བསྟན་བཅོས་རྩོམ་པ་ལ་འཇུག་པའི་ཐབས་མཆོད་པར་བརྗོད་པ།
བསྟན་བཅོས་རྩོམ་པ་ལ་འཇུག་པའི་ཐབས་མཆོད་པར་བརྗོད་པ། བརྩམ་པའི་བསྟན་བཅོས་ཀྱི་ལུས་དངོས། བསྟན་བཅོས་ཇི་ལྟར་བརྩམས་པའི་ཚུལ། བསྟན་བཅོས་བརྩམས་པའི་དགེ་བ་བསྔོ་བ་དང་བཞི།
གཞན་དོན་ཁུར་འཁྱེར་གྱི་སྙིང་རྗེ་ཆེན་པོ་ལ་སོ་སོར་མ་ཕྱེ་བར་བསྟོད་པ།
དང་པོ་ལ་གཞན་དོན་ཁུར་འཁྱེར་གྱི་སྙིང་རྗེ་ཆེན་པོ་ལ་སོ་སོར་མ་ཕྱེ་བར་བསྟོད་པ་དང༌། སོ་སོར་ཕྱེ་སྟེ་ཕྱག་འཚལ་བ་དང་གཉིས།
དང་པོ། སྙིང་རྗེ་བྱང་སེམས་ཀྱི་གཙོ་བོའི་རྒྱུར་བསྟན་པ།
དང་པོ་ནི། སྙིང་རྗེ་བྱང་སེམས་ཀྱི་གཙོ་བོའི་རྒྱུར་བསྟན་པ་དང༌། བྱང་སེམས་ཀྱི་རྒྱུ་གཞན་གཉིས་ཀྱི་ཡང་རྩ་བར་བསྟན་པ་དང་གཉིས། དང་པོ་ལ་གསུམ།
ཉན་རང་གཉིས་ཐུབ་དབང་ལས་སྐྱེས་ཚུལ།
ཉན་རང་གཉིས་ཐུབ་དབང་ལས་སྐྱེ་ཚུལ་དང༌། སངས་རྒྱས་བྱང་སེམས་ལས་འཁྲུངས་ཚུལ་དང༌། བྱང་ཆུབ་སེམས་དཔའི་རྒྱུའི་གཙོ་བོ་གསུམ་བསྟན་པ་དང་གསུམ། དང་པོ་ལ། ཐུབ་དབང་གི་དོན་དང༌། ཉན་ཐོས་ཀྱི་དོན་དང༌། རང་རྒྱལ་གྱི་དོན་དང༌། ཐུབ་དབང་ལས་དེ་གཉིས་སྐྱེ་ཚུལ་དང་བཞི།
ཐུབ་དབང་གི་དོན།
དང་པོ་ནི། ཐུབ་པ་སངས་རྒྱས་བཅོམ་ལྡན་འདས་ལོངས་སྤྲུལ་དེ་དག་ཆོས་ཅན། ཁྱོད་ལ་ཐུབ་དབང་ཞེས་བརྗོད་པའི་རྒྱུ་མཚན་ཡོད་དེ། ཉན་རང་བྱང་སེམས་ཀྱི་ཐུབ་པ་རྣམས་ལས་ཀྱང་གོང་ན་མེད་པའི་སྐུ་གསུང་ཐུགས་ཕྲིན་ལས་ཀྱི་དབང་ཕྱུག་ཕུན་སུམ་ཚོགས་པ་ཐོབ་པ་དང༌། ཉན་རང་བྱང་སེམས་རྣམས་ཁྱོད་ཀྱི་བཀས་ཆོས་ཀྱི་སྲིད་ལ་དབང་བསྒྱུར་བར་མཛད་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར་ཏེ། རང་འགྲེལ་ལས། དེ་ལ་གོང་ན་མེད་པའི་ཆོས་ཀྱི་དབང་ཕྱུག་ཕུན་སུམ་ཚོགས་པ་མངའ་བས། ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་རྣམས་ལས་ཀྱང་དབང་ཕྱུག་དམ་པའི་ཕུན་སུམ་ཚོགས་པ་ཉིད་དང༌། ཉན་ཐོས་ལ་སོགས་པ་རྣམས་དེའི་བཀས་མངའ་བསྒྱུར་པའི་ཕྱིར། ཞེས་གསུངས་པའི་ཕྱིར། གཉིས་པ་ཉན་ཐོས་ཀྱི་དོན་ནི། ཐེག་པ་ཆུང་ངུའི་གང་ཟག་ཆོས་ཅན། ཁྱོད་ལ་ཉན་ཐོས་ཞེས་བརྗོད་པའི་རྒྱུ་མཚན་ཡོད་དེ། ཟབ་མོ་སྟོང་ཉིད་དེ་རྟོགས་པའི་ལྟ་བ་ལ་སོགས་པ་ཉན་ཐོས་བྱང་ཆུབ་ཐོབ་བྱེད་ཀྱི་ཡང་དག་པའི་གདམས་ངག་དེ་སངས་རྒྱས་སོགས་གཞན་ལས་ཉན་ནས་སྒོམ་པར་བྱེད་ཅིང་བསྒོམ་པའི་འབྲས་བུ་ཉན་ཐོས་ཀྱི་བྱང་ཆུབ་ཐོབ་པ་ན། ཐོབ་པའི་དོན་དེ་གཞན་ལ་བཤད་ཅིང་ཐོས་པར་བྱེད་པས་ན་དེ་ལྟར་བརྗོད་པའི་ཕྱིར་རོ། །ཉན་ཐོས་ཀྱི་བྱང་ཆུབ་ཐོབ་པའི་དོན་དེ་གཞན་ལ་ཐོས་པར་བྱེད་ཚུལ་ཡོད་དེ། ཉན་ཐོས་དགྲ་བཅོམ་པ་དག་གིས་འདི་ལྟར་བདག་གིས་ཐར་བའི་ལམ་བསྒྲུབ་པའི་བྱ་བ་བྱས་ཟིན་ཏོ། །སྲིད་པའི་རྒྱུ་ཉོན་མོངས་པ་སྤངས་ཟིན་པས་རྟེན་འདི་ལས་སྲིད་པ་གཞན་དུ་སྦྱོར་པ་མི་ཤེས་སོ། །ཞེས་སོགས་གསུང་རབ་ལས་མང་དུ་འབྱུང་བ་ལྟར་ཉན་ཐོས་ཀྱི་བྱང་ཆུབ་ཐོབ་པའི་ཡོན་ཏན་རྣམས་གཞན་ལ་ཐོས་པར་བྱེད་པའི་ཕྱིར་རོ། །
ཉན་ཐོས་ཀྱི་དོན།
ཡང་ཐེག་པ་ཆུང་ངུའི་ཉན་ཐོས་ཀྱི་གང་ཟག་ཆོས་ཅན། ཁྱོད་ལ་ཐོས་སྒྲོག་ཅེས་བརྗོད་པའི་རྒྱུ་མཚན་ཡོད་དེ། འབྲས་བུའི་མཆོག་སངས་རྒྱས་ཀྱི་སྐུ་བཞིའི་མཚན་ཉིད་དང་སངས་རྒྱས་དེ་ཐོབ་བྱེད་ཐེག་པ་ཆེན་པོའི་ལམ་གྱི་མཚན་ཉིད་དང་དབྱེ་བ་ལ་སོགས་པ་སངས་རྒྱས་རྣམས་ལས་ཐོས་ནས་རང་གིས་ཉམས་སུ་མི་ལེན་པར་གཞན་དོན་དུ་གཉེར་བ་དག་ལ་སྒྲོག་པར་བྱེད་པ་ཙམ་ཡིན་པས་ན་དེ་ལྟར་བརྗོད་པའི་ཕྱིར། སྒྲ་བཤད་སྔ་ཕྱི་གཉིས་ཀ་ཉན་ཐོས་ཀྱི་སྒྲ་བཤད་ཡིན་ཏེ། ཉན་ཐོས་ཀྱི་སྐད་དོད་ཤྲ་བ་ཀ་ནི་ཉན་ཐོས་དང་ཐོས་སྒྲོག་གཉིས་ཀ་ལ་འཇུག་པའི་ཕྱིར་ཏེ། དམ་ཆོས་པདྨ་དཀར་པོ་ལས། མགོན་པོ་དེ་རིང་བདག་ཅག་ཉན་ཐོས་གྱུར། །བྱང་ཆུབ་དམ་པ་ཡང་དག་བསྒྲགས་པར་བགྱི། །བྱང་ཆུབ་པ་ཡི་སྒྲ་ཡང་རབ་ཏུ་བརྗོད། །དེ་བས་བདག་ཅག་ཉན་ཐོས་མི་བཟད་འདྲ། །ཞེས་གསུངས་པའི་ཕྱིར་རོ། །གསུམ་པ་རང་རྒྱལ་གྱི་དོན་བཤད་པ་ནི། ཐེག་པ་འབྲིང་གི་གང་ཟག་ཆོས་ཅན། ཁྱོད་ལ་དེ་ཉིད་རྟོགས་པ་འབྲིང་བོའམ་དེ་ཉིད་ཁོང་དུ་ཆུད་པ་འབྲིང་པོ་ཞེས་བརྗོད་པའི་རྒྱུ་མཚན་ཡོད་དེ། དེ་ཉིད་རྟོགས་པ་ཞེས་པའི་དོན་ནི་དེ་ཉིད་རྟོགས་པས་རང་ལམ་གྱི་བྱ་བ་བྱེད་པའམ་བྱས་ཟིན་པ་ལ་བྱེད་པས་ན་དེ་ཉིད་རྟོགས་པ་ཞེས་པའི་སྒྲ་ནི་ཐེག་པ་གསུམ་གའི་མི་སློབ་པའི་གང་ཟག་ལ་འཇུག་པས་ཁྱོད་ལའང་དེ་ཉིད་རྟོགས་པའི་སྒྲ་འཇུག་པ་གང་ཞིག ཁྱོད་བསྐལ་ཆེན་བརྒྱར་བསོད་ནམས་དང་ཡེ་ཤེས་ཀྱི་ཚོགས་ལ་གོམས་པ་བསྲིངས་པས་ཚོགས་གཉིས་ཀྱི་ནུས་པ་ཉན་ཐོས་ལས་བརྒྱ་འགྱུར་དུ་འཕེལ་བའི་ཁྱད་པར་གྱིས། ཉན་ཐོས་ལས་ལྷགཚོགས་གཉིས་རྒྱ་ཆེན་པོ་དང༌། སྙིང་རྗེ་ཁྱད་པར་ཅན་དང༌། རྣམ་པ་ཐམས་ཅད་པ་མཁྱེན་པ་མེད་པས་སངས་རྒྱས་ལས་དམན་པས་ན་འབྲིང་ཞེས་བརྗོད་པའི་ཕྱིར་རོ། །
རང་རྒྱལ་གྱི་དོན།
ཡང་ཐེག་པ་འབྲིང་གི་གང་ཟག་ཆོས་ཅན། ཁྱོད་ལ་རང་སངས་རྒྱས་ཞེས་བརྗོད་པའི་རྒྱུ་མཚན་ཡོད་དེ། རང་སངས་རྒྱས་ཀྱི་སྐད་དོད་པྲ་ཏྱེ་ཀ་བུདྡྷ་ཞེས་པའི་པྲ་ཏི་སོ་སོར་དང༌། ཨེ་ཀ་གཅིག་དང༌། བུདྡྷ་སངས་རྒྱས་ཏེ་རང་ཉིད་སོ་སོར་གཞན་ལ་མ་བརྟེན་པར་གཅིག་པུར་གནས་པ་དང༌། བདག་ཉིད་གཅིག་པུའི་ཆེད་དུ་དེ་ཁོ་ན་ཉིད་ཁོང་དུ་ཆུད་ནས་གོམས་པས་འབྲས་བུ་བྱང་ཆུབའཐོབ་པས་ན་དེ་ལྟར་བརྗོད་པའི་ཕྱིར་རོ། །
ཐུབ་དབང་ལས་དེ་གཉིས་སྐྱེ་ཚུལ་བཤད་པ།
བཞི་པ་ཐུབ་དབང་ལས་དེ་གཉིས་སྐྱེ་ཚུལ་བཤད་པ་ནི།
རྩ་བར། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །
ཞེས་ཉ༷ན་ཐོ༷ས་ས༷ངས་རྒྱ༷ས་འབྲི༷ང་རྣ༷མས་ཆོས་ཅན། ཐུ༷བ་དབ༷ང་ལས་སྐྱེ༷ས་པ་ཡིན་ཏེ། ཐུབ་པའི་དབང་པོའི་གསུང་ལས་སྐྱེས་པ་ཡིན་པའི་ཕྱིར། དེར་ཐལ། ཉན་རང་རྣམས་ཐུབ་པའི་དབང་པོའི་གསུང་གིས་བསྐྲུན་པ་སྟེ་བསྐྱེད་པ་ཡིན་པའི་ཕྱིར། ཁྱབ་སྟེ། ཉན་རང་རྣམས་ཐུབ་དབང་གི་གསུང་གིས་བསྐྱེད་པ་དེ་ཉན་རང་རྣམས་ཐུབ་དབང་གིས་གསུང་ལས་སྐྱེས་པའི་དོན་ཡིན་པའི་ཕྱིར་རོ། །རང་འགྲེལ་ལས། སངས་རྒྱས་ཀྱི་སྒྲ་འདི་སངས་རྒྱས་ཀྱི་དེ་ཉིད་ཉན་ཐོས་དང་རང་སངས་རྒྱས་དང་བླ་ན་མེད་པ་ཡང་དག་པར་རྫོགས་པའི་སངས་རྒྱས་གསུམ་ཆར་ལ་འཇུག་སྟེ། ཞེས་གསུངས་པ་མི་འཐད་པར་ཐལ། སངས་རྒྱས་ཀྱི་སྒྲ་ནི་ཉན་རང་སངས་རྒྱས་གསུམ་ག་ལ་མི་འཇུག་པའི་ཕྱིར། ཞེས་ཟེར་ན་མ་ཁྱབ་སྟེ། འགྲེལ་བར་བུདྡྷའི་དོན་དེ་ཉིད་ཁོང་དུ་ཆུད་པའི་སྒྲ་དེ་གང་ཟག་གསུམ་ལ་འཇུག་པར་བཤད་པ་ཡིན་པའི་ཕྱིར་རོ། །ཐུབ་བསྟན་དགེ་ལེགས་རྒྱ་མཚོའི་འཇུག་ཊཱིཀ་རབ་གསལ་སྣང་རྒྱན་ལས། ཉན་རང་ལ་ཚོགས་མཚན་ཉིད་པ་མེད་དེ། ཉན་རང་གི་མི་སློབ་ལམ་ལ་ཚོགས་གཉིས་ཀྱི་ལག་རྗེས་ཆོས་གཟུགས་ཀྱི་སྐུ་གཉིས་དང་མཚན་དཔེ་མེད་པའི་ཕྱིར། ཁྱབ་སྟེ། བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་ཞེས་པ་ནི་ཚོགས་དེས་རང་གིས་མཐར་ཐུག་གི་སྐུ་གཉིས་འགྲུབ་པར་བྱེད་ནུས་པའི་ངོ་བོའི་སྒོ་ནས་མཐར་ཐུག་གི་སྐུ་གཉིས་འབྲས་བུར་འཛིན་པ་ཁོ་ན་ལ་ཚོགས་ཟེར་བ་ཡིན་པས་ཚོགས་གཉིས་ཀའི་ལག་རྗེས་ལ་མི་སློབ་པའི་ཚེ་སྐུ་གཉིས་དང་མཚན་དཔེ་འགྲུབ་དགོས་པའི་ཕྱིར་ཏེ། ཚོགས་གཉིས་པོ་རེ་རེའི་ལག་རྗེས་ལ་མཐར་ཐུག་གི་སྐུ་གཉིས་ཀ་འགྲུབ་ཀྱང༌། གཙོ་ཆེ་ཆུང་གི་སྒོ་ནས་ཡེ་ཤེས་ཀྱི་ཚོགས་ཀྱི་ལག་རྗེས་ལ་གཙོ་བོར་ཆོས་སྐུ་དང༌། བསོད་ནམས་ཀྱི་ཚོགས་ཀྱི་ལག་རྗེས་ལ་གཙོ་བོར་གཟུགས་སྐུ་འགྲུབ་པའི་ཕྱིར། སློབ་དཔོན་འཕགས་པའི་རིན་ཆེན་འཕྲེང་བ་ལས། སངས་རྒྱས་རྣམས་ཀྱི་གཟུགས་སྐུ་ནི། །བསོད་ནམས་ཚོགས་ལས་འཁྲུངས་པ་སྟེ། །ཆོས་ཀྱི་སྐུ་དེ་མདོར་བསྡུས་ན། །རྒྱལ་བོ་ཡེ་ཤེས་ཚོགས་ལས་འཁྲུངས། །དེ་ལྟ་བས་ན་ཚོགས་འདི་གཉིས། །སངས་རྒྱས་ཉིད་ནི་ཐོབ་པའི་རྒྱུ། །ཞེས་སོགས་ནས། ཚོགས་ཀྱི་སྐད་དོད་བྷ་ར་ལ་སཾ་བསྣན་པས། སཾ་ཡང་དག་པར་འགྲུབ་པ་དང༌། བྷ་ངོ་བོས་བྱང་ཆུབ་ཆེནཔོ་དང༌། ར་འཛིན་པར་བྱེད་པའི་དོན་སྟོན་བྱེད་ཡིན་པའི་ཕྱིར་རོ། །ཞེས་གསུངས་པས་སོ། །
སངས་རྒྱས་རྣམས་བྱང་སེམས་ལས་འཁྲུངས་ཚུལ་བསྟན་པ།
གཉིས་པ་སངས་རྒྱས་རྣམས་བྱང་སེམས་ལས་འཁྲུངས་ཚུལ་བསྟན་པ་ནི།
རྩ་བར། སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང༌། །
ཞེས་འོ་ན་ཐུབ་དབང་སངས་རྒྱས་གང་ལས་འཁྲུངས་ཞེ་ན། ས༷ངས་རྒྱ༷ས་ཆོས་ཅན། ཁྱོད་བྱ༷ང་ཆུ༷བ་སེ༷མས་དཔ༷འ་ལ༷ས་འཁྲུ༷ངས་པ་ཡིན་ཏེ། བྱང་སེམས་ཁ་ཅིག་གིས་ཡོངས་འཛིན་བྱས་ནས་སངས་རྒྱས་རང་དང་རྒྱུད་གཅིག་པའི་བྱང་སེམས་ཀྱིས་ལམ་ཉམས་སུ་བླངས་པ་ལས་བྱུང་བའི་ཕྱིར་རོ། །མྱུ་གུ་ལ་སོགས་པ་སྐྱེས་ཤི༷ང་ལོ་མ་འཇམ་པའི་གནས་སྐབས་སུ་གྱུར་པ་ལྟར་བསྒྲིམས་ནས་ཡོངས་སུ་བསྐྱངས་དགོས་སོ། །
རྩོད་པ།
འདི་ལ་རྩོད་པ་དང་ལན་གཉིས་དང་པོ་ནི། རང་འགྲེལ་ལས། གལ་ཏེ་བྱང་ཆུབ་སེམས་དཔའ་རྣམས་ཀྱང་དེ་བཞིན་གཤེགས་པའི་ཉེ་བར་བསྟན་པ་ལས་སྐྱེས་པར་གྱུར་པས་རྒྱལ་བའི་སྲས་ཞེས་བརྗོད་པ་མ་ཡིན་ནམ། དེའི་ཕྱིར་ཇི་ལྟར་སངས་རྒྱས་བཅོམ་ལྡན་འདས་རྣམས་བྱང་ཆུབ་སེམས་དཔའ་ལས་འཁྲུངས་ཤེ་ན། ཞེས་གསུངས་པའི་དོན་ནི། ཇི་ལྟར་སངས་རྒྱས་བྱང་ཆུབ་སེམས་དཔའ་ལས་འཁྲུངས་པར་བཤད་པ་མི་འཐད་པར་ཐལ། བྱང་སེམས་རྣམས་སངས་རྒྱས་ལས་འཁྲུངས་པའི་ཕྱིར། དེར་ཐལ། ཉན་རང་མ་ཟད་བྱང་ཆུབ་སེམས་དཔའ་རྣམས་ཀྱང་དེ་བཞིན་གཤེགས་པ་སངས་རྒྱས་ཀྱིས་ལམ་གྱི་གདམས་པ་ཉེ་བར་བསྟན་པ་ལས་སྐྱེས་པར་གྱུར་པཡིན་པས་རྒྱལ་བའི་སྲས་ཞེས་བརྗོད་པ་ཡིན་པའི་ཕྱིར་ཞེ་ན།
ལན།
གཉིས་པ་ལན་ལ། རིགས་པས་སྒྲུབ་པ་དང༌། ལུང་གིས་སྒྲུབ་པ་གཉིས།
རིགས་པས་སྒྲུབ་པ།
དང་པོ་ནི་སྤྱིར་རྒྱལ་བའི་སྲས་ལ་ཁྱོད་ཀྱིས་བཤད་པ་ལྟར་རྒྱལ་བ་དེའི་གསུང་ལས་འཁྲུངས་པའི་ཆ་ནས་སྲས་སུ་བཞག་པ་གཅིག་དང༌། སྤྱོད་འཇུག་ལས། དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ཞེས་པ་ལྟ་བུའི་ཐེག་ཆེན་གྱི་ཐུན་མོང་མ་ཡིན་པའི་ཐབས་ཀྱི་རིགས་བྱང་ཆུབ་ཀྱི་སེམས་ནི་ཐེག་པ་ཆེ་ཆུང་གི་རིགས་སོ་སོར་འབྱེད་པའི་ཕའི་ས་བོན་ལྟ་བུ་ཡིན་པས་ན་ཕའི་ས་བོན་དང་མཚུངས་པའི་ཐབས་སེམས་བསྐྱེད་ཀྱི་སྒོ་ནས་སྲས་སུ་བཞག་པ་གཅིག་དང༌།
འདི་ནི་དེ་བཞིན་གཤེགས་པ་རྣམས་ཀྱི་རིགས་སུའང་སྐྱེས་པ་སྟེ། །ཞེས་པ་ལྟར་ཐེག་ཆེན་དུ་གྱུར་གྱི་ཤེས་རབ་ཁྱད་པར་ཅན་སྟོང་ཉིད་མངོན་སུམ་དུ་རྟོགས་པའི་ཤེས་རབ་ཀྱི་སྒོ་ནས་རྒྱལ་བའི་སྲས་སུ་བཞག་པ་དང་གསུམ་ཡོད་པས་ན་བྱང་སེམས་རྣམས་རང་རྒྱུའི་རྒྱལ་བའི་གསུང་ལས་སྐྱེས་པའི་སྒོ་ནས་རྒྱལ་བའི་སྲས་སུ་བཞག་ཆོག་པ་འདི་ནི་བདེན་མོད་ཀྱི་ཁོ་བོས་ཐེག་པ་གསུམ་གྱི་མི་སློབ་པ་ཐམས་ཅད་ཀྱི་རྒྱུའི་རྩ་བ་སྙིང་རྗེ་ལ་ཐུག་པར་སྒྲུབ་པའི་ཆེད་དུ་བྱང་སེམས་ལས་སངས་རྒྱས་འཁྲུངས་པར་བསྟན་པ་ཡིན་པས་སྐྱོན་མེད་ལ། སངས་རྒྱས་རྣམས་ནི་བྱང་སེམས་ལས་འཁྲུངས་ཚུལ་ཡང་རྗེས་སུ་འཆད་པ་ལྟར་འཐད་ཅིང་རིགས་པའི་ཕྱིར། ཞེས་པ་ནི་འདི་ནི་བདེན་མོད་ཀྱི་འོན་ཀྱང་ཞེས་པའི་ཚིག་ནུས་ཀྱི་དོན་ནོ། །སངས་རྒྱས་རྣམས་བྱང་སེམས་ལས་འཁྲུངས་ཚུལ་ལམ་རྒྱུ་གཉིས་ཀྱི་སྒོ་ནས་བྱང་ཆུབ་སེམས་དཔའ་རྣམས་བཅོམ་ལྡན་འདས་རྣམས་ཀྱི་རྒྱུར་འགྱུར་བ་ནི་འཐད་ཅིང་རིགས་པ་ཡིན་ཏེ། གནས་སྐབས་ཀྱི་ཁྱད་པར་སངས་རྒྱས་རྣམས་ནི་རང་དང་རྒྱུད་གཅིག་པའི་བྱང་སེམས་ཀྱི་ཉེར་ལེན་གྱི་རྒྱུ་དང༌། ཡང་དག་པར་འཛིན་དུ་འཇུག་པའི་ཁྱད་པར་རང་དང་རྒྱུད་ཐ་དད་པའི་བྱང་སེམས་ཀྱིས་ལྷན་ཅིག་བྱེད་རྐྱེན་བྱས་པ་ལ་བརྟེན་ནས་འཁྲུངས་པ་ཡིན་པའི་ཕྱིར་རོ། །ཞིབ་པར་ན་རང་ལྡོག་ནས་བྱང་སེམས་ལས་འཁྲུངས་པའི་སངས་འཕགས་དང༌། སངས་འཕགས་ཡིན་ན་རང་རྒྱུ་རྒྱུད་གཅིག་དང་ཐ་དད་ཀྱི་བྱང་སེམསགཉིས་ལས་འཁྲུངས་པ་ལ་བཞེད་པའོ། །
ལུང་གིས་སྒྲུབ་པ།
གཉིས་པ་ལུང་གིས་སྒྲུབ་པ་ནི།
འཕགས་པ་དཀོན་མཆོག་བརྩེགས་པའི་མདོ་ལས།
འོད་སྲུང༌། འདི་ལྟ་སྟེ་དཔེར་ན་ཟླ་བ་ཚེས་པ་ལ་ཕྱག་འཚལ་བ་ལྟར་ཉ་བ་ལ་ནི་མ་ཡིན་ནོ། །འོད་སྲུང་དེ་བཞིན་དུ་གང་དག་ང་ལ་རབ་ཏུ་དད་པ་དེ་དག་གིས་བྱང་ཆུབ་སེམས་དཔའ་རྣམས་ལ་ཕྱག་བྱའི། དེ་བཞིན་གཤེགས་པ་རྣམས་ལ་ནི་དེ་ལྟར་མ་ཡིན་ནོ། །ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་ལས་ནི་དེ་བཞིན་གཤེགས་པ་རྣམས་འབྱུང་ངོ། །དེ་བཞིན་གཤེགས་པ་རྣམས་ལས་ནི་ཉན་ཐོས་དང་རང་སངས་རྒྱས་ཐམས་ཅད་བྱུང་ངོ། །ཞེས་གསུངས་པ་ལྟ་བུའོ། །སྐབས་འདིར་ཉན་ཐོས་རྒྱལ་བ་ལས་འཁྲུངས་ལ། བྱང་སེམས་རྒྱལ་བ་ལས་མ་འཁྲུངས་པ་ལྟ་བུ་བཤད་པ་སྐབས་འདིའི་དགོས་པ་དང་སྐབས་ཐོབ་དང་གསུང་རབ་ཀྱི་བརྡ་ཆད་ཀྱིས་ཡིན་ནོ། །
མདོ་རྒྱན་ལས། རྒྱལ་སྲས་རྒྱལ་བའི་གཞི་དང་ནི། །ཞེས་དང༌། འཇུག་པ་ལས། རྒྱལ་བའི་སྲས་པོ་འདི་ཡི་སེམས་གང་འགྲོ་བ་རྣམས། །ཞེས་གསུངས་པ་སྐབས་འདི་དང་མི་འདྲ་བའོ། །སྐབས་འདིར་བྱང་སེམས་རྣམས་རྒྱལ་བའི་གསུངས་ལས་སྐྱེས་པའི་སྲས་ཡིན་མིན་ལ་རྩོད་པ་ཡིན་གྱི། རྒྱལ་བའི་ཐབས་ཤེས་ཀྱི་རིགས་སུ་སྐྱེས་པའི་སྲས་སུ་ཡིན་མིན་ལ་རྩོད་པ་མ་ཡིན་ནོ། །སློབ་དཔོན་ཐོག་མར་ཐེག་པ་གསུམ་གྱི་རྩ་བ་སྙིང་རྗེ་ལ་དངོས་སུ་ཕྱག་འཚལ་བས་ཉན་རང་སངས་རྒྱས་བྱང་སེམས་རྣམས་ལ་ཤུགས་ཀྱིས་ཕྱག་འཚལ་བ་བཞེད་པའི་ཕྱིར་དུ་ཉན་ཐོས་སོགས་རྐང་པ་གཉིས་ཀྱིས་ཉན་རང་སངས་རྒྱས་བྱང་སེམས་རྣམས་རྒྱུ་འབྲས་སུ་བསྟན་ནས་སྔ་མ་གསུམ་གྱི་རྩ་བའི་རྒྱུ་བྱང་སེམས་དེའི་རྒྱུ་ནི་སྙིང་རྗེ་ཡིན་པར་བསྟན་ཏེ། དེ་ནས་སྙིང་རྗེ་ལ་ཕྱག་འཚལ་བ་གང་ཞིག དེ་ལྟར་བསྟན་པའི་སྒོ་ནས་སྙིང་རྗེ་ལ་ཕྱག་འཚལ་བས་ནི་སྙིང་རྗེ་ནི་ཐེག་པ་གསུམ་གའི་ལམ་མ་ལུས་པའི་རྩ་བར་ཤེས་ནས་གདུལ་བྱས་སྙིང་རྗེ་ལ་ཆེད་དུ་མོས་ཤིང་དད་པ་སྐྱེད་པ་དང༌། རྒྱུ་ལ་ཕྱག་འཚལ་བས་འབྲས་བུ་ཉན་རང་ཐུབ་དབང་བྱང་སེམས་རྣམས་ལའང་ཕྱགའཚལ་བར་འགྲོ་བའི་ཕྱིར་རོ། །
བྱང་སེམས་ཀྱི་རྒྱུའི་གཙོ་བོ་གསུམ་བཤད་པ།
གསུམ་པ་བྱང་སེམས་ཀྱི་རྒྱུའི་གཙོ་བོ་གསུམ་ནི།
རྩ་བར། སྙིང་རྗེའི་སེམས་དང་གཉིས་སུ་མེད་བློ་དང༌། །
བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །
ཞེས་ཉན་རང་གཉིས་ཐུབ་དབང་ལས་དང༌། ཐུབ་དབང་བྱང་སེམས་ལས་འཁྲུངས་ན། བྱང་སེམས་དེ་དག་གི་རྒྱུ་གང་ཡིན་ཞེ་ན། བྱང་སེམས་རྣམས་ཆོས་ཅན། ཁྱོད་ཀྱི་རྒྱུ་ཡོད་དེ། འཆད་པར་འགྱུར་བའི་སྙི༷ང་རྗེ༷འི་སེ༷མས་ད༷ང༌། མཐའ་གཉི༷ས་སུ༷་མེ༷ད་པར་རྟོགས་པའི་བློ༷་ཤེས་རབ་ད༷ང༌། ཀུན་རྫོབ་བྱ༷ང་ཆུ༷བ་ཀྱི་སེ༷མས་བསྐྱེད་དང་གསུམ་ནི༷་རྒྱ༷ལ་བའི་སྲ༷ས་པོ་རྣ༷མས་ཀྱི༷་རྒྱུ༷་ཡིན་པའི་ཕྱིར་རོ། །སྙིང་རྗེ་ལ་སོགས་པའི་ཆོས་གསུམ་པོ་འདི་བྱང་སེམས་ཀྱི་རྒྱུ་ཡིན་ཏེ། རིན་ཆེན་འཕྲེང་བ་ལས། དེ་ཡི་རྩ་བ་བྱང་ཆུབ་སེམས། །རི་དབང་རྒྱལ་པོ་ལྟར་བརྟན་དང༌། །ཕྱོགས་མཐའ་གཏུགས་པའི་སྙིང་རྗེ་དང༌། །གཉིས་ལ་མི་བརྟེན་ཡེ་ཤེས་ལགས། །ཞེས་དང༌། རང་འགྲེལ་ལས། ཡང་བྱང་ཆུབ་སེམས་དཔའ་དེ་དག་ཅིའི་ཕྱིར་རྒྱུ་ཅན་ཡིན་ཞེ་ན་སྙིང་རྗེའི་སེམས་དང་གཉིས་སུ་མེད་བློ་དང༌། བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་བྱ་བ་སྨོས་སོ། །དེ་ལ་སྙིང་རྗེ་ནི་བརྩེ་བའམ་འདི་ཉིད་དུ་འཆད་པར་འགྱུར་བའི་རྣམ་པ་དང་རང་གི་ངོ་བོ་ཅན་ནོ། །ཞེས་པ་ནས། བྱང་ཆུབ་སེམས་དཔའ་རྣམས་ཀྱི་གཙོ་བོའི་རྒྱུ་ནི། སྙིང་རྗེ་དང༌། གཉིས་སུ་མེད་པའི་ཤེས་རབ་དང༌། བྱང་ཆུབ་ཀྱི་སེམས་ཞེས་བྱ་བ་ཆོས་གསུམ་པོ་འདི་དག་ཡིན་ནོ། །ཞེས་གསུངས་པའི་ཕྱིར་རོ། །
དབུ་མ་འཇུག་པ་འདིར་གསུངས་པའི་འདིར་བསྟན་ཆོས་གསུམ་དང༌། དབུ་མ་རྒྱན་རང་འགྲེལ་ལས། ཡང་དག་ཤེས་འཚོལ་སྔོན་བཏང་སྟེ། །དོན་དམ་རྣམ་པར་ངེས་གྱུར་ནས། །ལྟ་ངན་འཐིབ་གནས་འཇིག་རྟེན་ལ། །སྙིང་རྗེ་ཀུན་ནས་བསྐྱེད་ནས་སུ། །འགྲོ་དོན་བྱེད་པར་དཔའ་གྱུར་པ། །བྱང་ཆུབ་བློ་རྒྱས་མཁས་པ་ནི། །བློ་དང་སྙིང་རྗེས་བརྒྱན་པ་ཡིས། །ཐུབ་པའི་བརྟུལ་ཞུགས་ཡང་དག་སྤྱོད། །ཅེས་དང༌། ཡང་དག་དད་པའི་རྗེས་འབྲང་བ། །རྫོགས་པའི་བྱང་ཆུབ་སེམས་བསྐྱེད་ནས། །ཐུབ་པའྀ་བརྟུལ་ཞུགས་བླངས་བྱས་ཏེ། །དེ་ནི་ཡང་དག་ཤེས་འཚོལ་བརྩོན། །ཞེས་གསུངས་པ་དང༌། ཆོས་མཆོག་གིས། གང་ཕྱིར་འཇིག་རྟེན་དོན་གཉེར་འདི། །ཐེ་ཚོམ་ལས་ཀྱང་འཇུག་ཕྱིར་རོ། །ཞེས་དང༌། ཉ་ཊཱིཀ་དགོས་སོགས་ཆོས་བཞིའི་སྐབས་ལས།
དབང་རྣོན་ལ་དེ་འདྲའི་དོན་འགྱུར་བསྐྱེད་པ། དབང་རྟུལ་དེ་འདྲའི་ངེས་པ་སྐྱེས་པ། ཞེས་གསུངས་པ་རྣམས་ཀྱིས་འདིར་བསྟན་ཆོས་གསུམ་གྱི་གོ་རིམ་ལ་དཔྱད་པར་བྱའོ། །རང་འགྲེལ་ལས། གཉིས་སུ་མེད་པའི་བློ་ནི། དངོས་པོ་དང་དངོས་པོ་མེད་པ་ལ་སོགས་པ་མཐའ་གཉིས་དང་བྲལ་བའི་ཤེས་རབ་པོ། །ཞེས་གསུངས་པ་ལྟར་འདིར་བསྟན་གཉིས་མེད་ཀྱི་བློ་ཆོས་ཅན། ཁྱོད་ཀྱི་དམིགས་པ་དང་རྣམ་པ་དང་དབྱེ་བ་རྣམས་ཡོད་དེ། ཆོས་དང་གང་ཟག་གཉིས་ཁྱོད་ཀྱི་དམིགས་པ་དང༌། དངོས་པོའམ་ཡོད་མཐའ་སྟེ་རྟག་མཐའ་དང༌། དངོས་མེད་དམ་ཆད་མཐའ་དང་མཐའ་གཉིས་ཀྱིས་སྟོང་པའི་རྣམ་པ་ནི་ཁྱོད་ཀྱི་རྣམ་པ་དང༌། ཁྱོད་ལ་དབྱེ་ན་བྱང་སེམས་ལས་དང་པོ་པའི་སྔོན་དུ་འགྲོ་བའི་སྟོང་ཉིད་རྟོགས་པའི་བློ་གཅིག་དང༌། མོས་སྤྱོད་ཀྱི་སྐབས་ཀྱི་སྟོང་ཉིད་རྟོགས་པའི་བློ་གཅིག་དང༌། ས་ཐོབ་པའི་བྱང་སེམས་ཀྱི་རྒྱུད་ཀྱི་གཉིས་མེད་ཀྱི་བློ་དང་གསུམ་ཡོད་པའི་ཕྱིར་རོ། །འདིར་བསྟན་སེམས་བསྐྱེད་ཆོས་ཅན། ཁྱོད་ཀྱི་དམིགས་པ་དང་རྣམ་པ་དང་ངོ་བོ་དང་དབྱེ་བ་རྣམས་ཡོད་དེ། གཞན་དོན་དང་བྱང་ཆུབ་ཆེན་པོ་གཉིས་ཁྱོད་ཀྱི་དམིགས་པ་དང༌། སེམས་ཅན་ཐམས་ཅད་སྡུག་བསྔལ་ལས་སྒྲོལ་བའི་ཆེད་དུ་བྱང་ཆུབ་ཆེན་པོ་དེ་ཐོབ་པར་འདོད་པ་དེ་ཁྱོད་ཀྱི་རྣམ་པ་དང༌། གཉིས་མེད་ཀྱི་བློ་དང་སྙིང་རྗེ་ཆེན་པོ་གཉིས་ཀྱིས་དྲངས་པའི་དོན་གཉིས་ལ་དམིགས་པའི་ཡིད་ཀྱི་རྣམ་རིག་དེ་ཁྱོད་ཀྱི་ངོ་བོ་དང༌། ཁྱོད་ཀྱི་དབྱེ་བ་ལ་བྱང་སེམས་སྐྱེ་འཕགས་ཀྱི་རྒྱུད་ཀྱི་སྨོན་འཇུག་སེམས་བསྐྱེད་གཉིས་རྣམས་ཡོད་པའི་ཕྱིར་རོ། །
སྐབས་འདིའི་སེམས་བསྐྱེད་ལ་ལམ་མ་ཞུགས་ཀྱི་རྒྱུད་ཀྱི་བུར་ཤུན་གྱི་རོ་ལྟ་བུའི་སེམས་བསྐྱེད་ཡོད་པར་རྗེ་བདག་ཉིད་ཆེན་པོས་གསུངས་སོ། །འདིར་བསྟན་ཆོས་གསུམ་གྱི་ས་མཚམས་དང་གོ་རིམ་འཇོག་ཚུལ་ལ་མཁས་དབང་རྣམས་བཞེད་པ་སྣ་ཚོགས་པ་ཡོད་མོད་མ་སྤྲོས་སོ། །ཟླ་བའི་ལུགས་གཞིར་བཞག་ན་བྱང་སེམས་ལ་སེམས་ཙམ་པར་གྱུར་པའི་བྱང་སེམས་པ་ཡོད་པར་ཐལ། སློབ་དཔོན་ཕྱོགས་གླང་དེ་དེ་ཡིན་པའི་ཕྱིར། རང་འགྲེལ་ལས། གལ་ཏེ་གནས་བརྟན་དབྱིག་གཉེན་དང༌། ཕྱོགས་ཀྱི་གླང་པོ་དང༌། ཆོས་སྐྱོང་ལ་སོགས་པ་བསྟན་བཅོས་རྣམས་ཀྱི་མཛད་པ་པོ་སྔར་བྱོན་ཟིན་པར་གྱུར་པ་དེ་དག་གིས་ཀྱང་ཡི་གེ་ཙམ་ཐོས་པས་འཇིགས་ཏེ། ཟབ་མོ་རྟེན་ཅིང་འབྲེལ་བར་འབྱུང་བའི་དོན་ཕྱིན་ཅི་མ་ལོག་པར་སྟོན་པར་འདི་ཡོངས་སུ་སྤངས་སམཞེ་ན། དེ་སྐད་དུ་སྨྲའོ། །ཞེས་གསུང་སོ། །
སྙིང་རྗེ་ནི་བྱང་སེམས་ཀྱི་རྒྱུ་གཞན་གཉིས་ཀྱིའང་རྩ་བ་ཡིན་པ།
གཉིས་པ་སྙིང་རྗེ་ནི་བྱང་སེམས་ཀྱི་རྒྱུ་གཞན་གཉིས་ཀྱིའང་རྩ་བ་ཡིན་པ་ནི།
རྩ་བར། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདིའི། །
ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ། །
ལོངས་སྤྱོད་གནས་ལ་སྨིན་པ་ལྟ་བུར་འདོད་གྱུར་པ། །
དེ་ཕྱིར་བདག་གིས་ཐོག་མར་སྙིང་རྗེ་བསྟོད་པར་བགྱི། །
ཞེས་དཔལ་ལྡན་ཟླ་བས་ཉན་རང་དང་སངས་རྒྱས་དང་བྱང་སེམས་ཀྱི་རྩ་བ་ཡིན་པ་མ་ཟད་བྱང་སེམས་ཀྱི་རྒྱུ་བྱང་ཆུབ་ཀྱི་སེམས་དང་གཉིས་སུ་མེད་པའི་ཡེ་ཤེས་གཉིས་ཀྱི་རྩ་བ་ཡང་སྙིང་རྗེ་ཡིན་པའི་ཕྱིར་ན། བྱང་སེམས་ཀྱི་རྒྱུ་གསུམ་གྱི་ནང་ནས་སྙིང་རྗེ་དེ་རྒྱུའི་གཙོ་བོ་ཉིད་དུ་བསྟན་པར་བཞེད་པ་ཡིན་ལ། སྙིང་རྗེ་ཉིད་རྒྱུའི་གཙོ་བོ་ཡིན་པ་རྒྱུ་མཚན་ག༷ང་གི་ཕྱི༷ར་ཞེ་ན། སྙིང་བརྩེ༷་བ་ཉི༷ད་ནི་སྐུ་བཞི་དང་མཚན་དཔེ་ལ་སོགས་པའི་རྒྱ༷ལ་བ༷འི་ལོ༷་ཏོ༷ག་ཕུ༷ན་སུམ་ཚོ༷གས་པ་འདི༷འི་ཐོག་མར་བསྐྱེད་པ་ལ་གལ་ཆེ་བ་ས༷་བོ༷ན་ད༷ང་ནི༷་འདྲ་ལ། བར་དུ་གོང་ནས་གོང་དུ་སྤེ༷ལ་བ་ལ༷་ཆུ༷་དང་འདྲ༷་ལ། ཐ་མར་གདུལ་བྱས་རྒྱལ་བའི་ལོ་ཏོག་ལ་ཡུ༷ན་རི༷ང་དུ༷་ལོ༷ངས་སྤྱོ༷ད་པའི་གན༷ས་ལ༷་འབྲས་བུ་སྨི༷ན་པ༷་ལྟ༷་བུ༷ར་འདོ༷ད་པར་གྱུ༵ར་པ༷་དེ༷འི་ཕྱི༷ར་ན་ཟླ་བའི་ཞབས་བད༷ག་གི༷ས་ཉན་རང་སངས་རྒྱས་དང་བྱང་སེམས་དང༌། བྱང་སེམས་ཀྱི་རྒྱུ་གཞན་གཉིས་ལས་ཀྱང་བསྟན་བཅོས་རྩོམ་པའི་ཐོ༷ག་མ༷ར་སྙི༷ང་རྗེ༷་ཆེན་པོ་ལ་བསྟོ༷ད་པ༷ར་བགྱི༷་བ་ཡིན་ནོ། །
སྙིང་རྗེ་ནི་རྒྱལ་བའི་ལོ་ཏོག་བསྐྲུན་པ་ལ་ཐོག་མཐའ་བར་གསུམ་དུ་གལ་ཆེ་བར་བསྟན་པ་དེ་ཉིད་སྙིང་རྗེ་ལ་བསྟོད་པ་ཡིན་ཏེ། རིན་པོ་ཆེའི་ཕྲེང་བ་ལས། ཐེག་པ་ཆེན་པོ་གང་ཞིག་ལས། །
སྙིང་རྗེ་སྔོན་བཏང་སྤྱོད་པ་ཀུན། །ཡེ་ཤེས་དྲི་མ་མེད་བཤད་པ། །སེམས་ཡོད་སུ་ཞིག་དེ་ལ་སྨོད། །ཅེས་དང༌། རང་འགྲེལ་ལས། བྱང་ཆུབ་ཀྱི་སེམས་བསྐྱེད་དུ་ཟིན་ཀྱང༌། གལ་ཏེ་དུས་ཕྱིས་སྙིང་རྗེའི་ཆུས་ཡང་དང་ཡང་དུ་བཅུས་པར་མ་གྱུར་ན། འབྲས་བུའི་ཚོགས་ཡངས་པ་མ་བསགས་པ་འདི་ངེས་པར་ཉན་ཐོས་དང་རང་སངས་རྒྱས་ཀྱིས་ཡོངས་སུ་མྱ་ངན་ལས་འདས་པས་མྱ་ངན་ལས་འདའ་བར་འགྱུར་རོ། །འབྲས་བུ་མཐའ་ཡས་པའི་གནས་སྐབས་ཐོབ་ཏུ་ཟིན་ཀྱང་གལ་ཏེ་དུས་ཕྱིས་སྙིང་རྗེ་ཡོངས་སུ་སྨིན་པ་དང་བྲལ་བར་གྱུར་ན་ནི་འདི་དུས་རིང་པོར་ཉེ་བར་ལོངས་སྤྱོད་པར་མི་འགྱུར་ལ། འཕགས་པའི་འབྲས་བུའི་ཚོགས་ཆེན་པོ་རིམ་པ་གཅིག་ནས་གཅིག་ཏུ་བརྒྱུད་པ་རྣམ་པ་བར་མ་ཆད་པ་ཡུན་རིང་པོར་མངོན་པར་འཕེལ་བར་ཡང་མི་འགྱུར་རོ། །ཞེས་གསུངས་པས་སོ། །སྙིང་རྗེ་ཆེན་པོ་དེ་ལ་སེམས་ཅན་སྡུག་བསྔལ་དང་བྲལ་ན་སྙམ་པའི་འདོད་པ་གཅིག་དང༌། བྲལ་བར་གྱུར་ཅིག་སྙམ་དུ་སྨོན་པ་གཅིག་དང༌། བདག་གིས་དབྲལ་བར་བྱའོ་སྙམ་པའི་ཁུར་དུ་ཁྱེར་བའི་སྙིང་རྗེ་ཆེན་པོ་དང་གསུམ་ཡོད་དོ། །དྲུག་པ་ལྷག་བསམ་པ་ཡན་ཆད་ཀྱི་རྒྱུད་ཀྱི་དམིགས་པ་སེམས་ཅན་ཐམས་ཅད་ལ་དམིགས་ནས་རྣམ་པ་སྡུག་བསྔལ་གྱིས་མཚོན་པའི་ཕོངས་པ་མཐའ་དག་ལས་སྐྱོབ་འདོད་ཀྱི་བརྩེ་བ་དེ། སྐྱེས་བུ་ཆེན་པོའི་སྙིང་རྗེ་ཆེན་པོའི་མཚན་ཉིད། དམིགས་པ་སེམས་ཅན་ཐམས་ཅད་ལ་དམིགས་ནས་རྣམ་པ་སྡུག་བསྔལ་དང་བྲལ་ན་དང་སྡུག་བསྔལ་དང་བྲལ་བར་གྱུར་ཅིག་དང་སྡུག་བསྔལ་དང་དབྲལ་བར་བྱའོ་གང་རུང་གི་རྣམ་པ་ཅན་མས་བུ་གཅིག་པ་ལ་བརྩེ་བ་ལྟ་བུའི་ཡིད་འགྱུར་གྱི་མྱོང་བ་ཐོན་པའི་བརྩེ་བ་དེ། སྙིང་རྗེ་ཆེན་པོའི་མཚན་ཉིད། དབྱེ་ན་ཐེག་པ་གསུམ་གྱི་སྙིང་རྗེ་གསུམ་དང༌། ལམ་མ་ཞུགས་ཀྱི་དང༌། ལམ་ཞུགས་ཀྱི་སྙིང་རྗེ་ཆེན་པོ་གཉིས་དང༌། ཆོས་ལ་དམིགས་པའི་སྙིང་རྗེ་ཆེན་པོ་སོགས་གསུམ་རྣམས་ཡོད། ཐེག་པ་ཆེ་ཆུང་གི་སྙིང་རྗེ་ལ་ཁྱད་པར་ཡོད་དེ། གཟུངས་རྒྱལ་གྱིས་ཞུས་པ་ལས། ཉན་ཐོས་དང་རང་སངས་རྒྱས་ཀྱི་སྙིང་རྗེ་ནི་པགས་པའི་རྣམ་པ་ལྟ་བུའོ། །བྱང་ཆུབ་སེམས་དཔའ་རྣམས་ཀྱི་སྙིང་རྗེ་ནི་ཤའི་རྣམ་པ་ལྟ་བུའོ། །ཞེས་གསུངས་པའི་ཕྱིར་རོ། །སྙིང་རྗེ་ཆེན་པོ་དང་སྙིང་རྗེ་ཚད་མེད་གཉིས་ལ་མུ་བཞི་ཡོད་དེ། ཞི་ལྷག་མ་ཐོབ་པའི་བྱང་ཆུབ་སེམས་དཔའི་རྒྱུད་ཀྱི་སྙིང་རྗེ་ཆེན་པོ་ལྟ་བུ་ནི་སྙིང་རྗེ་ཆེན་པོ་ཡིན་ལ་སྙིང་རྗེ་ཚད་མེད་མ་ཡིན་པའི་མུ་དང༌། ཕྱི་རོལ་བའི་རྒྱུད་ཀྱི་ཞི་ལྷག་དང་མཚུངས་ལྡན་གྱི་སྙིང་རྗེ་དེ་སྙིང་རྗེ་ཚད་མེད་ཡིན་ལ་སྙིང་རྗེ་ཆེན་པོ་མ་ཡིན་པའི་མུ་དང༌། ཞི་ལྷག་ཐོབ་པའི་བྱང་སེམས་ཀྱི་རྒྱུད་ཀྱི་ཞི་ལྷག་དང་མཚུངས་ལྡན་གྱི་སྙིང་རྗེ་ཆེན་པོ་དེ་སྙིང་རྗེ་ཚད་མེད་དང་སྙིང་རྗེ་ཆེན་པོ་གཉིས་ཀ་ཡིན་པའི་མུ་དང༌། ཚིག་སྤྱི་ཙམ་གྱི་སྙིང་རྗེ་དང་ཕུག་རོན་གྱིས་བུ་ལ་བརྩེ་བ་ལྟ་བུ་ནི་གཉིས་ཀ་མ་ཡིན་པའི་མུ་ཡིན་ནོ། །ཚདམེད་བཞིའི་སེམས་རྟེན་ལ་བསམ་གཏན་དགོས་པའི་དབང་དུ་བྱས་པའོ། །
སྙིང་རྗེ་ཆེན་པོ་ལ་སོ་སོར་ཕྱེ་ནས་ཕྱག་འཚལ་བ།
གཉིས་པ་སྙིང་རྗེ་ཆེན་པོ་ལ་སོ་སོར་ཕྱེ་ནས་ཕྱག་འཚལ་བ་ལ། སེམས་ཅན་ལ་དམིགས་པའི་སྙིང་རྗེ་ལ་ཕྱག་འཚལ་བའི་ཚུལ་དང༌། ཆོས་དང་དམིགས་མེད་ལ་དམིགས་པའི་སྙིང་རྗེ་ལ་ཕྱག་འཚལ་ཚུལ་གཉིས།
སེམས་ཅན་ལ་དམིགས་པའི་སྙིང་རྗེ་ལ་ཕྱག་འཚལ་བའི་ཚུལ།
དང་པོ་ནི།
རྩ་བར། དང་པོ་ང་ཞེས་བདག་ལ་ཞེན་གྱུར་ཅིང༌། །
བདག་གི་འདི་ཞེས་དངོས་ལ་ཆགས་བསྐྱེད་པ། །
ཟོ་ཆུན་འཕྱན་ལྟར་རང་དབང་མེད་པ་ཡི། །
འགྲོ་ལ་སྙིང་རྗེར་གྱུར་གང་དེ་ལ་འདུད། །
ཅེས་ད༷ང་པོ༷ར་ངར་འཛིན་གྱི་འཇིག་ལྟས་ང༷་ཡིན་ནོ་ཞེ༷ས་རང་བཞིན་གྱིས་གྲུབ་པའི་གང་ཟག་གི་བད༷ག་ལ༷་ཞེ༷ན་པར་གྱུ༷ར་ཅི༷ང་ངར་འཛིན་འཇིག་ལྟས་མིག་སོགས་དང་ལྡན་པའམ་མིག་སོགས་ཀྱི་ཁྱད་པར་དུ་བྱས་པའི་ང་རང་བཞིན་གྱིས་གྲུབ་པར་འཛིན་པའི་བདག་གིར་འཛིན་པའི་འཇིག་ལྟ་བསྐྱེད་ལ། དེ་ནས་ང་ཡི་བར་འཛིན་པའི་འཇིག་ལྟས་ངར་འཛིན་གྱི་དམིགས་པའི་གང་ཟག་མ་ཡིན་པའི་གཟུགས་དང་མིག་སོགས་ལ་བད༷ག་གི༷་མིག་འདི༷་ཡིན་ནོ་ཞེ༷ས་དངོ༷ས་པོའི་ཆོས་ལ༷་རང་བཞིན་གྱིས་གྲུབ་པར་ཆ༷གས་པའི་བདེན་ཞེན་གྱི་ཆོས་ཀྱི་བདག་འཛིན་བསྐྱེ༷ད་པ༷་ཡིན། དེ་ལྟར་བདག་འཛིན་གཉིས་ཀྱི་དབང་གིས་ཟོ༷་ཆུ༷ན་འཕྱ༷ན་ནམ་འཁོར་བ་ལྟ༷ར་ར༷ང་དབ༷ང་མེ༷ད་པ༷ར་འཁོར་བར་འཁོར་བ་ཡི༷་འགྲོ༷་བ་མ་ལུས་པ་ལ༷་འཕོངས་པ་ལས་སྐྱོབ་འདོད་ཀྱི་སྙི༷ང་རྗེ༷ར་གྱུ༷ར་པ་ག༷ང་ཡིན་པ་དེ༷་ལ༷་འདུ༷ད་ཅེས་ཕྱག་འཚལ་བ་ཡིན་ནོ། །འགྲོ་བ་དང་ཟོ་ཆུན་གྱི་འཁྲུལ་འཁོར་གཉིས་འདྲ་ཚུལ་རྣམ་པ་དྲུག་གི་སྒོ་ནས་མཚུངས་པ་ཡིན་ཏེ། དེ་གཉིས་བཅིངས་པ་ལ་འདྲ་ཚུལ་ཡོད་དེ། ཟོ་ཆུན་དེ་ཐག་པས་བཅིངས་པ་ལྟར་སེམས་ཅན་རྣམས་ཀྱང་ལས་དང་ཉོན་མོངས་པས་འཁོར་བར་བཅིངས་པ་དང༌། བྱེད་པ་པོ་འདྲ་བ་ཟོ་ཆུན་དེ་ཁྲོན་པའི་ནང་དུ་འཁོར་མི་འཁོར་གང་ཟག་ལ་རག་ལས་པ་ལྟར་འགྲོ་བ་རྣམས་འཁོར་བར་འཁྱམས་མི་འཁྱམས་རྣམ་ཤེས་ལ་རག་ལས་པ་དང༌། འཁོར་ཚུལ་འདྲ་བ་ཟོ་ཆུན་དེ་ཁྲོན་པའི་རྩ་རྩེ་ཀུན་ཏུ་འཁོར་བ་ལྟར་འགྲོ་བ་ཡང་སྲིད་རྩེ་ནས་མནར་མེད་བར་དུ་ཡང་འཁོར་བ་དང༌། འབད་རྩོལ་འདྲ་བ་ཟོ་ཆུན་དེ་ཐུར་དུ་ངམ་ངམ་ཤུགས་ཀྱིས་འགྲོ་ཞིང་གྱེན་དུ་འགྲོ་བ་ལ་འབད་པ་ཆེན་པོ་དགོས་པ་ལྟར་འགྲོ་བ་རྣམས་ངན་སོང་དུ་འགྲོ་སླ་ཞིང༌། ངན་སོང་ནས་བདེ་འགྲོར་འགྲོ་བ་ནི་འབད་ཀྱང་དཀའ་བ་དང༌། གོ་རིམ་མ་ངེས་པ་འདྲ་བ་ཟོ་ཆུན་དེ་འཁོར་བའི་སྔ་ཕྱིའི་རིམ་པ་མ་ངེས་པར་ལྟར་འགྲོ་བ་རྣམས་རྟེན་འབྲེལ་བཅུ་གཉིས་ཀྱི་སྒོ་ནས་འཁོར་བར་འཁྱམས་པའི་ཚེ་ཉོན་མོངས་ལས་ལས་དང་ལས་ལས་སྐྱེ་བའི་ཀུན་ཉོན་དང་སྐྱེ་བ་ལས་ཉོན་མོངས་སྐྱེ་བ་སོགས་རྒྱུན་མི་ཆད་དུ་འབྱུང་བས་སྔ་ཕྱིའི་རིམ་པ་མེད་པ་དང༌། མནར་ཚུལ་འདྲ་བ་ཟོ་ཆུན་དེ་འཁོར་བའི་ཚེ་ཕན་ཚུན་གྱི་རྡོ་སོགས་ལ་འཐོགས་ཏེ་གཅོག་པ་ལྟར་འགྲོ་བ་རྣམས་འཁོར་བར་འཁྱམས་པའི་ཚེ་སྡུག་བསྔལ་གསུམ་གྱིས་ཡང་དང་ཡང་དུ་མནར་བ་ཡིན་པའི་ཕྱིར་རོ། །
དེ་ལྟར་སེམས་ཅན་རྣམས་ཟོ་ཆུན་དང་ཆོས་མཐུན་དྲུག་གི་སྒོ་ནས་འཁོར་བར་འཁྱམས་ཚུལ་བཤད་པ་དེ་ཡང་སེམས་ཅན་འཁོར་བར་འཁྱམས་ཚུལ་གྱི་གོ་བ་ཙམ་ཞིག་བསྐྱེད་པའི་ཆེད་དུ་མ་ཡིན་པར་སྙིང་རྗེ་བསྐྱེད་དགོས་ཞེས་ཡང་ཡང་བསྟན་ཀྱང་སྐྱེད་པར་བྱེད་ཚུལ་མ་བསྟན་པའི་སྙིང་རྗེ་སྐྱེ་བ་ནི་སེམས་ཅན་རྣམས་ནི་ཟོ་ཆུན་དང་ཆོས་མཚུངས་དྲུག་གི་སྒོ་ནས་འཁོར་བའི་སྡུག་བསྔལ་གྱིས་མནར་བའི་ཚུལ་དེ་ཡང་ཡང་སྒོམ་པའི་སྙིང་རྗེ་སྐྱེད་པར་བྱེད་ཚུལ་བསྟན་པ་ཡིན་པའོ། །རང་འགྲེལ་ལས། འདི་ནི་བྱང་ཆུབ་སེམས་དཔའ་རྣམས་ཀྱི་སྙིང་རྗེ་སེམས་ཅན་ལདམིགས་པའོ། །ཞེས་གསུངས་པས་སོ། །
ཆོས་དང་དམིགས་པ་མེད་པའི་སྙིང་རྗེ་ལ་ཕྱག་འཚལ་བ།
གཉིས་པ་ཆོས་དང་དམིགས་པ་མེད་པའི་སྙིང་རྗེ་ལ་ཕྱག་འཚལ་བ་ནི།
རྩ་བར། འགྲོ་བ་གཡོ་བའི་ཆུ་ཡི་ནང་གི་ཟླ་བ་ལྟར། །
གཡོ་དང་རང་བཞིན་ཉིད་ཀྱིས་སྟོང་པར་མཐོང་བ་ཡིས། །
ཞེས་འགྲོ༷་བ༷་རྣམས་རབ་ཏུ་གཡོ༷་བ༷འི་ཆུ༷་ཡི༷་ན༷ང་གི༷་ཟླ༷་བ༷་ལྟ༷ར་སྐད་ཅིག་སྐད་ཅིག་གིས་གཡོ༷་ཞིང་འཇིག་པའི་ཆོས་ཀྱིས་ཁྱད་པར་དུ་བྱས་པའི་སེམས་ཅན་ལ་དམིགས་པའི་སྙིང་རྗེ་ལ་ཕྱག་འཚལ་བས་ཆོས་ལ་དམིགས་པའི་སྙིང་རྗེ་ལ་ཕྱག་འཚལ་བ་ད༷ང༌། འགྲོ་བ་རྣམས་ཆུའི་ནང་གི་ཟླ་བ་ཟླ་བར་སྣང་ཡང་ཆུ་ཟླ་ནི་ཟླ་བ་དེར་གྲུབ་པས་སྟོང་པ་བཞིན་ར༷ང་བཞི༷ན་ཉི༷ད་གྱི༷ས་གྲུབ་པར་སྣང་ཡང་རང་བཞིན་གྱིས་སྟོ༷ང་པ༷ར་མཐོ༷ང་བ༷་ཡི༷ས་ཁྱད་པར་དུ་བྱས་པའི་སྙིང་རྗེ་ལ་ཕྱག་འཚལ་བས་དམིགས་མེད་ལ་དམིགས་པའི་སྙིང་རྗེ་ལ་ཕྱག་འཚལ་བ་ཡིན་ནོ། །མི་རྟག་པ་དང་བདག་མེད་པ་གང་གིས་ཁྱད་པར་དུ་མ་བྱས་པའི་སེམས་ཅན་ཙམ་ལ་དམིགས་ནས་སྡུག་བསྔལ་ལས་སྐྱོབ་པར་འདོད་པའི་བརྩེ་བ་དེ། སེམས་ཅན་ཙམ་ལ་དམིགས་པའི་སྐྱེས་བུ་ཆེན་པོའི་སྙིང་རྗེའི་མཚན་ཉིད། ཆོས་ལ་དམིགས་པའི་སྙིང་རྗེ་ཆེན་པོའི་མཚན་ཉིད་ཡོད་དེ། དམིགས་པ་མི་རྟག་པ་དང་བདག་མེད་རགས་པ་གང་རུང་གིས་ཁྱད་པར་དུ་བྱས་པའི་སེམས་ཅན་ལ་དམིགས་ནས་རྣམ་པ་སྡུག་བསྔལ་ལས་སྐྱོབ་འདོད་ཀྱི་བརྩེ་བ་ཆེན་པོ་དེ་དེ་ཡིན་པའི་ཕྱིར་རོ། །དམིགས་མེད་ལ་དམིགས་པའི་སྙིང་རྗེ་ཆེན་པོའི་མཚན་ཉིད་ཡོད་དེ། དམིགས་པ་བདེན་མེད་ཀྱིས་ཁྱད་པར་དུ་བྱས་པའི་སེམས་ཅན་ལ་དམིགས་ནས་རྣམ་པ་སྡུག་བསྔལ་ལས་སྐྱོབ་འདོད་ཀྱི་བརྩེ་བ་ཆེན་པོ་དེ་དེ་ཡིན་པས་སོ། །སྙིང་རྗེ་གསུམ་གྱི་ཁྱད་པར་ནི་དམིགས་ཡུལ་ཙམ་གྱིས་འབྱེད་མི་ཐུབ་སྟེ། སྙིང་རྗེ་གསུམ་གས་སེམས་ཅན་ལ་དམིགས་པ་མཚུངས་པའི་ཕྱིར། རྣམ་པས་ཀྱང་དེ་གསུམ་གྱི་ཁྱད་པར་འབྱེད་མི་ཐུབ་སྟེ། སྙིང་རྗེ་གསུམ་ག་སེམས་ཅན་སྡུག་བསྔལ་ལས་སྐྱོབ་འདོད་ཀྱི་རྣམ་པ་ཅན་དུ་མཚུངས་པའི་ཕྱིར། འོན་ཀྱང་སྙིང་རྗེ་གསུམ་ཁྱད་མེད་དུ་མི་འགྱུར་ཏེ། དེ་གསུམ་ནི་དམིགས་པའི་ཁྱད་པར་ལ་བློ་འཇུག་ཚུལ་ལམ་དམིགས་པའི་རྣམ་པ་འཆར་ཚུལ་མི་འདྲ་བའི་སྒོ་ནས་སྙིང་རྗེ་གསུམ་དུ་བཞག་པའི་ཕྱིར་རོ། །སྙིང་རྗེ་ནི་རྣམ་པར་མི་འཚེ་བ་ཡིན་ཏེ། ཕུང་པོའི་རབ་བྱེད་ལས། རྣམ་པར་མི་འཚེ་བ་གང་ཞེ་ན། རྣམ་པར་འཚེ་བའི་གཉེན་པོ་སྟེ་སྙིང་རྗེའོ། །
ཞེས་གསུངས་པས་སོ། །སྙིང་རྗེ་གསུམ་གྱི་དམིགས་པ་ཡིན་ཁྱབ་མཉམ་ཡིན་མིན་རྩོད་པརབྱའོ། །