ཤོག་གྲངས་ ༤༠༡ ནས་ ༥༠༠ བར།
བསྲེག་མི་རུང་བ་ལྟ་བུ་དང་། ད་ལྟའི་དངོས་པོ་ནི་སྐད་ཅིག་གིས་འཇིག་ཅིང་མི་གནས་པས་སྦྱང་གཞི་མི་དགོས་ལ། མ་འོངས་པའི་འབྱུང་འགྱུར་གྱི་སྐྱེ་འཆི་བར་དོ་༸གསུམ་སྦྱང་གཞི་ཡིན་ཏེ། དེ་བསྒོམ་ན་སྐྱེ་འཆི་བར་དོ་གསུམ་འབྱུང་རྒྱུ་ལ་བྷོ་པས། དེ་གསུམ་གྱིས་ཚབ་ཏུ་སྐུ་གསུམ་འབྱུང་བར་འགྱུར་ལ། དེ་ཡང་མངལ་སྐྱེས་སྦྱོང་བྱེད་དེ་དང་མཚུངས་པར་བསྒོམ་དགོས་ལ། མ་དག་པའི་ལས་ཉོན་ལས་གྲུབ་པའི་ཕུང་ཁམས་འདི་ལྷར་བྷེ་ཡང་ལྷར་མི་འགྱུར་བར། སོལ་བ་བརྡར་བས་དུང་མི་འབྱུང་བ་དང་འདྲ་བར་སྦྱང་གཞི་དེ་ཉིད་ལྷར་བྷོ་པ་ཡང་མིན་ཟེར་རོ། །དེ་ལ་མཁས་པ་དག་གིས་རིག་པའི་མདའ་འཕེན་པར་མཛད། འོ་ན་མ་འོངས་པའི་སྐྱེ་འཆི་བར་དོ་སྦྱངས་བ་ཡང་ད་ལྟ་སྦྱང་གཞི་མ་བྱུང་བའི་ཕྱིར། སང་ཕོད་སྐྱེ་རྒྱུའི་བུད་ཤིང་ད་ལོ་མེས་བསྲེག་ཏུ་མི་རུང་བ་དང་མཚུངས། ཞེས་སོགས་གནོད་བྱེད་དུ་མ་འབྱུང་ངོ་། །འཛམ་བུའི་གླིང་དུ་མངལ་སྐྱེས་སུ་སྐྱེ་འགྱུར་ཞིག་མ་གཏོགས་སྐྱེ་བ་གཞན་དུ་སྐྱེ་འགྱུར་གྱིས་དེ་བྷེ་པ་དོན་མེད་ཟེར་བ་ཞིག་ཏུ་ཡང་འགྱུར་རོ། །དེ་ལྟར་ལུགས་དེ་གཉིས་ཀས་ཕུང་ཁམས་སྐྱེ་མཆེད་རང་བཞིན་གྱིས་དག་པའི་ལྷ་མ་ཡིན་པར་འདོད། དེ་ནི་རྒྱུད་རྣམས་
དང་མི་མཐུན་ཏེ། རྣལ་འབྱོར་མ་ཀུན་ཏུ་སྤྱོད་པའི་རྒྱུད་ལས། དེ་ལ་རེ་ཞིག་རྣལ་འབྱོར་གྱི་དབང་ཕྱུག་གིས་ཕུང་པོ་ལྔའི་ང་རྒྱལ་བསྐྱེད་པར་བྱ་སྟེ། གཟུགས་ཀྱི་ཕུང་པོ་རྣམ་པར་སྣང་མཛད་དོ། །ཞེས་པ་ནས་དེ་ལྟར་ཕུང་པོ་དང་ཁམས་དང་སྐྱེ་མཆེད་རྣམས་ལ་ང་རྒྱལ་བསྐྱེད་པར་བྱའོ། །ཞེས་སོགས་ཕུང་ཁམས་སྐྱེ་མཆེད་རྣམས་ཀྱིས་ཆོས་སོ་བདུན་ལྷ་སོ་བདུན་དང་། སྐུ་དང་བ་སྤུའི་ཀེང་རུས་ཆེན་པོའོ། །ཞེས་སོགས་ལུས་ཀྱི་ཁམས་ཉེར་བཞི་དཔའ་བོ་ཉེར་བཞི་དང་། ལུས་ཀྱི་རྩ་ཁམས་དཔའ་བོ་དང་དཔའ་མོ་ཉེར་བཞིའི་ངོ་བོར་གསུངས་ལ། །ལུ་ཧི་པ་དང་ནག་པོ་པ་དང་དྲིལ་བུ་པ་གསུམ་ཀས། རྒྱུད་ཚིག་ཇི་ལྟར་ཕུང་ཁམས་ལྷར་བསྒོམ་ཚུལ་གསུངས་སོ། །དེ་ནས་ཕུང་ཁམས་སོགས་དག་པར་གསུངས་པ་རང་བཞིན་གྱི་ཕུང་ཁམས་རྣམ་པར་དག་པ་ལ་དགོངས། མ་དག་པར་གསུངས་པ་ནི་བློ་བུར་གྱི་དྲི་མ་ལ་དགོངས་པས། ཕུང་ཁམས་སོགས་དངོས་པོ་ཐམས་ཅད་རང་བཞིན་གྱི་རྣམ་པར་དག་ཀྱང་། གློ་བུར་གྱི་དྲི་མ་ཐམས་ཅད་སྦྱང་ཕྱིར་ལྷར་བྷེ་པ་ཡིན་པར་ཤེས་པར་བྱའོ། །ཡང་ཕུང་ཁམས་སྦྱང་གཞི་ཡིན་ཡང་ཕུང་ཁམས་སྦྱང་གཞི་ཉིད་ལྷར་བྷོ་པ་མ་ཡིན་ཟེར་བ་ཡང་མི་འཐད་པའི་ལུང་ནི། རྣམ་
བཞག་རིམ་པ་ལས། ཡང་འདི་ལྟར་ཕུང་པོ་དང་སྐྱེ་མཆེད་རྣམས་ཐོག་མ་མེད་པ་ནས་ཐ་མལ་པའི་ང་རྒྱལ་གྱིས་གནས་པ་རྣམས་ནི། ད་ལྟར་དེ་བཞིན་གཤེགས་པ་རྣམས་ཀྱིས་རྡུལ་ཕྲ་རབ་ལས་གྲུབ་པའི་ངོ་བོ་ཉིད་དུ་བསྟན་ཏེ། ཞེས་དང་། སྒྲུབ་ཐབས་མདོར་བྱས་ལས། རྣམ་པར་སྣང་མཛད་ཀྱི་ས་བོན་ནི། ཁ་དོག་དཀར་པོ་ཡི་གེ་ཨོཾ། །གཟུགས་ཕུང་ངོ་བོ་ཉིད་ཀྱིས་ནི། །སྔགས་ཤེས་པས་ནི་སྤྱི་བོར་འགོད། །ཅེས་སོགས་གསུངས་པ་དང་། ཕུང་ཁམས་སོགས་ཐ་མལ་དུ་འཛིན་པའི་གཞི་ཐམས་ཅད་ལྷར་བསྒོམས་པས་ལྷར་འཚར་ཞིང་ཀུན་རྫོབ་རང་བཞིན་རྣམ་དག་གི་ལྷ་ཡིན་ནོ། །དེ་ནས་ཐ་མལ་པའི་ཕུང་པོ་ཁམས་དང་སྐྱེ་མཆེད་གཟུང་འཛིན་ཀུན་རྫོབ་ཆ་ཐམས་ཅད་ལྷའི་ངོ་བོའི་རང་བཞིན་གྱིས་རྣམ་པར་དག་པས་ལྷར་འགྱུར་བའི་གཞི། དེ་ཐ་མལ་དུ་གཟུང་བས་སྦྱང་དགོས་པའི་གཞི་སྟེ། སྦྱང་གཞིའོ། །དེའི་དོན་གསང་འདུས་རྩ་རྒྱུད་ལས། མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་གྲགས། །རྡོ་རྗེ་སྐྱེ་མཆེད་ཉིད་དག་ཀྱང་། །བྱང་ཆུབ་སེམས་དཔའི་དཀྱིལ་འཁོར་མཆོག །ས་ནི་སྤྱན་ཞེས་བྱ་བར་བརྗོད། །ཆུ་ཡི་ཁམས་ནི་མཱ་མ་ཀཱི། །གོས་
དཀར་མོ་དང་སྒྲོལ་མ་ནི། །མེ་དང་རླུང་དུ་རབ་ཏུ་གྲགས། །གཟུགས་སྒྲ་ལ་སོགས་བསྔགས་པ་ཡིས། །ལྷ་ཉིད་དུ་ནི་རྟག་ཏུ་བྷེ། །ཞེས་དང་། དེའི་དོན་ཟབ་མོ་ནང་དོན་ལས། །ཕུང་པོ་སངས་རྒྱས་ལྔ་ཡིན་ཏེ། །ཁམས་བཞི་རིགས་བཅས་ལྷ་མོ་ལྔ། །ཞེས་སོགས་གསུངས་པ་དང་། རྒྱུད་ཀྱི་རྒྱལ་པོ་པདྨ་ཟབ་པ་ལས། འདི་ནི་རང་གི་ཕུང་པོ་ལ་བྷེ། ཞེས་བཀའ་བསྩལ་པ་དང་། ཁྱད་པར་ཕུང་པོ་ལྔ་ཡི་བདག །ཅེས་སྟོན་པས་སྤྱན་རས་གཟིགས་ལ་བཀའ་བསྩལ་པ་དང་། པདྨ་རྒྱལ་པོའི་རྒྱུད་ལས། །ཕུང་པོ་ལྔ་ཡི་དབྱེ་བ་ཤེས། །སངས་རྒྱས་ལྔ་ཡི་འབྲས་བུ་ལ། །ཡེ་ཤེས་ལྔ་ཡི་རྒྱས་ཐེབ་པ། །ལུས་ནི་དབེན་པར་གནས་པ་ཡིན། །ཞེས་གསུངས་སོ། །མི་ཐུབ་ཟླ་བས། གཟུགས་ཁམས་རྡོ་རྗེ་མ་ཡིན་ཏེ། །ཞེས་སོགས་དང་། དམ་པའི་དོན་དུ་ཕུང་པོ་མེད། །ཅེས་གསུངས་པས་ཕུང་པོ་དེ་དག་དོན་དམ་པར་མེད་ཀྱང་ཀུན་རྫོབ་སྦྱང་གཞིའོ། །སྣང་བ་བདེན་པར་འཛིན་པའམ། རྟག་ཙམ་དུ་འཛིན་པའི་གཟུགས་ཚོར་བ་སྣང་བ་རང་གར་འཛིན་ཅིང་། ལྷའི་ངོ་བོ་མ་ཤེས་པ་ཐམས་ཅད། འཁོར་བར་འཆིང་བའི་རྒྱུ་ཡིན་པས། འཆིང་བ་དང་སོ་སོ་དེ་དང་དེར་ཞེན་པས་མཚན་
རྟོག་དང་། ཐུན་མོང་གི་སྐབས་སུ་བདེན་འཛིན་ལ་ཉོན་སྒྲིབ་དང་། འདི་ལ་ཤེས་སྒྲིབ་ཏུ་འཇོགས་པས་ཤེས་སྒྲིབ་དང་། མྱང་འདས་འཆིང་བར་བྱེད་པས་དུག་ཅེས་དང་། དངོས་པོ་ཙམ་ལས་རྣམ་པར་རྟོག་པས་དངོས་པོའི་རྣམ་རྟོག་དང་། ཐ་མལ་དུ་འཛིན་པས་ཕལ་པའི་གནས་སྐབས་དང་། མི་གཙང་བའི་ཚད་ཅེས་མིང་མང་ཡང་དོན་དངོས་པོའི་འཆིང་བ་སྟེ། སྦྱང་བྱ་ཡིན་ལ་ཡུལ་གྱི་རྣམ་རྟོག་སྦྱང་གཞི་དང་། ཡུལ་ཅན་གྱི་རྣམ་རྟོག་སྦྱོང་བྱེད་ཡིན་པ་ཡང་མི་འགལ་ལོ། །རྣམ་ཐར་སྒོ་གསུམ་བྱང་ཕྱོགས་སོ་བདུན་ཡེ་ཤེས་ལྔ་སོགས་ཆོས་སྐུའི་ཡོན་ཏན་རྣམས་དང་། རིགས་ལྔ་ཡུམ་བཞི་ཌཀི་ལྔ་སོགས་གཟུགས་སྐུའི་ལྷ་ཚོགས་ཐམས་ཅད་སྦྱོང་བྱེད་ཡིན་ནོ། །སྦྱང་ཚུལ་ལ་ནི་གཉིས་ཡོད་དེ། རྣལ་འབྱོར་པའི་ཕུང་ཁམས་སྐྱེ་མཆེད་ཐ་མལ་པའི་ངོ་བོ་ཡེ་ཤེས་ཚོགས་བསགས་སྐབས་སུ་དངོས་པོ་སྟོང་ཉིད་སྦྱང་བའི་སྟོང་ཉིད་དེ་དང་། སེམས་གསལ་བ་གཉིས་ཐ་མི་དད་པའི་གསལ་སྟོང་ཟུང་འཇུག་ལ་མཉམ་པར་བཞག་ནས། ཐུན་མཚམས་ཏིང་ངེ་འཛིན་དེ་ལས་ལངས་བ་ན། ཐ་མལ་པའི་སྣང་བ་འཆར་དུ་མི་བཅུག་པར། དཀྱིལ་འཁོར་དང་ལྷའི་ངོ་བོར་བྷེ་ནས། དེ་ཀུན་རྫོབ་ཀྱི་
སྣང་བ་དང་དབྱེར་མེད་དུ་བྷོ་པ་ནི། མཉམ་བཞག་གི་རྣལ་འབྱོར་གྱིས་སྦྱང་ཚུལ་ཡིན་ལ། མཉམ་བཞག་ལས་ལངས་ནས་རྗེས་སྤྱོད་ལམ་གྱི་ཚེ་སྣང་བའི་དངོས་པོ་ལ་བག་ཆགས་གོམས་པས་ཐ་མལ་དུ་འཛིན་པ་སྐྱེས་ཙམ་ན། དེ་དྲན་པས་བཟུང་ནས་འདི་ནི་ལྷ་ཡིན་ནོ་སྙམ་དུ་བསྒོམས་པས་བོགས་དབྱུང་བ་ནི་རྗེས་སྤྱོད་ཀྱི་རྣལ་འབྱོར་གྱིས་སྦྱང་ཚུལ་ཡིན་ཞིང་། མཉམ་རྗེས་གཉིས་སྦྱང་གཞི་གཅིག་པས་སྦྱང་ཚུལ་རྣམ་རྟོག་སྤངས་བར་གཅིག་གོ །དེ་ཡང་ཕུང་ཁམས་སྐྱེ་མཆེད་ལ་ལྷའི་ང་རྒྱལ་བྷེ་པ་དང་། ཡེ་ཤེས་ཚོགས་བསགས་སྐབས་སུ་ངའོ་ཞེས་པའི་དོན་བདེན་གྲུབ་ལ་ང་རྒྱལ་འཇོག་པ་ནི་མ་ཡིན་ལ། ལྟ་བས་བདེན་འཛིན་གྱི་དྲི་མ་སྦྱངས་ཏེ་ཀུན་རྫོབ་སྣང་ཚུལ་ཙམ་དུ་ཐ་མལ་གྱི་རྣམ་རྟོག་སྣ་ཚོགས་སྤངས་ཕྱིར་ལྷ་བྷེ་སྟེ། ཀྱེ་རྡོར་ལས། དག་པས་དུག་མེད་བྱས་ནས་ནི། །བརྟན་བྱ་འདི་དག་བརྟན་པ་ཉིད། །ཅེས་གསུངས་པ་ཀུན་ཏུ་བརྟག་པ་བདག་འཛིན་གྱི་དུག་ལྟ་བས་སྦྱོང་བར་བྱེད། ཀུན་ཏུ་བརྟག་པ་ཐ་མལ་གྱི་རྣམ་རྟོག་བསྐྱེད་རིམ་གྱི་སྤངས་བར་བྱེད་པའོ། །ཡེ་ཤེས་ཀྱི་ཚོགས་བསགས་པ་ནི། སྔགས་དོན་ངའོ་ཞེས་པའི་ང་ནི་གཞི་ལམ་འབྲས་བུ་གསུམ་གྱི་སྐབས་ཐམས་ཅད་དུ་གསལ་སྟོང་ཟུང་འཇུག་
ཡོད་པ་དེ་ཉིད་ཡིན་ཏེ། བརྟག་གཉིས་ལས། ང་ལས་འགྲོ་བ་ཐམས་ཅད་འབྱུང་། །ང་ལས་ཁམས་གསུམ་པོ་ཡང་འབྱུང་། །ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །ཞེས་དང་། དངོས་དང་དངོས་པོ་མེད་པ་དང་། །དངོས་པོ་རྟོགས་ཕྱིར་སངས་རྒྱས་དང་། །གང་གིས་ལེ་ལོས་བསྣུན་པ་དང་། །རྨོངས་པ་ཎྜིགང་གིས་ང་མི་ཤེས། །ཞེས་གསུངས་སོ། །དེ་ཡང་རང་བཞིན་རྣམ་དག་སྟོང་ཉིད་ལ། ཁྱད་གཞིར་བྱས་ཏེ། ངའོ་སྙམ་པའི་འཛིན་སྟོང་བསྣན་པ་མ་ཡིན། སྣང་བ་ཐམས་ཅད་སྟོང་པར་སྦྱངས་ནས་ཅི་ཡང་མེད་པར་བསམ་པ་ཡང་མ་ཡིན་པར། སྟོང་པ་དང་གསལ་བ་ལ་དབྱེར་མེད་པར་མཉམ་པར་བཞག་པའོ། །སྐབས་འདི་ཡི་ང་དང་ཕར་ཕྱིན་ཐེག་པར་གསུངས་པའི་ང་དོན་མི་གཅིག་སྟེ། ཕར་ཕྱིན་ཐེག་པར་ང་དང་བདག་མེད་པར་རྒྱ་ཆེར་གསུངས་ལ། འདིར་ང་ཡོད་པ་ལྟར་གསུངས་ཏེ། །འདིའི་དོན་མདོ་སྡེ་མྱ་ངན་འདས་ཆེན་ལས་རྒྱ་ཆེར་གསུངས་ཏེ། སོ་སོའི་སྐྱེ་བོ་རྣམས་བདག་ཆེན་པོ་དང་ཆུང་ངུ་དང་། མཐེ་བོང་ཙམ་དང་ཏིལ་ཙམ་དང་ཁྲེ་ཙམ་དང་། མི་བདེན་སྒྱུ་མར་འཛིན་པ་སོགས་ཡང་དག་མ་ཡིན། འཇིག་རྟེན་ལས་
འདས་པའི་བདག་གི་མཚན་ཉིད་ནི་སངས་རྒྱས་ཀྱི་རང་བཞིན་ཞེས་བྱ་བ་སྟེ། དེ་ལྟར་བདག་ཏུ་འཛིན་པ་ནི་ཤིན་ཏུ་མཆོག་ཅེས་པའོ། །ཞེས་དང་། དཀོན་མཆོག་གསུམ་གྱི་མཚན་ཉིད་ནི། །བདག་ཅེས་བྱ་བའི་མཚན་ཉིད་དོ། །བདག་དང་སངས་རྒྱས་རང་བཞིན་ཉིད། །གང་གིས་མངོན་སུམ་རྟོགས་གྱུར་ན། །དེ་བཞིན་གཤེགས་པའི་སྙིང་པོ་ཉིད། །སྐྱེས་བུ་དེ་ཡིས་རྟོགས་གྱུར་རོ། །ཞེས་དང་། སངས་རྒྱས་ཀྱི་རང་བཞིན་ལ་ལམ་དབུ་མ་མཐའ་གཉིས་དང་ཡོངས་སུ་བྲལ་བ་ཡིན་པར་རིག་པར་བྱའོ། །རིགས་ཀྱི་བུ་བདག་ཅེས་བྱ་བ་དང་བདག་མེད་ཅེས་བྱ་བར་རང་བཞིན་གྱིས་གཉིས་སུ་མེད་པར་ཁྱེད་ཀྱིས་དེ་ལྟར་བཟུང་དུ་བཟུང་ལ་སྤྱི་བོས་ལོངས་ཤིག །ཅེས་དང་། ངས་སྔོན་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོའི་མདོ་ལས་ཀྱང་། བདག་དང་བདག་མེད་པ་གཉིས་མཚན་ཉིད་ཀྱིས་གཉིས་སུ་མེད་པར་བསྟན་ཏོ། །ཞེས་གསུངས་ཤིང་། དཔེར་ན་རྒྱལ་པོའི་བུ་གཅིག་ལ་རལ་གྲི་བཟང་པོ་ཡོད་པ་མི་གཅིག་གིས་ཁྱིམ་དུ་བྱུང་བ་མི་དེས་མཐོང་ནས་རྒྱལ་བུ་ཡུལ་གཞན་དུ་སོང་བ་དང་། མི་དེ་རལ་གྲི་ལ་སེམས་ཆགས་ནས་གཉིད་ཁུངས་སུ་རལ་གྲི་རལ་གྲི་ཟེར་བས་དེ་བློན་པོས་བཟུང་
ནས་རྒྱལ་པོ་ལ་གཏད་ནས་རལ་གྲི་ག་རེ་གསུངས་པས། དེས་ང་ལ་རལ་གྲི་མེད་དེ་མཐོང་བས་འཁྲུལ་ལོ་ཞུས་སོ། །རལ་གྲི་དེ་ཅི་འདྲ་གསུངས་པས། རྭ་རུ་འདྲའོ་ཟེར་བས་དེ་འདྲ་མི་སྲིད་གསུངས། རྒྱལ་པོས་བློན་པོ་རྣམས་ལ་རལ་གྲི་དེ་མཐོང་ངམ་དྲིས་པས་ཤིའོ། །དེའི་རྒྱལ་ཚབ་ཀྱིས་རྒྱལ་པོ་བྱས་ནས་བློན་པོ་རྣམས་ལ་མཛོད་དུ་རལ་གྲི་དེ་འདྲ་མཐོང་ངམ་གསུངས་པས། མཐོང་ལགས་རྭ་རུ་འདྲའོ་ཟེར་པས་དེ་འདྲ་མི་སྲིད་གསུངས། དེ་བཞིན་དུ་རྒྱལ་པོ་རབས་བཞིའི་བར་དུ་རལ་གྲིའི་ཁུངས་མ་ཆོད་ཕྱིས་བྲོས་པའི་རྒྱལ་བུ་དེ་བྱུང་ནས་རྒྱལ་པོ་བྱས། རལ་གྲི་མཐོང་ངམ་ཅི་འདྲ་དྲིས་པས། བློན་པོ་རྣམས་ལ་ལས་ཨུཏྤལ་འདྲའོ། །རྭ་རུ་འདྲའོ། །མེ་དཔུང་འདྲའོ། །སྦྲུལ་ནག་འདྲའོ། །སོ་སོར་ཟེར་བས། རྒྱལ་པོ་བཞད་ནས་ངའི་རལ་གྲི་ཁྱེད་རྣམས་ཀྱིས་མ་མཐོང་ངོ་ཟེར། དེ་བཞིན་བྱང་ཆུབ་སེམས་དཔའ་བྱོན་ནས་བདག་གསུངས་པ་ནི་རལ་གྲི་ཐོག་ནས་བྲོས་པ་ལྟ་བུའོ། །མི་རྣམས་བདག་ཡོད་ཟེར་བ་གཉིད་རྡོལ་བ་ལྟ་བུ། བདག་དེ་ཅི་འདྲ་སྨྲས་ན་མཐེ་བོང་ཙམ་དང་ཁྲེ་ཙམ་དང་ཏིལ་འབྲུ་ཙམ་ཡོད་ཟེར། ཁ་ཅིག་སེམས་ལ་གནས་ཏེ་ཉི་མ་ལྟར་འབར་ཞིང་གསལ་ཟེར་བ་བློན་
པོ་རྣམས་རྫུན་སྨྲ་བ་ལྟ་བུའོ། །དེ་ལྟར་རྫུན་དེ་རྣམས་གསལ་ཕྱིར་བདག་མེད་པར་གསུངས། སངས་རྒྱས་ཀྱི་རང་བཞིན་རལ་གྲི་ལྟ་བུ་ཞེས་སོགས་རྒྱ་ཆེར་དཔེ་དུ་མ་ནས་གསུངས་སོ། །འདི་དང་རྗེ་རང་བྱུང་བའི་ཆོས་དབྱིངས་སྟོད་འགྲེལ་དོན་མཐུན་པར་སྣང་ངོ་། །དེས་ན་དོན་དམ་ཆོས་སྐུ་དེ་ལ་དམ་པའི་བདག་ཅེས་པའི་ཐ་སྙད་མཛད། འདི་ལ་ས་སྐྱ་པ་དང་བཀའ་བརྒྱུད་རིན་པོ་ཆེའི་དགོངས་པ་གཅིག་པར་སྣང་ངོ་། །དེ་ཡང་མདོར་བསྡུས་ན་གཟུགས་ཕུང་ནི་སྦྱང་གཞི། རྣམ་སྣང་སྤྱན་རས་གཟིགས་ནི་སྦྱོང་བྱེད། གཟུགས་ཕུང་ལྷར་མ་ཤེས་པར་གཟུགས་ཕུང་དུ་འཛིན་པ་ནི་སྦྱང་བྱ། གཟུགས་ཕུང་རྒྱལ་བ་རྒྱ་མཚོར་ཤེས་ནས་དེའི་སྐུར་སྒོམ་པ་སྦྱང་ཚུལ། དེ་བྷེ་པས་གཟུགས་ཕུང་གཙོ་བོ་སྤྱན་རས་གཟིགས་སུ་གནས་གྱུར་པ་སྦྱངས་འབྲས་ཏེ་ཐམས་ཅད་དེས་འགྲེས་སོ། །སྦྱང་གཞི་འཁོར་བའི་ཆོས། སྦྱོང་བྱེད་ནི་འབྲས་བུ་མྱ་ངན་ལས་འདས་པའི་ཆོས། དེ་སྦྱངས་ནས་འཁོར་འདས་དབྱེར་མེད་བསྐྱེད་རྫོགས་ཉམས་ལེན་དུ་ཡང་འཆད་དེ་དོན་ལ་གཅིག་གོ །དེས་སྤྱིར་བསྐྱེད་རྫོགས་ཀྱི་སྦྱང་ལུགས་བསྟན་ནས། བྱེ་བྲག་ཆོ་གའི་སྦྱོར་དངོས་རྗེས་སོ་སོས་སོ་སོ་སྦྱང་ཚུལ་ལ་རྣམ་གྲངས་བདུན་ཡོད་དེ། དང་
པོ་སྔོན་འགྲོ་ལས་ཉོན་སྦྱང་ཚུལ་ལ། ཚོགས་བསགས་པས་ཚེ་སྔ་མའི་ལས་ཉོན་སྦྱངས། ཡེ་ཤེས་ཚོགས་བསགས་ཀྱིས་ཚེ་སྔ་མའི་འཆི་སྲིད་སྦྱངས། ས་བོན་ཡིག་འབྲུ་ནམ་མཁའ་ལ་གནས་པས་སྔ་མའི་བར་དོ་སྦྱང་བ། རྔོག་ལུགས་སོགས་བཞེད་པ་ཡིན་ཀྱང་། ཡེ་ཤེས་ཚོགས་བསགས་འཆི་སྲིད་སྦྱོང་བྱེད་ས་སྐྱ་པ་རྣམས་མ་ཡིན་པར་འདོད་དོ། །ཚོགས་གཉིས་ཀའི་ཚེ་སྔ་མའི་ལས་ཉོན་སྦྱོང་བྱེད་དུ་བཞེད་དོ། །མདོར་ན་ཚོགས་གཉིས་བསགས་པ་ནི། ཚེ་སྔ་མ་ཕན་ཆད་ཀྱི་ལས་ཉོན་སྦྱང་བ་དང་། བསྐལ་པ་གྲངས་མེད་གསུམ་དུ་ཚོགས་བསགས་པའི་དོད་འབྲས་བུའི་རྣམ་པ་ལམ་དུ་བྱེད་པ་ཡིན་ནོ། །སྲུང་འཁོར་ནི་གསང་འདུས་བ་ཁ་ཅིག་ནི་ཕྱིའི་ལྕགས་རི་སྦྱོང་བྱེད་དུ་འདོད་ཀྱང་། འདི་ནི་གླིང་བཞི་གཅིག་ཁོ་ན་སྦྱང་གཞི་སྦྱོང་བྱེད་སྦྱར་བ་མིན་པས་དེ་ཅུང་ཟད་མི་འཐད་ལ། འཇིག་རྟེན་པ་རྣམས་གོ་ཆ་དང་སྨན་སོགས་ལུས་བསྲུང་བ་དང་། ངག་མནན་བཟློག་པ་དང་སྨྱོ་འབོག་བཟློག་པ་སོགས་བར་ཆད་བསྲུང་ཐབས་ལ་བརྩོན་པ་སྦྱོང་བྱེད་དུ་ས་སྐྱ་པས་བཞེད་དོ། །མདོར་ན་བྱང་ཆུབ་སྒྲུབ་པའི་བར་ཆད་སྦྱང་པ་དང་། སྲོད་ལ་བདུད་བཏུལ་བ་མཚོན། དེ་ལ་ནི་དཀྱིལ་ཆོག་
གཞན་ལ་གྲངས་མེད་གསུམ་དུ་ཚོགས་བསགས་ནས་སྲོད་ལ་བདུད་བཏུལ་བའི་གོ་རིམ་ལྟར། ཚོགས་བསོད་ནམས་བསགས་པའི་རྗེས་ནས་དཀྱིལ་འཁོར་བྷེ་སྲུང་འཁོར་བྷོ་པར་བཤད་ཀྱང་། འདིར་རྒྱལ་བ་རྒྱ་མཚོའི་ལུགས་དང་ཐུན་མོང་མ་ཡིན་པའི་སྲུང་འཁོར་ཕྱོགས་གཅིག་ཏུ་བསྡུས་ཏེ། ཚོགས་བསགས་ཏེ་རང་ལ་ཡང་བདུད་ཀྱི་བར་ཆད་མི་འཇུག་པའི་ཆེད་དུ་ཚོགས་བསགས་ཀྱི་གོང་དུ་སྲུང་འཁོར་མཛད་པ་ཡིན་ནོ། །དེ་བཞིན་དུ་བླ་མེད་དཀྱིལ་ཆོག་ཐམས་ཅད་ལ་དོན་གྱི་བབ་སོ་གཅིག་ཀྱང་སོ་སོའི་བཞེད་པ་གོ་རིམ་དང་རྒྱས་བསྡུས་སྣ་ཚོགས་འབྱུང་བ་གཅིག་ལ་ཞེན་ནས་གཅིག་ཁྱད་དུ་བསད་ན་ཆོས་སྤངས་སུ་འགྱུར་བས་མི་བྱའོ། །རྟེན་དཀྱིལ་འཁོར་གྱིས་སྣོད་སྦྱང་ཚུལ་ལ། ཆོས་སྐུའི་ཞིང་ཁམས་ཆོས་དབྱིངས་དང་མཉམ་པར་བྷོ་ལ། ལོངས་སྐུའི་ཞིང་ཁམས་མེ་ཏོག་གིས་བརྒྱན་པའི་འོག་མིན་སྟུག་པོ་བཀོད་བྷོ་པ་གཉིས་ནི་འདིའི་ཁྱད་ཆོས་དཀྱིལ་འཁོར་གཞན་ལ་མ་གྲགས་པ་སྟེ། རྒྱས་པར་གོང་དུ་བཤད་ཟིན་ཏོ། མེ་ཏོག་གི་ལྟེ་བར་འབྱུང་བ་རིམ་བརྩེགས་བྷེ་པའི་དབང་དུ་བྱས་ན། ཆོས་འབྱུང་ནི་མའི་མངལ་དང་སྒོ་ང་དང་མེ་ཏོག་དང་དྲོད་གཤེར་ལྡན་པའི་ས་གཞི་སྟེ། སྐྱེ་གནས་བཞི་ཀ་སྦྱོང་བྱེད་ཡིན་
ལ། དབྱིབས་གྲུ་གསུམ་ནི་བླ་མ་ཁ་ཅིག་ནམ་མཁའ་རྣམས་སྟེང་རྒྱས་སྨད་ཞུམ་པའི་རྣམ་པར་ཡོད་པ་དང་མཚུངས་ཟེར་ཡང་ནམ་མཁའ་དབྱིབས་སུ་གྲུབ་པ་ཡང་མཚར་རོ། །སྐུ་གསུམ་རྣམ་ཐར་སྒོ་གསུམ་མཚོན་པས་གྲུ་གསུམ་ལ་ས་དང་པོ་ནས་ཡོན་ཏན་ཇེ་ཆེར་རྒྱས་པ་མཚོན་པས་སྟོད་ཆེ་བར་འདོད་པ་ལེགས་ལ། ཕྱི་དཀར་ནང་དམར་ནི་ཐབས་ཤེས་མཚོན་ནོ། །དེ་ནས་རླུང་མེ་ཆུ་ས་ཆགས་རིམ་གྱིས་སྦྱང་བའོ། །ས་ནས་ལུགས་ལྡོག་བསྒོམ་པ་ནི་མངལ་དུ་ལུས་གྲུབ་ཚུལ་གོ་རིམ་སྦྱང་བའམ་ལུས་ཀྱི་འཁོར་ལོའི་རིམ་པར་སྦྱང་བའོ། །ཡང་ལུས་རྐང་མཐིལ་རླུང་སོགས་གོ་རིམ་ལྟར་སྦྱང་བ་ཡིན་ནོ། །དེ་ལ་འབྱུང་བཞིའི་དཀྱིལ་འཁོར་ལ་མེའི་དཀྱིལ་འཁོར་དུས་འཁོར་ལུགས་ལ་དངོས་སུ་ཡོད་པར་བཞེད་ཀྱང་། རྒྱུད་གཞན་དང་། མངོན་པ་ནས་མེད་པར་གསུངས་ཏེ། ཀླུའི་བྱང་ཆུབ་ཀྱིས་མེ་དངོས་སུ་མེད་ཀྱང་འབྱུང་བཞི་གཞན་ལ་མེའི་རྡུལ་ཕྲ་རབ་ཡོད་པས་སྦྱང་གཞི་ཡོད་པར་གསུངས་སོ། །འབྲས་བུ་ལམ་བྱེད་ནི། ནམ་མཁའི་རྡོ་རྗེ་རྣལ་འབྱོར་མ་དང་། འབྱུང་བཞི་ཡུམ་བཞི་དང་མཁའ་འགྲོ་བཞི། འཁོར་ལོ་རྣམ་སྣང་སྤྱན་རས་གཟིགས་མཚོན་ནོ། །དེ་ནས་གཞལ་ཡས་
ཁང་གིས་སྣོད་ཀྱི་འཇིག་རྟེན་སྦྱངས་ལུགས། སྤྱིར་མ་དག་པའི་འཇིག་རྟེན་མཐའ་དག་དང་། དེ་ལས་བསྡུ་ན་མི་མཇེད་ཀྱི་འཇིག་རྟེན་ཁམས་དང་། བསྡུ་ན་གླིང་བཞིའི་འཇིག་རྟེན་གྱི་ཁམས་སྦྱངས་ཏེ། ཁྱད་པར་འཛམ་བུ་གླིང་རིང་གནས་པའི་ཡུལ་གྲུ་དང་། གནས་ཁང་སོགས་མ་དག་པའི་སྣང་བའི་འཇིག་རྟེན་ཐམས་ཅད་སྦྱངས་བའོ། །འབྲས་བུའི་རྣམ་པ་ལམ་བྱེད་ནི། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་མཚོན་ཏེ། ཆོས་སྐུའི་དབང་དུ་བྱ་བའོ། །གཟུགས་སྐུའི་དབང་དུ་བྱས་ན་འོག་མིན་སྟུག་པོ་བཀོད་པའི་རྒྱལ་པོ་དབང་བསྒྱུར་གྱི་གཞལ་ཡས་ཁང་རྣམ་སྣང་བཞུགས་གནས་དེའམ། ཁྱད་པར་བདེ་བ་ཅན་གྱི་ཞིང་ཁམས་ན་སྣང་བ་མཐའ་ཡས་བཞུགས་པའི་རིན་པོ་ཆེའི་གཞལ་ཡས་ཁང་ལ། ལྷ་གནས་འོག་མིན་གྱི་སྟེང་དུ་རྡོ་རྗེ་འཆང་བཞུགས་པའི་གཞལ་ཡས་ཁང་དེའམ། སྤྲུལ་སྐུའི་དབང་དུ་ན་དགའ་ལྡན་ན་བྱམས་པའི་གཞལ་ཡས་ཁང་ངམ། རྒྱ་གར་རྡོ་རྗེ་གདན་གྱི་གནས་དང་གཙུག་ལག་གམ། དཔལ་རི་པདྨ་འོད་ཀྱི་ཕོ་བྲང་ངམ། པོ་ཊ་ལ་ནི་དུས་གསུམ་གྱི་སངས་རྒྱས་ཐམས་ཅད་ཀྱིས་ཐུགས་རྗེ་ཆེན་པོའི་བཞུགས་གནས་སུ་བྱིན་གྱིས་བརླབས་པའི་རིན་པོ་ཆེའི་གཞལ་ཡས་ཁང་ཡོད་པ་དེ་
རྣམས་སུ་བྱིན་གྱིས་བརླབས་པ་ཡིན་ནོ། །དེ་ནས་བསྐྱེད་ཆོག་གི་སྐྱེ་གནས་བཞི་སྦྱང་ཚུལ་ལ། དང་པོ་མངོན་རྟོགས་རྒྱས་པས་སྐྱེ་གནས་བཞི་ཀ་སྦྱངས་ཏེ། དང་པོ་ཉི་ཟླ་དྲོད་གཤེར་དང་། །ཁུ་ཁྲག་སྦྱང་བར་གསུངས་པ་ལྟར། །འདིར་པདྨ་བརླན་དང་བསིལ་བ་ཡིན་པས་ཟླ་བའི་གོ་ཆོད་པར་བྱའོ། །ཡིག་འབྲུའི་བར་དོའི་རྣམ་ཤེས་སྦྱང་བ་ཡབ་ཡུམ་ཐུགས་ཀའམ་སྦྱོར་མཚམས་ནས་འཁོར་གྱི་ས་བོན་སྤྲོས་པས་མངལ་སྐྱེས་སྦྱངས། གཞན་དག་ཏུ་རྒྱུ་རྡོ་རྗེ་འཛིན་པ་ཞུ་བ་ཐིག་ལེར་གནས་པ་ལ་འབྲས་བུ་རྡོ་རྗེ་འཛིན་པ་བཞེངས་པས་སྒོང་སྐྱེས་སྦྱང་པ་ཡིན་ཡང་། འདིར་རྒྱུ་འབྲས་ཀྱི་རྡོ་རྗེ་འཛིན་པ་སོ་སོར་མ་བཤད་པས། ས་བོན་དང་ཕྱག་མཚན་ཞུ་བ་འོད་ཀྱི་གོང་བུར་ཡོངས་སུ་གྱུར་པ་ལས་ལྷར་བཞེངས་པ་དེས་སྒོང་སྐྱེས་སྦྱང་ངོ་། །མཁའ་འགྲོ་བཞི་ས་བོན་ལས་སྐད་ཅིག་གིས་བསྐྱེད་པའམ། རིགས་བདག་སྐད་ཅིག་གིས་བསྐྱེད་པས་བརྫུས་སྐྱེས་སྦྱང་ངོ་། །ཡེ་ཤེས་འགུགས་པས་ལུས་སེམས་ཡོངས་སུ་རྫོགས་པ་སྦྱངས། དབང་བསྐུར་བས་རང་རང་གི་རིགས་ཀྱི་བྱ་བ་བྱེད་པ་སྦྱངས། བཟླས་པ་སོགས་ཀྱིས་འཇིག་རྟེན་བྱ་བ་སྣ་ཚོགས་བྱེད་པ་སྦྱངས། ལྷ་བསྡུ་བས་འཆི་སྲིད་སྦྱང་བ་ནི། །
དཀྱིལ་འཁོར་བསྡུས་པས་སྣོད་ཀྱི་འཇིག་རྟེན་གྱི་ཁམས་འཇིག་པ་སྦྱངས། འཁོར་གཙོ་བོ་ལ་བསྡུས་ནས་རང་ཉིད་ནཱ་ད་སྟོང་ཉིད་ལ་ཞུགས་པས་བཅུད་ཀྱི་སེམས་ཅན་འཆི་བ་སྦྱང་ངོ་། །དེ་ཡང་འབྲས་བུ་ལམ་བྱེད་ཀྱི་དབང་དུ་བྱེད་ན། མངོན་བྱང་ལྔས་ལྷར་བསྐྱེད་པ་འོག་མིན་ནམ་རྡོ་རྗེ་གདན་དུ་སངས་རྒྱས་པ་དང་འདྲ། དབང་བསྐུར་བ་ནི་ཁམས་གསུམ་ཆོས་ཀྱི་རྒྱལ་པོར་དབང་བསྐུར་བ་འོད་ཟེར་སྤྲོ་བསྡུ་སེམས་ཅན་གྱི་དོན་བྱེད་པ། བཟླས་པ་ཆོས་འཁོར་བསྐོར་བ། མཐར་སྟོང་ཉིད་དུ་ཞུ་བ་དང་མྱ་ངན་ལས་འདའ་བ་དང་མཐུན། སླར་ཡང་སྒྱུ་མའི་སྐུ་ནི་སྤྲུལ་པ་རྒྱུན་མི་འཆད་པ་སྟེ། རྒྱས་པར་གོང་དུ་ཡང་བཤད་ཟིན་ཏོ། ལྷ་རྣམས་དུག་གསུམ་སྦྱང་བ་ཡང་། ཡུམ་ཁྲོ་མོ་དང་རྟ་མགྲིན་སོགས་ཀྱིས་ཞེ་སྡང་སྦྱངས། འཁོར་མཁའ་འགྲོ་བཞི་སོགས་ཀྱིས་བསྐོར་བས་འདོད་ཆགས་སྦྱངས། གཙོ་བོ་ལྔ་མཚན་དཔེ་ཅན་བྷེ་པས་གཏི་མུག་སྦྱང་ཚུལ་ཡང་མངོན་རྟོགས་སུ་བཤད་པ་ལྟར་རོ། །དེ་བཞིན་དུ་སྒྲིག་པ་དཔའ་བ་སོགས་གར་དགུའི་ཉམས་ཀྱིས་ཀྱང་དུག་གསུམ་སྦྱངས་བའོ། །ཁ་དོག་དང་དབྱིབས་ཕྱག་མཚན་གྱིས་དུག་ལྔ་སྦྱང་བ་ནི། གཏི་མུག་ལས་ཉོན་མོངས་པ་ཐམས་ཅད་སྐྱེ་ཞིང་མེ་ལོང་ཡེ་ཤེས་ཀྱང་
ཡེ་ཤེས་གཞན་གསུམ་གྱི་གཞི་ཡིན་པ་ལྟར། དཀར་པོ་ལ་ཚོན་སྣ་ཚོགས་རུང་བས་དཀར་པོས་མཚོན། ཞེ་སྡང་སྐྱེས་ན་ནག་ཏོམ་གྱིས་འགྲོ་བ་དང་། ཆོས་དབྱིངས་ཡེ་ཤེས་འགྱུར་བ་མེད་པས་མཐིང་ནག་གིས་མཚོན་ནོ། །འདོད་ཆགས་སྐྱེས་ནས་མདངས་དམར་བར་འགྱུར་ལ་སོར་རྟོག་ཡེ་ཤེས་སེམས་ཅན་ལ་ཆགས་པས་ཁ་དོག་དམར་པོས་མཚོན། མཉམ་ཉིད་ཡེ་ཤེས་སེར་པོས་མཚོན་པ་ནི། སེར་སྣས་ལོངས་སྤྱོད་འཛིན་ཅིང་ལོངས་སྤྱོད་ཡོད་པས་ང་རྒྱལ་སྐྱེ་ཞིང་ལོངས་སྤྱོད་ཀྱི་སྙིང་པོ་རིན་པོ་ཆེ་དང་གསེར་འོད་དང་ལྡན་པའི་ཕྱིར་རོ། །བྱ་གྲུབ་ཡེ་ཤེས་ཁ་དོག་ལྗང་ཁུས་མཚོན་ཏེ། ཕྲག་དོག་ནི་ཉོན་མོངས་པ་སྣ་ཚོགས་ལས་སྐྱེས་ལ་བྱ་གྲུབ་ཡེ་ཤེས་ནི་ཡེ་ཤེས་ཐམས་ཅད་ཀྱི་ཕྲིན་ལས་ཏེ་ལྗང་གུ་ཡང་ཚོན་སྣ་འདྲེས་མ་ལས་འབྱུང་བའི་ཕྱིར་རོ། །དེ་ལྟར་ཁ་དོག་ལྔ་ཐམས་ཅད་ལ་སྦྱང་གཞི་སྦྱོང་བྱེད་དེ་ལྟར་ཤེས་ཤིང་རིགས་སོ་སོའི་ཐུགས་རྗེའི་ཆེན་པོའི་སྐུའམ། རིགས་ལྔར་བསྒོམས་པས་དུག་ལྔ་ཡེ་ཤེས་སུ་བྱིན་གྱིས་བརླབ་ནུས་སོ། །རིགས་སོ་སོའི་ཕྱག་མཚན་ལྔས་ཀྱང་དུག་ལྔ་སྦྱངས་ཤིང་ཡེ་ཤེས་ལྔ་མཚོན་པ་ཡིན་ཏེ། འདིའི་ཌཱཀི་བཞིའི་ཕྱག་མཚན་ལྟ་བུ་སྟེ། །རྡོ་རྗེ་ཆ་ཀིའི་ཕྱག་མཚན་
རྡོ་རྗེ་ནི་ཞེ་སྡང་སྦྱངས་ཤིང་མེ་ལོང་ཡེ་ཤེས་སོགས་མཚོན་ནོ། །གཞན་དེས་འགྲེས་སོ། །ཕྱག་ཞབས་ཀྱི་རྣམ་འགྱུར་གྱིས་མཐའ་གཉིས་སོགས་སྦྱང་བ་ནི། རྟ་མགྲིན་དང་གསང་ཡེ་སོགས་ཞབས་གཡོན་བརྐྱངས་བས་ཆོས་ཉིད་ཀུན་ལ་ཁྱབ་པའམ། འཁོར་བའི་མཐའ་མནན་པ་དང་། ཞི་བར་མི་གནས་པ་དང་། གཡས་བསྐུམས་པས་བདག་ཐུགས་རྗེ་ཆེན་པོ་དང་ལྡན་པའམ། སྲིད་པར་མི་འཁྲུལ་བར་མཚོན་ནོ། །ཕྱག་གཡས་བརྐྱངས་པས་སྙིང་རྗེས་སེམས་ཅན་གྱི་དོན་བྱེད་པ་དང་། གཡོན་བསྐུམས་པས་བདག་དེ་བཞིན་ཉིད་དང་ལྡན་པ་མཚོན། གསང་ཡེས་གྲི་ཐོད་ཐུགས་ཀར་འཛིན་པའི་ལུགས་ལྟར་ན། གཡས་བརྐྱངས་བས་ནི་རང་ཉིད་ཐུགས་རྗེ་ཆེན་པོ་དང་ལྡན་པས་རྣམ་རྟོག་གཅོད་པ། གཡོན་ཐུགས་ཀར་བསྐུམས་པས་བདག་བདེ་སྟོང་གི་རོ་དང་ལྡན་པའོ། །གཙོ་བོ་ཐུགས་རྗེ་ཆེན་པོ་ཡབ་ཡུམ་རྣམས་ཕྱག་བཞི་ཚད་མེད་བཞི་དང་ཕྲིན་ལས་བཞི་སོགས་མཚོན་ལ། ཐུགས་ཀར་སྦྱར་བས་དབྱིངས་དང་ཡེ་ཤེས་བདེ་བ་དང་སྟོང་པ་ཟུང་འཇུག་སོགས་ཏེ་ཞིབ་པར་འོག་ཏུ་འཆད་དོ། །དེ་བཞིན་དུ་ཕུང་པོ་ལྔ་རླུང་ལྔ་སྦྱངས་ཤིང་ཡེ་ཤེས་ལྔ་མཚོན་པའི་ཐུགས་རྗེ་ཆེན་པོ་རིགས་ལྔ་
ཁམས་བཞི་སྦྱངས་ཤིང་ཁྱབ་བྱ་བཞིའི་མཚོན་པས་མཁའ་འགྲོ་བཞི་སྟེ། ཟབ་མོ་ནང་དོན་ལས། ཁམས་བཞི་སོགས་ལྡན་ཁྱབ་བྱ་བཞི། །ཡེ་ཤེས་ལྔ་དང་ཕུང་པོ་ལྔ་། །འཁོར་ལོ་རླུང་དང་ཁྱབ་བྱེད་བཅས། །ལྷ་ལྔ་བརྟེན་ཏེ་དུ་མར་གསུངས། །ཞེས་གསུངས་པ་དང་། དེ་ནས་ཆོས་རྣམས་ཐམས་ཅད་ཀྱི། །སྦྱང་གཞི་སྦྱོང་བྱེད་གསུངས་པ་ཡི། །ངེས་པར་འདིར་ནི་བསྟན་པར་བྱ། །ཞེས་སོགས་རྒྱ་ཆེར་གསུངས་ཏེ། དཔལ་ལྡན་འདུས་པ་བཤད་བྱ་བ། །ཕུང་པོ་སངས་རྒྱས་ལྔ་ཡིན་ཏེ། །ཞེས་སོགས་གསུངས་པ་ལྟར། ཕ་རྒྱུད་པདྨ་རྒྱལ་པོའི་རྒྱུད་ལྟར་ལྷ་དགུ་ལ་སྦྱང་གཞི་སྦྱོང་བྱེད་སྦྱང་བ་དང་། དཔེར་ན་དགྱེས་རྡོར་ལྷ་དགུ་ནི། སྙིང་གའི་འཁོར་ལོ་ཀྱང་ཡིན་བཞིན། །ཐམས་ཅད་ལུས་ཀྱི་རྩ་རླུང་ཡིན། །ཞེས་གསུངས་པ་ལྟར་མ་རྒྱུད་པདྨ་ཟབ་པའི་རྒྱུད་ཀྱི་དགོངས་པ་བྱེད་ན། ལྷ་དགུའི་སྙིང་གའི་རྩ་བརྒྱད་གཙོ་བོ་དང་དགུ་སྦྱོང་བྱེད་དུ་ཡང་འགྱུར་རོ། །དེ་ལྟར་རྣལ་འབྱོར་པའི་ཀུན་ཏུ་རྟོག་པས་བརྟག་པའི་ལྷའི་དཀྱིལ་འཁོར་བྷེ་པས་སེམས་འཛིན་པས་ཞི་གནས་སྐྱེ། ཕྱི་ནང་གཞན་གསུམ་དུ་དབྱེར་མེད་ཀྱི་དོན་ཤེས། ཏིང་ངེ་འཛིན་ལ་དབང་འབྱོར་ནས་མ་འོངས་
གཞན་དོན་གཟུགས་ཀྱི་སྐུ་འབྱུང་བའི་གནད་ཡོད་དེ། རྗེ་རང་བྱུང་བའི་ནང་དོན་ལས། དེ་ནས་སེམས་ཅན་ཀུན་རྟོགས་ལ། །ཀུན་བརྟག་ལྷ་རྣམས་བྷི་པའི་དོན། །སེམས་འཛིན་ཕྱི་ནང་དོན་ཤེས་དང་། །དབང་འབྱོར་གཞན་དོན་གཟུགས་སྟོན་ཕྱིར། །ཞེས་གསུངས་སོ། །དེར་མ་ཟད་གནད་ཤེས་པས་རང་བཞིན་གྱིས་གྲོལ་བ་སྟེ། རྗེ་བཙུན་གྲགས་པ་རྒྱལ་མཚན་གྱི་དགའ་སྟོན་སྤྲིང་ཡིག་ལས། སྤྱིར་སྦྱང་གཞི་དང་སྦྱོང་བྱེད་ལེགས་པར་འཕྲོད་ཅིང་བྷེ་ན། བྷོ་པ་ལ་བརྩོན་ཡང་རུང་མི་བརྩོན་ཡང་རུང་། འཁོར་བའི་རྒྱ་མཚོ་ལས་བདག་སྒྲོལ་ཞིང་གཞན་སྒྲོལ་བའི་ནུས་པ་དང་ལྡན་པའོ། །ཞེས་གསུངས་སོ། །དེ་ནས་ལྷ་དང་དཀྱིལ་འཁོར་གྱི་དེ་ཁོ་ན་ཉིད་དང་། རྣམ་དག་དང་བརྡ་དང་རྟགས་རྣམས་ཤེས་དགོས་ཏེ། དེ་མ་ཤེས་ན་ཐ་མལ་གྱི་རྒྱལ་པོའི་ཕོ་བྲང་དང་འདྲ་བའི་སྐྱོན་དུ་འགྱུར་བས། རྣམ་དག་ནི་སྤྱིར་གཟུགས་ཕུང་དག་པ་རྣམ་སྣང་གི་རང་བཞིན་ནམ། སངས་རྒྱས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ངོ་བོ་ཐར་པ་ཆེན་པོའི་གྲོང་ཁྱེར་ཡིན་ལ། དེ་ལ་ཡང་དཀྱིལ་འཁོར་དང་འཁོར་ཆུ་འཁོར་ཡུག་གསུམ་ལས། འཁོར་ཡུག་ལ་མེ་རི་སྙིང་རྗེ་ཆེན་པོས་བར་ཆད་ཀྱི་མི་མཐུན་པའི་
ཕྱོགས་བསྲེགས་པའི་བརྡའོ། །རྡོ་རྗེའི་ར་བས་སྟོང་ཉིད་དོན་དམ་པའི་འཁོར་བའི་སྡུག་བསྔལ་ཐམས་ཅད་བསྲུང་བའི་བརྡ། པདྨའི་ཕྲེང་བ་ནི་འཁོར་བའི་ཉེས་པའི་འདམ་གྱིས་མ་གོས་པའི་བརྡ། དུར་ཁྲོད་ནི་རྣམ་ཤེས་ཚོགས་བརྒྱད་དག་ཅིང་འཇིག་རྟེན་ཆོས་བརྒྱད་ཀྱི་རྟོག་པ་ལས་གྲོལ་བའི་བརྡ། ཕྱོགས་སྐྱོང་ལ་སོགས་པ་ནི་འཁོར་བའི་ཆོས་རྣམ་པར་དག་པའི་བརྡ། འཁོར་བ་ཞེས་པ་ནི་ཕྱིའི་བར་ཁྱམས་དང་རྟ་བབས་འོག་གི་སྒོ་གཡབ་དང་བཅས་པ་སྟེ། རྟ་བབས་སྒོ་སྟེང་དང་སྒོ་མདུན་ལ་ཡོད་པ་གང་བྱེད་ཀྱང་རྟ་བབས་སྟེང་གི་གདུགས་བཞི་ཚད་མེད་བཞིས་སེམས་ཅན་གྱི་ཚ་གདུང་སེལ་བའི་བརྡ། ཆོས་འཁོར་བཞི་བདེན་པ་བཞིའམ་རྒྱུད་སྡེ་བཞིའི་ཆོས་འཁོར་བསྐོར་བའི་བརྡའོ། །རི་དྭགས་ཕོ་མོ་གཉིས་གཉིས་ནི་གཟུང་འཛིན་གྱི་རྟོགས་པ་བརྒྱད་དང་རེ་དོགས་གྲོལ་བའི་བརྡ། རྟ་བབས་བང་རིམ་བཞི་བྱེད་ན་དགའ་བ་བཞི་དང་། བཅུ་གཅིག་བྱེད་ན་ཕར་ཕྱིན་དང་ས་བཅུ་གཅིག་མཚོན། སྣ་ཚོགས་རྡོ་རྗེ་ནི་འབུར་དོད་བྱེད་ན་ར་ཉི་ཤུ་འཇིགས་ཚོགས་ལ་ལྟ་བ་ཉི་ཤུ་རྣམ་པར་དག་པ། སྣ་ཚོགས་རྡོ་རྗེའི་རི་མོའི་རྣམ་པར་བྱེད་ན་ར་བཅུ་གཉིས་རྟེན་འབྲེལ་བཅུ་གཉིས་དག་པའི་བརྡ།
མདའ་ཡབ་དཀར་པོ་འབྲས་བུའི་ཡོན་ཏན་མཐར་ཕྱིན་པ་དང་། རིན་པོ་ཆེའི་ཤར་བུ་ནི་ཉེས་སྐྱོན་ཐམས་ཅད་དང་བྲལ་བའི་བརྡ་ཡིན་ནོ། དྲ་བ་དྲྭ་ཕྱེད་ནི་བྱང་ཆོས་སོ་བདུན་གྱི་བརྡ། ཕ་གུ་ནི་དགོས་འདོད་ཐམས་ཅད་གྲུབ་པ་དང་། འདོད་སྣམ་ནི་འདོད་ཡོན་ལམ་དུ་བྱེད་པ་དང་། དམར་པོ་སྙིང་རྗེ་ཆེན་པོའོ། །ཆོས་ཐམས་ཅད་མཉམ་པ་ཉིད་དུ་རྟོགས་པས་དཀྱིལ་འཁོར་གྲུ་བཞི་སྒོ་བཞི་ནི་རྣམ་པར་ཐར་པ་བཞི་ནས་ཐར་བའི་གྲོང་དུ་འཇུག་པའི་བརྡ། རྩིག་པ་ལྔ་ནི་དབང་པོ་ལྔ་དང་ཉོན་མོངས་པ་ལྔ་དང་ཕུང་པོ་ལྔ་དག་པ་རིགས་ལྔ་ཡེ་ཤེས་ལྔའི་བརྡའོ། །ཕྱོགས་མདོག་ནི་ཕྲིན་ལས་བཞི་འགྲུབ་པའི་བརྡའོ། །ཀ་བ་བརྒྱད་ནི་རྣམ་པར་ཐར་པ་བརྒྱད་དག་པའི་བརྡའོ། །རྡོ་རྗེའི་གདུང་དང་གདུང་ཟླུམ་ནི་གསང་སྔགས་རྡོ་རྗེ་ཐེག་པ་ལ་བསྟེན་ནས་ཐར་པ་ཆེན་པོའི་ལམ་དུ་བགྲོད་པའི་བརྡའོ། །གདུང་བཞི་ནི་ཚད་མེད་བཞི་དང་། དབུས་རིམ་པར་ཕྱུར་བུའི་ཐོག་རིམ་པ་ལྔ་ནི་ཡེ་ཤེས་རིམ་པ་ལྔའོ། །རྡོ་རྗེ་རྒྱ་གྲམ་ནི་འགྱུར་མེད་ཆོས་དབྱིངས་སོ། །འཁོར་ལོ་རིམ་པ་བཅུ་གསུམ་ནི་ས་བཅུ་གསུམ་ཡོངས་སུ་རྫོགས་པའོ། །ཆར་ཁེབས་ནི་ཐུགས་རྗེ་ཆེན་པོས་ཀུན་ལ་ཁྱབ་པའོ། །རྡོ་རྗེ་རྩེ་ལྔའི་ཏོག་ནི་སྐུ་ལྔ་དང་ནོར་
བུའི་ཏོག་ཆོས་སྐུ་མཚོན་པའོ། །དེ་ནས་ལྷའི་རྣམ་དག་བརྡ་ཆོས་ནི་ཕུང་པོ་ལྔ་དང་དུག་ལྔ་རྣམ་པར་དག་ཅིང་སྐུ་ལྔ་དང་ཡེ་ཤེས་ལྔའི་བརྡར་ཐུགས་རྗེ་ཆེན་པོ་རིགས་ལྔའོ། །འབྱུང་བ་ལྔ་དང་ནང་གི་ཁམས་ལྔ་རྣམ་པར་དག་ཅིང་ཡེ་ཤེས་ལྔ་མཚོན་པས་ཡུམ་ལྔའོ། །སྐྱེ་གནས་བཞི་དང་འབྱུང་བ་བཞི་དང་རྟག་ཆད་མུ་བཞི་རྣམ་པར་དག་ཅིང་ཚད་མེད་བཞི་དང་ཕྲིན་ལས་བཞི་དང་བསྡུ་བའི་དངོས་པོ་བཞི་སོགས་མཚོན་པས་མཁའ་འགྲོ་བཞིའོ། །འདོད་སྣམ་ལ་ཕྱོགས་རེ་རེས་མཆོད་པའི་ལྷ་མོ་གཟུགས་རྡོ་རྗེ་མ་སོགས་བཞི་རེ་ཡོད་པ་ནི་བདེན་པ་བཞི་དང་། བསམ་གཏན་བཞི་དང་། ཚད་མེད་བཞི་དང་། སྙོམས་འཇུག་བཞི་སྟེ་བཅུ་དྲུག་ནི་སྟོང་ཉིད་བཅུ་དྲུག་གོ །ལྷ་ལྔ་ལ་ཡིན་ན། ཕུང་པོ་ལྔ་དང་དུག་ལྔ་འབྱུང་བ་ལྔ་དང་། ཕྱོགས་བཞི་དབུས་ལྔ་སོགས་རྣམ་པར་དག་པ། རིགས་ལྔ་དང་སྐུ་ལྔ་དང་ཡེ་ཤེས་ལྔ་དང་ལམ་ལྔ་སོགས་རྣམ་པར་དག་པ་མཚོན་ཞིང་། རྩ་འཁོར་ལོ་བཞི་ལ་སྦྱར་ན་བདེ་ཆེན་གྱི་འཁོར་ལོ་བདེ་སྟོང་གི་གར་བསྒྱུར་མཛད་པ་བྱུང་། གསུང་གི་གནས་མགྲིན་པར་གསུང་གི་དབང་ཕྱུག་སྤྱན་རས་གཟིགས་ཆོས་ཀྱི་འཁོར་ལོ་ཐུགས་ཀྱི་ལྷ་མཆོག་རྟ་མགྲིན་སྤྲུལ་པའི་འཁོར་ལོ་ཨ་ཐུང་
ཕག་མོའི་ངོ་བོ་གསང་ཡེ། བདེ་སྟོང་འཁོར་ལོ་ཕྲིན་ལས་སྣ་ཚོགས་ཀྱི་གནས་རྣམ་པར་དག་པས་ཌཱཀི་དང་གིང་ཆེན་ཡབ་ཡུམ་བརྒྱད་རྣམ་པར་དག་པའོ། །དེ་ཐམས་ཅད་ཀྱང་ཐབས་ཤེས་རབ་གཉིས་སུ་མེད་པར་སྦྱོར་ཏེ། རྡོ་རྗེའི་ར་བ་ནི་ཤེས་རབ་མེ་རིའི་ཐབས། ཆོས་འབྱུང་ནི་ཤེས་རབ། འབྱུང་བ་རིམ་རྩེགས་ཐབས། པདྨ་ཤེས་རབ། དུར་ཁྲོད་ཐབས། སྣ་ཚོགས་རྡོ་རྗེའི་ལྟེ་བ་ནི་ཤེས་རབ། ར་ནི་ཐབས། འདོད་སྣམ་ཤེས་རབ། བརྩེགས་པ་ཐབས། དེ་སོགས་ཞིབ་ཏུ་ཐམས་ཅད་ལ་སྦྱར་ཏེ་མདོར་ན་གཞལ་ཡས་ཁང་ཤེས་རབ། ལྷ་ནི་ཐབས། ཡུམ་ནི་ཤེས་རབ། ཡབ་ནི་ཐབས། རྫོགས་རིམ་ནི་ཤེས་རབ། བསྐྱེད་རིམ་ནི་ཐབས། འཆི་བ་ཤེས་རབ། སྐྱེ་བ་ཐབས་སོགས་སུ་ཤེས་པར་བྱ་སྟེ། རྗེ་རང་བྱུང་བའི་ཟབ་མོ་ནང་དོན་ལས། རྟེན་དང་བརྟེན་པར་མ་ལུས་པ། །ཐབ་དང་ཤེས་རབ་རང་བཞིན་གསུངས། །ཞེས་དང་། སྐྱེ་བ་བསྐྱེད་རིམ་བརྟན་པ་སྟེ། །འཆི་བ་རྫོགས་རིམ་ཉིད་ཡིན་ནོ། །ཀུན་བརྟག་བསྐྱེད་རིམ་ཤེས་བྱ་སྟེ། །གཞན་དབང་འབྲེལ་བ་རྫོགས་རིམ་བཤད། །ཀུན་རྫོབ་བདེན་པ་བསྐྱེད་རིམ་སྟེ། །དོན་དམ་བདེན་པ་རྫོགས་རིམ་བཤད། །
བདེན་གཉིས་ཐབས་རྣམས་བསྐྱེད་རིམ་སྟེ། །དབྱེར་མེད་ཤེས་རབ་རྫོགས་རིམ་གསུངས། །ཞེས་གསུངས་པ་ལྟར་ཤེས་པར་བྱའོ། །འོ་དེ་ལྟར་སྦྱང་གཞི་སྦྱོང་བྱེད་སྦྱར་ཤེས། རང་བཞིན་སྟོང་པའི་ངང་ནས་རྣམ་པ་ལྷར་གསལ་བས་གསལ་སྟོང་ཟུང་འཇུག །ཟབ་མོ་སྟོང་ཉིད་ཀྱི་ངང་ནས་ལྷར་གསལ་བས་ཟབ་གསལ་གཉིས་མེད་ཀྱི་ཡེ་ཤེས། རྣམ་དག་དང་དེ་ཁོ་ན་ཉིད་ཤེས་པ་དང་བཅས་པའི་བསྐྱེད་རིམ་དེ་ལྟ་བུ་ནི། གསང་སྔགས་བླ་མེད་རྒྱུད་ཀྱི་དགོངས་པ་ཡང་དག་པ་ཡིན་ཏེ། རང་རྒྱུད་ལ་ལྷ་སྐུ་རང་ཆས་སུ་ཡོད་པ་རྒྱུའི་རྒྱུད། དེ་ངོ་ཤེས་པས་བསྒོམ་པ་ཐབས་རྒྱུད་དང་། དེ་བསྒོམས་པས་ལྷ་དེ་དངོས་སུ་འགྲུབ་པར་འགྱུར་བས་འབྲས་བུའི་རྒྱུད། བློས་བཏགས་ནས་སྒོམ་པས་ཀུན་བརྟག །དེ་མྱང་འདས་ཀྱི་ལམ་དུ་འགྲོ་བས་གཞན་དབང་། རང་གིས་ངོ་བོར་ཡང་གྲུབ་པ་མེད་པོར་བྷེ་པས་ཡོངས་གྲུབ། དེས་འཁོར་བའི་འཇིགས་པ་ལས་སྐྱོབས་པས་སྐྱབས་འགྲོ། དེ་ལྟར་བྷེ་པ་ཡང་སེམས་ཅན་ཐམས་ཅད་སངས་རྒྱས་འཐོབ་པའི་ཕྱིར་ཡིན་པས་སེམས་བསྐྱེད། སངས་རྒྱས་ཀྱི་སྐུ་མཚན་དཔེས་བརྒྱན་པ་དེ་ཡིད་ལ་བྱེད་པས་སངས་རྒྱས་རྗེས་དྲན། ཡིག་འབྲུ་དང་སྔགས་ཕྲེང་ཡིད་ལ་
བྱེད་པས་ཆོས་རྗེས་དྲན། འཁོར་གྱི་ལྷ་མོ་རྣམས་དུར་ཁྲོད་ཀྱི་གྲུབ་ཆེན་བརྒྱད་ཡིད་ལ་བྱེད་པས་གསང་སྔགས་ཀྱི་དགེ་འདུན་རྗེས་དྲན། ལྷའི་དཀྱིལ་འཁོར་ཡིད་ལ་བྱེད་པས་ལྷ་རྗེས་དྲན། དེ་བསོད་ནམས་ཀྱི་ཚོགས་བསགས་པས་ཚོགས་ལམ། སྭ་བྷ་ཝས་སྟོང་ཉིད་ཀྱི་དོན་ལ་སྦྱོར་བས་སྦྱོར་ལམ། སེམས་ཉིད་དེ་མཐའ་བཞི་དང་བྲལ་བའི་སྟོང་ཉིད་དུ་ལྷག་གིས་མཐོང་བས་མཐོང་ལམ། དཀྱིལ་འཁོར་རྟེན་དང་བརྟེན་པར་བྷོ་པས་བསྒོམ་ལམ། རྫོགས་རིམ་དམིགས་མེད་དུ་བསྡུ་བ་མཐར་ཕྱིན་པའི་ལམ། རང་ཉིད་ལྷར་གསལ་བས་རབ་ཏུ་དགའ་བ། སྐུ་ལ་ཉེས་པའི་དྲི་མ་མེད་པས་གཉིས་པ་དྲི་མ་མེད་པ། སྐུ་ལས་འོད་ཟེར་འཕྲོ་བས་གསུམ་པ་འོད་འཕྲོ་བ། འོད་དེས་སེམས་ཅན་གྱི་དོན་བྱེད་པར་བྷེ་པས་བཞི་པ་འོད་བྱེད་པ། དམིགས་པ་རྩེ་གཅིག་སྐད་ཅིག་ཙམ་ཡང་མ་ཡེངས་པས་སྦྱང་དཀའ་བ་ལས་ས་ལྔ་པ་སྦྱང་དཀའ་བ། སྦྱང་གཞི་སྦྱོང་བྱེད་སོགས་ཤེས་རབ་ཟབ་མོའི་ཕྱེ་ཤེས་པ་འབྲས་བུ་མངོན་དུ་གྱུར་པས་ས་དྲུག་པ་མངོན་དུ་གྱུར་པ། སེམས་ཅན་གྱི་དོན་དུ་དེ་ལྟར་བྷེ་པས་འཁོར་བའི་སྡུག་བསྔལ་ལས་རིང་དུ་འགྲོ་བས་ས་བདུན་པ་རིང་དུ་སོང་བ། ཐེ་ཚོམ་ཡིད་ཀྱི་རླུང་གིས་མི་གཡོ་བར་བྷེ་པས་
བརྒྱད་པ་མི་གཡོ་བ། སེམས་ཅན་སྨིན་ཅིང་གྲོལ་བའི་དོན་བྱེད་པས་རང་ལ་ཉེས་པའི་དྲི་མས་མ་གོས་ལ་ལེགས་པའི་ཡོན་ཏན་དང་བློ་གྲོས་འབྱོར་བ་འབྱོར་བས་ས་དགུ་པ་ལེགས་པའི་བློ་གྲོས། དེ་ལྟར་བྷི་པས་ཐུགས་རྗེ་ཆེན་པོའི་སྤྲིན་གྱིས་འགྲོ་བ་ཡོངས་ལ་ཕན་ཅིང་འཁོར་བའི་ཚ་གདུང་སེལ་བའི་ཆོས་ཀྱི་ཆར་འབེབས་ནུས་པ་ས་བཅུ་པ་ཆོས་ཀྱི་སྤྲིན། །ཚོགས་བསགས་པ་དང་སྲུང་འཁོར་དང་འོད་ཟེར་སྐུའི་ཚོགས་སྤྲོ་བསྡུ་བྱེད་པ་སྤྲུལ་སྐུ་སྣང་སྟོང་འཇའ་ཚོན་ལྟ་བུའི་ལྷ་སྐུ་དེ་ལོངས་སྐུ། དེ་རང་བཞིན་མེད་པས་ཆོས་ཉིད་སྟོང་པའི་ངོ་བོར་སྣང་བས་ཆོས་སྐུ། དེ་ཐམས་ཅད་སེམས་ཉིད་སྤྲོས་བྲལ་གྱི་ངོ་བོར་དབྱེར་མེད་རོ་གཅིག་ངོ་བོ་ཉིད་ཀྱི་སྐུ། དེ་ཐམས་ཅད་ཀྱང་གདོད་མ་ནས་རང་བཞིན་རྣམ་པར་དག་པའི་ངོ་བོར་སྣང་བ་བདེ་བ་ཆེན་པོའམ་མངོན་པར་བྱང་ཆུབ་པའི་སྐུའི་འབྲས་བུ་ལམ་བྱེད་ཡིན་ཏེ། རྩ་བའི་རྒྱུད་ཀྱི་རྒྱལ་པོ་པདྨ་ཟབ་པ་ལས། ས་བཅུའི་ལྷ་ཡི་སྐུར་བྷེ་པས། །རབ་ཏུ་དགའ་བ་དང་པོ་ཡིན། །སྐུ་ལ་དྲི་མ་གཏན་མེད་པས། །གཉིས་པ་དྲི་མ་མེད་པ་ཡིན། །ལྷ་ཡི་སྐུ་ལ་འོད་འཕྲོ་བས། །གསུམ་པ་འོད་བྱེད་པ་འདི་ཡིན། །འོད་ཀྱིས་སེམས་ཅན་གོ་འབྱེད་པས། །
བཞི་པ་འོད་ནི་འཕྲོ་བའོ། །དམིགས་པ་རྩེ་གཅིག་སྦྱང་དཀའ་བས། །ཤེས་རབ་ཕྱེད་པས་མངོན་དུ་འགྱུར། །སེམས་ཅན་དོན་བྱེད་ལྷ་བྷེ་པས། །བདུན་པ་རིང་དུ་སོང་བ་ཡིན། །ཐེ་ཚོམ་ཡིད་གཉིས་མི་བསྐྱེད་པས། །བརྒྱད་པ་མི་གཡོ་བ་ཡི་ས། །སེམས་ཅན་ཐམས་ཅད་སྨིན་པ་དང་། །རང་ལ་དྲི་མའི་རྟོག་པ་མེད། །དགུ་པ་ལེགས་པའི་བློ་གྲོས་སོ། །ཐུགས་རྗེའི་སྤྲིན་གྱིས་འགྲོ་བ་ཁྱབ། །བཅུ་པ་ཆོས་ཀྱི་སྤྲིན་འདི་ཡིན། །ཞེས་གསུངས་སོ། །པདྨ་རྒྱལ་པོའི་རྒྱུད་ལས་གསུངས་པའི་དོན་གྲུབ་ཆེན་ཛ་ལེན་དྷ་རའི་རྒྱ་གཞུང་དུ་ཡང་ལུང་དྲངས་ནས་གསུངས་ཏེ། རྟོག་པ་ཐམས་ཅད་བསྡུས་ནས་ནི། །བསམ་པ་བཟང་པོའི་ལྷ་འདི་བྷི། །ནམ་ཡང་འབྲལ་བར་མ་བྱེད་ཅིག །དེ་ལྟར་བྷོ་པས་བྱིན་བརླབས་ན། །བདེ་བར་གཤེགས་པ་ཐམས་ཅད་ཀྱིས། །བྱིན་གྱིས་རླབས་པ་རྒྱུན་མི་འཆད། །ལུས་ངག་ཡིད་ཀྱི་བདེ་བ་ནི། །ནམ་ཡང་འབྲལ་བར་མི་འགྱུར་རོ། །ལྟུང་བ་རྣམས་ཀྱིས་མི་འཇིགས་སོ། །ཆོས་ཀྱི་རྩ་བ་འདི་ཟིན་པས། །ཡན་ལག་ཐམས་ཅད་འདུས་པ་ཡིན། །ཞེས་གསུངས་སོ། །དེ་ལྟར་ཉམས་སུ་བླངས་བས་བྱིན་རླབས་འཇུག་པའི་རྟགས་དང་མཚན་མ་ནི། ཐུགས་རྗེ་
ཆེན་པོ་རྒྱལ་བ་རྒྱ་མཚོའི་སྒྲུབ་ཐབས་གྲུབ་པའི་རྒྱལ་མོའི་རྒྱ་གཞུང་ཆེན་པོ་ལས། ལྟས་དང་ཆོ་འཕྲུལ་མཁའ་འགྲོའི་རྟགས། །དངོས་གྲུབ་མཚན་མ་ལ་སོགས་པ། །བཟང་ངན་བྱེ་བྲག་ཇི་ལྟར་ཡང་། །གང་ལ་དགའ་འམ་མི་དགའ་བའི། །མཚན་མར་འཛིན་པ་མི་བྱའོ། །ཞེས་བསྐྱེད་རྫོགས་ཟུང་འཇུག་གི་རྟགས་མཚན་གྱི་སྡོམ་ཚིག་ཏུ་གསུངས་ཤིང་། དེ་དང་མཚུངས་པར་བསྐྱེད་རྫོགས་གཉིས་ཀའི་རྟགས་མཚན་དཔལ་ལྡན་གསང་བ་འདུས་པའི་རྩ་རྒྱུད་ལེའུ་བཅོ་ལྔ་པ་ལས། བྱང་ཆུབ་ཡེ་ཤེས་མཆོག ཅེས་སྤྱོད་པ་ལ་གནས་པས། ཐོབ་ནས། །སངས་རྒྱས་མཐུ་དང་མཚུངས་པར་མཐོང་། རང་ཉིད་སངས་རྒྱས་སུ་གྱུར་པར་རྨིས། །སངས་རྒྱས་ལོངས་སྤྱོད་རྫོགས་པའི་སྐུ། བདག་ཉིད་སངས་རྒྱས། །བདག་མེད་པར་ནི་མྱུར་དུ་མཐོང་། བདེ་བའམ། །སེམས་དཔའ་ཆེན་པོ་ཁམས་གསུམ་པ། བདག་ཉིད་སངས་རྒྱས་ས་ལ། །མཆོད་པ་བྱེད་པ་དེས་མཐོང་ངོ་། རྨི་ལམ་དུ། །ཡེ་ཤེས་ཆེན་པོ་འདི་འདྲའི་གཟུགས། བདག་ལོངས་སྐུ། །སངས་རྒྱས་བྱང་ཆུབ་སེམས་དཔའ་ཡིས། ཉེ་སྲས་སོགས། །འདོད་པའི་ཡོན་ཏན་ལྔ་རྣམས་ཀྱིས། །རྟག་ཏུ་མཆོད་པ་བྱེད་པར་མཐོང་། །རྡོ་རྗེ་སེམས་དཔའི་གཟུགས་
ཅན་དང་། མི་བསྐྱོད་རྣམ་སྣང་། གྲགས་ཆེན་རིན་འབྱུང་། རྡོ་རྗེ་མཆོག་དག་ཏུ། འོད་དཔག་མེད། །རྨི་ལམ་དག་ན་རང་གཟུགས་མཐོང་། །གྲགས་ཆེན་དོན་གྲུབ། རྡོ་རྗེ་གསང་བ་དང་། །བྱང་ཆུབ་སེམས་དཔའི་འཁོར་ལོ་ཅན། རང་རང་གིས་འཁོར། །སངས་རྒྱས་ཆེན་པོར་ཕྱག་འཚལ་བའི། ལྷ་འདི་ལ་འཁོར་གྱིས་བསྐོར་བ་ལ། །རྨི་ལམ་འདི་འདྲ་མཐོང་གྱུར་པ། ཏིང་ངེ་འཛིན་དང་སྤྱོད་པ། །ལུས་ངག་སེམས་ཀྱི་ཡན་ལག་སྐྱེས། ཡུན་དུ་བསྒོམ་པ་ལས་བྱུང་། །རྒྱན་རྣམས་ཐམས་ཅད་ཡོངས་རྫོགས་པའི། མཚན་བཅས་ཀྱི་རྨི་ལམ་ལ་་་ལྷ་ཡི་བུ་མོ་ཡིད་ཟློའོང་དང་། །ཁྱེའུ་དང་བུ་མོ་དག་མཐོང་ན། །དེས་ནི་དངོས་གྲུབ་ཐོབ་པར་འགྱུར། གྲུབ་པ་བརྒྱད་དང་ལས་བཞིའི། །ཕྱོགས་བཅུའི་སངས་རྒྱས་ཐམས་ཅད་རྣམས། བསྐྱེད་རིམ་གོམས་ན། །ཞིང་རྣམས་གནས་པ་ངེས་པར་མཐོང་། །ཐུགས་ནི་དགྱེས་པར་གྱུར་ནས་ཀྱང་། དེ་རྣམས་བདག་ལ་རྫོགས་རིམ་སྒྱུ་མ་ལྟ་བུ། །ཆོས་མཛོད་ཡིད་དུ་འོང་བ་རྩོལ། །གླེགས་བམ། །ཆོས་ཀྱི་འཁོར་ལོ་བསྐོར་བའི་སྐུ། རང་ཉིད་ཐུབ་དབང་ལྟ་བུར་གྱུར་པ་དང་ཁྲི་ལ་འདུག་པ་ཆོས་འཆད་པར་རྨིས། །སེམས་ཅན་ཀུན་གྱིས་ཡོངས་བསྐོར་བ། །བསམ་གཏན་རྡོ་རྗེ་ལ་གནས་པའི། ཆོས་འཆད་པར་
རྨིས། །དམ་ཚིག་སྦྱོར་བས་སྤྱོད་པས། མཐོང་བར་འགྱུར། །ཞེས་གསུངས་པ་ལྟ་བུའི་དྲོད་རྟགས་འབྱུང་སྟེ། འདི་དག་སྤྱོད་པ་དུས་ཀྱི་རྟགས་སུ་གསུང་མོད་ཀྱི་ཉམས་སུ་ལེན་པའི་ཚུལ་སྤྱོད་པ་གང་རུང་ཞིག་ལ་གནས་དགོས་པས་འདིར་བསྐྱེད་རིམ་ཟབ་གསལ་གཉིས་མེད་ཀྱི་རྟགས་སུ་འོང་ངོ་།། ༈ ཨོ་རྒྱན་རིན་པོ་ཆེས་བླ་མ་སྙིང་ཐིག་ལས་ཀྱང་བསྐྱེད་རིམ་འབྱོང་བ་ནི། རྟོགས་རྨི་ལམ་དུ་རང་ཉིད་སངས་རྒྱས་བྱང་སེམས་ཀྱི་སྐུར་གྱུར་པ་དང་། རང་ལས་འཕྲོ་བ་དང་པོ་རང་ལ་ཐིམ་པ་དང་། རང་ལ་སངས་རྒྱས་བྱང་སེམས་ཀྱིས་ཕྱག་དང་མཆོད་པ་བྱས་པ་རྨིས་པར་གསུངས་པ་དང་དོན་གཅིག་གོ །དེ་ལྟར་རང་གི་སེམས་ཉིད་ལྷའི་རྣམ་པར་སྣང་ཞིང་དེ་ལ་སེམས་གནས་ཤིང་གོམས་པ་ཐམས་ཅད་སྣང་སྲིད་སྒྱུ་མ་ལྟ་བུར་ལྷའི་སྐུར་ཤེས་པས་ཆགས་སྡང་རྨོངས་གསུམ་མི་སྐྱེ། མི་སྣང་བ་དང་གཅིག་ལ་མང་པོར་སྤྲུལ་པ་དང་། མང་པོ་གཅིག་ཏུ་སྡུད་པ་སོགས་རྫུ་འཕྲུལ་ཅུང་ཟད་སྟོན་པར་ནུས། སྒོ་གསུམ་ལྷ་དང་སྔགས་སྟོང་ཉིད་ཆོས་སྐུའི་རང་བཞིན་དུ་ཤེས་པས་ཡེ་ཤེས་སྐྱེ་ཞིང་། སངས་རྒྱས་ཀྱི་སྐུ་གསུང་ཐུགས་རང་གི་ལུས་ངག་ཡིད་གསུམ་ལ་མངོན་དུ་བྱ་ཞིང་བྷེ་པས། སངས་
རྒྱས་ཡེ་ཤེས་དང་ཨ་ཧྥུ་ཀ་རས་ས་བདུན་པ་མངོན་དུ་བྱེད་པར་བཞེད་ལ། སློབ་དཔོན་ཀླུ་སྒྲུབ་དང་ཀླུའི་བློ་གྲོས་ཀྱིས་ས་བརྒྱད་པ་མངོན་དུ་བྱེད་པར་བཞེད་ཀྱང་། འདིར་བསྐྱེད་རྫོགས་ཟུང་འཇུག་གིས། རྫོགས་པའི་སངས་རྒྱས་ས་བཅུ་གསུམ་པ་ཐོབ་པར་ངེས་ཏེ། རྡོ་རྗེ་གུར་གྱི་རྒྱུད་ཆེན་པོ་ལས། སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་ནི་མངོན་པར་འགྲུབ། །སྟོན་པ་སུམ་ཅུ་རྩ་གཉིས་མཚན། །གཙོ་བོ་དཔེ་བྱད་བརྒྱད་ཅུར་ལྡན། །དེ་དག་ཐབས་ཀྱི་གཟུགས་ཅན་ནོ། །ཞེས་གསུངས་སོ། །གཞུང་ནས་གསུངས་པའི་མཐའ་ནས་དབུས་ཡལ་གྱི་རྫོགས་རིམ་དེ་ཉིད་རྩེ་གཅིག་ཏུ་བྷེ་ནས་མུན་མཚམས་བྱེད་པའམ་མུན་ནག་ཏུ་བྷེ་སྟེ། མུན་ནག་གི་མཁའ་ལ་མིག་དང་རིག་པ་གཏད་དེ་བྷེ་པས། གཡས་ཀྱི་ས་ཆུ་མེ་རླུང་ནམ་མཁའི་རླུང་ལྔ་དབུ་མར་ཚུད་པའི་རྟགས་ལྔ་འཆར་ཏེ། དང་པོ་སེར་པོའམ་ཁམ་པ་ས་ཚུབ་དུ་བ་ལྟ་བུ་ལང་ལོང་འོང་། དེ་ནས་སྔོ་སྐྱ་ཆུ་འདྲ་གཡོ་བ་ཧྲིབ་ཧྲིབ་སྨིག་སྒྱུ་ལྟ་བུ་འབྱུང་༔ དེ་ནས་དམར་པོ་དམར་ཚག་ཚག་སྐྱ་ཚག་ཚག་འོད་འཕྲོ་བ་སྲིན་བུ་མེ་ཁྱེར་ལྟ་བུ་འབྱུང་། དེ་ནས་མདུན་རྒྱབ་གཡས་གཡོན་གང་རུང་འོད་འབར་བ་མར་མེ་ལྟ་བུ་འབྱུང་། དེ་
ནས་སྔོ་ལ་དྭངས་པ་ནམ་མཁའ་ཁྱབ་པ་སྙམ་བྱེད་པའི་སྤྲིན་མེད་ནམ་མཁའ་ལྟ་བུ་མཐོང་བར་གྱུར་ཏེ། དེ་ནས་ནམ་མཁའ་ཤིན་ཏུ་དྭངས་པ་ལ་ཉིན་མོར་རིག་པ་གཏད་ནས་བྷེ་པས་གཡོན་གྱི་རླུང་ལྔ་རིམ་པར་དྷུ་ཏིར་ཆུད་པས་ཉིན་མོའི་རྟགས་རྣམས་འབྱུང་སྟེ། ནམ་མཁའ་ལ་མེ་འབར་བ་ལྟ་བུའི་སྣང་བ་ནི་དམར་བ་ཞེས་བྱ། ཟླ་བའི་རྣམ་པ་དང་། ཉི་མའི་རྣམ་པ་དང་། ནག་པོ་སླ་ངའི་རྒྱབ་ལྟ་བུ། སྒྲ་གཅན། རིན་པོ་ཆེ་དང་། བར་སྣང་གི་གློག་ལྟ་བུའི་མཆོག་གི་ཆ་མཐོང་ཞིང་། རྣམ་པ་ཀུན་ལྡན་གྱི་སྟོང་གཟུགས་ཐིག་ལེ་དང་བུམ་པ་དང་། རས་ཡུག་ལ་སོགས་པ་སྣ་ཚོགས་པའི་གཟུགས་དང་། ཐིག་ལེ་སེར་དཀར་དམར་ནག་སྔོན་པོ་ལྗང་ཁུའི་རྣམ་པ་འབྱུང་སྟེ། ས་ཆུ་མེ་རླུང་ནམ་མཁའ་ཡེ་ཤེས་སྣ་ཚོགས་ཐིག་ལེ་ཞེས་བྱ་བས། ཐིག་ལེའི་ནང་དུ་ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་སྣ་ཚོགས་མཐོང་སྟེ། རྣམ་པ་མཆོག་ལྡན་གྱི་སྐུའོ། །དེའི་ཚེ་གཞོམ་དུ་མེད་པའི་སྒྲ་ཐོས་པར་གསུངས་སོ། །དེ་ནས་ཐིག་ལེ་ཁ་དོག་ཅི་རིགས་པའི་དབུས་སུ་རི་མོ་ནག་པོ་སྐྲའི་ཚད་ཙམ་རིང་ཐུང་ཅི་རིགས་པའི་ནང་དུ་སངས་རྒྱས་ཀྱི་སྐུ་དང་། རིགས་དྲུག་གི་གཟུགས་སྣ་ཚོགས་
མཐོང་བར་འབྱུང་བ་ནི། ངེས་པའི་སྐུ་ཞེས་པ་བསྟན་པའི་སྐུ་ཞེས་བྱ་སྟེ། རྟགས་ཀྱི་མཐར་ཐུག་པ་ཡིན་ཏེ། དུས་ཀྱི་འཁོར་ལོའི་རྒྱུད་ཆེན་པོ་ལས། ནམ་མཁའ་ཀུན་ནས་ཞེན་པའི་སེམས་དང་། མིག་འཛུམ་ཞིང་རྡོ་རྗེའི་ལམ་ལ་རབ་ཏུ་ཞུགས་པ་ཡིས། སྟོང་པ་ལ་ནི་དུ་བ་སྨིག་རྒྱུ་རབ་གསལ་དྲི་མ་མེད་པའི་མཁའ་སྣང་ཉིད་དང་། མར་མེ་དང་། འབར་བ་དང་ཟླ་བ་ཉི་མ་རྡོ་རྗེ་རྣམས་དང་མཆོག་གི་ཆ་ཐིག་ལེ་མཐོང་བར་འགྱུར། དེའི་དབུས་སུ་སངས་རྒྱས་གཟུགས་ནི་ཡུལ་དང་རྣམ་པར་བྲལ་བ་དུ་མ་ལོངས་སྤྱོད་རྫོགས་པའི་སྐུ། ནམ་མཁའ་ཆུ་འཛིན་བྲལ་བ་དག་རྣལ་འབྱོར་པས་བསྒྲད་པའི་མིག་གིས་བལྟ་བར་བྱ་སྟེ། རེ་ཁ་ནག་པོ་དྲི་མེད་འོད་ཟེར་འཕྲོ་བ་དུས་ཀྱི་རྩ་ལ་མཐོང་བར་འགྱུར་གྱི་བར་དུའོ། །དེ་ལ་ཀུན་མཁྱེན་གཟུགས་ནི་ཆུ་ལ་ཉི་མ་ལྟ་བུར་གུས་པ་མེད་པ་ཁ་དོག་སྣ་ཚོགས་ཏེ། རྣམ་པ་ཀུན་ལྡན་རང་སེམས་ཡུལ་དང་རྣམ་པར་བྲལ་བ་དག་གོ །སེམས་ནི་གཞན་མ་ཡིན་པ་ཉིད་ཅེས་གསུངས་སོ། །དྲི་མེད་འོད་ལས། དེའི་དོན་ནི། དེ་ཡང་མཚན་མའི་དབྱེ་བ་རྣམ་པ་བཅུ་སྟེ། དུ་བ་དང་། སྨིག་སྒྱུ་དང་། མེ་ཁྱེར་དང་། མར་མེ་དང་། འབར་བ་དང་། ཟླ་བ་དང་། ཉི་
མ་དང་། སྒྲ་གཅན་དང་། ཆ་ཤས་དང་། ཐིག་ལེ་མཐོང་བའི་དབྱེ་བས་མ་བཏགས་པའི་ཡེ་ཤེས་ཀྱི་ཕུང་པོའོ། །ཞེས་གསུངས་ཏེ་རྟགས་བཅུ་སྟེ་འདི་ཆོས་སྐུ་རང་ལ་ཡོད་པའི་རྟགས་ཀྱི་རྒྱུ་མཚན་ཡིད་ཆེས་པའོ། །བསམ་པ་ཐམས་ཅད་ཡོངས་སྤངས་ནས། །སྟོང་པ་རྩེ་གཅིག་ཡིད་བྱས་ཏེ། །ཉི་མ་གཅིག་ཏུ་ཡོངས་སུ་བཏགས། །གལ་ཏེ་ཡིད་ཆེས་མ་བྱུང་ན། །དེ་ཚེ་ང་ཡི་རྫུན་ཚིག་ཡིན། །ཞེས་དུས་འཁོར་རྩ་རྒྱུད་ལས་གསུངས་པ་ཡིན་ནོ། །ཕྱག་རྒྱ་ཆེན་པོ་བསྒོམ་པ་ལ་མིག་གི་མཐོང་སྣང་དེ་འདྲ་འོང་མི་སྲིད་སྙམ་ན་དེ་ཉིད་རྣལ་འབྱོར་ཉམས་ལ་ཅི་ཡང་འཆར། །ཞེས་རྗེ་མི་ལས་གསུངས་པ་ལྟར། ཉམས་ཀྱི་བྱེ་བྲག་སྟེ་དེ་ཉིད་རང་ཏིང་ངེ་འཛིན་ཕྱག་རྒྱ་ཆེན་པོ་ལས་འདས་པ་ཡིན་ཏེ། འབུམ་དང་ཉི་ཁྲི་ལས་དྲི་མ་མེད་པའི་སྒྲོན་མ་ཞེས་བྱ་བའི་ཏིང་ངེ་འཛིན་དང་། སྒྲོན་མེ་འབར་བ་ཞེས་བྱ་བའི་ཏིང་ངེ་འཛིན་ཡོད་དོ། །དེ་ཏིང་ངེ་འཛིན་དེ་ལས་བསྐྱེད་པའི་བྱང་ཆུབ་སེམས་དཔའ་ནི་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱའོ། །ཞེས་སོགས་རྒྱ་ཆེར་གསུངས་ཤིང་། མྱ་ངན་འདས་མདོ་ལས། ཟླ་བའི་འོད་ཟེར་གྱིས་ཏིང་ངེ་འཛིན་ཐོབ། ཅེས་
དང་། འབུམ་དང་ཉི་ཁྲིར་ཟླ་བ་བཟང་པོ་ཞེས་བྱ་བའི་ཏིང་ངེ་འཛིན་ཞེས་གསུངས་སོ། །དེ་ལྟར་མུན་པ་དང་ནམ་མཁའི་རྣལ་འབྱོར་སོགས་མིན་པར་རང་ག་རྫོགས་རིམ་སྟོང་ཉིད་ལ་གོམས་པར་བྱས་པས་ཉམས་རིམ་པ་གསུམ་འཆར་ཏེ། ཏེ་ལོ་པས། ལས་ནི་དང་པོ་གཅོང་རོང་ཆུ་དང་འདྲ། །བར་པ་ཆུ་བོ་གང་གཱ་དལ་གྱིས་གཡོ། །ཐ་མ་ཆུ་རྣམས་མ་བུ་འཕྲད་པ་འདྲ་། །ཞེས་དང་། སློབ་དཔོན་ཆེན་པོ་དགའ་རབ་རྡོ་རྗེས་མཛད་པའི་པྲ་ཁྲིད་ཉམས་ཀྱི་མན་ངག་ལས། དང་པོར་གནས་པའི་ཏིང་ངེ་འཛིན་དང་། གཉིས་པ་ལ་ནི་མི་གཡོ་བ། །གསུམ་པ་མཉམ་པ་ཉིད་དུ་སྦྱོར། །བཞི་པ་ཡེ་ཤེས་ལྷུན་གྱི་གྲུབ། །ཅེས་གསུངས་སོ། །དེ་ལ་དང་པོ་གནས་པའི་ཏིང་ངེ་འཛིན་ནི། གཞུང་འདི་ཉིད་ལས། འཁོར་བའི་འདུ་འཛི་སྤངས་ནས་ནི། །དགོན་པར་མཉམ་པར་བཞག་པའི་ཚེ། །སྐྱོན་གྱིས་ཚོགས་རྣམས་མ་བྱུང་བ། །ཇི་སྲིད་གནས་ལ་གནས་ཞེས་བྱ། །དཔེར་ན་སྐྱེས་བུ་འཇིགས་བཅས་ཤིག །ལམ་ལ་ཤིན་ཏུ་བགྲོད་པའི་ཚེ། །རང་ཡུལ་སྣང་བ་མཐོང་བསླེབས་ནས། །འཇིགས་པའི་རྟོག་པ་མེད་དང་འདྲ། །ཞེས་གསུངས་ལ། དང་པོར་གནས་པ་ཏིང་ངེ་འཛིན་དེ་ཐོབ་པའི་རྟགས་
ནི། དེ་ཉིད་ལས། འཁོར་བའི་ཆོས་ལ་སྐྱོ་བ་སྐྱེ། །རང་གི་གནས་ལ་མི་ཆགས་ཤིང། །ཐག་རིང་གཞན་དུ་འགྲོ་བར་འདོད། །ཅེས་གསུངས་ཤིང་། རྣལ་འབྱོར་པ་དེ། ཤི་ན་ཅི་ལྟར་འགྱུར་བ་ཡང་། །རྣལ་འབྱོར་པ་དེ་འགགས་པའི་ཚེ། །ངེས་པར་མི་ལུས་ཐོབ་ནས་ནི། །ཆོས་སྤྱོད་པ་དང་ལྡན་གྱུར་ནས། །དེ་ཚེ་ཆོས་ཉིད་བདེན་པ་མཐོང་། །ཞེས་གསུངས་སོ། །གཉིས་པ་མི་གཡོ་བའི་ཏིང་ངེ་འཛིན་གྱི་གཞུང་དེར། ཇི་སྲིད་མཉམ་པར་བཞག་པའི་ཚེ། །སྐྱོན་གྱིས་རྣམ་པ་གང་འགགས་ནས། །རང་བྱུང་ཡེ་ཤེས་དྲོད་དང་ལྡན། །ཉིན་མཚན་འདས་ཀྱི་བར་དུ་གནས། །ཞེས་གསུངས་ནས་ཏིང་ངེ་འཛིན་དེའི་དཔེ་ནི། མི་རྟོག་ཐིག་ལེའི་ངང་ལ་གནས་པ་ནི། །མ་བསྐྱོད་དྭངས་མའི་རྒྱ་མཚོ་ཆེན་པོ་དང་། །མི་གཡོ་གསལ་བ་ཏིལ་གྱི་མར་མེ་འདྲ། །དེ་ནི་ཡེ་ཤེས་བདེ་བའི་དྲོད་ཅེས་བྱ། །ཞེས་གསུངས། དེའི་རྟགས་བསྟན་པ་ནི་དེ་ཚེ། །ཟས་དང་གོས་ཀྱི་འདུ་ཤེས་ཆུང་། །ཉོན་མོངས་ལ་སོགས་ཆགས་སྡང་ཆུང་། །སྙིང་རྗེ་ཕན་སེམས་རབ་ཏུ་ཆེ། །རྨི་ལམ་བཟང་རྟགས་རབ་ཏུ་འབྱུང་། །ཞེས་གསུངས་པས། དེ་ཡི་རྣལ་འབྱོར་ཤི་ན་ཅི་འགྱུར་
ནི། །དེ་ལྟ་བུ་ཡི་རྣལ་འབྱོར་པ། །འབྱུང་བ་ལྔ་པོ་ཞིག་པའི་ཚེ།། །ལྷ་ཡི་རིག་འཛིན་ཆེན་པོ་ཐོབ། །ཚེ་འདི་ཉིད་ལ་མངོན་སངས་རྒྱས། །ཞེས་གསུངས་ཤིང་། བཞི་པ་ཡེ་ཤེས་ལྷུན་གྲུབ་ཀྱི་ཏིང་ངེ་འཛིན་ནི། གཞུང་དེར། འཁོར་བ་མྱ་ངན་འདས་པའི་ཆོས། །ཇི་ལྟ་བུ་ཡང་མ་གཟིགས་ཏེ། །ཐམས་ཅད་མཉམ་པ་ཉིད་དུ་བསལ། །ལོ་ཟླ་འདས་ཀྱང་དེ་བཞིན་གནས། །ཞེས་དང་། དེའི་དཔེ་ནི། མཉམ་ཉིད་མི་གཡོ་ཆོས་ཀྱི་སྐུ། །བཟུང་བས་མི་ཟིན་ཆུ་ཟླ་འདྲ། །རྟོག་མེད་མཉམ་པ་དེ་ཉིད་ནི། །ཁྱུང་ཆེན་ནམ་མཁར་ལྡིང་དང་མཚུངས། །ཞེས་གསུངས་ནས་དེའི་རྟགས་ནི། ཡོ་བྱད་འདུ་ཤེས་ཐམས་ཅད་འགགས། །དགེ་དང་མི་དགེའི་རྣམ་རྟོག་མེད། །ཉོན་མོངས་སྒྲིབ་པ་རྣམ་པར་དག །ཉམས་ཀྱི་རྨིས་ལྟས་སྣ་ཚོགས་འབྱུང་། །ཞེས་གསུངས་ནས་དེའི་འབྲས་བུ་ནི། མཉམ་པ་ཉིད་ཀྱི་ངོ་བོ་ལས། །ལམ་དང་ས་ཡི་རིག་འཛིན་ཐོབ། །དེ་ཡང་བརྗོད་དུ་མེད་པ་སྟེ། །དེ་ཚེ་ཉིད་ལ་མངོན་སངས་རྒྱས། །ཞེས་གསུངས་ཏེ། འདི་ནི་ཕྱག་རྫོགས་དབྱེར་མེད་ཀྱི་དོན་གྲུབ་ཆེན་ཀརྨ་པཀྴིས་བཞེད་པས། ཐུགས་རྗེ་ཆེན་པོའི་རྒྱལ་བ་རྒྱ་མཚོའི་ཆོས་སྐད་ཡིན་པ་སྟེ། ཟབ་
ཆོས་རྒྱ་མཚོ་མཐའ་ཡས་ལས། བྲམ་ཟེ་ཆེན་པོ་ས་ར་ཧ་དང་དགའ་རབ་རྡོ་རྗེ་གཉིས་མིང་ལ་ཐ་དད་ཡོད་ཀྱང་དོན་ལ་དགོངས་པ་གཅིག་པའི་ཕྱིར་ན། དེ་གཉིས་ཀྱི་དགོངས་པ་གཅིག་ཕྱིར་ཐུགས་གཉིས་སུ་མེད་པའི་ཡེ་ཤེས་རང་བྱུང་རྒྱ་མཚོ་ནམ་མཁའ་ཉི་ཟླ་ཀུན་ཁྱབ་རང་བྱུང་ཡེ་ཤེས་རང་ལ་ཤར་བའི་ཡང་དག་དོན་གྱི་འོག་མིན་གནས་ལུགས་ཕྱོགས་མེད་དུ་རྟོགས་ཤིང་འོག་མིན་ལྔ་དང་ལྡན་པ་རྟོག་པ་རབ་འབྱམས་སྐུ་ལྔ་ཡེ་ཤེས་ལྔ་ལ་སོགས་པ་ཐམས་ཅད་རང་ལ་རྫོགས་པ་སྟེ། གཅིག་ཆར་བའི་རྟོགས་ཚུལ་ལོ། །རིམ་གྱིས་འཇུག་པ་དང་གཅིག་ཆར་གཉིས་གནས་ལུགས་ཕྱོགས་མེད་དུ་རྟོགས་ཤིང་གོམས་འདྲིས་མཐར་ཕྱིན་པའི་དུས་སུ། ཇི་ལྟར་ཆུ་ལ་ཆུ་བཞག་པ་བཞིན་དུ་གང་ལ་ཡང་ཐ་དད་མེད་པའོ། །དེའི་ཕྱིར་ན་སྟོང་པ་རབ་འབྱམས་རང་བྱུང་ཡེ་ཤེས་འབའ་ཞིག་ལ་དུས་རྒྱུན་དུ་གཡོ་འགུལ་མེད་པར་ཆུ་བོའི་རྒྱུན་གྱི་རྣལ་འབྱོར་དུ་བྱའོ། །ཞེས་གསུངས་སོ། །གཞན་ཡང་གྲུབ་ཆེན་ཀརྨ་པཀྴིསམཛད་པ་གདམས་ངག་རྒྱ་མཚོ་མཐའ་ཡས་ལས་ཀྱང་། རྡོ་རྗེ་ཐེག་པ་ཕྱག་རྫོགས་གཉིས། །དབྱེར་མེད་རྒྱུ་དང་འབྲས་བུ་ལྟར། །གང་ལའང་ཐ་དད་མེད་པ་ཡིན། །ཞེས་གསུངས་སོ། །དེ་
ནི་ཐུགས་རྗེ་ཆེན་པོ་རྒྱལ་བ་རྒྱ་མཚོའི་རྫོགས་རིམ་ཟབ་མོའི་བསྒོམ་ཉམས་འཆར་ཚུལ་ཡིན་ལ། དེ་ཡང་ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་དགུའི་ཟབ་པའི་རྫོགས་རིམ་རྩ་རླུང་ཐིག་ལེའི་གདམས་པ། འཁོར་ལོ་ལྔའི་རྩ་ལ་བརྟེན་ནས། དུག་ལྔ་དང་རིགས་དྲུག་གི་ས་བོན་སྦྱང་ཚུལ་གྲུབ་ཆེན་ཀརྨ་པའི་ཞལ་གདམས་གཉེན་རས་སངྒ་ལཀྵ་ནས་རིན་པོ་ཆེ་རང་བྱུང་ལས་སྙན་དུ་བརྒྱུད་པ་དེ་ཉིད་གཙོ་བོར་ཉམས་སུ་ལེན་ན། རླུང་ལྔ་ཟིན་པའི་རྟགས་ལུས་ཉམས་དང་སེམས་ཉམས་དང་རྨིས་ཉམས་གསུམ་འབྱུང་སྟེ། ས་རླུང་ཟིན་པས་ལུས་ལྕི་ལ་སྡོད་ཚུགས་རྨི་ལམ་དུ་དུད་པའམ་ས་ཚུབ་བམ་ཁུར་གྱིས་མནན་པ་རི་རྡོ་ཁང་པ་ཆེན་པོ་མཐོང་བ་རྨིས། སེམས་ཉམས་པ་སྟེང་དུ་འགྲོ་སྙམ་བྱེད་གཏི་མུག་ཤས་ཆེའོ། །ཆུ་རླུང་ཟིན་པས་ལུས་གྲང་ལ་འཇམ། རྨི་ལམ་གྲུར་ཞུགས་པ་ཆུ་ལས་བརྒལ་བ་དང་། ཆུ་ཆེན་པོ་རྨིས། སེམས་གསལ་ལ་དྭངས་ང་རྒྱལ་ཤས་ཆེའོ། །མེ་རླུང་ཟིན་པས་ལུས་དྲོད་ཆེ་རྡུལ་མང་རྨི་ལམ་དུ་མེ་འབར་བ་དང་མེ་དུ་བ་རྨིས། སེམས་ཉམས་ཅུང་ཟད་འཕྲོ་ཞིང་ཚིག་པ་ཟ་འདོད་ཆགས་ཤས་ཆེ་བའོ། །དེ་དུས་ངལ་གསོ་ཞིང་བསྒོམ་བྱ། རླུང་གི་རླུང་ཟིན་པས་ལུས་ཡངས་ཤིང་བདེ་ཡང་འདུག་མི་ཚུགས།
རྨི་ལམ་དུ་རྟ་རྒྱུག་པ་དང་བྱའི་ཁྱུ་དང་རང་ཉིད་འཕུར་བ་རྨིས། སེམས་སྤྲོས་ཀྱང་མི་འཕྲོ་བར་གནས་ཕྲག་དོག་ཤས་ཆེ་བའོ། །ནམ་མཁའི་རླུང་ཟིན་པས་ལུས་ཡངས་ཤིང་མེད་པ་སྙམ་པའོ། །རྨི་ལམ་ཐང་ཆེན་པོ་དང་རིའི་རྩེ་ནས་ནམ་མཁའ་དང་ས་གཞི་རྒྱ་ཆེན་པོ་མཐོང་བར་རྨིས། སེམས་མི་རྟོག་པ་ལ་གནས་ཤིང་སྟོང་ཤས་ཆེ། སེར་སྣ་ཤས་ཆེ་བར་འོང་། གཏུམ་མོ་སྦར་བས་ལུས་ལ་དྲོད་ཁོལ་ཆེར་སྐྱེ་བ་དང་། སྟོད་སྨད་དུ་སྐྱེ་བ་དང་། ལུས་ཐམས་ཅད་ལ་སྐྱེ་བ་དང་། ཟས་སྔར་བས་འཇུ་སྟོབས་ཆེ་ནས་སྔར་བས་གྲོད་པ་ཆེ་བ་དང་། རིགས་པ་གསལ་བ་དང་ཁམས་དྭངས་བ་འབྱུང་། དེ་ནས་ཐིག་ལེ་བསྒོམས་པས་ལུས་སེམས་ལ་དགའ་བདེ་སྐྱེ། ལུས་མཉེན་ཅིང་བདེ་བ་སོགས་འབྱུང་། སྤྱིར་རྩ་རླུང་བསྒོམ་པས་ཐུན་མོང་གི་འདུ་བ་བཞི་དང་མཆོག་གྱུར་ཡོན་ཏན་བཞི་དང་བརྒྱད་འབྱུང་སྟེ། དང་པོ་རྩ་བྷེ་པས་ནོར་འདུ། རླུང་གིས་མི་འདུ། ཐིག་ལེས་མཁའ་འགྲོ་འདུ། ཆ་སྙོམས་བྷི་པས་ཁམས་གསུམ་གྱི་ཚེ་དཔལ་འདུའོ། །མཆོག་གྱུར་གྱི་ཡོན་ཏན་བཞི་ཐོབ་པར་གསུངས་པ་ནི་ཐུལ་སེལ་དང་གྱེན་རྒྱུའི་རླུང་ལ་དབང་ཐོབ་ན་ཉི་ཟླ་སྟོད་ལ་གནོན་ནུས། མེ་ཉམས་རླུང་ལ་
དབང་ཐོབ་ན་བསྐལ་པའི་འཐོར་རླུང་གིས་ཀྱང་གཞོམས་མི་ནུས། སྲོག་འཛིན་གྱི་རླུང་ལ་དབང་ཐོབ་ན་ཆུ་བོ་གྱེན་ལ་ཟློག་ནུས། ཁྱབ་བྱེད་ཀྱི་རླུང་ལ་དབང་ཐོབ་ན་ནམ་མཁའ་ལ་འགྲོ་འཆག་ཉལ་སོགས་ནུས་སོ། །གཏུམ་མོ་བསྒོམ་པའི་ཡོན་ཏན་ནི། ཕྱི་ཡི་གཏུམ་མོས་བགེགས་རིགས་སྟོང་ཕྲག་བརྒྱད་ཅུའི་རྩ་བཞི་འཇོམས་ཤིང་ལུས་ལ་དྲོད་སྐྱེད་པར་བྱེད་དོ། །ནང་གི་གཏུམ་མོས་ནད་རིགས་བཞི་བརྒྱ་རྩ་བཞི་ཞི་ཞིང་ལུས་ལ་བདེ་བ་སྐྱེད་པར་བྱེད། གསང་བའི་གཏུམ་མོས་ཉོན་མོངས་པ་བརྒྱད་ཁྲི་བཞི་སྟོང་འཇོམས་ཤིང་ལུས་སེམས་བདེ་སྟོང་གི་ཡེ་ཤེས་སྐྱེད་པར་བྱེད། དེ་ཁོ་ན་ཉིད་ཀྱི་གཏུམ་མོས་མ་རིག་པའི་མུན་པ་ཐམས་ཅད་འཇོམས་པས་གཏུམ། རང་རིག་ཡེ་ཤེས་བསྐྱེད་པའི་མ་ཡིན་པས་ན་མོ་ཞེས་བྱ་བ་ཡིན་ནོ།། ༈ དེ་ལྟར་བསྐྱེད་རྫོགས་ཟུང་འཇུག་གི་ངོས་ནས་ཉམས་ལེན་དེ་ལྟ་བུ་ལ་སྤྱོད་པ་ཅི་ལྟ་བུ་ཞེ་ན། སྤྱིར་ཐུགས་རྗེ་ཆེན་པོའི་ཉམས་ལེན་དེ་ཡུན་བསྲིང་བའི་སྤྱོད་པ་སྟེ། རྒྱལ་བ་རྒྱ་མཚོ་བ་མཁལ་མ་ལས། དེ་ཡི་ངང་ལས་མི་འདས་ཏེ། ཡུན་རིང་དུ་གནས་བསྐྱེད་པའོ། །ཞེས་གསུངས་ལ། དེ་ཡང་རྒྱལ་པོ་ཨིནྡྲ་བྷུ་ཏི་ལྟར་གཞལ་ཡས་ཁང་གི་ནང་དུ་བཙུན་མོའི་འཁོར་
ཚོགས་ཆེན་པོས་འདོད་ཡོན་སྣ་ཚོགས་ཀྱི་རང་ཉིད་ལྷར་གསལ་བ་ལ་མཆོད་པ་སྤྲོས་པས་རྒྱ་ཆེན་པོར་སྤྱོད་པ་དང་། ཡང་ན་དེ་ལྟ་བུའི་སྤྱོད་པ་ལོ་ཟླའམ་ཞག་ཅི་རིགས་ལ་སྤྲོས་བཅས་ཀྱི་སྤྱོད་པ་པདྨ་རྒྱལ་པོ་ལྟ་བུ། ཡང་དབེན་པའི་ཕུག་ཏུ་སློབ་མ་མོ་གསང་སྔགས་སུ་ཤེས་པས་གླུས་བསྐུལ་ཏེ་དགའ་བ་བཞི་སོགས་འདོད་ཡོན་ལ་རོལ་པས་སྤྲོས་པ་བསྡུས་པ་རས་ཆུང་བ་ལྟ་བུའོ། །དེ་ཡི་གོམས་ནས་རིགས་ལྡན་བསྟེན་ཅིང་སྤྱོད་པ་སློབ་དཔོན་དྲིལ་བུ་པ་ལྟ་བུ། སྤྲོས་པ་བསྡུས་པའི་སྤྱོད་པ་དེ་གསུམ་ནི་ཆགས་ཆེན་གྱི་སྤྱོད་པ་ཆགས་ལམ་པ་རྩ་རླུང་ལ་རང་དབང་ཐོབ་པས་བྱའི་གཞན་གྱིས་མི་རུང་ངོ་། །ཆགས་བྲལ་གྱི་སྤྱོད་པ་གྲོལ་ལམ་པས་བྱ་བ་ལ། བུད་མེད་ཤིན་ཏུ་སྤངས་ཏེ་དབེན་པར་བསྒྲུབ་གཡོག་དང་འཚོ་བའི་ཡོ་བྱད་ཙམ་ལས་གཞན་པའི་བྱ་བ་བཏང་ནས་ཐུན་མོང་དངོས་གྲུབ་ཐམས་ཅད་ལ་འདོད་པ་སྤངས་ནས་མཆོག་གི་དངོས་གྲུབ་ཁོ་ན་འདོད་པས་ཏིང་ངེ་འཛིན་རྩེ་གཅིག་བསྒོམ་པས་ཤིན་ཏུ་སྤྲོས་མེད་ཀྱི་སྤྱོད་པ་༔ ཟ་བ་དང་གཉིད་ལོག་པ་དང་གཤང་ལྕི་ཙམ་ལ་ཞེན་པའི་ཆོས་དང་ཆོས་མིན་གྱི་བྱ་བ་ཐམས་ཅད་སྤངས་ནས་རྫོགས་རིམ་སྟོང་ཉིད་ཁོ་ན་བྷོ་པ་བྷུ་སུ་ཀུའི་སྤྱོད་པ། རྐྱེན་བཟང་ངན་
ཐམས་ཅད་ལ་བསྲེ་ཞིང་སྤང་བླང་དགའ་སྡུག་མེད་པ་སྨྱོན་པའི་བརྟུལ་ཞུགས་སྤྱོད་པ་སྟེ་གྲོལ་ལམ་པའི་སྤྱོད་པ་གསུམ་དང་དྲུག་ནི་ཕ་རྒྱུད་ཀྱི་ལུགས་ཡིན་ཏེ། གསང་བ་འདུས་པའི་རྒྱུད་ལས། ཨཱརྱ་དེ་བའི་སྤྱོད་བསྡུས་སྒྲོན་མ་ལས་རྒྱ་ཆེར་གསུངས་སོ། །ཡང་སྡོམ་པ་གསུམ་ལྡན་དུ་སྲུང་ཞིང་བསྐྱེད་རྫོགས་ཀྱི་དོན་ཉམས་སུ་ལེན་ཞིང་སྤྱོད་ལམ་ཐམས་ཅད་དུ་སྟོང་ཉིད་ཀྱི་ཉམས་ལེན་དང་མ་བྲལ་བར་ཀུན་ཏུ་བཟང་པོའི་སྤྱོད་པ་རླུང་སོར་རྩེ་ནས་ཐོན་པ་དང་། རྡོ་རྗེས་ཆུ་དང་འོ་མ་འདྲེན་པ་སོགས་ནུས་ན། རང་ཉིད་ལྷའི་རྒྱན་ཆ་ལུགས་བྱས་ལ་ཕྱག་རྒྱ་མཚན་ལྡན་ནམ་ལྷ་དང་གནོད་སྦྱིན་སོགས་ཀྱི་བུ་མོ་ཁྲིད་དེ་དུར་ཁྲོད་དབེན་པར་བདེ་སྟོང་ཉམས་སུ་མྱོང་བ་གསང་སྤྱོད་དེ་རྗེ་མི་ལ་ལྟ་བུའོ། །ལུས་རྒྱན་དྲུག་གིས་བརྒྱན་ཏེ་ཕྱག་རྒྱ་མོ་ཁྲིད་ནས་གྲོང་ཁྱེར་དུ་རྒྱུ་སྟེ། ཕྱིར་ཁ་བཏང་ནས་རྫུ་འཕྲུལ་གྱིས་མ་དད་པ་ལྡོག་པ་ཌོམ་བྷི་པ་དང་དྲིལ་བུ་པ་ལྟ་བུ་ནི་རིགས་པ་བརྟུལ་ཞུགས་ཀྱི་སྤྱོད་པ། ཚོང་འདུས་ཁྲོམ་ཆེན་རིགས་ངན་ནམ་རྒྱལ་པོའི་ཁྱིམ་དུ་སྤྱོད་པ་མི་འཚམས་པ་སྣ་ཚོགས་བྱས་པ་བརྡུང་བཙོག་སོགས་བྱུང་ན་ཏིང་ངེ་འཛིན་གྱི་བོགས་ཐོན་རྫུ་འཕྲུལ་གྱིས་ཕ་རོལ་བྱང་ཆུབ་ལ་འགོད་དེ། གཙང་སྨྱོན་དང་མི་ཏྲ་ཛཱ་ཀི་ལྟ་བུའི་ཚོགས་
སྤྱོད་དང་། དུག་བདུད་རྩིར་བསྒྱུར་བ་སོགས་ནུས་ཤིང་གཉིད་དང་བྲལ་འཁོར་འདས་ལ་སྤང་བླང་མེད་པ་ཕྱོགས་ལས་རྣམ་རྒྱལ་གྱི་སྤྱོད་པ་འདི་སྤྱོད་དང་འདི་མི་སྤྱོད་ཀྱི་བྱེ་བྲག་མེད་པ་ཏེ་ལོ་པ་ལྟ་བུའོ། །དེ་ལྟར་ལྔ་ནི་མ་རྒྱུད་ནས་བཤད་པའི་སྤྱོད་པ་ཡིན་ལ། ཡང་གསང་སྔགས་རྙིང་མའི་ལུགས་ཀྱི་སྤྱོད་པ་ལ་ཡང་བརྒྱད་དེ། དང་པོ་འཁོར་བར་སྐྲག་ནས་ཚེ་འདིའི་ལོངས་སྤྱོད་ལ་མ་ཆགས་པར་ཆོས་ལ་བྲོས་པ་ཤ་བཙོན་ལྟ་བུའི་སྤྱོད་པ། ཆོས་དང་གདམས་ངག་ཚོལ་བའི་ཚེ་དགེ་བའི་བཤེས་གཉེན་ཐམས་ཅད་ལ་དད་གུས་ཀྱིས་གདམས་ངག་ལེན་པ་བུང་བ་ལྟ་བུའི་སྤྱོད་པ། ཐབས་སྣ་ཚོགས་ཀྱིས་ཚོགས་བསགས་པ་ཁྱིམ་པ་ལྟ་བུའི་སྤྱོད་པ། གཅིག་པུར་སྒྲུབ་པ་བྱེད་པ་རི་དྭགས་རྨས་མ་ལྟ་བུའི་སྤྱོད་པ། ཉམས་ལེན་དྲོད་ཐོབ་ནས་ངོ་བསྲུང་དང་ཕྱོགས་འཛིན་མེད་པར་ཉམས་བྱུང་རྒྱལ་དུ་སྐྱོངས་བ་སྨྱོན་པ་ལྟ་བུའི་སྤྱོད་པ་སྟེ། རྗེ་གླིང་རས་ལྟ་བུ། འཁོར་འདས་རེ་དོགས་མེད་པ་སེང་གེ་ལྟ་བུའི་སྤྱོད་པ། ཟས་དང་སྤྱོད་པ་ལ་གཙང་བཙོག་མེད་པར་སྤྱོད་པ་ཁྱི་ཕག་ལྟ་བུའི་སྤྱོད་པ་སྟེ། གྲུབ་ཆེན་སརྦ་འབག་དང་ལུ་ཧི་པ་ལྟ་བུ། རང་དོན་མཐར་ཕྱིན་ནས་གཞན་དོན་གང་ཕན་བསྟན་པ་དང་སེམས་
ཅན་གྱི་དོན་བྱེད་པ་རྒྱལ་པོ་ལྟ་བུའི་སྤྱོད་པ་ལྟ་བུའོ། །དེ་ལ་ཆགས་ཆེན་གྱི་སྤྱོད་པ་དང་བརྟུལ་ཞུགས་ཀྱི་སྤྱོད་པ་རྣམས་སྔོན་གྱི་གྲུབ་ཆེན་རྣམས་ཀྱི་སྤྱོད་པ་ཡིན་གྱི། དེང་སང་རང་རེ་རྣམས་ཀྱི་སྤྱོད་ཡུལ་མ་ཡིན་པས། འདིར་མིང་སྨོས་པ་ཙམ་ཞིག་པས་ས་བཅད་སྟོང་དོགས་པ་ལས་མ་བྲིས་པ་ལ། དེའི་དོན་དྲི་མེད་འོད་ལས། ལས་དང་པོ་པས་རྣལ་འབྱོར་གྱི་བྱ་བ་མི་བྱ། རྣལ་འབྱོར་པས་གྲུབ་ཐོབ་ཀྱི་བྱ་བ་མི་བྱ། གྲུབ་ཐོབ་པས་སངས་རྒྱས་ཀྱི་བྱ་བ་མི་བྱ། ཞེས་དང་། བརྡ་ཙམ་གོ་སྟེ་ལས་དང་པོ་པས་གོམས་པ་རབ་ཀྱི་སྤྱོད་པ་བྱས་ན་ངན་སོང་དུ་ལྟུང་། ཞེས་དང་། མི་ལ་རས་པས། དད་ལོག་གི་སྣང་བསྒྱུར་མི་ཤེས་པས། །ཐོ་ཅོའི་གཅེར་བུར་མ་རྒྱུག་ཅིག །ཅེས་དང་། ཁྲོ་ཕུ་ལོ་ཙཱ་བས། སྐྱེ་བོའི་དབུས་སུ་གཏེར་བུར་རྒྱུག་པ་སོགས། །ཐོ་ཅོའི་སྤྱོད་པ་བརྟུལ་ཞུགས་ཡིན་སྙམ་ཡང་། །ཐ་མལ་པ་རྣམས་མ་དད་སྐྱེ་བའི་རྒྱུ། །བག་ཡོད་བསྟན་པ་ཁོ་བོའི་སྙིང་གཏམ་ཡིན། །ཞེས་དང་། གསང་བ་སྤྱོད་པའི་རྒྱུད་ལས་ཀྱང་། ལྟ་བ་མི་ལྡན་སྤྱོད་པ་དང་། །སྤྱོད་པ་མི་ལྡན་ལྟ་བ་གཉིས། །འདི་ནི་གསང་སྔགས་དམ་ཚིག་སྟེ། །མནར་མེད་སེམས་ཅན་དམྱལ་བར་འགྲོ། །ཞེས་
གསུངས་ཏེ། སྤྱོད་པར་མི་ལྡན་ལྟ་བ་ནི། ལྟ་བ་བཟང་པོ་རྟོགས་ཀྱང་ལས་རྒྱུ་འབྲས་ལ་མི་འཛེམ་ན་དམྱལ་བར་ལྷུང་ངོ་། །ལྷའི་བུས་ཞུས་པའི་མདོ་ལས། ལྟ་བ་ཡངས་བར་མི་བགྱི་རྒྱུས། །ཆོས་ཀྱི་དབྱིངས་ལ་ཡངས་དོག་མེད། །སྤྱོད་པ་ཞིབ་ཏུ་མི་བརྩི་རྒྱུས། །ཁམས་གསུམ་འཁོར་བ་གཡང་ས་ཆེ། །ཞེས་དང་། ཕ་དམ་པས། དཔའ་སྡར་འཛངས་གསུམ་བྱང་ཁའི་འབྲོང་ལ་ཚང་། ལྟ་བའི་དུས་སུ་དཔའ་དགོས། བསྒོམ་པའི་དུས་སུ་འཛངས་དགོས། སྤྱོད་པའི་དུས་སུ་སྡར་དགོས། ཞེས་གསུངས་སོ། །ལེགས་ཀློབཤད་རིན་ཆེན་ཕྲེང་བའི་རྒྱུད་གཏེར་ལས། བཟང་པོའི་ཆོས་རིགས་སྤྱོད་པས་བསྲུངས། །སྤྱོད་པ་ཉམས་ན་རེ་དོགས་མེད། །ཅེས་གསུངས་སོ། །དེ་ནས་སྤྱོད་པ་དུས་ཚོད་དང་མ་འབྲེལ་བར་རྩིངས་སྤྱོད་བྱས་པས་ངན་སོང་དུ་ལྟུང་། གལ་ཏེ་རྟོགས་པ་མཐོ་ན་ཡང་རྫུ་འཕྲུལ་སྣ་ཚོགས་སྟོན་མི་ནུས་པར་རྩིངས་སྤྱོད་བྱས་ན་སངས་རྒྱས་ཀྱི་བསྟན་པ་ལ་གནོད། བསྟན་པ་ལ་གནོད་ན་དེ་བས་ཉེས་སྒྲིབ་ཆེ་བ་གཞན་ཅི་ཞིག་ཡོད། གཅིག་ཏུ་ནི་གསང་སྔགས་ལག་ལེན་ལ་རགས་ལས་པས། ཨོ་རྒྱན་རིན་པོ་ཆེས། གཏེར་སྟོན་ཚད་ལྡན་ནམ། མར་མི་རས་
ཆུང་སོགས་ནས་ད་ལྟའི་བར་ལ་ཆགས་ལམ་སོགས་ཀྱི་ཕྱག་ལེན་རྒྱུན་མ་ཆད་པ། ཤེས་རབ་ཡེ་ཤེས་ཀྱི་དབང་དངོས་སུ་བསྐུར་ཞིང་དགའ་བཞི་ཡེ་ཤེས་ངོ་སྤྲོད་པའི་དུས་སུ་རྒྱུན་མ་ཆད་པ་ནི་མི་འདུག་པས། དཔེ་རྒྱུན་དང་ལུང་རྒྱུན་ཙམ་མ་བརྟེན་པས་ལམ་དུ་མི་འགྲོ་སྟེ། དེའི་གནད་ཀྱིས་རྩ་རླུང་ལ་རྟགས་ཐོན་པས་རྡོ་རྗེས་དུང་ཕེར་བ་རྒྱབ་ཐུར་མདུན་ཐུར་ཚུགས་པའི་རྟོགས་ལྡན་མི་ཕམ་ལྟ་བུ་ཡང་ཆགས་ལམ་ལམ་དུ་མ་བསླང་བར་བསྟན་པ་དང་། བླ་མའི་ཞབས་འདྲེན་དུ་གྱུར་པ་དངོས་སུ་མཐོང་ན་གཞན་རྣམས་ཀྱིས་ལམ་དུ་ག་ལ་སློང་།། ༈ དེ་ནས་གྲོལ་ལམ་སྡོམ་པ་གསུམ་ལྡན་འདིའི་ཕུག་ཕྱག་ལེན་རྒྱུན་མ་ཆད་པར་བཅོམ་ལྡན་འདས་ནས་བཟུང་སྟེ། ཀླུ་སྒྲུབ་ཐོག་མེད་ཇོ་བོ་རྗེ་ཨ་ཏི་ཤ་ནས་དྭགས་པོ་རིན་པོ་ཆེའི་བར་དུ་ཡོད་དོ། །དྭགས་པོས་ཀྱང་སྤྱོད་པ་བཀའ་གདམས་ལུགས་དང་། ཉམས་ལེན་མི་ལའི་ཕྱག་ཆེན་ཆོས་དྲུག་མཛད་པས་བཀའ་ཕྱག་ཆུ་བོ་གཉིས་འདྲེས་ཞེས་བྱ་བ་དྭགས་པོ་བཀའ་བརྒྱུད་ཅེས་བསྟན་པ་ཉི་མ་ཤར་བ་ལྟ་བུར་གྱུར་ཅིང་། ཁྱད་པར་དུས་མཁྱེན་ནས་བདག་གི་འདྲེན་མཆོག་ཐམས་ཅད་མཁྱེན་པ་ཆོས་ཀྱི་དབང་ཕྱུག་གི་བར་དུ་གྲོལ་ལམ་ཁོ་ནས་གྲུབ་པ་བརྙེས་པ་གནམ་གྱི་སྐར་མ་
ཙམ་བྱུང་སྟེ། རྗེ་རང་བྱུང་བའི་སློབ་མ་མཚུར་ཕུའི་གནས་སྟོད་ན་རྟོགས་ལྡན་བརྒྱ་རྩ་བརྒྱད་དུས་གཅིག་ལ་མཁའ་སྤྱོད་དུ་གཤེགས་པ་དང་། བརྒྱུད་པ་འདི་ལ་ལུས་མ་སྤངས་པར་མཁའ་སྤྱོད་དུ་གཤེགས་པ་དུ་མ་ཞིག་བྱུང་ལ། ཁྱད་པར་དེང་སང་སྙིགས་མའི་མཐར་ཐུག་འདི་ལྟ་བུ་ལ་ཡང་རྗེ་ཆོས་ཀྱི་དབང་ཕྱུག་གི་ཆིབས་ཆུང་བ། དགེ་སློང་སྟག་ཚང་ཡང་དག་བྱ་བ་མེར་བསྲེགས་པས་མ་གནོད་ཅིང་། ཕྱིས་ལུས་མ་སྤངས་པ་མཁའ་སྤྱོད་དུ་གཤེགས་པ་དང་། རྗེ་དྲུག་པ་ཆོས་ཀྱི་དབང་ཕྱུག་ཉིད་ཀྱི་རྩ་སློབ་རྟོགས་ལྡན་ཀརྨ་བཀྲ་ཤིས་བྱ་བ་ཆུ་ལ་ཐོགས་མེད་དུ་གཤེགས་པ་སོགས་དེང་སང་གི་བར་དུ་གྲོལ་ལམ་བྷེ་པས་བརྟན་པ་ཐོབ་པ་དང་གྲུབ་ཐོབ་རྒྱུན་མ་ཆད་པ་ཡིན་ནོ།། ༈ དེ་ནས་ཉམས་སུ་བླང་བྱའི་སྤྱོད་པ་གསལ་བར་བཤད་པ་ནི། ཕ་རྒྱུད་ནས་སྤྲོས་མེད་ཀྱི་སྤྱོད་པ་དང་། མ་རྒྱུད་ནས་ཀུན་ཏུ་བཟང་པོའི་སྤྱོད་པ་དང་། རྙིང་མ་ནས་ཁྱིམ་པ་དང་རི་དྭགས་ལྟ་བུའི་སྤྱོད་པ་དང་གཉིས་གསུངས་པ་དང་། སྡོམ་གསུམ་ཐུན་མོང་གི་སྤྱོད་པ་ཞེས་པ་རྣམས་དོན་ལ་གཅིག་པས། ཕྱི་སོ་སོར་ཐར་པའི་སྡོམ་པ་ལུས་ངག་གི་སྤྱོད་པ་ཐམས་ཅད་འདུལ་བ་ཁོ་ན་ལྟར་སྲུངས། ནང་བསམ་
པའི་ཁྱེར་སོ་བྱང་ཆུབ་སེམས་དཔའི་བསླབ་པ་ཁོ་ན་ལྟར་ཅི་སྤྱད་ཐམས་ཅད་གཞན་དོན་དུ་སྤྱོད། དངོས་སམ་ཤུགས་ཀྱིས་གཞན་ལ་གང་ཕན་བསྒྲུབ། དངོས་ཤུགས་ཀྱིས་མི་ཕན་པ་ཡིན་ཡང་དགེ་རྩ་ཐམས་ཅད་སེམས་ཅན་སྤྱི་ལ་བསྔོའོ། །གསང་བ་རྡོ་རྗེ་ཐེག་པའི་དམ་ཚིག་རྣམས་སྲོག་ལྟར་བསྲུང་ཞིང་བསྐྱེད་རྫོགས་ལ་རྩེ་གཅིག་ཏུ་ཉམས་སུ་ལེན་པ་སྟེ། འདི་ལྟ་བུའི་ཉམས་ལེན་ཁོ་ནས་ས་ལམ་ཐམས་ཅད་བརྗོད་པ། བཀའ་བརྒྱུད་རིན་པོ་ཆེ་འདིའི་ཕྱག་སྲོལ་ཡིན་ཏེ། ཨཱརྱ་དེ་ཝའི་སྤྱོད་བསྡུས་ལས་ཀྱང་། སྤྲོས་མེད་ཀྱི་སྤྱོད་པ་ཁོ་ནས་གྲོལ་བར་བཤད་ཅིང་། གསང་བ་གྲུབ་པ་ལས་ཀྱང་། བསྒོམ་པའི་སྦྱོར་བའི་སྟོབས་ཀྱིས་ནི། །དངོས་གྲུབ་མཚན་ཉིད་གང་ཡང་རུང་། །དེ་ཀུན་སྐད་ཅིག་ཙམ་ལ་ནི། །རང་ཉིད་གནས་པར་འགྱུར་བ་ཡིན། །ཞེས་གསུངས་སོ། །ཨོ་རྒྱན་རིན་པོ་ཆེའི་སྤྱོད་པ་ལས། ཕྱི་སྡེ་སྣོད་དང་མཐུན་པར་བསླབ་པའི་ཚུལ་ཁྲིམས་དང་ལྡན། ནང་བླ་མེད་ལྟ་བུར་གསང་སྤྱོད་ཐབས་ཁྱད་པར་ཅན་དང་ལྡན་པ། གསང་བ་རྣམ་པ་ཀུན་ཏུ་སྒོ་གསུམ་ཆོས་དང་བསྟུན་པར་བྱའོ། །ཞེས་དང་། ཀླུ་སྒྲུབ་ཀྱིས། དད་དང་ཚུལ་ཁྲིམས་ཐོས་དང་གཏོང་བ་དང་། །ངོ་ཚ་ཁྲེལ་ཡོད་
ཤེས་པ་དེ་དག་ནི། །ནོར་བདུན་ལགས་པས་འདི་དག་མི་འབྲལ་མཛོད། །ཅེས་གསུངས་པ་ལྟར་མདོར་ན་སྡོམ་གསུམ་བསྲུང་བར་འདུས་ཏེ། འདུལ་ཁྲིམས་རྩ་བ་ཕམ་པ་བཞི་ནི་སྲོག་ལྟར་བསྲུང་སྟེ། རྗེ་མི་བསྐྱོད་རྡོ་རྗེའི་གསུང་ལས། དུས་དེང་སང་གི་སྡོམ་ལྡན་ནི་རྩ་བ་བཞི་མ་ཉམས་པར་བསྲུང་ཞིང་དགེ་བའི་བསམ་པ་མི་འདོར་བ་ལ་བྱེད་ཅེས་གསུངས་པ་ལྟར་ཕྲ་ཞིབ་རྣམས་ཅི་ནུས་སུ་བསྲུང་ཞིང་གསོ་སྦྱང་ལ་འབད། །བྱང་སྡོམ་རྩ་བ་རྣམས་སྲོག་ལྟར་བསྲུང་ཞིང་དུས་བཟང་རྣམས་སུ་བྱང་སྡོམ་རྒྱུས་པ་དང་རྒྱུན་དུ་བསྡུས་པ་ལེན། གསང་སྔགས་ཀྱི་དམ་ཚིག་རྩ་བ་རྣམས་སྲོག་ལྟར་བསྲུང་ཞིང་སྐབས་སུ་བདག་འཇུག་དང་བསྐང་བཤགས་ལ་འབད། དེ་ལྟ་བུ་ལ་སྤྱོད་པ་ཐམས་ཅད་དོན་གྱིས་ཚང་སྟེ། འཁོར་བའི་བརྩོན་ར་ནས་ཐར་ཐབས་ཁོ་ན་ལ་བརྩོན་པས་ཤ་བཙོན་ལྟ་བུའི་སྤྱོད་པ་དེ་ཡིན། ཆོས་ཀྱི་རོ་མྱོང་ཞིང་ཤན་ཕྱེད་དེ་འོང་བས་བུང་བ་ལྟ་བུའི་སྤྱོད་པ་ཡིན། རི་ཁྲོད་དང་དབེན་པར་སྒྲུབ་པ་བྱེད་ཅིང་དེར་ཡང་རང་ཉིད་གཅིག་པུར་སྡོད་པ་རི་དྭགས་རྨས་མ་ལྟ་བུའི་སྤྱོད་པ་ཡིན། སྒྲུབ་པའི་རྫས་དང་སྒྲུབ་ཐབས་དང་ཐ་ན་རང་གི་ལུས་ཀྱང་མི་སྟོན་པར་མཚམས་བྱ། གྲུབ་པའི་རྟགས་ཀྱང་
སློབ་བུ་དད་ལྡན་ནམ་རང་གི་སློབ་དཔོན་མིན་པ་ལ་གསང་བས་གསང་སྤྱོད་ཡིན། བྱིས་སྦ་ལ་ཟས་འཇུ་ཚོད་སྟེར་བ་ལྟར་རང་གི་ཉམས་སུ་ལོན་ཚོད་དང་བསྟུན་ནས་རིམ་པར་ཉམས་སུ་ལེན་པ་རྒྱལ་བུ་གཞོན་ནུའི་སྤྱོད་པ་ཡིན། སྤྱོད་ལམ་ཀུན་ཏུ་ཆོས་དང་མཐུན་པས་ཀུན་ཏུ་བཟང་པོའི་སྤྱོད་པ་ཡིན་ནོ། །དེ་ཡང་ཕ་རྒྱུད་ནས་བཤད་པའི་སྤྱོད་པ་དྲུག་པོ་ཡང་ཆ་འདྲ་བ་རེ་བྱར་ཡོད་དེ། གནས་ཁང་ཡོ་བྱད་འབྱོར་ཚད་ལེགས་པར་རྒྱས་པར་བྱས་ནས། རྡུལ་ཚོན་གྱི་དཀྱིལ་འཁོར་བཞེངས། མཆོད་པ་རེ་རེ་ནས་ལྷའི་གྲངས་བཤམས་ཏེ། དགེ་ཚུལ་སློང་སོགས་དམ་ཚིག་དང་ལྡན་པ་བརྒྱ་རྩ་བརྒྱད་དང་ལྷ་གྲངས་ལས་མི་ཉུང་བ་འཚོགས་ནས། སྡོམ་པ་གསུམ་དང་མི་འགལ་བའི་འདོད་ཡོན་སྣ་ཚོགས་ལ་སྤྱོད་ཅིང་། བདག་མདུན་བུམ་གསུམ་བདག་འཇུག་དུས་གསུམ་དུ་བྱ། ཚོགས་ཀྱི་འཁོར་ལོ་རྒྱ་ཆེན་པོ་དུས་གསུམ་དུ་རོལ། དུས་ཐམས་ཅད་དུ་སྔགས་རྒྱུན་བྱ་ཞིང་། དཀྱིལ་འཁོར་གྱི་འཁོར་ལོ་གྲོགས་རྣམས་ལྷ་དང་ལྷ་མོར་བྷེ་པ་ནི་སྤྲོས་པ་ཆེན་པོའི་སྤྱོད་པ་སྟེ། དཔེར་ན་རྙིང་མའི་བུམ་སྒྲུབ་སོགས་སྒྲུབ་ཆེན་རྣམས་ལ་རིག་མ་མཚན་ལྡན་ལྷ་གྲངས་སམ། ལྔ་གསུམ་བུམ་འཛིན་ལྷ་མོ་སོགས་བཤད་ཀྱང་དེང་སང་དེའི་
སྲོལ་མེད་དེ་བུམ་སྒྲུབ་དང་ཕུར་སྒྲུབ་སོགས་ནི་བྱེད་སྲོལ་ཡོད་མེད་པ་དང་འདྲའོ། །དེ་ལྟ་བུར་ཞག་བདུན་ནམ་ལྔ་གསུམ་གཅིག་སོགས་བྱེད་པ་ནི་སྤྲོས་པ་དང་བཅས་པའི་སྤྱོད་པའོ། །དེང་སང་སྒྲུབ་མཆོད་དང་ཉིན་ཆོག་ཟེར་བ་ལྟ་བུའོ། །སྒྲུབ་གཡོག་རང་གི་སློབ་མ་གཅིག་གམ་འགའ་ཟུང་གིས་སྡོམ་པ་གསུམ་དང་མི་འགལ་བའི་འདོད་ཡོན་གྱིས་སྟོབ་ཅིང་རང་ཉིད་དཀའ་ཐུབ་མི་བྱེད་འགྲངས་བར་སྤྱོད་དེ་ཉམས་སུ་ལེན། མདོར་ན་སྡོམ་གསུམ་དང་མི་འགལ་བའི་འདོད་ཡོན་མི་སྤངས་ཤིང་། ཉམས་སུ་ལེན་ཅིང་རས་བྲིས་ཀྱི་དཀྱིལ་འཁོར་དང་མཆོད་པའང་ཅི་འབྱོར་བྱེད་པ་སྤྲོས་པ་བསྡུས་པའི་སྤྱོད་པ་སྟེ། དེ་གསུམ་ཀའང་ཡེ་ཤེས་ཀྱི་ཕྱག་རྒྱ་ཡབ་ཡུམ་ཞལ་སྦྱོར་དུ་བྷོ་པས་ཆགས་ཆེན་སྤྱོད་པའི་གོ་ཆོད་པའོ། །མི་ཡི་བུད་མེད་རིང་དུ་སྤངས་ནས་འཚོ་བ་གང་བྱུང་ཅུང་ཟད་ཙམ་ལ་ཆོག་ཤེས་བྷེ་ནས་བྱ་བ་ཐམས་ཅད་སྤངས་འཇིག་རྟེན་པའི་དངོས་གྲུབ་ཙམ་ཡང་དོན་དུ་མི་གཉེར་བར་ཚེ་གཅིག་སངས་རྒྱས་ཁོ་ན་འདོད་པས་ཏིང་ངེ་འཛིན་ཁོ་ན་གཙོ་བོར་བྷེ་པས་སྤྲོས་མེད་ཀྱི་སྤྱོད་པ། རྫོགས་རིམ་སྟོང་ཉིད་ཁོ་ན་བྷི་པས་ཆོ་ག་གཏོར་བསྔོས་བཟླས་བརྗོད་ཀྱང་སྤངས། སྤྱོད་ལམ་རྣམ་གསུམ་ཙམ་ལས་
གཞན་ཅི་ཡང་མི་བྱེད་པ་བྷུ་སུ་ཀུའི་སྤྱོད་པའོ། །མ་རྒྱུད་ནས་བཤད་པའི་སྤྱོད་པ་བཞི་ཡང་ཚང་སྟེ་ཀུན་ཏུ་བཟང་པོའི་སྤྱོད་པ་ནི་དངོས་གཞི་ཡིན་ལ། ཡིད་ཀྱིས་རིག་མ་ལ་གསང་བར་སྤྱད་ནས་བདེ་སྟོང་ཉམས་སུ་མྱོང་བས་གསང་སྤྱོད་བསྒོམ་པའི་རིག་མ་ཡེ་ཤེས་ཀྱི་ཕྱག་རྒྱ་མོ་དང་། གྲོང་ཁྱེར་དུ་འགྲོ་དུས་ཀྱང་འབྲལ་བ་མེད་ཅིང་བསྐྱེད་རྫོགས་ཀྱི་སྟོབས་རིག་པ་བརྟུལ་ཞུགས་ཀྱིས་ཉོན་མོངས་དང་རྣམ་རྟོག་དང་བགེགས་ཀྱི་བར་ཆད་ཐམས་ཅད་ཚར་གཅོད་པས་རིག་པ་བརྟུལ་ཞུགས་ཀྱི་སྤྱོད་པ་གླང་ཆེན་ལྟ་བུ་ཁྲོམ་ཆེན་ཚོང་འདུས་རྒྱལ་པོ་དང་། རིགས་ངན་ཤན་པའི་ཁྱིམ་རྣམས་སུ་འགྲོ་དུས་ཀྱང་རང་ཉིད་ཐུགས་རྗེ་ཆེན་པོ་ཡུམ་ཕག་མོ་དང་འབྲལ་བ་མེད་ཅིང་གཞན་གྱིས་བསྟོད་ཅིང་འབུལ་ཞབས། མ་དད་ཅིང་གཤེ་སྐུར་རྐྱེན་བཟང་ངན་ཅི་བྱུང་ཉམས་ལེན་དང་བསྲེ་ཞིང་བོགས་སུ་འདོན་པ་ཚོགས་སྤྱོད། རྐྱེན་ངན་གང་གིས་ཀྱང་ཉམས་ལེན་ལ་མི་གནོད་པར་བརྟན་པ་ཐོབ་ནས། རང་སེམས་སངས་རྒྱས་སུ་ཐག་ཆོད་པས་སངས་རྒྱས་གཞན་ན་མི་རེ། འཁོར་བ་སེམས་ཀྱི་འཁྲུལ་སྣང་ལས་གཞན་དུ་མ་གྲུབ་པར་ཐག་ཆོད་ཅིང་། འཁོར་བ་རང་བཞིན་མེད་པར་མཐོང་བས་འཁོར་བས་འཁོར་བར་འཁྱམས་མི་དགོས་
པས། རེ་དོགས་ཟད་པས་ཞེ་འདོད་ཐམས་ཅད་དང་བྲལ། འདོད་པ་ཅི་ཡང་མེད་པས་ཞེན་པ་རང་ལོག །བདག་གཞན་དབྱེར་མེད་གཅིག་ཏུ་རྟོགས་པས་ཆགས་སྡང་རང་འགགས། སྣང་སྲིད་ལྷའི་དཀྱིལ་འཁོར་དུ་རྟོགས་པས་དག་པ་རབ་འབྱམས་ཏེ། དེ་ལྟ་བུ་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་བའི་ཕྱོགས་ལས་རྣམ་པར་རྒྱལ་བའི་སྤྱོད་པ། དེ་ལ་ཉེ་རིང་མེད་དེ་དགྲ་དང་གཉེན་མཉམ། གསེར་དང་བོང་བ་མཉམ། འདི་བྱ་དང་འདི་བྱེད་ཀྱི་གཏད་སོ་མེད་པས་སྨྱོན་པ་ལྟ་བུའི་སྤྱོད་པ། ཤ་ལྔ་བདུད་རྩི་ལྔ་སོགས་རང་བཞིན་གྱིས་རྣམ་པར་དག་པར་རྟོགས་པས་གཙང་བཙོག་གི་འཛིན་པ་མེད་དེ་ཁྱི་ཕག་ལྟ་བུའི་སྤྱོད་པ། དེ་ལྟ་བུའི་གདེང་ཐོབ་པས་གང་ལ་ཡང་ཉམས་ང་མེད་དེ་སེངྒེ་ལྟ་བུའི་སྤྱོད་པ། དེས་རང་དོན་གྲུབ་ཟིན་པས་སྐུ་གསུམ་གྱི་རྒྱལ་ས་ཐོབ་གཞན་འགྲོ་བའི་མགོན་སྐྱོབས་བྱེད་པས་རྒྱལ་པོ་ལྟ་བུའི་སྤྱོད་པ། དེས་རང་གཞན་ཐམས་ཅད་ཀྱི་དོན་ཡིད་བཞིན་དུ་འགྲུབ་པས་ནོར་བུ་ལྟ་བུའི་སྤྱོད་པ། འདི་བྱེད་ཀྱི་ཞེ་འདོད་མེད་པས་བུ་ཆུང་ལྟ་བུའི་སྤྱོད་པའམ། བྱ་རྩོལ་མེད་པའི་སྤྱོད་པ་སྟེ། སྤྱོད་པ་ཐམས་ཅད་ཀུན་ཏུ་བཟང་པོའི་སྤྱོད་པ་འདི་ལ་ཚང་
བའོ། །ཆོས་མགོ་འདིས་ཐོན། བསྟན་པ་འདིས་ཟིན། ཁེ་ཆེ་ལ་ཉེན་ཆུང་། བླ་མའི་ཞབས་ཏོག་འདི་ཆེ། བསྟན་པའི་མིག་རྒྱུན་དུ་འདི་བཟང་། སངས་རྒྱས་བྱང་སེམས་ཐམས་ཅད་འདི་ལ་དགྱེས། མཁས་པ་ཐམས་ཅད་ཀྱིས་འདི་ལ་བསྟོད། ཕལ་པ་ཐམས་ཅད་ཀྱིས་འདི་ལ་དད། སྤྱིར་དྭགས་བརྒྱུད་དགོས་ཀཾ་ཚང་གི་ཕྱག་ལེན་འདི་ཡིན། བསྟན་པ་སྤྱི་ཡི་ཆོས་ལུགས་ཀྱང་འདི་ཡིན། དེས་ནི་རྩིངས་སྤྱོད་ཀྱི་ཐོ་ཅོ་སྤངས། སྔགས་ལ་ཁ་གཡར་ནས་སྡོམ་པ་ཆུར་འདེབས་པའི་བྱ་བ་ངན་པ་ཐམས་ཅད་དུག་ལྟར་སྤངས་ལ། སྒྲུབ་བརྒྱུད་འདིའི་ཕྱག་སྲོལ་བཞིན་དུ་ཀུན་ཏུ་བཟང་པོའི་སྤྱོད་པས་ས་ལམ་ཐམས་ཅད་རྫོགས་པར་བྱའོ། །ཡང་དགྱེས་རྡོར་བའི་ཆོས་སྐད་ལྟར་ན་རིམ་གཉིས་ཀྱི་རྣལ་འབྱོར་བྷེ་པས་དྲོད་ཆུང་ངུ་ཐོབ་ནས་ཀུན་འདར་གསང་ནས་སྤྱོད། དེས་དྲོད་འབྲིང་ཐོབ་ནས་ཀུན་འདར་འཇིག་རྟེན་པའི་དངོས་སུ་སྤྱོད། དེ་ནས་ལུང་བསྟན་པའི་རིག་མ་པདྨ་ཅན་ལ་བསྟེན་ནས་དྲོད་ཆེན་པོ་ཐོབ་པས་ཀུན་ཏུ་བཟང་པོའི་སྤྱོད་པ་ཟླ་གཅིག་སྤྱད་པས་ས་བརྒྱད་ཐོབ། དེ་ནས་ཉེ་རྒྱུའི་སྤྱོད་པས་ཞག་བདུན་ནམ་བཅུ་གསུམ་རྡོ་རྗེ་འཛིན་པའི་ས་ཐོབ་པར་གསུངས་ཏེ། མིང་གི་ཁྱད་མ་གཏོགས་གོང་དང་
མཚུངས་པའོ། །མདོར་ན་ཨོ་རྒྱན་རིན་པོ་ཆེས་སྤྱོད་པའི་མདོ་འགག་ལང་གྲོ་ལ་གདམས་པ་ལས། མདོར་ན་ཕྱི་མདོ། ནང་སྔགས། ཐར་པའི་ལམ་སྒྲུབ་པའི་ལམ་དང་གྲོགས་སུ་གང་འགྲོ་བསྟན་པ་དང་བདག་གཞན་ལ་གང་ཕན། སྒོ་གསུམ་ཆོས་སྤྱོད་བཅུ་དང་མཐུན་ནི་ཟབ་བོ། །འོན་ཀྱང་སྤྱད་བྱ་སྤྱོད་བྱེད་ཀྱིས། །བློ་ལྡོག་རེ་དོགས་ནང་དུ་ཟད་། །ཀུན་ཀྱང་རོལ་པ་ཆོས་སྐུའི་ཀློང་། །ཆགས་མེད་ཞེན་གྲོལ་ངོ་མཚར་ཆེ། །ཞེས་གསུངས་པ་ལྟ་བུའོ། །དེ་ནས་ཅུང་ཟད་དྲོད་ཐོབ་ཀུན་བཟང་སྤྱོད་པ་མཐར་ཕྱིན་ནས་དབེན་པར་བསྒོམ་དུས་མཉམ་རྗེས་མེད་པ་དང་བརྟེན་པ་ཐོབ་པ་འདྲ་བ་བྱུང་ན། གྲོལ་ལམ་ལུགས་ཀྱི་གསང་སྤྱོད་ཀྱི་བོགས་དབྱུང་འདོད་ན། ཐོག་བཅས་དགྲ་དང་གཅན་གཟན་ཐོབ་དང་གཤའ་སྤྲད་གཡང་ས་མེ་ཆུ་སོགས་ཀྱི་གནོད་པ་མེད་ཅིང་ཐོག་མེད་མི་མ་ཡིན་ཤིན་ཏུ་ཆོ་འཕྲུལ་ཆེ་བས་ཕལ་པ་དག་ཉིན་ཡང་རྒྱུ་འགྲུལ་མི་ཕོད་པ་ལྟ་བུའི་དུར་ཁྲོད་དམ་གཉེན་ས་རོའི་གསེབ་སོགས་གཅིག་པུར་འགྲོ་སྟེ། སཾ་བྷུ་ཏྲིར། རྡོ་རྗེའི་ཉི་མ་ནུབ་པ་ན། །དེ་འོག་སྒྲུབ་པ་བརྩོན་པར་བྱ། །ཞེས་དང་། ནཱ་རོ་པའི་རོ་སྙོམས་གཞུང་དུ། མཚན་མོ་གསང་སྟེ་རྒྱུ་བར་
བྱ། །ཞེས་གསུངས་ཏེ་སྲོད་ལ་མ་ཚོར་བར་སོང་སྟེ། ཐོ་རངས་རང་གནས་སུ་ལོག །འགྲོ་ཁ་ཏིང་ངེ་འཛིན་གྱིས་དབང་བླངས། མི་མེད་ལུང་སྟོང་ཡིན་ན་ཚར་སློང་མ་འགྲིགས་བར་དུ་བསྡད་དོ། །ལུས་ལ་ཐལ་ཆེན་བྱུག །ཁ་དོག་ངན་ཞིང་ཧྲུལ་པོའི་གོས་གྱོན། ཤིང་ཐོག་གམ་རུས་རྒྱུན་གྱིས་བརྒྱན། ཟས་གདམས་ག་མེད་པར་བྱ། བདེ་སྟོང་གི་ཉམས་བཟང་པོ་དང་བཅས་ཏེ་འགྲོ་ལ། སྐྱབས་སེམས་བླ་མའི་རྣལ་འབྱོར་དབང་བཞི་བླངས། རང་ཉིད་གསང་བ་ཡེ་ཤེས་སམ་རྟ་མགྲིན་དུ་བསྒོམ་ལ་གར་བྱས་པས་སྐུ་ལ་ཁྲོ་བོ་དང་ཁྲོ་མོའི་ཚོགས་ཀྱིས་གཏམས་པར་བྱ། དེས་ལྷ་འདྲེ་འབྲོས་པར་བརྩམས་པས། རྡོ་རྗེའི་ར་བ་དང་མེ་རིའི་བསྐོར་བས་བྲོས་མ་ཐུབ་པར་རང་མདུན་དུ་འདར་ལྡི་ལི་ལི་བྱེད་པར་བསམ། དེ་ནས་ཅི་དང་ཅི་བྱུང་ཡང་འགུལ་བསྐྱོད་མི་བྱེད་པར་གསང་སྤྱོད་མཐར་མ་ཕྱིན་གྱི་བར་དུ་སྡོད་པའི་དམ་བཅའ་དྲག་པོར་བྱས་ལ་བསྡད། དེ་ནས་རང་རིག་རང་ལུས་ལས་ཡུམ་རྡོ་རྗེ་ཕག་མོའི་རྣམ་པར་བྱུང་ལ་གྲི་གུག་གིས་རང་གི་བེམ་པོའི་ཐོད་པ་བྲེག་པ་རང་བྱུང་གི་ཐོད་སྐྱེད་དུ་བཙུགས་པ། སྟོང་གསུམ་ཙམ་དུ་གྱུར་པའི་ནང་དུ་རང་གི་ཕུང་པོ་བཅུག་ལ་གྲི་གུག་གིས་གཏུབ། ཨོ་ཨཱཿཧཱུྃ་
གིས་བདུད་རྩིའི་རྒྱ་མཚོ་དེ་ལས་རིང་འདྲའི་མཁའ་འགྲོ་མང་པོས་ཐོད་པས་བཅུས་ནས་བླ་མ་ཡི་དམ་མཁའ་འགྲོ་ཆོས་སྐྱོང་འཇིག་རྟེན་སྐྱོང་བ་ལྷ་འདྲེ་གཞི་བདག་བགེགས་རིགས་རིགས་དྲུག་དང་བཅས་པ་ཚིམ་པར་བསྐྱེད་དོ། །ཕཊ་ཕཊ༔ ཅེས་དམིགས་པ་རེ་རེ་དང་སྤྱད་དོ། །དེ་ནས་དེ་ཐམས་ཅད་མི་དམིགས་པར་བྱས་ལ་དེ་ནས་ཆོ་འཕྲུལ་འཇིགས་སྐྲག་བྱུང་ན་སེམས་ཅན་ཐམས་ཅད་ཕ་མ་ཡིན་ལ་ཕ་མ་ལ་འཇིགས་སམ་སྙམ་དུ་སྙིང་རྗེ་བྱམས་པའི་གཏོང་ལེན་བསྒོམ། སྐྱེད་པ་བོགས་བྱུང་ན་སྣང་སྲིད་ཐམས་ཅད་ཡི་དམ་ཡིན་ན་ཡི་དམ་ལ་སུ་སྐག་སྙམ་དུ་ལྷ་འདྲེ་ཡི་དམ་དུ་བྷེ་པས་འཇིགས་སྐྲག་ཞིའམ་མ་ཞི་བཏགས། ཆོས་ཐམས་ཅད་སེམས་ཡིན་སེམས་སྟོང་ཉིད་ཆོས་སྐུ་ཡིན་པས་ལྷ་འདྲེར་འཛིན་པའི་རྟོག་པ་དེ་ཆུ་ལ་དབྱུག་པ་བརྒྱབ་པ་ལྟར་ཉམས་ལེན་དུ་བསྟིམས་ནས་མཉམ་པར་བཞག་གོ །གལ་ཏེ་མ་སློང་བར་རྟགས་དང་ཆོ་འཕྲུལ་མེད་ན་རང་ཉིད་རྟ་མགྲིན་གསང་ཡེར་བྷོ་ལ། ཕྱག་མཚན་གྲི་གུག་གམ་རྟ་མགྲིན་ཡིན་ན་རྡོ་རྗེའི་དབྱུག་པ་རལ་གྲི་གང་རུང་ཐོགས་པས་རི་བྲག་ཐམས་ཅད་རྩ་བ་ནས་བཤིགས། མཚོ་ཐམས་ཅད་དཀྲུག་ཁ་ཞབས་ལྡོག་པས་ས་གཞི་གྲི་གུག་གིས་བཀོག་ནས་སྟེང་
འོག་ལྡོག །ཤིང་དང་ནགས་ཚལ་ཐམས་ཅད་ལོ་ཏོག་ལྟར་བརྔས། དུག་སྣ་དང་ཁྲག་སྣའི་ཐལ་ཆེན་པོས་བར་སྣང་ནས་རྒྱ་མཚོའི་བར་བཀང་བར་བྷེ་ལ་ཕྱོགས་བཞིར་རྡོ་འཕང་རྦབ་ཅུང་ཟད་བཏང་། ཤིང་ལ་ཐག་པ་བཏགས་ནས་འཐེན་འཐེན་བྱ། དེ་ནས་གོང་ལྟར་ཏིང་ངེ་འཛིན་ལ་མཉམ་པར་བཞག་པས་དངོས་ཉམས་རྨི་ལམ་ཆོ་འཕྲུལ་འབྱུང་ངོ་། །བྱུང་ནས་ཉམས་ལེན་དང་བསྲེས་པས་ལྷ་འདྲེ་ཐུབ་པ་དང་མཉམ་དུ་ཚར་ཚད་ལྷ་འདྲེས་ཕྱག་འཚལ་ཆོས་ཞུ་དངོས་གྲུབ་འབུལ་བ་སོགས་མ་བྱུང་བར་དུ་དེ་ལྟར་བྱའོ། །ཆོ་འཕྲུལ་ཆེ་ན་དམར་འགྱེད་ཤ་ཁྲག་གི་ཟློསྟོན་མོ་ཡང་བྱ་སྟེ། ལར་བོགས་དབྱུང་ཡིན་པས་ཉམས་ལེན་ལ་བསྲེ་བ་གལ་ཆེ། གཞན་དམིགས་པ་བྱ་དོན་མེད་དོ། །ཡང་སྔོན་དུ་བརྟུལ་ཞུགས་ཆེ་བས་ལྷ་འདྲེ་ལ་གནོད་དྲག་པའི་ལྟས་འདུག་ན། རང་ཉིད་ཐུགས་རྗེ་ཆེན་པོའི་ཕྱག་ནས་བདུད་རྩིའི་རྒྱུན་བབས་པས། དེ་དག་གི་ནད་དང་སྡུག་བསྔལ་བསལ་ཞིང་བདེ་བ་དཔག་མེད་འཕེལ་བའི་དམིགས་པས་རྗེས་སུ་འཛིན་ཅིང་བསྔོ་བ་སྨོན་ལམ་གྱིས་བྱང་ཆུབ་ཀྱི་ས་བོན་བཏབ་བོ། །འདི་ནི་དོན་རྒྱས་པར་གཅོད་དང་རོ་སྙོམས་དང་ནཱ་རོ་གསང་སྤྱོད་ལྟར་ཡིན་པར་རྒྱས་པར་དེ་དག་ཏུ་བལྟ་ཞིང་ཁྱད་པར་དུ་
འདི་ལྷ་འདྲེ་འདུལ་ཕྱིར་མ་ཡིན། བོགས་འདོན་ཕྱིར་ཡིན་པས་ཉམས་ལེན་དང་བསྲེ་བ་གལ་ཆེ་བས། ལྷ་འདྲེ་འདུལ་བའི་དམིགས་རིམ་མང་པོ་མི་འཚལ་ལོ། །དེ་བརྟན་པ་ཐོབ་ནས་ཚོགས་སྤྱོད་བྱ་བ་ནི་གནས་རི་བསྐོར་བ་ལ་སོང་ན་ཡང་བརྡེག་བཙོག་སོགས་འབྱུང་བའམ། ཡང་ན་རྒྱུས་མེད་ངོ་མི་ཤེས་པའི་སར་རིགས་རུས་གསང་ལ་ཚོང་འདུས་སོགས་དང་ཁྲོམ་ཆེན་པོ་སོགས་སུ་སྤྱོད་པ་མཐོ་དམན་མི་འཚམས་པ་སྣ་ཚོགས་པས་སྨད་ར་དང་བརྡུང་བཙོག་བྱུང་ན་དགའ་མི་དགའ་ཁྱད་པར་ཨེ་འདུག །ཉམས་ལེན་གྱི་བོགས་སུ་ཨེ་ཐོན་བྱའོ། །སྡུག་བསྔལ་ན་ཚ་བྱུང་ན་དེའི་ངོ་བོ་ལ་བལྟས་ཏེ་བདེ་སྡུག་རོ་སྙོམ་མོ། །དེ་ལྟར་སྤྱོད་པ་བྱེད་པ་ཡང་ལྟ་བ་དེས་རྐྱེན་ཐུབ་བམ་མི་ཐུབ་ལྟ་ཕྱིར་ཡིན་ཏེ། བརྟག་གཉིས་ལས། སྤྱོད་པ་དངོས་གྲུབ་ཕྱིར་མ་གསུངས། །ཡིད་ནི་བསམ་གཏན་གཡོ་འམ་ཅི། །རང་གི་སེམས་ལ་སོ་སོར་བརྟག །ཅེས་གསུངས་པ་དང་། གྲུབ་ཐོབ་གཏེར་སྒོམ་པས། གྲོལ་ལམ་མ་གྲོལ་སྤྱོད་ལ་རགས། །སྤྱོད་པ་དོན་དང་མི་མཐུན་ཞིང་། །ཅིར་སྣང་ལམ་དུ་མ་སློང་ན། །ལྟ་བ་མཐོ་ཡང་ཁ་སྐད་ཡིན། །ཞེས་གསུངས་སོ། །དེ་ནས་རྟོགས་པའི་ནུས་པས་འབྱུང་
བཞིའི་གནོད་བྱེད་ཀྱིས་མི་ཚུགས་པ་སོགས་རྫུ་འཕྲུལ་ཐོབ་པ་ན་དུར་ཁྲོད་ཀྱི་ཆས་སོགས་བརྒྱན་ཅིང་གནས་ཡུལ་གྱི་དུར་ཁྲོད་དུ་རྒྱུ་ཞིང་། སྐལ་ལྡན་རྗེས་སུ་འཛིན་པ་དང་ཌཀིའི་ཚོགས་གྲལ་དུ་དངོས་སུ་འཇུག་པས་དངོས་གྲུབ་ལེན་པ་སོགས་བྱ་བ་ཡིན་ཏེ། ཉི་ཟླ་ཁ་སྦྱོར་ལས། སེང་གེ་ལྟ་བུའི་སྤྱོད་པ་ཡིས། །འཇིགས་པའི་སེམས་སྤངས་དུར་ཁྲོད་རྒྱུ། །ཞེས་དང་། །བརྟག་གཉིས་ལས། ངེས་པར་མདུན་དུ་ལྷ་མིའི་གང་། །བརྒྱ་བྱིན་ལྟ་བུ་ཡིན་ན་ཡང་། །སེང་གེའི་གཟུགས་ཀྱིས་རྣམ་པར་རྒྱུ། །ཞེས་གསུངས་སོ། །བིརླ་པས། གལ་ཏེ་རྟོགས་ལྡན་ཉམས་བཟང་སྤྱོད་པའི་གྲོགས་མེད་ན། །ཇི་ལྟར་མིག་ལྡན་སྐྱེས་བུ་རྐང་པ་མེད་དང་མཚུངས། །ཞེས་དང་། ཏེ་ལོ་པས། དམ་ཆོས་སྤྱོད་པ་མེད་པའི་རྣལ་འབྱོར་པ། །རྫིང་ལ་འཕུར་བའི་བྱ་རོག་འདྲ། །སེམས་ཕར་ཕར་བཏང་ཡང་ཚུར་ཚུར་འོང་། །སེམས་གཟུང་འཛིན་གཉིས་ལས་གྲོལ་དུས་མེད། །ཅེས་གསུངས་སོ། །དེ་ལྟར་གྲོལ་ལམ་གྱི་སྤྱོད་པ་དེ་ཐམས་ཅད་ལ་ཡིད་རིག་ཡེ་ཤེས་ཀྱི་ཕྱག་རྒྱའམ། ཙཎྜ་ལི་དམ་ཚིག་གི་ཕྱག་རྒྱ་བསྟེན་པའམ། སྣང་སྲིད་ཕྱག་རྒྱ་ཆེན་པོའི་བདེ་སྟོང་གི་ཉམས་དང་མ་བྲལ་བ་ཁོ་ནས་ཆོག་གོ །ལས་ཀྱི་
ཕྱག་རྒྱ་མིའི་བུ་མོ་ནི་བསྟེན་མི་དགོས་པར་མཆོག་གི་དངོས་གྲུབ་སྟེ། ཨཱརྱ་དེ་ཝའི་སྤྱོད་བསྡུས་ལས། དེ་བས་ན་ཕྱི་རོལ་གྱི་བུད་མེད་སྤངས་ནས། སྙིང་གར་གནས་པའི་ཡེ་ཤེས་ཀྱི་ཕྱག་རྒྱ་དང་། ལྷན་ཅིག་སྙོམས་པར་འཇུག་པར་ཤིན་ཏུ་མྱུར་ནས་རྡོ་རྗེ་འཆང་ཆེན་པོའི་གོ་འཕང་རྫོགས་པར་བྱའོ། །ཞེས་གསུངས་སོ། །མདོར་བསྡུ་ན་བདག་གི་འདྲེན་པ་ཐམས་ཅད་མཁྱེན་པ་ཡུལ་བྱང་ཕྱོགས་རྒྱུད་ཀྱི་པཎྜི་ཏ་འཇམ་དབྱངས་བླ་མ་ཆོས་ཀྱི་སྣང་བ་ཅན་དེ་ཉིད་ཀྱི་ཞལ་ནས། སྣང་ཚུལ་ལ་བདེན་བཟུང་བྱས་བྱས་ནས། །རེ་དོགས་སུ་སྤྱོད་ན་སྤྱོད་པ་མིན། །སྟོང་ཉིད་ཀྱི་སྟོང་ལྟས་བསླུས་བསླུས་ནས། །འཇོལ་ཉོག་ཏུ་སྤྱོད་ན་སྤྱོད་པ་མིན། །ཞེས་དང་། བོད་ཡུལ་གྱི་ལྟ་བ་བྱུང་རྒྱལ་དུ། །བྱས་ན་བརྟུལ་ཞུགས་ཀྱི་སྤྱོད་པ་སོགས། །སྔགས་སྤྱོད་ཆེན་པོར་སྒྲུབ་རློམ་ཡང་། །བྱིས་པས་འབྲོང་ཤ་ཟོས་པ་བཞིན། །དེ་ཡང་མ་ཆུན་གེགས་སུ་འགྲོ། །ཞེས་དང་། དེ་ནས་བྷུ་སུ་ཀུའི་སྤྱོད་པའམ་ཀུན་བཟང་སྤྲོས་མེད་ཀྱི་སྤྱོད་པ་དང་། འདུལ་ཁྲིམས་ཟུང་འབྲེལ་གྱི་རྟེན་འབྲེལ་གྱིས། །སྣང་ཆ་འགག་མེད་སྤྱོད་བཞིན་དུ། །ལྟ་བ་ལ་འཛིན་པས་མི་བཅིང་པར། །བསྒོམ་པ་བཅོས་མེད་དུ་སྐྱོང་
བ་འདི། །རྗེ་སྒྲུབ་བརྒྱུད་འདི་ཡི་རྣམ་ཐར་ཡིན། །ཞེས་གསུངས་པ་ཉིད་དོ། །དེ་ལྟར་བསྐྱེད་རྫོགས་ཟུང་འཇུག་གི་ངང་ནས་སྤྱོད་པ་བབ་ཅོལ་མ་སོང་བར་ཉམས་སུ་བླངས་པས་ས་ལམ་ཐམས་ཅད་བསྒྲོད་པར་གསུངས་ཏེ། །ཡེ་ཤེས་ཀྱི་མཁའ་འགྲོ་མ་རུས་པའི་རྒྱན་ཅན་གྱིས་མཛད་པའི་སྒྱུ་མ་ལམ་རིམ་གྱི་རྒྱ་གཞུང་ཆེན་པོ་ལས། རྟེན་དང་གཡོ་བ་ཇི་སྙེད་པ། །སྒོ་ལྔའི་ཡུལ་དུ་གང་སྣང་ཀུན། །ཐམས་ཅད་སྣང་སྟོང་ལྷ་ཡི་སྐུ། །ལྷ་སྐུ་མཐའ་བྲལ་སྒྱུ་མ་སྟེ། །བྱང་ཆུབ་ཕྱོགས་ཆོས་ཐམས་ཅད་དང་། །ལྷ་སྐུ་སྒྱུ་མ་དབྱེར་མེད་པས། །མཁས་པས་ཉམས་སུ་བླང་བར་བྱ། །ཞེས་དང་། རྫོགས་རིམ་སྟོང་ཉིད་ལ་གཙོ་བོར་བྷེ་པའི་དབང་དུ་མཛད་ནས། རྗེ་གླིང་རས་ཀྱི་གསུངས་ལས། ཕྱག་རྒྱ་ཆེན་པོའི་དོན་རྟོགས་པས། །བྱང་ཆུབ་ཕྱོགས་ཀྱི་ཆོས་རྣམས་ཀུན། །རྟོག་མེད་ངང་ལ་ལྷུན་གྱིས་གྲུབ། །ཅེས་གསུངས་ལྟར། རྒོད་ཚངས་པས་རྣལ་འབྱོར་བཞི་རིམ་ལ་སྦྱར་ནས་གསུངས་ཏེ། གྲུབ་ཆེན་ཀརྨ་པས་རྩ་རླུང་དང་སྦྱར་ནས་ལམ་བསྒྲོད་ཚུལ་གསུངས་པ་དང་། ཕར་ཕྱིན་ཐེག་པ་ནས་བྱང་ཆུབ་སེམས་དཔའི་ས་ལམ་བསྒྲོད་ཚུལ་གསུངས་ཏེ། དེ་དག་མིང་འདྲ་ཡང་དོན་གསང་སྔགས་ཁྱད་པར་
དུ་འཕགས་ཏེ། གདམས་ངག་རྒྱ་མཚོ་མཐའ་ཡས་ལས། རྡོ་རྗེ་ཐེག་པའི་བཅུད་བསྡུས་པས། །ཚོགས་སྦྱོར་གཉིས་སུ་ལམ་བསྒྲོད་ཅིང་། །མཚན་ཉིད་པ་དང་ཚིག་མཐུན་ཅིང་། །དོན་གྱིས་ཁྱད་པར་འཕགས་པ་ཡིན། །ཞེས་གསུངས་སོ། །དེ་ཡང་ཡོངས་སུ་གྲགས་པའི་ཚོགས་ལམ་ཆུང་འབྲིང་ཆེན་པོ་གསུམ་ཡིན་ལ། གྲུབ་ཆེན་ཀརྨ་པས་བཞིར་བཞེད་དོ། །དོན་ལ་ཁྱད་པར་མེད། ཟབ་མོ་ནང་དོན་ལས། དང་པོར་དབང་ཐོབ་བསྐྱེད་རྫོགས་ནི། །ལེགས་ཤེས་མོས་བསྒྲུབ་ཚོགས་ལམ་སྟེ། །ཞེས་གསུངས་པས་དབང་ཐོབ་ཅིང་བསྐྱེད་རྫོགས་ཀྱི་ཉམས་ལེན་ལེགས་པར་ཤེས་ནས་མོས་གུས་ཀྱིས་བསྒྲུབ་པ་ནི། དང་པོ་ཚོགས་ལམ་དུ་ཞུགས་པའོ། །དངོས་སུ་ནུས་པ་སྟོན་མི་ནུས་ན་ཡང་མོས་པ་ཙམ་དུ་སྒྲུབ་པས་མོས་པ་ལམ་བྱེད་ཅེས་བྱའོ། །སྡིག་པ་སྤངས་དགེ་བ་སྒྲུབ་པའི་སྒོ་ནས་ཆོས་ཉིད་ཀྱི་དོན་རྟོགས་པའི་ཆེད་དུ་ཚོགས་བསགས་པས་ཚོགས་ལམ་ཞེས་བྱའོ། །དེ་ནས་ཚོགས་ལམ་ཆུང་ངུའི་སྐབས་སུ་ཚེ་རབས་དཔག་མེད་ནས་བསགས་པའི་ལས་སྒྲིབ་ཐམས་ཅད་བསླངས་ཏེ། སྣོད་བཀྲུས་པས་དྲི་མ་ལྡང་བ་ལྟར་དུག་ལྔའི་རྣམ་རྟོག་སྣ་ཚོགས་དང་འཕྲོ་རྒོད་ཤས་ཆེ་བས་སེམས་
སྐད་ཅིག་ཙམ་ཡང་མི་གནས་ཕྱག་ཆེན་ཉམས་དང་པོ་དང་དོན་གཅིག་བསྐྱེད་རིམ་མི་ཟིན་ཅུང་ཟད་གསལ་ན་ཡང་དེ་ལ་སེམས་མི་གནས་པར་དོན་མེད་དུ་འཕྲོ་བ་འབྱུང་སྟེ།། དེ་ནི་ཚོགས་ལམ་ཆུང་ངུ་ལ་གཉིས་སུ་ཕྱེ་བའི་ཆུང་ངུའི་ཆུང་ངུ་ཡིན་ནོ། །འདི་སྐབས་བསྐྱེད་རིམ་ཆོ་ག་རྒྱས་པ་ཐུན་བཞིར་འབད་དོ། །ཚོགས་ཀྱི་མཆོད་པ་ཅི་མང་བྱ། བླ་མའི་རྣལ་འབྱོར་རྡོར་སེམས་སོགས། སྔོན་འགྲོའི་ཆོས་ལ་འབད་དོ། །དེ་ནས་ཚོགས་ལམ་ཆུང་ངུ་ནི་ཚེ་རབས་མང་པོའི་མྱོང་འགྱུར་གྱི་ལས་ངན་བསླངས་ནས། ནད་སྣ་ཚོགས་དང་གདོན་གྱི་ཆོ་འཕྲུལ་སྣ་ཚོགས་དངོས་ཉམས་རྨི་ལམ་དུ་འབྱུང་། བསྐྱེད་རྫོགས་རེས་གསལ་རེས་མི་གསལ། འདི་ཡི་སྐབས་སུ་སྣང་སྲིད་ཐམས་ཅད་ལྷ་དང་ལྷ་མོའི་རང་བཞིན་དུ་བསྐྱེད་རིམ་གྱི་ང་རྒྱལ་བརྟན་པར་བྱ་ཞིང་ཚོགས་ལམ་དང་པོའི་བྷེ་བྱ་ནི། དྲན་པ་ཉེ་བར་གཞག་པ་བཞི་ཡིན་ཏེ། །དེ་ལ་བསྒོམ་ལུགས་གསུམ་ཡོད་དེ། དང་པོ་ལུས་དྲན་པ་ཉེ་བར་བཞག་ལ། ལུས་མི་གཙང་བའི་རྫས་སུམ་ཅུ་རྩ་གཉིས་ཡིན་ཚུལ་ལ་ལེགས་པར་བསམས་ཤིང་བརྟགས་ནས་འདོད་ཆགས་སོགས་བཟློག་པ་དང་། ལུས་ལ་ཆགས་འཛིན་དང་འཕྱུར་འདོད་སོགས་མི་བྱེད་པར་ཐེག་པ་ཐུན་
མོང་གིས་ལུས་དྲན་པ་ཉེ་བར་བཞག་པ་ཡིན་ལ། ལུས་གཙང་མི་གཙང་གཉིས་ཀའི་རྟོག་པ་དང་བྲལ་བར་ཉམས་ལེན་སྐྱོང་བའམ་གཙང་བ་དང་མི་གཙང་བ་སོགས་ཀྱི་རྣམ་རྟོག་གང་སྐྱེས་དེ་རང་གི་ངོ་བོ་ལ་བལྟས་པས་གཙང་མི་གཙང་གཉིས་ཀའི་རང་བཞིན་མེད་པར་སྟོང་ཉིད་དུ་རྟོགས་པས་ལུས་དྲན་པ་ཉེ་བར་བཞག་སྟེ། དེས་རིགས་འགྲེས་ནས་ཐེག་པ་ཐུན་མོང་གི་ལུགས་དང་། ཕྱག་ཆེན་ཁོ་ནའི་ལུགས་གོ་བར་བྱ་ཞིང་། འདིར་བཤད་བྱ་བསྐྱེད་རྫོགས་ཟུང་འཇུག་སྣང་སྟོང་དབྱེར་མེད་གཙོ་བོར་བྱས་ནས་ལམ་བསྒྲོད་ཚུལ་བཤད་དེ། རང་ལྷ་ལུས་ཐུགས་རྗེ་ཆེན་པོའི་སྐུ་སྣང་སྟོང་དབྱེར་མེད་སྒྱུ་མ་ལྟ་བུར་དྲན་པར་བྱེད་པ་ནི་ལུས་དྲན་པ་ཉེ་བར་བཞག་པ། བདེ་སྡུག་བཏང་སྙོམས་ཚོར་བ་ཐམས་ཅད་རིན་ཆེན་རིགས་ཀྱི་སྤྱན་རས་གཟིགས་སུ་ཤེས་པའམ། ཚོར་བའི་རྟོགས་པ་གང་ཤར་ཚོར་སྟོང་ཐུགས་ཀྱི་ཁྱེར་སོར་ཁྱེར་བ་ཚོར་བ་དྲན་པ་ཉེ་བར་བཞག་པ། སེམས་ཉིད་ཡོད་མེད་སྐྱེ་འགག་དང་བྲལ་བ་དེ་ཉིད་ལྷའི་ངོ་བོར་ཤར། ལྷ་དང་སེམས་དབྱེར་མེད་ནི་སེམས་དྲན་པ་ཉེ་བར་བཞག་པ། སྣང་སྲིད་འཁོར་འདས་ཀྱི་ཆོས་ཐམས་ཅད་སེམས་ལས་གཞན་དུ་མ་གྲུབ། སེམས་ཡང་བརྟག་པ་ཙམ་ལས་
དངོས་པོར་མ་གྲུབ་ལ། དེ་ཉིད་མེད་བཞིན་དུ་ལྷ་སྐུར་སྣང་བ་ཆོས་དྲན་པ་ཉེ་བར་བཞག་གོ །མདོར་ན་ལུས་དང་ཚོར་བ་ལྷའི་ངོ་བོ་སེམས་དང་ཆོས་རྣམས་སྣང་སྟོང་ཟུང་འཇུག་ལ་དམིགས་པ་གཏད་པ་ཡིན་ནོ། །དེ་ནས་ཚོགས་ལམ་གཉིས་ལ་བསྐྱེད་རྫོགས་ཟུང་འཇུག་ལས་བསྐྱེད་རིམ་ཤས་ཆེ་བའི་ངོས་ནས་མི་ཟབ་པའི་རྫོགས་རིམ་འཁོར་ལོ་ལྔའི་མན་ངག་དང་བཅས་ཏེ་བསྒོམས་པས་དངོས་ཉམས་རྨི་ལམ་དུ་རིགས་དྲུག་གི་ཡུལ་སྣ་ཚོགས་མཐོང་བ་དང་། དངོས་སུ་སྡུག་བསྔལ་ཡི་ཆད་པ་དང་། བཀྲེས་སྐོམ་གྱི་སྣང་བ་དང་། བྲེལ་འཕོང་དང་། ང་རྒྱལ་དང་། རིགས་དྲུག་དང་ཆ་མཐུན་པའི་ཉམས་སྣང་འཆར་ཏེ། འདི་སྐབས་རིགས་དྲུག་གི་ས་བོན་སྦྱང་བའི་དམིགས་པ་དེ་གནད་དུ་བསྣུན་པས་ཉམས་ཀྱི་སྡུག་བསྔལ་ཙམ་དང་། རྨི་ལམ་གྱི་སྡུག་བསྔལ་ཙམ་དེས་མ་འོངས་རིགས་དྲུག་ཏུ་སྐྱེ་རྒྱུའི་ལས་ངན་ཐམས་ཅད་བྱང་བར་གསུངས་སོ། །འདི་ནས་བསྐྱེད་རིམ་ཅུང་ཟད་གསལ་ཞིང་བརྟན། འདི་ཡི་བསྒོམ་བྱ་ཡང་དག་སྤོང་བ་བཞི་སྟེ། །དེ་ད་ལྟར་ལྷ་སྐུ་སྒྱུ་མ་ལྟ་བུ་རྩེ་གཅིག་ཏུ་བྷེ་པ་ལ་སེམས་གནས་པས་མི་དགེ་བའི་ཆོས་མ་སྐྱེས་པ་རྣམས་མི་སྐྱེ། དེས་མི་དགེ་བའི་ཆོས་སྐྱེས་པ་སྤོང་བར་བྱེད་དེ།
དགེ་བའི་ཆོས་མ་སྐྱེས་པ་རྣམས་ནི་ཏིང་ངེ་འཛིན་དེས་སྐྱེད་པར་བྱེད། སྐྱེས་པ་རྣམས་འཕེལ་ཞིང་མི་ཉམས་ཆུད་མི་ཟ་བར་བྱེད་པ་སྟེ། བསྐྱེད་རིམ་ལ་ཡང་ཚང་ལ། ཡང་ཅིར་སྣང་ལྷ་སྐུ་སྒྱུ་མ་ལྟར་བསྒོམས་པས། མི་དགེ་བའི་རྟོག་པ་ཡང་དག་སྤོང་བ་དང་པོ། ཅིར་སྣང་ཐམས་ཅད་སྒྱུ་མ་ལྟ་བུའི་རང་བཞིན་མེད་པར་ཤེས་པས། ཉོན་མོངས་པ་ཐམས་ཅད་སྤང་བ་ཡང་དག་སྤོང་བ་གཉིས་པ། སངས་རྒྱས་བསྒྲུབ་པའི་ཕྱིར་དགེ་བ་ལ་འདུན་པ་བསྐྱེད་ཅིང་བསྐྱེད་རྫོགས་ལ་སེམས་འཛིན་པ་ཡང་དག་སྤོང་བ་གསུམ་པ། དགེ་རྩ་ཆུད་མི་ཟ་བའི་ཕྱིར་འཁོར་གསུམ་ཡོངས་དག་གིས་བྱང་ཆུབ་ཏུ་བསྔོ་བ་ཡང་དག་སྤོང་བ་བཞི་པ་ཡང་གསུངས་སོ། །དེ་ཡང་སློང་དང་སྐྱོན་གྱིས་རྩུབ་ཉམས་རྣམས་གང་ཟག་ཐ་མ་ལ་འོང་། འབྲིང་ལ་སྐྱོན་ཡོན་འདྲེས་མར་འོང་། གང་ཟག་རབ་ལ་སྐྱོན་མེད་ཀྱི་ཡོན་ཏན་ཁོ་ན་འཆར་བར་གསུངས་སོ། །དེ་ནས་བདེ་གསལ་མི་རྟོག་པའི་ཉམས་བཟང་པོ་སྣ་ཚོགས་དང་། རྣ་བས་སྒྲ་སྙན་ཐོས་པའི་ཉམས་དགའ་བ་སྣང་སྲིད་འཁོར་འདས་ཐམས་ཅད་ལྷའི་དཀྱིལ་འཁོར་དུ་འཆར་སྙམ་བྱེད་པ། གཉིད་ཆུང་རྨི་ལམ་དུ་ལུང་བསྟན་དང་རྨི་ལམ་མངོན་ཤེས་འདྲ་བ་དང་། གཞན་གྱི་སྒོ་
གསུམ་ཤེས་སྙམ་པ་ལ་ཐིག་པ་མི་ཐིག་པ་ཅི་ཡང་འབྱུང་། ལྷ་འདྲེ་རྣམས་མཐོང་སྙམ་བྱེད་ཅིང་བཀུག་ལ་ཁུག་ལ་ཕར་བསྐད་ན་སྐད་ནུས་སྙམ་བྱེད་པ་དང་། རྫོགས་རིམ་གྱིས་དུ་བ་སྨིག་སྒྱུ་སོགས་རྟགས་བཅུ་འབྱུང་བ་མཐོང་། ཕྲིན་ལས་གང་བརྩམས་སྣ་ཁ་འགའ་རེ་འགྲུབ་འགའ་རེ་མི་འགྲུབ་སྟེ། བསྐྱེད་རིམ་བརྟན་པའི་སྔ་ལྟས་ཙམ་མོ། །འདིའི་སྐབས་སུ་ཁྲོ་བོའི་ང་རྒྱལ་གྱིས་གདོན་བགེགས་སོགས་བརླགས་ནུས་པར་རློམ་པ་དང་། ནུས་པ་ཆེ་བའི་ང་རྒྱལ་བཟུང་ན་གོལ་ས་ཡིན་ཅིང་། ནུས་པ་དེ་དག་ཀྱང་རྟག་ཏུ་གནས་པ་མ་ཡིན། ཁ་ཡར་འབྱུང་ཚིབའོ། །འདིའི་སྐབས་སུ་བསྒོམ་བྱ་ནི་རྫུ་འཕྲུལ་གྱི་རྐང་པ་བཞི་སྟེ། ཡེངས་བ་མེད་པའི་བསྐྱེད་རྫོགས་ལ་འདུན་པའི་རྫུ་འཕྲུལ་གྱི་རྐང་པ། བསྐྱེད་རྫོགས་དེ་ལ་ལེ་ལོ་སྤངས་པའི་ཉམས་སུ་ལེན་པ་བརྩོན་འགྲུས་ཀྱི་རྫུ་འཕྲུལ་གྱི་རྐང་པ། བསྐྱེད་རྫོགས་དེའི་ངང་ནས་སྤྱོད་ཅིང་མི་མཐུན་པའི་ཕྱོགས་ཐམས་ཅད་སྤངས་བར་བྱས་པས་སྤྱོད་པའི་རྫུ་འཕྲུལ་གྱི་རྐང་པ་དང་། །བསྐྱེད་རྫོགས་དེ་ལ་སེམས་ཟིན་པའི་སེམས་ཀྱི་རྫུ་འཕྲུལ་གྱི་རྐང་པའོ། །དེ་ལྟར་རྩེ་གཅིག་རབ་འབྲིང་གསུམ་དང་ཚོགས་ལམ་གསུམ་དོན་གཅིག་པར་བཞེད་དོ། །གླིང་རས་ཀྱིས། བཞི་
གསུམ་བཅུ་གཉིས་ཚོགས་ཀྱི་ལམ། །རྟོགས་པ་གཅིག་གིས་བསྒྲོད་པ་ཡིན། །ཞེས་གསུངས། ཡེ་ཤེས་མཁའ་འགྲོའི་གསུངས་ལས། སེམས་ནི་དང་པོ་བསྐྱེད་པ་ནས་། །དྲོད་ཀྱི་ཡེ་ཤེས་མ་སྐྱེས་བར། །ཚོགས་ལམ་ཡིན་པ་ཤེས་པར་བྱ། །ཞེས་དང། དེ་ལས་ཆེ་འབྲིང་ཆུང་གསུམ་སྟེ། །རེ་རེ་ལའང་བཞི་བཞིར་འདོད། །དྲན་པ་བཞི་དང་སྤོང་བ་བཞི། །རྫུ་འཕྲུལ་རྐང་པ་རྣམ་བཞི་ཡིན། །ཞེས་གསུངས་པའི་དོན། ཟབ་མོ་ནང་དོན་ལས། །རྩ་རླུང་ཐིག་ལེའི་གནད་ཤེས་ནས། །ཀུན་བཟང་སྤྱོད་ནས་དྲོད་ཐོབ་བླ་ནས། །སྦྱོར་ལམ་ཉིད་ལ་གནས་པ་ཡིན། །ཞེས་དང་། ཡེ་ཤེས་མཁའ་འགྲོའི་སྒྱུ་མའི་ལམ་རིམ་དུ། མཐོང་ལམ་མི་རྟོག་སྒྱུ་མ་ལ། །སྦྱོར་བའི་ཕྱིར་ན་སྦྱོར་ལམ་ཡིན། །ཞེས་དང་། གྲུབ་ཆེན་ཀརྨ་པས། བདེན་པ་མཐོང་དང་ཡང་དག་དོན། །རབ་ཏུ་སྦྱོར་ཕྱིར་སྦྱོར་ལམ་སྟེ། །ཞེས་གསུངས་པའི་སྦྱོར་ལམ་ལ་བཞི་ཡོད་དེ། དྲོད་རྩེ་མོ་བཟོད་པ་ཆོས་མཆོག་བཞིའོ། །གྲུབ་ཆེན་རིན་པོ་ཆེས། གདམས་ངག་རྒྱ་མཚོ་མཐའ་ཡས་སུ། སྦྱོར་ལམ་ལྔའི་ཐ་སྙད་མཛད་དོ། །འདིར་བསྒོམ་བྱ་རྩ་རླུང་འཁོར་ལོ་ལྔའི་མན་ངག་གནད་དུ་
བསྣུན། དགེ་རྩ་རྒྱལ་བར་མཆོད་ཅིང་སེམས་ཅན་གྱི་དོན་དུ་བསྔོས་ཏེ། མདོར་ན་སོར་སྡུད་དང་རྡོར་བཟླས་རླུང་སྦྱོར་བ་བཞི་ལྡན་སོགས་ལ་འབད་དེ། ནང་དོན་ལས། འདི་ནི་སོ་། སོར་སྡུད་པ་དང་། །བསམ་གཏན་བཞི་ལྡན་ལམ་ཡིན་ཏེ། །རྩ་ནི་སྦྱང་བ་ཞེས་ཀྱང་བཤད། །ཅེས་གསུངས་པས། འདི་སྐབས་སུ་འཁོར་ལོ་ལྔའི་རྩ་གནས་སུ་རླུང་སེམས་དང་ཁམས་འདུས་པས་རྒྱལ་བ་རིགས་ལྔ་སོ་སོའི་ཞིང་ཁམས་དང་། སངས་རྒྱས་དཀར་སེར་དམར་ལྗང་སོགས་མཐོང་། དེ་དག་ལ་རློམ་སེམས་སྤང་ཞིང་གཏུམ་མོ་འབར་འཛག་བྷེ། རྨི་ལམ་དུ་བསྐྱེད་རྫོགས་ཟུང་འཇུག་ཅུང་ཟད་ཟིན་པ་སྦྱོར་ལམ་དྲོད་ཀྱི་སྔ་རྟགས་སུ་གསུངས་ཤིང་། ཕུང་པོའི་བདེན་འཛིན་ཞིག །ཡང་དག་པའི་དོན་ལ་ཐེ་ཚོམ་མེད་ཅིང་། བདག་གཞན་དགེ་བ་ལ་སྦྱོར་ནུས། རང་བཞིན་གྱིས་བྱམས་ཤིང་གཉིད་སོགས་བག་མེད་དབང་དུ་མི་འགྲོ་བ་སྒྱུ་མ་རང་ཤར་གྱི་ཡེ་ཤེས་མེ་ཡི་སྔ་ལྟས་ཡིན་པས་དྲོད་ཅེས་བྱའོ། །སྣང་བ་སེམས་སུ་ཐག་ཆོད་པས་གསང་སྤྱོད་བྱེད་པའི་སྐབས་སོ། །དྲོད་རྩེ་མོ་གཉིས་ཀའི་སྐབས་སུ་བསྒོམ་བྱ་གཙོ་བོ་དབང་པོ་ལྔ་ཡིན་ཏེ། སྲོག་ལ་བབ་ཀྱང་དམ་ཚིག་ལས་མི་འདའ་བར་ཉམས་སུ་ལེན་པ་དད་པའི་
དབང་པོ། བསྐྱེད་རྫོགས་ཀྱི་དོན་རྒྱུན་ཆད་མེད་པར་ཉམས་སུ་ལེན་པ་བརྩོན་འགྲུས་ཀྱི་དབང་པོ། སྒྱུ་མ་ལྟ་བུའི་ཉམས་ལེན་དེ་བརྗེད་པ་མེད་པ་དྲན་པའི་དབང་པོ། །བསྐྱེད་རྫོགས་དེ་ལ་མ་ཡེངས་རྩེ་གཅིག་བསྒོམ་པ་ཏིང་ངེ་འཛིན་གྱི་དབང་པོ། ཏིང་ངེ་འཛིན་དེའི་ངོ་བོ་ལ་ཤེས་རབ་ཀྱིས་སོ་སོར་རྟོགས་པས་རང་བཞིན་མེད་པར་ཤེས་པས་ཤེས་རབ་ཀྱི་དབང་པོ། གླིང་རས་ཀྱིས། སྟོབས་དང་དབང་པོ་སྦྱོར་བའི་ལམ། །རྟོག་པ་གཅིག་གིས་བསྒྲོད་པ་ཡིན། །ཞེས་གསུངས་སོ། །དེ་ནས་རླུང་བླ་མ་ཡི་དམ་དང་བསྲེ་བ། རླུང་མཁའ་འགྲོ་ཆོས་སྐྱོང་དང་བསྲེ་བ། རླུང་འགྲོ་བ་རིགས་དྲུག་དང་བསྲེ་བའི་གདམས་ངག་བསྒོམས་པས་རྩ་གནས་ཐམས་ཅད་དུ་རླུང་སེམས་འདུས་པས་སངས་རྒྱས་བྱང་སེམས་ཉན་རང་མཁའ་འགྲོ་ཆོས་སྐྱོང་མ་ངེས་པ་དུ་མ་མཐོང་སྙམ་བྱེད་པ་འབྱུང་སྟེ། དེ་ཡང་རླུང་སེམས་འདུས་པའི་རྟགས་དང་བདུད་ཀྱིས་བསླུ་བའི་ཆོ་འཕྲུལ་དང་། སྡིག་སྒྲིབ་དག་པའི་དག་སྣང་རྣམས་འདྲེས་མར་འབྱུང་བས་གང་ལ་ཡང་དགའ་བྲོད་སྤང་། འདིའི་སྐབས་སུ་རྨི་ལམ་འཛིན་སྦྱོང་སྤེལ་བ་སོགས་ཉམས་སུ་ལེན་ཏེ། ཉིན་པར་སྒྱུ་མ་ལྷའི་སྐུ་དྲན་པ་འབྲལ་མེད་ལ་རྨི་ལམ་དུ་
ཡང་སྒྱུ་མ་ལྷའི་སྐུ་དེ་རང་ཤར་དུ་བག་ཙམ་འབྱུང་བ་རྩེ་མོའི་རྟགས་ཏེ། གོས་གདན་ལ་དྲི་མ་མི་ཆགས་པ་དང་། ལུས་ཕྱི་ནང་གི་སྲོག་ཆགས་མེད་པ་དང་། སེར་སྣ་དང་གཡོ་སྒྱུ་མེད་ཅིང་། དབེན་པ་ལ་དགའ་བ་རྣམས་འབྱུང་ངོ་། །སྦྱོར་ལམ་གཉིས་པའོ། །དེ་ནས་རྩ་དང་རླུང་དང་ཐིག་ལེ་གསུམ་གྱི་ཉམས་ལེན་རྩེ་གཅིག་ཏུ་གོམས་པས་ཟག་བཅས་ཀྱི་བདེ་ཉམས་སུ་ལུས་སེམས་བདེ་བས་ཚིམ་པ་དང་། གསལ་ཉམས་སུ་ཟླ་བ་ཤར་བ་ལྟ་བུ་སྟོང་ཉིད་ནམ་མཁའ་ལྟ་བུ། ཞི་གནས་རྒྱ་མཚོ་དྭངས་མ་ལྟ་བུ། རྣམ་རྟོག་འགག་ཅིང་མི་རྟོག་པ་འབའ་ཞིག་དང་། ཉིན་མཚན་འཁོར་ཡུག་ཏུ་ཉམས་དེའི་ངང་ལས་འདའ་བ་དང་། སངས་རྒྱས་བྱོན་ཀྱང་དྲི་རྒྱུ་མེད་ང་ཡི་འདི་འདྲ་བླ་མ་གོང་མ་རྣམས་ཀྱིས་ཀྱང་ཅུང་མ་རྟོགས་སྙམ་པའི་ང་རྒྱལ་སྐྱེ། ངོ་སྤྲོད་བྱས་ཀྱང་ཐེ་ཚོམ་གྱིས་ང་ཡི་རྒྱུད་ཚོད་ཁོང་གིས་མ་མཁྱེན་སྙམ་ནས་སློབ་དཔོན་བས་སློབ་མ་མཐོ་བའི་ལུང་འདྲེན་བྱེད་དོ། །ལོངས་སྤྱོད་འཁོར་ཚོགས་དཔག་ཏུ་མེད་པ་འདུ་སྟེ་རྣམ་གཡེང་བདུད་ཀྱི་བར་ཆད་ཞུགས་ནས་ལྷ་གནས་སུ་གོལ་བའི་རྒྱུ་ཡིན་གསུངས། །བསྒོམ་རྩེ་གཅིག་འབྲིང་གི་སྣེ་ཟིན་ཙམ་ཡིན་པར་གསུངས། འདིར་འཁོར་དང་ལོངས་སྤྱོད་ཐམས་ཅད་སྒྱུ་
མ་རྨི་ལམ་ལྟ་བུར་བྷེ་ལ་ཆགས་ཞེན་སྤངས། སྦྱོར་ལམ་གསུམ་པ་བཟོད་པ་དང་། བཞི་པ་ཆོས་མཆོག་སྟེ། འདི་གཉིས་ཀའི་བྷེ་བྱ་སྟོབས་ལྔ་ཡིན་ཏེ། འདིའི་སྐབས་སུ་བདུད་ཀྱིས་ཡི་དམ་དང་སངས་རྒྱས་སུ་སྤྲུལ་ནས་ཁྱེད་ཀྱི་ལམ་འདི་ནོར་བས་སྐྱུར་ཅིག །ཟེར་ཡང་ཡིད་མི་འགྱུར་བའི་དད་པའི་སྟོབས། སྒྲུབ་པ་དང་ཉམས་ལེན་ལྷ་དང་བཅས་པའི་འཇིག་རྟེན་བཤོལ་ཡང་མི་ཤོར་བར་ཉམས་སུ་ལེན་པ་བརྩོན་འགྲུས་ཀྱི་སྟོབས། གཡེང་བས་བསྐྱེད་རྫོགས་ཀྱི་བསྒོམ་པར་ཡེངས་བར་མི་ནུས་པ་དྲན་པའི་སྟོབས། ཆགས་པ་དང་སྡང་བའི་ཡུལ་ཅིར་སྣང་ཡང་དེར་འཛིན་མེད་པར་ཏིང་ངེ་འཛིན་དེའི་ངང་དུ་གནས་པ་ཏིང་ངེ་འཛིན་གྱི་སྟོབས། ཅིར་སྣང་གི་ཆོས་ཐམས་ཅད་ཤེས་རབ་སྟོང་ཉིད་ཀྱི་ལྟ་བས་རང་བཞིན་མེད་པར་ཤེས་པ་ཤེས་རབ་ཀྱི་སྟོབས། རྨི་ལམ་ན་རྨི་ལམ་འཛིན་སྦྱང་སོགས་ལ་སྐྲག་སྣང་མི་འབྱུང་སྟེ། རྨི་ལམ་དུ་ཡང་ཆོས་ཐམས་ཅད་རྨི་ལམ་ལྟ་བུར་ཤེས་པ་བཟོད་པའི་རྟགས་དང་། དངོས་སུ་ཡང་སྤྱོད་ལམ་ཐམས་ཅད་དུ་སྒྱུ་མའི་ཉམས་དང་མི་འབྲལ་ཞིང་སྣང་བའི་བདེན་པ་ཞིག་པས། ཚིག་ངན་ཐམས་ཅད་བཟོད་པར་ནུས། འཁོར་བ་རང་བཞིན་མེད་པར་མཐོང་ནས་
སེམས་ཅན་ལ་ཕན་ན་དམྱལ་བར་ཡང་འཇུག་ནུས། ཆོས་ལོག་དང་བདུད་ཀྱི་དབང་དུ་མི་འགྲོ་བ་རྣམས་ཏེ། དེ་ངན་སོང་དུ་ནམ་ཡང་མི་ལྟུང་བའོ། །གསང་བ་བསམ་གྱིས་མི་ཁྱབ་པ་ལས། བཟོད་པ་བརྟན་པོས་ངན་སོང་སྡུག་བསྔལ་སྤངས། །ཞེས་དང་། སྒྱུ་མའི་ལམ་རིམ་ལས། རྨི་ལམ་ན་ཡང་ཆོས་རྣམས་ཀུན། །རྨི་ལམ་ཉིད་དུ་ཤེས་པ་སྟེ། །བཟོད་པ་དག་གི་རྟགས་ཡིན་ཏེ། །ངན་སོང་གསུམ་དུ་ཡང་མི་ལྟུང་། །རྨི་ལམ་ཟིན་ན་ལྷ་ཡི་སྐུ། །རང་ཤར་ཡུད་ཙམ་བྱུང་གྱུར་ན། །བར་དོར་ཟིན་པ་ཐེ་ཚོམ་མེད། །སྒྱུ་མར་གྱུར་པ་དེ་དང་མཚུངས། །ཞེས་གསུངས་སོ། །དེ་ལྟར་བསྒོམས་པས་ཉམས་བཟང་ངན་ཐམས་ཅད་རྟགས་མི་ཐུབ་པས་རིང་ན་ལོ་ཙམ་ཐ་ན་ཟླ་བའམ་ཞག་རེའམ་ཉིན་རེ་ལས་མི་འོང་ལ། ཉམས་བཟང་པོ་དེ་ཤར་ཚེ་ཐུན་མོང་གི་མངོན་ཤེས་གྲུབ་རྟགས་སྣ་ཚོགས་འབྱུང་ཡང་ཉམས་དེ་ཡལ་ནས་མི་འབྱུང་གསུངས་སོ། །འདིའི་སྐབས་སུ་སྟོང་ཉམས་ནམ་མཁའ་ལྟར་གཟའ་གཏད་མེད་སྙམ་པ་དང་། ཞེན་པ་གཏིང་ནས་མ་ལོག་པར་འཁྲུལ་ཞིག་བྱེད་པ་དང་། བྱ་བ་སྤྱོད་པ་མཐོ་དམན་སྣ་ཚོགས་བྱེད་པ་དང་ཚིག་ཅལ་ཅོལ་ངེས་མེད་སྨྲ་ཞིང་། ཉམས་དེ་ཡོད་ཚེ་ལུས་སྲོག་
ལ་ཡང་ཆགས་ཞེན་མེད་དེ། ཉམས་ཡལ་ནས་ཞེན་ཆགས་ཐ་མལ་པ་དང་འདྲ་བར་འབྱུང་སྟེ་འདི་དུས་ཞེན་པ་བཏང་། ངོ་བོ་ཅུང་ཟད་མཐོ་ཡང་མི་བརྟན་པར་ཐེ་ཚོམ་ཟ་བ་འོང་སྟེ། རྩེ་གཅིག་འབྲིང་གི་མཐར་ཐུག་པ་ཡིན་གསུངས། དངོས་སུ་དག་པའི་སྒྱུ་ལུས་ཡི་དམ་ཐུགས་རྗེ་ཆེན་པོའི་སྐུར་བསྒོམ་པ་དང་། མི་འབྲལ་དེས་རྨི་ལམ་དུ་ཡང་དེ་ལྟར་འཆར་ཏེ༔ སྒྱུ་མ་ལམ་རིམ་དུ་དེ་ཐོབ་པའི་རྟགས་གསུངས་པ། ཆོས་མཆོག་རྟགས་ནི་སྤྱོད་ལམ་ཀུན། །ཅི་བྱེད་སེམས་ཅན་དོན་ཀུན་བྱེད། །སངས་རྒྱས་དགྱེས་པའི་སྤྱོད་པ་སྟེ། །ཚེ་འདིས་ཞེན་པ་འཁྲིས་ནས་བྲལ། །ཆོས་བརྒྱུད་དུག་གི་མེ་ཏོག་རྣམས། །སྒྱུ་མ་ཉིད་དུ་ཡང་དག་གྲོལ། །རྨི་ལམ་ཟིན་ན་འོད་གསལ་རྟོགས། །དེས་ན་བར་དོ་འབྱོང་བ་ཡིན། །ཞེས་གསུངས་སོ། །འདིར་གྲུབ་ཆེན་རིན་པོ་ཆེ་ཀརྨ་པས་འཇིག་རྟེན་འདས་མ་འདས་ཀྱི་སོ་མཚམས་འདི་དང་། སྦྱོར་ལམ་ལྔར་བཞེད། སྣོད་བཅུད་ཐམས་ཅད་བདེ་བར་ཤར་བ། ཏིང་ངེ་འཛིན་མཉམ་རྗེས་འབྲེལ་སྙམ་བྱེད་པ། ལུས་སེམས་ཡོད་དུ་མི་ཚོར་ཞིང་རླུང་རྒྱུ་བ་མི་ཚོར་བ། བདེ་སྟོང་དབྱེར་མེད་ཀྱི་ཉམས་འདུ་འབྲལ་མེད་པའི་དགའ་སྤྲོ་སྣ་ཚོགས་ཀྱིས། ང་རྒྱལ་
རློམ་སེམས་ཆེན་པོ་སྐྱེས་ཏེ། བདག་གི་ཉམས་རྟོགས་འདྲ་བ་སུ་ལ་ཡང་མེད་སྙམ་པ་འབྱུང་སྟེ། དེ་ལ་ཡང་བརྩོན་འགྲུས་ཀྱི་ཉམས་ལེན་གནད་དུ་བསྣུན་པས་ཐུན་མོང་གི་ཡོན་ཏན་ཟག་བཅས་ཀྱི་མངོན་ཤེས་ཅུང་ཟད་ཙམ་དང་། ལུས་མེ་ཆུ་ས་རླུང་དུ་སྤྲུལ་པ་སོགས་ཟད་པར་ཟིལ་གནོན་གྱི་རྫུ་འཕྲུལ་དང་མང་པོར་སྤྲུལ་པ་སོགས་ནུས། རྩ་གནས་བཞིར་དགའ་བཞིས་བྱང་སེམས་བརྟན་པས་གདུལ་བྱ་ཐམས་ཅད་འདུ་སྟེ། ནུས་མཐུ་དང་བདེན་སྟོབས་སྣ་ཚོགས་འགྲུབ། སྐྱེ་བ་དཔག་མེད་ཀྱི་བསོད་ནམས་ཐམས་ཅད་ཏིང་ངེ་འཛིན་གྱི་སྟོབས་ཀྱིས་འདིར་སྨིན་ནས། འདོད་དགུ་ཆར་ལྟར་འབབ་པ་དང་སྙན་གྲགས་ཀྱིས་ཐམས་ཅད་དུ་ཁྱབ། ཆོས་དང་ཟང་ཟིང་སྣ་ཚོགས་ཀྱི་རྣམ་གཡེང་འབྱུང་སྟེ། བརྩོན་འགྲུས་བརྩམས་ན་ཉམས་གོང་དུ་འཕེལ། གལ་ཏེ་རྣམ་གཡེང་གིས་ཉམས་ལེན་སྒྱུར་ན་ཉམས་ཡལ་ནས་ཡོན་ཏན་ཐམས་ཅད་ཡལ། འདུ་བ་ལོངས་སྤྱོད་ཐམས་ཅད་མེད་ཀྱང་པར་འགྱུར་ལ། གལ་ཏེ་ཉམས་ལེན་བར་ཆད་མ་བྱུང་བར་དེ་ག་ལ་བསྐྱངས་བས། དཔོན་སློབ་ཐམས་ཅད་ཀྱིས་རྩེ་གཅིག་འབད་ཀྱང་ཉམས་བཟང་པོ་ཙམ་ལས་རྟོགས་པ་སྐྱེས་པ་མི་འབྱུང་། དེ་གར་ཚེ་འཕོས་ན་གཙང་རིས་
ཀྱི་ལྷ་གནས་ལྔར་སྐྱེས་ཏེ། གཞལ་ཡས་ཁང་གི་ནང་དུ་སྣང་སྟོང་ལྷའི་ལུས་སུ་བརྫུས་ཏེ་སྐྱེས་པས། དེ་ན་ལོངས་སྤྱོད་རྫོགས་པའི་སྐུར་སངས་རྒྱས་པ་ཡིན་ནམ་སྙམ་ནས་ཡུན་རིང་བསྐལ་པར་གནས་ནས་བསོད་ནམས་དེ་ཟད་ཏིང་ངེ་འཛིན་གྱི་ཉམས་དེ་ཡལ་ནས། དབང་པོ་རབ་སྟོང་ཉིད་དངོས་སུ་རྟོགས་ནས་ཡར་འཕར་ཏེ་ས་དང་པོ་ཐོབ་ནས་སྔར་གོལ་ཟློབ་ཡིན་པར་ཡང་ཤེས། དབང་པོ་བརྟུལ་པོས་འགྱོད་པ་དང་སྐྱག་པ་སྐྱེས་པས་ལྷ་གནས་འོག་མ་འོག་མར་ལྟུང་བར་བཤད་དོ། །འདི་སྐབས་སུ་ཟག་བཅས་ཀྱི་ཉམས་བཟང་པོ་དང་ཟག་མེད་ཀྱི་ཏིང་ངེ་འཛིན་འདྲེས་ཤིང་འཆར་ཏེ་སློབ་དཔོན་ཉམས་དང་མི་ལྡན་ན། འགྲོ་དོན་རན་ཅིང་རྟོགས་པ་མཐར་ཐུག་ཏུ་ངོ་སྤྲད་ནས་འདུས་བྱས་དགེ་བ་ལ་བརྩོན་པས་ཉམས་ལེན་བྱིངས། །ཐུན་མོང་གྲུབ་རྟགས་སྣ་ཚོགས་ལ་མངའ་བརྙེས་པས་འདུ་ཚོགས་ལོངས་སྤྱོད་ལྷོ་བལ་ཚོང་འདུས་ཆེན་པོ་ལྟ་བུ་འབྱུང་། ལོངས་སྤྱོད་རྒྱལ་པོའི་ཕོ་བྲང་ལྟ་བུ་འབྱུང་ཡང་། ཉིན་པར་ཆོས་བརྒྱད་རང་མཐོང་ཁ་ལེན་སྟོན་མོ་ལ་ཡེངས། ནུབ་མོ་གཉིད་དུ་འགྲོ། དཔོན་སློབ་ཐམས་ཅད་འདོད་ཡོན་གྱི་རོ་ལ་ཆགས་པས། ཏིང་ངེ་འཛིན་གྱི་རྒྱུན་མ་ཆད་ཙམ་དང་། དྲང་དོན་གྱི་
དགེ་ཚོགས་རྒྱུན་ཆད་མེད་པར་རྒྱ་ཆེར་བསྒྲུབས་ཀྱང་འཇིག་རྟེན་གྱི་ལམ་ལས་མི་འཕགས་པར་བཤད་དོ། །གདམས་ངག་རྒྱ་མཚོ་མཐའ་ཡས་ལས། གཟུགས་མེད་བཞི་དང་བཅུ་བདུན་ལྷ། །ཚངས་པ་དང་ནི་བརྒྱ་བྱིན་དང་། །འཇིག་རྟེན་སྐྱོང་དང་འཁོར་ལོས་སྒྱུར། །མཐོ་རིས་གནས་གསུམ་རྒྱུ་འབྲས་ཏེ། །ཚེ་གཅིག་མྱ་ངན་འདའ་བ་དང་། །སྨིན་གྲོལ་རྒྱལ་མཚན་ཕྱུར་བ་ཡིས། །བཀའ་བརྒྱུད་རྒྱལ་ས་ཟིན་པ་དང་། །དུས་གསུམ་དུས་མེད་ཐམས་ཅད་དུ། །གཞན་རྒྱུད་བྱིན་གྱིས་བརླབས་པ་ཡིས། །མཆོག་གི་དངོས་གྲུབ་དམ་པ་སྟེ། །མཐོ་རིས་ཐོབ་ལ་མ་རེ་ཞིག །ཅི་ཕྱིར་ཞེ་ན་རྒྱལ་བ་ཡིས། །བྱང་ཆུབ་སེམས་དཔའི་ཐེག་པ་ཅན། །བྱེ་བ་ཁྲག་ཁྲིག་བསམ་མི་ཁྱབ། །སེམས་བསྐྱེད་ས་ལམ་བགྲོད་ལགས་ཀྱང་། །སྡིག་ཅན་བདུད་ཀྱི་བར་ཆད་ཀྱིས། །གཅིག་གམ་གཉིས་ཙམ་མ་རྟོགས་པ། །ཐམས་ཅད་ཕྱིར་ལ་ལྡོག་གོ་གསུངས། །དེ་ཕྱིར་རྣལ་འབྱོར་དབང་ཕྱུག་རྣམས། །མྱ་ངན་འདས་པའི་ཞིང་ས་ལ། །སྐུ་གསུམ་འབྲས་བུ་སྨིན་རྒྱུ་སྟེ། །ལམ་རྟགས་བདུད་ཀྱི་བསླུ་བྲིད་དང་། །འདོད་ཡོན་བར་སྣང་འཇའ་ཚོན་དེས། །མི་ཤེས་བྱིས་སྦ་བྲིད་ཉན་གདའ། །སྦྱོར་ལམ་ཕྲ་
བའི་ཕྲ་བ་དེས། །འཇིག་རྟེན་འདས་དང་མ་འདས་མཚམས། །ཞེས་གསུངས་སོ། །འདི་ཡི་སྐབས་སུ་བསམ་གཏན་ལ་རྩེ་གཅིག་པར་བྷེ་ན་མངོན་ཤེས་ལྔ་དང་ཐུན་མོང་གི་གྲུབ་ཆེན་བརྒྱད་དེ། ནམ་མཁའ་ལ་འགྲོ་བ། ཆུ་ལ་མི་བྱིངས་བ། ལུས་མི་སྣང་བར་སྦས་པ། ཚེ་ལོ་ལྔ་བརྒྱ་ཙམ་དུ་སྡོད་ནུས་པ་ལ་སོགས་འབྱུང་སྟེ། ནང་དོན་ལས། བསམ་གཏན་ཡན་ལག་རྫོགས་པ་ཡི། །།མངོན་པར་ཤེས་པ་ལྔ་ཐོབ་གསུངས། །སྐུ་ཡི་དཀྱིལ་འཁོར་དུ་བཞུགས་པའོ། །ཞེས་གསུངས་སོ། །པདྨ་ཟབ་པའི་རྒྱུད་ལས། ལམ་ལྔ་སྨིན་པའི་དབང་ལ་ཚང་། །ཞེས་གསུངས་པའི་དོན། དབང་གི་སྔོན་འགྲོའི་ཆོས་བདུན་གྱི་དོན་གྱི་འབྲས་བུའི་སྐབས་ནས་མངོན་དུ་གྱུར་ཅིང་རྫོགས་པ་ཡིན་གསུངས་སོ། །མདོར་ན་འདི་མན་ཆད་འཇིག་རྟེན་པ་དང་ཐུན་མོང་གི་ལམ་ཡིན་པས་བོན་དང་ཕྱི་རོལ་པའི་ལམ་དང་ཉན་རང་ཐམས་ཅད་ལ་ཐུན་མོང་གི་གྲུབ་རྟགས་འདི་རྣམས་ཀྱང་འབྱུང་བ་ཡིན་པར་སྣང་ངོ་། །ནང་དོན་ལས། དེ་ཚེ་བརྟུལ་ཞུགས་སྤྱོད་པ་ཡིས། །སྦྱོར་ལམ་བསྒྲོད་ནས་མཐོང་བར་སྦྱོར། །ཞེས་དང་། དེ་ནས་སྲོག་རྩོལ་སྦྱོར་ལྡན་པས། །མཐོང་ལམ་ལ་ནི་སྦྱོར་བར་
བྱེད་། །ཅེས་གསུངས་པས། སྦྱོར་ལམ་དྲོད་ནས་གསང་སྤྱོད་བརྩམ། །བཟོད་པའི་སྐབས་སུ་རིག་པ་བརྟུལ་ཞུགས་སྤྱོད་པར་བྱ་སྟེ། དེ་ཚེ་བརྟུལ་ཞུགས་སྤྱོད་པ་ཡིས། །སྦྱོར་ལམ་བསྒྲོད་ནས་མཐོང་བར་སྦྱོར། །ཞེས་གསུངས། བསྒོམ་བྱ་སྲོག་རྩོལ་གཙོར་བོ་བྷེ་ཏེ། དེ་ནས་སྲོག་རྩོལ་སྦྱོར་ལྡན་པས། །མཐོང་ལམ་ལ་ནི་སྦྱོར་བར་བྱེད། །ཅེས་གསུངས་སོ། །དྲོད་ནས་ཆོས་མཆོག་བར་ནི་སྦྱོར་ལམ་སྟེ། སྒྱུ་མ་ལམ་རིམ་ལས། དྲོད་ནས་འཇིག་རྟེན་ཆོས་མཆོག་བར། །སྦྱོར་བའི་ལམ་དུ་ཤེས་པར་བྱ། །ཞེས་དང་། ཆོས་མཆོག་སྐད་ཅིག་ཕྱི་མ་ལ། །མཐོང་ལམ་རྣམ་པར་མི་རྟོག་པའི། །ཡེ་ཤེས་སྒྱུ་མ་རང་ཤར་ཉིད། །ཕྱིན་ཅི་མ་ལོག་མཚན་ཉིད་ཅན། །སྔ་མ་མཐོང་བས་མཐོང་བའི་ལམ། །ཞེས་གསུངས་སོ། །གདམས་ངག་རྒྱ་མཚོ་མཐའ་ཡས་ལས། མ་མཐོང་མཐོང་ཕྱིར་མཐོང་བའི་ལམ། །རབ་དགའི་ས་རུ་མཚན་གསོལ་བ། །ཞེས་གསུངས་ཏེ། མཚན་ཉིད་པའི་ལུགས་ལ། སེམས་བསྐྱེད་ནས་བཟུང་སྟེ་དེ་གྲངས་མེད་གཅིག་ཏུ་ཚོགས་བསགས་པས་ས་དང་པོ་ཐོབ་པར་བཤད་ལ། འདིར་གསང་སྔགས་ཉེ་ལམ་ལ་བསྟེན་པ་ཟླ་དྲུག་གམ་ལོ་ཅི་རིགས་ཀྱིས་ཐོབ་པར་
བཤད། དེ་ཡང་གསང་བ་རྡོ་རྗེའི་གནས་ནས། སྤྱི་བོ་བདེ་ཆེན་མན་ཆད་དྷ་ཏི་རྩ་ཡི་རྒྱལ་པོ་ལས། རྩ་མདུད་བཅུ་གསུམ་གྱིས་བཅིངས་ནས་ཡོད་པས། རྟག་ཏུ་རླུང་འཛིན་པ་དང་། བསྐྱེད་རྫོགས་ཀྱི་ནུས་པས་རྩ་མདུད་རེ་རེ་བཞིན་གྲོལ་བ་དང་། ལས་རླུང་ཡེ་ཤེས་རླུང་གིས་ལྡོག་པ་དང་། ཐིག་ལེའི་དྭངས་མ་རྩ་མདུད་དེ་དང་དེར་བརྟེན་པས་རིམ་པར་ས་བཅུ་གསུམ་ཐོབ་སྟེ། ཡང་གདམས་ངག་རྒྱ་མཚོ་མཐའ་ཡས་ལས། གསང་གནས་མི་འགྱུར་རྡོ་རྗེའི་གནས། །སྤྱི་བོ་བདེ་ཆེན་མན་ཆད་དུ། །འཁོར་བའི་རྩ་མདུད་བཅུ་གསུམ་ཡོད། །རྩ་མདུད་རིམ་དང་རིམ་བཞིན་གྲོལ། །རླུང་ཡང་རིམ་དང་རིམ་གྱིས་ལྡོག །བྱང་ཆུབ་སེམས་ཡང་རིམ་གྱིས་ཁྱབ། །ཅེས་དང་། ཟབ་མོ་ནང་དོན་ལས། གཉིས་པ་ཐིག་ལེ་ལྷན་ཅིག་ཏུ། །གསང་བར་འགག་པ་མཐོང་བའི་ལམ། །དེ་ཡི་མ་རིག་སྐྱེ་ཤི་འགག །གསུམ་པར་དེ་ཉིད་འགག་པ་སྟེ། །ལྟེ་བར་དེ་བཞིན་བཞི་དང་ལྔ། །དྲུག་དང་བདུན་པ་སྙིང་ཁ་སྟེ། །བརྒྱད་དང་དགུ་པ་མགྲིན་པ་ལ། །བཅུ་དང་བཅུ་གཅིག་སྤྱི་བོར་བཤད། །དེ་ནས་གཙུག་ཏོར་རླུང་འགགས་པས། །དེ་ཚེ་སངས་རྒྱས་ཐོབ་པར་གསུངས། །
ཞེས་གསུངས་ལ། དེ་ཡང་རྟེན་འབྲེལ་བཅུ་གཉིས་ལུགས་ལྡོག་ཏུ་འགག་པ་དང་། མས་བརྟེན་གྱི་དགའ་བ་བཅུ་དྲུག་ཀྱང་ཡིན། རྟེན་འབྲེལ་བཅུ་གཉིས་འགག་པ་དང་། །མས་བརྟེན་དགའ་བ་བཅུ་དྲུག་ཡིན། །ཅེས་གསུངས་སོ། །གསང་བའི་རྩ་མདུད་གཉིས་དང་སྤྱི་བོའི་གཉིས་རེ་རེ་ལ་རྩ་འཁོར་བཞི་བཞི་དང་། བར་གྱི་རྩ་མདུད་བརྒྱད་ལ་རེ་རེ་ལ་རྩ་འཁོར་གཉིས་རེ་སྟེ་ཡོངས་སུ་ཡུལ་ཆེན་སུམ་ཅུ་རྩ་གཉིས་ཀྱི་རྩ་མདུད་གྲོལ་ནས་ཕྱིའི་ཡུལ་ཆེན་སོ་གཉིས་སོ་སོ་དེ་དང་དེར་རྫུ་འཕྲུལ་གྱིས་བསྒྲོད་ནུས་པ་དང་། ཡུལ་སོ་གཉིས་ཀྱི་ལས་རླུང་དབུ་མར་རིམ་པར་ཐིམ་པས་རྟོགས་པ་སྐྱེ་ཞིང་དེ་དག་ཏུ་ཐིག་ལེའི་དྭངས་མ་བརྟེན་པས། ཡུལ་དེ་དག་གི་དཔའ་བོ་ཌཱཀི་དབང་དུ་བསྡུས་ནས་དངོས་གྲུབ་སྟེར་ཞིང་ཕྲིན་ལས་སྒྲུབས། རྩ་མདུད་བཅུ་གསུམ་པོ་རེ་རེ་གྲོལ་བས་ས་རེ་རེ་ནོན་ཏེ། དེ་དག་གི་མིང་ནི། མངོན་བརྗོད་བླ་མ་ལས། རབ་ཏུ་དགའ་དང་དྲི་མ་མེད། །འོད་བྱེད་པ་དང་འོད་འཕྲོ་བ། །སྦྱང་དཀའ་བ་དང་མངོན་དུ་གྱུར། །རིང་དུ་སོང་དང་མི་གཡོ་བ། །ལེགས་པའི་བློ་གྲོས་ཆོས་ཀྱི་སྤྲིན། །དཔེ་མེད་པ་དང་ཡེ་ཤེས་ལྡན། །རྡོ་རྗེའི་ས་ནི་བཅུ་གསུམ་པ། །ཞེས་གསུངས་ཤིང་།
ཡང་ས་དེ་དག་གི་མིང་གནས་དང་ཉེ་བའི་གནས། ཞིང་དང་ཉེ་བའི་ཞིང་། ཚནྡྷོ་དང་ཉེ་བའི་ཚནོ། འདུ་བ་དང་ཉེ་བའི་འདུ་བ། འཐུང་སྤྱོད་དང་ཉེ་བའི་འཐུང་སྤྱོད། དུར་ཁྲོད་དང་ཉེ་བའི་དུར་ཁྲོད། རྡོ་རྗེ་འཛིན་གྱི་ས་སྟེ་ཕྱིའི་གནས་དང་རྩའི་མིང་ལ་བརྗོད་པའི་ལུགས་གསུངས་སོ། །མཐོང་ལམ་གྱི་བསྒོམ་བྱ་ཏིང་ངེ་འཛིན་གྱི་བྱང་ཆུབ་ཀྱི་ཡན་བདུན་ཡིན་ཏེ། ལྷ་སྐུ་སྣང་སྟོང་སྒྱུ་མ་ལྟ་བུ་ཡོད་མེད་བདེན་བརྫུན་གྱིས་དྲན་རྟོག་བྱར་མེད་པས་དྲན་པ་བྱང་ཆུབ་ཡན་ལག །འཁོར་འདས་ཀྱི་ཆོས་ཐམས་ཅད་སྒྱུ་མ་ལྟར་བདག་མ་གྲུབ་པར་རྟོགས་པས་ཆོས་ཐམས་ཅད་དབྱེར་མེད་བྱང་ཆུབ་ཡན་ལག །སྒྱུ་མ་ཙམ་དུ་ཡང་འཛིན་པ་དང་ཡང་བྲལ་ཏེ་ཆོས་ཐམས་ཅད་མི་ལེན་མི་འདོར་འབད་རྩོལ་དང་བྲལ་བ་བརྩོན་འགྲུས་བྱང་ཆུབ་ཡན་ལག །དགའ་མི་དགའ་བའི་ཟུག་རྔུ་མེད་པར་འདུ་བྱེད་གང་ལ་དགའ་བ་མི་བསྐྱེད་པ་དགའ་བའི་བྱང་ཆུབ་ཡན་ལག །ཆོས་གང་དམིགས་ཐམས་ཅད་མི་དམིགས་པར་རང་སེམས་སྦྱངས་བས་སེམས་སྦྱང་བྱང་ཆུབ་ཡན་ལག །སྒྱུ་མ་ལྟ་བུའི་ཆོས་ཐམས་ཅད་སེམས་ཙམ་སེམས་ནི་གང་དུ་མི་དམིགས་པ་ཏིང་ངེ་འཛིན་བྱང་ཆུབ་ཡན་ལག་གོ །ཆོས་ཐམས་ཅད་
སྒྱུ་མ་ལྟ་བུའི་སྒྱུ་མ་དེ་ནི་ཅིའི་ངོ་བོ་ཡང་མ་མཐོང་བས་བཏང་སྙོམས་བྱང་ཆུབ་ཡན་ལག་གོ །དེ་ལྟ་བུའི་ངང་ནས་ཉིན་མཚན་ཐམས་ཅད་དུ་ཆོས་ཐམས་ཅད་རང་བཞིན་མ་གྲུབ་པའི་ངང་ནས་རྒྱ་མཚོ་ལ་རླབས་དང་ཆུ་བུར་ལྟར་བསྐྱེད་རིམ་སོགས་སྣང་བ་མ་འགགས་པ་འཆར་དེ་ཡང་ཆུ་རླབས་ཆུ་ལ་ཐིམ་པ་ལྟར་ཆོས་ཉིད་དུ་ཐིམ་སྟེ། ལྷ་སྐུ་གསལ་ལ་རྟོག་པ་མེད་པ་བསྐྱེད་རྫོགས་ཟུང་འཇུག་གི་རྟོག་པ་ཇི་ལྟ་བ་ནི་འདི་ནས་འབྱུང་བར་གསུངས་ལ། རྩལ་སྦྱངས་བས། སྒྱུ་ལུས་སྒྱུ་མ་ལྷ་སྐུ་དང་རྨི་ལམ་འོད་གསལ་རྣམས་དབྱེར་མེད་དུ་གསལ་སྣང་མཆེད་ནས་ཟག་མེད་ཀྱི་མངོན་ཤེས་དང་ས་དང་པོའི་ཡོན་ཏན་རྣམ་འཆར་བར་གསུངས་སོ། །འདིར་ས་ཐོབ་པའི་ཡོན་ཏན་རྣམས་དངོས་སུ་སྣང་མི་སྣང་གི་ཁྱད་པར་དྭགས་བརྒྱུད་པས་སྤྲོས་བྲལ་གྱི་རྟོགས་པ་མཐོང་ལམ་གྱི་ཡེ་ཤེས་སུ་བཞེད་པས། ས་པཎྜི་ཏས། ཉི་མ་དེ་རིང་ཤར་བ་ཡི། །འོད་ཟེར་ནངས་པར་འབྱུང་བ་མཚར། །ཞེས་སོགས་མཐོང་ལམ་ཐོབ་པ་ལ་དེའི་རྟགས་མེད་པ་བཀག །ཚེ་འདིར་མཐོང་ལམ་སྐྱེས་པ་ལ། །ཡོན་ཏན་ཤི་ནས་འབྱུང་བ་ནི། །བླུན་པོ་རྣམས་ཀྱིས་རྫུན་རབ་ཡིན། །མདོ་རྒྱུད་ཀུན་དང་མི་མཐུན་པའི། །འདི་འདྲའི་ཆོས་ལུགས་
མཁས་པས་སྤངས། །ཞེས་སོགས་རྒྱ་ཆེར་གསུངས་མོད། འོན་ཀྱང་རིན་ཆེན་འཕྲུལ་སྐས་ལས། སྒོ་ངའི་ནང་དུ་འདུག་པའི་ཁྱུང་། །དེ་བཞིན་སེང་གེ་མངལ་གྱི་རྒྱ། །རྒྱ་མིག་དང་ནི་རྒྱས་པ་བཞིན། །རྣལ་འབྱོར་པ་ནི་ལུས་རྒྱས་བཏུམ། ཡོན་ཏན་འཆར་བར་ག་ལ་ནུས། །ཕུང་པོ་བོར་ནས་དབྱིངས་སུ་གྲོལ། །རིག་པ་དྲི་མེད་འདམ་ནས་ཐོན་། །སྟོབས་དང་མི་འཇིགས་པ་ལ་སོགས། །ཡོན་ཏན་རྩོལ་བ་མེད་པར་རྫོགས། །ཞེས་གསུངས་ཤིང་། གཞན་ཡང་རྫོགས་ཆེན་གྱི་རྒྱུད་གཞུང་དུ་མ་ནས་གསུངས་སོ། །དེ་ལ་༈ རྣལ་འབྱོར་པས་ས་ཐོབ་པའི་རྟོགས་པ་ཤར་ནས། ས་ཐོབ་ཀྱང་ལུས་རྒྱས་བཅིངས་ནས་སའི་རྟགས་དངོས་སུ་མི་སྣང་། སེང་གེ་མངལ་དུ་གནས་པ་དང་། ཁྱུང་ཕྲུག་སྒོ་ངར་གནས་པ་དང་། བུམ་པ་ནང་གི་མར་མེ་མཆོད་པ་སོགས་མ་ཕུལ་བའི་ནོར་བུ་དང་འདྲ་བར་རྟགས་དངོས་སུ་སྟོན་མ་ནུས་ཀྱང་ངོ་བོ་དེ་མིན་པར་མི་འགྱུར་ཞིང་། གླ་རྩི་བྱོས་པའི་ཤུལ་དུ་བྲོ་ཡང་གླ་རྩི་མེད་པ་ལྟར། ད་དུང་ཐ་མལ་གྱི་རྣམ་རྟོག་ཟས་གོས་ཀྱི་འདུན་པ་ཡོད་ཀྱང་། དེས་ཕན་གནོད་མི་ནུས་ཏེ། བཅོམ་ལྡན་འདས་དང་དགྲ་བཅོམ་པ་རྣམས་ལའང་དེ་ལྟར་ཡོད་པ་
དང་། གཞན་དག་གི་རྟགས་དང་ཡོན་ཏན་མ་མཐོང་བས་མེད་པ་ཡང་མིན་ཏེ། བྱམས་པ་དགེ་སློང་མ་ཕམ་པར་གྱུར་པ་གཞན་དག་གིས་ཉོན་མོངས་ཅན་དུ་མཐོང་ཚུལ་བྱམས་པའི་ལུང་བསྟན་མདོ་ལས་གསུངས་སོ། །ཁ་ཅིག་གྲངས་མེད་གསུམ་དུ་ཚོགས་བསགས་ནས་ས་དང་པོ་ཐོབ་པ་ལ་ཡོན་ཏན་དངོས་སུ་གསལ་གྱིས། འདིར་སྔགས་ཀྱི་ཉེ་ལམ་གྱིས་ཡུན་ཐུང་ངུའི་ས་ཐོབ་པ་ལ་ཡོན་ཏན་དངོས་སུ་མི་སྣང་ཟེར་མོད་ཀྱང་། བྱམས་པ་ལ་ཡོན་ཏན་མ་མཐོང་བས་དཔེར་བྱས་ན་དེའི་ངེས་པ་ཡང་མེད་དམ་སེམས་ལ། གདམས་ངག་རྒྱ་མཚོ་མཐའ་ཡས་ལས། །ཐུན་མོང་ཉམས་ཀྱི་དངོས་གྲུབ་དང་། །ཚངས་རིས་བདུད་ཀྱི་བྱིན་རླབས་དང་། །ས་ཆེན་ནོན་པའི་ཡོན་ཏན་གསུམ། །འདི་རྣམས་ཆ་མཐུན་ཆ་མཐུན་ཏེ། །སྐྱོན་ཡོན་སོ་སོར་ཤེས་པར་བྱ། །ཞེས་དང་། ས་ལ་གནས་པའི་སྐྱེས་ཆེན་རྣམས། །བདེན་པ་མཐོང་བ་དཀའ་བར་གདའ། །ཞེས་གསུངས་པས། རྟགས་བྱུང་ཡང་འབྱེད་དཀའ་བ་དང་། ས་ཐོབ་པ་ཡིན་ཀྱང་ས་དེའི་བདེན་པ་མ་མཐོང་ན། ཡོན་ཏན་དངོས་སུ་མི་སྣང་བའི་ཁྱད་པར་འཐད་དོ། །དེ་ལ་མཐོང་ལམ་སྐབས་སྒྱུ་མ་ལྷ་སྐུ་འོད་གསལ་རྣམས་དབྱེར་མེད་དུ་བྷེ་པས། རྟགས་
ནི་དངོས་ཉམས་རྨི་ལམ་ཅི་རིགས་པ་འབྱུང་བར་གསུངས་ཏེ། སྒྱུ་མ་ལམ་རིམ་དུ། གཉིད་ཀྱི་དུས་དང་གཞན་དུ་ཡང་། །སྐད་ཅིག་ཡུད་ཙམ་ཐང་ཅིག་ལ། །ཡོན་ཏན་བརྒྱ་ཕྲག་བཅུ་གཉིས་ཏེ། །ཏིང་འཛིན་བརྒྱ་ལ་སྙོམས་འཇུག་དང་། །སངས་རྒྱས་བརྒྱ་ཡི་ཞལ་ལྟ་དང་། །སངས་རྒྱས་བརྒྱ་ལ་ཆོས་ཉན་དང་། །འཇིག་རྟེན་ཁམས་བརྒྱ་བསྐྱོད་པ་དང་། །སངས་རྒྱས་ཞིང་བརྒྱར་འགྲོ་བ་དང་། །ཞིང་བརྒྱར་འོད་ཀྱིས་སྣང་བྱེད་དང་། །སེམས་ཅན་བརྒྱ་ནི་སྨིན་བྱེད་དང་། །ཆོས་ཀྱི་སྒོ་བརྒྱ་འབྱེད་པ་དང་། །བསྐལ་པ་བརྒྱར་ནི་གནས་པ་དང་། །སྔོན་དང་ཕྱི་མཐར་རྗེས་འཇུག་དང་། །ལུས་ཀྱི་སྤྲུལ་པ་བརྒྱར་མཁྱེན་པ། །ལུས་རེ་ལ་ཡང་འཁོར་བརྒྱ་ཡིས། །ཡོངས་སུ་བསྐོར་བ་སྟོན་པར་བྱེད། །ཆོས་ཕྱིར་སྲོག་ཀྱང་བཏང་ནུས་ཕྱིར། །འདོད་པའི་ཡོན་ཏན་གྲོགས་སུ་འགྱུར། །སྦྱིན་པ་རྣམ་བཞི་རྫོགས་བྱེད་ཅིང་། །ལྷག་མ་རྣམས་ཀྱང་ཅི་ནུས་བྱེད། །ས་ཐོབ་འཇིགས་པ་ལྔ་བྲལ་ཏེ། །འཚེ་བ་མེད་དང་འཆི་བ་མེད། །ངན་འགྲོའི་ཚིགས་བཅད་མ་ཡིན་བརྗོད། །འཁོར་གྱི་འཇིགས་བྲལ་བག་ཚ་སྤངས། །ཞེས་གསུངས་ཏེ། སྐུ་གསུང་ཐུགས་ཀྱི་ཡོན་ཏན་བརྒྱ་ཕྲག་བཞི་
བཞི་སྟེ། བཅུ་གཉིས་པ་སྣོད་ལྡན་གྱི་གདུལ་བྱ་དང་། རྐྱེན་གྱིས་བསྐུལ་དུས་གཅིག་ཆར་རམ་རིམ་པར་འབྱུང་སྟེ། གདུལ་བྱ་དག་པ་ལ་དཀྱིལ་འཁོར་དངོས་སུ་སྤྲུལ་ནས་སྟོན་པ་དང་། ཌཱཀི་ཆོས་སྐྱོང་དངོས་སུ་འཁོར་བ་དང་། སངས་རྒྱས་ཀྱི་ཞིང་དང་གནས་ཉེར་བཞི་སོགས་རྫུ་འཕྲུལ་གྱིས་བསྒྲོད་པ་དང་། ཉི་ཟླ་བཟུང་བ་དང་། ལྕགས་དང་རྡོ་ལ་ཟན་ལྟར་བརྫི་དང་ཟ་བ་དང་། ཟག་མེད་མངོན་ཤེས་ཅུང་ཟད་སྐྱེས་པས་གླིང་བཞི་རི་རབ་སོགས་མཐོང་བ་ལས་ཀྱི་ཊཱཀི་དང་ལྷ་འདྲེ་རྣམས་ཀྱིས་ཆོས་ཞུ་བ་དང་། སྤྲུལ་བསྒྱུར་སྣ་ཚོགས་ལ་རང་དབང་ཐོབ་པ་དང་། གདུལ་བྱ་སྣ་ཚོགས་སྤྲིན་ལྟར་འདུ་ཞིང་སྣོད་ལྡན་དད་གུས་ཅན་ལ་ཉམས་རྟོགས་མར་མེ་བལྟམས་པ་ལྟར་སྐྱེ་འགྲོ་དོན་གྱིས་གཏེར་ཁ་འབྱེད་པའོ། །མཐོང་ལམ་ནས་ས་བཅུའི་བར་དུ་བསྒོམ་ལམ་ཡིན་ཏེ། ཡེ་ཤེས་མཁའ་འགྲོས། བྷེ་ལམ་མི་རྟོགས་སྒྱུ་མའི་དོན། །མཐོང་ལམ་བསྒོམ་ཕྱིར་བསྒོམ་ལམ་མོ། །ས་ནི་གཉིས་དང་ས་བཅུའི་བར། །ཞེས་གསུངས་ཏེ། བསྒོམ་ལམ་དེ་ཐམས་ཅད་བསྒོམ་པར་བྱ་བ་ནི། འཕགས་པའི་ལམ་ཡན་ལག་བརྒྱད་ཡིན་ཏེ། ལྟ་བ་དམིགས་པ་དང་བྲལ་བ་ཡང་དག་པའི་ལྟ་བ། དེ་བློ་ལས་འདས་པར་
རྟོགས་ན་ཡང་དག་པའི་རྟོགས་པ། བརྗོད་པ་དང་བྲལ་བ་ཡང་དག་པའི་ངག །དེ་རྒྱུན་ཆད་མེད་པར་ཡང་དག་པའི་དྲན་པ། རྣམ་གྲོལ་ཟས་ཀྱིས་འཚོ་བས་ཡང་དག་པའི་འཚོ་བ། དོན་ཆེན་པོ་དེ་བསྒྲུབས་པས་ཡང་དག་པའི་རྩོལ་བ། དེ་བྱ་བ་རྫོགས་པར་བྱེད་པས་ཡང་དག་པའི་ལས་ཀྱི་མཐའ། དེ་མཉམ་རྗེས་མེད་པས་ཡང་དག་པའི་ཏིང་ངེ་འཛིན་ཏེ། རྗེ་གླིང་རས་ཀྱིས། འཕགས་ལམ་བརྒྱད་པ་བསྒོམ་པའི་ལམ། །རྟོག་པ་གཅིག་གིས་བགྲོད་པ་ཡིན། །ཞེས་གསུངས་སོ། །དེ་ལ་ས་བཅུ་ཆོས་ཀྱི་སྤྲིན་གྱི་བར་དུ་བརྩི་ལུགས་མདོ་སྔགས་མཐུན། མདོ་ལུགས་བཅུ་གཅིག་སངས་རྒྱས་ཀྱི་ས་ཡིན། སྔགས་ལུགས་བཅུ་གཅིག་གམ་བཅུ་གཉིས་སུ་བརྩི་བ་བྱ་སྤྱོད་རྣལ་འབྱོར་རྒྱུད་ཀྱི་ལུགས། བཅུ་གསུམ་དུ་བརྩི་བ་བླ་མེད་ལུགས་ཐུན་མོང་པ་ཡིན་ཏེ། གོང་དུ་བཤད་པ་ལྟར་ཡིན་ལ། ཐུན་མོང་མ་ཡིན་པ་བཀའ་གཏེར་ཟུང་འཇུག་གི་ལུགས། ཐུགས་རྗེ་ཆེན་པོ་རྒྱལ་བ་རྒྱ་མཚོ་འདི་ཡི་ཆོས་སྐད་དང་འབྲེལ་ཆེ་བ། གྲུབ་ཆེན་ཀརྨ་པའི་བཤད་པ་གདམས་ངག་རྒྱ་མཚོ་མཐའ་ཡས་ལྟར་ན། ས་བཅོ་ལྔ་གསུངས་ཏེ་དེ་དག་དོན་ལ་འགལ་བ་ཡང་མེད་དེ། ས་བཅུ་གཅིག་པ་དེ་ལ་བྱེ་བྲག་
གིས་རྣམ་གྲངས་སོ་སོར་ཕྱེས་མ་ཕྱེས་ཀྱི་བཤད་ལུགས་སོ། །དེ་ལ་འདིར་ཐུགས་རྗེ་ཆེན་པོའི་གདམས་ངག་འཁོར་ལོ་ལྔའི་མན་ངག་དང་མཚུངས་པར། རྩ་འཁོར་ལོ་ལྔ་ཐུགས་རྗེ་ཆེན་པོའི་རིགས་ལྔ་དང་ཕོ་བྲང་འགྲོ་བ་རིགས་དྲུག་གི་གནས་དབྱེར་མེད་དུ་ཡོད་པར་དེ་དག་གིས་རླུང་དང་ཐིག་ལེ་ཐུགས་རྗེ་ཆེན་པོ་རིགས་ལྔའི་ལྷ་ཚོགས་དང་། འགྲོ་བ་རིགས་དྲུག་ས་བོན་དབྱེར་མེད་དུ་ཡོད་པ་སྟེ། ཉམས་ལེན་གནད་དུ་བསྣུན་པས། འཁོར་ལོ་ལྔ་པོ་རེ་རེ་ལ་སྟེང་འོག་བར་གསུམ་གྱི་རྩ་མདུད་གསུམ་རེ་ཡོད་པས་མདུད་པ་བཅོ་ལྔ་པོ་རེ་རེ་བཞིན་དུ་གྲོལ་བས་ས་རེ་རེ་ནོན། དེ་དག་གི་ལས་རླུང་རེ་རེ་བཞིན་ཡེ་ཤེས་ཀྱི་རླུང་དུ་ལྡོག་པས་རྩལ་རྫོགས། དེ་དག་གི་ཐིག་ལེའི་དྭངས་མ་རེ་རེ་བཞིན་བརྟན་པར་ཟིན་པས་བདེན་པ་མཐོང་སྟེ་ཡོན་ཏན་དངོས་སུ་འཆར་བར་བཤད་དེ། དེ་རེ་རེ་གྲོལ་བའི་དུས་སུ་ཡང་འཇའ་འོད་དང་སྒྲ་དང་ས་གཡོ་བ་དང་མེ་ཏོག་གི་ཆར་སོགས་ལྟས་ཆེན་པོ་ཡང་རེ་རེ་འབྱུང་གསུངས་སོ། །དེ་ལ་གསང་གནས་རྩ་མདུད་འོག་མ་ལས། རབ་རྡོ་རྗེ་གནས་གྲོལ་བས་ས་དང་པོ་ཐོབ་པའི་རྟགས་དང་ཡོན་ཏན་གོང་དུ་བཤད་པ་ལྟར་ལས། དེ་ནས་རིམ་གྱིས་ཡོན་ཏན་བརྒྱ་འགྱུར་བརྒྱ་འགྱུར་གྱི་ཆེ་
བ་བཤད་དེ། གསང་བར་ཕྲིན་ལས་ཀྱི་རྩ་མདུད་གཉིས་པ་གྲོལ། རང་སེམས་གཉིས་མེད་ཀྱི་ཏིང་ངེ་འཛིན་བརྟན་ཅིང་ལྷ་ཚོགས་ཐམས་ཅད་རང་གི་རྣམ་འཕྲུལ་དུ་འཆར། ཡོན་ཏན་གྱི་ཁྱད་པར་བརྒྱ་ཕྲག་སྟོང་ཐོབ། འོད་གསལ་དང་ལྷའི་སྐུ་དབྱེར་མེད་དངོས་སམ་ཉམས་རྨི་ལམ་དུ་སེམས་ཅན་དཔག་མེད་འདུལ་ཞིང་། ལྷའི་སྐུ་རང་ཤར་དུ་ཆོས་ཀྱི་དབྱིངས་ཁྱབ་པ་འཆར་ཞིང་ཆོས་ཀྱང་འཆད་དོ། །ཏིང་ངེ་འཛིན་བརྒྱ་ཕྲག་སྟོང་ལ་སྙོམས་པར་འཇུག་ཅིང་། སྒྱུ་མ་ལམ་རིམ་ལས། ལུས་ངག་ཡིད་གསུམ་འཁྲུལ་པའི་ཚོགས། །སྐྱེ་བ་མེད་པར་སྒྱུ་མར་རྟོགས། །ཚུལ་ཁྲིམས་ཕྱི་མའི་སྐྱོན་བྲལ་བས། །དྲི་མ་མེད་པ་ཞེས་བྱ་ཡིན། །ཞེས་གསུངས་པ་ལྟར་ས་འདི་ཚུལ་ཁྲིམས་ཡོངས་སུ་དག་ཅིང་གཙོ་བོར་ཉམས་སུ་ལེན་གཞན་རྣམས་ཅི་ནུས་སུ་སྤྱོད་པ་ཡིན་ལ། ས་བཅུ་པོ་སོ་སོ་ལ་ཕར་ཕྱིན་བཅུ་པོ་སོ་སོ་གཙོ་ཆེ་བ་ཡིན་གྱིས་ས་དེ་དག་ཏུ་ཕར་ཕྱིན་དེ་དག་རྫོགས་པ་ནི་མིན་ཏེ། སངས་རྒྱས་ཀྱི་བར་དུ་ཕར་ཕྱིན་བཅུ་ཀ་མི་རྫོགས་ཞེས་བདག་གི་དགེ་རྒན་མཁས་པ་ཆེན་པོ་རྒྱལ་མོ་རོང་པས་གསུངས་ཤིང་འདི་སྐབས་སུ་རྩོད་པ་རིགས་ལུང་མང་དུ་མཛད་དོ། །དེ་ནས་གསང་བའི་རྩ་
གནས་གསུམ་པོ་ཀརྨ་ལེའི་གཞུང་སྟེ། དེ་ལྟར་གསང་བའི་རྩ་མདུད་གསུམ་པོ་ནི། ཕྱི་ནང་གསང་བའི་རྣམ་པ་ཡང་ཡིན་ལ། གསུམ་པ་གྲོལ་བའི་གསང་གནས་ཀྱི་རྩ་ཐམས་ཅད་གྲོལ། རླུང་ཐམས་ཅད་ལྡོག །ཐིག་ལེ་ཕྱོགས་མེད་དུ་བརྟན་ནས། དེའི་ཡོན་ཏན་འབུམ་ཕྲག་ཐོབ་ཅིང་ཏིང་ངེ་འཛིན་འབུམ་ཕྲག་ལ་སྙོམས་པར་འཇུག་ནུས། ལས་ཀྱི་མཁའ་འགྲོའི་ཚོགས་སྤྲིན་ལྟར་འདུ་ཞིང་ཕྲིན་ལས་བསྒྲུབ་བོ། །སྒྱུ་མ་ལམ་རིམ་ལས། སྣང་གྲག་ཆོས་རྣམས་ཐམས་ཅད་ཀུན། །གསལ་ལ་འཛིན་མེད་སྒྱུ་མར་ཤར། །ཡེ་ཤེས་དག་གི་འོད་སྣང་བས་། །དེ་ཕྱིར་འོད་བྱེད་པ་ཞེས་བྱ། །ཞེས་པ་ལྟར་ཡིན་ཞིང་། བཟོད་པ་གཙོ་ཆེར་བསྒོམ་མོ། །དེ་ནས་ལྟེ་བའི་རྩ་མདུད་འོག་མ་གྲོལ་བས་ས་བཞི་པ་ཐོབ་སྟེ། སྒྱུ་མ་ལམ་རིམ་ལས། གསལ་སྟོང་འཛིན་མེད་འོད་དེ་ཡང་། །རང་བཞིན་མ་གྲུབ་སྒྱུ་མ་སྟེ། །ཉོན་མོངས་སྲེག་བྱེད་འོད་འཕྲོ་བ། །དེ་ཕྱིར་འོད་འཕྲོ་ཅན་ཞེས་བྱ། །ཞེས་གསུངས་ཤིང་ས་འདིར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་གཙོ་ཆེར་ཉམས་སུ་ལེན། རྩ་གསུམ་སེམས་གསུམ་རང་བཞིན་གཅིག་ཏུ་རྟོགས། རླུང་གསུམ་རྩལ་རྫོགས་ཡེ་ཤེས་ཐིག་ལེ་ཆ་གཉིས་བརྟན། རིག་
པ་དང་བདེ་བ་དབྱེར་མེད་པས་སངས་རྒྱས་དང་སེམས་ཅན་ཐམས་ཅད་ཁྱབ། བསྐྱེད་རྫོགས་གཉིས་ཐ་དད་དུ་འཛིན་པ་བྲལ་ནས་ཆུ་ལ་ཆུ་ལྟར་འདྲེས་ནས་བྱར་མེད་ཆོས་དབྱིངས་ཀྱི་ཏིང་ངེ་འཛིན་བརྟན་པོ་ཐོབ་སྟེ། སྒྱུ་མ་ལམ་རིམ་ལས། འོད་བྱེད་པ་ལ་འོད་གསལ་བ། །ལྷ་སྐུ་བདེ་ཆེན་དབྱེར་མེད་དེ། །རྩོལ་མེད་གོལ་ཕྱིར་འབད་བྱས་པ། །རྩོལ་བས་དུས་སུ་གྲོལ་གྱུར་པས། །ཆོས་དབྱིངས་ཡོངས་སུ་འཛིན་པ་ནི། །མེད་པའི་དོན་དུ་རྟོགས་པའོ། །ཏིང་འཛིན་ཁྲག་ཁྲིག་སྙོམས་འཇུག་སེམས། །ཁྲག་ཁྲིག་ཕྲག་ནི་བཅུ་གཉིས་སོ། །ཞེས་གསུངས་ཏེ། ཡོན་ཏན་གྱི་ཁྱད་པར་བྱེ་བ་ཕྲག་བརྒྱ་ཐོབ་པར་གསུངས་སོ། །དེ་ནས་ས་བཞི་པ་ཐོབ་པའི་ཏིང་ངེ་འཛིན་དང་། ཡོན་ཏན་དེ་སྦྱངས་ཤིང་གོམས་པར་བྱས་ཙ་པས་ལྟེ་བའི་རྩ་མདུད་བར་པ་གྲོལ་བས་ས་ལྔ་པ་སྦྱང་དཀའ་བ་ཐོབ་སྟེ། བདུད་དང་མུ་སྟེགས་གདུལ་དཀའ་བ་ཐམས་ཅད་འདུལ། ཡེ་ཤེས་ཀྱི་ཌཱཀ་རུས་པའི་རྒྱན་ཅན་གྱིས་གསུངས་ལས། སྤང་བྱ་གཉེན་པོ་བདེན་འཛིན་ཀུན། །གང་ཡང་བདེན་མེད་སྒྱུ་མར་གྱུར། །ཉོན་མོངས་ཐུལ་དཀའ་ཐུལ་བའི་ཕྱིར། །དེས་ན་སྦྱང་བ་དཀའ་ཞེས་བྱ། །ཞེས་དང་། སྦྱང་
དཀའི་ས་ལ་ཆོས་རྣམས་ཀུན། །དབྱེར་མེད་སྟོང་པའི་ངང་ཉིད་ལས། །འགགས་མེད་དམིགས་མེད་སྙིང་རྗེ་ཡི། །གཞན་དོན་ལྷ་སྐུ་ཕྱག་རྒྱ་ཆེ། །སྤྱོད་ལམ་ཀུན་དང་དབྱེར་མེད་འགྱུར་། །ཆོས་ཀྱི་དབྱིངས་དང་ཆོས་རྣམས་ཀུན། །རྒྱུད་གཞན་ཐ་དད་མེད་པར་རྟོགས། །སྐད་ཅིག་ཡུད་ཙམ་ཐང་ཅིག་ལ། །ཏིང་འཛིན་ཁྲག་ཁྲིག་སྟོང་ཕྲག་ལ། །སྙོམས་པར་འཇུག་པ་ལ་སོགས་ཏེ། །ཁྲག་ཁྲིག་སྟོང་ཕྲག་བཅུ་གཉིས་སོ། །ཞེས་གསུངས་ཏེ། ཡོན་ཏན་གྱི་ཁྱད་པར་བྱེ་བ་ཕྲག་སྟོང་ཐོབ་བོ། །ས་འདིར་བསམ་གཏན་གཙོ་ཆེར་བྷེ་པར་བཤད་དོ། །དེ་ནས་ཡང་ས་ལྔ་པའི་ཏིང་ངེ་འཛིན་གོམས་ཤིང་བརྟན་པས་ལྟེ་བའི་རྩ་མདུད་གསུམ་པ་རིན་ཆེན་གཞལ་ཡས་ཁང་གྲོལ་ནས་ས་དྲུག་པ་མངོན་དུ་གྱུར་པ་ཐོབ་པས་ལྐོག་གྱུར་གྱི་ཆོས་ཐམས་ཅད་མངོན་དུ་གྱུར། མཉམ་ཉིད་ཀྱི་རྩལ་རྫོགས་པས་འཇིགས་པ་དང་བག་ཚ་བ་ཐམས་ཅད་བྲལ། ཏིང་ངེ་འཛིན་ལ་རྒྱུན་དུ་གནས་ཀྱང་སྐྱོ་དུབ་མི་འབྱུང་། སྣང་སྲིད་ཐམས་ཅད་གདོད་ནས་ལོངས་སྤྱོད་རྫོགས་པའི་དཀྱིལ་འཁོར་དུ་རང་ངོ་ཤེས་པས། གཞན་ལ་ལོངས་སྐུར་སྟོན་ནུས་པ་སོགས་ཡོན་ཏན་བྱེ་བ་འབུམ་ཐོབ་སྟེ། སྒྱུ་མ་ལམ་རིམ་ལས། མངོན་གྱུར་ས་
ལ་འཁོར་འདས་ཀྱི། །རྒྱུ་འབྲས་ཐམས་ཅད་མངོན་གྱུར་པས། །རྟེན་ཅིང་འབྲེལ་འབྱུང་ལྷ་ཡི་སྐུ། །གསལ་ལ་འཛིན་མེད་འོད་གསལ་འཆར། །ཆོས་དབྱིངས་ཀུན་ནས་ཉོན་མོངས་དང་། །རྣམ་བྱང་ཐ་དད་མེད་པར་རྟོགས། །ཏིང་འཛིན་ཁྲི་ཕྲག་བརྒྱ་སྟོང་སོགས། །ཁྲག་ཁྲིག་བརྒྱ་སྟོང་བཅུ་གཉིས་སོ། །ཞེས་པ་ཐོབ་སྟེ། དེ་ལྟར་ལྟེ་བའི་རྩ་མདུད་གསུམ་པོ་རིན་པོ་ཆེ་མིག་གསུམ་པའི་ཚུལ་དུ་ཡོད་པ་དེ་གསུམ་གྲོལ་བས། ཡོན་ཏན་གྱི་མཁའ་འགྲོ་སྤྲིན་ལྟར་འདུ་བར་གསུངས་སོ། །དེ་ནས་སྙིང་ག་ཆོས་ཀྱི་འཁོར་ལོའི་རྩ་མདུད་གསུམ་པོ་རྡོ་རྗེའི་དབྱིབས་སུ་ཡོད་པ་དེ། དེའི་རྩ་མདུད་འོག་མ་གྲོལ་བས་ཆོས་ཐམས་ཅད་དབྱེར་མེད་རོ་གཅིག་ཆེན་པོར་རྟོགས། ཡོན་ཏན་ཁྱད་པར་བྱེ་བར་ཁྲག་ཁྲིག་འབུམ་ཐོབ་སྟེ། །སྒྱུ་མ་ལམ་རིམ་ལས། རིང་དུ་སོང་བའི་ཆོས་རྣམས་ཀུན། །སྐྱེ་འགག་བྲལ་བ་སྒྱུ་མའི་སྐུ། །ཟུང་འཇུག་མཐའ་བྲལ་བདེ་བ་ཆེ། །ཉིན་མཚན་སྤྱོད་ལམ་ཐམས་ཅད་དུ། །ཞེན་མེད་དེ་ལ་དྲན་ཐོབ་པས། །ཕྱིར་མི་ལྡོག་པ་ཤེས་པར་བྱ། །ཆོས་དབྱིངས་ཆོས་ཀྱི་མཚན་ཉིད་དང་། །ཐ་མི་དད་པའི་དོན་དུ་རྟོགས། །བྱེ་བ་ཁྲག་ཁྲིག་བརྒྱ་སྟོང་ལ། །སྙོམས་པར་
འཇུག་སོགས་བཅུ་གཉིས་སོ། །ཞེས་གསུངས་སོ། །ས་འདིར་ཐབས་ཀྱི་ཕ་རོལ་ཏུ་ཕྱིན་པ་གཙོ་ཆེར་སྤྱོད་དོ། །དེ་ནས་སྙིང་ཁའི་རྩ་མདུད་དབུས་མ་གྲོལ་བས་ས་བརྒྱད་པ་ཐོབ་སྟེ། ཆོས་ཐམས་ཅད་དུ་མ་རོ་གཅིག་ཏུ་བརྟན་པ་ཆེར་ཐོབ། སངས་རྒྱས་པ་ནི་ཇི་ལྟར་ཡོད་པའི་ཡོན་ཏན་དང་ཕྲིན་ལས་ཆ་མཐུན་རེ་ཐོབ་པ་སོགས་ཡོན་ཏན་གྱི་ཁྱད་པར་འཇིག་རྟེན་གྱི་ཁམས་ད་ཕྲག་གི་རྡུལ་སྙེད་ཀྱི་གྲངས་ཐོབ་པ་སྟེ། སྒྱུ་མ་ལམ་རིམ་ལས། མི་གཡོའི་ས་ལ་ཉིན་མཚན་ཀུན། །ལྷ་སྐུ་འོད་གསལ་བརྩོན་པ་བྲལ། །རང་ཤར་ལོངས་སྐུ་ཆ་མཐུན་ཏེ། །ཕྱོགས་བཅུ་དུས་གསུམ་སངས་རྒྱས་ཀྱི། །ཞིང་ཁམས་སྒྱུ་མའི་བཀོད་པས་སྦྱངས། །རྣམ་དག་ལྷུན་གྲུབ་མཁའ་བཞིན་ནོ། །ཆོས་དབྱིངས་འཕེལ་འགྲིབ་མེད་འགྱུར་ཞིང་། །ཞིང་དག་པ་ལ་དབང་ཐོབ་རྟོགས། །སྐད་ཅིག་ལ་ནི་ཏིང་ངེ་འཛིན། །སྟོང་དང་སུམ་བརྒྱ་སྟོང་ཕྲག་སུམ་ཅུ་ཡི། །རྡུལ་ནི་ཕྲ་རབ་སྙེད་ཐོབ་པ། །ཕྲག་གཉིས་བཅུ་གཉིས་ཤེས་པར་བྱ། །ཞེས་གསུངས་སོ། །དེ་ལྟར་ལྷུན་གྲུབ་དུ་མ་རོ་གཅིག་གི་རྟོགས་པ་དེ་ལ་རང་དབང་ཐོབ་པས་སྙིང་ཁའི་རྩ་མདུད་གོང་མ་གྲོལ་ཏེ། ས་དགུ་པ་ལེགས་པའི་བློ་གྲོས་ཐོབ། ཁམས་
གསུམ་ཆོས་ཀྱི་རྒྱལ་པོར་དབང་བསྐུར་བའི་སྔ་ལྟས་རྣམས་འབྱུང་སྟེ། འཁོར་འདས་གདུལ་བྱ་འདུལ་བྱེད་ཐམས་ཅད་རང་ཉིད་ལ་ཤར། སངས་རྒྱས་སྲས་བཅས་མང་པོའི་ཞིང་ཁམས་སྟོབས་དང་མི་འཇིགས་པ་སོགས་ཡོན་ཏན་ཐམས་ཅད་རང་ཉིད་ལ་འཆར་ཏེ། ཡོན་ཏན་གྱི་ཁྱད་པར་འཇིག་རྟེན་གྱི་ཁམས་གྲངས་མེད་པའི་འབུམ་ཕྲག་བཅུའི་རྡུལ་སྙེད་ཐོབ་པར་གསུངས། ས་འདི་ལ་སྟོབས་ཀྱི་ཕ་རོལ་ཏུ་ཕྱིན་པ་གཙོ་ཆེར་ཉམས་སུ་ལེན་པ་ཡིན་ལ། སྒྱུ་མ་ལམ་རིམ་ལས། བློ་གྲོས་ས་ལ་འོད་གསལ་ནི། །ཆོས་སྐུ་མཐའ་བྲལ་འདུས་མ་བྱས། །འགྲོ་འོང་སྐྱེ་ཤི་དགག་བསྒྲུབ་བྲལ། །སྨྲ་བའི་བརྗོད་འདས་སྐྱེ་བ་མེད། །བསྒོམ་བྱ་སྒོམ་བྱེད་གཉིས་མེད་ཅིང་། །སྤྲིན་མེད་དག་པའི་མཁའ་བཞིན་ནོ། །སྤོབས་པ་ཐོགས་པ་མེད་པ་ཡིས། །ཡེ་ཤེས་དབང་པོའི་དོན་དུ་རྟོགས། །སྐད་ཅིག་ལ་ནི་ཏིང་ངེ་འཛིན། །སངས་རྒྱས་ཞིང་ནི་གྲངས་མེད་པ། །བརྒྱ་སྟོང་ཕྲག་བཅུའི་རྡུལ་སྙེད་ལ། །སྙོམས་པར་འཇུག་སོགས་བཅུ་གཉིས་སོ། །ཞེས་གསུངས་སོ། །དེ་ལྟར་སྙིང་ག་ཆོས་ཀྱི་འཁོར་ལོ་རང་བྱུང་རྡོ་རྗེ་སེམས་དཔའི་ཕོ་བྲང་རྩ་མདུད་གསུམ་གྲོལ་བས་རྡོ་རྗེ་མཁའ་འགྲོའི་ཚོགས་ཐམས་
ཅད་རང་ལ་འཕྲོ་ཞིང་བཞུགས་སོ། །དེ་ནས་མགྲིན་པ་ལོངས་སྤྱོད་འཁོར་ལོ་པདྨ་གསུང་གི་ཕོ་བྲང་གི་རྩ་མདུད་གསུམ་པདྨའི་དབྱིབས་སུ་ཡོད་པའི་རྩ་མདུད་འོག་མ་གྲོལ་བས་ས་བཅུ་པ་ཆོས་ཀྱི་སྤྲིན་ཐོབ་སྟེ། ཕྱོགས་བཅུའི་ནམ་མཁའི་མཐར་ཐུག་པ་སངས་རྒྱས་ཐམས་ཅད་ཏིལ་གྱི་གང་བུ་ཁ་བྱེ་བ་ལྟར་གང་བ་ཐམས་ཅད་རང་དང་འདུ་འབྲལ་མེད་པར་ངོ་བོ་ཉིད་ཀྱི་དབང་བསྐུར་ཞིང་། རང་གིས་སྤྲུལ་པའི་སྐུའི་སྤྲིན་ཚོགས་ལ་ཆོས་ཀྱི་ཆར་འབེབས་པས་གདུལ་བྱ་རྣམས་སྨིན་གྲོལ་ལ་འགོད་པ་སོགས་ཡོན་ཏན་གཞལ་བར་མི་ནུས་ཏེ། འཇིག་རྟེན་གྱི་ཁམས་རབ་ཀློའབྱམས་ཀླས་པའི་རྡུལ་གྲངས་ཀྱིས་ཀྱང་དཔེར་བྱ་མི་ནུས་པ་ཐོབ་སྟེ། སྒྱུ་མ་ལམ་རིམ་ལས། ཚོགས་གཉིས་ཟུང་འཇུག་ཆོས་སྤྲིན་ལ། །མི་གནས་གནས་མེད་འོད་གསལ་ལ། །རང་བཞིན་རྣམ་དག་རྟོག་མེད་སྐུ། །འཛིན་པའི་རྟོག་བྲལ་ས་ལེར་མཁྱེན། །བློ་འདས་དམིགས་པ་མཐའ་དང་བྲལ། །ནམ་མཁའ་ལྟ་བུ་སྐྱེ་འགག་མེད། །མཚན་ཉིད་ཀུན་བྲལ་མཁའ་ལྟར་དག །སྨྲ་བསམ་བརྗོད་བྲལ་བློ་ལས་འདས། །ཉིན་མཚན་དུས་རྣམས་ཐམས་ཅད་དུ། །སྣང་སྟོང་བདེ་སྟོང་དབྱེར་མེད་མཆོག །འཕེལ་གྲིབ་མེད་པར་འཆར་བ་སྟེ། །ཕྲིན་