དེ་ཇི་ལྟར་འཆད་པ།
༈ གཉིས་པ་དེ་ཇི་ལྟར་འཆད་པའི་ཚུལ་ལ། དགོས་དོན། བསྡུས་དོན། མཚམས་སྦྱར། བརྒལ་ལན་ཏེ་ཡན་ལག་ལྔའི་སྒོ་ནས་འཆད་དེ། ཉན་པ་པོ་སྤྲོ་བ་བསྐྱེད་པའི་ཡན་ལག་ཏུ་དགོས་དོན། དེ་འགྲུབ་པའི་ཡན་ལག་ཏུ་བསྡུས་དོན། དེ་དག་གཏན་ལ་འབེབས་པའི་ཡན་ལག་ཏུ་ཚིག་དོན། དེ་ཡང་སྔ་ཕྱི་འབྲེལ་ཆགས་སུ་གོ་བའི་ཡན་ལག་ཏུ་མཚམས་སྦྱར་དང་། དེ་དག་འགལ་མེད་ཏུ་གོ་བའི་ཡན་ལག་ཏུ་བརྒལ་ལན་ཏེ་ལྔའི་སྒོ་ནས་སྟོན་ཏེ། སློབ་དཔོན་དབྱིག་གཉེན་གྱིས་རྣམ་བཤད་རིག་པར། མདོ་དོན་སྨྲ་བ་དག་གིས་ནི། །དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་མཚམས་སྦྱར་བཅས། །བརྒལ་ལན་བཅས་ཏེ་བསྙད་པར་བྱ། །ཞེས་གསུངས་སོ། །