གཞུང་གི་དོན་ལས་བཤད་པ་ལ་འཇུག་པའི་བྱ་བ།
གཞུང་གི་དོན་ལས་བཤད་པ་ལ་འཇུག་པའི་བྱ་བ། གཉིས་པ་གཞུང་དོན་ལ། བཤད་པ་ལ་འཇུག་པ། བཤད་པ་ཉིད་དགོད་པ། བཤད་པ་མཐར་ཕྱིན་པའི་ཚུལ་གསུམ་ལས། དང་པོ་ལ། མཆོད་པར་བརྗོད་ཅིང་བཤད་པར་དམ་བཅའ་བ། འགྲེལ་པ་རྩོམ་རིགས་པར་སྒྲུབ་པ། ཁེངས་སྐྱུང་ཞིང་སྤྲོ་བ་སྐྱེད་པའི་རྒྱུ་མཚན་ནོ། །དང་པོ་ལ། གཞུང་གི་ཚིག་དོན་བཤད་པ་དང་། མཐའ་དཔྱད་པ་གཉིས་ལས། དང་པོ་ནི། སློབ་དཔོན་སེང་བཟང་ཆོས་ཅན། ཁྱོད་ཀྱི་འགྲེལ་པ་འདི་རྩོམ་པའི་ཐོག་མར་གཞུང་ལམ་འབྲས་བུའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་བ་ཡིན་ཏེ། དེ་ལ་གུས་པས་འདུད་པའི་ཕྱིར། སློབ་དཔོན་གྱིས་འདི་རྩོམ་པའི་ཐོག་མར་ཤེར་ཕྱིན་གསུམ་ལ་ཕྱག་འཚལ་བ་ལ་ཆོས་ཅན། དགོས་པ་ཡོད་དེ། ཡུམ་དེའི་རྒྱན་གྱི་ཚིག་ལེའུར་བྱས་པ་དག །ཡུམ་གསུམ་པོ་ཀུན་གྱི་རྒྱན་དུ་འགྱུར་བ་ནི། འགྲེལ་པ་འདིས་རྣམ་པར་དབྱེ་བར་བྱ་བའི་ཕྱིར་དུ་ཡིན་པའི་ཕྱིར། གཉིས་པ་ལ། དགག་གཞག་སྤང་གསུམ་ལས། དང་པོ་ནི། ཁ་ཅིག་འགྲེལ་བྱེད་མཁན་པོ་གཞན་གྱི་རྗེས་སུ་མ་འབྲངས་པར། མདོ་དོན་རང་དབང་དུ་འགྲེལ་བར་བྱེད་པའི་གང་ཟག་དེ་ཤིང་རྟའི་སྲོལ་འབྱེད་ཀྱི་མཚན་ཉིད་ཡིན་ཟེར་ན། རྒྱན་རྩོམ་པ་པོའི་རྗེ་བཙུན་བྱམས་མགོན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། ཤིང་རྟའི་སྲོལ་འབྱེད་གཞན་གྱི་
རྗེས་སུ་མ་འབྲངས་པར་མདོ་དོན་རང་དབང་དུ་འགྲེལ་བར་བྱེད་པའི་བསྟན་བཅོས་མངོན་རྟོགས་རྒྱན་མཛད་པའི་གང་ཟག་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། དབུ་མ་བའི་ཤིང་རྟའི་སྲོལ་འབྱེད་ཡིན་པར་ཐལ། ཐེག་ཆེན་གྱི་ཤིང་རྟའི་སྲོལ་འབྱེད་གང་ཞིག །ཁྱོད་དེ་ཡིན་ན་ཁྱོད་དབུ་མ་པའི་དེ་ཡིན་དགོས་པའི་ཕྱིར། འདོད་ན། མངོན་རྟོགས་རྒྱན་དེ་དབུ་མ་པའི་ཤིང་རྟའི་སྲོལ་འབྱེད་ཀྱི་བསྟན་བཅོས་ཡིན་པར་ཐལ། འདོད་པའི་ཕྱིར། འདོད་ན། མདོ་སྡེ་རྒྱན་དེ་སེམས་ཙམ་པའི་ཤིང་རྟའི་སྲོལ་འབྱེད་ཀྱི་བསྟན་བཅོས་ཡིན་པར་ཐལ། འདོད་པའི་ཕྱིར། འདོད་ན། རྗེ་བཙུན་སེམས་ཙམ་པའི་ཤིང་རྟའི་སྲོལ་འབྱེད་ཀྱི་གང་ཟག་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། དབུ་མ་པའི་ཤིང་རྟའི་སྲོལ་འབྱེད་ཀྱི་གང་ཟག་ཡིན་པའི་ཕྱིར། གཞན་ཡང་། མཆོག་ཟུང་གཉིས་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། འགྲེལ་འབྱེད་གཞན་གྱི་རྗེས་སུ་མ་འབྲངས་པར་མངོན་པའི་དགོངས་པ་རང་དབང་དུ་བཀྲལ་བའི་ཕྱིར། རྩ་བར་འདོད་མི་ནུས་ཏེ། ཉན་ཐོས་དགྲ་བཅོམ་པ་ཡིན་པའི་ཕྱིར་རོ། ཁ་ཅིག །འགྲེལ་པ་དོན་གསལ་མདོ་རྒྱན་སྦྱར་བའི་འགྲེལ་པ་ཡིན་ཟེར་ན། མི་འཐད་པར་ཐལ། དེ་ཉིད་ལས། ངག་སོགས་སྦྱོར་བ་མ་བྱས་པར། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ཚིག་གི་ཆ་གཙོ་བོར་མ་སྦྱར་བའི་དོན་ཡིན་ཟེར་ན། མདོའི་དོན་གཏན་ལ་འབེབས་པའི་འགྲེལ་པ་ཡིན་ན། མདོ་འགྲེལ་ཡིན་པས་ཁྱབ་པར་ཐལ། དེ་མདོ་རྒྱན་སྦྱར་བའི་འགྲེལ་པ་གང་ཞིག །ཁྱོད་ཀྱི་ལུང་དོན་འཐད་པའི་ཕྱིར། འདོད་མི་ནུས་སོ། །ཁ་ཅིག་རྒྱན་གྱི་བཤད་བྱའི་མདོ་ཡིན་ན། དེའི་བཤད་བྱ་རྩ་བའི་མདོ་ཡིན་པས་ཁྱབ་ཟེར་ན།
བཀའ་དང་པོ་བདེན་བཞིའི་ཆོས་འཁོར་ཆོས་ཅན། དེར་ཐལ། དེའི་ཕྱིར། དེར་ཐལ། མདོ་ཡིན་པའི་ཕྱིར། ཁྱབ་སྟེ། མངོན་རྟོགས་རྒྱན་གྱིས་གསུང་རབ་མཐའ་དག་གི་དོན་མ་ཚང་བ་མེད་པར་བསྡུས་ཏེ་གཏན་ལ་ཕབ་པའི་ཕྱིར། དེར་ཐལ། དེས་རིགས་ཅན་གསུམ་གྱི་མངོན་པར་རྟོགས་པའི་ངོ་བོ་ངེས་པ་གྲངས་ངེས་པ་གོ་རིམ་ངེས་པ་བསྟན་པའི་ཕྱིར། རྩ་བར་འདོད་མི་ནུས་ཏེ། ཐེག་དམན་གྱི་མདོ་ཡིན་པའི་ཕྱིར། ཁ་ཅིག་ཁྲི་བརྒྱད་སྟོང་པ་དང་མདོ་སྡུད་པ་གཉིས་དེའི་བཤད་བྱ་རྩ་བའི་མདོ་ཡིན་ཟེར་ན། མི་འཐད་པར་ཐལ། དེའི་བཤད་བྱ་རྩ་བའི་མདོ་ལ་ཡུམ་རྒྱས་འབྲིང་བསྡུས་གསུམ་དུ་གྲངས་ངེས་པའི་ཕྱིར་དེར་ཐལ། རྣམ་བཤད་ལས་ཡུམ་གསུམ་ཀུན་གྱི་རྒྱན་དུ་འགྱུར་བ་ནི་ཞེས་གསུངས་པའི་ཕྱིར། ཁ་ཅིག་མདོ་སྡུད་པ་ཁྲི་བརྒྱད་སྟོང་པའི་ལེའུ་གྱ་བཞི་པ་ཡིན་པ་ལ་བསམས་ནས་ཁྲི་བརྒྱད་སྟོང་པ་ཡིན་ཟེར་ན། མངོན་རྟོགས་རྒྱན་གྱི་སྐབས་གཉིས་པ་མངོན་རྟོགས་རྒྱན་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། དེའི་བརྗོད་བྱ་ལ་དངོས་བརྒྱད་དོན་བདུན་ཅུ་ཚང་བར་ཐལ། འདོད་པའི་ཕྱིར། འདོད་མི་ནུས་སོ། ཁ་ཅིག །ཤེས་རབ་ཕ་རོལ་ཕྱིན་པ་ལ། །ཞེས་པའི་རྐང་པ་བཞི་པོ་དེ། འགྲེལ་པའི་མཆོད་བརྗོད་དང་རྩོམ་པར་དམ་བཅའ་གཉིས་ཀའི་གཞུང་ཡིན་ཟེར་ན། ཤེས་རབ་ཕ་རོལ་ཕྱིན་པ་ལ། །གུས་ཕྱག་འཚལ་ཞེས་པ་འདི་འགྲེལ་པའི་རྩོམ་པར་དམ་བཅའི་གཞུང་ཡིན་པར་ཐལ། འདོད་པའི་ཕྱིན། འདོད་ན། གཞུང་དེ་ལས་ལོགས་སུ། ཀུན་གྱི་རྒྱན་དུ་འགྱུར་བར་ནི། །རྣམ་པར་དབྱེ་ཕྱིར། ཞེས་ལོགས་སུ་སྨོས་པ་ལ་དགོས་པ་མེད་པར་ཐལ། འདོད་པའི་ཕྱིར་རོ། །གཉིས་པ་རང་ལུགས་
ནི། ཤེས་རབ་ཕ་རོལ་ཕྱིན་པ་ལ། །ཞེས་སོགས་རྐང་པ་བཞི་པོ་འདིས་འགྲེལ་པའི་མཆོད་བརྗོད་དང་རྩོམ་པར་དམ་བཅའ་གཉིས་ཀ་བསྟན་ཏེ། དྲངས་མ་ཐག་པའི་གཞུང་སྔ་མས་མཆོད་བརྗོད་དང་། ཕྱི་མས་རྩོམ་པར་དམ་བཅའ་བསྟན་པའི་ཕྱིར། ཤིང་རྟའི་སྲོལ་འབྱེད་དུ་རྒྱལ་བས་ལུང་བསྟན་པའི་བྱང་འཕགས་དེ་ཤིང་རྟའི་སྲོལ་འབྱེད་ཀྱི་མཚན་ཉིད། ཤིང་རྟའི་སྲོལ་བྱེད་ལ་ཀླུ་སྒྲུབ་དང་ཐོགས་མེད་གཉིས་སུ་གྲངས་ངེས་ཏེ། དེ་གཉིས་སངས་རྒྱས་ཀྱི་ཤིང་རྟའི་སྲོལ་འབྱེད་དུ་ལུང་བསྟན་པའི་ཕྱིར་དང་། ལེགས་བཤད་སྙིང་པོ་ལས། བདེ་གཤེགས་གསུང་རབ་ཚུལ་གཉིས་ཤིང་རྟའི་སྲོལ། །ལེགས་པར་ཕྱེ་བས་རྒྱལ་བའི་བསྟན་པ་མཆོག །ས་གསུམ་འགྲོ་ན་ཉི་ལྟར་གསལ་མཛད་པ། །ཀླུ་སྒྲུབ་ཐོགས་མེད་ཅེས་གསུངས་པའི་ཕྱིར་རོ། །མངོན་རྟོགས་ཀྱི་རིམ་པ་རྣམས་ཡུམ་གྱི་མདོས་སྦས་དོན་དུ་བྱེད་ཚུལ་ཇི་ལྟར་ན། སྤྱིར་དེ་ལ་མ་བསྟན་པར་སྦས་པ་དང་། བསྟན་ཡང་མི་མངོན་པར་སྦས་པ་གཉིས་ལས། འདི་ནི་ཕྱི་མ་སྟེ། མངོན་རྟོགས་བརྒྱད་ཀྱི་མཚན་ཉིད་དང་གཞི་ལྡོག་རྣམས་ཡུམ་གྱི་མདོས་མི་མངོན་པའི་ཚུལ་གྱིས་བསྟན་པའི་ཕྱིར། མངོན་རྟོགས་བརྒྱད་ཀྱི་རང་ལྡོག་ནི་དེ་ལྟར་མ་ཡིན་ཏེ། དེ་དངོས་སུ་བསྟན་པའི་ཕྱིར། དེར་ཐལ། དེ་དངོས་སུ་བསྟན་པའི་ཡུམ་གྱི་མདོ་ཚིག་ཡོད་པའི་ཕྱིར། གསུམ་པ་རྩོད་པ་སྤོང་བ་ལ། ཁ་ཅིག་ཁྲི་བརྒྱད་སྟོང་པ་མངོན་རྟོགས་རྒྱན་གྱི་བཤད་བྱ་རྩ་བའི་མདོ་ཡིན་པར་ཐལ། དེ་དང་རྒྱན་སྦྱར་བའི་ཚད་ལྡན་གྱི་འགྲེལ་པ་ཡོད་པའི་ཕྱིར་ན་མ་ཁྱབ། འོ་ན་དེ་ཆོས་ཅན། ཀུན་གྱི་རྒྱན་དུ་འགྱུར་བར་ནི། ཞེས་པའི་རྒྱན་གྱི་བཤད་གཞིའི་མདོ་ཡིན་པར་ཐལ། རྒྱན་གྱི་
བཤད་བྱ་རྩ་བའི་མདོ་ཡིན་པའི་ཕྱིར། འདོད་མི་ནུས་སོ། ཁ་ཅིག་རྗེ་བཙུན་ཤིང་རྟའི་སྲོལ་འབྱེད་ཡིན་པར་ཐལ། དེ་ཡིན་པར་ལེགས་བཤད་གསེར་འཕྲེང་དུ་གསུངས་པའི་ཕྱིར་ན། དེ་ནི་ཤིང་རྟའི་སྲོལ་འབྱེད་གཞན་ལ་མ་ལྟོས་པར་དགའ་ལྡན་དུ་སྦས་དོན་མངོན་རྟོགས་ཀྱི་རིམ་པ་གཏན་ལ་ཕབ་པ་ཙམ་ལ་དགོངས་སོ། །