ཡན་ལག་བདུན་པ་དང་འབྲེལ་བའི་སྡོམ་གསུམ་བཤགས་སྨོན་བདུད་རྩིའི་ཁྲུས་ཆབ།

༄༅། །ཡན་ལག་བདུན་པ་དང་འབྲེལ་བའི་སྡོམ་གསུམ་བཤགས་སྨོན་བདུད་རྩིའི་ཁྲུས་ཆབ་ཅེས་བྱ་བ་བཞུགས་སོ། །བླ་མ་དང་གཉིས་སུ་མེད་པའི་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ཞིང་སྐྱབས་སུ་མཆིའོ། །བདེ་ཆེན་ཉམས་བརྒྱས་སྒེག་པའི་རོལ་རྩལ་ལས། །རབ་འབྱམས་དཀྱིལ་འཁོར་རྒྱ་མཚོ་སྤྲོ་བསྡུའི་དཔྱིད། །སྐྱབས་ཀུན་འདུས་ཞལ་བླ་མ་རྡོ་རྗེ་སེམས། །མོས་པའི་ཡིད་མཁར་མངོན་སུམ་བཞུགས་པར་གྱུར། །བདག་གཞན་འགྲོ་ཀུན་རྡུལ་སྙེད་ལུས་སྤྲུལ་ནས། །སོར་བཅུའི་པདྨོ་ཚངས་གནས་རྒྱན་བཀོད་དེ། །ཡོན་ཏན་རྗེས་དྲན་སྙན་པའི་བསྟོད་དབྱངས་བཅས། །སྒོ་གསུམ་འཇུག་པ་གཅིག་པས་ཕྱག་བགྱིའོ། །དོན་གཉིས་མཐར་ཕྱིན་རྣམ་འདྲེན་རྫོགས་སངས་རྒྱས། །ཆགས་བྲལ་ངོ་བོ་བདེན་གཉིས་དམ་པའི་ཆོས། །རིག་གྲོལ་གཉིས་ལྡན་ཚོགས་མཆོག་དགེ་འདུན་ཏེ། །སྐྱབས་གནས་དཀོན་མཆོག་གསུམ་ལ་ཕྱག་འཚལ་ལོ། །ཆོས་སྐུ་མཁའ་འདྲ་སྤྲོས་པའི་མཐའ་ལས་འདས། །རང་བཞིན་འོད་གསལ་ལོངས་སྐུ་འགག་པ་མེད། །གདུལ་བྱའི་ཡུལ་ལ་གང་འདུལ་སྤྲུལ་སྐུར་སྟོན། །སྐུ་གསུམ་མཉམ་ཉིད་བླ་མར་ཕྱག་འཚལ་ལོ། །བྱིན་རླབས་སྤྲིན་འཁྲིགས་རྩ་རྒྱུད་བླ་མའི་ཚོགས། །དངོས་གྲུབ་ཆར་འབེབས་ཡི་དམ་ཞི་དང་ཁྲོ། །ཕྲིན་ལས་ཐོགས་མེད་མཁའ་འགྲོ་ཆོས་སྐྱོང་སོགས། །རབ་འབྱམས་རྩ་གསུམ་ལྷ་ལ་ཕྱག་འཚལ་ལོ། །མཁྱེན་པའི་ཡེ་ཤེས་གཏིང་མཐའ་མི་དཔོག་ཅིང་། །བརྩེ་བའི་ཐུགས་རྗེ་གདུལ་བྱའི་དཔལ་དུ་ཤར། །ནུས་མཐུ་ཚད་མེད་འགྲོ་ཀུན་སྐྱོབ་པའི་གཉེན། །སྐྱབས་འོས་ཡོངས་ལ་གུས་པས་ཕྱག་འཚལ་ལོ། །སྣོད་བཅུད་སྲིད་ཞིའི་དཔལ་འབྱོར་ཕུན་ཚོགས་སྤྲིན། །བདག་པོས་བཟུང་དང་མ་བཟུང་ཇི་སྙེད་པ། །བློ་ཡིས་བླངས་དང་ཡིད་ཀྱིས་སྤྲུལ་བྱས་ནས། །སྲིད་པ་ཇི་སྲིད་གནས་བར་མཆོད་པར་བགྱི། །ཁྱད་པར་བདག་ལུས་ཕུང་ཁམས་སྐྱེ་མཆེད་རིགས། །དུས་གསུམ་བྱས་བསགས་རྣམ་དཀར་དགེ་བའི་རྒྱུན། །འཁོར་གསུམ་སྤྲོས་པའི་མཚན་མ་མ་དམིགས་བཞིན། །འོད་གསལ་ཆོས་དབྱིངས་ཆེན་པོར་འབུལ་བར་བགྱི། །བདག་ནི་སྐྱབས་མཆོག་རྣམས་ཀྱི་བྲན་གྱུར་ཕྱིར། །དེང་ནས་དམན་པའི་བྱ་བ་མི་བགྱིད་ཅིང་། །སྲས་བཅས་རྒྱལ་བ་དགྱེས་པའི་བརྟུལ་ཞུགས་ནི། །སྲོག་གི་ཕྱིར་ཡང་མི་འདོར་གཡར་དམ་འཆའ། །བདག་གཞན་ཐོག་མེད་དུས་ནས་ད་ལྟའི་བར། །མི་ཤེས་ཉོན་མོངས་བག་མེད་མ་གུས་པས། །བཅས་དང་རང་བཞིན་ཁ་ན་མ་ཐོ་བའི། །ནོངས་པ་བགྱིས་ཀུན་སྙིང་ནས་བཤགས་པར་བགྱི། །ཕམ་པ་བཞི་དང་ལྷག་མ་བཅུ་གསུམ་གྲངས། །སྤང་ལྟུང་སུམ་ཅུ་ལྟུང་བྱེད་བཅུ་ཕྲག་དགུ། །སོར་བཤགས་བཞི་དང་ཉེས་བྱས་སྡེ་ཚན་རིགས། །སོ་ཐར་སྡོམ་པ་ཉམས་པ་མཐོལ་ལོ་བཤགས། །དཀར་ནག་ཆོས་བཞིར་བླང་དོར་མ་བགྱིས་དང་། །རྩ་ལྟུང་གཅིག་བཞི་བཅོ་བརྒྱད་ཉི་ཤུའི་གྲངས། །ཉེས་བྱས་ཕྲ་བའི་སྡེ་ཚན་ལ་ཞུགས་སོགས། །བྱང་སེམས་བསླབ་པ་ཉམས་པ་མཐོལ་ལོ་བཤགས། །རྩ་བ་སྐུ་གསུང་ཐུགས་ཀྱི་དམ་ཚིག་དང་། །ཡན་ལག་དམ་ཚིག་ཆེན་པོ་ཉི་ཤུ་ལྔ། །སྤྱི་དང་ཁྱད་པར་ལྷག་པས་བསྡུས་པ་ཡི། །གསང་སྔགས་དམ་ཚིག་ཉམས་པ་མཐོལ་ལོ་བཤགས། །ཁྱད་པར་དབང་བཞིའི་ལམ་ཁྱེར་མི་ལྡན་ཞིང་། །བླ་མའི་ཐུགས་འགལ་གསང་བ་གཞན་ལ་སྤེལ། །མཆེད་ལ་འཁུ་དང་མི་རུང་རྟོག་ངན་འགྱུས། །ཉམས་དང་འདྲེས་སོགས་ནོངས་པ་ཅི་མཆིས་བཤགས། །མདོར་ན་རིགས་ཁམས་ཆོས་ཉིད་དག་པའི་གཤིས། །གློ་བུར་འཁྲུལ་པས་བསླད་པའི་སྒྲིབ་པའི་ཚོགས། །སྙིང་ནས་འགྱོད་པས་བཤགས་ཤིང་སྡོམ་བགྱིད་ན། །དག་ཚངས་ཁྲུས་ཀྱི་ཆོ་ག་དེང་འདིར་རྩོལ། །འཕགས་དང་སོ་སོ་སྐྱེ་བོའི་རྣམ་དཀར་རྒྱུན། །དུས་གསུམ་བྱས་དང་བྱེད་འགྱུར་བགྱིད་རྣམས་དང་། སྲས་བཅས་རྒྱལ་བའི་རླབས་ཆེན་མཛད་ཀུན་ལ། །སྙིང་ནས་དགའ་བས་རྗེས་སུ་ཡི་རང་ངོ་། །རྫོགས་སངས་རྒྱས་ནས་རིང་པོར་མ་ལོན་དང་། །དེ་བཞིན་རྒྱལ་སྲས་ཉན་ཐོས་འཕགས་པའི་ཚོགས། །དགེ་བའི་བཤེས་སོགས་གང་ན་སུ་བཞུགས་པ། །དེ་དག་ཀུན་ལ་ཆོས་འཁོར་བསྐོར་བར་བསྐུལ། །གང་དག་མྱ་ངན་འདའ་བར་བཞེད་ཀུན་ལ། །ཉམ་ཐག་འགྲོ་རྣམས་ལྡང་བར་མི་འགོད་པར། །སྲིད་པ་ཇི་སྲིད་གནས་བར་དེ་སྲིད་དུ། །གཟུགས་སྐུ་རྡོ་རྗེ་ལྟ་བུར་བརྟན་བཞུགས་གསོལ། །འདིས་མཚོན་དུས་གསུམ་དགེ་བའི་དངོས་པོ་ཀུན། །སྲས་བཅས་རྒྱལ་བའི་དགོངས་པ་ཇི་བཞིན་དུ། །བླ་མེད་བྱང་ཆུབ་སྙིང་པོར་བསྔོ་བགྱིད་ན། །འགྲོ་ཀུན་ཐེག་མཆོག་སྙིང་པོའི་འབྲས་ཐོབ་ཤོག །བདག་གཞན་འདི་ནས་བྱང་ཆུབ་མ་ཐོབ་བར། །མི་ཁོམ་བརྒྱད་དུ་ནམ་ཡང་མི་སྐྱེ་ཞིང་། །དལ་འབྱོར་ཡོན་ཏན་རྫོགས་པའི་རྟེན་ཐོབ་ནས། །མཐུན་རྐྱེན་འཁོར་ལོ་བཞི་ཡིས་འབྱོར་གྱུར་ཅིག །ཐེག་མཆོག་རིགས་སད་དགེ་བའི་བཤེས་ཀྱིས་ཟིན། །ཚུལ་གནས་ཐོས་བསམ་སྒོམ་པའི་བློ་གྲོས་རྒྱས། །དད་བརྩེ་ཤེས་རབ་ལྷག་པའི་བསམ་པ་སོགས། །བསླབ་གསུམ་ཡོན་ཏན་ཉིན་བཞིན་གོང་འཕེལ་ཤོག །ངེས་པར་འབྱུང་བའི་ཚུལ་ཁྲིམས་རྣམ་པར་དག །གཞན་ཕན་བྱང་ཆུབ་སེམས་ཀྱི་གཏེར་ཁ་འབྱེད། །རིམ་གཉིས་ལམ་གྱི་འབྲས་བུ་མངོན་གྱུར་ནས། །ཚེ་གཅིག་གདོད་མའི་རྒྱལ་སར་དབང་འབྱོར་ཤོག །ཐུབ་གསུང་མཐའ་དག་འགལ་མེད་གཅིག་ཏུ་གོ །གྲུབ་མཐའ་གང་ལའང་ཕྱོགས་ལྷུང་ཆགས་སྡང་བྲལ། །སྒོ་གསུམ་ཅི་བྱེད་གཞན་དོན་འབའ་ཞིག་འགྱུར། །རང་གཞན་དོན་གཉིས་འབད་མེད་ལྷུན་གྲུབ་ཤོག །ཁྱད་པར་ཐེག་མཆོག་སྙིང་པོའི་ལམ་གྱི་སྲོག །བརྒྱུད་གསུམ་བླ་མའི་བྱིན་རླབས་སྙིང་ལ་ཞུགས། །རིག་སྟོང་ཡེ་ཤེས་ཆེན་པོ་ཁོང་ནས་ཤར། །བློས་བྱས་ཡིད་དཔྱོད་འཆིང་བ་རང་གྲོལ་ཤོག །སྣང་གྲགས་རྟོག་ཚོགས་དཀྱིལ་འཁོར་གསུམ་དུ་ཤར། །ཀ་དག་ལྷུན་གྲུབ་ཉམས་ལེན་མཐའ་རུ་ཕྱིན། །འདི་ཕྱི་བར་དོའི་གྲོལ་ཚད་མངོན་དུ་གྱུར། །སྙིང་པོའི་བསྟན་ལ་བྱ་བ་བྱེད་ནུས་ཤོག །ཕན་བདེའི་གཞིར་གྱུར་ཐུབ་བསྟན་ཡུན་དུ་གནས། །དེར་འཛིན་ཞབས་བརྟན་བཞེད་དོན་ལྷུན་གྱིས་གྲུབ། །རྒྱལ་ཁམས་བདེ་སྐྱིད་དགེ་བཅུའི་སྣང་བ་རྒྱས། །ཕན་བདེའི་དཔལ་ལ་སྤྱོད་པའི་བཀྲ་ཤིས་ཤོག །ཅེས་པའང་རྣམ་པར་དཀར་བའི་ཐུགས་སྨོན་ཅན། ར་སྤྲུལ་འཇམ་དབྱངས་བློ་གྲོས་ཆོས་འཕེལ་གྱི་བཞེད་སྐོང་དུ། ཤཱཀྱའི་དགེ་སྦྱོང་འདུ་གསུམ་སྤྱོད་པ་འགྱུར་མེད་པདྨ་རྣམ་རྒྱལ་གྱིས་ས་རྟ་ཟླ་བ་གཉིས་པའི་ཚེས་བཅུ་ལ་བདེ་ཆེན་པདྨ་འོད་གླིང་གི་དབེན་སྤྱིལ། བཀྲ་ཤིས་འཆི་མེད་གྲུབ་པའི་དགའ་ཚལ་དུ་བྲིས་པ་འབྲེལ་བཅས་རྣམ་མཁྱེན་ཀྱི་གོ་འཕང་ཐོབ་པའི་རྒྱུར་གྱུར་ཅིག