ཉམས་ལེན་ལ་སྐུལ་དེད་ཀྱི་མགུར་མ།
༄༅། །ཉམས་ལེན་ལ་སྐུལ་དེད་ཀྱི་མགུར་མ་བཞུགས་སོ། །
༄༅། །ཆོས་སྒྲུབ་བརྒྱུད་ཟེར་བའི་མན་ངག་དེ། །དུས་རྒྱུན་དུ་རང་རྒྱུད་འདུལ་གཟས་ཡིན། །ནང་རང་རྒྱུད་འདི་ཉིད་མ་འདུལ་ན། །ཕྱི་གཞན་དོན་འབྱུང་བ་དཀའ་མོ་ཡིན། །དོན་དེ་བས་རང་རྒྱུད་ཡང་ཡང་བརྟགས། །རྐྱེན་འདོད་ཡོན་ཞིག་གིས་བསྐུལ་བ་ན། །ཕ་བླ་མའི་གདམས་ངག་ཡང་ཡང་དྲན། །མགོན་ཐུབ་པ་
དགྱེས་པའི་ཉམས་ལེན་དེ། །ནང་རང་འདོད་ཀྱི་གཡོ་སྒྱུ་གཞན་ལ་ངོམས། །གྲོགས་གཞན་གྱི་ཡོན་ཏན་དགུང་ལ་ཕྱར། །ཚེ་འདི་ཕྱི་གཉིས་ཀྱི་བདེ་བའི་རྒྱུ། །དོན་བྱང་ཆུབ་སེམས་མཆོག་སྙིང་ལ་བཞག །ནམ་དྲན་མཆོག་རྒྱལ་པོ་རང་གི་བབས། །གཤིས་རྫོགས་པ་ཆེན་པོའི་དགོངས་དོན་བསྐྱངས། །གྲོགས་སུ་དང་
འགྲོགས་ཀྱང་མི་འཁོན་ཞིང་། །གནས་གང་དུ་སོང་ཡང་སྐྱོ་ངལ་མེད། །ལས་ཇི་ལྟར་བྱས་ཀྱང་གཞན་དོན་འབད། །སྔགས་རྡོ་རྗེ་ཐེག་པའི་དམ་ཚིག་ཆེ། །མིག་ཨ་འབྲས་བཞིན་དུ་གཅེས་སྤྲས་གྱིས། །ད་ངོ་ལྐོག་མེད་པ་སྲོག་བཞིན་སྲུང་། །གྲངས་རྣམ་གྲངས་དམ་ཚིག་མང་ན་ཡང་། །མདོ་ཆེན་པོ་གཉིས་ཀྱི་ཁོངས་སུ་འདུས། །རྐྱེན་འཁྲུལ་པ་ཕུག་རྡིབ་ལྟ་བའི་དམ། །བྱམས་སྙིང་རྗེའི་ལས་ཆེན་སྤྱོད་པའི་དམ། དེ་གཉིས་ཀ་འཛོམན་དོན་གཉིས་འབྱུང་། །ལུས་ཐོབ་དཀའི་དལ་འབྱོར་རྙེད་དུས་འདིར། །རྒྱུད་ཉོན་མོངས་དབང་དུ་མ་གཏོང་ལགས། །དྲན་ཤེས་བཞིན་བག་ཡོད་གསུམ་གྱིསནི། །རྟེན་མི་ལུས་འདི་ལ་སྙིང་པོ་ལོངས། །ཆོས་ཕྱག་རྒྱ་ཆེན་པོའི་ཉམས་ལེན་སྐྱོངས། །ནམ་འཆི་བ་མི་རྟག་ཡང་ཡང་དྲན། །ལས་རྒྱུ་འབྲས་ཡུང་གཞི་བཞིན་དུ་ཞིབ། །གནས་རིགས་དྲུག་
ཆོས་ལ་སྐྱོ་བ་སྐྱེད། །སྡུག་འཁོར་བའི་མཚོ་ཆེན་སྐམ་ལ་ཐོངས། །སྐྱབས་བསླུ་བ་མེད་པའི་མཆོག་གསུམ་ལ། །བློ་ཡིད་གཉིས་མེད་པར་གསོལ་བ་འདེབས། །མ་འཁོར་བར་འཁྱམས་པའི་སེམས་ཅན་ལ། །བྱམས་སྙིང་རྗེའི་མདའ་ཡིས་ཡང་ཡང་བསྣན། །གྲོགས་ཚོགས་བསགས་ཕན་བདེའི་ལག་ལེན་བཏབ། །བགེགས་ཆོས་བརྒྱད་དགྲ་ཆེན་ནམ་བྱུང་ཚེ། །དཔལ་རྡོ་རྗེ་སེམས་དཔའི་སྐུ་རུ་བཞེངས། །བྱིན་བླ་མའི་མཛད་སྤྱོད་གང་ལ་ཡང་། །ད་ཐེ་ཚོམ་བྲལ་བའི་གདེང་ཆེན་གྱིས། །བློ་བཅོས་མིན་མོས་གུས་ཤུགས་ལ་སྦར། །ལས་ཅི་བྱས་ཞབས་ཏོག་དུ་བསམ་ནས། །ཕ་བླ་མའི་རང་རིག་ངོ་བོ་སྐྱོངས། །དོན་དེ་ཚོ་ཐུགས་ལ་རྟག་འཆང་ན། །མི་སྐྱ་སེར་མེད་པ་ལམ་དེས་སྒྲོལ། །རྟེན་ཕོ་མོ་མེད་པ་ལམ་དེས་སྒྲོལ། །ལམ་དེ་ཡིས་མ་གྲོལ་གཅིག་ཀྱང་
མེད། །བུ་ང་ཡི་ཉམས་ལེན་དེ་འདྲ་ཡིན། །རྗེ་བླ་མས་གནང་བ་དེ་ཡིན་ཅིང་། །ཆོས་མདོ་རྒྱུད་ཀུན་གྱི་ཡང་སྙིང་དེ། །ཚིག་གནད་འགགས་དེ་ལས་གཞན་མེད་པས། །སྐྱེ་ཚེ་རབས་ཀུན་ཏུ་དེ་དོན་བཞིན། །དུས་རྒྱུན་ཆད་མེད་པ་དེ་ཡི་དོན། །བུ་ང་ཡི་སྙིང་ལ་འཆང་ནས་ཡོད། །གྲོགས་ཁྱེད་ཅག་རྣམས་ཀྱང་དེ་དོན་བཞིན། །སྙིང་རུས་པའི་གཏིང་ནས་ཉམས་ལེན་མཛོད། །ཅེས་སོ།། ༈ ཀྱེ་མ། གསོན་ཅིག་སྐལ་ལྡན་བུ་མཆོག་གི་ཁྱུ་ཚོགས། །ཉམ་ཆུང་རི་དྭགས་ཚོགས་རྣམས་རྩྭ་ཆུ་ལ་འགྲིམ་ཚེ། །ལས་ངན་ཤན་པའི་འཕྲུལ་མདའ་ལོང་ལོང་དུ་ངོམ་འདི། །སྙིགས་ལྔའི་རང་གཟུགས་མིན་ན་ཅི་ཞིག་ནི་ཡིན་ཨང་། །དེ་འདྲ་སྐྱབས་མེད་ཉམ་ངའི་དོ་རར་ནི་ཆུད་དུས། །བག་ཡང་བརྩེ་བས་སྐྱོང་བའི་དྲིན་ཅན་གྱི་བླ་མ། །ཡིད་ལ་ལམ་ལམ་དྲན་ནས་བཟོད་ཐབས་སུ་མི་
འདུག །སྐབས་རེར་སེམས་པ་སྟེར་བའི་ན་ཆུང་གི་ཚོགས་རྣམས། །གར་སོང་ཆ་མེད་ལམ་དུ་སྔར་གནས་ནི་བུད་སོང་། །སྐད་ཅིག་སེམས་པ་གཏད་པའི་སྤྲོ་སྙིང་ཞིག་མི་འདོད། །ལས་དབང་ཁྲིམས་ར་བཙན་པའི་ཁྲི་མུན་གྱི་འོག་ཁང་། །གཅེར་བུ་གཞོན་ཤ་ཅན་ལ་སྤུ་གྲི་ཡིས་རེག་ཚེ། །འདུས་བྱས་ཡིད་གཏད་མེད་པའི་གྲོགས་རྣམས་ནི་གར་སོང་། །དེ་བས་ད་ལྟ་རང་ལག་ཡོད་པ་ཡི་དུས་འདིར། །རྟག་ཏུ་ཡུན་རིང་འགྲོགས་ཀྱང་མཐོང་མ་ཡི་མྱོང་བ། །སེམས་ཉིད་སྟོང་གསུམ་ཟོང་གིས་ཁུག་མིན་གྱི་ནོར་བུ། །ཟབ་གཏེར་ལག་ཏུ་ལོན་དུས་གཡས་ཆུང་དུ་མ་བོར། །བསྐལ་པ་ཁྲི་ཕྲག་འབད་ཀྱང་ཁུག་རྒྱུ་ནི་མེད་པ། །ཕ་མཆོག་བླ་མས་གཏད་པའི་རྩོལ་མེད་ཀྱི་གཤིས་ལུགས། །སྐྱོ་ན་སྐྱོ་གྲོགས་དེ་ཡིས་ཅིས་ཕྱིརནི་མི་བྱེད། །སྡུག་ན་སྡུག་གྲོགས་བདེ་ན་བདེ་བ་
ཡི་གྲོགས་པོ། །ནམ་དགོས་རང་གི་དྲུང་ན་ཟདམེད་དུ་ཡོད་པ། །དམ་པའི་ལྷ་ཆོས་ཤིག་ལ་ཅིས་ཕྱིར་ནི་མི་རེམ། །ལྷ་ཆོས་ཡིད་བཞིན་ནོར་བུའི་ཡང་སྙིང་གི་རྩ་བ། །རང་འདོད་འཁྲི་བ་ཆོད་པའི་གསེང་ལམ་གྱི་གསེབ་ནས། །གཞན་ཕན་སྙིང་རྗེའི་གཤོག་ཡང་དཀར་པོ་དེ་ལོས་བརྐྱང་། །ཉམ་ངའི་རླུང་གིས་དྲངས་པས་ཅུང་ཟད་རེ་ཉེན་ཚེ། །ཐབས་ཤེས་འཕྲུལ་གྱི་གཤོག་རྩལ་ཅིས་ཕྱིར་དུ་ལྷོད་འཇུག །ཟད་མེད་རྣམ་གཡེང་འཕྲུལ་འཁོར་སྔོན་ཆད་ལ་བསྐོརན། །དནི་སྙིང་པོ་ཡོད་པའི་བྱ་བ་ཞིག་སྒྲུབ་རན། །གྲགས་སྐམ་སྟོང་འུར་ཙམ་གྱི་རྗེས་སུ་ནི་འབྲང་ངམ། །ཉི་ཚེའི་བྱ་བ་སྒྲུབ་ལ་སེམས་པ་ནི་མ་ཕྱོགས། །དོན་མེད་ཚེ་འདིའི་བྱ་བཞག་ཆུ་ནང་གི་ལྷུ་བ། །དོན་ཆུང་རང་འདོད་སྒྲུབ་འདི་ཆུ་ཤིང་གི་སྡོང་པོ། །དོན་ཆེན་བསྟན་པ་འཛིན་ལ་ཅིས་ཕྱིར་དུ་མི་སྤྲོ། །བསྟན་པའི་སྙིང་པོ་རྩོལ་མེད་
འོད་གསལ་གྱི་ཐེག་མཆོག །ས་དགེ་ཀར་རྙིང་གདམས་ཟབ་བདུད་རྩི་ཡི་ཐེག་པ། །ཉིན་མཚན་བར་མེད་འཐུང་ལ་ངོམ་པ་རང་ཅི་ཡོད། །རྩོལ་བཅས་ཐེག་པའི་ལམ་དེ་དཀའ་ཚེགས་ཀྱི་སྣོན་མ། །བྱིས་པའི་རྩེད་མོ་འདྲ་བ་འདི་ལ་ནི་མ་ཞེན། །འོན་ཀྱང་ཀུན་རྫོབ་བརྡ་ཡི་བསྟན་པ་ནི་འདི་ལ། །སྣང་སེམས་སྤུ་ཙམ་མི་རུང་སྔོན་སྲོལ་གྱི་ལམ་བཞིན། །རྒྱུ་འབྲས་ཡང་དག་མཆོག་གི་ཤན་འབྱེད་ཀྱི་ཐབས་འདིས། །གདུལ་བྱ་འདུན་པའི་དྲང་ངེས་སོ་སོ་རུ་ཕྱེས་མཛོད། །དེ་སྐད་ཡིད་ལ་ཤར་བ་གང་དྲན་གྱི་གཏམ་འདི། །མ་བཅོས་གཉུག་མར་ཀློད་པའི་གང་ཤར་གྱི་ངོར་ལ། །དྲན་ཚད་ཐོལ་བྱུང་སོང་བའི་སྙིང་གཏམ་གྱི་ཚིག་གསུམ་།ཆོསཀྱི་མཆེད་པོ་རྣམསཀྱི་སྙན་ལམ་དུ་འབུལ་ལོ། །སྤྲང་བན་བདག་གི་བསམ་པ་སྙིང་རྗེ་ལ་ཤོར་སོང་། །གཞན་ཕན་ལག་
ལེན་བཏབ་ལ་ནམ་ཡང་ནི་དམ་བཅའ། །མ་དང་མཁའ་འགྲོ་དགྱེས་པའི་དགེ་མཚན་གྱི་དྲི་ཡིས། །སྙིགས་ལྔའི་མི་གཙང་དྲི་དེ་སྐད་ཅིག་ལ་ལོས་སེལ། །ཧ་ཧ། འདི་ཡི་ཞལ་གདམས་རྣམས་ས་ཁྱི་ཕག་ལོ་འཁྲུག་པའི་དུས་ནས་བཟུང་རྒྱུན་དུ་ཉམས་ལེན་སྐོར་ཡིན།།