གདུལ་ཞིང་རཱུ་ཏྲའི་སྐྱེ་རྒྱུད་བསྟན་པའི་ལེའུ།
དེ་ནས་ཀུན་ཏུ་བཟང་པོའི་བསྟན་པའི་མཇུགཿ ཡུལ་གྱི་མིང་ནི་འདུ་ལྗོངས་མཚམས་ཞེས་བྱཿ ཁྱིམ་བདག་ཀོའུ་ཀཱ་ལ་ཞེས་པ་ལཿ བུ་ནི་ཀོའུ་ཀུན་དཀྲིས་ཞེས་བྱ་དང་ཿ གཡོག་པོ་པྲ་མ་དེ་བ་བྱ་བ་གཉིསཿ བསྟན་པ་གཉིས་ཀྱི་གདུལ་བྱའི་ཞིང་དུ་གཟིགསཿ སྤྲུལ་སྐུའི་བསྟན་པ་མི་ནུབ་བྱ་བའི་ཕྱིརཿ དགེ་སློང་ཐུབ་དཀའ་གཞོན་ནུར་སྐྱེ་བ་བཞེསཿ ལོངས་སྐུའི་བསྟན་པ་གསང་སྔགས་མི་ནུབ་ཕྱིརཿ རིགས་འཆང་ཁྱིམ་བདག་ཆེན་པོར་སྐྱེ་བ་བཞེསཿ སྐུ་གཅིག་
༼༡༣ན༽མཚན་གཉིས་གྲགས་པའི་དགེ་སློང་ལཿ མི་རྣམས་ཐམས་ཅད་རབ་ཏུ་ཤིན་ཏུ་འདུནཿ རྣལ་འབྱོར་ལྔ་ཡི་ལམ་ཆེན་བླངས་ནས་སྤྱོདཿ ཕུང་པོའི་གནས་ལ་སྟོང་པར་གྱུར་པར་ལྷཿ དེ་དུས་ཀེའུ་ཀུན་དཀྲིས་དད་པ་སྐྱེསཿ གང་དག་མི་ལ་དྲིས་ནས་ཐེ་ཚོམ་བཅདཿ སྟོན་པ་ཐུབ་དཀའ་གཞོན་ནུ་ཇི་ལྟ་བཿ བྱང་ཆུབ་མི་སྒྲུབ་ཉོན་མོངས་མི་སྤོང་བཿ ཅི་དགར་སྤྱོད་དུ་ཡོད་པའི་ཆོས་གསུང་དམཿ དེ་དག་དགེ་སློང་དེ་བཞིན་གསུང་ངོ་བརྗོདཿ མ་རིག་བསལ་ནས་མྱང་འདས་ཐོབ་པ་ལཿ དེ་བས་ཐུབ་དཀའ་གཞོན་ནུ་མཆོག་ཏུ་གསུངསཿ ཀོའུ་ཀུན་དཀྲིས་པྲ་མ་དེ་བ་ཡིསཿ ཐུབ་དཀའ་གཞོན་ནུ་གནས་པའི་དྲུང་དུ་ཕྱིནཿ ཐེ་ཚོམ་དང་ནི་ཉོན་མོངས་གསུམ་པོ་དགཿ རང་ཉིད་ཅི་དགར་སྤྱོད་པས་རྣལ་འབྱོར་དུཿ འཕགས་པའི་བདེན་མཐོང་སྔགས་ཀྱི་དགོངས་ལོན་པརཿ ཐབས་ལ་མཁས་པས་ཉེ་བར་གཟུང་དུ་གསོལཿ ཅེས་འདུན་ཞབས་མཐིལ་མགོ་བོ་བཏུད་བྱས་པསཿ སྟོན་པས་ཡིན་ནོ་ངེས་སོ་ལེགས་སོ་བྱིནཿ འཁོར་བའི་འཁོར་ལོ་ཇི་ལྟར་གནས་པ་དགཿ དེས་ན་དགེ་འདུན་རིན་ཆེན་མཆོག་ཏུ་གསུངསཿ ཞེས་གསུངས་དཔོན་གཡོག་གཉིས་ཀ་རབ་ཏུ་བྱུང་ཿ ཐར་པ་ནག་པོ་དན་ཕག་ཆོས་མིང་བཏགསཿ དན་ཕག་ཐར་པའི་དུས་འཛིན་པ་རུ་བསྐོསཿ དེ་ནས་དགེ་སློང་ཐར་པ་ནག་
༼༡༣བ༽པོ་ཡིསཿ ཐུབ་དཀའ་གཞོན་ནུའི་སྙན་དུ་འདི་སྐད་གསོལཿ ཨེ་མ་སྔགས་སྐྱོང་རིག་སྔགས་འཆང་ཆེན་པོཿ ཤིན་ཏུ་སྡུག་བསྔལ་ཀུན་ལས་གྲོལ་བྱད་པཿ ཇི་ལྟ་བ་ཡི་ལམ་དེ་གང་ལགས་གསུངསཿ སྟོན་པས་ཞལ་གྱི་མཛུམ་མདངས་བསྟན་ནས་སུཿ ཇི་བཞིན་ཉིད་དེ་མ་བཅོས་པརཿ དངོས་པོ་བཞི་ལ་གནས་སྤྱད་ཀྱང་ཿ ནམ་མཁའ་ལ་ནི་སྤྲིན་བཞིན་ཏེཿ འདི་ནི་རྣལ་འབྱོར་དམ་པའི་ལམཿ འདི་མ་རྟོགས་པར་ཁམས་གསུམ་ནཿ ལྟ་བའི་རིམ་པ་གཞན་མེད་དོཿ ཞེས་གསུངས་ཚུལ་བཞིན་སེམས་ཀྱི་རྣམ་དཔྱད་བསྟནཿ ཐར་པ་གཡོག་དང་བཅས་པ་ཡི་རངས་ཏེཿ གུས་དད་བཅས་པས་དེ་ལ་འདོད་ཡོན་མཆོདཿ མངོན་པར་བསྟོད་ནས་རང་གི་གནས་སུ་དེདཿ ཆོས་སྒྲ་ཇི་བཞིན་བ་ལ་ཐར་པས་སྤྱདཿ ངེས་པའི་དོན་མ་རྟོགས་པས་ཉོན་མོངས་འབརཿ དངོས་པོ་བཞི་ལ་ཞེན་འཐས་བྱས་པ་ཡིསཿ ལུས་ནི་དམ་པའི་ཆོས་ཞུགས་སེམས་ངན་འགྲོཿ གཡོག་པོ་དན་ཕག་ངེས་པའི་དོན་རྟོགས་ནསཿ བློ་གྲོས་རབ་འཕེལ་ཇི་བཞིན་ཁོ་ནར་སྤྱདཿ མ་ཞེན་སྟོན་པའི་བསྟན་པ་གཉན་པར་ཤེསཿ ལུས་ནི་མ་རབས་ཆས་ཞུགས་གུད་དེ་དེདཿ སེམས་ལ་ངེས་པའི་ལམ་ཕྱིན་ལྟ་མ་ལོགཿ དེ་ནས་རེ་ཞིག་དུས་ན་དཔོན་གཡོག་གཉིསཿ ལྟ་སྤྱོད་མ་མཐུན་གླགས་
༼༡༤ན༽ལྟ་གྱ་ཚིག་ཕོསཿ དགེ་སློང་ཐར་པ་ནག་པོས་ལན་བཏབ་པཿ བདག་ཅག་གཉིས་ནི་སློབ་དཔོན་གཅིག་ལ་གཏུགསཿ སྒྲ་གཅིག་དོན་དུ་འགྱུར་བར་འདོད་པ་དང་ཿ ཉམས་ལེན་སོ་སོར་མ་མཐུན་ཇི་ལྟ་བུཿ དན་ཕག་ཐར་པ་ནག་པོར་ལན་བཏབ་པཿ བདག་གིས་ངེས་པར་མཉམ་པར་བཞག་པ་ལསཿ ཀུན་ཏུ་དང་བར་མ་གྱུར་གཞན་མ་གོཿ དེ་ནས་ཐར་པ་ནག་པོས་ལན་བཏབ་པཿ ངས་ཀྱང་དེ་ལྟར་ངེས་པས་དེར་སྤྱད་པསཿ གསང་སྔགས་སྤྱོད་དེ་ཆོས་བཞིན་མཐུན་པར་མཆིསཿ ཐར་པ་ནག་པོ་མངོན་པའི་ང་རྒྱལ་སྐྱེསཿ དན་ཕག་ཁྱོད་ཀྱི་སྟ་སྤྱོད་ལོག་ཅེས་ཟེརཿ ཉོན་མོངས་དང་ནི་ཡེ་ཤེས་རྒྱུ་རྐྱེན་གཅིགཿ ཀུན་རྫོབ་རྩོལ་བྱས་དགེ་བས་སངས་མི་རྒྱཿ དོན་དམ་རྩོལ་མེད་ངང་ལ་འཇོག་པ་ཡིནཿ དེ་ནས་དན་ཕག་ཚིག་གི་ལན་བཏབ་པཿ རྣམ་ཤེས་ཞེན་འཛིན་དག་པ་ཡེ་ཤེས་ཏེཿ ཇི་བཞིན་ཉིད་དེ་མ་བཅོས་སྔགས་ཀྱི་ལམཿ ཉོན་མོངས་པ་ནི་སྤྲིན་བཞིན་དབྱིངས་སུ་དེངསཿ ཡས་འབེབས་སྤྱོད་པ་གསུམ་ལྡན་རྩོལ་བར་བྱཿ འདི་ནི་སྟོན་པ་ཐུབ་དགའི་བཞེད་པ་ཡིནཿ ཅེས་བརྗོད་ཐར་པ་ནག་པོ་ཀུན་འཁྲུགས་ནསཿ སློབ་དཔོན་ཐུབ་དཀའ་གཞོན་ནུ་མ་བཙོས་པཿ ཁ་གསག་མེད་ཅིང་རྒྱུད་དྲང་རང་བཞིན་གསོང་ཿ འཛམ་
༼༡༤བ༽གླིང་ཆོས་ཀྱི་རྒྱལ་པོ་ཐུབ་ཆེན་ལཿ གང་ཡིན་དྲིར་འགྲོ་ལུས་ཤུགས་མྱུར་དུ་ཕྱུང་ཿ དཔོན་གཡོག་གཉིས་ཀྱིས་ལྷ་ན་དུ་ཕྱིན་ནས་དྲིསཿ གཤགས་འབྱེད་སྟོན་པས་དན་ཕག་ལྟར་རོ་གསུངསཿ ཐར་པ་ནག་པོ་སེམས་ཚིག་རབ་ཏུ་ཁྲོསཿ སློབ་དཔོན་གཅིག་ལ་ལྟ་བ་མི་འདྲ་གཉིསཿ འདི་ལ་ཐམས་ཅད་ལོག་པར་དེ་དག་སྟོནཿ རྟག་ཏུ་ཕན་ཚུན་མཐུན་པ་མ་ཡིན་ཞིང་ཿ དན་ཕག་གཡོག་ཏུ་མི་བསྟན་སྒྲ་ཡང་འབྱིནཿ སྤྱོད་ཡུལ་ལམ་དན་ཀུན་ཏུ་བསྐོར་བར་བགྱིདཿ ཚིག་རྩུབ་སུན་ཕྱུང་རེངས་པར་སྤྱུགས་ཏེ་སྤངསཿ སློབ་མར་འདྲ་ཞིང་སློབ་དཔོན་སྤྱི་མི་ཡིནཿ གཉིས་ག་ལྟར་རེ་ཙམ་ཞིག་མི་ཟེར་བརཿ ངེས་པར་ང་ཉིད་སུན་ཕྱུང་ཕྱིན་ལོག་སྟོནཿ ཉེ་རིང་ཅན་དེ་ས་འདིར་མ་ཆགས་པརཿ སྤྱུགས་ཏེ་རྒྱལ་ཁམས་ང་ཡིས་དབང་བསྡུ་བསམཿ ཡུལ་ཕྱོགས་མཐའ་ལ་སྤྱུགས་ཏེ་རིང་སྤངས་སོཿ ཿཐུབ་ཆེན་རྔ་དང་འབྲུག་གི་སྒྲ་སྒྲོག་ལྟརཿ འདུ་ལྗོངས་མཚམས་ཀྱི་འཇིག་རྟེན་འདི་ན་ནིཿ ཐུབ་དཀའ་ལ་ནི་སྐྱབས་སུ་མཆི་མི་རྣམསཿ སེམས་ཅན་བློ་ཆུང་རྣམས་ནི་མི་ཤེས་པསཿ ཆོས་རྣམས་ཐམས་ཅད་བཤད་པར་མི་ནུས་ཏེཿ གྲོང་སྟོང་ལས་ཀྱི་འཁྲུལ་འཁོར་འདྲ་བར་གནསཿ ཞེས་གསུངས་ཞིང་ཁམས་གཞན་ལ་གཤེགས་པར་
༼༡༥ན༽གྱུརཿ དེ་ནས་དགེ་སློང་ཐར་པ་ནག་པོ་ཁོཿ འཇིག་རྟེན་སྐྱམ་ལིངས་འདུ་བྱེད་ལ་ཡེངས་ཏེཿ ལྷ་སྒོམ་སྔགས་བཟླས་མ་ཁོམ་བློ་དྲེད་ནསཿ བླ་མ་དང་ནི་མཆེད་གྲོགས་དམ་ཚིག་ཉམསཿ ཆོས་སྒོ་གྲངས་མང་རྒྱ་ཆེར་གྱུར་པ་ལཿ གཞལ་བྱ་གཉིས་ཀྱིས་གཞལ་བར་མ་བྱས་པརཿ ཐར་པས་ཚད་མ་རང་གི་ཞེན་ཕྱོགས་འབྲང་ཿ འཇིག་རྟེན་ཐམས་ཅད་ལོག་པའི་ལམ་ལ་སྒྱུརཿ ལོག་པའི་བརྟུལ་ཞུགས་ཕོ་མཐོང་ཐམས་ཅད་བསྒྲལཿ མོ་མཐོང་སྦྱོར་བ་བྱས་ནས་དབང་དུ་བསྡུསཿ དུར་ཁྲོད་མི་རོ་བླངས་ནས་ཟས་སུ་ཟོསཿ མི་ལྤགས་གོས་གྱོན་ཁེ་མ་རྣམས་སུ་རྒྱུཿ སྲོག་ཆགས་གསོད་པའི་བྱ་དང་ཁྱི་དང་ནིཿ གཅན་གཟན་རིགས་བྱེད་མང་པོ་ནོར་དུ་བསྲེལཿ སྨད་འཚོད་མ་བསྡུས་དབང་བསྐུར་ཆགས་པ་སྤྱོདཿ དངོས་པོ་བཞི་ཡི་རང་བཞིན་འདས་པར་གྱུརཿ སྡིག་གི་ཚོགས་དཔོན་མི་དགེ་བཅུ་དབུས་ནཿ དབང་པོ་རྣམས་ནི་དམག་དང་ཚོམ་རྐུན་འདྲཿ བསྟན་ནག་ལོ་སྐོར་བཅུ་གཉིས་བསྐྱངས་ནས་སུཿ དེ་ནས་ཚེ་འཕོས་ཕྱི་མའི་སྐྱེ་བ་ནིཿ ལྕེ་སྤྱང་ནག་པོའི་སྐྱེ་བ་ལྔ་བརྒྱ་དང་ཿ ཁྱི་ལི་ལུ་དྷེའི་སྐྱེ་བ་ལྔ་བརྒྱ་དང་ཿ ནེའུ་ལེ་ཤ་ཟན་སྐྱེ་བ་ལྔ་བརྒྱ་དང་ཿ སྦྲང་བུ་ཏྲེ་མའི་སྐྱེ་བ་ལྔ་བརྒྱ་དང་ཿ སྲིན་འབུ་སུ་ཀའི་སྐྱེ་བ་ལྔ་བརྒྱ་དང་ཿ
༼༡༥བ༽རོ་ཟ་རྐང་འཇིབ་ལ་སོགས་བསམ་མི་ཁྱབཿ དེ་ནས་ངན་སྐྱུགས་ཟ་བ་ལྔ་བརྒྱ་དང་ཿ དུད་འགྲོའི་རིས་གྱུར་དཔག་ཏུ་མེད་པ་དང་ཿ ཡི་དྭགས་རིས་གྱུར་དཔག་ཏུ་མེད་པ་དང་ཿ དེ་ནས་མནར་མེད་དམྱལ་བར་སྐྱེ་བ་བླངསཿ དེ་ནས་རྡོ་རྗེ་དམྱལ་བ་ཞེས་བྱ་བརཿ ཚེ་ཡི་ཚད་ནི་བརྒྱད་ཁྲིར་གནས་པར་གྱུརཿ དེ་ནས་ཤ་ཟ་རུས་འཆའི་རིས་གྱུར་བླངསཿ དེ་ནས་ཚེ་འཕོས་སྲུལ་པོ་གཉའ་ཕྲག་བུཿ སྲུལ་པོ་རྟོག་འདོད་ཅན་ཞེས་བྱ་བར་སྐྱེསཿ དེ་ནས་སྐྱེ་བ་སྟོང་ཕྲག་ཉི་ཤུའི་མཐརཿ སངས་རྒྱས་མར་མེ་མཛད་ཀྱི་བསྟན་པའི་རྗེསཿ ཤཱཀྱ་ཐུབ་པའི་བསྟན་པ་མ་བྱུང་བའིཿ བར་དེར་བསྟན་པའི་སྟོང་ལ་ལོ་མང་གྱུརཿ སྲིན་ཡུལ་ལང་ཀ་པཱུརྞ་ཞེས་བྱ་བརཿ སྨད་འཚོད་མ་ནི་ཀུན་ཏུ་རྒྱུ་ཞེས་ལཿ སྲོད་ལ་བདུད་དང་དགུང་ལ་བཙན་དང་འཁྲིགསཿ ཐོ་རངས་ལྷ་དང་འཁྲིགས་པའི་མངལ་དུ་ཆགསཿ ཕ་ནི་ལྷ་འདྲེ་མི་བསྲུན་གསུམ་ཡོད་པསཿ ཟླ་བ་བརྒྱད་ན་བུ་ཆུང་མགོ་གསུམ་པཿ ལག་པ་དྲུག་ཡོད་རྐང་པ་བཞི་ཡོད་པཿ ལུས་ལ་རང་འཁྲུངས་གཤོག་པ་གཉིས་ཡོད་པཿ མགོ་བོ་རེ་ལ་མིག་གསུམ་དགུ་ཡོད་པཿ ཆ་བྱེད་རྣམ་པ་སྣ་ཚོགས་མང་པོ་མངའཿ སྐྱེས་མ་ཐག་ཏུ་བཀྲ་མི་ཤིས་པའི་རྟགསཿ ནད་དོ་ཅོག་གིས་ལངྐའི་ཡུལ་རྣམས་གང་ཿ བསོད་
༼༡༦ན༽ནམས་ཕུང་པོ་རྣམ་པར་ཉམས་པར་གྱུརཿ ཕུན་སུམ་ཚོགས་པའི་རྟགས་རྣམས་ཐམས་ཅད་ནུབཿ མུ་གེ་འཁྲུག་ནད་ཡམས་ནད་དུག་གསུམ་འཕེལཿ རྨི་ལམ་ངན་རྨིས་འབྱུང་པོའི་ཚོགས་རྣམས་འདུཿ སྐྱེས་ནས་ཟླ་བ་དགུ་ན་བུ་ནད་ལོགཿ ཀུན་ཏུ་རྒྱུ་མ་དེ་ཉིད་ཤི་བར་གྱུརཿ ཡུལ་མི་རྣམས་ཀྱིས་རྒྱགས་ཕྲུག་ལྟས་ངན་འདིཿ མ་ཡི་ཕག་ཏུ་བཞག་པར་རིགས་སོ་ཟེརཿ ན་འཁྱི་ཞེས་བྱའི་དུར་ཤིང་རྩ་བ་ནཿ དུར་ཕག་ནག་པོ་གཏི་མུག་ཚང་བཅས་པཿ རྐེད་པར་དུག་སྦྲུལ་ཞེ་སྡང་འཁྲིས་བྱེདཿ རྩེ་ལ་འདོད་ཆགས་དུར་བྱའི་ཚང་བཅས་པཿ སྲིན་པོ་ཤི་ཚད་ཐམས་ཅད་དེར་སྐྱེལ་བཿ སྟག་དང་གློང་པོ་ཆེ་ཡི་ཚང་བྱེད་པཿ གདུག་པ་སྦྲུལ་རྣམས་ཐམས་ཅད་དེ་རུ་འཚོགཿ མཁའ་འགྲོ་མ་ཡིས་མི་རོ་དེ་རུ་འཁྱེརཿ དེ་ཡི་རྩ་བར་སྲིན་པོས་རོ་ཁང་བརྩིགསཿ མ་རོ་བུ་བཅས་ཁྱོགས་ལ་བླངས་ནས་བཅུགཿ བུ་དེས་མ་ལ་འཇུས་ཤིང་ནུ་མ་འཇིབསཿ ཆུ་སེར་གྱིས་ནི་བུ་སྲོག་ཞག་བདུན་འཚོཿ དེ་ནས་ཁྲག་ཏུ་གཞིབས་པས་ཞག་བདུན་འཚོཿ དེ་ནས་ནུ་མ་ཟོས་པས་ཞག་བདུན་འཚོཿ དེ་ནས་ནང་ཁྲོལ་ཟོས་པས་ཞག་བདུན་འཚོཿ དེ་ནས་ཕྱི་ཤ་ཟོས་པས་ཞག་བདུན་འཚོཿ དེ་ནས་རྐང་མར་རྒྱུངས་པ་ལྷ་བ་དང་ཿ ཀླད་པ་ཟོས་པས་ཞག་བདུན་བར་
༼༡༦བ༽དུ་འཚོཿ ཞག་པོ་བཞི་བཅུ་རྩ་གཉིས་ལུས་པོ་དརཿ བཟའ་རྒྱུ་མེད་པར་འགུལ་བས་རོ་ཁང་འགྱེལཿ བལྟས་པས་མཁའ་འགྲོས་མི་རོ་ཟ་བ་མཐོང་ཿ ཤ་ཟོས་ཁྲག་འཐུངས་པགས་པ་གོས་སུ་གྱོནཿ ཐོད་པར་ཁྲག་བླུག་བནྡྷ་ཁྲག་སྐྱོགས་བྱསཿ སྦྲུལ་མཐོང་རྐང་གདུབ་ལག་གདུབ་དོ་ཤལ་བྱསཿ གླང་པོ་ཤི་མཐོང་ཤ་ཟོས་པགས་པ་བརྒྱངསཿ སྟག་མཐོང་ཤ་ཟོས་པགས་པས་ཤམ་ཐབས་བྱསཿ དེ་ནས་ཁ་ལ་ཞག་གི་ཟོ་རིས་ཆགསཿ ལུས་ལ་ཐལ་ཆེན་ཚོམ་བུ་བཀོད་པར་གྱུརཿ ཟས་སུ་རོ་ཟ་གོས་སུ་པགས་རློན་གྱོནཿ སྐོམ་དུ་ཁྲག་འཐུང་ལས་སུ་མི་དགེ་སྤྱོདཿ འཚོ་བ་རོས་འཚོ་གཟི་མདངས་འོད་དུ་འབརཿ གཡས་དཀར་གཡོན་དམར་དབུས་མཐིང་དྲག་པོའི་ཞལཿ ལུས་པོ་ཤིན་ཏུ་ཆེ་བ་ཐལ་སྐྱའི་མདོགཿ ཤ་རྩུབ་ཉཱ་སུལ་རགས་ལ་བཞིན་མི་སྡུགཿ མི་མགོ་སྐམ་པོ་བྱུང་ཚད་ཕྱོགས་གཅིག་བརྒྱུསཿ རློན་པ་ཕྱོགས་གཅིག་རྙིང་པ་ཕྱོགས་གཅིག་བརྒྱུསཿ ཐོད་པ་ཚར་གསུམ་སེར་ལ་འཕྲེང་བ་བྱསཿ མཁུར་ཚོས་ཀུན་ལ་རཀྟའི་ཐིག་ལེ་བྱུགསཿ ལུས་ལ་ཕག་པའི་སྤུ་སྐྱེས་ཁ་མིག་དམརཿ མགོ་སྐྲ་ཁམས་ནག་རལ་པ་འབབ་རྙིགས་སུཿ ཕྱེད་ལ་ཐོར་ཚུགས་སྦྲུལ་རིགས་ལྔ་ཡིས་བཅིངསཿ ཡན་ལག་ཐམས་ཅད་བྱའི་སྡེར་མོ་ཅནཿ
༼༡༧ན༽དེ་དག་སྦྲུལ་རིགས་ལྔ་ཡིས་རིམ་པར་བཅིངསཿ གང་ཟིན་ལུས་ཀྱི་ཤ་རུས་རྔམ་ཟས་བྱེདཿ ཁ་ཊྭཱཾ་ལ་སོགས་མཚོན་ཆའི་རིགས་བྱེད་འཛིནཿ གཡོན་པ་བནྡྷ་ཁྲག་བཀང་རྟག་ཏུ་འཐུང་ཿ ཁབ་བླངས་ཆོ་བའི་འགོ་ནད་ཐམས་ཅད་འབྱུང་ཿ སྣ་ནས་གྲངས་བའི་ནད་རིགས་ཐམས་ཅད་འབྱུང་ཿ མིག་དང་རྣ་བ་འོག་སྒོའི་བུ་ག་ནསཿ འདུས་པའི་ནད་རིགས་བཞི་བརྒྱ་རྩ་བཞི་འབྱུང་ཿ ཁྱད་པར་གནམ་ནད་ས་ཆུ་མེ་ནད་དང་ཿ གག་ལྷོག་གཟེར་དང་ཕོ་གླང་ཏྲེ་ཏྲེ་ཧོཿ མཛེ་ཕོལ་འབྲུམ་བུ་རྒྱ་རིམས་དམུ་ཆུ་དང་ཿ ཤུ་བ་མེ་དཔལ་བལ་ལྡགས་གཡོན་པ་དང་ཿ གནོད་པའི་འཇིགས་སྐྲག་མང་པོ་སྣ་ཚོགས་འཕྲོཿ མཚན་ནི་མ་ཟོས་མ་ཏྲད་ཀ་རུར་གྲགསཿ དེ་དུས་ཡུལ་ནི་ཉི་ཤུ་རྩ་བཞི་ལཿ བདག་པོ་འཇིགས་བྱེད་མི་བཟད་རེ་རེ་ཡོདཿ པུལླིར་མ་ཛཱ་ལནྡྷ་ར་དང་ཿ ཨོ་རྒྱན་ཨ་རྦུ་ཏ་བཞི་ལྷས་བཟུང་གནསཿ གོང་ལ་ཝ་རི་རཱ་མེ་ཤྭ་ར་དང་ཿ དེ་བི་མཱ་ལ་ཉེ་གནས་དྲི་ཟས་བཟུང་ཿ དེ་ལྟར་བརྒྱད་ནི་ལྷ་དང་དྲི་ཟ་ཡིསཿ ནམ་མཁའ་ནས་འོངས་བཟུང་བས་མཁའ་སྤྱོད་ཟེརཿ ཀཱམཱུ་ཨོ་ཊི་གནོད་སྦྱིན་གྱིས་བཟུང་ཞིང་ཿ ཏྲི་ཤ་ཀུ་ནེ་དང་ནི་ཀོ་ས་ལཿ གནོད་སྦྱིན་འཁོར་གྱིས་བཟུང་བས་ཉོ་བའི་ཞིང་ཿ ཀ་ལིངྒ་དང་ལ་མྦཱ་ཀ་གཉིས་ནིཿ སྲིན་པོས་བཟུང་བས་ཚནྡྷོ་ཧ་
༼༡༧བ༽ཞེས་བཏགསཿ ཀཱཉྩི་ཧི་མ་ལ་སྲིན་པོའི་འཁོར་གྱིས་བཟུང་ཿ ཉེ་བའི་ཚནྡོ་ཧ་སྡེ་ས་སྤྱོད་དོཿ པྲེ་ཏ་པུ་རི་གྲི་ཧ་དེ་བ་ཏཿ ཀླུ་ཡིས་བཟུང་བས་འདུ་བའི་གནས་སུ་བཏགསཿ སཽར་ཥ་གསེར་གླེང་ཀླུ་འཁོར་ཉེ་བའི་འདུཿ ན་ག་ར་སིནྡྷུ་དུར་ཁྲོད་ལྷ་མིན་བཟུང་ཿ མ་རོ་ཀུ་ལུ་ཏ་ནི་ལྷ་མིན་འཁོརཿ ཉེ་བའི་དུར་ཁྲོད་ས་འོག་ཀླུ་དང་ནིཿ རི་རབ་ཁོང་གསེང་ནས་འོངས་ལྷ་མིན་གྱིསཿ བཟུང་བས་ས་འོག་ལ་སྤྱོད་ཅེས་སུ་གྲགསཿ དེ་དག་དྲེགས་པ་འཇིག་རྟེན་བདག་པོར་གྱུརཿ ཛམྦུ་གླིང་པ་རྣམས་ཀྱི་སྲོག་འཕྲོག་ཅིང་ཿ དགྲ་སྟྭ་ཏྲི་ཤུལ་ཁ་ཊྭཱཾ་མཚོན་ཆ་འཛིནཿ ལུས་ལ་དུར་ཁྲོད་ཆས་བརྒྱད་རུས་པར་བརྒྱནཿ རང་རང་ཆུད་མར་ལྷན་ཅིག་སྦྱོར་བའི་དུསཿ བདག་ཅག་རྣམས་ནི་བདེ་ཞིང་འགྲན་ཟླ་མེདཿ དཔོན་ཅིག་མེད་ན་ནང་འཐབ་ཕུང་སྟེ་འགྲོཿ བཟའ་བ་དང་ནི་བཏུང་བའི་སྒོ་འཕྲོག་པཿ འཐབ་པ་དང་ནི་རྩོད་པ་འགྱེད་པར་འགྱུརཿ སྟོབས་ཆེན་དབང་ཕྱུག་ཆེན་པོ་ལྷ་ཆེན་པོཿ ཐམས་ཅད་ལས་ཀྱིས་བསྐོས་པའི་སྒམ་བུ་ཕྱཿ མ་ཏུང་ཀ་རུང་དཔོན་བཅོལ་འཐད་ཅེས་གླེང་ཿ ངེད་རང་ཚོ་དང་ལྟ་སྤྱོད་མཐུན་པའི་ཕྱིརཿ འབྱུང་པོ་སྲོག་ཟན་ཐམས་ཅད་ཁ་འཆམ་ནསཿ ལུས་སམ་དག་གམ་འོན་ཏེ་ཡིད་ཀྱིས་ཀྱང་ཿ དཔོན་གྱི་བཀའ་ལས་ནམ་ཡང་མི་འདར་ཆདཿ
༼༡༨ན༽ལྷ་འདྲེ་ཡོངས་ཀྱི་དཔོན་པོ་དེ་བཞིན་ནོཿ ཐམས་ཅད་སྒམ་བུ་ཕྱ་ལ་རབ་ཏུ་འདུནཿ བགེགས་རྣམས་ཉིན་དང་མཚན་དུ་རྟག་པར་ཡང་ཿ མ་རུངས་དེ་ལ་སྲུང་བ་བྱེད་པར་གྱུརཿ འབྱུང་པོའི་ཚོགས་ཏེ་མི་མ་ཡིན་རྣམས་འདུཿ འཇིག་རྟེན་ཁམས་ལ་དབང་སྒྱུར་གསོན་པོར་ཟཿ ཉིད་གཡོག་ཡང་གཡོག་ཐམས་ཅད་བྲན་དུ་བཀོལཿ འཇིགས་བྱེད་སྟོབས་ཆེན་ཕ་རོལ་གནོན་པ་སྟེཿ དེ་དུས་སེམས་ཅན་ཤི་ཚད་དམྱལ་བར་འགྲོཿ འཇིག་རྟེན་དགེ་བར་གྲགས་རྣམས་གང་ཡོད་པཿ ད་ནི་ང་ཡིས་བརྗོད་པར་བྱའོ་ཟེརཿ ང་ལས་ཆེ་ཞིང་ལྷག་པ་སུ་ཞིག་ཡོདཿ ང་རྒྱལ་གཏུམ་པོའི་སྐད་འབྱིན་རབ་ཏུ་འཁྲུགསཿ མེ་དཔུང་འབར་ནས་རིག་པ་ངན་བསྐྱེད་དེཿ འབྱུང་པོ་ཀུན་གྱི་དབང་ཕྱུག་ང་ཡིན་པསཿ ང་ལས་ཆེ་བའི་དབང་ཕྱུག་གཞན་ཡོད་ནཿ དེ་ཡང་ང་ཡིས་དབང་དུ་བསྡུ་བ་ཡིནཿ ཞེས་པའི་ང་རྒྱལ་ཕྱོགས་བཅུར་བསྒྲགས་པ་ཡིསཿ དེ་དུས་འགྲོ་བའི་ཤེས་བློ་རྨོངས་པར་གྱུརཿ དུས་མཚན་མ་ཡིས་བདེན་པའི་ཚིག་འདི་བརྗོདཿ སྲིན་པོ་ལངྐའི་ཡུལ་གྱི་གྲོང་ཁྱེར་མཆོགཿ ཀོ་ཀ་ཐང་དམར་གླིང་གི་བྱན་ལག་ལྗོངསཿ རི་མ་ལ་ཡ་གནམ་ལྕགས་ཡོད་པའི་རྩེརཿ སྲིན་པོའི་རྒྱལ་པོ་ལངྐའི་མངའ་བདག་ཅེསཿ སངས་རྒྱས་མར་མེ་མཛད་ཀྱི་སློབ་མ་སྟེཿ ཁྱོད་བས་དེ་ཡི་གྲགས་
༼༡༨བ༽པ་རྣམ་པར་འཕེལཿ གཡུལ་འགྱེད་དགྲ་ཀུན་གྱིས་ཀྱང་མི་བརྫིའོཿ ཿབདེ་བར་གཉིད་ལོག་བདེ་བར་རབ་ཏུ་སདཿ དེ་སྐད་ཅེས་བརྗོད་ཐོས་མ་ཐག་ཏུ་ནིཿ འཇིགས་བྱེད་སྐད་ཅིག་གཅིག་ལ་དམག་སྡེར་བཅསཿ གཡུལ་འགྱེད་བྱ་བཞིན་མཁའ་ལ་འཕུར་ནས་སུཿ སྲིན་ཡུལ་བྱོན་ལག་ལྗོངས་པའི་རི་ལ་བབསཿ ང་རྒྱལ་གཏུམ་པོས་མ་ཏྲཾ་རཱུ་ཏྲ་བསྒྲགསཿ ལངྐའི་ཡུལ་རྣམས་ཤིགས་ཤིགས་ཡོམ་ཡོམ་གྱུརཿ སྲིན་པོ་སྲིན་མོ་ཐམས་ཅད་རབ་ཏུ་སྡངསཿ རྒྱལ་པོས་དེ་ལ་ཉུལ་པོ་བཏང་བ་ཡིསཿ འཇིགས་བྱེད་དམག་སྡེ་ལྟར་མི་བཟོད་པ་མཐོང་ཿ བརྗོད་གཞི་རྒྱལ་པོའི་སྙན་རུ་གསོལ་བ་ཡིསཿ ལངྐའི་བདག་པོས་མཉམ་གཞག་ཐུགས་དགོངས་བཏང་ཿ རྒྱལ་པོ་ཡོན་ཏན་འཛིན་གྱི་མདོ་ལས་ཀྱང་ཿ བླ་མའི་ཐུགས་དཀྲུགས་མཆེད་གྲོགས་ཡིད་བསད་པཿ སྲུལ་པོ་གཉའ་བྲག་ཕྲུག་གུ་རྟོག་འདོད་ཅནཿ ངན་སོང་གསུམ་ལས་ཚོ་ནི་འཕོས་གྱུར་པསཿ ལངྐའི་བདག་པོ་འཛོམས་པར་ཐེ་ཚོམ་མེདཿ མཐར་ནི་བདེ་བར་གཤེགས་པ་མང་པོས་འདུལཿ བླ་མེད་རྡོ་རྗེ་ཐེག་པའི་བསྟན་པར་བྱུང་ཿ ཞེས་གསུང་པ་ཡི་ལུང་བསྟན་ཅིག་འདུག་པསཿ ཡིན་ནམ་མ་ཡིན་ཉམས་སང་བྱ་རུ་ཡོང་ཿ རྒྱལ་པོས་སྲིན་པོའི་དམག་དཔུང་འཛོམ་པར་གཡུལཿ དམག་གིས་སྒམ་བུ་ཕྱ་ལ་
༼༡༩ན༽བརྡུགས་པར་གྱུརཿ ད་ནི་འགྲན་གྱི་ཟླ་མེད་གཅིག་པུར་ཆེཿ ང་ནི་དབང་ཕྱུག་མ་ཧཱ་དེ་བ་སྟེཿ རྒྱལ་ཆེན་རིགས་བཞི་ལ་སོགས་ང་ཡི་གཡོགཿ ལྷ་སྲིན་སྡེ་བརྒྱད་མ་ལུས་ང་ཡིས་བྲནཿ འཇིག་རྟེན་ཁམས་ཀྱི་བདག་པོ་ང་ཡིན་པསཿ སུ་ཞིག་ང་དང་འགྲན་གྱི་དོ་ཟླ་ཡོདཿ རཱུ་ཏྲ་མ་ཏྲ་མ་རཱུ་ཏྲཿ ཞེས་བརྗོད་སྲིན་པོའི་ཚོགས་རྣམས་དབང་དུ་བསྡུསཿ རྒྱལ་པོས་སངས་རྒྱས་བསྟན་པ་འཕེལ་བྱའི་ཕྱིརཿ ཁྱོད་ལ་བསྔོས་པར་གྱུར་པ་བདག་གནོད་འགྱོདཿ ཉིད་ཀྱི་འབངས་སུ་མཆིའོ་ངོ་མི་བཟློགཿ རྒྱལ་པོ་བཙུན་མོ་འཁོར་བཅས་མ་ལུས་དང་ཿ སྲིན་པོའི་རྒྱལ་ཁམས་དབང་དུ་བསྡུས་པའི་ཚེཿ སྲིན་པོའི་དེད་དཔོན་མ་ཏྲཾ་རཱུ་ཏྲ་ང་གྲགསཿ གང་གིས་དེ་མཐོང་ཐོས་མ་ཐག་ཏུ་འདུནཿ དེ་ནས་ཡང་ནི་ང་རྒྱལ་ཆེ་བར་རློམཿ བདག་ལས་ཆེ་བ་གང་དག་སུ་ཞིག་ཡོདཿ རཱུ་ཏྲ་མ་ཏྲཾ་མ་རཱུ་ཏྲཿ དུས་མཚན་མ་ཡིས་ཤེད་བསྐྱེད་ཚིག་འདི་བརྗོདཿ ཁྱོད་བས་ཆེ་བ་ལྷ་མ་ཡིན་གྱི་གནསཿ ལྷ་མིན་དེད་དཔོན་མཧཱ་ཀ་རུ་ཞེསཿ མཐུ་དང་རྫུ་འཕྲུལ་ཁྱད་པར་འཕགས་པ་ཡོདཿ འཇིགས་བྱེད་ཁམས་འཁྲུགས་མེ་དཔུང་ཆེན་པོར་གྱུརཿ འཕུར་རྩལ་མ་ཏྲཾ་ཀ་རུའི་གནས་སུ་བབསཿ ལྷུང་ཐབས་གྱུར་པའི་དད་པ་དབུགས་ཧམས་ནསཿ ཚ་གྲང་ནད་ཀྱིས་མཚོན་ཆར་
༼༡༩བ༽ཕབ་ནས་བསོདཿ ལུས་ཀུན་མེ་དཔལ་འབྲུམ་བུའི་ཟུག་རྔུས་གདུངསཿ ཤི་མ་གསོན་དེའི་རྐང་པ་གཡས་ནས་འཇུསཿ ཛམྦུའི་གླིང་དུ་ཀླད་ཀོར་བསྐྱུར་བཏང་བསཿ དགེ་གནས་བརྒྱད་ཀྱི་ཡུལ་དུ་ཆགས་པར་གྱུརཿ གསང་བའི་བྱན་མོ་བུ་འཁོར་བཅས་པ་རྣམསཿ གཟའ་བརྒྱུད་རྒྱུ་སྐར་ཉི་ཤུ་རྩ་བརྒྱད་དང་ཿ ལོག་པར་འདྲེན་པའི་བགེགས་རིགས་ཇི་སྙེད་པཿ གང་གི་སྐྱབས་སུ་བྲོས་ཀྱང་མཐར་ཏེཿ སླར་ཡང་ཐམས་ཅད་འཇིགས་བྱེད་དྲུང་དུ་འདུསཿ ལྷ་མིན་ཀུན་གྱིས་སྲིད་བརླག་བསྐོས་བཏབ་ནསཿ བམ་རི་ཐོད་པ་མཁར་ཞེས་བྱ་བར་འཁྲིསཿ ཕོ་བྲང་བདུད་ཀྱི་རྒྱལ་མཚན་ཕུགས་སུ་བཙུགསཿ སྐྲག་པའི་བདུད་མཚོན་སྒོ་ཡི་མདུན་དུ་ཕྱརཿ འཁོར་སའི་འཕྲུལ་ཆ་མང་པོས་བསྐོར་ནས་སུཿ རྫུ་འཕྲུལ་རི་རབ་མཛུབ་མོའི་རྩེ་ལ་བཞགཿ ཀླད་ལ་སྐོར་ཞིང་ང་རྒྱལ་སྒྲོགས་པ་ནིཿ རཱུ་ཏྲ་མ་ཏྲཾ་མ་རཱུ་ཏྲཿ སྲིད་པ་འདི་ནང་བས་སུ་ཞིག་ཆེཿ དུས་མཚན་ཆེ་བའི་ཟླ་ཡོད་འགྲན་བཙུགས་པཿ སུམ་ཅུ་རྩ་གསུམ་དཔའ་ལྡན་ལྷ་ཡུལ་ནཿ གསེར་འདྲ་ཉན་ཐོས་དགེ་འདུན་རྣམས་ཀྱི་དབུསཿ རྣམ་འདྲེན་དམ་པ་ཏོག་དཀར་ཞེས་བྱ་བཿ དབང་བསྐུར་ཐོབ་པ་ལྷ་རྒྱལ་ཀུན་གྱིས་བསྟོདཿ སིལ་སྙན་མང་པོ་གླུ་དབྱངས་སྒྲས་བསྐུལ་ནསཿ ཐམས་ཅད་མ་ལུས་
༼༢༠ན༽འདུད་པ་དེ་ཆེའོཿ དེ་སྐད་སྨྲས་པས་གཏུམ་རྔོམས་ཤིན་ཏུ་ཁྲོསཿ མི་སྡུག་བཞིན་བསྡུས་གཟུགས་བསྐྱོད་གཏུམ་རྔམས་འབརཿ མི་སྙན་ཚིག་འབྱིན་སྒྲ་དང་ས་གཡོས་བཅསཿ དམ་པ་ཏོག་དཀར་ཆོས་སྟོན་མཐོ་བ་ནསཿ པང་པས་འུབ་བསྡུས་མི་མཛད་འཇིག་རྟེན་དེརཿ མཆོག་ཆེན་ཉན་ཐོས་རྣམས་ཀྱིས་ཞི་བར་སྨྲསཿ ཀྱེ་མ་ཀྱི་ཧུད་སྡིག་པ་འདི་ལྟ་བུཿ རུང་ངམ་དགེ་བའི་ལས་ལ་འདུན་བརྗོད་པསཿ གོས་ཟུང་བཞི་གྱོན་རང་རང་བདེ་བར་འདུགཿ ཁྱོད་ཀྱི་དབང་དུ་ང་འགྱུར་ག་ལ་སྲིདཿ ང་ནི་སྟོབས་ཆེན་དཔའ་བོ་ཡིན་ནོ་ཟེརཿ དེ་ནས་དམ་པ་ཏོག་དཀར་འདའ་ཚུལ་བསྟནཿ འཁོར་རྣམས་ཀུན་ལ་མི་ཕྱེད་དང་བས་བརྗོདཿ ཀྱེ་མ་ང་ཡི་མཆོག་ཆེན་ཉན་ཐོས་རྣམསཿ སངས་རྒྱས་བསྟན་པ་འདི་ལ་མ་དད་པཿ སློབ་མ་དམ་ཉམས་ཐར་པ་ནག་པོ་འདིཿ འདིས་ནི་ལྷ་དང་མི་དང་ལྷ་མ་ཡིནཿ ཡང་དག་མ་ཡིན་ཡོངས་སུ་བསྡུ་བར་འགྱུརཿ རྫོགས་སངས་རྒྱས་ལ་སྡང་སེམས་འཇིག་རྟེན་ཕུད་ཿ དེ་ཡིས་ཉེས་པ་ཐམས་ཅད་འཕྲོག་བྱེད་པཿ ཐུབ་དཀའ་གཞོན་ནུ་དོན་ཕག་གཉིས་ཀྱིས་ནིཿ ཚེ་འདིར་རྣམ་སྨིན་གློ་བུར་བསྐྱེད་པར་འགྱུརཿ ཞི་བ་དང་ནི་རྒྱས་པས་མི་ཐུལ་བསཿ དབང་དང་དྲག་པོའི་ལས་ཀྱིས་འདུལ་བར་འགྱུརཿ འཕགས་པའི་བདེན་པར་སུ་
༼༢༠བ༽དག་ཡིད་མི་ཆེསཿ ལུས་ཀྱང་སྦྱིན་པར་ཡིད་ལ་བྱས་ནས་ནིཿ མཁའ་ལྟར་ཡས་འབེབས་ཐབས་མང་རྒྱལ་བས་འདུལཿ དམ་རྫས་དགེ་བར་བསྒྲུབ་པའི་ཨ་མྲྀ་ཏཿ སྨན་རྣམས་བདུད་རྩིར་བསྒྱུར་བ་འདི་ལས་འབྱུང་ཿ འདི་ཉིད་རྡུལ་ཕྲན་གཅིག་ཙམ་མ་ལུས་འདུལཿ མི་མཐུན་གཉེན་པོ་རྡོ་རྗེ་རྟ་མགོ་ཅནཿ དན་ཕག་ལག་ན་རྡོ་རྗེ་དེ་བཞིན་གཤེགསཿ དགོངས་ཏེ་ཐུབ་དཀའ་རྡོ་རྗེ་སེམས་དཔའ་ཆེཿ རྒྱལ་བའི་ལུང་བསྟན་མཆོག་འདི་དེ་ལྟར་བལྟཿ ཕ་རོལ་དགྲ་ནི་ཡང་དག་ཟད་པར་བྱེདཿ ང་ནི་ལྷ་མོ་སྒྱུ་འཕྲུལ་ལྷུམས་སུ་འཇུགཿ བྱང་ཆུབ་ཤིང་དྲུང་ང་ནི་མཉམ་པར་འཇོགཿ དེ་ལྟར་དེ་དག་རྟག་འཛིན་མི་བྱེད་པརཿ དེ་བས་ཐུབ་པའི་བསྟན་པ་མཆོག་ཏུ་གསུངསཿ སེམས་ཅན་ཀུན་ལ་བདེ་བ་སྦྱིན་པར་བྱེདཿ ཛམྦུའི་གླིང་འདིར་ཡུན་རིང་གནས་པར་འགྱུརཿ སྤྱོད་པ་ཟབ་མོ་སྦྱོར་སྒྲོལ་ཕུལ་ཕྱིན་གྱིསཿ ལུས་ཀྱི་བདག་འཛིན་མ་ཏྲཾ་རཱུ་ཏྲ་བསྒྲལཿ འཇིག་རྟེན་བདེ་དང་མི་བདེའི་རྣམ་པ་ཀུནཿ ངག་གི་བདག་འཛིན་ཨ་ཀར་ཤ་རཱུ་ཏྲཿ ངོ་བོ་གང་ལ་གང་གིས་ཅི་ཞིག་བསྟནཿ སེམས་ཀྱི་བདག་འཛིན་ཁ་ཊྭཾ་ག་རཱུ་ཏྲཿ རཱུ་ཏྲའི་ངོ་བོ་ངེས་ཚིག་དབྱེ་བ་གསུངསཿ རཱུ་ཏྲ་གསང་བ་ཕྱི་ནང་ཁོ་ན་ཉིདཿ རཱུ་ཏྲ་ལྔ་བཅུ་རྩ་བརྒྱད་སྡེ་དཔུང་བཅོམཿ ཛམྦུའི་གླིང་དེ་ཉམས་ཀྱང་དགའ་བར་
༼༢༡ན༽འགྱུརཿ དཀོན་ཅོག་ཟབ་མོའི་ཆོས་ཀྱིས་ཡུལ་ཁམས་སྐྱོང་ཿ ཆོས་བསྟེན་མི་ནུབ་མྱ་ངན་ཡོངས་མི་འདའཿ ཞེས་པའི་ཞལ་ཐེམས་བཞག་ནས་ལྷུམས་སུ་ཞུགསཿ དེ་ནས་རཱུ་ཏྲའི་མངོན་ཤེས་ཕྲ་འུས་མཐོང་ཿ ལྷ་ཆེན་དགའ་རབ་དབང་ཕྱུག་གཤེད་དུ་བསྐོསཿ དགའ་ལྡན་ལྷ་ཡུལ་ཐམས་ཅད་དབང་དུ་བསྡུསཿ ཚངས་པ་བརྒྱ་བྱིན་ལྷ་ཡི་ཁ་གནོན་བཞགཿ མ་ལ་ཡ་གནས་བམ་རི་ཐོད་མཁར་བཟུང་ཿ མི་ཡི་ལུས་སུ་གནས་ཚད་ཟས་སུ་ཟཿ རྔ་གླིང་རོལ་མོའི་དབྱངས་སྒྲ་སྣ་ཚོགས་དང་ཿ གླུ་དང་གར་རྣམས་བྱེད་ཅིང་ཐམས་ཅད་གནསཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་པ་ལསཿ གདུལ་ཞིང་རཱུ་ཏྲའི་སྐྱེ་རྒྱུད་བསྟན་པའི་ལེའུ་སྟེ་ལྔ་པའོཿ ཿཐ་ཐ་ཉྲ་རྒྱ་རྒྱཿ