བླ་མ་སྒྲུབ་ཐབས།
རྡོ་རྗེ་སློབ་དཔོན་དཀྱིལ་འཁོར་གཙོ། །སྒྲུབ་ཐབས་གྲུབ་པའི་ཞལ་ལུང་མཆོག །འཕགས་ཡུལ་མཁས་པའི་གསུང་དྲི་མེད། །ཡི་གེའི་ལམ་དུ་མཚོན་པའོ། །
ཨོཾ་སྭཱ་སྟི། བླ་མེད་བླ་མའི་བླ་མ་ལ། །གུས་པར་གུས་པས་གུས་ཕྱག་འཚལ། །དཔལ་ལྡན་དཔལ་སྟེར་དཔལ་སྒྲུབ་ཐབས། །ལེགས་པར་ལེགས་འདྲི་ལེགས་པར་ཉོན། །སྒྲུབ་པའི་སློབ་དཔོན་རྟ་མཆོག་ཞབས། །དེ་ཡི་བསྟན་པའི་མན་ངག་མཆོག །རྡོ་རྗེ་སློབ་དཔོན་བསྒྲུབ་པ་ནི། །ད་ནི་རབ་ཏུ་བཤད་པར་བྱ། །དེ་ལ་གཞུང་དགོད་པར་བྱ་སྟེ། ཨོཾ་ན་མོ་བུདྡྷ་ཡ། དངོས་གྲུབ་སློབ་དཔོན་རྗེས་འབྲང་བར། །རྡོ་རྗེ་འཛིན་པ་ཉིད་གསུངས་ཏེ། །དང་པོ་དཀྱིལ་འཁོར་བྱས་ནས་ནི། ཁ་དོག་སྣ་ཚོགས་མེ་ཏོག་དགོད། །དེར་ནི་བླ་མ་རྡོ་རྗེ་སེམས། །སྤྱན་དྲངས་ནས་ནི་ཕྱག་བྱས་ནས། །རང་མིང་སྔགས་བཟླས་གསོལ་གསུམ་གདབ། །རང་ཉིད་བླ་མ་བརྟན་གནས་ལ། །སྐྱབས་སུ་འགྲོ་བ་རྟག་ཏུ་དྲན། །དེ་ནས་གསང་སྔགས་བཟླས་ནས་ནི། །དེ་ལ་ཨུཏྨ་དྷུམྨ་རྟག །རྣམ་པར་རྟོག་པ་གཅོད་པར་བྱ། །ཁྲུས་བྱས་པདྨའི་ལྟེ་བ་རྣམས། །སྦྱངས་ནས་མཐའ་དག་སྡིག་པ་བཤགས། །དཀྱིལ་འཁོར་
རིམ་གྲོ་ཡོན་འབུལ་དང༌། །བླ་མས་གསུང་ཀུན་འབད་དེ་བྱ། །གསང་སྔགས་ཏིང་འཛིན་ལྷའི་སྦྱོར་བས། །ལས་རྣམས་ཐམས་ཅད་རབ་ཏུ་སྒྲུབ། །དགེ་དང་སྡིག་དང་དངོས་པོ་ཀུན། །དེ་དེའི་མཐུ་ལས་རབ་རྙེད་དེ། །གུས་པས་ཟླ་བ་དྲུག་ན་ནི། །དངོས་གྲུབ་ཐམས་ཅད་རབ་གྲུབ་པའོ། །བླ་མ་དགྱེས་དང་མ་དགྱེས་རབ་འདོད་པའི། །དངོས་གྲུབ་དང་ནི་དམྱལ་བར་རྟོགས་བྱས་ལ། །བློ་བཟང་བདག་ཉིད་དོན་ཀུན་ལེགས་པར་བྱ། །སློབ་དཔོན་དཔའ་བོ་རྡོ་རྗེའི་ཞལ་ལྔའི་རིམ་པ་བླ་མ་སྒྲུབ་ཐབས་རྫོགས་སོ།། །།ཙི་ཏི་བྷུནྟི་རི་ཞལ་ལས་ཆོས་ཀྱི་ཞབས་ཀྱིའོ། །དེ་ལ་རིམ་པ་འདི་ཡིན་ཏེ། ཐོག་མ་མཎྜལ་གྱི་ཆོ་ག་རྒྱས་བསྡུས་གང་ཡང་རུང་བ་སྔོན་དུ་འགྲོ་བས། སྟོང་པའི་ངང་ལས་མདུན་གྱི་མཎྜལ་གྱི་སྟེང་དུ། སྐད་ཅིག་གི་བླ་མ་དུར་ཁྲོད་ལ་དགྱེས་པའི་བདེ་མཆོག །འཁོར་ལོ་ཧེ་རུ་ཀ་ཕྱག་གཉིས་རྡོ་རྗེ་དང་ཐོད་པ་འཛིན་པས། ཡུམ་རྡོ་རྗེ་ཕག་མོ་ལ་འཁྱུད་པ་གཡས་བརྐྱངས་ཀྱི་སྟབས་ཀྱིས་པད་ཉིར་དྲག་པོ་དང་ཨུ་མ་མནན་པ། གྲུ་མོར་ཟུང་
འཇུག་གི་རང་བཞིན་ཁ་ཊྭཱཾ་ག་དཀར་པོ་འཆང་བ། རྒྱན་དང་མཚན་ཉིད་ཐམས་ཅད་ཡོངས་སུ་རྫོགས་པ་ལ་འཁྱུད་པའི་ཕག་མོ་ནི། དམར་མོ་རྡོ་རྗེ་དང་ཐོད་པ་འཛིན་པ་བྱིན་པ་གཉིས་ཀྱིས་འཁྱུད་པ། གཉིས་ཀའང་མེ་དཔུང་འབར་བའི་དབུས་ན་རོལ་པ་དེ་ཉིད་ས་གསུམ་གྱི་རྡོ་རྗེ་ཕོ་ཉ་མོ་རྣམས་དང༌། དཔའ་བོ་ཐམས་ཅད་མཉམ་པར་འདུས་པར་མོས་ལ། གང་གི་དྲིན་ཆེན་ཉིད། །སོགས་ཀྱི་བར།ཨོཾ་བླ་མ་དམ་པའི་ཞབས་ཀྱི་པདྨོ་ཡང་དག་པའི་ཡེ་ཤེས་གསལ་བར་བྱེད་པ་དེ་ཕྱག་འཚལ་ལོ། །ཧཱུྃ། ཨདྡྷྱ་སིདྡྷྱ་མི། ལན་མང་དུ། ཕྱག་བྱ། གུ་རུ་ཤ་ར་གཙྪ་མི། ལན་མང་དུ་བརྗོད། མཆོད་པ་རྒྱས་བསྡུས་ཇི་ལྟར་རིགས་པའི་མཆོད་ནས། ཨོཾ་ཧྲིཿཧ་ཧ་ཧཱུཾ་ཧཱུཾ་ཕཊ། ཀྱི་བླ་མའི་མཚན། ཨ་ཧཱུཾ་སྭཱཧཱ། མང་དུ་བཟླ་ཞིང༌། ཐུགས་ཀར་ཉི་མའི་སྟེང་དུ་ཧཱུཾ་ཡིག་སྔགས་འཕྲེང་དང་བཅས་པ་ལ་རྩེ་གཅིག་ཏུ་མཉམ་པར་བཞག །དཔལ་ལྡན་བླ་མ་དམ་པས་བྱིན་གྱིས་བརླབ་ཏུ་གསོལ། ཞེས་གསོལ་བ་ལན་གསུམ་བཏབ་པས། བླ་མ་རང་གི་སྤྱི་བོ་ནས་ཐིམ། རང་དང་དབྱེར་མེད་དུ་གྱུར། རང་ཕྱི་ཧེ་རུ་ཀའི་སྙིང་ག་ཆོས་འཁོར་གྱི་ལྟེ་བར་བླ་མ་ཧེ་རུ་ཀ་དེའི་ཐུགས་ཀར་ཉི་མ་ལ་ཧཱུཾ། སྔགས་འཕྲེང་གསལ་བཏབ་ལ། སྔར་བཞིན་སྐྱབས་འགྲོ་དང་བཟླས་པ་བྱ། དེ་ནས་བླ་མའི་ཐུགས་ཀའི་འོད་ཀྱིས་ས་གསུམ་གྱི་མཁའ་འགྲོ་མ་རྣམས་རང་ལ་བསྟིམ། ཁམས་དཔའ་བོ་རྩ་དཔའ་མོའི་རྡུལ་ཕྲ་རབ་ཏུ་གྱུར། བླ་མ་འོད་དུ་ཞུ། སྐུ་གསུང་ཐུགས་ཀྱི་གསང་བ་
དང་རང་གི་སྒོ་གསུམ་རོ་མཉམ་དུ་གྱུར། དེ་ནས་སྤྲོས་པ་གང་ཡང་མི་བྱ་བར་ལྷོད་དེ་བཞག །དྲན་པའི་ཐག་པས་རྟོག་པའི་གླིང་པོ་བག་མེད་དུ་མི་བཏང༌། སྒོ་ལྔའི་རྣམ་ཤེས་རྟོག་མེད་འོད་གསལ་བའི་ཆར་སྒོ་སྦྱོར་བ་རྣམས་ནི་དངོས་གཞིའི་རྣལ་འབྱོར་རོ། །དེ་ནས་བསྔོ་བ་བྱས་ལ་ཅི་རིགས་པར་སྤྱོད། སྤྱིར་སྒྲུབ་ཐབས་འདིར་རང་གང་ལ་མོས་པའི་ཡི་དམ་ལ་སྦྱར་བས་རུང་མོད་ཀྱི། ཁོ་བོ་ལ་བླ་མས་གནང་བ་ནི་འཁོར་ལོ་སྡོམ་པའི་ངེས་གསང་མཆོག་དང་སྦྱར་བ་འདི་དག་གོ །འདིའི་གདམས་ངག་གི་ཡན་ལག་ནི། ཨུ་ཏ་མ་ཞེས་པ་རླབས་དང༌། རྔུར་མ་ཞེས་པ་ངུ་བ་སྟེ། དང་པོ་ནི། བླ་མ་སྒྲུབ་པའི་གནས་སྐབས་སུ། རྣམ་པར་གཡེངས་བས་བསམ་གཏན་མི་འཕེལ་བ་དང༌། རྒོད་པ་ཤས་ཆེ་ན་འདི་བསྒོམས་སྟེ། རང་ཡི་དམ་དུ་གསལ་བའི་དྷུ་ཏིའི་འཁོར་ལོ་ལྔར་ཁྱབ་པ། སྤྱི་བོའི་བླ་མ་འོད་དུ་ཞུ། དབུ་མའི་ལམ་བརྒྱུད་རྩའི་འཁོར་ལོ་ཐམས་ཅད་དག་པར་བྱས། སྤྱི་མགྲིན་སྙིང་ལྟེ་རྣམས་སུ་དབང་བཞི་ཐོབ་པར་མོས། ལྟེ་འོག་ཏུ་ཆོས་འབྱུང་གྲུ་གསུམ་གྱི་དབུས་སུ་བདུད་རྩིའི་རྒྱུན་བབས་པས་གང་བའི་ནང་དུ་ཧཱུཾ་ཡིག་སྐར་མའི་གཟུགས་ཅན་བླ་མར་མོས་ལ་གསོལ་བ་ཅི་རིགས་སུ་བཏབ། དེ་འོད་དུ་ཞུ་ནས་ཡལ་བའི་ངང་དུ་རྣམ་པར་རྟོག་པ་མེད་པས་རྩེ་གཅིག་ཏུ་བསྒྲིམས་ཏེ་བཞག་པ་ན་དུ་བ་ལ་སོགས་པའི་མཚན་མ་མཐོང་གསུངས།གཉིས་པ་ཤེས་པ་མི་གསལ་བ་དང༌། འགལ་རྐྱེན་མང་བ་ལ། ལྟེ་བའི་འཁོར་ལོའི་དབུས་སུ་བླ་མ་དེ་ལ་གསོལ་བ་དྲག་ཏུ་བཏབ་པས་འོད་དུ་ཞུ་སྟེང་དུ་བྱོན་
སྟེ་སྙིང་སྤྱི་མགྲིན་སྤྱི་རྣམས་སུ་དབང་བཞི་ཐོབ། སྨིན་མཚམས་ནས་འཐོན། མདུན་གྱི་ནམ་མཁར་སྐུ་སྔ་མ་བཞིན་དུ་གྱུར་པ་ལ་གསོལ་བཏབ་ཅིང་མཉམ་པར་བཞག་ལ། ཡང་དང་ཡང་དུ་མོས་གུས་དྲག་པོ་བྱའོ། །ཁྲུས་བྱ་བ་ནི་བླ་མ་མདུན་དུ་བསྒོམ་ལ། ཉེས་ལྟུང་མཐའ་དག་བཤགས། སྤྱི་བོའི་བླ་མ་འོད་དུ་ཞུ་སྟེ་ཐིམ་པས། སྡིག་སྒྲིབ་ཐམས་ཅད་བུ་ག་ཀུན་ནས་ཐོན་པས་སངས་ཀྱིས་དག་པར་བསམ། ཡང་ལྟེ་བ་བླ་མ་ཧེ་རུ་ཀ་སེར་པོ་རྒྱ་སྲན་གྱི་ཚད་ཙམ། དེ་ལ་མོས་གུས་དྲག་པོས་གསོལ་བ་བཏབ་པས། ཧེ་རུ་ཀ་ཡབ་ཡུམ་བྱང་ཆུབ་ཀྱི་སེམས་སུ་ཞུ་བའི་ཆུ་རྒྱུན་གྱིས་སྤྲུལ་པའི་འཁོར་ལོའི་རྩའི་གནས་ཐམས་ཅད་བཀྲུས། བདུད་རྩི་ཐམས་ཅད་གཅིག་ཏུ་འདུས་པ་འཁོར་ལོའི་ལྟེ་བར་ཟིལ་བ་ཆགས་པ་ལྟར་འོད་འཕྲོ་བ་ལ་རྩེ་གཅིག་ཏུ་དམིགས། དེ་བཞིན་དུ་སྙིང་ཁར་སྔོན་པོ་མགྲིན་པར་དམར་པོ། དཔྲལ་བར་དཀར་པོ། སྤྱི་བོར་སྣ་ཚོགས། གསང་བར་ལྗང་ཁུའི་ཁ་དོག་ཅན་གྱི་བླ་མ་སྒོམ་པ་སོགས་སྔར་བཞིན་བསྒོམས་པས་ཕུང་པོ་ལྔ། ཁམས་ལྔ། དབང་པོ་ལྔ། ཡུལ་ལྔ་རྣམས་ཀྱི་དྲི་མ་སྦྱོང་ཞིང༌། གནས་སྐབས་སུ་འབྱུང་བ་ལྔའི་ནད་གདོན་སེལ་བ་དང༌། རླུང་དབུ་མར་འཇུག་པའི་གནད་དམ་པའོ། །འདིའི་བྱིན་རླབས་ཀྱི་ཆོ་ག་ནི། གནས་བཟང་པོར་བླ་མ་ཉིད་ཀྱི་ཁྲུས་བྱས་སྡིག་པ་བཤགས། རྩ་ཁྲུས་སྔོན་དུ་འགྲོ་བས་སྔོན་དུ་བརྗེད་པའི་བླ་མའི་སྒྲུབ་ཐབས་རྫོགས་པར་བྱ་ཞིང༌། གཙོ་བོ་
དང་མཁའ་འགྲོ་མ་རྣམས་ལ་གཏོར་མའང་ངེས་པར་དབུལ་ལོ། །དེ་ནས་སློབ་མས་མཎྜལ་དབུལ། སློབ་དཔོན་དགོངས་སུ་གསོལ། བདག་ལ་དངོས་གྲུབ་ཐམས་ཅད་ཀྱི་འབྱུང་གནས་བླ་མའི་དབང་བསྐུར་བ་སྩལ་དུ་གསོལ། གསུམ། མཎྜལ་གྱི་དབུས་སུ་སྒྲུབ་ཐབས་ལྟར་བླ་མ་བསྐྱེད། ཕྱག་འཚལ་སྐྱབས་འགྲོ་བཟླས་པ་རྣམས་བྱ། དེ་ནས་ཨོཾ་སརྦ་ཏ་ཐ་ག་ཏ་ཀ་ཡ་ཝཀ་ཙིཏྟ་སྭ་བྷཱ་བཱ་ཙཱརྡྷ་ཡ་ཙ་རཱ་ཎ་ན་མ་སྟེ་ན་མོ། ཨདྡྷྱ་སིདྡྷྱ་མཾ། གསུམ། བུམ་པའི་ཆུའི་དབང་བསྐུར་བར་མོས། ཨོཾ་བཛྲ་ཨབྷི་ཥིཉྩ་ཧཱུཾ་༡ སྦྱོར་མཚམས་ནས་འོད་དཀར་དམར་བྱུང་མགྲིན་པར་ཕོག །ཨོཾ་ཨཱཿཧཱུཾ། ༢ རང་ལྷ་སྐུ་ཁ་སྦྱོར་ལ་མཉམ་པར་བཞག །༣ དེ་ཡང་ཡལ་ནས་སྟོང་ཉིད་དུ་བསྒོམ། ༤ བླ་མའི་དཔྲལ་མགྲིན་སྙིང་ཁ་ནས་ཧེ་རུ་ཀ་དཀར་དམར་མཐིང་གསུམ་གནས་གསུམ་དུ་རིམ་བཞིན་བསྟིམ་པས་དབང་གསུམ། གསུམ་ག་བསྟིམས་ནས་ལུས་གང་སྟོང་པ་ཉིད་དུ་བཞག་པའི་བཞི་པའོ། །དེ་ནས་ཡང་སྐྱབས་འགྲོ་ཕྱག་འཚལ་སྔར་བླ་མ་སྤྱི་བོར་བྱོན་འོད་དུ་ཞུ། འཁོར་ལོ་བཞི་དབང་བཞི་ཐོབ། བདེ་གསལ་མི་རྟོག་པ་ལ་མཉམ་པར་བཞག །དབང་བཞི་ཚན་གསུམ་མོ། །སློབ་མའི་སྤྱི་བོར་མེ་ཏོག་བཞག་ལ། ཨོཾ་བཛྲ་སིདྡྷི་བྷ་བནྟུ། བརྗོད། དེ་ནས་སློབ་མས་མཎྜལ་དབུལ། བླ་མའི་དཀྱིལ་འཁོར་རྗེས་བསྡུས་པ་སྤྱི་དང་མཐུན་ལ།
འགྲུབ་ན་མཎྜལ་རྒྱས་པ་རྒྱ་གར་བའི་ཕྱག་ལེན་བཞིན་བྱ། དབང་བསྐུར་ཐོབ་མ་ཐག་རིམ་གཉིས་བསྒོམ་ཟེར་ན་སློབ་མ་མཆོག་དམན་བླ་མ་རབ་ཏུ་གུས་སམ་མི་གུས་བརྟག །གུས་ན་ཐོག་མར་བྱིན་རླབས་བྱས། བླ་མ་བསྒྲུབས་ན་ཕྱིས་ཏིང་ངེ་འཛིན་ཤུགས་ལ་མྱུར་དུ་སྐྱེས་ལ། དེ་མིན་གསང་བ་དམ་པོར་བྱའོ། །ལེགས་ཚོགས་གཞན་ཡང་བརྗོད་དང་རྩ་འཁོར་གྱི་ལྟེ་བ་སོ་སོར་སྦྱོར་ཏེ་ཞི་བ་ལ་བླ་མ་བུདྡྷ་ཧེ་རུ་ཀ་དཀར་པོ་དང༌། ཨོཾ༴ སོགས་སྔགས་ཀྱི་མཐར། པཱ་པཾ་རོ་ག་ཤཱིནྟཾ་ཀུ་རུ་སྭཱཧཱ། ཚེ་རྒྱས་པ་ལ་སེར་པོ་བདུད་རྩིའི་བུམ་པ་འཛིན་པ་དང་ཨཱ་ཡུ་པུཥྟི་ཀུ་རུ་ཨོཾ། ནོར་རྒྱས་པ་ལ་བརྗིད་བག་ཅན། རིན་ཆེན་སྙེ་མ་བསྙེམས་པ་དང༌། དྷ་ན་པུཥྟིཾ་སོགས་དང༌། དབང་དགུག་ལ་དམར་པོ་སྒེག་ཉམས་ཅན་ལྕགས་ཀྱུ་ཞགས་པ་འཛིན་པ་བ་ཤཾ་ཀུ་རུ་ཧོ། ༡ བ་ཥཌ ༢ ཨ་རཀྵ་ཡ་ཧྲི་ཛ་དང༌། དྲག་པོ་ལ་ནག་པོ་ཁྲོ་བོ་རྡོ་རྗེ་ཅན་བསད་བསྐྲད་དབྱེ་རྨོངས། རེངས་མནན། སོགས་ལའང༌། རྣམ་པ་དང་སྔགས་རྣམས་ཇི་ལྟར་མཐུན་མཐུན་དུ་སྦྱར་ཏེ་དེ་ལྟར་སོ་སོའི་འབྱུང་བའི་གནས་ལ་གནས་པ་ལ། སྔགས་བཟླས་པ་དང༌། གསོལ་བ་དྲག་ཏུ་གདབ་ཅིང་ལས་ལ་སྦྱར་བས་ཐོགས་པ་མེད་གསུངས། གཞན་ཡང་བྱ་བ་ཐམས་ཅད་ལ་འདི་ལྟར་རྟེན་འབྲེལ་འགྲིགས་དགོས་ཏེ། ཞིབ་མོར་བླ་མའི་ཞལ་སྔ་ནས་རྟོགས་པར་བྱའོ། །ཐམས་ཅད་དྲི་མོའི་དུས་སུ་ཡིས་བྱ་ནུས། འདིར་འཕགས་ཡུལ་གྱི་སློབ་དཔོན་རྣམས་ཀྱིས་ཕྱག་ལེན་མཛད་ཚུལ་
ནི། སློབ་མ་མཆོག་གི་བླ་མ་སྒྲུབ་ཐབས་འདི་དུས་ཟླ་བ་དྲུག་གི་བར་དུ་བྱེད་ཅིང༌། དེའི་བར་དུ་ཉིན་རེ་བཞིན་ཐུན་གསུམ་དུ་མཎྜལ་འབུལ་ཕྱག་འཚལ་ལན་སྟོང་སྟོང༌། བཟླས་པ་དྲུག་སྟོང་རེ་དང༌། ཟས་དང་ཡོ་བྱད་གསར་དུ་བྱུང་བ་ཐམས་ཅད་ཀྱི་ཕྱེད་བླ་མའམ། དེ་མི་ཞུགས་ན་དམ་ཚིག་གཅིག་པའི་རྣམ་འབྱོར་པ་རྣམས་ལ་འབུལ་བ་སྟེ། འདི་ནི་མ་མཐའ་བཀག་པའི་ཕྱག་ལེན་དུ་མཛད་དོ། །གྲུབ་པའི་སློབ་དཔོན་རྟ་མཆོག་དང༌། །པཾ་ཝཾ་ཞབས་དང་འཇོ་སྒེག་ཞབས། །གྷུ་ན་ཏི་པ་དྷརྨ་པ། །བྱཱ་ང་ལ་དང་ཆར་སྤྲིན་ཞབས། །དགའ་བ་སྦས་པ་དེ་བཞིན་དུ། །གྲུབ་ཆེན་ཤིནྟི་གུཔྟ་དང༌། །སངས་རྒྱས་ཀུན་གྱི་ངོ་བོ་ཉིད། །སྦས་པའི་མགོན་པོའི་ཞལ་ལས་འོངས། །ཚུལ་འདི་རྣལ་འབྱོར་སྤྱོད་པའི་ཚུལ་འཆང་བ། །ཀུན་དགའ་སྙིང་པོས་སེམས་ཅན་ཀུན་ལ་སྦྱིན། །མ་གྱུར་འགྲོ་ཀུན་སྒྲོལ་ལ་མ་བཞིན་དུ། །བརྩོན་པས་བྱང་ཆུབ་མཆོག་ལ་བརྩོན་པར་ཤོག །ཅེས་བླ་མ་སྒྲུབ་ཐབས་རྒྱ་གར་བའི་པཎ་གྲུབ་ཀྱི་ཞལ་ལུང་དྲི་མ་མེད་པ་སྙིང་པོར་ཕྱུང་བ་འདི་ནི། ཏཱ་ར་ནཱ་ཐས་བླ་མའི་གསུང་བཞིན་བཅོས་བསླད་མེད་པར་སྦྱར་བའི་ཡི་གེ་པ་ནི་ཀུན་དགའ་ལེགས་རྒྱལ་ལོ། །རང་ལོ་ཉེར་གཅིག་གི་རྩེར་སོན་པའམ་ཚེ་ལི་ཁེ་ཏམ། མངྒ་ལཾ། བརྟཱི་ཀུ་རུ། དགེའོ།། །།བཀྲ་ཤིས།།
ཤོགསྟོང་།