དང་པོ། ལོ་རྒྱུས་ཀྱི་ལེའུ།
༄༅། །འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ་བཞུགས་སོ། །
༄༅། །འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ། བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །ཤིན་ཏུ་རྣམ་དག་པདྨོའི་མདངས་འདྲ་ཀུན་མཁྱེན་སྦྲང་རྩིའི་སྙིང་པོ་ཅན། །གཞན་ཕན་ཐུགས་རྗེའི་འདབ་སྟོང་རབ་རྒྱས་གྲགས་པའི་དྲི་བསུང་མ་སྨད་པ། །འཇམ་པའི་དབྱངས་ཞེས་ཕྱོགས་བཅུར་རབ་གྲགས་སངས་རྒྱས་ཀུན་གྱིས་བསྔགས་པའི་མགོན། །བློ་གྲོས་བདེ་འབྱུང་གཙུག་གིས་མཛེས་བྱས་ངག་གི་དབང་པོའི་ཞབས་ལ་འདུད། །སྔོན་ཆད་བླ་མ་རྣམས་ཀྱི་སྙན་ནས་སྙན། །གཅིག་ནས་གཅིག་བརྒྱུད་ཡི་གེར་མ་བཀོད་ཅིང་། །ཀུན་ལ་མ་གྲགས་ཟབ་མོའི་གནད་རྣམས་དང་། །གཞུང་དུ་བཀོད་པ་རྣམས་ནས་འདིར་བརྗོད་བྱ། །ལོ་རྒྱུས་རྗེས་གནང་སྒྲུབ་པ་དང་། །སྤོགས་དང་ཁ་བསྒྱུར་སྦྱིན་སྲེག་དང་། །ལས་ཚོགས་དང་ནི་རྣམ་བདུན་གྱིས། །འཇམ་དཔལ་སྒྲུབ་པའི་རིམ་པ་བཤད། །
དེ་ལ་ཡིད་ཆེས་པའི་ཡན་ལག་ཏུ་བླ་མ་བརྒྱུད་པའི་ལོ་རྒྱུས་ནི། སངས་རྒྱས་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན། མ་ག་དྷའི་གྲོང་ཁྱེར་དང་ཉེ་བའི་གཙུག་ལག་ཁང་ཞིག་ན་རྒན་པོ་ལོ་དགུ་བཅུ་རྩ་དགུ་ལོན་པ་ཞིག་ཕྱི་མ་ལ་བག་ཆགས་བཞག་པའི་ཕྱིར་པཎྜི་ཏ་སུ་མ་ཏི་ཀཱིརྟི་ལ་ཡི་གེ་སློབ་ཅིང་འདུག་གོ། །དེའི་ཚེ་ཡུལ་དེའི་རྒྱལ་པོ་འཁོར་དང་བཅས་པ་དེ་བར་འོངས་པས་དེ་མཐོང་ནས་རྒན་པོ་དེ་ལ་སྨྲས་པ། ཀྱེ་རྒན་པོ་ཁྱོད་ནི་བྱིས་པའི་རང་བཞིན་དུ་གྱུར་ཏམ། འདི་ལྟར་གཟོད་ཡི་གེ་དག་ལ་སློབ་པ་བརྩོན། ཅེས་མ་རངས་བཞིན་དུ་སྨྲ་བ་ཐོས་ནས། དེ་ཡིད་རབ་ཏུ་མི་དགའ་བས་ད་ནི་ཡི་གེ་སློབ་པ་བཏང་སྟེ་སྒྲུབ་པ་ཞིག་བྱའོ་སྙམ་ནས། སློབ་དཔོན་ལ་བསླབ་མི་དགོས་པར་རིག་པའི་གནས་ལོབ་པའི་གདམས་ངག་ཡོད་དམ་ཞུས་པས། སློབ་དཔོན་གྱིས་འཕགས་པ་འཇམ་དཔལ་གྱི་སྒྲུབ་ཐབས་འདི་གནང་ནས། ཞག་གསུམ་བསྒྲུབས་པའི་ཕྱི་མ་ལ་རལ་གྲི་དྲངས་ནས་འཕགས་པ་འཇམ་དཔལ་དོ་ནུབ་ཞལ་མི་སྟོན་ན་རང་ཉིད་ཀྱི་རྐེ་བཅད་ལ་འཆི་བར་བྱའོ་ཞེས་དམ་བཅས་ཏེ་བསྒྲུབས་པས། ནམ་ལངས་སུ་འཇམ་པའི་དབྱངས་ཞལ་མངོན་སུམ་དུ་བསྟན་ནས་བྱིན་གྱིས་(༡༩)བརླབས་པས་རྒན་པོ་དེ་ཉིད་བྱིས་པ་ལོ་བརྒྱད་ལོན་པ་ལྟར་གྱུར་ནས་སྡེ་སྣོད་གསུམ་དང་རིག་པའི་གནས་ཐམས་ཅད་ལ་མཁས་པར་གྱུར་ཏེ། སློབ་དཔོན་ཆེན་པོ་མཉྫུ་ཤྲཱི་ཞེས་བྱ་བར་གྲགས་སོ། །དེས་རྗེ་བཙུན་དམ་པ་རྒྱ་གར་ལ་གནང་། དེ་ནས་རིམ་པ་བཞིན་དུ་དམ་པ་ཀུན་དགའ། སྨོན་ལམ་འབར། ཤེས་རབ་སེང་གེ། ཆོས་ཀྱི་བླ་མ། ཀུ་མཱ་ར་ཀཱིརྟི། ཀུ་མཱ་ར་བློ་གྲོས། བླ་བྲང་པ་ཆོས་དཔལ་རྒྱལ་མཚན། སྙན་ངག་མཁན་ངག་གི་དབང་པོ། རི་ཁྲོད་སེང་གེའོ། །ལོ་རྒྱུས་ཀྱི་ལེའུ་སྟེ་དང་པོའོ།། །།