བསྟན་པ་བསྐྱངས་ཤིང་ཐེག་ཆེན་ཇི་ལྟར་རྒྱས་ཚུལ།
བཞི་པ་བསྟན་པ་བསྐྱངས་ཤིང་ཐེག་ཆེན་ཇི་ལྟར་དར་ཚུལ་ནི།
སྟོན་པ་མྱ་ངན་ལས་འདས་པའི་རྗེས་སུ་བསྟན་པ་སྐྱོང་བའི་སྐྱེས་བུའང་སངས་རྒྱས་དང་འདྲ་བའི་ཉན་ཐོས་ཆེན་པོ་དང༌། བླ་མ་གྲགས་པ་སོགས་དགྲ་བཅོམ་པའི་ཚོགས་དང༌། འོད་སྲུངས་སོགས་བཙུན་པ་ཆེན་པོའི་སྡེ་དང༌། རྒྱལ་པོ་ལེགས་རྒྱལ་དགེ་བ་སོགས་བྲམ་ཟེ་ཆེན་པོའི་སྡེ་ལ་སོགས་པ་བསྟན་པ་ལ་བྱ་བ་བྱས་པའི་སློབ་དཔོན་མཁས་བཙུན་བཟང་པོའི་དཔལ་དང་ལྡན་ཞིང༌། རྟོགས་པའི་ཡོན་ཏན་ལ་མངའ་བརྙེས་པ་ཚད་མེད་པ་ཞིག་བྱོན་ནའང༌། བསྟན་བཅོས་ཀྱི་ཤིང་རྟའི་སྲོལ་འབྱེད་པ་པོ་ནི་ཉན་ཐོས་མདོ་སྡེ་པ་རྣམས་ཀྱི་འདོད་པ་ལྟར་ན། བྱེ་བྲག་བཤད་མཛོད་མཛད་པ་པོའི་དགྲ་བཅོམ་པ་རྣམས་ཡིན་པར་བྱེད་དགོས་ལ། ཐེག་པ་ཆེན་པོ་པ་ལྟར་ན། རྒྱལ་ཚབ་བྱམས་པ་མགོན་པོ་དང༌། སློབ་དཔོན་ཀླུ་སྒྲུབ་གཉིས་ཏེ། དགོངས་འགྲེལ་མཛད་པ་པོ་གཞན་རྣམས་འདི་དག་གིས་ལམ་སྲོལ་ཕྱེས་ཟིན་པའི་བསྟན་བཅོས་ལ་བརྟེན་ནས་འཇུག་པ་ཡིན་པའི་ཕྱིར་རོ། །དེས་ན་སྟོན་པ་ཉིད་ཀྱིས་ལུང་བསྟན་པ་ལྟར་བྲམ་ཟེ་ཆེན་པོ་ས་ར་ཧའི་སློབ་མ་ཟབ་མོ་ལྟ་བའི་ཤིང་རྟའི་སྲོལ་འབྱེད་པ་པོ་སངས་རྒྱས་གཉིས་པ་ཀླུ་སྒྲུབ། རྗེ་བཙུན་བྱམས་པའི་སློབ་མ་རྒྱ་ཆེན་སྤྱོད་པའི་རིང་ལུགས་ཀྱིས་འཛམ་བུ་གླིང་ཐམས་ཅད་ཁྱབ་པར་མཛད་པ་པོ་འཕགས་པ་ཐོགས་མེད། འཇམ་དཔལ་དབྱངས་ཀྱིས་རྗེས་སུ་བཟུང་ཞིང་ཕྱོགས་ཐམས་ཅད་ལས་རྣམ་པར་རྒྱལ་བའི་དངོས་གྲུབ་བརྙེས་པ་དངོས་སྟོབས་རིགས་པའི་སྲོལ་འབྱེད་སློབ་དཔོན་ཕྱོགས་ཀྱི་གླང་པོ་སྟེ། གཞུང་བྱེད་པ་པོ་གསུམ་དང༌། ཀླུ་སྒྲུབ་ཀྱི་སློབ་མ་པདྨའི་སྙིང་པོ་ལས་བརྫུས་ཏེ་འཁྲུངས་པ་སློབ་དཔོན་ཨཱརྱ་དེ་བ། ཐོགས་མེད་ཀྱི་གཅུང་གཞུང་འབུམ་སྡེ་དགུ་བཅུ་གོ་དགུ་ཐུགས་ལ་མངའ་ཞིང་མང་དུ་ཐོས་པ་རྒྱ་མཚོའི་མཐར་སོན་པ་སློབ་དཔོན་དབྱིག་གཉེན། ཕྱོགས་ཀྱི་གླང་པོའི་སློབ་མ་རྒོལ་བ་དབང་ཕྱུག་སྡེའི་རྗེས་སུ་ཞུགས་པས་ཕྱི་རོལ་པ་ཐམས་ཅད་ཀྱི་བརྟན་པ་གཅིག་ཅར་དུ་འཕྲོག་པར་བྱེད་པ་དཔལ་ཆོས་ཀྱི་གྲགས་པ་སྟེ། འགྲེལ་པ་བྱེད་པ་པོ་གསུམ་ཞེས་འཛམ་བུ་གླིང་མཛེས་པའི་རྒྱན་དྲུག་དང༌། ཕལ་ཆེར་དུ་ཀླུ་ཐོགས་གཉིས་ལ་མཆོག་གཉིས་སུ་གྲགས་ཤིང༌། ཕྱི་མ་རྣམས་ཀྱི་སྟེང་དུ་སློབ་དཔོན་ཡོན་ཏན་འོད་དང་ཤཱཀྱ་འོད་བསྣན་པས་རྒྱན་དྲུག་ཏུའང་བྱེད་དོ།།
ངོ་མཚར་གྱི་གཏམ་བདུན་མངའ་བའི་རྒྱལ་སྲས་ཆེན་པོ་ཞི་བ་ལྷ་དང༌། རིག་པའི་གནས་ཡན་ལག་དང་བཅས་པ་ལ་མཁས་ཤིང་དངོས་གྲུབ་བརྙེས་པ་ཙནྡྲ་གོ་མི་གཉིས་ལ་རྨད་བྱུང་གི་སློབ་དཔོན་གཉིས་ཞེས་བསྔགས་པར་བྱེད་ལ། གཞན་ཡང་རྒྱལ་བའི་གསུང་རབ་ཀྱི་དོན་ལ་དབང་འབྱོར་བའི་སློབ་དཔོན་མཐའ་ཡས་པ་བྱོན་ཏེ་གཙོ་བོར་ཕ་རོལ་ཏུ་ཕྱིན་པའི་བསྟན་པ་གསལ་བར་མཛད། སྤྱིར་རྒྱུ་མཚན་ཉིད་ཀྱི་ཐེག་པའི་བཀའ་རྣམས་བསྡུ་བ་བྱས་མ་ཐག་ཏུ་ཐེག་པ་ཆེན་པོ་རྣམས་བགོ་བཤའ་བྱ་ལོང་མེད་པར་མི་དང་ལྷ་དང་མི་མ་ཡིན་རྣམས་ཀྱིས་དད་པས་རང་རང་གི་གནས་སུ་སྤྱན་དྲངས་པ་ལས། མིའི་གནས་ན་བཞུགས་པ་རྣམས་རིམ་གྱིས་དར། མི་མ་ཡིན་པའི་གནས་ན་བཞུགས་པ་རྣམས་ཀྱང་དམ་པ་རྣམས་ཀྱིས་ཅི་རིགས་པ་སྤྱན་དྲངས་ནས་མི་ཡུལ་དུ་དར་རོ། །ཁྱད་པར་ཐེག་པ་ཆེན་པོ་ནི་རྒྱལ་པོ་པདྨ་ཆེན་པོ་དང་དུས་མཉམ་པ་ལས་ཅུང་ཟད་ཕྱི་བ་ཙམ་ན། ཡུལ་ཨོ་ཌཱི་བི་ཤར་རྒྱལ་པོ་ཟླ་བ་སྲུང་ཞེས་བྱ་བ་བྱུང་སྟེ། དེའི་ཁྱིམ་དུ་འཕགས་པ་འཇམ་དཔལ་དགེ་སློང་གི་ཚུལ་གྱིས་བྱོན་ནས་ཐེག་པ་ཆེན་པོའི་ཆོས་ཅི་རིགས་པ་བསྟན་ཅིང་གླེགས་བམ་ཞིག་ཀྱང་བཞག་གོ་ཞེས་བྱུང་ལ། དེ་ནི་མདོ་ལུགས་པ་རྣམས་ཤེར་ཕྱིན་བརྒྱད་སྟོང་པ་ཡིན་པར་འདོད་ཅིང༌། སྔགས་པ་རྣམས་ནི་དེ་ཁོ་ན་ཉིད་བསྡུས་པ་ཡིན་ཟེར། གང་ལྟར་ཡང་སྟོན་པ་མྱ་ངན་ལས་འདས་པའི་འོག་ཏུ་ཐེག་ཆེན་མི་ཡུལ་དུ་བྱུང་བའི་ཐོག་མ་ཡིན་ནོ་ཞེས་འབྱུང་སྟེ། འདི་ནི་བཀའ་བསྡུ་གསུམ་པ་མ་བྱས་པའི་གོང་དུ་བྱུང་བར་འདོད་དགོས་པས། ད་ལྟ་མཁས་པ་ཕལ་ལ་གཡམ་རྒྱུགས་ཀྱི་གསུང་སྒྲོས་སུ་བཀའ་ཐམས་ཅད་བསྡུ་བ་གསུམ་པའི་དུས་སུ་གླེགས་བམ་ལ་བཀོད་པ་ཡིན་ནོ་ཞེས་མགྲིན་གཅིག་ཁ་ཏོན་དུ་བྱེད་པ་ལ་གནོད་པར་སྣང་ངོ༌། །གསང་སྔགས་ཀྱི་རྒྱུད་སྡེ་རྣམས་འཕགས་ཡུལ་དུ་བསྟན་པ་གྲ་མ་ཉམས་པའི་དུས་དང༌། ཕྱིས་དར་ནུབ་ཅི་རིགས་བྱུང་ནས་བསྒྱུར་བའི་ཁྱད་པར་གྱིས་གསར་རྙིང་གཉིས་ལ་ལོ་རྒྱུས་ཀྱི་བབ་མི་འདྲ་བ་འབྱུང་སྟེ། རང་ལུགས་གསང་སྔགས་སྔ་འགྱུར་བའི་བཞེད་པ་ཞིབ་མོར་འོག་ཏུ་འཆད་པར་འགྱུར་ལ། གསང་སྔགས་གསར་མའི་གྲགས་ཚོད་ལྟར་ན། ཨོ་རྒྱན་རྒྱལ་པོ་ཨིནྡྲ་བྷུ་ཏི་ལ་རྒྱུད་རྣམས་སྟོན་པས་གཏད་ཀྱང་ཟེར། ཕྱག་ན་རྡོ་རྗེས་གཏད་ཀྱང་ཟེར་ཏེ། གང་ལྟར་ཡང་རྒྱལ་པོས་རྒྱུད་རྣམས་གླེགས་བམ་དུ་བྱས་ཤིང་སྐྱེ་བོ་རྣམས་ལ་བསྟན་པས་ཡུལ་དེའི་སྲོག་ཆགས་ཕྲ་མོ་ཡན་ཆད་ཀྱིས་དངོས་གྲུབ་ཐོབ་སྟེ་འཇའ་ལུས་སུ་སོང༌། དེ་ནས་ཨོ་རྒྱན་གྱི་ཡུལ་སྟོང་པ་མཚོར་གྱུར་ཏེ་ཀླུས་གང་བ་ལ། གསང་བདག་གིས་རྒྱུད་རྣམས་བསྟན་ཅིང་སྨིན་པར་མཛད་པས། དེ་དག་རིམ་གྱིས་མིར་གྱུར་ནས་མཚོ་འགྲམ་དུ་གྲོང་བཅས་ཏེ་ཉམས་སུ་བླངས་པས་གྲུབ་པ་ཐོབ། དེ་རྣམས་ཀྱི་བུ་དང་བུ་མོ་རྣམས་མཁའ་འགྲོ་མར་གྱུར་པས་ཨོ་རྒྱན་མཁའ་འགྲོའི་གླིང་ཞེས་གྲགས། མཚོ་དེ་ཡང་བསྐམས་ཏེ་ཧེ་རུ་ཀའི་ལྷ་ཁང་རང་བྱུང་ཞིག་བྱུང་བས། དེའི་དཀོར་མཛོད་དུ་རྒྱུད་ཀྱི་གླེགས་བམ་རྣམས་བཞུགས་པ་ལས། ཕྱིས་རྒྱལ་པོ་བ་སུ་ཀལྤས་གསང་བ་འདུས་པ། ཀླུ་སྒྲུབ་ཀྱིས་དགྱེས་རྡོར། ཀུ་ཀུ་རི་པས་མ་ཧཱ་མ་ཡ་དང་འཇིགས་བྱེད་སོགས་གྲུབ་ཐོབ་རྣམས་ཀྱིས་རྒྱུད་ཕལ་ཆེ་བ་ཞིག་དེ་ནས་བླངས། དེ་བཞིན་དུ་ཙི་ལུ་པ་སོགས་ཀྱིས་ཤམྦྷ་ལའི་ཡུལ་ནས་དུས་འཁོར་བླངས་པ་སོགས་ཡུལ་གཞན་དག་ནས་ཀྱང་བླངས་ཏེ་དར་རོ་ཞེས་ལོ་རྒྱུས་ཅུང་ཟད་མི་མཐུན་པ་མང་ཞིང༌། དེ་གང་ལྟར་དཔལ་ས་ར་ཧ་སོགས་གྲུབ་ཐོབ་བརྒྱད་ཅུ་རྩ་བཞི། ཡེ་ཤེས་ཞབས་སོགས་རྣམ་གནོན་ཚུལ་གྱིས་བསྔགས་པའི་སློབ་དཔོན་བཅུ་གཉིས། གཞན་ཡང་མཁས་པ་སྒོ་དྲུག དུས་འཁོར་ཞབས་པ་ཆེ་ཆུང་སོགས་གྲུབ་ཐོབ་བརྗོད་ཀྱིས་མི་ལང་བ་བྱོན་ཏེ་གཙོ་བོར་ཐེག་པ་ཆེན་པོ་གསང་སྔགས་ཀྱི་སྒོ་ནས་སྐལ་ལྡན་དཔག་ཏུ་མེད་པ་སྨིན་གྲོལ་ལ་བཀོད་པར་མཛད་དོ། །དེ་ལྟར་འཕགས་ཡུལ་དུ་རྒྱལ་བའི་ལུང་དང་རྟོགས་པའི་བསྟན་པ་རིན་པོ་ཆེའི་སྲོག་ཤིང་དམ་པར་གྱུར་པ་མཐའ་ཀླས་པའི་རྣམ་པར་ཐར་པ་ནི་འདིར་ཡི་གེ་ཉུང་ངུའི་ལམ་དུ་འདྲེན་པར་མ་ནུས་པས། ཡོངས་སུ་གྲགས་པའི་ལོ་རྒྱུས་ལེགས་བཤད་རྣམས་ཀྱི་སྣང་བ་ལ་བརྟེན་ནས་གུས་པ་དང་སྤྲོ་བའི་པདྨོ་མཆོག་ཏུ་རྒྱས་པར་བྱོས་ཤིག སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་ཇི་ལྟར་བྱུང་བའི་ཚུལ་བརྗོད་པ་ལྷ་དབང་གཡུལ་ལས་རྒྱལ་བའི་རྔ་བོ་ཆེའི་སྒྲ་དབྱངས་ཞེས་བྱ་བ་ལས། རྒྱལ་བའི་བསྟན་པ་རིན་པོ་ཆེ་འཇིག་རྟེན་དུ་བྱོན་ཚུལ་སྤྱིར་བཤད་པའི་སྐབས་ཏེ་དང་པོའོ།། །།