མཐར་ཐུག་རྫོགས་པ་ཆེན་པོའི་སངས་རྒྱས་པའི་ཐབས་ཟབ་མོ་དགོངས་པ་རང་གྲོལ། རྫ་དཔལ་སྤྲུལ་རིན་པོ་ཆེ།

༄༅། །མཐར་ཐུག་རྫོགས་པ་ཆེན་པོའི་སངས་རྒྱས་པའི་ཐབས་ཟབ་མོ་དགོངས་པ་རང་གྲོལ་ཞེས་བྱ་བ་བཞུགས་སོ། །ཨ་བུ་ཧྲལ་པོའི་སྙིང་གཏམ་ཚིག་སུ་བཀོད་པ་ཨི་གོ་ཨི་གོ །ཨེ་མ་ཧོ། རྣམ་དག་ཆོས་སྐུའི་ངང་ལས་མ་གཡོས་ཤིང་། །འཁྲུལ་པའི་རྩ་བ་བཅད་ནས་ཡེ་སངས་རྒྱས། །ཀུན་བཟང་ཁྱེད་ཀྱི་དགོངས་པ་ཇི་ལྟ་བ། །ནོར་མེད་དེ་བཞིན་བདག་གིས་མྱུར་རྟོགས་ཤོག །བུ་སྐལ་ལྡན་བྱང་ཆུབ་ཐོབ་འདོད་ན། །སྤྲང་འཁྱམས་པོ་ཁྱི་རྒན་དཔལ་སྤྲུལ་གྱིས། །དོན་མ་ནོར་སྙིང་གཏམ་ཚིག་གསུམ་བཤད། །བུ་སྙིང་རུས་ཅན་རྣམས་ཉམས་ལེན་ཞུ། །སྟོང་ཉིད་ཆོས་སྐུ་ཞེས་བྱ་བ། བླ་མ་གྲུབ་ཐོབ་ཐམས་ཅད་ཀྱི་ཐུགས་དམ། དུས་གསུམ་སངས་རྒྱས་ཐམས་ཅད་ཀྱི་དགོངས་པ། ཡི་དམ་ཐམས་ཅད་ཀྱི་སྲོག་རྩ། མཁའ་འགྲོ་ཐམས་ཅད་ཀྱི་སྙིང་ཁྲག །ཆོས་སྐྱོང་ཐམས་ཅད་ཀྱི་རྟེན་གནས། མདོ་རྒྱུད་ཐམས་ཅད་ཀྱི་སྙིང་ཁུ། གསང་སྔགས་རིག་སྔགས་ཐམས་ཅད་ཀྱི་ཡང་བཅུད། ཕྱག་རྫོགས་དབུ་གསུམ་གཅིག་ཏུ་བསྟན་པ། ཆོས་སྐུ་རང་སེམས་དབྱེར་མེད་ངོ་སྤྲོད་པ། གཅིག་ཤེས་ཀུན་གྲོལ། གཅིག་ཆོག་རྒྱལ་པོ། ཆོས་ཉིད་ཀྱི་ཕྱག་རྒྱ་ཆེན་པོ། ནངས་རྟོགས་ན་ནངས་སངས་རྒྱས། ནུབ་རྟོགས་ན་ནུབ་སངས་རྒྱས་ཞེས་བྱ་བ། མིང་ཆེ་ལ་དོན་ཆེ་བ། འདི་ཉིད་ནི་རང་སེམས་སྟོང་པ་མ་བཅོས། རང་ཤར་ཐོག་ཏུ་བཞག་པ་རང་ལ་ཟེར་བ་ཡིན་ནོ། །རྣལ་འབྱོར་ཕོ་མོ་རྣམས་ཀྱིས་ཡང་དག་པའི་ལྟ་བ་མ་ནོར་བ་ཞིག་རྟོགས་པར་བྱེད་ན་སེམས་མ་བཅོས་སྟོང་པའི་ངང་དུ་གསལ་ལྷང་ངེར་ཞོག །སེམས་འདུག་ན་འདུག་པའི་ཐོག་ཏུ་མ་བཅོས་པར་ཞོག །མ་དྲན་ན་མ་དྲན་པའི་ཐོག་ཏུ་ཞོག །མདོར་ན་སེམས་མ་བཅོས་གང་ཤར་ཐོག་ཏུ་ཞོག །བཅས་བཅོས་དགག་སྒྲུབ་གང་ཡང་མ་བྱེད། ཅི་བྱུང་ན་བྱུང་ཐོག་ཏུ་མ་བཅོས་པར་ཞོག །རང་སེམས་ཚུར་ལ་མ་བཞག །བལྟ་རྒྱུ་ཕར་ལ་མ་བཙལ། ལྟ་མཁན་བསམ་མཁན་སེམས་ཁོ་རང་ཐོག་ཏུ་མ་བཅོས་པར་ཞོག །རང་སེམས་ཚུར་ལ་མ་བཞག །བསྒོམ་རྒྱུ་ཕར་ལ་མ་བཙལ། སྒོམ་བྱེད་མཁན་སེམས་ཁོ་རང་ཐོག་ཏུ་མ་བཅོས་པར་ཞོག །རང་སེམས་བཙལ་བས་མི་རྙེད། སེམས་ཉིད་ཡེ་ནས་སྟོང་། བཙལ་ཡང་མི་དགོས་འཚོལ་མཁན་དེ་ཉིད་ཡིན། འཚོལ་མཁན་ཁོ་རང་ཐོག་ཏུ་མ་ཡེངས་པར་ཞོག །ཨི་ཤེས་མི་ཤེས་ལྟ་རྒྱུ། བདེན་ཡང་མི་བདེན། ཡིན་ནམ་མ་ཡིན། གང་བྱུང་ན་ཡང་བསམ་མཁན་ཁོ་རང་ཐོག་ཏུ་མ་བཅོས་པར་ཞོག །བཟང་ངན་ཡག་བཙོག་དགའ་སྡུག་ཅི་དྲན་བྱུང་ན་ཡང་སྤང་བླང་མི་བྱེད་པར་དྲན་མཁན་ཁོ་རང་ཐོག་ཏུ་མ་བཅོས་པར་ཞོག །འདོད་མི་འདོད་ཅི་བྱུང་ན་ཡང་བྱུང་ཐོག་ཏུ་མ་བཅོས་པར་ཞོག །དེ་ཡང་སྙན་བརྒྱུད་ལས། གཞི་མ་བཅོས་ཕྱག་རྒྱ་ཆེན་པོ་ཡིན། །ལམ་མ་བཅོས་དབུ་མ་ཆེན་པོ་ཡིན། །འབྲས་མ་བཅོས་རྫོགས་པ་ཆེན་པོ་ཡིན། །ཞེས་གསུངས་སོ། །མ་བཅོས་པ་དེ་ཡི་གེགས་སེལ་ཅུང་ཟད་བྱེད་པ་ནི། སེམས་རྩུབ་མོ་མི་དྲན་དགུ་དྲན་བྱུང་བའི་དུས་སུ། ལུས་ངག་ཡིད་གསུམ་ལྷོད་ཤིག་གེར་ཞོག །དེ་ཉིད་ངང་ནས་སེམས་མི་དྲན་དགུ་དྲན་དེ་ལ་ཕྱོགས་འཚོ་གྱིས་ལ་ཡེངས་མ་ཤོར་བའི་ངང་སྡོད། སེམས་ཕྲ་མོ་དྲན་འགྱུ་རིག་ཙམ་མི་རིག་ཙམ་དེ་འདྲ་བྱུང་དུས། རིག་པ་ཧྲིལ་གྱིས་སྒྲིམས་ལ་གསལ་ལྷང་ངེར་ཞོག །སེང་ངེར་ཡེ་རེ་སྡོད། སེམས་བྱིང་རྨུག་འཐིབས་གསུམ་བྱུང་བའི་དུས། བདེ་གསལ་གྱི་ཉམས་ལ་མ་ཆགས་པར་བཅས་བཅོས་མི་བྱེད་པར་རང་སར་ཞོག་ལ་སྡོད། སེམས་དགའ་སྡུག་བྱུང་དུས་རེས་དགའ་དགའ། སྡུག་སྡུག་བྱེད་མཁན་ཁོ་རང་ཐོག་ཏུ་མ་ཡེངས་པར་ཞོག་ལ་སྡོད། དགའ་བྲོད་སྐྱིད་རྒྱག་བཀུར་སྟི་བྱུང་དུས། དགའ་བྲོད་བདུད་ཀྱི་དབང་དུ་སྣང་བ་མཐོ་ལིང་ངེ་འགྲེང་སྟེ་མ་བཏང་བར་མགོ་བོ་ཁུག །སྣང་བ་ཕོབས། ལུས་སེམས་དལ་ཤིག་གེར་སྡོད། ན་ཚ་སྡུག་བསྔལ་རྐུ་འཕྲོག་ཚིག་ངན་སྨད་བརྡུང་རྐྱེན་ངན་མུ་གེ་དེ་རྣམས་བྱུང་དུས་སུ་མགོ་བོ་མ་ཁུག་ངོ་མདངས་མ་ཤོར་བ། མཆི་མ་མ་བཏང་ལ། དགའ་ཡལ་ལེ་སྤྲོ་སེང་ངེར་འཛུམ་མུལ་ལེ་སྡོད། སེམས་ཀྱི་མཚང་བསྟན་པ་ནི། སྒོམ་ཆེན་ཕོ་མོ་ལ་ལས། སེམས་ངོ་ཤེས་རྒྱུ་མ་རེད་བསམ་ནས་སྡུག་སྟེ་མཆིལ་མ་ཤར་ཤར་འབབ་ནས་འོང་སྟེ། སྡུག་མི་དགོས། མི་ཤེས་རྒྱུ་ཅི་ཡང་མེད། སེམས་ངོ་ཤེས་རྒྱུ་མ་རེད་བསམ་མཁན་ཁོ་རང་གི་ཐོག་ཏུ་ཞོག་དང་དེ་རང་ཡིན། སྒོམ་ཆེན་ལ་ལས་སེམས་ངོ་སྲུང་བ་ལ་དཀའ་མོ་གདའ་ཟེར་ཏེ། དཀའ་མོ་ཅི་ཡང་མེད། སྒོམ་མི་ཤེས་པའི་སྐྱོན་ཡིན། སྒོམ་བཙལ་ནི་མི་དགོས། ཉོ་ནི་མི་དགོས། སྒྲུབ་ནི་མི་དགོས། འགྲོ་ནི་མི་དགོས། ལས་ནི་མི་དགོས། རང་གི་སེམས་ལ་གང་བྱུང་གང་ཤར་ངང་དུ་བཞག་པས་ཆོག །རང་གི་སེམས་ནི་ཡེ་ནས་རང་ལ་ཡོད། བོར་རྒྱུ་རྙེད་རྒྱུ། ཡོད་རྒྱུ་མེད་རྒྱུ་ནི་ཅི་ཡང་མེད། ཡེ་ནས་ཡོད་པའི་སེམས་འདི་ནི་དྲན་དུས་དྲན། མི་དྲན་དུས་མི་དྲན་འདུག་མི་འདི་ནི་རང་ཡིན། སེམས་ཁོ་རང་ཅི་དྲན་བྱུང་ན་ཡང་བྱུང་ཐོག་ཏུ་མ་བཅོས་པར་ལྷོད་དེ་མ་ཡེངས་པར་སྐྱོངས་དང་ཆོག །བདེ་མོ་སླ་མོ་ཤུགས་ལ་འོང་བ་ཡིན། ཆོས་ལ་དཀའ་སྣང་བྱུང་ན་རང་སྡིག་སྒྲིབ་ཆེ་བའི་རྟགས་ཡིན། སྒོམ་ཆེན་ལ་ལས། དགོས་པའི་སེམས་རང་ཐོག་ཏུ་མི་བཞག་ནས། མི་དགོས་པའི་སེམས་ཀྱིས་ཕར་བལྟ་ཚུར་ཉུག་མང་པོ་བྱེད་པ་གདའ་སྟེ། ཕར་བལྟ་ཚུར་ཉུག་བྱས་པས་སེམས་མི་རིག་མི་རྙེད་དོན་མ་གོ་པའི་རྐྱེན་ཡིན། ཕར་ལྟ་ཚུར་ཉུག་ཅི་མི་དགོས། ཕར་ལྟ་ཚུར་ཉུག་བྱེད་མི་སེམས་ཁོ་རང་ཐོག་ཏུ་ཞོག་དང་དེ་རང་ཡིན། སྒོམ་ཆེན་ལ་ལས། སེམས་དྲན་ན་དྲན། མི་དྲན་ན་མི་དྲན་པའི་ཐོག་ཏུ་མི་བཞག་ནས། ལོགས་ཤིག་ནས་ཡོང་བསམ་ནས་ཕར་བཙལ་ཚུར་ཉུག་བྱས་པས་སེམས་ངོ་མི་ཤེས་པས། ཕར་བཙལ་ཚུར་ཉུག་བྱེད་མི་དགོས་སེམས་དྲན་ན་དྲན། མ་དྲན་ན་མ་དྲན་ཐོག་ཏུ་ཞོག་དང་དེ་རང་ཡིན། སྒོམ་ཆེན་ལ་ལས། རང་གི་སེམས་སྟོང་པ་ཉིད་ལ་རང་སེམས་ཡིད་མ་ཆེས་ནས། ཨེ་ཡིན་མི་ཡིན་བསམ་ནས་ཐེ་ཚོམ་བྱེད་པ་ཡང་གདའ་སྟེ། དེ་ཡི་དོན་མ་གོ་བའི་སྐྱོན་ཡིན། ཐེ་ཚོམ་བྱེད་མི་དགོས། རང་སེམས་ཡེ་ནས་སྟོང་པ་ཡིན་པས་སྟོང་པའི་ངང་དུ་ཞོག་དང་དེ་རང་ཡིན། ཐེ་ཚོམ་བྱུང་ན་ཐེ་ཚོམ་ཁོ་རང་ཐོག་ཏུ་ཞོག་དང་དེ་རང་ཡིན། སྒོམ་ཆེན་ལ་ལས། དྲན་མཁན་སེམས་ལ་མི་ལྟ་བར། དྲན་པའི་ཡུལ་རྒྱུ་ཟོག་ས་རྡོ་རྣམས་ལ་ལྟ་མི་ཡང་མང་པོ་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། གཉིས་འཛིན་གྱི་ལྟ་བ་ཡིན། དྲན་མཁན་ཁོ་རང་ཐོག་ཞོག་ལ་ལྟོས། སྒོམ་ཆེན་ལ་ལས། སྣང་སེམས་དབྱེར་མེད་དུ་མི་བཞག་ནས། སྣང་བ་རང་འདེད་ཅིང་འགྲོ་མི་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། གཉིས་སྣང་གི་ལྟ་བ་ཡིན། སྣང་བ་ཕར་ལ་མ་འདེད། དངོས་པོ་ཚུར་ལ་མ་བཀུག །སྣང་སེམས་དབྱེར་མེད་དུ་ཞོག །སྒོམ་ཆེན་ལ་ལས་རང་སར་མི་བཞག་ནས། བྱི་ལས་བྱི་བ་སྒུག་པ་ལྟར། རྣམ་རྟོག་ཅི་བྱུང་ལྟ་འདུག་མི་ཡང་གདའ་སྟེ། རྣམ་རྟོག་བྱུང་ན་བྱུང་། མ་བྱུང་ན་མ་བྱུང་ཐོག་ཏུ་ཞོག །སྒོམ་ཆེན་ལ་ལས་སེམས་རང་ཐོག་ཏུ་བཞག་མ་ཤེས་ནས། སྔ་མ་དྲན་པའི་རྗེས་སུ་ལྟ་ཞིང་འགྲོ་མི་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། དྲན་པའི་རྗེས་གཅོད་ཡིན། དྲན་པའི་རྗེས་མི་གཅོད་པར་གཅོད་མཁན་ཁོ་རང་ཐོག་ཏུ་ཞོག །སྒོམ་ཆེན་ལ་ལས་སེམས་ཅི་གནས་གང་ཤར་ཐོག་ཏུ་མི་བཞག་ནས། སྒོམ་བཟང་པོ་ཞིག་འདོད་ནས་སེམས་གན་བཅར་མདུན་ཚུབས་ཧྲིག་ཧྲིག་མང་པོ་བྱེད་པ་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། སེམས་བཅོས་མ་ཡིན་སེམས་བཟོ་བཅོས་གང་ཡང་མི་བྱེད་པ་རང་གནས་ཅི་བྱུང་གང་ཤར་ངང་དུ་ཞོག །སྒོམ་ཆེན་ལ་ལས་གང་དྲན་དྲན་མི་བཅུག་པར་ཤེས་ཕྱུང་ནས་སེམས་བཟུང་འདུག་མི་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། སེམས་བཀག་པ་ཡིན། སེམས་གནས་ན་གནས་ཐོག་ཞོག །འགྱུ་ན་འགྱུ་ཐོག་ཞོག །སྒོམ་ཆེན་ལ་ལས་ཁྱད་བསོད་ལྟར་སེམས་ཧང་ཧང་བྱེད་འདུག་མི་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། སེམས་ཧང་ལྟས་ཡིན། སྟོང་པའི་ངང་དུ་གསལ་ལྷང་ངེར་ཞོག །སྒོམ་ཆེན་ལ་ལས་སེམས་ཉིད་འདི་སྟོང་པ་ཡིན་བསམ་ནས་སྒོམ་པ་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། སྟོང་པ་བཟོ་སྒོམ་ཡིན། སྟོང་པ་ཉིད་ཡིན་བསམ་མཁན་གྱི་ཐོག་ཏུ་ཞོག །སྒོམ་ཆེན་ལ་ལས། བདེ་ཤིག་གེ་སྟོང་སང་སང་གསལ་ཧྲིག་ཧྲིག་བྱུང་དུས་ལྟ་རྩུབ་ཟིང་ཟིང་ན་ཁ་ཁ། སྟོང་འཕྱང་འཕྱང་། ལྟ་རྒྱུ་མེད་པ་དེ་འདྲ་བྱུང་དུས་མི་ལྟ་མཁན་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། སྤང་བླང་ཡིན། སྤང་བླང་གང་ཡང་མི་བྱེད་པར་གང་བྱུང་ཐོག་ཏུ་ཞོག །སྒོམ་ཆེན་ལ་ལས་བཟང་པོ་དྲན་བྱུང་དུས་ལྟ། ངན་པ་བཙོག་པོ་དྲན་བྱུང་དུས་མི་ལྟ་མཁན་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། བཟང་ལྟ་ངན་བསྐྱུར་ཡིན། བཟང་ལྟ་ངན་བསྐྱུར་མི་བྱེད་པར་བཟང་ངན་གང་དྲན་བྱུང་ན་ཡང་དེ་ཡི་ཐོག་ཏུ་མ་ཡེངས་པར་ཞོག །སྒོམ་ཆེན་ལ་ལས་སེམས་བདེ་མོ་བྱུང་ན་དགའ། རྣམ་རྟོག་རྒོད་པོ་བྱུང་ན་རང་གི་སེམས་ལ་ཞེ་སྡང་བྱེད་པ་ཡང་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། གང་ཤར་གྱི་ངོ་བོ་སྐྱོང་མ་ཤེས་པའི་སྐྱོན་ཡིན། རྣམ་རྟོག་རྒོད་པོ་བྱུང་དུས་སེམས་གློད་གློད་ངང་ནས་རྒོད་པོ་ཁོ་རང་གི་ཐོག་ཏུ་ཞོག །སྒོམ་ཆེན་ལ་ལས་དགོས་མི་དགོས་མེད་པར་སྒྲིམ་ལྷོད་ཡང་མི་བྱེད་པར་གདའ་སྟེ། དེ་ནི་ཡང་དག་པའི་ལྟ་བ་མ་ཡིན། བཅོས་མ་ཅུང་ཟད་འཕོག་འགྲོ་བ་ཡིན། སེམས་གནས་མ་ཤེས་པའི་སྐྱོན་ཡིན། དགོས་པའི་དུས་སུ་སྒྲིམ་ལྷོད་ཀྱིས། །མི་དགོས་པའི་དུས་སུ་སྒྲིམ་གློད་མི་བྱ་བར་རང་བབས་སུ་གསལ་ལྷང་ངེར་ཞོག །སྒོམ་ཆེན་ལ་ལས་ཟས་སྐོམ་ཞིམ་མངར་གྱི་རོ་དྲན་དུས་སུ་སྒོམ་མི་ཚུག་ནས་ཡར་ལངས་ནས་ཟས་སྐོམ་ཞིམ་མངར་ཅན་ཞིག་ཨེ་ཐོབ་མི་ཐོབ་བྱེད་ནས་ཟས་སྐོམ་ཞིམ་མངར་ལ་ལོངས་སྤྱོད་པ་གདའ་སྟེ། དེ་འདྲ་བྱས་ན་བསམ་གཏན་འཚོ་བ་ཟག་པའི་སྒོམ་ལེགས་པོ་ཞིག་མི་འོང་། ཁ་ཞིམ་ལྟོ་སྐྱིད་ཀྱིས་སྒོམ་ཆེན་སྡུག་བྲེད་ཅན་ཞིག་འོང་། དེ་ཕྱིར་ཟས་སྐོམ་ཞིམ་མངར་གྱི་རོ་ལ་ཆགས་པར་བསམ་གཏན་གྱི་འཚོ་བ་ཟ་དགོས་པ་ཡིན། སྒོམ་ཆེན་ལ་ལས་སྐྱིད་རྒྱག་ལོངས་སྤྱོད་ཆེ་བསྟོད་དེ་འདྲ་བྱུང་དུས། སྒོམ་བྱེད་མི་ཚུག་པ་དགའ་དགའ་སྐྱིད་སྐྱིད་ཆེར་བྱེད། སྡུག་བསྔལ་རྐྱེན་ངན་ན་ཚ་སྨད་བཤའ་ཁ་མཆུ་དེ་འདྲ་བྱུང་དུས་སྒོམ་བྱེད་མི་ཐུབ་ནས། ཁ་ངོ་སྤྲིན་ནག་ལྟར་བསྡུས་ནས་ཁ་ཡིས་སྡུག་རབ་བཤད། མིག་ནས་མཆི་མ་གཏོང་མཁན་ཡང་གདའ་སྟེ། དེ་འདྲ་བྱས་ན་དགའ་སྡུག་རོ་སྙོམ་ཐུབ་པའི་ཆོས་པ་ལེགས་པོ་ཞིག་མི་འོང་། དགའ་སྡུག་ཆོས་བརྒྱད་ཀྱི་དབང་དུ་ཤོར་བའི་ཆོས་མེད། ཐ་མལ་སྡུག་བྲེད་ཅིག་འོང་བ་ཡིན། དེའི་ཕྱིར་དགའ་སྡུག་གང་ཡང་རོ་སྙོམས་ནས་ལམ་ཁྱེར་དགོས་པ་ཡིན་ནོ། །

༈ སེམས་ཀྱི་རྣམ་ཐར་བཤད་པ་ནི། ཨེ་མ་ཧོ། སེམས་ཉིད་ཡེ་ནས་དངོས་པོ་མེད། །བལྟས་པས་མི་མཐོང་སྟོང་པ་འགྱུར། །སྟོང་པ་མ་ཡིན་རིག་ཅིང་གསལ། །རིག་སྟོང་དབྱེར་མེད་མཁའ་ལྟར་ཁྱབ། །བཞག་ཀྱང་གཏད་མེད་ཟང་ཐལ་འགྲོ། །མ་བཞག་འདུག་ཀྱང་རང་སར་འཁོར། །རྐང་ལག་མེད་ཀྱང་ཀུན་ཏུ་རྒྱུག །བཏང་ཡང་མི་འགྲོ་རང་སར་འཁོར། །མིག་ནི་མེད་ཀྱང་ཐམས་ཅད་རིག །རིག་པའི་སྣང་བ་སྟོང་པར་འགྲོ། །སེམས་ཀྱི་ངོ་བོ་འདི་ཞེས་མེད། །མེད་ཀྱང་དྲན་རིག་སྣ་ཚོགས་འཆར། །ཡོད་པ་མ་ཡིན་སྟོང་པར་འགྲོ། །མེད་པ་མ་ཡིན་དྲན་རིག་སྣང་། །སྣང་སྟོང་ཟུང་འཇུག་འོད་ཟེར་འབར། །སྟོང་གསལ་ཆོས་སྐུ་རང་མདངས་གསལ། །ཡེ་ཤེས་ལྔ་ལྡན་རབ་ཏུ་རྒྱས། །ཀ་དག་གནས་ལུགས་ལྷུན་གྲུབ་དང་། །སྐུ་དང་ཞིང་ཁམས་འགག་མེད་འཆར། །འོད་གསལ་མ་བུ་གཅིག་ཏུ་འདྲེས། །སེམས་ཀྱི་གནས་ལུགས་དེ་འདྲ་བ། །རྟོགས་པར་འདུག་གམ་རྟོགས་ལྡན་རྣམས། །ཤེས་པར་འདུག་གམ་ཤེས་ཆེན་རྣམས། །ཉམས་ལེན་མཛོད་ཅིག་རྣལ་འབྱོར་རྣམས། །

༈ འཁྲུལ་པ་རང་གྲོལ་གྱི་གདམས་ངག་ནི། དུག་སྨན་དུ་འགྱུར་བ་ལྟ་བུ་ནི། །སྟོང་པ་ཉིད་ལ་སེར་སྣ་མེད། །འཁྲུལ་པའི་དབང་གིས་སེར་སྣ་ལང་། །མ་འཁྲུལ་སེར་སྣ་ལོང་མཁན་ལྟོས། །ལྟོས་ཤིག་སྐྱོང་ལ་མ་ཡེངས་དང་། །སེར་སྣ་སངས་ནས་སྟོང་པར་འགྱུར། །སྟོང་པའི་ངང་དུ་མ་ཡེངས་ཞོག །དེ་ནི་སེར་སྣ་རྣམ་དག་ཡིན། །སྦྱིན་པ་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་ཆགས་ཞེན་མེད། །འཁྲུལ་པའི་དབང་གིས་ཆགས་ཞེན་ལང་། །མ་འཁྲུལ་ཆགས་ཞེན་ལང་མཁན་ལྟོས། །ལྟོས་ཤིག་སྐྱོངས་ལ་མ་ཡེངས་དང་། །ཆགས་ཞེན་སངས་ནས་སྟོང་པར་འགྱུར། །སྟོང་ཉིད་ངང་དུ་མ་ཡེངས་ཞོག །དེ་ནི་ཆགས་ཞེན་རྣམ་དག་ཡིན། །ཚུལ་ཁྲིམས་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་ཁོང་ཁྲོ་མེད། །འཁྲུལ་པའི་དབང་གིས་ཁོང་ཁྲོ་ལང་། །མ་འཁྲུལ་ཁོང་ཁྲོ་ལང་མཁན་ལྟོས། །ལྟོས་ཤིག་སྐྱོངས་ལ་མ་ཡེངས་དང་། །ཁོང་ཁྲོ་སངས་ནས་སྟོང་པར་འགྱུར། །སྟོང་ཉིད་ངང་དུ་མ་ཡེངས་ཞོག །དེ་ནི་ཁོང་ཁྲོ་རྣམ་དག་ཡིན། །བཟོད་པ་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་ལེ་ལོ་མེད། །འཁྲུལ་པའི་དབང་གིས་ལེ་ལོ་འབྱུང་། །མ་འཁྲུལ་ལེ་ལོ་འབྱུང་མཁན་ལྟོས། །ལྟོས་ཤིག་སྐྱོངས་དང་མ་ཡེངས་དང་། །ལེ་ལོ་སངས་ནས་སྟོང་ཉིད་འགྱུར། །སྟོང་ཉིད་ངང་དུ་མ་ཡེངས་ཞོག །དེ་ནི་ལེ་ལོ་རྣམ་དག་ཡིན། །བརྩོན་འགྲུས་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་གཡེང་བ་མེད། །འཁྲུལ་པའི་དབང་གིས་གཡེང་བ་འབྱུང་། །མ་འཁྲུལ་གཡེང་བ་འབྱུང་མཁན་ལྟོས། །ལྟོས་ཤིག་སྐྱོངས་ལ་མ་ཡེངས་དང་། །གཡེང་བ་སངས་ནས་སྟོང་ཉིད་འགྱུར། །སྟོང་ཉིད་ངང་ལ་མ་ཡེངས་ཞོག །དེ་ནི་རྣམ་གཡེང་རྣམ་དག་ཡིན། །བསམ་གཏན་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་གཏི་མུག་མེད། །འཁྲུལ་པའི་དབང་གིས་གཏི་མུག་ལང་། །མ་འཁྲུལ་གཏི་མུག་འབྱུང་མཁན་ལྟོས། །ལྟོས་ཤིག་སྐྱོངས་ལ་མ་ཡེངས་དང་། །གཏི་མུག་སངས་ནས་སྟོང་ཉིད་འགྱུར། །སྟོང་ཉིད་ངང་དུ་མ་ཡེངས་ཞོག །དེ་ནི་གཏི་མུག་རྣམ་དག་ཡིན། །ཤེས་རབ་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །སྟོང་པ་ཉིད་ལ་རློམ་སེམས་མེད། །འཁྲུལ་པའི་དབང་གིས་རློམ་སེམས་ལང་། །མ་འཁྲུལ་རློམ་སེམས་ངོ་བོར་ལྟོས། །ལྟོས་ཤིག་སྐྱོངས་ལ་མ་ཡེངས་དང་། །རློམ་སེམས་སངས་ནས་སྟོང་ཉིད་འགྱུར། །སྟོང་ཉིད་ངང་དུ་མ་ཡེངས་ཞོག །དེ་ནི་རློམ་སེམས་རྣམ་དག་ཡིན། །ཆོག་ཤེས་དེ་བས་གོང་ན་མེད། །དེ་རྟོགས་རྣལ་འབྱོར་ཨེ་མ་ཧོ། །

༈ ཉོན་མོངས་རང་གྲོལ་གྱི་མན་ངག་ནི། ཉོན་མོངས་ཡེ་ཤེས་བསྒྱུར་བས་ན། །ཡེངས་མེད་ངང་ལ་སྡུག་བསྔལ་མེད། །འཁྲུལ་པའི་དབང་གིས་སྡུག་བསྔལ་འབྱུང་། །མ་ཡེངས་སྡུག་བསྔལ་ངོ་བོར་ལྟོས། །སྡུག་བསྔལ་མེད་ནས་སྟོང་པར་འགྱུར། །སྟོང་གསལ་ངང་དུ་མ་ཡེངས་ཞོག །དེ་ནི་སྡུག་བསྔལ་རྣམ་དག་ཡིན། །བདེ་ཆེན་ཆོས་སྐུ་དེ་ལ་ཟེར། །ཡེངས་མེད་ངང་དུ་ཉོན་མོངས་མེད། །ཡེངས་པའི་སྐྱོན་གྱིས་ཉོན་མོངས་ལང་། །མ་ཡེངས་ཉོན་མོངས་ངོ་བོར་ལྟོས། །ལྟོས་ཤིག་སྒོམས་ལ་མ་ཡེངས་དང་། །ཉོན་མོངས་དེ་ནི་སྟོང་པར་འགྲོ། །སྟོང་པའི་ངང་དུ་མ་ཡེངས་ཞོག །དེ་ནི་ཉོན་མོངས་རྣམ་དག་ཡིན། །སྐྱེ་མེད་ཆོས་སྐུ་དེ་ལ་ཟེར། །ཡེངས་མེད་ངང་ལ་ཞེ་སྡང་མེད། །ཡེངས་པའི་སྐྱོན་གྱིས་ཞེ་སྡང་ལང་། །མ་ཡེངས་ཞེ་སྡང་ངོ་བོར་ལྟོས། །ལྟོས་ཤིག་སྒོམས་ལ་མ་ཡེངས་དང་། །ཞེ་སྡང་མེད་ནས་སྟོང་པར་འགྲོ། །སྟོང་གསལ་ངང་ལ་མ་ཡེངས་ཞོག །དེ་ནི་ཞེ་སྡང་རྣམ་དག་ཡིན། །མེ་ལོང་ཡེ་ཤེས་དེ་ལ་ཟེར། །ཡེངས་མེད་ངང་ལ་ང་རྒྱལ་མེད། །ཡེངས་པའི་སྐྱོན་གྱིས་ང་རྒྱལ་ལང་། །མ་ཡེངས་ང་རྒྱལ་ངོ་བོར་ལྟོས། །ལྟོས་ཤིག་སྒོམས་ལ་མ་ཡེངས་དང་། །ང་རྒྱལ་མེད་ནས་སྟོང་གསལ་འགྲོ། །སྟོང་གསལ་ངང་དུ་མ་ཡེངས་ཞོག །མཉམ་ཉིད་ཡེ་ཤེས་དེ་ལ་ཟེར། །ཡེངས་མེད་ངང་ལ་འདོད་ཆགས་མེད། །ཡེངས་པའི་སྐྱོན་གྱིས་འདོད་ཆགས་ལང་། །མ་ཡེངས་འདོད་ཆགས་ངོ་བོར་ལྟོས། །ལྟོས་ཤིག་སྒོམས་ལ་མ་ཡེངས་དང་། །འདོད་ཆགས་མེད་ནས་སྟོང་གསལ་འགྲོ། །སྟོང་གསལ་ངང་དུ་མ་ཡེངས་ཞོག །དེ་ནི་འདོད་ཆགས་རྣམ་དག་ཡིན། །སོར་རྟོགས་ཡེ་ཤེས་དེ་ལ་ཟེར། །ཡེངས་མེད་ངང་ལ་ཕྲག་དོག་མེད། །ཡེངས་པའི་སྐྱོན་གྱིས་ཕྲག་དོག་ལང་། །མ་ཡེངས་ཕྲག་དོག་ངོ་བོར་ལྟོས། །ལྟོས་ཤིག་སྒོམས་ལ་མ་ཡེངས་དང་། །ཕྲག་དོག་མེད་ནས་སྟོང་གསལ་འགྲོ། །སྟོང་གསལ་ངང་ལ་མ་ཡེངས་ཞོག །དེ་ནི་ཕྲག་དོག་རྣམ་དག་ཡིན། །བྱ་གྲུབ་ཡེ་ཤེས་དེ་ལ་ཟེར། །ཡེངས་མེད་ངང་ལ་གཏི་མུག་མེད། །ཡེངས་པའི་སྐྱོན་གྱིས་གཏི་མུག་ལང་། །མ་ཡེངས་གཏི་མུག་ངོ་བོར་ལྟོས། །ལྟོས་ཤིག་སྒོམས་ལ་མ་ཡེངས་དང་། །གཏི་མུག་མེད་ནས་སྟོང་གསལ་འགྲོ། །སྟོང་གསལ་ངང་དུ་མ་ཡེངས་ཞོག །དེ་ནི་གཏི་མུག་རྣམ་དག་ཡིན། །ཆོས་དབྱིངས་ཡེ་ཤེས་དེ་ལ་ཟེར། །ཡེངས་མེད་ངང་ལ་བྱིང་རྨུག་མེད། །ཡེངས་པའི་སྐྱོན་གྱིས་བྱིང་རྨུག་འཐིབས། །མ་ཡེངས་བྱིང་རྨུག་ངོ་བོར་ལྟོས། །ལྟོས་ཤིག་སྒོམས་ལ་མ་ཡེངས་དང་། །བྱིང་རྨུག་མེད་ནས་སྟོང་གསལ་འགྲོ། །སྟོང་གསལ་ངང་དུ་མ་ཡེངས་ཞོག །དེ་ནི་བྱིང་རྨུག་རྣམ་དག་ཡིན། །སྟོང་གསལ་ཡེ་ཤེས་དེ་ལ་ཟེར། །ཡེངས་མེད་ངང་ལ་འཐོར་རྒོད་མེད། །ཡེངས་པའི་སྐྱོན་གྱིས་འཐོར་རྒོད་ལང་། །མ་ཡེངས་འཐོར་རྒོད་ངོ་བོར་ལྟོས། །ལྟོས་ཤིག་སྒོམས་ལ་མ་ཡེངས་དང་། །འཐོར་རྒོད་མེད་ནས་སྟོང་གསལ་འགྲོ། །སྟོང་གསལ་ངང་དུ་མ་ཡེངས་ཞོག །དེ་ནི་འཐོར་རྒོད་རྣམ་དག་ཡིན། །འགྱུར་མེད་ཡེ་ཤེས་དེ་ལ་ཟེར། །ཡེངས་མེད་ངང་དུ་དུག་གསུམ་མེད། །ཡེངས་པའི་སྐྱོན་གྱིས་དུག་གསུམ་ལང་། །མ་ཡེངས་དུག་གསུམ་ངོ་བོར་ལྟོས། །ལྟོས་ཤིག་སྒོམས་ལ་མ་ཡེངས་དང་། །དུག་གསུམ་མེད་ནས་སྟོང་གསལ་འགྲོ། །སྟོང་གསལ་ངང་དུ་མ་ཡེངས་ཞོག །དེ་ནི་དུག་གསུམ་རྣམ་དག་ཡིན། །སྐུ་གསུམ་ཡེ་ཤེས་དེ་ལ་ཟེར། །

༈ ངེས་ཤེས་བསྐྱེད་པའི་དོན་དུ་སེམས་ཀྱི་འོང་ལུགས་བཤད་པ་ནི། སྒོམ་ཆེན་གྱི་སེམས་ལ་བར་རེ་ཅི་ཡང་མི་བསམ་པ་འོང་། སྟོང་ཉང་ངེ་འདུག་པ་འོང་། དེ་འདྲ་བྱུང་དུས་བཅས་བཅོས་མི་བྱེད་པར་རང་ཐོག་ཏུ་ལྷང་ངེར་ཞོག །ཐང་རེ་གསལ་ལྷང་ངེར། བདེ་འབོལ་ལེ་འདུག་པའི་དུས་འོང་། དེ་འདྲ་བྱུང་དུས་སེམས་དེ་གསལ་ལྷང་ངེར་ཞོག །ཐང་རེ་སེམས་ནག་ཐམ་ཐམ་སྟོང་ཧང་ཧང་གསལ་མི་ཐུབ་པའི་དུས་འོང་། དེ་འདྲ་བྱུང་དུས་རིག་པ་གསལ་གྱིས་བཏོན་ལ་རྗེན་ཧ་རེ་ཞོག །ཐང་རེ་སྡུག་ཧང་གིས་འོང་། དེ་འདྲ་བྱུང་དུས་སྤྲོ་སིང་ངེར་ལྷོད་ཤིག་གེར་དགའ་ཡ་ལེར་སྡོད། ཐང་རེ་ཡུད་ཙམ་འདུག་ཅིང་ཡུན་རིང་མི་འདུག་པ་ཞི་བི་ཞི་བི་དྲན་འགྲོ་བ་འདྲ་འོང་། དེ་འདྲ་བྱུང་དུས་སེམས་ཁ་སྒྲིམས་ལ་ཁོང་ལྷོད་ལ་ཞོག །ཐང་རེ་སེམས་རིག་ཙམ་མི་རིག་ཙམ་དེ་འདྲ་འོང་། དེ་འདྲ་བྱུང་དུས་སེམས་མར་ལོག་ནང་ནས་སྤུ་བཏོན་པ་ལྟར་གསལ་ཧྲིག་གིས་ཕྱུང་ནས་མ་ཡེངས་པ་ཧུ་རེ་ཞོག །ཐང་རེ་མི་དྲན་དགུ་དྲན་བྱེད་ནས་ཡར་འཕྱང་མར་འཕྱང་བྱེད་ཅིང་ཡུད་ཙམ་འདུག་མི་ཐུབ་པ་ལང་འོང་། དེ་འདྲ་བྱུང་དུས་ལུས་ལྷོད་སེམས་ལྷོད་ཀྱི་ངང་ནས་ཡེངས་མ་ཤོར་བར་ཕྱོགས་འཚོ་ཕྱོགས་སྐྱོང་གྱིས་ལ་ཞོག །ཐང་རེ་བསྒོམ་སྙིང་མི་འདོད་པ་སྙིང་ན་བ་འདུག་མི་ཚུག་པ་དེ་འདྲ་ཡང་འོང་། དེ་འདྲ་བྱུང་དུས་བླ་མ་ལ་གསོལ་བ་ལྷང་ལྷང་བཏབ་ཅིང་སྣང་བ་བདེ་ལྷང་ངེར་སྐྱིད་ལྷང་ངེར་ཞོག །ཐང་རེ་བདེ་བ་དེ་ལྡན་ལྡན་གསལ་བ་དང་དགའ་ལྷག་ལྷག །བྲོ་འཁྲབ་འདོད་པ་ཡང་འོང་། དེ་འདྲ་བྱུང་དུས་རང་སེམས་ལ་འཛིན་པ་མ་ཞུགས་པར་ལྷོད་མེར་རེ་སྡོད། སེམས་ཀྱི་འོང་ལུགས་དེ་རྣམས་ནི་ལས་དང་པོ་པས་གནས་ལུགས་གཏན་ལ་མ་ཕེབས་པའི་དུས་འོང་བ་ཡིན། གཏན་ལ་འབེབས་ཐུབ་པ་རྣམས་ལ་དེ་འདྲ་འོང་རྒྱུ་མེད། དེ་ཡང་ཟུར་ཙམ་བཤད་པར་བྱ་སྟེ། གནས་ལུགས་གཏན་ལ་འབེབས་པའི་དུས། །ལྟ་ཡང་མི་དགོས་འོད་གསལ་རང་བཞིན་འཆར། །སྒོམ་ཡང་མི་དགོས་སེམས་ཉིད་རང་སར་ཟིན། །ཡེངས་ཀྱང་མི་དགོས་སེམས་ཉིད་རང་ཚོད་བཟུང་། །འགྱུ་ཡང་མི་དགོས་དྲན་རིག་མཁའ་ལྟར་ཁྱབ། །བཅས་བཅོས་མི་དགོས་འོད་གསལ་ངང་དུ་གནས། །རང་སེམས་དབྱེར་མེད་འོད་གསལ་ངང་ནས་འདྲེས། །ཡེངས་མེད་རང་སར་ཟིན་ནས་ཀྱང་། །སྟོང་ཉིད་ཆོས་སྐུའི་ངང་ཉིད་ལས། །ལྷུན་གྲུབ་འོད་གསལ་ཤར་བའི་དུས། །རང་སེམས་སངས་རྒྱས་དབྱེར་མི་འབྱེད། །སྐུ་དང་ཞིང་ཁམས་འབྲལ་མེད་འབྱུང་། །རེ་དོགས་བདག་འཛིན་དགའ་སྡུག་མེད། །སྤང་བླང་ཐེ་ཚོམ་སྣ་ཚོགས་བྲལ། །སེམས་གཏན་ལ་ཕབ་ན་དེ་ལྟར་འབྱུང་། །

༈ སྤྱོད་ལམ་རྣམ་བཞི་ཁྱེར་ཚུལ་ནི། སྒོམ་ཆེན་འགྲོ་བའི་དུས་སུ་ནི། །སྨྱོ་མཆོང་རྒྱུག་མཆོང་མི་བྱེད་པར། །ལུས་སེམས་དལ་བའི་ངང་ཉིད་ལས། །རང་སེམས་གཡེལ་མེད་སྲུང་བཞིན་འགྲོ། །སྒོམ་ཆེན་འདུག་པའི་དུས་སུ་ནི། །བསམ་བློ་བགྲང་ཕྲེང་མི་བཏང་བར། །ལུས་གནད་དྲང་པོར་བསྲང་ནས་ཀྱང་། །རང་སེམས་གཅེར་བུ་ཕུད་ནས་སྡོད། །སྒོམ་ཆེན་ཉལ་བའི་དུས་སུ་ནི། །གཏི་མུག་རོ་བཞིན་མི་ཉལ་བ། །ཡེངས་མེད་འོད་གསལ་ངང་དུ་བསྲེས། །སྒོམ་ཆེན་བཟའ་བཏུང་ཟ་བའི་དུས། །བཟའ་བཏུང་བདུད་རྩིར་བྱིན་གྱིས་རློབས། །རང་ལུས་ཞི་ཁྲོའི་ལྷ་ཚོགས་རྣམས། །སེམས་ཉིད་ཡེངས་མེད་ངང་ལ་བཟའ། །འགྲོ་འདུག་ཉལ་བ་ཅི་བྱེད་ཀྱང་། །སྟོང་ཉིད་དབྱེར་མེད་ངང་ནས་གྱིས། །རང་སེམས་སངས་རྒྱས་དབྱེར་མེད་པ། །འཆི་ཁ་མི་འགྱོད་པ་ཞིག་འདོད་ན། འདི་ལྟ་བུ་ཞིག་ཉམས་ལེན་དགོས་པ་ཡིན། མཚན་ཉིད་ལྡན་པའི་བླ་མ་བསྟེན་ཤེས་དགོས། འཇིག་རྟེན་སྤྲོས་དང་བྲལ་བའི་བྱ་བཏང་ཞིག་ནི་དགོས། །སྐད་ཅིག་ཡེང་བ་མེད་པའི་བརྩོན་འགྲུས་ཤིག་ནི་དགོས། །གཅིག་པུར་རི་ཁྲོད་ཐུབ་པའི་སྡུག་བསྲན་ཞིག་ནི་དགོས། །ཟས་གོས་ཞེན་པ་བཅད་པའི་དཀའ་སྤྱད་ཅིག་ནི་དགོས། །གང་ཡང་གཉིས་སྣང་བྲལ་བའི་ལྟ་བ་ཞིག་ནི་དགོས། །ཡེངས་མེད་འོད་གསལ་འཁོར་ཡུག་སྒོམ་པ་ཞིག་ནི་དགོས། །བྱ་རྩོལ་སྤང་བླང་བྲལ་བའི་སྤྱོད་པ་ཞིག་ནི་དགོས། །རང་སེམས་སངས་རྒྱས་དབྱེར་མེད་འབྲས་བུ་ཞིག་ནི་དགོས། །ཆགས་འཛིན་ངོ་ལྐོག་མེད་པའི་དམ་ཚིག་ཅིག་ནི་དགོས། །ཀུན་ལ་འདོད་པའི་རློམ་སེམས་མེད་པ་ཞིག་ནི་དགོས། །དགོས་རབ་ཉམས་ལེན་མཛོད་ཅིག་སྐལ་ལྡན་ཆོས་མཛད་རྣམས། །

༈ ཡང་སྒོམ་གྱི་གྲོགས་གོ་ཆ་བཟང་པོ་ཞིག་འདོད་ན་འདི་ལྟར་མཛོད། གཡོག་འཁོར་མང་པོའི་དཔོན་པོ་བྱེད་པ་སྤང་། །རྒྱུ་ཟོག་མང་པོའི་བདག་པོ་བྱེད་པ་སྤང་། །རྟ་ནོར་མང་པོའི་འཚོ་སྐྱོང་བྱེད་པ་སྤང་། །ཉེ་བ་མང་པོའི་མགོ་འདྲེན་བྱེད་པ་སྤང་། །དགྲ་གཉེན་གཉིས་ལ་ཆགས་སྡང་བྱེད་པ་སྤང་། །ལས་དཀའ་སོ་ནམ་བཟོ་རིགས་བྱེད་པ་སྤང་། །ལོངས་སྤྱོད་ཁེ་གྲགས་འཚོ་སྐྱོང་བྱེད་པ་སྤང་། །ཆེ་ཐབས་གྲགས་ཐབས་མི་ཐབས་བྱེད་པ་སྤང་། །དེ་རྣམས་མ་སྤངས་སེམས་ཉིད་གཡེང་བས་ཁྱེར། །དེ་རྣམས་སྤངས་ན་སེམས་ཉིད་བཙན་ས་ཟིན་ན་སངས་རྒྱས་དངོས། །དེང་སང་དུས་ཀྱི་གནས་སྐབས་ལ། །བླ་མས་སློབ་མཁས་སློབ་མས་སྒོམ་མཁས་ཀྱི། །རང་སེམས་འདི་ནི་རྟོགས་མི་མང་པོའང་གདའ། །ཡང་དག་དོན་ནི་རྟོགས་མི་མང་པོའང་གདའ། །སེམས་ཉིད་ངོ་བོ་སྟོང་གསལ་ནི། །མི་གཅིག་ལ་འཆར་རྒྱུ་ཀུན་ལ་འཆར། །དེ་ཤེས་མི་ཀུན་ལ་དྲིས་དང་གསལ་བ་ཡིན། །མཁས་པ་མང་པོར་དྲིས་དང་ཤེས་ནས་འོང་། །ཐེ་ཚོམ་མེད་པར་གྱིས་ལ་སྒོམས། །

༈ ཡང་སྒོམ་ཆེན་ལ་ཞལ་གདམས་གནད་ཆེ་བ་ཞིག་ཡོད་དེ་བཤད་པར་བྱ། དེང་སང་དུས་ཀྱི་གནས་སྐབས་ལ། །བླ་མ་སློབ་མ་ལ་ལ་ཡིས། །བླ་མས་སློབ་ཉེས་སློབ་མས་བསྒོམ་ཉེས་ཀྱིས་མི་ལོ་བདུན་ཅུ་བརྒྱད་ཅུར་བསྒོམས་ན་ཡང་། རྣམ་རྟོག་མ་སྐྱེས་མི་འོང་མང་པོ་གདའ། །མིན་པ་ཡིན་སྣང་བྱེད་མི་མང་པོ་གདའ། །མི་ཤེས་བླུན་སྒོམ་བྱེད་པ་མང་པོ་གདའ། །དོན་མེད་བརྩོན་འགྲུས་བྱེད་པ་མང་པོ་གདའ། །བླ་མས་སློབ་མཁས་སློབ་མ་སྒོམ་མཁས་ཀྱིས། །རང་ཆེ་མ་བྱེད་མཁས་པ་རྣམས་ལ་དྲིས། །རང་བཟོ་མ་བྱེད་རང་སེམས་ཕུ་ཐག་ཆོད། །རང་མགོ་མ་བསྐོར་ཐེ་ཚོམ་མེད་པར་མཛོད། །དགེའོ། །དགེའོ། །དགེའོ། །སརྦ་མངྒ་ལཾ།། །།