གཉིས་པ། རིག་འཛིན་བརྡའི་བརྒྱུད་པ།
༈ དོན་གཉིས་པ་རིག་འཛིན་བརྡའི་བརྒྱུད་པ་ལ། དཔལ་རྡོ་རྗེ་སེམས་དཔའམ། དངོས་ཀྱི་སྤྲུལ་པ་སློབ་དཔོན་ཆེན་པོ་དགའ་རབ་རྡོ་རྗེ་ཉིད་མི་(༩༨)ཡུལ་དུ་འཁྲུངས་ཚུལ་བསྟན་པའི་ལོ་རྒྱུས་ནི། རྒྱ་གར་ནུབ་ཕྱོགས་ཨོ་རྒྱན་གྱི་རྒྱལ་པོ་ཨུ་པ་རཱ་ཙ་དང་། བཙུན་མོ་གསལ་བའི་འོད་ལྡན་མའི་སྲས་མོ། དགེ་སློང་མ་སུ་དྷརྨཱ་ཞེས་བྱ་བ། ནུབ་ཕྱོགས་དྷ་ན་ཀོ་ཤའི་མཚོ་གླིང་དུ། འཇགས་མའི་སྤྱིལ་བུ་ཕུབ་ནས། བསམ་གཏན་ལ་བཞུགས་པའི་རྨི་ལམ་དུ། ཤེལ་ལས་གྲུབ་པའི་མི་དཀར་པོ་གཅིག་གིས། ཤེལ་གྱི་བུམ་པ་སྤྱི་བོར་བཞག་སྟེ། དབང་བསྐུར་བར་རྨིས་པའི་རྨི་ལམ་གཡོག་མོ་ལ་བཤད་པས། བདེ་བར་གཤེགས་པའི་ལྟས་ལགས་ཟེར་རོ། །དེ་ནས་ཟླ་བ་དགུ་ངོ་དང་བཅུ་ན་རྩིབས་ལོགས་གཡས་པའི་སྒོ་བར་ནས་ཁྱེའུ་མཚན་དང་དཔེ་བྱད་ཀྱིས་བརྒྱན་པ་ལྷའི་གོས་དང་བཅས་པ་ཞིག་བལྟམས་སོ། །དེའི་ཚེ་ཡུམ་བྲེད་ནས། ཕ་མེད་བུ་འདི་འཇིག་རྟེན་འདྲེ་བས་སུ། །འཇིག་རྟེན་བདུད་དམ་ཚངས་པ་ལ་སོགས་སམ། །ཁམས་གསུམ་དག་ན་འདོད་ལྡན་སུ་ཞིག་ཡིན། །འདི་ལྟར་བྱུང་བའི་དཔེ་ནི་སུས་མཐོང་མེད། །ཀྱེ་མ་བདག་ནི་ཁྲིམས་གཙང་སྲིད་ལས་རྒྱལ་འདོད་པས། །ལོག་སྲིད་འགྲོ་བས་དཔྱས་གྱུར་སྡིག་རེ་ཆེ། །ཞེས་བརྗོད་ནས་ཐལ་བའི་དོང་དུ་བོར་བ་ལས། ཞག་གསུམ་ན་ཅི་ཡང་མ་ཉེས་པར་མདངས་སལ་ལེ་འདུག །དེའི་ཚེ་བར་སྣང་ལས་ལྷ་རྣམས་ཀྱིས་ཁྲུས་གསོལ་ཏེ། མགོན་པོ་སྟོན་པ་བཅོམ་ལྡན་འདས། །རང་བཞིན་སྣང་མཛད་འཇིག་རྟེན་མགོན། །བདག་ཀྱང་རབ་ཏུ་བསྐྱབ་པ་དང་། །ནམ་མཁའི་རྡོ་རྗེ་དེང་བདག་སྩོལ། །ཞེས་ཤིས་པ་བརྗོད་པ་དང་། མཁའ་འགྲོ་མ་རྣམས་ཀྱིས་མཆོད་པའི་སྤྲིན་གཏིབས། ལྷ་དང་། ཀླུ་དང་། གནོད་སྦྱིན་དང་། དྲང་སྲོང་གི་རྒྱལ་པོ་རྣམས་ཀྱིས་མེ་ཏོག་གི་ཆར་འབེབས། ཕྱོགས་ཀུན་ནས་འཇིག་རྟེན་སྐྱོང་བ་རྣམས་ཀྱིས་ཆོས་ཀྱི་རྔ་བརྡུང་དུང་འབུད་རྒྱལ་མཚན་བསྒྲེངས་པ་མཐོང་བ་དང་། སྤྲུལ་པར་ཤེས་ནས་དར་དཀར་གྱི་ལྕིབས་མོས་བླངས་ནས། གསོས་པས་གཞན་ལས་སྐྱེད་ཆེ་བར་གྱུར། ཐལ་བའི་ཁུང་དུ་དོར་ཡང་མ་ཤི་བས། རོ་ལངས་ཐལ་མདོག་ཅེས་གྲགས་སོ། །ལོ་བདུན་ནས་ཡུམ་ལ་པཎྜི་ཏ་མཁས་པ་རྣམས་དང་གསུང་གླེང་བྱེད་པར་ཞུས་པས་གནང་སྟེ་ཨོ་རྒྱན་དུ་བྱོན་པས། པཎྜི་ཏ་ལྔ་བརྒྱ་དང་རྩོད་པས། སློབ་དཔོན་རྒྱལ་ཏེ། ཤེས་རབ་ཆེ་བ་ལ་དགོངས་ནས། སློབ་དཔོན་པྲཛྙཱ་བྷ་ཝ་ཞེས་མཚན་གསོལ། རྒྱལ་པོ་དགྱེས་པས་སློབ་དཔོན་དགའ་རབ་རྡོ་རྗེ་མཚན་(༩༩)གསོལ། ཡུལ་མི་ཀུན་གྱིས་ཐལ་བའི་ཁུང་དུ་དོར་ཡང་མ་འགྲོངས་པར་སླར་བདེ་བས། སློབ་དཔོན་རོ་ལངས་བདེ་བར་མཚན་གསོལ་ཏེ། བཞིར་གྲགས་པ་ནི། སྔོན་སྟོན་པའི་ཉེ་དྲུང་དུ་སྐྱེ་བ་བཞིའི་ལུས་ཀྱིས་འདུད་པའི་བསོད་ནམས་ལས་བྱུང་བའོ། །དེ་ནས་སློབ་དཔོན་དེ་བྱང་ཕྱོགས་སུ་རི་བོ་ཉི་མ་རབ་ཏུ་སྣང་བྱེད་ལ་བྱོན་ནས། ལོ་སུམ་ཅུ་རྩ་གཉིས་སུ་དགོངས་པ་ལ་བཞུགས་སོ། །དེ་ནས་རི་བོ་མཱ་ལ་ཡར་བསྟན་པའི་ལས་རྒྱས་པའི་རྩེར་བྱོན་ཏེ། སྔར་སངས་རྒྱས་ཀྱིས་གསུངས་པའི་ཆོས་རྣམས་དང་། ཁྱད་པར་དུ་རང་བཞིན་རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞི་ཐུགས་ལ་བཞུགས་པ་རྣམས་ཡི་གེར་བཀོད་དེ། མཁའ་འགྲོ་མ་མངོན་པར་བྱུང་བའི་ཕུག་ཏུ་ཆོས་རྟགས་ཀྱི་ཕྱག་རྒྱ་བཏབ་སྟེ། མཁའ་འགྲོ་མ་ལ་གཏད་ནས་མཆོད་པར་བྱེད་དོ། །དེ་ནས་སློབ་དཔོན་ཉིད་དུར་ཁྲོད་བསིལ་བའི་ཚལ་དུ་མཁའ་འགྲོ་མ་རྣམས་ལ་ཆོས་སྟོན་ཅིང་དགོངས་པ་ལ་བཞུགས་སོ། །དེའི་ཚེ་རྒྱ་གར་ནུབ་ཕྱོགས་རིམ་པ་གཉིས་པའི་གྲོང་ཁྱེར་ན། ཡབ་བྲམ་ཟེ་ལེགས་ལྡན་སྟོན་པ་དང་། ཡུལ་སྣང་གསལ་མཛེས་མའི་བུ། སློབ་དཔོན་ཆེན་པོ་འཇམ་དཔལ་བཤེས་གཉེན་བྱ་བ། རིག་པའི་གནས་ལྔ་ལ་མཁས་པ་ཞིག །དུར་ཁྲོད་གསང་ལུང་ན་སྤྱོད་པ་མཛད་པ་ལ། འཇམ་དཔལ་རྣོན་པོས་ལུང་བསྟན་ནས། ཀྱཻ་རིགས་ཀྱི་བུ། འབྲས་བུ་ངེས་པའི་དོན་འདོད་ན། དུར་ཁྲོད་ཆེན་པོ་བསིལ་བའི་ཚལ་དུ་སོང་ཞིག །ཅེས་ཐོས་མ་ཐག་ཏུ་བྱོན་པས། སློབ་དཔོན་ཆེན་པོ་དགའ་རབ་རྡོ་རྗེ་དང་མཇལ་ཏེ་རྗེས་སུ་བཟུང་ནས། ཆོས་ཐམས་ཅད་རྫོགས་པར་གནང་སྟེ། སློབ་དཔོན་ཉིད་ཆུ་བོ་དན་ཏིག་གི་མགོར་འོད་ཕུང་དུ་གཤེགས་སོ། །དེ་ནས་སློབ་དཔོན་འཇམ་དཔལ་བཤེས་གཉེན་གྱིས་དཔེ་རྒྱུད་རྣམས། རྡོ་རྗེ་གདན་གྱི་བྱང་ཤར་མཚམས་ཕ་ཝཾ་རྡོ་རྗེ་རྒྱ་གྲམ་ཅན་གྱི་འོག་ཏུ་སྦས་ནས། དུར་ཁྲོད་ཆེན་པོ་སོ་ས་གླིང་དུ་བཞུགས་སོ། །དེའི་ཚེ་རྒྱ་ནག་པོའི་ཡུལ་གྲོང་ཁྱེར་ཤོ་འཁྱམས་ནག་པོ་ཞེས་བྱ་བ་ན། ཡབ་ཁྱིམ་བདག་དགེ་བ་དང་ལྡན་པའི་ཡིད་ཅན། ཡུམ་སྣང་གསལ་མཁྱེན་མའི་བུ། སློབ་དཔོན་ཤྲཱི་སིངྷ་ཞེས་བྱ་བ་མཁས་པ་ལ་སྦྱངས་པའི་ཡོན་ཏན་ལྡན་པ་ཞིག །ནུབ་ཕྱོགས་གསེར་གྱི་གླིང་དུ་འགྲོ་སྙམ་ནས། རྔ་མོང་སྟོབས་ལྡན་ཞིག་ལ་ཞོན་ནས་བྱོན་པའི་ལམ་ཁ་ཐང་སྟོང་པ་ཞིག་གི་སྟེང་(༡༠༠)གི་ནམ་མཁའ་ལས། སྤྱན་རས་གཟིགས་ཀྱིས་ལུང་བསྟན་པ། ཀྱཻ་སྐལ་ལྡན་འབྲས་བུ་ངེས་པའི་དོན་འདོད་ན། རྒྱ་གར་གྱི་དུར་ཁྲོད་ཆེན་པོ་སོ་ས་གླིང་དུ་སོང་ཞིག །ཅེས་བྱ་བ་ཐོས་ནས། གསང་སྔགས་ཕྱི་ནང་དང་རྐང་མགྱོགས་ཀྱི་དངོས་གྲུབ་བསྒྲུབས་ནས་ཕྱིན་པས། མཇལ་ཏེ་རྗེས་སུ་བཟུང་། ཆོས་རྣམས་རྫོགས་པར་གནང་ནས། དཔེ་བརྒྱུད་རྣམས་ལུང་བསྟན་ཏེ། དུར་ཁྲོད་དེ་ཉིད་དུ་མཆོད་རྟེན་གྱི་རྩེར་ལྷག་མེད་དུ་གཤེགས་སོ། །དེ་ནས་སློབ་དཔོན་ཆེན་པོ་ཤྲཱི་སེངྷས། དཔེ་རྣམས་བཏོན་ནས་རྒྱ་ནག་གི་དུར་ཁྲོད་བསིལ་སྦྱིན་དུ་བཞུགས་སོ། །དེའི་ཚེ་རྒྱ་གར་ནུབ་ཕྱོགས་གླང་པོ་སྒང་གི་གྲོང་ཁྱེར་ན། རྒྱལ་པོ་དྷརྨཱ་ཨ་ཤྭའི་སྲས་སློབ་དཔོན་ཆེན་པོ་བྱེ་མ་ལ་མུ་ཏྲ་ཞེས་བྱ་བ་སྟེ། བཀོད་པ་ཆེན་པོར། ཕྱག་རྒྱ་རྒྱ་ཅན་ཞེས་བྱ་བའི་མཁས་པ་མཆོག་དེ་ཀ་མ་རུར་གནས། ཞེས་ལུང་བསྟན་པ་དེ་དང་། སློབ་དཔོན་ཆེན་པོ་ཡེ་ཤེས་མདོ་གཉིས། རྡོ་རྗེ་གདན་གྱི་ནུབ་ཕྱོགས་འདམ་བུའི་ཚལ་དུ་སྐྱོ་བསངས་ལ་བྱོན་པའི་སྟེང་གི་ནམ་མཁའ་ནས་རྡོ་རྗེ་སེམས་དཔས་ལུང་བསྟན་པ། ཀྱཻ་སྐལ་ལྡན་གཉིས། ཚེ་གཅིག་གི་འབྲས་བུ་ངེས་པར་འདོད་ན། རྒྱ་ནག་པོའི་ཡུལ་དུར་ཁྲོད་བསིལ་སྦྱིན་དུ་སོང་ཞིག །ཅེས་ཐོས་མ་ཐག་བྱེ་མ་ལ་བྱོན་པས། སློབ་དཔོན་ཆེན་པོ་ཤྲཱི་སེངྷ་དང་མཇལ། གདམས་པ་རྣམས་གནང་ནས་སླར་རྒྱ་གར་དུ་བྱོན་ཏེ། དུར་ཁྲོད་ཆེན་པོ་སྣང་བྱེད་དུ་དགོངས་པ་ལ་བཞུགས་ཤིང་། དེའི་འོག་ཏུ་གྲོང་ཁྱེར་སེར་སྐྱའི་རྒྱལ་པོ་ཨིནྡྲ་བོ་དྷིའི་བླ་མཆོད་མཛད་དོ།། །།