རྟ་ཕག་གིས་རཱུ་ཏྲ་བཏུལ་བའི་ལེའུ།
དེ་ནས་རཱུ་ཏྲ་བཏུལ་ཚུལ་བཤད་པ་ནིཿ གཙང་མའི་གནས་མཆོག་འོག་མིན་ཆོས་དབྱིངས་ནསཿ སྟོན་མཆོག་དམ་པ་ལྷ་མིས་མཆོད་འོས་པཿ ཆོས་སྐུ་ཀུན་ཏུ་བཟང་པོ་འཁོར་དང་བཅསཿ ཐུགས་རྗེའི་སྤྲུལ་པ་སྟུག་པོ་བཀོད་པ་ནསཿ ལོངས་སྐུ་རྡོ་རྗེ་འཆང་ཆེན་འཁོར་བཅས་དང་ཿ ལྕང་ལོ་ཅན་གྱི་ཕོ་བྲང་དམ་པ་ནསཿ སྤྲུལ་སྐུ་ཕྱག་ན་རྡོ་རྗེ་འཁོར་བཅས་དང་ཿ བཀོད་པ་ལྷུན་གྱིས་གྲུབ་པའི་གཞལ་ཡས་ནསཿ
༼༢༡བ༽སྐུ་གསུམ་དབྱེར་མེད་ཀུན་ཏུ་འཆང་ཆེན་དང་ཿ འཇིག་རྟེན་མངོན་པར་དགའ་བའི་ཞིང་ཁམས་ནསཿ སངས་རྒྱས་རྡོ་རྗེ་སེམས་དཔའ་འཁོར་བཅས་དང་ཿ འཇིག་རྟེན་དཔལ་དང་ལྡན་པའི་ཞིང་ཁམས་ནསཿ སངས་རྒྱས་རིན་ཆེན་འབྱུང་གནས་འཁོར་བཅས་དང་ཿ འཇིག་རྟེན་བདེ་བ་ཅན་གྱི་ཞིང་ཁམས་ནསཿ སངས་རྒྱས་སྣང་བ་མཐའ་ཡས་འཁོར་བཅས་དང་ཿ འཇིག་རྟེན་བྱང་ཆུབ་བརྒྱན་པའི་ཞིང་ཁམས་ནསཿ སངས་རྒྱས་རྣམ་པར་སྣང་མཛད་འཁོར་བཅས་དང་ཿ འཇིག་རྟེན་རྣམ་པར་དག་པའི་ཞིང་ཁམས་ནསཿ སངས་རྒྱས་དོན་ཡོད་གྲུབ་པ་འཁོར་བཅས་དང་ཿ གཞན་ཡང་བདེ་གཤེགས་དཔག་མེད་བརྗོད་མེད་པཿ ལོངས་སྤྱོད་རྫོགས་སྐུ་ཉི་མའི་དཀྱིལ་འཁོར་ལྟརཿ རིག་འཛིན་བཅས་པ་བཀའ་ཡི་འགྲོ་བ་མཛདཿ སངས་རྒྱས་མཐུ་ཡིས་རཱུ་ཏྲ་མ་བཏུལ་ནཿ སངས་རྒྱས་བསྟན་པ་མི་འཕེལ་ངན་འགྲོར་ལྟུང་ཿ ཀུན་ཏུ་ལོག་པར་སྤྱད་པའི་ལུས་ལ་ནིཿ གཤེད་མས་མཚོན་ཆ་རྣམས་ཀྱིས་གདབས་པར་རུང་ཿ སྔོན་ཆད་བྱས་པ་གང་ཡིན་མ་སྨིན་ནཿ བདེན་པ་རབ་སྟོན་རྒྱལ་བ་བརྫུན་མར་གྱུརཿ འཇིགས་པར་འགྱུར་བ་མ་ཡིན་ནོན་པར་གྱིསཿ ཞེས་གསུངས་བཀའ་བགྲོས་ཡོངས་སུ་འཆམས་པར་གྱུརཿ གང་གིས་འདུལ་བའི་ལས་འཕྲོ་སྐབས་སུ་བབཿ བདེ་
༼༢༢ན༽གཤེགས་རྣམས་ཀྱིས་ཡེ་ཤེས་སྤྱན་གྱིས་གཟིགསཿ ཐུབ་དཀའ་གཞོན་ནུ་དན་ཕག་གདུལ་བྱར་མཁྱེནཿ བདེ་བར་གཤེགས་པས་དབང་བསྐུར་རབ་ཏུ་གནསཿ ཐུབ་དཀའ་རྡོ་རྗེ་སེམས་དཔར་སངས་རྒྱས་ནསཿ ད་ན་ཕག་ལག་ན་རྡོ་རྗེར་གནས་གྱུར་ཏེཿ བདེ་བར་གཤེགས་པ་ཀུན་གྱིས་བཀའ་བསྒོས་པཿ སྤྱན་རས་གཟིགས་དབང་སྒྲོལ་མར་མཚན་རྟགས་གཟུང་ཿ རྟ་གདོང་ཕག་གདོང་ཞལ་གྱིས་ནོན་པར་གྱིསཿ ལེགས་པར་གསུངས་པའི་བཀའ་འགྲོས་དུས་ལ་བབཿ ཟབ་པ་ཆགས་བྲལ་བདུད་རྩི་འདུས་མ་བྱསཿ གསུངས་ནས་རྟ་ཕག་མ་ལ་ཡ་རྩེར་བྱོནཿ ལུས་ཀྱིས་འབར་བ་ཆེན་པོའི་གར་དགུ་བསྒྱུརཿ རྟ་སྐད་ཐེངས་གསུམ་ཕག་སྐད་ལྔ་བཏོན་པསཿ རཱུ་ཏྲ་ཐར་པ་ནག་པོས་ལན་བཏབ་པཿ རྟ་ཕག་མགྲེན་བུ་ཆུང་ཁྱོད་ཇི་སྐད་ཟེརཿ འཇིག་རྟེན་ལྷ་དང་ལྷ་མིན་དྲེགས་པའི་ཚོགསཿ ཀུན་གྱིས་ང་ཡི་ཡོན་ཏན་བརྗོད་ཅིང་བསྔགསཿ གུས་པའི་སེམས་ཀྱིས་ང་ཡི་ཞལ་ལ་བལྟཿ ང་ནོན་མ་ཡིན་ཁྱོད་རང་བདེ་བར་འདུགཿ སྔོན་དུས་ཟུར་གོས་པས་ཀྱང་ང་མ་ནོནཿ ཞེས་བརྗོད་ལག་པ་བསྒྲེངས་ནས་མགོ་ལ་བཏུདཿ དེ་ནས་རྟ་མགྲིན་ཐར་པའི་འོག་སྒོར་ཞུགསཿ རྟ་མགོ་སྤྱི་གཙུག་རྒྱངས་ཀྱིས་བཏོན་ནས་སུཿ ཁོ་ཡི་རྐང་ལག་ཐམས་
༼༢༢བ༽ཅད་བརྒྱངས་པ་ཡིསཿ ཤིན་ཏུ་བག་དྲོ་རྒྱན་ཆ་ཕྱུག་པ་དང་ཿ རྟ་མགོ་ཚིལ་ཁུས་ཚོས་ནས་ལྗང་གུར་གྱུརཿ ཕག་གདོང་ཆུང་མའི་བྷ་གའི་ནང་ཞུགས་ནསཿ ཕག་མགོ་སྤྱི་བོའི་གཙུག་ཏུ་རྒྱངས་ཀྱིས་ཕྱུང་ཿ ཕག་མགོ་ཚིལ་ཁུས་ཚོས་ནས་ནག་པོར་གྱུརཿ རྟ་ཕག་ཞལ་སྦྱར་སྨེ་བ་བརྩེགས་པ་བསྐྲུནཿ རྟ་སྐད་ཐེངས་དྲུག་ཕག་སྐད་ལྔ་ངུར་བསཿ བདེ་བར་གཤེགས་པ་མི་རོར་བྱ་བཞིན་འཐིབསཿ ཞི་བ་ཁྲོ་བོ་ཞི་མ་ཁྲོ་ལ་སོགསཿ དཔག་ཏུ་མེད་པ་ཐིབས་ཀྱིས་འཐིབས་པར་གྱུརཿ ལུས་ཀུན་བརྒྱངས་པས་ན་ཚ་མ་བཟོད་ནསཿ ཐར་པ་ནག་པོས་འོ་དོད་སྒྲ་འབྱིན་པཿ ཕཱ་མཱཿ ཧུ་ཡུཿ རྟ་ཕག་གཉིས་ཀྱིས་རཱུ་ཏྲ་ཕམཿ སངས་རྒྱས་ཀྱིས་ནི་བདུད་རྣམས་ཕམཿ ཆོས་མ་ཡིན་རྣམས་ཆོས་ཀྱིས་ཕམཿ དགེ་འདུན་གྱིས་ནི་མུ་སྟེགས་ཕམཿ དབང་པོས་ལྷ་མིན་ཕམ་པར་གྱུརཿ ལྷ་མིན་གྱིས་ནི་ཟླ་བ་ཕམཿ ནམ་མཁའ་ལྡིང་གིས་རྒྱ་མཚོ་ཕམཿ མི་ཡིས་ཤིང་རྣམས་ཕམ་པར་གྱུརཿ ཆུས་ནི་མེ་ཡང་ཕམ་པར་གྱུརཿ རླུང་གིས་སྤྲིན་རྣམས་རབ་ཏུ་ཕམཿ རྡོ་རྗེ་ཡིས་ནི་རིན་ཆེན་ཕུགཿ མདོང་གསུམ་རྨི་ལམ་ངན་ནོ་བྱསཿ ཅི་མཛད་མྱུར་དུ་མཛོད་ཅིག་ཅེསཿ འཇིགས་པའི་སྒྲ་ནི་རབ་ཏུ་འབྱིན་པར་བྱེདཿ ཟག་པ་ཚར་ཅིག་རྒྱ་མཚོ་ཀླུ་གནས་ལྷུང་ཿ དཔག་བསམ་ཤིང་རྒྱལ་
༼༢༣ན༽ཙནྡན་སྦྲུལ་སྙིང་སྐྱེསཿ ཤིང་གི་རྩ་བ་ཀླུ་ཡི་ཡུལ་དུ་ཟུགཿ ལོ་འདབ་ལྷ་མ་ཡིན་གྱི་ཡུལ་དུ་འཁྲིགསཿ འབྲས་བུ་ལྷ་ཡི་ཡུལ་དུ་སྨིན་པར་གྱུརཿ མིང་ནི་བདུད་རྩི་ཨ་མྲྀ་ཏ་ཞེས་བྱཿ རྟ་ཕག་རྒྱུ་བདེ་ལམ་བདེ་འབྲས་བུ་བདེཿ བདེ་བ་ཆེན་པོའི་རོལ་རྩེད་མཛད་ནས་སུཿ རཱུ་ཏྲའི་ཆས་ནི་མང་ལ་ཡང་བ་རྣམསཿ དེ་དག་ཡེ་ཤེས་ཆས་སུ་བྱིན་བརླབས་ནསཿ རྟ་ཕག་ཆོས་ཀྱི་དབྱིངས་སུ་གཤེགས་པར་གྱུརཿ དབུ་གསུམ་ཡོད་པའི་རྒྱུ་མཚན་དེ་ལྟར་ཡིནཿ དུར་ཁྲོད་ཆས་བརྒྱད་དཔལ་གྱི་ཆས་བརྒྱད་དང་ཿ ལྷ་ལ་གཤོག་པ་ཡོད་པ་དེ་ལྟར་ཡིནཿ དཔེར་ན་དམག་བརྒྱབ་མི་བསད་ནོར་ཕྲོགས་མཚོནཿ དེ་ནས་ཕྱག་ན་རྡོ་རྗེས་སྤྲུལ་པ་བཀྱེཿ རཱུ་ཏྲས་ཀྱང་ནི་སྤྲུལ་པ་བཀྱེ་བར་གྱུརཿ སྟོབས་ཆེན་མཐུ་བསྐྱེད་རྫུ་འཕྲུལ་བཀྱེ་བའི་ལསཿ མགོ་ནི་གསུམ་གསུམ་དགུ་རུ་སྤྲུལ་པ་ལཿ དེ་ནས་གསང་བདག་ཕྱག་ན་རྡོ་རྗེ་ཡིསཿ སྟོབས་ཆེན་དགུ་ཡི་རྫུ་འཕྲུལ་བཀྱེ་ནས་སུཿ གཟས་པོའི་ནམ་མཁའ་ཐམས་ཅད་ཡོངས་སུ་བཀང་ཿ རཱུ་ཏྲ་ས་བརྒྱད་ནོན་པའི་སེམས་དཔའ་ལཿ རྣམ་པ་མང་པོའི་འདུལ་ཐབས་མཁས་པ་ཡིསཿ ལུས་ལ་བདེ་བར་གཤེགས་པའི་ཕོ་བྲང་བཏབཿ རཱུ་ཏྲས་མ་བཟོད་ཚེ་ངེས་བཏབ་པ་ནིཿ ཕྱོགས་བཅུ་ཀུན་ནས་རྣམ་པ་ང་
༼༢༣བ༽རྒྱུགཿ ཐོད་མཁར་སྒོ་འགྲོམ་གཡས་གཡོན་གྱིཿ བཟའ་ཤིང་ར་བའི་ནགས་ཚར་ནཿ གནོད་སྦྱིན་སྲིན་པོ་འབྱུང་པོའི་ཚོགསཿ བྱེ་བ་སྟོང་ཕྲག་བརྒྱ་མཆིས་པཿ རེམས་ཤིག་མྱུར་བར་ད་ལྟར་རེམཿ འཁོར་གནས་ཡུལ་ཆེན་ཉི་ཤུ་རྩ་བཞི་ཡིཿ རཱུ་ཏྲའི་ཆ་འཛིན་བྱེ་བ་དུང་ཕྱུར་དམགཿ ཅི་བགྱིའི་བཀའ་ཉན་ཕོ་ཉར་བསྔགས་པའི་འཁོརཿ དཔག་ཏུ་མེད་པ་ཕྱོགས་མཚམས་ཐམས་ཅད་ནསཿ བར་སྣང་ས་གཞི་ཀུན་འཁྲིགས་བསྲོ་སྒྲ་སྒྲོགསཿ ཨ་མ་བཙིགས་རུ་ལུ་རུ་ལུའི་སྒྲ་སྒྲོག་ཅིང་ཿ ལག་གི་མཚོན་ཆ་ཐམས་ཅད་དུས་གཅིག་གདེངསཿ སྲས་མཆོག་སྨེ་བ་བརྩེགས་པས་ནད་དབྱེན་བྱསཿ དེ་ནས་རྡོ་རྗེ་འཛིན་པས་ཁྲོ་བོ་བཅུརཿ ཕུར་པ་རེ་བསྐུར་སྒྲོལ་བར་མངའ་གསོལ་ནསཿ རྟ་མགྲིན་རྟ་སྐད་ཐེངས་གསུམ་འདུར་གླུ་ཡིསཿ རཱུ་ཏྲའི་དམག་དཔུང་དུ་འབོད་རབ་ཏུ་དུཿ གནས་པའི་ཡུལ་དང་ལུས་ཀྱི་རྒྱན་ཆ་དང་ཿ རང་རང་སྲོག་སྙིང་ཕྱག་མཚན་ཕྱུང་ནས་ཕུལཿ དེ་ནས་ཐར་པ་ནག་པོ་ཉམ་ཐག་དུལཿ སངས་རྒྱས་སྤྱོད་ཡུལ་ཁྱོད་ལ་ཕྱག་འཚལ་ལོཿ རྣམ་སྨིན་བསྐྱེད་མཛད་ཁྱོད་ལ་ཕྱག་འཚལ་ལོཿ བདག་གི་ལུས་རྣམས་འབྲས་བུར་སྤྱོད་གྱུར་ཅིགཿ སྔ་མ་གང་བྱས་འདི་ལ་སྨིན་གྱིས་ལྟོསཿ ཕྱི་མ་གང་ཡིན་ད་ལྟའི་ལས་ཀྱིས་བྱེདཿ ལས་
༼༢༤ན༽འདི་ལུས་དང་གྲིབ་མ་བཞིན་དུ་འགྲོགསཿ རང་གིས་བྱས་པ་རང་གིས་མྱོང་བ་ཡིནཿ ཡི་ཆད་འགྱོད་ཀྱང་ལས་དབང་བཅོས་སུ་མེདཿ ལས་ཀྱིས་མནར་བའི་སྐྱེ་བོ་བདག་འདྲ་བཿ ལུས་འདི་གདན་དུ་འབུལ་བས་བཞེས་སུ་གསོལཿ དེ་ནས་དབང་ཕྱུག་མ་སོགས་འཁོར་རྣམས་ཀྱིསཿ དབུས་ལ་མཆིས་པའི་སྐལ་བ་མེདཿ དཀྱིལ་འཁོར་མཐའ་ལ་ངེད་རྣམས་ཞོགཿ ཕུད་ལ་འཚལ་བའི་སྐལ་བ་མེདཿ ལྷག་མ་ཞལ་ཆབ་ངེད་ལ་ཞུཿ ད་ནས་
འབངས་ཡིན་དོ་མི 
་སྡོཿ ཅི་བགྱིའི་བཀའ་ཉན་ངེད་ཀྱིས་བསྒྲུབཿ མ་བྱམས་བུ་ལ་འཁྲིལ་བ་ལྟརཿ དམ་ལ་ངེས་པར་ཉེ་བར་བྱཿ ཞེས་པའི་ཁས་བླངས་མནའ་བེར་རོཿ དེ་ནས་གསང་བའི་བདག་པོ་ཡིསཿ ལུས་ངག་ཡིད་གསུམ་བྱིན་བརླབས་ནསཿ དམ་བསྲེས་དམ་ཆུ་བླུད་ནས་ཀྱང་ཿ གནས་གསུམ་དམ་ཚིག་རྡོ་རྗེ་བཞགཿ བཀའ་ལས་མི་འདར་དམ་ཚིག་བསྒྲགསཿ གསང་མཚན་མ་ཧཱ་ཀཱ་ལ་ར་བཏགསཿ རྡོ་རྗེ་ཐེག་པའི་གྲལ་ལ་བཞགཿ མ་འོངས་ཆོས་སྲུངས་གཉེར་བྱང་གཏདཿ དེ་ནས་བཀོད་པ་ལྷུན་གྲུབ་ཏུཿ སངས་རྒྱས་ཐོབ་པར་ལུང་བསྟན་ཏོཿ ཨུ་རྒྱན་གུ་རུ་པདྨ་འབྱུང་གནས་ཀྱི་སྐྱེས་རབས་རྣམ་པར་ཐར་པ་རྒྱས་པར་བཀོད་
༼༢༤བ༽པ་ལསཿ རྟ་ཕག་གིས་རཱུ་ཏྲ་བཏུལ་བའི་ལེའུ་སྟེ་དྲུག་པའོཿ ཿཐ་ཐ་ཉྲ་རྒྱ་རྒྱཿ ཿ