དགེ་ཚུལ་གྱི་བསླབ་བྱ་པད་གླིང་ལྔ་བར་གནང་བ།
དགེ་ཚུལ་གྱི་བསླབ་བྱ་པད་གླིང་ལྔ་པར་གནང་བ་བཞུགས། ན་མཿསརྦ་ཛྙཱ་ཡ། སྤངས་རྟོགས་ཡོན་ཏན་མཐར་ཕྱིན་ནས། །མཐའ་ཡས་འགྲོ་བ་འདུལ་བའི་ཐབས། །སྟོན་མཛད་ཐུབ་དབང་ལ་བཏུད་དེ། །དགེ་ཚུལ་བསླབ་བྱ་མདོ་ཙམ་བྲི། །དེ་ལ་ཐོག་མར་སྡོམ་ནི། སྲོག་གཅོད་རྐུ་དང་མི་ཚངས་སྤྱོད། །རྫུན་སྨྲ་ཆང་དང་ཕྱི་དྲོའི་ཟས། །གར་སོགས་ཕྲེང་སོགས་གསེར་དངུལ་ལེན། །ཁྲི་སྟན་ཆེ་མཐོ་གཉིས་དང་བཅུ། །ཁྱིམ་རྟགས་སྤོང་དང་རབ་བྱུང་རྟགས། །བླངས་དང་མཁན་པོར་གསོལ་བཏབ་ལས། །ཉམས་པ་རྣམ་པ་གསུམ་བསྣན་པས། །སྤང་བྱ་བཅུ་གསུམ་དག་ཏུ་འགྱུར། །དེ་ལྟར་བཅུ་གསུམ་ལས། དང་པོ་སྲོག་གཅོད་པ་ནི། གསད་བྱའི་ཡུལ་རང་ལས་རྒྱུད་གཞན་པའི་མིའམ་མིར་ཆགས་པ་ཡིན་ལ། དེ་ཡིན་པར་འདུ་ཤེས་མ་འཁྲུལ་བའི་ཀུན་སློང་གསོད་འདོད་རྒྱུན་མ་ཆད་པས། རང་ངམ་གཞན་ལ་བསྒོས་སམ་གྲོས་སུ་གཏོགས་ཀྱང་རུང་སྟེ། མཚོན་དུག་སོགས་ཀྱི་སྦྱོར་བས་རང་མ་ཤི་བའི་སྔ་རོལ་དུ་གསད་བྱའི་སྲོག་འགགས་པའོ། །གཉིས་པ་རྐུ་བ་ནི། རང་དང་ནོར་མི་གཅིག་པའི་མིའི་འགྲོ་བས་བདག་ཏུ་བཟུང་ཞིང་གསེར་ཞོ་ཕྱེད་ཀྱི་རིན་ཐང་དུ་ལོངས་པའི་ནོར་ཡིན་ལ། དེ་ཡིན་པར་འདུ་ཤེས་ཤིང་རྐུ་འདོད་ཀྱི་བསམ་པས་རང་ངམ་གཞན་ལ་རྐུར་བཅུག་ཀྱང་རུང་སྟེ། མཐུ་དང་འཇབ་བུའམ་གཡོ་སྒྱུའི་སྦྱོར་བས་དུས་གཅིག་ལ་བླངས་ཤིང་རང་དབང་ཐོབ་བློ་སྐྱེས་པའོ། །གསུམ་པ་མི་ཚངས་སྤྱོད་ནི། རྟེན་རྨ་སྒོ་གསུམ་གང་ཡང་རུང་བར་བརྟེན་བྱེད་ཕོ་དབང་ལས་རུང་རེག་བདེ་མྱོང་འདོད་ཀྱི་བསམ་པས། བཅུག་རེག་གི་བདེ་བ་ལུས་ཤེས་ཀྱིས་མྱོང་ཞིང་ཡིད་ཤེས་ཀྱིས་བདག་གིར་བྱས་པའོ། །བཞི་པ་རྫུན་དུ་སྨྲ་བ་ནི། ཡུལ་སྨྲ་ཤེས་དོན་གོ་བའི་མི་ལ་བདེན་པའི་འདུ་ཤེས་བསྒྱུར་ཏེ་རྫུན་སྨྲ་བར་
འདོད་པས་མངོན་ཤེས་སོགས་མི་ཆོས་བླ་མའི་ཡོན་ཏན་རང་ལ་མེད་བཞིན་དུ་ཡོད་པར་སྨྲ་བའམ། གཞན་གྱིས་སྨྲས་པ་དང་དུ་བླངས་ཀྱང་རུང་སྟེ་ཕ་རོལ་པོས་རྫུན་ཚིག་ཐོས་ཤིང་དོན་གོ་བའོ། །བཞི་པོ་དེ་འཆབ་བཅས་བྱུང་ན་གསོར་མི་རུང་བའི་ཕྱིར་ཕམ་འདྲའི་ཉེས་བྱས་སོ། །ལྔ་པ་ཆང་ནི། ཕབས་བཏབ་པ་འབྲུའི་ཆང་དང་། མ་བཏབ་པ་རྒུན་ཆང་སྟེ་མྱོས་པར་འགྱུར་བ་འཐུང་བའོ། །དྲུག་པ་ཕྱི་དྲོའི་ཁ་ཟས་ནི། རང་གླིང་གི་ཉི་མ་གུང་ཡོལ་ནས་སང་གི་སྐྱ་རེངས་མ་ཤར་གྱི་བར་དུ་དུས་རུང་གི་ཟས་ལ་ལོངས་སྤྱོད་པའོ། །བདུན་པ་གར་སོགས་ནི། རྒོད་བག་ལ་སོགས་པའི་བསམ་པས་རང་གར་གླུ་དབྱངས་ལེན་པ་དང་། བྲོ་གར་འཁྲབ་པ་དང་། རོལ་མོ་འཁྲོལ་བ་སྟེ་གར་སོགས་གསུམ་མོ། །བརྒྱད་པ་ཕྲེང་སོགས་བཞི་ནི། འཕྱོར་སྒེག་གི་བསམ་པས་རང་གར་མེ་ཏོག་སོགས་མཛེས་བྱེད་ཀྱི་ཕྲེང་བ་འདོགས་པ་དང་། མགུལ་རྒྱན་དང་སོར་གདུབ་སོགས་རྒྱན་གྱིས་བརྒྱན་པ་དང་། ལུས་ལ་དྲིལ་ཕྱིས་བྱེད་པ་སོགས་ཁ་དོག་འཆང་བ་དང་། དྲི་ཞིམ་པོས་བསྐུ་བ་སོགས་སྤོས་ཉུག་པ་སྟེ་ཕྲེང་སོགས་བཞིའོ། །དགུ་པ་གསེར་དངུལ་ལེན་པ་ནི། རང་དབང་བའི་གསེར་དངུལ་སོགས་རིན་པོ་ཆེ་ལ་རུང་བ་མ་བྱས་པར་ནོར་གྱི་བློས་རེག་པའོ། །བཅུ་པ་ཁྲི་སྟན་ཆེ་མཐོ་ནི། མཐོ་དམན་གང་ཡིན་ཡང་རུང་སྟེ། རྒྱུ་རིན་པོ་ཆེ་སོགས་ལས་བྱས་པའི་ཁྲི་སྟན་རིན་ཐང་ཅན་ལ་རང་གར་འདུག་པ་ཁྲི་སྟན་ཆེན་པོ་དང་། ཤིང་སོགས་རྒྱུ་དམན་ཡང་ཁྲུ་གང་ལས་ལྷག་པའི་ཁྲི་སྟན་ལ་འདུག་པ་ཁྲི་སྟན་མཐོ་བའོ། །དེ་དག་ཀྱང་སུམ་བརྒྱ་པར། གང་ཞིག་སྲོག་གཅོད་གཞན་གྱི་ནོར་འཕྲོག་དང་། །མི་ཚངས་སྤྱོད་རྫུན་བཅོས་པའི་ཆང་ལ་སོགས། །གར་སོགས་ཕྲེང་སོགས་མལ་ཆེ་མཐོ་བ་དང་། །ཕྱི་དྲོའི་ཁ་ཟས་གསེར་དངུལ་ལེན་པ་སྤང་། །ཞེས་གསུངས་པ་ལྟར་རོ། །བཅུ་གཅིག་པ་ཁྱིམ་པའི་རྟགས་སྤོང་བར་ཁས་བླངས་པ་ལས་ཉམས་པ་ནི། གོས་དཀར་པོ་དང་ཚོན་ཆེན་གྱིས་བསྒྱུར་བ་སོགས་ཁ་དོག་གིས་མི་རུང་བ་དང་། སྦུ་གུ་ཅན་སོགས་དབྱིབས་ཀྱིས་མི་རུང་བ་གྱོན་པ་དང་། སྐྲ་དང་ཁ་སྤུ་རིང་པོར་འཇོག་པ་ལ་སོགས་པའོ། །བཅུ་གཉིས་པ་རབ་བྱུང་གི་རྟགས་ལེན་པར་ཁས་བླངས་བ་ལས་ཉམས་པ་ནི། མུ་སྟེགས་པའི་རྟགས་སྤྱོད་ལམ་དཀའ་
ཐུབ་སོགས་ལ་སྤྱོད་པའོ། །བཅུ་གསུམ་པ་མཁན་པོར་གསོལ་བ་བཏབ་པ་ལས་ཉམས་པ་ནི། ཁྱད་གསོད་དང་མཁས་འདོད་ཀྱི་བསམ་པས་མཁན་པོར་བརྙས་ཤིང་མ་གུས་པར་བྱེད་པའོ། །དེའང་ཞིབ་ཏུ་ཕྱེ་ན་བླངས་འདས་སོ་དྲུག་ཏུ་འགྱུར་ཏེ། སྲོག་གཅོད་ཀྱི་ཆར་གཏོགས་པ་དུད་འགྲོ་གསོད་པ། སྲོག་ཆགས་དང་བཅས་པའི་རྩྭའམ་ཆུ་ལ་འདེབས་པ། སྲོག་ཆགས་དང་བཅས་པའི་ཆུ་ལ་སྤྱོད་པ་དེ་གསུམ་མོ། །རྫུན་གྱི་ཆར་གཏོག་པ་ལ་གཞི་མེད་དང་། བག་ཙམ་གྱི་ཕམ་པའི་སྐུར་འདེབས། དགེ་འདུན་དབྱེན། དེའི་རྗེས་སུ་ཕྱོགས་པ། ཁྱིམ་སུན་འབྱིན་པ། ཤེས་བཞིན་དུ་རྫུན་དུ་སྨྲ་བ། བཤེས་ངོར་སྐུར་འདེབས། ཞལ་ཏ་པར་འཕྱ་བ། ཟས་ཅུང་ཟད་ཙམ་གྱི་ཕྱིར་ཆོས་སྟོན་ཞེས་སྐུར་པ་འདེབས་པ། ལྷག་མའི་སྐུར་འདེབས། ཁྱད་གསོད་ཀྱིས་བསླབ་པ་སྤོང་བ། ལྷག་པོ་ལེན་ཕྱིར་འབྲས་ཆན་འགེབས་པ་སྟེ་བཅུ་གཉིས་སོ། །དེ་ལྟར་ཆར་གཏོགས་པས་ཕྱེ་བའི་བཅོ་ལྔ་པོ་སྔར་གྱི་བཅུ་གསུམ་པོའི་སྟེང་དུ་བསྣན་ཅིང་། གར་སོགས་གསུམ། ཕྲེང་སོགས་བཞི། ཁྲི་དང་སྟན་གཉིས་རེ་རེར་ཆེ་མཐོ་གཉིས་ཏེ་དེ་དག་སོ་སོར་བགྲངས་པས་ཁྱོན་སུམ་ཅུ་རྩ་དྲུག་ལས། ཕམ་འདྲ་བཞི་པོ་མ་གཏོགས་པའི་སུམ་ཅུ་རྩ་གཉིས་ནི་བཤགས་བྱའི་ཉེས་བྱས་སོ། །དེ་ཡང་ཉམས་པ་གསུམ་ནི། རབ་བྱུང་གི་བླངས་འདས་དང་། ལྷག་མ་སུམ་ཅུ་རྩ་གསུམ་ནི། དགེ་ཚུལ་གྱི་དངོས་སུ་བླངས་འདས་ཡིན་ལ། དེ་ལས་གཞན་དུ་འཆང་འབྲལ་སོགས་ལྟུང་མེད་ཕྱེད་དང་བཅོ་བརྒྱད་མ་གཏོགས་པ་གཞི་དང་། རྣམ་འབྱེད་ཀྱི་སྐབས་ནས་བྱུང་བའི་བསླབ་བྱ་རྣམ་གྲངས་ཙམ་གྱི་སྒོ་ནས་དགེ་སློང་དང་མཐུན་པར་གསུངས་ནའང་། དགེ་ཚུལ་ལ་བླངས་པའི་ཕྱོགས་མཐུན་བསྡམ་བྱའི་ཉེས་བྱས་ཙམ་མོ། །ཞེས་པ་འདི་ཡང་འགྲོ་བའི་སྐྱབས་མགོན་པད་གླིང་ལྔ་པ་གསུང་སྤྲུལ་ངག་དབང་ཀུན་བཟང་རྡོ་རྗེ་ཚུལ་ཁྲིམས་གྲགས་པ་བཟང་པོས་གཟིགས་པའི་སླད་དུ་བན་ཆུང་ཆོས་དཔལ་གྱིས་འཕྲལ་དུ་ཟིན་བྲིས་སུ་སྤེལ་ཏེ་ཕུལ་བ་དགེ་ལེགས་སུ་གྱུར་ཅིག། །།