ཟབ་ལམ་བདེ་གཤེགས་ཀུན་འདུས་ལས༔ ཏུམ་མོའི་ལམ་རིམ་ཟབ་རྒྱ་བཅུ་གཅིག་པ།
༁ྃ༔ ཟབ་ལམ་བདེ་གཤེགས་ཀུན་འདུས་ལས༔ གཏུམ་མོའི་ལམ་རིམ་ཟབ་རྒྱ་བཅུ་གཅིག་པ་བཞུགས་སོ༔ ཨོ་རྒྱན་གཏེར་བདག་གླིང་པ། དཔལ་བདེ་ཆེན་གར་གྱི་དབང་ཕྱུག་ལ་ཕྱག་འཚལ་ལོ༔ གསང་སྔགས་རྡོ་རྗེ་ཐེག་པ་ལ༔ ཉོན་མོངས་ལམ་དུ་བྱེད་པའི་གནད༔ དངོས་གྲུབ་ཀུན་གྱི་གཞིར་གྱུར་པའི༔ གཏུམ་མོའི་མན་ངག་བསྟན་པར་བྱ༔ དེ་ལ་སྔོན་འགྲོ་དངོས་གཞི་དང༔ རྗེས་ཀྱི་རིམ་པ་གསུམ་དུ་ཡོད༔ དང་པོ་སྔོན་འགྲོས་རྒྱུད་སྦྱངས་ནས༔ ཁྱད་པར་ཅན་གྱི་སྔོན་འགྲོ་ལ༔ སྲུང་འཁོར་ཚོགས་བསག་སྦྱང་བ་བྱ༔ བདེ་བའི་གདན་ལ་ལུས་གནད་ཀྱིས༔ ཐུགས་རྗེ་ཆེན་པོའི་སྐུར་གསལ་བའི༔ སྙིང་གར་ཟླ་སྟེང་རྡོ་རྗེ་ནི༔ དམར་པོ་འོད་ཟེར་འཕྲོ་བ་སྒོམ༔ རླུང་འབྱིན་ཚེ་ན་རྡོ་རྗེ་ལས༔ རྡོ་རྗེའི་འོད་ཚོགས་དཔག་མེད་འཕྲོས༔ སྣ་ཡི་སྒོ་ནས་ཕྱི་རོལ་གྱི༔ ནམ་མཁའི་ཁམས་ཀུན་གང་བར་བསམ༔ རླུང་ཕྱིར་འཛིན་ཚེ་རྡོ་རྗེ་རྣམས༔ ས་གཞི་རྭ་གུར་ཉིད་དུ་གྱུར༔ སྲ་མཁྲེགས་གཞོམ་དུ་མེད་པར་བསམ༔ ནང་དུ་རྔུབ་ཚེ་བར་སྣང་གི༔ རྡོ་རྗེའི་ཚོགས་ཀུན་སྣ་སྒོར་ཞུགས༔ རླུང་བཟུང་སྤྱི་ནས་རྐང་མཐིལ་བར༔ རྡོ་རྗེའི་རྭ་བས་བར་མེད་དུ༔ གཏམས་པས་གཞོམ་མེད་ཉིད་དུ་བསམ༔ སྲུང་བ་འཁོར་ལོའི་ཟབ་རྒྱའོ༔ ཚོགས་བསག་ཉམས་ཆག་བསྐང་བ་ནི༔ སྙིང་གར་ཉི་སྟེང་བླ་མ་དང་༔ དབྱེར་མེད་ཐུགས་རྗེ་ཆེན་པོ་བསྒོམ༔ དབུགས་ཕྱིར་འགྲོ་ཚེ་སྙིང་ག་ནས༔ རྡོ་རྗེ་རྒྱ་གྲམ་དམར་སྐྱ་ཞིག༔ སྣ་ཡི་སྒོར་ཐོན་སྤྱི་བོ་ཡི༔ ཁྲུ་གང་ཙམ་གྱི་མཁའ་ལ་འཁོད༔ ཕྱིར་འཛིན་དུས་སུ་བླ་མ་ཡང་༔ སྣ་སྒོ་ལས་ཐོན་སྤྱི་བོ་ཡི༔ རྒྱ་གྲམ་སྟེང་ན་བཞུགས་པར་བསམ༔ ནང་དུ་འཇུག་ཚེ་མི་རྒྱུ་བའི༔ སྣ་ཡི་སྒོ་ནས་སྙིང་གར་བྱོན༔ འཛིན་དུས་སྙིང་གི་ཐིག་ལེ་ལ༔ དགྱེས་འཛུམ་ཉམས་ཀྱིས་བཞུགས་པར་བསམ༔ རྩེ་
གཅིག་མོས་གུས་གདུང་ཤུགས་བྱ༔ ཚོགས་བསག་མན་ངག་ཟབ་རྒྱའོ༔ ལུས་སྦྱོང་རྣམ་སྣང་ཆོས་བདུན་བྱ༔ རླུང་ནི་ཁ་སྦྱོར་དྲག་ཏུ་འཆིང་༔ དེ་ནས་འོག་རླུང་རང་བབས་ལ༔ སྟེང་རླུང་གནོན་པའི་སྦྱོར་བ་ཅིག༔ དེ་སྐབས་ལག་གཉིས་འཕེན་སྟབས་དང༔ རྐང་པ་རེ་མོས་དཀྲུག་བྱ་ཞིང་༔ རོ་སྟོད་གཡས་གཡོན་བཅུ་ཞིང་དཀྲུག༔ མགོ་བོ་བསྐོར་ཞིང་ཕྱོགས་བཞིར་འཕང༔ དེ་རྗེས་ཁ་ནས་སྒྲ་བཅས་བཏང༔ ལུས་ནང་བཤལ་བ་བཞིན་དུ་བསྒོམ༔ དེ་ལྟར་སྤེལ་བ་ལན་བདུན་བྱ༔ རྩ་སྦྱང་རང་ལུས་ལྷ་ཡི་སྐུར༔ གསལ་བའི་དབུས་སུ་དྷུ་ཏི་ནི༔ དྭངས་གསལ་སྦུབས་སྟོང་ཀ་བའི་ཚུལ༔ ཕྲུ་མ་ཕུ་ཡིས་བཏབ་པ་ལྟར༔ དང་པོ་མདའ་སྨྱུག་ཙམ་དུ་བསྒོམ༔ དེ་ནས་སྦ་ལྕག་ཙམ་དུ་བསྒོམ༔ དེ་ན་ཇེ་ཆེར་ཇེ་ཆེར་སྤེལ༔ ལུས་ཀུན་དབུ་མར་འདྲེས་པར་བསམ༔ དེ་ནས་ནམ་མཁས་གར་ཁྱབ་ཏུ༔ དབུ་མས་ཀྱང་ནི་ཁྱབ་པར་བསྒོམ༔ སླར་ཡང་ཇེ་ཕྲར་གྱུར་པ་ལས༔ སྦ་ལྕག་ཙམ་དུ་གསལ་བར་བསྒོམ༔ ལུས་ནང་སྐྲ་རྩེའི་བར་དུ་ཡང༔ ཁོང་སྟོང་དྭངས་ཤིང་གསལ་བར་བསྒོམ༔ རླུང་སྦྱར་དྷུ་ཏིའི་གཡས་གཡོན་གྱི༔ རོ་རྐྱང་ཡར་སྣ་སྨིན་མཚམས་ནས༔ སྣ་ཡི་སྒོར་ཟུག་མར་སྣ་གཉིས༔ ལྟེ་འོག་སོར་བཞིར་དབུ་མར་ཞུགས༔ དྭངས་ཤིང་གསལ་སྒོམ་རླུང་རོ་ཕྱིར༔ བསལ་ཚེ་ནད་གདོན་སྡིག་སྒྲིབ་སྦྱངས༔ འཇུག་དུས་བརྟན་གཡོ་འཁོར་འདས་ཀྱི༔ དྭངས་མ་རླུང་གི་རྣམ་པ་ཅན༔ རོ་རྐྱང་ལས་བརྒྱུད་དབུ་མར་བཅུག༔ རང་བབས་འཇམ་ཞིང་དལ་བར་འཛིན༔ སྦྱང་བའི་མན་ངག་ཟབ་རྒྱའོ༔ དེ་ནས་གཏུམ་མོའི་རྣལ་འབྱོར་ལ༔ དྲོད་བསྐྱེད་དམ་ཚིག་གཏུམ་མོ་དང༔ བདེ་བ་ཆོས་ཀྱི་གཏུམ་མོ་དང་༔ བདེ་དྲོད་སྟོང་པར་རྒྱས་འདེབས་པ༔ ཡེ་ཤེས་གཏུམ་མོར་ཡང་དག་བཤད༔ ལུས་གནད་མེ་ཐབ་དྲུག་ཆིངས་ལ༔ ལུས་ནང་རྩ་གསུམ་གསལ་བ་ཡི༔ དབུ་མའི་ཡར་སྣར་ཧཾ་དཀར་པོ༔ འཚེར་ཞིང་སྣུམ་འདྲིལ་གསལ་ལ་དྭངས༔ ཐུར་ལྟ་དེ་སྟེང་བླ་མ་ནི༔ དཀར་དམར་བཀྲག་མདངས་གཟི་བྱིན་ཅན༔ ཡེ་ཤེས་མཁའ་འགྲོ་ཡུམ་དང་སྦྱོར༔ དགྱེས་ཤིང་འཛུམ་པའི་ཚུལ་ཅན་བསྒོམ༔ མར་སྣ་འདུས་མདོར་ཨཾ་དམར་པོ༔ མེ་ཡི་རང་བཞིན་ཚ་ལ་རྩུབ༔ གསལ་ཞིང་དྭངས་ལ་འབར་བར་བསྒོམ༔ དེ་ནས་རླུང་རོ་ཕྱིར་བསལ་ལ༔ སྟེང་རླུང་རྔུབ་པའི་སྦྱོར་
བ་ཡི༔ རོ་རྐྱང་ལས་བརྒྱུད་ཨཾ་ལ་འཕོག༔ མེ་ལྕེ་ཕྲ་ལ་ཚ་ཞིང་རྣོ༔ དམར་གསལ་འུར་གྱིས་འབར་བ་ཡིས༔ ལུས་ནང་རྩ་ཀུན་གང་བར་བསམ༔ འོག་རླུང་སྐུམ་སྟེ་ཁ་སྦྱོར་འཆིང་༔ རེས་འགའ་དམར་བྲེང་ཟངས་ཁབ་བཞིན༔ ཕྲ་ཞིང་དྭངས་པར་འབར་བ་དང༔ རེས་འགའ་ཅི་ཡང་མི་དམིགས་པའི༔ ངང་གདངས་བསྐྱང་ཞིང་མཉམ་པར་བཞག༔ ཀུན་ལ་རླུང་གནད་རེ་དང་སྦྱར༔ གསལ་ཞིང་དྲག་ལ་ཡུན་ཐུང་བ༔ གཏུམ་མོའི་སྦྱོར་བ་དག་ལ་བསླབ༔ དམིགས་པ་འཛིན་དུས་རླུང་མི་འཇུག༔ གསལ་ཐེབས་ཚེ་ན་ཁ་སྦྱོར་འཆིང༔ བཙན་ཐབས་དྲོད་སྐྱེད་ཟབ་རྒྱའོ༔ དེ་ཉིད་བདེ་བར་རྒྱས་འདེབས་པ༔ ལྟེ་བའི་ཨཾ་ལས་འབར་བའི་མེས༔ དྷུ་ཏི་བརྒྱུད་ནས་སྤྱི་བོ་ཡི༔ ཧཾ་ལ་རེག་པའི་བདེ་དྲོད་ཀྱིས༔ བླ་མ་དགྱེས་ཚིམ་བདུད་རྩིར་ཞུ༔ ཧཾ་ལ་ཐིམ་པས་དེ་ཉིད་ལས༔ བྱང་སེམས་བ་ཐག་ལྟ་བུའམ༔ མུ་ཏིག་ལྟ་བུར་བབས་པ་གང་༔ ལྟེ་བའི་ཨཾ་ལ་ཐིམ་པ་ཡིས༔ སྡོང་བུ་མར་ཁུས་བརླན་པ་བཞིན༔ མེ་ཡི་གསོས་བྱས་ཆེར་འབར་བས༔ ཟླ་བ་བདུད་རྩིར་ཞུ་བ་ཡི༔ དྭངས་མས་ལུས་ཀུན་གང་བ་ལས༔ བདེ་བའི་རོ་ཡིས་ཁྱབ་པར་བསམ༔ རླུང་དང་སྦྱར་ཏེ་འབར་འཛག་བྱ༔ ངང་གདངས་བསྐྱང་ཞིང་མཉམ་པར་བཞག༔ བདེ་བར་ཤར་ཚེ་ཧཾ་ཡིག་ལས༔ བབས་པའི་ཐིག་ལེ་ལྟེ་བའི་བར༔ སྐུད་པ་བཞིན་དུ་བྲེང་ངེ་བསྒོམ༔ བདེ་བ་རྩོལ་མེད་ཡུན་དུ་གནས༔ བདེ་བར་རྒྱས་འདེབས་ཟབ་རྒྱའོ༔ བདེ་དྲོད་དབྱེར་མེད་སྟོང་ཉིད་དུ༔ རྒྱས་འདེབས་ནམ་མཁའ་སྟོང་པ་ལ༔ སྨིན་མཚམས་དག་ནས་ཁྲུ་གང་ཙམ༔ འགྱུར་མེད་དྲག་པོའི་མིག་གིས་བལྟ༔ སེམས་ཀྱང་རེས་བསྒྲིམས་རེས་འགའ་གློད༔ ཐུན་ཆུང་ཐུན་གྲངས་མང་བ་གཅེས༔ རང་བབས་ངང་ལ་ངལ་ཡང་བསོ༔ དུ་བ་ལ་སོགས་རྟགས་ལྔ་འབྱུང༔ བརྟན་ན་མིག་འབྲས་བསྒྱུར་བ་དང༔ བར་ཐག་རིང་ཐུང་མ་ངེས་པའི༔ རྟགས་སྣང་རྣམས་ལ་མ་ངེས་བསྒོམ༔ སྟེང་འོག་མ་ངེས་ཤུགས་ཕྱུང་བས༔ འོད་ཀྱིས་ཐིག་ལེས་བོགས་འབྱིན་བྱེད༔ འཇིག་རྟེན་ཁམས་མང་མཐོང་བར་འགྱུ ར༔ སྟོང་ཉིད་འོད་གསལ་ཟབ་རྒྱའོ༔ དེ་ལྟར་གསུམ་གྱི་དང་པོ་ལ༔ མེ་ཐབ་དྲུག་ཆིངས་ལུས་ཀྱི་གནད༔ ཕྱི་མ་གཉིས་ལ་ཆོས་བདུན་ནོ༔ རླུང་ནི་བུམ་ཆེན་སྦྱོར་བ་གཅེས༔ དེ་ལྟར་བསྒོམས་པས་ཉམས་
གསུམ་འོང༔ དང་པོར་རང་བཞིན་གྱི་ནི་ཉམས༔ བདེ་བས་རྣམ་རྟོག་ཁ་འཁྱིལ་ནས༔ ཤིན་ཏུ་བྱིང་བར་འགྱུར་བ་ཡིན༔ རྟོགས་པའི་ཉམས་ཞེས་བྱ་བ་ནི༔ རྣམ་རྟོག་རགས་ཤིང་བདེ་བའི་ཉམས༔ འོད་གསལ་བ་ཡི་ཉམས་ཞེས་པ༔ བདེ་གསལ་མི་རྟོག་རང་བཞིན་ཅན༔ འདི་ནི་སྒོམ་ཉམས་མཐར་ཐུག་གོ༔ བྱིང་ན་ཤེས་པ་ཧུར་ཕྱུང་སྟེ༔ སྣ་ཚོགས་ཡུལ་གྱི་བདུད་རྩི་བསྟེན༔ ཉམས་སྣང་གཏན་འབེབས་ཟབ་རྒྱའོ༔ གཏུམ་མོ་སྒོམ་པའི་རྣལ་འབྱོར་ལ༔ གེགས་སེལ་གནད་ཀྱི་མན་ངག་གཅེས༔ རླུང་ལོག་སེལ་བའི་མན་ངག་ནི༔ སྙིང་གའི་ཐད་ཀྱི་མདུན་རྒྱབ་ཏུ༔ བུ་ག་ཧར་རེ་དོད་པ་ལ༔ རླུང་ནི་ཉི་ཟེར་རྡུལ་བཞིན་དུ༔ བུན་བུན་འགྲོ་བ་ཉིད་དུ་བསམ༔ ཐོག་མར་ཕྱི་རུ་དྲོད་བྱུང་ན༔ ལྡེང་པོ་ཙམ་ལས་བོགས་མི་འབྱུང་༔ ཐོག་མར་སྙིང་གར་དྲོད་བྱུང་ན༔ མྱུར་དུ་མི་གནས་ཡལ་བར་འགྱུར༔ དེ་ལ་སྡུད་དང་འབེབས་པ་བྱ༔ སྲིན་ཞལ་འབྱེད་འཛུམ་མང་པོ་བྱ༔ ལྟེ་བར་ཁ་སྦྱོར་དྲག་པོ་བསྒོམ༔ སྟོ ང་ཉམས་སྐྱེས་ནས་སྐྲག་པ་སྙམ༔ སྣ་རྩེར་ཉི་མ་བསྒོམས་པས་སེལ༔ གནས་སུ་དྲོད་འབེབས་ཟབ་རྒྱའོ༔ རགས་པའི་རླུང་ནི་རྣམ་ཤེས་དང༔ བསྲེ་བའི་མན་ངག་འདི་ལྟར་བསྒོམ༔ སྤྱི་བོ་བདེ་ཆེན་འཁོར་ལོ་ནི༔ གཞའ་ཚོན་ལྟ་བུར་དྭངས་པར་བསམ༔ བུམ་ཅན་ཁ་སྦྱོར་སྤྱི་བོར་སྡིག༔ གེགས་སེལ་འབེབས་སོགས་ལན་འགའ་བྱ༔ འདར་དང་འཁོར་དང་འབིགས་པ་ཡི༔ རྟགས་གསུམ་བྱུང་ན་དམིགས་པ་བསྒྱུར༔ རྩ་འཁོར་དང་ནི་དབང་པོའི་སྒོ༔ གཞན་ལའང་དེ་བཞིན་ཤེས་པར་བྱ༔ འདི་ལ་གོམས་པ་མཐར་ཕྱིན་ན༔ རླུང་རྣམས་གར་བཟུང་ཟིན་པ་དང༔ གང་འདོད་སྒོ་ནས་འགྲོ་འོང་ནུས༔ དེ་ནས་བདེ་བའི་རླུང་དང་བསྲེ༔ དྷུ་ཏིའི་འོད་ཀྱི་སྣང་བ་ཡིས༔ ལུས་ནི་གཞའ་ལུས་བདེ་བར་བསྒོམ༔ རླུང་ནི་དྲག་ཏུ་བཀག་པ་ཡིས༔ བདེ་བས་གཉིས་སྣང་འདྲེས་པའི་རྟགས༔ རྡོས་བཅས་ཀུན་ལ་ཐོགས་མེད་འགྱུར༔ བསྲེ་བའི་མན་ངག་ཟབ་རྒྱའོ༔ འབྱུང་བཞི་ཆ་ནི་མ་སྙོམས་ན༔ འབྱུང་བ་རོ་སྙོམས་བསྒོམ་པར་བྱ༔ ས་རྒྱས་ལུས་སེམས་ལྕི་བ་ལ༔ རླུང་དཀྱིལ་སྟེང་དུ་རྐང་པ་བཞག༔ བ་དན་གཡོ་བས་འདེགས་པར་བསམ༔ རླུང་རྒྱས་ཡེད་ཡེད་འགྲོ་འདོད་ན༔ ལྟེ་བར་ས་དཀྱིལ་ཆེར་མཆེད་ནས༔ སྣང་རིག་གསེར་དུ་གྱུར་པར་བསྒོམ༔ ཆུ་
རྒྱས་དྲོད་ཆུང་གྲང་ཤུམ་བྱེད༔ གསང་བར་མེ་དཀྱིལ་བསྒོམས་པས་སེལ༔ མེ་རྒྱས་ཚ་བ་འཕེལ་བ་ན༔ སྙིང་གར་ཆུ་དཀྱིལ་བསིལ་བ་ལས༔ མཆེད་ནས་སྣང་སྲིད་ཆུ་རུ་བསྒོམ༔ འགྱུར་བ་བགེགས་ལ་གཟེར་བཞི་བསྒོམ༔ ལུས་གནད་སྐྱིལ་ཀྲུང་རྐང་སེན་དབུགས༔ རྡོ་རྗེ་ཁུ་ཚུར་གཡས་འཕྱར་ཞིང༔ གཡོན་པ་ཕྱིར་ལོག་ལྟེ་བར་བརྟེན༔ མིག་གཉིས་སྟེང་བགྲད་འོག་སྒོ་གློད༔ སྟེང་རླུང་དྲག་ཏུ་བསྡིགས་པ་དང༔ ཐུར་སེལ་འཐེན་པ་རེས་འགའ་བྱ༔ སེམས་གནད་ནམ་མཁའི་དབྱིངས་སུ་འཕང༔ དངུལ་ཆུ་སྦྱངས་དང་ག་བུར་བསྲེས༔ ཛ་དངུལ་སྦྱངས་སོགས་སྣ་ནས་བསྟེན༔ འབྱུང་བཞི་རོ་སྙོམས་ཟབ་རྒྱའོ༔ གང་ཞིག་བགེགས་ཀྱི་བར་ཆད་ཀྱིས༔ ཏིང་འཛིན་ལས་སུ་མི་རུང་ན༔ ལྟེ་བར་རླུང་མེ་བརྩེགས་པ་ལ༔ རཾ་མཚན་བ་དན་བསྐྱོད་པ་ཡིས༔ རཾ་ལས་མེ་འབར་ལུས་ཀུན་ཁེངས༔ གདོན་གྱི་ངོ་བོ་སྙིང་གར་ཏྲི༔ ནག་པོར་གནས་པ་མེས་བསྲེགས་སྦྱངས༔ ཐལ་བའང་ཕྱི་རོལ་གཏོར་བར་བསམ༔ རླུང་འབྱིན་དྲག་པོ་འབར་བའི་མེས༔ བགེགས་རྣམས་སྐྲག་ཅིང་འབྱར་བར་བསམ༔ སྡིག་སྒྲིབ་སྦྱོང་ན་པཾ་དམར་པོ༔ སྔར་བཞིན་བསྒོམས་ལ་སྦྱང་བར་བྱ༔ གེགས་སེལ་མན་ངག་ཟབ་རྒྱའོ༔ དེ་ལྟར་གདམས་པའི་ངོ་བོ་རྣམས༔ དང་པོའི་ལས་ཅན་རྣམས་ཀྱིས་ནི༔ ཉིན་མཚན་ཐུན་དྲུག་བསྒོམ་པར་བྱ༔ ཉིན་མཚན་གཉིས་ལ་སྔ་ཐུན་རེ༔ ཕྱི་ཐུན་གཉིས་གཉིས་དག་ཏུ་བྱ༔ ཁ་ཚང་དོན་འདྲིལ་ཟབ་མོའི་གནད༔ གཏུམ་མོའི་མན་ངག་སྙིང་པོ་འདི༔ གསང་བ་ཡེ་ཤེས་དྷཱ་ཀི་མས༔ པདྨ་འབྱུང་གནས་བདག་ལ་གཏད༔ བདག་གིས་མ་འོངས་དོན་ཕྱིར་དུ༔ ལས་ཅན་རྗེ་འབངས་རྣམས་ལ་གཏད༔ ཤེས་རབ་བློ་ལྡན་སྙིང་རྗེ་ཅན༔ སྐལ་ལྡན་གཅིག་གི་དཔལ་དུ་ཤོག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ གསང་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ༔ དགེའོ༔