དགོངས་གཏེར་ཐུགས་ཀྱི་ཀློང་གསལ་ལས་ཚེ་དཔག་དཀར་པོའི་དབང་ནམ་མཁའི་ཐིག་ལེ།
དགོངས་གཏེར་ཐུགས་ཀྱི་ཀློང་གསལ་ལས༔ ཚེ་དཔག་དཀར་པོའི་དབང་ནམ་མཁའི་ཐིག་ལེ་བཞུགས་སོ༔
ན་མོ་ཨཱ་ཡུཛྙཱ་ན་ཡེ་ཚེ་དཔག་དཀར་པོའི་དབང་སྒྲུབ་བྲི༔ མཎྜལ་པདྨ་འདབ་བརྒྱད་དམ༔ ཡང་ན་འབྲུ་ཡི་ཚོམ་བུ་བཀོད༔ དེ་སྟེང་བུམ་པ་རྫས་ལྡན་བཞག༔ ཚེ་གཏོར་མཆོད་པ་མདའ་དར་བཤམ༔ རྒྱས་པར་གནམ་ཆོས་གཞུང་ལྟར་དུ༔ སྐྱབས་སེམས་སྔོན་འགྲོ་མཆོད་བྱིན་རླབས༔ རྩ་གསུམ་སྤྱི་ཡི་ལས་བྱང་ནང་༔ འདི་ཡི་མངོན་རྟོགས་བཙུད་ལ་འདོན༔ བསྡུ་ན་འདི་ཉིད་གཞུང་ལྟར་དུ༔ དྲན་རྫོགས་བསྒོམས་ལ་བསྙེན་པས་འཐུསཿ བསང་སྦྱང་སོགས་ཀྱང་མི་དགོས་ཏེ༔ མཁའ་ལ་འཇའ་ཤར་བཞིན་དུ་བསྒོམ༔ རང་དང་མདུན་གྱི་བུམ་པ་གཞལ་ཡས་ཁང་མཚན་ཉིད་རྫོགས་ཤིང་བསམ་གྱིས་མི་ཁྱབ་པའི་དབུས་སུ༔ བཅོམ་ལྡན་འདས་ཚེའི་བདག་པོ་སྐུ་མདོག་ཉ་རྒྱས་
ཀྱི་ཟླ་བ་ལྟ་བུ་ལོངས་སྐུའི་རྒྱན་རྫོགས་པ་ཕྱག་མཉམ་བཞག་ན་ཚེའི་བུམ་པ་འཛིན་པ༔ ཞབས་སྐྱིལ་ཀྲུང་དུ་བཞུགས་པ་ཡུམ་མཆོག་དམར་མོ་མདའ་དར་དང་ཚེ་བུམ་འཛིན་པས་འཁྱུད་པར་བསྐྱེད་ལ༔ དེའི་གནས་གསུམ་དུ་ཡི་གེ་འབྲུ་གསུམ་དང་ཐུགས་དབུས་ཟླ་སྟེང་ཧཱུྃཡི་མཐར་སྔགས་ཕྲེང་གཡས་སུ་འཁོར་བའི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་བཅས་ཀྱི་བྱིན་རླབས༔ འཁོར་འདས་ཀྱི་ཚེ་བཅུད་ཐམས་ཅད་འོད་ཟེར་གྱི་རྣམ་པར་བསྡུསཿ བོདག་དང་བུམ་བསྐྱེད་ལ་ཐིམ༔ བུམ་ལྷའི་སྐུ་ལས་བདུད་རྩིའི་རྒྱུན་བབས་བུམ་པ་གང་བར་གྱུར༔ ཨོཾ་ཨཱཿཧཱུྃ་
ཧྲཱིཿ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱཿ ཞེས་ཅི་ནུས་བཟླ་བར་བྱའོ༔ ཨནྡྷཾ་སོགས། འཇིག་རྟེན་འདྲེན་པའི་གཙོ་བོ་ཚེ་དཔག་མེད༔ དུས་མིན་འཆི་བ་མ་ལུས་འཇོམས་པའི་དཔལ༔ མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས༔ སངས་རྒྱས་ཚེ་དཔག་མེད་ལ་ཕྱག་འཚལ་བསྟོད༔ དེ་ནས་སློབ་མ་རྣམས་འདུས༔ སྔོན་འགྲོ་བགེགས་བསྐྲད་གྲུབ་ན་ལེགས་ཁྲུས་བྱས་མཎྜལ་ཕུལ་ལ་འོ་ན་ད་ལམ་ཁྱེད་རྣམས་ལ་མགོན་པོ་ཚེ་དཔག་མེད་ཀྱི་དབང་བསྐུར་བའི་ཐོག་མར་ལོ་རྒྱུས་ཟུར་ཙམ་ཞིག་ཞུ་ན༔ མཆོག་ཐུན་མོང་གི་དངོས་གྲུབ་གང་བསྒྲུབས་ཀྱང་༔ དེ་སྒྲུབ་ལོང་ཡོད་པའི་ཕྱིར་ཚེ་བསྲིང་བའི་ཐབས་ཤིག་ལ་འབད་དགོས་ཏེ༔ གསང་བ་འདུས་པའི་རྒྱུད་ལས༔ ལས་ཚོགས་རིམ་པ་བསྟན་པ་ནི༔ ཐོག་མར་རིག་འཛིན་ཚེ་ཉིད་བསྒྲུབ༔ ཅེས་དང་༔ གསང་འདུས་ནང་སྒྲུབ་ལསཿ མདོར་ན་རང་དོན་གཞན་དོན་གདུལ་བྱ་ཕྲིན་ལས༔ འདོད་པའི་དོན་གང་བསྒྲུབས་ཀྱང་རྣལ་འབྱོར་པ་ཚེ་རིང་ན་ཅི་བསམ་འགྲུབ་པས༔ ཚེ་སྒྲུབ་ལ་ནན་ཏན་དུ་བྱའོ༔ ཞེས་པདྨ་རྒྱལ་པོ་ངའི་ཐ་ཚིག་གོ༔ ཞེས་དང་༔ རྒྱ་གར་གྱི་པཎྜི་ཏ་ངག་གི་དབང་ཕྱུག་གི་ཞལ་ནས༔ འཁོར་བར་སྲོག་
ལས་གཅེས་པ་ནི༔ འགའ་ཡང་ཡོད་པར་མ་མཐོང་བས༔ དེས་ན་མྱུར་དུ་ཐབས་མང་པོས༔ འཆི་བ་བསླུ་བར་ཡང་དག་སྦྱོརཿ ཞེས་གསུངས་སོ༔ འོ་ན་ཆེ་བསྲིང་བའི་ཐབས་ཡོད་པ་ཡིན་ནམ་ཞེ་ན༔ གང་ཕྱིར་རིག་པར་ཐབས་སྦྱར་བས༔ དཀའ་བ་ཅུང་ཟད་ཡོད་མ་ཡིན༔ ཞེས་གསུངས་སོ༔ ཐབས་ལ་ཡང་ཕྱི་རོལ་པའི་ལུགས༔ ལྷ་དབང་ཕྱུག་ཆེན་པོར་གསོལ་བ་བཏབ་ནས་ཚེ་བསྲིང་ཐབས༔ གསེར་སླད་མེད་ཟོས་ནས་ཚེ་བསྲིང་ཐབས༔ དངུལ་ཆུའི་བཅུད་ལེན་ལ་བརྟེན་ནས་ཚེ་བསྲིང་ཐབས༔ སྨན་དང་རྫས་ཀྱི་བཅུད་ལེན་ལ་བརྟེན་ནས་ཚེ་བསྲིང་ཐབསཿ དེ་འདྲ་རེ་རེ་ཐུབ་ན་ཡང་ལོ་ལྔ་བརྒྱ་ཐུབ་པ་ཡོད་སྐད་དེ༔ ཐུན་མོང་གི་དངོས་གྲུབ་ཚེ་རིང་བ་ཙམ་ལས༔ མཆོག་གི་དངོས་གྲུབ་མི་འགྲུབ༔ ནང་པ་སངས་རྒྱས་པའི་ལུགས་མགོན་པོ་ཚེ་དཔག་ཏུ་མེད་པའི་སྒོ་ནས་ཚེ་བསྲིང་ན༔ མཆོག་གི་དངོས་གྲུབ་རིགས་དྲུག་གི་སྐྱེ་སྒོ་ཆོད་ནས་བདེ་བ་ཅན་དུ་སྐྱེ་སྟེ༔ མྱུར་དུ་འཚང་རྒྱ་བ་དང་༔ གནས་སྐབས་སུ་ཐུན་མོང་གི་དངོས་གྲུབ་ཚེ་རིང་བ་ཞོར་ལ་འགྲུབ་པ་ཡིན༔ དེ་ཡང་ནུབ་ཕྱོགས་བདེ་བ་ཅན་གྱི་ཞིང་ཁམས་ན༔ ཆོས་སྐུ་སྣང་བ་མཐའ་
ཡས་བཞུགས་ཏེ༔ དེའི་སྐུ་ལས་བདེ་གཤེགས་རིགས་ཀྱི་ཚེ་དཔག་མེད་དཀར་པོར་སྤྲུལ༔ གསུང་ལས་པདྨ་རིགས་ཀྱི་ཚེ་དཔག་མེད་དམར་པོར་སྤྲུལ༔ ཐུགས་ལས་རྡོ་རྗེ་རིགས་ཀྱི་ཚེ་དཔག་མེད་མཐིང་གར་སྤྲུལ༔ ལྟེ་བ་ནས་རིན་ཆེན་རིགས་ཀྱི་ཚེ་དཔག་མེད་སེར་པོར་སྤྲུལ་གསང་བ་ནས་ལས་ཀྱི་རིགས་ཀྱི་ཚེ་དཔག་མེད་ལྗང་གུར་སྤྲུལ་ཏེ༔ ཚེ་དཔག་མེད་རིགས་ལྔ་ཞེས་ཡོངས་སུ་གྲགས་སོ༔ གཞན་ཡང་ཡེ་ཤེས་ཀྱི་ཆ་ལས་ཡེ་ཤེས་ཚེ་དཔག་མེད་སྤྲུལཿ ཡོན་ཏན་གྱི་ཆ་ལས་ཡོན་ཏན་ཚེ་དཔག་མེད་སྤྲུལ་ལྷུན་གྱིས་གྲུབ་ཅིང་གཡོ་བ་མེད་པའི་ཆ་ལས་མི་གཡོ་ཚེ་དཔག་མེད་སྤྲུལ༔ མཁྱེན་པའི་ཆ་ལས་ཀུན་གཟིགས་ཚེ་དཔག་མེད་སྤྲུལ༔ དེ་རྣམས་ལ་ཚེ་དཔག་མེད་ལྷ་དགུ་ཞེས་གྲགས་སོ༔ གཞན་ཡང་ཕུང་ཁམས་སྐྱེ་མཆེད་རྣམས་ལ་ལྷ་དང་ལྷ་མོ་དཔག་ཏུ་མེད་པར་སྤྲུལ་ནས་འཆི་མེད་ཚེའི་ལྷ་ཚོགས་ཞེས་གྲགས་སོ༔ རིགས་ལས་གུ་རུ་མཚོ་སྐྱེས་རྡོ་རྗེ་སྤྲུལ་པས༔ འཆི་མེད་ཚེའི་རིག་འཛིན་པདྨ་འབྱུང་གནས་ཞེས་གྲགས་སོ༔ དེ་ལྟར་ཚེ་དཔག་མེད་རིགས་མང་བའི་ནང་ནས༔ ད་རེས་སྐུའི་ཚེ་དཔག་མེད་དཀར་པོ་དེའི་དབང་བསྐུར་བ་ཡིན༔ འོ་ན་ཚེ་དཔག་
དཀར་པོ་འདི་རྒྱུད་གང་ནས་བཤད་ཅེ་ན༔ ཚེ་རྒྱུད་བདུད་རྩི་འཁྱིལ་བ༔ རྡོ་རྗེ་ཕྲེང་བའི་རྒྱུད༔ གནམ་ལྕགས་རྡོ་རྗེའི་རྒྱུད་སོགས་ལས་དངོས་སུ་གསུངས་ཤིང་༔ རྟ་མཆོག་རོལ་པའི་རྒྱུད་སོགས་ལས་ཞོར་ལ་གསུངས་པ་ཡང་མང་དུ་ཡོད༔ རྒྱུད་དེ་དག་གསུངས་པའི་མན་ངག་གང་ལས་བརྒྱུད་ཅེ་ན༔ གྲུབ་པའི་རྒྱལ་མོས་མཛད་པའི་ཚེ་དཔག་དཀར་པོ༔ རས་ཆུང་བ་ནས་བརྒྱུད་པ་དང་༔ ཨུ་རྒྱན་གྱིས་མཛད་པའི་ཚེ་དཔག་དཀར་པོ༔ རཏྣ་གླིང་པ་དང་༔ པདྨ་གླིང་པ་དང་༔ ལས་འཕྲོ་གླིང་པ་དང་༔ གཏེར་བཞེད་སྙིང་པོ་རྣམས་ཀྱི་གཏེར་ནས་བྱོན་པ་ཡང་ཅི་རིགས་པ་ཐོབ་པས༔ བྱིན་རླབས་ཀྱི་བརྒྱུད་པ་གཅིག་ཏུ་འདུས་པ་ཡང་ཡིན་ལ༔ ཁྱད་པར་དུ་སྤྲུལ་སྐུ་མི་འགྱུར་རྡོ་རྗེའི་དགོངས་གཏེར་ལས་བྱུང་བ་ཡིན་ཏེ༔ ཆོས་ཡང་དག་པར་སྡུད་པའི་མདོ་ལས༔ བྱང་ཆུབ་སེམས་དཔའ་བསམ་པ་རྣམ་པར་དག་པ་ལ་ལ་ནི༔ རང་གི་ཡིད་ཀྱི་སྤྱོད་པ་ཉིད་ལ་གདམས་ངག་དང་རྗེས་སུ་བསྟན་པ་ཐམས་ཅད་འབྱུང་ངོ་༔ ཞེས་པ་དང་༔ ལུང་སྐོར་དགུ་པའི་ལེའུ་བརྒྱད་པ་ནས༔ ཆོས་ཀྱི་དབྱིངས་ཀྱི་གབ་གཏེར་ཕྱུང་༔ སྐུ་གསུམ་བསྟན་པ་དར་ཞིང་
རྒྱསཿ བདེ་གཤེགས་རྒྱལ་བའི་དགོངས་གཏེར་ཕྱུང་༔ ཆོས་སྒོ་མཐའ་ཡས་བསྟན་པ་རྒྱས༔ རིག་འཛིན་བླ་མའི་ཐུགས་གཏེར་ཕྱུང་༔ མན་ངག་རྒྱ་མཚོའི་བསྟན་པ་རྒྱས༔ ཡིད་བཞིན་ནོར་བུའི་གཙུག་གཏེར་ཕྱུང་༔ དགོས་འདོད་ཡིད་བཞིན་བསྟན་པ་རྒྱས༔ ཞེས་གསུངས་པས༔ བརྒྱུད་པ་ཐག་རུལ་བྲིང་རུལ་དུ་མ་སོང་༔ བརྒྱུད་པ་ཉེ་བས་མཁའ་འགྲོའི་ཁ་རླངས་ཐུ་ལེ་བ༔ མན་ངག་སྣོད་དྲིས་མ་ཁྱེར༔ གདམས་ངག་ཚོང་འདུས་ཀྱི་འོ་མ་ལྟར་བསྲེ་བསླད་དུ་མ་སོང་བ༔ རྡོ་རྗེའི་གསུང་བསླད་མེད་བྱིན་རླབས་ཀྱི་སོ་མ་ཉམས་པ་ཡིན༔ འདིའི་ཕན་ཡོན་རྒྱུད་ལས༔ ཚེ་འདི་ཉིད་ལ་འོད་གོང་འཇའ་ལུས་རྡོ་རྗེའི་སྐུར་འགྱུར་རོ༔ སྐུ་གདུང་རིང་བསྲེལ་གྱི་ཕུང་པོར་འགྱུརཿ གལ་ཏེ་དུས་ལ་བབས་ཏེ་འཆི་བར་གྱུར་ན་ཡང་སངས་རྒྱས་སྟོང་ཕྲག་མང་པོས་ལུང་བསྟན་པ་དང་༔ བདེ་ཆེན་དག་པའི་ཞིང་ཁམས་སུ་སྐྱེ་བར་འགྱུར་རོ༔ ཞེས་གསུངས་པ་དང་༔ སྤྱིར་ཐེག་དམན་གྱི་ཆོས་ཐམས་ཅད་སྐྱབས་འགྲོ་ལ་འདུས༔ ཐེག་ཆེན་མདོའི་ཆོས་ཐམས་ཅད་སེམས་བསྐྱེད་ལ་འདུས༔ སྔགས་ཀྱི་ཆོས་ཐམས་ཅད་དབང་ལ་འདུས་པར་ས་པཎ་ལ་སོགས་མཁས་པ་ཀུན་
གྱིས་བཞེད་དེ༔ དེའི་ཕྱིར་ཆོས་ཐམས་ཅད་དབང་འདི་ལ་མ་འདུས་པ་མེད་པ་ཡིན༔ དབང་ཐོབ་ནས་ཉམས་སུ་བླངས་ན༔ རབ་ཚེ་འདིར་འཚང་རྒྱ༔ འབྲིང་བར་དོར་འཚང་རྒྱ༔ ཐ་མ་ཚེ་འཕོས་ནས་དག་པའི་ཞིང་ཁམས་སུ་སྐྱེ་ནས་ལུས་རྟེན་དེ་ལ་འཚང་རྒྱ་བར་གསར་རྙིང་རྒྱུད་སྡེ་ཐམས་ཅད་ཞལ་མཐུན༔ དབང་ཐོབ་ནས་ཉམས་སུ་མ་བླངས་ན་ཡང་༔ དམ་ཚིག་མ་ཉམས་པ་ཁོ་ནས་སྐྱེ་བ་བདུན་ནས་འཚང་རྒྱ་བར་བཤད༔ དེ་ལྟར་གནས་སྐབས་ཚེའི་བར་ཆད་སེལ་ཞིང་༔ འབྲས་བུ་རྫོགས་པའི་སངས་རྒྱས་ཡུན་མི་འགོར་བར་ཐོབ་པའི་ཐབས༔ དབང་ཟབ་མོ་འདི་ཞུ་བའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད༔ བླ་མ་དུས་གསུམ་སངས་རྒྱས་དང་༔ ཚེ་དཔག་མེད་པ་ཡབ་ཡུམ་ལ༔ གསོལ་བ་འདེབས་སོ་ཚེ་དབང་ཞུ༔ བདག་ལ་ཚེ་དབང་བསྐུར་དུ་གསོལ༔ ལན་གསུམ་བླ་མ་དང་མདུན་བསྐྱེད་ཚེ་དཔག་མེད་པ་དབྱེར་མེད་པའི་དྲུང་དུ་སྐྱབས་འགྲོ་སེམས་བསྐྱེད་ཞུ་བའི་ཕྱིར༔ བདུན་རྣམ་དག་འདིའི་རྗེས་ཟློས་མཛོད༔ དཀོན་མཆོག་གསུམ་ལ་བདག་སྐྱབས་མཆི༔ སྡིག་པ་མི་དགེ་སོ་སོར་བཤགས༔ འགྲོ་བའི་
དགེ་ལ་རྗེས་ཡི་རང་༔ སངས་རྒྱས་བྱང་ཆུབ་ཡིད་ཀྱིས་བཟུང་༔ སངས་རྒྱས་ཆོས་དང་ཚོགས་མཆོག་ལ༔ བྱང་ཆུབ་བར་དུ་སྐྱབས་སུ་མཆི༔ རང་གཞན་དོན་གཉིས་རབ་བསྒྲུབ་ཕྱིར༔ བྱང་ཆུབ་མཆོག་གི་སེམས་ནི་བསྐྱེད་པར་བགྱི༔ བྱང་ཆུབ་མཆོག་གི་སེམས་ནི་བསྐྱེད་བགྱིས་ནས༔ སེམས་ཅན་ཐམས་ཅད་བདག་གི་མགྲོན་དུ་གཉེར༔ བྱང་ཆུབ་སྤྱོད་མཆོག་སྤྱོད་མཆོད་ཡིད་འོང་སྤྱད་པར་བགྱི༔ འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག༔ ཅེས་ལན་གསུམ་མམ་རྗེས་མ་གསུམ༔ ཀུ་ཤས་སློབ་མ་བྲན་ཚུལ་བྱས་ལ༔ ཨོཾ་བྱ་གྲི་ཝ་ཧཱུྃ་ཕཊ༔ ཨོཾ་སྭ་བྷ་ཝ་སོགས། སྟོང་པའི་ངང་ལས་པདྨ་དང་ཟླ་བའི་སྟེང་དུ་ཁྱེད་རང་རྣམས་ཀྱི་རྣམ་པར་ཤེས་པའི་ངོ་བོ་ཡི་གེ་ཧཱིཿདཀར་པོ་ཡོངས་སུ་གྱུར་པ་ལས༔ བཅོམ་ལྡན་འདས་ཚེའི་བདག་པོ་སྐུ་མདོག་ཉ་རྒྱས་ཀྱི་ཟླ་བ་ལྟ་བུ༔ ལོངས་སྐུའི་རྒྱན་རྫོགས་པ་ཕྱག་མཉམ་བཞག་ན་ཚེའི་བུམ་པ་འཛིན་པ༔ ཞབས་སྐྱིལ་ཀྲུང་དུ་བཞུགས་པ་ཡུམ་མཆོག་དམར་མོ་མདའ་དར་དང་ཚེ་བུམ་འཛིན་པས་འཁྱུད་པར་བསྐྱེད༔ དེའི་དཔྲལ་བར་ཨོཾ་དཀར་པོ༔ མགྲིན་པ་ཨཱདམར་པོ༔ ཐུགས་ཀའི་ཆ་སྨད་དུ་ཧཱུྃ་སྔོན་པོ༔ ཐུགས་ཀའི་དབུས་སུ་ཧཱུྃ༔ཡིག་དཀར་པོས་
མཚན་པར་སྒོམས་ཤིག༔ དེ་ནས་མདུན་བསྐྱེད་ཀྱི་ཐུགས་ཀ་ནས་ཆེའི་ལྷ་མོ་མདའ་དར་དང་བུམ་པ་ཐོགས་པ་དཔག་ཏུ་མེད་པ་འཕྲོས༔ ཁྱེད་རང་རྣམས་ཀྱི་ཚེ་ཡར་བ་དང་ཉམས་པ་ཕྱི་སྣོད་འབྱུང་བ་ལྔའི་བཅུད༔ ནང་བཅུད་ལྷ་ཀླུ་མི་གསུམ་གྱི་ཚེ་དང་བཅུད༔ རྒྱལ་བ་སྲས་བཅས་ཀྱི་ཐུགས་རྗེ་བྱིན་རླབས་ཐམས་ཅད་འོད་ཟེར་གྱི་ངོ་བོར་བསྡུས་ནས་ཁྱེད་རང་རྣམས་ལ་སིབ་སིབ་ཐིམ་པས༔ ཤ་ཁྲག་དྲོད་དབུགས་ཀྱི་ཚེ་ཉམས་པ་ཐམས་ཅད་སོར་ཆུད་པར་སྒོམས་ཤིག༔ སྤོས་རོལ་མོ་དབྱངས་དང་བཅས༔ མདའ་དར་གཡབ་ཅིང་༔ ཧཱི་དྲི་ཟའི་ལག་ནས་ལྕགས་ཀྱུ་ཡིས༔ དཀར་འཕྲོ་མ་ཡིས་ཚེ་ཁུག་ཅིག༔ གཤིན་རྗེའི་ལག་ནས་ཞགས་པ་ཡིས༔ གསེར་མདོག་མ་ཡིས་ཚེ་ཁུག་ཅིག༔ ཀླུ་བདུད་ལག་ནས་ལྕགས་སྒྲོག་གིས༔ དམར་འོད་མ་ཡིས་ཚེ་ཁུག་ཅིག༔ གནོད་སྦྱིན་ལག་ནས་དྲིལ་བུ་ཡིས༔ སྙི་ལེ་མ་ཡིས་ཚེ་ཁུགཅིག༔ ཚངས་པའི་ལག་ནས་སེར་མོས་ཁུག༔ བརྒྱ་བྱིན་ལག་ནས་དཀར་མོས་ཁུག༔ དགའ་བོའི་ལག་ནས་དམར་མོས་ཁུག༔ འཇོག་པོའི་ལག་ནས་ལྗང་མོས་ཁུག༔ སེར་མོས་ས་ཡི་ཚེ་ཁུག་ཅིག༔ བཅུད་བསྡུས་ཤ་ཉམས་སོར་ཆུད་མཛོད།
དཀར་མོས་ཆུ་ཡི་ཚེ་ཁུག་ཅིག༔ བཅུད་བསྡུས་ཁྲག་ཉམས་སོར་ཆུད་མཛོད༔ དམར་མོས་མེ་ཡི་ཚེ་ཁུག་ཅིག༔ བཅུད་བསྡུས་དྲོད་ཉམས་སོར་ཆུད་མཛོད༔ ལྗང་མོས་རླུང་གི་ཚེ་ཁུག་ཅིག༔ བཅུད་བསྡུས་དབུགས་ཉམས་སོར་ཆུད་མཛོད༔ སྔོན་མོས་ནམ་མཁའི་ཚེ་ཁུག་ཅིག༔ བཅུད་བསྡུས་ཚེ་ཉམས་སོར་ཆུད་མཛོད༔ ཨོཾ་ཨཱཿཧཱུྃ་ཧི༔ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱཿ ཨཱ་ཡུ་ཤེ་ཛ་ཛཿ རྡོ་རྗེ་མགོར་བཞག་པཿ ཏིཥྛ་བཛྲ༔ དེ་ནས་བུམ་པ་ལག་ཏུ་ཐོགས་ལ༔ བུམ་པ་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་ཤིང་བསམ་གྱིས་མི་ཁྱབ་པའི་དབུས་སུ༔ བཅོམ་ལྡན་འདས་ཚེའི་བདག་པོ་སྐུ་མདོག་ཉ་རྒྱས་ཀྱི་ཟླ་བ་ལྟ་བུ༔ ལོངས་སྐུའི་རྒྱན་རྫོགས་པ་ཕྱག་མཉམ་བཞག་ན་ཚེའི་བུམ་པ་འཛིན་པ༔ ཞབས་སྐྱིལ་ཀྲུང་དུ་བཞུགས་པ་ཡུམ་མཆོག་དམར་མོས་མདའ་དར་དང་ཚེ་བུམ་འཛིན་པས་འཁྱུད་པ༔ དེའི་སྐུ་ལས་བདུད་རྩིའི་རྒྱུན་བབས་པས་བུམ་པ་གང་༔ ཕྱུར་ཞིང་ལུད་པས་ཁྱེད་རང་རྣམས་ཀྱི་ཚངས་བུག་ནས་ཞུགས་སྤྱི་བོ་བདེ་ཆེན་གྱི་འཁོར་ལོ་གང་༔ ལུས་ཀྱི་སྒྲིབ་པ་དག༔ སྐུ་བུམ་པའི་དབང་ཐོབ༔ ལམ་བསྐྱེད་རིམ་བསྒོམ་པར་དབང་༔ འབྲས་
བུ་སྤྲུལ་པའི་སྐུ་འགྲུབ་པའི་སྐལ་པ་དང་ལྡན་པར་སྒོམས་ཤིག༔ ཧཱུྃ༔ ཚེ་བདག་ཟླ་དཀར་ཡོངས་སུ་རྒྱས༔ འདི་ནི་ལྷག་པའི་ལྷ་མཆོག་སྟེ༔ སློབ་མ་ཁྱོད་ཀྱིས་བསྟེན་ནུས་ན༔ ལྷ་ཡི་རྔ་ཆེན་ཇི་བཞིན་ནོ༔ ཨོཾ་ཨཱ༔ཧཱུྃ་ཧཱིཿ ཚེ་དཔག་འདི་ལ་བསྩལ་ལགས་ཀྱིསཿ འདི་ལ་འགོ་བར་མཛད་དུ་གསོལ༔ དངོས་གྲུབ་མ་ལུས་ཀུན་སྩོལ་ཅིག༔ སྐུ་ཡི་སྒོ་ནས་བྱིན་གྱིས་རློབས༔ ལུས་ཀྱི་མི་མཐུན་བཟློག་ཏུ་གསོལ༔ ཨོཾ་ཨཱ༔ཧཱུྃ་ཧཱུྃ༔ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱཧཱཿ ཀཱ་ཡ་ཨ་བྷི་ཥིཉྩ་ཨཱ༔ ཞེས་བུམ་པ་མགོར་བཞག༔ འཇིག་རྟེན་འདྲེན་པའི་གཙོ་བོ་ཚེ་དཔག་མེད༔ དུས་མིན་འཆི་བ་མ་ལུས་འཇོམས་པའི་དཔལ༔ མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས༔ ཚེ་དཔག་མེད་པའི་སྐུ་ཡི་བཀྲ་ཤིས་ཤོག༔ ཅེས་ནས་གཏོར༔ བུམ་པ་ནས་བདུད་རྩིའི་རྒྱུན་བབས༔ ཚངས་བུག་ནས་ཞུགས༔ མགྲིན་པ་ལོངས་སྤྱོད་ཀྱི་འཁོར་ལོ་གང་༔ ངག་གི་སྒྲིབ་པ་དག་གསང་བའི་དབང་ཐོབ༔ ལམ་རྩ་རླུང་བསྒོམ་པར་དབང་༔ འབྲས་བུ་ལོངས་སྐུ་འགྲུབ་པར་སྒོམས་ཤིག༔ ཧཱུྃ༔ ཚེ་བདག་ཟླ་དཀར་ཡོངས་སུ་རྒྱས༔ འདི་ནི་ལྷག་པའི་
ལྷ་མཆོག་སཿ སློབ་མ་ཁྱོད་ཀྱིས་བསྟེན་ནུས་ན༔ ལྷ་ཡི་རྔ་ཆེན་ཇི་བཞིན་ནོ༔ ཨོྃ་ཨཱ༔ཧཱུྃ་ཧི༔ ཚེ་དཔག་འདི་ལ་བསྩལ་ལགས་ཀྱིས༔ འདི་ལ་འགོ་བར་མཛད་དུ་གསོལ༔ དངོས་གྲུབ་མ་ལུས་ཀུན་སྩོལ་ཅིག༔ གསུང་གི་སྒོ་ནས་བྱིན་གྱིས་རློབས༔ ངག་གི་མི་མཐུན་བཟློག་ཏུ་གསོལ༔ ཨོཾ་ཨཱཿཧཱུྃ་ཧིཿ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱཿ ཝཀ་ཨ་བྷི་ཥིཉྩ་ཨཱ༔ བུམ་པ་མགྲིན་པར་བཞག༔ འཇིག་རྟེན་འདྲེན་པའི་གཙོ་བོ་ཚེ་དཔག་མེད༔ དུས་མིན་འཆི་བ་མ་ལུས་འཇོམས་པའི་དཔལ༔ མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས༔ ཚེ་དཔག་མེད་པའི་གསུང་གི་བཀྲ་ཤིས་ཤོག༔ ཅེས་ནས་གཏོར༔ ཡང་བུམ་པའི་བདུད་རྩི་ཆེར་ལུད་ཚངས་བུག་ནས་ཞུས་གས༔ སྙིང་ག་ཆོས་ཀྱི་འཁོར་ལོ་གང་༔ ཡིད་ཀྱི་སྒྲིབ་པ་དག༔ ཤེས་རབ་ཡེ་ཤེས་ཀྱི་དབང་ཐོབ༔ ལམ་རྩ་རླུང་ཐིག་ལེ་བསྒོམ་པ་ལ་དབང་༔ འབྲས་བུ་ཆོས་སྐུ་འགྲུབ་པར་སྒོམས་ཤིག༔ ཧཱུྃ༔ ཚེ་བདག་ཟླ་དཀར་ཡོངས་སུ་རྒྱས༔ འདི་ནི་ལྷག་པའི་ལྷ་མཆོག་སྟེ༔ སློབ་མ་ཁྱོད་ཀྱིས་བསྟེན་ནུས་ན༔ ལྷ་ཡི་རྔ་ཆེན་ཇི་བཞིན་ནོ༔ ཨོཾ་ཨཱཿཧཱུྃ་ཧཱིཿ ཚེ་དཔག་འདི་ལ་བསྩལ་ལགས་ཀྱིས༔ འདི་ལ་
འགོ་བར་མཛད་དུ་གསོལ༔ དངོས་གྲུབ་མ་ལུས་ཀུན་སྩོལ་ཅིག༔ ཐུགས་ཀྱི་སྒོ་ནས་བྱིན་གྱིས་རློབས༔ ཡིད་ཀྱི་མི་མཐུན་བཟློག་ཏུ་གསོལ༔ ཨོཾ་ཨཱཿཧཱུྃ་ཧྲཱིཿ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱཿ ཙིཏྟ་ཨ་བྷི་ཥིཉྩ་ཧཱུྃ༔ ཞེས་སྙིང་གར་བཞག༔ འཇིག་རྟེན་འདྲེན་པའི་གཙོ་བོ་ཚེ་དཔག་མེད༔ དུས་མིན་འཆི་བ་མ་ལུས་འཇོམས་པའི་དཔལ༔ མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས༔ ཚེ་དཔག་མེད་པའི་ཐུགས་ཀྱི་བཀྲ་ཤིས་ཤོག༔ ཅེས་ནས་གཏོརཿ ཡང་བུམ་པ་ནས་བདུད་རྩི་ལུད་པས༔ ཚངས་བུག་ནས་ཞུགས༔ ལྟེ་བ་སྤྲུལ་པའི་འཁོར་ལོ་སྤྱི་གཙུག་མན་ཆད་རྐང་མཐིལ་ཡན་ཆད་གང་༔ སྒོ་གསུམ་ཆ་སྙོམས་ཀྱི་སྒྲིབ་པ་དག༔ བཞི་པ་ཚིག་དབང་རིན་པོ་ཆེ་ཐོབ༔ ལམ་ཕྱག་རྒྱ་ཆེན་པོ་བསྒོམ་པར་དབང་༔ འབྲས་བུ་ངོ་བོ་ཉིད་སྐུ་འགྲུབ་པར་སྒོམས་ཤིག༔ ཧཱུྃ༔ ཚེ་བདག་ཟླ་དཀར་ཡོངས་སུ་རྒྱས༔ འདི་ནི་ལྷག་པའི་ལྷ་མཆོག་སྟེ༔ སློབ་མ་ཁྱོད་ཀྱིས་བསྟེན་ནུས་ན༔ ལྷ་ཡི་རྔ་ཆེན་ཇི་བཞིན་ནོ༔ ཨོཾ་ཨཱཿཧཱུྃ་ཧྲི་ཚེ་དཔག་འདི་ལ་བསྩལ་ལགས་ཀྱིས༔ འདི་ལ་འགོ་བར་མཛད་དུ་གསོལ༔ དངོས་གྲུབ་མ་ལུས་ཀུན་སྩོལ་ཅིག༔ ཡེ་
ཤེས་ལྔ་ཡི་དབང་བསྐུར་ལ༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཨོཾ་ཨཱཿཧཱུྃ་ཧི༔ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱཧཱ༔ སརྦ་ཨ་བྷི་ཥིཉྩ་ཧི༔ ཞེས་ལྟེ་བར་བཞག་གོ༔ འཇིག་རྟེན་འདྲེན་པའི་གཙོ་བོ་ཚེ་དཔག་མེད༔ དུས་མིན་འཆི་བ་མ་ལུས་འཇོམས་པའི་དཔལ༔ མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས་ཚེ་དཔག་མེད་ཀྱི་སྐུ་བཞི་ཡོངས་རྫོགས་བཀྲ་ཤིས་ཤོག༔ ཅེས་ནས་གཏོར༔ དེ་ལྟར་བུམ་ཆུ་ལན་བཞི་བླུད་པའམ༔ མཇུག་འདིར་ལན་གཅིག་བླུད་ཀྱང་ཆོག༔ དེ་ལྟར་བུམ་པ་ལ་བརྟེན་ནས་དབང་བཞི་རྫོགས་པར་ཐོབ་ནས༔ རྡོ་རྗེ་སློབ་དཔོན་གྱི་དབང་གི་དོན་དུ༔ གཏོར་མ་འདི་ཉིད་མགོན་པོ་ཚེ་དཔག་མེད་ཡབ་ཡུམ་སྔར་སྨོས་མ་ཐག་པའི་མཚན་ཉིད་ཅན༔ རྩ་བརྒྱུད་བླ་མ་རྒྱལ་བ་སྲས་བཅས་ཀྱིས་བསྐོར་བ༔ ཁྱེད་རང་རྣམས་ཀྱི་སྤྱི་བོར་མངོན་སུམ་དུ་བྱོན་ནས༔ བྱིན་གྱིས་བརླབས་དབང་བསྐུར་ཏེ་འོད་དུ་ཞུ་ནས་ཁྱེད་རང་ལ་ཐིམ་པས༔ གསེར་འགྱུར་གྱི་རྩིས་ལྕགས་གསེར་དུ་བསྒྱུར་བ་ལྟར༔ ཁྱེད་རང་ཚེ་དཔག་མེད་དངོས་སུ་གྱུར་པར་སྒོམས་ཤིག༔ གཏོར་མ་ལག་ཏུ་བཟུང་ལཿ བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པ༔ ཚེ་བདག་རྒྱལ་བ་
རིགས་ལྔ༔ ཡུམ་ལྔ༔ ལྷ་མོ་བཞི༔ མགྱོགས་མ་བཞི༔ སྒོ་མ་བཞི་ལ་སོགས་པ་འཆི་མེད་ཚེའི་ལྷ་ཚོགས་ཐམས་ཅད་ཀྱིས་བྱིན་གྱིས་རློབས་ཤིག༔ གུ་རུ་དགའ་རབ་རྡོ་རྗེ༔ ཤྲཱི་སེངྷ༔ ཧཱུཾ་ཆེན་ཀ་ར༔ བི་མ་ལ་མི་ཏྲ༔ པདྨ་འབྱུང་གནས༔ ནམ་མཁའི་སྙིང་པོ༔ བེ་རོ་ཙ་ན་ལ་སོགས་པ་འཆི་མེད་ཚེའི་རིག་འཛིན་ཆེན་པོ་རྣམས་ཀྱིས་བྱིན་གྱིས་རློབས་ཤིག༔ མཁའ་འགྲོ་བདེ་ཆེན་རྒྱལ་མོ༔ རིན་ཆེན་ཞིབ་འཚོ༔ བྲམ་ཟེའི་བུ་མོ་བདེ་ལྡན་མ༔ དབྱིངས་ཕྱུག་རྒྱལ་མོ༔ མནྡ་ར་བ༔ མཁར་ཆེན་བཟ༢༔ ཤེལ་དཀར་རྡོ་རྗེ་མཚོ་ལ་སོགས་པ་ཚེ་ལ་དབང་བའི་ཡེ་ཤེས་ཀྱི་མཁའ་འགྲོ་མ་རྣམས་ཀྱིས་བྱིན་གྱིས་རློབས་ཤིག༔ སྐྱེ་ཤི་མེད་པའི་ཚེ་ཐོབ་པར་མཛོད་ཅིག༔ བསྒྲེས་རྒུད་མེད་པའི་ལུས་ཐོབ་པར་མཛོད་ཅིག༔ རྡོ་རྗེ་ལྟ་བུའི་སྲོག་ཐོབ་པར་མཛོད་ཅིག༔ ཨོྃ་ཨཱ༔ཧཱུྃ་ཧཱུྃ༔ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱ། ཨཱཡུརྫུ་ན་ཨ་བྷི་ཥིཉྩ་མཱ་སྭཱ་ཧཱཿ སྤྲོ་ན་ཚེ་གཟུངས་ཀྱང་བརྗོད༔ བསོད་ནམས་རི་བོ་བཞིན་ཏུ་བརྟན་པ་དང་༔ བརྒྱུད་འཛིན་ཉི་ཟླ་བཞིན་དུ་གསལ་བ་དང་༔ སྙན་པ་ནམ་མཁའ་བཞིན་དུ་ཁྱབ་གྱུར་པ༔ བཀྲ་ཤིས་དེས་
ཀྱང་དེང་འདིར་བདེ་ལེགས་ཤོག༔ ཅེས་མེ་ཏོག་གཏོར༔ ཚེ་ཆང་དང་ཚེ་རིལ་སྦྱིན་ཅིང་༔ ཧཱུྃ༔ སྐྱེས་བུ་རིགས་ཀྱི་བུ་ཁྱོད་ལ༔ ཚེ་ཆང་བདུད་རྩི་འདི་བྱིན་པས༔ རྟག་ཏུ་ཚེ་རིང་ནུས་པ་ཡི༔ དབང་དང་ལྡན་ནས་ཚེ་འཕེལ་ཤོག༔ ཨོྃཨཱཧཱུྃ་ཧི༔ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱཿ ཨ་བྷི་ཥིཉྩ་ཧཱུྃ༔ ཧཱུྃ༔ སྐྱེས་བུ་རིགས་ཀྱི་བུ་ཁྱོད་ལ༔ ཚེ་རིལ་འདི་ཉིད་བྱིན་པ་ཡིས་ཁྱོད་ཉིད་རྡོ་རྗེའི་སྐུ་འགྲུབ་པའི༔ དབང་དང་ལྡན་ནས་ཚེ་འཕེལ་ཤོག༔ ཨོཾ་ཨཱཿཧཱུྃ་ཧྲཱིཿ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱཿ ཨ་བྷི་ཥིཉྩ་ཧཱུྃ༔ ད་སྔགས་ཀྱི་བཟླས་ལུང་གི་དོན་དུ་མེ་ཏོག་དཀར་པོའི་ཕྲེང་བ་ཞིག་ཕུལ་པའི་མོས་པས་རྗེས་ཟློས་མཛོད༔ ཚེ་དཔག་བདག་ལ་བསྩལ་ལགས་ཀྱིས༔ བདག་ལ་འགོ་བར་མཛད་དུ་གསོལ༔ དངོས་གྲུབ་མ་ལུས་ཀུན་སྩོལ་ཅིག༔ གཅིག་གམ་གསུམ༔ འོ་དེ་ལྟར་གསོལ་བ་བཏབ་པས་སློབ་དཔོན་གྱི་ཐུགས་ཀ་ནས་སྔགས་ཕྲེང་མུ་ཏིག་གི་ཕྲེང་བ་ལྟ་བུ་འཕྲོས༔ ཁྱེད་རང་རྣམས་ཀྱི་ཞལ་དུ་ཞུགས༔ ཐུགས་ཀར་ཧཱུྃཡི་མཐར་འཁོད་པར་བསྒོམས་ལཿ ཕྲེང་བ་འདི་བགྲངས་ཤིང་སྔ་གས་འདིའི་རྗེས་ཟློས་ལན་གསུམ་མཛོད༔ ཅེས་གོང་གི་རྩ་སྔགས་ཡིག་འབྲུ་བཅོ་ལྔ་པའི་རྗེས་ཟློས་
བཅུག༔ སྔགས་ཀྱི་ཕྲེང་བ་འདི་ཉིད་མེ་ཏོག་པུཎྜ་རི་ཀའི་ཕྲེང་བར་གྱུར་ནས་སྤྱི་བོར་བཅིངས་པའི་མོས་པ་མཛོད༔ ་རྡོ་རྗེ་མེ་ཏོག་མགོར་བཞག་ལ༔ ཨོཾ་ཨཱཿཧཱུྃ་ཧྲཱིཿ ཚེ་དཔག་འདི་ལ་བསྩལ་ལགས་ཀྱིས༔ འདི་ལ་འགོ་བར་མཛད་དུ་གསོལ༔ དངོས་གྲུབ་མ་ལུས་ཀུན་སྩོལ་ཞིག༔ སྔགས་ཀྱི་སྒོ་ནས་བྱིན་གྱིས་རློབས༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱཿ དེ་ནས་རྒྱས་པར་བྱེད་ན་ཡིག་འབྲུ་བཅོ་ལྔ་སོ་སོའི་ཙཀ་ལི༔ ཐིག་ལེ་ཐིག་ཕྲན་གྱི་དབུས་སུ་བྲིས་པ་གནས་སོ་སོར་བཞག༔ དབང་ཚིག་ཤཱ་ལོ་ཀ་ཀུན་ལ་སྦྱརཿ བསྡུ་ན་ཀུ་ཤ་སྒྲོ་མདངས་ཀྱི་རྩ་བས་གནས་སོ་སོར་བུམ་ཆུས་ཐིག་ལེ་བྱ་བའམ༔ མི་མང་ན་ཐིག་ལེ་བྱ་བའི་ཚུལ་ཙམ་གྱིས་ཆོག་སྟེ༔ དབང་ཚིག་འགྲེས་མི་བཤང་སྟེ༔ ཧཱུྃ༔ ཚེ་བདག་ཟླ་དཀར་ཡོངས་སུ་རྒྱས༔ འདི་ནི་ལྷག་པའི་ལྷ་མཆོག་སྟེ༔ སློབ་མ་ཁྱོད་ཀྱིས་བསྟེན་ནུས་ན༔ ལྷ་ཡི་རྔ་ཆེན་ཇི་བཞིན་ནོ༔ ཨོཾ་ཨཱཿཧཱུྃ་ཧཱུྃ༔ སྤྱི་བོར་ཨོཾ་གྱིས་རྒྱས་གདབ་བོ༔ ཨོཾ་ཨཱ་ཨོཾ༔ མགྲིན་པར་ཨཱཡིས་རྒྱས་གཏབ་བོ༔ ཨཱཨཱ༔ སྙིང་གར་ཧཱུྃ་གིས་རྒྱས་གདབ་བོ༔ ཧཱུྃ་ཧཱུྃ་ཧཱུྃ༔ ལྟེ་བར་ཧཱིཿཡིས་རྒྱས་གདབ་བོ༔ ཧཱིཿཧཱིཧྲཱིཿ དཔྲལ་བར་ཨོཾ་གྱིས་རྒྱས་གདབ་པོ༔ རྣ་ལྟག་གཡས་ལ་ཨས་རྒྱས་གདབ༔ རྣ་ལྟག་གཡོན་ལ་ཡི་གེ་
མཱ༔ ཕྲག་གོང་གཡས་ལ་ཡི་གེ་རཿ ཕྲག་གོང་གཡོན་ལ་ཡི་གེ་ཎི༔ ལག་པ་གཡས་ལ་ཡི་གེ་ཛཱི༔ ལག་པ་གཡོན་ལ་ཡི་གེ་ཝན༔ འགྲམ་པ་གཡས་ལ་ཡི་གེ་ཏི༔ འགྲིམ་པ་གཡོན་ལ་ཡི་གེ་ཡེ༔ སྲིན་ལག་གཡོན་ལ་ཡི་གེ་སྭ༔ ལྟག་པའི་བདུད་སྒོར་ཡི་གེ་ཧཱུཾ༔ སྔགས་ཀྱི་གོ་ཆས་བྱིན་གྱིས་བརླབས༔ ལུས་ཀྱི་མི་མཐུན་བཟློག་ཏུ་གསོལ༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱཿ ཞེས་མེ་ཏོག་གཏོར༔ དེས་ཚེ་དཔག་དཀར་པོའི་དབང་ལེགས་པར་ཐོབ་པ་ཡིན་པས༔ འདི་ཡི་དམ་གྱི་ལྷར་བཟུང་བའི་མོས་པས་རྗེས་ཟློས་མཛོད༔ གཙོ་བོའི་ཇི་ལྟར་སོགས༔ ས་གཞི་སྤོས་སོགས་བྱའོ་ཞེས་དགོངས་གཏེར་གྱི་ཚེ་དབང་ཕྱག་ལེན་གྱིས་བརྒྱན་ནས༔ རཱ་ག་ཨ་སྱས་བཀོད་པ་ལཿ ཉེས་འགལ་མཆིས་ན་ལྷ་ལ་བཤགས་ཤིང་དགེ་བས་འགྲོ་དོན་རྒྱ་ཆེན་འབྱུང་བར་གྱུར་ཅིག༔ ཡི་གེ་པ་ནི་དབོན་པོ་མཐུ་སྟོབས་ཀྱིས་བགྱིས་པའོ༔ སརྦ་མངྒ་ལཾ༔ ༧ ཁམས་སྟོད་ནང་ཆེན་འབང་སྒོང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།