རོག་ལུགས་ཀྱི་ཕུར་པའི་བརྒྱུད་འདེབས། དྷརྨཱ་ཤྲཱི།
རོག་ལུགས་ཀྱི་ཕུར་པའི་བརྒྱུད་འདེབས་བཞུགས་སོ། །ཁྱབ་བདག་ཀུན་བཟང་ཀརྨ་ཧེ་རུ་ཀ །དྷ་ན་སཾ་སྐྲྀ་པདྨ་སཾ་བྷ་ཝ། །མཁར་ཆེན་མཚོ་རྒྱལ་དཔལ་གྱི་དབང་ཕྱུག་ལ། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །རྒྱལ་བའི་སྙིང་པོ་ངམ་འབྲེ་ཀླུའི་རྒྱལ་མཚན། །ཤེས་རབ་དབང་ཕྱུག་ཇོ་བོ་ལང་ལབ་ཞབས། །སྣ་ནམ་ཆེན་པོ་ཤེས་རབ་ཚུལ་ཁྲིམས་ལ། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །རྒྱ་སྟོན་སངས་རྒྱས་རྒྱ་ཐུང་ཤེས་རབ་རྒྱལ། །ཁ་སེར་བ་དང་སྨན་ཆུང་བླ་མ་དཔལ། །སྟོད་ལས་གཙོར་སྟོན་བརྒྱུད་པའི་བླ་མ་ལ། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །ཁྱུང་པོ་གསལ་ལེ་འཆལ་འབྲུག་བློ་གྲོས་རྒྱལ། །གྲགས་པ་རྒྱལ་མཚན་གོ་རུབ་ཡང་དག་སྟེ། །སྨད་ལས་གཙོར་སྟོན་བརྒྱུད་པའི་བླ་མ་ལ། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །བརྒྱུད་པ་གཉིས་འདུས་རོག་སྟོན་ཤེས་རབ་བླ། །བཀྲ་ཤིས་གྲགས་དང་མཁས་གྲུབ་ཤེས་རབ་འོད། །བསོད་ནམས་དཔལ་བ་འཁྲུལ་ཞིག་དར་མ་ལ། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །སྤྱན་སྔ་དཔལ་ཆེན་བླ་མ་དྲིན་ཅན་པ། །གཙུག་རྒྱན་པ་དང་ཆོས་རྒྱལ་རིན་པོ་ཆེ། །བྱང་ཆུབ་བཟང་པོ་ཀུན་དགའ་རྡོ་རྗེ་ལ། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །དཔལ་མགོན་རྒྱལ་མཚན་བསོད་ནམས་རིག་པ་འཛིན། །སྔགས་འཆང་བདུད་འདུལ་ཆོས་རྗེ་ཨིནྡྲའི་མཚན། །བྱ་བཏང་འཁྲུལ་ཞིག་ཀློང་ཡང་འོད་གསལ་ལ། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །འགྱུར་མེད་རྡོ་རྗེ་ལོ་ཆེན་དྷརྨ་ཤྲཱི། །རིན་ཆེན་རྣམ་རྒྱལ་པདྨ་བསྟན་འཛིན་རྗེ། །ཕྲིན་ལས་རྣམ་རྒྱལ་པདྨ་དབང་གི་རྒྱལ། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །གཞན་ཕན་མཐའ་ཡས་པདྨ་རྡོ་རྗེ་དང་། བསྟན་པའི་ཉི་མ་འཇིགས་མེད་ཀུན་དགའ་བཟང་། །མདོ་སྔགས་བསྟན་འཛིན་ཕན་བདེའི་འོད་ཟེར་ཞབས། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །བརྒྱུད་སྲོལ་ཀུན་འདུས་རྩ་བའི་བླ་མ་དང་། །དངོས་གྲུབ་མཆོག་སྩོལ་ཕྲིན་ལས་ཕུར་བུའི་ལྷ། །མཁའ་འགྲོ་ཆོས་སྲུང་དམ་ཅན་རྒྱ་མཚོ་ལ། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །མཚན་ཉིད་ཀུན་རྫོགས་རྡོ་རྗེ་སློབ་དཔོན་ལས། །ཁྱད་པར་དབང་བཅུ་ནོད་པས་རྒྱུད་སྨིན་ནས། །སྣང་རིག་དབྱིངས་དང་ཡེ་ཤེས་གཉིས་མེད་པའི། །བདེ་ཆེན་སྲས་ཀྱི་རོལ་པར་རྟོགས་པར་ཤོག །ཕུན་སུམ་ཚོགས་ལྔས་སྒྲུབ་པའི་གཞི་བཟུང་ཞིང་། །དཀྱིལ་འཁོར་གསུམ་གྱིས་གཞུང་བསྲང་བསྙེན་སྒྲུབ་ཀྱིས། །རྣམ་གྲོལ་བྱང་ཆུབ་སྒྲུབ་པའི་བར་གཅོད་རྣམས། །མངོན་སྤྱོད་དྲག་པོའི་ལས་ཀྱིས་འཇོམས་པར་ཤོག །དེ་ལྟར་འབད་པས་གནས་སྐབས་ལམ་གྱུར་གྱི། །འབྲས་བུ་རིག་འཛིན་རྣམ་བཞི་རིམ་བགྲོད་ནས། །སྤངས་རྟོགས་མཐར་ཐུག་བཅོམ་ལྡན་ཧེ་རུ་ཀ །རྡོ་རྗེ་གཞོན་ནུའི་གོ་འཕང་མྱུར་ཐོབ་ཤོག །ཅེས་རོག་གི་རིག་འཛིན་རྣམས་ཀྱི་ཞལ་གཟིགས་མར་གྲགས་པའི་ཕུར་པ་སྣ་ནམ་ལུགས་ཀྱི་བརྒྱུད་པའི་གསོལ་འདེབས་འདི་ཡང་མཆེད་པོ་འགའི་གསུང་གིས་བསྐུལ་ཏེ་སྨྱོས་བཙུན་དྷརྨཱ་ཤྲཱིས་སྦྱར་བར་མཛད་པ་ལ། གཏེར་ཆེན་མན་གྱི་བརྒྱུད་པའི་རྣམ་གྲངས་མང་དུ་ཡོད་ཀྱང་འདིར་གཙོ་ཆེ་བ་ཕྱོགས་གཅིག་གི་ལུགས་སུ་བདག་གི་རིགས་བདག་བླ་མའི་བར་དུ་ཁ་སྐོང་བ་པོ་ནི་འཇིགས་བྲལ་ཡེ་ཤེས་རྡོ་རྗེའོ།། །།