གླེང་གཞི།
རྒྱ་གར་སྐད་དུ། ཀཱ་ཡཱ་ལོ་ཀོདྡིཥྛ་བྷི་ཥིཉྩ་མ་ཧཱ་སྭ་ཡཾ་བྷཱུ་ཏནྟྲ་ནཱ་མ། བོད་སྐད་དུ། སྐུ་ཐམས་ཅད་ཀྱི་སྣང་བ་སྟོན་པ། དབང་རྫོགས་པ་རང་བྱུང་ཆེན་པོའི་རྒྱུད་ཅེས་བྱ་བ། བཅོམ་ལྡན་འདས་དབང་ཐམས་ཅད་ཀྱི་བདག་ཉིད་པདྨ་ཧེ་རུ་ཀ་ལ་ཕྱག་འཚལ་ལོ། །འདི་སྐད་བདག་གིས་བསྟན་པའི་དུས་གཅིག་ན། རིག་པའི་སྣང་བ་ཡོངས་སུ་གསལ་བའི་གཞལ་ཡས་ན། རིག་པའི་རྩལ་གྱི་དབང་གི་མངའ་བདག་དེས། འདི་སྐད་ཅེས་བསྟན་ཏོ། །སྣང་བའི་རིག་པ་ཁྱད་པར་ཅན་ཀུན་ཏུ་སྣང་བ་རྣམས་ཉོན་ཅིག །རིག་པའི་གནས་ལུགས་འགགས་པ་མེད་པའི་དབང་། །བྱ་བ་རྒྱུན་དུ་སྤྱོད་པའི་དབང་། །འདས་
པ་རྗེས་སུ་བཟུང་བའི་དབང་། །མ་འོངས་གནད་ལ་འགེལ་བའི་དབང་། །ད་ལྟ་སྨིན་པར་བྱེད་པའི་དབང་། །མ་རྫོགས་རྫོགས་པར་བྱེད་པའི་དབང་། །ཐམས་ཅད་བཟློག་པར་བྱེད་པའི་དབང་། །གསོ་བྱེད་ཡོ་བྱད་ཉིད་ཀྱི་དབང་། །འདུ་བྱེད་རོ་ལངས་གསེར་བསྒྱུར་དབང་། །ཐལ་བྱེད་རོ་བསྲེག་འཁོར་ལོའི་དབང་། །སྒྲུབ་བྱེད་རལ་གྲི་མཚོན་ཆའི་དབང་། །སྨིན་བྱེད་སྡོམ་པ་རྣམ་བཞིའི་དབང་། །ཐམས་ཅད་དབང་གི་འཁོར་ལོར་བསྟན་པའོ། །འདི་སྐད་བདག་གིས་ཐོས་པའི་དུས་གཅིག་ན། རང་རིག་བྷན་དྷ་འབར་བའི་གཞལ་ཡས་ནས། བཅོམ་ལྡན་འདས་དབང་ཐམས་ཅད་ཀྱི་བདག་ཉིད། པདྨ་ཧེ་རུ་ཀ་ཞེས་བྱ་བ་བཞུགས་ཏེ། དེ་ཡང་བཅོམ་ལྡན་འདས་དེ་ཉིད་དབུ་གསུམ་པ་ཕྱག་དྲུག་པ། ཞབས་བཞི་བགྲད་པ། སྐུ་ལ་དུར་ཁྲོད་ཀྱི་རྒྱན་སྣ་ཚོགས་ཀྱིས་བརྒྱན་པ། གླང་ཆེན་གྱི་པགས་པ་དང་། ཀླུ་རིགས་བཞིས་དབུ་དང་ཡན་ལག་བརྒྱན་པ། ཞིང་ཆེན་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། བསྐལ་པའི་མེ་རི་སྣ་ཚོགས་སྐུ་ལས་འཕྲོ་བ། ཕྱག་ན་མཚོན་ཆ་གར་ཡང་མ་ངེས་པ་བསྣམས་པ། ཞབས་རེ་རེ་ལ་ལྕགས་ཀྱི་རྟ་རྨིག་གསུམ་གསུམ་བྱུང་བ། དབུ་རེ་རེ་ལ་རྟ་མགོ་ལྗང་ཞུར་རེ་རེ་རྟ་སྐད་ཕྱོགས་བཅུར་སྒྲོགས་པ། ཞལ་ནས་པདྨ་ཏ་ཀྲྀཏ་ཀྱི་སྒྲ་སྒྲོགས་པ། དབང་ཐམས་ཅད་ཀྱི་དེ་བཞིན་ཉིད་འགྲོ་བ་ཡོངས་ལ་བསྐུར་བ། སྐུ་མདོག་ལེ་བརྒན་དབང་གི་དཀྱིལ་འཁོར་རྫོགས་པ། ཞབས་ཀྱི་འོག་ཏུ་ཏ་ཀྲྀཏ་ཁྲོ་བོ་ཆེན་པོ་བརྒྱད་པོ་བརྫིས་པ། ལྟེ་བ་ན་རྟ་མགྲིན་དམར་པོ་ཞལ་གཅིག་ཕྱག་གཉིས་པ། ཐུགས་ཀ་ན་གསང་བའི་བདག་པོ་ཕྱག་ན་རྡོ་རྗེ་སྐུ་མདོག་སྔོན་པོ། ཞལ་གཅིག་ཕྱག་གཉིས་པ། གཡས་རྡོ་རྗེ་ཚངས་པའི་འཇིག་རྟེན་དུ་གསོར་ཞིང་། གཡོན་སྡིགས་མཛུབ་དང་ཞགས་པ་བསྡམས་པ། དཔུང་པར་ཧཱུཾ་ཀ་ར་དཀར་པོ་ཞལ་གཅིག་ཕྱག་གཉིས་པ། གཡས་ན་གསོད་པའི་སྟ་རེ་ཕྱར་བ། གཡོན་ན་ཕུར་པ་འདྲིལ་བའོ། །རྟ་མགོའི་སྟེང་ན་རྡོ་རྗེ་སེམས་དཔའ་དཀར་པོ། གཡས་རྡོ་རྗེ་རྩེ་དགུ་ཐུགས་ཀར་འཛིན་
པ། གཡོན་དྲིལ་བུ་དཀུ་ལ་བརྟེན་པའོ། །དེ་ལྟ་བུའི་བཅོམ་ལྡན་འདས་དེ་ལ། འཁོར་དཔག་ཏུ་མེད་པའི་ཚོགས་འདི་ལྟ་སྟེ། པདྨ་ཧེ་རུ་ཀ་ལ་སོགས་རིགས་ཀྱི་ཁྲོ་བོ་ལྔ་དང་། ཡུམ་ཀྲོ་དྷཱི་ཤྭ་རི་མ་དང་། རྡོ་རྗེ་སེམས་དཔའ་དང་། རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པ་དང་། སངས་རྒྱས་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། དམ་ཚིག་སྒྲོལ་མ་དང་། ནམ་མཁའི་དབྱིངས་ཕྱུག་མ་དང་། རྡོ་རྗེའི་རྡོ་རྗེ་དང་། རྡོ་རྗེ་ལས་དང་། རྡོ་རྗེ་ཆོས་དང་། རྡོ་རྗེ་རྣོན་པོ་དང་། རྡོ་རྗེ་རལ་གྲི་དང་། རྡོ་རྗེ་བེ་ཅོན་དང་། རྡོ་རྗེ་ཐོ་བ་དང་། རྡོ་རྗེ་མཻ་ཏྲིའོ། །འཇོམས་མ་རེག་དང་། འཇོམས་མ་ཡིད་དང་། འཇོམས་མ་དྲི་དང་། ) འཇོམས་མ་རོ་དང་། འཇོམས་མ་དུས་དང་། འཇོམས་མ་ཆེན་མོ་འབྱུང་བ་ལྔ་དང་། འཇོམས་མ་ཆེན་མོ་སྣང་བ་མའོ། །ལྷ་དབང་དང་། མི་དབང་དང་། ལྷ་མ་ཡིན་གྱི་དབང་པོ་དང་། བྱོལ་སོང་གི་དབང་པོ་དང་། ཡི་དྭགས་ཀྱི་དབང་པོ་དང་། དམྱལ་བའི་དབང་པོ་ཆེན་པོ་དང་། འབྲས་བུ་སྣང་བའི་སྟོན་པ་ཆེན་པོའོ། །དེ་བཞིན་གཤེགས་པའི་རིགས་ཀྱི་མཁའ་འགྲོ་མ་དང་། རྡོ་རྗེའི་རིགས་དང་། རིན་པོ་ཆེའི་རིགས་དང་། པདྨའི་རིགས་དང་། ལས་ཀྱི་རིགས་དང་། དབྱིངས་ཀྱི་རིགས་དང་། ཡེ་ཤེས་ཀྱི་རིགས་དང་། ལས་ཀྱི་རིགས་དང་། ཤ་ཟའི་རིགས་དང་། ཁྲག་འཐུང་གི་རིགས་དང་། རུས་པ་མུར་བའི་རིགས་དང་། མཁའ་འགྲོ་དང་། ཤུགས་འགྲོ་དང་། སྟོབས་འགྲོ་དང་། རྫུ་འཕྲུལ་གྱིས་འགྲོ་བ་དང་། ཐབས་ཀྱིས་འགྲོ་བ་དང་། སྣང་བ་ཞོན་ནས་འགྲོ་བ་དང་། འབྱུང་བ་ལ་ཞོན་ནས་འགྲོ་བ་དང་། སྐད་ཀྱིས་འགྲོ་བ་དང་། དུས་བཞི་ལ་འགྲོ་བའོ། །ས་བརྒྱད་པ་ལ་གནས་པ་དང་། དགུ་པ་ལ་གནས་པ་དང་། བཅུ་པ་ལ་གནས་པའི་འཁོར་རོ། །ཀླུའི་རྒྱལ་པོ་དགའ་བོ་དང་། འཇོག་པོ་དང་། མཐའ་ཡས་དང་། དུང་སྐྱོང་ལ་སོགས་པའོ། །ཕྱག་ན་རྡོ་རྗེ་དང་། རྟ་མགྲིན་དང་། གཤིན་རྗེ་གཤེད་དང་། འཇམ་དཔལ་དང་། ཕྱག་རྡོར་ཞི་བ་དང་། སྤྱན་རས་གཟིགས་དང་། རིགས་
ཀྱི་ཁྲོ་བོ་བསམ་གྱིས་མི་ཁྱབ་པའོ། །གྲུལ་བུམ་གྱི་རྒྱལ་པོ་དང་། མིའམ་ཅིའི་རྒྱལ་པོ་དང་། ལྟོ་འཕྱེའི་རྒྱལ་པོ་དང་། ལྷ་མ་ཡིན་གྱི་རྒྱལ་པོ་དང་། དྲི་ཟའི་རྒྱལ་པོ་དང་། འབྱུང་པོ་ཐམས་ཅད་ཀྱི་རྒྱལ་པོ་དང་། ཤ་ཟའི་རྒྱལ་པོ་དང་། ཡི་དྭགས་ཀྱི་རྒྱལ་པོ་དང་། ས་ལ་གནས་པ་དང་། ཆུ་ལ་གནས་པ་དང་། རླུང་ལ་གནས་པ་དང་། མེ་ལ་གནས་པ་དང་། ནམ་མཁའ་ལ་གནས་པའི་འཁོར་བསམ་གྱིས་མི་ཁྱབ་པས་བསྐོར་བའོ། །དེ་ནས་བཅོམ་ལྡན་འདས་དཔལ་ཆེན་པོ་དེ་ཉིད་དྲེགས་པ་ཅན་ཐམས་ཅད་དབང་དུ་སྡུད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་འཁོར་དཔག་ཏུ་མེད་པའི་རིགས་རྣམས་དང་། ཐབས་ཅིག་ཏུ་བཞུགས་སོ། །ཞེས་རྫོགས་པ་རང་བྱུང་ཆེན་པོའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།