གཉིས་པ། དགོས་འབྲེལ་གཏན་ལ་དབབ་པ།

གཉིས་པ་དགོས་འབྲེལ་གཏན་ལ་དབབ་པ་ལ་གསུམ་སྟེ། སྤྱིར་ངག་ཙམ་ལ་ཡོད་པའི་དགོས་འབྲེལ། རྒྱུད་དོན་ལུས་ལ་ཡོད་པའི་དགོས་འབྲེལ། དགོས་འབྲེལ་ངག་ལ་ཡོད་པའི་དགོས་འབྲེལ་ཡན་ལག་བཞིའོ། །

དང་པོ་ནི། རྟོགས་ལྡན་གྱི་ངག་དེས་བསྟན་པར་བྱ་བའི་དོན་ནི་དེའི་བརྗོད་བྱ། ངག་དེ་ལས་རྟོགས་པར་བྱ་བ་ནི་དགོས་པ། རྟོགས་པ་ལས་འབྲས་བུ་གྲུབ་པ་ནི་ཉིང་དགོས། དགོས་པ་ངག་ལས་བྱུང་བ་ནི་འབྲེལ་བའོ། །དཔེར་ན་བུམ་པ་ནི་བརྗོད་བྱ། བུམ་པ་འོན་ཅིག་གི་སྒྲ་ལས་དེ་ཐོས་པ་ནི་དགོས་པ། དེ་ལས་ཆུ་བླངས་ཏེ་བྱ་བ་བྱེད་པ་ནི་ཉིང་དགོས། དེ་དག་གཅིག་ལ་གཅིག་བརྟེན་པ་ནི་འབྲེལ་བ་སྟེ། མེད་ན་མི་འབྱུང་བའི་ཕྱིར་རོ། །

གཉིས་པ་ནི། རྡོ་རྗེ་ལས། བརྗོད་འབྲེལ་དགོས་དང་ཡང་དགོས་པའི། །རྒྱུད་ཀྱི་ཡན་ལག་བཞི་རུ་འགྱུར། །ཞེས་གསུངས་པས། འདི་ལ་གསུམ་སྟེ། ངོས་བཟུང་། གཅིག་ཐ་དད་བརྟགས། གྲངས་ངེས་པའོ། །

དང་པོ་ནི། རྒྱུད་འདིའི་གཞི་ལམ་འབྲས་བུ་གསུམ་ནི་བརྗོད་བྱ། དེའི་མཚོན་པ་མིང་ཚིག་ཡི་གེར་སྣང་བའི་གཞུང་ལེའུ་ཉི་ཤུ་རྩ་གཉིས་ནི་རྗོད་བྱེད། རྗོད་བྱེད་ཚིག་རྒྱུད་ལ་བརྟེན་ནས་བརྗོད་བྱ་དོན་གྱི་རྒྱུད་རྟོགས་པ་ནི་དགོས་པ། རྟོགས་པ་བཞིན་ཉམས་སུ་བླངས་པས་གནས་སྐབས་དང་མཐར་ཐུག་གི་དོན་གྲུབ་པ་ནི་ཉིང་དགོས། འབྲས་བུ་འགྲུབ་པ་དེ་ཉིད་རྒྱུད་དོན་རྟོགས་པ་ལ་ལྟོས་ཤིང་། རྟོགས་པའང་རྗོད་བྱེད་དང་བརྗོད་བྱ་ལ་བརྟེན་པའམ་ལྟོས་པ་ནི་འབྲེལ་བའོ། །ཚུལ་འདི་ཉིད་མན་ངག་ལྟ་ཕྲེང་དུ་གསུངས་ཏེ། གཞི་རང་བཞིན་གྱི་རྒྱུད་བརྗོད་བྱ། རྐྱེན་འཇུག་པའི་མཚན་ཉིད་དགོས་པ། རྒྱུ་ཤེས་པའི་མཚན་ཉིད་འབྲེལ་བ། དེ་གཉིས་ཀྱིས་མངོན་དུ་གྱུར་པ་འབྲས་བུའི་མཚན་ཉིད་དགོས་པའི་ཡང་དགོས་པའོ། །ཞེས་གསུངས་སོ། །དབྱེ་ན་གསུམ་ལས། གཞི་དཀྱིལ་འཁོར་གསུམ་དུ་ཡེ་ནས་སངས་རྒྱས་པའི་དོན་བརྗོད་བྱ། དེ་སྟོན་པའི་ཚིག་གླེང་གཞི་དང་གླེང་བསླང་བ་ལྟ་བུ་ནི་རྗོད་བྱེད། དེ་ཉིད་སྟོན་པས་གསུངས་པ་བཞིན་འཁོར་གྱིས་རྟོགས་པ་དགོས་པ། དེ་ཉིད་གདུལ་བྱ་འདུལ་བྱེད་གཞན་ལ་བརྟེན་ནས་དོན་གྲུབ་པ་ཉིང་དགོས། (༥༠)དེ་དག་གཅིག་ལ་གཅིག་བརྟེན་པ་ནི་འབྲེལ་བའོ། །ལམ་དབང་མནོས་ཏེ་བསྐྱེད་རྫོགས་ཡན་ལག་དང་བཅས་པའི་ཐབས་ཤེས་ཟུང་འབྲེལ་ནི་བརྗོད་བྱ། དེ་སྟོན་པའི་ཚིག་ཡི་གེ་སྤྲིན་གྱི་ཚོགས་སྒྲུབ་པ་ལ་སོགས་པ་རྒྱུད་དོན་དངོས་རྣམས་རྗོད་བྱེད། དེ་ལ་བརྟེན་ནས་རྣལ་འབྱོར་པས་ཆོས་ཐམས་ཅད་ཐབས་ཤེས་ཟུང་འཇུག་ཏུ་རྟོགས་པ་ནི་དགོས་པ། རྟོགས་བཞིན་ཉམས་སུ་བླངས་པས་འབྲས་བུ་གྲུབ་པ་ནི་ཉིང་དགོས། དེ་དག་གཅིག་ལ་གཅིག་བརྟེན་ཅིང་། ཁྱད་པར་དུ། དཀྱིལ་འཁོར་གཟུངས་མ་དང་འབྲེལ། གཟུངས་མ་དབང་དང་འབྲེལ། དབང་སྒྲུབ་པ་དང་འབྲེལ། སྒྲུབ་པ་འབྲས་བུ་དང་འབྲེལ་བ་ནི་འབྲེལ་བའོ། །འབྲས་བུ་དཀྱིལ་འཁོར་གསུམ་དུ་སངས་རྒྱས་ནས་སྐུ་དང་ཡེ་ཤེས་སུ་ལྷུན་གྱིས་གྲུབ་པ་ནི་བརྗོད་བྱ། དེ་སྟོན་པའི་ཚིག་གླེང་གཞི་གླེང་བསླང་བ་ལྟ་བུ་ནི་རྗོད་བྱེད། སེམས་ཅན་གྱི་དོན་དུ་སྤྲུལ་པ་འཕྲོ་བ་ནི་དགོས་པ། དེ་ལས་འགྲོ་བའི་དོན་གཉིས་གྲུབ་པ་ནི་ཉིང་དགོས། དེ་དག་གཅིག་ལ་གཅིག་བརྟེན་དུ་བྱུང་བ་ནི་ཐུགས་རྗེ་ཡེ་ཤེས་ཀྱི་འབྲེལ་བ་གྲུབ་པའོ། །

གཉིས་པ་རྒྱུད་འདིའི་ཚིག་དོན་རྟོགས་པའི་དགོས་འབྲེལ་གཅིག་གམ་ཐ་དད་སྙམ་ན། སྣང་བའི་བརྗོད་བྱ་དོན་སྤྱི་དངོས་མེད་ཡིན་ལ། དགོས་པ་འབྲེལ་བ་ཉིང་དགོས་གསུམ་ངོ་བོ་གཅིག་པ་བཀག་ཙམ་གྱིས་ཐ་དད་དོ། །བརྗོད་བྱ་ནི་ཉིང་དགོས་འགའ་ཞིག་དང་རྫས་གཅིག་ལ། འགའ་ཞིག་གི་རྒྱུ་ཡིན་ནོ། །དགོས་པ་དང་ཉིང་དགོས་ནི་རྫས་ཐ་དད། འབྲེལ་བ་ནི་འབྲེལ་ས་སོ་སོ་ལ་གཅིག་ཏུ་ཡོད།

གསུམ་པ་ནི་དགོས་པ་ལ་ལྟོས་པའི་གྲངས་ངེས་པ་ཡིན་ཏེ། རྒྱུད་འདི་ལ་དགོས་པ་ཅན་གྱི་བརྗོད་བྱ་མེད་དམ། ཉིང་དགོས་དང་ལྡན་པའི་དགོས་པ་མེད་དམ། དོན་དུ་གཉེར་བྱའི་ཉིང་དགོས་མེད་དམ། ཐབས་དང་ཐབས་ཅན་མ་འབྲེལ་ལམ་སྙམ་པ་སྟེ། རྟོགས་ལྡན་རྒྱུད་དོན་ལ་མི་འཇུག་པའི་གེགས་བཞི་སེལ་བ་ལ། དགོས་པ་ཅན་གྱི་བརྗོད་བྱ་དང་། ཉིང་དགོས་དང་ལྡན་པའི་དགོས་པ་དང་། དོན་དུ་བླང་བྱའི་ཉིང་དགོས་དང་། ཐབས་དང་ཐབས་བྱུང་གི་འབྲེལ་བ་རྣམས་བསྟན་ཏོ། །

གསུམ་པ་དགོས་འབྲེལ་ངག་ལ་ཡོད་པའི་དགོས་འབྲེལ་ཡན་ལག་བཞི་ལས། བརྗོད་བྱ་ནི་རྒྱུད་ཀྱི་དགོས་འབྲེལ་བཞིའོ། །དགོས་པ་ནི་རྒྱུད་ཀྱི་དགོས་འབྲེལ་ཁྱད་པར་ཅན་རྟོགས་པའོ། །ཉིང་དགོས་ནི་དགོས་སོགས་ཁྱད་པར་ཅན་རྟོགས་ནས་རྟོགས་ལྡན་རྒྱུད་ལ་འཇུག་པའོ། །དེའང་ལུགས་གཉིས་ཏེ། དབང་པོ་རྟུལ་པོ་དད་པའི་རྗེས་འབྲང་ངེས་པ་སྐྱེས་ནས་འཇུག་པ་དང་། རྣོན་པོ་ཆོས་ཀྱི་(༥༡)རྗེས་འབྲང་ཤས་ཆེར་འཛིན་པའི་ཐེ་ཚོམ་སྐྱེས་ནས་འཇུག་པ་སྟེ། གཉིས་ཀའང་དགོས་འབྲེལ་གྱི་ངག་ལས་དགོས་སོགས་རྟོགས་པར་མཉམ་ཞིང་། རྟོགས་ནས་རྒྱུད་ལ་འཇུག་པར་མཚུངས་སོ། །རྟོགས་ནས་འཇུག་པ་རྟོགས་པ་ལས་འབྱུང་། རྟོགས་པ་དགོས་འབྲེལ་བཀོད་པའི་ངག་ལས་བྱུང་བ་འབྲེལ་བའོ། །དེ་དག་གིས་ནི་རྒྱུད་འདིའི་དགོས་འབྲེལ་ལེགས་པར་བསྟན་ཟིན་པའོ། །