ངོ་བོ་དལ་བ་ལ་བསམ་པ།
དང་པོ་ལུས་རྟེན་ལ་སྙིང་པོ་ལེན་པའི་ཕྱིར་དུ་དལ་འབྱོར་རྙེད་པར་དཀའ་བ་བསམ་པའི་རིམ་པ་ལ། ཁྲིད་ཀྱི་སྔོན་འགྲོས་གསལ་འདེབས་པ་དང་། ཐུན་གྱི་སྔོན་འགྲོས་བློ་སྦྱོང་བ་དང་གཉིས། དང་པོ་ལ་ངོ་བོ་དལ་བ་ལ་བསམ་པ། ཁྱད་པར་གྱི་འབྱོར་བ་ལ་བསམ་པ། རྙེད་དཀའི་དཔེ་ལ་བསམ་པ། གྲངས་ཀྱི་ཁྱད་པར་ལ་བསམ་པ་དང་བཞི། དང་པོ་ངོ་བོ་དལ་བ་ལ་བསམ་པ་ནི། ངག་འདོན་རྩ་བ་ལས། ཀྱེ་མ་ཞེས་མི་ལུས་འདི་ལྟ་བུ་ཤིན་ཏུ་རྙེད་པར་དཀའ་ཞིང་། རྙེད་ན་དོན་ཆེན་པོ་དང་ལྡན་པ་འདི་ཐོབ་ནས། ཐོབ་པ་ལ་སྙིང་པོ་མི་ལེན་པར་ཆུད་ཟོས་སུ་གཏོང་བ་ལ་བསམ་ན་ཤིན་ཏུ་ཕང་ཆེ་བས་ན་ངག་ཏུ་ཡང་ཀྱེ་མ་ཞེས་བོས་པའོ། །དེ་ལྟར་ཡང་སློབ་མ་ལ་སྤྲིངས་པ་ལས། གང་ཞིག་ཐོབ་ནས་སྐྱེ་བའི་རྒྱ་མཚོ་མཐར་འབྱིན་ཅིང་། །བྱང་ཆུབ་མཆོག་གི་ས་བོན་དགེ་བའང་འདེབས་གྱུར་པ། །ཡིད་བཞིན་ནོར་བུ་བས་ཀྱང་ཡོན་ཏན་ལྷག་པ་ཡི། །མི་ཉིད་དེ་ནི་སུ་ཞིག་འབྲས་བུ་མེད་པར་བྱེད། །ཅེས་གསུངས་པས་རྙེད་ན་དོན་ཆེ་ཚུལ་གྱི་རྒྱུ་མཚན་གསུམ་བསྟན་པ་ཡིན་ནོ། །དེ་ལ་དལ་བའི་དོན་ནམ་ངེས་ཚིག་ནི། སློབ་དཔོན་འཕགས་པས། དམྱལ་བ་ཡི་དྭགས་དུད་འགྲོ་དང་། །ཚེ་རིང་ལྷ་དང་ཀླ་ཀློ་དང་། །ལོག་ལྟ་སངས་རྒྱས་ཀྱིས་སྟོང་པ། །ལྐུགས་པ་འདི་དག་མི་ཁོམ་བརྒྱད། །ཅེས་གསུངས་པས། དམྱལ་བར་སྐྱེས་ན་ཚ་གྲང་གི་དབང་གིས་མི་ཁོམ། ཡི་དྭགས་སུ་སྐྱེས་ན་བཀྲེས་སྐོམ་དབུལ་ཕོངས་ཀྱིས་མི་ཁོམ། དུད་འགྲོར་སྐྱེས་ན་གཅིག་ལ་གཅིག་ཟ་དང་བཀོལ་སྤྱོད་ཀྱིས་མི་ཁོམ། ལྷ་ཚེ་རིང་པོར་སྐྱེས་ན་རྟོག་པའི་འདུ་ཤེས་མངོན་གྱུར་པ་མི་སྐྱེ་བས་དྲན་པ་ཉམས་པས་ཆོས་བྱེད་པའི་སེམས་ཀྱི་རྟེན་མི་ཁོམ། ཡུལ་མཐའ་འཁོབ་ཀླ་ཀློ་ལ་སོགས་རིགས་ངན་པར་སྐྱེས་ན་སངས་རྒྱས་ཀྱི་བསྟན་པ་རྣལ་མ་དང་མ་འཕྲད་པས་ལུས་སེམས་གཉིས་མི་ཁོམ། རྒྱུ་འབྲས་ལ་ཡིད་ཆེས་མེད་པའི་ཐེ་ཚོམ་དང་ལོག་ལྟ་ཅན་དུ་སྐྱེས་ན་སེམས་རྒྱུད་ལྟ་བ་ངན་པས་བསླད་པས་ཆོས་བྱེད་མི་ཁོམ། མུན་པའི་བསྐལ་པའམ་གླིང་བར་གྱི་འཇིག་རྟེན་དུ་སྐྱེས་ན་སངས་རྒྱས་བྱོན་པའི་སྐལ་བ་རྩ་བ་ནས་སྟོང་པས་ལུས་སེམས་གཉིས་མི་ཁོམ། ཡིད་ཀྱི་ཤེས་པ་དང་ངག་གི་སྨྲ་བ་ལྐུགས་པ་ཅན་དུ་སྐྱེས་ན་དབང་པོའི་ཤེས་པ་ལས་སུ་མི་རུང་བས་ལུས་སེམས་གཉིས་མི་ཁོམ་པ་སྟེ་མི་ཁོམ་པའི་ལྡོག་ཆ་སོ་སོ་བརྒྱད་པོ་ལ་ད་རེས་ཀྱི་ལུས་རྟེན་འདི་ཉིད་མ་སྐྱེ་བར་ཐར་ཏེ། ཆོས་སྒྲུབ་ན་བསྒྲུབ་རུང་གི་དལ་བ་ཐོབ་པས་ན་དལ་བ་བརྒྱད་ཅེས་མིང་བཏགས་པའོ།།