༣ གནས་ལུགས་དོན་གྱི་མཎྜལ།
༈ ན་མོ་གུ་རུ་བྷྱཿ འགྲོ་བའི་སྐྱབས་གནས་བླ་མ་རྗེ། །ཡི་དམ་མཁའ་འགྲོའི་ཚོགས་རྣམས་ལ། །གནས་ལུགས་དོན་གྱི་མཎྜལ་འབུལ། །སྐྱེ་ཤི་མེད་པའི་དོན་རྟོགས་ཤོག །བྱིན་རླབས་དངོས་གྲུབ་འབྱུང་བར་ཤོག །སྣ་ཚོགས་སྣང་བའི་མཎྜལ་ལ། །གཞི་མེད་གསལ་བའི་ཚོམ་བུ་བཀོད། །སྟོང་པ་ཆོས་སྐུའི་ངང་དུ་བཞེས། །སྐྱེ་ཤི་མེད་པའི་དོན་རྟོགས་ཤོག །གྲགས་པ་སྒྲ་ཡི་མཎྜལ་ལ། །རང་ཡལ་རྗེས་མེད་ཀྱི་ཚོམ་བུ་བཀོད། །གྲགས་སྟོང་གསུང་གི་ངང་དུ་བཞེས། །ཚངས་དབྱངས་ཆོས་ཀྱི་དོན་རྟོགས་ཤོག །དྲན་རིག་སེམས་ཀྱི་མཎྜལ་ལ། །ཤར་གྲོལ་འཛིན་མེད་ཀྱི་ཚོམ་བུ་བཀོད། །རིག་སྟོང་ཐུགས་ཀྱི་ངང་དུ་བཞེས། །མི་རྟོགས་ཡེ་ཤེས་དོན་རྟོགས་ཤོག །རང་བྱུང་རིག་པའི་མཎྜལ་ལ། །ཟང་ཐལ་རྗེན་པའི་ཚོམ་བུ་བཀོད། །ཆོས་ཟད་བློ་འདས་ཀྱི་ངང་དུ་བཞེས། །གཞི་ལམ་འབྲས་བུའི་དོན་རྟོགས་ཤོག །ཡེ་སྟོང་རིག་པའི་མཎྜལ་ལ། །རྒྱ་ཆད་ཕྱོགས་བྲལ་གྱི་ཚོམ་བུ་བཀོད། །བསམ་བརྗོད་བྲལ་བའི་ངང་དུ་བཞེས། །གནས་ལུགས་ལྟ་བའི་དོན་རྟོགས་ཤོག །རང་གསལ་རིག་པའི་མཎྜལ་ལ། །མ་སྤངས་རང་གནས་ཀྱི་ཚོམ་བུ་བཀོད། །བང་དྭངས་འོད་གསལ་གྱི་ངང་དུ་བཞེས། །རང་བྱུང་སྒོམ་པའི་དོན་རྟོགས་ཤོག །མ་འགག་རིག་པའི་མཎྜལ་ལ། །སྣང་སེམས་སྒྱུ་མའི་ཚོམ་བུ་བཀོད། །བླང་དོར་གཉིས་མེད་ཀྱི་ངང་དུ་བཞེས། །ཞེན་མེད་སྤྱོད་པའི་དོན་རྟོགས་ཤོག །ཀ་དག་ཆོས་ཟད་ཀྱི་མཎྜལ་ལ། །བློ་བྲལ་ཟང་ཀའི་ཚོམ་བུ་བཀོད། །གནས་ལུགས་རང་མལ་གྱི་ངང་དུ་བཞེས། །(༧)མཐར་ཕྱིན་འབྲས་བུའི་དོན་རྟོགས་ཤོག །ངོ་བོ་སྟོང་པའི་མཎྜལ་ལ། །བསམ་དང་བྲལ་བའི་ཚོམ་བུ་བཀོད། །བློ་ལས་འདས་པའི་ངང་དུ་བཞེས། །ཆོས་སྐུ་རྒྱལ་པོའི་དོན་རྟོགས་ཤོག །རང་བཞིན་གསལ་བའི་མཎྜལ་ལ། །ལྷུན་གྲུབ་རང་སྣང་གི་ཚོམ་བུ་ལ། །རང་བྱུང་འོད་གསལ་གྱི་ངང་དུ་བཞེས། །ལོངས་སྐུ་གཞིར་སྣང་གི་དོན་རྟོགས་ཤོག །ཐུགས་རྗེ་འགགས་མེད་ཀྱི་མཎྜལ་ལ། །འཆར་ཚུལ་སྣ་ཚོགས་ཀྱི་ཚོམ་བུ་བཀོད། །རང་བྱུང་རྒྱན་གྱི་ངང་དུ་བཞེས། །སྤྲུལ་སྐུ་ཀུན་ཁྱབ་ཀྱི་དོན་རྟོགས་ཤོག །བླ་མ་ཡི་དམ་མཁའ་འགྲོ་ལ། །དོན་གྱི་མཎྜལ་འདི་ཕུལ་བས། །འགྲོ་ཀུན་ཚོགས་གཉིས་རབ་རྫོགས་ཏེ། །ཕྱམ་གཅིག་སངས་རྒྱས་འགྲུབ་པར་ཤོག །གནས་ལུགས་དོན་གྱི་མཎྜལ། རྣལ་འབྱོར་པ་ཀློང་ཆེན་རབ་འབྱམས་ཀྱིས་ལྷུན་གྲུབ་གླིང་གི་དབེན་གནས་སུ་མགུར་དུ་བཞེངས་པའོ།། །།དགེའོ།། །།