས་སུ་སྐྱེ་བ་དང་། ཆོས་འདི་ལྟ་བུ་ཐོབ་པ་དང་། སྟོན་པ་འདི་ལྟ་བུ་ཁོ་ན་མཉེས་པར་བྱེད་ཀྱི། མི་མཉེས་པར་མི་བྱེད་པར་གྱུར་ཅིག་ཅེས་སྨོན་ལམ་བཏབ་བོ། །དགེ་སློང་དག་ཇི་སྙམ་དུ་སེམས།4A དེད་དཔོན་གང་ཡིན་པ་དེ་ནི་གྲོ་བཞིན་སྐྱེས་རྣ་བ་བྱེ་བ་རི་འདི་ཉིད་ཡིན་ཏེ། འདིས་གང་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་བྱ་བ་བྱས་ཏེ་སྨོན་ལམ་བཏབ་པའི་ལས་དེའི་རྣམ་པར་སྨིན་པས་ཕྱུག་པ་དང་། ནོར་མང་བ་དང་། ལོངས་སྤྱོད་
ཆེ་བའི་རིགས་དང་། རིན་པོ་ཆེས་སྤྲས་པའི་རྣ་ཆ་རྣ་བ་ལ་ཐོགས་བཞིན་དུ་བཙས་ཤིང་པའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱས་ཏེ། འདིས་ཡང་དག་པར་རྫོགས་པའི་སངས་རྒྱས་འོད་སྲུང་དང་ཤུགས་མཉམ་པ། སྟོབས་མཉམ་པ། བརྩོན་པ་མཉམ་པ། མི་མཉམ་པ་དག་མཉམ་པ་བརྙེས་པའི་སྟོན་པ་ང་མཉེས་པར་བྱས་ཀྱི་མ་མཉེས་པར་ནི་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་བར་སྨིན་པ་ནི་གཅིག་ཏུ་གནག་པ་ཡིན། གཅིག་ཏུ་དཀར་བ་རྣམས་ཀྱི་ནི་དཀར་པ་ཡིན། འདྲེན་མེ་རྣམས་ཀྱི་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་ཁོ་ན་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །བཙུན་པ་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་མཐོང་བའི་ཆོས་འདི་ཉིད་ལ་ངན་སོང་དག་མཐོང་བ་ལགས། བཅོམ་ལྡན་འདས་ཀྱིས་བཀའ་སྩལ་པ་འདིས་མ་ལ་ངག་གི་ལས་རྩུབ་མོ་སྨྲས་པ་དེའི་ལས་དེའི་རྣམ་པར་སྨིན་པས་མཐོང་བའི་ཆོས་ཉིད་ལ་ངན་སོང་དག་མཐོང་ངོ་། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཉེ་དགའ་དགེ་འདུན་གྱི་གསར་བུ་ཡིན་པས་དེ་གྲལ་རིམས་ཀྱིས་ཁྲི་ལྡེག་པ་ཞིག་ཐོབ་པ་དང་། དེ་ཞིག་གིས་དོགས་པས་བླ་འོག་མ་བསྒྱུར་བར་ཉལ་ལོ། །དེས་བསམས་པ། བདག་ཉེ་དགའ་ཡིན་ན་ཁྲི་ལ་ཡང་ཆགས་སམ། གལ་ཏེ་མལ་ཆའམ་ཁྲི་མ་རྗེས་ན་ཉེ་དགའ་ཞེས་བྱ་བའི་མིང་ཡང་མི་འདོགས་སོ་སྙམ་ནས། དེ་ནང་པར་སྔར་ལངས་ཏེ་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱི་དྲུང་དུ་སོང་བ་དང་དེས་དེ་ལ་སྨྲས་པ། བཙུན་པ་ཉེ་དགའ་བྱོན་པ་ལེགས་སོ། །བྱོན་པ་ལེགས་སོ། །ཇིག་བཙུན་
པ་ཉེ་དགའ་བདེ་བར་གཟིམས་སམ། དེས་སྨྲས་པ། གསུས་པོ་ཆེ་ཁྱོད་ཇི་སྙམ་དུ་སེམས། ཇི་ལྟར་བདག་མལ་སྟན་རིམ་པ་བརྒྱད་ལ་ཉལ་བ་བཞིན་ཉེ་དགའ་ཡང་དེ་བཞིན་སྙམ་མམ། ཁོ་བོ་དགེ་འདུན་གྱི་གསར་བུ་ཡིན་པས་ཁོ་བོ་གྲལ་རིམས་ཀྱིས་ཁྲི་ལྡེག་པ་ཞིག་ཐོབ་སྟེ། དེ་ཞིག་གིས་དོགས་ནས་ཁོ་བོ་བླ་འོག་ཀྱང་མི་སྒྱུར་བར་ཉལ་ལོ། །བཙུན་པ་ཉེ་དགའ་མལ་ཆ་སྟན་རིམ་པ་བརྒྱད་པོ་འདི་འདྲ་བ་བརྟགས་ལགས་སམ། ལེགས་པར་བརྟགས་པའོ། །ཤིན་ཏུ་བརྟགས་པའོ། །གང་དུ་བཀག་སུས་བཀག །གལ་ཏེ་བརྟགས་པ་ལགས་ན་དབུལ་གྱིས་སྣོམས་ལ་བཞུད་ཅིག །ཉེ་དགས་སྨྲས་པ། གསུས་པོ་ཆེ་ཀོ་ས་ལའི་ཡུལ་རྣམས་ཁོ་བོ་དབང་ངམ་ཅི། གཙུག་ལག་ཁང་དུ་སྐྱོལ་ལ་བྱིན་ཅིག །དེས་དེ་ལ་མི་བརྒྱད་བྱིན་ཏེ། དེ་ལ་བཞིས་ནི་མལ་སྟན་རྣམས་ཁྱེར། བཞིས་ཁྲི་ཁྱེར་ནས་དེ་དག་སྲང་གི་དབུས་ནས་འདོད་པ་བྲམ་ཟེ་དང་། ཁྱིམ་བདག་དེ་དག་གིས་མཐོང་ངོ་། །མཐོང་ནས་ཀྱང་དྲིས་པ། ཤེས་ལྡན་དག་དེང་ལྷའི་གཟིམས་མལ་གང་དུ་བྱེད། ཉེ་དགས་སྨྲས་པ། ཉིད་ཀྱི་ཕོ་བྲང་དུའོ། །གཟིམས་མལ་འདི་གང་དུ་ཁྱེར། ཉེ་དགས་སྨྲས་པ། འདི་དག་ནི་བདག་གིས་ཐོབ་བོ། །ཤེས་ལྡན་དག་དགེ་སྦྱོང་ཉེ་དགའ་ནི། འདོད་པའི་ཡོན་ཏན་གྱིས་གཡེན་སྤྱོ་འམ་ཅི། ཞེས་དེ་དག་སྨོད་པར་བྱེད། གཞོགས་འཕྱས་བྱེད། ཁ་ཟེར་བར་བྱེད་དོ། །དེ་གཙུག་ལག་ཁང་དུ་སོང་ནས་གཙུག་ལག་ཁང་ཆག་ཆག་བཏབ། ཕྱག་དར་བྱས་ནས་བའི་ལྕི་བ་སར་པའི་བྱུག་པས་བྱུགས་ཏེ། གནས་མལ་བཤམས་ནས་ཉལ་བར་བསམས་པ་དང་། བཅོམ་ལྡན་འདས་ཀྱིས་ཀྱང་ཕྱོགས་དེར་བྱོན་ཏོ། །དེ་དགའ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གིས་གནས་མལ་ཅི་འདྲ་བ་མཆིས་གཟིགས་སུ་གསོལ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་
5A དག་ཐོག་མ་ཉིད་དུ་རུལ་པ་སྦེད་པ་ནི་སྐྱེས་བུ་གཏི་མུག་ཉེ་དགའ་ཡིན་པར་རིག་པར་བྱའོ། །བཅོམ་ལྡན་འདས་ཀྱིས་ དགོངས་པ
། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་ཁྲི་སྟན་མཐོན་པོ་དང་ཁྲི་སྟན་ཆེན་པོ་ལ་ཉལ་བ་ཡིན་ནོ། །དེ་ལྟ་བས་ན་དགེ་སློང་གིས་ཁྲི་སྟན་མཐོན་པོ་དང་ཁྲི་སྟན་ཆེན་པོ་ལ་འདུག་པར་མི་བྱའོ། །འདུག་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་ཁྲི་སྟན་མཐོན་པོ་དང་སྟན་ཆེན་པོ་ལ་འདུག་པར་མི་བྱའོ་ཞེས་གསུངས་པ་དང་། ཁྱིམ་བདག་གཞན་ཞིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་དུ་སྤྱན་དྲངས་ཏེ། དེས་ཁྲི་སྟན་མཐོན་པོ་དག་བཤམས་པར་བརྩམས་སོ། །ཚེ་དང་ལྡན་པ་ཀུན་དགའ་བོ་སྔོན་རོལ་ཉིད་དུ་སོན་པ་དང་། དེས་སྟན་མཐོན་པོ་དག་ཤོམ་པ་དེ་མཐོང་ནས་དེས་དེ་ལ་སྨྲས་པ། ཁྱིམ་བདག་སྟན་འདི་དག་ནི་དགེ་སློང་དང་འཚམ་པ་མ་ཡིན་གྱིས་སྡུས་ཤིག །དེས་དེ་དག་བསྡུ་བར་བརྩམས་པ་ན་བཅོམ་ལྡན་འདས་ཀྱང་དེར་གཤེགས་སོ། །སངས་རྒྱས་བཅོམ་ལྡན་འདས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་འདི་ཅི་ཞིག་བྱེད། བཅོམ་ལྡན་འདས་ཁྱིམ་བདག་འདིས་ཆེན་པོ་ལ་འོས་པའི་གདན་དག་ཤོམ་ནས་བདག་གིས་ཁྱིམ་བདག་སྟན་འདི་དག་ནི་དགེ་སློང་དང་འཚམ་པ་མ་ཡིན་གྱིས་འདི་དག་སྡུས་ཤིག་ཅེས་བསྒོ་བ་དང་དེ་དག་སྡུད་པ་ལགས་སོ། །ཀུན་དགའ་བོ་ཐམས་ཅད་ལ་འབྱོར་བ་ཡོད་པ་མ་ཡིན་གྱིས། ཀུན་དགའ་བོ་ཁྱིམ་བདག་སྟན་ཤོམ་པ་མ་ཟློག་ཤིག །དེ་ལྟ་བས་ན་རྗེས་སུ་གནང་སྟེ། ཁྱིམ་དུ་ཁྲི་སྟན་མཐོན་པོ་ལ་འདུག་པར་བྱའི་དེར་ཉལ་བར་མི་བྱའོ། །གཙུག་ལག་ཁང་དུ་ནི་འདུག་པར་མི་བྱའོ། །ཉལ་བར་ཡང་མི་བྱ་སྟེ། འདུག་གམ་ཉལ་ན་ཡང་འགལ་ཚབས་ཅན་དུ་འགྱུར་རོ། །ལྷོ་ཕྱོགས་ནས་དགེ་སློང་ཆོས་གོས་གསུམ་པ་གཞན་ཞིག་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཉན་ཡོད་དུ་འོངས་པ་དང་། དེའི་ལྤགས་པའི་གདིང་བ་བཟང་པོ་དེ་
ཉེ་དགས་མཐོང་ནས་དེས་དེ་ལ་སྨྲས་པ། བསོད་སྙོམས་པ་ལྤགས་པ་ཁོ་བོ་ལ་བྱིན་ཅིག །ཁོ་བོ་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འགྲོའོ། །དེས་སྨྲས་པ། བཙུན་པ་ཉེ་དགའ་འགྲོ་ཡང་རུང་མི་འགྲོ་ཡང་རུང་། བདག་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འདིར་འོངས་སོ། །བསོད་སྙོམས་པ་ཁྱོད་ཇི་སྙམ་དུ་སེམས། ཉེ་དགས་འོ་ན་འདི་འདྲ་བའི་ལྤགས་པ་རྙེད་པར་མི་ནུས་སྙམ་འམ། ངའི་རྙེད་པ་ལ་ལྟོས་ཤིག །བཙུན་པ་ཉེ་དགའ་ཁྱོད་ཀྱིས་གང་གི་ཕྱིར་དེ་ནུས་པ་དེའི་ཕྱིར་ཁོ་བོ་མི་འབུལ་ལོ། །ཡུལ་ཀོ་ས་ལའི་རྒྱལ་པོ་གསལ་རྒྱལ་གྱི་བ་ལང་གི་སྤྱན་བྱེད་པ་ཆེན་པོ་ཞེས་བྱ་བ་དང་ཚེ་དང་ལྡན་པ་ཉེ་དགར་བཤེས་པས་དེ་དེའི་གན་དུ་སོང་བ་ན། །ཇི་ཙམ་ན་སོས་ཀའི་དུས་སུ་བེའུ་བཀྲ་ཞིང་བཀྲ་བ་དག་བྱུང་ངོ་། །དེས་བེའུ་གཅིག་གི་རྒྱབ་ཏུ་བྱུགས་པ་དང་། ཆེན་པོས་སྨྲས་པ། བཙུན་པ་ཉེ་དགའ་ཁྱོད་བེའུ་འདིའི་མའི་འོ་མ་གསོལ་བར་བཞེད་དམ་ཅི། དེས་སྨྲས་པ། དེ་ཡང་འདོད་མོད་ཀྱི། འདི་འདྲ་བའི་ལྤགས་་པ་དགེ་སློང་གང་ལ་ཡོད་པ་ནི་སེམས་ལས་ཆུང་དུས་བདེ་བར་དགེ་བའི་ཕྱོགས་ལ་རབ་ཏུ་བརྩོན་པར་འགྱུར་རོ། །ཆེན་པོས་སྨྲས་པ། བཙུན་པ་ཉེ་དགའ་བཀའ་སྩལ་པས་མཇལ་གྱིས་བཞུད་ཅིག །དེ་སོང་བ་དང་ཆེན་པོས་ཕྱུགས་རྫི་ལ་བསྒོ་བ། བེའུ་འདི་སོད་ལ་ཁྱོད་ཀྱིས་ལྤགས་པ་ཁྱེར་ཏེ་བཙུན་པ་ཉེ་དགའ་ལ་ཕུལ་ཅིག །དེས་བེའུ་དེ་བསད་ནས་ལྤགས་པ་ཁྱེར་ཏེ་སོང་བ་དང་། བ་དེ་བེའུ་དེ་ལ་གདུང་བས་སྐད་འབྱིན་ཅིང་རྗེས་བཞིན་དུ་སོང་བ་ལས་དེ་རྒྱལ་བྱེད་ཀྱི་ཚལ་དུ་ཞུགས་པ་དང་། བ་དེ་རྒྱལ་བྱེད་ཀྱི་ཚལ་གྱི་སྒོ་ན་སྐད་འབྱིན་ཅིང་འདུག་གོ །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་རྒྱལ་བྱེད་ཀྱི་ཚལ་གྱི་སྒོ་ན་བ་འདི་ཅིའི་ཕྱིར་སྐད་འབྱིན་ཅིང་འདུག །ཚེ་དང་ལྡན་པ་ཀུན་དགའ་བོས་གསོལ་པ། བཅོམ་ལྡན་འདས་བཙུན་པ་ཉེ་དགའས་བེའུ་དེའི་ལྤགས་་པ་འཚལ་བའི་སླད་དུ་འགུམས་སུ་སྩལ་བས་དེས་ན་བ་དེ་རྒྱལ་བྱེད་ཀྱི་ཚལ་གྱི་
སྒོ་ན་སྐད་འབྱིན་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ་ཉེས་དམིགས་གང་ཅི་བྱུང་བ་དེ་ནི་དགེ་སློང་དག་ཀོ་ལྤགས་འཆང་བ་ཡིན་གྱིས། དེ་ལྟ་བས་ན་དགེ་སློང་གིས་ཀོ་ལྤགས་བཅང་བར་མི་བྱའོ། །བཅངས་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་ཀོ་ལྤགས་བཅང་བར་མི་བྱའོ་ཞེས་གསུངས་པ་དང་། ཁྱིམ་བདག་གཞན་ཞིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་དུ་གདུགས་ཚོད་ལ་སྤྱན་དྲངས་ན་ཁྱིམ་བདག་དེས་གདན་གཞན་བཤམ་དུ་མེད་ནས། དེས་ཀོ་ལྤགས་ཀྱི་གདན་དག་བཤམ་པར་བརྩམས་སོ། །ཚེ་དང་ལྡན་པ་ཀུན་དགའ་བོ་ནང་པར་སྔར་ལངས་ཏེ་ཁྱིམ་བདག་དེའི་ཁྱིམ་དུ་སོང་བ་དང་། དེས་ཁྱིམ་བདག་དེ་ཀོ་ལྤགས་ཀྱི་གདན་དག་ཤོམ་པ་མཐོང་ནས་སྨྲས་པ། ཁྱིམ་བདག་སྟན་འདི་དག་ནི་དགེ་སློང་དང་འཚམ་པ་མ་ཡིན་གྱིས་འདི་དག་སྡུས་ཤིག །དེས་བསྡུ་བར་བརྩམས་པ་ན་བཅོམ་ལྡན་འདས་ཀྱང་དེར་གཤེགས་སོ། །བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་འདི་ཅི་ཞིག་བྱེད། ཚེ་དང་ལྡན་པ་ཀུན་དགའ་བོས་གསོལ་པ། ཁྱིམ་བདག་འདིས་གདན་གཞན་བཤམ་དུ་མ་འབྱོར་ནས་དེ་ན་ཀོ་ལྤགས་ཀྱི་གདན་དག་བཤམས་པ་དང་། བདག་གིས་ཁྱིམ་བདག་གདན་འདི་དག་ནི་དགེ་སློང་དང་འཚམ་པ་མ་ཡིན་གྱིས་འདི་དག་སྡུས་ཤིག་ཅེས་བསྒོ་ནས། དེ་སྟན་འདི་དག་སྡུད་པ་ལགས་སོ། །ཀུན་དགའ་བོ་ཐམས་ཅད་ལ་འབྱོར་བ་མེད་པས་ཀུན་དགའ་བོ་ཁྱིམ་བདག་སྟན་ཤོམ་པ་མ་ཟློག་ཤིག །དེ་ལྟ་བས་ན་རྗེས་སུ་གནང་སྟེ། ཁྱིམ་དུ་ཀོ་ལྤགས་ཀྱི་སྟན་བཤམས་པ་ལ་འདུག་པར་བྱའི་ཉལ་བར་ནི་མི་བྱའོ། །གཙུག་ལག་ཁང་དུ་ནི་འདུག་པར་མི་བྱ་ཉལ་བར་མི་བྱ་སྟེ་འདུག་གམ་ཉལ་ན་འགལ་ཚབས་ཅན་དུ་འགྱུར་རོ།། །།སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །
ཚེ་དང་ལྡན་པ་པི་ལིན་དའི་བུ་རབ་ཏུ་བྱུང་ཚུན་ཆད་ནས་རྟག་ཏུ་ནད་བུ་ཅན་ཉིད་དུ་གྱུར་ཏོ། །གཉེན་དག་དེའི་དྲུང་དུ་སོང་སྟེ་སོན་པ་དང་། དེས་དེ་དག་ལ་ཆོས་བཤད་དོ། །དེ་དག་གིས་ཚེ་དང་ལྡན་པ་པི་ལིན་དའི་བུ་ལ་ཆོས་མཉན་ནས་བུད་མེད་ཀྱི་གན་དུ་འོངས་ཏེ་སྨྲས་པ། འཕགས་པ་པི་ལིན་དའི་བུས་སྤྲང་རྩི་བཙིར་བ་ལྟ་བུར་ཆོས་སྙན་དགུ་ཞིག་བཤད་དོ། །དེ་དག་གིས་སྨྲས་པ། ཁྱེད་ཅག་གིས་ཚེ་དང་ལྡན་པ་དེ་ལས་ཆོས་མཉན་པ་ནི་སངས་རྒྱས་འབྱུང་བ་འབྲས་བུ་དང་བཅས་པ་ཡིན་ནོ། །ཁྱེད་ཅག་ཀྱང་ཉན་འདོད་ཅིང་བདག་ཅག་དེར་མཆི་བར་ངོ་ཚའོ། །གལ་ཏེ་འཕགས་པ་བདག་ཅག་གི་འདིར་གཤེགས་ཏེ་ཆོས་བཤད་པ་ན་བདག་ཅག་གིས་ཀྱང་དེ་བཞིན་དུ་མཉན་ནོ། །དེ་དག་གིས་སྨྲས་པ། བདག་ཅག་འཕགས་པ་པི་ལིན་དའི་བུའི་ཐད་དུ་སོང་ལ་ཞུ་བར་བྱའོ། །ཞེས་དེ་དག་ཚེ་དང་ལྡན་པ་པི་ལིན་དའི་བུ་གང་ན་བ་དེར་སོང་སྟེ་ཕྱིན་ནས་སྨྲས་པ། འཕགས་པ་པི་ལིན་དའི་བུ་བུད་མེད་དག་ཆོས་ཐོས་པར་འཚལ་ལོ། །དེས་སྨྲས་པ། ཁོ་བོས་བཀག་གམ་ཅི་ཉོན་ཅིག །དེ་དག་གིས་སྨྲས་པ། འཕགས་པ་བུད་མེད་དེ་དག་མཆིར་ངོ་ཚ་ལགས་སོ། །གལ་ཏེ་འཕགས་པ་པི་ལིན་དའི་བུ་དེ་ཉིད་དུ་གཤེགས་ཏེ། །ཆོས་བཤད་ན་དེ་དག་ཉན་པར་འགྱུར་རོ། །དེས་སྨྲས་པ། ཤེས་ལྡན་དག་ཁོ་བོ་ན་བས་རྐང་པས་ནི་འགྲོ་མི་ནུས་སོ། །དེ་དག་གིས་སྨྲས་པ། འཕགས་པ་བཞོན་པས་གཤེགས། བཞིན་བཟངས་དག་བཅོམ་ལྡན་འདས་ཀྱིས་རྗེས་སུ་མ་གནང་ངོ་། །སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། བཞོན་པས་འགྲོ་བར་བྱའོ། །བཅོམ་ལྡན་འདས་ཀྱིས་བཞོན་པས་འགྲོ་བར་བྱའོ་ཞེས་གསུངས་ནས། ཚེ་དང་ལྡན་པ་པི་ལིན་དའི་བུ་བཞོན་པ་ལ་ཞོན་ནས་ལྷན་ཅིག་གནས་པ་དང་ཉེ་གནས་རྣམས་ཀྱིས་ཡོངས་སུ་བསྐོར་ཅིང་དོང་བ་དྲུག་སྟེ་རྣམས་ཀྱིས་མཐོང་ནས་དེ་དག་གིས་དྲིས་པ། ཤེས་ལྡན་དག་འགྲོ་བ་ཕ་བི་སུ་ཞིག །དེ་དག་གིས་སྨྲས་པ། མཁན་པོ་ཡིན་ནོ་ཅི་བཅོམ་ལྡན་འདས་ཀྱིས་བཞོན་པ་རྗེས་སུ་གནང་ངམ།
རྗེས་སུ་གནང་ངོ་། །དྲུག་སྡེ་རྣམས་ཀྱིས་སྨྲས་པ། བཅོམ་ལྡན་འདས་ཀྱི་ དགོངས་པ
་ནི་ཤཱཀྱ་རྣམས་ཤིན་ཏུ་གཞོན་པས་རྐང་པས་འགྲོ་མི་ནུས་ཏེ། བཅོམ་ལྡན་འདས་ཀྱིས་བཞོན་པ་རྗེས་སུ་གནང་ངོ་སྙམ་ནས་དེ་རྣམས་ཀྱིས་གསེར་དང་། དངུལ་དང་། བཻཌཱུ་དང་། ཤེལ་གྱིས་ཁྲ་བོར་བྱས་ཤིང་པད་མ་བཞིན་དུ་བྱི་དོར་བྱས་པའི་བཞོན་པ་དག་ཉེ་བར་བཞག་སྟེ། དེ་དག་བཞོན་པ་ལ་ཞོན་ནས་སྲང་གི་དབུས་ནས་ལག་པ་བསྒྲེང་སྟེ། བྲམ་ཟེ་དང་ཁྱིམ་བདག་རྣམས་ལ་ནད་མེད་པར་གྱུར་ཅིག་ཅེས་ཟེར་ཞིང་དོང་ངོ་། །དེ་དག་གིས་སྨྲས་པ། འཕགས་པ་དག་ཅི་འདི་དག་བཅོམ་ལྡན་འདས་ཀྱིས་རྗེས་སུ་གནང་ངམ། རྗེས་སུ་གནང་ངོ་། །དེ་དག་གིས་འཕགས་པ་དགེ་སྦྱོང་ཁྱེད་ཅག་ནི་འདོད་པའི་ཡོན་ཏན་གྱིས་གཡེན་སྤྱོ་བ་ཡིན་ནོ་ཞེས་སྨྲས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་
དགོངས་པ
། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་བཞོན་པས་འགྲོ་བ་ཡིན་ཏེ། དེ་ལྟ་བས་ན་དགེ་སློང་གིས་བཞོན་པས་འགྲོ་བར་མི་བྱའོ། །དེ་ཉིད་ཉེས་དམིགས་སུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། བཞོན་པས་འགྲོ་བར་བྱ་བ་ནི་གཉིས་ཏེ་རྒས་འཁོགས་ནས་ཉམ་ཆུང་བ་དང་། ན་སྟེ་སྦྱོར་མི་བཟོད་པའོ། །དགེ་སློང་རྣམས་ལྗོངས་རྒྱུ་ཞིང་དོང་བ་ལས་དེ་དག་གིས་ཆོས་གོས་དང་ལྷུང་བཟེད་ཐོགས་ཏེ་ཆུ་རྒལ་བ་ན་དབུས་སུ་ཕྱིན་ནས་འགྲོ་མ་ནུས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། དགེ་སློང་གིས་རྐྱལ་བསླབ་པར་བྱའོ། །བཅོམ་ལྡན་འདས་ཀྱིས་རྐྱལ་བསླབ་པར་བྱའོ། །ཞེས་གསུངས་པ་དང་། དྲུག་སྡེ་རྣམས་ཀྱིས་ཆུ་བོ་ཨ་ཛིར་བ་ཏི་ལ་ཕར་ཡང་རྐྱལ་ཚུར་ཡང་རྐྱལ་བ་དང་། ཇི་ཙམ་ཕྱུགས་རྫི་བུད་མེད་དག་འོངས་པ་དེ་དག་གིས་མཐོང་ནས་སྨྲས་པ། སྲིང་མོ་ཚུར་ཤོག །ཁྱེད་ཅག་བདག་ཅག་གིས་བསྒྲལ་ལོ། །དེ་དག་གིས་དེ་དག་བསྒྲལ་བར་བརྩམས་པ་ན་དེ་དག་གིས་དེ་དག་གི་ཡན་ལག་དང་ཉིང་ལག་དག་ལ་རེག་ཅིང་དེ་དག་གིས་དེ་དག་བསྒྲལ་ནས་སྨྲས་པ། སྲིང་
མོ་དག་ཡང་ཚུར་ཤེག །ཁོ་བོ་ཅག་གིས་ཕྱིར་ཡང་བསྒྲལ་ལོ། །དེ་དག་གིས་སྨྲས་པ། འཕགས་པ་དག་བདག་ཅག་གི་ཡན་ལག་དང་ཉིང་ལག་དག་ལ་ཁྱིམ་ཐབ་ཀྱིས་ཀྱང་མ་རེག་ན་ཁྱེད་ཅག་གིས་རེག་པར་བྱས་པས་བདག་ཅག་སླར་ག་ལ་མཆི་ཞེས་དེ་དག་སྨོད་པར་བྱེད། འཕྱ་བར་བྱེད། ཁ་ཟེར་བར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་ དགོངས་པ
་ཉེས་དམིགས་གང་ཅི་བྱུང་བ་དེ་ནི་དགེ་སློང་དག་བུད་མེད་ལ་རེག་པར་བྱེད་པ་ཡིན་གྱིས། དེ་ལྟ་བས་ན་དགེ་སློང་གིས་བུད་མེད་ལ་རེག་པར་མི་བྱའོ། །རེག་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་བུད་མེད་ལ་རེག་པར་མི་བྱའོ་ཞེས་གསུངས་པ་དང་། གྲོང་ཁྱེར་གྱི་མི་རྣམས་སྐྱེད་མོས་ཚལ་ལ་དགའ་བས་དེ་རྣམས་སྐྱེད་མོས་ཚལ་དུ་དོང་བ་དང་། བུད་མེད་ཅིག་ཆུ་ཆུར་སོང་བ་ལས་དེ་གྲེད་དེ་ཆུས་ཁྱེར་རོ། །དེ་ཚོལ་དུ་སོང་བའི་མི་དེས་དགེ་སློང་དག་མཐོང་ནས་འཕགས་པ་བདག་གི་བུད་མེད་ཆུས་ཁྱེར་བ་ཞིག་གཟིགས་སམ། མཐོང་སྟེ་ཆུས་ཁྱེར་བ་ཕ་བི་ཡིན་ནོ། །ཕ་བི་དེ་ད་ལྟར་ཤི་ལ་ཐུག་ན་ཉིན་ཐོག་ཐག་ཏུ་ཆུལ་ལྟ་ཞིང་འཁོད་དམ་ཞེས་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དབྱུང་བར་བྱའོ། །གཞན་དག་ན་རེ་ཐོང་ཤིག་ཅེས་ཟེར་ན། གལ་ཏེ་མཐུ་ཡོད་པ་ཡིན་ན་གཏང་བར་བྱའོ། །གཞན་དག་གཡོ་བ་མེད་པར་གྱུར་ཏེ་དེ་དག་བྱེ་མ་སྤུངས་པ་ལ་ཁས་བུབ་ཏུ་བཞག་ནས་བོར་ཏེ་དོང་བ་དང་ཝས་ཟོས་སོ། །དེ་བོར་ཏེ་འགྲོ་བར་མི་བྱའོ། །དེ་དག་ཆགས་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕྱོགས་གཞན་ཞིག་ན་འདུག་ལ་གང་དག་ཁ་ཏོན་ཟློས་པ་དེ་དག་གི་ནི་ཁ་ཏོན་བྱོས་ཤིག །བསམ་གཏན་པ་གང་དག་ཡིན་པ་དེ་དག་གིས་ནི་ཡིད་ལ་བྱོས་ཤིག །དྲོ་ཡོལ་དུ་དོགས་ན་དེ་ན་བ་ལང་རྫི་དང་ཕྱུགས་རྫི་གང་དག་འཁོད་པ་དེ་དག་ལ་གཏད་ནས་འགྲོ་བར་བྱའོ། །དྲུག་སྡེ་དག་གིས་ཁྱིམ་བདག་གཞན་ཞིག་གི་བའི་མཇུག་མ་ལ་བཟུང་ནས། བའི་འོ་མ་ཟད་ཟད་དུ་ཕར་རྐྱལ་ཚུར་རྐྱལ་ལོ། །དེས་ཕྱུགས་རྫི་ལ་དྲིས་པ། དེ་
རིང་ཅིའི་ཕྱིར་འོ་མ་མེད། དེས་སྨྲས་པ། འཕགས་པ་དྲུག་སྡེ་དག་གིས་ཞེས་བྱ་བ་ནས་དེ་སྨོད་པར་བྱེད། འཕྱ་བར་བྱེད། ཁ་ཟེར་བར་བྱེད་ཅེས་བྱ་བའི་བར་གོང་མ་བཞིན་ཏེ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་བའི་མཇུག་མ་ལས་བཟུང་སྟེ་རྐྱལ་བར་མི་བྱའོ། །བཅོམ་ལྡན་འདས་ཀྱིས་དགེ་སློང་གིས་བའི་མཇུག་མ་ལས་བཟུང་སྟེ་རྐྱལ་བར་མི་བྱའོ་ཞེས་གསུངས་པ་དང་། དགེ་སློང་ཆུ་རྒལ་བ་དག་ཅིག་གླང་པོ་ཆེའི་མཇུག་མ་ནས་བཟུང་སྟེ་འགྲོ་བར་འདོད་པ་ཕོངས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། མཇུག་མ་ཅན་ལྔའི་མཇུག་མ་ལས་བཟུང་སྟེ་འགྲོ་བར་བྱ་སྟེ། གླང་པོ་ཅང་ཤེས་པ་དང་། རྟ་ཅང་ཤེས་དང་། ཁྱུ་མཆོག་དང་། མ་ཧེ་དང་། གཡག་གིའོ། །འོན་ཀྱང་རྐྱལ་པས་རྐྱལ་བར་བྱའོ། །བཅོམ་ལྡན་འདས་ཀྱིས་རྐྱལ་པས་རྐྱལ་བར་བྱའོ་ཞེས་གསུངས་པ་དང་། དྲུག་སྡེ་དག་གིས་རྐྱལ་པ་བུད་མེད་དང་སྐྱེས་པ་ཉལ་པོ་བྱེད་པ་རི་མོར་བྲིས་ཤིང་པད་མ་ལྟར་བྱི་དོར་བྱས་པ་དག་བྱས་པ་དང་། དེ་དག་བྲམ་ཟེ་དང་ཁྱིམ་བདག་དག་གིས་མཐོང་ནས་སྨྲས་པ། འཕགས་པ་འདི་ཅི་ལགས། དེ་དག་གིས་སྨྲས་པ། བཅོམ་ལྡན་འདས་ཀྱིས་རྐྱལ་པ་རྗེས་སུ་གནང་ངོ་། །འཕགས་པ་དགེ་སྦྱོང་ཁྱེད་ཅག་ནི་འདོད་པ་ལྔའི་ཡོན་ཏན་གྱིས་གཡེན་སྤྱོ་འམ་ཅི་ཞེས་དེ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སྦྱོང་གིས་རྐྱལ་པ་བུད་མེད་དང་སྐྱེས་པ་ཉལ་པོ་བྱེད་པའི་རི་མོར་བྲིས་ཤིང་པད་མ་ལྟར་བྱེ་དོར་བྱས་པ་དག་བཅང་བར་མི་བྱའོ། །འོན་ཀྱང་རྐྱལ་པ་གཉིས་བཅང་བར་བྱ་སྟེ། རྩིས་བསྐུས་པ་དང་། རྐྱལ་སྐྱའོ། །ཁྱིམ་བདག་མགོན་མེད་ཟས་སྦྱིན་གྱིས་འཁོར་གྱི་ཁྱམས་ཤིག་བརྩིགས་པ་དང་། ཆོས་མཉན་པར་དགེ་སློང་ཤིང་གི་མཆིལ་ལྷམ་གོན་པ་དག་ལྷགས་ནས། དེ་དག་གིས་ཤིང་གི་མཆིལ་ལྷམ་གྱིས་ས་གཞི་བསྟར་བ་བྲུད་ཅིང་རློག་པར་གྱུར་ཏོ། །ཁྱིམ་བདག་མགོན་མེད་ཟས་སྦྱིན་ནང་པར་སྔར་ལངས་ཏེ་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འོངས་པ་དེས་
མཐོང་ངོ་། །མཐོང་ནས་སྨྲས་པ། འཕགས་པ་འདིར་མ་དང་སུམ་རྒྱལ་པོ་གསལ་རྒྱལ་དཔུང་གི་ཚོགས་ཡན་ལག་བཞི་དང་ དགོངས་བཏབ་བམ། དེ་དག་གིས་སྨྲས་པ
། རྒྱལ་པོ་ནི་མ་ཡིན་མོད་ཀྱི་དགེ་སློང་ཤིང་གི་མཆིལ་ལྷམ་གོན་པ་དག་ཅིག་འོངས་ཏེ། དེ་དག་གིས་འདི་མ་རུང་བར་བྱས་སོ། །དེ་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་
དགོངས་པ
། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་ཤིང་གི་མཆིལ་ལྷམ་འཆང་བ་ཡིན་གྱིས། དེ་ལྟ་བས་ན་དགེ་སློང་གིས་ཤིང་གི་མཆིལ་ལྷམ་བཅང་བར་མི་བྱའོ། །བཅོམ་ལྡན་འདས་ཀྱིས་དགེ་སློང་གིས་ཤིང་གི་མཆིལ་ལྷམ་བཅང་བར་མི་བྱའོ་ཞེས་གསུངས་པ་དང་། ཁྱིམ་དུ་དགེ་སློང་རྣམས་དབྱར་གནས་པར་དམ་བཅས་པ་ལས། དེ་དག་གིས་མཆིལ་ལྷམ་འདམ་གྱིས་རླན་པར་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཁྱིམ་གྱི་ནང་དུ་ཤིང་གི་མཆིལ་ལྷམ་བཅང་བར་བྱའོ། །དགེ་སློང་གིས་དགེ་དུན་རྣམས་ལ་བྲམ་ཟེ་དང་ཁྱིམ་བདག་དད་པ་ཅན་དག་གིས་ཤིང་གི་མཆིལ་ལྷམ་དག་ཕུལ་བ་དང་དགེ་སློང་རྣམས་ཀྱིས་མ་བླངས་སོ། །དེ་དག་གིས་སྨྲས་པ། འཕགས་པ་དག་གང་གི་ཚེ་བཅོམ་ལྡན་འདས་འཇིག་རྟེན་དུ་མ་བྱུང་བ་དེའི་ཚེ་མུ་སྟེགས་ཅན་རྣམས་སྦྱིན་གནས་སུ་གྱུར་ཏོ་ཞེས་བྱ་བའི་བར་དུ་སྟེ། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་སྟེ། བླངས་ནས་དགེ་འདུན་གྱི་སྣམ་ཕྱིས་འམ། ཆབ་ཁུང་སར་གཞག་པར་བྱའོ།། །།འདུལ་བ་གཞི། བམ་པོ་ཉི་ཤུ་གཉིས་བ། སྡོམ་ལ། སྨྱུག་མའི་ལོ་མ་གྲོ་བཞིན་དང་། རྗེས་སུ་གནང་དང་བསྲུངས་ཕྱིར་དང་། དེ་བཞིན་བསེགས་སུ་བཅིང་བ་དང་། །རྩེ་མོ་རྟིང་བ་སྦུ་གུ་ཅན། །བཅོམ་ལྡན་འདས་ཀྱིས་དགེ་སློང་གིས་ཤིང་གི་མཆིལ་ལྷམ་བཅང་བར་མི་བྱའོ་ཞེས་གསུངས་ནས་དེ་དག་སྨྱུག་ལོའི་མཆིལ་ལྷམ་འཆང་བ་དང་། དེ་ཉིད་ཉེས་དམིགས་སུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ།
སྨྱུག་ལོའི་མཆིལ་ལྷམ་བཅང་བར་མི་བྱའོ། །དེ་དག་རྩྭ་མུན་ཛའི་མཆིལ་ལྷམ་འཆང་བ་དང་། དེ་ཉིད་ཉེས་དམིགས་སུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། རྩྭ་མུན་ཛའི་མཆིལ་ལྷམ་བཅང་བར་མི་བྱའོ། །དེ་དག་སྲད་བུའི་མཆིལ་ལྷམ་འཆང་བ་དང་། དེ་ཉིད་ཉེས་དམིགས་སུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྲད་བུའི་མཆིལ་ལྷམ་བཅང་བར་མི་བྱའོ། །དགེ་སློང་དག་དྲེག་གིས་བཏབ་སྟེ། དེ་དག་ཤུ་བ་བྱུང་བས་ཀོ་བའི་མཆིལ་ལྷམ་རླན་པར་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དྲེག་གིས་ཐེབས་པ་གང་ཡིན་པ་དེས་སྲད་བུའི་མཆིལ་ལྷམ་བཅང་པར་བྱའོ། །གང་གི་ཚེ་གྲོ་བཞིན་སྐྱེས་བྱེ་བ་ཉི་ཤུ་པ་རབ་ཏུ་བྱུང་བ་དེའི་ཚེ་དེའི་རྐང་མཐིལ་ལ་གསེར་གྱི་ཁ་དོག་འདྲ་བའི་སྤུ་སོར་བཞི་ཙམ་ཡོད་པ་དེ་དྲུག་སྡེ་དག་གིས་མཐོང་ངོ་། །མཐོང་ནས་ཀྱང་དེ་དག་གིས་སྨྲས་པ། དགའ་བོ་ཉེ་དགའ་རེ་ཞིག་མར་སར་གྱི་གོང་བུ་འདྲ་བ་འདི་གཅིག་ཏུ་བརྩོན་པས་བསྟན་པ་ལ་རབ་ཏུ་བྱུང་ནས་ཅི་ཞིག་བྱེད་ཅེས་སྨྲས་པ་དེས་ཐོས་སོ། །དེས་ཐོས་ནས་ང་རྒྱལ་སྐྱེས་ཏེ་ཚེ་དང་ལྡན་པ་ཀུན་དགའ་བོའི་དྲུང་དུ་སོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོ་ལ་དྲིས་པ། བཙུན་པ་ཀུན་དགའ་བོ་བཅོམ་ལྡན་འདས་ཀྱིས་གཅིག་ཏུ་བརྩོན་པས་བསྟན་པ་ལ་ཏིང་ངེ་འཛིན་ཡུན་རིང་དུ་གནས་པར་གསུངས་པ་གང་ལགས། ཚེ་དང་ལྡན་པ་གྲོ་བཞིན་སྐྱེས་འཆག་པས་ཐོབ་པ་ཡིན་ནོ། །དེ་བསིལ་བའི་ཚལ་གྱི་དུར་ཁྲོད་དུ་སོང་ནས་འཆགས་ས་བཅས་སོ། །དེ་འཆག་པ་ན་སྤུག་སེར་གྱི་ཁ་དོག་འདྲ་བ་སོར་བཞི་ཙམ་པོ་དག་ཀྱང་ཟད་དོ། །དེའི་འོག་ཏུ་ལྤགས་པ་རྡོལ། དེའི་འོག་ཏུ་ཁྲག་བྱུང་སྟེ། དེ་ཇི་སྲིད་འཆག་སའི་མགོ་གཅིག་ནས་ཅིག་ཤོས་སུ་སོང་གི་བར་དུ་དེའི་འཆག་སའི་མགོ་གཅིག་ན་ཡང་ཁྭ་དག་ཁྲག་འཐུང་ལ་གཉིས་པ་ན་ཡང་འཐུང་ངོ་། །ཆོས་ཉིད་ཀྱིས་སངས་རྒྱས་བཅོམ་ལྡན་འདས་རྣམས་བཞུགས་ཤིང་འཚོ་ལ་གཞེས་པ་ནི་དུས་དུས་སུ་ཆུ་བོར་རྒྱུ་བ་སྤྱོད་དོ། །ཞེས་བྱ་བའི་བར་དུ་རྒྱས་
པར་བྱ་སྟེ། སྐབས་འདིར་ནི་སངས་རྒྱས་བཅོམ་ལྡན་འདས་གཙུག་ལག་ཁང་དུ་རྒྱུ་ཞིང་གཤེགས་པ་ཡིན་པས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པའི་གཙུག་ལག་ཁང་གང་ན་བ་དེར་གཤེགས་པ་དང་། བཅོམ་ལྡན་འདས་ཀྱིས་གྲོ་བཞིན་སྐྱེས་བྱེ་བ་ཉི་ཤུ་པའི་འཆག་ས་གཟིགས་སོ། །གཟིགས་ནས་ཀྱང་སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས་མཁྱེན་བཞིན་དུ་རྨེད་དེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་གཅིག་ཏུ་བརྩོན་པའི་འཆག་ས་འདི་དགེ་སློང་གང་གི་ཡིན་གྲོ་བཞིན་སྐྱེས་བྱེ་བ་ཉི་ཤུ་པའི་ལགས་སོ། །ཀུན་དགའ་བོ་དེ་ལྟ་བས་ན་རྗེས་སུ་གནང་སྟེ། གྲོ་བཞིན་སྐྱེས་བྱེ་བ་ཉི་ཤུ་པས་རིམ་པ་གཅིག་པའི་མཆིལ་ལྷམ་བཅང་བར་བྱའོ། །རིམ་གཉིས་པ་མ་ཡིན། རིམ་གསུམ་པ་མ་ཡིན་ནོ། །གལ་ཏེ་རྡོལ་བར་གྱུར་ན་ལྷན་པས་བཏབ་སྟེ་བཅང་བར་བྱའོ། །དེ་ནས་ཚེ་དང་ལྡན་པ་ཀུན་དགའ་བོ་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་གང་ན་བ་དེར་སོང་སྟེ་སོན་ནས། ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤེས་པར་གྱིས་ཤིག་སྟོན་པས་ཁྱོད་ལ་མཆིལ་ལྷམ་རིམ་གཅིག་པ་རྗེས་སུ་གནང་སྟེ། རིམ་གཉིས་པ་མ་ཡིན། རིམ་གསུམ་པ་མ་ཡིན་ནོ་ཞེས་བྱ་བ་རྒྱས་པར་སྦྱར་རོ། །བཙུན་པ་ཀུན་དགའ་བོ་དགེ་འདུན་ཐམས་ཅད་ལའམ། འོན་ཏེ་བདག་འབའ་ཞིག་ལ། ཁྱོད་འབའ་ཞིག་ལའོ། །བཙུན་པ་ཀུན་དགའ་བོ་སྟོན་པའི་བཀའ་ནི་མི་གཅོག་ན། གལ་ཏེ་བདག་གིས་བཅངས་ན་གཞི་དེས་བདག་ལ་ཚངས་པ་མཚུངས་པར་སྤྱོད་པ་དག་ཨེ་མའོ་གྲོ་བཞིན་སྐྱེས་བྱེ་བ་ཉི་ཤུ་པ་རབ་ཏུ་བྱུང་ནས་ལྟོག་པོ་ཞིག་རྙེད་དོ། །གང་ཡང་ཡུལ་ཙམ་པ་ཐུན་མོང་མ་ཡིན་པ་དང་གླང་པོ་ཆེ་བདུན་གྱི་ཚོགས་སྤངས་ཏེ་རབ་ཏུ་བྱུང་ལ། དེང་མཆིལ་ལྷམ་ཐེ་གི་བ་ཙམ་ལ་ཆགས་པ་ལྟ་ཞེས་གླེང་བར་འགྱུར་ཏེ། དེ་ལྟ་མོད་ཀྱི་གལ་ཏེ་བཅོམ་ལྡན་འདས་ཀྱིས་བདག་ལ་བལྟོས་ཏེ་དགེ་འདུན་ཐམས་ཅད་ལ་རྗེས་སུ་གནང་ན་བདག་གིས་དེ་བཞིན་དུ་བཅང་བར་བྱའོ་ཞེས་བའི་སྐབས་དེ་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་རྒྱས་
པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། གྲོ་བཞིན་སྐྱེས་བྱེ་བ་ཉི་ཤུ་པ་ལ་བལྟོས་ནས་དགེ་འདུན་ཐམས་ཅད་ཀྱིས་རིམ་གཅིག་པའི་མཆིལ་ལྷམ་བཅང་བར་བྱ་སྟེ། རིམ་གཉིས་པ་མ་ཡིན་ཞེས་རྒྱས་པར་སྦྱར་རོ། །བཅོམ་ལྡན་འདས་ཀྱི་སྤྱན་སྔ་ན་རྒན་ཞུགས་མཆིལ་ལྷམ་ཅན་གཞན་ཞིག་འཆག་པར་བྱེད་པ་དང་། དེ་ནས་བཅོམ་ལྡན་འདས་ཀྱིས་དགེ་སློང་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་ཕར་སོང་ངའི་སྤྱན་སྔ་ན་མ་འདུག་ཅིག །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་རེ་ཞིག་འཇིག་རྟེན་ཐམས་ཅད་ཀྱི་ཟང་ཟིང་དང་འདྲིས་པའི་སྟོན་པ་གང་ཡིན་པ། སྟོན་པ་དེའི་ཉན་ཐོས་རྣམས་ཀྱང་འདི་ལྟར་མྱུར་བ་མྱུར་བར་ལྟུང་བར་འགྱུར་བའི་བརྟུལ་ཞུགས་མི་སྤྱོད་ན། ང་འཇིག་རྟེན་ཐམས་ཅད་ཀྱི་ཟང་ཟིང་དང་བྲལ་བར་གནས་པའི་ལྟ་སྨོས་ཀྱང་ཅི་དགོས། བཅོམ་ལྡན་འདས་ཀྱིས་ དགོངས་པ
་ཉེས་དམིགས་གང་ཅི་བྱུང་བ་དེ་ནི་དགེ་སློང་དག་མཆིལ་ལྷམ་འཆང་པ་ཡིན་ཏེ། དེ་ལྟ་བས་ན་དགེ་སློང་གིས་མཆིལ་ལྷམ་བཅང་བར་མི་བྱའོ། །བཅོམ་ལྡན་འདས་ཀྱིས་དགེ་སློང་གིས་མཆིལ་ལྷམ་བཅང་བར་མི་བྱའོ་ཞེས་གསུངས་པ་དང་། གར་མཁན་གཞན་ཞིག་རབ་ཏུ་བྱུང་བ་དེའི་ཆུ་སྣོད་ཆག་ནས་དེ་རྐང་པ་བཀྲུ་བའི་གནས་སུ་རྐང་པ་བཀྲུས་ནས་ཁའི་ནང་ཆུས་བཀང་སྟེ། རྨ་བྱའི་འགྲོས་སུ་སོང་བ་དེ་དྲུག་སྡེ་རྣམས་ཀྱིས་མཐོང་ནས་དེ་རྣམས་ཀྱིས་སྨྲས་པ། ཚེ་དང་ལྡན་པ་དག་རོལ་མོའི་སྒྲ་མེད་པར་དགེ་སློང་གར་བྱེད་ཀྱིས་རོལ་མོའི་སྒྲ་བྱའོ་ཞེས་དེ་རྣམས་ཀྱིས་ཁས་རོལ་མོའི་སྒྲ་བྱ་བར་བརྩམས་སོ། །དེ་རྣམས་ལ་དགེ་སློང་དག་གིས་སྨྲས་པ། ཚེ་དང་ལྡན་པ་དག་ཅི་མ་གྲངས་པ་བྱེད་དམ། དེ་རྣམས་ཀྱིས་སྨྲས་པ། འདི་ལ་མ་གྲངས་སུ་ཅི་ཞིག་ཡོད་ཁྱེད་ཀྱིས་རོལ་མོའི་སྒྲ་མེད་པར་དགེ་སློང་གར་བྱེད་པ་མཐོང་ངམ་ཞེས་བྱ་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་རྣམས་ནི་མཁྱེན་དུ་རྨེད་པ་ཡིན་པས་མཁྱེན་བཞིན་དུ་རྨེད་དེ། སངས་རྒྱས་བཅོམ་ལྡན་འདས་
ཀྱིས་དགེ་སློང་དེ་ལ་རྨས་པ། དགེ་སློང་ཁྱོད་ཀྱིས་བསམ་པ་ཅི་ཞིག་གིས་དེ་ལྟ་བུ་བྱས། བཙུན་པ་གནས་མལ་བསྲུང་བའི་སླད་དུའོ། །དགེ་སློང་འདི་གནས་མལ་བསྲུང་བའི་ཕྱིར་དེ་ལྟ་བུ་བྱེད་པ་ལ་ལྟུང་བ་མེད་དེ། དེ་ལྟ་བས་ན་རྗེས་སུ་གནང་སྟེ། གནས་མལ་བསྲུང་བའི་ཕྱིར་རིམ་གཅིག་པའི་མཆིལ་ལྷམ་བཅང་བར་བྱའོ། །རིམ་གཉིས་པ་མ་ཡིན། རིམ་གསུམ་པ་མ་ཡིན། གལ་ཏེ་རྡོལ་བར་གྱུར་ན་ལྷན་པས་བཏབ་སྟེ་བཅང་བར་བྱའོ། །བཅོམ་ལྡན་འདས་ཀྱིས་རིམ་གཅིག་པའི་མཆིལ་ལྷམ་བཅང་བར་བྱའོ་ཞེས་གསུངས་པ་དང་། བསོད་སྙོམས་པ་གཞན་ཞིག་ལ་ཁྱིམ་བདག་ཅིག་དད་པར་གྱུར་ཏོ། །དེ་ནང་པར་སྔར་ལངས་ཏེ་མཆིལ་ལྷམ་མེད་པར་མཉན་ཡོད་དུ་བསོད་སྙོམས་ལ་ཞུགས་སོ། །དེ་མཆིལ་ལྷམ་མེད་པ་ཁྱིམ་བདག་དེས་མཐོང་ངོ་། །མཐོང་ནས་སྨྲས་པ། འཕགས་པ་ལ་མཆིལ་ལྷམ་མ་མཆིས་སམ། ཚུར་སྦྱོན་ལྷམ་མཁན་གྱི་དྲུང་དུ་བཞུད། མཆིལ་ལྷམ་ཅིག་འབུལ་དུ་སྩལ་ཏོ། །དེ་ལྷམ་མཁན་གྱི་དྲུང་དུ་སོང་ནས་དེས་ལྷམ་མཁན་ལ་སྨྲས་པ། ཀྱེ་ནང་རྗེ་འཕགས་པ་འདི་ལ་མཆིལ་ལྷམ་ཅིག་ཕུལ་ཅིག་ཅེས་བསྒོ་ནས་སོང་ངོ་། །དེའི་ཚེ་དགེ་སློང་རྣམས་དང་། ཤི་བ་རྣམས་དང་གཉིས་ཀྱི་ཕྱིར་མཆིལ་ལྷམ་རིམ་གཅིག་པ་དག་བྱས་སོ། །དགེ་སློང་དེ་ཡང་ཡང་དུ་ལྷམ་མཁན་གྱི་དྲུང་དུ་སོང་ཡང་མ་བྱིན་ནོ། །དུས་གཞན་ཞིག་ན་ཁྱིམ་བདག་དེས་ཡང་དགེ་སློང་མཆིལ་ལྷམ་མེད་པ་མཐོང་ངོ་། །མཐོང་ནས་ཀྱང་སྨྲས་པ། འཕགས་པ་ཁྱོད་ལ་ལྷམ་མཁན་གྱིས་མཆིལ་ལྷམ་མ་ཕུལ་ལམ། ཁྱིམ་བདག་ལྷམ་མཁན་ལ་བདེན་པར་སྨྲ་བ་དཀོན་པར་ཁྱོད་ཀྱིས་མ་ཐོས་སམ། ཡང་དང་ཡང་སོང་ཡང་མ་བྱིན་ནོ། །དེས་སྨྲས་པ། འཕགས་པ་ཚུར་སྦྱོན་ཁྱིམ་དུ་བཞུད། དེས་ཁྱིམ་དུ་ཁྲིད་ནས་ཁ་ཟས་བསོད་པས་ཚིམ་པར་བྱས་ཏེ་རིམ་པ་མང་པོ་ཅན་གྱི་མཆིལ་ལྷམ་ཞིག་བྱིན་ནོ། །དགེ་སློང་གིས་སྨྲས་པ། ཁྱིམ་བདག་བཅོམ་ལྡན་འདས་ཀྱིས་རྗེས་སུ་མ་གནང་ངོ་། །དེས་འཕགས་པ་སྣོམས་ཏེ་བཞུད་ལ་རིམ་གཅིག་པའི་མཆིལ་ལྷམ་མཛོད་ལ་གསོལ་ཅིག །དེས་དེ་ཁྱེར་ཏེ་
གནས་ཁང་དུ་སོང་ནས་དེས་དེ་དང་གྲི་བླངས་ཏེ་ཤིང་དྲུང་དུ་འདུག་ནས་དྲལ་བར་བརྩམས་སོ། །བཅོམ་ལྡན་འདས་ཀྱང་ཕྱོགས་དེར་བྱོན་ནས་དགེ་སློང་ཅི་བྱེད། བཅོམ་ལྡན་འདས་ཀྱིས་རིམ་པ་མང་པོ་ཅན་གྱི་མཆིལ་ལྷམ་བཀག་ན་བདག་ལ་རིམ་པ་མང་པོ་ཅན་འདི་ལྟ་བུ་གྲུབ་སྟེ། རིམ་པ་གཅིག་པར་བགྱིས་ལ་བཅད་བར་བགྱིའོ། །དེ་ནས་བཅོམ་ལྡན་འདས་འདི་སྙམ་དུ་ཨེ་མའོ་ངའི་ཉན་ཐོས་རྣམས་ལ་བྲམ་ཟེ་དང་། ཁྱིམ་བདག་དད་པ་ཅན་དག་གིས་རིམ་ པ་མང་པོའི་མཆིལ་ལྷམ་སྟེར་བ་ལྟ་སྙམ་དུ་དགོངས
་ནས། དེ་ལྟ་བས་ན་རྗེས་སུ་གནང་སྟེ། མཆིལ་ལྷམ་རིམ་པ་མང་པོ་ཅན་ཁྱིམ་པའི་དམན་མ་ཡིན་ཕན་ཆད་བཅང་བར་བྱའོ། །ཚེ་དང་ལྡན་པ་ཉེ་བ་འཁོར་གྱིས་ཞུས་ཏེ་ཞེས་བྱ་བའི་བར་དུ་སྟེ། བཙུན་པ་བཅོམ་ལྡན་འདས་ཀྱིས་མཆིལ་ལྷམ་རིམ་པ་མང་པོ་ཅན་ཁྱིམ་པའི་དམན་མ་ཡིན་ཕན་ཆད་བཅང་བར་བྱའོ་ཞེས་གསུངས་ན། བཙུན་པ་ཇི་ཙམ་གྱིས་ན་ཁྱིམ་པའི་དམན་མ་ལགས་པར་བརྗོད་པར་བགྱི། ཉེ་བ་འཁོར་ཐ་ན་གོམ་པ་བདུན་ནམ་བརྒྱད་བགོས་པར་གྱུར་ན་ཡང་ཡིན་ནོ། །གླེང་གཞི་ནི་ཡངས་པ་ཅན་ནའོ། །དེའི་ཚེ་ཡངས་པ་ཅན་ན་འདི་ལྟ་བུའི་མཆིལ་ལྷམ་དག་བྱེད་དེ། འདི་ལྟ་སྟེ། ཁྲིག་ཁྲིག །ཚིག་ཚིག་ཆེམ་ཆེམ་ཞེས་ཟེར་བ་ལུག་རུའམ། བྱུང་ཆུབ་ཀྱི་ཤིང་གི་ལོ་མ་ལྟ་བུ་ཁྲ་བོ་ཀཱར་ཥཱ་པ་ཎ་ལྔ་རི་བ་དག་བྱེད་དོ། །དྲུག་སྡེ་དག་གིས་མཆིལ་ལྷམ་གོན་པ་ཞིག་མཐོང་ནས་དེ་དག་གི་རྟིང་པ་རྐང་པའི་མཐེ་བོས་མན་ན་ནས་ལྟག་པ་ནས་ཕུལ་ཏེ་ཁྱོད་ཀྱིས་སྦྱིན་པ་འདི་ཕུལ་བས་སེམས་ཀྱི་རྒྱན་དང་། སེམས་ཀྱི་ཡོ་བྱད་དང་། རྣལ་འབྱོར་གྱི་ཚོགས་དང་། དོན་གྱི་མཆོག་སངས་རྒྱས་ཉིད་ཐོབ་བར་གྱུར་ཅིག་ཅེས་བྱས་ནས་བླངས་པ་དང་། ཕྱོགས་ཀུན་དུ་འཕགས་པ་དག་ནི་ལྷམ་དེ་ལྟ་བུ་འཕྲོག་གོ །ཞེས་སྒྲ་གྲགས་སོ། །རྒན་མོ་ཞིག་གི་མག་པ་ཞིག་འོངས་པ་དང་། དེ་ལ་དེས་མཆིལ་ལྷམ་ཞིག་བྱིན་ནས་འཕགས་པ་དག་མཆིལ་ལྷམ་འཕྲོག་གིས་ཇི་ནས་ཀྱང་འཕྲོག་པར་མི་འགྱུར་བར་བག་ཡོད་པར་གྱིས་ཤིག་ཅེས་བསྒོའོ། །ཕྱིས་བསོད་སྙོམས་པ་ཞིག་བསོད་སྙོམས་ཀྱི་ཕྱིར་
ཞུགས་པ་དེས་མཐོང་ནས་དེ་ཁྱིམ་ཞིག་ཏུ་ཞུགས་སོ། །དེ་ཡང་དེ་ཉིད་དུ་ཞུགས་པ་དང་། ཁྱིམ་དེ་ནས་བྱུང་ནས་ཁྱིམ་གཞན་ཞིག་ཏུ་ཞུགས་སོ། །བསོད་སྙོམས་པས་ཀྱང་དེ་ཉིད་དུ་ཞུགས་པ་དང་། དེས་སྨྲས་པ། འཕགས་པ་ཁྱོད་དོན་ཅིའི་ཕྱིར་ཁོ་བོའི་རྗེས་བཞིན་དུ་འབྲང་བ་ཅི་མཆིལ་ལྷམ་འདི་དབྲོག་པར་བཞེད་མོད། བཞིན་བཟངས་ཁྱོད་ཀྱི་མཆིལ་ལྷམ་ཁོ་བོ་མི་འཕྲོག་སྟེ། འོན་ཀྱང་ཁོ་བོ་བསོད་སྙོམས་ཀྱི་ཕྱིར་ཞུགས་སོ། །དེས་སྨྲས་པ། འཕགས་པ་འཕྲོག་ཀྱང་རུང་མི་འཕྲོག་ཀྱང་རུང་སྟེ། འོན་ཀྱང་ཕྱོགས་ཀུན་ཏུ་འཕགས་པ་ཁྱེད་ཅག་མཆིལ་ལྷམ་འཕྲོག་གོ་ཞེས་སྒྲ་གྲགས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་ པ་དང་། དེ་ནས་བཅོམ་ལྡན་འདས་འདི་སྙམ་དུ་དགོངས
་ཏེ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་མཆིལ་ལྷམ་ཁྲིག་ཁྲིག་ཅེས་བྱ་བ་ནས་དེ་ལྟ་བས་ན་དགེ་སློང་གིས་མཆིལ་ལྷམ་ཁྲིག་ཁྲིག་ཟེར་བ་བཅང་བར་མི་བྱའོ་ཞེས་བྱ་བའི་བར་རྒྱས་པར་སྦྱར་རོ། །དེ་ལྟ་བུ་བཅང་བར་མི་བྱའོ། །དགེ་སློང་གིས་དེ་ལྟ་བུའི་མཆིལ་ལྷམ་བཅངས་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་རྣམས་མཆིལ་ལྷམ་གྱིས་རྐང་པའི་བོལ་རྨ་བྱུང་བ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས། ཁྱེད་ཅག་གི་ཞབས་ཀྱི་བོལ་ཇི་ཞིག་གིས་རྨ་བྱུང་བར་གྱུར། མཆིལ་ལྷམ་གྱིས་སོ། །ཅི་ཁྱེད་ཅག་གིས་བསེགས་སུ་བཅིངས་ནས་མ་བཅངས་སམ། བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། བསེགས་སུ་བཅིངས་ནས་བཅང་བར་བྱའོ། །དགེ་སློང་རྣམས་བྱ་རྒོད་ཀྱི་ཕུང་པོའི་རི་ལ་འཛེག་པ་ན་རྐང་པའི་མཐེ་བོར་རྨ་བྱུང་ངོ་། །དེ་དག་བྲམ་ཟེ་དང་ཁྱིམ་བདག་དག་གིས་མཐོང་ནས་སྨྲས་པ། ཁྱེད་ཅག་གི་ཞབས་མཐེ་བོ་ལ་ཅི་ཞིག་གིས་རྨ་བྱུང་། བྱ་རྒོད་ཀྱི་ཕུང་པོའི་རི་ལ་འཛེག་པ་ནའོ། །ཅི་ཁྱེད་ཅག་གིས་མཆིལ་ལྷམ་གྱི་རྩེ་མོ་སྦུ་བུ་ཅན་མ་བཅངས་སམ།
བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། དགེ་སློང་གིས་མཆིལ་ལྷམ་རྩེ་མོ་སྦུ་བུ་བཅད་པར་བྱའོ། །དགེ་སློང་རྣམས་བྱ་རྒོད་ཀྱི་ཕུང་པོའི་རི་ལས་བབས་པ་ན་རྐང་པའི་རྟིང་པ་རྨ་བྱུང་བ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས་སྨྲས་པ། འཕགས་པ་ཁྱེད་ཅག་རྣམས་ཀྱི་ཞབས་ཀྱི་རྟིང་པ་ཅི་ཞིག་གིས་རྨ་བྱུང་། བྱ་རྒོད་ཀྱི་ཕུང་པོའི་རི་ལས་བབས་པ་ནའོ། །ཅི་ཁྱེད་ཅག་གིས་མཆིལ་ལྷམ་གྱི་རྟིང་པ་སྦུ་བུ་ཅན་མ་བཅངས་སམ། བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། དགེ་སློང་གིས་མཆིལ་ལྷམ་གྱི་རྟིང་པ་སྦུ་བུ་ཅན་བཅང་བར་བྱའོ།། །།སྡོམ་ལ། མགུལ་ཆད་དང་ནི་ཡུའུ་ཐུང་ལྷམ། །ཁ་ཁྲོད་དག་ཏུ་སྒྲོ་གུ་ཅན། །དོམ་གྱི་ལྤགས་པ་གནང་བ་དང་། །སྨྱུང་བུ་འབྲེང་བུ་ཆུ་གྲིའོ། །གླེང་གཞི་ནི་མཉན་ཡོད་ནའོ། །དགེ་སློང་རྣམས་རྩྭའི་མྱུ་གུས་རྐང་པ་རྨ་བྱུང་བ་དག་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས་སྨྲས་པ། འཕགས་པ་དག་ཁྱེད་ཅག་གི་ཞབས་ཅི་ཞིག་གིས་རྨ་བྱུང་། རྩྭའི་མྱུ་གུས་སོ། །ཅི་ཁྱེད་ཅག་གིས་ལྷམ་མགུལ་ཆད་མ་བཅངས་སམ། བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་བྱ་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ལྷམ་མགུལ་ཆད་བཅང་བར་བྱའོ། །གང་གི་ཚེ་རྩྭའི་མྱུ་གུ་དག་ཆེར་སྐྱེས་པ་དེའི་ཚེ་དགེ་སློང་རྣམས་ཀྱི་རྐང་བདེ་བས་ཀྱང་རྨ་ཆེར་བྱུང་བ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས་སྨྲས་པ། ཁྱེད་ཅག་གི་ཞབས་ཅི་ཞིག་གིས་རྨ་བྱུང་། དེ་རྣམས་ཀྱིས་སྨྲས་པ། རྩྭའི་མྱུ་གུ་དག་ཆེར་སྐྱེས་པས་བདག་ཅག་གི་རྐང་པ་དེ་བས་ཀྱང་རྨ་ཆེར་བྱུང་ངོ་། །འཕགས་པ་རྣམས་
ཅི་ཁྱེད་ཅག་གིས་ལྷམ་ཡུའུ་ཐུང་མ་བཅངས་སམ། བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ལྷམ་ཡུའུ་ཐུང་བཅང་བར་བྱའོ། །གང་གི་ཚེ་སྐྱེས་བུ་གཏི་མུག་འཕགས་སྐྱེས་པོས་སེར་སྐྱ་ན་གནས་པའི་ཤཱཀྱ་རྣམས་ཁ་བཏག་པ་ན། དེ་དག་ལས་ཁ་ཅིག་ནུབ་ཕྱོགས་སུ་དོང་བ་ནས། ཁ་ཅིག་བལ་ཡུལ་གྱི་བར་དུ་དོང་ངོ་། །མཉན་ཡོད་པའི་དོན་མཐུན་དག་ཟོང་ཐོགས་ཏེ་བལ་ཡུལ་དུ་ལྷགས་པ་དང་། དེ་དག་གིས་དེ་རྣམས་མཐོང་ནས་སྨྲས་པ། ཤེས་ལྡན་དག་ཁྱེད་ཅག་གང་ནས་ད་འདིར་ལྷགས། དེ་རྣམས་ཀྱིས་སྨྲས་པ། མཉན་ཡོད་ནས་སོ། །བདག་ཅག་གི་གཉེན་འཕགས་པ་ཀུན་དགའ་བོ་ཡོད་ན་ལན་འགའ་ཡང་འཕགས་པ་ཀུན་དགའ་བོ་འདིར་འོངས་ཏེ་བདག་ཅག་ལ་གཏམ་མ་དྲིས་སོ། །དེ་རྣམས་ཀྱིས་སྨྲས་པ། བདག་ཅག་གི་འཕགས་པ་ཀུན་དགའ་བོའི་དྲུང་དུ་སོང་ལ་སྦྲན་པར་བགྱིའོ། །དེ་རྣམས་ཀྱིས་ཟོང་རྣམས་བསྒྱུར་བའི་ཟོང་དག་ཁྱེར་ཏེ་མཉན་ཡོད་དུ་ལྷགས་ནས་དེ་རྣམས་ཀྱིས་འཕགས་པ་ཀུན་དགའ་བོ་ལ་སྨྲས་པ། འཕགས་པ་ཀུན་དགའ་བོ་ཁྱོད་ཀྱི་གཉེན་བལ་ཡུལ་ན་མཆིས་ཏེ་དེ་དག་ཁྱོད་མཐོང་བར་འཚལ་ལོ། །ཚེ་དང་ལྡན་པ་ཀུན་དགའ་བོ་ནི་གཉེན་ལ་གདུང་བ་ཡིན་པས་དེ་གཉེན་དག་ལ་བལྟ་བའི་ཕྱིར་བལ་ཡུལ་དུ་སོང་བ་ལས། དེ་ལྷགས་པས་ལག་པ་དང་རྐང་པ་སེར་ག་བྱུང་བ་དང་། དེ་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཀུན་དགའ་བོ་པད་མའི་འདབ་མ་རལ་བ་བཞིན་དུ་ཁྱོད་ཀྱི་ལག་པ་དང་རྐང་པ་ཅི་ཞིག་གིས་སེར་ག་བྱུང་བར་གྱུར། དེས་སྨྲས་པ། ལྷགས་པས་སོ། །ཁྱོད་ཀྱི་གཉེན་དག་ནི་ལྷམ་སྒྲོ་གུ་ཅན་ཅི་སྟེ་འཆང་། ཁྱོད་ནི་ཅིའི་ཕྱིར་མི་འཆང་། བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ཡུལ་ཁ་བ་ཅན་རྣམས་སུ་ལྷམ་སྒྲོ་གུ་ཅན་བཅང་བར་བྱའོ། །
སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་ཡུལ་ཁ་བ་ཅན་རྣམས་སུ་ལྷམ་སྒྲོ་གུ་ཅན་བཅང་བར་བྱའོ་ཞེས་གསུངས་པ་གང་ལགས་པ། བཙུན་པ་ཇི་ཙམ་གྱིས་ཡུལ་ཁ་བ་ཅན་དུ་བརྗོད་པར་བགྱི། །ཉེ་བ་འཁོར་གང་ན་སྣོད་དུ་ཆུ་འཁྱག་པ་ཡིན་ནོ། །དགེ་སློང་གཞན་ཞིག་ལ་རྔོན་པ་ཞིག་དད་པར་གྱུར་ནས། རྔོན་པ་དེས་དོམ་ལྤགས་ཤིག་རྙེད་པ་དགེ་སློང་དེ་ལ་ཕུལ་བ་དང་དེས་མ་བླངས་སོ། །དེས་དགེ་སློང་དེའི་ཕྱི་བཞིན་འབྲང་ཞིང་སྨྲས་པ། འཕགས་པ་བདག་གིས་དོམ་ལྤགས་རྙེད་པ་ཁྱོད་ལ་འབུལ་གྱིས་བཞེས་ཤིག །དགེ་སློང་དེས་མ་བླངས་སོ། །བཅོམ་ལྡན་འདས་ཀྱང་ཕྱོགས་དེར་གཤེགས་ཏེ། སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས་མཁྱེན་བཞིན་དུ་རྨེད་དེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་དགེ་སློང་འོ་ནིའི་ཕྱི་བཞིན་དུ་རྔོན་པ་ཕ་བི་ཅི་སྟེ་འབྲང་། བཙུན་པ་རྔོན་པ་དེས་དོམ་ལྤགས་ཤིག་རྙེད་ནས། དེས་དགེ་སློང་འོ་ནི་ལ་སྩལ་པ་ལས། དགེ་སློང་གིས་དེ་མ་བླངས་པ་དང་རྔོན་པ་དེ་དགེ་སློང་འོ་ནིའི་ཕྱི་བཞིན་འབྲང་ཞིང་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རྔོན་པ་དད་པ་ཅན་ནི་དཀོན་ཏེ། གལ་ཏེ་བརྒྱའམ་སྟོང་ཞིག་དང་ཕྲད་ན་ཐམས་ཅད་གསོད་པ་ཡིན་པས། དེ་བས་ན་གལ་ཏེ་རྔོན་པས་དོམ་ལྤགས་བྱིན་ན་བླང་བར་བྱའོ། །བླངས་ནས་དྲི་གཙང་ཁང་གི་སྒོའམ། རྐང་པའི་འོག་ཏུ་གདིང་བར་བྱ་སྟེ། དོམ་ལྤགས་ཐམས་ཅད་ནི་མིག་ལ་ཕན་ནོ། །དགེ་སློང་གཞན་ཞིག་མཆིལ་ལྷམ་རལ་ནས་དེ་ལྷམ་མཁན་གྱི་དྲུང་དུ་སོང་སྟེ་སོན་ནས་སྨྲས་པ། བཞིན་བཟངས་བདག་གི་མཆིལ་ལྷམ་རལ་བ་རྒྱུས་ཏེ་བདག་ལ་བྱིན་ཅིག །ལྷམ་མཁན་གྱིས་བསམས་པ། ཤཱཀྱའི་སྲས་ཀྱི་དགེ་སྦྱོང་རྣམས་ནི་རྔན་པ་མེད་པར་འཚོལ་གྱིས་ཡུན་རིང་དུ་བསྒྱངས་པ་དང་། རང་གི་བློ་སླར་ལྡོག་པར་འགྱུར་རོ་སྙམ་ནས། འཕགས་པ་བདག་བྲིལ་གྱིས་སང་སྤྱོན་ཅིག །དགེ་སློང་དེ་ཡང་དང་ཡང་དུ་
ལྷམ་མཁན་དེའི་དྲུང་དུ་སོང་ཡང་དེས་བསྒྱངས་པ་དང་། དེ་མཛའ་བཤེས་དགེ་སློང་རྣམས་ཀྱིས་མཐོང་ནས་དེ་ལ་སྨྲས་པ། ཚེ་དང་ལྡན་པ་ཅི་དེ་ན་ཁྱེད་ཀྱི་ཟས་སྦྱོར་བའི་ཁྱིམ་ཡོད་དམ། འོན་ཏེ་གཉེན་གྱི་ཁྱིམ་ཡོད། དེས་སྨྲས་པ། དེ་ན་བདག་གི་ཟས་སྦྱོར་བའི་ཁྱིམ་ཡང་མེད། གཉེན་གྱི་ཁྱིམ་ཡང་མེད་མོད་ཀྱི་བདག་གི་མཆིལ་ལྷམ་རལ་ནས་བདག་གིས་དེ་ལ་རྒྱུས་ཏེ་བྱིན་ཅིག་ཅེས་སྨྲས་ན་དེས་བསྒྱངས་སོ། །དེས་སྨྲས་པ། ལྷམ་མཁན་ལ་བདེན་པར་སྨྲ་བ་དཀོན་པར་ཁྱོད་ཀྱིས་མ་ཐོས་སམ། འོན་ཀྱང་བདག་ཤེས་ཀྱིས་གལ་ཏེ་བཅོམ་ལྡན་འདས་ཀྱིས་རྗེས་སུ་གནང་ན་བདག་གིས་བརྒྱུས་ཏེ་ཁྱོད་ལ་སྦྱིན་ནོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གང་ཞིག་ཤེས་པ་ཡོད་ན་དེས་གང་དུ་གཞན་གྱིས་མཐོང་ན་མི་དད་པར་མི་འགྱུར་བ་དབེན་པའི་ཕྱོགས་སུ་འདུག་སྟེ་བརྒྱུ་བར་བྱའོ། །དེ་དེའི་དྲུང་དུ་སོང་སྟེ་སྨྲས་པ། བཅོམ་ལྡན་འདས་ཀྱིས་རྗེས་སུ་གནང་གིས་རྒྱུས་ཤིག །དེས་སྨྲས་པ། ཅི་འདི་དེ་བཞིན་དུ་བརྒྱུར་རུང་སྙམ་མམ། དེ་ལ་རེ་ཞིག་སྨྱུང་བུ་དང་། དྲ་གྲི་དང་། འབྲེང་བུ་ཡང་དགོས་སོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གང་ཞིག་ཤེས་པ་ཡོད་ན་དེས་སྨྱུང་བུ་དང་། འབྲེང་བུ་ནི་བཅང་བར་བྱའོ། །དྲ་གྲི་ནི་བཅང་བར་མི་བྱའོ། །ཀོ་ལྤགས་ཀྱི་གཞི་རྫོགས་སྟོ། །