རྒྱུད་ལུང་གསལ་བའི་མེ་ལོང་།
རྒྱ་གར་སྐད་དུ༔ ཏན་ཏྲ་བྷེ་ལ་ཀྲ༔ བོད་སྐད་དུ༔ རྒྱུད་ལུང་གསལ་བའི་མེ་ལོང༔ སྟོང་པ་མངོན་བྱུང་ཉིད་ལ་ཕྱག་འཚལ་ལོ༔ རོལ་པ་ཆེན་པོའི་ལྟ་སྟངས་ཀྱིས༔ གཅིག་པར་སྣང་བའི་ཡེ་ཤེས་ཐོབ༔ སྒྲ་དོན་ཤེས་པའི་རྣལ་འབྱོར་གྱིས༔ འབྱུང་བ་རྣམས་ལ་ཅི་དགར་རོལ༔ འཁྲུལ་པ་འཆོས་པའི་རྣལ་འབྱོར་གྱིས༔ ངོ་བོ་ཐམས་ཅད་རྣལ་དུ་འབེབས༔ ལྟ་སྒོམ་མཐོང་བའི་རྣལ་འབྱོར་གྱིས༔ ཡེ་ཤེས་ཉིད་ལ་ཅི་བདེར་སྤྱོད༔ དེ་རྒྱུད་འགྲོལ་བའི་རྣལ་འབྱོར་(༣༡)གྱིས༔ ཉོན་མོངས་འཆིང་བའི་མདུད་པ་འགྲོལ༔ དབྱིངས་རིག་ཤེས་པའི་རྣལ་འབྱོར་གྱིས༔ སངས་རྒྱས་རྣམས་དང་རྒྱུན་དུ་གནས༔ བཞག་ཐབས་ཤེས་པའི་རྣལ་འབྱོར་གྱིས༔ རིག་པ་ཉིད་ནི་བཙོན་དུ་ཟིན༔ བཀོལ་དོན་ཤེས་པའི་རྣལ་འབྱོར་གྱིས༔ ཆོས་ཅན་དུམ་བུ་རྩེ་རུ་གྲོལ༔ གོལ་སྒྲིབ་ཤེས་པའི་རྣལ་འབྱོར་གྱིས༔ རང་གི་དེ་ཉིད་ཡིད་ཆེས་སྐྱེས༔ རྣལ་འབྱོར་ཤེས་པའི་རྣལ་འབྱོར་གྱིས༔ ལྟ་སྤྱོད་དོན་རྣམས་བདག་པོར་འགྱུར༔ གལ་མདོ་ཤེས་པའི་རྣལ་འབྱོར་གྱིས༔ རྒྱུད་ཚིག་རྣམས་ལ་ཅི་དགར་རོལ༔ དབྱིངས་དོན་ཤེས་པའི་རྣལ་འབྱོར་གྱིས༔ ཆོས་ཀྱི་དབྱིངས་རྣམས་དབང་དུ་འདུས༔ སྐྱེ་མཚམས་ཤེས་པའི་རྣལ་འབྱོར་གྱིས༔ སྐྱེ་གཉིས་བར་ལ་ཅི་བདེར་སྤྱོད༔ རང་སྣང་ཤེས་པའི་རྣལ་འབྱོར་གྱིས༔ ཡེ་ཤེས་རྟགས་ལ་ཐུགས་ཕྲད་གྲོལ༔ སྔ་ཕྱིར་ཤེས་པའི་རྣལ་འབྱོར་གྱིས༔ གོམས་ཤུགས་བྱིན་རླབས་མངོན་དུ་འབྱིན༔ དཔེ་འབྱེད་ཤེས་པའི་རྣལ་འབྱོར་པས༔ ཡིད་ཆེས་འབྲས་བུ་གཏན་ལ་འབེབས༔ ཡོན་ཏན་ཤེས་པའི་རྣལ་འབྱོར་པས༔ མ་བཙལ་བཞག་པའི་དོན་རྣམས་ཤེས༔ གྲོལ་སྨིན་ཤེས་པའི་རྣལ་འབྱོར་གྱིས༔ སྤྱི་ཡི་དོན་རྣམས་རང་དབང་བསྒྱུར༔ དམོད་སྔགས་ཤེས་པའི་རྣལ་འབྱོར་གྱིས༔ གདུག་པ་རྣམས་ནི་ཚར་གཅོད་འགྱུར༔ ངེས་པའི་སྙིང་པོ་ཡོངས་བསྡུས་པའི༔ རྩ་བ་བརྒྱད་ལས་རྣམ་འཕྲོས་པ༔ ཡན་ལག་གྲངས་ནི་དེ་སྙེད་དོ༔ ཕ་དང་མ་དང་མ་ནིང་ལས༔ ཁྱད་པར་འདི་ནི་ངེས་བསྡུས་སོ༔ ངེས་གསང་སྙིང་པོའི་དོན་དུ་འོ༔ ཉོན་མོངས་བག་ཆགས་བྲལ་བར་ནི༔ འདི་དག་རྣམས་དང་འཕྲད་ན་འགྱུར༔ ཞེས་བཀོད་པ་ཆེན་པོ་ལས་རྒྱུད་ལུང་གསལ་བའི་མེ་ལོང་ཞེས་བྱ་བ་རྫོགས་སོ༔ ལས་ཅན་ཅིག་དང་འཕྲད་པར་ཤོག༔
རྒྱ་གར་སྐད་དུ༔ བྷ་ཀ་ལ་དེ་ཝ༔ བོད་སྐད་དུ༔ ལྷ་སྒོམ་པ༔ བདེ་བ་ཆེན་པོ་ཉིད་ལ་ཕྱག་འཚལ་ལོ༔ ཨེ་ཝཾ་མ་ཡ་ཞེས་བྱ་བ༔ མཚོན་དང་གཞི་དང་དངོས་པོར་བརྗོད༔ ཁྱབ་ཕྱིར་རྟོགས་(༣༢)དང་ལམ་དུ་འོ༔ ཕྱག་རྒྱའི་དཀྱིལ་འཁོར་བསྒོམ་འདོད་པས༔ ཐོག་མར་ལུས་སོགས་དངོས་པོ་ནི༔ རྣམ་པར་སྦྱང་བར་བྱ་བའི་ཕྱིར༔ སྔོན་འགྲོ་དངོས་གཞི་མཇུག་དང་རྗེས༔ ཆོ་ག་རྣམ་པ་བཞི་ལྡན་པས༔ ལྷ་ཡི་དཀྱིལ་འཁོར་ཉིད་ལ་འཇུག༔ སྔོན་དུ་རང་གི་ལུས་སྦྱོང་བ༔ ཡི་གེ་རཾ་གྱིས་འཇིག་ཆགས་ནས༔ སྤྲོ་དང་བསྡུ་བ་མཁས་པས་བརྟག༔ ཕུང་པོ་ལྔ་ཡི་རྒྱུད་སྦྱོང་པ༔ ཨ་དང་ཨཱཿདང་ཧཱུཾ་སྭཱ་ཧཱ༔ འཇིག་དང་ཆགས་པ་ཉིད་དུ་བསྒོམ༔ དེ་ནས་དབང་པོའི་རྟེན་སྦྱོང་བ༔ ཛི་བྲུཾ་ཛྷ་ཛུ་བྷ་ཡིས་ནི༔ འཇིག་དང་ཆགས་པ་མཁས་པས་བསྒོམ༔ འབྱུང་བའི་ལུས་རྟེན་དབྲལ་བའི་ཕྱིར༔ རཾ་ཡཾ་ཁཾ་དང་ལཾ་གྱིས་ནི༔ འཇིག་དང་ཆགས་པ་ཉིད་ཀྱང་བསྒོམ༔ དབང་པོའི་ཡུལ་རྣམས་རྣམ་སྦྱོང་བ༔ ས་མ་ཏ་ཀེ་ར་ཡིས་ནི༔ འཇིག་དང་ཆགས་པ་སྔོན་བཞིན་ནོ༔ ཉོན་མོངས་ལྔ་ཡི་གཞི་སྦྱོང་བ༔ ཀ་གྷ་བྷ་ཛྷ་ཀྵ་ཡིག་གིས༔ ཡང་ནི་འཇིག་དང་ཆགས་པར་རོལ༔ སེམས་ཀྱི་རྟོག་པ་རྣམ་སྦྱོང་བ༔ ཨེ་ཞེས་རྔམ་པའི་སྒྲ་ཡིས་ནི༔ ཡོད་དང་མེད་པའི་དངོས་པོ་སྦྱོང༔ དེ་ལྟར་དངོས་པོ་ཉི་ཤུ་དྲུག༔ ཡི་གེ་དེ་ཡི་གྲངས་ཀྱིས་སྦྱོང༔ དེ་ཀུན་རྣམ་གྲངས་རྒྱས་གདབ་པ༔ ཤུ་དང་ཛྙ་དང་ཏ་ཛྙ་དང༔ ཧཾ་ཞེས་ཡོད་མེད་དངོས་པོ་རྣམས༔ འཇིག་པ་ཉིད་དེ་ཆགས་པ་མེད༔ གལ་ཏེ་དངོས་པོ་མ་སྦྱངས་ན༔ སྟོང་པ་ཉིད་ནི་སྐྱེ་མི་འགྱུར༔ འོན་ཏེ་སྟོང་རྒྱས་མ་བཏབ་ན༔ ལྷ་རྣམས་ཇི་ལྟར་བསྒོམས་བྱས་ཀྱང༔ དངོས་གྲུབ་འབྱུང་བ་མ་ཡིན་ནོ༔ དེས་ན་སྔོན་འགྲོའི་མན་ངག་གཅེས༔ རཾཨབཱམརྒྒབུཀཏཥ།ཅཱགུ༔ ནཾ་ཏྲཾ་ཨ་ཨཱ༔ ཧཱུཾ་སྭཱ་ཧཱ་ཛི་བྲུཾ་ཛྙཱ་ཛུ་བྷེ་རཾ་ཡཾ་ཁཾ་ལཾ་ས་མ་ཏ་ཀེ་ར་ཀ་གྷ་བྷ་ཛྷ་ཀྵ་ཨེ་ཤུ་ཛྙ་ཏ་ཛྙ་ན་ཧཾ༔
དེ་ལྟར་དངོས་པོ་སྦྱངས་ནས་ནི༔ རང་ལུས་ལྷ་ཡི་རྣལ་འབྱོར་འཇུག༔ ཅིག་དང་རིམ་གྱིས་ཐར་ཆགས་དང༔ ཐོད་རྒལ་དག་གིས་སྐྱེ་བར་འདོད༔ ཅིག་ཅར་འོད་ཀྱི་གོང་བུ་ལས༔ ཆུ་ཡི་ཟླ་བ་ཇི་བཞིན་དུ༔ སྣང་གཟུགས་རེག་དང་བྲལ་བར་བསྒོམ༔ རིམ་གྱིས་པ་ནི་ཡི་གེ་སྟེ༔ མི་འགྱུར་ཡི་གེ་དབུས་གནས་པར༔ སེམས་ཀྱི་དངོས་པོ་འོད་དཀར་པོ༔ སྣང་(༣༣)མེད་རེག་པའི་གཟུགས་སུ་སྟེ༔ རེག་སྟེ་སྡུད་པའི་ཡི་གེ་ཡིས༔ བསྡུས་ཏེ་འོད་ཀྱི་གོང་བུར་རོ༔ དེ་དཀྱིལ་སེམས་ཀྱི་ནམ་མཁའི་ཡིག༔ དེ་དབུས་མི་འགྱུར་ཡི་གེ་ལས༔ རིགས་ལྔའི་ཡི་གེ་དག་ལས་ནི༔ གང་མོས་ཞལ་ཕྱག་རྣམ་པར་བསྒོམ༔ ཡི་གེ་གཞན་གྱི་ཆོ་འཕྲུལ་གྱིས༔ ལྷ་རྣམས་བསྐྱེད་ན་འཇིག་པར་འགྱུར༔ དེ་ཕྱིར་འདི་ལྟར་ཤེས་པར་བསྒོམ༔ ཐར་ཆགས་ཉིད་ནི་བསླབ་བྱའི་དོན༔ དང་པོ་སྟོང་པ་ཉིད་དུ་སྟེ༔ གཉིས་པ་ཚངས་པའི་གནས་བཞི་འོ༔ གསུམ་པས་མཆོད་དང་བསྟོད་པ་བརྩམ༔ བཞི་པས་སྡིག་བཤགས་གསོལ་བ་འདེབས༔ རྗེས་སུ་ཡི་རང་སྨོན་ལམ་གདབ༔ ལྔ་པ་དངོས་པོ་རྩ་དྲུག་སྦྱོང༔ དྲུག་པ་ཞལ་ཕྱག་རྣམ་པ་སྟེ༔ རང་སེམས་མི་འགྱུར་ཡིག་དབུས་སུ༔ འོད་ལྔའི་རང་བཞིན་དབུས་གནས་པར༔ ཁྲོ་བོ་ལ་ནི་ནམ་མཁའི་ཡིག༔ ཞི་བ་རྣམས་ནི་སྡུད་བྱེད་ཡིག༔ ཞལ་ཕྱག་ཇི་ལྟར་འདོད་པ་བསྒོམ༔ ཐོད་རྒལ་འོད་ལྔའི་གོང་བུ་ལས༔ རང་ལྷའི་ཁ་དོག་ཇི་ལྟ་བུའི༔ འོད་ནི་ཐིག་ལེའི་ཚུལ་ཅན་ལས༔ སྐད་ཅིག་གིས་ནི་ཞལ་ཕྱག་ཏུ༔ ཇི་ལྟར་འདོད་པ་སེམས་ཀྱི་ཡུས༔ རྣལ་འབྱོར་པས་ནི་གང་བསྒོམས་པ༔ མི་ཤིགས་རྡོ་རྗེའི་གོ་དང་ལྡན༔ སྐྱེ་གཉིས་མཚམས་སུ་སྒྱུ་མའི་ཡུས༔ ཇི་ལྟར་ལྷ་ཡི་སྐུ་ལ་འཇུག༔ འདི་ནི་དངོས་པོ་མེད་སྣང་བའོ༔ ཉི་ཤུ་དྲུག་ནི་མ་སྦྱངས་ན༔ གང་གིས་ལྷ་ཡི་སྐུ་བསྒོམས་ཀྱང༔ ཆུ་ཡི་རི་མོ་ཇི་བཞིན་དུ༔ འཇིག་ཅིང་ཆགས་པ་མ་ཡིན་ནོ༔
དེ་ལྟར་ཞལ་ཕྱག་རྣམ་པ་ལས༔ སྟོང་པ་ཉིད་དུ་མ་ཡིན་ཏེ༔ རང་རང་ཁ་དོག་ཇི་འདྲའི་འོད༔ སེམས་ཀྱི་ཡུལ་དུ་གང་གྱུར་པ༔ རྒྱ་ཆེ་གཞན་སྣང་མེད་པར་བསྒོམ༔ དེ་བློ་བརྟན་པར་མ་གྱུར་པར༔ ཡང་ནས་ཡང་དུ་རྣམ་བསྒོམས་ན༔ རང་གིས་གང་འདོད་ཡི་དམ་དེ༔ འོད་ཀྱི་ཞལ་ཕྱག་རྣམ་པར་ནི༔ ཇི་ལྟར་འདོད་པ་བཞིན་དུ་མཐོང༔ དེ་ཉིད་མཐོང་བའི་དུས་དག་ཏུ༔ ཁ་དོག་ལྔ་ཡིས་རྒྱས་བཏབ་པས༔ ཇི་ལྟར་འདུག་ཀྱང་དེ་མི་འབྲལ༔ རང་ལུས་འོད་ལྔའི་ཐིག་ལེ་ལ༔ ཤེས་པ་ཇེ་ཕྲ་ཇེ་ཕྲར་(༣༤)བཞག༔ དེ་ཉིད་གོམས་པའི་རྣལ་འབྱོར་གྱིས༔ རྟག་ཏུ་རང་ལུས་ཕྱག་རྒྱར་མཐོང༔ འཇུག་ལ་དེ་ལྟར་སུ་གོམས་པ༔ འདི་ནི་ཡང་དག་དོན་ལ་ཉེ༔
དེ་རྗེས་གོམས་པའི་ཡོ་གི་ནི༔ རྫོགས་ཆེན་ལྷ་ཡི་བསྐྱེད་རིམ་པས༔ ཕྱི་ནང་ལྷ་རུ་གསལ་བའི་ཕྱིར༔ གཞན་བྱུང་བཟང་ངན་བླང་དོར་བྲལ༔ རང་ལུས་ཞལ་ཕྱག་རྣམ་གསལ་བས༔ མཆོད་དང་བསྟོད་པའི་གནས་གཞན་མེད༔ འོད་ཀྱིས་ཕྱི་ཡུལ་སྣང་གོམས་པས༔ ཇི་ལྟར་སྤྱད་ཀྱང་དགེ་སྡིག་བྲལ༔ ཐིག་ལེ་ཕྲ་ལ་ཤེས་པ་གཏད༔ ཤེས་པའི་རྒྱུ་ནི་ཕྲ་གྱུར་པས༔ ཉོན་མོངས་བདག་འཛིན་དངོས་པོ་སྟོངས༔ དེ་ལ་གོམས་ཏེ་ཚད་ཕྱིན་པས༔ ལྟ་དང་སྒོམ་དང་སྤྱོད་པའོ༔ ལུས་ངག་སྨྱོན་པ་གདེང་ཐོབ་པས༔ བདེ་སྡུག་རྒྱུ་ལས་རྣམ་པར་གྲོལ༔ རེག་པའི་གཟུགས་མེད་རང་སྣང་བས༔ དགེ་སྡིག་སྐྱབས་དང་འཇིགས་པ་མེད༔ འདི་ལྟར་རྒྱུན་དུ་སུས་ཤེས་པ༔ ཨ་ཏི་ཉིད་ཀྱི་རྣལ་འབྱོར་ཏེ༔ ཆུ་རྒྱུན་བཞིན་དུ་རྟག་ཏུ་སྤྱོད༔ དེ་ཕྱིར་ལྷ་ཡང་རང་ངོ་བས༔ རིག་པའི་སྐུ་ནི་མངོན་སུམ་མོ༔ དེ་ཕྱིར་ལྷ་ཡང་མངོན་དུ་སྣང༔ རྗེས་སུ་སྐྱེས་ན་བརྟན་པ་ཡིན༔ དངོས་པོ་མཐོང་ན་གོམས་པ་ཡིན༔ རང་བཞིན་མེད་ན་འབྲས་བུ་འོ༔ བཀོད་པ་ཆེན་པོ་ལས་ལྷའི་སྒོམ་ལུགས་གནད་ཀྱི་མན་ངག་གིས་ལྷ་མངོན་དུ་སྣང་བར་བསྟན་པ་སྟེ་བཞི་པ་རྫོགས་སོ༔ སཱ་མཱ་ཡཱ༔ ལས་ཅན་དེ་དང་འཕྲད་པར་ཤོག༔