དགའ་ལྡན་མཆོག་སྤྲུལ་ཡེ་ཤེས་ཐུབ་བསྟན་རྒྱ་མཚོ།
༈ དགའ་ལྡན་མཆོག་སྤྲུལ་རིན་པོ་ཆེ་ཡེ་ཤེས་ཐུབ་བསྟན་རྒྱ་མཚོར་ཕུལ་བའི་འཕྲིན་ལན། ཛཱནཱནཾཔྲབིདཾཀྲབཱཏྟཱཏེ སཾཔུཎྞཾམུནིཤཱསནཾསྤྲུཊེ༔ ཤུདྡྷསྱཱདཱིབྷེ། མཱནསྱསརསཱིཏབིཀྐིབཱ།
པཱདཔྱོབཀམལྕམཱུལཡོ༔ མཁྱེན་བརྩེའི་ཡེ་ཤེས་རྨད་བྱུང་བས། །ཡོངས་རྫོགས་ཐུབ་བསྟན་སྣང་མཛད་ཅིང་། །ཡིད་ཅན་རྒྱ་མཚོའི་གདུང་སེལ་བའི། །ཞབས་ཀྱི་པདྨོའི་ཉེ་དྲུང་དུ། ༡ །གང་དུ་སོན་པའི་ལེགས་བྱས་ཀྱིས། །དཔལ་དང་བདུད་རྩིའི་གཏེར་སྦྱིན་པས། །ཟླ་བ་ཁོ་ནར་རྣམ་བརྟག་བློས། །ཚིག་གི་ཀུ་མུཏ་འཛུམ་པར་གྱུར། ༢ །རིང་ནས་སྦྱངས་པའི་བློ་གྲོས་ནི། །ཤེས་བྱའི་ཡུལ་ལ་འཇུག་པ་ན། །འབད་པ་མེད་པར་ཀུན་མཁྱེན་གྱི། །རྒྱལ་ཐབས་རང་དབང་མཛད་ཅེས་གྲགས། ༣ །དེ་ཚེ་བསླབ་པའི་ཡལ་ག་ལ། །གྲོལ་བའི་འབྲས་བུས་རབ་དུད་པ། །སྔོན་མེད་དཔག་བསམ་རྐང་པས་འཐུང་། །ཉེ་བར་འཁོར་གྱི་རྣམ་ཐར་བཟུང་། ༤ །རང་གི་དྲི་ཡིས་འབིགས་བྱེད་ཀླུང་། །མཛེས་སྟེར་ས་མཆོག་ལྗོན་པ་སྟེ། །མ་འདྲིས་ཀུན་ལ་མཛའ་བཤེས་ཀྱིས། །དབུགས་འབྱིན་བགྱིད་པ་ཁྱོད་འདྲ་མེད། ༥ ། བདག་ལྟའི་འཛིན་སྟངས་བྲལ་བའི་བློ། །བདེ་བ་ཆེ་དང་མི་ཕྱེད་པའི། །ཟུང་འཇུག་ཡེ་ཤེས་སྲོག་གྲུབ་པས། །རྡོ་རྗེ་འཛིན་པའི་མཚན་སྙན་ལེན། ༦ །ལྷག་པར་འདི་ན་ཆེར་སྙེམས་རྣམས། །རིག་པའི་དེ་ཉིད་མ་མཐོང་བཞིན། །སྲེད་དང་སྡང་བའི་རྗེས་འབྲངས་ནས། །ཐུབ་བསྟན་ཉེ་འཁོན་གནས་ལ་སྦྱར། ༧ །ཁྱོད་ཀྱིས་གཙུག་ལག་ཇི་སྙེད་ཀུན། །སྒྲིབ་མེད་གཟིགས་དང་ཆབ་གཅིག་པར། །ཕྱོགས་ལྷུང་
དབུ་མར་བསྙིལ་མཛད་པས། །སྐྱེས་བུ་དམ་པར་གཅིག་ཏུ་མཚོན། ༨ །དེ་སླད་འཚོ་གཞེས་བརྟན་པ་དང་། །ལེགས་གསུངས་ཅུང་ཟད་ཐོབ་པས་ཀྱང་། །བྲལ་བས་ཉེན་ལ་ཙནྡན་ཆུས། །ཕན་པ་བསྒྲུབས་པས་ཆར་མི་ཉེ། ༩ །འདི་ན་དགེ་སྦྱོང་གཟུགས་བརྙན་ཡང་། །ལང་ཚོའི་ཆུ་སྐྱེས་མ་རྙིང་བཞིན། །ནང་གི་མུན་སེལ་རིམ་གཉིས་ཀྱི། །ཉིན་མོའི་སྣང་བར་ཕྱོགས་བཞིན་མཆིས། ༡༠ །སླར་ཡང་འཇིག་རྟེན་དགེ་ལེགས་ཀྱི། །འབྱུང་གནས་དམ་ཆོས་རིན་ཆེན་དབྱིག །གཏན་པ་མེད་པར་སྦྱིན་མཁས་པ། །གདེངས་ཅན་བདག་པོ་ཁྱོད་ཉིད་ཕྱིར། ༡༡ །བསྐལ་པ་རྒྱ་མཚོར་ཞབས་བརྟན་པའི། །གྲགས་དཀར་ཟླ་ཟློ བས་ཡིད་སྲུབས་སྡེ། །པདྨོ་ལྟ་བུར་ཟུམ་པ་དང་། །ཕན་བདེའི་ཆུ་གཏེར་རྒྱས་པ་ནས། ༡༢ །བདག་ཀྱང་བྱང་ཆུབ་སྙིང་པོའི་བར། །ཐུགས་རྗེའི་ཕྱག་གིས་དབུགས་དབྱུང་བས། །དཔྱིད་ཀྱིས་བཟུང་བའི་ཨུཏྤལ་བཞིན། །སྲིད་ཞིའི་དགེ་མཚན་རྫོགས་མཛད་གསོལ། ༡༣ །སརྦ་དཱ་ཐེ་ཡོ་བྷ་བ་ཏུ།། །།