མདོར་བསྡོམ་པ།

གཉིས་པ་དེའི་མདོར་བསྡོམ་པ་ནི༔ ཡེ་ཤེས་དབྱེར་མེད་དུ་འགག་བསྡམས་པ་དང་༔ དེ་འཁོར་འདས་ཀྱི་བར་དོ་ཡིན་པའི་ཚུལ་བཤད་པའོ༔

དང་པོ་ལའང་དངོས་དང་སྐྱོན་གྱི་མཐའ་སེལ་གཉིས་ལས༔ ཡེ་ཤེས་དབྱེར་མེད་དུ་འགགས་བསྡམས་པ་དངོས་ལ་ངོ་བོ་དང་བཞུགས་ཚུལ་དབྱེར་མེད་དོ༔

དང་པོ་ནི༔ དེ་ལྟ་བུའི་ངོ་བོ་སྟོང་པ་ཆོས་སྐུའི༔ རང་བཞིན་གསལ་བ་ལོངས་སྐུའི༔ ཐུགས་རྗེ་ཡངས་པ་སྤྲུལ་སྐུའི་ཡེ་ཤེས་དེ་དག་ཀྱང་མ་རིག་པའི་རྟོག་པ་ཀུན་གྱིས་གོས་མ་མྱོང་ཞིང་གཞི་རང་བཞིན་རྒྱུད་ཀྱི་དབང་བཙན་ལས་ངོ་བོ་སྐུར་བཞུགས་པས་སྐུ་ཐམས་ཅད་ཀྱི་ལུས་སམ་དབྱིངས་སམ་འཆར་གཞིར་ཡོད་པས་མཉམ་པ་ཉིད་ཀྱི་ཆ་ནས་ངོ་བོ་ཆོས་སྐུར་བཏགས༔ འཁྲུལ་བའི་ཐ་སྙད་ལས་འདས་པ་འབྱུང་ཆེན་ངོ་བོའི་སྐུའི་འཆར་གཞི་འཁོར་དང་ཞིང་ཁམས་མཚན་དཔེ་དག་པ་ལ་སྤྱོད་པའི་རང་བཞིན་འོད་ཀྱི་འཆར་གཞིར་བཞུགས་པ་ལ་ལོངས་སྐུར་བཏགས༔ དབྱིངས་ཡེ་དབྱེར་མེད་དུ་གྲོལ་བས་རིག་གདངས་ཅིར་ཡང་མ་འགགས་པར་འཆར་བ་ལ་སྤྲུལ་སྐུར་བཏགས་ཀྱང་འབྲལ་མེད་རོ་གཅིག་ཐིག་ལེ་ཆེན་པོར་འཁྱིལ་བས་དབྱེར་མེད་པ་ཞེས་བྱ་སྟེ༔ དེ་ཡང་ཀློང་ཆེན་རབ་འབྱམས་ལས༔ ངོ་བོ་ཀ་དག་ཡེ་ཤེས་དང་༔ རང་བཞིན་ལྷུན་གྲུབ་ཡེ་ཤེས་དང་༔ ཐུགས་རྗེ་རང་སྣང་ཡེ་ཤེས་གསུམ༔ འབྲལ་མེད་གཅིག་སྟེ་ཕྱོགས་མེད་གནས༔ ངོ་བོ་ཀ་དག་ཡེ་ཤེས་ནི༔ མ་རིག་རྟོག་པ་ཀུན་དང་བྲལ༔ རང་བཞིན་ལྷུན་གྲུབ་ཡེ་ཤེས་ནི༔ འཁྲུལ་བའི་ཚིག་གི་ཐ་སྙད་བྲལ༔ ཐུགས་རྗེ་རང་སྣང་ཡེ་ཤེས་ནི༔ ཐམས་ཅད་དབྱེར་མེད་གཅིག་དུ་གནས༔ ཡེ་ཤེས་རང་ལ་རང་གནས་ཕྱིར༔ གསུམ་གྱི་ཚུལ་དུ་དབྱེར་མེད་དོ༔ ཞེས་དང༔ ཐལ་འགྱུར་ལས༔ ཡེ་ཤེས་རང་ངོར་གནས་པ་ལ༔ གསུམ་གྱི་ཚུལ་དུ་དབྱེར་མེད་པའོ༔ ཞེས་དང་༔ ཀློང་གསལ་ལས༔ སྟོང་དང་གསལ་དང་ཁྱབ་པ་གསུམ༔ དབྱེར་མེད་གཅིག་གི་ཚུལ་དུ་གནས༔ ཀ་དག་ཅེས་པ་ཆོས་སྐུ་ལ༔ གསལ་སྟོང་ཞེས་པ་ལོངས་སྤྱོད་རྫོགས༔ ཁྱབ་པ་ཞེས་ནི་སྤྲུལ་པའི་སྐུ༔ དབྱེར་མེད་གཅིག་གི་ཚུལ་དུ་རྫོགས༔ ཞེས་སོ༔

གཉིས་པ་བཞུགས་ཚུལ་དབྱེར་མེད་ནི༔ ངོ་བོ་སྟོང་པ་དེ་སྐུ་གསུམ་གྱི་འཆར་གཞིར་བཞུགས་ཀྱང་ཡེ་ཤེས་མེད་པའི་བེམ་སྟོང་དང་སྐུ་ལ་ཁ་མིག་དང་རྣ་བ་དོད་པ་ནི་ཅང་མ་བཞུགས༔ རང་བཞིན་འོད་དུ་བཞུགས་ཀྱང་ལྷུན་གྲུབ་ཕྱི་རྒྱ་མ་རལ་པས་བུམ་པ་སྐུའི་ཞིང་བཀོད་ལ་ཁ་དོག་ཏུ་ཕྱེ་བ་དང་འོད་ལྔ་ཕྱོགས་སུ་ཤོར་པ་ནི་མ་དམིགས༔ ཐུགས་རྗེ་རིག་པར་བཞུགས་ཀྱང་བྱ་བྱེད་འབད་རྟོག་གི་དངོས་པོར་རྒྱ་ཆད་ཕྱོགས་ལྷུང་མེད་པ་སྟེ༔ དེ་ཉིད་ལས༔ ངོ་བོ་མི་འགྱུར་སྐུར་བཞུགས་པ༔ སྐུ་གསུམ་འདུ་འབྲལ་མེད་པ་ཡི༔ ཐམས་ཅད་འཆར་བའི་གཞིར་གནས་ཏེ༔ མཚན་མ་རིས་ཀྱི་ཞལ་ཕྱག་མེད༔ རང་བཞིན་གསལ་བའི་མདངས་ལྔ་ཡང༔ གཞོན་ནུ་བུམ་སྐུའི་ཚུལ་བཞུགས་ཏེ༔ ཁ་དོག་རིས་བཟུང་གྲུབ་པ་མེད༔ ཐུགས་རྗེ་རིག་པའི་ཡེ་ཤེས་སུ༔ ལྷུན་གྲུབ་བཞུགས་ཀྱང་མཁྱེན་མ་འགགས༔ སོ་སོར་གསལ་བ་གཉིས་གྱུར་ཀྱང༔ བྱ་དང་བྱེད་པའི་དངོས་པོར་མེད༔ ཅེས་དང་༔ རིག་པའི་ངོ་བོ་སྐུ་ལྔར་གནས༔ སྐུ་ནི་སྣང་ལ་མཚན་ཉིད་བྲལ༔ སྟོང་གསལ་འདུས་པའི་ཡེ་ཤེས་མདངས༔ ངོ་བོ་ཀ་ནས་དག་པའི་ཆ༔ སྐུ་གསུམ་གྱིས་ནི་གཞི་ཙམ་ལས༔ ཞལ་ཕྱག་ཏུ་ནི་གྲུབ་པ་མེད༔ ཁ་མིག་རྣ་བ་ཡོད་པ་ན༔ གཟུགས་ཅན་ཡིད་ཙམ་གཉིས་སོགས་སྲིད༔ གཟུགས་ཅན་འགྲོ་དྲུག་ཕལ་བ་སྟེ༔ གཟུགས་མེད་སྐྱེ་མཆེད་མུ་བཞིའོ༔ མཚན་མ་བྱུང་ན་ཀ་དག་མིན༔ སྟོང་གསལ་ཆེན་པོའི་སྐུ་ལྔའོ༔ སྐུ་ལྔའི་སྙིང་པོ་ཡེ་ཤེས་ལྔ༔ ཡེ་ཤེས་བཀྲགས་མདངས་འོད་ཟེར་ཤར༔ ཞེས་དང་༔ པདྨ་འཁྱིལ་བའི་རྒྱུད་ལས༔ ཐོག་མར་མ་རྟོགས་པས་འཁོར་བ་མ་བྱུང་༔ རྟོགས་པའི་སངས་རྒྱས་མ་བྱུང་བའི་སྔོན་རོལ༔ སྒྲིབ་གཉིས་སྦྱངས་ཤིང་ཚོགས་གཉིས་བསགས་པའི་སངས་རྒྱས་ཁ་མིག་རྣ་བ་ཅན་དུ་བཏགས་པ་ནི་ཅང་མི་བཞུགས་སོ༔ འོ་ན་གང་ཞེ་ན་རིག་པ་ཀུན་ཏུ་བཟང་པོ་ངོ་བོ་རང་བཞིན་ཐུགས་རྗེ་གསུམ་དུ་གནས་སོ༔ ཞེས་སོ༔ རྒྱུ་མཚན་དེ་བས་ན་ངོ་བོ་དང་བཞུགས་ཚུལ་ལ་བློས་གཞལ་ནས་དབྱེ་བའི་ཡུལ་དང་བྲལ་པའི་ཕྱིར༔ ཀློང་གསལ་ལས༔ གྲངས་དང་རིས་སུ་བཅད་པ་ཀུན༔ ཐ་སྙད་ཚིག་ཕྱིར་འབྲངས་པའོ༔ འཁྲུལ་བ་ཡིན་པས་དོན་ལ་བསྒྲིབས༔ ཞེས་སོ༔

གཉིས་པ་མཐའ་སེལ་ནི༔ སྤྱི་དང་བྱེ་བྲག་གཉིས་ལས༔ སྤྱིར་བཤད་ན༔ ཆོས་ཉིད་སྤྲོས་པ་དང་བྲལ་བའི་གནད་ཀྱིས་གཉིས་སྣང་དང་༔ རྒྱུ་རྐྱེན་དང་༔ རེ་དོགས་དང༔ དྲི་མ་དང༔ རྟག་ཆད་ཀྱི་མཐའ་ཐམས་ཅད་སེལ་བ་དང་༔ རང་དང་རིགས་མཐུན་མི་མཐུན་དང་༔ སྟོང་པར་རིགས་མཐུན་མི་མཐུན་ལས་གྲོལ་བ་སྟེ༔ ཐིག་ལེ་ཀུན་གསལ་ཆེན་པོའི་རྒྱུད་ལས༔ གཞན་སེལ་ནི་རིག་པར་འདུག་པས་བེམ་པོར་སེལ༔ སྟོང་པར་འདུག་པས་དངོས་པོ་སེལ༔ གཉིས་མེད་ཡིན་པས་གཉིས་སྣང་སེལ༔ རང་བྱུང་ཡིན་པས་རྒྱུ་རྐྱེན་སེལ༔ ལྷུན་གྲུབ་ཡིན་པས་རེ་དོགས་སེལ༔ དག་པ་ཡིན་པས་དྲི་མ་སེལ༔ མེད་པས་ཡོད་པའི་ཆད་མཐའ་སེལ༔ ཡོད་པས་མེད་པའི་རྟག་མཐའ་སེལ༔ ཀྱེ་རྡོ་རྗེ་འཛིན་པ་ཉོན་ཅིག༔ ཡང་དག་པ་དོན་གྱི་གཞིའི་སྤྱི་མོ་ནི་རང་དང་རིགས་མཐུན་པ་ལས་ལོག་སྟེ༔ རིག་པ་ཙམ་དུ་མཐུན་པས་ཚོགས་བརྒྱད་ལས་ལོག་པའོ༔ དེ་ཡང་ཇི་ལྟར་གྲོལ་ན༔ འཕེལ་འགྲིབ་མེད་པས་ཀུན་གཞིའི་རྣམ་ཤེས་ལས་གྲོལ༔ ངར་འཛིན་མེད་པས་ཉོན་མོངས་པའི་ཡིད་ལས་གྲོལ༔ གཟུང་འཛིན་མེད་པས་ཡིད་ལས་གྲོལ༔ སྐྱེ་འགགས་མེད་པས་སྒོ་ལྔའི་རྣམ་ཤེས་ལས་གྲོལ༔ ཀྱེ་གསང་བའི་བདག་པོ༔ སྟོང་པར་རིགས་མཐུན་པ་ལས་ཀྱང་ལོག་ཏེ་རང་བཞིན་དག་པའི་ནམ་མཁའ་ཁ་དོག་དང་བཅས་པ༔ བག་རྡུལ་དང་བཅས་པ་འདི་མ་ཡིན་ནོ༔ ཀྱེ་སེམས་དཔའ་ཆེན་པོ་ཉོན་ཅིག༔ རིགས་མི་མཐུན་པ་ལས་ཀྱང་ལོག་སྟེ༔ རིག་པ་དང་རིགས་མི་མཐུན་པའི་བེམ་པོ་མ་ཡིན༔ སྟོང་པ་དང་རིགས་མི་མཐུན་པའི་ཕྱི་ནང་གི་འབྱུང་བ་བཞི་ལས་གྲུབ་པའི་དངོས་པོར་མེད་པའོ༔ རིགས་ཀྱི་བུ་དོན་ཆེན་པོ་འདིས་ནི༔ གཉིས་ཀ་ལས་ལོག་པར་ཤེས་པར་བྱའོ༔ གཉིས་ཀ་མ་ཡིན་པའི་དངོས་པོར་འཛིན་པ་དང་བྲལ་བའོ༔ ཞེས་སོ༔

གཉིས་པ་བྱེ་བྲག་ཏུ་ཡེ་ཤེས་གསུམ་དབྱེར་མེད་པའི་མཐའ་སེལ་ཚུལ་ནི༔ ངོ་བོ་སྟོང་པ་བསམ་བརྗོད་ཀྱི་ཐ་སྙད་དང་སྤྲོས་པ་ལ་མི་གནས་པ་སྟོང་གསལ་དབྱེར་མེད་ཀྱིས་རྟག་མཐའ་སེལ༔ རང་བཞིན་གསལ་སྟོང་གཉིས་སུ་མེད་པའི་འགགས་མེད་དུ་ཡེ་ཡོད་ལྷུན་གྱིས་གྲུབ་པས་རྒྱུ་རྐྱེན་དང་ཆད་མཐའ་སེལ༔ ཐུགས་རྗེ་གཅིག་དང་དུ་མའི་ཆ་ཤས་ལས་འདས་པའི་རིག་སྟོང་དབྱེར་མེད་པས་འཁོར་འདས་ཀུན་ལ་ཁྱབ་པས་གཉིས་གཉིས་མེད་ཀྱི་མཐའ་ལས་འདས་པའོ༔ ཀློང་གསལ་ལས༔ སྟོང་པའི་ངོས་ནས་རྟག་མཐའ་བྲལ༔ གསལ་བའི་ངོས་ནས་ཆད་མཐའ་བྲལ༔ གསལ་སྟོང་ངོས་ནས་འཛིན་ཆ་བྲལ༔ ཐོག་མའི་ཀ་དག་གསལ་སྟོང་ཁྱབ༔ སུས་ཀྱང་བྱས་པ་མེད་པ་ཉིད༔ དེ་ནི་ཐོག་མའི་སྤྱི་གཞིའོ༔ ཞེས་དང་༔ ཀློང་ཆེན་རབ་འབྱམས་ལས༔ ངོ་བོ་སྟོང་པས་ཐ་སྙད་བྲལ༔ རང་བཞིན་ཡེ་གསལ་རྒྱུ་རྐྱེན་བྲལ༔ ཐུགས་རྗེ་ཀུན་ཁྱབ་ཆ་ཤས་བྲལ༔ ངོ་བོ་ཀ་དག་བརྗོད་གཞི་བྲལ༔ རང་བཞིན་ལྷུན་གྲུབ་ཅིར་ཡང་རྫོགས༔ ཐུགས་རྗེ་ཀུན་ཁྱབ་རང་ཤར་བའོ༔ ངོ་བོ་སྟོང་བས་རྟག་མཐའ་བྲལ༔ རང་བཞིན་གསལ་བས་ཆད་འཛིན་བྲལ༔ ཐུགས་རྗེ་ཁྱབ་པས་གཉིས་མཐའ་བྲལ༔ ངོ་བོ་སྟོང་གསལ་གཉིས་མེད་ལ༔ རང་བཞིན་གསལ་སྟོང་དབྱེར་མེད་དོ༔ ཐུགས་རྗེ་རིག་སྟོང་དབྱེར་མེད་དོ༔ ངོ་བོ་སྐུ་ལ་རང་བཞིན་འོད༔ ཐུགས་རྗེ་རིག་པ་ཡེ་ཤེས་སོ༔ ཞེས་སོ༔

གཉིས་པ་དེ་འཁོར་འདས་ཀྱི་བར་དོར་གྱུར་ཚུལ་ནི༔ དེ་ལྟ་བུའི་འདུས་མ་བྱས་པའི་ཡེ་གཞི་ནི་འཁོར་འདས་གང་གི་ཡང་ཕྱོགས་སུ་མ་ལྷུང་ཞིང་དབུས་ལྟ་བུར་གནས་པས་ཀྱང་འཁོར་འདས་བར་དོ་ཞེས་བྱ་ལ༔ འཁོར་འདས་གཉིས་ཀྱི་སྤྱི་གཞིར་གྱུར་བས་ཀྱང་འཁོར་འདས་བར་དོ༔ རྟོགས་ན་མྱང་འདས་དང་མ་རྟོགས་ན་འཁོར་བ་འབྱུང་བའི་གྱེས་མདོ་ལྟ་བུར་གྱུར་བས་ཀྱང་འཁོར་འདས་བར་དོ་ཞེས་བྱའོ༔ དེ་ལྟ་བུའི་རྒྱུ་མཚན་གསུམ་གྱི་བརྣག་དོན་ལས་འཁོར་འདས་ཀྱི་བར་དོ་ཞེས་བྱ་སྟེ༔ ངེས་དོན་འདུས་པའི་རྒྱུད་ལས༔ དང་པོ་འཁོར་འདས་བར་དོ་ལ༔ དང་པོ་འཁོར་འདས་ཉིད་ཀྱི་སྐུ༔ རང་བྱུང་ལུས་ལ་རིག་པའི་ཐུགས༔ འཁོར་འདས་མེད་ཕྱིར་གཞི་ཉིད་མིན༔ གཞི་ལ་སངས་རྒྱས་སེམས་ཅན་གྱི༔ སྣང་བ་ཡེ་ནས་མེད་པ་ལ༔ ཡང་དག་ཆོས་སྐུ་ངེས་པར་ཡོད༔ ཅེས་དང་༔ རང་བྱུང་ངོ་བོ་ཉིད་སྐུ་ནི༔ འདུ་འབྲལ་མེད་བའི་མྱང་འདས་གཞི༔ ཆོས་རྣམས་ཀུན་གྱི་རྩ་བ་ཡིན༔ ཡེ་ནས་རང་བཞིན་ལྷུན་གྱིས་གྲུབ༔ དེ་ཡང་རྡོ་རྗེ་སེམས་དཔའ་ཉོན༔ རང་བཞིན་ལུས་ཞེས་བྱ་བ་ནི༔ འཁྲུལ་མ་མྱོང་བས་མ་རིག་མེད༔ རྟོགས་མ་མྱོང་བས་ཡེ་ཤེས་མེད༔ དེ་ཕྱིར་ཡུལ་ལ་ཡངས་པ་དང༔ མ་ཡེངས་ངང་དུ་ཤན་མ་ཕྱེད༔ གང་གི་མཐའི་ཀྱང་མ་རིག་ཕྱིར༔ འཁོར་འདས་གཞི་ཞེས་དེ་ལ་བྱ༔ ཞེས་དང་༔ ཀློང་གསལ་ལས༔ འཁོར་འདས་གཉིས་སུ་མེད་གང་དུ༔ ཀ་དག་སྒྲིབ་མེད་ཟང་ཐལ་བཞུགས༔ ཞེས་དང་༔ ཡེ་ཤེས་མཁའ་མཉམ་ལས༔ ཡེ་ནས་ཡོད་པའི་ཆོས་ཀྱི་སྐུ༔ རྟོགས་མ་རྟོགས་ཀྱི་ཁྱད་པར་གྱིས༔ ལེགས་པར་ཉོན་ལ་ཡིད་ལ་ཟུངས༔ རང་སེམས་མ་རྟོགས་སེམས་ཅན་ནི༔ འཁོར་བར་གང་ནས་གང་དུ་འཁྲུལ༔ ཞེས་དང་༔ བསྟན་པའི་དོན་རྟོགས་སྐད་ཅིག་ལ༔ སངས་རྒྱས་ཀུན་དང་དགོངས་པ་མཉམ༔ ཞེས་གང་གསུངས་པ་སྟེ་འདི་ལ་གཞི་ལྷུན་གྲུབ་རིན་པོ་ཆེའི་སྦུབས་ཞེས་བྱའོ༔

ཞར་ལ་སྦུབས་ཀྱི་དོན་ཅུང་ཟད་བཤད་པར་བྱ་སྟེ༔ དེ་ལ་ངོ་བོ་ངེས་ཚིག་དབྱེ་བ་མཚན་ཉིད་མཐུན་དཔེ་དང་ལྔ་ལས༔

དང་པོ་ནི༔ གཞི༵་ལྷུན༵་གྲུབ༵་རི༵ན་པོ༵་ཆེ༵འི་སྦུབ༵ས་ཀྱི་ངོ་བོ་ནི་ཆོས་ཀྱི་སྐུ་ཡིན་ཏེ་དེས་ཡེ་ཤེས་དབྱེར་མེད་ཆེན་པོར་ལ་བཟློས་པའི་ཕྱིར་དང༔ ལམ་ལྷུན༵་གྲུབ༵་རི༵ན་པོ༵་ཆེ༵འི་འོད་ཀྱི་སྦུབ༵ས་ནི་ལོངས་སྐུ་གཞི་སྣང་གི་ཆ་སྟེ༔ འདི་ལས་ལམ་ཉམས་སུ་ལེན་དུས་སྣང་བཞིའི་ལ༵མ་སྣང༵་འཆར་བ་དང་༔ བར་དོར་སྐུ་གསུམ་གྱི་སྣང་བ་འཆར་བ་ཡིན་ནོ་དེས་ན་ལམ་གདུལ་བྱའི་སྣང་བའོ༔ འདི་ཡི་རོལ་པའམ་ཐུགས་རྗེ་སྤྲུལ་པའི་སྐུ་ལ་བདག་ཏུ་བཟུང་བས་འཁོར་བའི་འཁྲུལ་སྣང་ཡུལ་སེམས་ཐམས་ཅད་འབྱུང་བའི་ཕྱིར་ག༵ཞི་སེམ༵ས་ཅན༵་གྱི༵་སྣང༵་བ༵་བག་ཆགས་ཀྱི་སྦུབས་ལ་བརྟེན་པ་དང་༔ དེ་ཉིད་རང་སྣང་རང་བཞིན་མེད་པར་རྟོགས་པའི་ཤེས་རབ་ཀྱི་གཞི་ལ་བཙན་ས་ཟིན་པས་འབྲས༵་བུ༵་བདེ༵་བཤེ༵གས་ཀྱི༵་སྣང༵་བ༵་ལ་མཐར་ཕྱིན་པའི་འབྲས༵་བུའི༵་ལྷུན༵་གྲུབ༵་རིན༵་པོ༵་ཆེ༵འི་སྦུབ༵ས་ཞེས་བྱ་སྟེ༔ དེ་ལྟར་ན་སྦུབས་གསུམ་གཅིག་འདྲིལ་གྱི་ཐུགས་རྗེ་སྤྲུལ་པའི་རོལ་པ་ངེས་མེད་མངོན་བྱང་ལྔ་ལྡན་གྱི་སྤྲུལ་སྐུར་བཞེངས་པ་ལོག་པར་བཟུང་བ་ལས་བ༵ག་ཆ༵གས་ཀྱི༵་སྦུབ༵ས་བྱུང་ན་དེ་ནི་སྤྲུལ་སྐུའི་ཡིན་འབྲས་ཀྱི་ངོ་བོ་སྐུ་གསུམ་དུ་རིག་གོ༔ གཞན་དུ་དགྱེས་རྡོར་སོགས་གཞི་སེམས་ཅན་གྱི་སྣང་བ༔ ལམ་གདུལ་བྱའི་སྣང་བ༔ འབྲས་བུ་བདེ་གཤེགས་ཀྱི་སྣང་བ་གསུམ་དུ་བཞག་པ་དང་༔ དེའི་སྟེང་དུ་འཁྲུལ་བ་བརྟགས་པའི་སྣང་བ་བཞིར་བཤད་པ་ནི་འདིར་སེ༵མས་ཅ༵ན་གྱི༵་སྣང༵་བ༵་ནི་འཁྲུལ་པའི་བརྟགས་སྣང་ཡིན་པས་དེ་གཉིས་གཅིག་ཏུ་བྱས༔ གཞི༵་རང༵་བཞིན༵་ལྷུན་གྲུབ་རིན་པོ་ཆེའི་སྦུབས་ནི་ཆོས༵་ཀྱི་སྐུའི༵་སྣང༵་བར༵་བཤད་ཀྱང་ཁྱད་པར་འཕགས་པ་ལས་ཆད་པ་དང་དགོངས་པ་འགལ་བ་ནི་མ་ཡིན་ནོ༔ གཞི་འབྲས་ཀྱི་ཆོས་སྐུ་ངོ་བོ་བདག་གཅིག་པའི་གནད་ཀྱིས་གཞི་འབྲས་ཀྱི་སྦུབས་གཉིས་གཅིག་ཏུ་བྱས་ནས་རིན་པོ་ཆེའི་སྦུབ་དང་༡། འོད་ཀྱི་སྦུབས་དང་༢། བག་ཆགས་ཀྱི་སྦུབས་༣་དང་གསུམ་དུ་བྱས་པའོ། །དེ་ཡང་སྤྲོས་བྲལ་དོན་གསལ་ལས༔ དེ་ལ་སྦུབས་གསུམ་ངོ་བོ་ནི༔ གོང་བསྟན་སྐུ་གསུམ་ཡིན་པར་བཤད༔ ཅེས་སོ༔

ངེས་ཚིག་ནི་སྤྱིར་སངས་རྒྱས་སྐུ་གསུམ་གྱི་བཞུགས་པའི་རྟེན་གཞིར་གྱུར་བའི་ཕྱིར༔ བྱེ་བྲག་ཏུ་སྐུ་གསུམ་གྱི་དབྱིངས་ནང་གསལ་༣མཚན་ཉིད་འཛིན་༥། ཕྱི་གཉིས་ཏེ་ཡེ་ཤེས་འཁོར་འདས་ཐམས་ཅད་འབྱུང་བའི་གཞིར་གྱུར་བས་རིན་པོ་ཆེའི་སྦུབས༔ སྣང་ལ་རང་བཞིན་མེད་པའི་ལྔ་ཚན་འབྲས་ཆོས་ཉེར་ལྔ་ལྔའི་ཡོན་ཏན་རྫོགས་པ་མཚན་དཔེའི་རྒྱན་ལྡན་འོད་ཀྱི་སྦུབས༔ སྦུབས་སྔ་མ་གཉིས་ཀྱི་མཚན་ཉིད་འཛིན་པའི་ཡེ་ཤེས་གཉིས་ཤར་གཞི་དང་ཤར་ཆོས་ཀྱི་ཁྱད་ཡོད་དོ། །མེད་བཞིན་དུ་རྣམ་པར་རྟོག་པའི་བག་ཆགས་གནས་དོན་ལུས་གསུམ་མཐུ་བརྟས་པས་ཡོད་པར་སྣང་བ་བག་ཆགས་ཀྱི་སྦུབས་ཀྱི་ངེས་ཚིག་ཡིན་ཏེ༔ ཐིག་ལེ་ཀུན་གསལ་ལས༔ སྦུབས་གསུམ་ཞེས་བྱའི་གཏན་ཚིག་ནི༔ བཞུགས་པའི་རྟེན་དུ་གྱུར་པའོ༔ སྦུབས་ཞེས་བྱ་བ་སྤྱི་ཚིག་གོ༔ སོ་སོའི་ངེས་པ་བསྟན་པ་ནི༔ ཡོན་ཏན་ཀུན་འབྱུང་རིན་ཆེན་སྦུབས༔ སྣང་ལ་རང་བཞིན་མེད་པ་འོད་ཀྱི་སྦུབས༔ རྣམ་རྟོག་མཐུ་བརྟས་བག་ཆགས་སྦུབས༔ ཞེས་སོ༔

དབྱེ་བ་ནི་རྣམ་པ་གསུམ་ཡིན་ཏེ༔ སྔ་མ་ལས༔ རིན་ཆེན་སྦུབས་དང་འོད་ཀྱི་སྦུབས༔ བག་ཆགས་སྦུབས་དང་གསུམ་ཡིན་ནོ༔ ཞེས་སོ༔

མཚན་ཉིད་ཆོས་སྐུ་ཀ་དག་ལོངས་སྐུ་ལྷུན་གྲུབ་གཉིས་གོང་བག་ཆགས་འཁྲུལ་ཚུལ་འོག་ཏུ་གསལ་བས་འདིར་ལུང་གིས་སྤྲོས་ཏེ༔ ཀུན་གསལ་ལས༔ དང་པོའི་མཚན་ཉིད་བསྟན་པ་ནི༔ རྣམ་དག་ཟང་ཐལ་མི་རྟོག་འགྱུར་བ་མེད༔ འགགས་མེད་ཀུན་གསལ་ཡེ་ཤེས་སྐུ༔ ཕྱོགས་གཅིག་མཚོན་པ་མན་ཤེལ་བཞིན༔ རིན་ཆེན་སྦུབས་ཏེ་ཆོས་སྐུ་ཡིན༔ འགགས་མེད་ཡེ་ཤེས་འོད་ཀྱི་སྐུ༔ སུམ་ཅུ་རྩ་གཉིས་མཚན་འཆང་བ༔ ཚོམ་བུའི་དཀྱིལ་འཁོར་ཆེན་པོ་ལྔ༔ གསལ་འཚེར་ལྷུན་སྡུག་གཟི་བརྗིད་ལྡན༔ འོད་ཀྱི་སྦུབས་ཏེ་ལོངས་སྐུ་ཡིན༔ ཐ་མའི་མཚན་ཉིད་བསྟན་པ་ནི༔ བག་ཆགས་རྣམ་བཞི་གནས་༡དོན་༢་ལོས་༣གསུམ་མ་རིག་བག་ཆགས་༤ཡོངས་རྫོགས་པ༔ ཕུང་པོ་ཁམས་དང་སྐྱེ་མཆེད་བཅས༔ ཚོགས་བརྒྱད་སེམས་དང་བཅས་པ་ནི༔ བག་ཆགས་སྦུབས་༼ ཏེ་སྤྲུལ་སྐུ་ཡིན་ཞེས་ཀྱང་ཡོད། ༽༔ སུ་ང་ཡིས་བསྟན༔ ཞེས་སོ༔

བཞི་པ་༼ ལྔ་པ་དཔྱད། ༽མཐུན་དཔེ་ནི༔ གཞི་ལྷུན་གྲུབ་རིན་པོ་ཆེའི་སྦུབས་ནི༔ དཔེར་ན་མན་ཤེལ་ལ་དྲི་མ་གཤིས་སུ་མ་ཞུགས་པ་དང་༡༔ ཕྱི་ནང་སྒྲིབ་མེད་དུ་ཟང་ཐལ་བར་གསལ་༢བ་དང་༔ འོད་ལྔ་ཤར་མ་ཤར་གང་གི་དུས་སུ་ཡང་ངོ་བོ་འགྱུར་བ་མེད་པ་དང་༣༔ རྐྱེན་མེད་པས་འོད་ལྔ་ཕྱིར་མ་ཤར་ཀྱང་འཆར་གཞི་ནང་གསལ་འགགས་༤པ་མེད་པ་དང་༔ རྣམ་པར་རྟོག་པ་མེད་པ་༥ལྟར༔ སྤངས་པ་ཕུན་སུམ་ཚོགས་པས་རྣམ་པར་༡དག༔ ངོ་བོ་འགྱུར་བ་མེད་པས་རྡོ་རྗེར་ལྡན་༢༔ སྦུབས་ཀྱིས་མ་བསྒྲིབས་པ་དང༔ མདུན་རྒྱབ་དང་ཕྱི་ནང་མེད་པས་ཟང་ཐལ་༣༔ རླུང་ལྔ་ཕྱིར་མ་འཕགས་པས་རྐྱེན་མེད་པའི་ནང་གསལ་ཡེ་ཤེས་ཀྱི་སྣང་བ་གསུམ་དང་འདུ་འབྲལ་མེད་པར་ནང་གསལ་བ༤༔ སེམས་དང་ཡིད་དང་རྣམ་ཤེས་ལས་འདས་པས་རྣམ་རྟོག་མེད་པ་༥ལྔའི་ཆོས་མཚུངས་མན་ཤེལ་གྱིས་མཚོན་པའོ༔ འཇམ་དཔལ་འདུས་པ་ལས༔ ཕྱི་ནང་མེད་པའི་མན་ཤེལ་འདྲ༔ ཞེས་སོ༔ ཆོས་ཉིད་ནམ་མཁའ་ལྟ་བུའི་རང་མདངས་ལས་ཕྱིར་གསལ་དུ་ཤར་བ་དང་༔ འོད་ལྔ་མ་འདྲེས་པ་ལྷུན་གྱིས་གྲུབ་པའི་བཀྲ་བ་དང་གཉིས་ཀྱིས་འོད་ཀྱི་སྦུབས་འཇའ་ཚོན་དང་ཆུ་ཟླས་མཚོན༔ མེད་བཞིན་རྒྱུ་རྐྱེན་ལས་སྐྱེས་པ་དང་༔ བདག་ལས་གཞན་དུ་སྣང་བ་དང་༔ སྣ་ཚོགས་འགྱུར་བའི་འདུས་བྱས་ལས༔ བག་ཆགས་ཀྱི་སྦུབས་གཟུགས་བརྙན་གྱིས་མཚོན་ཏེ༔ དོན་གསལ་ལས༔ ཆུ་ཟླ་མེ་ལོང་གཟུགས་བརྙན་དང༔ འཇའ་ཚོན་ལྟ་བུའི་དཔེ་ཡིས་བསྟན༔ ཞེས་སོ༔ དེ་ལྟ་བུའི་སྦུབས་གསུམ་ལས་ཐ་སྙད་གཞན་སྣང་བ་གསུམ་མམ་བཞི་ཡང་༔ ཀུན་གསལ་ལས༔ འགྲོ་དྲུག་སོ་སོའི་ཞེན་པའི་སྣང་བ་དྲུག༔ རྒྱུ་འབྲས་བློ་ཡི་སྣང་བ་ས་བཅུ་བཅུ༔ རྟོགས་ལྡན་དོན་གྱི་སྣང་བ་རྫོགས་པ་ཆེན་པོ་ས་ལམ་གཅིག་རྫོགས་ཡིན་པས་གཅིག༔ དབྱེར་མེད་ཀུན་ཏུ་བཟང་པོའི་སྣང་བ་གཞི་འབྲས་དབྱེར་མེད་མངོན་དུུ་གྱུར་པའོ༔ བསྡུས་པའི་གཞི་སེམས་ཅན་ལམ་གདུལ་བྱ་འབྲས་བུ་བདེ་གཤེགས་ཀྱི་སྣང་བ་རྣམ་པ་གསུམ༔ མ་དག་འཁྲུལ་པའི་སྣང་བ་དང༔ དག་པ་འཇིག་རྟེན་སྣང་བ་དང་༔ ཡང་དག་ཡེ་ཤེས་སྣང་བའོ༔ ཞེས་སོ༔

གཉིས་པ་གནས་ལུགས་དེ་ལས་གཟུགས་སྐུའི་སྐུ་གསུམ་སྙིང་པོ་རང་བཞིན་གྱི་རྒྱུད་ཀྱི་ཕྱོགས་གཅིག་འབྱུང་བའི་གཞི་བྱེད་པ་འབྱུང་ཆེན་ངོ་བོའི་སྐུ༔ ལམ་ལྷུན་གྲུབ་རིན་པོ་ཆེའི་འོད་ཀྱི་སྦུབས་འཆར་ལུགས་བཤད་པ་ལ༔