གནམ་ཆོས་ཀྱི་ལྷན་ཐབས་ཡེ་ཤེས་ཀྱི་མགོན་པོ་བྱ་ཞོན་དཔོན་གཡོག་གསུམ་གྱི་བསྐང་གསོ་སྦྲག་མ།
གནམ་ཆོས་ཀྱི་ལྷན་ཐབས་ཡེ་ཤེས་ཀྱི་མགོན་པོ་བྱ་ཞོན་དཔོན་གཡོག་གསུམ་གྱི་བསྐང་གསོ་སྦྲག་མ་བཞུགས་སོ༔
གུ་རུ་མ་ཧཱ་ཀཱ་ལ་ཡེ་ན་མཿ ཨོ་རྒྱན་ཆེན་པོས༔ རྒྱུད་ལྟར་སྤྱི་ཡི་སྒྲུབ་པ་དང་༔ ལུང་ལྟར་རྗེ་དཔོན་གསུམ་སྒྲུབ་དང་༔ མན་ངག་ལྟར་གྱི་རྐྱང་སྒྲུབ་རྣམས༔ ཞེས་གཏེར་མགོན་འདི་ཉང་ལུགས་ལ་སྤྱི་སྒྲུབ་གཙོ་ཆེ༔ གནམ་ཆོས་འདི་རྐྱང་སྒྲུབ་གཙོ་ཆེ་ནའང་༔ འདིར་རྗེ་དཔོན་གསུམ་དུ་དྲིལ་ཏེ་སྒྲུབ་པ་ཡིན་ལགས་སོ༔ དེ་ལ་སྤྱིར་གཏེར་འོག་མ་ཐམས་ཅད་ལ་གོང་མ་ནས་ཁ་འགེབས་འོས་འགེབས་པ་ནི་གཏེར་སྟོན་ཐམས་ཅད་ཀྱིས་མཛད་པར་སྣང་ལ༔ ཁྱད་པར་ཉང་ཆོས་ཀྱི་བདག་པོར་ཡང་ལུང་གིས་ཟིན་ཕྱིར་ཉང་ལུགས་ནས་ཁ་བཀབ་སྟེ༔ བྱ་ཞོན་དཔོན་གཡོག་གསུམ་གྱི་གསོལ་ཁ་བསྐང་གསོ་སྦྲག་པ་ནི༔ རིན་པོ་ཆེའི་སྡེར་རམ་རྡོ་ལེབ་
གཙང 
་མར་ཆང་དང་ཁྲག་གིས་སྦྲུས་པའི་ཟན་ལ་གཡག་ནག་པོ་བྱས་ཤིང་ཁལ་བཀལ། རྭ་ལ་མར་
དང་དར་ཚོན་བརྒྱན༔ ཕྲག་པར་ལིངྒ་མགོ་ཐུར་དུ་བཙུགས་སོ༔ དེའི་གཡས་སུ་ཟུར་གསུམ་ནག་པོ་ལ་བྱ་ནག་འཛུགས༔ གཡོན་དུ་ཟུར་གསུམ་དམར་པོ་ཅུང་ཟད་གཙུས་པར་གཡག་ནག༔ མདུན་དུ་ལྷ་བཤོས་སྟོད་ཟུར་གསུམ་ལ་ལུག་ནག་དང་ཟན་ཀོང་དུ་ཆང་བླུགས༔ ཡང་ཀོང་བུ་ལ་ཁྲག་བླུགས་པ་སྟེ་ཟན་ཀོང་གཉིས་ནང་མར་གྱིས་བྱུག་གོ༔ རྒྱབ་ཏུ་ལྷ་བཤོས་འདྲ་བ་ལ་ཆངས་རྗེས་བཏོད་པའི་རྩེར་ཁྱི་ནག་པོ༔ དེའི་གཡས་སུ་བྱ་རོག་གདོང་ལ་ཟུར་ནག་པོ་གསུམ་བྱ་ནག་བརྒྱན་པ༔ གཡོན་དུ་རྩ་འཇིབས་ལ་དམར་གཏོར་ནལ་བུའི་རྒྱལ་མཚན་བཙུགས༔ དེ་དག་བསྐང་འབྲས་སམ་ཙཀླུ་འཛུགས་པའམ་བཟོ་བ་གང་ལྕོགས་སོ༔ ཕྱོགས་བཞིར་ཀོང་ཟོར་བཞི༔ ཟན་གྱི་ཀོང་བུ་ཟུར་གསུམ་ཁྲག་གིས་བཀང་བ་བཞི༔ དེ་རྒྱབ་མཐེབ་སྒྱུ་ཤ་དུམ་སྦྲགས་
པས་བསྐོར་རོ༔ དེ་ལྟ་བུ་ཆེ་བ་ཞིག་བཅས་ནས་རྟེན་དུ་བཞག་པ་གསོ་ཞིང་གནམ་ཆོས་འདོན་པའམ༔ དུས་སུ་བྱེད་ན་གཟུགས་རྣམས་ཀྱི་ཙཀ་ལི་འཆང་ནས་འཕྲལ་དུ་བཅའོ༔ བསྡུ་ན་གཏོར་མ་གསོ་ལ་གཟུགས་ཙཀ་ལི་བཤམས་སམ་མདའ་དར་ལ་བཏགས་ནས་འདོན་རུང་ངོ༔ དེ་ནས་བདག་བསྐྱེད་བསྙེན་པ་དང་མདུན་གྱི་ལས་བྱང་བསྙེན་པ་སོང་བ་དང་༔ བྲན་ལ༔ ཨོཾ་ཨ་མྲྀ་ཏེ་ཧཱུྃ་ཕཊ༔ ཨོཾ་སྭ་བྷ་ཝ་སོགས། སྟོང་པ་ཉིད་དུ་གྱུར་པའི་ངང་ལས༔ ཁྲི་ལས་གཡག་ནག་རུ་སྔོན་ཆེ་ཚོ་སྟོབས་དང་ལྡན་པ༔ རྨིག་བཞི་རིན་ཆེན་སྣ་བཞི་ལས་གྲུབ་པ༔ ཁ་རླངས་དྲི་བཟང་གི་ན་བུན་དང་འདོད་ཡོན་གྱི་སྤྲིན་ཕུང་འཁྲིགས་པ༔ མིག་གཉིས་ལས་ཉི་ཟླའི་འོད་ཟེར་འཕྲོ་ཞིང་སྤུ་ཞོལ་དང་རྔ་མ་ལས་བདུད་རྩིའི་ཆར་འབེབས་པ༔ ངག་ནས་སྙན་པའི་འབྲུག་སྒྲ་སྒྲོག་པ༔ གཞན་ཡང་ལུག་ནག་སྤྱི་དཀར༔ ཁྱི་ནག་སྙིང་དཀར༔ བྱ་ནག་གསེར་མིག་རྣམས་རེ་རེ་ལས་སྤྲུལ་པ་བྱེ་བ་ས་ཡ་འཕྲོ་བ༔ གཞན་ཡང་ཕྱི་ནང་གསང་བའི་མཆོད་སྒྲུབ་རྟེན་པའི་རྫས༔ སྨན་རཀ་གཏོར་ཚོགས་ཟད་མེད་ཀྱི་བདེ་བ་སྐྱེད་པར་བྱེད་པ༔ གཞན་འཕྲུལ་དབང་བྱེད་ལྷའི་ལོངས་སྤྱོད་ལྟ་བུར་གྱུར་ཅིག༔ ཨོཾ་སརྦ་དྷརྨཱ་པུཙཱ་པཉྩ་རཏྣ་ཀཱ་ཡ༔ ཀོ་ཏི་བྷི་བྷ་ཝཱཀ༔ སྭ་བྷཱ་ཝ་ཤུདྡྷོཉཧཾ༔ དེ་རྣམས་
ཀྱང་ཐུགས་དམ་བསྐང་ཞིང་དགྱེས་པ་བསྐྱེད་ཅིང་ཕ་རོལ་འཇོམས་ཤིང་བཟློག་ཏུ་མེད་པའི་སྟོབས་དང་ལྡན་པར་གྱུར་ཅིག༔ ཨོཾ་སརྦ་དྷརྨཱ་ཨ་བཱི་ག་ཏ༔ ཧི་ཀོ་ཧ་ཡ་ན༔ གྷ་མི་སྭ་བྷཱ་ཝ་ཤུདྡྷོཉཧཾ༔ དེ་དག་ནུས་པ་མི་འཁྱམས་པར་གང་བསམ་ཐོགས་མེད་དུ་འགྲུབ་པར་གྱུར་ཅིག༔ ཨོཾ་སརྦ་དུཥྛན༔ གྲི་ཎྱ་གྲོ་དྷྱ༔ གརྫ་ཧཱུྃ་ཕཊ༔ ཧཱུྃ༔ བདག་ནི་རིག་འཛིན་སྒྲུབ་པ་པོ༔ བདག་ནི་བསྟན་པའི་མངའ་བདག་ཡིན༔ ཁྱོད་ནི་སྲུང་མ་ཐུགས་དམ་ཅན༔ ཁྱོད་ནི་ལྷ་ཆེན་དཔལ་འབར་ཏེ༔ ལྷ་མིན་གཡུལ་ངོ་བཟློག་པར་མཛད༔ ཁྱེད་ནི་ས་བཅུའི་མངའ་བདག་སྟེ༔ སངས་རྒྱས་བསྟན་པ་རྒྱས་པར་མཛད༔ སྔོན་ཚེ་དཔལ་ཆེན་སྤྱན་སྔ་རུ༔ བསྟན་པ་བསྲུང་བར་ཞལ་བཞེས་པ༔ ཁྱོད་ཀྱི་དམ་བཅའ་གཉན་པོ་དེ༔ དེ་རིང་རྣལ་འབྱོར་བདག་བསྒྲུབས་ན། བསྒྲུབ་ཕྱིར་བསྐུལ་ཕྱིར་གཤེགས་སུ་གསོལ༔ ནག་པོ་ཆེན་པོ་གནས་འདིར་བྱོན༔ ས་བཅུའི་མངའ་བདག་གནས་འདིར་བྱོན༔ ལྷ་དམག་དབུགས་འབྱིན་གནས་འདིར་བྱོན༔ ལྷ་མིན་གཡུལ་བཟློག་གནས་འདིར་བྱོན༔ མཐུ་ཆེན་བདུད་འདུལ་གནས་འདིར་བྱོན༔ རྣལ་འབྱོར་དགྲ་ལྷ་གནས་
འདིར་བྱོན༔ རིག་འཛིན་སྲུང་མ་གནས་འདིར་བྱོན༔ ཧཱུྃ༔ འོག་མིན་ཆོས་དབྱིངས་ཕོ་བྲང་ནས༔ མགོན་པོ་ཡབ་ཡུམ་གཤེགས་སུ་གསོལ༔ བསིལ་བ་ཚལ་གྱི་དུར་ཁྲོད་ནས༔ བྱ་རོག་གདོང་ཅན་གཤེགས་སུ་གསོལ༔ བཅོལ་བའི་ཕྲིན་ལས་འགྲུབ་མཛད་པའི༔ རྩ་འཇིབས་དམར་མོ་གཤེགས་སུ་གསོལ༔ ཐུགས་དམ་གནད་ནས་བསྐུལ་བའི་ཕྱིར༔ མྱུར་དུ་བྱོན་ཅིག་སྲུང་མའི་ཚོགས༔ བོས་སོ་ཆོས་སྐྱོང་སྙན་མ་སྲ༔ གཡབ་བོ་ལེགས་ལྡན་སྤྱན་མ་བརྟུལ༔ བརྟེན་ནོ་མགོན་པོ་རྒྱང་མ་རིང་༔ སྒྲུབ་པོ་མགོན་པོ་གོང་མ་གཡེལ༔ བསྐུལ་ལོ་མགོན་པོ་ཕྲག་མ་དོག༔ རྦད་དོ་མགོན་པོ་མཐུ་མ་ཆུང་༔ སངས་རྒྱས་བསྟན་པ་བསྲུང་བའི་ཕྱིར༔ དོ་ནུབ་མནའ་དང་ཁྲིམས་ལ་བྱོན༔ གནས་མཆོག་འདི་རུ་བཞུགས་སུ་གསོལ༔ རྗེ་བོར་བསྟེན་ནོ་དབང་མ་ཆེ༔ གྲོགས་པོར་བསྟེན་ནོ་གཞུང་མ་ངན༔ མ་ལྟར་བསྟེན་ནོ་སྙིང་མ་སྲ༔ སྲིང་ལྟར་བསྟེན་ནོ་ཚུལ་མ་ཞན༔ བྲན་ལྟར་བསྟེན་ནོ་རྒྱུ་མ་ངན༔ སྔོན་ཚེ་རྒྱལ་བའི་སྤྱན་སྔ་རུ༔ བསྟན་པ་སྲུང་བར་མ་བྱམས་སམ༔ རྣལ་འབྱོར་བདག་ཅག་འཁོར་བཅས་ལ༔ ནོར་ཕྱུགས་ལོ་ཏོག་ཕུན་སུམ་ཚོགས༔
ཐམས་ཅད་རྒྱས་པར་མཛད་དུ་གསོལ༔ དགྲ་བགེགས་ཐམས་ཅད་བཟློག་ཏུ་གསོལ༔ བཅོལ་བའི་ལས་འདི་མ་བྱས་ན༔ བདེ་གཤེགས་རྒྱལ་བའི་བཀའ་ཡང་བསླུས༔ ཕྱི་རབས་རྣལ་འབྱོར་སུན་ཡང་ཕྱུང་༔ རིག་འཛིན་བདག་གི་དམ་ཡང་བཀྲལ༔ སྔོན་གྱི་དམ་ཚིག་གཉན་པོ་འགལ༔ དེ་བས་དམ་ལས་མི་འདའ་འཚལ༔ བདག་ཀྱང་དམ་ལས་མི་འདའ་ཡི༔ ཁྱོད་ཀྱང་དམ་ལས་མ་འདའ་ཞིག༔ ཧཱུྃ༔ དཔལ་ལྡན་མགོན་པོ་མཐུ་བོ་ཆེ༔ ནག་པོ་ཆེན་པོ་གཏུམ་པའི་སྐུ༔ ཆོས་ཀྱི་དབྱིངས་ནས་སྐུར་བཞེངས་ལ༔ གཤེགས་ཤིག་བུ་ཡི་གནས་འདིར་བྱོན༔ བུ་ཡི་གནས་མཆོག་དམ་པ་ན༔ ཁྱོད་དང་མཐུན་པའི་དམ་རྫས་ནི༔ གཡག་ནག་མར་གྱིས་བརྒྱན་པ་ལ༔ དར་ནག་རུ་མཚོན་རྭ་ལ་བརྒྱན༔ འཕྲག་པར་དགྲ་བགེགས་ལིངྒ་བཀལ༔ མགོན་པོ་ཡབ་ཡུམ་ཁྱེད་ལ་འབུལ༔ དཔལ་བཤོས་བྱ་ནག་བརྒྱན་པ་ཡང་༔ མགོན་པོ་ཡབ་ཡུམ་ཁྱེད་ལ་འབུལ༔ དྲི་བཤོས་གཡག་གིས་བརྒྱན་པ་ཡང་༔ མགོན་པོ་ཡབ་ཡུམ་ཁྱེད་ལ་འབུལ༔ ཞལ་ཟས་ལུག་ནག་བརྒྱན་པ་ཡོང་༔ མགོན་པོ་ཡབ་ཡུམ་ཁྱེད་ལ་འབུལ༔ ཆང་བཤོས་ཁྱི་ནག་
བརྒྱན་པ་ཡང་༔ མགོན་པོ་ཡབ་ཡུམ་ཁྱེད་ལ་འབུལ༔ ཏིང་ལོ་ཆང་གིས་བཀང་བ་ཡང་༔ མགོན་པོ་ཡབ་ཡུམ་ཁྱེད་ལ་འབུལ༔ བྱ་ནག་རྒྱན་གྱིས་བརྒྱན་པ་ཡང་༔ བྱ་རོག་གདོང་ཅན་ཁྱེད་ལ་འབུལ༔ ནལ་བུའི་རྒྱལ་མཚན་ཕྱར་བ་ཡང་༔ དམར་མོ་རྩ་འཇིབས་ཁྱེད་ལ་འབུལ༔ ཤ་ཁྲག་དམར་གྱི་གཏོར་མ་ཡང་༔ མགོན་པོ་འཁོར་བཅས་ཁྱེད་ལ་འབུལ༔ ཡབ་ཡུམ་འཁོར་བཅས་མཉེས་གྱུར་ཅིག༔ རྣལ་འབྱོར་བདག་ཅག་ཁྱེད་བསྒྲུབས་པས༔ དངོས་གྲུབ་ཐོབ་པར་བྱིན་གྱིས་རློབས༔ དེ་ཡན་གསོལ་ཁའོ༔ དེ་ནས་བསྐང་བ་ནི༔ ཆང་ཕུད་ལ་གསེར་སྐྱེམས་བརྡར་བུ་རམ་སྦྲང་རྩི་བཏབ་པ་མེད་ན་ཆང་རྒོད་དམ་ཇ་ཕུད་དུ་འབྲུ་བླུགས་ལ་བྲན་ནས༔ ཨོཾ་ཨཱཿཧཱུྃ༔ མ་ཧཱ་ཀཱ་ལ་ཙ་ཏུར་ཧམ༔ ཁ་ཁ་མུ་ཁ༔ དྷེ་ཝི་རུ་པི་ནི༔ ཨ་མྲྀ་ཏ་ཁཱ་ཧི་ཁཱ་༈ ཧི༔ ཧཱུྃ༔ གསེར་སྐྱེམས་བུ་རམ་སྦྲང་རྩིས་བརྒྱན༔ མཁའ་ལ་སྤྲིན་ལྟར་གཏིབས་ནས་ཀྱང་༔ འདོད་ཡོན་ལྔ་ཡི་ལོངས་སྤྱོད་ཚོགས༔ ཡེ་ཤེས་ལྔ་ཡི་འོད་ཟེར་འཕྲོ༔ དབང་པོ་ལྔ་ཡི་སྤྱོད་ཡུལ་དུ༔ མཁོ་དགུའི་ལོངས་སྤྱོད་འདི་ཕུལ་བས༔ མགོན་པོ་ཡབ་ཡུམ་ཐུགས་དམ་བསྐང༔ ཐུགས་དམ་གནད་ནས་བསྐུལ་བའི་ཕྱིར༔ བྱ་རོག་གདོང་ཅན་ཐུགས་
དམ་བསྐང༔ རྩ་འཇིབས་དམར་མོའི་ཐུགས་དམ་བསྐང་༔ ནག་པོ་སྟོང་དང་ཤ་ཟ་འབུམ༔ མ་མོ་བྱེ་བ་གནོད་སྦྱིན་ཁྲི༔ ཁྲབ་ཆེན་བྱེ་བ་འབུམ་འགྱུར་སོགས༔ འཁོར་དང་སྤྲུལ་པའི་ཐུགས་དམ་བསྐང༔ དཔལ་ལྡན་མགོན་པོ་འཁོར་བཅས་ལ༔ ཀོང་ཟོར་ཁྲག་གིས་བཀང་བ་འབུལ༔ གསལ་བ་འོད་ཀྱི་ཞུན་མར་འབུལ༔ ཤ་ཆེན་སྤོས་ཀྱི་དུད་སྤྲིན་འབུལ༔ དཔལ་བཤོས་དམར་གྱི་གཏོར་མ་འབུལ༔ འབྲས་ཆེན་བརྒྱན་པའི་གཏོར་མ་འབུལ༔ དཀར་གསུམ་བརྒྱན་པའི་གཏོར་མ་འབུལ༔ མངར་གསུམ་བརྒྱན་པའི་གཏོར་མ་འབུལ༔ གསེར་སྐྱེམས་རིན་ཆེན་བརྒྱན་པ་འབུལ༔ བདུད་རྩི་སྨན་གྱི་གཏོར་མ་འབུལ༔ རཀྟ་དམར་གྱི་གཏོར་མ་འབུལ༔ ཞལ་ཟས་རྣམ་པ་སྣ་ཚོགས་ཀྱི་དཔལ་མགོན་འཁོར་བཅས་ཐུགས་དམ་བསྐང་༔ སྤྲུལ་པ་ཡང་སྤྲུལ་ཐུགས་དམ་བསྐང་༔ ཧཱུྃ༔ བསྐང་ངོ་ཐུགས་དམ་གཉན་པོ་བསྐང་༔ མཆོད་དོ་དམ་རྫས་བདུད་རྩིས་མཆོད༔ དཔལ་མགོན་འཁོར་དང་བཅས་པ་ཡི༔ ཐུགས་དམ་གཉན་པོ་འདིས་བསྐང་ལ༔ རྣལ་འབྱོར་བདག་གི་གཡར་དམ་བསྐང་༔ ཉམས་ཆག་འགལ་འཁྲུལ་མཐོལ་ཞིང་བཤགས༔
བདག་གི་ཉམས་ཆག་སོར་ཆུད་ནས༔ ཅི་བཅོལ་ཕྲིན་ལས་འགྲུབ་པར་མཛོད༔ ཨོ་ས་མ་ཡ༔ ཨཱས་མ་ཡ༔ ཧཱུྃ་ས་མ་ཡ༔ ཨོཾ་མ་ཧཱ་ཀཱ་ལ་གུ་ཎ་ཧྲི་ད་ཧཱུྃ་ཧཱུྃ་ཧཱུྃ་ཛ་ཛ་ཛ་ཕཊ་ཕཊ་ཕཊ༔ ཏྲི་ཁ་ཁ་མུ་ཁ་དུ་བྷྱོཿ ཨོཾ་མ་ཧཱ་ཀཱ་ལི་དྷེ་ཝི་རུ་པི་ནི་ཧཱུྃ་བྷྱོ་ཕཊ༔ ཨོཾ་བཛྲ་སཏཱ་ས་མ་སོགས་ཡིག་བརྒྱ༔ སཏཱ་ཨཱ༔ ཞེས་ཉམས་ཆག་ཅི་བྱུང་ཡང་བསྐངས་ནས་ཕྲིན་ལས་ཐོགས་པ་མེད་དོ༔ གཡག་བསྐང་མེད་ཀྱང་བསྐང་བའི་གཏོར་མ་ཡོད་དམ་མེད་ན་ཕུགས་གཏོར་གསོས་ལ་ཇ་ཕུད་བཤམས་ནས་བསྐང་བ་འདི་འདོན་རུང་ངོ་༔ ལས་བྱང་ལ་བཏགས་ནས་རྒྱུན་དུ་ཡང་ལེགས་སོ༔ དེ་ནས་གཡག་བསྐང་ད་དུང་བཞག་རྒྱུ་ཡིན་ན་བཅོལ་གདམས་འདི་རང་གར་འདོན༔ འབུལ་ཁ་ཡིན་ན་གཡག་བསྐང་ལ་དཔལ་འབར་བཙུགས་ནས་བཀྱགས་བཅོལ་ལ་འདི་འདོན་ཏེ༔ རོལ་མོ་དང་བཅས་རྔ་ཐུག་རྩ་ཡི་སྟེང་ གཙང ་སའམ་མགོན་ཁང་རྟེན་རྫས་དྲུང་ངམ༔ ཀ་རྣ་ཐོག་ལྟ་བུ་ཞིག་ཏུ་དེ་གར་བཞག་གོ༔ ཧོ༔ དཔལ་ལྡན་ནག་པོ་ཆེན་པོ་ཡབ་ཡུམ་ཁྲག་འཐུང་གི་རྒྱལ་པོ༔ ཆོས་སྐྱོང་ཆེན་པོ་ཡེ་ཤེས་ཀྱི་མགོན་པོ༔ ཕྱག་བཞི་པ་ཡབ་ཡུམ་བྱ་རོག་གི་མཚན་ཅན་ལ་འབུལ་ལོ༔ ལས་ཀྱི་མགོན་པོ་བྱ་རོག་གི་གདོང་ཅན་ལ་འབུལ་ལོ༔ ཟ་བྱེད་རྩ་འཇིབས་དམར་མོ་ལ་འབུལ་ལོ༔ ནག་པོ་སྟོང་གི་ཚོགས་ཀྱིས་བསྐོར་བ་ལ་འབུལ་ལོ༔
ཤ་ཟ་འབུམ་གྱི་ཚོགས་ཀྱིས་བསྐོར་བ་ལ་འབུལ་ལོ༔ མ་མོ་བྱེ་བའི་ཚོགས་ཀྱིས་བསྐོར་བ་ལ་འབུལ་ལོ༔ གནོད་སྦྱིན་ཁྲིའི་ཚོགས་ཀྱིས་བསྐོར་བ་ལ་འབུལ་ལོ༔ ཁྲབ་ཆེན་བྱེ་བ་འབུམ་འགྱུར་གྱི་ཚོགས་ཀྱིས་བསྐོར་བ་ལ་འབུལ་ལོ༔ ལྷ་སྲིན་སྡེ་བརྒྱད་སྒྲོལ་བྱེད་འཁོར་གྱིས་བསྐོར་བ་ལ་འབུལ་ལོ༔ ཞིང་སྐྱོང་ཉི་ཤུ་རྩ་བཞིས་གཙོར་བྱས་རྣམས་ལ་འབུལ་ལོ༔ ལྷའི་དེད་དཔོན་དཔལ་མགོན་བདུན་ཅུ་རྣམས་ལ་འབུལ་ལོ༔ ཚོགས་ཀྱི་བདག་པོ་ནོར་ལྷ་གཏེར་བདག་རྣམས་ལ་འབུལ་ལོ༔ འདོད་པ་ཁམས་ཀྱི་དབང་ཕྱུག་ལྷ་མོ་དཔོན་གཡོག་རྣམས་ལ་འབུལ་ལོ༔ ཡེ་ཤེས་ཀྱི་སྤྱན་ཅན་ཌཀྐི་འབུམ་ཕྲག་བཅུ་རྣམས་ལ་འབུལ་ལོ༔ དཀར་པོའི་ཆོས་སྐྱོང་ལྷ་དམག་བྱེ་བ་དུང་ཕྱུར་ལ་འབུལ་ལོ༔ ནག་པོའི་དགྲ་འདུལ་བདུད་དམག་ཉི་ཁྲི་ཆིག་སྟོང་ལ་འབུལ་ལོ༔ རིག་འཛིན་གྱི་སྲོག་ཤིང་མགོན་པོ་བཞི་བཅུ་རྩ་ལྔ་ལ་འབུལ་ལོ༔ རྣལ་འབྱོར་གྱི་དགྲ་ལྷ་ལྷ་མོ་སྟོང་དང་རྩ་བརྒྱད་ལ་འབུལ་ལོ༔ བདུད་འདུལ་གྱི་དབང་ཕྱུག་བྱ་རོག་གདོང་ཅན་བཅུ་གསུམ་ལ་འབུལ་ལོ༔ གཙུག་ལག་ཁང་དང་གནས་ཆེན་གནས་ཕྲན་གྱི་སྲུང་མ་རྣམས་ལ་འབུལ་ལོ༔ དཀྱིལ་འཁོར་གྱི་
མངའ་བདག་དཔའ་བོ་ཌཱཀྐི་རྣམས་ལ་འབུལ་ལོ༔ ཁྱེད་རྣམས་འཁོར་དང་བཅས་པ་རྣམས་ཀྱིས་བརྒྱན་པའི་མཆོད་པ་རྒྱ་ཆེན་པོ་འདི་བཞེས་ལ༔ རྣལ་འབྱོར་པ་བདག་ཅག་འཁོར་དང་བཅས་པའི་ཚེ་དང་བསོད་ནམས་སྤེལ་ཅིག༔ ཕ་རོལ་གྱི་སྣང་བ་སྒྱུར་ཅིག༔ གནོད་པར་བྱེད་པའི་དགྲ་བགེགས་ཐམས་ཅད་སྒྲོལ་ཅིག༔ དཔལ་དང་གྲགས་པ་སྒྲུབས་ཤིག༔ བཀའ་དང་བསྟན་པ་སྲུངས་ཤིག༔ འཁོར་དང་གང་ཟག་སྐྱོངས་ཤིག༔ སངས་རྒྱས་ཀྱི་བསྟན་པ་དར་ཞིང་རྒྱས་པར་མཛོད་ཅིག༔ ཉིན་གྱི་དུས་སུ་བྱ་ར་གྱིས་ཤིག །མཚན་གྱི་དུས་སུ་མེལ་ཚེ་གྱིས་ཤིག༔ བྱིང་ན་སློངས་ཤིག༔ བརྗོད་ན་བསྐུལ་ཅིག༔ འབྲོས་པའི་རི་བོ་གྱིས་ཤིག༔ བརྟན་པའི་མཁར་གྱིས་ཤིག༔ གབ་པའི་ཡུལ་གྱིས་ཤིག༔ ཆུ་རབ་མེད་ལ་ཟམ་པ་ཚུགས་ཤིག༔ བྲག་ལམ་མེད་པ་ལམ་ཐོན་ཅིག༔ བཅོལ་བའི་ཕྲིན་ལས་རྣམས་མྱུར་དུ་སྒྲུབས་ཤིག༔ གཞན་ཡང་ནད་དང་གནོད་པ༔ གདོན་དང་སྡིག་སྒྲིབ་ཐམས་ཅད་ཞི་བར་མཛད་དུ་གསོལ༔ ཚེ་དང་བསོད་ནམས་སྟོབས་དང་འབྱོར་པ་རྒྱས་པར་མཛད་དུ་གསོལ༔ ལྷ་འདྲེ་མི་གསུམ་ལ་སོགས་གདུལ་བྱ་མ་ལུས་དབང་དུ་
སྡུས་ཤིག༔ དགྲ་བགེགས་ཐམས་ཅད་ཚར་གཅོད་པ་ལ་སོགས་པའི་ཕྲིན་ལས་འདི་དག་མྱུར་དུ་སྒྲུབས་ཤིག༔ ཨོཾ་མ་ཧཱ་ཀཱ་ལ་གུ་ཎ་ཧྲི་ད་ཧཱུྃ་ཧཱུྃ་ཧཱུྃ་ཛ་ཛ་ཛ་ཕཊ་ཕཊ་ཕཊ༔ ཏྲི་ཁ་ཁ་མུ་ཁ་དུ་བྷྱོཿ ཨོཾ་མ་ཧཱ་ཀཱ་ལི་དྷེ་ཝི་རུ་པི་ནི་ཧཱུཾ་བྷྱོ་ཕཊ༔ མུ་ཀ་ཡེ༔ ཨེ་ས་ཡེ༔ ཀ་པ་ཡེ༔ བཛྲ་སི་ཏི་ཧཱུྃ༔ རཏྣ་སརྦ་སིདྡྷི་ཧཱུྃ་ཛཿ དངོས་གྲུབ་ཅི་འདོད་པ་འབྱུང་ཞིང་༔ ཉམས་ཆག་བསྐང་བ་དང་༔ རྐྱེན་ཁ་བཟློག་པ་དང་༔ ཐག་རིང་དུ་འགྲོ་ན་དོན་འགྲུབ་བར་ཆད་ཞི་བ་དང་༔ བྱ་བ་གལ་ཆེན་དུས་གང་བརྩམ་འགྲུབ་པ་དང་༔ དེ་ལ་སོགས་པའི་དུས་འདི་ལྟར་བྱས་ནས་ཆོས་སྐྱོང་དཔུང་དུ་བསྐུལ་བ་འདི་ཤིན་ཏུ་ཁག་ཆེའོ༔ ཡང་རྨི་ལྟས་སུ་གཡག་ནག་བྱ་ནག་འཐབ་པ༔ མི་ནག་བུད་མེད་འཐབ་འཛིངས་དུ་བ་སོགས་ལྷ་འཁུ་རྟོགས་དང་༔ སྤྲང་པོ་མཛེ་པོ་སློང་མོ་བ་སྣོད་སྟོང་ཐོགས་པ་རྨིས་ཤིང་༔ དངོས་སུ་སྙིང་མི་དགའ་ཚིག་པ་ཟ་ལྟོག་སྐམ་གྱི་སྣང་བ་འཆར་བ་སོགས་མཆོད་གཏོར་རྩོད་པའི་རྟགས་བྱུང་ན་ཡང་འདི་བྱས་པས་སེལ་ལོ༔ ལར་དུས་སམ་རྣམ་དགར་འདི་ལ་བརྩོན་ན་བཀྲ་ཤིས་བསམ་པ་འགྲུབ་བོ༔ ལོགས་སུ་ཡང་ལེགས་པར་བཅས་མཆོད་པ་གཟབས་ནས༔ གསོ་བྲན་སྤར་ཞིང་བརྒྱ་རྩ་སོགས་ཚར་གྲངས་བསོགས་ནི༔ མདོས་སོགས་མ་འགྲུབ་ཀྱང་ཆོག་པར་གསུངས་སོ༔ ཡང་ལས་བྱང་སྔོན་དུ་མ་སོང་ཡང་ཆང་ཕུད་ གཙང ་མ་སོགས་ལ་གསེར་སྐྱེམས་སམ་ཚུལ་དུ་འདོན་ན་བསྐང་བ་མན་ཆོད་དང་
འདོད་གསོལ་ཡན་བྱས་ནས་ནམ་མཁའ་ལ་གནམ་ཕུད་ཚུལ་དུ་མཆོད་པར་བྱའོ༔ དེ་བཞིན་དུ་བྱེས་ལམ་སོགས་གཏོར་མ་མ་ཐོན་ན༔ ཤ་ཐུད་མར་ཆུར་སོགས་གང་མང་བྲན་ལ་འདོན་རུང་ངོ་༔ དེ་ལ་ནི་བདག་བསྐྱེད་དྲན་རྫོགས་ཆོག་ཅིང་༔ འདི་སྤྱན་འདྲེན་བཞུགས་གསོལ་གོང་དུ་ཡོད་ལྟར་ནས༔ གཡག་གི་སྐབས་སོགས་སྒྱུར༔ གསེར་སྐྱེམས་མན་འདོད་གསོལ་དང་བཅས་པ་འདོན་ན་རབས༔ ཐ་མ་བདག་མདུན་དྲན་རྫོགས་སུ་བྱས་ནས༔ ཧོ༔ དཔལ་ལྡན་ནག་པོ་ཆེན་པོ་ཞེས་པ་མན་གྱིས་ཡང་ཆོག་གོ༔ ཞེས་པ་འདི་ནི་སྔགས་འཆང་རཱ་ག་ཨ་སྱས་ལེགས་པ་བསྒྲིགས་པ་ལ། གནད་དང་མན་ངག་ཟབ་ཁྱད་མང་དུ་ཡོད་དོ། །དེ་ལ་འགལ་བ་མཆིས་ན་མགོན་པོ་ཉིད་ལ་བཤགས་ཤིང་། དགེ་བས་སྤྲུལ་སྐུའི་སྐུ་ཚེ་བརྟན་པ་དང་ཕྲིན་ལས་རྒྱས་པར་གྱུར་ཅིག༔ མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།