མ་ཎི་མགུར་དབྱངས།
༄༅། །མ་ཎི་མགུར་དབྱངས་བཞུགས་སོ།།
༄༅། །ཨོཾ་མ་ཎི་པདྨེ་ཧཱུྃ་ཧི༔ དུས་དེང་སང་ལས་ངན་གྱི་འགྲོ་བ་རྣམས། །རང་རྒྱུད་ཀྱི་ཉོན་མོངས་མི་འདུལ་བར། །ཁ་ཡིས་ཨོ་ཡིག་བསྒྲངསན་ཡང་། །སེམས་ང་རྒྱལ་གྱི་དབང་དུ་བཏང་བ་འདི་ངུ་རེ་བྲོ། །ལྷ་འཕོ་ལྟུང་གི་སྡུག་བསྔལ་དེ་ཡ་རེ་ང་། །ཁ་ཡིས་ཨོ་ཡིག་མ་བསྒྲངས་ཀྱང་། །སེམས་ང་རྒྱལ་མེད་ན་ཨོཾ་ཡིག་གི་སྙིང་པོ་
ཡིན། །ཁ་ཡིས་མ་ཡིག་བསྒྲུངས་ན་ཡང་། །སེམས་ཕྲག་དོག་གི་དབང་དུ་བཏང་བ་འདི་ངུ་རེ་བྲོ། །ལྷ་མིན་འཐབ་རྩོད་ཀྱི་སྡུག་བསྔལ་དེ་ཡ་རེ་ང་། །ཁ་ཡིས་མ་ཡིག་མ་བསྒྲུངས་ཀྱང་། །སེམས་ཕྲག་དོག་མེད་ན་མ་ཡིག་གི་སྙིང་པོ་ཡིན། །ཁ་ཡིས་ཎི་ཡིག་བསྒྲུངས་ན་ཡང་། །སེམས་འདོད་ཆགས་ཀྱི་དབང་དུ་བཏང་བ་འདི་ངུ་རེ་
བྲོ། །མི་བྲེལ་ཕོངས་ཀྱི་སྡུག་བསྔལ་དེ་ཡ་རེ་ང་། །ཁ་ཡིས་ཎི་ཡིག་མ་བསྒྲངས་ཀྱང་། །སེམས་འདོད་ཆགས་མེདན་ཎི་ཡིག་གི་སྙིང་པོ་ཡིན། །ཁ་ཡིས་པད་ཡིག་བགྲངས་ན་ཡང་། །སེམས་གཏི་མུག་གི་དབང་དུ་བཏང་བ་འདི་དུ་རེ་བྲོ། །དུད་འགྲོ་གླེན་ལྐུགས་ཀྱི་སྡུག་བསྔལ་དེ་ཡ་རེ་ང་། །ཁ་ཡིས་པད་ཡིག་མ་བསྒྲུངས་ཀྱང་། །སེམས་གཏི་མུག་མེདན་པད་ཡིག་གི་སྙིང་པོ་ཡིན། །ཁ་ཡིས་མེ་ཡིག་བསྒྲངསན་ཡང་། །སེམས་སེར་སྣའི་དབང་དུ་བཏང་བ་འདི་ངུ་རེ་བྲོ། །ཡི་དྭགས་་བསྐྲེས་སྐོམ་གྱི་སྡུག་བསྔལ་དེ་ཡ་རེ་ང་། །ཁ་ཡིས་མེ་ཡིག་མ་བསྒྲངས་ཀྱང་། །སེམས་སེར་སྣ་མེད་ན་མེ་ཡིག་གི་སྙིང་པོ་ཡིན། །ཁ་ཡིས་ཧཱུྃ་ཡིག་བསྒྲངས་ན་ཡང་། །སེམས་ཞེ་སྡང་གི་དབང་དུ་བཏང་བ་འདི་ངུ་རེ་བྲོ། །དམྱལ་བ་ཚ་གྲང་གི་སྡུག་བསྔལ་དེ་ཡ་རེ་ང་། །ཁ་ཡིས་ཧཱུྃ་ཡིག་མ་བསྒྲང་ཀྱང་། །སེམས་ཞེ་སྡང་
མེད་ན་ཧཱུཾ་ཡིག་གི་སྙིང་པོ་ཡིན། །ཁ་ཡིས་ཧྲཱིཿཡིག་བསྒྲང་ན་ཡང་། །སེམས་ཅན་སྡུག་བསྔལ་ལ་སྦྱར་བ་འདི་ངུ་རེ་བྲོ། །སྙིང་རྗེ་དེ་སེམས་ལ་མེད་པས་ན། །སྡེ་ཡར་ཀ་ཚུར་ཀ་རྣམས་ཀྱང་འཁྲུག་ནས་གདའ། །ལས་ངན་གྱི་རྣམ་སྨིན་མྱོང་ཚེ་ཡ་རེ་ང་། །ཁ་ཡིས་ཧྲཱིཿཡིག་མ་བསྒྲུངས་ཀྱང་། །སྙིང་རྗེ་དེ་སེམས་ལ་ཡོད་གྱུར་ན། །འཕགས་པ་སྤྱན་རས་གཟིགས་ཀྱི་དགོངས་པ་ཡིན། །སྐལ་ལྡན་གྱི་འགྲོ་བ་ཕོ་མོ་རྣམས། །ཕྱི་དུག་ལྔའི་འཁོར་ལོ་མ་བསྐོར་བར། །ནང་ཡེ་ཤེས་ལྔའི་འཁོར་ལོ་དེ་རྒྱུན་དུ་སྐོར་ལ་ཤོག །ཕྱི་ཉོན་མོངས་ཀྱི་ཕྲེང་ནག་མི་བསྒྲང་བར། །ནང་རྟོག་མེད་རྡོ་རྗེའི་ཕྲེང་བ་དེ་རྒྱུན་དུ་སྒོངས་ལ་ཤོག །ཕྱི་ལུས་ཀྱི་འཁོར་ལོ་བསྐོར་ན་ཡང་། །ནང་རྣམ་གཡེང་གི་འཁོར་ལོ་བསྐོར་ནས་གདའ། །ཕྱི་ལུས་ཀྱི་ཕྲེང་བ་བསྒྲངས་ན་ཡང་། །ནང་བསམ་ངན་གྱི་ཕྲེང་བ་བསྒྲུངས་ནས་
གདའ། །ནང་རྡོ་རྗེའི་ལྷ་ཁང་བོར་ནས་ནི། །ཕྱི་ཡི་ལྷ་ཁང་བཞེངས་པ་འདི། །སེམས་ཅན་སྡུག་བསྔལ་ལ་སྦྱར་ནས་གདའ། །དགྲ་ལས་སྒྲིབ་པ་སྦྱང་བའི་འདུན་པ་དཀའ། །ཕྱི་ཆགས་སྡང་གི་རྡོ་ཡིག་མ་བརྐོ་བར། །ནང་བདག་འཛིན་གྱི་རྡོ་སྒོག་སྲ་མོ་ལ། །དོན་ཡེ་ཤེས་དྲུག་གི་འབྲུ་དྲུག་བརྐོས། །མ་འགྲོ་དྲུག་སངས་རྒྱས་ཐོབ་པར་ཤོག །ཅེས་སོ།། ༈ ཡང་འདི་སྐད་དུ། །མཁྱེན་ནོ་མཁྱེན་ནོ་ཨོ་རྒྱན་ཆེན་པོ་མཁྱེན་ནོ། །གཟིགས་ཤིག་གཟིགས་ཤིག་མི་མངོན་དབྱིངས་ནས་གཟིགས་ཤིག །དུས་དེང་སང་མི་གཟིགས་ན་ནམ་ཞིག་གཟིགས། །གཟིགས་ཤིག་གཟིགས་ཤིག་ལས་ངན་གྱི་འགྲོ་བ་ལ་གཟིགས་ཤིག །བཞེངས་ཤིག་བཞེངས་ཤིག་སྐུ་གསུམ་དབྱེར་མེད་ཀྱི་ཀློང་ནས་བཞེངས་ཤིག །དྲོངས་ཤིག་དྲོངས་ཤིག་འགྲོ་དྲུག་བདེ་ཆེན་གྱི་ཞིང་དུ་དྲོངས་ཤིག །བཞེངས་ཤིག་བཞེངས་ཤིག་གུ་རུ་རིགས་དྲུག་
དེ་བཞེངས་ཤིག །སྐྱོབས་ཤིག་སྐྱོབས་ཤིག་རྒྱུ་དྲུག་འཁོར་བ་ལས་སྐྱོབས་ཤིག །མ་ཉལ་མ་ཉལ་སྐལ་ལྡན་གྱི་འགྲོ་བ་ཕོ་མོ་རྣམས། །སེམས་ང་རྒྱལ་གྱི་དབང་དུ་མ་ཉལ་ཡར་ལ་བཞེངས། །བཞེངས་པའི་བཞེངས་ལུགས་ནི་ཅི་འདྲ་ཞིག་ཡིན་ན། །སེམས་ང་རྒྱལ་གྱི་རྟོག་པ་ཞིག་སྐྱེས་པའི་དུསན། །ཕྱིར་མ་སྤངས་དྭང་དུ་མ་བླངས་པའི་ངོ་བོ། །ཆོས་མཉམ་པ་ཉིད་ཀྱི་ཡེ་ཤེས་སུ་གྲོལ་ལོ། །མ་ཉལ་མ་ཉལ་སྐལ་ལྡན་གྱི་འགྲོ་བ་ཕོ་མོ་རྣམས། །སེམས་ཕྲག་དོག་གི་དབང་དུ་མ་ཉལ་ཡར་ལ་བཞེངས། །བཞེངས་པའི་བཞེངས་ལུགས་ནི་ཅི་འདྲ་ཞིག་ཡིན་ན། །སེམས་ཕྲག་དོག་གི་རྟོག་པ་ཞིག་སྐྱེས་པའི་དུས་ན། །ཕྱིར་མ་སྤངས་དྭང་དུ་མ་བླངས་པའི་ངོ་བོ། །ཆོས་བྱ་བ་གྲུབ་པའི་ཡེ་ཤེས་སུ་གྲོལ་ལོ། །མ་ཉལ་མ་ཉལ་སྐལ་ལྡན་གྱི་འགྲོ་བ་ཕོ་མོ་རྣམས། །སེམས་འདོད་ཆགས་ཀྱི་དབང་དུ་མ་
ཉལ་ཡར་ལ་བཞེངས། །བཞེངས་པའི་བཞེངས་ལུགས་ནི་ཅི་འདྲ་ཞིག་ཡིནན། །སེམས་འདོད་ཆགས་ཀྱི་རྟོག་པ་ཞིག་སྐྱེས་པའི་དུསན། །ཕྱིར་མ་སྤངས་དྲུང་དུ་མ་བླངས་པའི་ངོ་བོ། །ཆོས་སོ་སོར་རྟོགས་པའི་ཡེ་ཤེས་སུ་གྲོལ་ལོ། །མ་ཉལ་མ་ཉལ་སྐལ་ལྡན་གྱི་འགྲོ་བ་ཕོ་མོ་རྣམས། །སེམས་གཏི་མུག་གི་དབང་དུ་མ་ཉལ་ཡར་ལ་བཞེངས། །བཞེངས་པའི་བཞེངས་ལུགསནི་ཅི་འདྲ་ཞིག་ཡིནན། །སེམས་གཏི་མུག་གི་རྟོག་པ་ཞིག་སྐྱེས་པའི་དུས་ན། །ཕྱིར་མ་སྤངས་དྭང་དུ་མ་བླངས་པའི་ངོ་བོ། །ཆོས་མཐའ་བྲལ་དབྱིངས་ཀྱི་ཡེ་ཤེས་སུ་གྲོལ་ལོ། །མ་ཉལ་མ་ཉལ་སྐལ་ལྡན་གྱི་འགྲོ་བ་ཕོ་མོ་རྣམས། །སེམས་སེར་སྣའི་དབང་དུ་མ་ཉལ་ཡར་ལ་བཞེངས། །བཞེངས་པའི་བཞེངས་ལུགས་ནི་ཅི་འདྲ་ཞིག་ཡིན་ན། །སེམས་སེར་སྣའི་རྟོག་པ་ཞིག་སྐྱེས་པའི་དུས་ན། །ཕྱིར་མ་སྤངས་དྭང་དུ་མ་བླངས་པའི་ངོ་
བོ། །ཆོས་མི་དམིགས་ཟང་ཐལ་ཡེ་ཤེས་སུ་གྲོལ་ལོ། །མ་ཉལ་མ་ཉལ་སྐལ་ལྡན་གྱི་འགྲོ་བ་ཕོ་མོ་རྣམས། །སེམས་ཞེ་སྡང་གི་དབང་དུ་མ་ཉལ་ཡར་ལ་བཞེངས། །བཞེངས་པའི་བཞེངས་ལུགསནི་ཅི་འདྲ་ཞིག་ཡིནན། །སེམས་ཞེ་སྡང་གི་རྟོག་པ་ཞིག་སྐྱེས་པའི་དུས་ན། །ཕྱི་མ་སྤངས་དྲུང་དུ་མ་བླངས་པའི་ངོ་བོ། །ཆོས་མེ་ལོང་ལྟ་བུའི་ཡེ་ཤེས་སུ་གྲོལ་ལོ། །དོན་དེ་ལ་དྲིལན་ཟུང་འཇུག་གི་གོ་འཕང་། །དུས་གཞན་ལ་མི་ལྟོས་ཚེ་འདི་རུ་ཐོབ་བོ། །ཕྱི་ནང་གི་ཆོས་ཀུན་མཚུངས་པ་ལ། །ནང་གི་རྟོག་ཚོགས་དེ་མ་འཁྲུགས་ན། །ཕྱི་ནས་ཤར་བ་བརྡ་ཆོས་ཡིན། །ནང་དུ་ཤར་བ་དོན་ཆོས་ཡིན། །ཕྱི་ཡི་འབྱུང་བ་ལྔ་པོ་འདི། །བརྡ་ཆོས་ཡིན་གྱི་དོན་ཆོས་མིན། །ནང་གི་འབྱུང་བ་ལྔ་པོ་འདི། མཚོན་བྱ་དོན་གྱི་འབྱུང་ལྔ་ཡིན། །ཕྱི་ལ་མ་ཞེན་བརྡ་ཙམ་རྟོག །ནང་གི་འབྱུང་ལྔ་དབྱིངས་ལ་སྐྱོལ། དབྱིངས་སྣང་རྒྱན་དུ་ཤར་བའི་ཚེ། །བརྡ་ཆོས་ཐམས་ཅད་རང་གྲོལ་དུ་འགྲོའོ་།ཅེས་པའང་དཔལ་ཧེ་རུ་ཀའི་
བརྟུལ་ཞུགས་སྤྱོད་པའི་རྣལ་འབྱོར་གྱི་དབང་ཕྱུག་གང་ཤར་རང་གྲོལ་དབང་པོས་གསུངས་མགུར་ཐོལ་བྱུང་དུ་བྱུང་བ་གཏེར་སྟོན་རོལ་པའི་རྡོ་རྗེའམ་པདྨ་དྲི་མེད་ཕྲིན་ལས་རྩལ་གྱིས་འགྲིགས་ཆགས་སུ་བཀོད་པ་དགེ། །།