བུ་ཡིག་རིན་པོ་ཆེ་གསེར་གྱི་སྒྲོམ་བུ།
བུ་ཡིག་རིན་པོ་ཆེ་གསེར་གྱི་སྒྲོམ་བུ༔ རྒྱ་གར་སྐད་དུ༔ སཏྭ་ནཾ་ཀི་གུ་རུ༔
བོད་སྐད་དུ༔ སེམས་ཀྱི་གནད་བསྟན་པ༔ རང་སངས་རྫོགས་པ་བདེ་བ་ལ་ཕྱག་འཚལ་ལོ༔ གང་ཞིག་གླང་ཆེན་སྨྱོས་འདྲའི་སེམས༔ མི་རྟོག་བདེ་བའི་ལྕགས་ཀྱུས་ནི༔ དེ་ཉིད་འཛིན་པར་སུ་(༣༠)འདོད་པ༔ མི་རྟོག་ཆེན་པོ་རྣལ་དུ་ཕེབས༔ གནས་པ་སེམས་ཉིད་ཀྱི་རྒྱན་དུ་བཀོད་པ་དང༔ གཞག་པ་སེམས་ཀྱི་ར་བར་གཞུག་པ་དང༔ འཕྲོ་བ་སེམས་ཀྱི་རོལ་པར་ཤར་བའོ༔
གང་ཞིག་དུར་ཁྲོད་ཝ་ཡི་སེམས༔ རྟོག་སངས་ཆེན་པོའི་གལ་གྱིས་ནི༔ དེ་ཉིད་འཛིན་པར་སུ་འདོད་པ༔ རྒྱུ་མེད་འབྲས་མེད་རྣལ་དུ་ཕེབས༔ བྱུང་ཁུངས་འགག་པ་སེམས་ཀྱི་གནས་བཙལ་བ་དང༔ གནད་གཟིར་བས་སེམས་ཀྱི་རྟ་བསད་པ༔ རྟག་བཅག་པས་སེམས་རོ་མཆོག་ཇི་ལྟར་འདུག་བསྟན་པའོ༔ གང་ཞིག་ཟོ་ཆུ་ལྟ་བུའི་སེམས༔ འཁྲུལ་པ་རང་དེངས་ཐོ་བ་ཡིས༔ འདི་ཉིད་འཇོམས་པར་སུ་འདོད་པ༔ འཁྲུལ་འཁོར་རང་ལྡན་རྣལ་དུ་ཕེབས༔ ལྟོས་པ་ཟད་པར་བྱས་པས་སེམས་ཀྱི་གྲངས་ཟད་པ་དང༔ འགྲོ་འོང་ལ་བརྟགས་པས་སེམས་ངོས་བཟུང་བ་དང༔ དེ་ཉིད་བཟློག་པས་སེམས་ལམ་དུ་བོར་བའོ༔
གང་ཞིག་ནམ་མཁའ་ལྟ་བུའི་སེམས༔ ངོ་བོ་གཅིག་པའི་ཕྱགས་ཤིང་གིས༔ དེ་ཉིད་སྡུད་པར་སུ་འདོད་པ༔ ཆོས་སྐུ་གཅིག་པར་རྣལ་དུ་ཕེབས༔ སྒོ་འགགས་པས་སེམས་ཀྱི་བྱུང་ཚོར་སྟོངས་པ་དང༔ ཡུལ་ཕྱུང་བས་སེམས་ཀྱི་རྟེན་སྟོངས་པ་དང༔ རྒྱ་བསྐྱེད་པས་སེམས་ཉིད་དབུས་སུ་དྲིལ་བའོ༔ གང་ཞིག་སེམས་ལ་དགའ་བའི་གང་ཟག་སྤྲོས་པ་ཅན༔ འདི་ཉིད་གོམས་ནས་སྙིང་པོའི་དོན་ལ་འཇུག༔ དེ་ཡི་ཕྱིར་ན་འདི་ལ་འབད་པར་བྱ༔ འབད་དེ་གོམས་ན་རིག་པ་མཐོང་བར་འགྱུར༔ ཞེས་བཀོད་པ་ཆེན་པོ་འབུམ་ཕྲག་དྲུག་པ་ལས་སེམས་ཉིད་རྣལ་དུ་དབབ་པའི་དུམ་བུ་ཞེས་བྱ་བ་རྫོགས་སོ༔ རྒྱ་རྒྱ་རྒྱ༔