དྲི་བ་བཞི་བ་ནི།གང་དང་ཡང་དག་ལྡན་པས་ཞེས་སོགས་ཀྱིས་བསྟན་པའི་ཆོས་འཁོར་གྱི་དོན་དང་ཆོས་འཁོར་གསུམ་རེ་རེའི་མཚན་ཉིད་དང་རྣམ་མཁྱེན་དང་ཆོས་འཁོར་སྔ་ཕྱི་རྒྱུ་འབྲས་ཡིན་ནམ་ཅི་ཞེས་པའི་ལན།

དྲི་བ་བཞི་བ་ནི།གང་དང་ཡང་དག་ལྡན་པས་ཞེས་སོགས་ཀྱིས་བསྟན་པའི་ཆོས་འཁོར་གྱི་དོན་དང་ཆོས་འཁོར་གསུམ་རེ་རེའི་མཚན་ཉིད་དང་རྣམ་མཁྱེན་དང་ཆོས་འཁོར་སྔ་ཕྱི་རྒྱུ་འབྲས་ཡིན་ནམ་ཅི་ཞེས་པའི་ལན།

གང་དང་ཡང་དག་ལྡན་པས་ཞེས་སོགས་ཀྱིས་བསྟན་པའི་ཆོས་འཁོར་གྱི་དོན་དང་ཆོས་འཁོར་གསུམ་རེ་རེའི་མཚན་ཉིད་དང་རྣམ་མཁྱེན་དང་ཆོས་འཁོར་སྔ་ཕྱི་རྒྱུ་འབྲས་ཡིན་ནམ་ཅི་ཞེས་པའོ། །དེའི་ལན་ནི། བཀའ་དང་རྟོགས་པའི་བསྟན་པས་བསྡུས་པའི་རྣམ་དཀར་གྱི་ཡོན་ཏན་དེ། ཆོས་འཁོར་གྱི་མཚན་ཉིད། ཉ་ཊཱིཀ་ལས། གང་མངོན་རྟོགས་སུ་ལྡན་པའི་སྟོབས་ཀྱིས་བརྒྱད་ཁྲི་བཞི་སྟོང་གི་ཆོས་འཁོར་བསྐོར། ཞེས་དང༌། བསྟན་པ་སྤྱི་འགྲེལ་གྱི་རྣམ་བཤད་ལས། ངེས་དོན་དུ་རྗོད་བྱེད་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བརྗོད་བྱ་ལམ་ལྔ་ཐམས་ཅད་ཆོས་འཁོར་དུ་སངས་རྒྱས་གཉིས་པ་དབྱིག་གཉེན་ལ་སོགས་པའི་བཞེད་དོ། །ཞེས་གསུངས་སོ། །ཀུན་བཏུས་ལས། རྟོགས་པའི་བསྟན་པ་ཡང་རྒྱུ་དང་འབྲས་བུའི་དབྱེ་བས་འགོག་པ་དང་ལམ་གྱི་བདེན་པ་དག་གོ ། ཞེས་དང༌། ཡུམ་གསུམ་གནོད་འཇོམས་༣༡༤ལས། དེ་བཞིན་གཤེགས་པ་རྣམས་བྱུང་ཡང་རུང་ཞེས་སོགས་ནི་ཆོས་ཐམས་ཅད་གནས་པའི་མཚན་ཉིད་དེ་གང་ཡང་མི་བྱེད་ཅེས་བསྟན་པའོ། །ཆོས་གནས་པ་འདི་ཉིད་མཁྱེན་པས་དེ་བཞིན་གཤེགས་པ་ཞེས་བྱ་བ་དག་འཇིག་རྟེན་ན་སྣང་བ་སྟེ། འདི་ཉིད་དེ་དག་གི་མངོན་པར་རྟོག་པ་དང་འདི་ཉིད་ཆོས་ཀྱི་འཁོར་ལོ་ཞེས་བྱ་བའི་ཐ་ཚིག་གོ ། ཞེས་གསུངས་པ་ལྟར་ཆོས་རྗེ་ཀུན་མཁྱེན་གྱི་སྟོང་ཕྲག་ཉི་ཤུ་ལྔ་པའི་བཤད་པ་༡༢༩ལས། འདི་ཉིད་ཆོས་ཀྱི་འཁོར་ལོ་ཞེས་བྱ་བའི་ཐ་ཚིག་གོ་ཞེས་དབུ་མ་པ་ཆེན་པོ་གསུངས། ཞེས་དང༌། བསྟན་པ་སྤྱི་འགྲེལ་གྱི་རྣམ་བཤད་ལས། བསྟན་པ་ནི་སྡེ་སྣོད་གསུམ་དང་རྒྱུད་སྡེ་བཞི་སོགས་ལུང་གི་ཆོས་དང༌། བྱང་ཕྱོགས་སོ་བདུན་སོགས་རྟོགས་པའི་ཆོས་ལམ་དང་འགོག་བདེན་ནོ། །ཞེས་གསུངས་པས་འགོག་བདེན་དང་ཆོས་ཉིད་དེ་བཞིན་གཤེགས་པའི་སྙིང་པོ་གཉིས་རྟོགས་པའི་ཆོས་འཁོར་ཡིན་པ་འདྲའོ། །གཞན་ཡང་འཕགས་པ་བྱམས་པའི་སྨོན་ལམ་གྱི་རྣམ་བཤད་ལས། གང་བཟོད་པ་ཐོབ་པ་ཡན་ཆད་ཀྱི་ཐེག་པ་ཆེན་པོའི་ལམ་ལ་འཇིག་རྟེན་ལས་འདས་པའི་སའི་རིམ་པ་མི་འདྲ་བ་རེ་གསར་ཐོབ་ཏུ་འབྱུང་བ་ཀུན་དང༌། ཉན་ཐོས་ཀྱི་འབྲས་བུ་བཞི་ལ་སོགས་པ་ཐམས་ཅད་རྟོགས་པའི་ཆོས་འཁོར་ཡིན་ལ། དེ་དང་དེ་དངོས་སུ་ལྟ་ཅི་སྨོས། རྒྱུད་ནས་ཐོབ་བྱེད་ཀྱི་ཆོས་སྟོན་པ་ཐམས་ཅད་ཀྱང༌། ལུང་གི་ཆོས་འཁོར་ཏེ། དེ་དག་ཀུན་རྫོབ་ཀྱི་ཆོས་འཁོར་རོ། །ཤེས་བྱ་ཐམས་ཅད་གཟིགས་པའི་ཡེ་ཤེས་རྒྱུན་མི་ཆད་པ་ནི་རྟོགས་པའི་ཆོས་འཁོར་དང༌། དོན་དེ་དང་མཐུན་པའི་གསུང་རབ་ཡན་ལག་རྒྱ་མཚོ་སངས་རྒྱས་ཉིད་ལ་སྣང་བ་ནི། ལུང་གི་ཆོས་འཁོར་ཏེ་འདི་གཉིས་ནི་དོན་དམ་པའི་ཆོས་འཁོར་རོ། །ཞེས་པའི་གསུང་ཟིན་ལྟར་ན་བསྟན་བཅོས་ཀུན་ལུང་གི་ཆོས་འཁོར་ཡིན་མིན་ཅུང་ཟད་དཔྱད་པར་བྱ་བ་ཡོད་དོ། །བདེན་བཞིའི་ཆོས་འཁོར་དང་བརྗོད་བྱ་སྟོན་ཚུལ་ཕྱོགས་མཐུན་གྱི་སྡེ་གཏོགས་པའི་མདོ་དེ། འཁོར་ལོ་དང་པོའི་མཚན་ཉིད། མཚན་ཉིད་མེད་པའི་ཤེར་ཕྱིན་གྱི་མདོ་དང་བརྗོད་བྱ་སྟོན་ཚུལ་ཕྱོགས་མཐུན་གྱི་སྡེ་གཏོགས་པའི་བཀའ་དེ། འཁོར་ལོ་གཉིས་པའི་མཚན་ཉིད། དོན་དམ་རྣམ་པར་ཕྱེ་བའི་མདོ་དང་བརྗོད་བྱ་སྟོན་ཚུལ་ཕྱོགས་མཐུན་གྱི་སྡེ་གཏོགས་པའི་མདོ་དེ། འཁོར་ལོ་གསུམ་པའི་མཚན་ཉིད་དུ་བཞག་པ་འགལ་བ་མེད་པར་སྣང་སྟེ། ཚུལ་གཉིས་རྣམ་འབྱེད་ལས། དེས་ན་འདི་ནི་བརྗོད་བྱའི་དོན་གྱི་གོ་རིམ་མམ་གདུལ་བྱའི་རྒྱུད་སྦྱོང་ཚུལ་གྱི་རིམ་པ་གསུམ་ཡིན་པས་དེ་ལྟ་བུའི་རིམ་པ་ཐ་མ་ཡིན་པའི་ཕྱིར།ཞེས་དང༌། དེ་ཉིད་ལས། འཁོར་ལོ་རིམ་པ་གསུམ་པོ་འདི་ཡང་དུས་ཐོག་མཐའ་ནི་མ་ཡིན་ཏེ། ཞེས་དང༌། དེ་བཞིན་གཤེགས་པའི་སྙིང་པོའི་མདོའི་འགྲེལ་བ་སྙིང་པོ་རབ་གསལ་༢༤༨ལས། འཁོར་ལོ་བར་བ་དང་ཐ་མ་གཉིས་ཀ་བརྗོད་བྱ་འདྲ་བས་བརྗོད་བྱའི་སྒོ་ནས་དྲང་དོན་དུ་མི་སྟོན་གྱི། ལེགས་པར་རྣམ་པར་ཕྱེ་བ་མ་ཡིན་པས་བརྗོད་ཚུལ་གྱིས་དྲང་དོན་དུ་གསུངས་བར་གོ་བར་བྱའོ། །ཞེས་གསུངས་སོ། །འོན་ཀྱང་མཉམ་མེད་ཐུབ་དབང་གི་བསྟན་པ་འདི་ལས་གཞན་པའི་སངས་རྒྱས་ཀྱི་ཆོས་འཁོར་དེ་གསུམ་འདུས་སམ་དཔྱད་པར་བྱའོ། །རྣམ་མཁྱེན་དང་ཆོས་འཁོར་གཉིས་སྔ་ཕྱི་རྒྱུ་འབྲས་ཡིན་ཏེ། ཉ་ཊཱིཀ་ཡིད་ཀྱི་མུན་སེལ་ལས། ཡུམ་ཤེར་ཕྱིན་ཆོས་ཅན། རྫོགས་སངས་རྣམས་ཀྱི་ཡུམ་ཡིན་ཏེ། དེ་རྣམས་ཀྱི་རྒྱུད་ལ་རྣམ་མཁྱེན་བསྐྱེད་ནས་དེ་རྣམས་ཀྱིས་བརྒྱད་ཁྲི་བཞི་སྟོང་གི་ཆོས་འཁོར་བསྐོར་བར་བསྐྲུན་པའི་མི་རྟོག་ཡེ་ཤེས་ཡིན་པས་སོ། །རྣམ་མཁྱེན་དེའི་ཡུམ་དུ་ཡང་ངོ༌། །ཞེས་དང༌། ཐུབ་རྣམས་ཆོས་འཁོར་གསུངས་པ་ཆོས་ཅན། རྣམ་མཁྱེན་གྱི་འབྲས་བུའི་ཐ་སྙད་བྱར་རུང་ཞེས་སོགས་དགོད་དོ། །རྟགས་རིམ་བཞིན་དུ་གྲུབ་སྟེ། ཇི་སྙེད་པ་མཁྱེན་པའི་ཡེ་ཤེས་ཐུགས་རྗེ་ཆེན་པོ་ཅན་རྒྱུད་ལ་ཡོད་ན་དེ་བསྐོར་ནུས་ཏེ། མདོར་རྣམ་མཁྱེན་ཉིད་ཐོབ་ནས་ཆོས་ཀྱི་འཁོར་ལོ་བསྐོར་ཞེས་སོ། །དེ་མེད་ན་བསྐོར་མི་ནུས་ཏེ། འདབ་གཤོག་མེད་པའི་བྱ་འཕུར་མི་ནུས་པ་བཞིན། མདོར། རྣམ་པ་ཐམས་ཅད་མཁྱེན་པ་ཉིད་ཐོབ་པར་མ་བགྱིས་པར་ཆོས་ཀྱི་འཁོར་ལོ་བསྐོར་བར་མི་ནུས་སོ་ཞེས་དང༌། རྣམ་མཁྱེན་ཉིད་དེའི་རྒྱུར་སྨོས་པ་མི་འཐད་དེ། ལྗགས་སོགས་ཀྱང་དེ་ཡིན་པས་སོ་ཞེ་ན། རྣམ་མཁྱེན་ངེས་པའི་རྒྱུ་ཡིན་གྱི་གཞན་ཡང་རྒྱུ་ཡིན་པ་མི་འགོག་གོ ། ཞེས་གསུངས་སོ། །རྣམ་མཁྱེན་དང་ཆོས་འཁོར་རྒྱུ་འབྲས་སུ་གསུངས་པ་རང་རྒྱུ་རང་འབྲས་ཀྱི་དབང་དུ་བྱས་པ་ཡོད་པ་དང་འགོག་བདེན་ལྟ་བུ་འབྲས་བུའི་ཐ་སྙད་བྱས་ནས་བཤད་དགོས་པ་སོགས་ཞིབ་ཆ་ཅུང་ཟད་རེ་དགོས་སོ། །རྣམ་མཁྱེན་དང་སློབ་ལམ་གྱི་ཆོས་འཁོར་གཉིས་སྔ་ཕྱི་གང་ཡིན་ལ་དཔྱད་པར་བྱའོ། །རྣམ་མཁྱེན་མ་ཐོབ་པར་ཆོས་འཁོར་བསྐོར་མི་ནུས་པར་གསུངས་པ་ལ། རྒྱུད་བླ་མ་ལས། བྱང་ཆུབ་སེམས་དཔའི་ཚུལ་འདི་ནི། །རྗེས་ཐོབ་དེ་བཞིན་གཤེགས་རྣམས་དང༌། །སེམས་ཅན་ཡང་དག་སྒྲོལ་བ་ལ། །འཇིག་རྟེན་ན་ནི་མཉམ་པ་ཉིད། །ཞེས་སོགས་དང༌། དེའི་ས་འགྲེལ་ལས། ས་བཅུ་པ་ལ་གནས་པའི་བྱ༷ང་ཆུ༷བ་སེ༷མས་དཔ༷འི་འཕྲིན་ལས་འཇུག་པའི་ཚུ༷ལ་འདི༷་ནི༷་རྗེ༷ས་ཐོ༷བ་ཏུ་གཞན་ཡོངས་སུ་སྨིན་པར་བྱེད་པ་ལ་ལྟོས་ནས་སྤངས་རྟོགས་མཐར་ཕྱིན་པའི་དེ༷་བཞི༷ན་གཤེ༷གས་པ་རྣ༷མས་དང༷་ཡང་གདུལ་བྱར་གྱུར་བའི་སེ༷མས་ཅ༷ན་རྣམས་འཁོར་བ་སྡུག་བསྔལ་གྱི་རྒྱ་མཚོ་ལས་ཡ༷ང་ད༷ག་པར་སྒྲོ༷ལ་བ༷་ལ༷།འཇི༷ག་རྟེ༷ན་ན༷་ནི༷་ལྷུན་གྱིས་གྲུབ་ཅིང་རྒྱུན་མི་འཆད་པས་མཉ༷མ་པ༷་ཉི༷ད་ཡིན་ཏེ། མངོན་པར་ཤེས་པ་དྲུག་དང་དབང་བཅུ་ལ་སོགས་པའི་ཡོན་ཏན་ཁྱད་པར་ཅན་རྣམས་ཐོབ་པའི་ཕྱིར་རོ། །གཞན་དོན་ལ་སངས་རྒྱས་དང་མཚུངས་པ་དེ་ལྟ་མོད་ཀྱི། རང་དོན་སྤངས་རྟོགས་ཀྱི་ཡོན་ཏན་ལ་ལྟོས་ནས་ཁྱད་པར་ཤིན་ཏུ་ཆེ་བ་ཉིད། ཅེས་གསུངས་པ་ལྟར་ན་གཞན་དོན་མཛད་པ་སངས་རྒྱས་དང་འདྲ་ན་གཞན་དོན་དུ་ཆོས་འཁོར་བསྐོར་བ་སངས་རྒྱས་དང་འདྲ་བར་འགྱུར་རོ་ཞེ་ན་ཅུང་ཟད་དཔྱད་རྒྱུ་སྣང་ངོ༌། །ས་བཟང་གི་མངོན་པ་ཀུན་བཏུས་འགྲེལ་བ་སོགས་ལས་ཐུན་མོང་གི་ལུགས་ལ་འཁོར་ལོ་གསུམ་དུས་ཀྱི་རིམ་པའི་སྒོ་ནས་གསུངས་ཏེ། དེ་༦༠༠ལས། བཱ་ར་ཎཱ་སཱིར་བྱོན་ཏེ་ལྔ་སྡེ་བཟང་པོ་ལ་སོགས་པའི་གདུལ་བྱ་རྣམས་ལ་བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་ལོ་བདུན་དུ་བསྐོར་བས་གང་ཟག་གི་བདག་ཏུ་ལྟ་བ་ལས་བཟློག་ནས་མྱ་ངན་ལས་འདས་པའི་ལམ་ལ་འཇུག་པར་མཛད་པ་དང༌། བྱ་རྒོད་ཕུང་པོ་ལ་སོགས་པར་བྱོན་ཏེ་གང་ཟག་སྡེ་བཞི་ལ་སོགས་པའི་གདུལ་བྱ་རྣམས་ལ་བཀའ་བར་བ་མཚན་ཉིད་མེད་པའི་ཆོས་ཀྱི་འཁོར་ལོ་ལོ་བཅུའི་རབ་ཏུ་བསྐོར་བས་དངོས་པོར་འཛིན་པའི་ལྟ་བ་ལས་བཟློག་ནས་ཐེག་པ་ཆེན་པོའི་ལམ་གྱིས་སྨིན་པར་མཛད་པ་དང༌། མཉན་ཡོད་དང་ལང་ཀ་པུ་རི་ལ་སོགས་པར་བྱོན་ཏེ་རང་བཞིན་སྣ་ཚོགས་པའི་གདུལ་བྱ་རྣམས་ལ་བཀའ་ཐ་མ་དོན་དམ་རྣམ་པར་ངེས་པའི་ཆོས་ཀྱི་འཁོར་ལོ་ལོ་སུམ་ཅུར་བསྐོར་བས་ཡོད་མེད་རྟག་ཆད་ཀྱི་མཐར་འཛིན་པའི་ལྟ་བ་བཟློག་ནས་མུ་བཞིའི་སྤྲོས་པ་དང་བྲལ་བའི་བྱང་ཆུབ་ཆེན་པོ་ལ་སྦྱོར་བར་མཛད་པ་ལྟ་བུ་ཆོས་ཀྱི་འཁོར་ལོ་བསྐོར་བའི་མཛད་པ་དང༌། ཞེས་དང༌། ཆོས་འབྱུང་རིན་པོ་ཆེའི་གཏེར་༢༧༩ལས། དུས་དང་པོར་གསུངས་པ་བདེན་པ་བཞིའི་ཆོས་འཁོར། བར་དུ་གསུངས་པ་མཚན་ཉིད་མེད་པའི་འཁོར་ལོ། ཐ་མར་གསུངས་པ་དོན་དམ་རྣམ་པར་ངེས་པའི་ཆོས་འཁོར་དེ་གསུམ་དུ་དགོངས་པ་ངེས་འགྲེལ་དུ་བཤད་དོ། །ཞེས་དང༌། ཉ་ཊཱིཀ་ལས། མདོ་དེ་ལས་རིམ་ཅན་དུ་བསྐོར་བར་གསུངས་ཤིང༌། སྐད་ཅིག་གཅིག་ཁོ་ན་ལ་བསྐོར་ན་དགུང་ལོ་སོ་དྲུག་པ་ལ་སངས་རྒྱས་ནས་བརྒྱད་ཅུའི་བར་ཅི་ཞིག་མཛད། ཅེས་གསུངས་སོ། །