ངུར་སྨྲིག་གི་རྒྱལ་མཚན་བཞེས་པའི་རྣམ་ཐར།

དགུང་གྲངས་བཅོ་ལྔའི་ས་ག་ཟླ་བར། དགའ་བོ་རབ་ཏུ་འབྱུང་པའི་མདོ་ལས། ཁྱིམ་པ་རྣམས་ནི་མེ་འོབས་ན་གནས་པ་ལྟ་བུའོ། །རབ་ཏུ་བྱུང་པ་རྣམས་ནི་བསིལ་ཁང་ན་གནས་པ་ལྟ་བུའོ། །ཞེས་སོགས་དང༌། དྲག་ཤུལ་ཅན་གྱིས་ཞུས་པའི་མདོ་ལས། ཁྱིམ་ན་གནས་པ་ནི་ཀུན་ཏུ་གནོད་པ་སྟེ་རྡུལ་འབབ་པའོ། །ཁྱིམ་ན་གནས་པ་ནི་ཐིབས་པའོ། །རབ་ཏུ་བྱུང་པ་ནི་འཐིབས་པ་ལས་ཐར་བ་ཡིན་ཏེ་ཞེས་པའི་བར་ཁྱིམ་པ་དང་རབ་ཏུ་བྱུང་པའི་ཁྱད་པར་བརྒྱ་རྩ་བརྒྱད་དུ་གསུངས་པ་དང༌། ཆོ་འཕྲུལ་ཆེན་པོ་བསྟན་པའི་མདོ་ལས། གང་དག་ཁྱིམ་ན་གནས་པར་བྱེད་བཞིན་དུ། །བྱང་ཆུབ་དམ་པ་མཆོག་འདི་ཐོབ་པ་ཡི། །སངས་རྒྱས་གང་ཡང་སྔོན་ཆད་མ་བྱུང་སྟེ། །མ་འོངས་པ་ནའང་མི་འབྱུང་གནས་པ་མེད། །ཅེས་དང༌།

དགའ་བོ་རབ་ཏུ་བྱུང་པའི་མདོ་ལས། སྟོང་གསུམ་གྱི་སེམས་ཅན་ཐམས་ཅད་ཀྱིས་བསྐལ་པའི་བར་དུ་བུ་དང་ཆུང་མ་སྦྱིན་པར་གཏང་པའི་བསོད་ནམས་པས། རབ་ཏུ་བྱུང་པའི་བསམ་པས་དགོན་པར་གོམ་པ་གཅིག་བོར་བ་བསོད་ནམས་ཆེ་བར་གསུངས་པ་ལྟར་གྱི་དོན་ཆེན་པོ་ཅན་མཉམ་མེད་ཤཱཀྱའི་རྒྱལ་བོའི་རྗེས་སུ་འཇུག་པའི་རབ་ཏུ་བྱུང་བའི་འདུན་པ་གཞན་གྱིས་བསྐུལ་བ་ལ་མ་ལྟོས་པར་བྱུང་སྟེ། སྤྱིར་ནི་དམ་པ་གང་ཉིད་ཁྱབ་བདག་སྒྲོལ་བའི་མགོན་པོའི་ཞབས་དང་གཉིས་སུ་མ་མཆིས་པ་ལ་ཚེ་རབས་གོམས་པའི་བག་ཆགས་དང་སྨོན་ལམ་གྱི་སྟོབས་ལས་སྐྱེ་བ་མ་མཆིས་ཏེ། བྱང་འཕགས་སྐྱེ་བ་ཐམས་ཅད་ཏིང་ངེ་འཛིན་ལ་དབང་འབྱོར་བས་དང༌། སངས་རྒྱས་བཅོམ་ལྡན་འདས་རྣམས་འབད་མེད་ལྷུན་འགྲུབ་ཀྱིས་སྣ་ཚོགས་པའི་འགྲོ་དོན་བྱེད་པ་ཁོ་ནར་ངེས་པའི་ཕྱིར་རོ། །འོན་ཀྱང་བྱང་སེམས་འཕགས་པ་ཆེན་པོ་འགྲོ་བའི་དོན་དུ་ཉན་ཐོས་སུ་སྤྲུལ་བ་ཤཱ་རིའི་བུ་སྔོན་གྱི་ཚེ་རབས་

ཕྲེང་བ་དུ་མར་རབ་ཏུ་བྱུང་བ་དང་རབ་ཏུ་བྱུང་བར་སྨོན་ལམ་གྱི་སྟོབས་ལས་ཁྱིམ་ནས་ཕྱུང་སྟེ་རབ་ཏུ་འབྱུང་བར་འདོད་པ་ངང་གིས་སྐྱེས་པ་དང་རབ་ཏུ་བྱུང་ནས་ཀྱང་དགྲ་བཅོམ་པའི་འབྲས་བུ་ཚེགས་མེད་པར་ཐོབ་པར་གསུངས་ཏེ། འདུལ་བ་ལུང་གཞི་ལས། རང་སངས་རྒྱས་དེའི་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། དགེ་བའི་རྩ་བ་འདི་ཡིས་བདག །ཧ་ཅང་ཕྱུག་པའི་ཁྱིམ་དང་ནི། །དབུལ་པོའི་ཁྱིམ་དུ་མི་སྐྱེ་བར། །བར་མའི་ཁྱིམ་དུ་སྐྱེ་འགྱུར་ཞིང༌། །རྟག་པར་རབ་འབྱུང་མང་བར་ཤོག །ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་རྒྱལ་བུ་དེ་གང་ཡིན་པ་དེ་ནི་དགེ་སློང་ཤཱ་རིའི་བུ་འདི་ཉིད་ཡིན་ཏེ། དེས་རང་སངས་རྒྱས་ལ་མཆོད་པ་བྱས་ནས་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ད་ལྟར་ཁྱིམ་ཧ་ཅང་ཕྱུག་པར་ཡང་མ་སྐྱེས། ཁྱིམ་ཧ་ཅང་དབུལ་བར་ཡང་མ་སྐྱེས་པར་ཁྱིམ་འབྲིང་པོར་སྐྱེས་ཤིང་རབ་ཏུ་འབྱུང་བ་མང་བར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེས་མ་རྣམས་ཀྱི་རྣམ་པར་སྨིན་པ་ཡང་འདྲེས་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེས་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ཞེས་པ་ལྟར། དགེ་བའི་བཤེས་གཉེན་མིའི་ཤ་ཚུགས་སུ་ཤར་བ་གང་ཉིད་ཀྱང་རབ་ཏུ་བྱུང་སྟེ་ལུང་རྟོགས་ཀྱི་ཆོས་ལ་བརྩོན་པར་འདོད་པ་འགོག་མེད་དུ་ངང་གིས་དུས་རིང་པོར་བྱུང་ནས། རང་ཡུལ་གྱི་བྱ་བཏང་བ་བླ་མ་ཚུལ་རྒྱམ་དང༌། ཨཱརྱ། སངས་དཔལ། ངག་རྒྱམ་བཅས་དང་ལྷན་དུ་ཞབས་ཐང་ལ་འཛི་ག་ལུང་བའི་བཀྲ་ཤིས་ཆོས་ཐང་དགོན་པར་ཕེབས་ནས། འདུལ་བ་འཛིན་པ་མཁན་ཆེན་རྡོ་རྗེ་འཆང་བློ་བཟང་འཕྲིན་ལས་མཆོག་གི་ཞལ་སྔ་ནས་ཀྱི་ཞབས་དྲུང་དུ་ཡོངས་རྫོགས་དགེ་བསྙེན་དང་བར་མ་རབ་བྱུང་སྔོན་དུ་འགྲོ་བའི་སྒོ་ནས་དགེ་ཚུལ་གྱི་སྡོམ་པ་ཡང་དག་པར་མནོས་ཏེ། མཚན་ལ་དཔལ་ལྡན་ཆོས་འཕེལ་ཞེས་བཏགས། བླ་མ་ཚུལ་རྒྱམ་དང་ཨཱརྱ་གཉིས་ཕྱོགས་འདིར་ཆོས་གོས་གཅིག་ཞབས་སུ་གྲགས་པ་སྟེ་དུས་ཐོག་གཅིག་ལ་ཁོང་དང་བཅས་ཏེ་གསུམ་ཚན་དུ་རབ་བྱུང་དགེ་ཚུལ་དུ་སྒྲུབ་པའི་སྒྲུབ་གྲོགས་ཡིན་ནོ། །དེ་ནས་བཟུང་སྟེ། རྗེ་ཏཱ་ར་ནཱ་ཐའི་རང་རྣམ་མ་བཅོས་ལྷུག་པ་ལས། སྲིད་གསུམ་མ་ལུས་སྐྱེས་སུ་ཐོབ་གྱུར་ཀྱང། །ངུར་སྨྲིག་རྒྱལ་མཚན་ཐོབ་པའི་ཆར་མི་ཕོད། །སྲིད་ཀྱི་འབྱོར་བ་འདི་ནི་ནམ་ཡང་འཇིག །ངུར་སྨྲིག་ཐོབ་པས་འཆི་མེད་གྲོང་དུ་བགྲོད། །ཅེས་པ་ལྟར་འཇིག་རྟེན་གསུམ་དུ་ཐོབ་པར་དཀའ་བའི་ངུར་སྨྲིག་གི་རྒྱལ་མཚན་དྲང་སྲོང་གི་རྟགས་ཀྱིས་ཡང་དག་པར་བརྒྱན་པར་བྱས་

སོ། །

ཞི་བའི་ཐུགས་དང་དུལ་བའི་གསུང་དབྱངས་ཀྱིས། །

འགྲོ་བློའི་དབུལ་སེལ་སྟོབས་བཅུའི་དབང་ཕྱུག་གི། །

བརྟུལ་ཞུགས་གཙང་མས་རབ་ཏུ་བརྒྱན་བྱས་ཏེ། །

ཐར་ལམ་གཞུང་ཤིང་བཙུགས་པའི་རྣམ་ཐར་རོ། །

སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ངུར་སྨྲིག་གི་རྒྱལ་མཚན་བཞེས་པའི་རྣམ་ཐར་མདོར་བསྡུས་པ་སྟེ་གསུམ་པའོ། །