མཐུན་ཕྱོགས་དང་མི་མཐུན་ཕྱོགས་བཤད་སྐབས་ཀྱི་དོགས་པ།

མཐུན་ཕྱོགས་དང་མི་མཐུན་ཕྱོགས་བཤད་སྐབས་ཀྱི་དོགས་པ།

དེ་སྒྲུབ་ཀྱི་མཐུན་ཕྱོགས་ཡོད་པ་ལ་དེ་སྒྲུབ་ཀྱི་ཤེས་འདོད་ཆོས་ཅན་དང་བསྒྲུབ་བྱའི་ཆོས་གཉིས་ཀའི་དོན་མཐུན་པ་ཞིག་ཡོད་མི་དགོས་པར་ཐལ། འདོད་ན། དེ་མི་འཐད་པར་ཐལ། ཁྱོད་དེ་སྒྲུབ་ཀྱི་མཐུན་ཕྱོགས་ཡིན་པ་ལ་ཁྱོད་དང་དེ་སྒྲུབ་ཀྱི་ཤེས་འདོད་ཆོས་ཅན་གཉིས་ཀ་དེ་སྒྲུབ་ཀྱི་བསྒྲུབ་ཀྱི་བསྒྲུབ་བྱའི་ཆོས་དེ་ཡིན་པར་མཐུན་པ་དགོས་པའི་ཕྱིར། དེར་ཐལ། དེ་སྒྲུབ་ཀྱི་མཐུན་ཕྱོགས་ཞེས་པའི་ཕྱོགས་དེ་བསྒྲུབ་བྱའི་ཆོས་ལ་བྱས་ནས་ཆོས་ཐ་དད་པ་གཉིས་བསྒྲུབ་བྱའི་ཆོས་དེ་ཡིན་པར་མཐུན་པས་མཐུན་ཕྱོགས་ཞེས་བཤད་དགོས་པའི་ཕྱིར། འདོད་ན། དེ་སྒྲུབ་ཀྱི་མཐུན་ཕྱོགས་ཡོད་པ་ལ་དེ་སྒྲུབ་ཀྱི་ཤེས་འདོད་ཆོས་ཅན་དང་བསྒྲུབ་བྱའི་ཆོས་ཀྱི་དོན་མཐུན་པ་ཞིག་ཡོད་དགོས་པར་ཐལ། འདོད་པའི་ཕྱིར། འདོད་མི་ནུས་ཏེ། རྟགས་རིགས་ལས། ཁ་ཅིག་ན་རེ། དེ་སྒྲུབ་ཀྱི་ཤེས་འདོད་ཆོས་ཅན་དང་བསྒྲུབ་བྱའི་ཆོས་ཀྱི་སྤྱིའི་དོན་མཐུན་པ་དེ། དེ་སྒྲུབ་ཀྱི་མཐུན་ཕྱོགས་ཀྱི་མཚན་ཉིད། དེ་ལྟར་དོན་མི་མཐུན་པ་དེ་དེ་སྒྲུབ་ཀྱི་མི་མཐུན་ཕྱོགས་ཀྱི་མཚན་ཉིད་ཟེར་ན། འོ་ན་གཞལ་བྱའི་རྟགས་ཀྱིས་སྒྲ་རྟག་པར་སྒྲུབ་པའི་མཐུན་ཕྱོགས་མེད་པར་ཐལ། སྒྲ་དང་རྟག་པར་ཆོས་མཐུན་པ་མེད་པའི་ཕྱིར། ཞེས་གསུངས་པའི་ཕྱིར་ན་དཔྱད། ༈ རིགས་སྒོའི་སྐབས་སུ་གཞལ་བྱ་དེ་སྒྲ་རྟག་པར་སྒྲུབ་པའི་མཐུན་ཕྱོགས་དང་མི་མཐུན་ཕྱོགས་ཐམས་ཅད་ལ་འཇུག་པ་གསུངས་པ་ཡིན་པར་ཐལ། འདོད་ན། གཞལ་བྱ་ཆོས་ཅན། སྒྲ་རྟག་པར་སྒྲུབ་པའི་མཐུན་ཕྱོགས་དང་མི་མཐུན་ཕྱོགས་ཐམས་ཅད་ལ་འཇུག་པ་ཡིན་པར་ཐལ། འདོད་ན། གཞལ་བྱ་ཆོས་ཅན། སྒྲ་རྟག་པར་སྒྲུབ་པའི་མི་མཐུན་ཕྱོགས་ཡིན་ན་ཁྱོད་ཡིན་པས་ཁྱབ་པར་ཐལ། ཁྱོད་སྒྲ་རྟག་པར་སྒྲུབ་པའི་མི་མཐུན་ཕྱོགས་ཐམས་ཅད་ལ་འཇུག་པ་ཡིན་པའི་ཕྱིར། འདོད་ན། རི་བོང་རྭ་ཆོས་ཅན། གཞལ་བྱ་ཡིན་པར་ཐལ། སྒྲ་རྟག་པར་སྒྲུབ་པའི་མི་མཐུན་ཕྱོགས་ཡིན་པའི་ཕྱིར། དེར་ཐལ། སྒྲ་རྟག་པར་སྒྲུབ་པའི་མེད་པ་མི་མཐུན་ཕྱོགས་ཡིན་པའི་ཕྱིར། དེར་ཐལ། སྒྲ་རྟག་པར་སྒྲུབ་པའི་མེད་པ་མི་མཐུན་ཕྱོགས་འཇོག་རྒྱུ་ཡོད་པའི་ཕྱིར། འདོད་ན། རི་བོང་རྭ་ཆོས་ཅན། གཞལ་བྱ་ཡིན་པར་ཐལ། སྒྲ་རྟག་པར་སྒྲུབ་པའི་མི་མཐུན་ཕྱོགས་ཡིན་པའི་ཕྱིར། ཁྱབ་སྟེ། གཞལ་བྱ་དེ་སྒྲ་རྟག་པར་སྒྲུབ་པའི་མི་མཐུན་ཕྱོགས་ལ་ཁྱབ་བྱེད་དུ་འཇུག་པ་ཡིན་པའི་ཕྱིར། དེར་ཐལ། གཞལ་བྱ་སྒྲ་རྟག་སྒྲུབ་ཀྱི་མཐུན་ཕྱོགས་དང་མི་མཐུན་ཕྱོགས་མཐའ་དག་ལ་འཇུག་པ་ཡིན་པའི་ཕྱིར། དེར་ཐལ། ཚད་མ་རིགས་སྒོ་ལས། སྒྲ་རྟག་པ་ལ་སོགས་པའི་ཆོས་སྒྲུབ་པར་བྱ་བ་ལ་གཞལ་བྱ་ཡིན་པའི་ཕྱིར་ཞེས་བྱ་བའི་གཏན་ཚིགས་ནི་མཐུན་ཕྱོགས་དང་མི་མཐུན་པའི་ཕྱོགས་ཐམས་ཅད་ལ་འཇུག་པའི་ཐུན་མོང་གི་མ་ངེས་པ་ཞེས་བྱའོ། །ཞེས་དང༌། ཚད་མ་མདོ་ལས། ཕྱོགས་ཆོས་མཐུན་ཕྱོགས་ཡོད་མེད་དང༌། །རྣམ་གཉིས་རེ་རེ་དག་ལ་ཡང༌། །རྣམ་གསུམ་མི་མཐུན་ཕྱོགས་ལ་ཡང༌། །ཡོད་མེད་རྣམ་པ་གཉིས་ཕྱིར་རོ། །ཞེས་གསུངས་པའི་ཕྱིར་ན་སེ་ར་རྗེ་བཙུན་པའི་ཕྱོགས་ཆོས་འཁོར་ལོ་གཏན་ཚིགས་དགུའི་རེ་མིག་འགོད་ཚུལ་ལས། རེ་མིག་དང་པོ་སྒྲས་ཟིན་ལ། སྒྲ་ཆོས་ཅན། རྟག་སྟེ། གཞལ་བྱ་ཡིན་པའི་ཕྱིར། ཞེས་བཀོད་པ་སྒྲས་བརྗོད་ལྟ་བུ་ཡིན། དོན་ལ། སྒྲ་ཆོས་ཅན། རྟག་སྟེ། གཞལ་བྱ་ཡོད་པའི་ཕྱིར། དཔེར་ན་ནམ་མཁའ་དང་བུམ་པ་བཞིན། ཞེས་པ་ལྟ་བུ་ཡིན་ཏེ། གཞལ་བྱ་ཡོད་པ་དེ་སྒྲ་རྟག་པར་སྒྲུབ་པའི་མཐུན་ཕྱོགས་དང་མི་མཐུན་ཕྱོགས་གཉིས་ཀ་ལ་ཡོད་ཁྱབ་བྱེད་དུ་འཇུག་པའི་གཏན་ཚིགས་ཡིན་པའི་ཕྱིར། ཞེས་ཞིབ་ཆ་གསུངས་མོད། དེ་ལྟར་ན་སྒྲ་ཆོས་ཅན། རྟག་པ་ཡིན་ཏེ། བྱས་པ་ཡིན་པའི་ཕྱིར། ཞེས་པའི་སྦྱོར་བའི་རྟགས་དེ་དེ་སྒྲུབ་ཀྱི་མི་མཐུན་ཕྱོགས་ལ་ཁྱབ་བྱེད་དུ་ཡོད་པར་ཚད་མ་མདོ་ལས་གསུངས་པས་བྱས་པས་སྒྲ་རྟག་སྒྲུབ་ཀྱི་མི་མཐུན་ཕྱོགས་ལ་མ་ཁྱབ་པས་ལུང་དོན་སྔར་བཞིན་བཞག་ན་སྒྲ་ཆོས་ཅན། རྟག་པ་ཡིན་ཏེ། བྱས་པ་ཡོད་པའི་ཕྱིར་ཞེས་གསུངས་པའི་དོན་ཡིན་ཟེར་དགོས་ལ། དེ་ལྟར་ན་གཏན་ཚིགས་འཁོར་ལོ་ལས། ལོགས་གཉིས་འགལ་བ་གཉིས་ཡིན་ཏེ། །ཞེས་ལོགས་གཉིས་ཀྱི་སྦྱོར་བ་འགལ་རྟགས་ཀྱི་སྦྱོར་བ་ཡིན་པར་གསུངས་པས་སྒྲ་ཆོས་ཅན། རྟག་པ་ཡིན་ཏེ། བྱས་པ་ཡོད་པའི་ཕྱིར་ཞེས་བཀོད་ན་སྦྱོར་བ་དེ་སྒྲུབ་ཀྱི་རྗེས་སུ་འགྲོ་ལྡོག་གི་ཁྱབ་པ་ཕྱིན་ཅི་ལོག་ཏུ་མ་ངེས་པས་གཏན་ཚིགས་འཁོར་ལོའིལུང་དོན་གོང་ལྟར་བཞག་ན་འདི་ལྟར་དཔྱད་པར་བྱའོ། །༈ མཐུན་ཕྱོགས་དེ་བསྒྲུབ་བྱའི་ཆོས་ཀྱི་སྤྱི་ཡིན་པར་ཐལ། རིགས་ཐིགས་ལས། མཐུན་པའི་ཕྱོགས་ནི་བསྒྲུབ་པར་བྱ་བའི་ཆོས་ཀྱི་སྤྱི་དང་དོན་མཐུན་པའོ། །ཞེས་གསུངས་པའི་ཕྱིར། འདོད་ན། བསྒྲུབ་བྱའི་ཆོས་མཐུན་ཕྱོགས་ཀྱི་བྱེ་བྲག་ཡིན་པར་ཐལ། མཐུན་ཕྱོགས་བསྒྲུབ་བྱའི་ཆོས་ཀྱི་སྤྱི་ཡིན་པའི་ཕྱིར། རྟགས་ཁས། འདོད་མི་ནུས་ཏེ། བསྒྲུབ་བྱའི་ཆོས་བྱེ་བྲག་མ་ཡིན་པའི་ཕྱིར། དེར་ཐལ། བདག་མེད་ཡིན་ན་བསྒྲུབ་བྱའི་ཆོས་ཡིན་པས་ཁྱབ་པའི་ཕྱིར་རོ། །༈ ཡང་དེ་སྒྲུབ་ཀྱི་བསྒྲུབ་བྱའི་ཆོས་ཀྱི་སྤྱི་དང་དོན་མཐུན་པ་ཡིན་ན་དེ་སྒྲུབ་ཀྱི་མཐུན་ཕྱོགས་ཡིན་པས་ཁྱབ་པར་ཐལ། རིགས་ཐིགས་ལས། མཐུན་པའི་ཕྱོགས་ནི་བསྒྲུབ་པར་བྱ་བའི་ཆོས་ཀྱི་སྤྱི་དང་དོན་མཐུན་པའོ། །ཞེས་གསུངས་པའི་ཕྱིར། འདོད་ན། ཤེས་བྱ་ཆོས་ཅན། སྒྲ་མི་རྟག་པར་སྒྲུབ་པའི་མཐུན་ཕྱོགས་ཡིན་པར་ཐལ། སྒྲ་མི་རྟག་པར་སྒྲུབ་པའི་བསྒྲུབ་བྱའི་ཆོས་ཀྱི་སྤྱི་དང་དོན་མཐུན་པ་དེ་ཡིན་པའི་ཕྱིར། དེར་ཐལ། ཁྱོད་སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱི་སྤྱི་ཡིན་པའི་ཕྱིར། མ་གྲུབ་ན། ཤེས་བྱ་ཆོས་ཅན། ཁྱོད་སྒྲ་མི་རྟག་པར་སྒྲུབ་པའི་བསྒྲུབ་བྱའི་ཆོས་ཀྱི་སྤྱི་ཡིན་པར་ཐལ། སྒྲ་མི་རྟག་པར་སྒྲུབ་པའི་བསྒྲུབ་བྱའི་ཆོས་དེ་ཁྱོད་ཀྱི་བྱེ་བྲག་ཡིན་པའི་ཕྱིར་ན་སྐབས་འདིའི་བསྒྲུབ་བྱའི་ཆོས་ཀྱི་སྤྱི་ཞེས་པ་དང་སྤྱིར་སྤྱི་ཞེས་པ་མི་འདྲའམ་དཔྱད་པརབྱའོ། །༈ བུམ་པ་སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱིས་སྟོང་བ་ཡིན་པར་ཐལ། དེ་སྒྲུབ་ཀྱི་བསྒྲུབ་བྱའི་ཆོས་ཀྱིས་མི་སྟོང་པ་དེ་མཐུན་ཕྱོགས་ཀྱི་མཚན་ཉིད་དུ་ཁ་ཅིག་གིས་བཞག་པ་མི་འཐད་པའི་རྒྱུ་མཚན་ཡོད་པའི་ཕྱིར། འདོད་ན། བུམ་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་མེད་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱིས་སྟོང་པ་ཡིན་པའི་ཕྱིར། མ་ཁྱབ་ན། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཆོས་ཅན། ཁྱོད་ཀྱིས་སྟོང་ན་ཁྱོད་མེད་དགོས་པར་ཐལ། གཞི་གྲུབ་པའི་ཕྱིར། མ་ཁྱབ་ན། ཁྱབ་པ་ཡོད་པར་ཐལ། མིས་སྟོང་ན་མི་མེད་དགོས་པའི་རྒྱུ་མཚན་ཡོད་པའི་ཕྱིར། དེར་ཐལ། གྲོང་ཁྱེར་མིས་མ་སྟོང་པའི་རྒྱུ་མཚན་ཡོད་པའི་ཕྱིར། དེར་ཐལ། རི་ཆོས་ངེས་དོན་རྒྱ་མཚོ་ལས། གྲོང་ཁྱེར་མིས་སྟོང་པ་ཐལ་ལོ། །ཞེས་གསུངས་པའི་ཕྱིར། འདོད་ན། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱིས་སྟོང་ན་སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་མེད་དགོས་པར་ཐལ། མིས་སྟོང་ན་མི་མེད་དགོས་པ་གང་ཞིག རིགས་པ་མཚུངས་པའི་ཕྱིར། འདོད་ན། བུམ་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་མེད་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱིས་སྟོང་པའི་ཕྱིར། ཁྱབ་པ་ཁས། མ་གྲུབ་ན། བུམ་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱིས་མི་སྟོང་པ་ཡིན་པར་ཐལ། འདོད་ན། བུམ་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱིས་མི་སྟོང་པ་ཡིན་པའི་ཕྱིར། ཁྱབ་སྟེ། རྟགས་རིགས་ལས། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱིས་མི་སྟོང་བ་དེ་མ་ཡིན་པའི་ཕྱིར། ཁྱབ་པ་ཁས། དེར་ཐལ། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་མ་ཡིན་པའི་ཕྱིར། ཞེས་གསུངས་པའི་ཕྱིར་ན་དཔྱད། ༈ ཆོས་དེ་ཁྱོད་ཀྱི་བྱེ་བྲག་ཡིན་ན་ཆོས་དེ་སྒྲ་ཁྱོད་དུ་སྒྲུབ་པའི་བསྒྲུབ་བྱའི་ཆོས་མ་ཡིན་པས་ཁྱབ་པར་ཐལ། འདོད་ན། འདུས་བྱས་ཆོས་ཅན། ཆོས་དེ་ཁྱོད་ཀྱི་བྱེ་བྲག་ཡིན་ན་ཆོས་དེ་དངོས་པོའི་རྟགས་ཀྱིས་སྒྲ་ཁྱོད་དུ་སྒྲུབ་པའི་བསྒྲུབ་བྱའི་ཆོས་མ་ཡིན་པས་ཁྱབ་པར་ཐལ། འདོད་ན། རང་རྒྱུ་ལས་སྐྱེས་པ་ཆོས་ཅན། ཁྱོད་དངོས་པོའི་རྟགས་ཀྱིས་སྒྲ་འདུས་བྱས་སུ་སྒྲུབ་པར་བྱེད་པའི་བསྒྲུབ་བྱའི་ཆོས་མ་ཡིན་པར་ཐལ། ཁྱོད་འདུས་བྱས་ཀྱི་བྱེ་བྲག་ཡིན་པའི་ཕྱིར། མ་གྲུབ་ན། རང་རྒྱུ་ལས་སྐྱེས་པ་ཆོས་ཅན། ཁྱོད་འདུས་བྱས་ཀྱི་བྱེ་བྲག་ཡིན་པར་ཐལ། ཁྱོད་འདུས་བྱས་ཀྱི་བྱེ་བྲག་ཏུ་སོང་བའི་རྟགས་གསུམ་གྲུབ་པའི་ཕྱིར། དེར་ཐལ། ཁྱོད་འདུས་བྱས་ཡིན། ཁྱོད་འདུས་བྱས་དང་བདག་གཅིག་ཏུ་འབྲེལ། ཁྱོད་མ་ཡིན་ཞིང་འདུས་བྱས་ཡིན་པའི་གཞི་མཐུན་པ་དུ་མ་གྲུབ་པའི་ཕྱིར། དང་པོ་གཉིས་སླ། རྟགས་ཕྱི་མ་གྲུབ་སྟེ། བུམ་པ་དེ་ཡང་དེ་ཡིན། ཀ་བ་དེ་ཡང་དེ་ཡིན་པའི་ཕྱིར། དེར་ཐལ། བུམ་པ་རང་རྒྱུ་ལས་སྐྱེས་པ་མ་ཡིན་ཞིང་འདུས་བྱས་ཡིན་པའི་ཕྱིར། དེར་ཐལ། བུམ་པ་རང་རྒྱུ་ལས་སྐྱེས་པ་མ་ཡིན་པ་གང་ཞིག བུམ་པ་འདུས་བྱས་ཡིན་པའི་ཕྱིར། དང་པོ་མ་གྲུབ་ན། བུམ་པ་རང་རྒྱུ་ལས་སྐྱེས་པའི་རྒྱུ་མཚན་དེ་བུམ་པ་བུམ་པའི་རྒྱུ་ལས་སྐྱེས་པའི་རྒྱུ་མཚན་གྱིས་མ་ཡིན། དེ་ལས་གཞན་མ་ཡིན་པའི་ཕྱིར། དང་པོ་མ་གྲུབ་ན། འོ་ན་བུམ་པ་རང་དང་གཅིག་ཡིན་པར་ཐལ། བུམ་པ་བུམ་པ་དང་གཅིག་ཡིན་པ་གང་ཞིག རྒྱུ་མཚན་སྔ་མ་དང་འདྲ་བའི་ཕྱིར། འདོད་མི་ནུས་ཏེ། རང་དང་གཅིག་གི་ཡིན་པ་ཡོད་པ་དང༌། བུམ་པ་དང་རང་དང་ཡིན་ཁྱབ་མཉམ་པར་ཐལ་བ་སོགས་ཐལ་བ་མང་བོ་ཡོད་པའི་ཕྱིར། རྩ་བར་འདོད་མི་ནུས་ཟེར་ན། དེ་མི་འཐད་དེ། རྟགས་རིགས་ལས། མི་རྟག་པ་ཆོས་ཅན། ཆོས་དེ་ཁྱོད་ཀྱི་བྱེ་བྲག་ཡིན་ན་ཆོས་དེ་སྒྲ་ཁྱོད་དུ་སྒྲུབ་པའི་བསྒྲུབ་བྱའི་ཆོས་མཡིན་དགོས་པར་ཐལ། ཁྱོད་བདག་མེད་ཡིན་པའི་ཕྱིར། ཞེས་གསུངས་པའི་ཕྱིར་ན་དཔྱད། ༈ བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་བ་དེ། མཐུན་ཕྱོགས་ཀྱི་མཚན་ཉིད་དུ་འཇོག་དགོས་པར་ཐལ། འདོད་ན། དེ་སྒྲུབ་ཀྱི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་བ་ཡིན་ན་དེ་སྒྲུབ་ཀྱི་མཐུན་ཕྱོགས་ཡིན་པས་ཁྱབ་པར་ཐལ། འདོད་ན། བདག་མེད་ཡིན་ན་མཐུན་ཕྱོགས་ཡིན་པས་ཁྱབ་པར་ཐལ། བདག་མེད་ཡིན་ན་དེ་སྒྲུབ་ཀྱི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་བ་ཡིན་པས་ཁྱབ་པའི་ཕྱིར། དེར་ཐལ། བདག་མེད་ཡིན་ན་སྒྲ་བདག་མེད་དུ་སྒྲུབ་པའི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་པ་ཡིན་པས་ཁྱབ་པའི་ཕྱིར། འདོད་ན། མི་མཐུན་ཕྱོགས་ཆོས་ཅན། དེ་སྒྲུབ་ཀྱི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་པ་ཡིན་པར་ཐལ། བདག་མེད་ཡིན་པའི་ཕྱིར། འདོད་ན། མི་མཐུན་ཕྱོགས་ཆོས་ཅན། མཐུན་ཕྱོགས་ཡིན་པར་ཐལ། བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་པ་ཡིན་པའི་ཕྱིར། འདོད་མི་ནུས་ཏེ། མི་མཐུན་ཕྱོགས་མཐུན་ཕྱོགས་མ་ཡིན་པའི་ཕྱིར། དེར་ཐལ། ཚད་མ་རིགས་ཐིགས་ལས། མི་མཐུན་པའི་ཕྱོགས་ནི་མཐུན་པའི་ཕྱོགས་མ་ཡིན་པ་དེ། དེ་ལསགཞན་པ་དང༌། དེ་དང་འགལ་བ་དང༌། དེ་མེད་པའོ། །ཞེས་གསུངས་པའི་ཕྱིར་ན་དཔྱད། ༈ དུ་ལྡན་ལ་ལ་མེ་ཡོད་པར་སྒྲུབ་པའི་མཐུན་ཕྱོགས་དང་མེ་ཡོད་པ་དོན་གཅིག་ཡིན་པར་ཐལ། འདོད་ན། ཚང་མང་ཆོས་ཅན། དུ་ལྡན་ལ་ལ་མེ་ཡོད་པར་སྒྲུབ་པའི་མཐུན་ཕྱོགས་ཡིན་པར་ཐལ། མེ་ཡོད་པ་ཡིན་པའི་ཕྱིར། འདོད་ན། ཚང་མང་ཆོས་ཅན། དུ་ལྡན་ལ་ལ་མེ་ཡོད་པར་སྒྲུབ་པའི་མཐུན་ཕྱོགས་མ་ཡིན་པར་ཐལ། དུ་ལྡན་ལ་ལ་མེ་ཡོད་པར་སྒྲུབ་པའི་དགག་ཆོས་ཡིན་པའི་ཕྱིར། དེར་ཐལ། མེ་མ་ཡིན་པའི་ཕྱིར། ཁྱབ་སྟེ། དུ་ལྡན་ལ་ལ་མེ་ཡོད་པར་སྒྲུབ་པའི་བསྒྲུབ་བྱའི་ཆོས་ལ་མེ་འཇོག་དགོས་པ་གང་ཞིག དེ་སྒྲུབ་ཀྱི་བསྒྲུབ་བྱའི་ཆོས་ལ་མེ་བཞག་ན་དེ་སྒྲུབ་ཀྱི་བསྒྲུབ་བྱའི་ཆོས་ཀྱི་ལོག་ཕྱོགས་གང་ཡིན་པ་དགག་ཆོས་སུ་འཇོག་དགོས་པས་མེ་མ་ཡིན་པ་དེ་དེ་སྒྲུབ་ཀྱི་དགག་ཆོས་སུ་འཇོག་དགོས་པའི་ཕྱིར། འདོད་ན། ཚང་མང་ཆོས་ཅན། དུ་ལྡན་ལ་ལ་མེ་ཡོད་པར་སྒྲུབ་པའི་དགག་ཆོས་ཡིན་པར་ཐལ། མེ་མ་ཡིན་པ་ཡིན་པའི་ཕྱིར། འདོད་ན། ཚང་མང་ཆོས་ཅན། དུ་ལྡན་ལ་ལ་མེ་ཡོད་པར་སྒྲུབ་པའི་མི་མཐུན་ཕྱོགས་ཡིན་པར་ཐལ། དུ་ལྡན་ལ་ལ་མེ་ཡོད་པར་སྒྲུབ་པའི་དགག་ཆོས་ཡིན་པའི་ཕྱིར། འདོད་མི་ནུས་ཏེ། ཚང་མང་དེ་དུ་ལྡན་ལ་ལ་མེ་ཡོད་པར་སྒྲུབ་པའི་མཐུན་ཕྱོགས་ཡིན་པའི་ཕྱིར། མ་གྲུབ་ན། ཚང་མང་ཆོས་ཅན། དུ་ལྡན་ལ་ལ་མེ་ཡོད་པར་སྒྲུབ་པའི་མཐུན་ཕྱོགས་ཡིན་པར་ཐལ། མེ་ཡོད་པ་ཡིན་པའི་ཕྱིར། རྟགས་ཁྱབ་གཉིས་རེ་རེ་ནས་གྲུབ་སྟེ། རྟགས་རིགས་ལས། དུ་ལྡན་ལ་ལ་མེ་ཡོད་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་བ་དེ། དུ་ལྡན་ལ་ལ་མེ་ཡོད་པར་སྒྲུབ་པར་བྱེད་པའི་མཐུན་ཕྱོགས་ཀྱི་མཚན་ཉིད། དེ་དང་མེ་ཡོད་པ་དོན་གཅིག མཚན་གཞི་ནི། ཚང་མང་སོགས་སོ། །ཞེསགསུངས་པའི་ཕྱིར་རོ། །༈ མཚོན་བྱ་མ་ཡིན་པ་བུམ་པ་མཚོན་བྱར་སྒྲུབ་པའི་མཐུན་ཕྱོགས་ཡིན་པར་ཐལ། འདོད་ན། མཚོན་བྱ་མ་ཡིན་པ་ཆོས་ཅན། ཁྱོད་བུམ་པ་མཚོན་བྱར་སྒྲུབ་པའི་མཐུན་ཕྱོགས་མ་ཡིན་པར་ཐལ། ཁྱོད་བུམ་པ་མཚོན་བྱར་སྒྲུབ་པའི་མི་མཐུན་ཕྱོགས་ཡིན་པའི་ཕྱིར། དེར་ཐལ། ཁྱོད་བུམ་པ་མཚོན་བྱར་སྒྲུབ་པར་བྱེད་པའི་དགག་ཆོས་ཡིན་པའི་ཕྱིར། མ་གྲུབ་ན། མཚོན་བྱ་མ་ཡིན་པ་ཆོས་ཅན། ཁྱོད་བུམ་པ་མཚོན་བྱར་སྒྲུབ་པའི་དགག་བྱའི་ཆོས་ཡིན་པར་ཐལ། ཁྱོད་མཚོན་བྱའི་ལོག་ཕྱོགས་ཡིན་པའི་ཕྱིར། ཁྱབ་སྟེ། དེ་སྒྲུབ་ཀྱི་བསྒྲུབ་བྱའི་ཆོས་ཀྱི་ལོག་ཕྱོགས་གང་ཡིན་པ་དེ་དེ་སྒྲུབ་ཀྱི་དགག་བྱའི་ཆོས་ཀྱི་དོན་དུ་འཇོག་དགོས་པའི་ཕྱིར། དེར་ཐལ། དེ་སྒྲུབ་ཀྱི་དགག་བྱའི་ཆོས་ཀྱི་དོན་ཡོད་པའི་ཕྱིར། གོང་དུ་འདོད་ན། མཚོན་བྱ་མ་ཡིན་པ་ཆོས་ཅན། བུམ་པ་མཚོན་བྱར་སྒྲུབ་པའི་དགག་ཆོས་ཡིན་པར་ཐལ། འདོད་ན། མཚོན་བྱ་མ་ཡིན་པ་ཆོས་ཅན། བུམ་པ་མཚོན་བྱར་སྒྲུབ་པའི་མི་མཐུན་ཕྱོགས་ཡིན་པར་ཐལ། བུམ་པ་མཚོན་བྱར་སྒྲུབ་པའི་དགག་ཆོས་ཡིན་པའི་རྒྱུ་མཚན་འཐད་པའི་ཕྱིར། འདོད་མི་ནུས་ཏེ། ཁྱོད་བུམ་པ་མཚོན་བྱར་སྒྲུབ་པའི་མཐུན་ཕྱོགས་ཡིན་པའི་ཕྱིར། དེར་ཐལ། ཁྱོད་མཚོན་བྱ་ཡིན་པའི་ཕྱིར། དེར་ཐལ། རྟགས་རིགས་ལས། དེས་ན་མཚོན་བྱ་མ་ཡིན་པ་བུམ་པ་མཚོན་བྱར་སྒྲུབ་པའི་མཐུན་ཕྱོགས་ཡིན་ལ། དེ་དང་རིགས་འདྲ་བ་གཞན་ལ་ཡང་ཤེས་པར་བྱའོ། །ཞེས་གསུངས་པའི་ཕྱིར་ན་དཔྱད། ༈ འགལ་རྟགས་ཀྱི་སྦྱོར་བ་ཡིན་ན་སྦྱོར་བ་དེའི་རྟགས་དེ་ལ་མཐུན་ཕྱོགས་དེ་གཏན་ནས་མེད་པ་ཞིག་དགོས་པར་ཐལ། འདོད་ན། མཉན་བྱ་ཆོས་ཅན། མཚོན་བྱ་ཡིན་ཏེ། རྫས་ཡོད་ཆོས་གསུམ་ཚང་བ་ཡིན་པའི་ཕྱིར། ཞེས་པའི་སྦྱོར་བ་ཆོས་ཅན། ཁྱོད་ཀྱི་རྟགས་དེ་ལ་མཐུན་ཕྱོགས་དེ་གཏན་ནས་མེད་པར་ཐལ། ཁྱོད་འགལ་རྟགས་ཀྱི་སྦྱོར་བ་ཡིན་པའི་ཕྱིར། འདོད་ན། རྫས་ཡོད་ཆོས་གསུམ་ཚང་བ་ལ་མཚོན་བྱ་གཏན་ནས་མེད་པར་ཐལ། འདོད་མི་ནུས་ཏེ། རྫས་ཡོད་ཆོས་གསུམ་ཚང་བ་ལ་མཚོན་བྱ་ཡོད་པའི་ཕྱིར། མ་གྲུབ་ན། རྫས་ཡོད་ཆོས་གསུམ་ཚང་བ་ཆོས་ཅན། ཁྱོད་ལ་མཚོན་བྱ་ཡོད་པར་ཐལ། ཁྱོད་མཚན་ཉིད་ཡིན་པའི་ཕྱིར། དེར་ཐལ། ཁྱོད་མཚན་ཉིད་ཀྱི་མཚན་ཉིད་ཡིན་པའི་ཕྱིར། འདོད་ན། མཉན་བྱ་ཆོས་ཅན། མཚོན་བྱ་ཡིན་ཏེ། རྫས་ཡོད་ཆོས་གསུམ་ཚང་བ་ཡིན་པའི་ཕྱིར། ཞེས་པའི་སྦྱོར་བ་ཆོས་ཅན། ཁྱོད་ཀྱི་རྟགས་དེ་ལ་མཐུན་ཕྱོགས་དེ་ཡོད་པར་ཐལ། དེ་སྒྲུབ་ཀྱི་རྟགས་རྫས་ཡོད་ཆོས་གསུམ་ཚང་བ་ལ་དེ་སྒྲུབ་ཀྱི་མཐུན་ཕྱོགས་མཚོན་བྱ་ཡོད་པའི་ཕྱིར། འདོད་ན། མཉན་བྱ་ཆོས་ཅན། མཚོན་བྱ་ཡིན་ཏེ། རྫས་ཡོད་ཆོས་གསུམ་ཚང་བ་ཡིན་པའི་ཕྱིར། ཞེས་པའི་སྦྱོར་བ་ཆོས་ཅན། ཁྱོད་ཀྱི་རྟགས་དེ་ལ་མཐུན་ཕྱོགས་དེ་གཏན་ནས་མེད་པར་ཐལ། ཁྱོད་འགལ་རྟགས་ཀྱི་སྦྱོར་བ་ཡིན་པའི་ཕྱིར། ཁྱབ་སྟེ། རྟགས་རིགས་ལས། འགལ་རྟགས་ཀྱི་མཐུན་ཕྱོགས་ལྟར་རྟགས་ལ་གཏན་ནས་མེད་པའི་མཐུན་ཕྱོགས་དང༌། ཞེས་གསུངས་པའི་ཕྱིར་ན་མཚན་ཉིད་དེ་ལ་མཚོན་བྱ་ཡོད་ཅེས་པ་དང༌། རྟགས་དེ་ལ་མཐུན་ཕྱོགས་ཡོད་ཅེས་པསོགས་ཅུང་མི་འདྲའམ་དཔྱད། ༈ ཡང་ཤེས་བྱ་དེ་སྒྲ་མི་རྟག་པར་སྒྲུབ་པར་བྱེད་པའི་མི་མཐུན་ཕྱོགས་ཡིན་པར་ཐལ། འདོད་ན། བྱས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ཁོ་ན་ལ་ཡོད་པ་མ་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་མི་མཐུན་ཕྱོགས་ལ་ཡོད་པའི་ཕྱིར། མ་གྲུབ་ན། བྱས་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་མི་མཐུན་ཕྱོགས་ལ་ཡོད་པར་ཐལ། ཁྱོད་སྒྲ་མི་རྟག་པར་སྒྲུབ་པའི་མི་མཐུན་ཕྱོགས་གང་ཡང་རུང་བ་ཞིག་ལ་ཡོད་པའི་ཕྱིར། དེར་ཐལ། ཁྱོད་ཤེས་བྱ་ལ་ཡོད་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཤེས་བྱ་དེ་སྒྲ་མི་རྟག་པར་སྒྲུབ་པར་བྱེད་པའི་མི་མཐུན་ཕྱོགས་ཡིན་པའི་ཕྱིར། ཁྱབ་སྟེ། ཁྱོད་སྒྲ་མི་རྟག་པར་སྒྲུབ་པར་བྱེད་པའི་མི་མཐུན་ཕྱོགས་ཡིན་ཞིང༌། ཁྱོད་ལ་ཡོད་པས་སྒྲ་མི་རྟག་པར་སྒྲུབ་པར་བྱེད་པའི་མི་མཐུན་ཕྱོགས་ལ་ཡོད་པར་འཇོག་དགོས་པའི་ཕྱིར། དེར་ཐལ། དེ་སྒྲུབ་ཀྱི་མི་མཐུན་ཕྱོགས་ལ་ཡོད་ན་དེ་སྒྲུབ་ཀྱི་མི་མཐུན་ཕྱོགས་མཐའ་དག་ལ་ཡོད་མི་དགོས་པའི་ཕྱིར། མ་གྲུབ་ན། མི་རྟག་པ་ཆོས་ཅན། ཁྱོད་དུང་སྒྲ་རྩོལ་བྱུང་དུ་སྒྲུབ་པའི་མི་མཐུན་ཕྱོགས་ལ་མེད་པར་ཐལ། ཁྱོད་དུང་སྒྲ་རྩོལ་བྱུང་དུ་སྒྲུབ་པའི་མི་མཐུན་ཕྱོགས་མཐའ་དག་ལ་མེད་པའི་ཕྱིར། དེར་ཐལ། རྩོལ་བྱུང་མ་ཡིན་པའི་ཕྱོགས་གཅིག་ཆུ་སྒྲ་སོགས་ལ་ཡོད་ཀྱང༌། རྩོལ་བྱུང་མ་ཡིན་པའི་ཕྱོགས་གཅིག་ནམ་མཁའ་སོགས་ལ་མེད་པའི་ཕྱིར། དེར་ཐལ། མི་རྟག་པ་དུང་སྒྲ་རྩོལ་བྱུང་དུ་སྒྲུབ་པའི་མཐུན་ཕྱོགས་མི་མཐུན་ཕྱོགས་གཉིས་ཀ་ལ་ཆ་གཉིས་སུ་འཇུག་པའི་རྟགས་ཡིན་པར་གསུངས་པའི་ཕྱིར། དེར་ཐལ། ཚད་མ་མདོ་ལས། ཕྱོགས་ཆོས་མཐུན་ཕྱོགས་ཡོད་མེད་དང༌། །རྣམ་གཉིས་རེ་རེ་དག་ལ་ཡང༌། །རྣམ་གསུམ་མི་མཐུན་ཕྱོགས་ལ་ཡང༌། །ཡོད་མེད་རྣམ་པ་གཉིས་ཕྱིར་རོ། །ཞེས་དང༌། རྟགས་རིགས་ལས། གསུམ་པ་མཐུན་ཕྱོགས་མི་མཐུན་ཕྱོགས་གཉིས་ཀ་ལ་ཆ་གཉིས་སུ་འཇུག་པ་ནི། དཔེར་ན་དུང་སྒྲ་རྩོལ་བ་ལསབྱུང་བར་སྒྲུབ་པར་བྱེད་པ་ལ་མི་རྟག་པ་ལྟ་བུའོ། །ཞེས་གསུངས་པའི་ཕྱིར་རོ། །༈ ཡང་ཆུ་ཀླུང་ཆོས་ཅན། མེས་གཞི་འགར་གྲང་རེག་འགོག་པར་སྒྲུབ་པའི་མེད་པའི་མི་མཐུན་ཕྱོགས་ཡིན་པར་ཐལ། འདོད་ན། ཆུ་ཀླུང་ཆོས་ཅན། ཁྱོད་མེད་པར་ཐལ། ཁྱོད་སྦྱོར་བ་གང་ཡང་རུང་བའི་མེད་པའི་མི་མཐུན་ཕྱོགས་ཡིན་པའི་ཕྱིར། ཁྱབ་སྟེ། སྦྱོར་བ་དེ་སྒྲུབ་ཀྱི་མེད་པའི་མི་མཐུན་ཕྱོགས་ཡིན་པ་ལ་མེད་པ་ཡང་ཡིན་དེ་སྒྲུབ་ཀྱི་མི་མཐུན་ཕྱོགས་ཀྱང་ཡིན་དགོས་པའི་ཕྱིར། དེར་ཐལ། སྒྲ་མི་རྟག་སྒྲུབ་ཀྱི་མེད་པ་མི་མཐུན་ཕྱོགས་ཡིན་པ་ལ་སྒྲ་མི་རྟག་པར་སྒྲུབ་པའི་མི་མཐུནཕྱོགས་ཀྱང་ཡིན། མེད་པ་ཡང་ཡིན་དགོས་པའི་ཕྱིར། དེར་ཐལ། རྟགས་རིགས་ལས། སྒྲ་མི་རྟག་སྒྲུབ་ཀྱི་མེད་པ་མི་མཐུན་ཕྱོགས་ཡིན་པར་ཐལ། སྒྲ་མི་རྟག་སྒྲུབ་ཀྱི་མི་མཐུན་ཕྱོགས་གང་ཞིག མེད་པ་ཡིན་པའི་ཕྱིར། ཞེས་གསུངས་པའི་ཕྱིར། ཁྱབ་སྟེ། དེའི་སྐབས་སུ་སྒྲ་མི་རྟག་པར་སྒྲུབ་པའི་མེད་པ་མི་མཐུན་ཕྱོགས་ཀྱི་དོན་བསྟན་པ་ཡིན་པའི་ཕྱིར། འདོད་ན། དེ་སྒྲུབ་ཀྱི་མེད་པ་མི་མཐུན་ཕྱོགས་ཡིན་ན་མེད་པས་ཁྱབ་པར་ཐལ། འདོད་ན། ཆུ་ཀླུང་ཆོས་ཅན། མེད་པ་ཡིན་པར་ཐལ། མེས་གཞི་འགར་གྲང་རེག་འགོག་པར་སྒྲུབ་པའི་མེད་པའི་མི་མཐུན་ཕྱོགས་ཡིན་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། མེས་གཞི་འགར་གྲང་རེག་འགོག་པ་ན་ཆུ་ཀླུང་ལྟ་བུ་མེད་པའི་མི་མཐུན་ཕྱོགས། ཞེས་གསུངས་པའི་ཕྱིར་ན་དེ་སྒྲུབ་ཀྱི་མེད་པའི་མི་མཐུན་ཕྱོགས་ཞེས་པ་དང༌། དེསྒྲུབ་ཀྱི་མེད་པ་མི་མཐུན་ཕྱོགས་ཞེས་པ་ལ་ཅུང་མི་འདྲ་བའི་ཁྱད་ཡོད་དམ་དཔྱད། ༈ ཡང་ཆུ་ཀླུང་ཆོས་ཅན། མེས་གཞི་འགར་གྲང་རེག་འགོག་པར་སྒྲུབ་པའི་མེད་པའི་མི་མཐུན་ཕྱོགས་ཡིན་པར་ཐལ། འདོད་ན། ཆུ་ཀླུང་ཆོས་ཅན། མེས་གཞི་འགར་གྲང་རེག་འགོག་པར་སྒྲུབ་པའི་མི་མཐུན་ཕྱོགས་ཡིན་པར་ཐལ། མེས་གཞི་འགར་གྲང་རེག་འགོག་པར་སྒྲུབ་པའི་མེད་པའི་མི་མཐུན་ཕྱོགས་ཡིན་པའི་ཕྱིར། འདོད་ན། ཆུ་ཀླུང་ཆོས་ཅན། མེས་གཞི་འགར་གྲང་རེག་འགོག་པར་སྒྲུབ་པའི་མི་མཐུན་ཕྱོགས་མ་ཡིན་པར་ཐལ། མེས་གཞི་འགར་གྲང་རེག་འགོག་པར་སྒྲུབ་པའི་མཐུན་ཕྱོགས་ཡིན་པའི་ཕྱིར། དེར་ཐལ། གང་ཟག་གང་རུང་བའི་ངོར་ཆུ་ཀླུང་དེ་མེས་གཞི་འགར་གྲང་རེག་འགོག་པར་སྒྲུབ་པའི་མཐུན་ཕྱོགས་ཡིན་པའི་ཕྱིར། དེར་ཐལ། ཆུ་ཀླུང་ཐུར་དུ་འབབ་པ་དེ་ཡང་མེ་འབར་བའི་རང་བཞིན་དུ་སྣང་བའི་ཚད་མ་རྒྱུད་ལྡན་གྱི་གང་ཟག་ཡོད་པའི་ཕྱིར། དེར་ཐལ། ཚ་དམྱལ་བའི་གང་ཟག་ལ་ཆུ་ཀླུང་དེ་མེའི་རང་བཞིན་དུ་སྣང་བའི་ཕྱིར། དེར་ཐལ། ཐེག་བསྡུས་ལས། ཡི་དྭགས་དུད་འགྲོ་མི་རྣམས་དང༌། །ལྷ་རྣམས་ཇི་ལྟར་རིགས་རིགས་སུ། །དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པར་འདོད་པ་ཡིན། །ཞེས་གསུངས་པའི་ཕྱིར། ཁྱབ་སྟེ། ཐེག་མཆོག་དབུ་མའི་ཟིན་བྲིས་ལས། སྣང་གཞིའི་དངོས་པོ་གཅིག་ལ་ཡང་སྣང་མཁན་གྱི་ཡིད་ཐ་དད་པའི་དབང་གིས་དངོས་པོ་མི་འདྲ་བ་སྣ་ཚོགས་པ་གསལ་སྣང་དུ་ཤར་བ་ཙམ་མ་ཡིན་པར་དེ་དང་དེའི་དོན་བྱེད་ནུས་པར་སྣང་བའི་ཕྱིར། ཕྱི་རོལ་གྱི་དོན་མ་གྲུབ་པར་འདོད་པ་ཡིནནོ། །ཞེས་གསུངས་པའི་ཕྱིར། ༈ སྒྲ་རྟག་པར་སྒྲུབ་པའི་མཐུན་ཕྱོགས་ཡིན་ལ་མཐུན་ཕྱོགས་ཀྱི་སྒྲ་བཤད་དུ་མེད་པ་ལ་ནམ་མཁའ་འཇོག་དགོས་པའི་ཕྱིར། དེར་ཐལ། ནམ་མཁའ་རྟག་པ་ཡིན་པས་སྒྲ་རྟག་པར་སྒྲུབ་པའི་མཐུན་ཕྱོགས་ཡིན་ཡང༌། ནམ་མཁའ་དང་སྒྲ་གཉིས་རྟག་པར་ཆོས་མི་མཐུན་པས་སྒྲ་རྟག་པར་སྒྲུབ་པའི་མཐུན་ཕྱོགས་ཀྱི་སྒྲ་བཤད་དུ་མེད་པའི་མུ་ཡིན་པའི་ཕྱིར། འདོད་ན། ནམ་མཁའ་དང་སྒྲ་གཉིས་ཆོས་ཅན། རྟག་པར་ཆོས་མི་མཐུན་པར་ཐལ། འདོད་མི་ནུས་ཏེ། ནམ་མཁའ་དང་སྒྲ་གཉིས་རྟག་པར་ཆོས་མཐུན་པའི་ཕྱིར། དེར་ཐལ། ནམ་མཁའ་དང་སྒྲ་གཉིས་རྟག་པ་ཡིན་པའི་ཕྱིར། མ་གྲུབ་ན། ནམ་མཁའ་དང་སྒྲ་གཉིས་ཆོས་ཅན། དངོས་པོ་ཡིན་པར་ཐལ། ཡོད་པ་གང་ཞིག རྟག་པ་མ་ཡིན་པའི་ཕྱིར། རྟགས་ཕྱི་མ་ཁས། འདོད་མི་ནུས་ཏེ། རྟག་དངོས་གཉིས་དངོས་པོ་མིན་པ་བཞིན་དུ་ནམ་མཁའ་དང་སྒྲ་གཉིས་ཀྱང་དངོས་པོ་ཡིན་པ་ཁས་ལེན་མི་བཏུབ་པའི་ཕྱིར། འདོད་ན། ནམ་མཁའ་དང་སྒྲ་གཉིས་ཆོས་ཅན། རྟག་པ་ཡིན་པར་ཐལ། ཡོད་པ་གང་ཞིག དངོས་པོ་མ་ཡིན་པའི་ཕྱིར། འདོད་ན། ནམ་མཁའ་དང་སྒྲ་གཉིས་ཆོས་ཅན། ཁྱོད་རྟག་པར་ཆོས་མཐུན་པར་ཐལ། ཁྱོད་རྟག་པ་ཡིན་པའི་ཕྱིར། འདོད་ན། ནམ་མཁའ་ཆོས་ཅན། ཁྱོད་དང་སྒྲ་གཉིས་རྟག་པར་ཆོས་མི་མཐུན་པར་ཐལ། ཁྱོད་རྟག་པ་གང་ཞིག སྒྲ་མི་རྟག་པ་ཡིན་པའི་ཕྱིར། ཁྱབ་སྟེ། རྟགས་རིགས་ལས། ཁྱོད་དང་སྒྲ་གཉིས་རྟག་པར་ཆོས་མི་མཐུན་པའི་ཕྱིར་ཏེ། ཁྱོད་རྟག་པ་གང་ཞིག སྒྲ་མི་རྟག་པ་ཡིན་པའི་ཕྱིར། ཞེས་གསུངས་པའི་ཕྱིར། ༈ མི་མཐུན་ཕྱོགས་མེད་པར་ཐལ། འདོད་ན། མི་མཐུན་དཔེ་མེད་པར་ཐལ། མི་མཐུན་ཕྱོགས་མེད་པའི་རྒྱུ་མཚན་ཡོད་པའི་ཕྱིར། འདོད་ན། ཆོས་མི་མཐུན་སྦྱོར་གྱི་སྒྲུབ་ངག་ཡང་དག་མེད་པར་ཐལ། མི་མཐུན་དཔེ་མེད་པའི་ཕྱིར། ཁྱབ་སྟེ། ཆོས་མི་མཐུན་སྦྱོར་གྱི་སྒྲུབ་ངག་ཡང་དག་ཡོད་པ་ལ་མི་མཐུན་དཔེ་ཡོད་དགོས་པའི་ཕྱིར། དེར་ཐལ། ཆོས་མི་མཐུན་སྦྱོར་གྱི་སྒྲུབ་ངག་ཡང་དག་ཡིན་པ་ལ་མི་མཐུན་ཕྱོགས་ལ་རྟགས་དེ་མེད་པར་སྟོན་པ་ཞིག་དགོས་པའི་ཕྱིར། དེར་ཐལ། ཚད་མ་རིགས་སྒོ་ལས། ཆོས་མི་མཐུན་པ་ཡང་གང་ལ་བསྒྲུབ་པར་བྱ་བ་མེད་པ་རྟགས་མེད་པ་ཉིད་དུ་སྟོན་པ་སྟེ། ཞེས་གསུངས་པའི་ཕྱིར། འདོད་ན། མི་མཐུན་ཕྱོགས་ཡོད་པར་ཐལ། ཆོས་མི་མཐུན་སྦྱོར་གྱི་སྒྲུབ་ངག་ཡང་དག་ཡོད་པའི་ཕྱིར། འདོད་མི་ནུས་ཏེ། གཞི་གྲུབ་ན་མཐུན་ཕྱོགས་ཡིན་པས་ཁྱབ་པའི་ཕྱིར། དེར་ཐལ། གཞི་གྲུབ་ན་སྦྱོར་སྐོར་གང་ཡང་རུང་བའི་མཐུན་ཕྱོགས་ཡིན་པས་ཁྱབ་པའི་ཕྱིར། དེར་ཐལ། གཞི་གྲུབ་ན་སྒྲ་བདག་མེད་དུ་སྒྲུབ་པའི་སྦྱོར་བའི་དེའི་མཐུན་ཕྱོགས་ཡིན་པས་ཁྱབ་པའི་ཕྱིར་རོ། །ཡང་ན་རྟགས་རིགས་ལས། མཐུན་ཕྱོགས་མི་མཐུན་ཕྱོགས་དང་དངོས་འགལ་ཡིན་ཀྱང༌། མི་མཐུན་ཕྱོགས་མཐུན་ཕྱོགས་དང་དངོས་འགལ་མ་ཡིན་ཏེ། མིམཐུན་ཕྱོགས་མེད་པའི་ཕྱིར། ཞེས་གསུངས་པའི་ཕྱིར། ༈ ཡང་མི་མཐུན་ཕྱོགས་མེད་ཀྱང་སྒྲ་མི་རྟག་སྒྲུབ་ལྟ་བུའི་སྦྱོར་བ་དེ་སྒྲུབ་ཀྱི་མི་མཐུན་ཕྱོགས་ཡོད་པར་ཐལ། རྟགས་རིགས་ལས། དེས་ན་གཞུང་རྣམས་སུ་མི་མཐུན་ཕྱོགས་ཀྱི་མཚན་ཉིད་སོགས་གསུངས་པ་སྒྲ་མི་རྟག་སྒྲུབ་ལྟ་བུའི་གཞི་ལ་སྦྱར་དགོས་སོ། །ཞེས་གསུངས་པའི་ཕྱིར། འདོད་ན། སྒྲ་མི་རྟག་སྒྲུབ་ལྟ་བུའི་སྦྱོར་བའི་མི་མཐུན་ཕྱོགས་མེད་པར་ཐལ། ཡོད་མེད་གང་རུང་ཡིན་ན་སྒྲ་མི་རྟག་སྒྲུབ་ལྟ་བུའི་སྦྱོར་བའི་མཐུན་ཕྱོགས་ཡིན་པས་ཁྱབ་པའི་ཕྱིར། དེར་ཐལ། སྒྲ་མི་རྟག་སྒྲུབ་ལྟ་བུའི་སྦྱོར་བའི་མཐུན་ཕྱོགས་ཡིན་པ་ལ་སྒྲ་མི་རྟག་སྒྲུབ་ཀྱི་མཐུན་ཕྱོགས་ཡིན་མི་དགོས་པའི་ཕྱིར། དེར་ཐལ། ལྟ་བུའི་སྒྲ་སྦྱར་བའི་རྒྱུ་མཚན་ཡོད་པའི་ཕྱིར། འདོད་ན། སྒྲ་བདག་མེད་དུ་སྒྲུབ་པའི་མཐུན་ཕྱོགས་ཡིན་ན་སྒྲ་མི་རྟག་སྒྲུབ་ལྟ་བུའི་མཐུན་ཕྱོགས་ཡིན་དགོས་པར་ཐལ། འདོད་པའི་ཕྱིར། འདོད་ན། ཡོད་མེད་གང་རུང་ཡིན་ན་སྒྲ་མི་རྟག་སྒྲུབ་ལྟ་བུའི་མཐུན་ཕྱོགས་ཡིན་པས་ཁྱབ་པར་ཐལ། སྒྲ་བདག་མེད་དུ་སྒྲུབ་པའི་མཐུན་ཕྱོགས་ཡིན་ན་སྒྲ་མི་རྟག་སྒྲུབ་ལྟ་བུའི་མཐུན་ཕྱོགས་ཡིན་དགོས་པ་གང་ཞིག ཡོད་མེད་གང་རུང་ཡིན་སྒྲ་བདག་མེད་དུ་སྒྲུབ་པའི་མཐུན་ཕྱོགས་ཡིན་པས་ཁྱབ་པའི་ཕྱིར། འདོད་ན། སྒྲ་མི་རྟག་སྒྲུབ་ལྟ་བུའི་མི་མཐུན་ཕྱོགས་མེད་པར་ཐལ། ཡོད་མེད་གང་རུང་ཡིན་ན་སྒྲ་མི་རྟག་སྒྲུབ་ལྟ་བུའི་མཐུན་ཕྱོགས་ཡིན་པས་ཁྱབ་པའི་ཕྱིར། ཁྱབ་སྟེ། མི་མཐུན་ཕྱོགས་མེད་པའི་རྒྱུ་མཚན་དེ་ཡོད་མེད་གང་རུང་ཡིན་ན་མཐུན་ཕྱོགས་ཡིན་པས་ཁྱབ་པའི་རྒྱུ་མཚན་གྱིས་ཡིན་པའི་ཕྱིར། འདོད་མི་ནུས་ཏེ། རྟགས་རིགས་ལས། དེས་ན་གཞུང་རྣམས་སུ་མི་མཐུན་ཕྱོགས་ཀྱི་མཚན་ཉིད་སོགས་གསུངས་པ་སྒྲ་མི་རྟག་སྒྲུབ་ལྟ་བུའི་གཞི་ལ་སྦྱར་དགོས་སོ། །ཞེས་གསུངས་པའི་ཕྱིར་ན་དཔྱད་པར་བྱའོ། །༈ ཕྱོགས་སྒྲ་འཇུག་ཡུལ་ལ་དངོས་བཏགས་ཅི་རིགས་ཀྱི་སྒོ་ནས་གསུམ་ཡོད་པར་གསུངས་པ་ལས་ཕྱོགས་ཆོས་ཀྱི་ལྟོས་ཡུལ་ཤེས་འདོད་ཆོས་ཅན་ལ་ཕྱོགས་སྒྲ་བཏགས་མིང་དུ་འཇུག་པ་གསུངས་པ་ཡིན་པར་ཐལ། འདོད་ན། ཕྱོགས་ཆོས་ཀྱི་ལྟོས་ཡུལ་ཤེས་འདོད་ཆོས་ཅན་ཆོས་ཅན། ཁྱོད་ཕྱོགས་བཏགས་པ་བ་ཡིན་པར་ཐལ། ཁྱོད་ཕྱོགས་སྒྲ་བཏགས་མིང་དུ་འཇུག་པའི་གཞི་ཡིན་པའི་ཕྱིར། འདོད་ན། ཕྱོགས་ཆོས་ཀྱི་ལྟོས་ཡུལ་ཤེས་འདོད་ཆོས་ཅན་ཆོས་ཅན། ཁྱོད་དང་ཕྱོགས་གཉིས་ཀྱི་གཞི་མཐུན་མེད་པར་ཐལ། ཁྱོད་ཕྱོགས་བཏགས་པ་བ་ཡིན་པའི་ཕྱིར། ཁྱབ་སྟེ། ཁྱོད་ཆོས་དེ་བཏགས་པ་བ་ཡིན་ན་ཁྱོད་དང་ཆོས་དེ་གཉིས་ཀའི་གཞི་མཐུན་མི་སྲིད་དགོས་པའི་ཕྱིར། དེར་ཐལ། ཚད་མ་མདོ་ལས། བཏགས་པའི་ཕྱིར་ན་མི་སྲིད་ཕྱིར། །འབངས་ལ་རྒྱལ་བོ་བཏགས་པ་བཞིན། །ཞེས་གསུངས་པའི་ཕྱིར། འདོད་ན། ཕྱོགས་ཆོས་ཀྱི་ལྟོས་ཡུལ་ཤེས་འདོད་ཆོས་ཅན་ཆོས་ཅན། ཁྱོད་དང་ཕྱོགས་གཉིས་ཀྱི་གཞི་མཐུན་མེད་པར་ཐལ། ཁྱོད་ཕྱོགས་བཏགས་པ་བ་ཡིན་པའི་ཕྱིར། ཁྱབ་པ་ཁས། དེར་ཐལ། ཚད་མ་མདོ་ལས། བསྡུས་པ་བསྒྲུབ་བྱ་ཡིན་པའི་ཕྱིར། །ཆོས་དང་ཆོས་ཅན་ཁ་ཡར་བ། །དངོས་སུ་མིན་ཡང་དེའི་ཕྱོགས་གཅིག །ཡིན་ཕྱིར་བསྒྲུབ་བྱར་བཏགས་ནས་བརྗོད། །ཅེས་གསུངས་པའི་ཕྱིར། འདོད་ན། ཕྱོགས་ཆོས་ཀྱི་ལྟོས་ཡུལ་ཤེས་འདོད་ཆོས་ཅན་དང་ཕྱོགས་གཉིས་ཀྱི་གཞི་མཐུན་མེད་པར་ཐལ། འདོད་མི་ནུས་ཏེ། སྒྲ་མི་རྟག་པ་དེ་དེ་ཡིན་པའི་ཕྱིར། མ་གྲུབ་ན། སྒྲ་མི་རྟག་པ་ཆོས་ཅན། ཕྱོགས་ཆོས་ཀྱི་ལྟོས་ཡུལ་ཤེས་འདོད་ཆོས་ཅན་དང་ཕྱོགས་གཉིས་ཀ་ཡིན་པར་ཐལ། ཕྱོགས་ཆོས་ཀྱི་ལྟོས་ཡུལ་ཤེས་འདོད་ཆོས་ཅན་ཡིན་པ་གང་ཞིག ཕྱོགས་ཡིན་པའི་ཕྱིར། དང་པོ་དེར་ཐལ། ཁྱོད་ཤེས་འདོད་ཆོས་ཅན་དུ་བཟུང་བའི་སྦྱོར་བ་དེ་སྒྲུབ་ཀྱི་ཤེས་འདོད་ཆོས་ཅན་ཡིན་པའི་ཕྱིར། གཉིས་པ་དེར་ཐལ། ཁྱོད་བསྒྲུབ་བྱ་ཡིན་པའི་ཕྱིར། དེར་ཐལ། ཁྱོད་ཆོས་དང་ཆོས་ཅན་གྱི་ཚོགས་དོན་ཡིན་པའི་ཕྱིར། ༈ ཡང་ཕྱོགས་སྒྲ་དངོས་སུ་འཇུག་པའི་ཡུལ་ཡིན་ན་ཆོས་དང་ཆོས་ཅན་གྱི་ཚོགས་དོན་ཡིན་པས་ཁྱབ་པར་ཐལ། འདོད་ན། ཕྱོགས་ཆོས་ཅན། ཆོས་དང་ཆོས་ཅན་གྱི་ཚོགས་དོན་ཡིན་པར་ཐལ། ཕྱོགས་སྒྲ་དངོས་སུ་འཇུག་པའི་ཡུལ་ཡིན་པའི་ཕྱིར། མ་གྲུབ་ན། ཕྱོགས་ཆོས་ཅན། ཁྱོད་ཕྱོགས་སྒྲ་དངོས་སུ་འཇུག་པའི་ཡུལ་ཡིན་པར་ཐལ། ཁྱོད་ཕྱོགས་ཞེས་བརྗོད་པའི་སྒྲ་དངོས་མིང་དུ་འཇུག་པའི་འཇུག་གཞི་ཡིན་པའི་ཕྱིར། མ་གྲུབ་ན། ཕྱོགས་ཆོས་ཅན། ཁྱོད་ཁྱོད་ཅེས་བརྗོད་པའི་སྒྲ་དངོས་མིང་དུ་འཇུག་པའི་འཇུག་གཞི་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། ཁྱབ་སྟེ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། ཁྱོད་ཁྱོད་ཅེས་བརྗོད་པའི་སྒྲ་དངོས་མིང་དུ་འཇུག་པའི་གཞི་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། ཞེས་གསུངས་པའི་ཕྱིར་ན་རྒྱས་པར་ཕྱོགས་སྒྲའི་དོགས་དཔྱོད་ཅིག་ལོགས་སུ་སྤྲོའོ། །